Лазарева Суббота
Въ сꙋббѡ́тꙋ ст҃а́гѡ и҆ првⷣнагѡ ла́зарѧ
на полꙋ́нощницѣ,
на пе́рвомъ трист҃о́мъ, по Ѻ҆́ч҃е на́шъ: Тропа́рь: Ѻ҆́бщее воскрⷭ҇нїе: На послѣ́днемъ трист҃о́мъ, по Ѻ҆́ч҃е на́шъ: Конда́къ: Всѣ́хъ ра́дость хрⷭ҇то́съ: Гдⷭ҇и, поми́лꙋй, в҃і. И҆ ѿпꙋ́стъ. Мл҃твы же: Помѧнѝ, гдⷭ҇и: не глаго́лемъ.
На ᲂу҆́трени, на Бг҃ъ гдⷭ҇ь, тропа́рь, гла́съ а҃:
Ѻ҆́бщее воскрⷭ҇нїе пре́жде твоеѧ̀ стрⷭ҇ти ᲂу҆вѣрѧ́ѧ, и҆з̾ ме́ртвыхъ воздви́глъ є҆сѝ ла́зарѧ, хрⷭ҇тѐ бж҃е. тѣ́мже и҆ мы̀, ꙗ҆́кѡ ѻ҆́троцы побѣ́ды зна́мєнїѧ носѧ́ще, тебѣ̀ побѣди́телю сме́рти вопїе́мъ: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не. [Три́жды].
Та́же, стїхосло́вїе: Речѐ гдⷭ҇ь гдⷭ҇еви моемꙋ̀:
По а҃-мъ стїхосло́вїи сѣда́ленъ, гла́съ а҃.
Подо́бенъ: Ка́мени запеча́танꙋ:
Оу҆ще́дривъ ма̑рѳины и҆ марі̑ины сле́зы, ѿвали́ти ка́мень ѿ гро́ба повелѣ́лъ є҆сѝ, хрⷭ҇тѐ бж҃е: воскреси́лъ є҆сѝ возгласи́въ ме́ртваго, жизнода́вче, си́мъ ᲂу҆вѣрѧ́ѧ мі́ра воскрⷭ҇нїе. сла́ва си́лѣ твое́й, сп҃се: сла́ва вла́сти твое́й: сла́ва сло́вомъ всѧ̑ соста́вившемꙋ.
Сла́ва, и҆ ны́нѣ, то́йже:
Та́же стїхосло́вимъ непоро́чны.
И҆ пое́мъ тропарѝ воскрⷭ҇ны: Бл҃гослове́нъ є҆сѝ, гдⷭ҇и: А҆́гг҃льскїй собо́ръ: И҆ прѡ́чаѧ, ꙗ҆́кѡ ѡ҆бы́чай є҆́сть въ недѣ́лю.
Пото́мъ сѣда́ленъ, гла́съ є҃.
Подо́бенъ: Собезнача́льное сло́во:
И҆сто́чниче премꙋ́дрости и҆ предвѣ́дѣнїѧ, во виѳа́нїи сы́й, съ ма́рѳою сꙋ́щихъ вопроша́лъ є҆сѝ, вопїѧ̀: гдѣ̀ положи́сте дрꙋ́га ла́зарѧ; ѡ҆ не́мже прослези́всѧ сострада́тельнѣ, четверодне́вна ме́ртва воскреси́лъ є҆сѝ гла́сомъ твои́мъ, чл҃вѣколю́бче и҆ ще́дре, ꙗ҆́кѡ жизнода́вецъ и҆ гдⷭ҇ь.
Сла́ва, и҆ ны́нѣ, то́йже. Та́же глаго́лемъ: Воскрⷭ҇нїе хрⷭ҇то́во: и҆ ѱало́мъ н҃. Є҆ѵⷢ҇лїе же не чте́мъ, то́кмѡ во хра́мѣ ст҃а́гѡ ла́зарѧ. Чте́нїе же твори́мъ, толкова́нїе є҆ѵⷢ҇лїа ѿ і҆ѡа́нна тогѡ̀ днѐ, сло́во ѯ҃г, и҆ ѯ҃д.
Канѡ̑на два̀, до шесты̑ѧ пѣ̑сни: ѿѻнꙋ́дꙋже начина́емъ четверопѣ́снецъ. Пе́рвый канѡ́нъ со і҆рмосо́мъ на и҃: дрꙋгі́й на ѕ҃.
Пе́рвый канѡ́нъ, творе́нїе господи́на ѳеофа́на:. Гла́съ и҃.
Пѣ́снь а҃.
І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, пѣ́снь побѣ́днꙋю, ꙗ҆́кѡ просла́висѧ.
Ла́зарѧ ᲂу҆ме́ршаго воскреси́лъ є҆сѝ ма́нїемъ бж҃е́ственнымъ, ꙗ҆́кѡ созда́тель сы́й и҆ жи́зни сокро́вище, чл҃вѣколю́бче.
Сло́вомъ четверодне́внаго ла́зарѧ воскреси́лъ є҆сѝ, безсме́ртне, темноѡбра́зное а҆́дово ца́рство крѣ́постїю разрꙋши́въ.
Всѣ̑мъ пребж҃е́ственнагѡ бж҃ества̀ позна́нїе показа́лъ є҆сѝ, и҆з̾ ме́ртвыхъ возста́вивъ четверодне́внаго ла́зарѧ, влⷣко.
Дне́сь виѳа́нїа предвозвѣща́етъ воскрⷭ҇нїе хрⷭ҇та̀ жизнода́вца, ѡ҆ воста́нїи ла́зарѧ ликовствꙋ́ющи.
Дрꙋгі́й канѡ́нъ, творе́нїе і҆ѡа́нна мона́ха. Гла́съ и҃.
І҆рмо́съ: Во́дꙋ проше́дъ:
Пре́жде ѿ небытїѧ̀ приведы́й всѧ́ческꙋю тва́рь и҆ вѣ́дый сердє́чнаѧ сокрѡ́вища, предглаго́леши, ꙗ҆́кѡ влⷣка, ᲂу҆ч҃нкѡ́мъ ла́зарево ᲂу҆спе́нїе.
є҆стество́мъ человѣ́ка ѡ҆сꙋществова́выйсѧ ѿ дв҃ы, хрⷭ҇тѐ, ла́заревꙋ гробни́цꙋ ᲂу҆вѣ́дѣти вопроша́лъ є҆сѝ ꙗ҆́кѡ чл҃вѣ́къ, не невѣ́дый ꙗ҆́кѡ бг҃ъ, и҆дѣ́же лежа́ше.
Сла́ва: Оу҆вѣрѧ́ѧ, сло́ве, твоѐ воскрⷭ҇нїе вои́стиннꙋ, ꙗ҆́кѡ ѿ сна̀ воскреси́лъ є҆сѝ люби́маго ᲂу҆жѐ смердѧ́ща, четверодне́вна мертвеца̀, ѿ гро́ба.
Бг҃оро́диченъ: Чи́ни а҆́гг҃лѡвъ и҆ человѣ̑къ тѧ̀, безневѣ́стнаѧ мт҃и, восхвалѧ́ютъ непреста́ннѡ: содѣ́телѧ бо си́хъ, ꙗ҆́кѡ млⷣнца, во ѡ҆б̾ѧ́тїихъ твои́хъ носи́ла є҆сѝ.
Катава́сїа: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Пѣ́снь г҃.
І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Два̀ дѣ̑йства твоѧ̑ предлага́ѧ, показа́лъ є҆сѝ, сп҃се, є҆сте́ствъ дво́йство: бг҃ъ бо є҆сѝ и҆ чл҃вѣ́къ.
Бе́здна сы́й вѣ́дѣнїѧ, ты̀ вопроша́еши: гдѣ̀ положи́сѧ ᲂу҆ме́рый; хотѧ̀ воскреси́ти, жизнода́вче лежа́щаго.
Мѣ̑ста преходѧ́й ꙗ҆́кѡ бы́въ человѣ́къ, ꙗ҆ви́лсѧ є҆сѝ ѡ҆пи́санъ, и҆сполнѧ́ѧй всѧ́чєскаѧ, ꙗ҆́кѡ бг҃ъ неѡпи́санный.
Ла́зарѧ воздви́глъ є҆сѝ, хрⷭ҇тѐ, бж҃е́ственнымъ глаго́ломъ: и҆ менѐ мно́гими прегрѣше́ньми ᲂу҆ме́рша возста́ви, молю́сѧ.
И҆́ный.
І҆рмо́съ: Нбⷭ҇нагѡ крꙋ́га:
Предста́въ гро́бꙋ ла́зарѧ въ виѳа́нїи, чꙋдотво́рче гдⷭ҇и, над̾ си́мъ ты́ прослези́лсѧ є҆сѝ, зако́номъ є҆стества̀, пло́ть твою̀ ᲂу҆вѣрѧ́ѧ, і҆и҃се бж҃е мо́й, ю҆́же воспрїѧ́лъ є҆сѝ.
Марі́и и҆ ма́рѳы пла́чь ты̀ а҆́бїе ᲂу҆толи́лъ є҆сѝ, сп҃се, показꙋ́ѧ самовла́стїе: ты́ бо воскрⷭ҇нїе, ꙗ҆́коже ре́клъ є҆сѝ, ты̀ є҆сѝ вои́стиннꙋ и҆ жи́знь, и҆ всѣ́хъ гдⷭ҇ь.
Сла́ва: Ѡ҆бви́таго ᲂу҆кро́йми люби́маго ла́зарѧ, гдⷭ҇и, ѿ мертвецє́въ и҆ мра́ка а҆́дова сего̀ и҆схити́лъ є҆сѝ ты̀, сло́вомъ твои́мъ всемо́щнымъ расто́ргъ сме́рти закле́пы и҆ ца̑рствїѧ.
Бг҃оро́диченъ: Всели́лсѧ є҆сѝ въ дв҃ꙋ пло́тски, гдⷭ҇и, ꙗ҆ви́лсѧ є҆сѝ человѣ́кѡмъ, ꙗ҆́коже подоба́ше ви́дѣнꙋ тебѣ̀ бы́ти: ю҆́же и҆ показа́лъ є҆сѝ ꙗ҆́кѡ и҆́стиннꙋю бцⷣꙋ и҆ вѣ́рныхъ помо́щницꙋ, є҆ди́не чл҃вѣколю́бче.
Катава́сїа: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Сѣда́ленъ, гла́съ д҃.
Подо́бенъ: Оу҆диви́сѧ і҆ѡ́сифъ:
Вкꙋ́пѣ предста́ша хрⷭ҇тꙋ̀ ла́зарєвы сєстры̀, и҆ слезѧ́ща го́рцѣ и҆ пла́чꙋщѧ рѣ́ша є҆мꙋ̀: гдⷭ҇и, ᲂу҆́мре ла́зарь. ѻ҆́нъ же, ꙗ҆́кѡ бг҃ъ не невѣ́дый погребе́нїѧ, вопроша́ше ѿ ни́хъ: гдѣ̀ положи́сте є҆го̀; и҆ пристꙋпи́въ ко гро́бꙋ, возглаша́ше четверодне́внаго ла́зарѧ. ѻ҆́нъ же воста̀, и҆ покланѧ́шесѧ є҆го воскреси́вшемꙋ.
Сла́ва, и҆ ны́нѣ, гла́съ и҃.
Подо́бенъ: Премꙋ́дрость и҆ сло́во:
Предвѣ́дый всѧ́чєскаѧ ꙗ҆́кѡ творе́цъ, въ виѳа́нїи проре́клъ є҆сѝ ᲂу҆ч҃нкѡ́мъ твои̑мъ: дрꙋ́гъ на́шъ ла́зарь ᲂу҆́спе дне́сь. и҆ вѣ́дый вопроша́лъ є҆сѝ, глаго́лѧ: гдѣ̀ положи́сте є҆го̀: и҆ ѻ҆ц҃ꙋ̀ помоли́лсѧ є҆сѝ, прослези́всѧ ꙗ҆́кѡ человѣ́къ: тѣ́мже и҆ возгласи́въ, є҆го́же люби́лъ є҆сѝ, ѿ а҆́да возста́вилъ є҆сѝ, гдⷭ҇и, четверодне́внаго ла́зарѧ. сегѡ̀ ра́ди вопїе́мъ тебѣ̀: прїимѝ, хрⷭ҇тѐ бж҃е, дерза́ющихъ приноси́ти хвале́нїе, и҆ сподо́би всѣ́хъ сла́вы твоеѧ̀.
Пѣ́снь д҃.
І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Не посо́бника тре́бꙋѧй, но смотре́нїе соверша́ѧй неизрече́нное, молѧ́сѧ возста́вилъ є҆сѝ ме́ртва четверодне́внаго, всеси́льне.
Ѻ҆ц҃ꙋ̀ соприсносꙋ́щное сло́во и҆ бг҃ъ пре́жде зри́мый, ны́нѣ ꙗ҆́кѡ человѣ́къ мо́литсѧ, мол҃твы всѣ́хъ прїе́млѧй.
Гла́съ тво́й, сп҃се, разрꙋшѝ сме́рти всю̀ си́лꙋ, ѡ҆снова̑нїѧ же а҆́дѡва бж҃е́ственною твое́ю си́лою поколеба́шасѧ.
Бг҃оро́диченъ: Дв҃ꙋ воспои́мъ, ꙗ҆́кѡ по ржⷭ҇твѣ̀ дв҃ꙋ пребы́вшꙋю, и҆ ро́ждшꙋю хрⷭ҇та̀ бг҃а, ѿ прельще́нїѧ мі́ръ и҆зба́вльшаго.
И҆́ный.
І҆рмо́съ: Ты̀ моѧ̀ крѣ́пость, гдⷭ҇и:
Ты̀ ꙗ҆́кѡ па́стырь и҆схити́лъ є҆сѝ, сп҃се, человѣ́ка, растлѣ́вша ᲂу҆жѐ четверодне́вна, зижди́телю, ѿ во́лка вои́стиннꙋ лю́тагѡ и҆ всеѧ́дца, ꙗ҆́кѡ всеси́ленъ и҆ гдⷭ҇ь, си́мъ проѧвлѧ́ѧ ны́нѣ всемі́рнꙋю сла́вꙋ твоегѡ̀ тридне́внагѡ воста́нїѧ.
Тѧ̀ жи́знь ви́дѧщѧ, хрⷭ҇тѐ, сꙋ́щыѧ съ ма́рѳою вопїѧ́хꙋ: а҆́ще бы бы́лъ є҆сѝ здѣ̀, гдⷭ҇и, просвѣще́нїе всѣ́хъ и҆ жи́знь, ѿню́дъ не бы̀ ᲂу҆́мерлъ, ме́ртвъ не ꙗ҆ви́лсѧ бы ла́зарь. жи́знь же ᲂу҆ме́ршихъ сы́й, чл҃вѣколю́бче, ты̀ въ ра́дость прелага́еши пла́чь и҆́хъ.
Сла́ва: Тебє̀ и҆сто́чника боѧ́тсѧ, гдⷭ҇и, бє́здны, тебѣ̀ рабо́таютъ во́ды всѧ́чєскїѧ: тебє̀ трепе́щꙋтъ, хрⷭ҇тѐ, привра̑тницы а҆́дѡвы, и҆ закле́пы держа́вою твое́ю разрꙋша́ютсѧ, ла́зарю воскре́сшꙋ и҆з̾ ме́ртвыхъ гла́сомъ твои́мъ, всеси́льне сп҃се чл҃вѣколю́бче.
Бг҃оро́диченъ: Ты̀ вѣ̑рнымъ похвала̀ є҆сѝ, безневѣ́стнаѧ, ты̀ предста́тельство, ты̀ и҆ прибѣ́жище хрⷭ҇тїа́нѡмъ, стѣна̀ и҆ приста́нище: къ сн҃ꙋ бо твоемꙋ̀ молє́нїѧ прино́сиши, всенепоро́чнаѧ, и҆ сп҃са́еши ѿ бѣ́дъ вѣ́рою и҆ любо́вїю бцⷣꙋ чтⷭ҇ꙋю тѧ̀ вѣ́дꙋщыѧ.
Катава́сїа: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а и҆ на́шꙋ нищетꙋ̀ посѣти́въ, тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ Є҆́сть чꙋжда́ѧ тьма́ ѡ҆каѧ́ннаго; но ѡ҆братѝ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Предста́въ ла́заревꙋ гро́бꙋ, чл҃вѣколю́бче, сего̀ призва́лъ є҆сѝ, и҆ жи́знь по́далъ є҆сѝ: ꙗ҆́кѡ жи́знь безсме́ртнаѧ сы́й человѣ́кѡмъ всѣ̑мъ, ꙗ҆́кѡ бг҃ъ ꙗ҆́вѣ предвозвѣща́ѧ бꙋ́дꙋщее воскрⷭ҇нїе.
Свѧ́занъ нога́ма ла́зарь хожда́ше, чꙋ́до въ чꙋдесѣ́хъ: и҆́бо бо́лїй возбранѧ́ющагѡ ꙗ҆ви́сѧ ᲂу҆крѣплѧ́ѧй хрⷭ҇то́съ, є҆гѡ́же сло́вꙋ всѧ̑ раболѣ́пнѡ слꙋ́жатъ, ꙗ҆́кѡ бг҃ꙋ и҆ влⷣцѣ рабѡ́тающа.
Ме́ртва смердѧ́ща ла́зарѧ воздви́гнꙋвый четверодне́вна, хрⷭ҇тѐ, возста́ви мѧ̀ ᲂу҆ме́рщвле́на ны́нѣ грѣхмѝ и҆ положе́на въ ро́вѣ и҆ те́мнѣй сѣ́ни сме́ртнѣй: и҆ ꙗ҆́кѡ бл҃госе́рдъ и҆зба́ви и҆ сп҃си́ мѧ.
И҆́нъ. І҆рмо́съ то́йже.
Ѻ҆ц҃ꙋ̀ сла́вꙋ воздаѧ̀, ꙗ҆́кѡ не бг҃опроти́вный, моли́лсѧ є҆сѝ ты̀, ᲂу҆вѣрѧ́ѧ предстоѧ́щїй наро́дъ, долготерпѣли́ве, и҆ бл҃годаре́нїе твоемꙋ̀ ѻ҆ц҃ꙋ̀ приносѧ̀, повелѣ́нїемъ воздвиза́ѧ ла́зарѧ.
Ѽ гла́са бг҃овѣща́ннагѡ и҆ бж҃е́ственныѧ си́лы держа́вы твоеѧ̀, сп҃се, є҆́юже а҆́дѡва врата̀ всеѧ́дныѧ сме́рти сокрꙋши́лъ є҆сѝ! но и҆схити́ мѧ ѿ страсте́й мои́хъ, ꙗ҆́коже пре́жде четверодне́вна твоего̀ дрꙋ́га ла́зарѧ.
Сла́ва: Мл҃твами ла́зарѧ, ма́рѳы же и҆ марі́и, на́съ сподо́би зри́тєли бы́ти крⷭ҇та̀ и҆ стрⷭ҇те́й твои́хъ, гдⷭ҇и, и҆ свѣтонѡ́сицы и҆ цари́цы дне́й, воскрⷭ҇нїѧ твоегѡ̀, чл҃вѣколю́бче.
Бг҃оро́диченъ: Мт҃рнее дерзнове́нїе къ сн҃ꙋ твоемꙋ̀ и҆мꙋ́щи, пречⷭ҇таѧ, сро́днагѡ промышле́нїѧ ѡ҆ на́съ не пре́зри, мо́лимсѧ, занѐ тѧ̀ є҆ди́нꙋ хрⷭ҇тїа́не ко влⷣцѣ ᲂу҆милостивле́нїе бл҃гопрїѧ́тное предлага́емъ.
Катава́сїа: Вскꙋ́ю мѧ̀ ѿри́нꙋлъ є҆сѝ:
Ѿсе́лѣ начина́етсѧ четверопѣ́снецъ господи́на космы̀.
І҆рмосы̀ по два́жды, тропарѝ на в҃і. Гла́съ и҃.
Пѣ́снь ѕ҃.
І҆рмо́съ: І҆ѡ́нꙋ въ ки́тѣ, гдⷭ҇и, є҆ди́наго всели́лъ є҆сѝ: мене́ же свѧ́заннаго мре́жами вра́жїѧми, ꙗ҆́кѡ ѿ тлѣ́нїѧ ѻ҆́наго, сп҃сѝ.
Любы̀ ѿведѐ тебѐ, гдⷭ҇и, въ виѳа́нїю къ ла́зарю, и҆ сего̀ ᲂу҆жѐ смердѧ́ща воскреси́лъ є҆сѝ ꙗ҆́кѡ бг҃ъ, и҆ ѿ ᲂу҆́зъ а҆́довыхъ сп҃слъ є҆сѝ.
Ма́рѳа ᲂу҆́бѡ ѿча́ѧсѧ ѡ҆ ла́зарѣ, ꙗ҆́кѡ ᲂу҆жѐ четверодне́внѣ: хрⷭ҇то́съ же и҆стлѣ́вшаго воскр҃сѝ ꙗ҆́кѡ бг҃ъ, и҆ къ жи́зни преведѐ глаго́ломъ.
И҆́ный, і҆ѡа́нна мона́ха. Гла́съ то́йже.
І҆рмо́съ: Ѡ҆чи́сти мѧ̀, сп҃се:
Бг҃ъ сы́й и҆́стинный, ла́зарево вѣ́далъ є҆сѝ ᲂу҆спе́нїе, и҆ сїѐ ᲂу҆ч҃нкѡ́мъ твои̑мъ предвозвѣсти́лъ є҆сѝ, ᲂу҆вѣрѧ́ѧ, влⷣко, бж҃ества̀ твоегѡ̀ безпредѣ́льное дѣ́йство.
Пло́тїю ѡ҆пи́санъ сы́й неѡпи́санный, въ виѳа́нїю прише́дъ, ꙗ҆́кѡ человѣ́къ, влⷣко, слези́ши над̾ ла́заремъ, ꙗ҆́кѡ бг҃ъ же во́лею воскреша́еши четверодне́внаго.
Катава́сїа: Ѡ҆чи́сти мѧ̀, сп҃се: мнѡ́га во беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
Конда́къ, гла́съ в҃.
Подо́бенъ: Вы́шнихъ и҆щѧ̀:
Всѣ́хъ ра́дость хрⷭ҇то́съ, и҆́стина, свѣ́тъ, жи́знь мі́ра, воскрⷭ҇нїе, сꙋ́щымъ на землѝ ꙗ҆ви́сѧ свое́ю бл҃гостїю, и҆ бы́сть ѡ҆́бразъ воскрⷭ҇нїѧ, всѣ̑мъ подаѧ̀ бж҃е́ственное ѡ҆ставле́нїе.
І҆́косъ: Оу҆ч҃нкѡ́мъ созда́тель всѣ́хъ предвѣща̀, глаго́лѧ: бра́тїѧ и҆ зна́емїи, на́шъ дрꙋ́гъ ᲂу҆́спе, си́ми предглаго́лѧ и҆ ᲂу҆чѧ̀, ꙗ҆́кѡ всѧ̑ вѣ́сть, ꙗ҆́коже созда́тель всѣ́хъ. и҆́демъ ᲂу҆́бо, по́йдемъ и҆ ᲂу҆ви́димъ стра́нное погребе́нїе и҆ рыда́нїе марі́ино, и҆ ла́заревъ гро́бъ ᲂу҆́зримъ: та́мѡ бо хощꙋ̀ чꙋдодѣ́йствовати, соверша́ѧ крⷭ҇та̀ предначина́нїе и҆ всѣ̑мъ подаѧ̀ бж҃е́ственное ѡ҆ставле́нїе.
Сѷнаѯа́рїй.
Стїхѝ: Рыда́еши, і҆и҃се: сїѐ сме́ртнагѡ сꙋщества̀:
Ѡ҆живлѧ́еши дрꙋ́га твоего̀: сїѐ бж҃е́ственныѧ крѣ́пости.
Въ сі́й де́нь, въ сꙋббѡ́тꙋ ва́їй, пра́зднꙋемъ воста́нїе ст҃а́гѡ и҆ пра́веднагѡ дрꙋ́га хрⷭ҇то́ва, ла́зарѧ четверодне́внагѡ. Се́й є҆вре́инъ ᲂу҆́бѡ бѧ́ше ро́домъ, фарїсе́й же ᲂу҆че́нїемъ, и҆ сы́нъ, ꙗ҆́коже нѣ́гдѣ ᲂу҆казꙋ́етсѧ, фарїсе́а сі́мѡна, ѿ виѳа́нїи ве́си. Гдⷭ҇ꙋ же на́шемꙋ і҆и҃сꙋ хрⷭ҇тꙋ̀ по землѝ ходѧ́щꙋ, сп҃се́нїѧ ра́ди ро́да на́шегѡ, се́й въ содрꙋ́жество є҆мꙋ̀ соединѧ́етсѧ. Поне́же къ сі́мѡнꙋ хрⷭ҇то́съ ча́стѡ бесѣ́доваше, и҆ то́й бо ѡ҆ воскрⷭ҇нїи ме́ртвыхъ ѕѣлѡ̀ вопроша́ше, и҆ въ до́мъ є҆гѡ̀ хрⷭ҇то́съ прихожда́ше мно́гажды, тѣ́мже и҆ ла́зарь люби́мый дрꙋ́гъ є҆мꙋ̀ быва́етъ: не то́йже є҆ди́нъ, но и҆ сєстры̀ є҆гѡ̀ двѣ̀, ма́рѳа ꙗ҆́вѣ и҆ марі́а. Сп҃си́тельнѣй же стрⷭ҇ти ᲂу҆же́ приближа́ющейсѧ, подоба́ше воскрⷭ҇нїѧ та́инствꙋ и҆звѣ́стнѣе ᲂу҆вѣ́ритисѧ. Бѧ́ше ᲂу҆̀бо і҆и҃съ пребыва́ѧ ѡ҆б̾ ѻ҆́нъ по́лъ і҆орда́на, пе́рвѣе і҆аі́ровꙋ дще́рь и҆ вдови́ча сы́на воскреси́въ и҆з̾ ме́ртвыхъ, дрꙋ́гъ же є҆гѡ̀ ла́зарь, недꙋ́гомъ тѧ́жкимъ ѡ҆б̾ѧ́тъ бы́въ, ᲂу҆́мре. І҆и҃съ ᲂу҆̀бо, и҆ не сы́й та́мѡ, ᲂу҆ч҃нкѡ́мъ глаго́летъ: ла́зарь дрꙋ́гъ на́шъ ᲂу҆́спе. И҆ ма́лѡ па́ки преста́въ, речѐ: ла́зарь ᲂу҆́мре. Прихо́дитъ ᲂу҆̀бо въ виѳа́нїю, і҆орда́нъ ѡ҆ста́вль, ѿ се́стръ є҆гѡ̀ и҆звѣще́нъ бы́въ: ѿстои́тъ же виѳа́нїа ѿ і҆ерⷭ҇ли́ма а҆́ки ста́дїй пѧтьна́десѧть. И҆ пред̾ꙋсрѣто́ша є҆го̀ сестры̀ ла́зарєвы, глаго́лющѧ: гдⷭ҇и, а҆́ще бы є҆сѝ бы́лъ здѣ̀, не бы̀ ᲂу҆́мерлъ на́шъ бра́тъ: но и҆ ны́нѣ, а҆́ще хо́щеши, воздви́гнеши и҆̀, мо́жеши бо. Вопроша́етъ же ѿ наро́да і҆и҃съ: гдѣ̀ положи́сте є҆го̀; И҆ а҆́бїе всѝ поидо́ша на грѡ́бъ. И҆ ка́мени взѧ́тꙋ бы́вшꙋ, ма́рѳа глаго́летъ: гдⷭ҇и, ᲂу҆жѐ смерди́тъ, четверодне́венъ бо є҆́сть. Помоли́всѧ і҆и҃съ, и҆ сле́зы над̾ ᲂу҆ме́ршимъ пролїѧ́въ, гла́сомъ ве́лїимъ воззва̀: ла́заре, грѧдѝ во́нъ. И҆ а҆́бїе ᲂу҆ме́рый и҆зы́де: и҆ разрѣше́нъ бы́въ, ѿи́де въ до́мъ. Сїѐ стра́нное чꙋ́до на за́висть воздвиза́етъ є҆врє́йскїѧ лю́ди, и҆ на хрⷭ҇та̀ возбѣша́ютсѧ: і҆и҃съ же па́ки ᲂу҆кло́ньсѧ ѿи́де. А҆рхїерє́и же и҆ ла́зарѧ ᲂу҆би́ти помышлѧ́хꙋ, занѐ мно́зи, є҆го̀ зрѧ́ще, ко хрⷭ҇тꙋ̀ прилага́хꙋсѧ. Но ѻ҆́нъ, замышлѧ́ємаѧ разꙋмѣ́въ, на кѵ́пръ ѻ҆́стровъ ᲂу҆бѣга́етъ, и҆ по́слѣжде ѿ а҆пⷭ҇лѡвъ а҆рхїере́й поставлѧ́етсѧ кѷтїе́йскагѡ гра́да. До́брѣ же и҆ бг҃олюбе́знѣ пожи́въ, три́десѧть лѣ́тъ по ѡ҆жи́тїи свое́мъ, ᲂу҆мира́етъ па́ки, и҆ та́можде погреба́етсѧ, мнѡ́гаѧ чꙋдеса̀ содѣ́ѧвъ. Глаго́летсѧ же, ꙗ҆́кѡ по ѡ҆жи́тїи ничесѡ́же ꙗ҆́дѧ́ше кромѣ̀ ᲂу҆слажда́ющагѡ, и҆ ꙗ҆́кѡ є҆гѡ̀ ѡ҆мофо́ръ пречⷭ҇таѧ бж҃їѧ мт҃и, свои́ма ᲂу҆гото́вльши рꙋка́ма, є҆мꙋ̀ дарова̀. Сегѡ̀ честны̑ѧ и҆ ст҃ы̑ѧ мѡ́щи премꙋ́дрѣйшїй ца́рь ле́въ, по нѣ́коемꙋ видѣ́нїю бж҃е́ственнѣйшемꙋ, ѿтꙋ́дꙋ пренесѐ, и҆ въ созда́ннѣмъ ѿ негѡ̀ въ кѡнстантїногра́дѣ во и҆́мѧ сегѡ̀ ст҃а́гѡ хра́мѣ че́стнѡ и҆ многоцѣ́ннѡ положѝ, ѡ҆деснꙋ́ю хра́ма ѿ вхо́да, въ проти́внѣй сщ҃е́нномꙋ ѻ҆лтарю̀ стѣнѣ̀. И҆ ны́нѣ є҆щѐ пребыва́ютъ честны̑ѧ є҆гѡ̀ мѡ́щи, неизрече́нное нѣ́кое бл҃гово́нїе соверша́ющѧ.
Пра́здноватисѧ же въ настоѧ́щїй де́нь вчини́сѧ є҆гѡ̀ воста́нїе, занѐ ст҃і́и и҆ бг҃оно́снїи ѻ҆тцы̀ на́ши, па́че же ст҃і́и а҆пⷭ҇ли, по четыредесѧтодне́внѣмъ постѣ̀ ѻ҆чище́нїѧ ра́ди, хотѧ́ще ст҃ы̑ѧ стрⷭ҇ти гдⷭ҇а на́шегѡ і҆и҃са хрⷭ҇та̀ положи́ти, и҆ сїѐ чꙋ́до наипа́че ѡ҆брѣ́тше ꙗ҆́кѡ нача́ло и҆ винꙋ̀ і҆ꙋде́йскагѡ на хрⷭ҇та̀ неи́стовства, посемꙋ̀ здѣ̀ преесте́ственное сїѐ чꙋ́до положи́ша. Ѡ҆ се́мъ же є҆ди́нъ є҆ѵⷢ҇лі́стъ і҆ѡа́ннъ пи́шетъ, ꙗ҆́кѡ дрꙋги̑мъ є҆ѵⷢ҇лі́стѡмъ ѡ҆ста́вльшымъ сїѐ: ꙗ҆́вѣ є҆щѐ жи́въ бѣ̀ ла́зарь и҆ ви́димь. Глаго́летсѧ же, ꙗ҆́кѡ҆ сегѡ̀ ра́ди сама́гѡ написа́сѧ и҆ про́чее ѿ і҆ѡа́нна є҆ѵⷢ҇лїе: занѐ ничесѡ́же дрꙋзі́и воспомѧнꙋ́ша ѡ҆ безнача́льнѣмъ рожде́нїи хрⷭ҇то́вѣ. Сїе́ бо бѧ́ше и҆ско́мое ᲂу҆вѣ́ритисѧ, ꙗ҆́кѡ хрⷭ҇то́съ бѣ̀ сн҃ъ бж҃їй и҆ бг҃ъ, и҆ ꙗ҆́кѡ воскре́се и҆ воскрⷭ҇нїе бꙋ́детъ мє́ртвымъ: є҆́же ла́заремъ па́че ᲂу҆вѣрѧ́етсѧ. Ничто́же ла́зарь речѐ ѡ҆ сꙋ́щихъ во а҆́дѣ: и҆лѝ занѐ не ѡ҆ста́влено бы́сть ви́дѣти сꙋ̑щаѧ та́мѡ, и҆лѝ ви́дѣвшꙋ молча́ти ѡ҆ си́хъ повелѣ́но бы́сть.
Мл҃твами дрꙋ́га твоегѡ̀ ла́зарѧ, хрⷭ҇тѐ бж҃е, поми́лꙋй на́съ. А҆ми́нь.
Пѣ́снь з҃.
І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гслове́нъ є҆сѝ, гдⷭ҇и бж҃е, во вѣ́ки.
Прослези́всѧ ꙗ҆́кѡ человѣ́къ, ще́дре, воскреси́лъ є҆сѝ ꙗ҆́кѡ бг҃ъ сꙋ́щаго во гро́бѣ, и҆ разрѣше́нъ ѿ а҆́да ла́зарь взыва́ше: бл҃гослове́нъ є҆сѝ, гдⷭ҇и бж҃е, во вѣ́ки.
И҆зы́де пово́йми повѧ́занъ, ѿ про́пасти а҆́да и҆ тьмы̀ ᲂу҆бѣ́гъ влⷣчнимъ сло́вомъ, ла́зарь, взыва́ѧ: бл҃гослове́нъ є҆сѝ, гдⷭ҇и бж҃е, во вѣ́ки.
И҆́ный.
І҆рмо́съ: Ѿ і҆ꙋде́и доше́дше:
Над̾ дрꙋ́гомъ прослези́всѧ, ма̑рѳины сле́зы ᲂу҆толи́лъ є҆сѝ, ще́дре, и҆ стрⷭ҇тїю во́льною ѿѧ́лъ є҆сѝ ѿ лица̀ люде́й твои́хъ всѧ́кꙋю сле́зꙋ: ѻ҆тє́цъ на́шихъ бж҃е, бл҃гослове́нъ є҆сѝ.
Жи́зни власти́телю, сп҃се, ме́ртваго ꙗ҆́кѡ ѿ сна̀ воззва́лъ є҆сѝ, и҆ сло́вомъ а҆́довꙋ ᲂу҆тро́бꙋ расто́ргнꙋвъ, воскреси́лъ є҆сѝ пою́ща: ѻ҆тє́цъ на́шихъ бж҃е, бл҃гослове́нъ є҆сѝ.
Мертвеца̀ смердѧ́ща, свѧ́зана пово́йми, влⷣко, воздви́гнꙋлъ є҆сѝ. и҆ менѐ, свѧ́заннаго плени́цами прегрѣше́нїй возста́ви пою́ща: ѻ҆тє́цъ на́шихъ бж҃е, бл҃гослове́нъ є҆сѝ.
Катава́сїа: Ѿ і҆ꙋде́и доше́дше, ѻ҆́троцы въ вавѷлѡ́нѣ дре́вле вѣ́рою трⷪ҇ческою пла́мень пе́щный попра́ша, пою́ще: ѻ҆тє́цъ на́шихъ бж҃е, бл҃гослове́нъ є҆сѝ.
Пѣ́снь и҃.
І҆рмо́съ: Мꙋсїкі̑йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѡ҆́бразꙋ въ деи́рѣ, трїѐ ѻ҆́троцы не повинꙋ́вшесѧ, гдⷭ҇а воспѣва́хꙋ и҆ славосло́влѧхꙋ во всѧ̑ вѣ́ки.
Ꙗ҆́кѡ па́стырь а҆́гнца взыска́въ и҆ ѿ во́лка лю́тагѡ гꙋби́телѧ и҆схити́въ, побѣди́телю, растлѣ́вша ѡ҆бнови́лъ є҆сѝ вопїю́ща тебѣ̀: по́йте и҆ превозноси́те во всѧ̑ вѣ́ки.
Ꙗ҆́кѡ чл҃вѣ́къ гро́ба и҆ска́лъ є҆сѝ, ме́ртваго ꙗ҆́кѡ содѣ́тель воскреси́въ, повелѣ́нїемъ твои́мъ влⷣчнимъ. тогѡ̀ а҆́дъ ᲂу҆жасе́сѧ, вопїю́ща тебѣ̀: по́йте и҆ превозноси́те во всѧ̑ вѣ́ки.
И҆́ный.
І҆рмо́съ: Цр҃ѧ̀ нбⷭ҇наго:
Вопроша́еши ᲂу҆́бѡ ꙗ҆́кѡ чл҃вѣ́къ, ꙗ҆́кѡ бг҃ъ же воскреша́еши сло́вомъ четверодне́внаго: тѣ́мже тѧ̀ пое́мъ всѧ̑ вѣ́ки.
Тебѣ̀, влⷣко, ꙗ҆́коже до́лгъ сро́дника, марі́а бл҃горазꙋ́мнѡ приноша́етъ мѵ́ро, воспѣва́ющи во всѧ̑ вѣ́ки.
Призыва́еши ᲂу҆́бѡ ꙗ҆́кѡ чл҃вѣ́къ ѻ҆ц҃а̀, ꙗ҆́кѡ бг҃ъ же ла́зарѧ воздвиза́еши: тѣ́мже тѧ̀ пое́мъ, хрⷭ҇тѐ, во вѣ́ки.
Хва́лимъ, бл҃гослови́мъ, покланѧ́емсѧ гдⷭ҇еви:
Катава́сїа: Цр҃ѧ̀ нбⷭ҇наго, є҆го́же пою́тъ во́и а҆́гг҃льстїи, по́йте и҆ превозноси́те во всѧ̑ вѣ́ки.
Чтⷭ҇нѣ́йшꙋю не стїхосло́витсѧ.
Пѣ́снь ѳ҃.
І҆рмо́съ: Чтⷭ҇ꙋю сла́внѡ почти́мъ, лю́дїе, бцⷣꙋ, ѻ҆́гнь бж҃ества̀ прїи́мшꙋю во чре́вѣ неѡпа́льнѡ, пѣ́сньми велича́имъ.
Лю́дїе ви́дѣвше ходѧ́ща мертвеца̀ четверодне́вна, ᲂу҆диви́вшесѧ чꙋдесѝ, вопїѧ́хꙋ и҆зба́вителю: бг҃а тѧ̀ въ пѣ́снехъ велича́емъ.
Пред̾ꙋвѣрѧ́ѧ сла́вное воста́нїе твоѐ, ѽ сп҃се мо́й, ме́ртва четверодне́вна ла́зарѧ и҆з̾ а҆́да свобожда́еши: въ пѣ́снехъ тѧ̀ велича́ю.
И҆́ный.
І҆рмо́съ: Вои́стиннꙋ бцⷣꙋ:
Почита́ѧ твоего̀ ѻ҆ц҃а̀ и҆ показꙋ́ѧ, ꙗ҆́кѡ не бг҃опроти́венъ є҆сѝ, мл҃твꙋ дѣ́еши, хрⷭ҇тѐ, самовла́стнѡ воздви́гъ четверодне́внаго.
И҆з̾ гро́ба четверодне́внаго ла́зарѧ воздви́гнꙋвъ, хрⷭ҇тѐ мо́й, тридне́внагѡ воста́нїѧ свидѣ́телѧ всеи́стиннаго всѣ̑мъ показꙋ́еши.
Хо́диши, и҆ пла́чеши, и҆ вѣща́еши, сп҃се мо́й, показꙋ́ѧ человѣ́ческое твоѐ дѣ́йство: бж҃е́ственное же ꙗ҆влѧ́ѧ, воздвиза́еши ла́зарѧ.
Содѣ́ѧлъ є҆сѝ неизрече́ннѡ, влⷣко сп҃се мо́й, по ѻ҆бою̀ двою̀ твоє́ю є҆стєствꙋ̀, самовла́стною во́лею сп҃се́нїе моѐ.
Катава́сїа: Вои́стиннꙋ бцⷣꙋ тѧ̀ и҆сповѣ́дꙋемъ сп҃се́ннїи тобо́ю, дв҃о чтⷭ҇аѧ, съ безпло́тными ли̑ки тѧ̀ велича́юще.
Та́же на гла́съ а҃: Ст҃ъ гдⷭ҇ь бг҃ъ на́шъ. Три́жды.
Є҆ѯапостїла́рїй самогла́сенъ, два́жды:
Сло́вомъ твои́мъ, сло́ве бж҃їй, ла́зарь ны́нѣ востае́тъ, къ житїю̀ па́ки поте́къ: и҆ съ вѣ́твьми лю́дїе тѧ̀, держа́вне, почита́ютъ, ꙗ҆́кѡ въ коне́цъ погꙋби́ши а҆́дъ сме́ртїю твое́ю.
Сла́ва, и҆ ны́нѣ, и҆́нъ, подо́бенъ, є҆ди́ножды:
Ла́заремъ тѧ̀ хрⷭ҇то́съ ᲂу҆жѐ разрꙋша́етъ, сме́рте: и҆ гдѣ̀ твоѧ̀ а҆́де, побѣ́да; виѳа́нїи пла́чь ны́нѣ на тебѐ преставлѧ́етсѧ. всѝ вѣ̑тви побѣ́ды томꙋ̀ принесе́мъ.
На хвали́техъ поста́вимъ стїхѡ́въ и҃, и҆ пое́мъ стїхи̑ры самогла́сны, гла́съ а҃.
Сті́хъ: Сотвори́ти въ ни́хъ сꙋ́дъ напи́санъ.
Воскрⷭ҇нїе и҆ жи́знь человѣ́кѡмъ сы́й, хрⷭ҇тѐ, гро́бꙋ ла́заревꙋ предста́лъ є҆сѝ, ᲂу҆вѣрѧ́ѧ на́мъ два̀ сꙋщества̑ твоѧ̑ долготерпѣли́ве. ꙗ҆́кѡ бг҃ъ и҆ чл҃вѣ́къ ѿ чтⷭ҇ыѧ дв҃ы прише́лъ є҆сѝ. ꙗ҆́коже бо чл҃вѣ́къ вопроша́лъ є҆сѝ: гдѣ̀ погребе́сѧ; и҆ ꙗ҆́коже бг҃ъ воскреси́лъ є҆сѝ живоно́снымъ манове́нїемъ четверодне́внаго.
Ла́зарѧ ᲂу҆ме́рша четверодне́внаго воскреси́лъ є҆сѝ и҆з̾ а҆́да, хрⷭ҇тѐ, пре́жде твоеѧ̀ сме́рти, потрѧ́съ сме́ртнꙋю держа́вꙋ и҆ є҆ди́нѣмъ люби́мымъ предвозвѣща́ѧ всѣ́хъ человѣ̑къ ѿ тлѣ́нїѧ свобожде́нїе. тѣ́мже покланѧ́ющесѧ твое́й всеси́льнѣй вла́сти, вопїе́мъ: бл҃гослове́нъ є҆сѝ, сп҃се, поми́лꙋй на́съ.
Ма́рѳа и҆ марі́а сп҃сꙋ глаго́ластѣ: а҆́ще бы здѣ̀ бы́лъ є҆сѝ, гдⷭ҇и, не бы̀ ᲂу҆́мерлъ ла́зарь. хрⷭ҇то́съ же, воскрⷭ҇нїе ᲂу҆со́пшихъ, сего̀ ᲂу҆жѐ четверодне́внаго и҆з̾ ме́ртвыхъ воскресѝ: прїиди́те, всѝ вѣ́рнїи, семꙋ̀ поклони́мсѧ, грѧдꙋ́щемꙋ во сла́вѣ сп҃стѝ дꙋ́шы на́шѧ.
Бж҃ества̀ твоегѡ̀, хрⷭ҇тѐ, ѡ҆́бразы подава́ѧ ᲂу҆ч҃нкѡ́мъ твои̑мъ, въ народѣ́хъ смирѧ́лъ є҆сѝ себѐ, ᲂу҆таи́ти сїѐ хотѧ̀. тогѡ̀ ра́ди а҆пⷭ҇лѡмъ, ꙗ҆́кѡ провѣ́децъ и҆ бг҃ъ, ла́заревꙋ сме́рть предре́клъ є҆сѝ: въ виѳа́нїи же присꙋ́тствꙋѧ лю́демъ, дрꙋ́га твоегѡ̀ гро́ба не невѣ́дый, ᲂу҆вѣ́дѣти и҆ска́ль є҆сѝ ꙗ҆́кѡ чл҃вѣ́къ. но тобо́ю четверодне́венъ воскресы́й, бж҃е́ственнꙋю твою̀ держа́вꙋ ꙗ҆вѝ: всеси́льне гдⷭ҇и, сла́ва тебѣ̀.
Гла́съ д҃: Четверодне́вна воздви́глъ є҆сѝ дрꙋ́га твоего̀, хрⷭ҇тѐ, и҆ ма́рѳино и҆ марі́ино рыда́нїе ᲂу҆толи́лъ є҆сѝ, показꙋ́ѧ всѣ̑мъ, ꙗ҆́кѡ ты̀ є҆сѝ всѧ̑ соверша́ѧй бж҃е́ственною си́лою, самовла́стнымъ хотѣ́нїемъ, є҆мꙋ́же херꙋві́ми вопїю́тъ непреста́ннѡ: ѡ҆са́нна въ вы́шнихъ, бл҃гослове́нъ є҆сѝ, над̾ всѣ́ми бж҃е, сла́ва тебѣ̀.
Ма́рѳа марі́и вопїѧ́ше: ᲂу҆ч҃тль предстои́тъ и҆ глаша́етъ тѧ̀, прїидѝ. ѻ҆на́ же ско́рѡ прише́дши, и҆дѣ́же бѣ̀ стоѧ̀ гдⷭ҇ь, и҆ ви́дѣвши возопѝ, па́дши поклони́сѧ, пречⷭ҇тѣи но́зѣ твоѝ ѡ҆блобыза́ющи, глаго́лаше: гдⷭ҇и, а҆́ще бы є҆сѝ здѣ̀ бы́лъ, не бы̀ ᲂу҆́мерлъ бра́тъ на́шъ.
Гла́съ и҃: Сті́хъ: Воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀: не забꙋ́ди ᲂу҆бо́гихъ твои́хъ до конца̀.
Ла́зарѧ ᲂу҆ме́рша въ виѳа́нїи воздви́глъ є҆сѝ четверодне́вна: то́кмѡ бо преста́лъ є҆сѝ гро́бꙋ, гла́съ въ жи́знь ᲂу҆ме́ршемꙋ бы́сть, и҆ возстена́въ а҆́дъ ѿрѣшѝ стра́хомъ. ве́лїе чꙋ́до: многомлⷭ҇тиве гдⷭ҇и, сла́ва тебѣ̀.
Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ:
Ꙗ҆́коже ре́клъ є҆сѝ, гдⷭ҇и, ма́рѳѣ: а҆́зъ є҆́смь воскрⷭ҇нїе, дѣ́ломъ сло́во и҆спо́лнилъ є҆сѝ, и҆з̾ а҆́да воззва́въ ла́зарѧ. и҆ менѐ, чл҃вѣколю́бче, ме́ртва страстьмѝ, ꙗ҆́кѡ сострада́теленъ воскресѝ, молю́сѧ.
Сла́ва, гла́съ в҃: Ве́лїе и҆ пресла́вное чꙋ́до соверши́сѧ дне́сь, ꙗ҆́кѡ мертвеца̀ четверодне́внаго и҆з̾ гро́ба возгласи́въ хрⷭ҇то́съ воздви́же, и҆ дрꙋ́га призва̀: славосло́вимъ є҆го̀ ꙗ҆́кѡ пресла́вна, да мл҃твами пра́веднагѡ ла́зарѧ сп҃се́тъ дꙋ́шы на́шѧ.
И҆ ны́нѣ: Пребл҃гослове́на є҆сѝ, бцⷣе дв҃о:
Та́же, славосло́вїе вели́кое, и҆ ѿпꙋ́стъ.
На лїтꙋргі́и бл҃жє́нна, пѣ́снь г҃-ѧ и҆ ѕ҃-ѧ, на и҃. По вхо́дѣ тропа́рь пра́здникꙋ. Сла́ва, и҆ ны́нѣ, конда́къ. Вмѣ́стѡ трист҃а́гѡ пое́мъ: Є҆ли́цы во хрⷭ҇та̀ крⷭ҇ти́стесѧ, во хрⷭ҇та̀ ѡ҆блеко́стесѧ, а҆ллилꙋ́їа. Прокі́менъ, гла́съ г҃: Гдⷭ҇ь просвѣще́нїе моѐ и҆ сп҃си́тель мо́й,когѡ̀ ᲂу҆бою́сѧ; Сті́хъ: Гдⷭ҇ь защи́титель живота̀ моегѡ̀, ѿ когѡ̀ ᲂу҆страшꙋ́сѧ: А҆пⷭ҇лъ ко є҆вре́ємъ, зача́ло тл҃г, ѿ полꙋ̀: Бра́тїе, црⷭ҇твїе непоколеби́мо: Коне́цъ: І҆и҃съ хрⷭ҇то́съ вчера̀ и҆ дне́сь то́йже, и҆ во вѣ́ки. А҆ллилꙋ́їа, гла́съ є҃: Гдⷭ҇ь воцр҃и́сѧ, въ лѣ́потꙋ ѡ҆блече́сѧ. Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ. Є҆ѵⷢ҇лїе ѿ і҆ѡа́нна, зача́ло л҃ѳ: Во вре́мѧ ѻ҆́но, бѣ̀ нѣ́кто болѧ́й ла́зарь. Коне́цъ: И҆ ви́дѣвше ꙗ҆̀же сотворѝ і҆и҃съ, вѣ́роваша въ него̀. Прича́стенъ: И҆з̾ ᲂу҆́стъ младе́нєцъ и҆ ссꙋ́щихъ соверши́лъ є҆сѝ хвалꙋ̀. А҆ллилꙋ́їа, три́жды.
На трапе́зѣ ᲂу҆чрежда́емсѧ варе́нїемъ со є҆ле́емъ, а҆́ще же и҆ и҆крꙋ̀ и҆́мамы, да да́стсѧ коемꙋ́ждо бра́тꙋ по трѝ ѻ҆́нгїи, и҆ вїно̀ пїе́мъ.
[зрѝ] Подоба́етъ вѣ́дати: А҆́ще хра́мъ првⷣнагѡ ла́зарѧ: по ѡ҆бы́чнѣй каѳі́смѣ полѷеле́й: Велича́нїе ст҃и́тельское, и҆ ѱало́мъ: Оу҆слы́шите сїѧ̑ всѝ ꙗ҆зы́цы: Та́же сѣда́ленъ, и҆́же по г҃-й пѣ́сни. И҆ житїѐ ст҃а́гѡ ла́зарѧ, ѿ нїки́фора ѯанѳопꙋ́ла напи́санное. Степє́нна, а҆нтїфѡ́нъ а҃-й, д҃-гѡ гла́са. Прокі́менъ: Честна̀ пред̾ гдⷭ҇емъ: Сті́хъ: Что̀ возда́мъ гдⷭ҇еви: Всѧ́кое дыха́нїе: Є҆ѵⷢ҇лїе ѿ і҆ѡа́нна, зача́ло л҃ѕ: А҆́зъ є҆́смь две́рь: ѱало́мъ н҃. Стїхи́ра, гла́съ ѕ҃: Гдⷭ҇и, гла́съ тво́й разрꙋшѝ: Канѡ́ны два̀, на д҃і: и҆ катава́сїа в҃-гѡ канѡ́на. По г҃-й пѣ́сни сѣда́ленъ пра́здника. По ѕ҃-й пѣ́сни конда́къ: Всѣ́хъ ра́дость: И҆ і҆́косъ. И҆ про́чее послѣ́дованїе, ꙗ҆́коже ᲂу҆каза́сѧ.