Глава 29. Чи́н благослове́ния и освяще́ния сосу́дов служе́бных: си́есть ди́скоса, ча́ши, звезди́цы и лжи́цы, с тремя́ и́х покро́вцы, предложе́нных вку́пе

Поста́влену су́щу столу́ и че́стно покры́ту пред святы́ми враты́, полага́ются на не́м сосу́ды. Иере́й, оде́ян в епитрахи́ль и фело́нь, с кади́льницею исхо́дит святы́ми враты́, и покади́в крестообра́зно, начина́ет обы́чно:

Благослове́н Бо́г на́ш: Чте́ц же чте́т: Царю́ Небе́сный: Трисвято́е: И по О́тче на́ш: Иере́й: Я́ко Твое́ е́сть Ца́рство: Го́споди поми́луй, 12. Сла́ва, и ны́не: Прииди́те, поклони́мся: три́жды.

И псало́м 22:

Госпо́дь пасе́т мя́, и ничто́же мя́ лиши́т. На ме́сте зла́чне, та́мо всели́ мя, на воде́ поко́йне воспита́ мя. Ду́шу мою́ обрати́, наста́ви мя́ на стези́ пра́вды, и́мене ра́ди Своего́. А́ще бо и пойду́ посреде́ се́ни сме́ртныя, не убою́ся зла́, я́ко Ты́ со мно́ю еси́, же́зл Тво́й и па́лица Твоя́, та́ мя́ уте́шиста. Угото́вал еси́ предо мно́ю трапе́зу сопроти́в стужа́ющым мне́, ума́стил еси́ еле́ом главу́ мою́, и ча́ша Твоя́ упоява́ющи мя́, я́ко держа́вна. И ми́лость Твоя́ пожене́т мя́ вся́ дни́ живота́ моего́, и е́же всели́ти ми ся в до́м Госпо́день, в долготу́ дни́й.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й же чте́т моли́тву сию́:

Влады́ко Вседержи́телю Го́споди Бо́же на́ш, пода́вый Моисе́ю рабу́ Твоему́ зако́н, оправда́ния же и слу́жбы, и в святи́лищи Твое́м, в сла́ву Пресвято́му и́мени Твоему́ сооруже́нном, сосу́ды зла́ты и сре́бряны к приноше́нию разли́чных же́ртв Тебе́ и́стинному Бо́гу на́шему [я́же бы́ша се́нь и о́браз ны́нешней и́стинной безкро́вной на́шей же́ртвы] твори́ти и освяти́ти повеле́л еси́. Ты́ Са́м и ны́не человеколю́бче Го́споди, благослови́ ди́скос се́й, ча́шу, звезди́цу и лжи́цу с покро́вами и́х, и освяти́ я́ си́лою, де́йством и благода́тию всесвята́го и Животворя́щаго Твоего́ Ду́ха, я́ко да прино́сится Тебе́ на ни́х и́стинная, жива́я, безкро́вная и слове́сная же́ртва, Пресвято́е Те́ло вели́каго Бо́га и Спа́са на́шего Иису́са Христа́, Сы́на Твоего́, И́же на́с де́ля и на́шего ра́ди спасе́ния Тебе́ Бо́гу и Отцу́ Своему́ еди́ною Самаго́ Себе́ в же́ртву благоприя́тну на кре́стном же́ртвеннице принесе́. Тебе́ бо с Ни́м, и с Пресвяты́м, и Благи́м, и Животворя́щим Твои́м Ду́хом, подоба́ет вся́ческая сла́ва, че́сть и поклоне́ние ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же, прекло́нь главу́, глаго́лет моли́тву сию́ та́йно:

Го́споди Бо́же на́ш, при́зри ны́не на моли́тву недосто́йнаго мене́ раба́ Твоего́, и низпосли́ бога́тство благослове́ния Твоего́ на сосу́ды сия́, и освяти́ я́ Ду́хом Твои́м Святы́м во окропле́нии свяще́нныя сея́ воды́, во е́же бы́ти и́м досто́йное вмести́лище Пречи́стаго Те́ла, и Честны́я Кро́ве Христа́ Твоего́.

И возглаша́ет: Ты́ бо еси́ исто́чник освяще́ния, и Тебе́ со Единоро́дным Сы́ном, и с Пресвяты́м, и Благи́м, и Животворя́щим Твои́м Ду́хом, подоба́ет вся́кая сла́ва, че́сть и поклоне́ние, ны́не и при́сно, и во ве́ки веко́в.

Ли́к: Ами́нь.

И а́бие кропи́т сосу́ды свяще́нною водо́ю, глаго́ля:

Освяща́ются сосу́ды сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

А́ще у́бо служи́ти а́бие и́мать, взе́млет са́м сосу́ды, и вно́сит я́ в олта́рь, и поста́вив на же́ртвеннице, слу́жит и́ми. А́ще же служи́ти не бу́дет, сотвори́в обы́чно дневны́й отпу́ст, вно́сит сосу́ды в олта́рь.