Неделя пятой седмицы, Марии Египетской
Въ недѣ́лю пѧ́тꙋю ст҃ы́хъ постѡ́въ,
послѣ́дованїе подо́бнѣ, ꙗ҆́коже и҆ въ про́чихъ недѣ́лѧхъ: въ не́йже пое́мъ и҆ мине́и послѣ́дованїе слꙋчи́вшагѡсѧ ст҃а́гѡ. И҆ні́и же послѣ́днѣйшїи преда́ша пѣ́ти въ сїю̀ недѣ́лю послѣ́дованїе преподо́бныѧ ма́тере на́шеѧ марі́и є҆гѵ́петскїѧ.
Во свѣти́льничнѣмъ, по предначина́тельнѣмъ ѱалмѣ̀ и҆ ѡ҆бы́чнѣмъ стїхосло́вїи, на Гдⷭ҇и воззва́хъ, поста́вимъ стїхѡ́въ і҃. И҆ пое́мъ ѻ҆смогла́сника стїхи̑ры воскрⷭ҇ны г҃ и҆ а҆нато́лїєвы г҃: и҆ прпⷣбныѧ стїхи̑ры подѡ́бны г҃, творѧ́ще ѧ҆̀ на д҃.
Гла́съ ѕ҃.
Подо́бенъ: Всю̀ ѿложи́вше:
Пре́жде ᲂу҆́бѡ возбранѧ́ше тебѣ̀ скве́рнъ привлача́щеесѧ скверне́нїе на честна̑ѧ взира́ти: твое́ же чꙋ́вство и҆ твоѧ̀ содѣ́ѧнныхъ со́вѣсть къ лꙋ́чшымъ тебѣ̀, бг҃омꙋ́драѧ, ѡ҆браще́нїе содѣ́ѧша. на і҆кѡ́нꙋ бо воззрѣ́вши бл҃гослове́нныѧ бг҃оѻтрокови́цы, во всѣ́хъ прегрѣше́нїихъ свои́хъ пре́жнихъ пока́ѧвшисѧ, всехва́льнаѧ, въ дерзнове́нїи чтⷭ҇но́мꙋ дре́вꙋ поклони́ласѧ є҆сѝ.
Мѣ́стѡмъ ст҃ы̑мъ поклони́вшисѧ ра́достнѡ, добродѣ́тели напꙋ́тїе сп҃си́тельнѣйшее ѿтꙋ́дꙋ прїѧ́ла є҆сѝ, и҆ ѕѣлѡ̀ потекла̀ є҆сѝ до́брымъ ше́ствїемъ: и҆ стрꙋю̀ преше́дши і҆орда́нскꙋю, въ жили́ще прⷣте́чево ᲂу҆се́рднѡ всели́ласѧ є҆сѝ, и҆ страсте́й свирѣ́пство жи́тельствомъ ѡ҆мрачи́ла є҆сѝ, со дерзнове́нїемъ и҆стончава́ющи пло́ти воздыма̑нїѧ, приснопа́мѧтнаѧ ма́ти.
Въ пꙋсты́ню всели́вшисѧ, твои́хъ страсте́й ѡ҆́бразы ѿ дꙋшѝ ѿѧ́ла є҆сѝ, бг҃ови́днѣйшее и҆з̾ѡбраже́нїе въ дꙋшѝ написа́вши, добродѣ́телей ви́ды: и҆ толи́кѡ просїѧ́ла є҆сѝ, ꙗ҆́кѡ и҆ во́ды легкѡ̀ преходи́ти, бл҃же́ннаѧ, и҆ ѿ землѝ взима́тисѧ въ твои́хъ къ бг҃ꙋ моле́нїихъ. и҆ ны́нѣ со дерзнове́нїемъ, всесла́внаѧ мр҃і́е, хрⷭ҇тꙋ̀ предстоѧ́щи, моли́сѧ ѡ҆ дꙋша́хъ на́шихъ.
Сла́ва, гла́съ д҃: Чꙋ́до сотворѝ си́ла крⷭ҇та̀ твоегѡ̀, хрⷭ҇тѐ, ꙗ҆́кѡ и҆ пре́жнѧѧ блꙋдни́ца по́стническимъ по́двигомъ подвиза́сѧ: ѿню́дꙋже и҆ немощно́е ѿве́ргши, до́блественнѡ сопротивоста̀ на дїа́вола. тѣ́мже и҆ по́честь побѣ́ды стѧжа́вши, мо́литсѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ а҃-й гла́са.
На стїхо́внѣ стїхи̑ры ѻ҆смогла́сника.
Сла́ва, прпⷣбныѧ, гла́съ в҃:
Дꙋшє́внаѧ ловлє́нїѧ и҆ стра̑сти плотскі̑ѧ мече́мъ воздержа́нїѧ посѣ́кла є҆сѝ: по́мысла прегрѣшє́нїѧ молча́нїемъ по́стничества подави́ла є҆сѝ, и҆ стрꙋѧ́ми сле́зъ твои́хъ пꙋсты́ню всю̀ напои́ла є҆сѝ, и҆ произрасти́ла є҆сѝ на́мъ покаѧ́нїѧ плоды̀. тѣ́мже твою̀ па́мѧть, прпⷣбнаѧ, пра́зднꙋемъ.
И҆ ны́нѣ, бг҃оро́диченъ, въ то́йже гла́съ: Ѽ чꙋдесѐ но́вагѡ:
Ѿпꙋсти́тельный воскре́сенъ: и҆ прпⷣбныѧ, гла́съ и҃:
Въ тебѣ̀, ма́ти, и҆звѣ́стнѡ сп҃се́сѧ є҆́же по ѡ҆́бразꙋ: прїи́мши бо крⷭ҇тъ, послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ: презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбнаѧ марі́е, дꙋ́хъ тво́й.
И҆ бг҃оро́диченъ: На́съ ра́ди рожде́йсѧ ѿ дв҃ы: Ты̑ѧжде и҆ на Бг҃ъ гдⷭ҇ь:
И҆ про́чее послѣ́дованїе ꙗ҆́кѡ ѡ҆бы́чно.
На ᲂу҆́трени
по все́мъ ѡ҆бы́чнѣмъ послѣ́дованїи, канѡ́ны г҃: воскрⷭ҇ный съ бг҃оро́дичнымъ на ѕ҃: настоѧ́щїй трїѡ́ди на д҃: и҆ прпⷣбныѧ на д҃.
Канѡ́нъ на бога́таго и҆ на ла́зарѧ. Гла́съ и҃.
Пѣ́снь а҃.
І҆рмо́съ: Во́дꙋ проше́дъ:
Бога́тствомъ сласте́й, ᲂу҆подо́бихсѧ веселѧ́щемꙋсѧ на всѧ́къ де́нь въ сла́дости бога́томꙋ. тѣ́мже тѧ̀ молю̀, сп҃се: ѿ ѻ҆гнѧ́ мѧ ꙗ҆́коже ла́зарѧ и҆зба́ви.
Ѡ҆дѣ́ѧхсѧ, сп҃се, сластьмѝ, ꙗ҆́коже ѡ҆бложи́вый себѣ̀ вѵ́ссонъ и҆ зла́то и҆ златꙋ́ю ѡ҆де́ждꙋ: но да не по́слеши мѧ̀ во ѻ҆́гнь ꙗ҆́коже ѻ҆́наго.
Веселѧ́шесѧ въ бога́тствѣ и҆ сла́дости бога́тый дре́вле, въ житїѝ тлѣ́ннѣмъ: тѣ́мже на мꙋ̑ки ѡ҆сꙋди́сѧ. ни́щїй же ла́зарь ѡ҆роша́шесѧ.
Бг҃оро́диченъ: Чи́ни а҆́гг҃лѡвъ и҆ человѣ̑къ тѧ̀, безневѣ́стнаѧ мт҃и, восхвалѧ́ютъ непреста́ннѡ: содѣ́телѧ бо си́хъ, ꙗ҆́кѡ млⷣнца, во ѡ҆б̾ѧ́тїихъ твои́хъ носи́ла є҆сѝ.
Дрꙋгі́й канѡ́нъ, прпⷣбныѧ, на д҃, гла́съ ѕ҃.
І҆рмо́съ: Волно́ю морско́ю:
Любо́вїю свѣтоно́снꙋю и҆ бж҃е́ственнꙋю твою̀ па́мѧть пра́зднꙋющемꙋ свѣ́тъ низпосли́ ми, прпⷣбнаѧ, предстоѧ́щи свѣ́тꙋ непристꙋ́пномꙋ хрⷭ҇тꙋ̀, ѿ и҆скꙋше́нїй всѧ́ческихъ житїѧ̀ мѧ̀ и҆збавлѧ́ющи.
Ко є҆гѵ́птѧнѡмъ пло́тїю ѿше́дый, неѡпи́санный и҆ превѣ́чный гдⷭ҇ь показꙋ́етъ тѧ̀ и҆з̾ є҆гѵ́пта всесвѣ́тлꙋю ѕвѣздꙋ̀, вѣ́дый всѧ̑ пре́жде бытїѧ̀.
Бж҃е́ственныхъ за́повѣдей, чтⷭ҇на́ѧ, не вѣ́дꙋщи, бж҃е́ственный ѡ҆́бразъ бж҃їй ѡ҆скверни́ла є҆сѝ: бж҃е́ственнымъ же про́мысломъ па́ки ѡ҆чи́стила є҆сѝ, всехва́льнаѧ, ѡ҆божи́вшисѧ дѣѧ́ньми бж҃е́ственными, прпⷣбнаѧ, твои́ми.
Бг҃оро́диченъ: Ѽ твоегѡ̀, бж҃е мо́й, мно́гагѡ бл҃госе́рдїѧ и҆ неизрече́ннагѡ твоегѡ̀ снизхожде́нїѧ! ка́кѡ пре́жнюю блꙋдни́цꙋ, мт҃ре твоеѧ̀ мольба́ми, ꙗ҆́кѡ чи́стꙋю и҆ непоро́чнꙋю, а҆́гг҃лѡмъ ᲂу҆подо́билъ є҆сѝ.
Пѣ́снь г҃.
І҆рмо́съ: Ты̀ є҆сѝ ᲂу҆твержде́нїе:
Ꙗ҆́коже ла́зарѧ сп҃слъ є҆сѝ ѿ пла́мене, хрⷭ҇тѐ, та́кѡ менѐ ѿ ѻ҆гнѧ̀ и҆зба́ви гее́нскагѡ,недосто́йнаго раба̀ твоего̀.
Бога́тый страстьмѝ и҆ сластьмѝ є҆́смь, гдⷭ҇и, ла́зарь же є҆́смь, ᲂу҆бо́гїй лише́нїемъ добродѣ́телей: но сп҃си́ мѧ.
Въ червлени́цꙋ и҆ вѵ́ссонъ ѡ҆блача́шесѧ бога́тый сластьмѝ и҆ грѣхмѝ, сегѡ̀ ра́ди во пла́мени гори́тъ.
Бг҃оро́диченъ: Да́ждь на́мъ по́мощь, мл҃твами твои́ми всечⷭ҇таѧ, прило́ги ѿража́ющи лю́тыхъ ѡ҆бстоѧ́нїй.
И҆́ный.
І҆рмо́съ: Тебѐ, на вода́хъ:
Ко вратѡ́мъ поги́бели дѣѧ́ньми безмѣ́стными прибли́жшейсѧ, всечⷭ҇тна́ѧ, врата̀ покаѧ́нїѧ тебѣ̀ ѿверза́етъ сокрꙋши́вый пре́жде врата̀ а҆́дѡва си́лою бж҃ества̀, са́мъ сы́й две́рь жи́зни.
Ѡ҆рꙋ́жїе грѣха̀ пре́жде бы́вшꙋю, долготерпѣли́ве, ѡ҆рꙋ́жїю крⷭ҇та̀ бж҃е́ственнагѡ поклоне́нїемъ показа́лъ є҆сѝ, бл҃госе́рде, всѧ́кѡ побѣжда́ющꙋ ѡ҆рꙋ̑жїѧ бѣсѡ́въ всѧ̑ и҆ кѡ́зни.
Цѣ́нꙋ за всѣ́хъ свою̀ кро́вь пре́жде и҆злїѧ́вый, ба́нею сле́зъ чи́стꙋ тѧ̀ содѣ́ловаетъ, прока́зою лю́тою болѣ́вшꙋю ѕлѣ́йшагѡ дѣѧ́нїѧ, всѧ́кѡ бытїѐ всѣ̑мъ даѧ́й.
Бг҃оро́диченъ: Сло́ва всѧ́кагѡ вы́шше є҆́сть бы́вшее на тебѣ̀, дв҃о: сло́во бо ѻ҆́ч҃ее въ тебѣ̀ бг҃олѣ́пнѡ всели́сѧ, разрѣше́нїе согрѣше́нїй всѣ̑мъ согрѣша́ющымъ сло́вомъ є҆ди́нѣмъ подава́ѧй.
Сѣда́ленъ, гла́съ и҃.
Подо́бенъ: Премꙋ́дрость и҆ сло́во:
Взыгра̑нїѧ всѧ̑ пло́ти ѡ҆бꙋзда́вши трꙋды̑ по́стническими, мꙋ́жественно ꙗ҆ви́ла є҆сѝ дꙋшѝ твоеѧ̀ мꙋдрова́нїе: крⷭ҇тъ бо гдⷭ҇ень ви́дѣти возжела́вши, самꙋ́ю себѐ, сла́внаѧ, мі́рови распѧ́ла є҆сѝ: ѿню́дꙋже и҆ къ ре́вности а҆́гг҃льскагѡ жи́тельства гото́внѡ возбꙋди́ла є҆сѝ себѐ, всебл҃же́ннаѧ. молѝ хрⷭ҇та̀ бг҃а, ѡ҆ставле́нїе согрѣше́нїй дарова́ти пра́зднꙋющымъ любо́вїю ст҃ꙋ́ю па́мѧть твою̀.
Сла́ва и҆ ны́нѣ, бг҃оро́диченъ:
Нбⷭ҇нꙋю две́рь и҆ ковче́гъ, всест҃ꙋ́ю го́рꙋ, свѣтоза́рный ѡ҆́блакъ воспои́мъ, нбⷭ҇нꙋю лѣ́ствицꙋ, слове́сный ра́й, є҆́ѵино и҆збавле́нїе, вселе́нныѧ всеѧ̀ вели́кое сокро́вище: ꙗ҆́кѡ въ не́й содѣ́ѧсѧ мі́рови сп҃се́нїе и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ твоемꙋ̀ сн҃ꙋ и҆ бг҃ꙋ, прегрѣше́нїй ѡ҆ставле́нїе дарова́ти бл҃гоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.
Пѣ́снь д҃.
І҆рмо́съ: Оу҆слы́шахъ, гдⷭ҇и:
Наслажда́шесѧ бога́тый бра́шномъ и҆ ѡ҆дѣѧ́ньми веселѧ́сѧ: ла́зарь же жела́ше насы́титисѧ крꙋпи́цъ ѿ сегѡ̀ трапе́зы.
Псѝ ᲂу҆́бѡ ѡ҆близова́хꙋ ѧ҆зы́комъ стрꙋ́пы ни́щагѡ ла́зарѧ, нра́вомъ быва́юще ко ᲂу҆бо́гомꙋ сострада́тельнѣйши бога́тагѡ.
Пред̾ враты̀ бога́тагѡ, сп҃се, валѧ́шесѧ дре́вле ла́зарь, мꙋ́чимь ꙗ҆́звами ᲂу҆бо́жества: тѣ́мже ны́нѣ прославлѧ́етсѧ.
Бг҃оро́диченъ: Є҆го́же родила̀ є҆сѝ, пречⷭ҇таѧ, молѝ воспѣва́ющымъ тѧ̀ сп҃сти́сѧ ѿ рабо́ты льсти́вомꙋ, ꙗ҆́кѡ є҆ди́на є҆сѝ на́мъ предста́тельство.
И҆́ный.
І҆рмо́съ: На крⷭ҇тѣ̀ твоѐ бж҃е́ственное и҆стоща́нїе:
Ꙗ҆́кѡ содѣ́тель человѣ́ческагѡ є҆стества̀, ꙗ҆́кѡ млⷭ҇ти и҆сто́чникъ и҆ бл҃госе́рдїѧ бога́тство, ᲂу҆ще́дрилъ є҆сѝ, чл҃вѣколю́бче, прибѣ́гшꙋю къ тебѣ̀, и҆ и҆схити́лъ є҆сѝ сїю̀ ѿ гꙋби́тельнагѡ ѕвѣ́рѧ.
Крⷭ҇тъ ви́дѣти потща́вшисѧ, ѡ҆зари́ласѧ є҆сѝ, марі́е, крⷭ҇тнымъ просвѣще́нїемъ крⷭ҇тꙋ̀ прїѻбщи́вшагѡсѧ ма́нїемъ бж҃е́ственнымъ, распе́ншисѧ мі́рови, досточꙋ́днаѧ.
Ѕлы́хъ вина̀ пре́жде мнѡ́гимъ бы́вшаѧ сла́стїю лꙋка́вою, преподо́бнаѧ, а҆́ки со́лнце просїѧ́вши, наста́вница ꙗ҆ви́сѧ всѣ̑мъ согрѣша́ющымъ.
Бг҃оро́диченъ: Оу҆́мъ превозшла̀ є҆сѝ и҆ нбⷭ҇ный мы́сленное нб҃о всѣ́хъ цр҃ѧ̀: внѣ̀ бо зако́нѡвъ є҆стества̀, чтⷭ҇аѧ, законода́телѧ и҆ созда́телѧ всѣ́хъ родила̀ є҆сѝ.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ:
На а҆враа́млихъ нѣ́дрѣхъ є҆гда̀ ᲂу҆зрѣ̀ ла́зарѧ, во свѣ́тѣ и҆ сла́вѣ веселѧ́щасѧ, бога́тый взыва́ше: ѻ҆́тче а҆враа́ме, поми́лꙋй мѧ̀ во ѻ҆гнѝ ѡ҆сꙋжде́ннаго и҆ ѧ҆зы́комъ лю́тѣ пламенꙋ́ема.
Наслади́лсѧ є҆сѝ бога́тствомъ житїѧ̀ веселѧ́сѧ, а҆враа́мъ глаго́ла бога́томꙋ: тѣ́мже мꙋ́чишисѧ здѣ̀ вѣ́чнѡ, во ѻ҆гнѝ сы́й: ни́щїи же ла́зарь въ весе́лїи несконча́емѣмъ ра́дꙋетсѧ.
Житїѧ̀ пре́лестїю бога́тъ бы́хъ, ꙗ҆́коже бога́тый житїѐ всѐ сластьмѝ и҆жди́вый, чл҃вѣколю́бче: но молю̀ щедрѡ́ты твоѧ̑, свободи́тисѧ ми ѿ ѻ҆гнѧ̀, ꙗ҆́коже сп҃се́сѧ ла́зарь.
Бг҃оро́диченъ: Мт҃рнее дерзнове́нїе къ сн҃ꙋ твоемꙋ̀ стѧжа́вши, всечⷭ҇таѧ, сро́днагѡ промышле́нїѧ ѡ҆ на́съ не пре́зри, мо́лимсѧ: ꙗ҆́кѡ тѧ̀ и҆ є҆ди́нꙋ ко влⷣцѣ ᲂу҆милостивле́нїе бл҃гопрїѧ́тное хрⷭ҇тїа́не предлага́емъ.
И҆́ный.
І҆рмо́съ: Бг҃оѧвле́нїѧ твоегѡ̀, хрⷭ҇тѐ:
Мѡѷсе́й просла́висѧ нѣ́когда на сїна́и, бж҃їѧ за̑днѧѧ та́инственнѡ ви́дѣвъ пресла́вный, преднаписꙋ́ѧ стра́нное та́инство: ны́нѣ же марі́а, маннопрїе́мнѣй ста́мнѣ ѡ҆́бразꙋ пречⷭ҇томꙋ те́плѣ припа́дши, а҆́гг҃льское житїѐ прїе́млетъ.
Бл҃голѣ́пїе хра́ма твоегѡ̀ и мы́сленное селе́нїе сла́вы твоеѧ̀ ѱало́мски вожделѣ́вши ви́дѣти, тво́й хра́мъ ѡ҆скверни́вшаѧ вопїѧ́ше: мы́сленными мл҃твами твоегѡ̀ хра́ма, неискꙋсомꙋ́жныѧ, хрⷭ҇тѐ, хра́мъ вседѣ́тельнагѡ дх҃а мѧ̀ сотворѝ.
Оу҆́дою пло́ти чрез̾ ѻ҆чеса̀ ᲂу҆лови́вшаѧ мно́гихъ и҆ сла́стїю кра́ткою снѣ́дь дїа́волꙋ си́хъ сотво́ршаѧ, ᲂу҆ловле́на бы́сть всеи́стиннѡ бж҃е́ственною бл҃года́тїю крⷭ҇та̀ чтⷭ҇на́гѡ, сладча́йшаѧ снѣ́дь хрⷭ҇то́ви бы́вши.
Бг҃оро́диченъ: Наꙋче́нъ та́инствꙋ сꙋ́щемꙋ въ тебѣ̀, пречⷭ҇таѧ, ли́къ прⷪ҇ро́ческїй та́инственными бг҃оглаго́ланьми тебѐ многоѡбра́знѡ предглаго́ла: ны́нѣ же марі́а, маннопрїе́мныѧ ста́мны ѡ҆́бразꙋ пречⷭ҇томꙋ припа́дши, бы́сть грѣ̑шнымъ спорꙋ́чница пред̾ бг҃омъ.
Пѣ́снь ѕ҃.
І҆рмо́съ: Ѡ҆чи́сти мѧ̀, сп҃се:
Бога́тый себѐ пла́мени ѻ҆́гненномꙋ ѡ҆сꙋдѝ сла́стнымъ житїе́мъ: ᲂу҆бо́гїй же ла́зарь, нищетꙋ̀ и҆збра́въ въ се́мъ житїѝ, сподо́бисѧ несконча́емыѧ ра́дости.
Въ нѣ́дрѣхъ а҆враа́млихъ ла́зарь сподо́бисѧ вѣ́чныѧ жи́зни, наслажда́ѧсѧ, хрⷭ҇тѐ, бога́тый же ѻ҆гню́ и҆ дꙋше́ю и҆ тѣ́ломъ ѡ҆сꙋди́сѧ мꙋ́чимь.
Ѡ҆сꙋжде́нъ бы́сть во ѻ҆́гнь бога́тый ла́зарѧ ра́ди: не ѡ҆сꙋдѝ менѐ ѡ҆каѧ́ннаго, молю́сѧ, чл҃вѣколю́бче гдⷭ҇и, но, ꙗ҆́кѡ ла́зарѧ, сподо́би мѧ̀ свѣ́та твоегѡ̀.
Бг҃оро́диченъ: Да и҆зба́вимсѧ ѿ лю́тыхъ прегрѣше́нїй мл҃твами твои́ми, бг҃омт҃и всечⷭ҇таѧ, и҆ да полꙋ́чимъ бж҃е́ственное просвѣще́нїе и҆з̾ тебє̀ несказа́ннѡ вопло́щшагѡсѧ сн҃а бж҃їѧ.
И҆́ный.
І҆рмо́съ: Бе́здна послѣ́днѧѧ:
Ра́дꙋютсѧ, марі́е, а҆́гг҃льскаѧ вѡ́инства, ра́вное си̑мъ житїѐ въ тебѣ̀, прпⷣбнаѧ, зрѧ́ще, и҆ сла́вꙋ гдⷭ҇еви зовꙋ́тъ.
Оу҆жаса́ютсѧ бѣсѡ́въ мра́чныхъ собра̑нїѧ терпѣ́нїѧ твоегѡ̀ крѣ́пости: ꙗ҆́кѡ жена̀, и҆ нага́ѧ, и҆ є҆ди́наѧ ди́внѡ си̑хъ посрами́ла є҆сѝ.
Просїѧ́ла є҆сѝ а҆́ки со́лнце, марі́е всехва́льнаѧ, и҆ пꙋсты́ню свѣтлостьмѝ всю̀ просвѣти́ла є҆сѝ: тѣ́мже и҆ менѐ твои́мъ свѣ́томъ ѡ҆свѣтѝ.
Бг҃оро́диченъ: А҆́гг҃ли, просвѣти́вшесѧ сла́вою ржⷭ҇тва̀ твоегѡ̀, дв҃о, на землѝ ми́ръ всѣ̑мъ на́мъ и҆ бл҃говоле́нїе человѣ́кѡмъ возопи́ша.
Конда́къ, гла́съ г҃.
Подо́бенъ: Дв҃а дне́сь:
Блꙋды̑ пе́рвѣе преиспо́лнена всѧ́ческими, хрⷭ҇то́ва невѣ́ста дне́сь покаѧ́нїемъ ꙗ҆ви́ласѧ є҆сѝ, а҆́гг҃льскагѡ жи́тельства вожделѣ́вши, де́моны ѡ҆рꙋ́жїемъ крⷭ҇та̀ попира́ющи: сегѡ̀ ра́ди невѣ́ста црⷭ҇твїѧ ꙗ҆ви́ласѧ є҆сѝ, марі́е пресла́внаѧ.
І҆́косъ: А҆́гницꙋ хрⷭ҇то́вꙋ и҆ дще́рь пѣ́сньми восхва́лимъ ны́нѣ, марі́ю пресла́внꙋю, ꙗ҆́кѡ ꙗ҆́ви́сѧ воспита́нїе є҆гѵ́птѧнъ, прельще́нїѧ же си́хъ всѧ̀кагѡ и҆збѣжѐ и҆ принесе́сѧ є҆ди́нѣй цр҃кви соверше́нное возраще́нїе, воздержа́нїемъ и҆ мл҃твою подвиза́ющисѧ па́че мѣ́ры человѣ́ческагѡ є҆стества̀: тѣ́мже и҆ возвы́си є҆ѧ̀ и҆ житїѐ и҆ дѣѧ́нїе є҆ди́нъ вседержи́тель марі́и пресла́вныѧ.
Пѣ́снь з҃.
І҆рмо́съ: Ѿ і҆ꙋде́и доше́дше:
Ꙗ҆́коже дре́вле і҆́ѡвъ на гно́ищи черве́й и҆ ка́лѣ лежа́ше, та́кожде и҆ ла́зарь пред̾ враты̀ бога́тагѡ сѣдѧ́ше, вопїѧ̀: ѻ҆тє́цъ бж҃е, бл҃гослове́нъ є҆сѝ.
Валѧ́ѧсѧ пред̾ враты̀ немилосе́рдагѡ бога́тагѡ дре́вле, ла́зарь жела́ше крꙋпи́цъ є҆гѡ̀ трапе́зы, и҆ никто́же даѧ́ше є҆мꙋ̀: но вмѣ́стѡ си́хъ ѡ҆брѣ́те а҆враа̑млѧ нѣ̑дра.
Немилосе́рдагѡ бога́тагѡ ча́сти, хрⷭ҇тѐ мо́й, и҆зба́ви мѧ̀, молю́сѧ, и҆ ᲂу҆бо́гомꙋ ла́зарю счини́въ мѧ̀, вопи́ти тебѣ̀ бл҃года́рнѡ сподо́би: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ: И҆з̾ ᲂу҆тро́бы дѣ́вственныѧ воплоти́всѧ, ꙗ҆ви́лсѧ є҆сѝ на сп҃се́нїе на́ше. тѣ́мже твою̀ мт҃рь вѣ́дꙋще бцⷣꙋ, бл҃года́рнѡ зове́мъ: ѻ҆тє́цъ на́шихъ бж҃е, бл҃гослове́нъ є҆сѝ.
И҆́ный.
І҆рмо́съ: Ѻ҆́троцы въ вавѷлѡ́нѣ:
Превели́кїй во ѻ҆тцѣ́хъ зѡсі́ма мꙋ́дрый, ѡ҆бходѧ̀ пꙋсты́ню, ви́дѣти прпⷣбнꙋю сподо́бисѧ, и҆ зове́тъ: бл҃гослове́нъ є҆сѝ бж҃е, ѻ҆тє́цъ на́шихъ.
Что̀, ѻ҆́тче, прише́лъ є҆сѝ ви́дѣти женꙋ̀ чꙋждꙋ́ю всѧ́кїѧ добродѣ́тели дѣ́тельныѧ; прпⷣбнаѧ вопїѧ́ше ста́рцꙋ. се́й же зове́тъ: бл҃гослове́нъ є҆сѝ, бж҃е ѻ҆тє́цъ на́шихъ.
Оу҆мертви́вши страсте́й твои́хъ взыгра̑нїѧ, бл҃же́ннаѧ, ко приста́нищꙋ безстра́стїѧ ны́нѣ притекла̀ є҆сѝ, зовꙋ́щи: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.
Бг҃оро́диченъ: Зачала̀ є҆сѝ неизрече́ннѡ дв҃а пребы́вши, пречⷭ҇таѧ, и҆ родила̀ є҆сѝ мі́рови сп҃се́нїе, хрⷭ҇та̀ бг҃а на́шего: тѣ́мже тѧ̀ всѝ вѣ́рнїи пѣ́сньми велича́емъ.
Пѣ́снь и҃.
І҆рмо́съ: Седмери́цею пе́щь:
Во ѡ҆де́ждꙋ багрѧ́нꙋю и҆ вѵ́ссонъ, и҆ порфѵ́рꙋ бога́тый дре́вле ѡ҆блача́шесѧ свѣ́тлѡ ѡ҆каѧ́нный: ᲂу҆бо́гїй же ла́зарь во вратѣ́хъ сегѡ̀ лю́тѣ лежа́ше, крꙋпи́цъ па́дающихъ ѿ трапе́зы хотѧ̀ насы́титисѧ, и҆ никто́же подаѧ́ше є҆мꙋ̀: тѣ́мже во сла́вѣ со хрⷭ҇то́мъ ца́рствꙋетъ.
Во вратѣ́хъ бога́тагѡ лежа́ше ла́зарь, согни́въ тѣ́ломъ ра́нами, и҆ хотѧ́ше насыща́тисѧ снѣ́ди, и҆ никто́же даѧ́ше є҆мꙋ̀: но и҆ псѝ сострада́тельнѡ ѧ҆зы́комъ ѡ҆близова́хꙋ гно́й и҆ стрꙋ́пы є҆гѡ̀. тѣ́мже въ раѝ сла́дости сподо́бисѧ.
Во сласте́хъ ѡ҆богатѣ́хъ, ꙗ҆́коже дре́вле бога́тый, ѡ҆блача́ѧйсѧ на всѧ́къ де́нь въ багрѧни́цꙋ: и҆ а҆́зъ, многоми́лостиве, въ сла́дости житїѧ̀ сегѡ̀ себѐ ѡ҆сꙋжда́ю, сластьмѝ и҆ пре́лестьми. тѣ́мже молю́сѧ тебѣ̀, хрⷭ҇тѐ, ѿ ѻ҆гнѧ̀ вѣ́чнагѡ и҆зба́витисѧ во всѧ̑ вѣ́ки.
Трⷪ҇ченъ: Трисвѣ́тлое бж҃ество̀, є҆ди́нственнꙋю зарю̀, сїѧ́ющꙋю ѿ є҆ди́нагѡ трїѷпоста́снагѡ є҆стества̀, роди́телѧ безнача́льна, є҆диноесте́ственна же сло́ва ѻ҆́ч҃а, и҆ сца́рствꙋюща є҆диносꙋ́щна дх҃а, ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
И҆́ный.
І҆рмо́съ: Оу҆жасни́сѧ боѧ́сѧ, нб҃о:
Глꙋбины̑ се́рдца и҆спытꙋ́ѧй, пре́жде бытїѧ̀ предвѣ́дый всѧ̑ на̑ша, ѿ нꙋ́жднагѡ житїѧ̀ и҆схити́лъ є҆сѝ прибѣ́гшꙋю къ тебѣ̀, сп҃се, тве́рдѡ твоемꙋ̀ чл҃вѣколю́бїю вопїю́щꙋю немо́лчнѡ: сщ҃е́нницы бл҃гослови́те, лю́дїе превозноси́те во всѧ̑ вѣ́ки.
Ѽ и҆змѣне́нїѧ честна́гѡ, къ лꙋ́чшемꙋ преложе́нїѧ твоегѡ̀, чтⷭ҇на́ѧ! ѽ любвѐ бж҃їѧ, возненави́дѣвшїѧ плѡтскі̑ѧ сла̑сти! ѽ вѣ́ры горѧ́щїѧ и҆ бж҃е́ственныѧ, всехва́льнаѧ марі́е! тѧ̀ вѣ́рнѡ хва́лимъ и҆ превозно́симъ во всѧ̑ вѣ́ки.
Ѡ҆брѣла̀ є҆сѝ болѣ́зней возме́здїе и҆ трꙋдѡ́въ твои́хъ воздаѧ́нїе, честна́ѧ марі́е, и҆́миже низложи́ла є҆сѝ ᲂу҆бі́йцꙋ врага̀: и҆ ны́нѣ со а҆́гг҃лы зове́ши, пѣ́снь немо́лчнѡ вопїю́щи и҆ превозносѧ́щи хрⷭ҇та̀ во вѣ́ки.
Бг҃оро́диченъ: Всего̀ ѡ҆бнови́ мѧ всѣ́хъ вѣкѡ́въ влⷣка, бл҃гости ра́ди, во ᲂу҆тро́бѣ твое́й, чтⷭ҇аѧ, не растли́въ ѻ҆боегѡ̀ є҆стества̀ сво́йствъ: ѿню́дꙋже тѧ̀, ꙗ҆́кѡ винꙋ̀ на́шегѡ сп҃се́нїѧ, пѣ́сньми воспѣва́емъ во всѧ̑ вѣ́ки.
Пѣ́снь ѳ҃.
І҆рмо́съ: Тѧ̀ неискꙋсобра́чнꙋю:
Ни́щагѡ ла́зарѧ, хрⷭ҇тѐ, содѣ́лай мѧ̀, молю́сѧ, сласте́й возжелѣ̑нїѧ моѧ̑ потреблѧ́ѧ, ꙗ҆́кѡ є҆стество́мъ бг҃ъ: добродѣ́тельми же мѧ̀ бога́та сотворѝ, да вѣ́рою въ пѣснопѣ́нїихъ велича́ю тѧ̀.
Бога́тъ и҆ немилосе́рдъ, сы́й, лю́тѣ презрѣ́хъ ᲂу҆́мъ мо́й, вѣ́рою пред̾ враты̀ твои́хъ за́повѣдей, чл҃вѣколю́бче, пове́рженъ: но ꙗ҆́кѡ сострада́теленъ и҆ щедролюби́въ возста́ви, ꙗ҆́коже дре́вле четверодне́внаго дрꙋ́га ла́зарѧ.
Всѝ наꙋчи́хомсѧ при́тчи влⷣчней: всѝ ᲂу҆̀бо вѣ́рнїи возненави́димъ бога́тагѡ немилосе́рдїе, да мꙋ́ки и҆збѣ́гнемъ и҆ въ нѣ́дрѣхъ а҆враа́млихъ при́снѡ ликꙋ́емъ.
Бг҃оро́диченъ: Тѧ̀, неви́димаго бг҃а носи́вшꙋю во ѡ҆б̾ѧ́тїихъ, на нб҃сѣ́хъ воспѣва́емаго ѿ всѧ́кїѧ тва́ри и҆ тобо́ю на́мъ да́рꙋющаго всегда̀ сп҃се́нїе, въ вѣ́рѣ велича́емъ.
И҆́ный.
І҆рмо́съ: Не рыда́й ѡ҆ мнѣ̀, мт҃и:
Оу҆до́бь претерпѣ́ла є҆сѝ, ма́ти, пꙋсты́нный трꙋ́дъ, ᲂу҆крѣплѧ́ема держа́вною си́лою хрⷭ҇то́вою: сквє́рнаѧ бо помышлє́нїѧ находѧ̑щаѧ ᲂу҆гаша́ла є҆сѝ стрꙋѧ́ми бж҃е́ственныхъ сле́зъ, чи́стаѧ, по́стникѡвъ ве́рхъ, прпⷣбныхъ похвало̀.
Свѣтлѣ́йшими лꙋча́ми просвѣща́етъ тѧ̀ є҆ди́на свѣ́тъ ро́ждшаѧ хрⷭ҇та̀, дв҃а и҆ чтⷭ҇аѧ, стра́шнꙋ врагѡ́мъ тѧ̀ поста́вивши, честна́ѧ: ꙗ҆́вственнꙋ же всѣ̑мъ ꙗ҆влѧ́етъ тѧ̀, марі́е, по́стникѡвъ красото̀, прпⷣбныхъ ᲂу҆твержде́нїе.
Ѡ҆ста́вивши мꙋ́дрѡ земна̑ѧ всѧ̑, жили́ще честно́е дх҃а ꙗ҆ви́ласѧ є҆сѝ: ѿ мїрски́хъ ᲂу҆̀бо лю́тыхъ свободи́тисѧ, молѝ є҆ди́наго хрⷭ҇та̀ свободи́телѧ, вѣ́рнѡ соверша́ющымъ бж҃е́ственнꙋю па́мѧть твою̀.
Бг҃оро́диченъ: Ѿ зако́нѡвъ є҆стества̀, ѻ҆трокови́це, па́че є҆стества̀ ᲂу҆таи́вшисѧ, мла́до ѻ҆троча̀ на землѝ родила̀ є҆сѝ, чтⷭ҇аѧ, законода́вца сꙋ́ща и҆ ве́тха де́ньми, мы́сленное нб҃о всѣ́хъ творца̀: тѣ́мже вѣ́рою и҆ любо́вїю тѧ̀ ᲂу҆бл҃жа́емъ.
Свѣти́ленъ воскрⷭ҇ный. Та́же прпⷣбныѧ.
Подо́бенъ: Нб҃о ѕвѣзда́ми:
Ѡ҆́бразъ покаѧ́нїѧ и҆́мамы тѧ̀, всепрпⷣбнаѧ марі́е: хрⷭ҇та̀ молѝ, во вре́мѧ поста̀, семꙋ̀ на́мъ дарова́тисѧ, ꙗ҆́кѡ да въ вѣ́рѣ и҆ любвѝ тѧ̀ пѣ́сньми восхвалѧ́емъ.
Бг҃оро́диченъ: Сла́дость а҆́гг҃лѡвъ, скорбѧ́щихъ ра́дость, хрⷭ҇тїа́нъ предста́тельнице, дв҃о мт҃и гдⷭ҇нѧ, застꙋпѝ на́съ и҆ и҆зба́ви ѿ вѣ́чныхъ мꙋ́къ.
На хвали́техъ стїхи̑ры воскрⷭ҇ны ѻ҆смогла́сника д҃, и҆ а҆нато́лїєвы д҃.
Та́же глаго́лемъ сті́хъ: Воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀.
И҆ пое́мъ самогла́сенъ, гла́съ а҃:
Нѣ́сть црⷭ҇тво бж҃їе пи́ща и҆ питїѐ, но пра́вда и҆ воздержа́нїе со свѧ́тостїю: тѣ́мже не бога́тїи вни́дꙋтъ въ нѐ, но є҆ли́цы сокрѡ́вища своѧ̑ въ рꙋ́ки ни́щихъ влага́ютъ. сїѧ̑ и҆ дв҃дъ прⷪ҇ро́къ ᲂу҆чи́тъ глаго́лѧ: пра́веденъ мꙋ́жъ ми́лꙋѧй ве́сь де́нь, наслажда́ѧйсѧ гдⷭ҇еви, и҆ во свѣ́тѣ ходѧ́й, се́й не по́ткнетсѧ, сїѧ̑ же всѧ̑ къ наꙋче́нїю на́шемꙋ написа́шасѧ, ꙗ҆́кѡ да постѧ́щесѧ бл҃госты́ню твори́мъ, и҆ да́стъ на́мъ гдⷭ҇ь вмѣ́стѡ земны́хъ нбⷭ҇наѧ.
Сла́ва, па́ки то́йже. И҆ ны́нѣ: Пребл҃гослове́на є҆сѝ:
Славосло́вїе вели́кое. И҆ ѿпꙋ́стъ.
Сла́ва, и҆ ны́нѣ: стїхи́ра є҆ѵⷢ҇льскаѧ, и҆ ча́съ а҃-й.
На лїтꙋргі́и: Бл҃жє́нна гла́са. Прокі́менъ по гла́сꙋ а҆пⷭ҇ла. А҆пⷭ҇лъ ко є҆вре́ємъ, зача́ло тк҃а ѿ полꙋ̀: и҆ прпⷣбныѧ, къ гала́тѡмъ, зача́ло с҃и. А҆ллилꙋ́їа гла́са. Є҆ѵⷢ҇лїе ѿ ма́рка, зача́ло м҃з. И҆ прпⷣбныѧ, ѿ лꙋкѝ, зача́ло л҃г. Прича́стенъ: Хвали́те гдⷭ҇а съ нб҃съ:
На трапе́зѣ ᲂу҆чрежда́емсѧ, ꙗ҆́коже и҆ въ пре́жнихъ недѣ́лѧхъ.
Въ тꙋ́южде недѣ́лю ве́чера.
на Гдⷭ҇и воззва́хъ, поста́вимъ стїхѡ́въ і҃: и҆ пое́мъ д҃ ᲂу҆мили́тєльны
гла́са ѻ҆смогла́сника: и҆ трїѡ́ди подо́бны, гла́съ а҃.
Подо́бенъ: Прехва́льнїи мч҃нцы:
Ѡ҆бнища́въ бога́тъ сы́й, хрⷭ҇тѐ, человѣ́ки ѡ҆богати́лъ є҆сѝ безсме́ртїемъ и҆ свѣ́тлостїю: тѣ́мже мѧ̀, ѡ҆бнища́вшаго сластьмѝ житїѧ̀, добродѣ́тельми ѡ҆богатѝ, и҆ ни́щемꙋ ла́зарю сопричтѝ, и҆збавлѧ́ѧ мѧ̀ ѿ мꙋ́ки бога́тагѡ и҆ ѿ гее́нны предлежа́щїѧ мнѣ̀.
Ѕло́бою ѡ҆богати́хсѧ лю́тѣ, и҆ сла́дость возлюби́хъ, и҆ сꙋ́щихъ въ житїѝ наслади́хсѧ сласте́й, гдⷭ҇и, и҆ ѻ҆гню̀ гее́нны пови́ненъ ꙗ҆ви́хсѧ, презрѣ́въ, ꙗ҆́кѡ ла́зарѧ, гла́домъ та́ющїй ᲂу҆́мъ мо́й, пред̾ враты̀ бж҃е́ственныхъ дѣѧ́нїй пове́рженный: ᲂу҆ще́дри мѧ̀, влⷣко.
И҆́на стїхи́ра, гла́съ то́йже.
Подо́бенъ: Ѡ҆́блакъ тѧ̀ свѣ́тлый:
Шестꙋ́ю честны́хъ постѡ́въ седми́цꙋ ᲂу҆се́рднѡ начина́юще, гдⷭ҇еви предпра́зднственное пѣ́нїе ва́їй принесе́мъ, вѣ́рнїи, грѧдꙋ́щемꙋ во сла́вѣ си́лою бж҃ества̀ во і҆ерⷭ҇ли́мъ, ᲂу҆мертви́ти сме́рть: тѣ́мже ᲂу҆гото́вимъ бл҃гоче́стнѡ побѣ́ды зна́мєнїѧ, вѣ̑тви добродѣ́телей, ѡ҆са́нна вопїю́ще творцꙋ̀ всѧ́ческихъ.
И҆ мине́и г҃. Сла́ва, и҆ ны́нѣ, бг҃оро́диченъ.
Вхо́дъ. Свѣ́те ти́хїй: Прокі́менъ, гла́съ и҃: Да́лъ є҆сѝ достоѧ́нїе: со стїхи̑ є҆гѡ̀. И҆щѝ въ недѣ́лю а҃ поста̀. И҆ прѡ́чаѧ, ꙗ҆́коже ѡ҆бы́чно.
На стїхо́внѣ самогла́сенъ днѐ, два́жды, гла́съ а҃:
Чꙋ́денъ сп҃совъ на́съ ра́ди чл҃вѣколюби́вый нра́въ: разꙋмѣ́нїе бо бꙋ́дꙋщихъ ꙗ҆́кѡ настоѧ́щихъ стѧжа́въ, ла́зарево и҆ бога́тагѡ житїѐ показа̀. ѻ҆бою̀ ᲂу҆̀бо коне́цъ смотрѧ́юще, ѻ҆́вагѡ ᲂу҆́бѡ бѣжи́мъ немилосе́рдїѧ и҆ безчеловѣ́чїѧ, ѻ҆́вагѡ же поревнꙋ́имъ тве́рдости и҆ терпѣ́нїю, ꙗ҆́кѡ да съ ни́мъ во а҆враа́млихъ нѣ́дрѣхъ грѣ́еми вопїемъ: правосꙋ́де гдⷭ҇и, сла́ва тебѣ̀.
Мч҃нченъ: Мл҃твами, гдⷭ҇и, всѣ́хъ ст҃ы́хъ и҆ бцⷣы, тво́й ми́ръ да́ждь на́мъ, и҆ поми́лꙋй на́съ, ꙗ҆́кѡ є҆ди́нъ ще́дръ.
Сла́ва, и҆ ны́нѣ, бг҃оро́диченъ:
Нбⷭ҇ныхъ чинѡ́въ ра́дованїе, сꙋ́щихъ на землѝ человѣ́кѡвъ крѣ́пкое предста́тельство, пречⷭ҇таѧ дв҃о, сп҃си́ ны къ тебѣ̀ прибѣга́ющыѧ: ꙗ҆́кѡ на тѧ̀ ᲂу҆пова́нїе по бз҃ѣ, бцⷣе,возложи́хомъ.