[глⷡ҇а к҃д] Мл҃тва на ѡ҆снова́нїе до́мꙋ.

Бж҃е вседержи́телю, сотвори́вый нб҃са̀ ра́зꙋмомъ, и҆ ѡ҆снова́вый зе́млю на тве́рди є҆ѧ̀, созда́телю и҆ содѣ́телю. всѣ́хъ, при́зри на раба̀ твоего̀, (и҆́мⷬ҇къ), и҆зво́лившаго въ держа́вѣ крѣ́пости твоеѧ̀, воздви́гнꙋти до́мъ въ жили́ще, и҆ зда́нїемъ є҆го̀ воздви́гнꙋти: ᲂу҆твердѝ є҆го̀ на тве́рдомъ ка́мени, и҆ ѡ҆снова́й по твоемꙋ̀ бж҃е́ственномꙋ є҆ѵⷢ҇льскомꙋ гла́сꙋ, є҆го́же ни вѣ́тръ, ни вода̀, ни и҆́но что̀ повреди́ти возмо́жетъ: бл҃говолѝ є҆мꙋ̀ въ коне́цъ привести́сѧ, и҆ въ не́мъ жи́ти хотѧ́щихъ ѿ всѧ́кагѡ навѣ́та сопроти́внагѡ свободѝ.

Ꙗ҆́кѡ твоѧ̀ держа́ва, и҆ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.