Глава 5. Моли́тва во е́же сотвори́ти оглаше́ннаго
Разреша́ет свяще́нник по́яс хотя́щаго просвети́тися, и совлача́ет и отреша́ет его́, и поставля́ет его́ к восто́ку во еди́ной ри́зе непрепоя́сана, непокрове́на, и необуве́на, иму́щаго ру́це до́ле, и ду́ет на лице́ его́ три́жды, и зна́менует чело́ его́ и пе́рси три́жды, и налага́ет ру́ку на главу́ его́, глаго́ля:
Го́споду помо́лимся.
О и́мени Твое́м, Го́споди Бо́же и́стины, и Единоро́днаго Твоего́ Сы́на, и Свята́го Твоего́ Ду́ха, возлага́ю ру́ку мою́ на раба́ Твоего́, и́мярек, сподо́бльшагося прибе́гнути ко свято́му и́мени Твоему́, и под кро́вом кри́л Твои́х сохрани́тися, отста́ви от него́ ве́тхую о́ную пре́лесть и испо́лни его́ е́же в Тя́ ве́ры, и наде́жди, и любве́, да разуме́ет, я́ко Ты́ еси́ еди́н Бо́г и́стинный, и единоро́дный Тво́й Сы́н, Госпо́дь на́ш Иису́с Христо́с, и Святы́й Тво́й Ду́х. Да́ждь ему́ во все́х за́поведех Твои́х ходи́ти, и уго́дная Тебе́ сохрани́ти: я́ко а́ще сотвори́т сия́ челове́к, жи́в бу́дет в ни́х. Напиши́ его́ в кни́зе жи́зни Твоея́, соедини́ его́ ста́ду насле́дия Твоего́, да просла́вится и́мя Твое́ свято́е в не́м, и возлю́бленнаго Твоего́ Сы́на, Го́спода же на́шего Иису́са Христа́ и Животворя́щаго Твоего́ Ду́ха. Да бу́дут о́чи Твои́ взира́юще на него́ ми́лостию вы́ну, и у́ши Твои́, е́же услы́шати гла́с моле́ния его́. Возвесели́ его́ в де́лех руку́ его́, и во вся́ком ро́де его́, да испове́стся Тебе́ покланя́яся, и сла́вяй и́мя Твое́ вели́кое и вы́шнее, и восхва́лит Тя́ вы́ну вся́ дни́ живота́ своего́.
Возгла́с: Тя́ бо пою́т вся́ си́лы небе́сныя, и Твоя́ е́сть сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Запреще́ние пе́рвое.
Го́споду помо́лимся.
Ли́к: Го́споди поми́луй.
Запреща́ет тебе́, диа́воле, Госпо́дь, прише́дый в ми́р, и всели́выйся в челове́цех, да разруши́т твое́ мучи́тельство, и челове́ки и́змет, и́же на дре́ве сопроти́вныя си́лы победи́, со́лнцу поме́ркшу, и земли́ поколеба́вшейся, и гробо́м отверза́щымся, и телесе́м святы́х востаю́щым, и́же разруши́ сме́ртию сме́рть и упраздни́ держа́ву иму́щаго сме́рти, си́есть, тебе́ диа́вола. Запреща́ю тебе́ Бо́гом показа́вшим дре́во живота́, и уста́вившим Херуви́мы, и пла́менное ору́жие обраща́ющееся стрещи́ то́: запреще́н бу́ди. О́ным у́бо тебе́ запреща́ю, Ходи́вшим я́ко по су́ху на плещу́ морску́ю, и Запрети́вшим бу́ри ве́тров, Его́же зре́ние суши́т бе́здны, и преще́ние растаява́ет го́ры, То́й бо и ны́не запреща́ет тебе́ на́ми. Убо́йся, изы́ди, и отступи́ от созда́ния сего́, и да не возврати́шися, ниже́ утаи́шися в не́м, ниже́ да сря́щеши его́ или́ де́йствуеши, ни в нощи́, ни во дни́, или́ в часе́, или́ в полу́дни, но отиди́ во сво́й та́ртар, да́же до угото́ваннаго вели́каго дне́ су́днаго. Убо́йся Бо́га Седя́щаго на Херуви́мех и призира́ющаго бе́здны, Его́же трепе́щут а́нгели, арха́нгели, Престо́ли, Госпо́дьства, Нача́ла, Вла́сти, Си́лы, многоочи́тии Херуви́ми, и шестокрила́тии Серафи́ми, Его́же трепе́щут не́бо и земля́, мо́ре, и вся́, я́же в ни́х. Изы́ди, и отступи́ от запеча́таннаго новоизбра́ннаго во́ина Христа́ Бо́га на́шего, О́нем бо тебе́ запреща́ю, Ходя́щим на крилу́ ве́треннюю, Творя́щим а́нгелы Своя́ о́гнь паля́щ. Изы́ди, и отступи́ от созда́ния сего́ со все́ю си́лою и а́ггелы твои́ми.
Возгла́с: Я́ко просла́вися и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Запреще́ние второ́е.
Го́споду помо́лимся.
Бо́г Святы́й стра́шный и сла́вный во все́х де́лех и кре́пости Свое́й, непостижи́мый и неизсле́димый сы́й, То́й предъопредели́вый тебе́, диа́воле, ве́чныя му́ки томле́ние, на́ми недосто́йными Его́ рабы́ повелева́ет тебе́, и все́й споспе́шней твое́й си́ле отступи́ти от новозапеча́таннаго и́менем Го́спода на́шего Иису́са Христа́ и́стиннаго Бо́га на́шего, запреща́ю тебе́ у́бо вселука́вому, и нечи́стому, и скве́рному, и омерзе́нному, и чужде́му ду́ху, си́лою Иису́са Христа́, вся́кую вла́сть иму́щаго на небеси́ и на земли́, ре́кшаго глухо́му и немо́му де́мону: изы́ди от челове́ка, и да не ктому́ вни́деши в него́, отступи́, позна́й твою́ су́етную си́лу, ниже́ на свиния́х вла́сть иму́щую, помяни́ Повеле́вшаго тебе́ по твоему́ проше́нию во ста́до свино́е вни́ти. Убо́йся Бо́га, Его́же повеле́нием земля́ на вода́х утверди́ся, созда́вшаго не́бо, и поста́вльшаго го́ры ста́вилом, и удо́лия ме́рилом, и поло́жшаго песо́к мо́рю преде́л, и в воде́ зе́льней стезю́ тве́рдую, прикаса́ющагося гора́м, и дымя́тся, одева́ющагося све́том я́ко ри́зою, просте́ршаго не́бо я́ко ко́жу, покрыва́ющаго вода́ми превы́спренняя своя́, основа́ющаго зе́млю на утвержде́нии ея́, не преклони́тся во ве́к ве́ка, призыва́ющаго во́ду морску́ю, и пролива́ющаго ю́ на лице́ всея́ земли́, изы́ди и отступи́ от и́же ко свято́му просвеще́нию гото́вящагося. Запреща́ю тебе́ спаси́тельным страда́нием Го́спода на́шего Иису́са Христа́, и честны́м Его́ Те́лом и Кро́вию, и прише́ствием Его́ стра́шным, прии́дет бо и не закосни́т, судя́й все́й земли́, и тебе́, и споспе́шную твою́ си́лу уму́чит в гее́нне о́гненней, преда́вый во тьму́ кроме́шную, иде́же че́рвь неусыпа́емый, и о́гнь неугаси́мый.
Я́ко держа́ва Христа́ Бо́га на́шего, со Отце́м и Святы́м Ду́хом, ны́не и при́сно, и во ве́ки веко́в, ами́нь.
Запреще́ние тре́тие.
Го́споду помо́лимся.
Го́споди Савао́ф, Бо́же Изра́илев, исцеля́яй вся́кий неду́г, и вся́кую я́зю, при́зри на раба́ Твоего́, взыщи́, испыту́й, и отжени́ от него́ вся́ де́йства диа́воля. Запрети́ нечи́стым духо́м, и изжени́ я́, и очи́сти дела́ руку́ Твое́ю, и о́строе Твое́ употреби́вый де́йство, сокруши́ сатану́ под но́зе его́ вско́ре, и да́ждь ему́ побе́ды на него́, и на нечи́стыя его́ ду́хи, я́ко да от Тебе́ ми́лость получи́в, сподо́бится безсме́ртных Твои́х Та́ин, и сла́ву Тебе́ возсле́т, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
Моли́тва четве́ртая.
Го́споду помо́лимся.
Сы́й Влады́ко Го́споди, сотвори́вый челове́ка по о́бразу Твоему́ и по подо́бию, и да́вый ему́ вла́сть жи́зни ве́чныя, та́же отпа́дша грехо́м не презре́вый, но устро́ивый вочелове́чением Христа́ Твоего́ спасе́ние ми́ра, Са́м и созда́ние Твое́ сие́ изба́вль от рабо́ты вра́жия, приими́ в Ца́рство Твое́ пренебе́сное, отве́рзи его́ о́чи мы́сленныя, во е́же озаря́ти в не́м просвеще́нию Ева́нгелиа Твоего́, сопрязи́ животу́ его́ а́нгела све́тла, избавля́юща его́ от вся́каго наве́та сопротиволежа́щаго, от сре́тения лука́ваго, от де́мона полу́деннаго, и от мечта́ний лука́вых.
И ду́ет свяще́нник на уста́ его́, на чело́, и на пе́рси, глаго́ля:
Изжени́ из него́ вся́каго лука́ваго и нечи́стаго ду́ха, сокры́таго и гнездя́щагося в се́рдце его́.
И глаго́лет сие́ три́жды.
Ду́ха пре́лести, ду́ха лука́вства, ду́ха идолослуже́ния, и вся́каго лихои́мства, ду́ха лжи́ и вся́кия нечистоты́, де́йствуемыя по науче́нию диа́волю, и сотвори́ его́ овча́ слове́сное свята́го ста́да Христа́ Твоего́, у́д че́стен це́ркве Твоея́, сы́на и насле́дника Ца́рствия Твоего́, да по за́поведем Твои́м жи́тельствовав, и сохрани́в печа́ть неруши́мую, и соблю́д ри́зу нескве́рную, получи́т блаже́нства святы́х во Ца́рствии Твое́м.
Возгла́сно: Благода́тию и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́ с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.
И совлече́ну и отреше́ну креща́емому, обраща́ет его́ свяще́нник на за́пад, горе́ ру́це иму́ща, и глаго́лет:
Отрица́еши ли ся сатаны́, и все́х де́л его́, и все́х а́ггел его́, и всего́ служе́ния его́, и всея́ горды́ни его́?
И отвеща́ет оглаше́нный, или́ восприе́мник его́, а́ще е́сть креща́емый ва́рвар, или́ отроча́, и глаго́лет:
Отрица́юся.
Па́ки свяще́нник глаго́лет второ́е:
Отрица́еши ли ся сатаны́, и все́х де́л его́, и все́х а́ггел его́, и всего́ служе́ния его́, и всея́ горды́ни его́?
И отвеща́ет: Отрица́юся.
Па́ки глаго́лет свяще́нник тре́тие:
Отрица́еши ли ся сатаны́, и все́х де́л его́, и все́х а́ггел его́, и всего́ служе́ния его́, и всея́ горды́ни его́?
И отвеща́ет: Отрица́юся.
Вопроша́ет па́ки свяще́нник креща́емаго: Отре́клся ли еси́ сатаны́?
И отвеща́ет оглаше́нный, или́ восприе́мник его́: Отреко́хся.
Па́ки вопроша́ет свяще́нник:
Отре́клся ли еси́ сатаны́?
И отвеща́ет: Отреко́хся.
Па́ки вопроша́ет свяще́нник тре́тие:
Отре́клся ли еси́ сатаны́?
И отвеща́ет: Отреко́хся.
Та́же глаго́лет свяще́нник:
И ду́ни, и плю́ни на него́.
И сие́ сотво́ршу, обраща́ет его́ свяще́нник к восто́ку, до́ле ру́це иму́ща, и глаго́лет ему́ свяще́нник:
Сочетава́еши ли ся Христу́?
И отвеща́ет оглаше́нный, или́ восприе́мник, глаго́ля:
Сочетава́юся.
Па́ки свяще́нник глаго́лет второ́е:
Сочетава́еши ли ся Христу́?
Отвеща́ет второ́е: Сочетава́юся.
Па́ки свяще́нник глаго́лет тре́тие:
Сочетава́еши ли ся Христу́?
Отвеща́ет тре́тие: Сочетава́юся.
Та́же па́ки глаго́лет ему́ свяще́нник:
Сочета́лся ли еси́ Христу́?
И отвеща́ет: Сочета́хся.
И па́ки глаго́лет: И ве́руеши ли Ему́?
И глаго́лет: Ве́рую Ему́, я́ко Царю́ и Бо́гу.
И глаго́лет:
Ве́рую во Еди́наго Бо́га Отца́ Вседержи́теля, Творца́ не́бу и земли́, ви́димым же все́м и неви́димым. И во Еди́наго Го́спода Иису́са Христа́ Сы́на Бо́жия, Единоро́днаго Иже от Отца́ рожде́ннаго пре́жде все́х ве́к. Све́та от све́та, Бо́га и́стинна от Бо́га и́стинна, рожде́нна, не сотворе́нна, единосу́щна Отцу́, Имже вся́ бы́ша. На́с ра́ди челове́к, и на́шего ра́ди спасе́ния сше́дшаго с небе́с, и воплоти́вшагося от Ду́ха Свя́та и Мари́и Де́вы, и вочелове́чшася: Распя́таго же за ны́ при Понти́йстем Пила́те, и страда́вша и погребе́нна: И воскре́сшаго в тре́тий де́нь по писа́нием: И возше́дшаго на небеса́ и седя́ща одесну́ю Отца́: И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, и́же от Отца́ исходя́щаго, Иже со Отце́м и Сы́ном спокланя́ема и ссла́вима глаго́лавшаго проро́ки. Во Еди́ну Святу́ю Собо́рную и Апо́стольскую Це́рковь. Испове́дую еди́но креще́ние, во оставле́ние грехо́в. Ча́ю воскресе́ния ме́ртвых: И жи́зни бу́дущаго ве́ка, ами́нь.
И егда́ испо́лнит святы́й симво́л и глаго́лет па́ки к нему́:
Сочета́лся ли еси́ Христу́?
И отвеща́ет: Сочета́хся.
И па́ки глаго́лет: И ве́руеши ли Ему́?
И глаго́лет: Ве́рую Ему́, я́ко Царю́ и Бо́гу.
И глаго́лет: Ве́рую во еди́наго Бо́га: все́ до конца́.
И егда́ испо́лнит второ́е святы́й симво́л, глаго́лет па́ки к нему́ тре́тие:
Сочета́лся ли еси́ Христу́?
И отвеща́ет: Сочета́хся.
И па́ки глаго́лет: И ве́руеши ли Ему́?
И глаго́лет: Ве́рую Ему́, я́ко Царю́ и Бо́гу.
И глаго́лет: Ве́рую во еди́наго Бо́га: все́ до конца́.
И егда́ испо́лнит тре́тие святы́й симво́л, вопроша́ет его́ па́ки свяще́нник, глаго́ля: Сочета́лся ли еси́ Христу́?
И отвеща́ет: Сочета́хся.
Па́ки вопроша́ет свяще́нник второ́е:
Сочета́лся ли еси́ Христу́:
И отвеща́ет второ́е: Сочета́хся.
Па́ки вопроша́ет свяще́нник тре́тие:
Сочета́лся ли еси́ Христу́?
И отвеща́ет тре́тие: Сочета́хся.
И глаго́лет свяще́нник:
И поклони́ся Ему́.
И покланя́ется, глаго́ля: Покланя́юся Отцу́, и Сы́ну, и Свято́му Ду́ху, Тро́ице Единосу́щней и Неразде́льней.
Та́же глаго́лет свяще́нник:
Благослове́н Бо́г, все́м челове́ком хотя́й спасти́ся, и в позна́ние и́стины приити́, ны́не и при́сно, и во ве́ки веко́в, ами́нь.
Та́же глаго́лет моли́тву сию́:
Го́споду помо́лимся.
Влады́ко Го́споди Бо́же на́ш, призови́ раба́ Твоего́, и́мярек, ко свято́му Твоему́ просвеще́нию, и сподо́би его́ вели́кия сея́ благода́ти, свята́го Твоего́ креще́ния: отреши́ его́ ве́тхость, и обнови́ его́ в живо́т ве́чный, и испо́лни его́ Свята́го Твоего́ Ду́ха си́лы, в соедине́ние Христа́ Твоего́, да не ктому́ ча́до те́ла бу́дет, но ча́до Твоего́ Ца́рствия, благоволе́нием и благода́тию Единоро́днаго Твоего́ Сы́на, с Ни́мже благослове́н еси́ со Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.