Глава 36. Моли́тва на освяще́ние вся́кия ве́щи

По нача́ле обы́чном, Трисвято́е: По О́тче на́ш: и по возгла́се, иере́й глаго́лет: Го́споду помо́лимся. Го́споди поми́луй.

И чте́т моли́тву сию́.

Созда́телю и Соде́телю челове́ческаго ро́да, Да́телю благода́ти духо́вныя, Пода́телю ве́чнаго спасе́ния, Са́м Го́споди, посли́ Ду́ха Твоего́ Свята́го с вы́шним благослове́нием на ве́щь сию́, я́ко да вооруже́на си́лою небе́снаго заступле́ния, хотя́щым ю́ употребля́ти, помо́щна бу́дет к теле́сному спасе́нию и заступле́нию и по́мощи, о Христе́ Иису́се Го́споде на́шем. Ами́нь.

Та́же кропи́т ве́щь свяще́нною водо́ю, три́жды, и глаго́лет обы́чный отпу́ст.