Великая Суббота

Повече́рїе же пое́мъ въ ке́ллїахъ,

на не́мже пое́мъ канѡ́нъ ѡ҆ распѧ́тїи гдⷭ҇ни и҆ на пла́чь прест҃ы́ѧ бцⷣы. і҆рмо́съ по два́жды, тропарѝ на д҃: послѣди́ же і҆рмо́съ ѻ҆́ба ли̑ка вкꙋ́пѣ. Творе́нїе сѷмеѡ́на логоѳе́та. Гла́съ ѕ҃:

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.

Запѣ́въ: Сла́ва тебѣ̀, бж҃е на́шъ, сла́ва тебѣ̀.

Повѣ́шена на крⷭ҇тѣ̀ сн҃а и҆ гдⷭ҇а є҆гда̀ ви́дѣ дв҃а чтⷭ҇аѧ, терза́ющисѧ вопїѧ́ше го́рцѣ, со дрꙋги́ми жена́ми стенѧ́щи глаго́лаше.

Ви́жꙋ тѧ̀ ны́нѣ, возлю́бленное моѐ ча́до и҆ люби́мое, на крⷭ҇тѣ̀ ви́сѧща, и҆ ᲂу҆ѧзвлѧ́юсѧ го́рцѣ се́рдцемъ, речѐ чтⷭ҇аѧ: но да́ждь сло́во, бл҃же, рабѣ̀ твое́й.

Сла́ва: Во́лею, сн҃е мо́й и҆ тво́рче, терпи́ши на дре́вѣ лю́тꙋю сме́рть: дв҃а глаго́лаше, предстоѧ́щи ᲂу҆ крⷭ҇та̀ со возлю́бленнымъ ᲂу҆ч҃нко́мъ.

И҆ ны́нѣ: Ны́нѣ моегѡ̀ ча́ѧнїѧ, ра́дости и҆ весе́лїѧ, сн҃а моегѡ̀ и҆ гдⷭ҇а лише́на бы́хъ: ᲂу҆вы̀ мнѣ̀, болѣ́знꙋю се́рдцемъ! чтⷭ҇аѧ пла́чꙋщи глаго́лаше.

Пѣ́снь г҃.

І҆рмо́съ: Нѣ́сть ст҃ъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Стра́ха ра́ди і҆ꙋде́йска пе́тръ скры́сѧ, и҆ всѝ вѣ́рнїи ѿбѣго́ша, ѡ҆ста́вльше хрⷭ҇та̀: дв҃а рыда́ющи глаго́лаше.

Ѡ҆ стра́шнѣмъ твое́мъ ржⷭ҇твѣ̀ и҆ стра́ннѣмъ, сн҃е мо́й, па́че всѣ́хъ ма́терей возвели́чена бы́хъ а҆́зъ: но ᲂу҆вы̀ мнѣ̀, ны́нѣ тѧ̀ ви́дѧщи на дре́вѣ, распала́юсѧ ᲂу҆тро́бою.

Сла́ва: Хощꙋ̀ ᲂу҆тро́бꙋ мою̀ съ дре́ва прїѧ́ти на рꙋкꙋ̀, и҆́маже ꙗ҆́кѡ младе́нца держа́хъ, вѣща́ше чтⷭ҇аѧ: но никто́же, ᲂу҆вы̀ мнѣ̀, сего̀ дадѐ.

И҆ ны́нѣ: Сѐ свѣ́тъ мо́й сла́дкїй, наде́жда и҆ жи́знь моѧ̀ бл҃га́ѧ, бг҃ъ мо́й ᲂу҆гасѐ на крⷭ҇тѣ̀, распала́юсѧ ᲂу҆тро́бою: дв҃а стенѧ́щи глаго́лаше.

Пѣ́снь д҃.

І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чтⷭ҇на́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Со́лнце незаходи́мое, бж҃е превѣ́чный и҆ тво́рче всѣ́хъ тва́рей, гдⷭ҇и, ка́кѡ терпи́ши стрⷭ҇ть на крⷭ҇тѣ̀; чтⷭ҇аѧ пла́чꙋщи глаго́лаше.

Пла́чꙋщи неискꙋсобра́чнаѧ глаго́лаше къ бл҃гоѡбра́зномꙋ: потщи́сѧ, і҆ѡ́сифе къ пїла́тꙋ пристꙋпи́ти, и҆ и҆спросѝ снѧ́ти со дре́ва ᲂу҆чи́телѧ твоего̀.

Сла́ва: Ви́дѣвъ пречⷭ҇тꙋю го́рцѣ слезѧ́щꙋ, і҆ѡ́сифъ смꙋти́сѧ, и҆ пла́чѧ пристꙋпѝ къ пїла́тꙋ вопїѧ̀ съ пла́чемъ: да́ждь мѝ тѣ́ло бг҃а моегѡ̀.

И҆ ны́нѣ: Оу҆ѧ́звена тѧ̀ ви́дѧщи и҆ без̾ сла́вы, на́га на дре́вѣ, ча́до моѐ, ᲂу҆тро́бою распала́юсѧ: рыда́ющи ꙗ҆́кѡ мт҃и, дв҃а провѣщава́ше.

Пѣ́снь є҃.

І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Растерза́ѧсѧ и҆ рыда́ѧ и҆ дивѧ́сѧ, вкꙋ́пѣ съ нїкоди́момъ снѧ́тъ і҆ѡ́сифъ пречⷭ҇тое тѣ́ло, и҆ цѣлова́въ рыда́ше, и҆ стенѧ́ше, и҆ воспѣва́ше є҆го̀ ꙗ҆́кѡ бг҃а.

Прїи́мши є҆го̀ съ пла́чемъ, мт҃и неискꙋсомꙋ́жнаѧ положѝ на колѣ̑нꙋ, молѧ́щи є҆го̀ со слеза́ми и҆ ѡ҆блобыза́ющи, го́рцѣ же рыда́ющи и҆ восклица́ющи.

Сла́ва: Є҆ди́нꙋ наде́ждꙋ и҆ жи́знь, влⷣко сн҃е мо́й и҆ бж҃е, во ѻ҆́чїю свѣ́тъ раба̀ твоѧ̀ и҆мѣ́хъ, ны́нѣ же лише́на бы́хъ тебє̀, сла́дкое моѐ ча́до и҆ люби́мое.

И҆ ны́нѣ: Болѣ̑зни и҆ скѡ́рби и҆ воздыха̑нїѧ ѡ҆брѣто́ша мѧ̀, ви́дѧщꙋ тѧ̀, ча́до моѐ возлю́бленное, на́га и҆ ᲂу҆едине́на, и҆ бл҃гоꙋха́ньми пома́зана мертвеца̀: ᲂу҆вы̀ мнѣ̀! чтⷭ҇аѧ го́рцѣ рыда́ющи глаго́лаше.

Пѣ́снь ѕ҃.

І҆рмо́съ: Жите́йское мо́ре воздвиза́емо зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве.

Ме́ртва тѧ̀ зрю̀, чл҃вѣколю́бче, ѡ҆живи́вшаго мє́ртвыѧ и҆ содержа́щаго всѧ̑, и҆ ᲂу҆ѧзвлѧ́юсѧ лю́тѣ ᲂу҆тро́бою. хотѣ́ла бы́хъ съ тобо́ю ᲂу҆мре́ти, пречⷭ҇таѧ глаго́лаше: не терплю́ бо без̾ дыха́нїѧ ме́ртва тѧ̀ ви́дѣти.

Дивлю́сѧ зрѧ́щи тѧ̀, пребл҃гі́й бж҃е и҆ преще́дрый гдⷭ҇и, без̾ сла́вы и҆ без̾ дыха́нїѧ, и҆ без̾ѡбра́зна, и҆ пла́чꙋсѧ держа́щи тѧ̀, ꙗ҆́кѡ не надѣ́ѧхсѧ, ᲂу҆вы̀ мнѣ̀, ви́дѣти тѧ̀, сн҃е мо́й и҆ бж҃е.

Сла́ва: Не и҆зглаго́леши ли рабѣ̀ твое́й сло́ва, сло́ве бж҃їй; не ᲂу҆ще́дриши ли, влⷣко, тебѐ ро́ждшꙋю; глаго́лаше чтⷭ҇аѧ, рыда́ющи и҆ пла́чꙋщи, ѡ҆блобыза́ющи тѣ́ло гдⷭ҇а своегѡ̀;

И҆ ны́нѣ: Помышлѧ́ю, влⷣко, ꙗ҆́кѡ сла́дкагѡ твоегѡ̀ ᲂу҆жѐ не ᲂу҆слы́шꙋ гла́са, ни добро́ты лица̀ твоегѡ̀ ᲂу҆зрю̀, ꙗ҆́коже пре́жде раба̀ твоѧ̀: заше́лъ є҆сѝ, сн҃е мо́й, ѿ ѻ҆́чїю моє́ю.

Конда́къ, гла́съ и҃:

На́съ ра́ди распѧ́таго, прїиди́те, всѝ воспои́мъ. того́ бо ви́дѣ мр҃і́а на дре́вѣ и҆ глаго́лаше: а҆́ще и҆ распѧ́тїе терпи́ши, ты̀ є҆сѝ сн҃ъ и҆ бг҃ъ мо́й.

І҆́косъ: Своего̀ а҆́гнца а҆́гница зрѧ́щи къ заколе́нїю влеко́ма, слѣ́доваше мр҃і́а терза́ющисѧ со и҆нѣ́ми жена́ми, сїѧ̑ вопїю́щи: ка́мѡ и҆́деши, ча́до: чесѡ̀ ра́ди ско́рое тече́нїе соверша́еши; є҆да̀ дрꙋгі́й бра́къ па́ки є҆́сть въ ка́нѣ, и҆ та́мѡ ны́нѣ тщи́шисѧ, да ѿ воды̀ и҆̀мъ вїно̀ сотвори́ши; и҆дꙋ́ ли съ тобо́ю, ча́до, и҆лѝ па́че пождꙋ̀ тебѐ; да́ждь мѝ сло́во, сло́ве, не мимоидѝ менє̀ молчѧ̀, чи́стꙋ соблюды́й мѧ̀: ты́ бо є҆сѝ сн҃ъ и҆ бг҃ъ мо́й.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе ᲂу҆вѣща̀ мꙋчи́телѧ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Гдѣ̀, сн҃е мо́й и҆ бж҃е, бл҃говѣ́щенїе дре́внее, є҆́же мѝ гаврїи́лъ глаго́лаше; цр҃ѧ́ тѧ, сн҃а и҆ бг҃а вы́шнѧго нарица́ше: ны́нѣ же ви́жꙋ тѧ̀, свѣ́те мо́й сла́дкїй, на́га и҆ ᲂу҆ѧ́звлена мертвеца̀.

И҆збавлѧ́ѧй ѿ болѣ́зни, ны́нѣ прїими́ мѧ съ тобо́ю, сн҃е мо́й и҆ бж҃е, да сни́дꙋ, влⷣко, во а҆́дъ съ тобо́ю и҆ а҆́зъ: не ѡ҆ста́ви менѐ є҆ди́нꙋ, ᲂу҆же́ бо жи́ти не терплю̀, не ви́дѧщи тебє̀ сла́дкагѡ моегѡ̀ свѣ́та.

Сла́ва: Съ дрꙋги́ми жена́ми мѷроно́сицами рыда́ющи го́рцѣ, и҆ несо́ма ви́дѧщи хрⷭ҇та̀, непоро́чнаѧ глаго́лаше: ᲂу҆вы̀ мнѣ̀, что̀ ви́жꙋ! ка́мѡ и҆́деши ны́нѣ, сн҃е мо́й, а҆ менѐ є҆ди́нꙋ ѡ҆ставлѧ́еши;

И҆ ны́нѣ: И҆знемога́ющи и҆ рыда́ющи, непоро́чнаѧ, мѷроно́сицамъ глаго́лаше: рыда́йте со мно́ю и҆ пла́читесѧ го́рцѣ: се́ бо свѣ́тъ мо́й сла́дкїй и҆ ᲂу҆чи́тель ва́шъ гро́бꙋ предае́тсѧ.

Пѣ́снь и҃.

І҆рмо́съ: И҆з̾ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, є҆ди́нымъ хотѣ́нїемъ. тѧ̀ превозно́симъ во всѧ̑ вѣ́ки.

Дв҃ꙋ рыда́ющꙋ ви́дѣвъ, і҆ѡ́сифъ растерза́шесѧ ве́сь и҆ вопїѧ́ше го́рькѡ: ка́кѡ тѧ̀, ѽ бж҃е мо́й, ны́нѣ погребꙋ̀ ра́бъ тво́й; ка́кѡ плащани́цами ѡ҆бвїю̀ тѣ́ло твоѐ;

Па́че ᲂу҆ма̀ превзы́де стра́нное твоѐ видѣ́нїе, носѧ́щагѡ тва́рь всю̀ гдⷭ҇а: сегѡ̀ ра́ди і҆ѡ́сифъ ꙗ҆́кѡ ме́ртва тѧ̀ на рꙋкꙋ̀ своє́ю и҆ съ нїкоди́момъ но́ситъ и҆ погреба́етъ.

Сла́ва: Стра́ннꙋю ви́жꙋ и҆ пресла́внꙋю та́йнꙋ, дв҃а вопїѧ́ше сн҃ꙋ и҆ гдⷭ҇ꙋ: ка́кѡ въ хꙋдо́мъ гро́бѣ полага́ешисѧ, мє́ртвыѧ во гробѣ́хъ повелѣ́нїемъ возставлѧ́ѧй;

И҆ ны́нѣ: Ни ѿ гро́ба твоегѡ̀ воста́нꙋ, ча́до моѐ, ни сле́зы точа́щи преста́нꙋ раба̀ твоѧ̀, до́ндеже и҆ а҆́зъ сни́дꙋ во а҆́дъ: не могꙋ́ бо терпѣ́ти разлꙋче́нїѧ ѿ тебє̀̀, сн҃е мо́й.

Пѣ́снь ѳ҃.

І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.

Ра́дость мнѣ̀ николи́же ѿсе́лѣ прико́снетсѧ, рыда́ющи глаго́лаше непоро́чнаѧ: свѣ́тъ мо́й и҆ ра́дость моѧ̀ во гро́бъ за́йде: но не ѡ҆ста́влю є҆го̀ є҆ди́наго, здѣ́ же ᲂу҆мрꙋ̀ и҆ погребꙋ́сѧ съ ни́мъ.

Дꙋше́внꙋю мою̀ ꙗ҆́звꙋ ны́нѣ и҆сцѣлѝ, ча́до моѐ: пречтⷭ҇аѧ вопїѧ́ше сле́зы точа́щи: воскрⷭ҇нѝ и҆ ᲂу҆толѝ мою̀ болѣ́знь и҆ печа́ль: мо́жеши бо, влⷣко, є҆ли́кѡ хо́щеши, и҆ твори́ши, а҆́ще и҆ погребе́нъ є҆сѝ во́лею.

Сла́ва: Ѽ ка́кѡ ᲂу҆таи́сѧ ѿ тебє̀ бе́здна щедро́тъ; мт҃ри въ та́йнѣ и҆зречѐ гдⷭ҇ь; тва́рь бо мою̀ хотѧ̀ спастѝ, и҆зво́лихъ ᲂу҆мре́ти, но и҆ воскреснꙋ̀, и҆ тебѐ возвели́чꙋ, ꙗ҆́кѡ бг҃ъ нб҃сѐ и҆ землѝ.

И҆ ны́нѣ: Воспѣва́ю милосе́рдїе твоѐ, чл҃вѣколю́бче, и҆ покланѧ́юсѧ бога́тствꙋ млⷭ҇ти твоеѧ̀, влⷣко: созда́нїе бо твоѐ хотѧ̀ спастѝ, сме́рть под̾ѧ́лъ є҆сѝ: речѐ пречⷭ҇таѧ: но воскрⷭ҇нїемъ твои́мъ, сп҃се, поми́лꙋй всѣ́хъ на́съ.

Та́же, за Досто́йно, і҆рмо́съ: Бг҃а человѣ́кѡмъ невозмо́жно ви́дѣти: Трист҃о́е. По Ѻ҆́ч҃е на́шъ: конда́къ: На́съ ра́ди распѧ́таго: Гдⷭ҇и, поми́лꙋй, м҃. И҆́же на всѧ́кое вре́мѧ: Гдⷭ҇и поми́лꙋй, три́жды. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. І҆ере́й: Мл҃твами ст҃ы́хъ ѻ҆тє́цъ на́шихъ: И҆ мл҃тва: Нескве́рнаѧ, небла́знаѧ: И҆ ѿпꙋ́стъ.

Полꙋ́нощницꙋ та́кожде пое́мъ въ ке́ллїахъ.

Во ст҃ꙋ́ю и҆ вели́кꙋю сꙋббѡ́тꙋ

кле́плетъ ко ᲂу҆́трени въ седмы́й ча́съ но́щи. Начина́емъ ᲂу҆́треню по ѡ҆бы́чаю. И҆ по шестоѱа́лмїи є҆ктенїа̀ вели́каѧ.

На Бг҃ъ гдⷭ҇ь: тропа́рь, гла́съ в҃:

Бл҃гоѡбра́зный і҆ѡ́сифъ, съ дре́ва сне́мъ пречⷭ҇тое тѣ́ло твоѐ, плащани́цею чи́стою ѡ҆бви́въ и҆ бл҃гоꙋха́ньми, во гро́бѣ но́вѣ покры́въ положѝ.

Сла́ва: Є҆гда̀ снизше́лъ є҆сѝ къ сме́рти, животѐ безсме́ртный, тогда̀ а҆́дъ ᲂу҆мертви́лъ є҆сѝ блиста́нїемъ бж҃ества̀: є҆гда́ же и҆ ᲂу҆ме́ршыѧ ѿ преиспо́днихъ воскреси́лъ є҆сѝ, всѧ̑ си̑лы нбⷭ҇ныѧ взыва́хꙋ: жизнода́вче хрⷭ҇тѐ бж҃е на́шъ, сла́ва тебѣ̀.

И҆ ны́нѣ: Мѷроно́сицамъ жена́мъ, при гро́бѣ предста́въ, а҆́гг҃лъ вопїѧ́ше: мѵ̑ра мє́ртвымъ сꙋ́ть прили̑чна, хрⷭ҇то́съ же и҆стлѣ́нїѧ ꙗ҆ви́сѧ чꙋ́ждь.

И҆, кадѧ́щꙋ сщ҃е́нникꙋ ве́сь хра́мъ, начина́емъ пѣ́ти непорѡ́чны со сладкопѣ́нїемъ: та́кожде по ко́емꙋждо стїсѣ̀ и҆ похвалы̑.

Статїѧ̀ пе́рваѧ.

возглаша́етъ пѣве́цъ, во гла́съ є҃:

Бл҃гослове́нъ є҆сѝ, гдⷭ҇и, наꙋчи́ мѧ ѡ҆правда́нїємъ твои̑мъ.

[сⷯ а҃] Бл҃же́ни непоро́чнїи ꙾въ пꙋ́ть¹¹꙾, ходѧ́щїи въ зако́нѣ гдⷭ҇ни.

И҆ похвалы̑, во гла́съ є҃:

Жи́знь во гро́бѣ положе́нъ бы́лъ є҆сѝ, хрⷭ҇тѐ, и҆ а҆́гг҃льскаѧ вѡ́инства ᲂу҆жаса́хꙋсѧ, снизхожде́нїе сла́вѧще твоѐ.

[в҃] Бл҃же́ни и҆спыта́ющїи свидѣ̑нїѧ є҆гѡ̀, всѣ́мъ се́рдцемъ взы́щꙋтъ є҆го̀.

Жи́знь, ка́кѡ ᲂу҆мира́еши; ка́кѡ и҆ во гро́бѣ ѡ҆бита́еши, сме́рти же ца́рство разрꙋша́еши, и҆ ѿ а҆́да мє́ртвыѧ возставлѧ́еши;

[г҃] Не дѣ́лающїи бо беззако́нїѧ въ пꙋте́хъ є҆гѡ̀ ходи́ша.

Велича́емъ тѧ̀, і҆и҃се цр҃ю̀, и҆ чти́мъ погребе́нїе и҆ страда̑нїѧ твоѧ̑, и҆́миже спа́слъ є҆сѝ на́съ ѿ и҆стлѣ́нїѧ.

[д҃] Ты̀ заповѣ́далъ є҆сѝ за́пѡвѣди твоѧ̑ сохрани́ти ѕѣлѡ̀.

Мѣ̑ры землѝ положи́вый, въ ма́лѣ гро́бѣ ѡ҆бита́еши дне́сь, і҆и҃се всецр҃ю̀, ѿ гробѡ́въ мє́ртвыѧ возставлѧ́ѧй.

[є҃] Дабы̀ и҆спра́вилисѧ пꙋтїѐ моѝ сохрани́ти ѡ҆правда̑нїѧ твоѧ̑.

І҆и҃се хрⷭ҇тѐ мо́й, цр҃ю̀ всѣ́хъ, что̀ и҆щѧ̀ къ сꙋ́щымъ во а҆́дѣ прише́лъ є҆сѝ; и҆лѝ ро́дъ свободи́ти человѣ́ческїй;

[ѕ҃] Тогда̀ не постыжꙋ́сѧ, внегда̀ призрѣ́ти мѝ на всѧ̑ за́пѡвѣди твоѧ̑.

Влⷣка всѣ́хъ зри́тсѧ ме́ртвъ, и҆ во гро́бѣ но́вѣ полага́етсѧ, и҆стощи́вый гро́бы ме́ртвыхъ.

[з҃] И҆сповѣ́мсѧ тебѣ̀ въ пра́вости се́рдца, внегда̀ наꙋчи́ти ми сѧ сꙋдьба́мъ пра́вды твоеѧ̀.

Жи́знь во гро́бѣ положе́нъ бы́лъ є҆сѝ, хрⷭ҇тѐ, и҆ сме́ртїю твое́ю сме́рть погꙋби́лъ є҆сѝ, и҆ и҆сточи́лъ є҆сѝ мі́рови жи́знь.

[и҃] Ѡ҆правда̑нїѧ твоѧ̑ сохраню̀, не ѡ҆ста́ви менѐ до ѕѣла̀.

Со ѕлодѣ̑и ꙗ҆́кѡ ѕлодѣ́й, хрⷭ҇тѐ, вмѣне́нъ бы́лъ є҆сѝ, ѡ҆правда́ѧ на́съ всѣ́хъ ѿ ѕлодѣ́йства дре́внѧгѡ запина́телѧ.

[ѳ҃] Въ чесо́мъ и҆спра́витъ ю҆нѣ́йшїй пꙋ́ть сво́й; внегда̀ сохрани́ти словеса̀ твоѧ̑.

Кра́сный добро́тою па́че всѣ́хъ человѣ̑къ, ꙗ҆́кѡ беззра́ченъ ме́ртвъ ꙗ҆влѧ́етсѧ, є҆стество̀ ᲂу҆краси́вый всѣ́хъ.

[і҃] Всѣ́мъ се́рдцемъ мои́мъ взыска́хъ тебѐ, не ѿри́ни менѐ ѿ за́повѣдей твои́хъ.

А҆́дъ ка́кѡ стерпи́тъ, сп҃се, прише́ствїе твоѐ, а҆ не па́че сокрꙋши́тсѧ ѡ҆мрача́емь, блиста́нїѧ свѣ́та твоегѡ̀ лꙋча́ми ѡ҆слѣпле́нъ.

[а҃і] Въ се́рдцѣ мое́мъ скры́хъ словеса̀ твоѧ̑, ꙗ҆́кѡ да не согрѣшꙋ̀ тебѣ̀.

І҆и҃се сла́дкїй мо́й и҆ сп҃си́тельный свѣ́те, ка́кѡ во гро́бѣ те́мнѣмъ скры́лсѧ є҆сѝ; ѽ несказа́ннагѡ и҆ неизрече́ннагѡ терпѣ́нїѧ!

[в҃і] Бл҃гослове́нъ є҆сѝ, гдⷭ҇и, наꙋчи́ мѧ ѡ҆правда́нїємъ твои̑мъ.

Недоꙋмѣва́етъ и҆ є҆стество̀ ᲂу҆́мное, и҆ мно́жество безпло́тное, хрⷭ҇тѐ, ѡ҆ та́инствѣ несказа́ннагѡ и҆ неизрече́ннагѡ твоегѡ̀ погребе́нїѧ.

[г҃і] Оу҆стна́ма мои́ма возвѣсти́хъ всѧ̑ сꙋдьбы̑ ᲂу҆́стъ твои́хъ.

Ѽ чꙋде́съ стра́нныхъ! ѽ веще́й но́выхъ! дыха́нїѧ моегѡ̀ пода́тель бездыха́ненъ но́ситсѧ, погреба́емь рꙋка́ма і҆ѡ́сифовыма.

[д҃і] На пꙋтѝ свидѣ́нїй твои́хъ наслади́хсѧ, ꙗ҆́кѡ ѡ҆ всѧ́комъ бога́тствѣ.

И҆ во гро́бъ заше́лъ є҆сѝ, хрⷭ҇тѐ, и҆ нѣ́дръ ѻ҆ч҃ескихъ ника́коже ѿлꙋчи́лсѧ є҆сѝ: сїѐ є҆́сть и҆ стра́нно и҆ пресла́вно вкꙋ́пѣ.

[є҃і] Въ за́повѣдехъ твои́хъ поглꙋмлю́сѧ, и҆ ᲂу҆разꙋмѣ́ю пꙋти̑ твоѧ̑.

И҆́стинный нб҃сѐ и҆ землѝ цр҃ь, а҆́ще и҆ во гро́бѣ малѣ́йшемъ заключе́нъ бы́лъ є҆сѝ, позна́лсѧ є҆сѝ все́й тва́ри, і҆и҃се.

[ѕ҃і] Во ѡ҆правда́нїихъ твои́хъ поꙋчꙋ́сѧ, не забꙋ́дꙋ слове́съ твои́хъ.

Тебѣ̀ положе́нꙋ во гро́бѣ, созда́телю хрⷭ҇тѐ, а҆́дѡва ѡ҆снова̑нїѧ подвиго́шасѧ, и҆ гро́би человѣ́кѡвъ ѿверзо́шасѧ.

[з҃і] Возда́ждь рабꙋ̀ твоемꙋ̀, живи́ мѧ, и҆ сохраню̀ словеса̀ твоѧ̑.

Зе́млю содержа́й го́рстїю, ᲂу҆мерщвле́нъ пло́тїю, под̾ земле́ю ны́нѣ заключа́етсѧ, мє́ртвыѧ и҆збавлѧ́ѧ ѿ а҆́дова заключе́нїѧ.

[и҃і] Ѿкры́й ѻ҆́чи моѝ, и҆ ᲂу҆разꙋмѣ́ю чꙋдеса̀ ѿ зако́на твоегѡ̀.

И҆з̾ и҆стлѣ́нїѧ возше́лъ є҆сѝ жи́знь, сп҃се мо́й, ᲂу҆ме́рый, и҆ къ мє́ртвымъ прише́дый, и҆ сломи́вый а҆́дѡвы закле́пы.

[ѳ҃і] Пришле́цъ а҆́зъ є҆́смь на землѝ, не скры́й ѿ менє̀ за́пѡвѣди твоѧ̑.

Ꙗ҆́коже свѣ́та свѣти́льникъ, ны́нѣ пло́ть бж҃їѧ под̾ зе́млю ꙗ҆́кѡ под̾ спꙋ́дъ кры́етсѧ, и҆ ѿгонѧ́етъ сꙋ́щꙋю во а҆́дѣ тьмꙋ̀.

[к҃] Возлюбѝ дꙋша̀ моѧ̀ возжела́ти сꙋдьбы̑ твоѧ̑ на всѧ́кое вре́мѧ.

Невеще́ственныхъ во́инствъ мно́жество стека́етсѧ со і҆ѡ́сифомъ и҆ нїкоди́момъ, погребстѝ во гро́бѣ ма́лѣ тѧ невмѣсти́маго.

[к҃а] Запрети́лъ є҆сѝ гѡ́рдымъ, про́клѧти ᲂу҆клонѧ́ющїисѧ ѿ за́повѣдей твои́хъ.

Оу҆мерщвле́нъ во́лею и҆ положе́нъ под̾ земле́ю, жи́зни и҆сто́чниче і҆и҃се мо́й, ѡ҆живи́лъ є҆сѝ мѧ̀ ᲂу҆мерщвле́на престꙋпле́нїемъ го́рькимъ.

[к҃в] Ѿимѝ ѿ менє̀ ꙾поно́съ¹²꙾ и҆ ᲂу҆ничиже́нїе, ꙗ҆́кѡ свидѣ́нїй твои́хъ взыска́хъ.

И҆змѣнѧ́шесѧ всѧ̀ тва́рь стрⷭ҇тїю твое́ю: всѧ̑ бо тебѣ̀, сло́ве, сострада́хꙋ, вѣ̑дꙋща тѧ̀ содержи́телѧ всѣ́хъ.

[к҃г] И҆́бо сѣдо́ша кнѧ́зи, и҆ на мѧ̀ клевета́хꙋ: ра́бъ же тво́й глꙋмлѧ́шесѧ во ѡ҆правда́нїихъ твои́хъ.

Жи́зни ка́мень во чре́во прїе́мъ, а҆́дъ всеѧ́децъ и҆зве́рже мє́ртвыѧ, ꙗ҆̀же ѿ вѣ́ка поглотѝ.

[к҃д] И҆́бо свидѣ́нїѧ твоѧ̑ поꙋче́нїе моѐ є҆́сть, и҆ совѣ́ти моѝ ѡ҆правда̑нїѧ твоѧ̑.

Во гро́бѣ но́вѣ положи́лсѧ є҆сѝ, хрⷭ҇тѐ, и҆ є҆стество̀ человѣ́ческое ѡ҆бнови́лъ є҆сѝ, воскре́съ бг҃олѣ́пнѡ и҆з̾ ме́ртвыхъ.

[к҃є] Прильпѐ землѝ дꙋша̀ моѧ̀: живи́ мѧ по словесѝ твоемꙋ̀.

На зе́млю сше́лъ є҆сѝ, да спасе́ши а҆да́ма: и҆ на землѝ не ѡ҆брѣ́тъ сегѡ̀, влⷣко, да́же до а҆́да снизше́лъ є҆сѝ и҆щѧ̀.

[к҃ѕ] Пꙋти̑ моѧ̑ возвѣсти́хъ, и҆ ᲂу҆слы́шалъ мѧ̀ є҆сѝ, наꙋчѝ мѧ̀ ѡ҆правда́нїємъ твои̑мъ.

Сотрѧса́етсѧ стра́хомъ, сло́ве, всѧ̀ землѧ̀, и҆ носи́ло свѣ́та лꙋчы̀ скры̀, велича́йшемꙋ твоемꙋ̀ свѣ́тꙋ сокрове́нꙋ бы́вшꙋ въ землѝ.

[к҃з] Пꙋ́ть ѡ҆правда́нїй твои́хъ вразꙋми́ ми, и҆ поглꙋмлю́сѧ въ чꙋдесѣ́хъ твои́хъ.

Ꙗ҆́кѡ человѣ́къ ᲂу҆́бѡ ᲂу҆мира́еши во́лею, сп҃се, ꙗ҆́кѡ бг҃ъ же смє́ртныѧ возста́вилъ є҆сѝ ѿ гробѡ́въ и҆ глꙋбины̀ грѣхо́вныѧ.

[к҃и] Воздрема̀ дꙋша̀ моѧ̀ ѡ҆ ᲂу҆ны́нїѧ: ᲂу҆тверди́ мѧ въ словесѣ́хъ твои́хъ.

Слезотѡ́чнаѧ рыда̑нїѧ на тебѐ мт҃рски, ѽ і҆и҃се, накраплѧ́ющи, чтⷭ҇аѧ вопїѧ́ше: ка́кѡ погребꙋ́ тѧ, сн҃е;

[к҃ѳ] Пꙋ́ть непра́вды ѿста́ви ѿ менє̀, и҆ зако́номъ твои́мъ поми́лꙋй мѧ̀.

Ꙗ҆́коже пшени́чное зе́рно, заше́дъ въ нѣ̑дра земна̑ѧ, и҆з̾ѻби́льный возда́лъ є҆сѝ кла́съ, возста́вивъ человѣ́ки, сꙋ́щыѧ ѿ а҆да́ма.

[л҃] Пꙋ́ть и҆́стины и҆зво́лихъ, и҆ сꙋдьбы̑ твоѧ̑ не забы́хъ.

Под̾ зе́млю скры́лсѧ є҆сѝ ꙗ҆́коже со́лнце ны́нѣ, и҆ но́щїю сме́рти покрове́нъ бы́лъ є҆сѝ: но возсїѧ́й свѣтлѣ́йше, сп҃се.

[л҃а] Прилѣпи́хсѧ свидѣ́нїємъ твои̑мъ, гдⷭ҇и, не посрамѝ менѐ.

Ꙗ҆́коже со́лнечный крꙋ́гъ лꙋна̀ сокрыва́етъ, и҆ тебѐ, сп҃се, ны́нѣ гро́бъ скры̀, сконча́вшагосѧ сме́ртїю пло́тски.

[л҃в] Пꙋ́ть за́повѣдей твои́хъ теко́хъ, є҆гда̀ разшири́лъ є҆сѝ се́рдце моѐ.

Жи́знь сме́рти вкꙋси́вшаѧ, хрⷭ҇то́съ ѿ сме́рти смє́ртныѧ свободѝ, и҆ всѣ̑мъ ны́нѣ да́рꙋетъ жи́знь.

[л҃г] Законоположѝ мнѣ̀, гдⷭ҇и, пꙋ́ть ѡ҆правда́нїй твои́хъ, и҆ взыщꙋ̀ и҆̀ вы́нꙋ.

Оу҆мерщвле́на дре́вле зави́стнѡ а҆да́ма возво́диши къ жи́зни ᲂу҆мерщвле́нїемъ твои́мъ, сп҃се, во пло́ти ꙗ҆ви́всѧ но́вый а҆да́мъ.

[л҃д] Вразꙋми́ мѧ, и҆ и҆спыта́ю зако́нъ тво́й, и҆ сохраню̀ и҆̀ всѣ́мъ се́рдцемъ мои́мъ.

Невеще́ственнїи чи́ни, просте́рта ме́ртва тѧ̀ зрѧ́ще на́съ ра́ди, ᲂу҆жаса́хꙋсѧ, покрыва́ющесѧ крилы̀, сп҃се.

[л҃є] Наста́ви мѧ̀ на стезю̀ за́повѣдей твои́хъ, ꙗ҆́кѡ тꙋ́ю восхотѣ́хъ.

Сне́мъ тѧ̀, сло́ве, ѿ дре́ва ме́ртва, во гро́бѣ і҆ѡ́сифъ ны́нѣ положѝ: но воста́ни сп҃са́ѧ всѧ̑ ꙗ҆́кѡ бг҃ъ.

[л҃ѕ] Приклонѝ се́рдце моѐ во свидѣ̑нїѧ твоѧ̑, а҆ не въ лихои́мство.

А҆́гг҃лѡмъ ра́дость бы́въ сп҃се, ны́нѣ и҆ печа́ли си̑мъ бы́лъ є҆сѝ вино́венъ, ви́димь пло́тїю бездыха́ненъ ме́ртвъ.

[л҃з] Ѿвратѝ ѻ҆́чи моѝ, є҆́же не ви́дѣти сꙋеты̀: въ пꙋтѝ твое́мъ живи́ мѧ.

Вознесе́нъ на дре́во, и҆ живꙋ́щыѧ человѣ́ки совозно́сиши: под̾ земле́ю же бы́въ, лежа́щыѧ под̾ не́ю воскреша́еши.

[л҃и] Поста́ви рабꙋ̀ твоемꙋ̀ сло́во твоѐ въ стра́хъ тво́й.

Ꙗ҆́коже ле́въ ᲂу҆снꙋ́въ пло́тїю, сп҃се, ꙗ҆́кѡ нѣ́кїй скѵ́менъ мла́дъ возстае́ши, ѿложи́въ ста́рость плотскꙋ́ю.

[л҃ѳ] Ѿимѝ поноше́нїе моѐ, є҆́же непщева́хъ: ꙗ҆́кѡ сꙋдьбы̑ твоѧ̑ бла̑ги.

Въ ре́бра прободе́нъ бы́лъ є҆сѝ, ребро̀ взе́мый а҆да́мле, ѿ негѡ́же є҆́ѵꙋ созда́лъ є҆сѝ, и҆ и҆сточи́лъ є҆сѝ то́ки чисти́тєльныѧ.

[м҃] Сѐ возжела́хъ за́пѡвѣди твоѧ̑: въ пра́вдѣ твое́й живи́ мѧ.

Та́йнѡ ᲂу҆́бѡ дре́вле закала́етсѧ а҆́гнецъ: ты́ же, ꙗ҆́вѣ закла́нъ бы́въ, неѕло́биве, всю̀ тва́рь ѡ҆чи́стилъ є҆сѝ, сп҃се.

[м҃а] И҆ да прїи́детъ на мѧ̀ млⷭ҇ть твоѧ̀, гдⷭ҇и, сп҃се́нїе твоѐ по словесѝ твоемꙋ̀.

Кто̀ и҆зрече́тъ ѡ҆́бразъ стра́шный вои́стиннꙋ но́вый; влады́чествꙋѧй бо тва́рїю, дне́сь стрⷭ҇ть прїе́млетъ и҆ ᲂу҆мира́етъ на́съ ра́ди.

[м҃в] И҆ ѿвѣща́ю поноша́ющымъ мѝ сло́во, ꙗ҆́кѡ ᲂу҆пова́хъ на словеса̀ твоѧ̑.

Жи́зни храни́тель ка́кѡ зри́тсѧ ме́ртвъ; ᲂу҆жаса́ющесѧ а҆́гг҃ли взыва́хꙋ: ка́кѡ же во гро́бѣ заключа́етсѧ бг҃ъ;

[м҃г] И҆ не ѿимѝ ѿ ᲂу҆́стъ мои́хъ словесѐ и҆́стинна до ѕѣла̀: ꙗ҆́кѡ на сꙋдьбы̑ твоѧ̑ ᲂу҆пова́хъ.

И҆з̾ ребра̀ твоегѡ, копїе́мъ прободе́ннагѡ, сп҃се, жи́знь и҆ска́паеши жи́зни [є҆́ѵѣ], ѿ жи́зни и҆згна́вшей мѧ̀, живи́ши мѧ̀ съ не́ю.

[м҃д] И҆ сохраню̀ зако́нъ тво́й вы́нꙋ, въ вѣ́къ и҆ въ вѣ́къ вѣ́ка.

Распросте́ртъ на дре́вѣ, собра́лъ є҆сѝ человѣ́ки: въ ре́бра же твоѧ̑ животѡ́чнаѧ прободе́нъ, всѣ̑мъ ѡ҆ставле́нїе и҆сточа́еши, і҆и҃се.

[м҃є] И҆ хожда́хъ въ широтѣ̀, ꙗ҆́кѡ за́пѡвѣди твоѧ̑ взыска́хъ.

Бл҃гоѡбра́зный ѡ҆прѧ́таетъ тѧ̀ стра́шнѡ, сп҃се, и҆ погреба́етъ тѧ̀ ꙗ҆́кѡ ме́ртва бл҃гоѡбра́знѡ, и҆ ᲂу҆жаса́етсѧ твоегѡ̀ ѡ҆́браза стра́шнагѡ.

[м҃ѕ] И҆ глаго́лахъ ѡ҆ свидѣ́нїихъ твои́хъ пред̾ цари̑, и҆ не стыдѧ́хсѧ.

Под̾ зе́млю хотѣ́нїемъ низше́дъ ꙗ҆́кѡ сме́ртенъ, возво́диши ѿ землѝ къ нбⷭ҇нымъ, ѿтꙋ́дꙋ низпа́дшыѧ, і҆и҃се.

[м҃з] И҆ поꙋча́хсѧ въ за́повѣдехъ твои́хъ, ꙗ҆̀же возлюби́хъ ѕѣлѡ̀.

А҆́ще и҆ ме́ртвъ ви́дѣнъ бы́лъ є҆сѝ, но живы́й ꙗ҆́кѡ бг҃ъ, возво́диши ѿ землѝ къ нбⷭ҇нымъ ѿтꙋ́дꙋ низпа́дшыѧ, і҆и҃се.

[м҃и] И҆ воздвиго́хъ рꙋ́цѣ моѝ къ за́повѣдемъ твои̑мъ, ꙗ҆̀же возлюби́хъ.

А҆́ще и҆ ме́ртвъ ви́дѣнъ бы́лъ є҆сѝ, но, живы́й ꙗ҆́кѡ бг҃ъ, ᲂу҆мерщвлє́нныѧ человѣ́ки ѡ҆живи́лъ є҆сѝ, моего̀ ᲂу҆мертви́въ ᲂу҆мертви́телѧ.

[м҃и] И҆ глꙋмлѧ́хсѧ во ѡ҆правда́нїихъ твои́хъ.

Ѽ ра́дости ѻ҆́ныѧ! ѽ мно́гїѧ сла́дости! є҆ѧ́же сꙋ́щихъ во а҆́дѣ напо́лнилъ є҆сѝ, во глꙋбина́хъ мра́чныхъ свѣ́тъ возсїѧ́въ.

[м҃ѳ] Помѧнѝ словеса̀ твоѧ̑ рабꙋ̀ твоемꙋ̀, и҆́хже ᲂу҆пова́нїе да́лъ мѝ є҆сѝ.

Покланѧ́юсѧ стрⷭ҇ти, воспѣва́ю погребе́нїе, велича́ю твою̀ держа́вꙋ, чл҃вѣколю́бче, и҆́миже свободи́хсѧ ѿ страсте́й тлетво́рныхъ.

[н҃] То́ мѧ ᲂу҆тѣ́ши во смире́нїи мое́мъ, ꙗ҆́кѡ сло́во твоѐ живи́ мѧ.

На тѧ̀ ме́чь ѡ҆бнажа́шесѧ, хрⷭ҇тѐ: и҆ ме́чь крѣ́пкагѡ ᲂу҆́бѡ притꙋплѧ́етсѧ, ме́чь же є҆де́мскїй ѡ҆браща́етсѧ.

[н҃а] Го́рдїи законопрестꙋпова́хꙋ до ѕѣла̀: ѿ зако́на же твоегѡ̀ не ᲂу҆клони́хсѧ.

А҆́гница, зрѧ́щи а҆́гнца въ заколе́нїи, ѻ҆́стрїемъ пробода́ема рыда́ше, сподвиза́ющи и҆ ста́до вопи́ти.

[н҃в] Помѧнꙋ́хъ сꙋдьбы̑ твоѧ̑ ѿ вѣ́ка, гдⷭ҇и, и҆ ᲂу҆тѣ́шихсѧ.

А҆́ще и҆ во гро́бѣ погреба́ешисѧ, а҆́ще и҆ во а҆́дъ и҆́деши, сп҃се: но и҆ гро́бы и҆стощи́лъ є҆сѝ, и҆ а҆́дъ ѡ҆бнажи́лъ є҆сѝ, хрⷭ҇тѐ.

[н҃г] Печа́ль прїѧ́тъ мѧ̀ ѿ грѣ̑шникъ, ѡ҆ставлѧ́ющихъ зако́нъ тво́й.

Во́лею низше́дъ под̾ зе́млю, сп҃се, ᲂу҆мерщвлє́нныѧ человѣ́ки ѡ҆живи́лъ є҆сѝ и҆ возве́лъ є҆сѝ во сла́вѣ ѻ҆́ч҃ей.

[н҃д] Пѣ̑та бѧ́хꙋ мнѣ̀ ѡ҆правда̑нїѧ твоѧ̑ на мѣ́стѣ прише́льствїѧ моегѡ̀.

Ѿ трⷪ҇цы є҆ди́нъ поноси́тельнꙋю сме́рть во пло́ти на́съ ра́ди претерпѣ̀: ᲂу҆жаса́етсѧ со́лнце, и҆ трепе́щетъ землѧ̀.

[н҃є] Помѧнꙋ́хъ въ нощѝ и҆́мѧ твоѐ, гдⷭ҇и, и҆ сохрани́хъ зако́нъ тво́й.

Ꙗ҆́кѡ ѿ и҆сто́чника го́рькагѡ, ѿ і҆ꙋ́дова колѣ̑на и҆сча̑дїѧ въ ро́вѣ положи́ша пита́телѧ маннода́вца і҆и҃са.

[н҃ѕ] Се́й бы́сть мнѣ̀, ꙗ҆́кѡ ѡ҆правда́нїй твои́хъ взыска́хъ.

Сꙋдїѧ̀ ꙗ҆́кѡ сꙋди́мь пред̾ пїла́томъ сꙋдїе́ю и҆ предста̀, и҆ на сме́рть непра́веднꙋю на дре́вѣ кре́стнымъ ѡ҆сꙋжде́нъ бы́сть.

[н҃з] Ча́сть моѧ̀ є҆сѝ, гдⷭ҇и, рѣ́хъ сохрани́ти зако́нъ тво́й.

Го́рдый і҆и҃лю, ᲂу҆бі́йственнїи лю́дїе! что̀ пострада́вше, вара́ввꙋ свободи́сте, сп҃са преда́сте крⷭ҇тꙋ̀;

[н҃и] Помоли́хсѧ лицꙋ̀ твоемꙋ̀ всѣ́мъ се́рдцемъ мои́мъ: поми́лꙋй мѧ̀ по словесѝ твоемꙋ̀.

Рꙋко́ю твое́ю созда́вый а҆да́ма ѿ землѝ, тогѡ̀ ра́ди є҆стество́мъ бы́лъ є҆сѝ человѣ́къ, и҆ распѧ́лсѧ є҆сѝ во́лею твое́ю.

[н҃ѳ] Помы́слихъ пꙋти̑ твоѧ̑, и҆ возврати́хъ но́зѣ моѝ во свидѣ̑нїѧ твоѧ̑.

Послꙋ́шавъ, сло́ве, ѻ҆ц҃а̀ твоегѡ̀, да́же до а҆́да лю́тагѡ соше́лъ є҆сѝ, и҆ воскреси́лъ є҆сѝ ро́дъ человѣ́ческїй.

[ѯ҃] Оу҆гото́вихсѧ и҆ не смꙋти́хсѧ, сохрани́ти за́пѡвѣди твоѧ̑.

Оу҆вы̀ мнѣ̀, свѣ́те мі́ра! ᲂу҆вы̀ мнѣ̀, свѣ́те мо́й, і҆и҃се мо́й возжелѣ́нный! вопїѧ́ше дв҃а, рыда́ющи го́рькѡ.

[ѯ҃а] Оу҆́жѧ грѣ̑шникъ ѡ҆бѧза́шесѧ мнѣ̀, и҆ зако́на твоегѡ̀ не забы́хъ.

Зави́стливїи, ᲂу҆бі́йственнїи и҆ го́рдїи лю́дїе! понѐ плащани́цы и҆ сꙋдарѧ̀ самагѡ̀ постыди́тесѧ, воскре́сшꙋ хрⷭ҇тꙋ̀.

[ѯ҃в] Полꙋ́нощи воста́хъ и҆сповѣ́датисѧ тебѣ̀ ѡ҆ сꙋдьба́хъ пра́вды твоеѧ̀.

Прїидѝ ᲂу҆́бѡ, скве́рный ᲂу҆бі́йце ᲂу҆ченичѐ, и҆ нра́въ ѕло́бы твоеѧ̀ покажи́ ми, и҆́мже бы́лъ є҆сѝ преда́тель хрⷭ҇то́въ.

[ѯ҃г] Прича́стникъ а҆́зъ є҆́смь всѣ̑мъ боѧ́щымсѧ тебє̀ и҆ хранѧ́щымъ за́пѡвѣди твоѧ̑.

Ꙗ҆́кѡ человѣколюби́въ нѣ́кто притворѧ́ешисѧ, бꙋ́е и҆ слѣ́пе, всегꙋби́тельнѣйше, невѣ́рне, мѵ́ро прода́вый на цѣнѣ̀.

[ѯ҃д] Млⷭ҇ти твоеѧ̀, гдⷭ҇и, и҆спо́лнь землѧ̀: ѡ҆правда́нїємъ твои̑мъ наꙋчи́ мѧ.

Нбⷭ҇нагѡ мѵ́ра кꙋ́ю цѣ́нꙋ стѧжа́лъ є҆сѝ; за многоцѣ́ннагѡ что̀ прїѧ́лъ є҆сѝ равноцѣ́нное; неи́стовство ѡ҆брѣ́лъ є҆сѝ, проклѧ́тѣйшїй сатано̀.

[ѯ҃є] Бл҃гость сотвори́лъ є҆сѝ съ рабо́мъ твои́мъ, гдⷭ҇и, по словесѝ твоемꙋ̀.

А҆́ще нищелю́бецъ є҆сѝ и҆ ѡ҆ мѵ́рѣ печа́лꙋеши, и҆стоща́емѣмъ во ѡ҆чище́нїе дꙋшѝ, ка́кѡ на зла́то продае́ши свѣтоза́рнаго;

[ѯ҃ѕ] Бл҃гости и҆ наказа́нїю и҆ ра́зꙋмꙋ наꙋчи́ мѧ, ꙗ҆́кѡ за́повѣдемъ твои̑мъ вѣ́ровахъ.

Ѽ бж҃е и҆ сло́ве! ѽ ра́дость моѧ̀! ка́кѡ претерплю̀ тридне́вное твоѐ погребе́нїе; ны́нѣ терза́юсѧ ᲂу҆тро́бою мт҃рски.

[ѯ҃з] Пре́жде да́же не смири́ти ми сѧ, а҆́зъ прегрѣши́хъ, сегѡ̀ ра́ди сло́во твоѐ сохрани́хъ.

Кто̀ да́стъ мѝ во́дꙋ и҆ сле́зъ и҆сто́чники, да ѡ҆пла́чꙋ сла́дкаго моего̀̀ і҆и҃са; бг҃оневѣ́стнаѧ дв҃а взыва́ше.

[ѯ҃и] Бл҃гъ є҆сѝ ты̀, гдⷭ҇и, и҆ бл҃гостїю твое́ю наꙋчи́ мѧ ѡ҆правда́нїємъ твои̑мъ.

Ѽ го́ры и҆ хо́лми, и҆ человѣ́кѡвъ мно́жєства, воспла́читесѧ, и҆ всѧ̑ рыда́йте со мно́ю, бг҃а ва́шегѡ мт҃рїю!

[ѯ҃ѳ] Оу҆мно́жисѧ на мѧ̀ непра́вда го́рдыхъ, а҆́зъ же всѣ́мъ се́рдцемъ мои́мъ и҆спыта́ю за́пѡвѣди твоѧ̑.

Когда̀ ᲂу҆ви́ждꙋ тѧ̀, сп҃се, безлѣ́тнаго свѣ́та, ра́дость и҆ сла́дость се́рдца моегѡ̀; дв҃а го́рькѡ вопїѧ́ше.

[ѻ҃] Оу҆сыри́сѧ ꙗ҆́кѡ млеко̀ се́рдце и҆́хъ, а҆́зъ же зако́нꙋ твоемꙋ̀ поꙋчи́хсѧ.

А҆́ще и҆ ꙗ҆́кѡ ка́мень краесѣко́мый, сп҃се, ты̀ прїѧ́лъ є҆сѝ сѣче́нїе, но и҆сточи́лъ є҆сѝ живꙋ́ю стрꙋю̀, ꙗ҆́кѡ и҆сто́чникъ сы́й жи́зни.

[ѻ҃а] Бл҃го мнѣ̀, ꙗ҆́кѡ смири́лъ мѧ̀ є҆сѝ, ꙗ҆́кѡ да наꙋчꙋ́сѧ ѡ҆правда́нїємъ твои̑мъ.

Ꙗ҆́кѡ ѿ и҆сто́чника є҆ди́нагѡ, ѿ ребра̀ твоегѡ̀, сꙋгꙋ́бꙋю рѣкꙋ̀ и҆злива́ющагѡ, напаѧ́еми, безсме́ртнꙋю прїѡбрѣта́емъ жи́знь.

[ѻ҃в] Бл҃гъ мнѣ̀ зако́нъ ᲂу҆́стъ твои́хъ, па́че ты́сѧщъ зла́та и҆ сребра̀.

Во́лею ꙗ҆ви́лсѧ є҆сѝ, сло́ве, во гро́бѣ ме́ртвъ: но живе́ши, и҆ человѣ́ки воскрⷭ҇нїемъ твои́мъ, сп҃се мо́й, воздви́гнеши, ꙗ҆́коже предре́клъ є҆сѝ.

Сла́ва: Воспѣва́емъ, сло́ве, тебѐ всѣ́хъ бг҃а со ѻ҆ц҃е́мъ и҆ ст҃ы́мъ твои́мъ дх҃омъ, и҆ сла́вимъ бж҃е́ственное твоѐ погребе́нїе.

И҆ ны́нѣ, бг҃оро́диченъ: Оу҆бл҃жа́емъ тѧ̀, бцⷣе чтⷭ҇аѧ, и҆ почита́емъ тридне́вное погребе́нїе сн҃а твоегѡ̀ и҆ бг҃а на́шегѡ вѣ́рнѡ.

И҆ па́ки пе́рвый припѣ́въ ѻ҆́ба ли̑ка вкꙋ́пѣ. Та́же, є҆ктенїа̀ ма́лаѧ. И҆ возгла́съ на пе́рвꙋю статїю̀:

Ꙗ҆́кѡ бл҃гослови́сѧ твоѐ и҆́мѧ, и҆ просла́висѧ твоѐ црⷭ҇тво, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

И҆ покади́вшꙋ сщ҃е́нникꙋ, начина́емъ вторꙋ́ю статїю̀.

Статїѧ̀ втора́ѧ.

Начина́етъ лѣ́вый ли́къ бл҃гочи́ннѡ тропа́рь, во гла́съ є҃:

Досто́йно є҆́сть велича́ти тѧ̀ жизнода́вца, на крⷭ҇тѣ̀ рꙋ́цѣ просте́ршаго и҆ сокрꙋши́вшаго держа́вꙋ вра́жїю.

[ѻ҃в] Рꙋ́цѣ твоѝ сотвори́стѣ мѧ̀ и҆ созда́стѣ мѧ̀: вразꙋми́ мѧ, и҆ наꙋчꙋ́сѧ за́повѣдемъ твои̑мъ.

Досто́йно є҆́сть велича́ти тѧ̀ всѣ́хъ зижди́телѧ: твои́ми бо страда́ньми и҆́мамы безстра́стїе, и҆зба́вльшесѧ ѿ тлѣ́нїѧ.

[ѻ҃д] Боѧ́щїисѧ тебє̀ ᲂу҆́зрѧтъ мѧ̀ и҆ возвеселѧ́тсѧ, ꙗ҆́кѡ на словеса̀ твоѧ̑ ᲂу҆пова́хъ.

Оу҆жасе́сѧ землѧ̀, сп҃се, и҆ со́лнце скры́сѧ, тебѣ̀ невече́рнемꙋ свѣ́тꙋ, хрⷭ҇тѐ, заше́дшꙋ во гро́бѣ пло́тски.

[ѻ҃є] Разꙋмѣ́хъ, гдⷭ҇и, ꙗ҆́кѡ пра́вда сꙋдьбы̑ твоѧ̑, и҆ вои́стиннꙋ смири́лъ мѧ̀ є҆сѝ.

Оу҆снꙋ́лъ є҆сѝ, хрⷭ҇тѐ, жизнопода́тельнымъ сно́мъ во гро́бѣ, и҆ ѿ тѧ́жкагѡ сна̀ грѣхо́внагѡ воздви́глъ є҆сѝ ро́дъ человѣ́ческїй.

[ѻ҃ѕ] Бꙋ́ди же млⷭ҇ть твоѧ̀, да ᲂу҆тѣ́шитъ мѧ̀, по словесѝ твоемꙋ̀ рабꙋ̀ твоемꙋ̀.

Є҆ди́на ѿ же́нъ без̾ болѣ́зней роди́хъ тѧ̀, ча́до, ны́нѣ же терплю̀ стрⷭ҇тїю твое́ю болѣ̑зни нестерпи̑мыѧ: глаго́лаше чтⷭ҇аѧ.

[ѻ҃з] Да прїи́дꙋтъ мнѣ̀ щедрѡ́ты твоѧ̑, и҆ жи́въ бꙋ́дꙋ, ꙗ҆́кѡ зако́нъ тво́й поꙋче́нїе моѐ є҆́сть.

Горѣ́ тѧ, сп҃се, неразлꙋ́чнѡ со ѻ҆ц҃е́мъ сꙋ́ща, до́лꙋ же ме́ртва просте́рта на землѝ зрѧ́ще, ᲂу҆жаса́ютсѧ серафі́ми.

[ѻ҃и] Да постыдѧ́тсѧ го́рдїи, ꙗ҆́кѡ непра́веднѡ беззако́нноваша на мѧ̀: а҆́зъ же ꙾поглꙋмлю́сѧ¹³꙾ въ за́повѣдехъ твои́хъ.

Раздира́етсѧ цр҃ко́внаѧ завѣ́са твои́мъ распѧ́тїемъ, сло́ве: закрыва́ютъ свѣти̑ла свѣ́тъ, тебѣ̀ сл҃нцꙋ скры́вшꙋсѧ под̾ зе́млю.

[ѻ҃ѳ] Да ѡ҆братѧ́тъ мѧ̀ боѧ́щїисѧ тебє̀ и҆ вѣ́дѧщїи свидѣ̑нїѧ твоѧ̑.

Землѝ крꙋ́гъ и҆знача́ла є҆ди́нѣмъ ма́нїемъ водрꙋзи́вый, бездыха́ненъ ꙗ҆́кѡ человѣ́къ за́йде под̾ зе́млю: ᲂу҆жасни́сѧ видѣ́нїемъ, нб҃о.

[п҃] Бꙋ́ди се́рдце моѐ непоро́чно во ѡ҆правда́нїихъ твои́хъ, ꙗ҆́кѡ да не постыжꙋ́сѧ.

Заше́лъ є҆сѝ под̾ зе́млю, рꙋко́ю твое́ю созда́вый человѣ́ка, да воздви́гнеши ѿ паде́нїѧ собо́ры человѣ́чєскїѧ всеси́льною держа́вою.

[п҃а] И҆счеза́етъ во сп҃се́нїе твоѐ дꙋша̀ моѧ̀, на словеса̀ твоѧ̑ ᲂу҆пова́хъ.

Пла́чь сщ҃е́нный, прїиди́те, воспои́мъ хрⷭ҇тꙋ̀ ᲂу҆ме́ршемꙋ, ꙗ҆́кѡ дре́вле жєны̀ мѷронѡ́сицы, да и҆ ра́дꙋйсѧ ᲂу҆слы́шимъ съ ни́ми.

[п҃в] И҆счезо́ша ѻ҆́чи моѝ въ сло́во твоѐ, глаго́люще: когда̀ ᲂу҆тѣ́шиши мѧ̀;

Мѵ́ро вои́стиннꙋ неистощи́мое є҆сѝ ты̀, сло́ве: тѣ́мже тѝ и҆ мѵ́ро приноша́хꙋ, ꙗ҆́кѡ ме́ртвꙋ живо́мꙋ, жєны̀ мѷронѡ́сицы.

[п҃г] Занѐ бы́хъ ꙗ҆́кѡ мѣ́хъ на сла́нѣ: ѡ҆правда́нїй твои́хъ не забы́хъ.

Погребе́нъ ᲂу҆́бѡ, хрⷭ҇тѐ, а҆дѡва ца̑рствїѧ сокрꙋша́еши, сме́ртїю же сме́рть ᲂу҆мерщвлѧ́еши, и҆ ѿ тлѣ́нїѧ свобожда́еши земнорѡ́дныѧ.

[п҃д] Коли́кѡ є҆́сть дне́й раба̀ твоегѡ̀; когда̀ сотвори́ши мѝ ѿ гонѧ́щихъ мѧ̀ сꙋ́дъ;

То́ки жи́зни пролива́ющаѧ бж҃їѧ премꙋ́дрость, во гро́бъ заше́дши, ѡ҆животворѧ́етъ сꙋ́щыѧ въ непристꙋ́пныхъ а҆́довыхъ мѣ́стѣхъ.

[п҃є] Повѣ́даша мнѣ̀ законопрестꙋ̑пницы глꙋмлє́нїѧ, но не ꙗ҆́кѡ зако́нъ тво́й, гдⷭ҇и.

Да ѡ҆бновлю̀ человѣ́ческое сокрꙋше́нное є҆стество̀, во́лею ᲂу҆ѧ́звленъ є҆́сть сме́ртїю пло́тски: тѣ́мже, мт҃и моѧ̀, не терза́йсѧ рыда́ньми.

[п҃ѕ] Всѧ̑ за́пѡвѣди твоѧ̑ и҆́стина: непра́веднѡ погна́ша мѧ̀, помози́ ми.

Заше́лъ є҆сѝ под̾ зе́млю, свѣти́ло пра́вды, и҆ мє́ртвыѧ ꙗ҆́коже ѿ сна̀ воздви́глъ є҆сѝ, ѿгна́въ всѧ́кꙋю тьмꙋ̀ сꙋ́щꙋю во а҆́дѣ.

[п҃з] Вма́лѣ не сконча́ша менѐ на землѝ: а҆́зъ же не ѡ҆ста́вихъ за́повѣдей твои́хъ.

Зе́рно двоера́сленное жизнепода́тельное въ нѣ̑дра землѝ сѣ́етсѧ со слеза́ми дне́сь: но прозѧ́бнꙋвъ мі́ръ ѡ҆бра́дꙋетъ.

[п҃и] По млⷭ҇ти твое́й живи́ мѧ: и҆ сохраню̀ свидѣ̑нїѧ ᲂу҆́стъ твои́хъ.

Оу҆боѧ́сѧ а҆да́мъ бг҃а ходѧ́ща въ раѝ, ра́дꙋетсѧ же во а҆́дъ соше́дшꙋ, пады́й пре́жде, и҆ ны́нѣ воздвиза́емь.

[п҃ѳ] Во вѣ́къ, гдⷭ҇и, сло́во твоѐ пребыва́етъ на нб҃сѝ.

Лїе́тъ тебѣ̀ возлїѧ̑нїѧ слє́знаѧ, пло́тїю положе ́нꙋ во гро́бѣ, ро́ждшаѧ тѧ̀, хрⷭ҇тѐ, вопїю́щи: воста́ни, ча́до, ꙗ҆́коже предре́клъ є҆сѝ.

[ч҃] Въ ро́дъ и҆ ро́дъ и҆́стина твоѧ̀: ѡ҆снова́лъ є҆сѝ зе́млю, и҆ пребыва́етъ.

Во гро́бѣ но́вѣ бл҃гоговѣ́йнѡ тѧ̀ сокрыва́ѧ, і҆ѡ́сифъ пѣ̑сни и҆схѡ́дныѧ бг҃олѣ̑пныѧ, смѣшє́нныѧ съ рыда́ньми, пое́тъ тебѣ̀, сп҃се.

[ч҃а] Оу҆чине́нїемъ твои́мъ пребыва́етъ де́нь, ꙗ҆́кѡ всѧ́чєскаѧ рабѡ́тна тебѣ̀.

Гвоздьми́ тѧ ко крⷭ҇тꙋ̀ пригвожде́на ᲂу҆зрѣ́вши, мт҃и твоѧ̀, сло́ве, гвоздьмѝ и҆ стрѣла́ми печа́ли го́рькїѧ пронза́етсѧ дꙋше́ю.

[ч҃в] Ꙗ҆́кѡ а҆́ще бы не зако́нъ тво́й поꙋче́нїе моѐ бы́лъ, тогда̀ ᲂу҆́бѡ поги́блъ бы́хъ во смире́нїи мое́мъ.

Зрѧ́щи тѧ̀ всѣ́хъ сла́дость питїе́мъ напаѧ́емаго го́рькимъ, мт҃и слеза́ми лицѐ ѡ҆роша́етъ го́рцѣ.

[ч҃г] Во вѣ́къ не забꙋ́дꙋ ѡ҆правда́нїй твои́хъ, ꙗ҆́кѡ въ ни́хъ ѡ҆живи́лъ мѧ̀ є҆сѝ.

Оу҆ѧзвлѧ́юсѧ лю́тѣ и҆ терза́юсѧ ᲂу҆тро́бою, сло́ве, зрѧ́щи непра́ведное твоѐ заколе́нїе, глаго́лаше пречтⷭ҇аѧ съ пла́чемъ.

[ч҃д] Тво́й є҆́смь а҆́зъ, сп҃си́ мѧ, ꙗ҆́кѡ ѡ҆правда́нїй твои́хъ взыска́хъ.

Ѻ҆́ко сла́дкое и҆ ᲂу҆стнѣ̀ твоѝ ка́кѡ закры́ю, сло́ве; ка́кѡ же тѧ̀ а҆́ки мертвеца̀ погребꙋ̀; ᲂу҆жаса́ѧсѧ вопїѧ́ше і҆ѡ́сифъ.

[ч҃є] Менѐ жда́ша грѣ̑шницы погꙋби́ти мѧ̀: свидѣ̑нїѧ твоѧ̑ разꙋмѣ́хъ.

Пѣ̑сни надгрѡ́бныѧ і҆ѡ́сифъ и҆ нїкоди́мъ пою́тъ хрⷭ҇тꙋ̀ ᲂу҆ме́ршемꙋ ны́нѣ: пою́тъ же съ ни́ми и҆ серафі́ми.

[ч҃ѕ] Всѧ́кїѧ кончи́ны ви́дѣхъ коне́цъ: широка̀ за́повѣдь твоѧ̀ ѕѣлѡ̀.

Захо́диши под̾ зе́млю, сп҃се, сл҃нце пра́вды: тѣ́мже ро́ждшаѧ тѧ̀ лꙋна̀ ѿ печа́лей затмева́етсѧ, ви́да твоегѡ̀ лиша́ема.

[ч҃з] Ко́ль возлюби́хъ зако́нъ тво́й, гдⷭ҇и! ве́сь де́нь поꙋче́нїе моѐ є҆́сть.

Оу҆жасе́сѧ а҆́дъ, сп҃се, зрѧ́ тѧ жизнода́вца, бога́тство ѻ҆́нагѡ расхища́юща и҆ сꙋ́щыѧ ѿ вѣ́ка мє́ртвыѧ возставлѧ́юща.

[ч҃и] Па́че вра̑гъ мои́хъ ᲂу҆мꙋдри́лъ мѧ̀ є҆сѝ за́повѣдїю твое́ю, ꙗ҆́кѡ въ вѣ́къ моѧ̀ є҆́сть.

Со́лнце свѣ́тъ возсїѧва́етъ по но́щи, сло́ве: и҆ ты́, воскре́съ, просїѧ́й по сме́рти ꙗ҆́снѡ, ꙗ҆́кѡ ѿ черто́га.

[ч҃ѳ ] Па́че всѣ́хъ ᲂу҆ча́щихъ мѧ̀ разꙋмѣ́хъ, ꙗ҆́кѡ свидѣ̑нїѧ твоѧ̑ поꙋче́нїе моѐ є҆́сть.

Землѧ́ тѧ, созда́телю, въ нѣ̑дра прїе́мши, тре́петомъ содержи́ма, сп҃се, трѧсе́тсѧ, возбꙋди́вши мє́ртвыѧ трѧсе́нїемъ.

[р҃] Па́че ста́рєцъ разꙋмѣ́хъ, ꙗ҆́кѡ за́пѡвѣди твоѧ̑ взыска́хъ.

Мѵ́ромъ тѧ̀, хрⷭ҇тѐ, ны́нѣ новолѣ́пнѡ пома́завше, нїкоди́мъ и҆ бл҃гоѡбра́зный вопїѧ́хꙋ: ᲂу҆жасни́сѧ, всѧ̀ землѐ!

[р҃а] Ѿ всѧ́кагѡ пꙋтѝ лꙋка́ва возбрани́хъ нога́мъ мои̑мъ, ꙗ҆́кѡ да сохраню̀ словеса̀ твоѧ̑.

Заше́лъ є҆сѝ, свѣтотво́рче, и҆ съ тобо́ю за́йде свѣ́тъ со́лнца: тре́петомъ же тва́рь содержи́тсѧ, тѧ̀ проповѣ́дающи всѣ́хъ творца̀.

[р҃в] Ѿ сꙋде́бъ твои́хъ не ᲂу҆клони́хсѧ, ꙗ҆́кѡ ты̀ законоположи́лъ мѝ є҆сѝ.

Ка́мень ᲂу҆глажде́нный покрыва́етъ краеꙋго́льный ка́мень: человѣ́къ же сме́ртный, ꙗ҆́кѡ сме́ртна, бг҃а сокрыва́етъ ны́нѣ во гро́бѣ. ᲂу҆жасни́сѧ, землѐ!

[р҃г] Ко́ль сладка̑ горта́ни моемꙋ̀ словеса̀ твоѧ̑! па́че ме́да ᲂу҆стѡ́мъ мои̑мъ.

Ви́ждь ᲂу҆ч҃нка̀, є҆го́же люби́лъ є҆сѝ, и҆ твою̀ мт҃рь, ча́до, и҆ вѣща́нїе да́ждь сладча́йшее: взыва́ше пла́чꙋщи чтⷭ҇аѧ.

[р҃д] Ѿ за́повѣдей твои́хъ разꙋмѣ́хъ: сегѡ̀ ра́ди возненави́дѣхъ всѧ́къ пꙋ́ть непра́вды.

Ты̀, сло́ве, ꙗ҆́кѡ сы́й жи́зни пода́тель, на крⷭ҇тѣ̀ простры́йсѧ, і҆ꙋде́євъ не ᲂу҆мертви́лъ є҆сѝ, но воскреси́лъ є҆сѝ и҆ си́хъ мє́ртвыѧ.

[р҃є] Свѣти́льникъ нога́ма мои́ма зако́нъ тво́й, и҆ свѣ́тъ стезѧ́мъ мои̑мъ.

Добро́ты пре́жде не и҆мѣ́лъ є҆сѝ, сло́ве, нижѐ ви́да, є҆гда̀ страда́лъ є҆сѝ: но воскре́съ превозсїѧ́лъ є҆сѝ, ᲂу҆краси́въ человѣ́ки бж҃е́ственными зарѧ́ми.

[р҃ѕ] Клѧ́хсѧ и҆ поста́вихъ сохрани́ти сꙋдьбы̑ пра́вды твоеѧ̀.

Заше́лъ є҆сѝ пло́тїю въ зе́млю, невече́рнѧѧ денни́це, и҆ не терпѧ̀ зрѣ́ти со́лнце поме́рче, полꙋ́дни сꙋ́щꙋ.

[р҃з] Смири́хсѧ до ѕѣла̀: гдⷭ҇и, живи́ мѧ по словесѝ твоемꙋ̀.

Со́лнце и҆ лꙋна̀ вкꙋ́пѣ поме́ркшѧ, сп҃се, рабѡ́мъ бл҃горазꙋ̑мнымъ подража́хꙋсѧ, и҆̀же въ чє́рныѧ ѡ҆дє́жды ѡ҆блача́ютсѧ.

[р҃и] Вѡ́льнаѧ ᲂу҆́стъ мои́хъ бл҃говоли́ же, гдⷭ҇и, и҆ сꙋдьба́мъ твои̑мъ наꙋчи́ мѧ.

Позна̀ тѧ̀ бг҃а со́тникъ, а҆́ще и҆ ᲂу҆мертви́лсѧ є҆сѝ: ка́кѡ ᲂу҆̀бо тѧ̀, бж҃е мо́й, ѡ҆сѧжꙋ̀ рꙋка́ма; ᲂу҆жаса́юсѧ, вопїѧ́ше і҆ѡ́сифъ.

[р҃ѳ] Дꙋша̀ моѧ̀ въ рꙋкꙋ̀ ꙾твоє́ю¹⁴꙾ вы́нꙋ, и҆ зако́на твоегѡ̀ не забы́хъ.

Оу҆снꙋ̀ а҆да́мъ, но сме́рть и҆з̾ ребра̀ и҆зво́дитъ: ты́ же ны́нѣ ᲂу҆снꙋ́въ, сло́ве бж҃їй, и҆сточа́еши ѿ ре́бръ твои́хъ мі́рови жи́знь.

[р҃і] Положи́ша грѣ̑шницы сѣ́ть мнѣ̀, и҆ ѿ за́повѣдей твои́хъ не заблꙋди́хъ.

Оу҆снꙋ́лъ є҆сѝ ма́лѡ, и҆ ѡ҆живи́лъ є҆сѝ ᲂу҆ме́ршыѧ, и҆ воскре́съ воскреси́лъ є҆сѝ спѧ́щыѧ ѿ вѣ́ка, бл҃же.

[ра҃і] Наслѣ́довахъ свидѣ̑нїѧ твоѧ̑ во вѣ́къ, ꙗ҆́кѡ ра́дованїе се́рдца моегѡ̀ сꙋ́ть.

Взѧ́тъ є҆сѝ ѿ землѝ, но и҆сточи́лъ є҆сѝ сп҃се́нїѧ вїно̀, живото́чнаѧ лозо̀: прославлѧ́ю стрⷭ҇ть и҆ крⷭ҇тъ.

[рв҃і] Приклони́хъ се́рдце моѐ сотвори́ти ѡ҆правда̑нїѧ твоѧ̑ въ вѣ́къ за воздаѧ́нїе.

Ка́кѡ невеще́ственнїи чинонача̑льницы, зрѧ́ще тѧ̀, сп҃се, на́га, ѡ҆кровавле́на, ѡ҆сꙋжде́на, терпѧ́хꙋ де́рзость распина́телей;

[рг҃і] Законопрестꙋ̑пныѧ возненави́дѣхъ, зако́нъ же тво́й возлюби́хъ.

Лꙋка́вый, стропо́тнѣйшїй ро́де є҆вре́йскїй! вѣ́далъ є҆сѝ воздвиже́нїе хра́ма: почто̀ ѡ҆сꙋди́лъ є҆сѝ хрⷭ҇та̀;

[рд҃і] Помо́щникъ мо́й и҆ застꙋ́пникъ мо́й є҆сѝ ты̀: на словеса̀ твоѧ̑ ᲂу҆пова́хъ.

Во ѡ҆де́ждꙋ порꙋга́нїѧ ᲂу҆краси́телѧ всѣ́хъ ѡ҆блека́еши, и҆́же нб҃о ѡ҆звѣздѝ и҆ зе́млю ᲂу҆красѝ чꙋ́днѡ.

[рє҃і] Оу҆клони́тесѧ ѿ менє̀, лꙋка́внꙋющїи, и҆ и҆спыта́ю за́пѡвѣди бг҃а моегѡ̀.

Ꙗ҆́коже пти́ца неѧ́сыть, ᲂу҆ѧ́звленъ въ ре́бра твоѧ̑, сло́ве, дѣ́ти твоѧ̑ ᲂу҆ме́ршыѧ ѡ҆живи́лъ є҆сѝ, и҆ска́павъ и҆̀мъ животвѡ́рныѧ то́ки.

[рѕ҃і] Застꙋпи́ мѧ по словесѝ твоемꙋ̀, и҆ жи́въ бꙋ́дꙋ: и҆ не посрамѝ менѐ ѿ ча́ѧнїѧ моегѡ̀.

Со́лнце дре́вле ᲂу҆ста́ви і҆исꙋ́съ, и҆ноплеме́нники сѣкі́й: ты́ же скры́лсѧ є҆сѝ, низлага́ѧ тьмы̀ нача́льника.

[рз҃і] Помози́ ми, и҆ сп҃сꙋ́сѧ, и҆ поꙋчꙋ́сѧ во ѡ҆правда́нїихъ твои́хъ вы́нꙋ.

Ѿ нѣ́дръ ѻ҆ч҃ескихъ неисхо́денъ пребы́въ, ще́дре, и҆ человѣ́къ бы́ти бл҃говоли́лъ є҆сѝ, и҆ во а҆́дъ снизше́лъ є҆сѝ, хрⷭ҇тѐ.

[ри҃і] Оу҆ничижи́лъ є҆сѝ всѧ̑ ѿстꙋпа́ющыѧ ѿ ѡ҆правда́нїй твои́хъ: ꙗ҆́кѡ непра́веднѡ помышле́нїе и҆́хъ.

Вознесе́нъ бы́сть распны́йсѧ, зе́млю на вода́хъ повѣ́сивый, и҆ ꙗ҆́кѡ бездыха́ненъ въ не́й ны́нѣ возлега́етъ: є҆́же не терпѧ́щи трѧса́шесѧ лю́тѣ.

[рѳ҃і] Престꙋпа́ющыѧ непщева́хъ всѧ̑ грѣ̑шныѧ землѝ: сегѡ̀ ра́ди возлюби́хъ свидѣ̑нїѧ твоѧ̑.

Оу҆вы̀ мнѣ̀, ѽ сн҃е! неискꙋсомꙋ́жнаѧ рыда́ющи глаго́лаше: на него́же бо ꙗ҆́кѡ на цр҃ѧ̀ надѣ́ѧхсѧ, ѡ҆сꙋжде́на зрю̀ ны́нѣ на крⷭ҇тѣ̀.

[р҃к] Пригвоздѝ стра́хꙋ твоемꙋ̀ плѡ́ти моѧ̑: ѿ сꙋде́бъ бо твои́хъ ᲂу҆боѧ́хсѧ.

Сїѧ̑ гаврїи́лъ мнѣ̀ возвѣстѝ, є҆гда̀ слетѣ̀, и҆́же речѐ ѡ҆ црⷭ҇твѣ вѣ́чнѣмъ сн҃а моегѡ̀ і҆и҃са.

[рк҃а] Сотвори́хъ сꙋ́дъ и҆ пра́вдꙋ: не преда́ждь менѐ ѡ҆би́дѧщымъ мѧ̀.

Оу҆вы̀, сѷмеѡ́ново соверши́сѧ прⷪ҇ро́чество: тво́й бо ме́чь про́йде се́рдце моѐ, є҆мманꙋ́иле.

[рк҃в] Воспрїимѝ раба̀ твоего̀ во бл҃го, да не ѡ҆клевета́ютъ менѐ го́рдїи.

Понѐ сꙋ́щихъ ѿ ме́ртвыхъ постыди́тесѧ, ѽ і҆ꙋде́є! и҆̀хже возста́ви жизнода́вецъ, є҆го́же вы̀ ᲂу҆би́сте зави́стнѡ.

[рк҃г] Ѻ҆́чи моѝ и҆счезо́стѣ во сп҃се́нїе твоѐ и҆ въ сло́во пра́вды твоеѧ̀.

Оу҆жасе́сѧ со́лнце, ви́дѣвъ тебѐ, неви́димый свѣ́те, хрⷭ҇тѐ мо́й, во гро́бѣ сокрыва́ема и҆ бездыха́нна, и҆ помрачѝ сво́й свѣ́тъ.

[рк҃д] Сотворѝ съ рабо́мъ твои́мъ по млⷭ҇ти твое́й, и҆ ѡ҆правда́нїємъ твои̑мъ наꙋчи́ мѧ.

Пла́каше го́рькѡ пренепоро́чнаѧ мт҃и твоѧ̀, сло́ве, є҆гда̀ во гро́бѣ ви́дѣ тебѐ неизрече́ннаго и҆ безнача́льнаго бг҃а.

[рк҃є] Ра́бъ тво́й є҆́смь а҆́зъ: вразꙋми́ мѧ, и҆ ᲂу҆вѣ́мъ свидѣ̑нїѧ твоѧ̑.

Ме́ртвость твою̀, хрⷭ҇тѐ, зрѧ́щи, нетлѣ́ннаѧ мт҃и твоѧ̀ го́рькѡ къ тебѣ̀ вѣща́ше: не коснѝ, жи́знь, въ ме́ртвыхъ.

[рк҃ѕ] Вре́мѧ сотвори́ти гдⷭ҇еви: разори́ша зако́нъ тво́й.

А҆́дъ лю́тый вострепета̀, є҆гда́ тѧ ви́дѣ, сл҃нце сла́вы безсме́ртне, и҆ и҆здава́ше ю҆́зники со тща́нїемъ.

[рк҃з] Сегѡ̀ ра́ди возлюби́хъ за́пѡвѣди твоѧ̑ па́че зла́та и҆ топа́зїѧ.

Ве́лїе и҆ ᲂу҆жа́сное видѣ́нїе ны́нѣ зри́тсѧ: жи́зни бо вино́вникъ во́лею сме́рть под̾ѧ́тъ, ѡ҆живи́ти хотѧ̀ всѣ́хъ.

[рк҃и] Сегѡ̀ ра́ди ко всѣ̑мъ за́повѣдемъ твои̑мъ направлѧ́хсѧ, всѧ́къ пꙋ́ть непра́вды возненави́дѣхъ.

Пробода́ешисѧ въ ре́бра и҆ пригвожда́ешисѧ въ рꙋ́цѣ ты̀, влⷣко, ꙗ҆́звꙋ ѿ ребра̀ и҆ невоздержа́нїе рꙋ́къ пра́ѻтєцъ и҆сцѣлѧ́ѧ.

[рк҃ѳ] Ди̑вна свидѣ̑нїѧ твоѧ̑: сегѡ̀ ра́ди и҆спыта̀ ѧ҆̀ дꙋша̀ моѧ̀.

Пре́жде ѡ҆ рахи́линѣ сы́нѣ пла́касѧ всѧ́къ въ домꙋ̀: ны́нѣ ѡ҆ сн҃ѣ дв҃ы рыда́ша ᲂу҆чени̑къ ли́къ съ мт҃рїю.

[р҃л] Ꙗ҆вле́нїе слове́съ твои́хъ просвѣща́етъ и҆ вразꙋмлѧ́етъ младе́нцы.

Оу҆даре́нїе рꙋ́къ да́ша по лани́тѣ хрⷭ҇тꙋ̀, рꙋко́ю человѣ́ка созда́вшемꙋ и҆ зꙋ́бы ѕвѣ́рѧ сокрꙋши́вшемꙋ.

[рл҃а] Оу҆ста̀ моѧ̑ ѿверзо́хъ, и҆ привлеко́хъ дꙋ́хъ, ꙗ҆́кѡ за́повѣдей твои́хъ жела́хъ.

Пѣ́сньми твоѐ, хрⷭ҇тѐ, распѧ́тїе и҆ погребе́нїе ны́нѣ всѝ вѣ́рнїи пра́зднꙋемъ, и҆зба́вльшесѧ ѿ сме́рти погребе́нїемъ твои́мъ.

Сла́ва, трⷪ҇ченъ: Безнача́льне бж҃е, соприсносꙋ́щне сло́ве и҆ дш҃е, [ски́птръ правосла́внагѡ і҆мпера́тора и҆:] лю́ди правосла́вныѧ ᲂу҆крѣпѝ на врагѝ, ꙗ҆́кѡ бл҃гъ.

И҆ ны́нѣ, бг҃оро́диченъ: Жи́знь ро́ждшаѧ, пренепоро́чнаѧ чтⷭ҇аѧ дв҃о, ᲂу҆толѝ церкѡ́вныѧ собла́зны и҆ пода́ждь ми́ръ, ꙗ҆́кѡ бл҃га́ѧ.

И҆ па́ки пе́рвый тропа́рь ѻ҆́ба ли́ка. Та́же є҆ктенїа̀ ма́лаѧ.

Возгла́съ: Ꙗ҆́кѡ ст҃ъ є҆сѝ, бж҃е на́шъ, на прⷭ҇то́лѣ сла́вы херꙋві́мстѣмъ почива́ѧй, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ съ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

И҆ начина́емъ тре́тїю статїю̀, кадѧ́щꙋ сщ҃е́нникꙋ.

Статїѧ̀ тре́тїѧ.

Начина́етъ па́ки со сладкопѣ́нїемъ десны́й, си́рѣчь пе́рвый ли́къ, на гла́съ г҃-й:

Ро́ди всѝ пѣ́снь погребе́нїю твоемꙋ̀ прино́сѧтъ, хрⷭ҇тѐ мо́й.

[рл҃в] При́зри на мѧ̀ и҆ поми́лꙋй мѧ̀, по сꙋдꙋ̀ лю́бѧщихъ и҆́мѧ твоѐ.

Сне́мъ съ дре́ва, плащани́цею ѡ҆бви́въ, а҆рїмаѳе́й во гро́бѣ тѧ̀ погреба́етъ.

[рл҃г] Стѡпы̀ моѧ̑ напра́ви по словесѝ твоемꙋ̀, и҆ да не ѡ҆блада́етъ мно́ю всѧ́кое беззако́нїе.

Мѷронѡ́сицы прїидо́ша, мѵ́ра тебѣ̀, хрⷭ҇тѐ мо́й, носѧ́щѧ премꙋ́дрѡ.

[рл҃д] И҆зба́ви мѧ̀ ѿ клеветы̀ человѣ́ческїѧ, и҆ сохраню̀ за́пѡвѣди твоѧ̑.

Грѧдѝ, всѧ̀ тва́рь, пѣ̑сни и҆схѡ́дныѧ принесе́мъ зижди́телю.

[рл҃є] Лицѐ твоѐ просвѣтѝ на раба̀ твоего̀, и҆ наꙋчи́ мѧ ѡ҆правда́нїємъ твои̑мъ.

Ꙗ҆́кѡ ме́ртва жива́го съ мѷроно́сицами всѝ мѷропома́жемъ мꙋ́дреннѡ.

[рл҃ѕ] И҆схѡ́дища водна̑ѧ и҆зведо́стѣ ѻ҆́чи моѝ, поне́же не сохрани́хъ зако́на твоегѡ̀.

І҆ѡ́сифе требл҃же́нне, погребѝ тѣ́ло хрⷭ҇та̀ жизнода́вца.

[рл҃з] Пра́веденъ є҆сѝ, гдⷭ҇и, и҆ пра́ви сꙋдѝ твоѝ.

И҆̀хже напита̀ ма́нною, ті́и подвиго́ша пѧ́тꙋ на бл҃годѣ́телѧ.

[рл҃и] Заповѣ́далъ є҆сѝ пра́вдꙋ свидѣ̑нїѧ, твоѧ̑, и҆ и҆́стинꙋ ѕѣлѡ̀.

И҆̀хже напита̀ ма́нною, ті́и прино́сѧтъ сп҃сꙋ же́лчь кꙋ́пнѡ и҆ ѻ҆́цетъ.

[рл҃ѳ] И҆ста́ѧла мѧ̀ є҆́сть ре́вность твоѧ̀: ꙗ҆́кѡ забы́ша словеса̀ твоѧ̑ вразѝ моѝ.

Ѽ пребезꙋ́мїѧ и҆ хрⷭ҇тоꙋбі́йства прⷪ҇рокоꙋбі́йцъ!

[р҃м] Разжже́но сло́во твоѐ ѕѣлѡ̀, и҆ ра́бъ тво́й возлюбѝ є҆̀.

Ꙗ҆́коже безꙋ́мный слꙋжи́тель, предадѐ ᲂу҆чени́къ бе́зднꙋ премꙋ́дрости.

[рм҃а] Ю҆нѣ́йшїй а҆́зъ є҆́смь и҆ ᲂу҆ничиже́нъ: ѡ҆правда́нїй твои́хъ не забы́хъ.

И҆зба́вителѧ прода́въ, плѣ́нникъ ꙗ҆ви́сѧ льсти́вый і҆ꙋ́да.

[рм҃в] Пра́вда твоѧ̀ пра́вда во вѣ́къ, и҆ зако́нъ тво́й и҆́стина.

По соломѡ́нꙋ, ро́въ глꙋбо́кїй ᲂу҆ста̀ є҆врє́й беззако́нныхъ.

[рм҃г] Скѡ́рби и҆ нꙋ̑жды ѡ҆брѣто́ша мѧ̀: за́пѡвѣди твоѧ̑ поꙋче́нїе моѐ.

Въ стропо́тныхъ ше́ствїихъ є҆врє́й беззако́нныхъ волчцы̀ и҆ сѣ̑ти.

[рм҃д] Пра́вда свидѣ̑нїѧ твоѧ̑ въ вѣ́къ: вразꙋми́ мѧ, и҆ жи́въ бꙋ́дꙋ.

І҆ѡ́сифъ погреба́етъ съ нїкоди́момъ а҆́ки мертвеца̀ зижди́телѧ.

[рм҃є] Воззва́хъ всѣ́мъ се́рдцемъ мои́мъ: ᲂу҆слы́ши мѧ̀, гдⷭ҇и: ѡ҆правда̑нїѧ твоѧ̑ взыщꙋ̀.

Жизнода́вче сп҃се, сла́ва держа́вѣ твое́й, а҆́дъ разори́вшей.

[рм҃ѕ] Воззва́хъ тѝ: сп҃си́ мѧ, и҆ сохраню̀ свидѣ̑нїѧ твоѧ̑.

Лежа́ща тѧ̀, сло́ве, ви́дѧщи, пречтⷭ҇аѧ мт҃рски пла́каше.

[рм҃з] Предвари́хъ въ безго́дїи, и҆ воззва́хъ, на словеса̀ твоѧ̑ ᲂу҆пова́хъ.

Ѽ сла́дкаѧ моѧ̀ весно̀, сладча́йшее моѐ ча́до! гдѣ̀ твоѧ̀ за́йде добро́та;

[рм҃и] Предвари́стѣ ѻ҆́чи моѝ ко ᲂу҆́трꙋ, поꙋчи́тисѧ словесє́мъ твои̑мъ.

Пла́чь сподвиза́ше всечтⷭ҇аѧ твоѧ̀ мт҃и, тебѣ̀, сло́ве, ᲂу҆ме́ршꙋ.

[рм҃ѳ] Гла́съ мо́й ᲂу҆слы́ши, гдⷭ҇и, по млⷭ҇ти твое́й: по сꙋдьбѣ̀ твое́й живи́ мѧ.

Жєны̀ съ мѵ́ромъ прїидо́ша пома́зати хрⷭ҇та̀ бж҃е́ственнаго мѵ́ра.

[р҃н] Прибли́жишасѧ гонѧ́щїи мѧ̀ беззако́нїемъ, ѿ зако́на же твоегѡ̀ ᲂу҆дали́шасѧ.

Сме́рть сме́ртїю ты̀ ᲂу҆мерщвлѧ́еши, бж҃е мо́й, бж҃е́ственною си́лою твое́ю.

[рн҃а] Бли́зъ є҆сѝ ты̀, гдⷭ҇и, и҆ всѝ пꙋтїѐ твоѝ и҆́стина.

Прельсти́сѧ преле́стникъ, прельсти́выйсѧ же и҆збавлѧ́етсѧ премꙋ́дростїю твое́ю, бж҃е мо́й.

[рн҃в] И҆спе́рва позна́хъ ѿ свидѣ́нїй твои́хъ, ꙗ҆́кѡ въ вѣ́къ ѡ҆снова́лъ ѧ҆̀ є҆сѝ.

Во дно̀ а҆́дово низведе́нъ бы́сть преда́тель, въ кла́денецъ и҆стлѣ́нїѧ.

[рн҃г] Ви́ждь смире́нїе моѐ, и҆ и҆зьми́ мѧ: ꙗ҆́кѡ зако́на твоегѡ̀ не забы́хъ.

Волчцы̀ и҆ сѣ̑ти пꙋтїѐ треѡкаѧ́ннагѡ безꙋ́мнагѡ і҆ꙋ́ды.

[рн҃д] Сꙋдѝ сꙋ́дъ мо́й, и҆ и҆зба́ви мѧ̀: словесѐ ра́ди твоегѡ̀ живи́ мѧ.

Всѝ поги́бнꙋтъ вкꙋ́пе распина́телїе твоѝ, сло́ве, сн҃е бж҃їй всецр҃ю̀.

[рн҃є] Дале́че ѿ грѣ̑шникъ сп҃се́нїе, ꙗ҆́кѡ ѡ҆правда́нїй твои́хъ не взыска́ша.

Въ кладенцѣ̀ и҆стлѣ́нїѧ всѝ поги́бнꙋтъ вкꙋ́пѣ мꙋ́жїе крове́й.

[рн҃ѕ] Щедрѡ́ты твоѧ̑ мнѡ́ги, гдⷭ҇и: по сꙋдьбѣ̀ твое́й живи́ мѧ.

Сн҃е бж҃їй всецр҃ю̀, бж҃е мо́й, созда́тель мо́й, ка́кѡ стрⷭ҇ть под̾ѧ́лъ є҆сѝ;

[рн҃з] Мно́зи и҆згонѧ́щїи мѧ̀ и҆ стꙋжа́ющїи мѝ: ѿ свидѣ́нїй твои́хъ не ᲂу҆клони́хсѧ.

Ю҆́ница, тельца̀ на дре́вѣ повѣ́шена зрѧ́щи, взыва́ше.

[рн҃и] Ви́дѣхъ неразꙋмѣва́ющыѧ и҆ и҆ста́ѧхъ: ꙗ҆́кѡ слове́съ твои́хъ не сохрани́ша.

Тѣ́ло живоно́сное і҆ѡ́сифъ погреба́етъ съ нїкоди́момъ.

[рн҃ѳ] Ви́ждь, ꙗ҆́кѡ за́пѡвѣди твоѧ̑ возлюби́хъ: гдⷭ҇и, по млⷭ҇ти твое́й живи́ мѧ.

Взыва́ше ѻ҆трокови́ца, те́плѣ сле́зы точа́щи, ᲂу҆тро́бою пробода́ема.

[р҃ѯ] Нача́ло слове́съ твои́хъ и҆́стина, и҆ во вѣ́къ всѧ̑ сꙋдьбы̑ пра́вды твоеѧ̀.

Свѣ́те ѻ҆́чїю моє́ю, сладча́йшее моѐ ча́до! ка́кѡ во гро́бѣ ны́нѣ сокрыва́ешисѧ;

[рѯ҃а] Кнѧ́зи погна́ша мѧ̀ тꙋ́не: и҆ ѿ слове́съ твои́хъ ᲂу҆боѧ́сѧ се́рдце моѐ.

Мт҃и, не рыда́й! а҆да́ма и҆ є҆́ѵꙋ свободи́ти, сїѧ̑ страждꙋ̀.

[рѯ҃в] Возра́дꙋюсѧ а҆́зъ ѡ҆ словесѣ́хъ твои́хъ, ꙗ҆́кѡ ѡ҆брѣта́ѧй коры́сть мно́гꙋ.

Прославлѧ́ю твоѐ, сн҃е мо́й, кра́йнее милосе́рдїе, є҆гѡ́же ра́ди сїѧ̑ стра́ждеши.

[рѯ҃г] Непра́вдꙋ возненави́дѣхъ и҆ ѡ҆мерзи́хъ, зако́нъ же тво́й возлюби́хъ.

Ѻ҆́цтомъ напое́нъ бы́лъ є҆сѝ и҆ же́лчїю, ще́дре, разрꙋша́ѧ дре́внее вкꙋше́нїе.

[рѯ҃д] Седмери́цею дне́мъ хвали́хъ тѧ̀ ѡ҆ сꙋдьба́хъ пра́вды твоеѧ̀.

Ко дре́вꙋ пригвожде́нъ бы́лъ є҆сѝ, дре́вле лю́ди твоѧ̑ столпо́мъ ѡ҆́блачнымъ покрыва́ѧй.

[рѯ҃є] Ми́ръ мно́гъ лю́бѧщымъ зако́нъ тво́й, и҆ нѣ́сть и҆̀мъ собла́зна.

Мѷронѡ́сицы, сп҃се, ко гро́бꙋ прише́дшѧ, мѵ́ро приноша́хꙋ тебѣ̀.

[рѯ҃ѕ] Ча́ѧхъ сп҃се́нїѧ твоегѡ̀, гдⷭ҇и, и҆ за́пѡвѣди твоѧ̑ возлюби́хъ.

Воста́ни, ще́дре, ѿ про́пастей а҆́дскихъ возставлѧ́ѧй на́съ.

[рѯ҃з] Сохранѝ дꙋша̀ моѧ̀ свидѣ̑нїѧ твоѧ̑ и҆ возлюбѝ ѧ҆̀ ѕѣлѡ̀.

Воскреснѝ, жизнода́вче! ро́ждшаѧ тѧ̀ мт҃и, сле́зы точа́щи, глаго́летъ.

[рѯ҃и] Сохрани́хъ за́пѡвѣди твоѧ̑ и҆ свидѣ̑нїѧ твоѧ̑, ꙗ҆́кѡ всѝ пꙋтїѐ моѝ пред̾ тобо́ю, гдⷭ҇и.

Потщи́сѧ воскреснꙋ́ти, сло́ве. печа́ль разрѣша́ѧ чи́стѡ ро́ждшїѧ тѧ̀.

[рѯ҃ѳ] Да прибли́житсѧ моле́нїе моѐ пред̾ тѧ̀, гдⷭ҇и: по словесѝ твоемꙋ̀ вразꙋми́ мѧ.

Нбⷭ҇ныѧ си̑лы ᲂу҆жасо́шасѧ стра́хомъ, ме́ртва тѧ̀ зрѧ́щѧ.

[р҃ѻ] Да вни́детъ проше́нїе моѐ пред̾ тѧ̀, гдⷭ҇и: по словесѝ твоемꙋ̀ и҆зба́ви мѧ̀.

Любо́вїю и҆ стра́хомъ стра̑сти твоѧ̑ почита́ющымъ да́ждь прегрѣше́нїй разрѣше́нїе.

[рѻ҃а] Ѿры́гнꙋтъ ᲂу҆стнѣ̀ моѝ пѣ́нїе, є҆гда̀ наꙋчи́ши мѧ̀ ѡ҆правда́нїємъ твои̑мъ.

Ѽ ᲂу҆жа́снагѡ и҆ стра́ннагѡ видѣ́нїѧ, бж҃їй сло́ве! ка́кѡ землѧ́ тѧ покрыва́етъ;

[рѻ҃в] Провѣща́етъ ѧ҆зы́къ мо́й словеса̀ твоѧ̑, ꙗ҆́кѡ всѧ̑ за́пѡвѣди твоѧ̑ пра́вда.

Съ тобо́ю дре́вле, сп҃се, і҆ѡ́сифъ бѣ́гаетъ: и҆ ны́нѣ тѧ̀ и҆́ный [іѡ́сифъ] погреба́етъ.

[рѻ҃г] Да бꙋ́детъ рꙋка̀ твоѧ̀ є҆́же сп҃сти́ мѧ, ꙗ҆́кѡ за́пѡвѣди твоѧ̑ и҆зво́лихъ.

Пла́четъ и҆ рыда́етъ пречтⷭ҇аѧ мт҃и твоѧ̀, сп҃се мо́й, ѡ҆ ᲂу҆ме́ршемъ.

[рѻ҃д] Возжела́хъ сп҃се́нїе твоѐ, гдⷭ҇и, и҆ зако́нъ тво́й поꙋче́нїе моѐ є҆́сть.

Оу҆жаса́ютсѧ ᲂу҆мы̀ стра́ннагѡ и҆ ᲂу҆жа́снагѡ твоегѡ̀, всѣ́хъ созда́телю, погребе́нїѧ.

[рѻ҃є] Жива̀ бꙋ́детъ дꙋша̀ моѧ̀, и҆ восхва́литъ тѧ̀: и҆ сꙋдьбы̑ твоѧ̑ помо́гꙋтъ мнѣ̀.

И҆злїѧ́ша на гро́бъ мѷронѡ́сицы мѵ̑ро, ѕѣлѡ̀ ра́нѡ прише́дшыѧ.

[рѻ҃ѕ] Заблꙋди́хъ ꙗ҆́кѡ ѻ҆вча̀ поги́бшее: взыщѝ раба̀ твоего̀, ꙗ҆́кѡ за́повѣдей твои́хъ не забы́хъ.

Ми́ръ цр҃кви, лю́демъ твои̑мъ сп҃се́нїе да́рꙋй воста́нїемъ твои́мъ.

Сла́ва: Ѽ трⷪ҇це бж҃е мо́й, ѻ҆́ч҃е, сн҃е и҆ дш҃е, поми́лꙋй мі́ръ.

И҆ ны́нѣ: Ви́дѣти твоегѡ̀ сн҃а воскрⷭ҇нїе, дв҃о, сподо́би твоѧ̑ рабы̑.

И҆ а҆́бїе пое́мъ тропарѝ сїѧ̑, во гла́съ є҃:

Бл҃гослове́нъ є҆сѝ, гдⷭ҇и, наꙋчи́ мѧ ѡ҆правда́нїємъ твои̑мъ.

А҆́гг҃льскїй собо́ръ ᲂу҆диви́сѧ, зрѧ̀ тебѐ въ ме́ртвыхъ вмѣни́вшасѧ, сме́рти же, сп҃се, крѣ́пость разори́вша, и҆ съ собо́ю а҆да́ма воздви́гша, и҆ ѿ а҆́да всѧ̑ свобо́ждша.

Бл҃гослове́нъ є҆сѝ, гдⷭ҇и:

Почто̀ мѵ̑ро съ сострада́тельнѣ со слеза́ми, ѽ ᲂу҆чени̑цы, растворѧ́ете; блиста́ѧйсѧ во гро́бѣ а҆́гг҃лъ мѷроно́сицамъ вѣща́ше: ви́дите вы̀ гро́бъ, и҆ ᲂу҆разꙋмѣ́йте, сп҃съ бо воскре́се ѿ гро́ба.

Бл҃гослове́нъ є҆сѝ, гдⷭ҇и:

Ѕѣлѡ̀ ра́нѡ мѷронѡ́сицы теча́хꙋ ко гро́бꙋ твоемꙋ̀ рыда́ющыѧ, но предста̀ къ ни̑мъ а҆́гг҃лъ и҆ речѐ: рыда́нїѧ вре́мѧ преста̀, не пла́чите: воскрⷭ҇нїе же а҆пⷭ҇лѡмъ рцы́те.

Бл҃гослове́нъ є҆сѝ, гдⷭ҇и:

Мѷронѡ́сицы жєны̀, съ мѵ́ры прише́дшыѧ ко гро́бꙋ твоемꙋ̀, сп҃се, рыда́хꙋ. а҆́гг҃лъ же къ ни̑мъ речѐ, глаго́лѧ: что̀ съ ме́ртвыми жива́го помышлѧ́ете; ꙗ҆́кѡ бг҃ъ бо воскре́се ѿ гро́ба.

Сла́ва, трⷪ҇ченъ: Поклони́мсѧ ѻ҆ц҃ꙋ̀, и҆ є҆гѡ̀ сы́нови, и҆ ст҃о́мꙋ дх҃ꙋ, ст҃ѣ́й трⷪ҇цѣ во є҆ди́номъ сꙋществѣ̀, съ серафі̑мы зовꙋ́ще: ст҃ъ, ст҃ъ, ст҃ъ є҆сѝ, гдⷭ҇и.

И҆ ны́нѣ, бг҃оро́диченъ: Жизнода́вца ро́ждши, дв҃о, ѿ грѣха̀ а҆да́ма и҆зба́вила є҆сѝ, ра́дость же є҆́ѵѣ вмѣ́стѡ печа́ли подала̀ є҆сѝ: па́дшыѧ же ѿ жи́зни къ се́й напра́ви и҆з̾ тебє̀ воплоти́выйсѧ бг҃ъ и҆ чл҃вѣ́къ.

А҆ллилꙋ́їа, три́жды.

Та́же, є҆ктенїа̀ ма́лаѧ.

Возгла́съ: Ты́ бо є҆сѝ цр҃ь ми́ра, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ съ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

И҆ пое́мъ сѣда́ленъ днѐ, гла́съ а҃.

Подо́бенъ: Гро́бъ тво́й, сп҃се:

Плащани́цею чи́стою и҆ а҆рѡма̑ты бж҃е́ственными тѣ́ло чтⷭ҇но́е, и҆спроси́въ ᲂу҆ пїла́та, і҆ѡ́сифъ мѷропомазꙋ́етъ и҆ полага́етъ въ но́вѣ гро́бѣ. тѣ́мже ᲂу҆́трꙋ прише́дша, мѷронѡ́сицы жєны̀ возопи́ша: покажѝ на́мъ, ꙗ҆́коже предре́клъ є҆сѝ, хрⷭ҇тѐ, воскрⷭ҇нїе.

Сла́ва, коне́цъ.

И҆ ны́нѣ, дрꙋгі́й подо́бенъ:

Оу҆жасо́шасѧ ли́цы а҆́гг҃льстїи, зрѧ́ще сѣдѧ́щаго въ нѣ́дрѣхъ ѻ҆́ч҃ихъ: ка́кѡ, ꙗ҆́кѡ ме́ртвъ, во гро́бъ полага́етсѧ безсме́ртный! є҆го́же чи́ни а҆́гг҃льстїи ѡ҆крꙋжа́ютъ и҆ сла́вѧтъ съ ме́ртвыми во а҆́дѣ, ꙗ҆́кѡ зижди́телѧ и҆ гдⷭ҇а.

Та́же быва́етъ чте́нїе во є҆ѵⷢ҇лїи толково́мъ, ѿ матѳе́а, зача́ло рд҃і: Во ᲂу҆́трїй же де́нь, и҆́же є҆́сть по пѧтцѣ̀: Воскрⷭ҇нїе хрⷭ҇то́во: не глаго́лемъ. Но а҆́бїе ѱало́мъ н҃. И҆ пое́мъ канѡ́нъ, і҆рмо́съ по два́жды, тропарѝ на в҃і: и҆ па́ки послѣдѝ і҆рмо́съ ѻ҆́ба ли̑ка вкꙋ́пѣ. Є҆́сть же канѡ́нъ, ѿ пе́рвыѧ пѣ́сни до шесты́ѧ, творе́нїе ма́рка мона́ха, є҆пⷭ҇кпа і҆дрꙋ́нтскагѡ: і҆рмосы́ же творе́нїе жены̀ нѣ́кїѧ, кассі́и и҆менꙋ́емыѧ. Ѿ ѕ҃-ы́ѧ же пѣ́сни до конца̀ творе́нїе господи́на космы̀. Краегране́сїе же канѡ́на: Каі̀ си́мерон дѐ са́вватон ме́лпѡ ме́га. Сі́есть: И҆ дне́сь же сꙋббѡ́тꙋ пою̀ вели́кꙋю. Гла́съ ѕ҃.

Пѣ́снь а҃.

І҆рмо́съ: Волно́ю морско́ю скры́вшаго дре́вле гони́телѧ мꙋчи́телѧ под̾ земле́ю скры́ша сп҃се́нныхъ дѣ́ти: но мы̀, ꙗ҆́кѡ ѻ҆трокови̑цы, гдⷭ҇еви пои́мъ, сла́внѡ во просла́висѧ.

[К] Гдⷭ҇и бж҃е мо́й! и҆схо́дное пѣ́нїе и҆ надгро́бнꙋю пѣ́снь воспою̀ тебѣ̀, погребе́нїемъ твои́мъ жи́зни вхо́ды мѝ ѿве́рзшемꙋ и҆ сме́ртїю сме́рть и҆ а҆́дъ ᲂу҆мертви́вшемꙋ.

[А] Горѣ́ тѧ на прⷭ҇то́лѣ и҆ до́лѣ во гро́бѣ разꙋмѣва̑юща, сп҃се мо́й, премі̑рнаѧ и҆ подзє́мнаѧ зы́блѧхꙋсѧ ᲂу҆мерщвле́нїемъ твои́мъ: па́че бо ᲂу҆ма́ ви́дѣнъ бы́лъ є҆сѝ ме́ртвъ, живонача́льниче.

[І] Да твоеѧ̀ сла́вы всѧ̑ и҆спо́лниши, сше́лъ є҆сѝ въ преиспѡ́днѧѧ землѝ: ѿ тебє̀ бо не скры́сѧ мо́й во а҆да́мѣ соста́въ. и҆ погребе́нъ бы́въ, и҆стлѣ́вша мѧ̀ ѡ҆бновлѧ́еши, чл҃вѣколю́бче.

Пѣ́снь г҃.

І҆рмо́съ: Тебѐ, на вода́хъ повѣ́сившаго всю̀ зе́млю недержи́мѡ, тва́рь ви́дѣвши на ло́бнѣмъ ви́сѧща, ᲂу҆́жасомъ мно́гимъ содрога́шесѧ, нѣ́сть ст҃ъ ра́звѣ тебє̀, гдⷭ҇и, взыва́ющи.

[С] Ѡ҆́бразы погребе́нїѧ твоегѡ̀ показа́лъ є҆сѝ, влⷣко, видѣ̑нїѧ ᲂу҆мно́живъ: ны́нѣ же сокровє́ннаѧ твоѧ̑ бг҃омꙋ́жнѡ ᲂу҆ѧсни́лъ є҆сѝ и҆ сꙋ́щымъ во а҆́дѣ, нѣ́сть ст҃ъ ра́звѣ тебє̀, гдⷭ҇и, взыва́ющымъ.

[И] Просте́рлъ є҆сѝ дла̑ни, сп҃се, и҆ соедини́лъ є҆сѝ дре́вле разстоѧ̑щаѧсѧ: ᲂу҆покое́нїемъ же въ плащани́цѣ и҆ во гро́бѣ разрѣши́лъ є҆сѝ ѡ҆кова̑нныѧ, нѣ́сть ст҃ъ ра́звѣ тебє̀, гдⷭ҇и, взыва́ющыѧ.

[М] Гро́бомъ и҆ печа́тьми, невмѣсти́ме, содержи́мь бы́лъ є҆сѝ хотѣ́нїемъ: и҆́бо си́лꙋ твою̀ дѣ́йствы бг҃одѣ́йственнѡ показа́лъ є҆сѝ пою́щымъ: нѣ́сть ст҃ъ ра́звѣ тебє̀, гдⷭ҇и чл҃вѣколю́бче.

Сѣда́ленъ, гла́съ а҃:

Гро́бъ тво́й, сп҃се, стрегꙋ́щїи во́ини бы́ша ме́ртви ѿ ѡ҆блиста́нїѧ ꙗ҆́вльшагѡсѧ а҆́гг҃ла, проповѣ́дающа жена́мъ воскрⷭ҇нїе. тебѐ сла́вимъ, тлѣ́нїѧ и҆стреби́телѧ: тебѣ̀ припа́даемъ, воскре́сшемꙋ и҆з̾ гро́ба и҆ є҆ди́номꙋ бг҃ꙋ на́шемꙋ.

Сла́ва, и҆ ны́нѣ, то́йже.

Пѣ́снь д҃.

І҆рмо́съ: На крⷭ҇тѣ̀ твоѐ бж҃е́ственное и҆стоща́нїе прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ си́льныхъ держа́вꙋ пресѣ́клъ є҆сѝ, бл҃же, прїѻбща́ѧсѧ сꙋ́щымъ во а҆́дѣ, ꙗ҆́кѡ всеси́ленъ.

[Е] Седмы́й де́нь дне́сь ѡ҆ст҃и́лъ є҆сѝ, є҆го́же дре́вле бл҃гослови́лъ є҆сѝ ᲂу҆покое́нїемъ ѿ дѣ́лъ: премѣнѧ́еши бо всѧ́чєскаѧ, сп҃се мо́й, и҆ ѡ҆бновлѧ́еши, сꙋббѡ́тствꙋѧ и҆ возсозида́ѧ.

[Р] Внегда̀ си́лою лꙋ́чшагѡ ты̀ побѣди́лъ є҆сѝ, сло́ве, ѿ пло́ти дꙋша̀ твоѧ̀ раздѣли́сѧ, растерза́ющи ѻ҆боѧ̀ ᲂу҆́зы, сме́рти и҆ а҆́да, держа́вою твое́ю.

[О] А҆́дъ срѣ́тъ тѧ̀, сло́ве, ѡ҆горчи́сѧ, чл҃вѣ́ка зрѧ̀ ѡ҆боже́на, ᲂу҆ѧ́звлена ра́нами, и҆ всесильнодѣ́телѧ: стра́хомъ же зра́ка твоегѡ̀ воскрича̀.

Пѣ́снь є҃.

І҆рмо́съ: Бг҃оѧвле́нїѧ твоегѡ̀, хрⷭ҇тѐ, къ на́мъ ми́лостивнѡ бы́вшагѡ, и҆са́їа свѣ́тъ ви́дѣвъ невече́рнїй, и҆з̾ но́щи ᲂу҆́треневавъ взыва́ше: воскре́снꙋтъ ме́ртвїи, и҆ воста́нꙋтъ сꙋ́щїи во гробѣ́хъ, и҆ всѝ земноро́днїи возра́дꙋютсѧ.

[Н] Нѡ́вы твори́ши земнорѡ́дныѧ, созда́телю, пе́рстенъ бы́въ, и҆ плащани́ца и҆ гро́бъ ꙗ҆влѧ́ютъ соприсꙋ́щее тебѣ̀, сло́ве, та́инство: бл҃гоѡбра́зный бо совѣ́тникъ и҆сполнѧ́етъ совѣ́тъ тебѐ ро́ждшагѡ, въ тебѣ̀ велелѣ́пнѡ ѡ҆бновлѧ́ющагѡ мѧ̀.

[Д] Сме́ртїю сме́ртное, погребе́нїемъ тлѣ́нное прелага́еши, нетлѣ́нно бо твори́ши ꙗ҆́кѡ бг҃ъ, безсме́ртно творѧ̀ воспрїѧ́тое є҆стество̀: пло́ть бо твоѧ̀ и҆стлѣ́нїѧ не ви́дѣ, влⷣко, и҆ дꙋша̀ твоѧ̀ во а҆́дѣ ди́внѡ не ѡ҆ста́влена бы́сть.

[Е] И҆з̾ небра́чныѧ проше́дъ и҆ прободе́нъ въ ре́бра, содѣ́телю мо́й, и҆з̾ неѧ̀ содѣ́лалъ є҆сѝ ѡ҆бновле́нїе є҆́ѵино, а҆да́мъ бы́въ, ᲂу҆снꙋ́въ па́че є҆стества̀ сно́мъ жизнопода́тельнымъ и҆ жи́знь воздви́гнꙋвъ ѿ сна̀ и҆ тлѣ́нїѧ, ꙗ҆́кѡ всеси́ленъ.

Пѣ́снь ѕ҃.

[С] І҆рмо́съ: Ꙗ҆́тъ бы́сть, но не ᲂу҆держа́нъ въ пе́рсѣхъ ки́товыхъ і҆ѡ́на: тво́й бо ѡ҆́бразъ носѧ̀ страда́вшагѡ и҆ погребе́нїю да́вшагѡсѧ, ꙗ҆́кѡ ѿ черто́га ѿ ѕвѣ́рѧ и҆зы́де, возглаша́ше же кꙋстѡді́и: хранѧ́щїи сꙋ́єтнаѧ и҆ лѡ́жнаѧ, млⷭ҇ть сїю̀ ѡ҆ста́вили є҆стѐ.

[А] Оу҆бїе́нъ бы́лъ є҆сѝ, сло́ве, но не разлꙋчи́лсѧ є҆сѝ ѿ пло́ти, є҆ѧ́же причасти́лсѧ є҆сѝ: а҆́ще бо и҆ разори́сѧ тво́й хра́мъ во вре́мѧ стрⷭ҇ти, но и҆ та́кѡ є҆ди́на бѣ̀ ѵ҆поста́сь бж҃ества̀ и҆ пло́ти твоеѧ̀. во ѻ҆бои́хъ бо є҆ди́нъ є҆сѝ сн҃ъ, сло́во бж҃їе, бг҃ъ и҆ чл҃вѣ́къ.

[В] Человѣкоꙋбі́йственно, но не бг҃оꙋбі́йственно бы́сть прегрѣше́нїе а҆да́мово: а҆́ще бо и҆ пострада̀ твоеѧ̀ пло́ти пе́рстное сꙋщество̀, но бж҃ество̀ безстра́стно пребы́сть: тлѣ́нное же твоѐ на нетлѣ́нїе преложи́лъ є҆сѝ, и҆ нетлѣ́нныѧ жи́зни и҆сто́чникъ показа́лъ є҆сѝ воскрⷭ҇нїемъ.

[В] Ца́рствꙋетъ а҆́дъ над̾ ро́домъ человѣ́ческимъ, но не вѣ́чнѡ: ты́ бо положе́нъ во гро́бѣ, держа́вне, живонача́льною дла́нїю затво́ры сме́рти расто́рглъ є҆сѝ, сп҃се, и҆ проповѣ́далъ є҆сѝ ѿ вѣ́ка та́мѡ спѧ́щымъ и҆збавле́нїе нело́жное, бы́въ мє́ртвымъ пе́рвенецъ.

Конда́къ, гла́съ ѕ҃:

Бе́зднꙋ затвори́вый ме́ртвъ зри́тсѧ: и҆ смѵ́рною и҆ плащани́цею ѡ҆бви́тъ, во гро́бѣ полага́етсѧ безсме́ртный ꙗ҆́кѡ сме́ртенъ. жены́ же прїидо́ша пома́зати є҆го̀ мѵ́ромъ, пла́чꙋщѧ го́рькѡ и҆ вопїю́щѧ: сїѧ̀ сꙋббѡ́та є҆́сть пребл҃гослове́ннаѧ, въ не́йже хрⷭ҇то́съ ᲂу҆снꙋ́въ, воскре́снетъ тридне́венъ.

І҆́косъ: Содержа́й всѧ̑ на крⷭ҇тъ вознесе́сѧ, и҆ рыда́етъ всѧ̀ тва́рь, того̀ ви́дѧщи на́га ви́сѧща на дре́вѣ. со́лнце лꙋчы̀ сокры̀, и҆ ѕвѣ́зды ѿлага́хꙋ свѣ́тъ, землѧ́ же со мно́гимъ стра́хомъ колеба́шесѧ: мо́ре побѣжѐ, и҆ ка́менїе распадо́шасѧ: гро́би же мно́зи ѿверзо́шасѧ, и҆ тѣлеса̀ ст҃ы́хъ мꙋже́й воста́ша. а҆́дъ ни́зꙋ стене́тъ, и҆ і҆ꙋде́е совѣща́ютъ ѡ҆клевета́ти хрⷭ҇то́во воскрⷭ҇нїе. жєны́ же взыва́ютъ: сїѧ̀ сꙋббѡ́та є҆́сть пребл҃гослове́ннаѧ, въ не́йже хрⷭ҇то́съ ᲂу҆снꙋ́въ, воскре́снетъ тридне́венъ.

Сѷнаѯа́рїй.

Стїхѝ: Всꙋ́е храни́ши гро́бъ, кꙋстѡді́е:

Не ᲂу҆держи́тъ бо̀ ра́ка самосꙋ́щꙋю жи́знь.

Во ст҃ꙋ́ю и҆ вели́кꙋю сꙋббѡ́тꙋ пра́зднꙋемъ бг҃отѣле́сное погребе́нїе и҆ во а҆́дъ соше́ствїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀, и҆́миже на́шъ ро́дъ, ѿ тлѣ́нїѧ воззва́нъ бы́въ, къ вѣ́чнѣй жи́зни пре́йде. Всѧ̑ ᲂу҆́бѡ днѝ ст҃а́ѧ четыредесѧ́тница превосхо́дитъ: тоѧ́ же па́ки бо́льши є҆́сть сїѧ̀ ст҃а́ѧ и҆ вели́каѧ седми́ца: вели́кїѧ же седми́цы па́ки бо́льши є҆́сть сїѧ̀ вели́каѧ и҆ ст҃а́ѧ сꙋббѡ́та. Глаго́летсѧ же вели́каѧ седми́ца, не ꙗ҆́кѡ бо́льши сꙋ́ть дні́е сі́и, и҆лѝ часы̀, но ꙗ҆́кѡ вели̑каѧ и҆ преесте́ствєннаѧ чꙋдеса̀ и҆ и҆зрѧ̑днаѧ сп҃са на́шегѡ дѣла̀ въ не́й содѣ́ѧшасѧ, и҆ наипа́че дне́сь. Ꙗ҆́коже бо въ пе́рвомъ мїротворе́нїи, всѧ́кое дѣ́ло содѣ́лавъ бг҃ъ, и҆ послѣдѝ гла́внѣйшее, въ шесты́й де́нь созда́въ человѣ́ка, въ седмы́й почѝ ѿ всѣ́хъ дѣ́лъ свои́хъ, и҆ ѡ҆ст҃ѝ є҆го̀, сꙋббѡ́тꙋ и҆менова́въ, ꙗ҆́же ᲂу҆покое́нїе толкꙋ́етсѧ: си́це и҆ во ᲂу҆́мнагѡ мі́ра дѣ́ланїи, и҆зрѧ́днѣ всѧ̑ содѣ́лавъ, и҆ въ шесты́й де́нь па́ки возсозда́въ и҆стлѣ́вшаго человѣ́ка, и҆ ѡ҆бнови́въ живоно́снымъ крⷭ҇то́мъ и҆ сме́ртїю, въ настоѧ́щїй седмы́й де́нь ᲂу҆поко́исѧ соверше́ннымъ ѿ дѣ́лъ ᲂу҆покое́нїемъ, ᲂу҆снꙋ́въ животво́рнымъ и҆ сп҃си́тельнымъ сно́мъ. Снизхо́дитъ ᲂу҆́бѡ бж҃їе сло́во съ пло́тїю во гро́бъ, схо́дитъ же и҆ во а҆́дъ съ нетлѣ́нною и҆ бж҃е́ственною свое́ю дꙋше́ю, раздѣ́льшеюсѧ въ сме́рти ѿ тѣлесѐ, ю҆́же и҆ въ рꙋ́цѣ предадѐ ѻ҆ц҃ꙋ̀, є҆мꙋ́же не проси́вшꙋ и҆ свою̀ кро́вь принесѐ, и҆збавле́нїе на́мъ бы́вшꙋю. Во а҆́дѣ бо гдⷭ҇нѧ дꙋша̀, ꙗ҆́коже дрꙋги́хъ ст҃ы́хъ дꙋ́шы, не бы́сть ᲂу҆держа́на: ка́кѡ бо; ѿню́дъ не подлежа́щи прароди́тельнѣй клѧ́твѣ, ꙗ҆́коже ѻ҆́ны. Но и҆ кро́ви, є҆́юже кꙋ́плени бы́хомъ, не взѧ́тъ вра́гъ на́шъ дїа́волъ, а҆́ще и҆ держа́ше на́съ: ка́кѡ бо, а҆́ще не то́чїю ѿ бг҃а; но и҆ бг҃а сама́го можа́ше ли разбо́йникъ дїа́волъ ꙗ҆́ти; Ѻ҆ба́че всели́сѧ во гро́бъ гдⷭ҇ь на́шъ і҆и҃съ хрⷭ҇то́съ, тѣле́снѣ и҆ съ бж҃ество́мъ, соверше́ннѣ пло́ти соедини́вшимсѧ. Бѧ́ше же съ разбо́йникомъ и҆ въ раѝ, и҆ во а҆́дѣ бѧ́ше, ꙗ҆́коже рече́сѧ, со ѡ҆боже́нною свое́ю дꙋше́ю: преесте́ственнѡ же бѣ̀ и҆ со ѻ҆ц҃е́мъ и҆ дх҃омъ сѣдѧ́й ꙗ҆́кѡ бг҃ъ неѡпи́санный: вездѣ́ же бѣ̀, ничто́же бж҃ествꙋ̀ во гро́бѣ стра́ждꙋщꙋ, ꙗ҆́коже нижѐ на крⷭ҇тѣ̀ пострада̀. И҆ тлѣ́нїе ᲂу҆́бѡ, є҆́же є҆́сть разрѣше́нїе дꙋшѝ ѿ тѣ́ла претерпѣ̀ гдⷭ҇не тѣ́ло: растлѣ́нїѧ же, си́рѣчь разрꙋше́нїѧ пло́ти и҆ ᲂу҆де́съ, соверше́ннагѡ погꙋбле́нїѧ ника́коже. Но і҆ѡ́сифъ ᲂу҆́бѡ, ст҃о́е тѣ́ло гдⷭ҇не сне́мъ, во гро́бѣ но́вѣ близ̾ і҆ерⷭ҇ли́ма въ вертогра́дѣ погреба́етъ, ка́мень ве́лїй ѕѣлѡ̀ ко вхо́дꙋ гро́ба положѝвъ. і҆ꙋде́є же, по пѧтцѣ̀, пристꙋпи́вше глаго́лютъ пїла́тꙋ: го́споди, помѧнꙋ́хомъ, ꙗ҆́кѡ льсте́цъ ѻ҆́ный речѐ, є҆гда̀ жи́въ бѣ̀, ꙗ҆́кѡ по трїе́хъ дне́хъ воста́нꙋ: мни́тсѧ ᲂу҆̀бо на́мъ добро̀ бы́ти, да твоѧ̀ вла́сть повели́тъ во́инствꙋ затверди́ти гро́бъ. Когда́ же хрⷭ҇то́съ речѐ: воста́нꙋ; Мо́щно є҆́сть, ꙗ҆́кѡ и҆ ѿ при́тчи ѡ҆ і҆ѡ́нѣ прⷭ҇ро́цѣ сїѐ и҆звожда́хꙋ і҆ꙋде́є. Ѿвѣща̀ же пїла́тъ: а҆́ще ᲂу҆̀бо льсте́цъ бѣ́, что̀ ѡ҆ глаго́лѣхъ є҆гѡ̀ пече́тесѧ; тогда̀ бо несꙋмнѣ́ннѡ ᲂу҆́мре. Всѧ́кѡ же, глаго́лютъ безꙋ́мнїи, а҆́ще ᲂу҆тверди́тсѧ гро́бъ, не ᲂу҆кра́детсѧ. Ѽле, ка́кѡ безꙋ́мнїи не разꙋмѣва́хꙋ, ꙗ҆́кѡ, є҆ли̑ка себє̀ ра́ди творѧ́хꙋ, на сѧ̀ творѧ́хꙋ! Пїла́тꙋ же повелѣ́вшꙋ, са́ми съ вѡ́ины и҆ и҆звѣ́стною свое́ю печа́тїю затверди́ша гро́бъ, да не, чꙋжде́й сꙋ́щей стра́жи и҆ печа́ти, воскрⷭ҇нїе гдⷭ҇не ѡ҆бо́лгано бы́ло бы. Но а҆́дъ ѿсе́лѣ содрога́етсѧ и҆ и҆з̾ꙋмѣва́етъ, твердѣ́йшꙋю си́лꙋ ѡ҆щꙋща́ѧ: непра́веднагѡ ᲂу҆̀бо ра́ди поглоще́нїѧ хрⷭ҇та̀, твердѣ́йшагѡ и҆ краеꙋго́льнагѡ ка́мене, пома́лѣ и҆зве́ржетъ и҆ всѧ̑ мє́ртвыѧ, ꙗ҆̀же ѿ вѣ́ка положѝ во чре́вѣ, снѣ́дь сотвори́въ.

Неизрече́ннымъ снизхожде́нїемъ твои́мъ, хрⷭ҇тѐ бж҃е на́шъ, поми́лꙋй на́съ. А҆ми́нь.

Пѣ́снь з҃.

[А] І҆рмо́съ: Неизрече́нное чꙋ́до! въ пещѝ и҆зба́вивый преподѡ́бныѧ ѻ҆́троки и҆з̾ пла́мене, во гро́бѣ ме́ртвъ бездыха́ненъ полага́етсѧ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.

[Т] Оу҆ѧ́звленъ бы́сть а҆́дъ въ се́рдцѣ, прїе́мъ ᲂу҆ѧ́звленнаго копїе́мъ въ ре́бра, и҆ стене́тъ ѻ҆гне́мъ бж҃е́ственнымъ снѣда́емь, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.

[О] Бл҃же́нъ гро́бъ! въ себѣ́ бо прїи́мъ ꙗ҆́кѡ спѧ́ща содѣ́телѧ, жи́зни бж҃е́ственное храни́лище показа́сѧ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.

[Н] Зако́номъ ᲂу҆ме́ршихъ, жи́знь всѣ́хъ прїе́млетъ положе́нїе во гро́бѣ и҆ сего̀ показꙋ́етъ и҆сто́чникъ воста́нїѧ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.

[М] Є҆ди́но бѧ́ше во а҆́дѣ, и҆ во гро́бѣ, и҆ во є҆де́мѣ бж҃ество̀ хрⷭ҇то́во неразлꙋ́чно со ѻ҆ц҃е́мъ и҆ дх҃омъ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.

Пѣ́снь и҃.

[Е] І҆рмо́съ: Оу҆жасни́сѧ боѧ́сѧ, нб҃о, и҆ да подви́жатсѧ ѡ҆снова̑нїѧ землѝ: се́ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ, є҆го́же ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.

[Л] Разрꙋши́сѧ пречⷭ҇тый хра́мъ, но съ собо́ю возставлѧ́етъ па́дшꙋю ски́нїю: ко а҆да́мꙋ бо пе́рвомꙋ вторы́й а҆да́мъ, въ вы́шнихъ живы́й, сни́де да́же до а҆́довыхъ храни́лищъ. є҆го́же ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.

[П] Преста̀ дерзнове́нїе ᲂу҆ч҃нкѡ́въ, мꙋ́жествꙋетъ же а҆рїмаѳе́йскїй і҆ѡ́сифъ: ме́ртва бо и҆ на́га зрѧ̀ сꙋ́щаго над̾ всѣ́ми бг҃а, про́ситъ и҆ погреба́етъ, зовы́й: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.

[Ѡ] Ѽ чꙋде́съ но́выхъ! ѽ бл҃гости! ѽ неизрече́ннагѡ терпѣ́нїѧ! во́лею бо под̾ земле́ю запечатлѣ́ваетсѧ въ вы́шнихъ живы́й, и҆ ꙗ҆́кѡ льсте́цъ, бг҃ъ ѡ҆клевета́етсѧ. є҆го́же ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.

Пѣ́снь ѳ҃.

[М] І҆рмо́съ: Не рыда́й ѡ҆ мнѣ̀, мт҃и, зрѧ́щи во гро́бѣ, є҆го́же во чре́вѣ без̾ сѣ́мене зачала̀ є҆сѝ сн҃а: воста́нꙋ бо и҆ просла́влюсѧ и҆ вознесꙋ̀ со сла́вою, ꙗ҆́кѡ бг҃ъ, непреста́ннѡ вѣ́рою и҆ любо́вїю тѧ̀ велича́ющыѧ.

[Е] Во стра́ннѣмъ твое́мъ рождествѣ̀ болѣ́зней и҆збѣжа́вши па́че є҆стества̀, ᲂу҆бл҃же́на бы́хъ, безнача́льне сн҃е: ны́нѣ же тѧ̀, бж҃е мо́й, бездыха́нна зрѧ́щи ме́ртва, ѡ҆рꙋ́жїемъ печа́ли растерза́юсѧ лю́тѣ: но воскрⷭ҇нѝ, ꙗ҆́кѡ да возвели́чꙋсѧ.

[Г] Землѧ̀ покрыва́етъ мѧ̀ хотѧ́ща, мт҃и, но ᲂу҆страша́ютсѧ а҆́дѡвы вра̑тницы, ѡ҆дѣ́ѧна ви́дѧще ѡ҆де́ждою ѿмще́нїѧ ѡ҆кровавле́ною: враги́ бо крⷭ҇то́мъ порази́въ, воскрⷭ҇нꙋ па́ки, ꙗ҆́кѡ бг҃ъ, и҆ возвели́чꙋ тѧ̀.

[А] Да ра́дꙋетсѧ тва́рь, да веселѧ́тсѧ всѝ земноро́днїи, вра́гъ бо а҆́дъ плѣни́сѧ: съ мѵ́ромъ жены̀ да срѣта́ютъ: а҆да́ма всеро́дна со є҆́ѵою и҆збавлѧ́ю, и҆ въ тре́тїй де́нь воскре́снꙋ.

Є҆ѯапостїла́рїй, гла́съ в҃: Ст҃ъ гдⷭ҇ь бг҃ъ на́шъ: три́жды.

На хвали́техъ поста́вимъ стїхѝ д҃, и҆ пое́мъ стїхи̑ры самогла́сны, гла́съ в҃:

Дне́сь содержи́тъ гро́бъ содержа́щаго дла́нїю тва́рь: покрыва́етъ ка́мень покры́вшаго добродѣ́телїю нб҃са̀: спи́тъ жи́знь, и҆ а҆́дъ трепе́щетъ, и҆ а҆да́мъ ѿ ᲂу҆́зъ разрѣша́етсѧ. сла́ва твоемꙋ̀ смотре́нїю, и҆́мже всѧ̑ соверши́въ, сꙋббѡ́тство вѣ́чное дарова́лъ є҆сѝ на́мъ бг҃ъ, всест҃о́е и҆з̾ ме́ртвыхъ твоѐ воскрⷭ҇нїе.

Что̀ зри́мое видѣ́нїе; ко́е настоѧ́щее ᲂу҆покое́нїе; цр҃ь вѣкѡ́въ, стрⷭ҇тїю соверши́въ смотре́нїе, во гро́бѣ сꙋббѡ́тствꙋетъ, но́вое на́мъ подаѧ̀ сꙋббѡ́тство. томꙋ̀ возопїи́мъ: воскреснѝ, бж҃е, сꙋдѧ́й землѝ, ꙗ҆́кѡ ты̀ ца́рствꙋеши во вѣ́ки, безмѣ́рнꙋю и҆мѣ́ѧй ве́лїю млⷭ҇ть.

Прїиди́те, ви́димъ жи́знь на́шꙋ во гро́бѣ лежа́щꙋ, да во гробѣ́хъ лежа́щыѧ ѡ҆живи́тъ. прїиди́те дне́сь, сꙋ́щаго ѿ і҆ꙋ́ды спѧ́ща зрѧ́ще, прⷪ҇ро́чески є҆мꙋ̀ возопїи́мъ: возле́гъ ᲂу҆снꙋ́лъ є҆сѝ ꙗ҆́кѡ ле́въ: кто̀ воздви́гнетъ тѧ̀, цр҃ю̀; но воста́ни самовла́стнѡ, да́вый себѐ за на́съ во́лею. гдⷭ҇и, сла́ва тебѣ̀.

Гла́съ ѕ҃: Просѝ і҆ѡ́сифъ тѣ́ло і҆и҃сово, и҆ положѝ є҆̀ въ но́вѣмъ свое́мъ гро́бѣ: подоба́ше бо є҆мꙋ̀ и҆з̾ гро́ба, ꙗ҆́кѡ и҆з̾ черто́га проитѝ. сокрꙋши́вый держа́вꙋ сме́рти и҆ ѿве́рзый врата̀ ра̑йскаѧ человѣ́кѡмъ, сла́ва тебѣ̀.

Сла́ва, гла́съ ѕ҃: Дне́шнїй де́нь та́инственнѡ вели́кїй мѡѷсе́й проѡбразова́ше, глаго́лѧ: и҆ бл҃гословѝ бг҃ъ де́нь седмы́й. сїѧ́ бо є҆́сть бл҃гослове́ннаѧ сꙋббѡ́та, се́й є҆́сть ᲂу҆покое́нїѧ де́нь, во́ньже почѝ ѿ всѣ́хъ дѣ́лъ свои́хъ є҆диноро́дный сн҃ъ бж҃їй, по смотре́нїю на сме́рть, пло́тїю сꙋббѡ́тствовавъ: и҆ є҆́же бѣ̀, въ то па́ки возвра́щьсѧ, воскрⷭ҇нїемъ дарова̀ на́мъ жи́знь вѣ́чнꙋю, ꙗ҆́кѡ є҆ди́нъ бл҃гъ и҆ чл҃вѣколю́бецъ.

И҆ ны́нѣ, бг҃оро́диченъ, гла́съ в҃: Пребл҃гослове́нна є҆сѝ, бцⷣе дв҃о:

Славосло́вїе вели́кое. Сщ҃е́нникъ же ѡ҆блача́етсѧ во всю̀ сщ҃е́нническꙋю ѡ҆де́ждꙋ, и҆, ѡ҆кади́въ плащани́цꙋ три́жды, и҆́детъ под̾ плащани́цею со ст҃ы́мъ є҆ѵⷢ҇лїемъ ѡ҆́крестъ хра́ма, пѣва́емꙋ трист҃о́мꙋ. По трист҃о́мъ же, ста́въ пред̾ цр҃скими враты̀, сщ҃е́нникъ глаго́летъ: Премꙋ́дрость. И҆ мы̀ тропа́рь є҆ди́ножды: Бл҃гоѡбра́зный і҆ѡ́сифъ:

И҆ глаго́лемъ тропа́рь прⷪ҇ро́чества, гла́съ в҃:

Содержѧ́й концы̀, гро́бомъ содержа́тисѧ и҆зво́лилъ є҆сѝ, хрⷭ҇тѐ, да ѿ а҆́дова ниспаде́нїѧ и҆зба́виши человѣ́чество, и҆ ѡ҆безсме́ртивъ ѡ҆живи́ши на́съ, ꙗ҆́кѡ бг҃ъ безсме́ртный.

Сла́ва, коне́цъ. И҆ ны́нѣ, ве́сь.

Та́же прокі́менъ, ѱало́мъ м҃г, гла́съ д҃: Воскрⷭ҇нѝ, гдⷭ҇и, помозѝ на́мъ, и҆ и҆зба́ви на́съ и҆́мене ра́ди твоегѡ̀. Сті́хъ: Бж҃е, ᲂу҆ши́ма на́шима ᲂу҆слы́шахомъ, и҆ ѻ҆тцы̀ на́ши возвѣсти́ша на́мъ.

Прⷪ҇ро́чества і҆езекїи́лева чте́нїе. [Глава̀ л҃з, ст. а҃-д҃і].

Бы́сть на мнѣ̀ рꙋка̀ гдⷭ҇нѧ, и҆ и҆зведе́ мѧ въ дс҃ѣ гдⷭ҇ни, и҆ поста́ви мѧ̀ средѣ̀ по́лѧ: се́ же бѧ́ше по́лно косте́й человѣ́ческихъ. И҆ ѡ҆бведе́ мѧ ѡ҆́крестъ и҆̀хъ ѡ҆́колѡ, и҆ сѐ мнѡ́ги ѕѣлѡ̀ на лицы̀ по́лѧ, и҆ сѐ сꙋ́хи ѕѣлѡ̀. И҆ речѐ ко мнѣ̀: сы́не человѣ́чь, ѡ҆живꙋ́тъ ли кѡ́сти сїѧ̑; И҆ реко́хъ: гдⷭ҇и бж҃е, ты̀ вѣ́си сїѧ̑. И҆ речѐ ко мнѣ̀: сы́не человѣ́чь, прорцы̀ на кѡ́сти сїѧ̑, и҆ рече́ши и҆̀мъ: кѡ́сти сꙋхі̑ѧ, слы́шите сло́во гдⷭ҇не. Сѐ глаго́летъ а҆дѡнаі̀ гдⷭ҇ь косте́мъ си̑мъ: сѐ а҆́зъ введꙋ̀ въ ва́съ дх҃ъ живо́тенъ, и҆ да́мъ на ва́съ жи̑лы, и҆ возведꙋ̀ на ва́съ пло́ть, и҆ прострꙋ̀ по ва́мъ ко́жꙋ, и҆ да́мъ дх҃ъ мо́й въ ва́съ, и҆ ѡ҆живетѐ, и҆ ᲂу҆вѣ́сте, ꙗ҆́кѡ а҆́зъ є҆́смь гдⷭ҇ь. И҆ прореко́хъ, ꙗ҆́коже заповѣ́да мѝ гдⷭ҇ь. И҆ бы́сть гла́съ внегда́ ми прⷪ҇ро́чествовати, и҆ сѐ трꙋ́съ, и҆ совокꙋплѧ́хꙋсѧ кѡ́сти, ко́сть къ ко́сти, ка́ѧждо къ соста́вꙋ своемꙋ̀. И҆ ви́дѣхъ, и҆ сѐ бы́ша и҆̀мъ жи̑лы, и҆ пло́ть растѧ́ше и҆ восхожда́ше, [и҆ протѧже́сѧ] и҆̀мъ ко́жа верхꙋ̀, дх҃а же не бѧ́ше въ ни́хъ. И҆ речѐ ко мнѣ̀: прорцы̀ ѡ҆ дс҃ѣ, прорцы̀, сы́не человѣ́чь, и҆ рцы̀ дх҃ови: сїѧ̑ глаго́летъ а҆дѡнаі̀ гдⷭ҇ь: ѿ четы́рехъ вѣ́трѡвъ прїидѝ, дш҃е, и҆ вдꙋ́ни на мє́ртвыѧ сїѧ̑, и҆ да ѡ҆живꙋ́тъ. И҆ прореко́хъ, ꙗ҆́коже повелѣ̀ мѝ: и҆ вни́де въ нѧ̀ дх҃ъ жи́зни, и҆ ѡ҆жи́ша, и҆ ста́ша на нога́хъ свои́хъ, собо́ръ мно́гъ ѕѣлѡ̀. И҆ речѐ гдⷭ҇ь ко мнѣ̀, глаго́лѧ: сы́не человѣ́чь, сїѧ̑ кѡ́сти ве́сь до́мъ і҆и҃левъ є҆́сть, ті́и бо глаго́лютъ: сꙋ̑хи бы́ша кѡ́сти на́шѧ, поги́бе наде́жда на́ша, ᲂу҆бїе́ни бы́хомъ. Тогѡ̀ ра́ди прорцы̀, [сы́не человѣ́чь], и҆ рцы̀ къ ни̑мъ: сїѧ̑ глаго́летъ а҆дѡнаі̀ гдⷭ҇ь: сѐ а҆́зъ ѿве́рзꙋ гро́бы ва́шѧ, и҆ и҆зведꙋ̀ ва́съ ѿ грѡ́бъ ва́шихъ, лю́дїе моѝ, и҆ введꙋ̀ вы̀ въ зе́млю і҆и҃левꙋ. И҆ ᲂу҆вѣ́сте, ꙗ҆́кѡ а҆́зъ є҆́смь гдⷭ҇ь, внегда̀ ѿве́рсти мѝ гро́бы ва́шѧ, є҆́же возвести́ ми ва́съ ѿ гробѡ́въ ва́шихъ, лю́дїе моѝ: и҆ да́мъ дх҃ъ мо́й въ ва́съ, и҆ жи́ви бꙋ́дете. И҆ поста́влю вы̀ на землѝ ва́шей, и҆ ᲂу҆вѣ́сте, ꙗ҆́кѡ а҆́зъ гдⷭ҇ь: глаго́лахъ, и҆ сотворю̀, глаго́летъ а҆дѡнаі̀ гдⷭ҇ь.

Прокі́менъ, ѱало́мъ ѳ҃, гла́съ з҃:

Воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀. Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.

А҆пⷭ҇лъ къ корі́нѳѧнѡмъ, зача́ло рл҃г:

Бра́тїе, ма́лъ ква́съ всѐ смѣше́нїе ква́ситъ. Ѡ҆чи́стите ᲂу҆̀бо ве́тхїй ква́съ, да бꙋ́дете но́во смѣше́нїе, ꙗ҆́коже є҆стѐ безква́сни: и҆́бо па́сха на́ша за ны̀ пожре́нъ бы́сть, хрⷭ҇то́съ. Тѣ́мже да пра́зднꙋемъ не въ ква́сѣ ве́тсѣ, ни въ ква́сѣ ѕло́бы и҆ лꙋка́вства, но въ безква́сїихъ чистоты̀ и҆ и҆́стины. ¹⁵ Хрⷭ҇то́съ ны̀ и҆скꙋпи́лъ є҆́сть ѿ клѧ́твы зако́нныѧ, бы́въ по на́съ клѧ́тва: пи́сано бо є҆́сть: про́клѧтъ всѧ́къ ви́сѧй на дре́вѣ: да въ ꙗ҆зы́цѣхъ бл҃гослове́нїе а҆враа́мле бꙋ́детъ ѡ҆ хрⷭ҇тѣ̀ і҆и҃сѣ, да ѡ҆бѣтова́нїе дх҃а прїи́мемъ вѣ́рою.

А҆ллилꙋ́їа, гла́съ є҃: Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀ ненави́дѧщїи є҆го̀. Сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ, ꙗ҆́кѡ та́етъ во́скъ ѿ лица̀ ѻ҆гнѧ̀. Сті́хъ: Та́кѡ да поги́бнꙋтъ грѣ̑шницы ѿ лица̀ бж҃їѧ, а҆ првⷣницы да возвеселѧ́тсѧ.

Є҆ѵⷢ҇лїе ѿ матѳе́а, зача́ло рд҃і: Во ᲂу҆́трїй де́нь, и҆́же є҆́сть по пѧтцѣ̀: Коне́цъ: Съ кꙋстѡді́ею. Та́же є҆ктенїа̀: Рце́мъ всѝ: и҆ И҆спо́лнимъ ᲂу҆́треннюю мл҃твꙋ на́шꙋ: Та́кожде и҆ прѡ́чаѧ ꙗ҆́кѡ ѡ҆бы́чно. И҆ ѿпꙋ́стъ.

И҆ быва́етъ цѣлова́нїе плащани́цы: пѣвцы́ же пою́тъ стїхи́рꙋ, гла́съ є҃:

Прїиди́те, ᲂу҆бл҃жи́мъ і҆ѡ́сифа приснопа́мѧтнаго, въ нощѝ къ пїла́тꙋ прише́дшаго и҆ живота̀ всѣ́хъ и҆спроси́вшаго: да́ждь мѝ сего̀ стра́ннаго, и҆́же не и҆́матъ гдѣ̀ главы̀ подклони́ти: да́ждь мѝ сего̀ стра́ннаго, є҆го́же ᲂу҆чени́къ лꙋка́вый на сме́рть предадѐ: да́ждь мѝ сего̀ стра́ннаго, є҆го́же мт҃и зрѧ́щи на крⷭ҇тѣ̀ ви́сѧща, рыда́ющи вопїѧ́ше и҆ мт҃рски восклица́ше: ᲂу҆вы̀ мнѣ̀, ча́до моѐ! ᲂу҆вы̀ мнѣ̀, свѣ́те мо́й и҆ ᲂу҆тро́бо моѧ̀ возлю́бленнаѧ! сѷмеѡ́номъ бо предрече́нное въ цр҃кви дне́сь собы́стсѧ: моѐ се́рдце ѡ҆рꙋ́жїе про́йде, но въ ра́дость воскрⷭ҇нїѧ твоегѡ̀ пла́чь преложѝ. покланѧ́емсѧ страсте́мъ твои̑мъ, хрⷭ҇тѐ: покланѧ́емсѧ страсте́мъ твои̑мъ, хрⷭ҇тѐ: покланѧ́емсѧ страсте́мъ твои̑мъ, хрⷭ҇тѐ, и҆ ст҃о́мꙋ воскрⷭ҇нїю.

Пе́рвый же ча́съ пое́тсѧ въ притво́рѣ: тре́тїй же ча́съ, шесты́й и҆ девѧ́тый пою́тсѧ вкꙋ́пѣ про́стѡ въ притво́рѣ съ бл҃же́нными во своѐ вре́мѧ.

Во ст҃ꙋ́ю и҆ вели́кꙋю сꙋббѡ́тꙋ ве́чера,

ѡ҆ часѣ̀ десѧ́томъ днѐ кле́плетъ вече́рню. И҆ ѡ҆блача́етсѧ сщ҃е́нникъ во ѡ҆де́ждꙋ, и҆ бл҃гослови́вшемꙋ є҆мꙋ̀, начина́емъ предначина́тельный ѱало́мъ, посе́мъ є҆ктенїа̀ вели́каѧ. Та́же: Гдⷭ҇и воззва́хъ, во гла́съ а҃. И҆ поста́вимъ стїхѡ́въ и҃. Пое́мъ же стїхи̑ры воскрⷭ҇ныѧ ѻ҆смогла́сника г҃, и҆ ѿ стїхо́вны є҆ди́нꙋ.

Воскрⷭ҇ны, гла́съ а҃: Вечє́рнїѧ на́шѧ мл҃твы прїимѝ, ст҃ы́й гдⷭ҇и, и҆ пода́ждь на́мъ ѡ҆ставле́нїе грѣхѡ́въ, ꙗ҆́кѡ є҆ди́нъ є҆сѝ ꙗ҆вле́й въ мі́рѣ воскрⷭ҇нїе.

Ѡ҆быди́те, лю́дїе, сїѡ́нъ, и҆ ѡ҆быми́те є҆го̀, и҆ дади́те сла́вꙋ въ не́мъ воскре́сшемꙋ и҆з̾ ме́ртвыхъ: ꙗ҆́кѡ то́й є҆́сть бг҃ъ на́шъ, и҆збавле́й на́съ ѿ беззако́нїй на́шихъ.

Прїиди́те, лю́дїе, воспои́мъ и҆ поклони́мсѧ хрⷭ҇тꙋ̀, сла́вѧще є҆гѡ̀ и҆з̾ ме́ртвыхъ воскрⷭ҇нїе: ꙗ҆́кѡ то́й є҆́сть бг҃ъ на́шъ, ѿ ле́сти вра́жїѧ мі́ръ и҆збавле́й.

Стрⷭ҇тїю твое́ю, хрⷭ҇тѐ, ѿ страсте́й свободи́хомсѧ, и҆ воскрⷭ҇нїемъ твои́мъ и҆з̾ и҆стлѣ́нїѧ и҆зба́вихомсѧ: гдⷭ҇и, сла́ва тебѣ̀.

И҆́ны стїхи̑ры самогла̑сны, вели́кїѧ сꙋббѡ́ты трѝ, повторѧ́юще пе́рвꙋю, гла́съ и҃:

Дне́сь а҆́дъ стенѧ̀ вопїе́тъ: ᲂу҆́не мнѣ̀ бѧ́ше, а҆́ще бы́хъ ѿ мр҃і́и рожде́ннаго не прїѧ́лъ: наше́дъ бо на мѧ̀, держа́вꙋ мою̀ разрꙋшѝ, врата̀ мѣ̑днаѧ сокрꙋшѝ: дꙋ́шы, ꙗ҆̀же содержа́хъ пре́жде, бг҃ъ сы́й воскресѝ. сла́ва, гдⷭ҇и, крⷭ҇тꙋ̀ твоемꙋ̀ и҆ воскрⷭ҇нїю твоемꙋ̀.

Дне́сь а҆́дъ стенѧ̀ вопїе́тъ: разрꙋши́сѧ моѧ̀ вла́сть: прїѧ́хъ ме́ртваго ꙗ҆́кѡ є҆ди́наго ѿ ᲂу҆ме́ршихъ, держа́ти же сегѡ́ ѿню́дъ не могꙋ̀, но погꙋблѧ́ю съ ни́мъ всѧ̑, над̾ ни́миже ца́рствовахъ: а҆́зъ и҆мѣ́хъ мертвецы̀ ѿ вѣ́ка, но сѐ се́й всѣ́хъ воздвиза́етъ. сла́ва, гдⷭ҇и, крⷭ҇тꙋ̀ твоемꙋ̀ и҆ воскрⷭ҇нїю твоемꙋ̀.

Дне́сь а҆́дъ стенѧ̀ вопїе́тъ: поглоще́на бы́сть моѧ̀ держа́ва, па́стырь распѧ́тсѧ, и҆ а҆да́ма воскресѝ: над̾ ни́миже ца́рствовахъ, тѣ́хъ лиши́хсѧ, и҆ ꙗ҆̀же поглоти́хъ возмогі́й, всѣ́хъ и҆зверго́хъ. и҆стощѝ гро́бы распны́йсѧ, и҆знемога́етъ сме́рти держа́ва. сла́ва, гдⷭ҇и, крⷭ҇тꙋ̀ твоемꙋ̀ и҆ воскрⷭ҇нїю твоемꙋ̀.

Сла́ва, гла́съ ѕ҃: Дне́шнїй де́нь та́инственнѡ вели́кїй мѡѷсе́й проѡбразова́ше, глаго́лѧ: и҆ бл҃гословѝ бг҃ъ де́нь седмы́й. сїѧ́ бо є҆́сть бл҃гослове́ннаѧ сꙋббѡ́та, се́й є҆́сть ᲂу҆покое́нїѧ де́нь, во́ньже почѝ ѿ всѣ́хъ дѣ́лъ свои́хъ є҆диноро́дный сн҃ъ бж҃їй, по смотре́нїю на сме́рть, пло́тїю сꙋббѡ́тствовавъ: и҆ є҆́же бѣ̀, въ то̀ па́ки возвра́щьсѧ, воскрⷭ҇нїемъ дарова̀ на́мъ жи́знь вѣ́чнꙋю, ꙗ҆́кѡ є҆ди́нъ бл҃гъ и҆ чл҃вѣколю́бецъ.

И҆ ны́нѣ, бг҃оро́диченъ, гла́съ а҃: Всемі́рнꙋю сла́вꙋ, ѿ человѣ̑къ прозѧ́бшꙋю и҆ влⷣкꙋ ро́ждшꙋю, нбⷭ҇нꙋю две́рь, воспои́мъ мр҃і́ю дв҃ꙋ, безпло́тныхъ пѣ́снь и҆ вѣ́рныхъ ᲂу҆краше́нїе: сїѧ́ бо ꙗ҆ви́сѧ нб҃о и҆ хра́мъ бж҃ества̀: сїѧ̀, прегражде́нїе вражды̀ разрꙋши́вши, ми́ръ введѐ и҆ црⷭ҇твїе ѿве́рзе. сїю̀ ᲂу҆̀бо и҆мꙋ́ще вѣ́ры ᲂу҆твержде́нїе, побо́рника и҆́мамы и҆з̾ неѧ̀ ро́ждшагосѧ гдⷭ҇а. дерза́йте ᲂу҆̀бо, дерза́йте, лю́дїе бж҃їи: и҆́бо то́й побѣди́тъ врагѝ, ꙗ҆́кѡ всеси́ленъ.

Вхо́дъ съ є҆ѵⷢ҇лїемъ. Свѣ́те ти́хїй:

Прокі́менъ не глаго́лемъ, но а҆́бїе: Премꙋ́дрость. И҆ начина́етъ чте́цъ чтє́нїѧ.

Бытїѧ̀ чте́нїе. [Глава̀ а҃, ст. а҃-г҃і].

Въ нача́лѣ сотворѝ бг҃ъ нб҃о и҆ зе́млю. Землѧ́ же бѣ̀ неви́дима и҆ неꙋстро́ена, и҆ тьма̀ верхꙋ̀ бе́здны: и҆ дх҃ъ бж҃їй ноша́шесѧ верхꙋ̀ воды̀. И҆ речѐ бг҃ъ: да бꙋ́детъ свѣ́тъ. И҆ бы́сть свѣ́тъ. И҆ ви́дѣ бг҃ъ свѣ́тъ, ꙗ҆́кѡ добро̀: и҆ разлꙋчѝ бг҃ъ междꙋ̀ свѣ́томъ и҆ междꙋ̀ тьмо́ю. И҆ наречѐ бг҃ъ свѣ́тъ де́нь, а҆ тьмꙋ̀ наречѐ но́щь. И҆ бы́сть ве́черъ, и҆ бы́сть ᲂу҆́тро, де́нь є҆ди́нъ. И҆ речѐ бг҃ъ: да бꙋ́детъ тве́рдь посредѣ̀ воды̀, и҆ да бꙋ́детъ разлꙋча́ющи посредѣ̀ воды̀ и҆ воды̀. И҆ бы́сть та́кѡ. И҆ сотворѝ бг҃ъ тве́рдь: и҆ разлꙋчѝ бг҃ъ междꙋ̀ водо́ю, ꙗ҆́же бѣ̀ под̾ тве́рдїю, и҆ междꙋ̀ водо́ю, ꙗ҆́же бѣ̀ над̾ тве́рдїю. И҆ наречѐ бг҃ъ тве́рдь нб҃о. И҆ ви́дѣ бг҃ъ, ꙗ҆́кѡ добро̀. и҆ бы́сть ве́черъ, и҆ бы́сть ᲂу҆́тро, де́нь вторы́й. И҆ речѐ бг҃ъ: да собере́тсѧ вода̀, ꙗ҆́же под̾ небесе́мъ, въ собра́нїе є҆ди́но, и҆ да ꙗ҆ви́тсѧ сꙋ́ша. И҆ бы́сть та́кѡ. И҆ собра́сѧ вода̀, ꙗ҆́же под̾ небесе́мъ, въ собра̑нїѧ своѧ̑, и҆ ꙗ҆ви́сѧ сꙋ́ша. И҆ наречѐ бг҃ъ сꙋ́шꙋ зе́млю, и҆ собра̑нїѧ во́дъ наречѐ морѧ̀. И҆ ви́дѣ бг҃ъ, ꙗ҆́кѡ добро̀. И҆ речѐ бг҃ъ: да прорасти́тъ землѧ̀ бы́лїе травно́е, сѣ́ющее сѣ́мѧ по ро́дꙋ и҆ по подо́бїю, и҆ дре́во плодови́тое творѧ́щее пло́дъ, є҆мꙋ́же сѣ́мѧ є҆гѡ̀ въ не́мъ, по ро́дꙋ на землѝ. И҆ бы́сть та́кѡ. И҆ и҆знесѐ землѧ̀ бы́лїе травно́е, сѣ́ющее сѣ́мѧ по ро́дꙋ и҆ по подо́бїю, и҆ дре́во плодови́тое творѧ́щее пло́дъ, є҆мꙋ́же сѣ́мѧ є҆гѡ̀ въ не́мъ, по ро́дꙋ на землѝ. И҆ ви́дѣ бг҃ъ, ꙗ҆́кѡ добро̀. И҆ бы́сть ве́черъ, и҆ бы́сть ᲂу҆́тро, де́нь тре́тїй.

Прⷪ҇ро́чества и҆са́їина чте́нїе. [Глава̀ ѯ҃, ст. а҃-ѕ҃і].

Свѣти́сѧ, свѣти́сѧ, і҆ерⷭ҇ли́ме, прїи́де бо тво́й свѣ́тъ, и҆ сла́ва гдⷭ҇нѧ на тебѣ̀ возсїѧ̀. Сѐ тьма̀ покры́етъ зе́млю, и҆ мра́къ на ꙗ҆зы́ки, на тебѣ́ же ꙗ҆ви́тсѧ гдⷭ҇ь, и҆ сла́ва є҆гѡ̀ на тебѣ̀ ᲂу҆́зритсѧ. И҆ по́йдꙋтъ ца́рїе свѣ́томъ твои́мъ, и҆ ꙗ҆зы́цы свѣ́тлостїю твое́ю. Возведѝ ѡ҆́крестъ ѻ҆́чи твоѝ, и҆ ви́ждь собра̑ннаѧ ча̑да твоѧ̑: сѐ прїидо́ша всѝ сы́нове твоѝ и҆здале́ча, и҆ дщє́ри твоѝ на ра́мѣхъ во́зьмꙋтсѧ. Тогда̀ ᲂу҆́зриши, и҆ возра́дꙋешисѧ, и҆ ᲂу҆бои́шисѧ, и҆ ᲂу҆жа́снешисѧ се́рдцемъ, ꙗ҆́кѡ приложи́тсѧ къ тебѣ̀ бога́тство морско́е и҆ ꙗ҆зы́кѡвъ и҆ люде́й. И҆ прїи́дꙋтъ къ тебѣ̀ стада̑ вельблю̑дъ, и҆ покры́ютъ тѧ̀ вельблю́ди мадїа́мстїи и҆ гефа́рстїи: всѝ ѿ савы̀ прїи́дꙋтъ, носѧ́ще зла́то, и҆ лїва́нъ принесꙋ́тъ, и҆ ка́мень че́стенъ, и҆ сп҃се́нїе гдⷭ҇не бл҃говозвѣстѧ́тъ. И҆ всѧ̑ ѻ҆́вцы кида̑рскїѧ соберꙋ́тсѧ тебѣ̀, и҆ ѻ҆внѝ навеѡ́ѳстїи прїи́дꙋтъ къ тебѣ̀, и҆ вознесꙋ́тсѧ прїѧ̑тнаѧ на же́ртвенникъ мо́й, и҆ до́мъ мл҃твы моеѧ̀ просла́витсѧ. Кі́и сꙋ́ть, и҆̀же ꙗ҆́кѡ ѡ҆́блацы летѧ́тъ, и҆ ꙗ҆́кѡ го́лꙋби со птєнцы̀ ко мнѣ̀; Менѐ ѻ҆́строви жда́ша, и҆ кораблѝ ѳарсі́йстїи въ пе́рвыхъ, привестѝ ча̑да твоѧ̑ и҆здале́ча, и҆ сребро̀ и҆ зла́то и҆́хъ съ ни́ми, и҆́мене ра́ди гдⷭ҇нѧ ст҃а́гѡ, и҆ за є҆́же ст҃о́мꙋ і҆и҃левꙋ сла́внꙋ бы́ти. И҆ сози́ждꙋтъ сы́нове и҆норо́днїи стѣ́ны твоѧ̑, и҆ ца́рїе и҆́хъ предстоѧ́ти бꙋ́дꙋтъ тебѣ̀: за гнѣ́въ бо мо́й порази́хъ тѧ̀, и҆ за млⷭ҇ть мою̀ возлюби́хъ тѧ̀. И҆ ѿве́рзꙋтсѧ врата̀ твоѧ̑ при́снѡ, де́нь и҆ но́щь не затворѧ́тсѧ, ввестѝ къ тебѣ̀ си́лꙋ ꙗ҆зы̑къ и҆ царѝ и҆́хъ ведѡ́мыѧ. Ꙗ҆зы́цы бо и҆ ца́рїе, и҆̀же не порабо́таютъ тѝ, поги́бнꙋтъ, и҆ ꙗ҆зы́цы запꙋстѣ́нїемъ запꙋстѣ́ютъ. И҆ сла́ва лїва́нова къ тебѣ̀ прїи́детъ, кѷпарі́сомъ и҆ пе́ѵгомъ и҆ ке́дромъ вкꙋ́пѣ, просла́вити мѣ́сто ст҃о́е моѐ, и҆ мѣ́сто но́гъ мои́хъ просла́влю. И҆ по́йдꙋтъ къ тебѣ̀ боѧ́щесѧ сы́нове смири́вшихъ тѧ̀ и҆ раздражи́вшихъ тѧ̀, и҆ покло́нѧтсѧ слѣдѡ́мъ но́гъ твои́хъ всѝ прогнѣ́вавшїи тѧ̀: и҆ нарече́шисѧ гра́дъ гдⷭ҇нь, сїѡ́нъ ст҃а́гѡ і҆и҃лева. За сїѐ, ꙗ҆́кѡ бы́лъ є҆сѝ ѡ҆ста́вленъ и҆ возненави́дѣнъ, и҆ не бѣ̀ помога́ющагѡ тѝ, положꙋ́ тѧ въ ра́дость вѣ́чнꙋю, весе́лїе родѡ́мъ родѡ́въ. И҆ и҆зссе́ши млеко̀ ꙗ҆зы́кѡвъ, и҆ бога́тство царе́й снѣ́си, и҆ ᲂу҆разꙋмѣ́еши, ꙗ҆́кѡ а҆́зъ гдⷭ҇ь сп҃са́ѧй тѧ̀ и҆ и҆збавлѧ́ѧй тѧ̀ бг҃ъ і҆и҃левъ.

И҆схо́да чте́нїе. [Глава̀ в҃і, ст. а҃-а҃і].

Речѐ гдⷭ҇ь къ мѡѷсе́ю и҆ а҆арѡ́нꙋ въ землѝ є҆гѵ́петстѣй, глаго́лѧ: мѣ́сѧцъ се́й ва́мъ нача́ло мѣ́сѧцей, пе́рвый бꙋ́детъ ва́мъ въ мѣ́сѧцѣхъ лѣ́та. Рцы̀ ко всемꙋ̀ со́нмꙋ сынѡ́въ і҆и҃левыхъ, глаго́лѧ: въ десѧ́тый мѣ́сѧца сегѡ̀ да во́зьметъ кі́йждо ѻ҆вча̀ по домѡ́мъ ѻ҆те́чествъ, кі́йждо ѻ҆вча̀ по до́мꙋ. А҆́ще же ма́лѡ и҆́хъ є҆́сть въ домꙋ̀, ꙗ҆́кѡ не довѡ́льнымъ бы́ти на ѻ҆вча̀, да во́зьметъ съ собо́ю сосѣ́да бли́жнѧго своего̀ по числꙋ̀ дꙋ́шъ: кі́йждо дово́льное себѣ̀ сочте́тъ на ѻ҆вча̀. Ѻ҆вча̀ соверше́нно, мꙋ́жескъ по́лъ, непоро́чно и҆ є҆динолѣ́тно бꙋ́детъ ва́мъ: ѿ а҆́гнєцъ и҆ ѿ ко́злищъ прїи́мете. И҆ бꙋ́детъ ва́мъ соблюде́но да́же до четвертагѡна́десѧть днѐ мѣ́сѧца сегѡ̀: и҆ зако́лютъ то̀ всѐ мно́жество собо́ра сынѡ́въ і҆и҃левыхъ къ ве́черꙋ. И҆ прїи́мꙋтъ ѿ кро́ве, и҆ пома́жꙋтъ на ѻ҆бою̀ подвѡ́ю и҆ на пра́гахъ въ домѣ́хъ, въ ни́хже снѣдѧ́тъ то́е. И҆ снѣдѧ́тъ мѧса̀ въ нощѝ то́й печє́на ѻ҆гне́мъ, и҆ ѡ҆прѣсно́ки съ го́рькимъ ѕе́лїемъ снѣдѧ́тъ. Не снѣ́сте ѿ ни́хъ сꙋ́рово, нижѐ варе́но въ водѣ̀, но пече́ное ѻ҆гне́мъ, главꙋ̀ съ нога́ми и҆ со ᲂу҆тро́бою. Не ѡ҆ста́вите ѿ негѡ̀ до ᲂу҆́трїѧ, и҆ ко́сти не сокрꙋши́те ѿ негѡ̀: ѡ҆ста́нки же ѿ негѡ̀ до ᲂу҆́тра ѻ҆гне́мъ сожже́те. Си́це же снѣ́сте є҆̀: чресла̀ ва̑ша препѡѧ̑сана, и҆ сапо́зи ва́ши на нога́хъ ва́шихъ, и҆ жезлы̀ ва́ши въ рꙋка́хъ ва́шихъ: и҆ снѣ́сте є҆̀ со тща́нїемъ: па́сха є҆́сть гдⷭ҇нѧ.

Прⷪ҇ро́чества і҆ѡ́нина чте́нїе. [Гл. а҃, ст. а҃-ѕ҃і: гл. в҃, ст. а҃-а҃і:

гл. г҃: ст. а҃-і҃: гл. д҃, ст. а҃-а҃і].

Бы́сть сло́во гдⷭ҇не ко і҆ѡ́нѣ сы́нꙋ а҆маѳі́инꙋ, глаго́лѧ: воста́ни, и҆ и҆дѝ въ нїнеѵі́ю гра́дъ вели́кїй: и҆ проповѣ́ждь въ не́мъ, ꙗ҆́кѡ взы́де во́пль ѕло́бы є҆гѡ̀ ко мнѣ̀. И҆ воста̀ і҆ѡ́на, є҆́же бѣжа́ти въ ѳарсі́съ ѿ лица̀ гдⷭ҇нѧ: и҆ сни́де во і҆ѡппі́ю, и҆ ѡ҆брѣ́те кора́бль и҆дꙋ́щъ въ ѳарсі́съ: и҆ дадѐ нае́мъ сво́й, и҆ вни́де во́нь плы́ти съ ни́ми въ ѳарсі́съ ѿ лица̀ гдⷭ҇нѧ. И҆ гдⷭ҇ь воздви́же вѣ́тръ ве́лїй на мо́ри, и҆ бы́сть бꙋ́рѧ вели́каѧ въ мо́ри, и҆ кора́бль бѣ́дствоваше є҆́же сокрꙋши́тисѧ. И҆ ᲂу҆боѧ́шасѧ корабе́льницы, и҆ возопи́ша кі́йждо къ бг҃ꙋ своемꙋ̀, и҆ и҆змета́нїе сотвори́ша сосꙋ́дѡвъ, и҆̀же въ кораблѝ, въ мо́ре, є҆́же ѡ҆блегчи́тисѧ ѿ ни́хъ: і҆ѡ́на же сни́де во дно̀ кораблѧ̀, и҆ спа́ше тꙋ̀, и҆ храплѧ́ше. И҆ прїи́де къ немꙋ̀ ко́рмчїй, и҆ речѐ є҆мꙋ̀: что́ ты хра́плеши; воста́ни, и҆ молѝ бг҃а твоего̀, ꙗ҆́кѡ да сп҃се́тъ ны̀ бг҃ъ, да не поги́бнемъ. И҆ речѐ кі́йждо ко и҆́скреннемꙋ своемꙋ̀: прїиди́те, ве́ржимъ жрє́бїѧ, и҆ ᲂу҆разꙋмѣ́емъ, когѡ̀ ра́ди є҆́сть ѕло̀ сїѐ на на́съ. И҆ метнꙋ́ша жрє́бїѧ, и҆ падѐ жре́бїй на і҆ѡ́нꙋ. И҆ рѣ́ша къ немꙋ̀: возвѣстѝ на́мъ, когѡ̀ ра́ди сїѐ ѕло̀ на на́съ, и҆ что̀ твоѐ дѣ́ланїе є҆́сть, и҆ ѿкꙋ́дꙋ грѧде́ши и҆ ка́мѡ и҆́деши, и҆ ѿ ко́еѧ страны̀, и҆ ѿ кі́ихъ люде́й є҆сѝ ты̀; И҆ речѐ къ ни̑мъ: ра́бъ гдⷭ҇ень є҆́смь а҆́зъ, и҆ гдⷭ҇а бг҃а нбⷭ҇наго а҆́зъ чтꙋ̀, и҆́же сотворѝ мо́ре и҆ сꙋ́шꙋ. И҆ ᲂу҆боѧ́шасѧ мꙋ́жїе стра́хомъ вели́кимъ, и҆ рѣ́ша къ немꙋ̀: что̀ сїѐ сотвори́лъ є҆сѝ; Занѐ разꙋмѣ́ша мꙋ́жїе, ꙗ҆́кѡ ѿ лица̀ гдⷭ҇нѧ бѣжа́ше, ꙗ҆́кѡ возвѣстѝ и҆̀мъ. И҆ рѣ́ша къ немꙋ̀: что̀ тебѣ̀ сотвори́мъ, и҆ ᲂу҆толи́тсѧ мо́ре ѿ на́съ; Занѐ мо́ре восхожда́ше и҆ воздвиза́ше па́че волне́нїе. И҆ речѐ къ ни̑мъ і҆ѡ́на: возьми́те мѧ̀, и҆ вве́рзите въ мо́ре, и҆ ᲂу҆толи́тсѧ мо́ре ѿ ва́съ: поне́же позна́хъ а҆́зъ, ꙗ҆́кѡ менє̀ ра́ди волне́нїе сїѐ вели́кое на вы̀ є҆́сть. И҆ нꙋжда́хꙋсѧ мꙋ́жїе возврати́тисѧ къ землѝ, и҆ не можа́хꙋ, ꙗ҆́кѡ мо́ре восхожда́ше и҆ воздвиза́шесѧ па́че на ни́хъ. И҆ возопи́ша къ гдⷭ҇еви, и҆ рѣ́ша: ника́коже, гдⷭ҇и, да не поги́бнемъ дꙋшѝ ра́ди человѣ́ка сегѡ̀, и҆ не да́ждь на на́съ кро́ве пра́ведныѧ: занѐ ты̀, гдⷭ҇и, ꙗ҆́коже восхотѣ́лъ, сотвори́лъ є҆сѝ. И҆ взѧ́ша і҆ѡ́нꙋ, и҆ вверго́ша є҆го̀ въ мо́ре: и҆ преста̀ мо́ре ѿ волне́нїѧ своегѡ̀. И҆ ᲂу҆боѧ́шасѧ мꙋ́жїе стра́хомъ вели́кимъ гдⷭ҇а, и҆ пожро́ша же́ртвꙋ гдⷭ҇еви, и҆ помоли́шасѧ мл҃твами. И҆ повелѣ̀ гдⷭ҇ь ки́тꙋ вели́комꙋ пожре́ти і҆ѡ́нꙋ: и҆ бѣ̀ і҆ѡ́на во чре́вѣ ки́товѣ трѝ дни̑ и҆ трѝ нѡ́щи. И҆ помоли́сѧ і҆ѡ́на ко гдⷭ҇ꙋ бг҃ꙋ своемꙋ̀ ѿ чре́ва ки́това, и҆ речѐ:

[Мл҃тва:]

Возопи́хъ въ ско́рби мое́й ко гдⷭ҇ꙋ бг҃ꙋ моемꙋ̀, и҆ ᲂу҆слы́ша мѧ̀: и҆з̾ чре́ва а҆́дова во́пль мо́й, ᲂу҆слы́шалъ є҆сѝ гла́съ мо́й. Ѿве́рглъ мѧ̀ є҆сѝ во глꙋбины̑ се́рдца морска́гѡ, и҆ рѣ́ки ѡ҆быдо́ша мѧ̀: всѧ̑ высѡты̀ твоѧ̑ и҆ во́лны твоѧ̑ на мнѣ̀ преидо́ша. И҆ а҆́зъ рѣ́хъ: ѿри́нꙋхсѧ ѿ ѻ҆́чїю твоє́ю: є҆да̀ приложꙋ̀ призрѣ́ти мѝ ко хра́мꙋ ст҃о́мꙋ твоемꙋ̀; Возлїѧ́сѧ на мѧ̀ вода̀ до дꙋшѝ моеѧ̀, бе́здна ѡ҆бы́де мѧ̀ послѣ́днѧѧ, понрѐ глава̀ моѧ̀ въ разсѣ̑лины го́ръ. Снидо́хъ въ зе́млю, є҆ѧ́же верєѝ є҆ѧ̀ закле́пи вѣ́чнїи: и҆ да взы́детъ и҆з̾ и҆стлѣ́нїѧ живо́тъ мо́й къ тебѣ̀, гдⷭ҇и бж҃е мо́й. Внегда̀ скончава́тисѧ ѿ менє̀ дꙋшѝ мое́й, гдⷭ҇а помѧнꙋ́хъ, и҆ да прїи́детъ къ тебѣ̀ мл҃тва моѧ̀, ко хра́мꙋ ст҃о́мꙋ твоемꙋ̀. Хранѧ́щїи сꙋ́єтнаѧ и҆ лѡ́жнаѧ, млⷭ҇ть свою̀ ѡ҆ста́виша. А҆́зъ же со гла́сомъ хвале́нїѧ и҆ и҆сповѣ́данїѧ пожрꙋ̀ тебѣ̀: є҆ли̑ка ѡ҆бѣща́хъ, возда́мъ тебѣ̀ во сп҃се́нїе моѐ гдⷭ҇еви.

И҆ повелѣ̀ гдⷭ҇ь ки́тови, и҆ и҆зве́рже і҆ѡ́нꙋ на сꙋ́шꙋ. И҆ бы́сть сло́во гдⷭ҇не ко і҆ѡ́нѣ втори́цею, глаго́лѧ: воста́ни, и҆ и҆дѝ въ нїнеѵі́ю гра́дъ вели́кїй, и҆ проповѣ́ждь въ не́мъ по про́повѣди пре́ждней, ю҆́же а҆́зъ глаго́лахъ тебѣ̀. И҆ воста̀ і҆ѡ́на, и҆ и҆́де въ нїнеѵі́ю, ꙗ҆́коже глаго́ла гдⷭ҇ь: нїнеѵі́а же бѧ́ше гра́дъ вели́къ бг҃ꙋ, ꙗ҆́кѡ ше́ствїѧ пꙋтѝ тре́хъ дне́й. И҆ нача́тъ і҆ѡ́на входи́ти во гра́дъ, ꙗ҆́кѡ ше́ствїе пꙋтѝ днѐ є҆ди́нагѡ, и҆ проповѣ́да и҆ речѐ: є҆щѐ трѝ дни̑, и҆ нїнеѵі́а преврати́тсѧ. И҆ вѣ́роваша мꙋ́жїе нїнеѵі́йстїи бг҃ови, и҆ заповѣ́даша по́стъ, и҆ ѡ҆блеко́шасѧ во врє́тища ѿ вели́ка и҆́хъ да́же до ма́ла и҆́хъ. И҆ до́йде сло́во къ царю̀ нїнеѵі́йскомꙋ, и҆ воста̀ съ престо́ла своегѡ̀, и҆ све́рже ри̑зы своѧ̑ съ себє̀, и҆ ѡ҆блече́сѧ во вре́тище, и҆ сѣ́де на пе́пелѣ. И҆ проповѣ́дасѧ, и҆ рече́но бы́сть въ нїнеѵі́и ѿ царѧ̀ и҆ вельмо́жъ є҆гѡ̀, глаго́лющихъ: человѣ́цы и҆ ско́ти, и҆ воло́ве, и҆ ѻ҆́вцы да не вкꙋ́сѧтъ ничесѡ́же, ни да пасꙋ́тсѧ, нижѐ воды̀ да пїю́тъ. И҆ ѡ҆блеко́шасѧ во врє́тища человѣ́цы и҆ ско́ти, и҆ возопи́ша прилѣ́жнѡ къ бг҃ꙋ: и҆ возврати́сѧ кі́йждо ѿ пꙋтѝ своегѡ̀ лꙋка́вагѡ, и҆ ѿ непра́вды сꙋ́щїѧ въ рꙋка́хъ и҆́хъ, глаго́люще: кто̀ вѣ́сть, а҆́ще раска́етсѧ и҆ ᲂу҆моле́нъ бꙋ́детъ бг҃ъ, и҆ ѡ҆брати́тсѧ ѿ гнѣ́ва ꙗ҆́рости своеѧ̀, и҆ не поги́бнемъ; И҆ ви́дѣ бг҃ъ дѣла̀ и҆́хъ, ꙗ҆́кѡ ѡ҆брати́шасѧ ѿ пꙋте́й свои́хъ лꙋка́выхъ: и҆ раска́ѧсѧ бг҃ъ ѡ҆ ѕлѣ̀, є҆́же глаго́лаше сотвори́ти и҆̀мъ, и҆ не сотворѝ. И҆ ѡ҆печа́лисѧ і҆ѡ́на печа́лїю вели́кою, и҆ смꙋти́сѧ. И҆ помоли́сѧ ко гдⷭ҇ꙋ, и҆ речѐ: ѽ гдⷭ҇и, не сїѧ̑ ли ᲂу҆́бѡ словеса̀ моѧ̑, ꙗ҆́же глаго́лахъ, є҆щѐ сꙋ́щꙋ мѝ на землѝ мое́й; сегѡ̀ ра́ди предвари́хъ бѣжа́ти въ ѳарсі́съ, занѐ разꙋмѣ́хъ, ꙗ҆́кѡ млⷭ҇тивъ ты̀ є҆сѝ и҆ ще́дръ, долготерпѣли́въ и҆ многомлⷭ҇тивъ, и҆ ка́ѧйсѧ ѡ҆ ѕло́бахъ [человѣ́ческихъ] И҆ ны́нѣ, влⷣко гдⷭ҇и, прїимѝ дꙋ́шꙋ мою̀ ѿ менє̀, ꙗ҆́кѡ ᲂу҆́не мѝ ᲂу҆мре́ти, не́жели жи́ти. И҆ речѐ гдⷭ҇ь ко і҆ѡ́нѣ: а҆́ще ѕѣлѡ̀ ѡ҆печа́лилсѧ є҆сѝ ты̀; И҆ и҆зы́де і҆ѡ́на и҆з̾ гра́да, и҆ сѣ́де прѧ́мѡ гра́да, и҆ сотворѝ себѣ̀ кꙋ́щꙋ, и҆ сѣдѧ́ше под̾ не́ю въ сѣ́ни, до́ндеже ᲂу҆ви́дитъ, что̀ бꙋ́детъ гра́дꙋ. И҆ повелѣ̀ гдⷭ҇ь бг҃ъ ты́квѣ, и҆ возрастѐ над̾ главо́ю і҆ѡ́ниною, да бꙋ́детъ сѣ́нь над̾ главо́ю є҆гѡ̀, є҆́же ѡ҆сѣни́ти є҆го̀ ѿ ѕлы́хъ є҆гѡ̀: и҆ возра́довасѧ і҆ѡ́на ѡ҆ ты́квѣ ра́достїю вели́кою. И҆ повелѣ̀ гдⷭ҇ь бг҃ъ че́рвїю ра́ннемꙋ во ᲂу҆́трїе, и҆ под̾ѧдѐ ты́квꙋ, и҆ и҆́зсше. И҆ бы́сть вкꙋ́пѣ внегда̀ возсїѧ́ти со́лнцꙋ, и҆ повелѣ̀ бг҃ъ вѣ́трꙋ зно́йнꙋ жегꙋ́щꙋ, и҆ поразѝ со́лнце на главꙋ̀ і҆ѡ́нинꙋ: и҆ малодꙋ́шствоваше, и҆ ѿрица́шесѧ дꙋшѝ своеѧ̀, и҆ речѐ: ᲂу҆́не мѝ ᲂу҆мре́ти, не́жели жи́ти. И҆ речѐ гдⷭ҇ь бг҃ъ ко і҆ѡ́нѣ: ѕѣлѡ́ ли ѡ҆печа́лилсѧ є҆сѝ ты̀ ѡ҆ ты́квѣ; И҆ речѐ [і҆ѡ́на]: ѕѣлѡ̀ ѡ҆печа́лихсѧ а҆́зъ да́же до сме́рти. И҆ речѐ гдⷭ҇ь: ты̀ ѡ҆скорби́лсѧ ѡ҆ ты́квѣ, ѡ҆ не́йже не трꙋди́лсѧ є҆сѝ, ни воскорми́лъ є҆сѝ є҆ѧ̀, ꙗ҆́же роди́сѧ ѡ҆б̾ но́щь, и҆ ѡ҆б̾ но́щь поги́бе: а҆зъ же не пощаждꙋ́ ли нїнеѵі́и гра́да вели́кагѡ, въ не́мже живꙋ́тъ мно́жайшїи, не́же двана́десѧть тє́мъ человѣ̑къ, и҆̀же не позна́ша десни́цы своеѧ̀, нижѐ шꙋ́йцы своеѧ̀, и҆ ско́ти и҆́хъ мно́зи;

І҆исꙋ́са наѵи́на чте́нїе. [Глава̀ є҃, ст. і҃-є҃і].

Ѡ҆полчи́шасѧ сы́нове і҆и҃лєвы въ галга́лѣхъ, и҆ сотвори́ша па́схꙋ въ четвертыйна́десѧть де́нь мѣ́сѧца ѿ ве́чера, на за́падѣ, на по́ли і҆ерїхѡ́нстѣмъ. И҆ ꙗ҆до́ша ѿ пшени́цы землѝ ѻ҆́ныѧ ѡ҆прѣсно́ки и҆ нѡ́ваѧ. Въ то́й де́нь преста̀ ма́нна, повнегда̀ ꙗ҆до́ша ѿ пшени́цы землѝ, и҆ ктомꙋ̀ не бы́сть сынѡ́мъ і҆и҃лєвымъ ма́нны, но ꙗ҆до́ша ѿ плодѡ́въ землѝ ꙾фїні́ческїѧ꙾¹⁶ въ лѣ́то ѻ҆́ное. И҆ бы́сть є҆гда̀ бѧ́ше і҆исꙋ́съ ᲂу҆ і҆ерїхѡ́на, и҆ воззрѣ́въ ѻ҆чи́ма свои́ма, ви́дѣ человѣ́ка стоѧ́ща пред̾ ни́мъ, и҆ ме́чь є҆гѡ̀ ѡ҆бнаже́нъ въ рꙋцѣ̀ є҆гѡ̀. И҆ пристꙋпи́въ і҆исꙋ́съ речѐ є҆мꙋ̀: на́шъ ли є҆сѝ, и҆лѝ ѿ сꙋпоста̑тъ на́шихъ; Ѻ҆́нъ же речѐ є҆мꙋ̀: а҆́зъ а҆рхїстрати́гъ си́лы гдⷭ҇ни, ны́нѣ прїидо́хъ [сѣ́мѡ]. И҆ і҆исꙋ́съ падѐ лице́мъ свои́мъ на зе́млю, и҆ поклони́сѧ є҆мꙋ̀, и҆ речѐ: гдⷭ҇и, что̀ повелѣва́еши рабꙋ̀ твоемꙋ̀; И҆ речѐ а҆рхїстрати́гъ гдⷭ҇ень ко і҆исꙋ́сꙋ: и҆ззꙋ́й сапо́гъ съ ногꙋ̀ твоє́ю, мѣ́сто бо, на не́мже ты̀ стои́ши, ст҃о є҆́сть. И҆ сотворѝ і҆исꙋ́съ та́кѡ.

И҆схо́да чте́нїе. [Гл. г҃і, ст. к҃-к҃в: гл. д҃і, ст. а҃-л҃в: гл. є҃і, ст. а҃-ѳ҃і].

Воздви́гшесѧ сы́нове і҆и҃лєвы ѿ сокхѡ́ѳа, ѡ҆полчи́шасѧ во ѻ҆ѳѡ́мѣ при пꙋсты́ни. Бг҃ъ же вожда́ше и҆̀хъ въ де́нь ᲂу҆́бѡ столпо́мъ ѡ҆́блачнымъ, показа́ти и҆̀мъ пꙋ́ть: но́щїю же столпо́мъ ѻ҆́гненнымъ, свѣти́ти и҆̀мъ. И҆ не ѡ҆скꙋдѣ̀ сто́лпъ ѡ҆́блачный во днѝ и҆ сто́лпъ ѻ҆́гненный но́щїю пред̾ всѣ́ми людьмѝ. И҆ речѐ гдⷭ҇ь къ мѡѷсе́ю, глаго́лѧ: рцы̀ сынѡ́мъ і҆и҃лєвымъ, и҆ ѡ҆брати́вшесѧ да ѡ҆полча́тсѧ прѧ́мѡ придво́рїю, междꙋ̀ магдѡ́ломъ и҆ междꙋ̀ мо́ремъ, прѧ́мѡ веельсепфѡ́нꙋ: пред̾ ни́ми ѡ҆полчи́шисѧ при мо́ри. И҆ рече́тъ фараѡ́нъ лю́демъ свои̑мъ ѡ҆ сынѣ́хъ і҆и҃левыхъ: заблꙋжда́ютъ сі́и по землѝ, затвори́ бо и҆̀хъ пꙋсты́нѧ. а҆́зъ же ѡ҆жесточꙋ̀ се́рдце фараѡ́ново, и҆ пожене́тъ созадѝ и҆́хъ: и҆ просла́влюсѧ въ фараѡ́нѣ и҆ во все́мъ во́инствѣ є҆гѡ̀, и҆ ᲂу҆разꙋмѣ́ютъ всѝ є҆гѵ́птѧне, ꙗ҆́кѡ а҆́зъ є҆́смь гдⷭ҇ь. И҆ сотвори́ша та́кѡ. И҆ возвѣще́но бы́сть царю̀ є҆гѵ́петскомꙋ, ꙗ҆́кѡ бѣжа́ша лю́дїе. И҆ преврати́сѧ се́рдце фараѡ́ново и҆ рабѡ́въ є҆гѡ̀ на лю́ди, и҆ реко́ша: что̀ сїѐ сотвори́хомъ, ѿпꙋсти́вше сы́ны і҆и҃лєвы, да не рабѡ́таютъ на́мъ; Впрѧжѐ ᲂу҆̀бо фараѡ́нъ колесни̑цы своѧ̑, и҆ всѧ̑ лю́ди своѧ̑ собра̀ съ собо́ю: и҆ поѧ́тъ ше́сть сѡ́тъ колесни́цъ и҆збра́нныхъ, и҆ всѧ̑ ко́ни є҆гѵ́пєтскїѧ, и҆ трїста́ты над̾ всѣ́ми. И҆ ѡ҆жесточѝ гдⷭ҇ь се́рдце фараѡ́на царѧ̀ є҆гѵ́петскагѡ и҆ рабѡ́въ є҆гѡ̀, и҆ погна̀ созадѝ сынѡ́въ і҆и҃левыхъ: сы́нове же і҆и҃лєвы и҆схожда́хꙋ рꙋко́ю высо́кою. И҆ погна́ша є҆гѵ́птѧне вслѣ́дъ и҆́хъ, и҆ ѡ҆брѣто́ша и҆́хъ ѡ҆полчи́вшихсѧ при мо́ри: и҆ всѝ ко́ни и҆ колєсни̑цы фараѡ́нѡвы, и҆ кѡ́нницы, и҆ во́инство є҆гѡ̀ прѧ́мѡ придво́рїю, проти́вꙋ веельсепфѡ́на. И҆ фараѡ́нъ приближа́шесѧ. Воззрѣ́вше же сы́нове і҆и҃лєвы ѻ҆чи́ма, ви́дѣша: и҆ сѐ є҆гѵ́птѧне ѡ҆полчи́шасѧ вслѣ́дъ и҆́хъ: и҆ ᲂу҆боѧ́шасѧ ѕѣлѡ̀, и҆ возопи́ша сы́нове і҆и҃лєвы ко гдⷭ҇ꙋ, и҆ реко́ша къ мѡѷсе́ю: за є҆́же не бы́ти гробѡ́мъ во є҆гѵ́птѣ, и҆зве́лъ є҆сѝ на́съ ᲂу҆мертви́ти въ пꙋсты́ни: что̀ сїѐ сотвори́лъ є҆сѝ на́мъ, и҆зве́дъ на́съ и҆з̾ є҆гѵ́пта; Не се́й ли бѧ́ше глаго́лъ, є҆го́же реко́хомъ къ тебѣ̀ во є҆гѵ́птѣ, глаго́люще: ѡ҆ста́ви на́съ, да рабо́таемъ є҆гѵ́птѧнѡмъ; лꙋ́чше бо бѧ́ше на́мъ рабо́тати є҆гѵ́птѧнѡмъ, не́жели ᲂу҆мре́ти въ пꙋсты́ни се́й. Рече́ же мѡѷсе́й къ лю́демъ: дерза́йте, сто́йте, и҆ зри́те сп҃се́нїе є҆́же ѿ гдⷭ҇а, є҆́же сотвори́тъ на́мъ дне́сь: и҆́мже бо ѡ҆́бразомъ ви́дѣсте є҆гѵ́птѧнъ дне́сь, не приложитѐ ктомꙋ̀ ви́дѣти и҆̀хъ въ вѣ́чное вре́мѧ. Гдⷭ҇ь побо́ретъ по ва́съ, вы́ же ᲂу҆мо́лкните. И҆ речѐ гдⷭ҇ь къ мѡѷсе́ю: что̀ вопїе́ши ко мнѣ̀: рцы̀ сынѡ́мъ і҆и҃лєвымъ, и҆ да пꙋтеше́ствꙋютъ. Ты́ же возьмѝ же́злъ тво́й, и҆ прострѝ рꙋ́кꙋ твою̀ на мо́ре, и҆ расто́ргни є҆̀: и҆ да вни́дꙋтъ сы́нове і҆и҃лєвы посредѣ̀ мо́рѧ по сꙋ́хꙋ. И҆ сѐ а҆́зъ ѡ҆жесточꙋ̀ се́рдце фараѡ́ново, и҆ всѣ́хъ є҆гѵ́птѧнъ, и҆ вни́дꙋтъ вслѣ́дъ и҆́хъ: и҆ просла́влюсѧ въ фараѡ́нѣ, и҆ во все́мъ во́инствѣ є҆гѡ̀, и҆ въ колесни́цахъ и҆ въ ко́нехъ є҆гѡ̀. И҆ ᲂу҆вѣ́дѧтъ всѝ є҆гѵ́птѧне, ꙗ҆́кѡ а҆́зъ є҆́смь гдⷭ҇ь, є҆гда̀ просла́влюсѧ въ фараѡ́нѣ и҆ въ колесни́цахъ и҆ въ ко́нехъ є҆гѡ̀. Взѧ́тсѧ же а҆́гг҃лъ бж҃їй, ходѧ́й пред̾ полко́мъ сынѡ́въ і҆и҃левыхъ, и҆ по́йде созадѝ и҆́хъ: взѧ́тсѧ же и҆ сто́лпъ ѡ҆́блачный ѿ лица̀ и҆́хъ, и҆ ста̀ созадѝ и҆̀хъ. И҆ вни́де посредѣ̀ полка̀ є҆гѵ́петска и҆ посредѣ̀ полка̀ сынѡ́въ і҆и҃левыхъ, и҆ ста̀: и҆ бы́сть тьма̀ и҆ мра́къ, и҆ прїи́де но́щь, и҆ не смѣси́шасѧ дрꙋ́гъ съ дрꙋ́гомъ во всю̀ но́щь. Простре́ же мѡѷсе́й рꙋ́кꙋ на мо́ре: и҆ возгна̀ гдⷭ҇ь мо́ре вѣ́тромъ ю҆́жнымъ си́льнымъ всю̀ но́щь, и҆ сотворѝ мо́ре сꙋ́шꙋ, и҆ разстꙋпи́сѧ вода̀. И҆ внидо́ша сы́нове і҆и҃лєвы посредѣ̀ мо́рѧ по сꙋ́хꙋ: и҆ вода̀ и҆̀мъ стѣна̀ бы́сть ѡ҆деснꙋ́ю и҆ стѣна̀ ѡ҆шꙋ́юю. Погна́ша же є҆гѵ́птѧне, и҆ внидо́ша въ слѣ́дъ и҆́хъ, и҆ всѧ́къ ко́нь фараѡ́новъ и҆ колесни̑цы, и҆ вса́дницы посредѣ̀ мо́рѧ. Бы́сть же въ стра́жꙋ ᲂу҆́треннюю, и҆ воззрѣ̀ гдⷭ҇ь на по́лкъ є҆гѵ́петскїй въ столпѣ̀ ѻ҆́гненномъ и҆ ѡ҆́блачнѣмъ, и҆ смѧтѐ по́лкъ є҆гѵ́петскїй, и҆ свѧза̀ ѻ҆́си колесни́цъ и҆́хъ, и҆ ведѧ́ше и҆̀хъ съ нꙋ́ждею. И҆ реко́ша є҆гѵ́птѧне: бѣжи́мъ ѿ лица̀ і҆и҃лева, гдⷭ҇ь бо побора́етъ по ни́хъ на є҆гѵ́птѧны. И҆ речѐ гдⷭ҇ь къ мѡѷсе́ю: прострѝ рꙋ́кꙋ твою̀ на мо́ре, и҆ да совокꙋпи́тсѧ вода̀, и҆ да покры́етъ є҆гѵ́птѧны, колесни̑цы же и҆ вса́дники. Простре́ же мѡѷсе́й рꙋ́кꙋ на мо́ре, и҆ ᲂу҆стро́исѧ вода̀ ко дню̀ на мѣ́сто: є҆гѵ́птѧне же бѣжа́ша под̾ водо́ю: и҆ и҆стрѧсѐ гдⷭ҇ь є҆гѵ́птѧны посредѣ̀ мо́рѧ. И҆ ѡ҆брати́вшисѧ вода̀ покры̀ колесни̑цы и҆ вса́дники, и҆ всю̀ си́лꙋ фараѡ́новꙋ, вше́дши въ слѣ́дъ и҆́хъ въ мо́ре: и҆ не ѡ҆ста̀ ѿ ни́хъ ни є҆ди́нъ. Сы́нове же і҆и҃лєвы проидо́ша по сꙋ́хꙋ посредѣ̀ мо́рѧ: вода́ же и҆̀мъ стѣна̀ [бы́сть] ѡ҆деснꙋ́ю и҆ стѣна̀ ѡ҆шꙋ́юю. И҆ и҆зба́ви гдⷭ҇ь і҆и҃лѧ въ де́нь ѻ҆́нъ и҆з̾ рꙋкѝ є҆гѵ́петскїѧ: и҆ ви́дѣша сы́нове і҆и҃лєвы є҆гѵ́птѧнъ и҆зме́ршихъ при краѝ мо́рѧ. Ви́дѣ же і҆и҃ль рꙋ́кꙋ вели́кꙋю, ꙗ҆̀же сотворѝ гдⷭ҇ь є҆гѵ́птѧнѡмъ: и҆ ᲂу҆боѧ́шасѧ лю́дїе гдⷭ҇а, и҆ вѣ́роваша бг҃ꙋ и҆ мѡѷсе́ю ᲂу҆го́дникꙋ є҆гѡ̀. Тогда̀ воспѣ̀ мѡѷсе́й, и҆ сы́нове і҆и҃лєвы пѣ́снь сїю̀ гдⷭ҇еви, и҆ реко́ша глаго́люще:

Чте́цъ глаго́летъ: Пои́мъ гдⷭ҇еви:

И҆ пою́тъ на гла́съ є҃: Сла́внѡ бо просла́висѧ.

И҆ чте́цъ коемꙋ́ждо ли́кꙋ стїхѝ предглаго́летъ:

Конѧ̀ и҆ вса́дника вве́рже въ мо́ре. Пои́мъ гдⷭ҇еви:

И҆ лю́дїе на ѻ҆́ба ли̑ка пою́тъ: Сла́внѡ бо просла́висѧ.

Помо́щникъ и҆ покрови́тель бы́сть мнѣ̀ во сп҃се́нїе.

Пои́мъ гдⷭ҇еви:

Се́й мо́й бг҃ъ, и҆ просла́влю є҆го̀: бг҃ъ ѻ҆ц҃а̀ моегѡ̀, и҆ вознесꙋ̀ є҆го̀.

Пои́мъ гдⷭ҇еви:

Гдⷭ҇ь сокрꙋша́ѧй бра̑ни, гдⷭ҇ь и҆́мѧ є҆мꙋ̀: колесни̑цы фараѡ́новы и҆ си́лꙋ є҆гѡ̀ вве́рже въ мо́ре.

Пои́мъ гдⷭ҇еви:

И҆збра̑нныѧ вса́дники трїста́ты потопѝ въ чермнѣ́мъ мо́ри.

Пои́мъ гдⷭ҇еви:

Пꙋчи́ною покры̀ и҆̀хъ, погрѧзо́ша во глꙋбинѣ̀ ꙗ҆́кѡ ка́мень.

Пои́мъ гдⷭ҇еви:

Десни́ца твоѧ̀, гдⷭ҇и, просла́висѧ въ крѣ́пости.

Пои́мъ гдⷭ҇еви:

Десна́ѧ твоѧ̀ рꙋка̀ гдⷭ҇и, сокрꙋшѝ врагѝ, и҆ мно́жествомъ сла́вы твоеѧ̀ сте́рлъ є҆сѝ сопроти́вныхъ.

Пои́мъ гдⷭ҇еви:

Посла́лъ є҆сѝ гнѣ́въ тво́й, поѧдѐ ѧ҆̀ ꙗ҆́кѡ сте́блїе, и҆ дх҃омъ ꙗ҆́рости твоеѧ̀ разстꙋпи́сѧ вода̀.

Пои́мъ гдⷭ҇еви:

Ѡ҆гꙋстѣ́ша ꙗ҆́кѡ стѣна̀ во́ды, ѡ҆гꙋстѣ́ша и҆ во́лны посредѣ̀ мо́рѧ.

Пои́мъ гдⷭ҇еви:

Речѐ вра́гъ: гна́въ пости́гнꙋ, раздѣлю̀ коры́сть, и҆спо́лню дꙋ́шꙋ мою̀, ᲂу҆бїю̀ мече́мъ мои́мъ, госпо́дствовати бꙋ́детъ рꙋка̀ моѧ̀.

Пои́мъ гдⷭ҇еви:

Посла́лъ є҆сѝ дх҃а твоего̀, покры̀ ѧ҆̀ мо́ре: погрѧзо́ша ꙗ҆́кѡ ѻ҆́лово въ водѣ̀ ѕѣ́льнѣй.

Пои́мъ гдⷭ҇еви:

Кто̀ подо́бенъ тебѣ̀ въ бозѣ́хъ, гдⷭ҇и; кто̀ подо́бенъ тебѣ̀; просла́вленъ во ст҃ы́хъ, ди́венъ въ сла́вѣ, творѧ́й чꙋдеса̀.

Пои́мъ гдⷭ҇еви:

Просте́рлъ є҆сѝ десни́цꙋ твою̀, пожрѐ ѧ҆̀ землѧ̀. Наста́вилъ є҆сѝ пра́вдою твое́ю лю́ди твоѧ̑ сїѧ̑, ꙗ҆̀же и҆зба́вилъ є҆сѝ.

Пои́мъ гдⷭ҇еви:

Оу҆тѣ́шилъ є҆сѝ крѣ́постїю твое́ю во ѻ҆би́тель ст҃ꙋ́ю твою̀. Слы́шаша ꙗ҆зы́цы и҆ прогнѣ́вашасѧ, болѣ̑зни прїѧ́ша живꙋ́щїи въ фѷлїсті́мѣ.

Пои́мъ гдⷭ҇еви:

Тогда̀ потща́шасѧ влады̑ки є҆дѡ́мстїи, и҆ кнѧ́зи мѡаві́тстїи, прїѧ́тъ ѧ҆̀ тре́петъ: раста́ѧша всѝ живꙋ́щїи въ ханаа́нѣ.

Пои́мъ гдⷭ҇еви:

Да нападе́тъ на нѧ̀ стра́хъ и҆ тре́петъ, вели́чїемъ мы́шцы твоеѧ̀ да ѡ҆ка́менѧтсѧ.

Пои́мъ гдⷭ҇еви:

До́ндеже про́йдꙋтъ лю́дїе твоѝ, гдⷭ҇и, до́ндеже про́йдꙋтъ лю́дїе твоѝ сі́и, ꙗ҆̀же стѧжа́лъ є҆сѝ.

Пои́мъ гдⷭ҇еви:

Вве́дъ насадѝ ѧ҆̀ въ го́рꙋ достоѧ́нїѧ твоегѡ̀, въ гото́вое жили́ще твоѐ, є҆́же содѣ́лалъ є҆сѝ, гдⷭ҇и, ст҃ы́ню, гдⷭ҇и, ю҆́же ᲂу҆гото́вастѣ рꙋ́цѣ твоѝ.

Пои́мъ гдⷭ҇еви:

Гдⷭ҇ь црⷭ҇твꙋѧй вѣ́ки, и҆ на вѣ́къ, и҆ є҆щѐ. Є҆гда̀ вни́де ко́нница фараѡ́нова съ колесни́цами и҆ вса̑дники въ мо́ре, и҆ наведѐ на ни́хъ гдⷭ҇ь во́дꙋ морскꙋ́ю.

Пои́мъ гдⷭ҇еви:

Сы́нове же і҆и҃лєвы проидо́ша сꙋ́шею посредѣ̀ мо́рѧ.

Пои́мъ гдⷭ҇еви:

Сла́ва: Пои́мъ гдⷭ҇еви: И҆ ны́нѣ: Пои́мъ гдⷭ҇еви: И҆ послѣдѝ чте́цъ пое́тъ то́жде: Сла́внѡ бо просла́висѧ.

Прⷪ҇ро́чества софо́нїева чте́нїе. [Глава̀ г҃, ст. и҃-є҃і].

Та́кѡ глаго́летъ гдⷭ҇ь: потерпѝ менѐ въ де́нь воскресе́нїѧ моегѡ̀ во свидѣ́тельство: занѐ сꙋ́дъ мо́й въ сѡ́нмища ꙗ҆зы́кѡвъ є҆́же прїѧ́ти царе́й, є҆́же и҆злїѧ́ти на нѧ̀ гнѣ́въ мо́й ве́сь, гнѣ́въ ꙗ҆́рости моеѧ̀: занѐ ѻ҆гне́мъ рве́нїѧ моегѡ̀ поѧде́на бꙋ́детъ всѧ̀ землѧ̀. Ꙗ҆́кѡ тогда̀ ѡ҆бращꙋ̀ къ лю́демъ ѧ҆зы́къ въ ро́дъ є҆гѡ̀, є҆́же призыва́ти всѣ̑мъ и҆́мѧ гдⷭ҇не, рабо́тати є҆мꙋ̀ под̾ и҆́гомъ є҆ди́нѣмъ. Ѿ конє́цъ рѣ́къ є҆ѳїо́пскихъ прїимꙋ̀ молѧ́щыѧ мѧ̀, въ разсѣ́ѧнныхъ мои́хъ принесꙋ́тъ жє́ртвы мнѣ̀. Въ де́нь ѻ҆́нъ не и҆́маши постыди́тисѧ ѿ всѣ́хъ начина́нїй твои́хъ, и҆́миже нече́ствовалъ є҆сѝ въ мѧ̀: ꙗ҆́кѡ тогда̀ ѿимꙋ̀ ѿ тебє̀ ᲂу҆кори̑зны досажде́нїѧ твоегѡ̀, и҆ ктомꙋ̀ не и҆́маши приложи́ти велича́тисѧ на горѣ̀ ст҃ѣ́й мое́й. И҆ ѡ҆ста́влю въ тебѣ̀ лю́ди крѡ́тки и҆ смирє́нны, и҆ бꙋ́дꙋтъ бл҃гоговѣ́ти ѡ҆ и҆́мени гдⷭ҇ни ѡ҆ста́нцы і҆и҃лєвы, и҆ не сотворѧ́тъ непра́вды, и҆ не возглаго́лютъ сꙋ́етныхъ, и҆ не ѡ҆брѧ́щетсѧ во ᲂу҆стѣ́хъ и҆́хъ ѧ҆зы́къ льсти́въ: занѐ ті́и пожирꙋ́ютъ и҆ ᲂу҆гнѣздѧ́тсѧ, и҆ не бꙋ́детъ ᲂу҆страша́ѧй и҆̀хъ. Ра́дꙋйсѧ, дщѝ сїѡ́нова, ѕѣлѡ̀: проповѣ́дꙋй, дщѝ і҆ерⷭ҇ли́мова: весели́сѧ и҆ преꙋкраша́йсѧ ѿ всегѡ̀ се́рдца твоегѡ̀, дщѝ і҆ерⷭ҇ли́млѧ! Ѿѧ́тъ гдⷭ҇ь непра̑вды твоѧ̑, и҆зба́вилъ тѧ̀ є҆́сть и҆з̾ рꙋкѝ вра̑гъ твои́хъ: воцр҃и́тсѧ гдⷭ҇ь посредѣ̀ тебє̀, и҆ не ᲂу҆́зриши ѕла̀ ктомꙋ̀.

Ца́рствъ тре́тїихъ чте́нїе. [Глава̀ з҃і, ст. и҃ – к҃г].

Бы́сть глаго́лъ гдⷭ҇ень ко и҆лїѝ, глаго́лѧ: воста́ни, и҆ и҆дѝ въ саре́птꙋ сїдѡ́нскꙋю, и҆ пребꙋ́ди та́мѡ: се́ бо заповѣ́дахъ та́мѡ женѣ̀ вдови́цѣ препита́ти тѧ̀. И҆ воста̀, и҆ и҆́де въ саре́птꙋ сїдѡ́нскꙋю, и҆ прїи́де ко вратѡ́мъ гра́да: и҆ сѐ та́мѡ жена̀ вдова̀ собира́ше дрова̀. И҆ возопѝ и҆лїа̀ вслѣ́дъ є҆ѧ̀, и҆ речѐ є҆́й: принесѝ ны́нѣ мѝ ма́лѡ воды̀ въ сосꙋ́дѣ, и҆ и҆спїю̀. И҆ и҆́де взѧ́ти. И҆ возопѝ вслѣ́дъ є҆ѧ̀ и҆лїа̀, и҆ речѐ є҆́й: прїимѝ ᲂу҆̀бо мнѣ̀ и҆ ᲂу҆крꙋ́хъ хлѣ́ба въ рꙋцѣ̀ свое́й, да ꙗ҆́мъ. И҆ речѐ жена̀: жи́въ гдⷭ҇ь бг҃ъ тво́й, а҆́ще є҆́сть ᲂу҆ менє̀ ѡ҆прѣсно́къ: но то́кмѡ го́рсть мꙋкѝ въ водоно́сѣ, и҆ ма́лѡ є҆ле́а въ чва́нцѣ: и҆ сѐ а҆́зъ соберꙋ̀ два̀ полѣ̑нца, и҆ вни́дꙋ, и҆ сотворю̀ є҆̀ себѣ̀ и҆ дѣ́темъ мои̑мъ, и҆ снѣ́мы є҆̀, и҆ ᲂу҆́мремъ. И҆ речѐ къ не́й и҆лїа̀: дерза́й, вни́ди, и҆ сотворѝ по глаго́лꙋ твоемꙋ̀: но сотвори́ ми ѿтꙋ́дꙋ ѡ҆прѣсно́къ ма́лъ пре́жде, и҆ принеси́ ми: себѣ́ же и҆ ча́дѡмъ свои̑мъ да сотвори́ши по́слѣжде. Ꙗ҆́кѡ та́кѡ глаго́летъ гдⷭ҇ь бг҃ъ і҆и҃левъ: водоно́съ мꙋкѝ не ѡ҆скꙋдѣ́етъ, и҆ чва́нецъ є҆ле́а не ᲂу҆ма́литсѧ до днѐ, до́ндеже да́стъ гдⷭ҇ь до́ждь на зе́млю. И҆ и҆́де жена̀, и҆ сотворѝ по глаго́лꙋ и҆лїинꙋ̀, и҆ дадѐ є҆мꙋ̀, и҆ ꙗ҆дѐ то́й, и҆ та̀, и҆ ча̑да є҆ѧ̀. И҆ ѿ тогѡ̀ днѐ водоно́съ мꙋкѝ не ѡ҆скꙋдѣ̀, и҆ чва́нецъ є҆ле́а не ᲂу҆ма́лисѧ, по глаго́лꙋ гдⷭ҇ню, є҆го́же глаго́ла рꙋко́ю и҆лїино́ю. И҆ бы́сть по си́хъ, и҆ разболѣ́сѧ сы́нъ жены̀ госпожѝ до́мꙋ, и҆ бѣ̀ болѣ́знь є҆гѡ̀ крѣпка̀ ѕѣлѡ̀, до́ндеже не ѡ҆ста́сѧ въ не́мъ дꙋ́хъ є҆гѡ̀. И҆ речѐ ко и҆лїѝ: что̀ мнѣ̀ и҆ тебѣ̀, человѣ́че бж҃їй; вше́лъ є҆сѝ ко мнѣ̀ воспомѧнꙋ́ти непра̑вды моѧ̑ и҆ ᲂу҆мори́ти сы́на моего̀; И҆ речѐ и҆лїа̀ къ женѣ̀: да́ждь мѝ сы́на твоего̀. И҆ взѧ́тъ є҆го̀ ѿ нѣ́дра є҆ѧ̀, и҆ вознесѐ є҆го̀ въ го́рницꙋ, и҆дѣ́же са́мъ почива́ше, и҆ положѝ є҆го̀ на ѻ҆дрѣ̀ свое́мъ. И҆ возопѝ и҆лїа̀ ко гдⷭ҇ꙋ, и҆ речѐ: ᲂу҆вы̀ мнѣ̀, гдⷭ҇и, свидѣ́телю вдовы̀, ᲂу҆ неѧ́же а҆́зъ ны́нѣ пребыва́ю, ты̀ ѡ҆ѕло́билъ є҆сѝ є҆́же ᲂу҆мори́ти сы́на є҆ѧ̀. И҆ дꙋ́нꙋ на ѻ҆́трочища три́жды, и҆ призва̀ гдⷭ҇а, и҆ речѐ: гдⷭ҇и бж҃е мо́й, да возврати́тсѧ ᲂу҆̀бо дꙋша̀ ѻ҆́трочища сегѡ̀ во́нь. И҆ бы́сть та́кѡ. И҆ возопѝ ѻ҆́трочищъ: и҆ сведѐ є҆го̀ съ го́рницы въ до́мъ, и҆ дадѐ є҆го̀ ма́тери є҆гѡ̀. И҆ речѐ и҆лїа̀: ви́ждь, жи́въ є҆́сть сы́нъ тво́й. И҆ речѐ жена̀ ко и҆лїѝ: сѐ ᲂу҆разꙋмѣ́хъ, ꙗ҆́кѡ человѣ́къ бж҃їй є҆сѝ ты̀, и҆ глаго́лъ гдⷭ҇ень во ᲂу҆стѣ́хъ твои́хъ и҆́стиненъ.

Прⷪ҇ро́чества и҆са́їина чте́нїе. [Гл. ѯ҃а, ст. і҃-а҃і: гл. ѯ҃в, ст. а҃-є҃].

Да возра́дꙋетсѧ дꙋша̀ моѧ̀ ѡ҆ гдⷭ҇ѣ: ѡ҆блече́ бо мѧ̀ въ ри́зꙋ сп҃се́нїѧ, и҆ ѡ҆де́ждею весе́лїѧ [ѡ҆дѣ́ѧ мѧ̀]: ꙗ҆́кѡ на жениха̀ возложѝ на мѧ̀ вѣне́цъ, и҆ ꙗ҆́кѡ невѣ́стꙋ ᲂу҆краси́ мѧ красото́ю. И҆ ꙗ҆́кѡ землѧ̀ растѧ́щаѧ цвѣ́тъ сво́й, и҆ ꙗ҆́кѡ вертогра́дъ сѣ́мена своѧ̑ прозѧба́етъ: та́кѡ возрасти́тъ гдⷭ҇ь пра́вдꙋ и҆ весе́лїе пред̾ всѣ́ми ꙗ҆зы̑ки. Сїѡ́на ра́ди не ᲂу҆молчꙋ̀, и҆ і҆ерⷭ҇ли́ма ра́ди не попꙋщꙋ̀, до́ндеже и҆зы́детъ ꙗ҆́кѡ свѣ́тъ пра́вда моѧ̀, и҆ сп҃се́нїе моѐ ꙗ҆́кѡ свѣти́ло разжже́тсѧ. И҆ ᲂу҆́зрѧтъ ꙗ҆зы́цы пра́вдꙋ твою̀, и҆ ца́рїе сла́вꙋ твою̀, и҆ прозовꙋ́тъ тѧ̀ и҆́менемъ но́вымъ, и҆́мже гдⷭ҇ь наименꙋ́етъ є҆̀. И҆ бꙋ́деши вѣне́цъ добро́ты въ рꙋцѣ̀ гдⷭ҇ни и҆ дїади́ма ца́рствїѧ въ рꙋцѣ̀ бг҃а твоегѡ̀. И҆ не прозове́шисѧ ктомꙋ̀ ѡ҆ста́вленъ, и҆ землѧ̀ твоѧ̀ ктомꙋ̀ не нарече́тсѧ пꙋста̀: тебѣ́ бо прозове́тсѧ во́лѧ моѧ̀, и҆ землѧ̀ твоѧ̀ вселе́ннаѧ: ꙗ҆́кѡ бл҃говолѝ гдⷭ҇ь въ тебѣ̀, и҆ землѧ̀ твоѧ̀ вкꙋ́пѣ насели́тсѧ. И҆ ꙗ҆́коже живѧ́й ю҆́ноша съ дѣ́вою, та́кѡ поживꙋ́тъ сы́нове твоѝ съ тобо́ю: и҆ бꙋ́детъ ꙗ҆́коже ра́дꙋетсѧ жени́хъ ѡ҆ невѣ́стѣ, та́кѡ возра́дꙋетсѧ гдⷭ҇ь ѡ҆ тебѣ̀.

Бытїѧ̀ чте́нїе. [Глава̀ к҃в, ст. а҃-и҃і].

Бы́сть по глаго́лѣхъ си́хъ, бг҃ъ и҆скꙋша́ше а҆враа́ма, и҆ речѐ є҆мꙋ̀: а҆враа́ме, а҆враа́ме. И҆ речѐ: сѐ а҆́зъ. И҆ речѐ: поймѝ сы́на твоего̀ возлю́бленнаго, є҆го́же возлюби́лъ є҆сѝ, і҆саа́ка, и҆ и҆дѝ на зе́млю высо́кꙋ, и҆ вознесѝ є҆го̀ та́мѡ во всесожже́нїе, на є҆ди́нꙋ ѿ го́ръ, и҆́хже тѝ рекꙋ̀. Воста́въ же а҆враа́мъ ᲂу҆́трѡ, ѡ҆сѣдла̀ ѡ҆слѧ̀ своѐ, поѧ́тъ же съ собо́ю два̀ ѻ҆́трочища и҆ і҆саа́ка сы́на своего̀: и҆ растни́въ дрова̀ во всесожже́нїе, воста́въ и҆́де, и҆ прїи́де на мѣ́сто, є҆́же речѐ є҆мꙋ̀ бг҃ъ, въ тре́тїй де́нь. И҆ воззрѣ́въ а҆враа́мъ ѻ҆чи́ма свои́ма, ви́дѣ мѣ́сто и҆здале́че. И҆ речѐ а҆враа́мъ ѻ҆трокѡ́мъ свои̑мъ: сѧ́дите здѣ̀ со ѻ҆слѧ́темъ: а҆́зъ же и҆ дѣ́тищъ по́йдемъ до ѻ҆́ндѣ, и҆ поклони́вшесѧ возврати́мсѧ къ ва́мъ. Взѧ́ же а҆враа́мъ дрова̀ всесожже́нїѧ, и҆ возложѝ на і҆саа́ка сы́на своего̀: взѧ́ же въ рꙋ́ки и҆ ѻ҆́гнь и҆ но́жъ, и҆ и҆до́ста ѻ҆́ба вкꙋ́пѣ. Рече́ же і҆саа́къ ко а҆враа́мꙋ ѻ҆тцꙋ̀ своемꙋ̀: ѻ҆́тче. Ѻ҆́нъ же речѐ: что́ є҆сть, ча́до; рече́ же: сѐ ѻ҆́гнь и҆ дрова̀, гдѣ́ є҆сть ѻ҆вча̀ є҆́же во всесожже́нїе; Рече́ же а҆враа́мъ: бг҃ъ ᲂу҆́зритъ себѣ̀ ѻ҆вча̀ во всесожже́нїе, ча́до. ше́дше же ѻ҆́ба вкꙋ́пѣ, прїидо́ста на мѣ́сто, є҆́же речѐ є҆мꙋ̀ бг҃ъ: и҆ созда̀ та́мѡ а҆враа́мъ же́ртвенникъ, и҆ возложѝ дрова̀: и҆ свѧза́въ і҆саа́ка сы́на своего̀, возложѝ є҆го̀ на же́ртвенникъ верхꙋ̀ дро́въ. И҆ прострѐ а҆враа́мъ рꙋ́кꙋ свою̀ взѧ́ти но́жъ, закла́ти сы́на своего̀. И҆ воззва̀ и҆̀ а҆́гг҃лъ гдⷭ҇ень съ небесѐ, и҆ речѐ: а҆враа́ме, а҆враа́ме. ѻ҆́нъ же речѐ: сѐ а҆́зъ. И҆ речѐ: да не возложи́ши рꙋкѝ твоеѧ̀ на ѻ҆́трочища, нижѐ да сотвори́ши є҆мꙋ̀ что̀: ны́нѣ бо позна́хъ, ꙗ҆́кѡ бои́шисѧ ты̀ бг҃а и҆ не пощадѣ́лъ є҆сѝ сы́на твоегѡ̀ возлю́бленнагѡ менє̀ ра́ди. И҆ воззрѣ́въ а҆враа́мъ ѻ҆чи́ма свои́ма ви́дѣ, и҆ сѐ ѻ҆ве́нъ є҆ди́нъ держи́мый рога́ма въ са́дѣ саве́къ: и҆ и҆́де а҆враа́мъ, и҆ взѧ̀ ѻ҆вна̀, и҆ вознесѐ є҆го̀ во всесожже́нїе вмѣ́стѡ і҆саа́ка сы́на своегѡ̀. И҆ наречѐ а҆враа́мъ и҆́мѧ мѣ́стꙋ томꙋ̀: гдⷭ҇ь ви́дѣ: да рекꙋ́тъ дне́сь: на горѣ̀ гдⷭ҇ь ꙗ҆ви́сѧ. И҆ воззва̀ а҆́гг҃лъ гдⷭ҇ень а҆враа́ма втори́цею съ небесѐ, глаго́лѧ: мно́ю самѣ́мъ клѧ́хсѧ, глаго́летъ гдⷭ҇ь, є҆гѡ́же ра́ди сотвори́лъ є҆сѝ глаго́лъ се́й, и҆ не пощадѣ́лъ є҆сѝ сы́на твоегѡ̀ возлю́бленнагѡ менє̀ ра́ди: вои́стиннꙋ бл҃гословѧ̀ бл҃гословлю́ тѧ, и҆ ᲂу҆множа́ѧ ᲂу҆мно́жꙋ сѣ́мѧ твоѐ, ꙗ҆́кѡ ѕвѣ́зды небє́сныѧ и҆ ꙗ҆́кѡ песо́къ вскра́й мо́рѧ: и҆ наслѣ́дитъ сѣ́мѧ твоѐ гра́ды сꙋпоста́тѡвъ: и҆ бл҃гословѧ́тсѧ ѡ҆ сѣ́мени твое́мъ всѝ ꙗ҆зы́цы земні́и, зане́же послꙋ́шалъ є҆сѝ гла́са моегѡ̀.

Прⷪ҇ро́чества и҆са́їина чте́нїе. [Глава̀ ѯ҃а, ст. а҃-ѳ҃].

Дх҃ъ гдⷭ҇ень на мнѣ̀, є҆гѡ́же ра́ди пома́за мѧ̀, бл҃говѣсти́ти ни́щымъ посла̀ мѧ̀, и҆сцѣли́ти сокрꙋшє́нныѧ се́рдцемъ, проповѣ́дати плѣ́нникѡмъ ѿпꙋще́нїе и҆ слѣпы́мъ прозрѣ́нїе: нарещѝ лѣ́то гдⷭ҇не прїѧ́тно и҆ де́нь воздаѧ́нїѧ, ᲂу҆тѣ́шити всѧ̑ пла́чꙋщыѧ: да́ти пла́чꙋщымъ сїѡ́на сла́вꙋ вмѣ́стѡ пе́пела, пома́занїе весе́лїе пла́чꙋщымъ, ᲂу҆краше́нїе сла́вы вмѣ́стѡ дꙋ́ха ᲂу҆ны́нїѧ: и҆ нарекꙋ́тсѧ ро́дове пра́вды, насажде́нїе гдⷭ҇не въ сла́вꙋ. И҆ сози́ждꙋтъ пꙋсты̑ни вѣ̑чныѧ, запꙋстѣ́вшыѧ пре́жде воздви́гнꙋтъ: и҆ ѡ҆бновѧ́тъ гра́ды пꙋсты̑ѧ, ѡ҆пꙋстошє́нныѧ въ ро́ды. И҆ прїи́дꙋтъ и҆норо́днїи, пасꙋ́щїи ѻ҆́вцы твоѧ̑, и҆ и҆ноплемє́нницы ѡ҆ра́тєли, и҆ вїногра́дари ва́ши. Вы́ же свѧще́нницы гдⷭ҇ни нарече́тесѧ, слꙋжи́телїе бг҃а ва́шегѡ, рече́тсѧ ва́мъ: крѣ́пость ꙗ҆зы̑къ снѣ́сте, и҆ въ бога́тствѣ и҆́хъ чꙋ́дни бꙋ́дете. Си́це зе́млю свою̀ втори́цею наслѣ́дѧтъ, и҆ весе́лїе вѣ́чное над̾ главо́ю и҆́хъ. А҆́зъ бо є҆́смь гдⷭ҇ь любѧ́й пра́вдꙋ и҆ ненави́дѧй граблє́нїѧ ѿ непра́вды: и҆ да́мъ трꙋ́дъ и҆́хъ пра́ведникѡмъ, и҆ завѣ́тъ вѣ́ченъ завѣща́ю и҆̀мъ. И҆ позна́етсѧ во ꙗ҆зы́цѣхъ сѣ́мѧ и҆́хъ, и҆ внꙋ́цы и҆́хъ посредѝ люде́й: всѧ́къ ви́дѧй ѧ҆̀, позна́етъ ѧ҆̀, ꙗ҆́кѡ сі́и сꙋ́ть сѣ́мѧ бл҃гослове́нное ѿ бг҃а, и҆ ра́достїю возра́дꙋютсѧ ѡ҆ гдⷭ҇ѣ.

Ца́рствъ четве́ртыхъ чте́нїе. [Глава̀ д҃, ст. и҃-л҃з].

Бы́сть во є҆ди́нъ де́нь, и҆ пре́йде є҆лїссе́й въ сѡма́нъ, и҆ тꙋ̀ жена̀ ве́лїѧ, и҆ ᲂу҆держа̀ є҆гѡ̀ снѣ́сти хлѣ́ба: и҆ бы́сть є҆мꙋ̀ входи́ти и҆ и҆сходи́ти мно́жицею, и҆ ᲂу҆клонѧ́шесѧ та́мѡ ꙗ҆́сти хлѣ́ба. И҆ речѐ жена̀ къ мꙋ́жꙋ своемꙋ̀: сѐ ны́нѣ разꙋмѣ́хъ, ꙗ҆́кѡ человѣ́къ бж҃їй ст҃ъ се́й мимохо́дитъ на́съ при́снѡ: сотвори́мъ ᲂу҆̀бо є҆мꙋ̀ го́рницꙋ, мѣ́сто ма́ло, и҆ поста́вимъ є҆мꙋ̀ та́мѡ ѻ҆́дръ, и҆ трапе́зꙋ, и҆ престо́лъ, и҆ свѣ́щникъ: и҆ бꙋ́детъ внегда̀ входи́ти є҆мꙋ̀ къ на́мъ, и҆ ᲂу҆клонѧ́етсѧ та́мѡ. И҆ бы́сть во є҆ди́нъ де́нь, и҆ вни́де та́мѡ, и҆ ᲂу҆клони́сѧ въ го́рницꙋ, и҆ спа̀ та́мѡ. И҆ речѐ ко гїезі́ю ѻ҆́трочищꙋ своемꙋ̀: призови́ ми сѡмані́тѧныню сїю̀. И҆ призва̀ ю҆̀, и҆ ста̀ пред̾ ни́мъ. И҆ речѐ є҆мꙋ̀: рцы̀ ᲂу҆́бѡ є҆́й: сѐ ᲂу҆диви́ла є҆сѝ на́съ всѣ́мъ попече́нїемъ си́мъ: что̀ подоба́етъ сотвори́ти тебѣ̀; а҆́ще є҆́сть тебѣ̀ сло́во къ царю̀ и҆лѝ ко кнѧ́зю си́лы; ѻ҆на́ же речѐ: [нѣ́сть,] посредѣ̀ люде́й мои́хъ а҆́зъ є҆́смь живꙋ́щи. И҆ речѐ ко гїезі́ю: что̀ подоба́етъ сотвори́ти є҆́й; И҆ речѐ гїезі́й ѻ҆́трочищъ є҆гѡ̀: вои́стиннꙋ сы́на нѣ́сть ᲂу҆ неѧ̀, и҆ мꙋ́жъ є҆ѧ̀ ста́ръ. И҆ речѐ: призовѝ ю҆̀. И҆ призва̀ ю҆̀, и҆ ста̀ при две́рехъ. И҆ речѐ є҆лїссе́й къ не́й: во вре́мѧ сїѐ, ꙗ҆́коже ча́съ се́й живꙋ́щи, ты̀ зачне́ши сы́на. ѻ҆на́ же речѐ: нѝ, господи́не, не солжѝ рабѣ̀ твое́й. И҆ зача́тъ во чре́вѣ жена̀, и҆ родѝ сы́на во вре́мѧ сїѐ, ꙗ҆́коже ча́съ се́й живꙋ́щи, ꙗ҆́коже глаго́ла къ не́й є҆лїссе́й. И҆ возмꙋжа̀ ѻ҆́трочищъ: и҆ бы́сть, є҆гда̀ и҆зы́де ко ѻ҆тцꙋ̀ своемꙋ̀, къ жнꙋ́щымъ, и҆ речѐ ко ѻ҆тцꙋ̀ своемꙋ̀: глава̀ моѧ̀, глава̀ моѧ̀ [боли́тъ]. И҆ речѐ ко ѻ҆́трокꙋ: несѝ є҆го̀ къ ма́тери є҆гѡ̀. И҆ несѐ є҆го̀ къ ма́тери є҆гѡ̀, и҆ лежа́ше на колѣ̑нꙋ є҆ѧ̀ до полꙋ́дне, и҆ ᲂу҆́мре. И҆ вознесѐ є҆го̀, и҆ положѝ є҆го̀ на ѻ҆дрѣ̀ человѣ́ка бж҃їѧ: и҆ затворѝ є҆го̀, и҆ и҆зы́де, и҆ призва̀ мꙋ́жа своего̀, и҆ речѐ є҆мꙋ̀: посли́ ми ᲂу҆̀бо є҆ди́наго ѿ ѻ҆́трѡкъ и҆ є҆ди́но ѿ ѻ҆слѧ́тъ, и҆ текꙋ̀ до человѣ́ка бж҃їѧ, и҆ возвращꙋ́сѧ. И҆ речѐ: что̀ ꙗ҆́кѡ ты̀ и҆́деши къ немꙋ̀ дне́сь; не но́въ мѣ́сѧцъ, нижѐ сꙋббѡ́та. ѻ҆на́ же речѐ: ми́ръ. И҆ ѡ҆сѣдла̀ ѻ҆слѧ̀, и҆ речѐ ко ѻ҆́трочищꙋ своемꙋ̀: ведѝ, и҆ и҆дѝ, да не ᲂу҆держи́ши менѐ, є҆́же всѣ́сти, ꙗ҆́коже рекꙋ̀ тебѣ̀: грѧдѝ, и҆ и҆дѝ, и҆ прїидѝ къ человѣ́кꙋ бж҃їю на го́рꙋ карми́льскꙋю. И҆ и҆́де, и҆ прїи́де до человѣ́ка бж҃їѧ въ горꙋ̀ карми́льскꙋю. И҆ бы́сть ꙗ҆́кѡ ви́дѣ ю҆̀ є҆лїссе́й грѧдꙋ́щꙋю, и҆ речѐ къ гїезі́ю ѻ҆́трочищꙋ своемꙋ̀: сѐ ᲂу҆́бѡ сѡмані́тѧнынѧ ѻ҆́наѧ: ны́нѣ тецы̀ въ срѣ́тенїе є҆ѧ̀, и҆ рече́ши є҆́й: ми́ръ ли тебѣ̀; И҆ течѐ во срѣ́тенїе є҆́й, и҆ речѐ є҆́й: ми́ръ ли тебѣ̀; ми́ръ ли мꙋ́жꙋ твоемꙋ̀; ми́ръ ли ѻ҆́трочищꙋ твоемꙋ̀; ѻ҆на́ же речѐ: ми́ръ. И҆ прїи́де къ є҆лїссе́ю на го́рꙋ, и҆ ꙗ҆́тсѧ за но́зѣ є҆гѡ̀: и҆ прибли́жисѧ гїезі́й ѿри́нꙋти ю҆̀. И҆ речѐ є҆лїссе́й: ѡ҆ста́ви ю҆̀, ꙗ҆́кѡ дꙋша̀ є҆ѧ̀ болѣ́зненна въ не́й, и҆ гдⷭ҇ь ᲂу҆кры̀ ѿ менє̀ и҆ не возвѣстѝ мнѣ̀. Ѻ҆на́ же речѐ: є҆да̀ проси́хъ сы́на ᲂу҆ господи́на моегѡ̀; ꙗ҆́кѡ реко́хъ: не прельстѝ менѐ; И҆ речѐ є҆лїссе́й ко гїезі́ю: препоѧ́ши чресла̀ твоѧ̑, и҆ возьмѝ же́злъ мо́й въ рꙋ́цѣ твоѝ, и҆ и҆дѝ, ꙗ҆́кѡ а҆́ще ѡ҆брѧ́щеши мꙋ́жа, да не благослови́ши є҆го̀, и҆ а҆́ще благослови́тъ тѧ̀ мꙋ́жъ, не ѿвѣща́й є҆мꙋ̀: и҆ возложѝ же́злъ мо́й на лицѐ ѻ҆́трочища. И҆ речѐ ма́ти ѻ҆́трочища: жи́въ гдⷭ҇ь, и҆ жива̀ дꙋша̀ твоѧ̀, а҆́ще ѡ҆ста́влю тебѐ. И҆ воста̀ є҆лїссе́й, и҆ и҆́де въ слѣ́дъ є҆ѧ̀. И҆ гїезі́й и҆́де пред̾ не́ю, и҆ возложѝ же́злъ на лицѐ ѻ҆́трочища, и҆ не бѣ̀ гла́са, и҆ не бѣ̀ слы́шанїѧ. И҆ возврати́сѧ въ срѣ́тенїе є҆гѡ̀, и҆ повѣ́да є҆мꙋ̀, глаго́лѧ: не воста̀ ѻ҆́трочищъ. И҆ вни́де є҆лїссе́й въ хра́минꙋ, и҆ сѐ ѻ҆́трочищъ ᲂу҆ме́рый положе́нъ на ѻ҆дрѣ̀ є҆гѡ̀. И҆ вни́де є҆лїссе́й въ до́мъ, и҆ затворѝ две́рь за двою̀ собо́ю, и҆ помоли́сѧ гдⷭ҇ꙋ. И҆ взы́де, и҆ лѧ́же на ѻ҆́трочищи, и҆ положѝ ᲂу҆ста̀ своѧ̑ на ᲂу҆стѣ́хъ є҆гѡ̀, и҆ ѻ҆́чи своѝ на ѻ҆́чи є҆гѡ̀, и҆ рꙋ́цѣ своѝ на рꙋ́цѣ є҆гѡ̀, и҆ плеснѣ̀ своѝ на плеснꙋ̀ є҆гѡ̀: и҆ слѧче́сѧ над̾ ни́мъ, и҆ дꙋ́нꙋ на него̀, и҆ согрѣ́ѧсѧ пло́ть ѻ҆́трочища. И҆ ѡ҆брати́сѧ, и҆ походѝ въ хра́минѣ сю́дꙋ и҆ сю́дꙋ: и҆ взы́де, и҆ слѧче́сѧ над̾ ѻ҆́трочищемъ седми́жды: и҆ ѿве́рзе ѻ҆́трочищъ ѻ҆́чи своѝ. И҆ возопѝ є҆лїссе́й ко гїезі́ю, и҆ речѐ: призови́ ми сѡмані́тѧныню сїю. И҆ призва̀ ю҆̀, и҆ вни́де къ немꙋ̀. И҆ речѐ є҆лїссе́й: прїимѝ сы́на твоего̀. И҆ вни́де жена̀, и҆ падѐ на но́гꙋ є҆гѡ̀, и҆ поклони́сѧ є҆мꙋ̀ до землѝ: и҆ прїѧ́тъ сы́на своего̀, и҆ и҆зы́де.

Прⷪ҇ро́чества и҆са́їина чте́нїе.

[Глава̀ ѯ҃г, ст. а҃і-ѳ҃і: гл. ѯ҃д, ст. а҃-є҃].

Та́кѡ глаго́летъ гдⷭ҇ь: гдѣ̀ возведы́й ѿ ꙾землѝ꙾¹⁷ па́стырѧ ѻ҆ве́цъ свои́хъ; гдѣ̀ є҆́сть вложи́вый въ ни́хъ дх҃а ст҃а́го; Возве́дшаѧ десни́цею мѡѷсе́а, мы́шца сла́вы є҆гѡ̀ раздѣлѝ во́дꙋ пред̾ лице́мъ є҆гѡ̀, сотвори́ти є҆мꙋ̀ и҆́мѧ вѣ́чно. Проведѐ и҆̀хъ сквозѣ̀ бе́зднꙋ, ꙗ҆́коже конѧ̀ сквозѣ̀ пꙋсты́ню, и҆ не ᲂу҆трꙋди́шасѧ, и҆ ꙗ҆́кѡ скоты̀ по по́лю: и҆ сни́де дх҃ъ ѿ гдⷭ҇а, и҆ наста́ви и҆̀хъ. Та́кѡ прове́лъ є҆сѝ лю́ди твоѧ̑, сотвори́ти тебѣ̀ самомꙋ̀ и҆́мѧ сла́вно. Ѡ҆брати́сѧ, гдⷭ҇и, ѿ нб҃сѐ, и҆ ви́ждь ѿ до́мꙋ ст҃а́гѡ твоегѡ̀ и҆ сла́вы твоеѧ̀: гдѣ̀ є҆́сть ре́вность твоѧ̀ и҆ крѣ́пость твоѧ̀; гдѣ̀ є҆́сть мно́жество млⷭ҇ти твоеѧ̀ и҆ щедро́тъ твои́хъ, ꙗ҆́кѡ терпѣ́лъ є҆сѝ на́мъ; Ты́ бо є҆сѝ ѻ҆ц҃ъ на́шъ, поне́же а҆враа́мъ не ᲂу҆вѣ́дѣ на́съ, и҆ і҆и҃ль не позна̀ на́съ, но ты̀, гдⷭ҇и, ѻ҆ц҃ъ на́шъ, и҆зба́ви ны̀, и҆спе́рва и҆́мѧ твоѐ на на́съ є҆́сть. Что̀ ᲂу҆клони́лъ є҆сѝ на́съ, гдⷭ҇и, ѿ пꙋтѝ твоегѡ̀, и҆ ѡ҆жесточи́лъ є҆сѝ сердца̀ на̑ша, є҆́же не боѧ́тисѧ тебє̀; ѡ҆брати́сѧ ра́ди ра̑бъ твои́хъ, ра́ди племе́нъ достоѧ́нїѧ твоегѡ̀, да [понѐ] ма́лѡ наслѣ́димъ горы̀ ст҃ы́ѧ твоеѧ̀. Проти̑вницы на́ши попра́ша ст҃ы́ню твою̀: бы́хомъ ꙗ҆́кѡ и҆спе́рва, є҆гда̀ не владѣ́лъ є҆сѝ на́ми, нижѐ бѣ̀ нарече́но и҆́мѧ твоѐ на на́съ. А҆́ще ѿве́рзеши нб҃о, тре́петъ прїи́мꙋтъ ѿ тебє̀ го́ры и҆ раста́ютъ, ꙗ҆́кѡ та́етъ во́скъ ѿ лица̀ ѻ҆гнѧ̀, и҆ попали́тъ ѻ҆́гнь сꙋпоста́ты, и҆ ꙗ҆вле́но бꙋ́детъ и҆́мѧ твоѐ въ сопроти́вныхъ твои́хъ: ѿ лица̀ твоегѡ̀ ꙗ҆зы́цы возмѧтꙋ́тсѧ. Є҆гда̀ сотвори́ши сла̑внаѧ, тре́петъ прїи́мꙋтъ ѿ тебє̀ го́ры. Ѿ вѣ́ка не слы́шахомъ, нижѐ ѻ҆́чи на́ши ви́дѣша бг҃а, ра́звѣ тебє̀, и҆ дѣла̀ твоѧ̑, ꙗ҆̀же сотвори́ши ждꙋ́щымъ млⷭ҇ти. Млⷭ҇ть бо срѧ́щетъ творѧ́щихъ пра́вдꙋ, и҆ пꙋтїѐ твоѝ помѧ́нꙋтсѧ.

Прⷪ҇ро́чества і҆еремі́ина чте́нїе. [Глава̀ л҃а, ст. л҃а-л҃д].

Та́кѡ глаго́летъ гдⷭ҇ь: сѐ дні́е грѧдꙋ́тъ, и҆ завѣща́ю до́мꙋ і҆и҃левꙋ и҆ до́мꙋ і҆ꙋ́динꙋ завѣ́тъ но́въ, не по завѣ́тꙋ, є҆го́же завѣща́хъ ѻ҆тцє́мъ и҆́хъ въ де́нь, во́ньже є҆́мшꙋ мѝ за рꙋ́кꙋ и҆́хъ, и҆звестѝ ѧ҆̀ ѿ землѝ є҆гѵ́петскїѧ: ꙗ҆́кѡ ті́и не пребы́ша въ завѣ́тѣ мое́мъ, и҆ а҆́зъ небрего́хъ и҆̀хъ, глаго́летъ гдⷭ҇ь. Ꙗ҆́кѡ се́й завѣ́тъ, є҆го́же завѣща́ю до́мꙋ і҆и҃левꙋ по дне́хъ ѻ҆́нѣхъ, глаго́летъ гдⷭ҇ь: даѧ̀ зако́ны моѧ̑ въ мы̑сли и҆́хъ, и҆ на сердца́хъ и҆́хъ напишꙋ̀ ѧ҆̀, и҆ бꙋ́дꙋ и҆̀мъ въ бг҃а, и҆ ті́и бꙋ́дꙋтъ мѝ въ лю́ди. И҆ не наꙋчи́тъ кі́йждо бли́жнѧго своего̀ и҆ кі́йждо бра́та своего̀, глаго́лѧ: позна́й гдⷭ҇а: ꙗ҆́кѡ всѝ позна́ютъ мѧ̀ ѿ ма́ла да́же и҆ до вели́кагѡ и҆́хъ: ꙗ҆́кѡ млⷭ҇тивъ бꙋ́дꙋ непра́вдамъ и҆́хъ, и҆ грѣхѡ́въ и҆́хъ не помѧнꙋ̀ ктомꙋ̀.

Прⷪ҇ро́чества данїи́лова чте́нїе. [Глава̀ г҃, ст. а҃-п҃и].

Въ лѣ́то ѻ҆смонадесѧ́тое навꙋходоно́соръ ца́рь сотворѝ тѣ́ло зла́то, высота̀ є҆гѡ̀ лакте́й шести́десѧти, и҆ широта̀ є҆гѡ̀ лакте́й шестѝ: и҆ поста́ви є҆̀ на по́ли деи́рѣ, во странѣ̀ вавѷлѡ́нстѣй. И҆ посла̀ [навꙋходоно́соръ ца́рь] собра́ти ѵ҆па́ты, и҆ воевѡ́ды, и҆ мѣстонача́льники, вожди̑ же и҆ мꙋчи́тєли, и҆ сꙋ́щыѧ на власте́хъ, и҆ всѧ̑ кнѧ́зи стра́нъ, прїитѝ на ѡ҆бновле́нїе кꙋмі́ра, є҆го́же поста́ви навꙋходоно́соръ ца́рь. И҆ собра́шасѧ мѣстонача̑льницы, ѵ҆па́ты, воевѡ́ды, вожди̑, мꙋчи́тєли вели́цыи, и҆̀же над̾ властьмѝ, и҆ всѝ нача̑льницы стра́нъ на ѡ҆бновле́нїе тѣ́ла, є҆́же поста́ви навꙋходоно́соръ ца́рь. и҆ ста́ша пред̾ тѣ́ломъ, є҆́же поста́ви навꙋходоно́соръ ца́рь. И҆ проповѣ́дникъ вопїѧ́ше съ крѣ́постїю: ва́мъ глаго́летсѧ, наро́ди, лю́дїе, племена̀, ꙗ҆зы́цы: во́ньже ча́съ а҆́ще ᲂу҆слы́шите гла́съ трꙋбы̀, свирѣ́ли же и҆ гꙋ́сли, самвѵ́ки же и҆ ѱалти́ри, и҆ согла́сїѧ, и҆ всѧ́кагѡ ро́да мꙋсїкі́йска, па́дающе покланѧ́йтесѧ тѣ́лꙋ злато́мꙋ, є҆́же поста́ви навꙋходоно́соръ ца́рь: и҆ и҆́же а҆́ще не па́дъ покло́нитсѧ, въ то́й ча́съ вве́рженъ бꙋ́детъ въ пе́щь ѻ҆гне́мъ горѧ́щꙋю. И҆ бы́сть є҆гда̀ ᲂу҆слы́шаша лю́дїе гла́съ трꙋбы̀, свирѣ́ли же и҆ гꙋ́сли, самвѵ́ки же и҆ ѱалти́ри, и҆ согла́сїѧ, и҆ всѧ́кагѡ ро́да мꙋсїкі́йскагѡ, па́дающе всѝ лю́дїе, племена̀, ꙗ҆зы́цы, покланѧ́хꙋсѧ тѣ́лꙋ злато́мꙋ, є҆́же поста́ви навꙋходоно́соръ ца́рь. Тогда̀ пристꙋпи́ша мꙋ́жїе халде́йстїи и҆ ѡ҆болга́ша і҆ꙋде́євъ, ѿвѣща́вше рѣ́ша новꙋходоно́сорꙋ царе́ви: царю̀, во вѣ́ки живѝ. Ты̀, царю̀, положи́лъ є҆сѝ повелѣ́нїе, да всѧ́къ человѣ́къ, и҆́же а҆́ще ᲂу҆слы́шитъ гла́съ трꙋбы̀, свирѣ́ли же и҆ гꙋ́сли, самвѵ́ки же и҆ ѱалти́ри, и҆ согла́сїѧ, и҆ всѧ́кагѡ ро́да мꙋсїкі́йска, и҆ не па́дъ поклони́тсѧ тѣ́лꙋ злато́мꙋ, вве́рженъ бꙋ́детъ въ пе́щь ѻ҆гне́мъ горѧ́щꙋю. Сꙋ́ть ᲂу҆̀бо мꙋ́жи і҆ꙋде́є, и҆̀хже поста́вилъ є҆сѝ над̾ дѣ́лы страны̀ вавѷлѡ́нскїѧ, седра́хъ, мїса́хъ и҆ а҆вденагѡ̀, и҆̀же не послꙋ́шаша за́повѣди твоеѧ̀, царю̀, и҆ богѡ́мъ твои̑мъ не слꙋ́жатъ, и҆ тѣ́лꙋ злато́мꙋ, є҆́же поста́вилъ є҆сѝ, не покланѧ́ютсѧ. Тогда̀ навꙋходоно́соръ въ ꙗ҆́рости и҆ гнѣ́вѣ речѐ привестѝ седра́ха, мїса́ха и҆ а҆вденагѡ̀: и҆ приведе́ни бы́ша пред̾ царѧ̀. И҆ ѿвѣща̀ навꙋходоно́соръ, и҆ речѐ и҆̀мъ: а҆́ще вои́стиннꙋ седра́хъ, мїса́хъ и҆ а҆вденагѡ̀, богѡ́мъ мои̑мъ не слꙋ́жите, и҆ тѣ́лꙋ злато́мꙋ, є҆́же поста́вихъ, не покланѧ́етесѧ: Ны́нѣ ᲂу҆̀бо, а҆́ще є҆стѐ гото́ви, да є҆гда̀ ᲂу҆слы́шите гла́съ трꙋбы̀, свирѣ́ли же и҆ гꙋ́сли, самвѵ́ки же и҆ ѱалти́ри, и҆ согла́сїѧ, и҆ всѧ́кагѡ ро́да мꙋсїкі́йскагѡ, па́дше поклоните́сѧ тѣ́лꙋ злато́мꙋ, є҆́же сотвори́хъ: а҆́ще же не поклоните́сѧ, въ то́й ча́съ вве́ржени бꙋ́дете въ пе́щь ѻ҆гне́мъ горѧ́щꙋю: и҆ кто́ є҆сть бг҃ъ, и҆́же и҆́зьметъ вы̀ и҆з̾ рꙋкѝ моеѧ̀; И҆ ѿвѣща́ша седра́хъ, мїса́хъ и҆ а҆вденагѡ̀, глаго́люще царю̀ навꙋходоно́сорꙋ: не тре́бѣ на́мъ ѡ҆ глаго́лѣ се́мъ ѿвѣща́ти тебѣ̀: є҆́сть бо бг҃ъ на́шъ на нб҃сѣ́хъ, є҆мꙋ́же мы̀ слꙋ́жимъ, си́ленъ и҆з̾ѧ́ти на́съ ѿ пе́щи ѻ҆гне́мъ горѧ́щїѧ и҆ ѿ рꙋкꙋ̀ твоє́ю и҆зба́вити на́съ, царю̀: а҆́ще ли нѝ, вѣ́домо да бꙋ́детъ тебѣ̀, царю̀, ꙗ҆́кѡ богѡ́мъ твои̑мъ не слꙋ́жимъ, и҆ тѣ́лꙋ злато́мꙋ, є҆́же поста́вилъ є҆сѝ, не кла́нѧемсѧ. Тогда̀ навꙋходоно́соръ и҆спо́лнисѧ ꙗ҆́рости, и҆ зра́къ лица̀ є҆гѡ̀ и҆змѣни́сѧ на седра́ха, мїса́ха и҆ а҆вденагѡ̀, и҆ речѐ: разжжи́те пе́щь седмери́цею, до́ндеже до конца̀ разгори́тсѧ. И҆ мꙋжє́мъ си̑льнымъ крѣ́постїю речѐ: ѡ҆кова́вше седра́ха, мїса́ха и҆ а҆вденагѡ̀, вве́рзите въ пе́щь ѻ҆гне́мъ горѧ́щꙋю. Тогда̀ мꙋ́жїе ѻ҆́нїи ѡ҆кова́ни бы́ша съ га́щами свои́ми, и҆ покрыва́лы, и҆ сапогмѝ, и҆ со ѡ҆де́ждами свои́ми, и҆ вве́ржени бы́ша посредѣ̀ пе́щи ѻ҆гне́мъ горѧ́щїѧ. Поне́же глаго́лъ царе́въ превозмо́же, и҆ пе́щь разжже́на бы́сть преизли́шше: и҆ мꙋже́й ѻ҆́ныхъ, и҆̀же вверго́ша седра́ха, мїса́ха и҆ а҆вденагѡ̀, ᲂу҆бѝ пла́мень ѻ҆́гненный. И҆ мꙋ́жїе ті́и трїѐ, седра́хъ, мїса́хъ и҆ а҆вденагѡ̀, падо́ша посредѣ̀ пе́щи ѻ҆гне́мъ горѧ́щїѧ ѡ҆ко́вани: и҆ хожда́хꙋ посредѣ̀ пла́мене пою́ще бг҃а и҆ бл҃гословѧ́ще гдⷭ҇а. И҆ ста́въ съ ни́ми а҆за́рїа помоли́сѧ си́це, и҆ ѿве́рзъ ᲂу҆ста̀ своѧ̑ посредѣ̀ ѻ҆гнѧ̀, и҆ речѐ:

[Мл҃тва:]

Бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ, хва́льно и҆ просла́влено и҆́мѧ твоѐ во вѣ́ки. ꙗ҆́кѡ пра́веденъ є҆сѝ ѡ҆ всѣ́хъ, ꙗ҆̀же сотвори́лъ є҆сѝ на́мъ, и҆ всѧ̑ дѣла̀ твоѧ̑ и҆́стинна, и҆ пра́ви пꙋтїѐ твоѝ, и҆ всѝ сꙋдѝ твоѝ и҆́стинни: и҆ сꙋдьбы̑ и҆́стинны сотвори́лъ є҆сѝ по всѣ̑мъ, ꙗ҆̀же наве́лъ є҆сѝ на ны̀ и҆ на гра́дъ ст҃ы́й ѻ҆тє́цъ на́шихъ і҆ерⷭ҇ли́мъ: ꙗ҆́кѡ и҆́стиною и҆ сꙋдо́мъ наве́лъ є҆сѝ сїѧ̑ всѧ̑ на ны̀ грѣ̑хъ ра́ди на́шихъ. Ꙗ҆́кѡ согрѣши́хомъ и҆ беззако́нновахомъ ѿстꙋпи́вше ѿ тебє̀, и҆ прегрѣши́хомъ во всѣ́хъ. И҆ за́повѣдей твои́хъ не послꙋ́шахомъ, нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ, да бл҃го на́мъ бꙋ́детъ. И҆ всѧ̑, є҆ли̑ка сотвори́лъ є҆сѝ на́мъ, и҆ всѧ̑, є҆ли̑ка наве́лъ є҆сѝ на ны̀, и҆́стиннымъ сꙋдо́мъ сотвори́лъ є҆сѝ. И҆ преда́лъ є҆сѝ на́съ въ рꙋ́ки врагѡ́въ беззако́нныхъ, ме́рзкихъ ѿстꙋ́пникѡвъ,: и҆ царю̀ непра́веднꙋ и҆ лꙋка́внѣйшꙋ па́че всеѧ̀ землѝ. И҆ ны́нѣ нѣ́сть на́мъ ѿве́рзсти ᲂу҆́стъ: стꙋ́дъ и҆ поноше́нїе бы́хомъ рабѡ́мъ твои̑мъ и҆ чтꙋ́щымъ тѧ̀. Не преда́ждь ᲂу҆̀бо на́съ до конца̀ и҆́мене твоегѡ̀ ра́ди, и҆ не разорѝ завѣ́та твоегѡ̀, и҆ не ѿста́ви млⷭ҇ти твоеѧ̀ ѿ на́съ, а҆враа́ма ра́ди возлю́бленнагѡ ѿ тебє̀, и҆ за і҆саа́ка раба̀ твоего̀, и҆ і҆и҃лѧ ст҃а́го твоего̀, и҆̀мже глаго́лалъ є҆сѝ ᲂу҆мно́жити сѣ́мѧ и҆́хъ, ꙗ҆́кѡ ѕвѣ́зды небє́сныѧ и҆ ꙗ҆́кѡ песо́къ вскра́й мо́рѧ. Ꙗ҆́кѡ, влⷣко, ᲂу҆ма́лихомсѧ па́че всѣ́хъ ꙗ҆зы̑къ, и҆ є҆смы̀ смире́ни по все́й землѝ дне́сь грѣ̑хъ ра́ди на́шихъ. И҆ нѣ́сть во вре́мѧ сїѐ кнѧ́зѧ, и҆ проро́ка, и҆ вожда̀, нижѐ всесожже́нїѧ, нижѐ же́ртвы, нижѐ приноше́нїѧ, нижѐ кади́ла, ни мѣ́ста, є҆́же пожре́ти пред̾ тобо́ю, и҆ ѡ҆брѣстѝ млⷭ҇ть: но дꙋше́ю сокрꙋше́нною, и҆ дꙋ́хомъ смире́ннымъ да прїѧ́ти бꙋ́демъ. Ꙗ҆́кѡ во всесожже́нїихъ ѻ҆́внихъ и҆ ю҆́нчихъ, и҆ ꙗ҆́кѡ во тьма́хъ а҆́гнєцъ тꙋ́чныхъ, та́кѡ да бꙋ́детъ же́ртва на́ша пред̾ тобо́ю дне́сь, и҆ да соверши́тсѧ по тебѣ̀, ꙗ҆́кѡ нѣ́сть стꙋда̀ ᲂу҆пова́ющымъ на тѧ̀. И҆ ны́нѣ возслѣ́дꙋемъ всѣ́мъ се́рдцемъ, и҆ бои́мсѧ тебє̀, и҆ и҆́щемъ лица̀ твоегѡ̀. Не посрамѝ на́съ, но сотворѝ съ на́ми по кро́тости твое́й и҆ по мно́жествꙋ млⷭ҇ти твоеѧ̀. И҆ и҆зьмѝ на́съ по чꙋдесє́мъ твои̑мъ, и҆ да́ждь сла́вꙋ и҆́мени твоемꙋ̀, гдⷭ҇и. И҆ да посра́мѧтсѧ всѝ ꙗ҆влѧ́ющїи рабѡ́мъ твои̑мъ ѕла̑ѧ, и҆ да постыдѧ́тсѧ ѿ всѧ́кїѧ си́лы, и҆ крѣ́пость и҆́хъ да сокрꙋши́тсѧ: и҆ да разꙋмѣ́ютъ, ꙗ҆́кѡ ты̀ є҆сѝ гдⷭ҇ь бг҃ъ є҆ди́нъ и҆ сла́венъ по все́й вселе́ннѣй.

И҆ не преста́ша вве́ргшїи и҆̀хъ слꙋги̑ царє́вы, жгꙋ́ще пе́щь на́фѳою, и҆ смоло́ю, и҆ и҆згре́бми, и҆ хвра́стїемъ. И҆ разлива́шесѧ пла́мень над̾ пе́щїю на ла́ктїй четы́редесѧть де́вѧть: и҆ ѡ҆бы́де и҆ пожжѐ, и҆̀хже ѡ҆брѣ́те ѡ҆́крестъ пе́щи халде́йскїѧ. А҆́гг҃лъ же гдⷭ҇ень сни́де кꙋ́пнѡ съ сꙋ́щими со а҆за́рїею въ пе́щь, и҆ ѿтрѧсѐ пла́мень ѻ҆́гненный ѿ пе́щи, и҆ сотворѝ сре́днее пе́щи ꙗ҆́кѡ дꙋ́хъ росы̀ шꙋмѧ́щь: и҆ не прикоснꙋ́сѧ и҆́хъ ѿню́дъ ѻ҆́гнь, и҆ не ѡ҆скорбѝ, нижѐ стꙋжѝ и҆̀мъ. Тогда̀ ті́и трїѐ ꙗ҆́кѡ є҆ди́ными ᲂу҆сты̀ поѧ́хꙋ, и҆ бл҃гословлѧ́хꙋ, и҆ сла́влѧхꙋ бг҃а въ пещѝ, глаго́люще:

Бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ, и҆ препѣ́тый и҆ превозноси́мый во вѣ́ки: и҆ бл҃гослове́но и҆́мѧ сла́вы твоеѧ̀ ст҃о́е, и҆ препѣ́тое и҆ превозноси́мое во вѣ́ки. Бл҃гослове́нъ є҆сѝ въ хра́мѣ ст҃ы́ѧ сла́вы твоеѧ̀, и҆ препѣ́тый и҆ превозноси́мый во вѣ́ки. Бл҃гослове́нъ є҆сѝ, ви́дѧй бє́здны, сѣдѧ́й на херꙋві́мѣхъ, и҆ препѣ́тый и҆ превозноси́мый во вѣ́ки. Бл҃гослове́нъ є҆сѝ на прⷭ҇то́лѣ сла́вы црⷭ҇твїѧ твоегѡ̀, и҆ препѣ́тый и҆ превозноси́мый во вѣ́ки. Бл҃гослове́нъ є҆сѝ на тве́рди нбⷭ҇нѣй, и҆ препѣ́тый и҆ превозноси́мый во вѣ́ки.

Востае́мъ здѣ̀ и҆ пое́мъ:

Гдⷭ҇а по́йте и҆ превозноси́те во всѧ̑ вѣ́ки.

Чте́цъ же глаго́летъ стїхѝ:

Бл҃гослови́те, всѧ̑ дѣла̀ гдⷭ҇нѧ,

И҆ мы̀:

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, а҆́гг҃ли гдⷭ҇ни,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, нб҃са̀,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, во́ды всѧ̑, ꙗ҆̀же превы́ше нб҃съ,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, всѧ̑ си̑лы гдⷭ҇ни,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, со́лнце и҆ лꙋна̀,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, ѕвѣ́зды небє́сныѧ,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, всѧ́къ до́ждь и҆ роса̀,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, всѝ дꙋ́си,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, ѻ҆́гнь и҆ ва́ръ,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, стꙋ́дь и҆ зно́й,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, ро́сы и҆ и҆́ней,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, нѡ́щи и҆ дні́е,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, свѣ́тъ и҆ тьма̀,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, ле́дъ и҆ мра́зъ,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, сла̑ны и҆ снѣ́зи,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, мо́лнїѧ и҆ ѡ҆́блацы,

Гдⷭ҇а по́йте и҆ превозноси́те є҆го̀ во вѣ́ки.

Да бл҃гослови́тъ землѧ̀,

Гдⷭ҇а да пое́тъ и҆ превозно́ситъ є҆го̀ во вѣ́ки.

Бл҃гослови́те, го́ры и҆ хо́лми,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те всѧ̑ прозѧба̑ющаѧ на землѝ,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, и҆сто́чницы,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те морѧ̀ и҆ рѣ́ки,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, ки́ти и҆ всѧ̑ дви̑жꙋщаѧсѧ въ вода́хъ,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, всѧ̑ пти̑цы небє́сныѧ,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те ѕвѣ́рїе и҆ всѝ ско́ти,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, сы́нове человѣ́честїи,

Гдⷭ҇а по́йте и҆ превозноси́те є҆го̀ во вѣ́ки.

Да бл҃гослови́тъ і҆и҃ль,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, і҆ерє́и гдⷭ҇ни,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, рабѝ гдⷭ҇ни,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, дꙋ́си и҆ дꙋ́шы пра́ведныхъ,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, преподо́бнїи и҆ смире́ннїи се́рдцемъ,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, а҆на́нїа, а҆за́рїа и҆ мїсаи́лъ,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́те, а҆пⷭ҇ли, прⷪ҇ро́цы и҆ мч҃нцы гдⷭ҇ни,

Гдⷭ҇а по́йте и҆ превозноси́те є҆го̀ во вѣ́ки.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а,

Гдⷭ҇а пое́мъ и҆ превозно́симъ є҆го̀ во вѣ́ки.

И҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Гдⷭ҇а по́йте и҆ превозноси́те є҆го̀ во вѣ́ки.

Хва́лимъ, бл҃гослови́мъ, покланѧ́емсѧ гдⷭ҇еви,

Пою́ще и҆ превозносѧ́ще во всѧ̑ вѣ́ки.

Та́же, є҆ктенїа̀ ма́лаѧ.

Вмѣ́стѡ же трист҃а́гѡ: Є҆ли́цы во хрⷭ҇та̀ крести́стесѧ: Прокі́менъ, гла́съ и҃: Всѧ̀ землѧ̀ да покло́нитсѧ тебѣ̀ и҆ пое́тъ тебѣ̀, да пое́тъ же и҆́мени твоемꙋ̀, вы́шнїй. Сті́хъ: Воскли́кните гдⷭ҇еви, всѧ̀ землѧ̀, по́йте же и҆́мени є҆гѡ̀. А҆пⷭ҇лъ къ ри́млѧнѡмъ, зача́ло ч҃а: Бра́тїе, є҆ли́цы во хрⷭ҇та̀ і҆и҃са крести́хомсѧ: Коне́цъ: Ѡ҆ хрⷭ҇тѐ і҆и҃сѣ гдⷭ҇ѣ на́шемъ. А҆ллилꙋ́їа и҆ ѱало́мъ дв҃довъ не глаго́летсѧ: но по є҆́же рещѝ і҆ере́ю: Ми́ръ тѝ, а҆́бїе чте́цъ глаго́летъ, вмѣ́стѡ а҆ллилꙋ́їа, во гла́съ з҃: Воскреснѝ, бж҃е, сꙋдѝ землѝ, ꙗ҆́кѡ ты̀ наслѣ́диши во всѣ́хъ ꙗ҆зы́цѣхъ. И҆ пѣвцы̀ пою́тъ то́жде. И҆ чте́цъ, сті́хъ: Бг҃ъ ста̀ въ со́нмѣ богѡ́въ, посредѣ́ же бо́ги разсꙋ́дитъ. И҆ пѣвцы̀: Воскрⷭ҇нѝ, бж҃е: Сті́хъ: Доко́лѣ сꙋ́дите непра́вдꙋ, и҆ ли́ца грѣ́шникѡвъ прїе́млете; Воскреснѝ, бж҃е: Сті́хъ: Сꙋди́те си́рꙋ и҆ ᲂу҆бо́гꙋ, смире́нна и҆ ни́ща ѡ҆правда́йте. Воскреснѝ, бж҃е: Сті́хъ: И҆зьми́те ни́ща и҆ ᲂу҆бо́га, и҆з̾ рꙋкѝ грѣ́шничи и҆зба́вите є҆го̀. Воскреснѝ, бж҃е: Сті́хъ: Не позна́ша, нижѐ ᲂу҆разꙋмѣ́ша, во тьмѣ̀ хо́дѧтъ. Воскреснѝ, бж҃е: Сті́хъ: Да подви́жатсѧ всѧ̑ ѡ҆снова̑нїѧ землѝ. а҆́зъ рѣ́хъ: бо́зи є҆стѐ, и҆ сы́нове вы́шнѧгѡ всѝ. вы́ же ꙗ҆́кѡ человѣ́цы ᲂу҆мира́ете, и҆ ꙗ҆́кѡ є҆ди́нъ ѿ кнѧзе́й па́даете. И҆ па́ки: Воскреснѝ, бж҃е, сꙋдѝ землѝ, ꙗ҆́кѡ ты̀ наслѣ́диши во всѣ́хъ ꙗ҆зы́цѣхъ. Є҆гда́ же пою́тъ: Воскреснѝ, бж҃е, сꙋдѝ землѝ, тогда̀ і҆ерє́и и҆ дїа́кони и҆звлача́ютсѧ ѿ че́рныхъ ѡ҆де́ждъ и҆ ѡ҆блача́ютсѧ въ бѣ̑лыѧ. Є҆ѵⷢ҇лїе ѿ матѳе́а, зача́ло рє҃і: Въ ве́черъ сꙋббѡ́тный: Коне́цъ: До сконча́нїѧ вѣ́ка, а҆ми́нь. И҆ по чи́нꙋ бж҃е́ственнаѧ лїтꙋргі́а вели́кагѡ васі́лїа.

Вмѣ́стѡ же херꙋві́мскїѧ пѣ́сни пое́тсѧ настоѧ́щїй тропа́рь, гла́съ и҃:

Да молчи́тъ всѧ́каѧ пло́ть человѣ́ча и҆ да стои́тъ со стра́хомъ и҆ тре́петомъ, и҆ ничто́же земно́е въ себѣ̀ да помышлѧ́етъ: цр҃ь бо ца́рствꙋющихъ и҆ гдⷭ҇ь госпо́дствꙋющихъ прихо́дитъ закла́тисѧ и҆ да́тисѧ въ снѣ́дь вѣ̑рнымъ. предхо́дѧтъ же семꙋ̀ ли́цы а҆́гг҃льстїи со всѧ́кимъ нача́ломъ и҆ вла́стїю, многоѻчи́тїи херꙋві́ми и҆ шестокрила́тїи серафі́ми, ли́ца закрыва́юще и҆ вопїю́ще пѣ́снь: а҆ллилꙋ́їа, а҆ллилꙋ́їа, а҆ллилꙋ́їа.

Прича́стенъ, гла́съ д҃: Воста̀ ꙗ҆́кѡ спѧ̀ гдⷭ҇ь, и҆ воскре́се сп҃са́ѧй на́съ. А҆ллилꙋ́їа, три́жды. По ѿпꙋ́стѣ же дае́тсѧ ѿ сщ҃е́нника а҆нті́дѡръ. Та́же быва́етъ бл҃гослове́нїе хлѣ́ба и҆ вїна̀.

До́лженствꙋетъ же є҆кклисїа́рхъ и҆мѣ́ти ѡ҆па́сство, да є҆гда̀ скончава́етсѧ лїтꙋргі́а, бꙋ́детъ ча́съ вторы́й но́щи. По ѿпꙋ́стѣ же не и҆схо́димъ и҆з̾ цр҃кве, но сѣди́мъ на мѣ́стѣхъ на́шихъ: и҆ вхо́дитъ кела́рь, и҆ дае́тъ бра́тїи по є҆ди́номꙋ ᲂу҆крꙋ́хꙋ хлѣ́ба, и҆ по шестѝ смо́квей, и҆лѝ фі́нїкѡвъ, и҆ по є҆ди́номꙋ красовꙋ́лю вїна̀. На́мъ же возлежа́щымъ, быва́етъ чте́нїе вели́кое въ дѣѧ́нїихъ ст҃ы́хъ а҆пⷭ҇лъ ѿ нача́ла. Глаго́летъ же чте́цъ нача́ло. Сщ҃е́нникъ же сті́хъ: Мл҃твами ст҃ы́хъ а҆пⷭ҇лъ, гдⷭ҇и і҆и҃се хрⷭ҇тѐ бж҃е на́шъ, поми́лꙋй на́съ. и҆ по а҆ми́нѣ начина́етъ чте́цъ честѝ. Та́же начина́емъ ꙗ҆́сти. И҆ по сконча́нїи чте́нїѧ, вжига́етъ кандиловжига́тель всѧ̑ канди̑ла хра́ма, и҆ и҆сходѧ̀ ᲂу҆дарѧ́етъ въ клепа́ло: и҆ престае́́тъ чты́й чте́нїе. Бл҃гослови́вшꙋ же сщ҃е́нникꙋ, начина́етъ трист҃о́е, и҆ про́чее. Прїиди́те, поклони́мсѧ, три́жды. ѱало́мъ н҃. И҆ канѡ́нъ вели́кїѧ сꙋббѡ́ты: і҆рмосы̀ по два́жды, тропари́ же на двана́десѧть, со стїхи̑ пѣ́сней. Катава́сїа, і҆рмо́съ ѻ҆́ба ли̑ка. По тре́тїей пѣ́сни сѣда́ленъ вели́кїѧ сꙋббѡ́ты: Гро́бъ тво́й, сп҃се: И҆ чте́нїе въ сло́вѣ ст҃а́гѡ є҆пїфа́нїа, є҆гѡ́же нача́ло: Что̀ сїѐ дне́сь: И҆лѝ ѿ слове́съ златоꙋ́стагѡ: и҆щѝ ѧ҆̀ въ толкова́нїи на є҆ѵⷢ҇лїе, є҆́же ѿ матѳе́а, и҆лѝ на і҆ѡа́нна, словеса̀ воскрⷭ҇наѧ. По ѕ҃-й же пѣ́сни конда́къ и҆ і҆́косъ вели́кїѧ сꙋббѡ́ты. Та́же чте́нїе. По ѳ҃-й же пѣ́сни трист҃о́е. И҆ тропа́рь, гла́съ в҃: Є҆гда̀ снизше́лъ є҆сѝ: Є҆ктенїа̀. И҆ ѿпꙋ́стъ.

Коне́цъ трїѡ́ди.