Чин пострижения в великую схиму

Хотяй святый великий ангельский образ прияти, в первых должен есть очистити свою совесть опасно, и вся своя исповедати пред своим духовным отцем согрешения, и от него совершенное разрешение прияти, и сице свою очистив совесть, приуготовляти себе ко причащению Святых и Божественных Таин Тела и Крове Господни, всяко якоже умираяй, ибо конечнее вторыми обеты отрицаяся мира, миру и всем мирским пристрастием умирает.

С вечера убо вносима бывают одеяния хотящаго прияти святый образ во святый жертвенник, и полагаются на подножии святыя трапезы.

На утрени же поется канон, емуже краегранесие:

Благоискусный конец, благоискусну ми сущу, Христе, подаждь.

Песнь 1. Глас 2. Ирмос:

Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.

Ко Твоему человеколюбию притекшаго, Христе, во святый образ ныне приходящаго, душевною любовию и мыслию любодобродетельною, Спасе, приими.

Под'яти ми Твое иго благое, Блаже, и бремя, Владыко, взяти сподоби, многих моих прегрешений бремя истощевая, яко Милостив.

Убегнути ми греховнаго поползновения, отныне благоизволи, содеянных мною безмерных прегрешений язвы очищая росою благодати.

Слава:

Нас ради в плоть оболкийся, и смерть о нас яко благоутробен восприимый, плотских осквернений очисти, Щедре, приступающаго к Тебе.

И ныне, Богородичен:

Прибежище и предстательницу, и покров Тя светел стяжахом, Богородицу Тя, Пресвятая, мудрствующии, и божественнаго зрения сподобляемся.

Песнь 3. Ирмос:

Утверди нас в Тебе, Господи, древом умерщвлей грех, и страх Твой всади в сердца нас поющих Тя.

Очисти, Христе, к Тебе притекающаго раба, и сего житию преподобных сподоби, благочестно и праведно пожити.

Преложение живота и претворение, образ божественный сей подаждь, и согрешением очищение быти, к Тебе приходящему верному рабу Твоему.

Едине Блаже, не хотяй смерти человеком, Милостиве, Твоего раба, Тебе припадающаго, лику святых сопричти.

Слава:

Ныне хотящаго Твоим путем шествовати, и житие избрати крестное, приим, очисти мя от прежних согрешений, Человеколюбче.

И ныне, Богородичен:

Евину клятву, Чистая, разрешила еси, рождши всем благословение неизсякаемое источившаго, Спаса миру, Мати Дево.

Седален, глас 4. Подобен: Скоро предвари:

Хотящии, рече Господь, ити в'след Мене, отвержитеся мирских пристрастий, родителей родивших, чад же и жен, братий же и другов, сродник же и рабов, имений и домов, и приимите достоинство апостол Моих.

Песнь 4. Ирмос:

Услышах, Господи, слух Твоего смотрения, и прославих Тя, Едине Человеколюбче.

Обращающагося приими мя, Слове Божий, яко блуднаго древле, и яко мытаря, Едине Человеколюбче.

Избавитель нам быв, Крестом мир искупил еси, темже Ти припадаю, избави мя, Владыко.

Знаменаннаго благодатию и светом Твоего богоразумия, словеснаго Твоего стада яви мя овча.

Слава:

Воздвигнувый Лазаря из мертвых, и мене умерщвленнаго греховным жалом, Владыко, оживи.

И ныне, Богородичен:

Благословенная Пречистая Мати Божия, Твоим мя предстательством и божественным покровом соблюди, Владычице.

Песнь 5. Ирмос:

Света Подателю и веков Творче, Господи, во свете Твоих повелений настави нас, разве бо Тебе иного Бога не знаем.

Послушанием Твоим, Христе, наше яко Бог разрешил еси преслушание, и Царствия нам вход покаянием и верою показал еси.

Скончавшаго в небрежении житие зря мене, внимание прилежания пристави, Христе, правды оболк мя бронею.

Верою, паки порождения же банею, омыл мя еси от прародительныя клятвы, ныне же омый слез источниками, оскверненнаго лютыми грехопадении.

Слава:

Преклоншагося низу, и сляченнаго мя к земли, Владыко, страстным и смертоносным греховным бременем, Своею живоносною рукою исправи.

И ныне, Богородичен:

Равен сый Отцу по безначальному зраку, был еси нам равен, от неискусобрачныя родився Матере, Еяже молитвами, Богочеловече, спаси мя.

Песнь 6. Ирмос:

В бездне греховней валяяся, неизследную милосердия Твоего призываю бездну, от тли, Боже, мя возведи.

Не презри создание Свое, Владыко, но креста Твоего благодатию спаси мя, и Честною Кровию, юже от божественнаго Твоего ребра источил еси.

Яко не суща первее создал еси, тако и погубляема мя грехи взыскав спаси, яко Пастырь Благ же и Милосерд.

Слава:

Блаженным надеждам причаститися, уготованным всем достойным Твоим, и тех житию подражати сподоби мя, Едине Человеколюбче.

И ныне, Богородичен:

Рукама нетленныма вообразивый мя, паки воз'образи непотребнаго зело, из чрева Твоего, Владычице, приим мя совершенне, яко Милосерд.

Кондак, глас 1:

Об'ятия Отча отверсти ми потшщися, блудно мое иждих житие, на богатство неиждиваемое взираяй щедрот Твоих, Спасе, ныне обнищавшее мое не презри сердце. Тебе бо, Господи, во умилении зову: согреших, Отче, на небо и пред Тобою.

Песнь 7. Ирмос:

Телу златому премудрыя дети не послужиша, и в пламень сами поидоша, и боги их обругаша, среди пламене возопиша, и ороси я Ангел, услышася уже уст ваших молитва.

Направи к себе пути моя, Блаже, и сердце мое обновлением божественнаго Духа, обетшавшаго назидай, святыни добротою украсив вопиющаго ти: благословен Бог отец наших.

За руку мя десную, яко Благ, взем, к житию, Тебе благоугодному, право ступати покажи, и к совершенству жития восходити, вопиющаго к Тебе: благословен Бог отец наших.

Леностно прежде препровождая мое житие окаянный, к Тебе Владыце ныне прихожду, на Твою надеявся благость и благоутробие Твое единое, и припадаю, взывая Ти: благословен Бог отец наших.

Слава:

Ядрилом креста и ветром Честнаго и Божественнаго Духа ко пристанищу настави Твоего славнаго хотения, и к небесному наследию, и сподоби пети Тебе: благословен Бог отец наших.

И ныне, Богородичен:

Спаса Бога, и миру Избавителя, Всечистая, родила еси, егоже ныне моли, благолепием добродетелей, и светлостию, и постническою благодатию облещи поющыя: благословенна еси, Бога плотию рождшая.

Песнь 8. Ирмос:

Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющыя: благословите, вся дела Господня, Господа.

Победу нам на диавола, креста Твоего образ дал еси, в немже низлагаем онаго козни и лукавая шатания, зовуще: благословите, вся дела Господня, Господа.

Дал еси нам, еже мощи обновити благодать крещения, исповеданием, жития чистотою, слез пролиянием, и покаянием преисекренним, Человеколюбче.

Страсти плотския уму покорити, воздержанием и постничеством, подаждь рабом Твоим, образы доброты, удалением горшаго и непрестанным заповедий Твоих соблюдением.

Слава:

Свыше нам Твоего сыноположения образ обнови Божественнаго Твоего Духа действом и благодатию, яко Един Благопременитель, художеством человеколюбия, и премногия Твоея благости.

И ныне, Богородичен:

Расторгни пленицы прегрешений, и греховное рукописание, к божественному образу приходящаго тихостию, и благоговением, Пречистая, верою православною утвержденна, соблюдающи.

Песнь 9. Ирмос:

Безначальна Родителя Сын, Бог и Господь, воплощься от Девы, нам явися, омраченная просветити, собрати расточенная, тем Всепетую Богородицу величаем.

Достойно званию и святому образу пожити, Слове Божий, подаждь ми, греха моего скверну и струпы прегрешений божественною Твоею благодатию очистив, Многомилостиве.

Спасе, яко именуемый, спаси мя, молюся чистым сердцем к Тебе приходящаго, и злобы моея тяготу от'емля, яко Един Щедр, милостивне упокой, якоже обещался еси, Всесильне.

Христос ныне дарует, Благ сый и Милосерд, к Нему приходящым божественная дарования, приступающым к божественному благоговейно благодати престолу, дар благости нетленныя подавая.

Слава:

Имеяй сопутствующую Твоему хотению силу, служители достойны нас покажи Евангелиа Твоего, Слове, и яже к Тебе обеты совершити, молитвами святых Твоих, Животодавче, сподоби.

И ныне, Богородичен:

Сына Твоего благосердаго, Пренепорочная, умоли, верно приходящаго к божественному образу, постническаго доспети, всеблагоговейно, многоцелебнаго конца, Тебе бо Пречистую Заступницу стяжахом.

Стихиры, глас 2.

Подобен: Егда от древа Тя:

Верою приходящаго к Тебе, Владыко, на стезю правды Твоея поставль, настави мя, яко Един Благоутробен, и люте падшаго мя, и низверженнаго множеством согрешений моих, Спасе, исправи, на Твое бо надеявся поспешение, ко ангельскому жительству сему прихожду, Человеколюбче.

Имеяй источник благих, грешных не хотяй, Христе, смерти, за неизреченную милость, но покаяние верным даровавый, познавшым пренепостижное смотрение Твое, приими приходящаго усердно к божественному Твоему образу и спаси человеколюбию Твоему припадающаго.

Стену прейду Тобою греха моего, Спасе, и избавлюся, Ты бо воздал еси мой долг, и ценою искупил мя еси плененнаго, благости показуя богатство, и милосердия бездну источити хотяй всем поющым Тя, Человеколюбче.

Слава, и ныне, Богородичен:

Всем предстательствуеши, Благая, прибегающым с верою в державный Твой покров, иного бо не имамы грешнии к Богу в бедах и скорбех присно заступления, обременени грехи многими, Мати Бога Вышняго; темже Ти припадаем, избави от всякаго обстояния рабы Своя.

На святей же Литургии, входу бывшу со Евангелием, хотяй прияти святый образ снимает главы своея покров, и сущыя на ногах каллиги, и сотворив метания три посреде церкве, станет тамо. По входе же прочтену бывшу тропарю дневному, абие поют антифоны сия, глас 4.

Антифон 1:

Хотех слезами очистити моих грехов, Господи, рукописание, и прочее живота моего покаянием благоугодити Тебе, но враг льстит мя и борет душу мою; Господи, прежде даже не погибну, спаси мя.

Кто обуреваемь и притекаяй ко пристанищу сему не спасется, или кто болезнуя и припадая ко врачевству сему не исцелеет? Содетелю всех и Врачу недужных, Господи, прежде даже не погибну, спаси мя.

Овча есмь словеснаго Твоего стада, и к Тебе прибегаю Пастырю доброму: взыщи мя заблудшаго, Боже, и помилуй мя.

Слава, и ныне, Богородичен:

От всяких бед избави нас, Благословенная Богородице, да вси вопием Ти: радуйся, Едина Заступнице душам нашим.

Антифон 2:

Во источнице тайнем паки рождения сыноположение приим и избавление, в лености житие и грехопадениих иждив, Блаже, ныне зову Тебе: слез покаяния источник ми даруй, и омый скверну моих прегрешений, Всесильне Спасе и Многомилостиве.

Буря греховная обдержит мя, Спасе, и ктому не терпя волнения, к Тебе припадаю Единому Правителю: яко Петрови руку ми простри человеколюбия Твоего и спаси мя.

Слава, и ныне, Богородичен:

Избави нас от бед наших, Мати Христа Бога, рождшая всех Творца, да вси вопием Ти: радуйся, Едина Предстательнице душам нашым.

Антифон 3:

Где есть мирское пристрастие, где есть привременных мечтание, не се ли сия зрим землю и пепел бывающая? Что убо труждаемся всуе? Почто не отвержемся мира и не последуем Зовущему: хотяй ити в'след Мене, да возмет крест свой, и живот вечный наследствует.

Стих: Приидите, чада, послушайте Мене, страху Господню научу вы.

Приидите ко Мне, вси труждающиися и обремененнии, и Аз упокою вы; возмите иго Мое на себе, и научитеся от Мене, яко кроток есмь и смирен сердцем, и обрящете покой душам вашым.

Стих: Заблудих яко овча погибшее.

Овча есмь словеснаго Твоего стада, и к Тебе прибегаю Пастырю Доброму: взыщи мя заблуждшаго, Боже, и помилуй мя.

Таже:

Приидите, поклонимся и припадем, и восплачемся пред Господем сотворшим нас, поюще Ему: аллилуиа, аллилуиа, аллилуиа.

Сему поему, грядет приемляй схиму даже до святых дверий, и пред теми пад на земли ниц, не востает дóндеже поются тропари сии, глас 4:

Господи, Господи, призри с небесе и виждь, и посети виноград сей, и соверши его, егоже насади десница Твоя.

Слава, и ныне, Богородичен:

Едина Чистая и Непорочная Дево, рождшая Бога без семене плотию, Того моли о спасении душ наших.

Посем:

Об'ятия Отча отверсти ми потшщися, блудно мое иждих житие, на богатство неиждиваемое взираяй щедрот Твоих, Спасе, ныне обнищавшее мое не презри сердце. Тебе бо, Господи, во умилении зову: согреших, Отче, на небо и пред Тобою.

По скончании же пения, настоятель воздвизает ниц лежащаго десницею, глаголя:

Бог Милосердый, яко Отец чадолюбивый, зря твое глубокое смирение и истинное покаяние, чадо, яко блуднаго сына приемлет тя кающагося и к Нему вторицею от сердца припадающаго.

Воставшаго же настоятель велегласно вопрошает, глаголя:

Что пришел еси, брате, вторицею припадая ко святому жертвеннику, и ко святей дружине сей?

Ответ: Желая жития совершеннейшаго постническаго, честный отче.

Вопрос: Желаеши ли сподобитися ангельскому образу, и сопричтен быти лику инокующих, и иноческия обеты усугублением пред Господем обновляти?

Ответ: Ей, честный отче.

Настоятель: Воистинну добро дело и блаженно избрал еси, но аще и совершиши е: добрая бo дела трудом стяжаваются, и болезнию исправляются.

Вопрос: Вольным ли своим разумом вторицею сицевым образом приступаеши ко Господу?

Ответ: Ей, честный отче.

Вопрос: Не от некия ли беды, или нужды?

Ответ: Ни, честный отче.

Вопрос: Отрицаеши ли ся вторицею мира и яже в мире по заповеди Господней?

Ответ: Ей, честный отче.

Вопрошает: Обещаеши ли ся вторицею в монастыри сем, или в немже ти от святаго послушания повелено будет, и в постничестве даже до последняго издыхания твоего пребыти?

Ответ: Ей, Богу содействующу, честный отче.

Вопрос: Обещаеши ли вторицею сохранити себе в девстве, и целомудрии, и благоговении даже до смерти?

Ответ: Ей, Богу споспешствующу, честный отче.

Вопрос: Обещаеши ли вторицею хранити послушание даже до смерти ко игумену и ко всей о Христе братии?

Отвещает: Ей, Богу споспешствующу, честный отче.

Вопрос: Претерпиши ли всякую скорбь и тесноту иноческаго жития, Царствия ради Небеснаго?

Ответ: Ей, Богу споспешствующу, честный отче.

Вопрос: Обещаеши ли вторицею пребыти в нестяжании и вольней Христа ради во общем житии сущей нищете, ничтоже себе самому стяжавая, или храня, разве яже на общую потребу, и се от послушания, а не от своего произволения?

Ответ: Ей, честный отче, пребуду, Богу споспешствующу.

И абие оглашение:

Виждь, чадо, каковы обеты вторицею даеши Владыце Христу: Ангели бо приидоша невидимо, написующе исповедание твое сие, о немже имаши истязан быти во Второе Пришествие Господа нашего Иисуса Христа. Сказую убо тебе всесовершенное житие, в немже по подобию Господне жительство является, засвидетельствуя яже подобает ти хранити и ихже подобает бегати. Отречение убо мира и сущих в мире ничтоже ино есть, по реченному, разве креста и смерти обещание; веждь убо себе от днешняго дне распята и умерщвлена быти мирови, совершеннаго ради сугубаго отречения: отрицаеши бо ся родителей, братий, жены, чад, отча сродства, содружества другов обычных, сущих в мире мятежей, попечений, стяжаний, имений, тщетныя и суетныя сласти же и славы, и отврещися имаши не точию предреченных, но и своея души по глаголу Господню, глаголющу: иже хощет по Мне ити, да отвержется себе, и возмет крест свой, и последует Ми. Аще убо воистинну последовати Ему изволил еси, и аще неложно нарещися Того ученик желаеши, уготовися от нынешняго времене, не ко отрадам, ни безпечалию, ни к пищам, ниже ко иному чесому от сущих на земли красных же и сладких, но к подвигом духовным, к воздержанию плоти, к очищению души, к нищете духовней же и телесней, ко плачу благому, ко всем скорбным и болезненным, радостотворнаго по Бозе жития; ибо алкати имаши, и жаждати, и наготу терпети, досаду же под'яти и поругание, поношение и гонение, и во многи ины впасти напасти, имиже сущий по Бозе живот начертавается; и егда сия вся постраждеши, радуйся, рече Господь: яко мзда твоя многа на небесех есть. Радостию убо радуйся, и веселием веселися, яко днесь избра тя, и отлучи тя Господь Бог от мирскаго жития, и постави тя якоже пред Лицем Своим, в предстоянии иноческаго чина, в воинстве ангеловиднаго жития, в высоте небоподражательнаго жительства, Тому ангельски служити, и Тому всецело работати, горняя мудрствовати, горних искати, наше бо житие, по апостолу, на небесех есть. Оле новаго звания! Оле дара тайны! Второе крещение приемлеши днесь, брате, богатыми Человеколюбца Бога даровании, и от грехов своих очищаешися, и сын света бываеши, и Сам Христос Бог наш радуется со святыми Своими Ангелы о покаянии твоем, закалая тебе тельца упитаннаго. Достойно прочее званию ходи, устранися от суетных пристрастий, возненавиди в долняя влекущую тя похоть, все свое желание преложи к небесным, отнюд не возвращайся вспять, да не будеши столп сланый, яко жена Лотова, (или якоже пес на своя блевотины возвращаяйся), и исполнится на тебе слово Господне, глаголющее, яко никтоже возложив руку на рало, и обращься вспять, управлен есть в Царствии Небеснем. Несть бо ти мала беда обещавшемуся ныне вся предреченная хранити, потом же нерадити о обетовании, или на первое житие возвратитися, или отца твоего духовнаго разлучитися, и сопостящихся братий, или туне хотящу в небрежении иждити дни своя, понеже тяжчайшее обрящеши осуждение, паче первых на Страшнем и неумытнем судищи Христове, елико множайшия благодати насладишися ныне, и лучши ти бе, по реченному, не обещатися, нежели обещавшуся не отдати. Ниже паки мни, яко в мимошедшем времени здешняго пребывания довольно подвизался еси к невидимым силам вражиим, но веждь, яко наипаче отныне приимут тя множайшии подвизи к бранем его, никакоже убо тя победити возможет огражденна тя обрет, к наставляющему тя верою крепкою, и любовию, и ко всякому послушанию и смирению правотою. Сего ради да отидет от Тебе всякое непослушание, прекословие, гордыня, рвение, ревность, зависть, ярость, кличь, хула, тайноядение, дерзновение, особное дружество, безчиние, любопрение, роптание, шептание, притяжание себе самому особное, аще и малыя коея и окаянныя вещи, и друзии вси злобнии виды, ихже ради приходит гнев Божий на таковая деющих, и вкоренятися начинает в них душам тлитель. Паче же вместо сих стяжи подобающая святым: братолюбие, безмолвие, кротость, молчание, благоговение, поучение и размышление божественных словес, и чтение, соблюдение сердца от лукавых помыслов, делание по силе, воздержание, и терпение даже до смерти, и на негоже отца обетование свое возложил еси, и первое и последнее исповедание, сердечных таин твоих николиже от него сокрывай, но всегда открывая ему сия исповедай, якоже Божественная писания глаголют: крещахуся бо, рече, исповедающе грехи своя.

Вопрос: Сия вся тако ли вторицею исповедаеши о уповании силы Божия, и в сих обетованиих претерпети обещаваеши ли ся даже до кончины живота твоего, благодатию Христовою?

Ответ: Ей, Богу споспешствующу, честный отче.

Таже настоятель глаголет молитву сию:

Всещедрый убо Бог и Многомилостивый, пречистыя утробы неизследимыя благости Своея отверзаяй всякому приходящему к Нему с желанием и любовию теплою, рекий: аще бы и жена забыла изчадие свое, Аз же не забуду тебе, и твое ведый желание, и ко предложению твоему прилагаяй яже от Себе силу, ко исполнению заповедий Своих, да восприимет, и об'имет, и защитит тя, и будет ти стена тверда от лица вражия, камень терпения, утешения вина, крепости податель, благодушия снискание, мужеству сподвижник, совозлегая, совостая, услаждая и веселя сердце твое утешением Святаго Своего Духа, сподобляя тя и части святых и преподобных отец наших, Антониа, Евфимиа, Саввы и иже с ними, и преподобных отец наших Антониа и Феодосиа Печерских, Сергиа Радонежскаго и всех святых, с нимиже и да наследиши Царство Небесное о Христе Иисусе Господе нашем, Емуже слава и держава, и Царство и сила, со Отцем и Святым Духом, ныне и присно и во веки веков.

Братиям же рекшым: Аминь.

Настоятель знаменает трижды главу схиму приемлющаго, и по знаменании глаголет: Господу помолимся.

И обращься к востоком, глаголет молитву сию:

Сый Владыко Вседержителю, Превышний Царю Славы, с Живым и Ипостасным Своим Словом, и от Тебе исходящим Духом Истинным господствуяй всякою тварию видимою же и невидимою, Боже седяй на Херувимех и трисвятым гласом от Серафимов воспеваемый непрестанно, Емуже предстоят тысящы тысящей и тмы тем святых Ангел и Архангел воинства, Ты еси Свет просвещаяй всякаго человека грядущаго в мир, умоляемь от Святыя Богородицы и Приснодевы Марии, и всея Небесныя Твоея Церкве первенец во Иерусалиме, призри милостивным оком на смирение раба Твоего, имярек, иже возложи исповедание пред многими свидетели, совокупи его дарованному ему от прародителей дару сыноположения, и Царствия Твоего святым крещением, иноческое сие и ангеловидное обещание постави совершенно на краесекомем и духовнем камени еже в Тя веры, укрепи его в державе силы Твоея, и облецы его во все оружество Святаго Твоего Духа, яко несть ему брань к крови и плоти, но к началом, ко властем, к миродержителем тмы века сего, к духовом лукавства, препояши чресла его силою истины, и облецы его в броня правды и радости, и обуй нозе его во уготование благовествования мира, умудри его восприяти щит веры, в немже возможет вся стрелы лукаваго разжженныя угасити, и шлем спасения прияти, и меч духовный, еже есть слово Твое, и заступая неизглаголанная сердца его воздыхания, сопричти его избранным Твоим, яко да будет Твой сосуд избранный, сын и наследник Царствия Твоего, сын света и дне, мудрость, правда, освящение, избавление, сотвори его орган доброгласен, псалтирь красен Святаго Духа, яко да отсюду по преспеянию совлекся ветхаго человека, тлеющаго по сластолюбии прелестника многообразнаго змия, облечется в Новаго Адама, по Бозе созданнаго, в преподобии и правде, утверди его всегда и язвы и крест Иисусов носити на теле своем, имиже ему мир распятся, и той мирови, вообрази в нем добродетель истинную водити, а не на угождение человеком, или на самоугодие, в терпении благочестие, во благочестии же братолюбие и послушание, облагодати его бодрствующа, делающа, спяща, востающа, во псалмех и пениих и песнех духовных, ангельски зрети Тебе чистым сердцем, и покланятися Тебе Единому Живому и Истинному Богу, в радость Его неизглаголанную.

Яко Твое есть Царство и держава и власть, и Тебе подобает всякая слава, честь и поклонение, ныне и присно и во веки веков.

Братия же глаголют: Аминь.

И абие полагаются ножницы на святем Евангелии. Настоятель же глаголет молитву сию, диакону рекшу: Господу помолимся. Братиям же: Господи, помилуй.

Святый Господи сил, Отче Господа нашего Иисуса Христа, благослови раба Твоего, егоже призвал еси в духовный Твой невестник, и сподоби его быти Твоим преподобным рабом, умудри его, и излий нань от Владычняго Твоего Духа благодать и разум, укрепи его на невидимаго врага брань, плотская востания державною Твоею силою низложи, даждь ему благоугождати Тебе в пении и славословии непрестаннем, в песнех благовременных, в молитвах благоприятных, в совете праве, в сердцы смиренне, в деянии жизни, и кротости и истине, и сподоби его благоугодити тебе в кротости, в любви, в совершенстве, в разуме, в мужестве, и приносити Тебе пения и славословия и молитвы в воню благоухания, соверши его житие в преподобии и правде, да непрестанно и нескверно имея к Тебе соединение, сподобится Небеснаго Царствия, благодатию и щедротами Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно и во веки веков.

Братия глаголют: Аминь.

Настоятель простер руку ко святому Евангелию, глаголет:

Се Христос невидимо предстоит; виждь, яко никтоже тя принуждает приити к сему образу, виждь, яко ты от предложения своего хощеши великий сей ангельский образ прияти.

Ответ: Ей, честный отче, от предложения своего.

По отвещании же, настоятель глаголет к нему трижды сие:

Возми ножницы и подаждь ми я.

Подавшу же ему ножницы третицею, настоятель, показуя десницею ко святому

Евангелию, паки глаголет к нему:

Се от руки Христовы вторицею вземлеши я: виждь, к Кому приходиши, Кому обещаваешися, и кого отрицаешися.

Взем же настоятель ножницы, глаголет:

Благословен Бог, хотяй всем человеком спастися и в познание истины приити, Сый благословен во веки веков.

Братия же глаголют: Аминь.

Настоятель же постризает верху главы его крестообразно, глаголя:

Брат наш, имярек, постризает второе власы главы своея, в знамение конечнаго отрицания мира, и всех яже в мире, и в конечное отвержение своея воли, и всех плотских похотей, и во еже в безмолвии и детельнем приседении себе внимати, во имя Отца и Сына и Святаго Духа; рцем вси о нем: Господи, помилуй.

Братия же поют трижды: Господи, помилуй.

Коснув же ся настоятель десницею власяницы, еюже одеян есть схиму приемляй, и держа за ню, глаголет:

Брат наш, имярек, облачится вторицею в хитон правды, и одевается в ризу радования великаго ангельскаго образа, во еже пребыти ему в совершенней Христа ради вольней нищете духовней же и телесней, и всяко ошаяватися всякаго стяжания и имений собрания, и во отложение и попрание всех печалей и смущений от бесов, от плоти и от мира находящих, во всегдашнее же свое еже о Христе духовное веселие и радование, во имя Отца и Сына и Святаго Духа; рцем вси о нем: Господи, помилуй.

И знаменает его крестообразно, он же лобызает власяницу и десницу настоятелеву. Настоятель же абие облачит его в схимническую рясу, яже имать быти сута, сиесть швена и на преде, братиям поющым трижды: Господи, помилуй.

Настоятель же, взем великий параман и держа его шуйцею, глаголет:

Брат наш, имярек, приемлет совершенный параман великаго ангельскаго образа, во одежду нетления и чистоты душевныя же и телесныя, и во всегдашнее воспоминание благаго ига Христова на себе взятия, и легкаго бремене Его ношения, и во обуздание и связание всех похотей и желаний плоти своея, во имя Отца и Сына и Святаго Духа; рцем вси о нем: Господи, помилуй.

Знаменав же параман и дав ему лобзати, налагает на плещи его, братиям поющым трижды: Господи, помилуй.

Настоятель же, взем пояс усмяный и держа его шуйцею, глаголет:

Брат наш, имярек, препоясует вторицею чресла своя силою истины, во умерщвление тела и обновление духа, в бодрость же и опасство, в снабдение заповедий Христовых, во имя Отца и Сына и Святаго Духа; рцем вси о нем: Господи, помилуй.

Десницею же знаменав его, препоясует им схимника, братиям поющым трижды: Господи, помилуй.

Настоятель же взем кукуль со аналавом, яже всегда вкупе бывают, и держа я шуйцею, глаголет:

Брат наш, имярек, облачится в кукуль беззлобия, в шлем спасительнаго упования, и молчаливаго в духовнем размышлении пребывания, и опаснаго себе внимания, во имя Отца и Сына и Святаго Духа; рцем вси о нем: Господи, помилуй.

Благословив же десницею кукуль со аналавом, и дав ему лобызати, возлагает нань, покрывая главу, предняя же и задняя его, и абие взем шуйцею конец предния полы аналава, десницею благословляет ю и дает ему лобызати, глаголя:

Брат наш, имярек, приемлет аналав, якоже крест свой на рамо, во еже последовати Владыце Христу, и всегда вольныя Его страсти и смерть, яже нас деля претерпел есть, памятствовати, и по елику мощно, сия подражати тщатися, во имя Отца и Сына и Святаго Духа; рцем вси о нем: Господи, помилуй.

Братия же поют трижды: Господи, помилуй.

Посем же взем мантию схимническую без фалдов сущую,

и держа ю шуйцею, глаголет:

Брат наш, имярек, облачится второе в ризу спасения и в броня правды, во еже ошаяватися от всякия неправды, и со тщанием своего разума измышления и своея воли мудрования отлагати, смерти же память всегда во уме своем имети, распята же себе быти мирови вменяти, и мертва на всякое дело зло имети, жива же присно на всяку добродетель Христови неленостно представляти, во имя Отца и Сына и Святаго Духа; рцем вси о нем: Господи, помилуй.

Десницею же знаменав ю, облачит схимника, братиям поющым трижды: Господи, помилуй.

Взем же сандалия и шуйцею держа я, глаголет:

Брат наш, имярек, обувается вторицею в сандалия, благовествования мира, во еже скору быти и тщаливу на всякое послушание и на всяко дело благое, косну же и нескору ко исполнению своея воли и ко всякому делу неподобному, и во еже бодренно и терпеливно нощное и дневное на молитвах стояние совершати, во имя Отца и Сына и Святаго Духа; рцем вси о нем: Господи, помилуй.

Десницею же благословив, обувает его, братиям поющым трижды: Господи, помилуй.

По сих же приим вервицу и шуйцею держа ю, глаголет:

Приими, брате, имярек, вторицею меч духовный, иже есть глагол Божий, ко всегдашней молитве Иисусове, всегда бо имя Господа Иисуса во уме, в сердцы и во устех своих имети должен еси, глаголя присно: Господи Иисусе Христе, Сыне Божий, помилуй мя грешнаго; и виждь, яко отселе всегда непрестанно слово Божие в молитве, во псалмех и пениих и песнех духовных, во устех своих имети должен еси, слово же гнилое да не изыдет из уст твоих, во имя Отца и Сына и Святаго Духа; рцем вси о нем: Господи, помилуй.

И благословив ю десницею, подает схимнику, братиям поющым трижды: Господи, помилуй. Он же, приемля, лобызает вервицу и десницу настоятелеву.

Настоятель же, взем ручный крест и держа и десницею, глаголет:

Приими, брате, имярек, вторицею щит веры, крест Христов, в немже возможеши вся стрелы лукаваго разжженныя угасити, и памятствуй всегда, яко рече Господь: иже хощет по Мне ити, да отвержется себе, и возмет крест свой, и последует Ми; рцем вси о нем: Господи, помилуй.

И знаменав схимника крестом крестообразно, подает ему; он же, приемля десною рукою, лобызает крест и десницу настоятелеву, братия же поют трижды: Господи, помилуй.

Наконец же, взем настоятель горящую свещу, подает ему глаголя:

Приими, брате, вторицею свещу сию, и виждь, яко отселе должен еси чистым и добродетельным житием, и благими нравы, словом же и делом, смиренным же образом, кротким же и молчаливым себе вниманием, и крепким от всего воздержанием, свет быти мирови. Рече бо Господь: тако да просветится свет ваш пред человеки, яко да видят ваша добрая дела, и прославят Отца вашего, Иже есть на небесех; рцем вси о нем: Господи, помилуй.

Схимник же, взем свещу, лобызает десницу настоятелеву.

По всех же сих, десницею благословляя схимника, настоятель глаголет:

Брат наш, имярек, восприял есть великий ангельский образ, и вторицею оболкся есть во вся оружия Божия, во еже мощи ему победити всю силу и брани начал, и властей, и миродержителей тмы века сего, духов злобы поднебесных, безмолвно же себе внимати, во имя Отца и Сына и Святаго Духа; рцем вси о нем: Господи, помилуй.

Братия же поют трижды: Господи, помилуй.

Абие же по сих всех братия поют тропари сия, глас 4:

Облецытеся в ризу спасения, препояшитеся поясом целомудрия, приимите знамение креста, ноги умныя вооружите воздержания оружии, и обрящете покой душам вашым.

Да возрадуется душа моя о Господе, облече бо мя в ризу спасения и одеждею веселия одея мя, яко на жениха возложи на мя венец, и яко невесту украси мя красотою.

По сих же чтет настоятель молитву сию,

рекшу диакону: Господу помолимся.

Господи Боже наш, верный во обетованиих Твоих, и нераскаянный в дарованиих Твоих, и неизреченный в человеколюбии Твоем, призвавый создание Твое званием святым, и приведый раба Твоего, имярек, в духовное Твое житие, даждь ему живот благообразный, жительство добродетельное и незазорное, яко да во освящении пожив, несквернен сохранит в оньже силою Твоею облечеся образ, и убо ризою в правду одеваяся, поясом же умерщвление тела, и целомудрия в себе обнося, кукуль же смиреномудрия и шлем спасения возложив, аналавом же крестом и верою украшаемь, одеянием в ризу нетления вооружаемь, сандалиями же да наступит на путь мира и спасения, во еже быти ему страшну сопротивным, не емлему ратными, всякия сласти и срамныя похоти чужду, послушанием наказуемь, воздержание проходя, и постничества содержа правило, да во псалмех и пениих и песнех духовных хвалит пречестное и великолепое имя Твое, стопам последуя великаго пророка Илии и святаго Пророка, Предтечи и Крестителя Иоанна, яко да достиг меру совершения, течение скончает, веру соблюдет, и облечется нетлением ангельским, и сопричтется святому Твоему стаду, и получит деснаго Ти предстояния, и услышит блаженный глас: приидите, благословеннии Отца Моего, наследуйте уготованное вам Царство от сложения мира, егоже и нас наследники сподоби быти, Боже, Твоею благодатию.

Яко Бог милости, щедрот и человеколюбия еси, и Тебе славу возсылаем, Отцу и Сыну и Святому Духу, ныне и присно и во веки веков.

Братия глаголют: Аминь.

Настоятель: Мир всем. Братия: И духови твоему. Диакон: Главы ваша Господеви приклоните.

Братия: Тебе, Господи.

Настоятель же чтет сию молитву тихо, преклонь главу:

Господи Боже наш, введи раба Твоего, имярек, в духовный Твой двор и сопричти его словесному Твоему стаду, очисти его мудрование от плотских похотей и тщетныя прелести жития сего, и даждь ему непрестанно поминати уготованная благая любящым Тя и распеншым себе житию сему, Царствия ради Твоего. Ты бо еси Пастырь и посетитель душ наших, и Тебе славу возсылаем, Отцу и Сыну и Святому Духу, ныне и присно и во веки веков.

Братия: Аминь.

И аще литургия Божественная совершается, тогда служай иерей, абие по конечней молитве пострига, возглашает: Яко свят еси, Боже наш: Лицы же поют: Святый Боже: Прокимен же пострижения и Апостол и Евангелие по дневнем абие чтутся, прочее же божественная служба совершается вся по ряду обычно. Причастившу же ся новоначальному Божественным Таинам Тела и Крове Господни, по заамвонней молитве и по: Благословлю Господа, братия поют стихиру сию, глас 1:

Познаим, братие, таинства силу, от греха бо ко отеческому дому востекшаго блуднаго сына Преблагий Отец пред'усрет лобзает, и паки Своея славы познание дарует, и таинственное Вышним совершает веселие, закалая тельца упитаннаго, да и мы достойно сожительствуем заклавшему Человеколюбному Отцу, и славному Заколению, Спасу душ наших.

Поему же сему братия вси, два два, приходяще по ряду, целуют крест и новоначальнаго брата, вопрошающе его сице: Что ти есть имя, брате? Новоначальный же отвещает, поведая свое новое имя, глаголя: Антоний, или иное, каковем либо ново именован будет. Братия же, кийждо их кланяяся, и отходя, глаголет к нему: Спасайся во ангельстем чине. По скончании же пения бывает отпуст.

Аще же не совершается Божественная литургия, глаголются от диакона диаконства сия, и чтется Апостол, и Евангелие.

Миром Господу помолимся.

О свышнем мире и спасении душ наших:

О мире всего мира, благостоянии святых:

О святем храме сем, и с верою:

О Великом Господине и отце нашем Святейшем Патриарсе:

О брате нашем, имярек, и яже от Бога поспешении и помощи ему, Господу помолимся.

О еже непорочно, неосужденно и непреткновенно исправити ему намерение иноческаго великаго образа, Господу помолимся.

О еже просветитися души его в воздержании и постничестве, Господу помолимся.

О еже избавитися ему от всякия мирския похоти, и к сущым по плоти сродником пристрастия, Господу помолимся.

О оставлении грехов и прощении согрешений его, и еже быти ему вышше всех мирских мудрований, Господу помолимся.

О еже пребыти ему во всяком благочестии, и благоговении, и чистоте, Господу помолимся.

О еже отложити ему ветхаго человека, и облещися в новаго по Бозе созданнаго, Господу помолимся.

О еже избавитися ему и нам от всякия скорби:

Заступи, спаси, помилуй и сохрани:

Пресвятую, Пречистую, Преблагословенную, Славную Владычицу нашу Богородицу и Приснодеву Марию:

Настоятель же возглашает:

Яко свят еси, Боже наш, и Тебе славу возсылаем, Отцу и Сыну и Святому Духу, ныне и присно и во веки веков.

Братия: Аминь.

И поют обычно:

Елицы во Христа крестистеся, во Христа облекостеся. Аллилуиа.

Диакон: Вонмем.

Настоятель: Мир всем.

Братия: И духови твоему.

Чтец: Прокимен, глас 3:

Господь просвещение мое и Спаситель мой, кого убоюся?

Стих: Господь Защититель живота моего, от кого устрашуся?

Диакон: Премудрость.

Чтец: Ко Ефесеом Послания святаго апостола Павла чтение.

Диакон: Вонмем.

Чтец же чтет Апостол, глава 6, зачало 233:

Братие, возмогайте во Господе и в державе крепости Его, облецытеся во вся оружия Божия, яко возмощи вам стати противу кознем диавольским, яко несть наша брань к крови и плоти, но к началом и ко властем и к миродержителем тмы века сего, к духовом злобы поднебесным. Сего ради приимите вся оружия Божия, да возможете противитися в день лют, и вся содеявше стати. Станите убо препоясани чресла ваша истиною, и оболкшеся в броня правды, и обувше нозе во уготование благовествования мира, над всеми же восприимше щит веры, в немже возможете вся стрелы лукаваго разжженныя угасити, и шлем спасения восприимите, и меч духовный, иже есть глагол Божий.

Настоятель: Мир ти.

Чтец: И духови твоему.

Диакон: Премудрость, вонмем.

Чтец псалом Давидов, Аллилуиа.

Братия же поют Аллилуиа, трижды.

Стих: Сей нищий воззва, и Господь услыша и, и от всех скорбей его спасе и.

Диакон:

Премудрость, прости, услышим святаго Евангелиа.

Настоятель: Мир всем.

Братия: И духови твоему.

Настоятель: От Матфеа святаго Евангелия чтение.

Братия: Слава Тебе, Господи.

Диакон: Вонмем.

Настоятель же чтет Евангелие от Матфеа, глава 10, зачало 39 и 43:

Рече Господь: иже любит отца, или матерь паче Мене, несть Мене достоин, и иже любит сына, или дщерь паче Мене, несть Мене достоин. И иже не приимет креста своего, и в'след Мене грядет, несть Мене достоин. Приидите ко Мне, вси труждающиися и обремененнии, и Аз упокою вы. Возмите иго Мое на себе и научитеся от Мене, яко кроток есмь и смирен сердцем, и обрящете покой душам вашим, иго бо Мое благо, и бремя Мое легко есть.

Братия поют: Слава Тебе, Господи.

Диакон:

Помилуй нас, Боже, по велицей милости:

Еще молимся о оставлении и прощении грехов раба Божия, брата нашего, имярек.

Возглас:

Яко милостив и Человеколюбец Бог еси, и Тебе славу возсылаем:

Настоятель же глаголет молитвы сия над главою

приимшаго святый великий ангельский образ:

Многомилостиве Господи, даровавый рабу Твоему, имярек, восприятия ради ангельскаго образа кукуль, и шлем спасительнаго упования, неотемлему убо от главы его таковую благодать Твою соблюди, содержая и согревая мысли его владычественное от противных прилогов неподвижимо, яко да вселукаваго змия, еже блюсти пяту его попущеннаго, попирая главу, к Тебе страшней и Единей Главе всех мысленнии очи свои возведет. Яко Ты еси просвещение и освящение душ наших, и Тебе славу возсылаем, Отцу и Сыну и Святому Духу, ныне и присно и во веки веков.

Братия: Аминь.

Настоятель: Мир всем.

Братия: И духови твоему.

Диакон: Главы ваша Господеви приклоните.

Братия: Тебе, Господи.

Настоятель же чтет сию молитву над преклоншим главу:

Огненней Главе, свою главу Тебе невидимому Единому Премудрому Богу преклоншаго, Владыко, благослови, освяти, и соблюди от всякаго вреднаго искушения видимаго же и невидимаго.

И возглас:

Яко Твое есть Царство и власть и сила, и Тебе подобает всякая слава, честь и поклонение, Отцу и Сыну и Святому Духу, ныне и присно и во веки веков.

Братия: Аминь.

И абие братия целуют крест и новопостриженнаго,

якоже в первем постризе указася.

Поют же стихиру сию самогласну, глас 1:

Познаим, братие, таинства силу, от греха бо ко отеческому дому востекшаго блуднаго сына Преблагий Отец пред'усрет лобзает, и паки Своея славы познание дарует, и таинственное Вышним совершает веселие, закалая тельца упитаннаго, да и мы достойно сожительствуем заклавшему Человеколюбному Отцу, и славному Заколению, Спасу душ наших.

И тако бывает конечный отпуст во славу Божию.

Соединив руки их крестообразно (правую перваго с левою старца), настоятель возглашает:

Се вручаю тебе пред Богом, отче (имярек), сего новопостриженнаго брата (имярек), от святаго Евангелия, еже есть от руки Христовы, чиста и непорочна. Ты же приими его Бога ради вместо сына духовнаго, и направи его на путь спасения, и научи, яже к пользе душевней, прежде всего страху Божию, еже любити Бога всем сердцем, и всею душею, и всею крепостию, и повиновение имети безпрекословно к монастырским властям, и во всех добродетелех жити поучай, со смирением и терпением ко всем, и блюди опасно, да не погибнет душа его нерадения твоего ради. Имаши бо ответ дати Господу Богу о нем в день Судный. Какова его приемлеши от святаго Евангелия, такова да потщишися и представити его Самому Христу, в страшный день праведнаго Его Суда.

Старец отвещает: Превыше нашея меры дело сие, честный отче. Но повелено нам есть от Спасителя нашего Иисуса Христа наипаче всего послушание имети к настоятелю, Богом поставленному, елико сила наша о Бозе, не отрицаюся, должен есмь наипаче всего попечение имети о нем, якоже Бог наставит нас убогих, ваших ради честных молитв.

Посем наказует новопостриженнаго: Се тебе, чадо (имярек), отец и учитель. Ты же повинуйся ему во всем, и твори к нему послушание и повиновение во всяческих, повелеваемых от него, без повеления же его и благословения ничтоже твори. И во всем терпелив буди, смирен же и кроток, молчалив и благоискусен во всех ти повелеваемых послушаниях. Сего ради обрящеши благодать пред Богом, и не точию оставление грехов получиши, но и жизнь вечную наследиши со святыми Его, ныне и присно, и во веки веков. Старец: Аминь.

За сим молитва на снятие клобука (кукуля).

Диакон: Господу помолимся. Братия: Господи, помилуй.

Игумен: Многомилостиве Господи, даровавый рабу Твоему (имярек), с восприятием ангельскаго образа, кукуль и шлем спасительнаго упования, не отемлему убо от главы его таковую благодать Твою соблюди, содержа и согревая мысли его владычественное, от противных прилогов неподвижимо, яко да вселукаваго змия, еже блюсти пяту его попущеннаго, попирая главу, к Тебе, страшней и Единой всех Главе, умныя очи свои возведет. Яко Ты еси просвещение и освящение душ наших, и Тебе славу возсылаем, Отцу и Сыну и Святому Духу, ныне и присно и во веки веков. Братия: Аминь.

Настоятель: Мир всем. Братия: И духови твоему. Диакон: Главы ваша Господеви приклоните. Братия: Тебе, Господи. Настоятель же чтет сию молитву над приклоншим главу.

Огненной Главе свою главу Тебе невидимому и Единому Премудрому Богу подклонивша, Владыко, благослови, освяти, от всякаго вреднаго искушения, видимаго же и невидимаго, избави. Яко Твое есть Царство, и власть, и сила, и Тебе подобает всякая слава, честь и поклонение, Отцу и Сыну и Святому Духу, ныне и присно и во веки веков.

Братия: Аминь.

Диакон: Премудрость. Настоятель: Пресвятая Богородице, спаси нас. Братия: Честнейшую: Настоятель: Слава Тебе, Христе Боже: Братия: Слава Отцу: И отпуст без креста:

Христос, истинный Бог наш, молитвами Пречистыя Своея Матере, святых славных апостол, преподобных и богоносных отец наших, Антония и Феодосия Печерских, Сергия и Никона Радонежских, и Иова Почаевскаго, и прочих в постничестве просиявших, и всех святых Своих, да спасет и помилует нас, яко Благ и Человеколюбец.

Братия: Господи, помилуй, трижды.

Сицевый брат должен пребывати в церкви дний пять,

упраздняяся от всякаго дела, кроме чтения.