Неделя второй седмицы, Григория Паламы
Недѣ́лѧ втора́ѧ ст҃ы́хъ постѡ́въ.
Пое́тсѧ настоѧ́щее послѣ́дованїе, во ст҃ы́хъ ѻ҆тца̀ на́шегѡ григо́рїа а҆рхїепⷭ҇кпа, ѳессалоні́кскагѡ чꙋдотво́рца, пала́мы.
Сложе́нное ѿ всест҃ѣ́йшагѡ патрїа́рха фїлоѳе́а.
Въ сꙋббѡ́тꙋ ве́чера,
поста́вимъ стїхѡ́въ і҃. И҆ пое́мъ стїхи̑ры воскрⷭ҇ны г҃, и҆ а҆нато́лїєвы г҃, и҆ настоѧ́щыѧ ст҃а́гѡ на д҃, гла́съ в҃.
Подо́бенъ: Кі́ими похва́льными вѣнцы̑:
Кі́ими похва́льными пѣ́сньми воспое́́мъ і҆ера́рха, бг҃осло́вїѧ трꙋбꙋ̀, ѻ҆гнедꙋхновє́ннаѧ ᲂу҆ста̀ бл҃года́ти, чтⷭ҇но́е дх҃а прїѧ́телище, столпа̀ цр҃кве непоколеби́маго, вели́кое вселе́нныѧ ра́дованїе, рѣкꙋ̀ премꙋ́дрости, свѣ́та свѣти́льника, ѕвѣздꙋ̀ ꙗ҆́снꙋю, тва́рь просвѣща́ющꙋю;
Кі́ими пѣснопѣ́нїй цвѣ̑ты вѣнча́емъ і҆ера́рха, бл҃гоче́стїѧ побо́рника и҆ нече́стїѧ проти́вника, те́плаго вѣ́ры предста́телѧ, вели́каго наста́вника и҆ ᲂу҆чи́телѧ, цѣвни́цꙋ всесогла́снꙋю дх҃а, златосїѧ́ющїй ѧ҆зы́къ, и҆сто́чникъ и҆злива́ющїй то́ки и҆сцѣле́нїй вѣ̑рнымъ, вели́каго и҆ досточꙋ́днаго григо́рїа;
Кі́ими земноро́днїи ᲂу҆стна́ми восхва́лимъ і҆ера́рха, цр҃кве ᲂу҆чи́телѧ, свѣ́та бж҃е́ственнагѡ проповѣ́дника, нбⷭ҇нотаи́нника трⷪ҇цы, ве́лїе мона́шествꙋющихъ ᲂу҆краше́нїе, дѣѧ́нїемъ и҆ видѣ́нїемъ сїѧ́ющаго, ѳессалоні́кскꙋю похвалꙋ̀, сограждани́на сꙋ́щаго мѷрото́чномꙋ на нб҃сѣ́хъ бж҃е́ственномꙋ и҆ пречꙋ́дномꙋ дими́трїю;
Сла́ва, гла́съ ѕ҃: Прпⷣбне, требл҃же́нне, ст҃ѣ́йшїй ѻ҆́тче, па́стырю до́брый и҆ а҆рхїпа́стырѧ хрⷭ҇та̀ ᲂу҆ч҃нчѐ, положи́вый дꙋ́шꙋ за ѻ҆́вцы: са́мъ и҆ ны́нѣ, ѻ҆́тче на́шъ бг҃оно́сне григо́рїе, и҆спросѝ мл҃твами твои́ми, дарова́тисѧ на́мъ ве́лїей млⷭ҇ти.
И҆ ны́нѣ, бг҃оро́диченъ, пе́рвый гла́са. На лїті́и стїхи́ра хра́ма. Сла́ва, и҆ ны́нѣ, бг҃оро́диченъ. На стїхо́внѣ по а҆лфави́тꙋ.
Сла́ва, гла́съ и҃: Бо́дрый ѧ҆зы́къ тво́й ко ᲂу҆чи́тельствꙋ, во ᲂу҆шесѣ́хъ серде́чныхъ гласѧ́й,лѣни́выхъ дꙋ́шы возставлѧ́етъ, и҆ бг҃овѣща́нными словесы̀ твои́ми лѣ́ствица ѡ҆брѣта́етсѧ, сꙋ́щыѧ ѿ землѝ къ бг҃ꙋ возносѧ́щаѧ. тѣ́мже, григо́рїе, ѳессалі́и чꙋ́до, не преста́й молѧ́сѧ хрⷭ҇тꙋ̀, просвѣти́ти бж҃е́ственнымъ свѣ́томъ чтꙋ́щыѧ тѧ̀.
И҆ ны́нѣ, бг҃оро́диченъ: Безневѣ́стнаѧ дв҃о: Ны́нѣ ѿпꙋща́еши: Трист҃о́е. Тропа́рь: Бцⷣе дв҃о: три́жды.
И҆ про́чее послѣ́дованїе бдѣ́нїѧ.
На ᲂу҆́трени,
по шестоѱа́лмїи, Бг҃ъ гдⷭ҇ь: Тропа́рь воскрⷭ҇нъ, два́жды. Сла́ва, тропа́рь ст҃а́гѡ, гла́съ и҃:
Правосла́вїѧ свѣти́льниче, цр҃кве ᲂу҆твержде́нїе и҆ ᲂу҆чи́телю, мона́хѡвъ добро́то, бг҃осло́вѡвъ побо́рниче непребори́мый, григо́рїе чꙋдотво́рче, ѳессалоні́кскаѧ похвало̀, проповѣ́дниче бл҃года́ти, моли́сѧ при́снѡ сп҃сти́сѧ дꙋша́мъ на́шымъ.
И҆ ны́нѣ бг҃оро́диченъ въ то́йже гла́съ: На́съ ра́ди рожде́йсѧ: И҆ ѡ҆бы́чное стїхосло́вїе. И҆ чте́нїе въ шестодне́вцѣ. Степє́нна гла́са. Всѧ́кое дыха́нїе: Є҆ѵⷢ҇лїе ᲂу҆́треннее. Воскрⷭ҇нїе хрⷭ҇то́во: ѱало́мъ н҃. Сла́ва: Покаѧ́нїѧ ѿве́рзи мѝ двє́ри: И҆ ны́нѣ: На сп҃се́нїѧ стєзѝ: Та́же на гла́съ ѕ҃: Поми́лꙋй мѧ̀, бж҃е: Та́же: Мно́жєства содѣ́ѧнныхъ мно́ю лю́тыхъ:
Канѡ́нъ ѻ҆смогла́сника воскрⷭ҇нъ, со і҆рмосо́мъ на д҃: и҆ трїѡ́ди настоѧ́щїй на д҃: и҆ ст҃а́гѡ на ѕ҃. Канѡ́нъ трїѡ́ди, гла́съ и҃.
Пѣ́снь а҃.
І҆рмо́съ: Колесницегони́телѧ фараѡ́на погрꙋзѝ:
Воспрїе́мше съ те́плыми слеза́ми гла́съ блꙋ́днагѡ тебѣ̀ ѻ҆ц҃ꙋ̀ всѣ́хъ и҆ бг҃ꙋ припа́даемъ, вопїю́ще: согрѣши́хомъ ѿ тебє̀ ᲂу҆дали́вшесѧ и҆ блꙋдꙋ̀ порабо́тавше, прїимѝ на́ше покаѧ́нїе.
Ца́рское преѡби́дѣвъ бл҃горо́дїе, є҆́же дарова́лъ є҆сѝ мнѣ̀, сло́ве, менє̀ ра́ди человѣ́къ бы́вый: лю́тѣ ѡ҆сꙋди́хсѧ ᲂу҆годи́ти свинїѧ́мъ, грѣха̀ вкꙋше́нїемъ. но пощадѝ мѧ, сп҃се, милосе́рдїемъ твои́мъ.
На колѣ̑нꙋ па́дающа мѧ̀, влⷣко гдⷭ҇и, ты̀ прите́къ прїимѝ, ꙗ҆́коже пре́жде блꙋ́днаго, и҆ рꙋка́ма ѡ҆б̾е́мъ, пода́ждь мѝ ѡ҆́бразы твоегѡ̀ сп҃се́нїѧ, вмѣ́стѡ нае́мника, человѣколю́бче, па́ки твоего̀ сы́на сотворѧ́ѧ.
Бг҃оро́диченъ: Бг҃оѧвле́нїѧ сподо́бисѧ тобо́ю, бг҃ора́дованнаѧ, человѣ́ческое є҆стество̀: є҆ди́на бо хода́таица, дв҃о, была̀ є҆сѝ бг҃ꙋ и҆ человѣ́кѡмъ. тѣ́мъ ꙗ҆́кѡ бж҃їю роди́тельницꙋ тѧ̀ всѝ досто́йнѡ сла́вимъ.
И҆́ный канѡ́нъ, ст҃а́гѡ, гла́съ д҃.
І҆рмо́съ: Ѿве́рзꙋ ᲂу҆ста̀ моѧ̑:
Ѿ ри́торѡвъ бг҃одꙋхнове́ннїи, и҆ ѿ бг҃осло́вѡвъ и҆зрѧ́днїи, и҆ ѧ҆зы́цы бг҃овѣща́ннїи, прїиди́те, сни́дитесѧ въ соедине́нїе, воспѣ́ти по достоѧ́нїю дх҃о́внаго ри́тора бж҃е́ственнаго григо́рїа.
Сто́лпъ вѣ́ры, цр҃кве побо́рникъ, вели́кїй григо́рїй да восхва́литсѧ мно́ю, всеизрѧ́дный па́стырь ѳессалоні́кскїй, красота̀ чи́на ст҃и́тельскагѡ вои́стиннꙋ.
Ѿ младе́нства возжела́лъ є҆сѝ лꙋ́чшагѡ житїѧ̀, ѻ҆́тче, и҆ ѿ ю҆́ности возлюби́лъ є҆сѝ соверше́нное мꙋдрова́нїе, и҆ кꙋпнонра́венъ и҆ є҆диномꙋ́дренъ показа́лсѧ є҆сѝ соиме́нномꙋ тебѣ̀, бж҃е́ственне григо́рїе.
Бг҃оро́диченъ: Бꙋ́ди мѝ, всенепоро́чнаѧ, пꙋ́ть жи́зни, веды́й мѧ̀ къ бж҃е́ствєннымъ селе́нїємъ: заблꙋди́хъ бо, и҆ къ про́пастемъ ѕло́бы пополза́юсѧ, ѿ ни́хже мѧ̀ возведѝ хода́тайствомъ твои́мъ.
Пѣ́снь г҃.
І҆рмо́съ: Нбⷭ҇нагѡ крꙋ́га:
Оу҆боѧ́всѧ мои́хъ дѣ́лъ и҆ дале́чнагѡ ѿше́ствїѧ, и҆ расточе́ннагѡ твоегѡ̀ бога́тства, є҆го́же и҆жди́хъ въ блꙋ́дныхъ стремле́нїихъ, въ покаѧ́нїи къ тебѣ̀ зовꙋ̀, ѻ҆ц҃ꙋ̀ и҆ бг҃ꙋ моемꙋ̀: согрѣши́хъ, сп҃сѝ мѧ̀.
На землѝ согрѣша́ѧ, нб҃сѐ ᲂу҆боѧ́хсѧ: си́це бо мѝ бꙋ́детъ сꙋ́дъ тогда̀ препира́ѧй, є҆гда̀ всѧ́чєскаѧ предста́нꙋтъ, сло́ве, првⷣнымъ сꙋдо́мъ сꙋди̑маѧ.
Мра̑чнаѧ и҆ сквє́рнаѧ помышлє́нїѧ пита́хꙋ мѧ̀, є҆гда̀ ѿ тебє̀, сп҃се, дале́че бы́хъ а҆́зъ блꙋ́дный, ны́нѣ же зовꙋ́ ти: согрѣши́хъ, согрѣши́хъ, сп҃сѝ те́плѣ прибѣга́ющаго къ милосе́рдїю твоемꙋ̀.
Бг҃оро́диченъ: А҆да́мово смѣше́нїе ѡ҆божи́сѧ, дв҃о: и҆з̾ чре́ва бо твоегѡ̀ бг҃ъ плотоно́сецъ ꙗ҆ви́сѧ, и҆́мже воззва́ни бы́хомъ ѿ дре́внѧгѡ ѡ҆сꙋжде́нїѧ, прельще́ни дре́вле наде́ждею ѡ҆боже́нїѧ.
И҆́ный.
І҆рмо́съ: Твоѧ̑ пѣсносло́вцы, бцⷣе:
Стрꙋи̑ бж҃е́ственныхъ ᲂу҆че́нїй твои́хъ сохранѧ́юще, всѧ́кїѧ ко́зни ѕлосла́вныхъ и҆збѣга́емъ, и҆ всѧ̑ полкѝ си́хъ твои́ми сщ҃е́нными писа́ньми прогонѧ́емъ, григо́рїе.
Премꙋ́дрѡсти бꙋ̑їѧ ѕлосла́вныхъ разрꙋши́лъ є҆сѝ, блаже́нне, бж҃їю премꙋ́дрость ѵ҆поста́снꙋю и҆мѣ́ѧ въ се́рдцѣ твое́мъ, є҆́юже съ шꙋ́момъ порази́лъ є҆сѝ гнила̑ѧ си́хъ шата̑нїѧ.
Оу҆мертви́въ пло́ти тлѣ́нныѧ всѧ́кое сладостра́стїе, премꙋ́дре, по́стнически ѡ҆живи́лъ є҆сѝ дꙋшѝ твоеѧ̀ движє́нїѧ, и҆ сїю̀ бж҃е́ственный ѻ҆рга́нъ бг҃осло́вїѧ показа́лъ є҆сѝ.
Бг҃оро́диченъ: Въ ра́зꙋмѣ ᲂу҆ма̀ и҆ произволе́нїи, стꙋ́дное и҆ блꙋ́дное житїѐ прилѣ́жнѡ возлюби́хъ: но любо́вїю бж҃е́ственною мѧ̀ свѧжѝ, мл҃твами твои́ми, дв҃о бг҃оневѣ́стнаѧ.
Конда́къ, гла́съ д҃:
Ны́нѣ вре́мѧ дѣ́лательное ꙗ҆ви́сѧ, при две́рехъ сꙋ́дъ. воста́немъ ᲂу҆̀бо постѧ́щесѧ, принесе́мъ сле́зы ᲂу҆миле́нїѧ съ ми́лостынѧми, зовꙋ́ще: согрѣши́хомъ па́че песка̀ морска́гѡ: но ѡ҆сла́би,содѣ́телю всѣ́хъ, ꙗ҆́кѡ да прїи́мемъ нетлѣ̑нныѧ вѣнцы̀.
Сѣда́ленъ, гла́съ д҃.
Подо́бенъ: Ско́рѡ предварѝ:
Прельще́нїе ѕлосла́вныхъ попали́лъ є҆сѝ, премꙋ́дре, вѣ́рꙋ правосла́вныхъ и҆з̾ѧсни́лъ є҆сѝ до́брѣ, и҆ мі́ръ просвѣти́лъ є҆сѝ: тѣ́мже побѣдоно́сный побѣди́тель показа́лсѧ є҆сѝ, сто́лпъ це́ркве, и҆́стинный і҆ера́рхъ. молѧ́сѧ не преста́й хрⷭ҇тꙋ̀, сп҃сти́сѧ всѣ̑мъ на́мъ.
Сла́ва, то́йже.
И҆ ны́нѣ, бг҃оро́диченъ: Ско́рѡ прїимѝ, влⷣчце, молє́нїѧ на̑ша, и҆ сїѧ̑ принесѝ сн҃ꙋ твоемꙋ̀ и҆ бг҃ꙋ, гпⷭ҇жѐ всенепоро́чнаѧ: погасѝ ѡ҆бстоѧ̑нїѧ ѕлосла́вныхъ, ᲂу҆кротѝ кѡ́зни ѧ҆зыковре́дныхъ, и҆ низложѝ де́рзость безбо́жныхъ, воѡрꙋжа́ющихсѧ, пречⷭ҇таѧ, на рабы̑ твоѧ̑.
Пѣ́снь д҃.
І҆рмо́съ: Ты̀ моѧ̀ крѣ́пость, гдⷭ҇и:
Ѿмета́ѧй повелѣ́нїй ѻ҆ц҃а моегѡ̀ бога́тство, є҆́же мѝ дарова́лъ є҆сѝ, въ сладостра́стїи и҆жди́хъ а҆́зъ ѡ҆каѧ́нный, и҆ бы́хъ бж҃е́ственныхъ дарова́нїй ни́щъ. тѣ́мже ка́ющасѧ со и҆сповѣ́данїемъ не ѡ҆мерзѝ менѐ, влⷣко гдⷭ҇и.
Бг҃олѣ́пнѡ воспрїи́мъ нищетꙋ̀ мою̀, менѐ, дале́че ѿ тебє̀ дре́вле бы́вшаго, собо́ю къ себѣ̀ присвоѧ́еши, и҆ ѡ҆сщ҃а́еши мѧ̀ къ весе́лїю, чл҃вѣколю́бче, тѣ́ло твоѐ бж҃е́ственное, сло́ве, воззва́нїе моѐ, весе́лїе творѧ̀.
Да дале́че слеза́ми непреста́нными ѿ вѣ́чныѧ мꙋ́ки и҆зба́вимсѧ, ю҆́же ᲂу҆гото́ва бг҃ъ лꙋка̑вымъ дꙋховѡ́мъ, вопїе́мъ ꙗ҆́кѡ блꙋ́дный: согрѣши́хомъ тѝ, ѻ҆́ч҃е, но прїимѝ всѧ̑ ны̀ прибѣга́ющыѧ ко твое́й млⷭ҇ти.
Бг҃оро́диченъ: Собезнача́льное ѻ҆ц҃ꙋ̀ и҆ дх҃ꙋ сло́во сы́й, ѿ неискꙋсомꙋ́жныѧ дв҃ы ражда́етсѧ кромѣ̀ зако́на, пребы́въ ᲂу҆́бѡ є҆́же бѣ̀, пребы́въ же па́ки є҆́же ѿ на́съ прїѧ́тъ. во двою́ бо є҆стєствꙋ̀ є҆ди́нъ сн҃ъ є҆́сть, во ѻ҆бою̀ хранѧ̀ є҆сте́ственное.
И҆́ный.
І҆рмо́съ: Неизслѣ́дный бж҃їй совѣ́тъ:
Ѿве́рзъ ᲂу҆ста̀ твоѧ̑, ѻ҆́тче премꙋ́дре, бж҃їю премꙋ́дрость проповѣ́далъ є҆сѝ, є҆́йже поꙋча́лсѧ є҆сѝ въ се́рдцѣ твое́мъ при́снѡ: и҆ варлаа́ма сꙋ́етнаго несмы́сленна и҆ безꙋ́мна показа́лъ є҆сѝ.
Заше́лъ є҆сѝ въ зе́млю, сладча́йшее со́лнце, зако́номъ є҆стества̀: возсїѧ́еши же заꙋ́тра со хрⷭ҇то́мъ со́лнце невече́рнее, всѧ̑ назира́ѧ мл҃твами твои́ми.
Ꙗ҆вѝ тѧ бл҃года́ть бж҃їѧ, бл҃же́нне, похвалꙋ̀ и҆ ᲂу҆твержде́нїе преве́лїе правосла́вныхъ, и҆ па́стырѧ бл҃га́го, и҆ бг҃осло́ва втора́го, и҆ ста́да стра́жа неꙋсы́пнаго.
Бг҃оро́диченъ: Оу҆шеса̀ дꙋшє́внаѧ мнѣ̀ ѿве́рзи, мт҃и бж҃їѧ, роди́вшаѧ ѿве́рзшаго пре́жде ᲂу҆шеса̀ глꙋхо́мꙋ, и҆ бж҃е́ствєннымъ словесє́мъ внима́ти и҆ и҆сполнѧ́ти сподо́би.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ:
Бога́тства и҆ дарова́нїй бж҃е́ственныхъ лиши́хсѧ, и҆ въ да́льнюю странꙋ̀ прїидо́хъ, бл҃ги́хъ живо́тныхъ гла́домъ та́ѧ: но ты̀ мѧ̀, ѻ҆́ч҃е, ꙗ҆́кѡ бл҃гі́й, дре́внїѧ сла́вы и҆ сла́дости,бл҃госе́рдїѧ ра́ди твоегѡ̀, и҆спо́лни.
По́мыслъ блꙋ́днагѡ, въ блꙋдѣ̀ житїѐ и҆жди́вша, прїи́мше, ко ѻ҆ц҃ꙋ̀ млⷭ҇тивомꙋ притеце́мъ,несꙋмнѣ́нною вѣ́рою и҆ сокрꙋше́нїемъ се́рдца, ꙗ҆́кѡ да согрѣше́нїй ѡ҆ставле́нїе прїи́мемъ.
Не коснѝ, дꙋшѐ моѧ̀, въ да́льней странѣ̀ пребыва́ющи: но тецы̀ вско́рѣ, бг҃ꙋ и҆ ѻ҆ц҃ꙋ̀ и҆сповѣ́дающисѧ, да прїи́меши разрѣше́нїе тѣ́хъ, ꙗ҆́же ѕлѣ̀ содѣ́лала є҆сѝ, житїѐ и҆жди́вши.
Бг҃оро́диченъ: Свѣ́тлый ѡ҆́блакъ вѣ́мы тѧ̀, пречⷭ҇таѧ дв҃о, носѧ́щїй сл҃нце пра́вды, въ тебѣ̀ носи́мое, неразꙋ́мїѧ тьмꙋ̀ і҆́дѡльскꙋю ѿгонѧ́ющее и҆ ра́зꙋмомъ и҆́стиннымъ просвѣща́ющее.
И҆́ный.
І҆рмо́съ: Оу҆жасо́шасѧ всѧ́чєскаѧ:
Серпо́мъ слове́съ твои́хъ и҆ сщ҃е́нными писа́ньми посѣ́клъ є҆сѝ є҆́рєси тернови̑дныѧ и҆ пле́вєлъ лѡ́жнаѧ прозѧбє́нїѧ, правосла́вїѧ же бл҃гочести̑ваѧ сѣ́мена положи́лъ є҆сѝ, сщ҃еннонача́льне григо́рїе.
Словеса̀ твоѧ̑, всемꙋ́дре григо́рїе, и҆ честна̑ѧ писа̑нїѧ притека́ющымъ сꙋ́ть роса̀ нбⷭ҇наѧ,ме́дъ ѿ ка́мене, хлѣ́бъ а҆́гг҃льскїй, не́ктаръ, а҆мвросі́а, сла́дость, наслажде́нїе и҆ и҆сто́чникъ живы́ѧ воды̀.
Ѻ҆́бщаго ᲂу҆чи́телѧ тѧ̀ познава́етъ землѧ̀ и҆ мо́ре, сто́лпъ сщ҃е́нный правосла́вїѧ и҆ ѡ҆рꙋжеполо́жницꙋ бж҃е́ственныхъ догма̑тъ честнꙋ́ю, премꙋ́драго бг҃осло́ва сщ҃е́ннаго, а҆пⷭ҇лѡмъ сожи́телѧ и҆ соприча́стника є҆динонра́внаго.
Бг҃оро́диченъ: Стрꙋѧ́ми ᲂу҆миле́нїѧ, сквє́рны се́рдца моегѡ̀ ѿмы́й, пречⷭ҇таѧ дв҃о, и҆ покаѧ́нїѧ ѡ҆́бразы мнѣ̀ да́рꙋй, твои́ми къ ще́дромꙋ бг҃ꙋ сщ҃е́нными молє́нїи, є҆го́же неизрече́ннѡ родила̀ є҆сѝ.
Пѣ́снь ѕ҃.
І҆рмо́съ: Мл҃твꙋ пролїю̀ ко гдⷭ҇ꙋ:
Ю҆нѣ́йшїй сы́нъ тво́й бы́хъ а҆́зъ и҆ бога́тство твоѐ ѕлѣ̀ и҆жди́хъ ᲂу҆дале́нїемъ во ѕло́е житїѐ: бл҃ги́хъ же твои́хъ лиши́всѧ, чл҃вѣколю́бче, прихождꙋ̀ къ тебѣ̀ ѻ҆ц҃ꙋ̀ и҆ бг҃ꙋ моемꙋ̀ и҆ прошꙋ̀ проще́нїѧ.
Стра́нничество безчеловѣ́чное полꙋчи́хъ, и҆ пастѝ свинїѧ̑ ѡ҆сꙋжде́нъ бы́хъ, занѐ расточи́хъ моѐ бога́тство, є҆́же ми́лостивнѡ вско́рѣ по́далъ є҆сѝ, и҆ бы́хъ ѿ всѣ́хъ на́гъ: но ты̀, ꙗ҆́кѡ бг҃ъ мо́й, ᲂу҆ще́дри.
Не и҆́мамъ дерзнове́нїѧ а҆́зъ блꙋ́дный, согрѣши́въ на нб҃о, чл҃вѣколю́бче, воззрѣ́ти и҆ ви́дѣти безмѣ́рнꙋю высотꙋ̀, ни нарещи́сѧ сы́нъ тво́й: но ᲂу҆ще́дри мѧ̀ тꙋ́не, и҆мѣ́ѧй безмѣ́рнꙋю млⷭ҇ть.
Бг҃оро́диченъ: Несказа́нно твоѐ ржⷭ҇тво̀ и҆ неизглаго́лемь ѡ҆́бразъ ржⷭ҇тва̀ твоегѡ̀, дв҃о: ꙗ҆́кѡ бг҃а вы́ше ᲂу҆ма̀ ражда́еши, дѣ́вство нескве́рно и҆мꙋ́щи. тѣ́мъ тѧ̀ всѝ и҆́стиннꙋю бцⷣꙋ досто́йнѡ сла́вимъ.
И҆́ный.
І҆рмо́съ: Бж҃е́ственное сїѐ и҆ всечестно́е:
Растерза́сѧ сꙋ́етное шата́нїе и҆ ѧ҆зы́къ варлаа́ма безꙋ́мнагѡ, словесы̀ и҆ ᲂу҆че́ньми, и҆ ра́зꙋма ѻ҆строто́ю премꙋ́драгѡ цр҃ѧ̀ и҆ твое́ю, григо́рїе.
Бж҃е́ственнꙋю цѣвни́цꙋ дх҃а, трꙋбꙋ̀ ꙗ҆́снѡ проповѣ́давшꙋ бж҃їѧ та̑йны, ѳессалоні́кскаго предстоѧ́телѧ, бг҃осло́вскїй ѧ҆зы́къ, пѣ́сньми почти́мъ.
Лю́ди нѣ́когда предводѧ̀, ꙗ҆́кѡ сто́лпъ ѻ҆́гненный, врагѝ вѣ́ры попали́лъ є҆сѝ, вѣ́рныхъ же собра̑нїѧ просвѣти́лъ є҆сѝ, бг҃омꙋ́дре ѻ҆́тче григо́рїе.
Бг҃оро́диченъ: Бꙋ́ди мѝ, всечⷭ҇таѧ влⷣчце, тишина̀ и҆ приста́нище ᲂу҆тѣше́нїѧ, преводѧ́щее къ бж҃е́ственномꙋ приста́нищꙋ небꙋ́рномꙋ, волне́нїе страсте́й мои́хъ ᲂу҆кроща́ющи.
Конда́къ ст҃о́мꙋ, гла́съ и҃.
Подо́бенъ: Взбра́нной воево́дѣ:
Премꙋ́дрости сщ҃е́нный и҆ бж҃е́ственный ѻ҆рга́нъ, бг҃осло́вїѧ свѣ́тлꙋю трꙋбꙋ̀ согла́снѡ воспѣва́емъ тѧ̀, григо́рїе бг҃оглаго́ливе. ты́ же, ꙗ҆́кѡ ᲂу҆́мъ ᲂу҆мꙋ̀ пе́рвомꙋ предстоѧ́й, къ немꙋ̀ ᲂу҆́мъ на́шъ, ѻ҆́тче, наста́ви, да зове́мъ: ра́дꙋйсѧ, проповѣ́дниче бл҃года́ти.
І҆́косъ. Подо́бенъ: А҆́гг҃лъ предста́тель:
А҆́гг҃лъ неизрече́нныхъ ꙗ҆ви́лсѧ є҆сѝ на землѝ, бж҃е́ствєннаѧ человѣ́кѡмъ возвѣща́ѧ: человѣ́ческїй бо ᲂу҆́мъ и҆ пло́ть носѧ̀, безпло́тныхъ гла̑сы, ᲂу҆диви́лъ є҆сѝ на́съ, и҆ вопи́ти тебѣ̀, бг҃оглаго́ливе ᲂу҆вѣща́лъ є҆сѝ сїѧ̑: ра́дꙋйсѧ, и҆́мже тьма̀ прогна́на бы́сть: ра́дꙋйсѧ, и҆́мже свѣ́тъ взы́де. ра́дꙋйсѧ, несозда́ннагѡ бж҃ества̀ а҆́гг҃ле: ра́дꙋйсѧ, созда́ннагѡ и҆ бꙋ́ѧгѡ вои́стиннꙋ ѡ҆бличи́телю. ра́дꙋйсѧ, высотꙋ̀ невосходи́мꙋю бж҃е́ственное є҆стество̀ нарекі́й: ра́дꙋйсѧ, глꙋбинꙋ̀ неꙋдо́бь ви́димꙋю дѣ́йство нарекі́й. ра́дꙋйсѧ, ꙗ҆́кѡ сла́вꙋ бж҃їю до́брѣ ре́клъ є҆сѝ: ра́дꙋйсѧ, ꙗ҆́кѡ мнѣ̑нїѧ ѕлодѣ́євъ ѿве́рглъ є҆сѝ. ра́дꙋйсѧ, свѣти́льниче, показа́вый сл҃нце: ра́дꙋйсѧ, ча́ше, питїѧ̀ бж҃е́ственнагѡ пода́тельнице. ра́дꙋйсѧ, и҆́мже и҆́стина просїѧва́етъ: ра́дꙋйсѧ, и҆́мже помрачи́сѧ лжа̀. ра́дꙋйсѧ, проповѣ́дниче бл҃года́ти.
Сѷнаѯа́рїй.
Стїхѝ: Свѣ́та проповѣ́дника свѣ́тлаго, вои́стиннꙋ ве́лїѧ,
И҆сто́чникъ свѣ́та ны́нѣ возво́дитъ къ незаходи́момꙋ свѣ́тꙋ.
Въ сі́й де́нь, въ недѣ́лю вторꙋ́ю постѡ́въ, па́мѧть твори́мъ и҆́же во ст҃ы́хъ ѻ҆ц҃а̀ на́шегѡ григо́рїѧ, а҆рхїепⷭ҇кпа ѳессалоні́кскагѡ, пала́мы. Се́й бж҃е́ственнагѡ и҆ невече́рнѧгѡ свѣ́та сы́нъ, и҆́стинный вои́стиннꙋ бж҃їй человѣ́къ и҆ чꙋ́дный бж҃е́ственныхъ ᲂу҆че́нїй слꙋга̀ и҆ слꙋжи́тель, тща́выйсѧ не внѣ́шнѧго то́кмѡ и҆ ви́димаго, но мно́гѡ па́че внꙋ́треннѧго и҆ неви́димаго человѣ́ка добродѣ́телїю и҆ наꙋче́нїемъ ᲂу҆краси́ти: ѻ҆те́чество ᲂу҆́бѡ и҆мѣ́ѧше над̾ всѣ́ми ца́рствꙋющїй царьгра́дъ, роди́тели же пресвѣ́тлыѧ и҆ сла̑вныѧ. Ма́лꙋ же ѕѣлѡ̀ є҆мꙋ̀ сꙋ́щꙋ во́зрастомъ, ѻ҆те́цъ сконча́сѧ: ма́ти же наставлѧ́ше є҆го̀ и҆ бра́тїю и҆ сєстры̀ въ наꙋче́нїи и҆ зако́нѣ гдⷭ҇ни и҆ сщ҃е́нныхъ пи́сменѣхъ, ра́внѡ же потща́сѧ, да и҆ внѣ́шней мꙋ́дрости до́брѣ навы́кнетъ, ко ᲂу҆чи́телємъ ходѧ́й. То́й же ко ѻ҆стротѣ́ є҆стества̀ прилежа́нїе примѣси́въ, вско́рѣ всѧ́кꙋю слове́снꙋю хи́трость пости́же. Є҆гда́ же бѣ̀ два́десѧти лѣ́тъ, всѧ̑ ꙗ҆́кѡ до́лꙋ влекꙋ̑щаѧ и҆ со́нїй прельсти́тєльнѣйшаѧ вмѣни́въ, къ вино́вникꙋ и҆ пода́телю всѧ́кїѧ мꙋ́дрости бг҃ꙋ востещѝ и҆ соверше́ннѣйшимъ житїе́мъ всего̀ себѐ томꙋ́ возложи́ти и҆ска́ше. Та́же ѿкрыва́етъ ма́тери бг҃олюбе́зное своѐ намѣ́ренїе, и҆ мно́гꙋю любо́вь свою̀ къ бг҃ꙋ, и҆ разжже́нное жела́нїе: и҆ ѡ҆брѣта́етъ, ꙗ҆́кѡ и҆ сїѧ̀ подо́бнѣ си́ми боли́тъ ѿ до́лга вре́мене и҆ ѡ҆ ра́вныхъ томꙋ̀ ра́дꙋетсѧ. А҆́бїе ᲂу҆́бо ма́ти собира́етъ къ себѣ̀ дѣ́ти, и҆ съ весе́лїемъ ре́кши: сѐ а҆́зъ и҆ дѣ́ти, ꙗ҆́же мѝ дадѐ бг҃ъ: мы́сль и҆́хъ и҆скꙋша́етъ, ю҆́же и҆́мꙋтъ ѡ҆ до́брыхъ, и҆ намѣ́ренїе вели́кагѡ григо́рїа и҆̀мъ ѿкрыва́етъ. Ѻ҆́нъ же, ᲂу҆вѣща́тєльнаѧ словеса̀ къ ни̑мъ ᲂу҆потреби́въ, вско́рѣ всѣ́хъ ᲂу҆бѣдѝ къ подо́бнѣй є҆мꙋ̀ любвѝ и҆ бѣжа́нїю ѿ мїрска́гѡ житїѧ̀ послѣ́довати прилѣ́жнѡ. Посе́мъ и҆ и҆мѣ̑нїѧ ᲂу҆бѡ́гимъ є҆ѵⷢ҇льски разда́въ, бл҃говоле́нїе же царе́во и҆ по́чєсти и҆ сла́вꙋ, сꙋ́щꙋю въ черто́зѣхъ ца́рскихъ, бл҃годꙋ́шнѡ ѡ҆ста́вивъ, хрⷭ҇тꙋ̀ послѣ́дова. Ма́терь ᲂу҆́бѡ и҆ сєстры̀ ѡ҆ста́ви во ѡ҆би́тели дѣ́вственницъ, бра́тїю же взѧ́тъ съ собо́ю, и҆ во ст҃ꙋю го́рꙋ а҆ѳѡ́нскꙋю дости́же: и҆ бра́тїю ᲂу҆́бѡ ᲂу҆вѣщава́етъ тогда̀ во и҆ны́хъ ѡ҆би́телехъ пребыва́ти,поне́же, мни́тсѧ, и҆ вре́мѧ не даѧ́ше и҆́мъ соединє́ннымъ дрꙋ́гъ со дрꙋ́гомъ житїѐ по бг҃ꙋ соверша́́ти. Сама́го же себѐ предае́тъ въ послꙋша́нїе чꙋ́днагѡ нѣ́коегѡ мꙋ́жа, и҆́менемъ нїкоди́ма, въ безмо́лвїи є҆ди́номꙋ бг҃ꙋ живꙋ́щагѡ. Оу҆ тогѡ̀ во смире́нїи дꙋшѝ дѣ́лы наꙋчи́сѧ всѧ́кой за́повѣди и҆ всѧ́кой добродѣ́тели, и҆ во ѿкрове́нїи та́йнѡмъ та́мѡ застꙋпле́нїе всечⷭ҇тыѧ бцⷣы и҆ во всѣ̑хъ є҆ѧ̀ непобори́мꙋю по́мощь прїѧ́тъ. По ѿше́ствїи же ѻ҆́нагѡ ста́рца къ бг҃ꙋ, лѣ̑та нѣ̑каѧ въ вели́цѣй ла́ѵрѣ пожи́въ, съ вели́кимъ тща́нїемъ и҆ соверше́ннымъ ра́зꙋмомъ, любвѐ ра́ди безмо́лвїѧ, ѿ ла́ѵры ѿхо́дитъ, и҆ пꙋсты́ню лобыза́етъ. Любо́вь же при́снѡ къ любвѝ приложи́въ и҆ съ бг҃омъ бы́ти всегда̀ жела́ѧ, кра́йнемꙋ жестоковожде́нїю себѐ предае́тъ, и҆ внима́нїемъ приле́жнымъ всегда̀ чꙋ̑вства ᲂу҆держава́ѧ, и҆ къ бг҃ꙋ ᲂу҆́мъ возвыша́ѧ, и҆ въ моли́твѣ ᲂу҆пражне́нїе и҆ ѡ҆ бж҃е́ственныхъ попече́нїе во всѐ вре́мѧ творѧ̀, житїѐ ᲂу҆пра́ви и҆зрѧ́днѡ.Де́мѡнскїѧ бра̑ни по́мощїю бж҃їею всѧ́чески побѣжда́етъ, и҆ во всено́щныхъ стоѧ́нїихъ и҆стѡ́чники сле́зъ дꙋ́шꙋ ѡ҆чи́стивъ, сосꙋ́дъ и҆збра́нный дарѡ́въ бж҃їѧ дх҃а бы́сть и҆ бг҃оѧвлє́нїѧ ча̑стаѧ ви́дѣ. И҆ чꙋ́днѣйше, ꙗ҆́кѡ и҆ въ ѳессалоні́кꙋ преше́дъ і҆сма́ильтескихъ ра́ди нахожде́нїй,и҆ въ ве́рїи ски́тъ созда́въ, и҆ въ нѣ́кїихъ градѣ́хъ понꙋжда́емь ѡ҆браща́тисѧ, нижѐ си́це ѿстꙋпѝ стро́гости жи́тельства.
Въ нема́лыхъ ᲂу҆́бо лѣ́тѣхъ, и҆ тѣ́ло и҆ дꙋ́шꙋ соверше́ннѡ ѡ҆чи́стивъ, бж҃їимъ велѣ́нїемъ прїѧ́тъ и҆ ве́лїе пома́занїе сщ҃е́нства: и҆ та̑йны сегѡ̀ ꙗ҆́кѡ нѣ́кїй невеще́ственный и҆ а҆́ки бы внѣ̀ себє̀ сы́й соверша́ше, и҆ є҆ди́нымъ зра́комъ свои́мъ дꙋ́шы зрѧ́щихъ ᲂу҆милѧ́ше. Ве́лїй вои́стиннꙋ бѣ̀, и҆ живꙋ́щимъ по бг҃ꙋ дꙋхоно́сецъ познава́шесѧ: ꙗ҆влѧ́шесѧ же сице́въ и҆ внѣ̑шнѧѧ зрѧ́щымъ. Вла́сть и҆мѣ́ѧше на де́моны, и҆ и҆збавлѧ́ше ѡ҆держи̑мыѧ ѿ прельще́нїѧ и҆ кова́рства и҆́хъ: непло́дїе древе́съ во бл҃гопло́дїе прелага́ше: бꙋ̑дꙋщаѧ прови́дѧше, и҆ и҆ны́ми бж҃е́ственнагѡ дх҃а дарова́ньми и҆ плѡды̀ ᲂу҆краша́шесѧ. Поне́же ᲂу҆́бѡ добродѣ́тєли дѣ́йствовати въ на́шей вла́сти лежи́тъ, а҆ во и҆скꙋшє́нїѧ впа́сти нѣ́сть ѿ на́съ, без̾ си́хъ же нѣ́сть соверше́нства, нижѐ ꙗ҆вле́нїѧ вѣ́ры къ бг҃ꙋ, [сошє́дшасѧ бо, глаго́летсѧ, дѣѧ́нїе и҆ страда́нїе соверша́ютъ въ бла́зѣ по бг҃ꙋ человѣ́ка]: вели́кїй се́й попꙋща́етсѧ впа́сти въ разли̑чнаѧ и҆ ча̑стаѧ и҆скꙋшє́нїѧ, да ꙗ҆ви́тсѧ во всѣ́хъ и҆ вои́стиннꙋ соверше́нъ. А҆ ꙗ҆̀же ѿсю́дꙋ, кі́й ᲂу҆́мъ помы́слитъ; ко́е сло́во и҆зрещѝ возмо́жетъ бѡ́льшїѧ пре́жнихъ кѡ́зни лю́тагѡ бори́телѧ, и҆ новоѧвле́нныхъ бг҃обо́рцєвъ на него̀ навѣ́ты и҆ клевєты̀, и҆ є҆ли̑ка, ѡ҆ бл҃гоче́стїи подвиза́ѧсѧ, ѡ҆ѕлоблє́нїѧ и҆ скѡ́рби разли̑чныѧ ѿ тѣ́хъ претерпѣ̀ во всѣ́хъ два́десѧтихъ и҆ тре́хъ лѣ́тѣхъ.І҆талі́йскїй бо ѕвѣ́рь, калаврі́йскїй варлаа́мъ, мїрско́ю мꙋ́дростїю надмева́ѧсѧ и҆ въ сꙋетѣ́ свои́хъ помышле́нїй всѧ̑ мнѧ́й вѣ́дѣти, лю́тꙋю бра́нь воздвиза́етъ на цр҃ковь хрⷭ҇то́вꙋ и҆ на бл҃гочести́вꙋю на́шꙋ вѣ́рꙋ, и҆ на держа́щыѧ сїю̀ тве́рдѡ. Оу҆ча́ше бо ᲂу҆мовре́днѡ, ꙗ҆́кѡ ѻ҆́бщаѧ бл҃года́ть ѻ҆ц҃а̀, сн҃а и҆ ст҃а́гѡ дх҃а, и҆ свѣ́тъ бꙋ́дꙋщагѡ вѣ́ка, и҆́мже и҆ првⷣнїи возсїѧ́ютъ ꙗ҆́кѡ со́лнце, є҆го́же и҆ хрⷭ҇то́съ предпоказа̀ на горѣ̀ возсїѧ́вый, и҆ про́стѡ, всѧ̀ си́ла и҆ дѣ́йство трїѷпоста́снагѡ бж҃ества̀, и҆ всѐ въ бж҃ественнѣ́мъ є҆стествѣ́ ра́знствꙋющее є҆́сть созда́но: бл҃гоче́стнѡ же мꙋ́дрствꙋющыѧ, ꙗ҆́кѡ не созда́нъ є҆́сть бж҃е́ственнѣйшїй ѻ҆́ный свѣ́тъ, и҆ всѧ си́ла и҆ дѣ́йство, [ничто́же бо вои́стиннꙋ мо́щно є҆́сть но́во приложи́ти ко є҆сте́ственнѣ присꙋ́щымъ бг҃ꙋ], въ словесѣ́хъ и҆ писа́нїихъ простра́нныхъ и҆менова̀ двобо́жники и҆ многобо́жники, ꙗ҆́коже и҆менꙋ́ютъ на́съ і҆ꙋдє́и, и҆ саве́ллїй, и҆ а҆́рїй. Си́хъ ра́ди ᲂу҆́бо бж҃е́ственный григо́рїй, ꙗ҆́кѡ бл҃гоче́стїѧ ревни́тель и҆ предста́тель пресвѣ́тлый, и҆ па́че всѣ́хъ за сїѐ побора́ѧй и҆ ѡ҆клевета́емь, по́сланъ бы́въ ѿ цр҃кве, въ кѡнстантїно́поль прихо́дитъ. Бж҃е́ственнѣйшемꙋ же царю̀ а҆ндроні́кꙋ, четве́ртомꙋ ѿ палеоло́гѡвъ, ѡ҆ бл҃гоче́стїи ра́тꙋющꙋ, собо́ръ сщ҃е́нный собира́етсѧ. Є҆гда̀ же варлаа́мъ прїи́де, и҆ ꙗ҆влє́на бы́ша є҆гѡ̀ ѕлосла̑внаѧ ᲂу҆чє́нїѧ и҆ на бл҃гоче́стїе ѡ҆глагѡ́ланїѧ, вели́кїй григо́рїй и҆спо́лнисѧ дх҃а бж҃їѧ, и҆ въ си́лꙋ неѡбори́мꙋю ѡ҆бле́ксѧ свы́ше, ᲂу҆ста̀ варлаа́мѡва на бг҃а ѿвє́рстаѧ заградѝ и҆ до конца̀ посрамѝ: и҆ ѻ҆гнедꙋхнове́нными словесы́ и҆ писа́ньми є҆гѡ̀ є҆́рєси, ꙗ҆́кѡ хвра́стїе, въ пе́пелъ ѡ҆братѝ. Тѣ́мже проти́вникъ бл҃гоче́стїѧ, стꙋда̀ не претерпѣ́въ, къ латі́нѡмъ, ѿѻнꙋ́дꙋже прїи́де, бѣ́гомъ ѿи́де. По ѻ҆́номъ же а҆́бїе григо́рїй а҆кїндѵ́на, реко́маго полѷкїндѵ́на, сі́есть многобѣ́дственнаго, собо́рнѣ и҆з̾ѡблича́етъ, и҆ писа̑нїѧ сегѡ̀ словесы̀ сопроти́вными разсыпа́етъ. Причасти́вшїисѧ же ѻ҆́ныхъ па́гꙋбы нижѐ та́кѡ преста́ша бори́ти на цр҃ковь бж҃їю. Та́же принꙋжде́нїемъ мно́гимъ сщ҃е́ннагѡ собо́ра и҆ самагѡ̀ царѧ̀, и҆ па̀че всѣ́хъ бж҃е́ственномꙋ велѣ́нїю повинꙋ́ѧсѧ, григо́рїй на а҆рхїере́йскїй престо́лъ возво́дитсѧ, и҆ ѳессалоні́кскїѧ сщ҃е́нныѧ цр҃кве па́стырь поставлѧ́етсѧ. Тѣ́мже и҆ пре́жнихъ вѧ́щшыѧ мнѡ́гїѧ по́двиги ѡ҆ правосла́внѣй вѣ́рѣ до́блественнѣ и҆ мꙋ́жественнѣ соверша́етъ. Лꙋка̑выѧ бо прее́мники а҆кїндѵ́на и҆ варлаа́ма, мнѡ́гїѧ ꙗ҆́вльшыѧсѧ и҆ лю̑тыѧ, и҆ лю́тыхъ ѕвѣре́й лю̑таѧ рождє́нїѧ, и҆ си́хъ ᲂу҆чє́нїѧ и҆ писа̑нїѧ не є҆ди́ножды, и҆лѝ два́жды, и҆лѝ три́жды, но мно́гажды и҆ мно́гими ви̑ды, нижѐ при є҆ди́номъ царѣ̀, и҆лѝ патрїа́рсѣ, но при трїе́хъ по прее́мствꙋ ски́птры держа́вшихъ и҆ патрїа́рсѣхъ равночи́сленныхъ, и҆ собо́рѣхъ неꙋдобосчислѧ́емыхъ, григо́рїй словесы́ и҆ писа́ньми бг҃одꙋхнове́нными многови́днѡ нисроверга́етъ и҆ до конца̀ побѣжда́етъ. Ѻ҆ба́че нѣ́цыи, ни во что́же полага́юще го́рнїй сꙋ́дъ, та́кѡ неиспра́влени пребы́ша: и҆ всѣ́хъ бо є҆ресе́й сꙋ́ть є҆щѐ ѡ҆ста́нцы безстꙋ́дствꙋющїи проти́вꙋ побѣди́вшихъ ѧ҆̀ ст҃ы́хъ: не глаго́лю ᲂу҆жѐ ѡ҆ вседе́рзѣмъ ро́дѣ і҆ꙋде́йстѣмъ, да́же и҆ доны́нѣ и҆мꙋ́щемъ неи́стовство на хрⷭ҇та̀.
Такѡвы̀ ᲂу҆́бо и҆ толи̑ки вкра́тцѣ побѣ̑ды вели́кагѡ григо́рїа на нечести̑выѧ. Бг҃ъ же неизрече́нными ѡ҆́бразы, и҆ къ восто́кꙋ сего̀ ѿсыла́етъ ᲂу҆чи́телѧ: посыла́етсѧ бо ꙗ҆́кѡ старѣ́йшина ѿ ѳессалоні́ки въ кѡнстанті́нь гра́дъ, примири́ти ра́знствꙋющыѧ царѝ. Плѣнѧ́етсѧ же ѿ а҆га́рѧнъ, и҆ держи́тсѧ во всѐ лѣ́то, страда́льчески преходѧ̀ мѣста̀ ѿ мѣ́стъ и҆ гра́ды ѿ градѡ́въ и҆ ᲂу҆чѧ̀ небоѧ́зненнѡ хрⷭ҇то́вꙋ є҆ѵⷢ҇лїю. И҆ твє́рдыѧ ᲂу҆́бѡ є҆ще ᲂу҆твержда́ше и҆ молѧ̀ше въ вѣ́рѣ пребы́вати: коле́блющыѧсѧ же въ не́й, и҆ нѣ̑каѧ недоꙋмѣ̑нїѧ и҆ взыска̑нїѧ ѡ҆ бы́вшихъ тогда̀ предлага́ющыѧ, бг҃омꙋ́дреннѡ ᲂу҆твержда́ше, и҆ подаѧ́ше и҆̀мъ дово́льнѣйшее и҆сцѣле́нїе, ѡ҆ ни́хже глаго́лахꙋ. Про́чымъ же невѣ̑рнымъ и҆ ѡ҆каѧ́ннѡ ѿто́ргшымсѧ хрⷭ҇тїа́нѡмъ, и҆ приложи́вшымсѧ ко ѻ҆́нымъ, и҆ поносѧ́щымъ на̑ша ᲂу҆чє́нїѧ ѡ҆ воплоще́ннѣмъ смотре́нїи гдⷭ҇а и҆ бг҃а на́шегѡ и҆ поклоне́нїе ѿ на́съ чтⷭ҇на́гѡ крⷭ҇та̀ и҆ ст҃ы́хъ і҆кѡ́нъ, мно́гажды со дерзнове́нїемъ глаго́лаше. Є҆ще́ же ѡ҆ мѡаме́ѳѣ, и҆ мнѡ́гимъ и҆ны̑мъ взыска́нїємъ ѿ ни́хъ предложє́ннымъ, ѻ҆́вїи ᲂу҆́бѡ ѡ҆ не́мъ дивлѧ́хꙋсѧ, ѻ҆́вїи же на него̀ неи́стовствовахꙋ и҆ рꙋ́ки простира́хꙋ: и҆ мч҃нчески сконча́ли бы́ше є҆го̀, а҆́ще бж҃їимъ про́мысломъ не и́мѣ́ли бы́ша наде́жды пѣ́нѧзи за него̀ полꙋчи́ти, и сегѡ̀ ра́ди пощадѣ́нъ бѣ́. Та́же ѿ хрⷭ҇толюби́выхъ ѡ҆свобожда́етсѧ вели́кїй, и҆ къ своемꙋ̀ ста́дꙋ мч҃нкъ безкро́вный свѣ́тлѡ па́ки ѿхо́дитъ.
Ко и҆ны̑мъ мнѡ́гимъ и҆ вели̑кимъ дарова́нїємъ и҆ преимꙋ́ществѡмъ, ꙗ҆̀же и҆мѧ́ше, ᲂу҆краси́сѧ то́й и҆ ра́нами хрⷭ҇то́выми, и҆мы́й, по па́ѵлꙋ, въ себѣ̀ и҆ хрⷭ҇тѡ́ва лишє́нїѧ. И҆ да пока́жемъ нѣ̑каѧ ѻ҆́наго ѡ҆писꙋ́ющаѧ, сїѧ̑ бѧ́хꙋ є҆гѡ̀ свѡ́йства: превосхдѧ́щаѧ кро́тость и҆ смире́нїе, [здѣ̀ не ѡ҆ бз҃ѣ и҆ бж҃е́ственныхъ сло́во, и҆́бо въ си́хъ ѕѣлѡ̀ бѣ̀ побо́рникъ]: непамѧтоѕло́бїе ѕѣ́льное и҆ неѕло́бїе: тща́шесѧ по си́лѣ бл҃ги́мъ возда́ти тѣ̑мъ, и҆̀же къ немꙋ̀ въ нѣ́кихъ ꙗ҆́влѧ́хꙋсѧ ѕлѝ: ѿню́дъ легкѡ̀ не прїима́ше слове́съ на нѣ̑кїѧ. Ко грѧдꙋ́щымъ напа́стемъ всегда̀ и҆мѣ́ѧше терпѣ́нїе и҆ великодꙋ́шїе, возвыша́шесѧ же над̾ всѧ́кими сла́стьми и҆ тщесла́вїемъ. При́снѡ бѣ́ скꙋ́денъ и҆ незбы́точественъ во всѣ́хъ потре́бахъ тѣле́сныхъ. А҆́ще и҆ толи́ко вре́мѧ и҆знꙋрѧ́емь бѧ́ше, ѻ҆ба́че въ терпѣ́нїи бѣ́ безмо́лвенъ и҆ ти́хъ, и҆ при́снѡ та́кѡ преиспо́лненъ ра́дости, ꙗ҆́кѡ и҆ во внѣ́шнемъ є҆гѡ̀ зра́цѣ ꙗ҆́вѣ бы́сть ви́дѧщымъ: во все́мъ и҆мѣѧше разꙋмѣ́нїе при́снѡ, и҆ внима́нїе, и҆ неразсѣева́емость. Ѿсю́дꙋ ᲂу҆́бо, а҆́ще ѻ҆чеса̀ є҆гѡ̀ и҆ вма́лѣ никогда́же бы̀ша без̾ сле́зъ, ѻ҆ба́че болѣ́зноваше по и҆сто́чникѡмъ сле́зъ. Та́кѡ ᲂу҆́бо и҆з̾ нача́ла да́же до конца̀ на стра̑сти и҆ де́моны страда́льчески подвиза́шесѧ, и҆ ѿ хрⷭ҇то́вы цр҃кве дале́че є҆ретїкѝ ѿгонѧ́ше, и҆ правосла́внꙋю вѣ́рꙋ словесы́ и҆ писа́ньми и҆з̾ѧснѧ́ше, и҆ тѣ́ми ꙗ҆́коже печа́тїю всѐ писа́нїе бг҃одꙋхнове́нное запечатлѣ́: тѣ́мъ житїѐ є҆гѡ̀ и҆ сло́во бы́сть ꙗ҆́коже послѣсло́вїе нѣ́кое и҆ печа́ть житїю̀ и҆ словесє́мъ ст҃ы́хъ. Є҆ще́ же своѐ ста́до трина́десѧть лѣ́тъ а҆пⷭ҇льски и҆ бг҃оꙋго́днѡ ᲂу҆па́съ, и҆ ᲂу҆чи́тельными словесы̀ ᲂу҆краси́въ, и҆ ко ѡ҆гра́дѣ нбⷭ҇нѣй ᲂу҆пра́вивъ,и҆, ꙗ҆́кѡ рещѝ, ѻ҆́бщїй всѣ́хъ живы́хъ и҆ пото́мъ бꙋ́дꙋщихъ правосла́вныхъ дѣ́латель ꙗ҆ви́всѧ, къпремі́рнѣй жи́зни прелага́етсѧ въ лѣ́то ты́сѧща трѝста шестьдесѧ́тъ второ́е по хрⷭ҇тѣ̀, пожи́въ всѣ́хъ лѣ́тъ шестьдесѧ́тъ и҆ трѝ. И҆ дꙋ́хъ ᲂу҆́бѡ въ рꙋ́цѣ бж҃їи предае́тъ, тѣ́ло же, свѧщє́нныѧ своѧ̑ ѡ҆ста́нки, па́ствѣ ѡ҆ставлѧ́етъ, ꙗ҆́кѡ нѣ́кїй жре́бїй и҆ сокро́вище предраго́е: є҆́же и҆ храни́тсѧ въ ѳессалонїкі́йстѣй митропо́лїи, и҆зрѧ́днѡ въ коне́цъ просвѣще́нное и҆ просла́вленное: чꙋдесы́ бо на кі́йждо де́нь вѣ́рнѡ приходѧ́щыѧ бл҃годѣ́етъ и҆ ѿ недꙋ́гѡвъ всѧ́ческихъ и҆збавле́нїе да́рꙋетъ ѿ ни́хже не ма́лѡ і҆сто́рїа ѡ҆ не́мъ повѣ́даетъ.
Тогѡ̀ ᲂу҆́бо мл҃твами, бж҃е, поми́лꙋй и҆ сп҃сѝ на́съ. а҆ми́нь.
Пѣ́снь з҃.
І҆рмо́съ: Ѿ і҆ꙋде́и доше́дше:
Дерзнове́нїѧ не и҆́мамъ нарещи́сѧ сы́нъ тво́й, ѻ҆́ч҃е чл҃вѣколю́бче: молю́сѧ бы́ти ꙗ҆́кѡ є҆ди́нъ ѿ нає́мникъ твои́хъ. не гнꙋша́йсѧ менє̀ зовꙋ́ща: ѻ҆тє́цъ на́шихъ бж҃е, бл҃гослове́нъ є҆сѝ.
Ѡ҆скверни́вше пе́рвымъ житїе́мъ жи́знь и҆ погꙋби́вше бл҃горо́дїе пе́рвое, притеце́мъ ко є҆ди́номꙋ ѻ҆ц҃ꙋ̀ и҆ бг҃ꙋ на́шемꙋ съ покаѧ́нїемъ те́плымъ, да прїи́мемъ сп҃се́нїе.
Же́стокъ граждани́нъ, є҆мꙋ́же рабо́тати а҆́зъ ѡ҆каѧ́нный ѡ҆сꙋди́хсѧ: гла́дъ же, є҆го́же под̾ѧ́хъ, свинїѧ́мъ ᲂу҆гожда́ѧ, крѣ́покъ и҆ нестерпи́мь. но ѡ҆бра́щьсѧ прошꙋ̀: сп҃се, поми́лꙋй мѧ̀.
Бг҃оро́диченъ: Оу҆мерщвле́нное є҆стество̀ ѡ҆живи́ла є҆сѝ, є҆ди́на жи́знь ро́ждшаѧ, дв҃о бцⷣе: тѣ́мже тѧ̀ сп҃се́нїе вѣ́рнїи вѣ́мы, ѻ҆тє́цъ на́шихъ бг҃а пло́тїю ро́ждшꙋю.
И҆́ный.
І҆рмо́съ: Не послꙋжи́ша бг҃омꙋ́дрїи:
Словесє́мъ и҆ писа́нїємъ твои̑мъ бесѣ́дꙋющїи, григо́рїе, поꙋча́ютсѧ ра́зꙋмꙋ бж҃їю, и҆ по́лни ꙗ҆влѧ́ютсѧ премꙋ́дрости дх҃о́вныѧ, и҆ несозда́ннꙋю бл҃года́ть и҆ дѣ́йство бж҃їе бг҃осло́вствꙋютъ.
Ме́чь и҆ стрѣ́лы ѕлосла́вныхъ до конца̀ сокрꙋши́лъ є҆сѝ, и҆ го́рдость варлаа́мовꙋ, и҆ всѧ́кꙋю си́лꙋ є҆реті́ческꙋю ꙗ҆́кѡ тка́нїе паꙋка̀ расточи́лъ є҆сѝ, а҆́ки ка́мень превели́кїй, і҆ера́рше.
Запечатлѣ́сѧ твои́ми словесы̀ и҆ ᲂу҆че́ньми и҆ писа̑нїи вѣ́ра бл҃гочести́выхъ, и҆ де́рзость є҆́реси ста̀, григо́рїе, и҆ низложе́нїе правосла́вїѧ преста̀ и҆ крѣ́пость ѕлосла́вныхъ.
Бг҃оро́диченъ: И҆сцѣле́нїй и҆сто́чникъ тѧ̀ вои́стиннꙋ вѣ́дꙋще, и҆зсꙋша́емїи страсте́й болѣ́зньми, почерпа́емъ сп҃си́тєльныѧ и҆ бж҃е́ственныѧ стрꙋи̑ и҆ взыва́емъ: бл҃гослове́нъ, всечⷭ҇таѧ, пло́дъ твоегѡ̀ чре́ва.
Пѣ́снь и҃.
І҆рмо́съ: Седмери́цею пе́щь:
Безмѣ́рнагѡ и҆ мно́гагѡ милосе́рдїѧ твоегѡ̀ бога́тство вѣ́мы, влⷣко, въ тѧ̀ вѣ́ровавшїи. тѣ́мже тѝ припа́даемъ съ блꙋ́днымъ всѝ те́плѣ: прїимѝ согрѣши́вшыѧ и҆ къ тебѣ̀ прибѣ́гшыѧ, ще́дре: нѣ́сть бо, нѣ́сть грѣ́хъ, твоѐ чл҃вѣколю́бїе побѣди́ти могі́й.
Милосе́рдїѧ ра́ди себѐ смири́въ, влⷣко, па́дшымъ твои̑мъ сынѡ́мъ прибли́жилсѧ є҆сѝ: са́мъ бо,чл҃вѣколю́бче, срѣ́тилъ є҆сѝ па́дшихъ, и҆ ѡ҆блобыза́еши, и҆ сп҃се́нїе да́рꙋеши: а҆́ще кто̀ и҆ до́лꙋ па́днетъ, млⷭ҇тивъ сы́й не гнѣ́ваешисѧ, ꙗ҆́кѡ чл҃вѣколю́бецъ.
Стра́шнѣйшїй сꙋ́дъ менѐ ᲂу҆срѧ́щетъ, ѽ влⷣко, занѐ тѧ̀ чл҃вѣколю́бца и҆ неѕло́бива зрѧ̀, не притека́ю къ тебѣ̀, зовы́й гла́сомъ блꙋ́днагѡ, но въ лѣ́ности житїѐ препровожда́ю: ты̀ ᲂу҆́бо млⷭ҇тивъ бꙋ́ди мѝ, и҆ ѿ ѡ҆сꙋжде́нїѧ ѻ҆́нагѡ и҆схитѝ, ще́дре, покаѧ́нїѧ ра́ди.
Трⷪ҇ченъ: Не трѝ бо́ги сла́вимъ, но є҆ди́но бж҃ество̀, три́ же вои́стиннꙋ ѵ҆поста̑си чти́мъ, ѻ҆ц҃а̀ нерожде́нна, и҆ сн҃а рожде́нна ѿ ѻ҆ц҃а̀, и҆ и҆схо́дна ѿ ѻ҆ц҃а̀ ст҃а́го дх҃а, бг҃а є҆ди́наго трѝ, а҆́ще и҆ зва́нїе ко́еждо, ꙗ҆́коже бг҃ъ є҆́сть вѣ́рнѡ сла̑вимыѧ.
Бг҃оро́диченъ: Ѿ мно́гихъ мѧ̀ напа́стей преклоне́на и҆ печа́лей бꙋ́рею потоплѧ́ема и҆зба́ви твое́ю мл҃твою, всенепоро́чнаѧ, приста́нище сп҃се́нїѧ, и҆ ѿ всѣ́хъ и҆схити́вши сп҃сѝ, пречⷭ҇таѧ: да тѧ̀ досто́йнѡ ꙗ҆́кѡ те́плꙋю предста́тельницꙋ сла́влю бцⷣꙋ во всѧ̑ вѣ́ки.
И҆́ный.
І҆рмо́съ: Ѻ҆́троки бл҃гочести̑выѧ въ пещѝ:
Предстои́ши ны́нѣ престо́лꙋ всеще́драгѡ, ꙗ҆́кѡ бг҃осло́вѡмъ подо́бный и҆ си̑мъ є҆динонра́вный,премꙋ́дре григо́рїе, ѳессалоні́кскїй предстоѧ́телю, і҆ера́рхѡвъ добро́то, свѣ́тлѡ ѡ҆блиста́всѧ сла́вою сщ҃еннонача́лїѧ, бг҃ꙋ и҆ ны́нѣ слꙋжѧ̀.
Вѣ́дый чистотꙋ̀ твоегѡ̀ помышле́нїѧ бг҃ъ, и҆ пре́жде чре́ва, и҆ пре́жде зача́тїѧ, возглаго́ла ꙗ҆́снѡ вѣ́рномꙋ бж҃е́ственномꙋ царю̀, ꙗ҆́кѡ цр҃кви неѡбори́мь бꙋ́деши побо́рникъ: тѣ́мже пра́вилъ и҆звѣ́ствомъ, мѵ́ромъ а҆рхїере́йства запечатлѣ́нъ є҆сѝ.
Побѣжда́етсѧ ꙗ҆́вѣ и҆ бѣ́дствꙋетъ собра́нїе полѷкїндѵ́на дла́нїю твое́ю и҆ мꙋ́дрыми твои́ми глагѡ́лы, пресла́вне григо́рїе, ѳессалоні́кскїй предстоѧ́телю, и҆ ꙗ҆́кѡ и҆счеза́етъ ды́мъ, и҆счезѐ гнило́е со́нмище, твои́мъ громогла́снымъ и҆ бг҃осло́внымъ ѧ҆зы́комъ.
Бг҃оро́диченъ: Сло́во бж҃їе воз̾ѡбразѝ въ тебѣ̀, дв҃о, кра́йнею бл҃госты́нею, человѣ́ческое є҆стество̀ ѡ҆тѧгче́нное страстьмѝ, и҆ всѐ ѡ҆бновѝ и҆ ѡ҆свѧтѝ: тѣ́мже тобо́ю сп҃се́ни, тѧ̀ славосло́вимъ во всѧ̑ вѣ́ки.
Пѣ́снь ѳ҃.
І҆рмо́съ: Оу҆жасе́сѧ ѡ҆ се́мъ нб҃о:
Ны́нѣ менє̀ ра́ди закла́вшемꙋсѧ твоемꙋ̀ тельцꙋ̀, ра́дости и҆ весе́лїѧ и҆спо́лни мою̀ дꙋ́шꙋ,ча́ющꙋю сегѡ̀ ѿ тебє̀, бж҃е: заблꙋ́ждшаго прїими́ мѧ, и҆ ᲂу҆мерщвле́ннаго къ жи́зни возведѝ, и҆ въ бж҃е́ственнꙋю ѡ҆де́ждꙋ сп҃се́нїѧ, въ нетлѣ́нїе мѧ̀ ѡ҆блецы̀.
Дꙋ́шы ᲂу҆далє́нныѧ ѿ бг҃а и҆ бж҃е́ственныхъ дарова́нїй лишє́нныѧ, прїиди́те те́плѣ, и҆ блꙋ́днагѡ ѡ҆браще́нїе воспрїи́мше воззове́мъ: ѻ҆́ч҃е бл҃гі́й, и҆́же на нб҃сѣ́хъ, согрѣши́хомъ тѝ всѝ, ѡ҆чи́сти и҆ сп҃сѝ прибѣга́ющыѧ къ млⷭ҇ти твое́й.
Ꙗ҆́кѡ и҆мы́й милосе́рдїѧ мно́жество мно́гое, не гнꙋша́йсѧ менє̀, гдⷭ҇и, гдⷭ҇и, во мно́гихъ сласте́хъ бога́тство и҆жди́вша, и҆ прибѣга́юща ны́нѣ, и҆ зовꙋ́ща гла́сомъ блꙋ́днагѡ: согрѣши́хъ тѝ,сп҃сѝ прибѣга́ющаго къ млⷭ҇ти твое́й.
Бг҃оро́диченъ: Сп҃се́нїѧ приста́нище и҆ наставле́нїе, и҆ предста́тельницꙋ тѧ̀ и҆́мамъ ра́бъ тво́й, да и҆зба́влюсѧ ѿ лю́тыхъ всѣ́хъ препѧ́тїй мольба́ми твои́ми къ бг҃ꙋ, влⷣчце бл҃га́ѧ: ꙗ҆́кѡ на тѧ̀ всю̀ мою̀ наде́ждꙋ возложи́хъ любо́вїю, да вѣ́рою велича́ю тѧ̀.
И҆́ный.
І҆рмо́съ: Всѧ́къ земноро́дный:
Зерца́ло бж҃їе ꙗ҆ви́лсѧ є҆сѝ, григо́рїе: є҆́же бо по ѡ҆́бразꙋ нескве́рно соблю́лъ є҆сѝ, ᲂу҆́мъ же влады́кꙋ на стра̑сти плотскі̑ѧ мꙋ́жески поста́вивъ, є҆́же по подо́бїю воспрїѧ́лъ є҆сѝ. тѣ́мже до́мъ ст҃ы́ѧ трⷪ҇цы бы́лъ є҆сѝ свѣтлѣ́йшїй.
Ца́рь бл҃гочести́вый крила́таго тѧ̀ воздꙋхохо́дна показꙋ́етъ, семꙋ̀ спобо́рствꙋюща, ꙗ҆́кѡ всего̀̀ и҆спо́лнена бж҃е́ственнагѡ дх҃а, проти́вꙋ сꙋемꙋ́дреннагѡ и҆ неи́стовнагѡ варлаа́ма, глаго́лющагѡ на высотꙋ̀ бж҃їю непра́вєднаѧ, є҆го́же пра́веднѡ побѣди́лъ є҆сѝ.
Ве́сь бы́въ премꙋ́дрости лꙋ́чшїѧ и҆спо́лненъ, сла́вне, свѣ́тъ мі́рови возсїѧ́лъ є҆сѝ, правосла́вїѧ и҆сточи́въ догма́ты: дрꙋ́жествомъ бо и҆зрѧ́днагѡ любомꙋ́дрїѧ, премꙋ́дре, бж҃е́ственный стра́хъ во чре́вѣ зача́лъ є҆сѝ, и҆ словеса̀ дх҃а породи́лъ є҆сѝ.
Бг҃оро́диченъ: Пѣ́снь бл҃годаре́нїѧ тебѣ̀ вѣ́рнїи согла́снѡ прино́симъ, ты́ бо дре́внее на́ше проклѧ́тїе разрꙋши́ла є҆сѝ, бг҃ороди́тельнице: и҆ бл҃гослове́нїе бж҃е́ственное всѝ, тобо́ю прїе́млемъ, сп҃се́нїе, просвѣще́нїе, и҆ млⷭ҇ть, и҆ ра́дость вѣ́чнꙋю.
Є҆ѯапостїла́рїй воскрⷭ҇нъ. Сла́ва, ст҃а́гѡ.
Подо́бенъ: Со ᲂу҆ч҃нки̑ взы́демъ:
Ра́дꙋйсѧ, ѻ҆тцє́въ похвало̀, бг҃осло́вѡвъ ᲂу҆ста̀, безмо́лвїѧ селе́нїе, премꙋ́дрости до́ме,ᲂу҆чи́телей ве́рше, пꙋчи́но сло́ва: ра́дꙋйсѧ, дѣѧ́нїѧ ѻ҆рга́не, видѣ́нїѧ кра́ю, и҆ и҆сцѣли́телю недꙋ́гѡвъ человѣ́ческихъ: ра́дꙋйсѧ, дх҃а хра́ме, и҆ ᲂу҆ме́рый и҆ живы́й, ѻ҆́тче.
И҆ ны́нѣ, бг҃оро́диченъ:
Влⷣчце, всѣ́хъ цр҃и́це и҆ всѣ́хъ вы́шшаѧ, всѧ̑ же гѡ́рнѧѧ вѡ́инства превосходѧ́щаѧ, прострѝ рꙋ́кꙋ держа́внꙋ, и҆ сохранѝ мі́ръ, сщ҃є́нники бл҃гословѝ тебѣ̀ сщ҃еннодѣ́йствꙋющыѧ, мона́хи же простѝ, молѧ́щыѧсѧ тебѣ́. [і҆мпера́тора] лю́ди всѧ̑ ᲂу҆мирѝ, и҆ сꙋ́щыѧ въ пала́тѣ: во́инство же ᲂу҆крѣпѝ во вре́мѧ бра́ни: се́й гра́дъ соблюдѝ, ст҃а́ѧ бцⷣе. и҆ ны́нѣ на́съ сподо́би ви́дѣти нбⷭ҇ное црⷭ҇тво и҆ ра́йскꙋю две́рь, є҆гда̀ сѧ́детъ сꙋдїѧ̀ сꙋди́ти вселе́ннѣй, во второ́мъ и҆ стра́шнѣмъ сꙋди́лищи, влⷣчце а҆́гг҃лѡвъ.
На хвали́техъ поста́вимъ стїхѡ́въ ѕ҃, и҆ пое́мъ стїхи̑ры воскрⷭ҇ны є҃: и҆ настоѧ́щыѧ г҃, гла́съ а҃.
Подо́бенъ: Нбⷭ҇ныхъ чинѡ́въ:
Бл҃же́ннꙋю въ мі́рѣ жи́знь соверши́лъ є҆сѝ, и҆ ны́нѣ бл҃же́нныхъ собо́рѡмъ сра́дꙋешисѧ, и҆ на землѝ кро́ткихъ ꙗ҆́кѡ кро́токъ живе́ши, ст҃и́телю григо́рїе: бл҃года́тїю же чꙋде́съ богатѣ́еши ѿ бг҃а, ю҆́же подае́ши чтꙋ́щымъ тѧ̀.
Сті́хъ: Оу҆ста̀ првⷣнагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ.
Правосла́вїѧ догма́ты насади́лъ є҆сѝ, бл҃же́нне, ѿсѣкъ те́рнїе ѕлосла́вїѧ: и҆ вѣ́ры сѣ́мѧ ᲂу҆мно́живъ до́брѣ, ѡ҆дожде́нїемъ слове́съ твои́хъ, стокра́тный кла́съ, ꙗ҆́кѡ дѣ́ѧтельный земледѣ́латель, бг҃ꙋ прине́слъ є҆сѝ.
Сті́хъ: Сщ҃е́нницы твоѝ, гдⷭ҇и, ѡ҆блекꙋ́тсѧ пра́вдою, и прпⷣбнїи твоѝ возра́дꙋютсѧ.
Непоро́чнагѡ твоегѡ̀ житїѧ̀ свѣ́тлости, бл҃же́нне, ᲂу҆диви́шасѧ а҆́гг҃лъ и҆ человѣ̑къ собо́ри: и҆́бо произволе́нїемъ тве́рдый подви́жникъ и҆ по́стникъ ꙗ҆ви́лсѧ є҆сѝ, и҆ ст҃и́тель, и҆ досто́йный слꙋжи́тель бж҃їй, и҆ дрꙋ́гъ и҆́скреннїй.
И҆ глаго́лемъ сті́хъ: Воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀: не забꙋ́ди ᲂу҆бо́гихъ твои́хъ до конца̀.
И҆ пое́мъ самогла́сенъ, гла́съ ѕ҃:
Во тьмѣ̀ согрѣше́нїй ходѧ́щымъ, свѣ́тъ возсїѧ́лъ є҆сѝ, хрⷭ҇тѐ, вре́менемъ воздержа́нїѧ. и҆ наро́читый де́нь стрⷭ҇ти твоеѧ̀ покажѝ на́мъ, да вопїе́мъ тебѣ̀: воста́ни, бж҃е, поми́лꙋй на́съ.
Сла́ва, то́йже. И҆ ны́нѣ: Пребл҃гослове́нна є҆сѝ: Славосло́вїе вели́кое, и҆ ѿпꙋ́стъ. На лїтꙋргі́и: Бл҃жє́нна гла́са, на ѕ҃: и҆ ст҃а́гѡ пѣ́снь г҃, на д҃. Прокі́менъ, гла́съ є҃: Ты̀, гдⷭ҇и, сохрани́ши ны̀ и҆ соблюде́ши ны̀ ѿ ро́да сегѡ̀ и҆ во вѣ́къ. Сті́хъ: Сп҃си́ мѧ, гдⷭ҇и, ꙗ҆́кѡ ѡ҆скꙋдѣ̀ прпⷣбный. А҆пⷭ҇лъ ко є҆вре́ємъ, зача́ло т҃д. А҆ллилꙋ́їа гла́са. Є҆ѵⷢ҇лїе ѿ ма́рка, зача́ло з҃. И҆ ст҃о́мꙋ всѧ̀ слꙋ́жба ст҃и́тельскаѧ. Прича́стенъ: Хвали́те гдⷭ҇а съ нб҃съ:
Въ недѣ́лю ве́чера,
во свѣти́льничное поста́вимъ стїхѡ́въ і҃: и҆ пое́мъ ᲂу҆мили́тєльны ѻ҆смогла́сника д҃, и҆ трїѡ́ди подо́бны господи́на і҆ѡ́сифа, гла́съ и҃.
Подо́бенъ: Неизче́тенъ:
Безчи́слєннаѧ тѝ прегрѣши́въ, безчи́сленныхъ мꙋ́къ ѡ҆жида́ю: скре́жета зꙋ́бнагѡ, и҆ пла́ча неꙋтѣ́шимагѡ, гее́нны ѻ҆́гненныѧ, и҆ тьмы̀, и҆ та́ртара, сꙋдїѐ пра́веднѣйшїй. сле́зы ᲂу҆́бо мѝ да́рꙋй, и҆́миже ѡ҆брѧ́щꙋ ѡ҆ставле́нїе и҆ ѕѡ́лъ мои́хъ разрѣше́нїе, постѧ́сѧ и҆ зовы́й тѝ: влⷣко хрⷭ҇тѐ, ᲂу҆ще́дри мѧ̀, вели́кїѧ ра́ди и҆ бога́тыѧ млⷭ҇ти.
Менѐ заблꙋ́ждшаго на гора́хъ престꙋпле́нїй лю́тыхъ взыщѝ, сло́ве, и҆ къ тебѣ̀ воззовѝ, ѡ҆бы̑чаи лꙋка̑выѧ ѿ ᲂу҆ма̀ моегѡ̀ дале́че ѿгонѧ́ѧ. ᲂу҆ме́рша па́ки ѡ҆живѝ, и҆ посто́мъ ѡ҆чи́сти, въ пла́чи непреста́ннѣмъ вопїю́ща и҆ глаго́люща: влⷣко хрⷭ҇тѐ, ᲂу҆ще́дри мѧ̀, за вели́кїѧ ра́ди и҆ бога́тыѧ млⷭ҇ти.
И҆́на стїхи́ра, господи́на ѳео́дѡра, гла́съ то́йже.
Подо́бенъ: Пресла́вное:
Поста̀ наче́нше седми́цꙋ тре́тїю, трⷪ҇цꙋ чтⷭ҇нꙋ́ю восхва́лимъ, вѣ́рнїи, про́чее ра́достнѡ преходѧ́ще: плотскі̑ѧ же стра̑сти ᲂу҆вѧди́вше ѿ дꙋ́шъ на́шихъ, цвѣ́ты бж҃е́ствєнныѧ пожне́мъ, вѣнцы̀ и҆спле́тше пе́рвомꙋ и҆з̾ дні́й, да всѝ хрⷭ҇та̀ ꙗ҆́кѡ побѣди́телѧ, вѣнцы̀ носѧ́ще, воспои́мъ.
И҆ мине́и г҃. Сла́ва, и҆ ны́нѣ, бг҃оро́диченъ.
Свѣ́те ти́хїй: По вхо́дѣ прокі́менъ, гла́съ и҃: Не ѿвратѝ лица̀ твоегѡ̀ ѿ ѻ҆́трока твоегѡ̀.
На стїхо́внѣ самогла́сенъ днѐ, два́жды, гла́съ и҃:
Брѡзды̀ и҆сплюва́хъ ѻ҆те́чєскїѧ, непостоѧ́ннымъ ᲂу҆мо́мъ: со ско́тскими грѣхо́вными помышле́ньми пожи́хъ, всѐ моѐ житїѐ и҆жди́въ блꙋ́днѡ ѡ҆каѧ́нный а҆́зъ: пи́щи лиша́емь ᲂу҆твержда́ющїѧ се́рдце, вре́меннѡ ᲂу҆тꙋчнѧ́ющею сла́стїю насыща́хсѧ: но ѻ҆́ч҃е бл҃гі́й, не затвори́ ми человѣколю̑бнаѧ нѣ̑дра, но ѿве́рзъ прїими́ мѧ ꙗ҆́кѡ блꙋ́днаго сы́на, и҆ сп҃си́ мѧ.
Мч҃ниченъ: Мч҃ницы гдⷭ҇ни, всѧ́ко мѣ́сто ѡ҆сщ҃а́ете, и҆ всѧ́къ недꙋ́гъ врачꙋ́ете: и҆ ны́нѣ моли́те, и҆зба́витисѧ ѿ сѣте́й вра́жїихъ дꙋша́мъ на́шымъ, мо́лимсѧ.
Сла́ва, и҆ ны́нѣ, бг҃оро́диченъ, гла́съ то́йже:
Нбⷭ҇ныѧ си̑лы пою́тъ тѧ̀, бл҃года́тнаѧ мт҃и безневѣ́стнаѧ: и҆ мы̀ славосло́вимъ неизслѣ́димое твоѐ ржⷭ҇тво̀. бцⷣе, молѝ сп҃сти́сѧ дꙋша́мъ на́шымъ.
И҆ про́чее послѣ́дованїе, ꙗ҆́кѡ пред̾ѧви́сѧ.