Глава 40. Чи́н благослове́ния и освяще́ния ико́ны Пресвяты́я Живонача́льныя Тро́ицы, во о́бразе трие́х А́нгелов, или́ Креще́ния, или́ Преображе́ния, или́ Соше́ствия Свята́го Ду́ха
Иере́й обы́чно по предъука́занному о́бразу наче́н, соверши́т все́ да́же до псалма́.
Зде́ же чте́тся псало́м 66:
Бо́же уще́дри ны́, и благослови́ ны, просвети́ лице́ Твое́ на ны́, и поми́луй ны́. Позна́ти на земли́ пу́ть Тво́й, во все́х язы́цех спасе́ние Твое́. Да испове́дятся Тебе́ лю́дие, Бо́же, да испове́дятся Тебе́ лю́дие вси́. Да возвеселя́тся и да возра́дуются язы́цы, я́ко су́диши лю́дем правото́ю, и язы́ки на земли́ наста́виши. Да испове́дятся Тебе́ лю́дие, Бо́же, да испове́дятся Тебе́ лю́дие вси́. Земля́ даде́ пло́д сво́й, благослови́ ны, Бо́же, Бо́же на́ш. Благослови́ ны, Бо́же, и да убоя́тся Его́ вси́ концы́ земли́.
Сла́ва, и ны́не: Аллилу́иа, три́жды.
Диа́кон: Го́споду помо́лимся.
Ли́к: Го́споди поми́луй.
Иере́й же чте́т моли́тву сию́:
Го́споди Бо́же, в Тро́ице Святе́й сла́вимый, Его́же ни у́м пости́гнути мо́жет, ниже́ сло́во сказа́ти возмога́ет, Его́же никто́же от челове́к нигде́же ви́де, то́чию я́коже от святы́х писа́ний и богогла́сных апо́столов уче́ний научи́хомся, си́це ве́руем, и си́це Тебе́ Бо́га Отца́ Безнача́льнаго, и Сы́на Твоего́ Единосу́щнаго, и Ду́ха Твоего́ Сопресто́льнаго и Соесте́ственнаго испове́дуем. И я́коже писа́ние на́м ве́тхое повеству́ет о явле́нии Твое́м во о́бразе трие́х А́нгелов, о́ному пресла́вному патриа́рху Авраа́му бы́вшем, в но́вей же благода́ти Оте́ц во гла́се, Сы́н пло́тию во Иорда́не, Ду́х же Святы́й в ви́де голуби́не яви́ся. И па́ки Сы́н, Иже пло́тию вознесе́ся на не́бо, и одесну́ю Бо́га седи́т, Уте́шителя Ду́ха на апо́столы в виде́нии о́гненных язы́к посла́, и на Фаво́ре Оте́ц во гла́се, Ду́х Святы́й во о́блаце, Сы́н же в пресве́тлом све́те ученико́м трие́м показа́ся, си́це всегда́шняго ра́ди воспомина́ния, Тебе́ Еди́наго сла́вимаго Бо́га не то́чию усты́ испове́дуем, но и о́браз пи́шем, не е́же боготвори́ти се́й, но е́же на́нь теле́сныма очи́ма взира́юще, у́мныма на Тебе́ Бо́га на́шего зре́ти, и Того́ чту́ще, Тебе́ Созда́теля, Искупи́теля и Освяти́теля на́шего сла́вити и велича́ти и Твоя́ неисче́тная благодея́ния воспомина́ти, по́честь бо о́браза на первообра́зное прехо́дит. Предло́жше у́бо ико́ну сию́ ны́не пред Твои́м вели́чеством, благоче́стным и́мже предре́хом наме́рением, про́сим и мо́лим, и Твоему́ благоутро́бию ми́ли ся де́ем, при́зри ми́лостивно на ню́ и низпосли́ небе́сное Твое́ благослове́ние, и во и́мя Твое́ Трисвято́е благослови́ и освяти́ ю́, во е́же сию́ благоче́стно чту́щии, и пред не́ю Тебе́ смире́нно кла́няющиися, и ве́рно моля́щиися обря́щут ми́лость, и благода́ть полу́чат, и от все́х бе́д и скорбе́й свобо́дны бу́дут, грехо́в же проще́ние полу́чат, и Ца́рствия Небе́снаго сподо́бятся, благода́тию и щедро́тами, и человеколю́бием Тебе́ Еди́наго в Тро́ице сла́вимаго Бо́га, Отца́, и Сы́на, и Свята́го Ду́ха, Ему́же сла́ва, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Иере́й же чте́т моли́тву сию́ та́йно:
Го́споди Бо́же, в Тро́ице Святе́й сла́вимый и покланя́емый, услы́ши ны́не моли́тву на́шу, и низпосли́ благослове́ние Твое́ Боже́ственное небе́сное, и благослови́, и освяти́ о́браз се́й окропле́нием воды́ сея́ свяще́нныя, в сла́ву Твою́ и во спасе́ние люде́й Твои́х.
И возглаша́ет: Ты́ бо еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
Иере́й же кропи́т свяще́нною водо́ю о́браз, глаго́ля:
Освяща́ется о́браз се́й благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
А́бие же чте́т, или́ пое́т стихи́ру сию́, гла́с 8:
Прииди́те лю́дие, Триипоста́сному Божеству́ поклони́мся, Сы́ну во Отце́, со Святы́м Ду́хом, Оте́ц бо безле́тно роди́ Сы́на соприсносу́щна и сопресто́льна, и Ду́х Святы́й бе́ во Отце́ с Сы́ном прославля́емь, еди́на Си́ла, еди́но Существо́, еди́но Божество́. Ему́же покланя́ющеся вси́ глаго́лем: Святы́й Бо́же, вся́ соде́явый Сы́ном, соде́йством Свята́го Ду́ха, Святы́й Кре́пкий, Имже Отца́ позна́хом, и Ду́х Святы́й прии́де в ми́р, Святы́й Безсме́ртный, уте́шительный Ду́ше, от Отца́ исходя́й, и в Сы́не почива́яй, Тро́ице Свята́я, сла́ва Тебе́.
Ве́стно же бу́ди, я́ко а́ще ико́на бу́дет Святы́я Тро́ицы, сия́ стихи́ра пое́тся. А́ще же Богоявле́ния или́ Преображе́ния, или́ Соше́ствия Свята́го Ду́ха, пое́тся или́ чте́тся тропа́рь и конда́к пра́здничный, и отпу́ст пра́здничный быва́ет.