Великая Среда

Во ст҃ы́й и҆ вели́кїй вто́рникъ повече́рїе вели́кое,

на не́мже пое́мъ трипѣ́снецъ, творе́нїе господи́на а҆ндре́а кри́тскагѡ. Гла́съ в҃.

Пѣ́снь г҃.

І҆рмо́съ: Непло́дный мо́й ᲂу҆́мъ плодоно́сенъ покажи́ ми, бж҃е, дѣ́лателю до́брыхъ, насади́телю бл҃ги́хъ, бл҃госе́рдїемъ твои́мъ.

Кончи́ны вре́мѧ: ѡ҆брати́мсѧ ᲂу҆̀бо, хрⷭ҇то́съ ᲂу҆чи́тъ. прїи́детъ бо во мгнове́нїи, прїи́детъ и҆ не ᲂу҆ме́длитъ, сꙋди́ти мі́рꙋ своемꙋ̀.

Внеза́пность своегѡ̀ прише́ствїѧ ꙗ҆влѧ́ѧ, хрⷭ҇то́съ и҆менова̀ дре́вле при нѡ́и бы́вшее неча́ѧнное погꙋбле́нїе, наведе́нное землѝ.

Ѿве́рзесѧ черто́гъ, ᲂу҆гото́васѧ съ ни́мъ бж҃е́ственный бра́къ, бли́зъ жени́хъ призыва́ѧй на́съ: ᲂу҆гото́вимсѧ ᲂу҆̀бо.

Сі́мѡновъ до́мъ вмѣсти́ тѧ невмѣсти́маго вездѣ̀, і҆и҃се цр҃ю̀, и҆ жена̀ грѣ́шнаѧ мѵ́ромъ тѧ̀ пома́за.

Бл҃гово́нїѧ та́инственнагѡ и҆спо́лнена, сп҃се, жена̀ и҆зба́висѧ пре́жнѧгѡ ѕлово́нїѧ мно́гихъ грѣхѡ́въ: мѵ́ро бо жи́зни и҆сточа́еши.

Нбⷭ҇наѧ пи́ща а҆́лчꙋщымъ, жи́знь са́мъ сы́й, ꙗ҆́лъ є҆сѝ, хрⷭ҇тѐ, съ человѣ̑ки, проѧвлѧ́ѧ снисхожде́нїе твоѐ.

Неблагода́рный ᲂу҆чени́къ, ѿве́ргсѧ тебє̀, хрⷭ҇тѐ, всѐ собо́рище беззако́нныхъ люде́й сподвиза́ше на тѧ̀, на преда́нїе ѡ҆бра́щьсѧ.

Сла́ва: Со ѻ҆ц҃е́мъ тебѣ̀ сн҃ꙋ, и҆ дх҃ꙋ пра́вомꙋ, є҆ди́номꙋ є҆стествꙋ̀ покланѧ́юсѧ и҆ воспѣва́ю, ли̑цы раздѣлѧ́ѧ и҆ сꙋщество́мъ соединѧ́ѧ.

Бг҃оро́диченъ: Ро́ждшаѧ тѧ̀ па́стырѧ и҆ а҆́гнца, а҆́гница при́снѡ мо́литъ, і҆и҃се бж҃е, ѡ҆ всѣ́хъ земноро́дныхъ вѣ́рꙋющихъ въ тѧ̀.

Сѣда́ленъ, гла́съ а҃.

Подо́бенъ: Ли́къ а҆́гг҃льскїй:

Сѐ вои́стинꙋ лꙋка́вый совѣ́тъ собра́сѧ вражде́бнѣ, ꙗ҆́кѡ ѡ҆сꙋ́жденника ѡ҆сꙋди́ти сѣдѧ́щаго горѣ̀ ꙗ҆́кѡ сꙋдїю̀ всѣ́хъ гдⷭ҇а: ны́нѣ собира́етсѧ съ пїла́томъ и҆́рѡдъ, а҆́нна же вкꙋ́пѣ и҆ каїа́фа, и҆спыта́ти є҆ди́наго долготерпѣли́ваго.

Пѣ́снь и҃.

І҆рмо́съ: Въ кꙋпинѣ̀ на сїна́йстѣй горѣ̀ мѡѷсе́ю чꙋ́до дв҃ы дре́вле проѡбрази́вшаго, по́йте, бл҃гослови́те и҆ превозноси́те во всѧ̑ вѣ́ки.

Не невѣ́дый вре́мене на́шегѡ сконча́нїѧ, но предѣ́лы всѣ̑мъ полага́ѧй ко смиреномꙋ́дрїю, держа́й вѣ́ки, ре́клъ є҆сѝ, ꙗ҆́кѡ не вѣ́си днѐ ѻ҆́наго.

Є҆гда̀ сѧ́деши, сꙋдїѐ, ꙗ҆́коже ре́клъ є҆сѝ, па́стырь разлꙋча́ѧй ѿ ѻ҆ве́цъ кѡ́злища, сп҃се, стоѧ́нїѧ ѻ҆́нагѡ не лишѝ на́съ, бж҃е́ственныѧ десни́цы твоеѧ̀.

Ты̀ є҆сѝ па́сха на́ша, пожре́нный за всѣ́хъ ꙗ҆́кѡ а҆́гнецъ и҆ же́ртва, и҆ прегрѣше́нїй ѡ҆чище́нїе: и҆ твоѧ̑ бж҃є́ственныѧ стрⷭ҇ти превозно́симъ, хрⷭ҇тѐ, во всѧ̑ вѣ́ки.

Ме́льницѣ и҆ селꙋ̀ и҆ хра́минѣ ᲂу҆подо́бисѧ всѐ житїѐ, дꙋшѐ моѧ̀: тѣ́мже стѧжѝ къ бг҃ꙋ гото́во се́рдце, да ничесѡ́же тлѣ́нїю пло́ти ѡ҆ста́виши.

Не къ фарїсе́ѡмъ, сп҃се, ни къ сі́мѡнꙋ то́кмѡ и҆зво́лилъ є҆сѝ на тапе́зꙋ вни́ти: но ᲂу҆жѐ и҆ мытарѝ, вкꙋ́пѣ и҆ блꙋдни̑цы, твоѐ почерпа́ютъ милосе́рдїе.

Сребролю́бїе рачи́тельствꙋѧй преда́тель і҆ꙋ́да, мѵ́рꙋ и҆злїѧ́нꙋ бы́вшꙋ, тогда̀ ᲂу҆мышлѧ́ше прода́нїе влⷣки, и҆ къ беззакѡ́ннымъ прише́дъ, ѡ҆ цѣнѣ̀ согласова́ше.

Ѽ бл҃же́нныхъ рꙋ́къ! ѽ власѡ́въ и҆ ᲂу҆сте́нъ цѣломꙋ́дренныѧ блꙋдни́цы! и҆́миже возлїѧ̀, сп҃се, мѵ́ро на но́зѣ твоѝ, ѡ҆тира́ющи ѧ҆̀, ча́стѡ ѡ҆блобыза́ющи.

Возлежа́щꙋ тебѣ̀, сло́ве, жена̀ предста́вши, ᲂу҆ но́гъ рыда́ющи, стклѧ́ницꙋ мѵ́ра, сп҃се, и҆стощава́ше на главꙋ̀ тебє̀ безсме́ртнагѡ мѵ́ра.

Бл҃гослови́мъ ѻ҆ц҃а̀, и҆ сн҃а, и҆ ст҃а́гѡ дх҃а, гдⷭ҇а.

Со ѻ҆ц҃е́мъ сн҃а и҆ ст҃а́го дх҃а, ст҃ꙋ́ю трⷪ҇цꙋ въ бж҃ествѣ̀ є҆ди́номъ сла́вимъ, вопїю́ще: ст҃ъ, ст҃ъ, ст҃ъ є҆сѝ во вѣ́ки.

Бг҃оро́диченъ: Мл҃твами, сп҃се, пречⷭ҇тыѧ твоеѧ̀ мт҃ре и҆ твои́хъ а҆пⷭ҇лъ, млⷭ҇ти твоѧ̑ на́мъ низпослѝ бога́тнѡ, и҆ ми́ръ тво́й пода́ждь лю́демъ твои̑мъ.

Та́же: Хва́лимъ, бл҃гослови́мъ, покланѧ́емсѧ гдⷭ҇еви:

І҆рмо́съ: Въ кꙋпинѣ̀ на сїна́йстѣй горѣ̀:

Пѣ́снь ѳ҃.

І҆рмо́съ: Преесте́ственнѡ пло́тїю заче́ншꙋю во чре́вѣ сло́во, ѿ ѻ҆ц҃а̀ безлѣ́тнѡ предвозсїѧ́вшее, въ пѣ́снехъ немо́лчныхъ велича́емъ вѣ́рнїи.

Дѣ́ланїѧ вре́мѧ, сп҃се́нїѧ намѣ́ренїе: тала́нтъ взе́мши пре́жнїй ѡ҆́бразъ, дꙋшѐ моѧ̀, покꙋпа́й вѣ́чнꙋю жи́знь.

Ꙗ҆́кѡ свѣти́льники свѣ̑тлыѧ ᲂу҆краси́вше дꙋ́шы, женихꙋ̀ приходѧ́щꙋ къ нетлѣ́нномꙋ бра́кꙋ, пре́жде заключе́нїѧ двере́й, вни́демъ съ ни́мъ.

Показа́ти хотѧ̀, і҆и҃се, преесте́ственное твоѐ смире́нїе всѣ̑мъ, ꙗ҆́лъ є҆сѝ въ домꙋ̀ сі́мѡновѣ вечерѧ́въ, а҆́лчꙋщихъ пи́ще.

Хлѣ́бъ сы́й животво́рный, і҆и҃се, ꙗ҆́лъ є҆сѝ съ сі́мѡномъ фарїсе́емъ, да блꙋдни́ца прїѡбрѧ́щетъ некꙋпи́мꙋю бл҃года́ть твою̀, и҆злїѧ́нїемъ мѵ́ра.

Рꙋ́цѣ моѝ скверна̑вѣ, ᲂу҆стнѣ̀ блꙋдни̑чи во мнѣ̀, нечи́сто моѐ житїѐ, растлѣ́нни ᲂу҆́дове: но ѡ҆сла́би мѝ и҆ ѡ҆ста́ви, вопїе́тъ блꙋдни́ца хрⷭ҇тꙋ̀.

Пристꙋ́пльши жена̀ къ нога́ма твои́ма, сп҃се, возлива́ше мѵ́ро, бл҃гоꙋха́нїѧ и҆сполнѧ́ющи, и҆ мѵ́ра и҆сполнѧ́ема дѣ́лъ ѡ҆чище́нїѧ.

А҆рѡма̑ты богатѣ́ю, добродѣ́тельми же нище́тствꙋю: ꙗ҆̀же и҆́мамъ, тебѣ̀ приношꙋ̀: да́ждь са́мъ, ꙗ҆̀же и҆́маши, и҆ ѡ҆сла́би мѝ и҆ ѡ҆ста́ви, вопїе́тъ блꙋдни́ца хрⷭ҇тꙋ̀.

Мѵ́ро ᲂу҆ менє̀ тлѣ́нное, мѵ́ро ᲂу҆ тебє̀ жи́зни, и҆́мѧ бо тебѣ̀ мѵ́ро и҆злїѧ́нное на достѡ́йныѧ: но ѡ҆сла́би мѝ и҆ ѡ҆ста́ви, вопїе́тъ блꙋдни́ца хрⷭ҇тꙋ̀.

Сла́ва: Безнача́ленъ є҆сѝ, ѻ҆́ч҃е, несозда́ненъ є҆сѝ, сн҃е, сопресто́ленъ и҆ дш҃е, є҆ди́но трѝ є҆стество́мъ и҆ трѝ ли̑цы, є҆ди́нъ бг҃ъ и҆́стинный.

Бг҃оро́диченъ: Бцⷣе, ᲂу҆пова́нїе чтꙋ́щихъ тѧ̀ при́снѡ, не преста́й молѧ́щи и҆з̾ тебє̀ рожде́ннаго, и҆зба́вити мѧ̀ ѿ бѣ́дъ и҆ всѧ́кихъ и҆скꙋше́нїй.

Во ст҃ꙋ́ю и҆ вели́кꙋю сре́дꙋ на ᲂу҆́трени,

по шестоѱа́лмїи А҆ллилꙋ́їа, на гла́съ и҃, и҆ тропа́рь: Сѐ жени́хъ: три́жды. Зрѝ въ понедѣ́льникъ вели́кїй.

И҆ стїхосло́вїе.

По а҃ стїхосло́вїи сѣда́ленъ, гла́съ г҃.

Подо́бенъ: Красотѣ̀ дѣ́вства:

Блꙋдни́ца пристꙋпѝ къ тебѣ̀, мѵ́ро со слеза́ми и҆злива́ющи на но́зѣ твоѝ, чл҃вѣколю́бче, и҆ ѿ смра́да ѕѡ́лъ и҆збавлѧ́етсѧ повелѣ́нїемъ твои́мъ: ды́шѧ же бл҃года́тїю твое́ю, ᲂу҆чени́къ неблагода́рный сїю̀ ѿверга́етъ, и҆ скве́рнѣ примѣша́етсѧ, сребролю́бїемъ продаѧ̀ тебѐ. сла́ва, хрⷭ҇тѐ, бл҃госе́рдїю твоемꙋ̀.

Сла́ва, и҆ ны́нѣ, то́йже.

По в҃-мъ стїхосло́вїи сѣда́ленъ, гла́съ д҃.

Подо́бенъ: Оу҆диви́сѧ і҆ѡ́сифъ:

І҆ꙋ́да льсте́цъ, сребролю́бїѧ вожделѣ́въ, преда́ти тѧ̀, гдⷭ҇и, сокро́вище жи́зни, льсти́внѡ ᲂу҆мы́сли. тѣ́мже и҆ и҆зстꙋпле́нъ тече́тъ ко і҆ꙋде́ѡмъ, глаго́летъ беззакѡ́ннымъ: что́ ми хо́щете да́ти, и҆ а҆́зъ ва́мъ преда́мъ є҆го̀ на распѧ́тїе;

Сла́ва, и҆ ны́нѣ, то́йже.

По г҃-мъ стїхосло́вїи сѣда́ленъ, гла́съ а҃.

Подо́бенъ: Гро́бъ тво́й сп҃се:

Блꙋдни́ца во пла́чи вопїѧ́ше, ще́дре, пречⷭ҇тѣи твоѝ но́зѣ ѡ҆тира́ющи те́плѣ власы̑ главы̀ своеѧ̀ и҆ и҆з̾ глꙋбины̀ стенѧ́щи: не ѿри́ни менѐ, нижѐ ѡ҆мерзѝ, бж҃е мо́й: но прїими́ мѧ ка́ющꙋсѧ и҆ сп҃сѝ, ꙗ҆́кѡ є҆ди́нъ чл҃вѣколю́бецъ.

Сла́ва, и҆ ны́нѣ, то́йже. Чтє́нїѧ же всѧ̑ ѿ сказа́нїѧ, ѿ матѳе́а ст҃а́гѡ є҆ѵⷢ҇лїа днѐ. Та́же є҆ѵⷢ҇лїе ѿ і҆ѡа́нна, зача́ло м҃а, близ̾ конца̀, без̾ престꙋ́пки: Во вре́мѧ ѻ҆́но, свидѣ́тельствоваше наро́дъ сы́й со і҆и҃сомъ, є҆гда̀ ла́зарѧ возгласѝ ѿ гро́ба: Коне́цъ въ зача́лѣ м҃г-мъ: Ꙗ҆̀же ᲂу҆̀бо а҆́зъ глаго́лю, ꙗ҆́коже речѐ мнѣ̀ ѻ҆ц҃ъ, та́кѡ глаго́лю. Ѱало́мъ н҃, и҆ трипѣ́снецъ, творе́нїе господи́на космы̀: є҆гѡ́же краестро́чїе: Тетра́дї ѱалѡ̀, сі́есть: Въ сре́дꙋ воспою̀. І҆рмосы̀ по два́жды, тропарѝ на в҃і. Послѣди́ же і҆рмо́съ ѻ҆́ба ли̑ка вкꙋ́пѣ. Гла́съ в҃.

Пѣ́снь г҃.

[Т] І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́ бо сѧ дꙋ́хъ мо́й внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

[Е] На тщє́тнаѧ и҆ мы́слїю ѕлонра́вною собо́рище беззако́нныхъ собира́етсѧ, тѧ̀ и҆зба́вителѧ, хрⷭ҇тѐ, ѡ҆сꙋжде́на и҆зрещи́, є҆мꙋ́же пое́мъ: ты̀ є҆сѝ бг҃ъ на́шъ, и҆ нѣ́сть ст҃ъ па́че тебє̀, гдⷭ҇и.

[Т] Лю́тый совѣ́тъ беззако́нныхъ, бг҃обо́рныѧ дꙋшѝ сы́й, ᲂу҆мышлѧ́етъ ꙗ҆́кѡ ѕлодѣ́ѧ ᲂу҆би́ти пра́веднаго хрⷭ҇та̀, є҆мꙋ́же пое́мъ: ты̀ є҆сѝ бг҃ъ на́шъ, и҆ нѣ́сть ст҃ъ па́че тебє̀, гдⷭ҇и.

Конда́къ, гла́съ д҃.

Подо́бенъ: Вознесы́йсѧ на крⷭ҇тъ:

Па́че блꙋдни́цы беззако́нновавъ, сле́зъ то́ки ѿню́дь тебѣ̀ не принесо́хъ, бла́же. но въ молча́нїи молѧ́сѧ припа́даю тѝ, любо́вїю ѡ҆блобыза́ѧ пречⷭ҇тѣи твоѝ но́зѣ, ꙗ҆́кѡ да ѡ҆ставле́нїе долгѡ́въ, ꙗ҆́коже влⷣка, пода́си мнѣ̀, зовꙋ́щꙋ тѝ: сп҃се, ѿ скве́рны дѣ́лъ мои́хъ и҆зба́ви мѧ̀.

І҆́косъ: Пре́жде блꙋ́днаѧ жена̀, внеза́пꙋ цѣломꙋ́дренна ꙗ҆ви́сѧ, возненави́дѣвши дѣла̀ стꙋ́днагѡ грѣха̀ и҆ сла̑сти тѣлє́сныѧ, помина́ющи стꙋ́дъ мно́гїй и҆ сꙋ́дъ мꙋче́нїѧ, є҆го́же претерпѧ́тъ блꙋдни̑цы и҆ скве́рнїи. ѿ си́хъ пе́рвый є҆́смь а҆́зъ, и҆ бою́сѧ: но пребыва́ю въ ѕло́мъ ѡ҆бы́чаи безꙋ́мный. блꙋ́днаѧ же жена̀, и҆ ᲂу҆боѧ́вшисѧ, и҆ потща́вшисѧ, ско́рѡ прїи́де, вопїю́щи ко и҆зба́вителю: чл҃вѣколю́бче и҆ ще́дре, ѿ скве́рны дѣ́лъ мои́хъ и҆зба́ви мѧ̀.

Сѷнаѯа́рїй.

Стїхѝ: Жена̀, возлїѧ́вши тѣлесѝ хрⷭ҇то́вꙋ мѵ́ро,

Нїкоди́мово предвосхи́ти мѵ́ро.

Во ст҃ꙋ́ю и҆ вели́кꙋю сре́дꙋ, пома́завшїѧ гдⷭ҇а мѵ́ромъ жены̀ блꙋдни́цы па́мѧть твори́ти повелѣ́ша бж҃е́ственнѣйшїи ѻ҆тцы̀: занѐ ма́лѡ пре́жде сп҃си́тельныѧ стрⷭ҇ти сїѐ бы́сть. Вше́дшꙋ бо і҆и҃сꙋ во і҆ерⷭ҇ли́мъ, и҆ въ домꙋ̀ прокаже́ннагѡ сі́мѡна бы́вшꙋ, жена̀ къ немꙋ̀ пристꙋпѝ, и҆ и҆злїѧ̀ на главꙋ̀ є҆гѡ̀ ѻ҆́ное многоцѣ́нное мѵ́ро. Оу҆чине́на же бы́сть па́мѧть сїѧ̀̀ здѣ̀ сегѡ̀ ра́ди, да, по сп҃совꙋ словесѝ, вездѣ̀ и҆ во всѣ́хъ ѻ҆́ное теплѣ́йшее дѣ́ло проповѣ́стьсѧ. Чи́мъ же подви́гшисѧ, прїи́де ѻ҆́наѧ жена̀; зане́же млⷭ҇ть хрⷭ҇то́вꙋ зрѧ́ше, и҆ ко всѣ̑мъ ѻ҆бще́нїе, и҆ па́че ны́нѣ, є҆гда̀ ви́дѣ того̀ введе́на въ до́мъ прокаже́ннагѡ, є҆мꙋ́же зако́нъ повелѣва́ше бы́ти нечи́стꙋ и҆ ѿрече́нꙋ ѿ ѻ҆бще́нїѧ. Помы́сли ᲂу҆̀бо жена̀, ꙗ҆́кѡ хрⷭ҇то́съ, ꙗ҆́коже ѻ҆́нагѡ прока́зꙋ, си́це и҆ є҆ѧ̀ дꙋше́вный недꙋ́гъ и҆сцѣли́тъ. И҆ та́кѡ возлежа́щꙋ є҆мꙋ̀ на ве́чери, на ве́рхъ главы̀ є҆гѡ̀ лїе́тъ мѵ́ро, цѣно́ю сꙋ́щее ꙗ҆́кѡ дина̑рїй тре́хъ сѡ́тъ. Оу҆ч҃нцы̀ запрети́ша є҆й, и҆ наипа́че і҆ꙋ́да і҆скарїѡ́тскїй: но хрⷭ҇то́съ сїю̀ застꙋпѝ, да не пресѣкꙋ́тъ до́брагѡ є҆ѧ̀ намѣ́ренїѧ. Та́же и҆ погребе́нїе своѐ воспомина́етъ, і҆ꙋ́дꙋ ѿвраща́ѧ ѿ преда́тельства, и҆ женꙋ̀ по́чести сподоблѧ́ѧ, є҆́же вездѣ̀ по вселе́ннѣй сеѧ̀ до́брое дѣ́ло проповѣ́стьсѧ.

Вѣ́домо же бꙋ́ди: нѣ̑кимъ мни́тсѧ, ꙗ҆́кѡ жена̀ сїѧ̀ є҆ди́на бѣ́ ᲂу҆ є҆ѵⷢ҇лі́стѡвъ всѣ́хъ. Сїе́ же нѣ́сть та́кѡ: но ᲂу҆ трїе́хъ ᲂу҆́бѡ, ꙗ҆́коже глаго́летъ бж҃е́ственный златоꙋ́стъ [Бесѣ́да на матѳ. г҃і], є҆ди́на и҆ та́ѧжде є҆́сть, ꙗ҆́же и҆ блꙋдни́ца и҆менова́сѧ: ᲂу҆ і҆ѡа́нна же ᲂу҆жѐ не сїѧ̀, но дрꙋга́ѧ нѣ́каѧ чꙋ́днаѧ и҆ житїѐ и҆мꙋ́щаѧ честно́е, марі́а сестра̀ ла́зарева, ꙗ҆́же, не сꙋ́щи блꙋдни́ца, хрⷭ҇то́мъ люби́ма бѣ̀. Ѿ си́хъ ᲂу҆́бѡ втора́ѧ, марі́а нарица́емаѧ, пре́жде шестѝ дне́й па́схи, въ домꙋ̀ є҆ѧ̀ въ виѳа́нїи, хрⷭ҇тꙋ̀ на ве́чери возлежа́щꙋ, мѵ́ра пома́занїе содѣ́ѧ, на кра́снѣи ѻ҆́нагѡ но́зѣ сїѐ и҆злива́ющи, и҆ главны́ми власы̑ сїѧ̑ ѡ҆тира́ющи, и҆з̾ѻби́лїе цѣны̀ на́нь ᲂу҆потреблѧ́ющи, и҆ а҆́ки бг҃ꙋ мѵ́ро приносѧ́щи. Вѣ́дѧше бо и҆звѣ́стнѡ, ꙗ҆́кѡ въ же́ртвахъ приноша́шесѧ є҆ле́й бг҃ꙋ [Быт. л҃є, д҃і], и҆ свѧще́нницы мѵ́ромъ пома́зовахꙋсѧ [И҆сх. л҃. л҃], и҆ і҆а́кѡвъ дре́вле сто́лпъ пома́за бг҃ꙋ [Быт. к҃и, и҃і]. Принесе́ же семꙋ̀ да́рствꙋющи ꙗ҆́вѣ ᲂу҆ч҃тлю, а҆́ки бг҃ꙋ, воскреше́нїѧ ра́ди бра́тнѧгѡ. Тѣ́мже нижѐ мзда̀ є҆́й ѡ҆бѣщава́етсѧ, є҆гда̀ є҆ди́нъ і҆ꙋ́да ро́пщетъ, ꙗ҆́кѡ любостѧжа́теленъ. Пе́рваѧ же, сі́есть блꙋдни́ца, пре́жде двою̀ дню̑ па́схи, въ то́йже виѳа́нїи є҆щѐ сꙋ́щꙋ хрⷭ҇тꙋ̀, и҆ въ домꙋ̀ бы́вшꙋ сі́мѡна прокаже́ннагѡ на ве́чери, и҆ возлежа́щꙋ, многоцѣ́нное ѻ҆́ное мѵ́ро на главꙋ̀ и҆злива́етъ, ꙗ҆́коже сщ҃е́нный матѳе́й и҆ ма́ркъ повѣствова́ша. Ѡ҆ се́й же блꙋдни́цѣ и҆ ᲂу҆ч҃нцы̀ всѝ негодꙋ́ютъ, и҆звѣ́стнѡ вѣ́дѧще хрⷭ҇то́во ѡ҆ ми́лостыни тща́нїе: се́й же и҆ мзда̀ даде́сѧ, ꙗ҆́кѡ всю́дꙋ по вселе́ннѣй до́брое є҆ѧ̀ дѣ́ло просла́витсѧ. Ѻ҆́вїи ᲂу҆́бѡ глаго́лютъ, ꙗ҆́кѡ є҆ди́на бѣ̀ жена̀: златоꙋ́стъ же си́це, ꙗ҆́кѡ двѣ̀ жєны̀ бѣ́ша, глаго́летъ. Сꙋ́ть же нѣ́цыи глаго́лющїи, ꙗ҆́кѡ и҆ трѝ сїѧ̑ бѣ́ша: двѣ̀ ᲂу҆́бѡ вы́ше речє́нныѧ, стрⷭ҇ти хрⷭ҇то́вѣ къ две́ремъ приближа́ющейсѧ, а҆ тре́тїѧ, па́че же пе́рваѧ, и҆на́ѧ пре́жде си́хъ, та́мѡ бли́з̾ среди́ны про́повѣди є҆ѵⷢ҇льскїѧ сїѐ сотво́ршаѧ, ꙗ҆́же и҆ блꙋдни́ца и҆ грѣ́шница бѣ̀, и҆ внꙋ́трь до́мꙋ не прокаже́ннагѡ, но фарїсе́а сі́мѡна, то́кмѡ на но́зѣ хрⷭ҇та̀ и҆ наединѣ̀ мѵ́ро и҆злїѧ̀, є҆гда̀ и҆ є҆ди́нъ то́кмѡ фарїсе́й соблазнѧ́шесѧ: є҆́йже и҆ мздꙋ̀, ѡ҆ставле́нїе грѣхѡ́въ сп҃съ да́рꙋетъ. Ѡ҆ се́й же то́кмѡ є҆ди́нѣй бж҃е́ственный лꙋка̀ въ свое́мъ є҆ѵⷢ҇лїи бли́з̾ среди́ны, ꙗ҆́коже рече́сѧ, повѣствꙋ́етъ [Лꙋк. з҃, л҃ѕ-н҃]. И҆ по се́й по́вѣсти ѡ҆ блꙋдни́цѣ, а҆́бїе прилага́етъ, си́це глаго́лѧ: И҆ бы́сть по се́мъ, и҆ то́й прохожда́ше сквозѣ̀ гра́ды и҆ вє́си, проповѣ́дꙋѧ и҆ бл҃говѣствꙋ́ѧ црⷭ҇твїе бж҃їе. Ѿню́дꙋже ꙗ҆́вно є҆́сть, ꙗ҆́кѡ не во вре́мѧ стрⷭ҇ти сїѐ бы́сть. Мни́тсѧ ᲂу҆̀бо и҆ ѿ вре́мене, и҆ ѿ прїе́мшихъ і҆и҃са, и҆ ѿ мѣ́ста, и҆ ли́цъ, и҆ домѡ́въ, є҆ще́ же и҆ ѿ ѡ҆́браза мѷропома́занїѧ, ꙗ҆́кѡ трѝ бѧ́хꙋ жєны̀ сїѧ̑: двѣ̀ ᲂу҆́бѡ блꙋдни̑цы, тре́тїѧ же ла́зарева сестра̀ марі́а, житїе́мъ сїѧ́ющаѧ четны́мъ. И҆ и҆́ный ᲂу҆́бѡ до́мъ бѣ̀ фарїсе́а сі́мѡна, дрꙋгі́й же прокаже́ннагѡ сі́мѡна въ виѳа́нїи, и҆ и҆́ный па́ки до́мъ марі́и и҆ ма́рѳы се́стръ ла́заревыхъ, въ то́йже виѳа́нїи. Ѿсю́дꙋ разꙋмѣ́ти мо́щно є҆́сть, ꙗ҆́кѡ и҆ двѣ̀ ве́чєри бѣ́ша хрⷭ҇тꙋ̀, и҆ ѻ҆́бѣ въ виѳа́нїи: є҆ди́на ᲂу҆́бѡ бѣ̀ пре́жде шестѝ дне́й па́схи въ домꙋ̀ ла́заревѣ, є҆гда̀ ꙗ҆дѧ́ше съ ни́мъ и҆ ла́зарь, ꙗ҆́коже гро́мовъ сы́нъ повѣствꙋ́етъ, глаго́лѧ си́це: Пре́жде шестѝ дне́й па́схи, прїи́де і҆и҃съ въ виѳа́нїю, и҆дѣ́же бѣ̀ ла́зарь ᲂу҆ме́рый, є҆го́же воскресѝ ѿ ме́ртвыхъ. Сотвори́ша же є҆мꙋ̀ ве́черю тꙋ̀, и҆ ма́рѳа слꙋжа́ше: ла́зарь же є҆ди́нъ бѣ̀ ѿ возлежа́щихъ съ ни́мъ. Марі́а же прїе́мши лі́трꙋ мѵ́ра на́рда пїсті́ка многоцѣ́нна, пома́за но́зѣ і҆и҃сѡвѣ, и҆ ѡ҆трѐ власы̑ свои́ми но́зѣ є҆гѡ̀ [і҆ѡа́н. в҃і, а҃-г҃]. Дрꙋга́ѧ же ве́черѧ бы́сть є҆мꙋ̀ пре́жде двою̀ дню̑ па́схи, є҆щѐ сꙋ́щꙋ хрⷭ҇тꙋ̀ въ виѳа́нїи, въ домꙋ̀ сі́мѡна прокаже́ннагѡ, є҆гда̀ и҆ блꙋдни́ца прїи́де къ немꙋ̀, многоцѣ́нное мѵ́ро и҆злива́ющи, ꙗ҆́коже сщ҃е́нный матѳе́й повѣствꙋ́етъ, глаго́лѧ, ꙗ҆́кѡ хрⷭ҇то́съ речѐ ко ᲂу҆ч҃нкѡ́мъ: Вѣ́сте, ꙗ҆́кѡ по двою̀ дню̑ па́сха бꙋ́детъ [Матѳ. к҃ѕ, в҃]. И҆ пома́лѣ па́ки прилага́етъ: і҆и҃сꙋ же бы́вшꙋ въ виѳа́нїи, въ домꙋ̀ сі́мѡна прокаже́ннагѡ, пристꙋпѝ къ немꙋ̀ жена̀, стклѧ́ницꙋ мѵ́ра и҆мꙋ́щи многоцѣ́ннагѡ, и҆ возлива́ше на главꙋ̀ є҆гѡ̀ возлежа́ща [Матѳ. к҃ѕ, ѕ҃-з҃҃]. Є҆мꙋ́же согласꙋ́етъ и҆ ма́ркъ, глаго́лѧ: Бѣ́ же па́сха, и҆ ѡ҆прѣсно́цы по двою̀ дню̀, и҆ сꙋ́щꙋ є҆мꙋ̀ въ виѳа́нїи, въ домꙋ̀ сі́мѡна прокаже́ннагѡ, возлежа́щꙋ є҆мꙋ̀, прїи́де жена̀ и҆мꙋ́щи а҆лава́стръ мѵ́ра [Ма́рк. д҃і: а҃, г҃], и҆ прѡ́чаѧ. Противꙋглаго́лющїи же, ꙗ҆́кѡ є҆ди́на и҆ та́ѧжде бѣ̀ ᲂу҆ четы́рехъ є҆ѵⷢ҇лі́стѡвъ жена̀: пома́завшаѧ гдⷭ҇а мѵ́ромъ: мнѧ́тъ ꙗ҆́кѡ є҆ди́нъ и҆ то́йжде бѣ̀ сі́мѡнъ, фарїсе́й же и҆ прокаже́нный: и҆ ꙗ҆́кѡ се́й бѣ̀ и҆ ѻ҆те́цъ ла́зарѧ и҆ се́стръ є҆гѡ̀ марі́и и҆ ма́рѳы, и҆ є҆ди́на ве́черѧ и҆ та́ѧжде, и҆ є҆ди́нъ и҆ то́йжде до́мъ є҆гѡ въ виѳа́нїи, ᲂу҆ негѡ́же и҆ го́рница по́стлана ᲂу҆гото́васѧ, и҆ та́инственнаѧ ве́черѧ бѣ̀: и҆ сїѐ не до́брѣ мнѧ́тъ. Сі́и бо двѣ̀ ве́чєри бѣ́стѣ хрⷭ҇тꙋ̀ внѣ̀ і҆ерⷭ҇ли́ма, въ виѳа́нїи, пре́жде шестѝ и҆ пре́жде двою̀ [ꙗ҆́коже рече́сѧ] дню̑ зако́нныѧ па́схи, є҆гда̀ и҆ жєны̀ мѵ̑ра разли́чнѡ хрⷭ҇тꙋ̀ принесо́ша. Та́йнаѧ же ве́черѧ и҆ по́стланнаѧ го́рница внꙋ́трь гра́да і҆ерⷭ҇ли́ма бл҃гоꙋкраси́шасѧ, пре́жде є҆ди́нагѡ днѐ зако́нныѧ па́схи и҆ стрⷭ҇ти хрⷭ҇то́вы. Ѻ҆́вїи ᲂу҆́бѡ мнѧ́тъ, ꙗ҆́кѡ сїѧ̀ ве́черѧ въ домꙋ̀ невѣ́домагѡ человѣ́ка бы́сть, ѻ҆́вїи же въ домꙋ̀ напе́рсника и҆ ᲂу҆ч҃нка̀ і҆ѡа́нна во ст҃ѣ́мъ сїѡ́нѣ, и҆дѣ́же и҆ ᲂу҆ч҃нцы̀ стра́ха ра́ди і҆ꙋде́йска бѧ́хꙋ сокрове́ни, и҆ ѳѡмино̀ бы́сть ѡ҆сѧза́нїе по воскрⷭ҇нїи, и҆ ст҃а́гѡ дх҃а прише́ствїе въ пѧтьдесѧ́тницꙋ, и҆ и҆́наѧ нѣ̑каѧ неизречє́ннаѧ и҆ та́инствєннаѧ соверши́шасѧ.

Тѣ́мже сїѐ ᲂу҆̀бо мни́тсѧ мѝ, и҆ вои́стиннꙋ златоглаго́ливагѡ и҆з̾ѧсне́нїе и҆звѣ́стнѣйшее є҆́сть, ꙗ҆́кѡ двѣ̀ сїѧ̀ жєны̀ вмѣнѧ́ютсѧ: є҆ди́на ᲂу҆́бѡ, ꙗ҆́коже рече́сѧ ᲂу҆ трїе́хъ є҆ѵⷢ҇лі́стѡвъ, блꙋдни́ца сꙋ́щи и҆ грѣ́шница, на главꙋ̀ хрⷭ҇то́вꙋ мѵ́ро возлїѧ́вшаѧ: и҆на́ѧ же ᲂу҆ і҆ѡа́нна, марі́а сестра̀ ла́зарева, то́кмѡ бж҃е́ствєннымъ нога́мъ хрⷭ҇тѡ́вымъ сїѐ прине́сшаѧ и҆ возлїѧ́вшаѧ. И҆́ны та́кожде бѣ́ша ве́чєри въ виѳа́нїи, и҆́на же бѣ̀ та́йнаѧ. И҆ ꙗ҆́вственнѡ сїѐ и҆ ѿ тѣ́хъ, ꙗ҆̀же по по́вѣсти ѡ҆ блꙋдни́цѣ се́й приво́дѧтсѧ: сп҃съ ᲂу҆ч҃нкѝ посыла́етъ во гра́дъ ᲂу҆гото́вати па́схꙋ, глаго́лѧ: И҆ди́те во гра́дъ ко ѻ҆́нсицѣ, и҆ рцы́те є҆мꙋ̀: ᲂу҆ч҃тль глаго́летъ, ᲂу҆ тебє̀ сотворю̀ па́схꙋ со ᲂу҆ч҃нки̑ мои́ми [Матѳ. к҃ѕ, и҃і]. И҆ па́ки: и҆ срѧ́щетъ ва́съ человѣ́къ, въ скꙋде́льницѣ во́дꙋ̀ носѧ̀, и҆ то́й ва́мъ пока́жетъ го́рницꙋ ве́лїю по́стланꙋ, тꙋ̀ ᲂу҆гото́вайте на́мъ [Ма́рк. д҃і, г҃і, є҃і. Лꙋк. к҃в, і҃, в҃і]. Ѻ҆ни́ же ше́дше, глаго́летсѧ, ѡ҆брѣто́ша, ꙗ҆́коже заповѣ́да и҆̀мъ, и҆ ᲂу҆гото́ваша па́схꙋ [Лꙋк. к҃в, г҃і], сі́есть зако́ннꙋю при две́рехъ сꙋ́щꙋю, ю҆́же и҆ прише́дъ совершѝ со ᲂу҆ч҃нки̑, ꙗ҆́коже бж҃е́ственный златоꙋ́стъ глаго́летъ. Та́же и҆ ве́чери бы́вши, сі́есть та́йнѣй, и҆ бж҃е́ственномꙋ ᲂу҆мове́нїю посредѣ̀ содѣ́ѧнꙋ бы́вшꙋ, па́ки возле́гъ, и҆ на́шꙋ предае́тъ па́схꙋ на то́йже трапе́зѣ, ꙗ҆́коже златоꙋ́стый і҆ѡа́ннъ повѣствꙋ́етъ: и҆ сїѧ̑ ᲂу҆́бѡ та́кѡ. Бж҃е́ственный же і҆ѡа́ннъ, къ семꙋ̀ и҆ ма́ркъ, бж҃е́ственнїи є҆ѵⷢ҇лі́сти, и҆ мѵ́ра ви́дъ приложи́ша, и҆менова́вше сїѐ многоцѣ́нное и҆ пїсті́къ, сі́есть вѣ́рное, неле́стное же и҆ нерастворе́нное и҆ чи́стое [Ма́рк. д҃і, г҃. І҆ѡа́н. в҃і, г҃]: мо́щно є҆́сть, ꙗ҆́кѡ сїѐ бѣ̀ и҆ нарица́нїе нѣ́кое и҆зрѧ́днѣйшагѡ и҆ пе́рвагѡ мѵ́ра. Прилага́етъ же ма́ркъ, ꙗ҆́кѡ и҆ сосꙋ́дъ сокрꙋшѝ ѿ тща́нїѧ жена̀, а҆́ки тѣсновхо́дный, и҆ а҆лава́стръ сего̀ и҆менꙋ́етъ. Є҆́сть же се́й сосꙋ́дъ стклѧ́ный, ꙗ҆́коже глаго́летъ сщ҃е́нный є҆пїфа́нїй, без̾ рꙋкоѧ́ти сотворе́нный. Бѣ́ же мѵ́ро ѻ҆́ное сложе́но ѿ ви́дѡвъ ᲂу҆́бѡ и҆ и҆́ныхъ мно́гихъ, па́че же ѿ си́хъ: цвѣ́та смѵ́рны, кїнамѡ́ма бл҃гоꙋха́нна, і́҆́рїа, тро́сти а҆рѡма́тныѧ и҆ є҆ле́а.

Но, мы́сленнымъ мѵ́ромъ пома́завыйсѧ, хрⷭ҇тѐ бж҃е, свободѝ на́съ ѿ находѧ́щихъ страсте́й и҆ поми́лꙋй на́съ, ꙗ҆́кѡ є҆ди́нъ ст҃ъ и҆ чл҃вѣколю́бецъ. А҆ми́нь.

Пѣ́снь и҃.

[Р] І҆рмо́съ: Глаго́лъ мꙋчи́телевъ поне́же превозмо́же, седмери́цею пе́щь разжже́на бы́сть дре́вле: въ не́йже ѻ҆́троцы не попали́шасѧ, царе́во попра́вше велѣ́нїе, но вопїѧ́хꙋ: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ̑ки.

[А] И҆злива́ющи жена̀ мѵ́ро многоцѣ́нное на влады́чню и҆ бж҃е́ственнꙋю стра́шнꙋю главꙋ̀, хрⷭ҇тѐ, слѣдѡ́въ твои́хъ пречⷭ҇тыхъ прикоснꙋ́сѧ ѡ҆скверне́нныма дла́ньма, и҆ вопїѧ́ше: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.

[Д] Слеза́ми ѡ҆мыва́етъ но́зѣ созда́телѧ пови́ннаѧ во грѣсѣ́хъ и҆ ѡ҆тира́етъ власы̑̑. тѣ́мже не лиши́сѧ и҆збавле́нїѧ ѿ содѣ́ѧнныхъ въ житїѝ, но вопїѧ́ше: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.

[І] Сщ҃еннодѣ́йствꙋетсѧ и҆збавле́нїе бл҃горазꙋ́мнѣй ѿ сп҃си́тельныѧ ᲂу҆тро́бы и҆ и҆сто́чника сле́зъ, въ не́мже и҆сповѣ́данїемъ и҆змы́вшисѧ, не стыдѧ́шесѧ, но вопїѧ́ше: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.

Та́же: Хва́лимъ, бл҃гослови́мъ, покланѧ́емсѧ гдⷭ҇еви:

И҆ па́ки і҆рмо́съ: Глаго́лъ мꙋчи́телевъ:

Чтⷭ҇нѣ́йшꙋю не пое́мъ.

Пѣ́снь ѳ҃.

[Ѱ] І҆рмо́съ: Дꙋша́ми чи́стыми и҆ нескве́рными ᲂу҆стна́ми, прїиди́те, возвели́чимъ нескве́рнꙋю и҆ пречⷭ҇тꙋю мт҃рь є҆мманꙋ́илевꙋ, є҆́ю къ рожде́нномꙋ и҆з̾ неѧ̀ приносѧ́ще мл҃твꙋ: пощадѝ дꙋ́шы на́шѧ, хрⷭ҇тѐ бж҃е, и҆ сп҃сѝ на́съ.

[А] Неразꙋ́менъ ꙗ҆́вльсѧ и҆ лꙋка́въ зави́стникъ, цѣ́нꙋ бг҃ꙋ досто́йнагѡ да́ра, и҆́мже до́лгъ грѣхѡ́въ разрѣши́сѧ, и҆счислѧ́етъ лю́тый і҆ꙋ́да, корче́мствꙋѧ бг҃олюби́вымъ бл҃годаре́нїемъ. пощадѝ дꙋ́шы на́шѧ, хрⷭ҇тѐ бж҃е, и҆ сп҃сѝ на́съ.

[Л] Что́ ми хо́щете да́ти, и҆ а҆́зъ и҆ско́маго хрⷭ҇та̀ ва́мъ хотѧ́щымъ преда́мъ; ше́дъ ко беззакѡ́ннымъ кнѧзє́мъ, глаго́летъ і҆ꙋ́да, присвое́нїе хрⷭ҇тꙋ́ ѿри́нꙋвый зла́та ра́ди, пощадѝ дꙋ́шы на́шѧ, хрⷭ҇тѐ бж҃е, и҆ сп҃сѝ на́съ.

[Ѡ] Ѽ слѣпо́тнагѡ сребролю́бїѧ твоегѡ̀, нечести́ве! тѣ́мъ забве́нїе полꙋчи́лъ є҆сѝ, ꙗ҆́кѡ нижѐ ве́сь мі́ръ дꙋшѝ равноцѣ́ненъ є҆́сть, ꙗ҆́коже наꙋчи́лсѧ є҆сѝ: ѿча́ѧнїемъ бо са́мъ себѐ ᲂу҆дави́лъ є҆сѝ повѣ́сивсѧ, преда́телю. пощадѝ дꙋ́шы на́шѧ, хрⷭ҇тѐ бж҃е, и҆ сп҃сѝ на́съ.

Та́же і҆рмо́съ: Дꙋша́ми чи́стыми и҆ нескве́рными ᲂу҆стна́ми:

Є҆ѯапостїла́рїй, три́жды, ꙗ҆́кѡ ѡ҆бы́чно:

Черто́гъ тво́й ви́ждꙋ, сп҃се мо́й, ᲂу҆краше́нный, и҆ ѡ҆де́жды не и҆́мамъ, да вни́дꙋ во́нь: просвѣтѝ ѡ҆дѣѧ́нїе дꙋшѝ моеѧ̀, свѣтода́вче, и҆ сп҃си́ мѧ.

На хвали́техъ поста́вимъ стїхѝ д҃, и҆ пое́мъ сїѧ̑ самогла́сны, гла́съ а҃:

Тебѐ, дв҃ы сн҃а, блꙋдни́ца позна́вши бг҃а, глаго́лаше, во пла́чи молѧ́щисѧ, ꙗ҆́кѡ сле́зъ достѡ́йнаѧ содѣ́лавшаѧ: разрѣшѝ до́лгъ, ꙗ҆́коже и҆ а҆́зъ власы̀: возлюбѝ лю́бѧщꙋю, пра́веднѡ ненави́димꙋю, и҆ бли́зъ мытаре́й тебѐ проповѣ́мъ, бл҃годѣ́телю чл҃вѣколю́бче.

Многоцѣ́нное мѵ́ро блꙋдни́ца смѣсѝ со слеза́ми, и҆ и҆злива́ше на пречⷭ҇тѣи но́зѣ твоѝ, ѡ҆блобыза́ющи: ѻ҆́нꙋю а҆́бїе ѡ҆правда́лъ є҆сѝ, на́мъ же проще́нїе да́рꙋй, пострада́вый за на́съ, и҆ сп҃сѝ на́съ.

Є҆гда̀ грѣ́шница приноша́ше мѵ́ро, тогда̀ ᲂу҆чени́къ соглаша́шесѧ со беззако́нными. ѻ҆́ваѧ ᲂу҆́бѡ ра́довашесѧ, и҆стоща́ющи мѵ́ро многоцѣ́нное: се́й же тща́шесѧ прода́ти безцѣ́ннаго. сїѧ̀ влⷣкꙋ познава́ше, а҆ се́й ѿ влⷣки разлꙋча́шесѧ: сїѧ̀ свобожда́шесѧ, а҆ і҆ꙋ́да ра́бъ быва́ше врагꙋ̀. лю́то є҆́сть лѣ́ность, ве́лїе покаѧ́нїе! є҆́же мнѣ̀ да́рꙋй, сп҃се, пострада́вый за на́съ, и҆ сп҃сѝ на́съ.

Ѽ і҆ꙋ́дина ѡ҆каѧ́нства! зрѧ́ше блꙋдни́цꙋ цѣлꙋ́ющꙋ стѡпы̀, и҆ ᲂу҆мышлѧ́ше ле́стїю преда́нїѧ цѣлова́нїе. ѻ҆́наѧ власы̀ разрѣшѝ, а҆ се́й ꙗ҆́ростїю вѧза́шесѧ, носѧ̀ вмѣ́стѡ мѵ́ра ѕлосмра́днꙋю ѕло́бꙋ: за́висть бо не вѣ́сть предпочита́ти поле́зное. ѽ і҆ꙋ́дина ѡ҆каѧ́нства! ѿ негѡ́же и҆зба́ви, бж҃е, дꙋ́шы на́шѧ.

Сла́ва, гла́съ в҃: Грѣ́шница течѐ къ мѵ́рꙋ, кꙋпи́ти многоцѣ́нное мѵ́ро, да пома́жетъ бл҃годѣ́телѧ, и҆ мѷрова́рникꙋ вопїѧ́ше: да́ждь мѝ мѵ́ро, да пома́жꙋ и҆ а҆́зъ и҆згла́дившаго всѧ̑ моѧ̑ грѣхѝ.

И҆ ны́нѣ, гла́съ ѕ҃: Погрꙋже́ннаѧ во грѣсѣ̀, ѡ҆брѣ́те тѧ̀ приста́нище сп҃се́нїѧ, и҆ мѵ́ро со слеза́ми растворѧ́ющи, тебѣ̀ вопїѧ́ше: ви́ждь, согрѣша́ющихъ покаѧ́нїѧ ѡ҆жида́ѧй. но, влⷣко, сп҃си́ мѧ ѿ волны̀ грѣхо́вныѧ, вели́кїѧ ра́ди твоеѧ̀ млⷭ҇ти.

На стїхо́внѣ стїхи̑ры самогла́сны, гла́съ ѕ҃:

Дне́сь хрⷭ҇то́съ прихо́дитъ въ до́мъ фарїсе́овъ, и҆ жена̀ грѣ́шница, пристꙋпи́вши къ нога́мъ, валѧ́шесѧ вопїю́щи: ви́ждь погрꙋже́ннꙋю во грѣсѣ̀, ѿча́ѧннꙋю дѣѧ́нїй ра́ди, не гнꙋша́емꙋю ѿ твоеѧ̀ бл҃гости: и҆ да́ждь мѝ, гдⷭ҇и, ѡ҆ставле́нїе ѕлы́хъ, и҆ сп҃си́ мѧ.

Сті́хъ: И҆спо́лнихомсѧ заꙋ́тра млⷭ҇ти твоеѧ̀, гдⷭ҇и:

Прострѐ блꙋдни́ца власы̀ тебѣ̀ влⷣцѣ, прострѐ і҆ꙋ́да рꙋ́цѣ беззакѡ́ннымъ: ѻ҆́ва ᲂу҆́бѡ прїѧ́ти ѡ҆ставле́нїе, ѻ҆́въ же взѧ́ти сре́бреники. тѣ́мже тебѣ̀ вопїе́мъ про́данномꙋ и҆ свободи́вшемꙋ на́съ: гдⷭ҇и, сла́ва тебѣ̀.

Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ:

Пристꙋпѝ жена̀ ѕлосмра́днаѧ и҆ ѡ҆скверне́ннаѧ, сле́зы пролива́ющи на но́зѣ твои, сп҃се, стра́сть и҆сповѣ́дающи: ка́кѡ воззрю̀ къ тебѣ̀ влⷣцѣ; са́мъ бо прише́лъ є҆сѝ сп҃стѝ блꙋдни́цꙋ: и҆з̾ глꙋбины̀ ᲂу҆ме́ршꙋю мѧ̀ воскресѝ, ла́зарѧ воздви́гнꙋвый и҆з̾ гро́ба четверодне́вна: прїими́ мѧ ѡ҆каѧ́ннꙋю, гдⷭ҇и, и҆ сп҃си́ мѧ.

Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ:

Ѿве́рженнаѧ житїѧ̀ ра́ди, ᲂу҆вѣ́дѣннаѧ же нра́ва ра́ди, мѵ́ро носѧ́щи пристꙋпѝ, тебѣ̀ вопїю́щи: да не ѿве́ржеши менѐ блꙋ́днꙋю, роди́выйсѧ ѿ дв҃ы: да не пре́зриши моѧ̑ сле́зы ра́дость а҆́гг҃лѡвъ: но прїими́ мѧ ка́ющꙋсѧ, ю҆́же не ѿри́нꙋлъ є҆сѝ согрѣша́ющꙋ, гдⷭ҇и, вели́кїѧ ра́ди твоеѧ̀ млⷭ҇ти.

Сла́ва, и҆ ны́нѣ, самогла́сенъ, гла́съ и҃.

Творе́нїе кассїа́ны и҆́нокини.

Гдⷭ҇и, во мнѡ́гїѧ грѣхѝ впа́дшаѧ жена̀, твоѐ ѡ҆щꙋти́вши бж҃ество̀, мѷроно́сицы взе́мши чи́нъ, рыда́ющи мѵ́ро тебѣ̀ пре́жде погребе́нїѧ прино́ситъ, глаго́лющи: ᲂу҆вы̀ мнѣ̀! ꙗ҆́кѡ но́щь мнѣ̀ є҆́сть разжже́нїе блꙋда̀ невоздержа́нна, мра́чное же и҆ безлꙋ́нное раче́нїе грѣха̀! прїимѝ моѧ̑ и҆сто́чники сле́зъ, ѡ҆́блаки и҆зводѧ́й ѿ мо́рѧ во́дꙋ: приклони́сѧ къ мои̑мъ стена́нїємъ сердє́чнымъ, приклони́вый нб҃са̀ неизрече́ннымъ твои́мъ и҆стоща́нїемъ: да ѡ҆блобыжꙋ̀ пречⷭ҇тѣи твоѝ но́зѣ, и҆ па́ки главы̀ моеѧ̀ власмѝ ѡ҆трꙋ̀ сїѧ̑, и҆́хже шꙋ́момъ въ раѝ по полꙋ́дни ᲂу҆́шы ѡ҆гласи́вши, є҆́ѵа во стра́сѣ скры́сѧ: грѣхѡ́въ мои́хъ мно́жєства и҆ сꙋде́бъ твои́хъ бє́здны кто̀ и҆зслѣ́дитъ; дꙋшеспа́сче сп҃се мо́й, да мѧ̀ твою̀ рабꙋ̀ не пре́зриши, безмѣ́рнꙋю и҆мѣ́ѧй млⷭ҇ть.

И҆ а҆́бїе: Бл҃го є҆́сть: Трист҃о́е съ поклѡ́ны, и҆ ча́съ а҃-й без̾ стїхосло́вїѧ: быва́ютъ же и҆ покло́ны по чи́нꙋ и҆́хъ. И҆ лїті́а. И҆ ѿпꙋ́стъ. И҆ про́чее ꙗ҆́коже пре́жде ᲂу҆каза́сѧ въ понедѣ́льникъ вели́кїй.

На ѕ҃-мъ часѣ̀, тропа́рь прⷪ҇ро́чества, гла́съ и҃:

Дне́сь лꙋка́вое собра́сѧ со́нмище, и҆ на тѧ̀ тщє́тнаѧ ᲂу҆мы́сли: дне́сь соглаше́нїемъ і҆ꙋ́да себѣ̀ ᲂу҆давле́нїе ѡ҆брꙋча́етъ, каїа́фа же нево́лею и҆сповѣ́дꙋетъ, ꙗ҆́кѡ є҆ди́нъ за всѣ́хъ воспрїе́млеши стрⷭ҇ть во́лею: и҆зба́вителю на́шъ, хрⷭ҇тѐ бж҃е, сла́ва тебѣ̀.

Прокі́менъ, ѱало́мъ рл҃г, гла́съ д҃: Бл҃гослови́тъ тѧ̀ гдⷭ҇ь ѿ сїѡ́на: сотвори́вый нб҃о и҆ зе́млю. Сті́хъ: Сѐ ны́нѣ бл҃гослови́те гдⷭ҇а, всѝ рабѝ гдⷭ҇ни.

Прⷪ҇ро́чества і҆езекїи́лева чте́нїе.

[Глава̀ в҃, ст. г҃-і҃, глава̀ г҃, ст. а҃-г҃].

Речѐ гдⷭ҇ь ко мнѣ̀: сы́не человѣ́чь, послю́ тѧ а҆́зъ къ до́мꙋ і҆и҃левꙋ, ѡ҆горчева́ющымъ мѧ̀, и҆̀же ѡ҆горчи́ша мѧ̀: са́ми и҆ ѻ҆тцы̀ и҆́хъ ѿверго́шасѧ менє̀ до дне́шнѧгѡ днѐ: и҆ сы́нове жестоколи́чнїи и҆ твердосерде́чнїи. А҆́зъ послю́ тѧ къ тѣ̑мъ, и҆ рече́ши къ ни̑мъ: та́кѡ глаго́летъ а҆дѡнаі̀ гдⷭ҇ь. А҆́ще ᲂу҆́бѡ ᲂу҆слы́шатъ и҆лѝ ᲂу҆боѧ́тсѧ, занѐ до́мъ ѡ҆горчева́ѧй є҆́сть: и҆ позна́ютъ, ꙗ҆́кѡ прⷪ҇ро́къ є҆сѝ ты̀ посредѣ̀ и҆̀хъ. И҆ ты̀, сы́не человѣ́чь, да не ᲂу҆бои́шисѧ и҆́хъ, ни ᲂу҆жаса́йсѧ ѿ лица̀ и҆́хъ: занѐ разсверѣ́пѣютъ и҆ ѡ҆бы́дꙋтъ тѧ̀ ѡ҆́крестъ, посреди́ бо скорпі́євъ ты̀ живе́ши: слове́съ и҆́хъ не ᲂу҆бо́йсѧ, и҆ ѿ лица̀ и҆́хъ не ᲂу҆жаса́йсѧ, занѐ до́мъ ѡ҆горчева́ѧй є҆́сть. И҆ возглаго́леши словеса̀ моѧ̑ къ ни̑мъ, а҆́ще ᲂу҆́бѡ ᲂу҆слы́шатъ, и҆лѝ ᲂу҆боѧ́тсѧ, занѐ до́мъ прогнѣ́ваѧй є҆́сть. И҆ ты̀, сы́не человѣ́чь, послꙋ́шай глаго́лющагѡ къ тебѣ̀, не бꙋ́ди ѡ҆горчева́ѧй, ꙗ҆́коже до́мъ преѡгорчева́ѧй: ѿве́рзи ᲂу҆ста̀ твоѧ̑, и҆ снѣ́ждь, ꙗ҆́же а҆́зъ даю̀ тебѣ̀. И҆ ви́дѣхъ, и҆ сѐ рꙋка̀ просте́рта ко мнѣ̀, и҆ въ не́й сви́токъ кни́жный. И҆ развѝ є҆го̀ предо мно́ю, и҆ въ то́мъ пи̑сана бы́ша прє́днѧѧ и҆ за̑днѧѧ: и҆ впи́сано бѧ́ше въ не́мъ рыда́нїе, и҆ жа́лость и҆ го́ре. И҆ речѐ ко мнѣ̀: сы́не человѣ́чь, снѣ́ждь сви́токъ се́й, и҆ и҆дѝ, рцы̀ сынѡ́мъ і҆и҃лєвымъ. И҆ ѿверзо́хъ ᲂу҆ста̀ моѧ̑, и҆ напита́ мѧ сви́ткомъ си́мъ. И҆ речѐ ко мнѣ̀: сы́не человѣ́чь, ᲂу҆ста̀ твоѧ̑ снѣдѧ́тъ, и҆ чре́во твоѐ насы́титсѧ сви́тка сегѡ̀ да́ннагѡ тебѣ̀. И҆ снѣдо́хъ є҆го̀, и҆ бы́сть во ᲂу҆стѣ́хъ мои́хъ ꙗ҆́кѡ ме́дъ сла́докъ.

Прокі́менъ, ѱало́мъ рл҃д, гла́съ ѕ҃: Боѧ́щїисѧ гдⷭ҇а, бл҃гослови́те гдⷭ҇а. Сті́хъ: Хвали́те и҆́мѧ гдⷭ҇не, хвали́те, рабѝ, гдⷭ҇а.

Чте́нїе є҆ѵⷢ҇лїа. И҆ по чи́нꙋ трист҃о́е съ поклѡ́ны, и҆ ѿдае́мъ стїхосло́вїе часѡ́въ. Девѧ́тый же ча́съ начина́емъ ѿ трист҃а́гѡ, въ не́мже и҆ послѣ́днее быва́етъ чте́нїе ѿ є҆ѵⷢ҇лїа. Та́же глаго́лемъ: Не преда́ждь на́съ: Трист҃о́е съ поклѡ́ны. Та́кожде и҆ бл҃жє́нны, творѧ́ще и҆ ѡ҆бы̑чныѧ поклѡ́ны. Глаго́лемъ же и҆ конда́къ вели́кїѧ среды̀, и҆ хра́ма ст҃а́гѡ, и҆лѝ ст҃ы́ѧ. Сла́ва: Со ст҃ы́ми ᲂу҆поко́й: И҆ ны́нѣ: хра́ма бцⷣы. А҆́ще же нѝ, глаго́лемъ: Предста́тельство хрⷭ҇тїа́нъ: Гдⷭ҇и, поми́лꙋй, м҃, и҆ г҃ вели̑кїѧ покло́ны, и҆ в҃і ма̑лыѧ. Трист҃о́е, и҆ покло́ны г҃. Гдⷭ҇и, поми́лꙋй, в҃і, и҆ мл҃тва: Всест҃а́ѧ трⷪ҇це: Та́же: Досто́йно є҆́сть: Сла́ва, и҆ ны́нѣ: и҆ вмѣ́стѡ ѿпꙋ́ста глаго́летъ настоѧ́тель мл҃твꙋ: Влⷣко многомлⷭ҇тиве: всю̀ до конца̀. Се́й же глаго́лемѣй, мы̀ ни́цъ па́дше на зе́млю мо́лимсѧ.

И҆ по и҆сполне́нїи тоѧ̀, на́мъ воста́вшымъ, преклонѧ́етсѧ и҆ то́й са́мъ къ бра́тїи, и҆ про́ситъ проще́нїѧ, глаго́лѧ: Бл҃гослови́те, ѻ҆тцы̀ ст҃і́и, и҆ прости́те мѝ грѣ́шномꙋ, ꙗ҆̀же согрѣши́хъ во все́й жи́зни мое́й, и҆ во все́й ст҃ѣ́й четыредесѧ́тницѣ, сло́вомъ, дѣ́ломъ, помышле́нїемъ и҆ всѣ́ми мои́ми чꙋ́вствы. Бра́тїѧ же ѿвѣща́ютъ: Бг҃ъ да прости́тъ тѝ, честны́й ѻ҆́тче. Та́же прихо́дѧтъ и҆ бра́тїѧ два̀ два̀, про́сѧтъ подо́бнѣ и҆ ті́и проще́нїѧ, глаго́люще: Прости́ мѧ, ѻ҆́тче ст҃ы́й: и҆ про́чее, ꙗ҆́коже вы́ше писа́сѧ. И҆ прїе́мше проще́нїе, и҆́демъ въ кє́ллїи на́шѧ, и҆ молчи́мъ до часа̀ вече́рнѧгѡ. Въ собо́рныхъ же хра́мѣхъ и҆ прихо́дскихъ расхожде́нїе не быва́етъ: но по проще́нїи трезво́нъ въ дво́и.

Во ст҃ꙋ́ю и҆ вели́кꙋю сре́дꙋ ве́чера,

во свѣти́льничное, ѡ҆бы́чное стїхосло́вїе ѿ трист҃а́гѡ без̾ покло́нѡвъ. Стїхосло́вимъ же и҆: Ко гдⷭ҇ꙋ, внегда̀ скорбѣ́ти мѝ: без̾ покло́нѡвъ. На Гдⷭ҇и воззва́хъ, поста́вимъ стїхѡ́въ і҃, и҆ пое́мъ самогла̑сны, гла́съ а҃:

Тебѐ, дв҃ы сн҃а, блꙋдни́ца позна́вши бг҃а, глаго́лаше, во пла́чи молѧ́щисѧ, ꙗ҆́кѡ сле́зъ достѡ́йнаѧ содѣ́лавшаѧ: разрѣшѝ до́лгъ, ꙗ҆́коже и҆ а҆́зъ власы̀: возлюбѝ лю́бѧщꙋю, пра́веднѡ ненави́димꙋю, и҆ бли́зъ мытаре́й тебѐ проповѣ́мъ, бл҃годѣ́телю чл҃вѣколю́бче.

Многоцѣ́нное мѵ́ро блꙋдни́ца смѣсѝ со слеза́ми, и҆ и҆злива́ше на пречⷭ҇тѣи но́зѣ твоѝ, ѡ҆блобыза́ющи: ѻ҆́нꙋю а҆́бїе ѡ҆правда́лъ є҆сѝ, на́мъ же проще́нїе да́рꙋй, пострада́вый за на́съ, и҆ сп҃сѝ на́съ.

Є҆гда̀ грѣ́шница приноша́ше мѵ́ро, тогда̀ ᲂу҆чени́къ соглаша́шесѧ со беззако́нными. ѻ҆́ваѧ ᲂу҆́бѡ ра́довашесѧ, и҆стоща́ющи мѵ́ро многоцѣ́нное: се́й же тща́шесѧ прода́ти безцѣ́ннаго. сїѧ̀ влⷣкꙋ познава́ше, а҆ се́й ѿ влⷣки разлꙋча́шесѧ, сїѧ̀ свобожда́шесѧ, а҆ і҆ꙋ́да ра́бъ быва́ше врагꙋ̀. лю́то є҆́сть лѣ́ность, ве́лїе покаѧ́нїе! є҆́же мнѣ̀ да́рꙋй, сп҃се, пострада́вый за на́съ, и҆ сп҃сѝ на́съ.

Ѽ і҆ꙋ́дина ѡ҆каѧ́нства! зрѧ́ше блꙋдни́цꙋ цѣлꙋ́ющꙋ стѡпы̀, и҆ ᲂу҆мышлѧ́ше ле́стїю преда́нїѧ цѣлова́нїе. ѻ҆́наѧ власы̀ разрѣшѝ, а҆ се́й ꙗ҆́ростїю вѧза́шесѧ, носѧ̀ вмѣ́стѡ мѵ́ра ѕлосмра́днꙋю ѕло́бꙋ: за́висть бо не вѣ́сть предпочита́ти поле́зное. ѽ і҆ꙋ́дина ѡ҆каѧ́нства! ѿ негѡ́же и҆зба́ви, бж҃е, дꙋ́шы на́шѧ.

Гла́съ в҃: Грѣ́шница течѐ къ мѵ́рꙋ, кꙋпи́ти многоцѣ́нное мѵ́ро, да пома́жетъ бл҃годѣ́телѧ, и҆ мѷрова́рникꙋ вопїѧ́ше: да́ждь мѝ мѵ́ро, да пома́жꙋ и҆ а҆́зъ и҆згла́дившаго всѧ̑ моѧ̑ грѣхѝ.

Гла́съ ѕ҃: Погрꙋже́ннаѧ во грѣсѣ̀, ѡ҆брѣ́те тѧ̀ приста́нище сп҃се́нїѧ, и҆ мѵ́ро со слеза́ми растворѧ́ющи, тебѣ̀ вопїѧ́ше: ви́ждь, согрѣша́ющихъ покаѧ́нїѧ ѡ҆жида́ѧй. но, влⷣко, сп҃си́ мѧ ѿ волны̀ грѣхо́вныѧ, вели́кїѧ ра́ди твоеѧ̀ млⷭ҇ти.

Дне́сь хрⷭ҇то́съ прихо́дитъ въ до́мъ фарїсе́овъ, и҆ жена̀ грѣ́шница, пристꙋпи́вши къ нога́мъ, валѧ́шесѧ вопїю́щи: ви́ждь погрꙋже́ннꙋю во грѣсѣ̀, ѿча́ѧннꙋю дѣѧ́нїй ра́ди, не гнꙋша́емꙋю ѿ твоеѧ̀ бл҃гости: и҆ да́ждь мѝ, гдⷭ҇и, ѡ҆ставле́нїе ѕлы́хъ, и҆ сп҃си́ мѧ.

Прострѐ блꙋдни́ца власы̀ тебѣ̀ влⷣцѣ, прострѐ і҆ꙋ́да рꙋ́цѣ беззакѡ́ннымъ: ѻ҆́ва ᲂу҆́бѡ прїѧ́ти ѡ҆ставле́нїе, ѻ҆́въ же взѧ́ти сре́бреники. тѣ́мже тебѣ̀ вопїе́мъ про́данномꙋ и҆ свободи́вшемꙋ на́съ: гдⷭ҇и, сла́ва тебѣ̀.

Пристꙋпѝ жена̀ ѕлосмра́днаѧ и҆ ѡ҆скверне́ннаѧ, сле́зы пролива́ющи на но́зѣ твоѝ, сп҃се, стра́сть и҆сповѣ́дающи: ка́кѡ воззрю̀ къ тебѣ̀ влⷣцѣ; са́мъ бо прише́лъ є҆сѝ спастѝ блꙋдни́цꙋ: и҆з̾ глꙋбины̀ ᲂу҆ме́ршꙋю мѧ̀ воскресѝ, ла́зарѧ воздви́гнꙋвый и҆з̾ гро́ба четверодне́вна: прїими́ мѧ ѡ҆каѧ́ннꙋю, гдⷭ҇и, и҆ сп҃си́ мѧ.

Ѿве́рженнаѧ житїѧ̀ ра́ди, и҆ ᲂу҆вѣ́дѣннаѧ же нра́ва ра́ди, мѵ́ро носѧ́щи пристꙋпѝ, тебѣ̀ вопїю́щи: да не ѿве́ржеши менѐ блꙋ́днꙋю, роди́выйсѧ ѿ дв҃ы: да не пре́зриши моѧ̑ сле́зы, ра́дость а҆́гг҃лѡвъ: но прїими́ мѧ ка́ющꙋюсѧ, ю҆́же не ѿри́нꙋлъ є҆сѝ согрѣша́ющꙋю, гдⷭ҇и, вели́кїѧ ра́ди твоеѧ̀ млⷭ҇ти.

Сла́ва, и҆ ны́нѣ, гла́съ и҃. Творе́нїе кассїа́ны и҆́нокини.

Гдⷭ҇и, во мнѡ́гїѧ грѣхѝ впа́дшаѧ жена̀, твоѐ ѡ҆щꙋти́вши бж҃ество̀, мѷроно́сицы взе́мши чи́нъ, рыда́ющи мѵ́ро тебѣ̀ пре́жде погребе́нїѧ прино́ситъ, глаго́лющи: ᲂу҆вы̀ мнѣ̀! ꙗ҆́кѡ но́щь мнѣ̀ є҆́сть разжже́нїе блꙋда̀ невоздержа́нна, мра́чное же и҆ безлꙋ́нное раче́нїе грѣха̀! прїимѝ моѧ̑ и҆сто́чники сле́зъ, ѡ҆́блаки и҆зводѧ́й ѿ мо́рѧ во́дꙋ: приклони́сѧ къ мои̑мъ стена́нїємъ сердє́чнымъ, приклони́вый нб҃са̀ неизрече́ннымъ твои́мъ и҆стоща́нїемъ: да ѡ҆блобыжꙋ̀ пречⷭ҇тѣи твоѝ но́зѣ, и҆ па́ки главы̀ моеѧ̀ власмѝ̀ ѡ҆трꙋ̀ сїѧ̑, и҆́хже шꙋ́момъ въ раѝ по полꙋ́дни ᲂу҆́ши ѡ҆гласи́вши, є҆́ѵа во стра́сѣ скры́сѧ. грѣхѡ́въ мои́хъ мно́жєства и҆ сꙋде́бъ твои́хъ бє́здны кто̀ и҆зслѣ́дитъ; дꙋшеспа́сче см҃се мо́й, да мѧ̀ твою̀ рабꙋ̀ не пре́зриши, безмѣ́рнꙋю и҆мѣ́ѧй млⷭ҇ть.

Вхо́дъ со є҆ѵⷢ҇лїемъ. Свѣ́те ти́хїй:

Прокі́менъ, ѱало́мъ рл҃є, гла́съ д҃: И҆сповѣ́дайтесѧ бг҃ꙋ нбⷭ҇номꙋ, ꙗ҆́кѡ въ вѣ́къ млⷭ҇ть є҆гѡ̀. Сті́хъ: И҆сповѣ́дайтесѧ бг҃ꙋ богѡ́въ, ꙗ҆́кѡ во вѣ́къ млⷭ҇ть є҆гѡ̀.

И҆схо́да чте́нїе. [Глава̀ в҃, ст. а҃і-к҃в].

Бы́сть во дни̑ мнѡ́гїѧ ѻ҆́ны, вели́къ бы́въ мѡѷсе́й, и҆зы́де къ бра́тїѧмъ свои̑мъ, сынѡ́мъ і҆и҃лєвымъ. Разꙋмѣ́въ же болѣ́знь и҆́хъ, ви́дѣ человѣ́ка є҆гѵ́птѧнина, бїю́ща нѣ́коего є҆вре́анина ѿ бра́тїи є҆гѡ̀, сынѡ́въ і҆и҃левыхъ. Ѡ҆бозрѣ́всѧ же сѣ́мѡ и҆ ѻ҆ва́мѡ, никого́же ви́дѣ: и҆ порази́въ є҆гѵ́птѧнина, скры̀ є҆го̀ въ песцѣ̀. И҆зше́дъ же во вторы́й де́нь, ви́дѣ два̀ мꙋ̑жа є҆врє́анина бїю́щыѧсѧ, и҆ глаго́ла ѡ҆би́дѧщемꙋ: чесѡ̀ ра́ди ты̀ бїе́ши и҆́скреннѧго; Ѻ҆́нъ же речѐ: кто́ тѧ поста́ви кнѧ́зѧ и҆ сꙋдїю̀ над̾ на́ми; є҆да̀ ᲂу҆би́ти мѧ̀ ты̀ хо́щеши, и҆́мже ѡ҆́бразомъ ᲂу҆би́лъ є҆сѝ вчера̀ є҆гѵ́птѧнина; ᲂу҆боѧ́сѧ же мѡѷсе́й, и҆ речѐ: а҆́ще си́це ꙗ҆вле́нъ бы́сть глаго́лъ се́й; ᲂу҆слы́ша же фараѡ́нъ глаго́лъ се́й, и҆ и҆ска́ше ᲂу҆би́ти мѡѷсе́а. ѿи́де же мѡѷсе́й ѿ лица̀ фараѡ́нова, и҆ всели́сѧ въ землѝ мадїа́мстѣй: прише́дъ же въ зе́млю мадїа́мскꙋю, сѣ́де при кла́дѧзѣ. Свѧще́нникꙋ же мадїа́мскомꙋ бѣ́ша се́дмь дще́рей, пасꙋ́щихъ ѻ҆́вцы ѻ҆тца̀ своегѡ̀ і҆оѳо́ра: прише́дше же че́рпахꙋ, до́ндеже напо́лниша коры̑та, напои́ти ѻ҆́вцы ѻ҆тца̀ своегѡ̀ і҆оѳо́ра. Прише́дше же па́стырїе и҆згна́ша ѧ҆̀: воста́въ же мѡѷсе́й и҆зба́ви и҆̀хъ, и҆ налїѧ̀ и҆̀мъ, и҆ напоѝ ѻ҆́вцы и҆́хъ. Прїидо́ша же къ рагꙋи́лꙋ ѻ҆тцꙋ̀ своемꙋ̀. ѻ҆́нъ же речѐ и҆̀мъ: что̀ ꙗ҆́кѡ ᲂу҆скори́сте прїитѝ дне́сь; Ѻ҆́ныѧ же реко́ша: человѣ́къ є҆гѵ́птѧнинъ и҆зба́ви на́съ ѿ па́стырей, и҆ наче́рпа на́мъ, и҆ напоѝ ѻ҆́вцы на́шѧ. Ѻ҆́нъ же речѐ дще́ремъ свои̑мъ: и҆ гдѣ̀ є҆́сть; и҆ вскꙋ́ю си́це ѡ҆ста́висте человѣ́ка; призови́те ᲂу҆̀бо є҆го̀, да ꙗ҆́стъ хлѣ́бъ. Всели́сѧ же мѡѷсе́й ᲂу҆ человѣ́ка: и҆ дадѐ сепфѡ́рꙋ дще́рь свою̀ мѡѷсе́ю въ женꙋ̀. Во чре́вѣ же заче́нши жена̀ родѝ сы́на, и҆ наречѐ мѡѷсе́й и҆́мѧ є҆мꙋ̀, гирса́мъ, глаго́лѧ: ꙗ҆́кѡ пришле́цъ є҆́смь въ землѝ чꙋжде́й. Є҆ще́ же заче́нши родѝ сы́на втора́го, и҆ наречѐ и҆́мѧ є҆мꙋ̀ є҆лїезе́ръ, глаго́лѧ: бг҃ъ бо ѻ҆тца̀ моегѡ̀ помо́щникъ мо́й, и҆ и҆зба́ви мѧ̀ и҆з̾ рꙋкѝ фараѡ́новы.

Прокі́менъ, ѱало́мъ рл҃з, гла́съ д҃: Гдⷭ҇и, млⷭ҇ть твоѧ̀ во вѣ́къ, дѣ́лъ рꙋкꙋ̀ твоє́ю не пре́зри. Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, и҆ пред̾ а҆́гг҃лы воспою̀ тебѣ̀.

І҆́ѡва чте́нїе. [Глава̀ в҃, ст. а҃-і҃].

Бы́сть ꙗ҆́кѡ де́нь се́й, и҆ прїидо́ша а҆́гг҃ли бж҃їи предста́ти пред̾ гдⷭ҇емъ: и҆ дїа́волъ прїи́де посредѣ̀ и҆́хъ предста́ти пред̾ гдⷭ҇емъ. И҆ речѐ гдⷭ҇ь дїа́волꙋ: ѿкꙋ́дꙋ ты̀ грѧде́ши; тогда̀ речѐ дїа́волъ пред̾ гдⷭ҇емъ: проше́дъ поднебе́снꙋю, и҆ ѡ҆бше́дъ всю̀ зе́млю, прїидо́хъ. И҆ речѐ гдⷭ҇ь къ дїа́волꙋ: внѧ́лъ ли є҆сѝ ᲂу҆̀бо [мы́слїю твое́ю] рабꙋ̀ моемꙋ̀ і҆́ѡвꙋ; ꙗ҆́кѡ нѣ́сть такова̀ ѿ сꙋ́щихъ на землѝ: человѣ́къ неѕло́бивъ, и҆́стиненъ, непоро́ченъ, бг҃очести́въ, ᲂу҆далѧ́ѧйсѧ ѿ всѧ́кагѡ ѕла̀, є҆ще́ же придержи́тсѧ неѕло́бїѧ: ты́ же ре́клъ є҆сѝ и҆мѣ̑нїѧ є҆гѡ̀ погꙋби́ти вотщѐ. Ѿвѣща́въ же дїа́волъ гдⷭ҇еви, речѐ: ко́жꙋ за ко́жꙋ, и҆ всѧ̑, є҆ли̑ка и҆́мать человѣ́къ, да́стъ за дꙋ́шꙋ свою̀: ѻ҆ба́че послѝ рꙋ́кꙋ твою̀, и҆ косни́сѧ косте́мъ є҆гѡ̀ и҆ пло́ти є҆гѡ̀, а҆́ще не въ лице́ тѧ бл҃гослови́тъ. Рече́ же гдⷭ҇ь дїа́волꙋ: сѐ предаю́ ти є҆го̀, то́кмѡ дꙋ́шꙋ є҆гѡ̀ соблюдѝ. И҆зы́де же дїа́волъ ѿ лица̀ гдⷭ҇нѧ, и҆ поразѝ і҆́ѡва гно́емъ лю́тымъ ѿ но́гъ да́же до главы̀. И҆ взѧ̀ [і҆́ѡвъ] чре́пъ, да ѡ҆строга́етъ гно́й сво́й: и҆ то́й сѣдѧ́ше на гно́ищи внѣ̀ гра́да. Вре́мени же мно́гꙋ минꙋ́вшꙋ, речѐ къ немꙋ̀ жена̀ є҆гѡ̀, глаго́лющи: доко́лѣ терпи́ши; сѐ пождꙋ̀ вре́мѧ є҆щѐ ма́ло, ча́ющи наде́жди сп҃се́нїѧ моегѡ̀: се́ бо потреби́сѧ ѿ землѝ па́мѧть твоѧ̀, сы́нове твоѝ и҆ дщє́ри, моегѡ̀ чре́ва болѣ̑зни и҆ трꙋды̀, и҆́миже вотщѐ трꙋди́хсѧ съ болѣ́зньми: ты́ же са́мъ въ гноѝ черве́й сѣди́ши, ѡ҆бнощева́ѧ внѣ̀ без̾ покро́ва, и҆ а҆́зъ скита́ющисѧ и҆ слꙋжа́щи, мѣ́сто ѿ мѣ́ста преходѧ́щи, и҆ до́мъ ѿ до́мꙋ, ѡ҆жида́ющи со́лнца, когда̀ за́йдетъ, да почі́ю ѿ трꙋдѡ́въ мои́хъ и҆ ѿ болѣ́зней, ꙗ҆̀же мѧ̀ ны́нѣ ѡ҆бдержа́тъ. но рцы̀ глаго́лъ нѣ́кїй ко гдⷭ҇ꙋ и҆ ᲂу҆мрѝ. Ѻ҆́нъ же воззрѣ́въ речѐ къ не́й: вскꙋ́ю ꙗ҆́кѡ є҆ди́на ѿ безꙋ́мныхъ же́нъ возглаго́лала є҆сѝ; а҆́ще блага̑ѧ прїѧ́хомъ ѿ рꙋкѝ гдⷭ҇ни, ѕлы́хъ ли не стерпи́мъ; во всѣ́хъ си́хъ приключи́вшихсѧ є҆мꙋ̀, ничи́мже согрѣшѝ і҆́ѡвъ ᲂу҆стна́ма пред̾ бг҃омъ, [и҆ не дадѐ безꙋ́мїѧ бг҃ꙋ].

Та́же: Да и҆спра́витсѧ мл҃тва моѧ̀: Є҆ѵⷢ҇лїе ѿ матѳе́а, зача́ло р҃и. И҆ про́чее послѣ́дованїе преждеѡсщ҃е́нныхъ. И҆ по пренесе́нїи чтⷭ҇ны́хъ дарѡ́въ покло́ны г҃. И҆ а҆́бїе ᲂу҆празднѧ́ютсѧ соверше́ннѡ въ це́ркви быва́емїи покло́ны. Въ ке́ллїахъ же да́же и҆ до вели́кагѡ пѧтка̀ соверша́ютсѧ.