Глава 44. Чи́н благослове́ния но́вых сосу́дов церко́вных, вку́пе мно́гих, или́ еди́наго, яковы́ су́ть: кади́льница, ка́ция, блю́до анафо́рное, копие́, куку́мы, си́есть водоно́сные сосу́дцы, и ины́я олта́рныя принадле́жности

Начина́ет иере́й обы́чно. По Трисвято́м, и по Прииди́те, поклони́мся:

чте́т псало́м 25:

Суди́ ми Го́споди, я́ко а́з незло́бою мое́ю ходи́х, и на Го́спода упова́я, не изнемогу́. Искуси́ мя Го́споди, и испыта́й мя́, разжзи́ утро́бы моя́ и се́рдце мое́. Я́ко ми́лость Твоя́ пред очи́ма мои́ма е́сть, и благоугоди́х во и́стине Твое́й. Не седо́х с со́нмом су́етным, и со законопресту́пными не вни́ду. Возненави́дех це́рковь лука́внующих, и с нечести́выми не ся́ду. Умы́ю в непови́нных ру́це мои́, и обы́ду же́ртвенник Тво́й, Го́споди. Е́же услы́шати ми́ гла́с хвалы́ Твоея́, и пове́дати вся́ чудеса́ Твоя́. Го́споди, возлюби́х благоле́пие до́му Твоего́, и ме́сто селе́ния сла́вы Твоея́. Да не погуби́ши с нечести́выми ду́шу мою́, и с му́жи крове́й живо́т мо́й. И́хже в ру́ку беззако́ния, десни́ца и́х испо́лнися мзды́. А́з же незло́бою мое́ю ходи́х, изба́ви мя́ Го́споди, и поми́луй мя́. Нога́ моя́ ста́ на правоте́: в це́рквах благословлю́ Тя́, Го́споди.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й чте́т моли́тву сию́:

Го́споди Бо́же Вседержи́телю, Бо́же оте́ц на́ших, сосу́дом Твои́м избра́нным апо́столом Па́влом реки́й, я́ко все́ созда́ние Твое́ добро́ и ничто́же отме́тно, а́ще сло́вом Твои́м Боже́ственным и моли́твами освяща́ется, при́зри ны́не ми́лостивно, смире́нно мо́лимся, на моли́тву на́шу и на сосу́ды сия́ [или́ на сосу́д се́й] я́же [или́ его́же] раби́ Твои́ в сла́ву Пресвята́го и́мене Твоего́, и в служе́ние свята́го Твоего́ же́ртвенника сооруди́ша, и ми́лостивно Твои́м небе́сным благослове́нием, моли́твою же на́с недосто́йных рабо́в и служи́телей Твои́х, благослови́ и освяти́, и к служе́нию свята́го Твоего́ олтаря́, досто́йны [или́ досто́ин] бы́ти яви́, прине́сшым же небе́сною Твое́ю благода́тию возда́ждь, и оставле́ние грехо́в да́руй, и Ца́рствия Твоего́ прича́стники сотвори́. Ты́ бо еси́ Бо́г ми́лости, и щедро́т, и человеколю́бия, и Тебе́ сла́ву возсыла́ем, со Единоро́дным Твои́м Сы́ном, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же прекло́нь главу́, та́йно чте́т моли́тву сию́:

При́зри Го́споди Бо́же на́ш на моли́тву на́шу, смире́нно мо́лимся, и низпосли́ благослове́ние Твое́ на сосу́ды сия́, [или́ на сосу́д се́й], и окропле́нием воды́ сея́ свяще́нныя благослови́, и освяти́ я́ [или́ его́], во е́же бы́ти и́м [или́ ему́] досто́йным [или́ досто́йну] служе́нию свята́го Твоего́ олтаря́.

И возглаша́ет: Я́ко Ты́ еси́ освяще́ние на́ше и Тебе́ сла́ву возсыла́ем, со Единоро́дным Твои́м Сы́ном, с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

Иере́й же кропи́т сосу́ды свяще́нною водо́ю, глаго́ля:

Освяща́ются сосу́ды сия́ [или́ освяща́ется сосу́д се́й] благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

И а́бие твори́т дневны́й отпу́ст, и вно́сит сосу́ды во олта́рь.