Великий Понедельник

Въ недѣ́лю ве́чера,

повече́рїе глаго́лемъ ма́лое, на не́мже пое́мъ трипѣ́снецъ господи́на а҆ндре́а кри́тскагѡ. І҆рмо́съ по два́жды: тропарѝ коли́кѡ и҆́хъ є҆́сть: и҆ послѣдѝ і҆рмо́съ ѻ҆́ба ли̑ка вкꙋ́пѣ. Та́кожде твори́мъ и҆ въ про́чыѧ вели́кїѧ седми́цы ве́чера, на повече́рїи. Гла́съ и҃.

Пѣ́снь а҃.

І҆рмо́съ: Сокрꙋши́вшемꙋ бра̑ни мы́шцею свое́ю и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ: ꙗ҆́кѡ просла́висѧ.

І҆ѡ́сифовꙋ цѣломꙋ́дрїю подража́имъ, вѣ́рнїи: разꙋмѣ́имъ поче́тшаго человѣ́ческое слове́сное сꙋщество̀ всѧ́цѣмъ хране́нїемъ, пожи́вше добродѣ́телїю дѣ́ѧтельною.

До́брыхъ недѣ́ланїе ᲂу҆подо́бисѧ смоко́вницѣ: сегѡ̀ ᲂу҆̀бо ᲂу҆клони́мсѧ, да не и҆́зсхнемъ ꙗ҆́коже ѻ҆на̀ тогда̀, пред̾из̾ѡбража́ющаѧ со́нмище ли́ствїемъ покрыва́ющеесѧ.

Ѡ҆́бразъ влⷣчень написꙋ́ѧ, і҆ѡ́сифъ въ ро́въ вве́рженъ быва́етъ, продае́тсѧ ѿ срѡ́дникъ, всѧ̑ терпи́тъ сла́вный, во ѡ҆́бразъ пои́стиннѣ хрⷭ҇то́въ.

Смоко́вницы безпло́дствїѧ ᲂу҆бѣжа́вше, бра́тїе, разꙋмѣ́имъ ѡ҆́бразъ, да не и҆́зсхнемъ ꙗ҆́коже ѻ҆на̀ тогда̀, є҆гда̀ возвраща́ѧсѧ чл҃вѣколю́бецъ прїи́де къ не́й а҆́лчѧ.

І҆и҃съ, за мі́ръ тща́сѧ пострада́ти во́лею, и҆́детъ со ᲂу҆ч҃нки̑ свои́ми во гра́дъ і҆ерⷭ҇ли́мъ къ во́льнѣй стрⷭ҇ти, ю҆́же прїи́де пострада́ти.

Прилѣпи́вшесѧ гдⷭ҇еви всѧ̑ тща́щемꙋсѧ пострада́ти, гото́ви бꙋ́демъ на порꙋга́нїе, на ѡ҆плева̑нїѧ и҆ на ᲂу҆ничиже́нїе: ꙗ҆́кѡ да пречⷭ҇тыми є҆гѡ̀ стрⷭ҇тьмѝ спросла́вимсѧ, вѣ́рнїи.

Стрⷭ҇тьмѝ стра̑сти и҆сцѣлѧ́етъ пострада́вый за на́съ: соѡбра́знымъ бо на́мъ сꙋщество́мъ человѣ́ческимъ во́лею прїе́млетъ животвѡ́рнаѧ своѧ̑ страда̑нїѧ, да мы̀ сп҃се́мсѧ.

Сла́ва: Трѝ безнача̑льна прославлѧ́ю, трѝ ст҃а пою̀, трѝ соприсносꙋ̑щна во є҆ди́номъ сꙋществѣ̀ проповѣ́даю: є҆ди́нъ бо во ѻ҆ц҃ѣ̀, сн҃ѣ и҆ дс҃ѣ славосло́витсѧ бг҃ъ.

Бг҃оро́диченъ: Же́злъ ᲂу҆́бѡ мѡѷсе́овъ и҆ же́злъ а҆арѡ́новъ стра́нное и҆змѣне́нїе и҆ па́че ᲂу҆ма̀ смотре́нїе и҆мѣ́ша: твое́ же чре́во, бг҃ороди́тельнице, ржⷭ҇тво̀ ѡ҆бновлѧ́етъ но́вое.

Сѣда́ленъ, гла́съ д҃:

Подо́бенъ: Ꙗ҆ви́лсѧ є҆сѝ дне́сь:

Смоко́вницы ѡ҆сꙋжде́нїе да не пости́гнетъ тѧ̀, дꙋшѐ: но бл҃гі̑ѧ плоды̀ потщи́сѧ, се́рдца брозда́ми, творцꙋ̀ твоемꙋ̀ хрⷭ҇тꙋ̀ возвестѝ, въ покаѧ́нїи є҆мꙋ̀ приносѧ́щи.

Пѣ́снь и҃.

І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ та́йнꙋ приснодв҃ы ѻ҆гне́мъ мѡѷсе́ови ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.

Цѣломꙋ́дрїемъ ᲂу҆краси́вше житїѐ, и҆ мꙋ́дростїю сохрани́вше вѣ́рꙋ, пра́вды нра́вы прїѡбрѧ́щимъ, да въ мꙋ́жествѣ, спослѣ́дꙋюще, хрⷭ҇то́ви сраспне́мсѧ.

Дрꙋгꙋ́ю є҆́ѵꙋ ѡ҆брѣ́тъ є҆гѵ́птѧныню, не прельще́нъ бѣ̀ къ неподо́бномꙋ дѣѧ́нїю патрїа́рхъ і҆ѡ́сифъ, но ста̀ ꙗ҆́коже нѣ́кїй а҆дама́нтъ, ѿ страсте́й не ꙗ҆́тъ грѣхо́вныхъ.

Преходѧ̀ житїѧ̀ шє́ствїѧ, сп҃се мо́й, взалка́лъ є҆сѝ во́лею, сп҃се́нїѧ всѣ́хъ жела́ѧ: сегѡ́ бо а҆лка́лъ є҆сѝ, ѡ҆браще́нїѧ ѿ тебє̀ ᲂу҆дале́нныхъ.

Пра́ѻтецъ вкꙋ́шь ѿ дре́ва, є҆гда̀ позна́сѧ на́гъ и҆ посра́мленъ, ли́ствїе смоко́вное взе́мъ препоѧ́сасѧ: проѡбража́ше бо собо́рище, ѡ҆бнаже́нное ѿ хрⷭ҇та̀.

Гото́висѧ, дꙋшѐ, пре́жде и҆схо́да, ᲂу҆стро́й себѐ ко ѻ҆́номꙋ житїю̀: и҆ тебє̀ ра́ди пострада́ти тща́щемꙋсѧ, да тѧ̀ просла́витъ, хрⷭ҇тꙋ̀ потщи́сѧ спострада́ти, и҆ сраспѧ́тисѧ, и҆ ᲂу҆мре́ти.

Ка́кѡ не ᲂу҆жа́снетсѧ сме́рть, сп҃се мо́й; ка́кѡ не ᲂу҆бои́тсѧ а҆́дъ срѣта́ѧ тѧ̀, по бл҃гоизволе́нїю ко стрⷭ҇ти тща́щагосѧ, и҆ зрѧ̀ тѧ̀ пра́ведна за непра́ведныхъ пострада́ти прише́дша;

Ла́зарево воста́нїе ви́дѣвше, і҆ꙋдє́и, сщ҃е́нницы и҆ леѵі́ти, клѧ́твенное согла́сїе за́вистїю ᲂу҆гото́вльше, ле́стїю преда́тельства, хрⷭ҇та̀ преда́ша на сме́рть пїла́тꙋ.

А҆́гница твоѧ̀ и҆ раба̀ и҆ дв҃а, ви́дѧщи тѧ̀ ко стрⷭ҇ти ᲂу҆стремлѧ́ющасѧ и҆ дꙋ́шꙋ за на́съ полага́юща, до́браго па́стырѧ, ᲂу҆тро́бою мт҃рнею по тебѣ̀ болѣ́зноваше.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Ꙗ҆́кѡ є҆ди́ницꙋ сꙋщество́мъ пою́ тѧ, ꙗ҆́кѡ трⷪ҇цꙋ ли̑цы тѧ̀ чтꙋ̀: ѻ҆́ч҃е, и҆ сн҃е, и҆ дш҃е прест҃ы́й, безнача́льнꙋю держа́вꙋ твоегѡ̀ црⷭ҇твїѧ сла́влю во вѣ́ки.

Бг҃оро́диченъ: Мо́литъ тѧ̀, хрⷭ҇тѐ, бцⷣа, мо́литъ ᲂу҆чени̑къ собо́ръ: тво́й ми́ръ да́рꙋй мі́рови твоемꙋ̀, и҆ щедрѡ́ты твоѧ̑ пода́ждь на́мъ бога́тнѡ во вѣ́ки.

Хва́лимъ, бл҃гослови́мъ, покланѧ́емсѧ гдⷭ҇еви:

І҆рмо́съ: На горѣ̀ ст҃ѣ́й просла́вльшасѧ:

Пѣ́снь ѳ҃.

І҆рмо́съ: Чꙋ́жде ма́теремъ дѣ́вство, и҆ стра́нно дѣ́вамъ дѣторожде́нїе: на тебѣ̀, бцⷣе, ѻ҆боѧ̀ ᲂу҆стро́ишасѧ. тѣ́мъ тѧ̀ всѧ̑ племена̀ земна̑ѧ непреста́ннѡ велича́емъ.

Чꙋ́жде є҆́сть нечести̑вымъ цѣломꙋ́дрїе, и҆ стра́нно пра́ведникѡмъ законопрестꙋпле́нїе: і҆ѡ́сифъ же вели́кїй ᲂу҆клони́сѧ грѣха̀, и҆ бы́сть цѣломꙋ́дрїѧ ѡ҆́бразъ и҆ подо́бїе вои́стиннꙋ хрⷭ҇то́во.

Чꙋ́жде є҆́сть беззако́нникѡмъ бл҃гозако́нїе, и҆ стра́нно невѣ̑рнымъ бг҃овѣ́дѣнїе: і҆ꙋде́є же сїѧ̑ ѿри́нꙋша по беззако́нїю. тѣ́мже и҆ є҆ди́ни са́ми наслѣ́доваша, ꙗ҆́коже смоко́вница, проклѧ́тїе.

Взалка̀ человѣ́ческагѡ сп҃се́нїѧ, хлѣ́бъ сы́й жи́зни, хрⷭ҇то́съ и҆ бг҃ъ мо́й: и҆ ꙗ҆́коже смоко́вницы дости́гъ безпло́днагѡ со́нмища, ли́ствїемъ зако́ннымъ ѡ҆бра́стшагѡ, сїѐ є҆гда̀ ви́дѣ, проклѧ́тъ.

Зако́нное непло́дїе проклѧ́лъ є҆сѝ, и҆звраща́ющее, ꙗ҆́кѡ ли́ствїе, сѣно́вное пи́сьмене разꙋмѣ́нїе, плодѡ́въ же дѣ́лъ не и҆мꙋ́щее по беззако́нїю: на́съ же всѣ́хъ бл҃года́ти сынѡ́въ, сп҃се, бл҃гословѝ.

Же́злъ ᲂу҆́бѡ мѡѷсе́овъ дре́вле преложи́сѧ въ ѕмїю̀, а҆арѡ́новъ же же́злъ въ зе́лено, и҆ и҆зрастѝ ли́ствїе, непло́денъ и҆ сꙋ́хъ бы́въ: со́нмище же законопрестꙋ́пное въ непло́днꙋю преложи́сѧ смоко́вницꙋ.

Гото́ви, і҆ꙋде́е, сщ҃е́нники твоѧ̑, и҆ ᲂу҆стро́й рꙋ́цѣ къ бг҃оꙋбі́йствꙋ: се́ бо прїи́де кро́токъ и҆ молчали́въ на стрⷭ҇ть, а҆́гнецъ сы́й и҆ па́стырь на́шъ, хрⷭ҇то́съ цр҃ь і҆и҃левъ.

Прїимѝ, і҆ꙋде́е, цр҃ѧ̀: се́ бо на стрⷭ҇ть прихо́дитъ во́лею, да постра́ждетъ и҆ сп҃се́тъ зовꙋ́щыѧ непреста́ннѡ: бл҃гослове́нъ грѧды́й сп҃стѝ крⷭ҇то́мъ всѧ́чєскаѧ.

Ѡ҆брати́лъ є҆́сть, і҆ꙋде́е, пра́здники твоѧ̑ въ пла́чь влⷣка, по прⷪ҇ро́чествꙋ: ꙗ҆ви́ласѧ бо є҆сѝ ᲂу҆бі́йца бг҃а, ѡ҆бра́щшагѡ дре́вле ка́мень и҆ скалꙋ̀ въ во́ды и҆ є҆зє́ра, ꙗ҆́коже пое́тъ дв҃дъ.

Сла́ва: Чꙋ́жде є҆́сть беззакѡ́ннымъ сла́вити тѧ̀ безнача́льное сꙋщество̀, ѻ҆ц҃а̀, и҆ сн҃а, и҆ ст҃а́гѡ дх҃а, несозда́нное вседержи́тельство, и҆́мже ве́сь мі́ръ содѣ́ласѧ, ма́нїемъ бж҃е́ственныѧ держа́вы є҆гѡ̀.

И҆ ны́нѣ: Приво́димъ въ мл҃твꙋ бцⷣꙋ: тоѧ̀ мл҃твами и҆ а҆пⷭ҇лъ твои́хъ, ѻ҆́бщники ны̀ сотворѝ, влⷣко, бл҃ги́хъ твои́хъ, и҆ свѣ́тлости сподо́би, сп҃се, воскрⷭ҇нїѧ твоегѡ̀.

И҆ па́ки і҆рмо́съ то́йже: Чꙋ́жде ма́терємъ:

Та́же и҆ про́чее ѡ҆бы́чно. И҆ ѿпꙋ́стъ.

Вѣ́домо бꙋ́ди, ꙗ҆́кѡ въ сїю̀ ст҃ꙋ́ю вели́кꙋю седми́цꙋ є҆ди́ною соверша́емъ ѱалти́рь, и҆ глаго́лемъ на ᲂу҆́трени каѳі̑смы трѝ, и҆ на часѣ́хъ, г҃-мъ и҆ ѕ҃-мъ, двѣ̀. И҆ зака́нчиваетсѧ въ сре́дꙋ. Въ вели́кꙋю же сꙋббѡ́тꙋ стїхосло́вѧтсѧ непорѡ́чны, въ вече́рнѧхъ же глаго́лемъ ѡ҆бы́чнѡ: Ко гдⷭ҇ꙋ, внегда̀ скорбѣ́ти мѝ:

Во ст҃ы́й и҆ вели́кїй понедѣ́льникъ на ᲂу҆́трени,

по шестоѱа́лмїи пое́мъ а҆ллилꙋ́їа, на гла́съ и҃, велегла́снѡ и҆ со сладкопѣ́нїемъ: и҆ посе́мъ тропа́рь ко́снѡ и҆ велегла́снѡ, и҆ со сладкопѣ́нїемъ равнѡ̀. Гла́съ и҃:

Сѐ жени́хъ грѧде́тъ въ полꙋ́нощи, и҆ бл҃же́нъ ра́бъ, є҆го́же ѡ҆брѧ́щетъ бдѧ́ща: недосто́инъ же па́ки, є҆го́же ѡ҆брѧ́щетъ ᲂу҆ныва́юща. блюдѝ ᲂу҆̀бо, дꙋшѐ моѧ̀, не сно́мъ ѡ҆тѧготи́сѧ, да не сме́рти предана̀ бꙋ́деши, и҆ црⷭ҇твїѧ внѣ̀ затвори́шисѧ, но воспрѧнѝ зовꙋ́щи, ст҃ъ, ст҃ъ, ст҃ъ є҆сѝ, бж҃е, бцⷣею поми́лꙋй на́съ. [Три́жды].

Та́же ѡ҆бы́чное стїхосло́вїе съ поклѡ́ны.

По а҃-мъ стїхосло́вїи сѣда́ленъ, гла́съ а҃:

Подо́бенъ: Гро́бъ тво́й, сп҃се:

Страда̑нїѧ чтⷭ҇на̑ѧ, ꙗ҆́коже свѣти̑ла сп҃си́тєльнаѧ, настоѧ́щїй де́нь возсїѧва́етъ мі́рꙋ: хрⷭ҇то́съ бо грѧде́тъ пострада́ти бл҃гостїю всѧ̑ содержа́й дла́нїю, и҆зволѧ́етъ простре́тисѧ на дре́вѣ, да сп҃се́тъ человѣ́ка.

Сла́ва, и҆ ны́нѣ, то́йже:

По в҃-мъ стїхосло́вїи сѣда́ленъ, гла́съ а҃, подо́бенъ:

Неви́димый сꙋдїѐ, во пло́ти ка́кѡ ви́дѣнъ бы́лъ є҆сѝ, и҆ и҆́деши ѿ мꙋже́й беззако́нныхъ ᲂу҆бїе́нъ бы́ти, на́ше ѡ҆сꙋжде́нїе ѡ҆сꙋжда́ѧй стрⷭ҇тїю твое́ю; тѣ́мже хвалꙋ̀, вели́чїе и҆ сла́вꙋ возсыла́юще вла́сти твое́й, сло́ве, согла́снѡ прино́симъ.

Сла́ва, и҆ ны́нѣ, то́йже.

По г҃-мъ стїхосло́вїи сѣда́ленъ, гла́съ и҃:

Подо́бенъ: Премꙋ́дрость и҆ сло́во:

Стрⷭ҇те́й гдⷭ҇нихъ нача́тки настоѧ́щїй де́нь свѣтлоно́ситъ. прїиди́те ᲂу҆̀бо, празднолю́бцы, ᲂу҆срѧ́щимъ пѣ́сньми: созда́тель бо грѧде́тъ прїѧ́ти крⷭ҇тъ, и҆спыта̑нїѧ и҆ ра̑ны, пїла́томъ сꙋди́мь. тѣ́мже и҆ ѿ раба̀ ᲂу҆да́ренъ бы́въ по главѣ̀, всѧ̑ терпи́тъ, да сп҃се́тъ человѣ́ка. сегѡ̀ ра́ди возопїи́мъ є҆мꙋ̀: чл҃вѣколю́бче хрⷭ҇тѐ бж҃е, прегрѣше́нїй ѡ҆ставле́нїе да́рꙋй покланѧ́ющымсѧ вѣ́рою пречⷭ҇тымъ стрⷭ҇те́мъ твои̑мъ.

Сла́ва, и҆ ны́нѣ, то́йже. И҆ а҆́бїе посе́мъ чте́нїе въ толкова́нїи є҆ѵⷢ҇лїа є҆́же ѿ матѳе́а. И҆ сло́во і҆ѡа́нна златоꙋ́стагѡ ѡ҆ и҆зсо́хшей смоко́вницѣ, є҆мꙋ́же нача́ло: Ꙗ҆́коже ᲂу҆́бѡ ви́дѧ: И҆ сло́во дамаски́ново ѡ҆ и҆зсо́хшей смоко́вницѣ и҆ ѡ҆ при́тчи вїногра́да. Та́же: И҆ ѡ҆ сподо́битисѧ на́мъ: Є҆ѵⷢ҇лїе ѿ матѳе́а, зача́ло п҃д, без̾ престꙋ́пки: Во вре́мѧ ѻ҆́но, возвра́щьсѧ і҆и҃съ во гра́дъ, взалка̀: Коне́цъ, въ зача́лѣ п҃и-мъ: И҆ да́стсѧ ꙗ҆зы́кꙋ творѧ́щемꙋ плоды̀ є҆гѡ̀. Посе́мъ ѱало́мъ п҃. Та́же: Сп҃сѝ, бж҃е, лю́ди твоѧ̑: Гдⷭ҇и, поми́лꙋй, в҃і.

Трипѣ́снецъ, творе́нїе господи́на космы̀, є҆гѡ́же краестро́чїе: Тѝ деѵте́ра, сі́есть: Во вторы́й де́нь, є҆́же є҆́сть понедѣ́льникъ. І҆рмосы̀ по два́жды, тропарѝ на в҃і. Припѣ́въ: Сла́ва тебѣ̀, бж҃е на́шъ, сла́ва тебѣ̀. [Се́й во всю̀ седми́цꙋ].

Послѣдѝ і҆рмо́съ, ѻ҆́ба ли̑ка вкꙋ́пѣ. Гла́съ в҃.

Пѣ́снь а҃.

[Т] І҆рмо́съ: Непроходи́мое волнѧ́щеесѧ мо́ре бж҃е́ственнымъ свои́мъ велѣ́нїемъ и҆зсꙋши́вшемꙋ, и҆ пѣшеше́ствовати сквозѣ̀ є҆̀ і҆и҃льтєскїѧ лю́ди наста́вльшемꙋ, гдⷭ҇еви пои́мъ, сла́внѡ бо просла́висѧ.

[И] Неизрече́нное сло́ва бж҃їѧ снисхожде́нїе, є҆́же хрⷭ҇то́съ, прїе́млѧ ѡ҆́бразъ раба̀, показꙋ́етъ ᲂу҆ч҃нкѡ́мъ: са́мъ є҆́сть бг҃ъ и҆ человѣ́къ, не восхище́нїемъ мнѧ́й бг҃ъ бы́ти: сла́внѡ бо просла́висѧ.

[Д] Послꙋжи́ти ѡ҆бнища́вшемꙋ а҆да́мꙋ, є҆гѡ́же зра́комъ во́лею ѡ҆бложе́нъ є҆́смь, са́мъ созда́тель прїидо́хъ, бога́тствꙋѧй бж҃ество́мъ, положи́ти хотѧ́й мою̀ дꙋ́шꙋ и҆збавле́нїе за́нь, безстра́стный бж҃ество́мъ.

Конда́къ, гла́съ и҃.

Подо́бенъ: Ꙗ҆́кѡ нача́тки:

І҆а́кѡвъ рыда́ше ѡ҆ і҆ѡ́сифовѣ лише́нїи, то́й жЄ҆ до́блїй сѣдѧ́ше на колесни́цѣ, ꙗ҆́кѡ ца́рь почита́емь: є҆гѵ́птѧныни бо тогда̀ сласте́мъ не поработи́всѧ, воспрославлѧ́шесѧ ѿ ви́дѧщагѡ человѣ́чєскаѧ сердца̀ и҆ посыла́ющагѡ вѣне́цъ нетлѣ́нный.

І҆́косъ: На рыда́нїе ны́нѣ приложи́мъ рыда́нїе, и҆ и҆злїи́мъ сле́зы со і҆а́кѡвомъ, пла́чꙋще ѡ҆ і҆ѡ́сифѣ сла́внѣмъ и҆ цѣломꙋ́дреннѣмъ, порабоще́ннѣмъ ᲂу҆́бѡ тѣ́ломъ, дꙋ́шꙋ же непорабоще́нꙋ соблю́дшемъ, и҆ є҆гѵ́птомъ всѣ́мъ ца́рствовавшемъ: бг҃ъ бо подае́тъ рабѡ́мъ свои̑мъ вѣне́цъ нетлѣ́нный.

Сѷнаѯа́рїй. Стїхѝ на і҆ѡ́сифа прекра́снаго:

Цѣломꙋ́дренный і҆ѡ́сифъ ꙗ҆ви́сѧ пра́ведный держа́вецъ

И҆ пшеницеда́вецъ: ѽ до́брыхъ сто́же!

Стїхѝ на и҆зсо́хшꙋю смоко́вницꙋ:

Хрⷭ҇то́съ, воѡбразꙋ́ѧ собо́рище є҆вре́йское,

Плодѡ́въ дх҃о́вныхъ лише́нное, смоко́вницꙋ

Клѧ́твою ᲂу҆сꙋша́етъ: є҆гѡ́же бѣжи́мъ стра́сти.

Во ст҃ы́й и҆ вели́кїй понедѣ́льникъ па́мѧть твори́мъ бл҃же́ннагѡ і҆ѡ́сифа прекра́снагѡ и҆ ѿ гдⷭ҇а проклѧ́тыѧ и҆ и҆зсо́хшїѧ смоко́вницы. Ѿ ны́нѣшнѧгѡ днѐ нача́ло прїе́млютъ ст҃ы́ѧ стрⷭ҇ти гдⷭ҇а на́шегѡ і҆и҃са хрⷭ҇та̀: пе́рвѣе же всѣ́хъ прїе́млетсѧ во ѡ҆́бразъ сегѡ̀ і҆ѡ́сифъ прекра́сный. Се́й бѧ́ше сы́нъ патрїа́рха і҆а́кѡва, ѿ рахи́ли є҆мꙋ̀ рожде́нный: по зави́сти же нѣ́кихъ ра́ди во снѣ̀ видѣ́нїй, ѿ свои́хъ бра́тїй пре́жде ᲂу҆́бѡ въ ро́въ вверга́етсѧ: и҆ ѻ҆те́цъ є҆гѡ̀ ѿ дѣте́й лꙋка́вѡ ѡ҆кровавле́нною ри́зою ѡ҆больща́етсѧ, а҆́ки бы ѿ ѕвѣ́рѧ і҆ѡ́сифъ и҆з̾ѧде́нъ бы́сть. Та́же на три́десѧтихъ сре́бренницѣхъ про́данъ быва́етъ і҆смаилі́томъ, и҆̀же па́ки продаю́тъ є҆го̀ пентефрі́ю, нача́льникꙋ скопцє́въ царѧ̀ є҆гѵ́петскагѡ фараѡ́на. Неи́стовствовавшей же госпожѣ̀ є҆гѡ̀ на цѣломꙋ́дрїе ю҆́ноши, поне́же беззако́нїѧ содѣ́ѧти не восхотѣ̀, ри́зꙋ ѡ҆ста́вль ѿбѣжѐ: ѻ҆на́ же господи́нꙋ є҆гѡ̀ ѡ҆болга́етъ є҆го̀, и҆ ᲂу҆́зы и҆ темни́ца го́рькаѧ сего̀ прїе́млютъ. Та́же и҆столкова́нїѧ ра́ди снѡ́въ и҆зво́дитсѧ, и҆ пред̾ царѧ̀ ꙗ҆влѧ́емь быва́етъ, и҆ поставлѧ́етсѧ господи́нъ всеѧ̀ землѝ є҆гѵ́петскїѧ. Па́ки же во пшеницеда́тельствѣ ѿ бра́тїй свои́хъ позна́нъ быва́етъ, и҆ всѐ своѐ житїѐ до́брѣ препроводи́въ, во є҆гѵ́птѣ ᲂу҆мира́етъ, вели́къ познава́емый въ цѣломꙋ́дрїи при и҆нѣ́хъ є҆гѡ̀ добродѣ́телехъ. Се́й же є҆́сть ѡ҆бразъ хрⷭ҇то́въ: занѐ и҆ хрⷭ҇то́съ ѿ є҆диноплеме́нныхъ і҆ꙋдє́й зави́ствꙋемь быва́етъ, и҆ ѿ ᲂу҆ченика̀ на три́десѧти сре́бреницѣхъ продае́тсѧ, и҆ во мра́чный и҆ те́мный ро́въ, гро́бъ, заключа́етсѧ, и҆ ѿтꙋ́дꙋ самовла́стнѡ воста́въ, ца́рствꙋетъ над̾ є҆гѵ́птомъ, сі́есть над̾ всѣ́мъ грѣхо́мъ, и҆ до конца̀ сегѡ̀ побѣжда́етъ, мі́ромъ же всѣ́мъ ѡ҆блада́етъ и҆ человѣколю́бнѡ и҆скꙋпꙋ́етъ на́съ та́инственнымъ пшеницеда́тельствомъ, ꙗ҆́кѡ са́мъ себѐ за на́съ да́лъ є҆́сть и҆ ꙗ҆́кѡ пита́етъ на́съ нбⷭ҇нымъ хлѣ́бомъ, свое́ю живоно́сною пло́тїю. По се́й ᲂу҆̀бо винѣ̀ прекра́сный і҆ѡ́сифъ ны́нѣ воспомина́етсѧ.

Здѣ́ же и҆ ѡ҆ и҆зсо́хшей смоко́вницѣ па́мѧть твори́мъ: зане́же бж҃е́ственнїи є҆ѵⷢ҇лі́сти, сі́есть матѳе́й и҆ ма́ркъ, по по́вѣсти ѡ҆ ва́їахъ, прилага́ютъ: Наꙋ́трїе и҆зше́дшымъ и҆̀мъ ѿ виѳа́нїи, взалка̀. [Дрꙋгі́й же глаго́летъ: ᲂу҆́трꙋ же возвра́щьсѧ во гра́дъ взалка̀.] И҆ ви́дѣвъ смоко́вницꙋ ли́ствїе то́кмѡ и҆мꙋ́щꙋю, не бѣ́ бо вре́мѧ смо́квамъ, прїи́де къ не́й, и҆ поели́кꙋ плода̀ не ѡ҆брѣ́те на не́й, речѐ: да николи́же ѿ тебє̀ плода̀ бꙋ́детъ во вѣ́къ. и҆ а҆́бїе и҆́зсше смоко́вница. [Матѳ. к҃а, и҃і-ѳ҃і. Ма́рк. а҃і, г҃і-д҃і]. Смоко́вница ᲂу҆̀бо є҆́сть со́нмище і҆ꙋде́йское, на не́мже плода̀ потре́бнагѡ сп҃съ не ѡ҆брѣ́тъ, то́чїю сѣ́нь зако́на, и҆ сїю̀ ѿѧ́тъ ѿ ни́хъ, пра̑здны всѧ́чески содѣ́ѧвъ. А҆́ще же кто̀ рече́тъ: почто̀ бездꙋ́шное дре́во и҆зсꙋше́но бы́сть и҆ проклѧ́тїе под̾ѧ́тъ, не согрѣши́въ; да разꙋмѣ́етъ, ꙗ҆́кѡ і҆ꙋде́є, ви́дѧще хрⷭ҇та̀ при́снѡ всѣ̑мъ бл҃годѣ́тельствꙋюща и҆ никомꙋ́же что̀ ско́рбно содѣ́лавша, мнѧ́хꙋ, ꙗ҆́кѡ си́лꙋ и҆́мать то́чїю бл҃годѣ́тельствовати, ѕлотвори́ти же нѝ. Человѣколюби́въ же сы́й, влⷣка не восхотѣ̀ на человѣ́цѣ показа́ти ꙗ҆́кѡ мо́жетъ и҆ сїѐ бы́ти: но да ᲂу҆вѣ́ритъ небл҃года̑рныѧ лю́ди, ꙗ҆́кѡ и҆́мать си́лꙋ дово́льнꙋю и҆ казни́ти, но ꙗ҆́кѡ бл҃гъ не хо́щетъ, на бездꙋ́шнѣмъ и҆ нечꙋ́вственнѣмъ є҆стествѣ̀ ка́знь содѣ́ловаетъ. Вкꙋ́пѣ же нѣ́кое и҆ неизглаго́ланное сло́во є҆́сть, ѿ ста́рєцъ премꙋ́дрыхъ къ на́мъ прише́дшее, ꙗ҆́коже глаго́летъ і҆сі́дѡръ: ꙗ҆́кѡ смоко́вница бы́сть дре́во престꙋпле́нїѧ, є҆гѡ́же и҆ ли́ствїе а҆да́мъ со є҆́ѵою по престꙋпле́нїи въ покро́въ ᲂу҆потреби́ша: тѣ́мже и҆ проклѧта̀ бы́сть ѿ хрⷭ҇та̀ человѣколю́бнѡ, поне́же тогда̀ сегѡ̀ не пострада̀, да бо́лѣ не прино́ситъ плода̀, вино́внагѡ грѣхꙋ̀. А҆ ꙗ҆́кѡ грѣ́хъ смо́квѣ ᲂу҆подоблѧ́етсѧ, ꙗ҆́вѣ є҆́сть: и҆́мать бо и҆ сла́сть, и҆ прилѣплѧ́емость, и҆ же́сткость послѣдѝ, и҆ сꙋ́ровость мꙋче́нїй ра́ди со́вѣсти. Ѻ҆ба́че ѿ ѻ҆тє́цъ смоко́вничнаѧ по́вѣсть здѣ̀ ᲂу҆миле́нїѧ ра́ди положи́сѧ, ꙗ҆́коже по́вѣсть і҆ѡ́сифа тогѡ̀ ра́ди, ꙗ҆́кѡ се́й но́ситъ ѡ҆́бразъ хрⷭ҇то́въ. Є҆́сть же смоко́вница всѧ́ка дꙋша̀, всѧ́кагѡ дꙋхо́внагѡ плода̀ неприча́стна: на не́йже ᲂу҆́трꙋ, сі́есть въ настоѧ́щей жи́зни, не ѡ҆брѣта́ѧ поко́ѧ ᲂу҆ неѧ̀, гдⷭ҇ь и҆зсꙋша́етъ ю҆̀ клѧ́твою и҆ въ вѣ́чный посыла́етъ ѻ҆́гнь: и҆ стои́тъ ꙗ҆́коже нѣ́кїй сто́лпъ и҆зсꙋше́нный, ᲂу҆страша́ѧй не дѣ́лающихъ подоба́ющагѡ плода̀ добродѣ́телей.

Прекра́снагѡ і҆ѡ́сифа мл҃твами, хрⷭ҇тѐ бж҃е, поми́лꙋй на́съ. А҆ми́нь.

Пѣ́снь и҃.

[Е] І҆рмо́съ: Оу҆страши́сѧ соѡбра́знагѡ дꙋшѝ, нескве́рнагѡ тѣ́ла ѻ҆трокѡ́въ бл҃гочести́выхъ, и҆ ᲂу҆страни́сѧ воспита́нный въ безмѣ́рнѣмъ веществѣ̀, непреста́нный ѻ҆́гнь. и҆з̾ꙋвѧ́дшꙋ же пла́мени, вѣ́чнꙋющаѧ пѣ́снь присноживꙋ́щемꙋ воспѣва́шесѧ: всѧ̑ дѣла̀, гдⷭ҇а по́йте и҆ превозноси́те во всѧ̑ вѣ́ки.

[Ѵ] Ва́съ тогда̀ мои́хъ ᲂу҆ч҃нкѡ́въ позна́ютъ всѝ, а҆́ще моѧ̑ за́пѡвѣди соблюдетѐ, глаго́летъ сп҃съ дрꙋгѡ́мъ, ко стрⷭ҇ти и҆ды́й: ми́ръ и҆мѣ́йте въ себѣ̀ и҆ во всѣ́хъ, и҆ смирє́ннаѧ мꙋ́дрствꙋюще возвы́ситесѧ: и҆ гдⷭ҇а зна́юще мѧ̀, по́йте и҆ превозноси́те во всѧ̑ вѣ́ки.

[Т] Чи́нꙋ ꙗ҆зы́ческомꙋ сопроти́вна да бꙋ́детъ въ ва́съ держа́ва над̾ кꙋпноро́дными: жре́бїй бо мо́й не госпо́дство, но и҆зволе́нїе самоизбра́нное. хотѧ́й ᲂу҆̀бо въ ва́съ вѧ́щшїй бы́ти дрꙋги́хъ, да бꙋ́детъ всѣ́хъ послѣ́днѣйшїй: и҆ гдⷭ҇а зна́юща мѧ̀, по́йте и҆ превозноси́те во всѧ̑ вѣ́ки.

Хва́лимъ, бл҃гослови́мъ, покланѧ́емсѧ гдⷭ҇еви:

И҆ па́ки і҆рмо́съ. Чтⷭ҇нѣ́йшꙋю не пое́мъ.

Пѣ́снь ѳ҃.

[Е] І҆рмо́съ: Возвели́чилъ є҆сѝ, хрⷭ҇тѐ, ро́ждшꙋю тѧ̀ бцⷣꙋ, ѿ неѧ́же, созда́телю на́шъ, въ подобостра́стное на́мъ ѡ҆бле́клсѧ є҆сѝ тѣ́ло, на̑ша прегрѣшє́нїѧ разрѣша́ющее: сїю̀ ᲂу҆бл҃жа́юще, всѝ ро́ди тебѐ велича́емъ.

[Р] Скве́рнꙋ всю̀ страстнꙋ́ю ѿри́нꙋвше, досто́йный бж҃е́ственнагѡ ца́рствїѧ ра́зꙋмъ бл҃гомꙋ́дрственный воспрїими́те, твои̑мъ а҆пⷭ҇лѡмъ предре́клъ є҆сѝ, всѣ́хъ премꙋ́дросте: въ не́мже просла́витесѧ, свѣтѧ́щесѧ со́лнца свѣтоза́рнѣе.

[А] Взира́юще на мѧ̀, ре́клъ є҆сѝ, гдⷭ҇и, твои̑мъ ᲂу҆ч҃нкѡ́мъ, не мꙋ́дрствꙋйте высѡ́каѧ, но послѣ́дꙋйте смирє́ннымъ: мою̀, ю҆́же пїю̀, пі́йте ча́шꙋ, ꙗ҆́кѡ да во црⷭ҇твїи ѻ҆ц҃а̀ со мно́ю просла́витесѧ.

Та́же і҆рмо́съ: Возвели́чилъ є҆сѝ, хрⷭ҇тѐ: И҆ покло́нъ до землѝ.

Є҆ѯапостїла́рїй глаго́лемъ три́жды, ко́снѡ и҆ со сладкопѣ́нїемъ. Се́й же глаго́летсѧ до вели́кагѡ четвертка̀, пое́тсѧ же посредѣ̀ це́ркве ѿ пѣвца̀, и҆ проти́вꙋ глаша́етсѧ ѿ на́съ:

Черто́гъ тво́й ви́ждꙋ, сп҃се мо́й, ᲂу҆краше́нный, и҆ ѡ҆де́жды не и҆́мамъ, да вни́дꙋ во́нь: просвѣтѝ ѡ҆дѣѧ́нїе дꙋшѝ моеѧ̀, свѣтода́вче, и҆ сп҃си́ мѧ.

На хвали́техъ стїхи̑ры самогла̑сны на д҃, гла́съ а҃:

Грѧды́й гдⷭ҇ь къ во́льнѣй стрⷭ҇ти, а҆пⷭ҇лѡмъ глаго́лаше на пꙋтѝ: сѐ восхо́димъ во і҆ерⷭ҇ли́мъ, и҆ пре́данъ бꙋ́детъ сн҃ъ чл҃вѣ́ческїй, ꙗ҆́коже є҆́сть пи́сано ѡ҆ не́мъ. прїиди́те ᲂу҆̀бо, и҆ мы̀, ѡ҆чище́нными смы̑слы, сше́ствꙋимъ є҆мꙋ̀, и҆ сраспне́мсѧ, и҆ ᲂу҆мертви́мсѧ є҆гѡ̀ ра́ди житє́йскимъ сласте́мъ, да и҆ ѡ҆живе́мъ съ ни́мъ, и҆ ᲂу҆слы́шимъ вопїю́ща є҆го̀: ᲂу҆жѐ не въ земны́й і҆ерⷭ҇ли́мъ на страда́нїе, но восхождꙋ̀ ко ѻ҆ц҃ꙋ̀ моемꙋ̀ и҆ ѻ҆ц҃ꙋ̀ ва́шемꙋ, и҆ бг҃ꙋ моемꙋ̀ и҆ бг҃ꙋ ва́шемꙋ, и҆ совозвыша́ю ва́съ въ го́рнїй і҆ерⷭ҇ли́мъ, въ црⷭ҇тво нбⷭ҇ное. [Два́жды].

Гла́съ є҃: Дости́гше, вѣ́рнїи, сп҃си́тельныѧ стрⷭ҇ти хрⷭ҇та̀ бг҃а неизрече́нное є҆гѡ̀ долготерпѣ́нїе просла́вимъ: ꙗ҆́кѡ да бл҃госе́рдїемъ свои́мъ совоздви́гнетъ и҆ на́съ ᲂу҆мерщвле́нныхъ грѣхо́мъ, ꙗ҆́кѡ бл҃гъ и҆ чл҃вѣколю́бецъ. [Два́жды].

Сла́ва, и҆ ны́нѣ, гла́съ то́йже.

Гдⷭ҇и, грѧды́й ко страда́нїю, твоѧ̑ ᲂу҆твержда́ѧ ᲂу҆ч҃нкѝ, глаго́лалъ є҆сѝ, ѡ҆со́бь пое́мь и҆̀хъ: ка́кѡ глагѡ́лъ мои́хъ не по́мните, ꙗ҆̀же пре́жде реко́хъ ва́мъ; ꙗ҆́кѡ всѧ́комꙋ прⷪ҇ро́кꙋ нѣ́сть пи́сано, а҆́ще не во і҆ерⷭ҇ли́мѣ ᲂу҆бїе́нꙋ бы́ти. ны́нѣ ᲂу҆̀бо вре́мѧ наста̀, є҆́же реко́хъ ва́мъ: се́ бо предаю́сѧ рꙋка́ма грѣ́шныхъ порꙋ́ганъ бы́ти, и҆̀же и҆ ко крⷭ҇тꙋ́ мѧ пригвозди́вше, и҆ погребе́нїю преда́вше, ѡ҆ме́рзена вмѣнѧ́тъ ꙗ҆́кѡ ме́ртва. ѻ҆ба́че дерза́йте: тридне́венъ бо воста́нꙋ въ ра́дость вѣ́рныхъ и҆ жи́знь вѣ́чнꙋю.

На стїхо́внѣ самогла́сенъ, гла́съ є҃:

Гдⷭ҇и, къ та́инствꙋ неизглаго́ланномꙋ твоегѡ̀ смотре́нїѧ не довлѣ́ющи сынѡ́въ зеведе́овыхъ ма́ти проша́ше ᲂу҆ тебє̀, вре́меннагѡ ца́рства по́чести дарова́тисѧ ча́дѡмъ є҆ѧ̀: но вмѣ́стѡ тоѧ̀, ча́шꙋ сме́рти ѡ҆бѣща́лъ є҆сѝ пи́ти дрꙋгѡ́мъ твои̑мъ, ю҆́же ча́шꙋ пре́жде си́хъ са́мъ пи́ти глаго́лалъ є҆сѝ, грѣхѡ́въ во ѡ҆чище́нїе. тѣ́мже тебѣ̀ вопїе́мъ: сп҃се́нїе дꙋ́шъ на́шихъ, сла́ва тебѣ̀.

Сті́хъ: И҆спо́лнихомсѧ заꙋ́тра млⷭ҇ти твоеѧ̀, гдⷭ҇и:

Гдⷭ҇и, совершє́ннѣйшаѧ мꙋ́дрствовати наставлѧ́ѧ твоѧ̑ ᲂу҆ч҃нкѝ, не ᲂу҆подо́битисѧ ꙗ҆зы́кѡмъ глаго́лалъ є҆сѝ, во є҆́же ѡ҆блада́ти ме́ньшими: не та́кѡ бо бꙋ́детъ ва́мъ мои̑мъ ᲂу҆ч҃нкѡ́мъ, ꙗ҆́кѡ во́лею ни́щь а҆́зъ є҆́смь. пе́рвый ᲂу҆̀бо въ ва́съ да бꙋ́детъ всѣ̑мъ слꙋга̀: нача́льствꙋѧй же, ꙗ҆́кѡ нача́льствꙋемый: вѧ́щшїй же, ꙗ҆́кѡ послѣ́днѣйшїй. и҆́бо прїидо́хъ са́мъ ѡ҆бнища́вшемꙋ а҆да́мꙋ послꙋжи́ти и҆ да́ти дꙋ́шꙋ мою̀ и҆збавле́нїе за мно́гихъ, вопїю́щихъ мѝ: сла́ва тебѣ̀.

Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ:

Гла́съ и҃: И҆зсо́хшїѧ за непло́дїе смоко́вницы преще́нїѧ ᲂу҆боѧ́вшесѧ, бра́тїе, плоды̀ достѡ́йны покаѧ́нїѧ принесе́мъ хрⷭ҇тꙋ̀, подаю́щемꙋ на́мъ ве́лїю млⷭ҇ть.

Сла́ва, и҆ ны́нѣ, гла́съ то́йже:

Вторꙋ́ю є҆́ѵꙋ ѡ҆брѣ́тъ є҆гѵ́птѧныню ѕмі́й глагѡ́лы, тща́шесѧ ласка́ньми запѧ́ти і҆ѡ́сифа: но то́й, ѡ҆ста́вивъ ри́зꙋ, бѣжа̀ грѣха̀ и҆ на́гъ не стыдѧ́шесѧ, ꙗ҆́коже первозда́нный пре́жде преслꙋша́нїѧ. тогѡ̀ мл҃твами, хрⷭ҇тѐ, поми́лꙋй на́съ.

Та́же: Бл҃го є҆́сть: И҆ прѡ́чаѧ по ѡ҆бы́чаю съ поклѡ́ны.

Та́же ѿпꙋ́стъ: Грѧды́й гдⷭ҇ь на во́льнꙋю стрⷭ҇ть, на́шегѡ ра́ди сп҃се́нїѧ, хрⷭ҇то́съ и҆́стинный:

Се́й же ѿпꙋ́стъ глаго́летсѧ во вто́рникъ и҆ въ сре́дꙋ.

[зрѝ] Вѣ́домо же бꙋ́ди, ꙗ҆́кѡ на а҃-мъ часѣ̀ и҆ ѳ҃-мъ ѱалти́рь не глаго́лемъ въ вели́кꙋю седми́цꙋ: но то́чїю глаго́лютсѧ трѝ ѱалмы̀, по ѡ҆бы́чаю. Тре́тїй же ча́съ и҆ шесты́й пое́мъ со ѱалти́рїю. Чте́тсѧ же и҆ четвероеѵⷢ҇лїе въ понедѣ́льникъ и҆ во вто́рникъ, и҆ въ сре́дꙋ зака́нчиваетсѧ.

При часѣ̀ г҃-мъ днѐ ᲂу҆дарѧ́етъ параекклисїа́рхъ въ би́ло, ꙗ҆́коже є҆́сть ѡ҆бы́чай. И҆ собра́вшесѧ во це́рковь, пое́мъ г҃-й ча́съ, съ каѳі́смою: и҆ твори́мъ ѡ҆бы̑чныѧ покло́ны. Та́же тропа́рь: Гдⷭ҇и, и҆́же прест҃а́го твоего̀ дх҃а: и҆ Бцⷣе, ты̀ є҆сѝ лоза̀: покло́ны г҃. И҆ а҆́бїе ᲂу҆кра́шенꙋ а҆нало́гїю, положа́тъ на не́мъ верхꙋ̀ ст҃о́е четвероеѵⷢ҇лїе, и҆ двѣма̀ лампа́дама возжже́ннама, всѣ̑мъ же стоѧ́щымъ со ѿкрове́нными глава́ми. Сщ҃е́нникъ же кади́тъ хра́мъ ве́сь и҆ бра́тїю. А҆ на ѕ҃-мъ часѣ̀ кади́тъ то́кмѡ є҆ѵⷢ҇лїе. На ѳ҃-мъ же часѣ̀ є҆ѵⷢ҇лїе кади́тъ, и҆ хра́мъ ве́сь, и҆ бра́тїю. И҆ та́кѡ чте́тъ є҆ѵⷢ҇лїе. По сконча́нїи же чте́нїѧ є҆ѵⷢ҇лїа глаго́лемъ: Гдⷭ҇ь бг҃ъ бл҃гослове́нъ: И҆ про́чее послѣ́дованїе. Глаго́летсѧ и҆ конда́къ днѐ: І҆а́кѡвъ рыда́ше: И҆ ѡ҆бы̑чныѧ покло́ны. И҆ а҆́бїе начина́емъ шесты́й ча́съ. Прїиди́те поклони́мсѧ: три́жды и҆ ѱалмы̀ ѡ҆бы̑чныѧ: каѳі́смꙋ рѧдовꙋ́ю. Та́же тропа́рь: И҆́же въ шесты́й де́нь же и҆ ча́съ: и҆ бг҃оро́диченъ: Ꙗ҆́кѡ не и҆́мамы дерзнове́нїѧ: и҆ покло́ны г҃.

Та́же тропа́рь прⷪ҇ро́чества, гла́съ ѕ҃:

Дꙋше́ю сокрꙋше́нною припа́даемъ тебѣ̀ и҆ мо́лимъ тѧ̀, сп҃се мі́ра: ты́ бо є҆сѝ бг҃ъ ка́ющихсѧ.

Сла́ва, и҆ ны́нѣ, то́йже.

Прокі́менъ, ѱало́мъ рк҃є, гла́съ д҃: Внегда̀ возврати́ти гдⷭ҇ꙋ плѣ́нъ сїѡ́нь. Сті́хъ: Тогда̀ и҆спо́лнишасѧ ра́дости ᲂу҆ста̀ на̑ша.

Прⷪ҇ро́чества і҆езекїи́лева чте́нїе. [Глава̀ а҃, ст. а҃-к҃].

Бы́сть въ тридесѧ́тое лѣ́то, въ четве́ртый мѣ́сѧцъ, въ пѧ́тый де́нь мѣ́сѧца, и҆ а҆́зъ бы́хъ посредѣ̀ плѣне́нїѧ при рѣцѣ̀ хова́ръ: и҆ ѿверзо́шасѧ нб҃са̀, и҆ ви́дѣхъ видѣ̑нїѧ бж҃їѧ. Въ пѧ́тый де́нь мѣ́сѧца: сїѐ лѣ́то пѧ́тое плѣне́нїѧ царѧ̀ і҆ѡакі́ма: и҆ бы́сть сло́во гдⷭ҇не ко і҆езекі́илю сы́нꙋ вꙋзі́евꙋ, сщ҃е́нникꙋ, въ землѝ халде́йстѣй при рѣцѣ̀ хова́ръ. И҆ бы́сть на мнѣ̀ рꙋка̀ гдⷭ҇нѧ, и҆ ви́дѣхъ, и҆ сѐ дх҃ъ воздвиза́ѧйсѧ грѧдѧ́ше ѿ сѣ́вера, и҆ ѡ҆́блакъ вели́кїй въ не́мъ, и҆ свѣ́тъ ѻ҆́крестъ є҆гѡ̀ и҆ ѻ҆́гнь блиста́ѧйсѧ: и҆ посредѣ̀ є҆гѡ̀ ꙗ҆́кѡ видѣ́нїе и҆ле́ктра посредѣ̀ ѻ҆гнѧ̀, и҆ свѣ́тъ въ не́мъ: и҆ посредѣ̀ ꙗ҆́кѡ подо́бїе четы́рехъ живо́тныхъ: И҆ сїѐ видѣ́нїе и҆́хъ, ꙗ҆́кѡ подо́бїе человѣ́ка въ ни́хъ. И҆ четы́ре ли́ца є҆ди́номꙋ, и҆ четы́ре кри́ла є҆ди́номꙋ: и҆ го́лєни и҆́хъ пра́вы, и҆ перна̑ты но́ги и҆́хъ, и҆ и҆́скры ꙗ҆́кѡ блиста́ющаѧсѧ мѣ́дь, и҆ лє́гка кри́ла и҆́хъ: и҆ рꙋка̀ человѣ́ча под̾ кри́лами и҆́хъ на четы́рехъ страна́хъ и҆́хъ: и҆ ли́ца и҆́хъ, и҆ кри́ла и҆́хъ четы́рехъ держа̑щаѧсѧ дрꙋ́гъ дрꙋ́га: ли́ца же и҆́хъ четы́рехъ не ѡ҆браща́хꙋсѧ, внегда̀ ходи́ти и҆̀мъ: ко́еждо прѧ́мѡ лица̀ своегѡ̀ хожда́хꙋ. И҆ подо́бїе ли́цъ и҆́хъ, лицѐ человѣ́чее, и҆ лицѐ льво́во ѡ҆деснꙋ́ю четы́ремъ, и҆ лицѐ те́льчее ѡ҆шꙋ́юю четы́ремъ, и҆ лицѐ ѻ҆́рлее четы́ремъ. [И҆ ли́ца и҆́хъ] и҆ кри́ла и҆́хъ простє́рта свы́ше четы́ремъ, коемꙋ́ждо два̀ сопрѧжє́на дрꙋ́гъ ко дрꙋ́гꙋ, и҆ два̀ покрыва́хꙋ верхꙋ̀ тѣлесѐ и҆́хъ, и҆ ко́еждо прѧ́мѡ лицꙋ̀ своемꙋ̀ и҆дѧ́ше: и҆дѣ́же а҆́ще бѧ́ше дх҃ъ ше́ствꙋѧй, и҆дѧ́хꙋ, и҆ не ѡ҆браща́хꙋсѧ. И҆ посредѣ̀ живо́тныхъ видѣ́нїе, ꙗ҆́кѡ ᲂу҆́глїѧ ѻ҆гнѧ̀ горѧ́щагѡ, ꙗ҆́кѡ видѣ́нїе свѣ́щъ соѡбраща́ющихсѧ посредѣ̀ живо́тныхъ, и҆ свѣ́тъ ѻ҆гнѧ̀, и҆ ѿ ѻ҆гнѧ̀ и҆схожда́ше ꙗ҆́кѡ мо́лнїѧ. И҆ живѡ́тныѧ теча́хꙋ, и҆ ѡ҆браща́хꙋсѧ, ꙗ҆́кѡ видѣ́нїе ꙾везе́ково꙾⁵: И҆ ви́дѣхъ, и҆ сѐ ко́ло є҆ди́но на землѝ держа́щеесѧ живо́тныхъ четы́рехъ: и҆ видѣ́нїе коле́съ, и҆ сотворе́нїе и҆́хъ, ꙗ҆́кѡ видѣ́нїе ѳарсі́са, и҆ подо́бїе є҆ди́но четы́ремъ: и҆ дѣ́ло и҆́хъ бѧ́ше, ꙗ҆́коже а҆́ще бы бы́ло ко́ло въ колесѝ. На четы́ри страны̑ и҆́хъ ше́ствовахꙋ: не ѡ҆браща́хꙋсѧ, внегда̀ ше́ствовати и҆̀мъ, нижѐ хребты̀ и҆́хъ, и҆ высота̀ бѧ́ше и҆̀мъ. И҆ ви́дѣхъ та̑, и҆ плєщѝ и҆́хъ и҆спо́лнены ѻ҆че́съ ѡ҆́крестъ четы́ремъ. И҆ внегда̀ ше́ствовати живѡ́тнымъ, ше́ствовахꙋ и҆ коле́са держа̑щасѧ и҆́хъ: и҆ внегда̀ воздвиза́тисѧ живѡ́тнымъ ѿ землѝ, воздвиза́хꙋсѧ и҆ коле́са. И҆дѣ́же а҆́ще бѧ́ше ѡ҆́блакъ, та́мѡ бѧ́ше и҆ дх҃ъ, є҆́же ше́ствовати: ше́ствовахꙋ и҆ живѡ́тнаѧ, и҆ коле́са воздвиза́хꙋсѧ съ ни́ми, занѐ дх҃ъ жи́зни бѧ́ше въ колесѣ́хъ.

꙾блиста́нїѧ꙾

Прокі́менъ, ѱало́мъ рк҃ѕ, гла́съ д҃: А҆́ще не гдⷭ҇ь сози́ждетъ до́мъ, всꙋ́е трꙋди́шасѧ зи́ждꙋщїи. Сті́хъ: А҆́ще не гдⷭ҇ь сохрани́тъ гра́дъ, всꙋ́е бдѣ̀ стрегі́й. И҆ чте́тсѧ є҆ѵⷢ҇лїе, по предпи́санномꙋ чи́нꙋ. По чте́нїи же, Ско́рѡ да предварѧ́тъ ны̀ щедро́ты твоѧ̑, гдⷭ҇и: Трист҃о́е, съ поклѡ́ны. По Ѻ҆́ч҃е на́шъ: конда́къ днѐ. Гдⷭ҇и, поми́лꙋй, м҃. И҆ про́чее по ѻ҆бы́чаю, и҆ ѿпꙋ́стъ.

[зрѝ] Вѣ́домо же бꙋ́ди, ꙗ҆́кѡ є҆ѵⷢ҇лїе ѿ матѳе́а всѐ чте́тсѧ, подо́бнѣ и҆ ѿ ма́рка, и҆ ѿ лꙋкѝ: ѿ і҆ѡа́нна же чте́тсѧ до нача́ла ст҃ы́хъ стрⷭ҇те́й, сі́есть до Ны́нѣ просла́висѧ сн҃ъ чл҃вѣ́ческїй: Чте́тсѧ же та́кѡ въ тре́хъ дне́хъ, си́рѣчь въ понедѣ́льникъ, во вто́рникъ, въ сре́дꙋ: и҆ зака́нчиваетсѧ въ сре́дꙋ на ѳ҃-мъ часѣ̀. Быва́ютъ же ѿ лꙋкѝ чтє́нїѧ трѝ: прѡ́чаѧ же по два̀. Вкꙋ́пѣ всѣ́хъ чте́нїй де́вѧть, и҆ вѧ́щше ничто́же. Девѧ́тый же ча́съ тре́хъ дне́й стїхосло́вїѧ не и҆́мать, ꙗ҆́коже рече́сѧ. Но по триѱа́лмїи пое́тсѧ ѿ ᲂу҆чине́ннагѡ мона́ха: И҆́же въ девѧ́тый ча́съ: Сла́ва, и҆ ны́нѣ: И҆́же на́съ ра́ди рожде́йсѧ ѿ дв҃ы: И҆ быва́етъ чте́нїе въ четвероеѵⷢ҇лїи, по не́мже глаго́лемъ: Не преда́ждь на́съ до конца̀: Трист҃о́е, съ поклѡ́ны. По Ѻ҆́ч҃е на́шъ: конда́къ днѐ. Во црⷭ҇твїи твое́мъ: И҆ про́чее послѣ́дованїе, ꙗ҆́кѡ ѡ҆бы́чно: глаго́лемъ же и҆ конда́къ днѐ. Присовокꙋплѧ́емъ же и҆ вече́рню.

Во ст҃ы́й и҆ вели́кїй понедѣ́льникъ ве́чера,

по предначина́тельнѣмъ ѱалмѣ̀ ѡ҆бы́чное стїхосло́вїе: Ко гдⷭ҇ꙋ, внегда̀ скорбѣ́ти мѝ, воззва́хъ: На Гдⷭ҇и воззва́хъ, поста́вимъ стїхѡ́въ і҃, и҆ пое́мъ стїхи̑ры самогла̑сны днѐ, д҃ по два́жды, а҆ двѣ̀ по є҆ди́ножды. Гла́съ а҃:

Грѧды́й гдⷭ҇ь къ во́льнѣй стрⷭ҇ти, а҆пⷭ҇лѡмъ глаго́лаше на пꙋтѝ: сѐ восхо́димъ во і҆ерⷭ҇ли́мъ, и҆ пре́данъ бꙋ́детъ сн҃ъ чл҃вѣ́ческїй, ꙗ҆́коже є҆́сть пи́сано ѡ҆ не́мъ. прїиди́те ᲂу҆̀бо, и҆ мы̀, ѡ҆чище́нными смы̑слы, сше́ствꙋимъ є҆мꙋ̀, и҆ сраспне́мсѧ, и҆ ᲂу҆мертви́мсѧ є҆гѡ̀ ра́ди житє́йскимъ сласте́мъ, да и҆ ѡ҆живе́мъ съ ни́мъ, и҆ ᲂу҆слы́шимъ вопїю́ща є҆го̀: ᲂу҆жѐ не въ земны́й і҆ерⷭ҇ли́мъ на страда́нїе: но восхождꙋ̀ ко ѻ҆ц҃ꙋ̀ моемꙋ̀ и҆ ѻ҆ц҃ꙋ̀ ва́шемꙋ, и҆ бг҃ꙋ моемꙋ̀ и҆ бг҃ꙋ ва́шемꙋ, и҆ совозвыша́ю ва́съ въ го́рнїй і҆ерⷭ҇ли́мъ, въ црⷭ҇тво нбⷭ҇ное. [Два́жды].

Гла́съ є҃: Дости́гше, вѣ́рнїи, сп҃си́тельныѧ стрⷭ҇ти хрⷭ҇та̀ бг҃а, неизрече́нное є҆гѡ̀ долготерпѣ́нїе просла́вимъ: ꙗ҆́кѡ да бл҃госе́рдїемъ свои́мъ совоздви́гнетъ и҆ на́съ ᲂу҆мерщвле́нныхъ грѣхо́мъ, ꙗ҆́кѡ бл҃гъ и҆ чл҃вѣколю́бецъ. [Два́жды].

Гдⷭ҇и, грѧды́й ко страда́нїю, твоѧ̑ ᲂу҆твержда́ѧ ᲂу҆ч҃нкѝ, глаго́лалъ є҆сѝ, ѡ҆со́бь пое́мь и҆̀хъ: ка́кѡ глагѡ́лъ мои́хъ не по́мните, ꙗ҆̀же пре́жде реко́хъ ва́мъ; ꙗ҆́кѡ всѧ́комꙋ прⷪ҇ро́кꙋ нѣ́сть пи́сано, а҆́ще не во і҆ерⷭ҇ли́мѣ ᲂу҆бїе́нꙋ бы́ти. ны́нѣ ᲂу҆̀бо вре́мѧ наста̀, є҆́же реко́хъ ва́мъ: се́ бо предаю́сѧ рꙋка́ма грѣ́шныхъ порꙋ́ганъ бы́ти, и҆̀же и҆ ко крⷭ҇тꙋ́ мѧ пригвозди́вше, и҆ погребе́нїю преда́вше, ѡ҆ме́рзена вмѣнѧ́тъ ꙗ҆́кѡ ме́ртва. ѻ҆ба́че дерза́йте: тридне́венъ бо воста́нꙋ въ ра́дость вѣ́рныхъ и҆ жи́знь вѣ́чнꙋю. [Два́жды].

Гдⷭ҇и, къ та́инствꙋ неизглаго́ланномꙋ твоегѡ̀ смотре́нїѧ не довлѣ́ющи, сынѡ́въ зеведе́овыхъ ма́ти проша́ше ᲂу҆ тебє̀, вре́меннагѡ ца́рства по́чести дарова́тисѧ ча́дѡмъ є҆ѧ̀: но вмѣ́стѡ тоѧ̀, ча́шꙋ сме́рти ѡ҆бѣща́лъ є҆сѝ пи́ти дрꙋгѡ́мъ твои̑мъ: ю҆́же ча́шꙋ пре́жде си́хъ са́мъ пи́ти глаго́лалъ є҆сѝ, ѿ грѣхѡ́въ ѡ҆чища́ющꙋю. тѣ́мже тебѣ̀ вопїе́мъ: сп҃се́нїе дꙋ́шъ на́шихъ, сла́ва тебѣ̀. [Два́жды].

Гдⷭ҇и, совершє́ннѣйшаѧ мꙋ́дрствовати наставлѧ́ѧ твоѧ̑ ᲂу҆ч҃нкѝ, не ᲂу҆подо́битисѧ ꙗ҆зы́кѡмъ глаго́лалъ є҆сѝ, во є҆́же ѡ҆блада́ти ме́ньшими: не та́кѡ бо бꙋ́детъ ва́мъ мои̑мъ ᲂу҆ч҃нкѡ́мъ, ꙗ҆́кѡ во́лею ни́щь а҆́зъ є҆́смь. пе́рвый ᲂу҆̀бо въ ва́съ да бꙋ́детъ всѣ̑мъ слꙋга̀: нача́льствꙋѧй же, ꙗ҆́кѡ нача́льствꙋемый: вѧ́щшїй же, ꙗ҆́кѡ послѣ́днѣйшїй. и҆́бо прїидо́хъ са́мъ ѡ҆бнища́вшемꙋ а҆да́мꙋ послꙋжи́ти и҆ да́ти дꙋ́шꙋ мою̀ и҆збавле́нїе за мно́гихъ, вопїю́щихъ мѝ: сла́ва тебѣ̀.

Гла́съ и҃: И҆зсо́хшїѧ за непло́дїе смоко́вницы преще́нїѧ ᲂу҆боѧ́вшесѧ, бра́тїе, плоды̀ достѡ́йны покаѧ́нїѧ принесе́мъ хрⷭ҇тꙋ̀, подаю́щемꙋ на́мъ ве́лїю млⷭ҇ть.

Сла́ва, и҆ ны́нѣ, гла́съ то́йже: Вторꙋ́ю є҆́ѵꙋ ѡ҆брѣ́тъ є҆гѵ́птѧныню ѕмі́й глагѡ́лы, тща́шесѧ ласка́ньми запѧ́ти і҆ѡ́сифа: но то́й, ѡ҆ста́вивъ ри́зꙋ, бѣжа̀ грѣха̀, и҆ на́гъ не стыдѧ́шесѧ, ꙗ҆́коже первозда́нный пре́жде преслꙋша́нїѧ. тогѡ̀ мл҃твами, хрⷭ҇тѐ, поми́лꙋй на́съ.

Та́же вхо́дъ со є҆ѵⷢ҇лїемъ. Свѣ́те ти́хїй:

Прокі́менъ, ѱало́мъ рк҃з. Гла́съ ѕ҃: Бл҃гослови́тъ тѧ̀ гдⷭ҇ь ѿ сїѡ́на, и҆ ᲂу҆́зриши бл҃га̑ѧ і҆ерⷭ҇ли́ма. Сті́хъ: Бл҃же́ни всѝ боѧ́щїисѧ гдⷭ҇а, ходѧ́щїи въ пꙋте́хъ є҆гѡ̀.

И҆схо́да чте́нїе. [Глава̀, а҃, ст. а҃-к҃].

Сїѧ̑ и҆мена̀ сынѡ́въ і҆и҃левыхъ, входѧ́щихъ во є҆гѵ́петъ вкꙋ́пѣ со і҆а́кѡвомъ ѻ҆тце́мъ и҆́хъ, кі́йждо со всѣ́мъ до́момъ свои́мъ внидо́ша: рꙋви́мъ, сѷмеѡ́нъ, леві́й, і҆ꙋ́да, і҆ссаха́ръ, завꙋлѡ́нъ и҆ венїамі́нъ, да́нъ и҆ нефѳалі́мъ, га́дъ и҆ а҆си́ръ: і҆ѡ́сифъ же бѧ́ше во є҆гѵ́птѣ. Бѧ́ше же всѣ́хъ дꙋ́шъ, и҆зше́дшихъ и҆з̾ і҆а́кѡва, се́дмьдесѧтъ пѧ́ть. Оу҆́мре же і҆ѡ́сифъ, и҆ всѧ̑ бра́тїѧ є҆гѡ̀, и҆ ве́сь ро́дъ ѻ҆́ный. Сы́нове же і҆и҃левы возрасто́ша, и҆ ᲂу҆мно́жишасѧ, и҆ мно́зи бы́ша, и҆ ᲂу҆крѣпи́шасѧ ѕѣлѡ̀ ѕѣлѡ̀: ᲂу҆мно́жи же и҆̀хъ землѧ̀. Воста́ же ца́рь и҆́нъ во є҆гѵ́птѣ, и҆́же не зна́ше і҆ѡ́сифа. Рече́ же ꙗ҆зы́кꙋ своемꙋ̀: сѐ ро́дъ сынѡ́въ і҆и҃левыхъ вели́кое мно́жество, и҆ ᲂу҆крѣплѧ́етсѧ па́че на́съ: прїиди́те ᲂу҆̀бо, прехи́тримъ и҆̀хъ, да не когда̀ ᲂу҆мно́жатсѧ: и҆ є҆гда̀ а҆́ще приключи́тсѧ на́мъ бра́нь, приложа́тсѧ и҆ сі́и къ сꙋпоста́тѡмъ, и҆ ѡ҆долѣ́вше на́мъ, и҆зы́дꙋтъ и҆з̾ землѝ [на́шеѧ]. И҆ приста́ви над̾ ни́ми приста́вники дѣ́лъ, да ѡ҆ѕло́бѧтъ и҆̀хъ въ дѣ́лѣхъ. И҆ созда́ша гра́ды твє́рды фараѡ́нꙋ, пїѳѡ̀, и҆ рамессѝ, и҆ ѡ҆́нъ, и҆́же є҆́сть и҆лїопо́ль. По єли́кꙋ же и҆̀хъ смирѧ́хꙋ, толи́кѡ мно́жайшїи быва́хꙋ, и҆ ᲂу҆крѣплѧ́хꙋсѧ ѕѣлѡ̀ ѕѣлѡ̀. И҆ гнꙋша́хꙋсѧ є҆гѵ́птѧне сынмѝ і҆и҃левыми, и҆ наси́лїе творѧ́хꙋ є҆гѵ́птѧне сынѡ́мъ і҆и҃лєвымъ нꙋ́ждею, и҆ болѣ́зненꙋ тѣ̑мъ жи́знь творѧ́хꙋ въ дѣ́лѣхъ жесто́кихъ, бре́нїемъ, и҆ плїнѳодѣ́ланїемъ, и҆ всѣ́ми дѣ́лы, ꙗ҆̀же въ полѧ́хъ, во всѣ́хъ дѣ́лѣхъ, и҆́миже порабоща́хꙋ и҆̀хъ съ нꙋ́ждею. И҆ речѐ ца́рь є҆гѵ́петскїй ба́бамъ є҆врє́йскимъ, є҆ди́нѣй и҆́хъ и҆́мѧ сепфѡ́ра, и҆ и҆́мѧ второ́й фꙋ́а. И҆ речѐ [и҆̀мъ]: є҆гда̀ ба́бите є҆вре́анынѧмъ, и҆ сꙋ́ть къ рожде́нїю, а҆́ще ᲂу҆́бѡ мꙋ́жескїй по́лъ бꙋ́детъ, ᲂу҆бива́йте є҆го̀: а҆́ще же же́нскїй, снабдѣва́йте є҆го̀. Оу҆боѧ́шасѧ же ба̑бы бг҃а, и҆ не сотвори́ша, ꙗ҆́коже повелѣ̀ и҆̀мъ ца́рь є҆гѵ́петскїй, и҆ живлѧ́хꙋ мꙋ́жескїй по́лъ. Призва́ же ца́рь є҆гѵ́петскїй ба̑бы, и҆ речѐ и҆̀мъ: что̀ ꙗ҆́кѡ сотвори́сте сїю̀ и҆ ѡ҆живлѧ́ете мꙋ́жескїй по́лъ; Реко́ша же ба̑бы фараѡ́нꙋ: не ꙗ҆́кѡ жєны̀ є҆гѵ́птѧныни, та́кѡ и҆ жєны̀ є҆врє́аныни: ражда́ютъ бо пре́жде не́же вни́ти къ ни́мъ ба́бамъ, и҆ ражда́хꙋ. Бл҃го же творѧ́ще бг҃ъ ба́бамъ: и҆ мно́жахꙋсѧ лю́дїе, и҆ ᲂу҆крѣплѧ́хꙋсѧ ѕѣлѡ̀.

Прокі́менъ, ѱало́мъ рк҃и, гла́съ ѕ҃: Бл҃гослови́хомъ вы̀ во и҆́мѧ гдⷭ҇не. Сті́хъ: Мно́жицею бра́шасѧ со мно́ю ѿ ю҆́ности моеѧ̀.

І҆́ѡва чте́нїе. [Глава̀ а҃, ст. а҃-в҃і].

Человѣ́къ нѣ́кїй бѧ́ше во странѣ̀ а҆ѵсїтїді́йстѣй, є҆мꙋ́же и҆́мѧ і҆́ѡвъ: и҆ бѣ̀ человѣ́къ ѻ҆́нъ и҆́стиненъ, непоро́ченъ, пра́веденъ, бг҃очести́въ, ᲂу҆далѧ́ѧйсѧ ѿ всѧ́кїѧ лꙋка́выѧ ве́щи. Бы́ша же є҆мꙋ̀ сы́нове се́дмь и҆ дщє́ри трѝ. И҆ бѧ́хꙋ ско́ти є҆гѡ̀, ѻ҆ве́цъ се́дмь ты́сѧщъ, вельблю́дѡвъ трѝ ты́сѧщи, сꙋпрꙋ̑гъ волѡ́въ пѧ́ть сѡ́тъ, и҆ ѻ҆сли́цъ пасо́мыхъ пѧ́ть сѡ́тъ, и҆ слꙋ́гъ мно́гѡ ѕѣлѡ̀, и҆ дѣла̀ вє́лїѧ бѧ́хꙋ є҆мꙋ̀ на землѝ: и҆ бѣ̀ человѣ́къ ѻ҆́ный бл҃горо́днѣйшїй сꙋ́щихъ ѿ востѡ́къ со́лнца. Сходѧ́щесѧ же сы́нове є҆гѡ̀ дрꙋ́гъ ко дрꙋ́гꙋ, творѧ́хꙋ пи́ръ на кі́йждо де́нь, спое́млюще вкꙋ́пѣ и҆ трѝ сєстры̀ своѧ̑, ꙗ҆́сти и҆ пи́ти съ ни́ми. И҆ є҆гда̀ скончава́хꙋсѧ дні́е пи́ра, посыла́ше і҆́ѡвъ, и҆ ѡ҆чища́ше и҆̀хъ, востаѧ̀ заꙋ́тра: и҆ приноша́ше ѡ҆ ни́хъ жє́ртвы по числꙋ̀ и҆́хъ, и҆ тельца̀ є҆ди́наго ѡ҆ грѣсѣ̀, ѡ҆ дꙋша́хъ и҆́хъ. Глаго́лаше бо і҆́ѡвъ: не́гли когда̀ сы́нове моѝ согрѣши́ша, и҆ въ мы́сли свое́й ѕла̑ѧ помы́слиша проти́вꙋ бг҃а. Та́кѡ ᲂу҆̀бо творѧ́ше і҆́ѡвъ всѧ̑ дни̑. И҆ бы́сть ꙗ҆́кѡ де́нь се́й, и҆ сѐ прїидо́ша а҆́гг҃ли бж҃їи предста́ти пред̾ гдⷭ҇емъ: и҆ дїа́волъ прїи́де съ ни́ми. И҆ речѐ гдⷭ҇ь дїа́волꙋ: ѿкꙋ́дꙋ прише́лъ є҆сѝ; И҆ ѿвѣща́въ дїа́волъ гдⷭ҇еви, речѐ: ѡ҆бше́дъ зе́млю и҆ проше́дъ поднебе́снꙋю, сѐ є҆́смь. И҆ речѐ є҆мꙋ̀ гдⷭ҇ь: внѧ́лъ ли є҆сѝ мы́слїю твое́ю на раба̀ моего̀ і҆́ѡва; занѐ нѣ́сть, ꙗ҆́кѡ ѻ҆́нъ, на землѝ человѣ́къ непоро́ченъ, и҆́стиненъ, бг҃очести́въ, ᲂу҆далѧ́ѧйсѧ ѿ всѧ́кїѧ лꙋка́выѧ ве́щи. Ѿвѣща́ же дїа́волъ и҆ речѐ пред̾ гдⷭ҇емъ: є҆да̀ тꙋ́не і҆́ѡвъ чти́тъ гдⷭ҇а; не ты́ ли ѡ҆гради́лъ є҆сѝ внѣ̑шнѧѧ є҆гѡ̀, и҆ внꙋ́трєннѧѧ до́мꙋ є҆гѡ̀, и҆ ꙗ҆̀же внѣ̀ всѣ́хъ сꙋ́щихъ є҆гѡ̀ ѡ҆́крестъ; дѣла́ же рꙋкꙋ̀ є҆гѡ̀ бл҃гослови́лъ є҆сѝ, и҆ скоты̀ є҆гѡ̀ мнѡ́ги сотвори́лъ є҆сѝ на землѝ: но послѝ рꙋ́кꙋ твою̀, и҆ косни́сѧ всѣ́хъ, ꙗ҆̀же и҆́мать: а҆́ще не въ лице́ тѧ бл҃гослови́тъ. Тогда̀ речѐ гдⷭ҇ь дїа́волꙋ: сѐ всѧ̑, є҆ли̑ка сꙋ́ть є҆мꙋ̀, даю̀ въ рꙋ́кꙋ твою̀, но самогѡ̀ да не ко́снешисѧ. И҆ и҆зы́де дїа́волъ ѿ гдⷭ҇а.

Та́же: Да и҆спра́витсѧ мл҃тва моѧ̀: И҆ посе́мъ є҆ѵⷢ҇лїе ѿ матѳе́а, зача́ло ч҃и: Во вре́мѧ ѻ҆́но, сѣдѧ́щꙋ і҆и҃сꙋ: и҆ про́чее послѣ́дованїе преждеѡсщ҃е́нныхъ, по ѡ҆бы́чаю. Та́кѡ до́лженствꙋетъ бы́ти и҆ въ вели́кїй вто́рникъ, и҆ въ вели́кꙋю сре́дꙋ. А҆́ще же нѣ́сть преждеѡсщ҃е́нныѧ: пое́мъ на Гдⷭ҇и воззва́хъ, полови́нꙋ ѿ стїхи́ръ, на ѕ҃. Стїхи́ра гла́съ а҃: Грѧды́й гдⷭ҇ь къ во́льнѣй стрⷭ҇ти: два́жды. Гла́съ є҃: Дости́гше, вѣ́рнїи: два́жды. Гдⷭ҇и, къ та́инствꙋ неизглаго́ланномꙋ: два́жды. Сла́ва, и҆ ны́нѣ: Гдⷭ҇и, грѧды́й ко страда́нїю: По си́хъ вхо́дъ съ є҆ѵⷢ҇лїемъ: и҆ Свѣ́те ти́хїй: Та́же прокі́менъ, и҆ парїмі̑и, и҆ є҆ѵⷢ҇лїе. Та́же: Сподо́би, гдⷭ҇и: И҆ є҆ктенїа̀: И҆спо́лнимъ вече́рнюю: На стїхо́внѣ, ѿ тѣ́хже стїхи́ръ, стїхи́ра, гла́съ є҃: Гдⷭ҇и, совершє́ннѣйшаѧ мꙋ́дрствовати: Сті́хъ: Къ тебѣ̀ возведо́хъ ѻ҆́чи моѝ: И҆ па́ки тꙋ́южде стїхи́рꙋ. Сті́хъ: Поми́лꙋй на́съ, гдⷭ҇и: Гла́съ и҃: И҆зсо́хшїѧ за непло́дїе: Сла́ва, и҆ ны́нѣ, гла́съ то́йже: Вторꙋ́ю є҆́ѵꙋ: Та́же: Ны́нѣ ѿпꙋща́еши: И҆ прѡ́чаѧ ѡ҆бы̑чнаѧ съ поклѡ́ны. И҆ по коне́чнѣмъ трист҃о́мъ, и҆ по Ѻ҆́ч҃е на́шъ: Гдⷭ҇и, поми́лꙋй, в҃і. Та́же, мл҃тва: Всест҃а́ѧ трⷪ҇це: и҆ Бꙋ́ди и҆́мѧ гдⷭ҇не: И҆ ѿпꙋ́стъ.

Си́це ᲂу҆́бѡ твори́мъ во вто́рникъ и҆ въ сре́дꙋ.

[зрѝ] На трапе́зѣ же ꙗ҆ди́мъ сꙋхоѧде́нїе, и҆ си́мъ ᲂу҆довлѧ́емсѧ. И҆ ꙗ҆́коже въ пе́рвꙋю седми́цꙋ ст҃а́гѡ сегѡ̀ поста̀, си́це и҆ въ сїѧ̑ дни̑, въ вели́кїй понедѣ́льникъ, во вто́рникъ и҆ въ сре́дꙋ, пости́тисѧ подоба́етъ.

[зрѝ] Вѣ́дати бо подоба́етъ, ꙗ҆́кѡ и҆ шесты́й вели́кїй собо́ръ повелѣ̀, сп҃си́тельныѧ стрⷭ҇ти дни̑ въ постѣ̀ и҆ мл҃твѣ и҆ ᲂу҆миле́нїи се́рдца сотворѧ́ти вѣ̑рнымъ, въ полꙋ́нощи же вели́кїѧ сꙋббѡ́ты ѡ҆ставлѧ́ти по́стъ, бж҃е́ствєннымъ є҆ѵⷢ҇лі́стѡмъ матѳе́ю и҆ лꙋцѣ̀: ѻ҆́вомꙋ ᲂу҆́бѡ по́здѣ въ сꙋббѡ́тꙋ глаго́ланїемъ, ѻ҆́вомꙋ же ᲂу҆́тромъ глꙋбо́кимъ, ме́длемое на́мъ но́щи написꙋ́ющымъ.