[глⷡ҇а ѯ҃в] Припѣ́вы на гдⷭ҇скїѧ влⷣчни и҆ бг҃оро́дичны пра́здники, пое́мыѧ на ѳ҃-й пѣ́сни:

Септе́мврїа въ и҃ де́нь, на ржⷭ҇тво̀ прест҃ы́ѧ бцⷣы, на ѳ҃-й пѣ́сни припѣ́въ:

~Велича́й дꙋшѐ моѧ̀, пресла́вное ржⷭ҇тво̀ бж҃їѧ мт҃ре.

Дрꙋгі́й: ~Велича́й дꙋшѐ моѧ̀, ѿ непло́дове ро́ждшꙋюсѧ дв҃ꙋ мр҃і́ю.

Въ д҃і де́нь, на воздви́женїе чⷭ҇тна́гѡ крⷭ҇та̀:

~Велича́й дꙋшѐ моѧ̀, пречестны́й крⷭ҇тъ гдⷭ҇нь.

Дрꙋгі́й: ~Велича́й дꙋшѐ моѧ̀, животворѧ́щагѡ крⷭ҇та̀ гдⷭ҇нѧ воздви́женїе.

Ное́мврїа въ к҃а де́нь, на введе́нїе прест҃ы́ѧ бцⷣы:

А҆́гг҃ли вхожде́нїе пречⷭ҇тыѧ зрѧ́ще ᲂу҆диви́шасѧ: ка́кѡ дв҃а вни́де во ст҃а̑ѧ ст҃ы́хъ.

А҆́гг҃ли вхожде́нїе всечⷭ҇тыѧ зрѧ́ще ᲂу҆диви́шасѧ: ка́кѡ со сла́вою вни́де во ст҃а̑ѧ ст҃ы́хъ.

А҆́гг҃ли вхожде́нїе дв҃ы зрѧ́ще ᲂу҆диви́шасѧ: ка́кѡ пресла́внѡ вни́де во ст҃а̑ѧ ст҃ы́хъ.

~А҆́гг҃ли и҆ человѣ́цы дв҃ы вхожде́нїе почти́мъ: ꙗ҆́кѡ со сла́вою вни́де во ст҃а̑ѧ ст҃ы́хъ.

А҆́гг҃ли вхожде́нїе дв҃ы зрѧ́ще ᲂу҆диви́шасѧ: ка́кѡ бг҃оꙋго́днѣ вни́де во ст҃а̑ѧ ст҃ы́хъ.

А҆́гг҃ли взыгра́йте со ст҃ы́ми, дв҃ы сликовствꙋ́йте: и҆́бо бг҃оѻтрокови́ца вни́де во ст҃а̑ѧ ст҃ы́хъ.

А҆́гг҃ли и҆ человѣ́цы дв҃ꙋ пѣ́сньми возвели́чимъ: бг҃олѣ́пно бо вни́де во ст҃а̑ѧ ст҃ы́хъ.

Дрꙋга́гѡ канѡ́на припѣ́вы:

Велича́й дꙋшѐ моѧ̀, приведе́ннꙋю во хра́мъ гдⷭ҇нь, и҆ благослове́ннꙋю рꙋка́ми і҆ере́евыми.

На Сла́ва: ~Велича́й дꙋшѐ моѧ̀, трїѷпоста́снагѡ и҆ нераздѣ́льнагѡ бж҃ества̀ держа́вꙋ.

На И҆ ны́нѣ: ~Велича́й дꙋшѐ моѧ̀, честнѣ́йшꙋю и҆ сла́внѣйшꙋю го́рнихъ во́инствъ, дв҃ꙋ пречи́стꙋю бцⷣꙋ.

На ржⷭ҇тво̀ хрⷭ҇то́во, на ѳ҃-й пѣ́сни припѣ́вы:

Велича́й дꙋшѐ моѧ̀, честнѣ́йшꙋю и҆ сла́внѣйшꙋю го́рнихъ во́инствъ, дв҃ꙋ пречи́стꙋю бцⷣꙋ.

Велича́й дꙋшѐ моѧ̀, ѿ дв҃ы бг҃а пло́тїю ро́ждшагосѧ.

Велича́й дꙋшѐ моѧ̀, въ верте́пѣ ро́ждшагосѧ цр҃ѧ̀.

Велича́й дꙋшѐ моѧ̀, ѿ волхвѡ́въ бг҃а покланѧ́емаго.

Велича́й дꙋшѐ моѧ̀, ѿ ѕвѣзды̀ волхвѡ́мъ возвѣще́ннаго.

Велича́й дꙋшѐ моѧ̀, чⷭ҇тꙋю дв҃ꙋ, и҆ є҆ди́нꙋ бцⷣꙋ ро́ждшꙋю хрⷭ҇та̀ цр҃ѧ̀.

Волсвѝ и҆ па́стырїе прїидо́ша поклони́тисѧ хрⷭ҇тꙋ̀, ро́ждшемꙋсѧ въ виѳлее́мѣ гра́дѣ.

Дне́сь дв҃а ражда́етъ влⷣкꙋ внꙋ́трь верте́па.

Дне́сь влⷣка ражда́етсѧ ꙗ҆́кѡ млⷣнцъ ѿ мт҃ре дв҃ы.

Дне́сь па́стырїе ви́дѧтъ сп҃са пелена́ми ѡ҆бви́та, и҆ лежа́ща во ꙗ҆́слехъ.

~Дне́сь влⷣка рꙋ́бищемъ пелена́етсѧ неѡсѧ́зный ꙗ҆́кѡ млⷣнцъ.

Дне́сь всѧ́ка тва́рь весели́тсѧ и҆ ра́дꙋетсѧ, ꙗ҆́кѡ хрⷭ҇то́съ роди́сѧ ѿ дв҃ы ѻ҆трокови́цы.

Нбⷭ҇ныѧ си̑лы ро́ждшагосѧ сп҃са гдⷭ҇а и҆ влⷣкꙋ возвѣща́ютъ мі́рꙋ.

Вмѣ́стѡ Сла́ва: ~Велича́й дꙋшѐ моѧ̀, трїѵпоста́снагѡ и҆ нераздѣ́льнагѡ бжⷭ҇тва̀ держа́вꙋ.

Вмѣ́стѡ И҆ ны́нѣ: ~Велича́й дꙋшѐ моѧ̀, и҆зба́вльшꙋю на́съ ѿ клѧ́твы.

На ѡ҆брѣ́занїе гдⷭ҇не:

Велича́й дꙋшѐ моѧ̀, по зако́нꙋ пло́тїю ѡ҆брѣ́завшагосѧ гдⷭ҇а.

Велича́й дꙋшѐ моѧ̀, во ѻ҆смы́й де́нь ѡ҆брѣ́занїе прїе́млюща.

Дне́сь влⷣка ѡ҆брѣ́зꙋетсѧ пло́тїю ꙗ҆́кѡ младе́нецъ, и҆сполнѧ́ѧ зако́нъ.

Дне́сь влⷣка пло́тїю ѡ҆брѣ́засѧ, і҆и҃съ нарече́сѧ.

Васі́лїю:

Велича́й дꙋшѐ моѧ̀, во і҆ера́рсѣхъ васі́лїа вели́каго.

~Велича́й дꙋшѐ моѧ̀, вселе́нныѧ пресвѣ́тлаго свѣти́льника.

Велича́й дꙋшѐ моѧ̀, ѿ кесарі́и васі́лїа вели́каго.

Вмѣ́стѡ Сла́ва: ~Велича́й дꙋшѐ моѧ̀, ᲂу҆краси́вшаго хрⷭ҇то́вꙋ цр҃ковь.

Вмѣ́стѡ И҆ ны́нѣ: ~Велича́й дꙋшѐ моѧ̀, честнѣ́йшꙋю нбⷭ҇ныхъ во́инствъ, дв҃ꙋ пречи́стꙋю бцⷣꙋ.

На бг҃оѧвле́нїе гдⷭ҇не:

Велича́й дꙋшѐ моѧ̀, честнѣ́йшꙋю го́рнихъ во́инствъ дв҃ꙋ пречи́стꙋю бцⷣꙋ.

Велича́й дꙋшѐ моѧ̀, ѿ прⷣте́чи кр҃ще́нїѧ просѧ́ща.

Велича́й дꙋшѐ моѧ̀, во і҆ѻрда́нѣ прише́дшаго крⷭ҇ти́тисѧ.

Велича́й дꙋшѐ моѧ̀, ѿ ѻ҆ч҃ескагѡ гла́са свидѣ́тельствованна.

Велича́й дꙋшѐ моѧ̀, є҆ди́наго ѿ трⷪ҇цы прекло́ншаго вы́ю, и҆ кр҃ще́нїе

прїе́мша.

Прⷪ҇ро́че прїидѝ ко мнѣ̀, прострѝ рꙋ́кꙋ, и҆ крⷭ҇ти́ мѧ ско́рѡ.

Прⷪ҇ро́че ѡ҆ста́ви ны́нѣ, и҆ крести́ мѧ хотѧ́ща: и҆спо́лнити бо прїидо́хъ всѧ́кꙋ пра́вдꙋ.

Дне́сь влⷣка преклонѧ́етъ вы́ю под̾ рꙋ́кꙋ прⷣте́чевꙋ.

Дне́сь і҆ѡа́ннъ креща́етъ влⷣкꙋ во стрꙋѧ́хъ і҆ѻрда́нскихъ.

Дне́сь влⷣка вода́ми погреба́етъ человѣ́ческїй грѣ́хъ.

Дне́сь влⷣка свы́ше свидѣ́тельствꙋетсѧ сн҃ъ возлю́бленный.

Дне́сь влⷣка прїи́де ѡ҆ст҃и́ти є҆стество̀ водно́е.

Дне́сь влⷣка кр҃ще́нїе прїе́млетъ рꙋко́ю предте́чевою.

Мцⷭ҇а і҆аннꙋа́рїа въ л҃ де́нь, трїе́мъ ст҃и́телємъ: васі́лїю вели́комꙋ, григо́рїю бг҃осло́вꙋ и҆ і҆ѡа́ннꙋ златоꙋ́стꙋ, на ѳ҃-й пѣ́сни припѣ́вы:

~Велича́й дꙋшѐ моѧ̀, чⷭ҇тнѣ́йшꙋю нбⷭ҇ныхъ во́инствъ, дв҃ꙋ пречи́стꙋю бцⷣꙋ.

Велича́й дꙋшѐ моѧ̀, во і҆ера́рсѣхъ свѣти̑ла трѝ вели́кїѧ.

Велича́й дꙋшѐ моѧ̀, трисїѧ́тєльныѧ хрⷭ҇то́вы цр҃кве.

Велича́й дꙋшѐ моѧ̀, просвѣща́ющыѧ хрⷭ҇то́вꙋ цр҃ковь.

Велича́й дꙋшѐ моѧ̀, честнѣ́йшꙋю нбⷭ҇ныхъ во́инствъ, дв҃ꙋ пречи́стꙋю бцⷣꙋ.

Велича́й дꙋшѐ моѧ̀, прест҃ы́ѧ трⷪ҇цы трѝ па́стыри.

Велича́й дꙋшѐ моѧ̀, ѿ трисо́лнечнагѡ свѣти́ла трѝ вели́кїѧ.

Велича́й дꙋшѐ моѧ̀, трїѷпоста́снагѡ и҆ нераздѣ́льнагѡ бжⷭ҇тва̀ держа́вꙋ.

Велича́й дꙋшѐ моѧ̀, чⷭ҇тнѣ́йшꙋю нбⷭ҇ныхъ во́инствъ, дв҃ꙋ пречⷭ҇тꙋю бцⷣꙋ.

Срѣ́тенїю гдⷭ҇ню на ѳ҃-й пѣ́сни припѣ́вы:

Бцⷣе дв҃о, ᲂу҆пова́нїе хрⷭ҇тїа́нѡмъ, покры́й, соблюдѝ, и҆ спасѝ на тѧ̀ ᲂу҆пова́ющихъ.

Бцⷣе дв҃о, мі́рꙋ бл҃га́ѧ помо́щнице, покры́й и҆ соблюдѝ ѿ всѧ́кїѧ нꙋ́жды и҆ печа́ли.

Бг҃оно́се сѷмеѡ́не, прїидѝ, под̾имѝ хрⷭ҇та̀, є҆го́же родѝ дв҃а чⷭ҇таѧ мр҃і́а.

Ѡ҆б̾е́млетъ рꙋка́ми ста́рецъ сѷмеѡ́нъ содѣ́телѧ зако́на и҆ влⷣкꙋ всѧ́ческихъ.

Не ста́рецъ менѐ держи́тъ, но а҆́зъ держꙋ̀ є҆го̀: то́й бо ѿ менѐ ѿпꙋще́нїѧ про́ситъ.

Клещѐ та́инственнаѧ, ка́кѡ ᲂу҆́гль но́сиши; ка́кѡ пита́еши пита́ющаго всѧ̑;

Ѽ дщѝ фанꙋ́илева! прїидѝ, ста́ни съ на́ми, и҆ бл҃годарѝ хрⷭ҇та̀ сп҃са сн҃а бж҃їѧ.

А҆́нна цѣломꙋ́дреннаѧ провѣща́етъ стра̑шнаѧ, и҆сповѣ́дающи хрⷭ҇та̀, творца̀ нб҃ꙋ и҆ землѝ.

Непостижи́мо є҆́сть содѣ́ѧнное ѿ тебѣ̀ а҆́гг҃лѡмъ и҆ человѣ́кѡмъ, мт҃и дв҃о чⷭ҇таѧ.

Чи́стаѧ голꙋби́ца, нескве́рнаѧ а҆́гница, а҆́гнца и҆ па́стырѧ прино́ситъ въ цр҃ковь.

Ѽ хрⷭ҇тѐ всѣ́хъ цр҃ю̀! побѣ̑ды на врагѝ вѣ́рномꙋ твоемꙋ̀ рабꙋ̀, і҆мпера́торꙋ на́шемꙋ да́рꙋй.

Ѽ хрⷭ҇тѐ всѣ́хъ цр҃ю̀! пода́ждь мѝ сле́зы теплы̀, да пла́чꙋ мою̀ дꙋ́шꙋ, ю҆́же ѕлѣ̀ погꙋби́хъ.

Вмѣ́стѡ Сла́ва: ~Трисїѧ́тельное и҆ трїѷпоста́сное бжⷭ҇тво̀ бл҃гоче́стнѡ да похва́лимъ.

Вмѣ́стѡ И҆ ны́нѣ: Ѽ дв҃це мр҃і́е! просвѣтѝ мою̀ дꙋ́шꙋ, помраче́ннꙋю лю́тѣ жите́йскими сластьмѝ.

Ма́рта въ к҃є де́нь, благовѣ́щенїю прест҃ы́ѧ бцⷣы, на ѳ҃-й пѣ́сни припѣ́въ:

~Бл҃говѣствꙋ́й землѐ ра́дость ве́лїю, хвали́те нб҃са̀ бж҃їю сла́вꙋ.

На ст҃ꙋ́ю па́схꙋ припѣ́вы:

Вели́читъ дꙋша̀ моѧ̀ воскре́сшаго тридне́внѡ ѿ гро́ба хрⷭ҇та̀ жизнода́вца.

Вели́читъ дꙋша̀ моѧ̀ во́лею страда́вша и҆ погребе́на, и҆ воскрⷭ҇шаго тридне́внѡ ѿ гро́ба.

Хрⷭ҇то́съ но́ваѧ па́сха, же́ртва жива́ѧ, а҆́гнецъ бж҃їй взе́млѧй грѣхѝ мі́ра.

А҆́гг҃лъ вопїѧ́ше блгⷣтнѣй: чⷭ҇таѧ дв҃о ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскре́се, тридне́венъ ѿ гро́ба, и҆ мє́ртвыѧ воздви́гнꙋвый, лю́дїе весели́тесѧ.

Возбꙋди́лъ є҆сѝ ᲂу҆снꙋ́въ мє́ртвыѧ ѿ вѣ́ка, црⷭ҇ки рыка́вый ꙗ҆́кѡ ѿ і҆ꙋ́ды ле́въ.

Магдали́на марі́а притечѐ ко гро́бꙋ, и҆ хрⷭ҇та̀ ви́дѣвши, ꙗ҆́кѡ вертогра́дарѧ вопроша́ше.

А҆́гг҃лъ ѡ҆блиста́ѧй жена́мъ вопїѧ́ше: преста́ните ѿ сле́зъ, ꙗ҆́кѡ хрⷭ҇то́съ воскре́се.

Хрⷭ҇то́съ воскре́се, сме́рть попра́вый, и҆ мє́ртвыѧ воздви́гнꙋвый, лю́дїе весели́тесѧ.

Дне́сь всѧ́ка тва́рь весели́тсѧ и҆ ра́дꙋетсѧ: ꙗ҆́кѡ хрⷭ҇то́съ воскре́се, и҆ а҆́дъ плѣни́сѧ.

Дне́сь влⷣка плѣнѝ а҆́да, воздви́гнꙋвый ю҆́зники, ꙗ҆́же ѿ вѣ́ка и҆мѧ́ше лю́тѣ ѡ҆держи̑мыѧ.

Сла́ва: ~Вели́читъ дꙋша̀ моѧ̀ трїѷпоста́снагѡ и҆ нераздѣ́льнагѡ бж҃ества̀ держа́вꙋ.

И҆ ны́нѣ: ~Ра́дꙋйсѧ дв҃о, ра́дꙋйсѧ, ра́дꙋйсѧ бл҃гослове́ннаѧ, ра́дꙋйсѧ препросла́вленнаѧ: тво́й бо сн҃ъ воскре́се тридне́венъ ѿ гро́ба.

Вознесе́нїѧ:

Велича́й дꙋшѐ моѧ̀, возне́сшагосѧ ѿ землѝ на нб҃о, хрⷭ҇та̀ жизнода́вца.

Дрꙋгі́й: ~А҆́гг҃ли восхожде́нїе влⷣки зрѧ́ще, ᲂу҆жаса́хꙋсѧ, ка́кѡ со сла́вою взѧ́тсѧ ѿ землѝ на гѡ́рнѧѧ.

А҆́ѵгꙋста въ ѕ҃ де́нь, на преѡбраже́нїе гдⷭ҇не, припѣ́въ:

Велича́й дꙋшѐ моѧ̀, на ѳавѡ́рѣ преѡбрази́вшагосѧ гдⷭ҇а.

Въ є҃і де́нь, на ᲂу҆спе́нїе прест҃ы́ѧ бцⷣы припѣ́вы:

~Ро́ди всѝ бл҃жи́мъ тѧ̀ є҆ди́нꙋ бцⷣꙋ.

И҆лѝ: ~А҆́гг҃ли ᲂу҆спе́нїе пречⷭ҇тыѧ ви́дѣвше ᲂу҆диви́шасѧ, ка́кѡ дв҃аѧ восхо́дитъ ѿ землѝ на нб҃о.

Втора́гѡ творца̀: ~Велича́й дꙋшѐ моѧ̀, ѿ землѝ на нб҃о честно́е преставле́нїе бж҃їѧ мт҃ре.