Глава 48. Чи́н благослове́ния и освяще́ния разноли́чных ико́н, предложе́нных вку́пе
Нача́ло обы́чное, я́коже указа́ся вы́ше. По Прииди́те, поклони́мся: Псало́м 88:
Ми́лости Твоя́ Го́споди во ве́к воспою́, ро́д и ро́д возвещу́ и́стину Твою́ усты́ мои́ми. Зане́ ре́кл еси́: в ве́к ми́лость сози́ждется, на небесе́х угото́вится и́стина Твоя́. Завеща́х заве́т избра́нным мои́м, кля́хся Дави́ду рабу́ Моему́: до ве́ка угото́ваю се́мя твое́, и сози́жду в ро́д и ро́д престо́л тво́й. Испове́дят небеса́ чудеса́ Твоя́, Го́споди, и́бо и́стину Твою́ в це́ркви святы́х. Я́ко кто́ во о́блацех уравни́тся Го́сподеви? Уподо́бится Го́сподеви в сыне́х Бо́жиих? Бо́г прославля́емь в сове́те святы́х, ве́лий и стра́шен е́сть над все́ми окре́стными Его́. Го́споди Бо́же си́л, кто́ подо́бен Тебе́? Си́лен еси́ Го́споди, и и́стина Твоя́ о́крест Тебе́. Ты́ влады́чествуеши держа́вою морско́ю: возмуще́ние же во́лн его́ Ты́ укроча́еши. Ты́ смири́л еси́, я́ко я́звена го́рдаго, мы́шцею си́лы Твоея́ расточи́л еси́ враги́ Твоя́. Твоя́ су́ть небеса́, и Твоя́ е́сть земля́, вселе́нную и исполне́ние ея́ Ты́ основа́л еси́. Се́вер и мо́ре Ты́ созда́л еси́, Фаво́р и Ермо́н о и́мени Твое́м возра́дуетася. Твоя́ мы́шца с си́лою: да укрепи́тся рука́ Твоя́, и вознесе́тся десни́ца Твоя́. Пра́вда и судьба́ угото́вание престо́ла Твоего́: ми́лость и и́стина предъи́дете пред лице́м Твои́м. Блаже́ни лю́дие ве́дущии воскликнове́ние: Го́споди во све́те лица́ Твоего́ по́йдут, и о и́мени Твое́м возра́дуются ве́сь де́нь, и пра́вдою Твое́ю вознесу́тся. Я́ко похвала́ си́лы и́х Ты́ еси́, и во благоволе́нии Твое́м вознесе́тся ро́г на́ш.
Та́же диа́кон: Го́споду помо́лимся.
Ли́к: Го́споди поми́луй.
Иере́й же чте́т моли́тву сию́:
Го́споди Вседержи́телю Бо́же оте́ц на́ших, в Тро́ице Святе́й сла́вимый и покланя́емый, Его́же ни у́м пости́гнути мо́жет, ни сло́во сказа́ти возмога́ет, Его́же никто́же от челове́к нигде́же ви́де, то́чию я́коже от святы́х писа́ний научи́хомся, си́це ве́руем и си́це Тебе́ Бо́га Отца́ Безнача́льнаго, и Сы́на Твоего́ Единосу́щнаго, и Ду́ха Твоего́ сопресто́льнаго бы́ти испове́дуем, Иже в ве́тсем заве́те, в явле́нии Твое́м патриа́рху Авраа́му во о́бразе трие́х а́нгел, на после́док же дне́й по воплоще́нии Единоро́днаго Сы́на Бо́жия, Го́спода на́шего Иису́са Христа́ от Присноде́вы Мари́и, в креще́нии от Иоа́нна на Иорда́не, в пресве́тлом преображе́нии на Фаво́ре, и в пресла́вном вознесе́нии на елео́не яви́выйся, о́браз Пресвяты́я Тро́ицы на́м показа́л еси́, еще́ же и Нерукотворе́нный о́браз Го́спода на́шего Иису́са Христа́ чудоде́йственне Им на убру́се изъображе́нный, и Еде́сскому кня́зю Авгарю по́сланной и те́м того́ и и́ны мно́ги боля́щыя ра́зными неду́ги исцели́вый, на́с же чти́ти се́й научи́вый, та́кожде и о́бразы и подо́бия святы́х Твои́х уго́дников не отмета́яй, но прие́мляй, Са́м и ны́не при́зри на ико́ны сия́, я́же раби́ Твои́ в че́сть и сла́ву Тебе́ Еди́наго в Тро́ице Святе́й сла́вимаго Бо́га, и Единоро́днаго Сы́на Твоего́ Го́спода на́шего Иису́са Христа́, Пречи́стыя и Преблагослове́нныя Ма́тере Его́, Влады́чицы на́шея Пресвяты́я Богоро́дицы и Присноде́вы Мари́и, и в па́мять святы́х Твои́х и́мярек сооруди́ша, благослови́ я́ и освяти́, и пода́ждь и́м си́лу целе́бну, все́х ко́зней диа́вольских прогони́тельну, и во е́же все́м приле́жно пред ни́ми моля́щымся услы́шанным бы́ти, и ми́лость Твоего́ человеколю́бия привлещи́, и благода́ть получи́ти сотвори́. Ты́ бо еси́ освяще́ние на́ше, и Тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
Иере́й же, прекло́нь главу́, та́йно чте́т моли́тву сию́:
Безнача́льне, Неви́диме и Непостижи́ме Го́споди, И́же дре́вле в Ве́тсем Заве́те подо́бия Херуви́мов от дре́ва и зла́та и шве́ннаго де́ла, в ски́нии свиде́ния и в хра́ме Соломо́нове сотвори́ти повеле́вый, и ны́не о́бразы не то́чию в воспомина́ние Твои́х спаси́тельных благодея́ний и Боже́ственных явле́ний ро́ду челове́ческому, в че́сть же и сла́ву Твоего́ Пресвята́го и́мене твори́мыя прие́мляй, но и в па́мять и подража́ние святы́х Твои́х уго́дников устроя́емыя не отмета́яй, услы́ши смире́нную моли́тву на́шу, благослови́ ико́ны сия́ и освяти́, и пода́ждь и́м благода́ть и си́лу бе́сы отгоня́ти, и вся́ неду́ги исцеля́ти.
Я́ко Ты́ еси́ благословля́яй и освяща́яй вся́ческая, Христе́ Бо́же на́ш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
И а́бие кропи́т иере́й предложе́нныя ико́ны по три́жды, глаго́ля:
Освяща́ются ико́ны сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
И покропи́в, иере́й кади́т я́, и покланя́ются пред ни́ми, и лобыза́ет я́.
Ли́к же пое́т тропари́ пра́здничныя, и посе́м отпу́ст.