[глⷡ҇а ѯ҃] Прокі́мени, а҆по́столи, а҆ллилꙋїа́рє, є҆ѵⷢ҇лїа, и҆ прича́стни на всѧ́кꙋ потре́бꙋ разли́чнїи

На ѡ҆сщ҃е́нїе є҆ле́а з҃ і҆ере́євъ.

Пе́рвый і҆ере́й глаго́летъ: прокі́менъ, гла́съ а҃: Бꙋ́ди гдⷭ҇и млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. Сті́хъ: Ра́дꙋйтесѧ првⷣнїи ѡ҆ гдⷭ҇ѣ, пра̑вымъ подоба́етъ похвала̀. А҆по́столъ і҆а́кѡвлѧ посла́нїѧ, зача́ло н҃з. А҆ллилꙋ́їа, гла́съ и҃. Сті́хъ: Млⷭ҇ть и҆ сꙋ́дъ воспою̀ тебѣ̀ гдⷭ҇и. Є҆ѵⷢ҇лїе лꙋкѝ, зача́ло н҃г.

Вторы́й і҆ере́й глаго́летъ: прокі́менъ, гла́съ в҃: Крѣ́пость моѧ̀ и҆ пѣ́нїе моѐ гдⷭ҇ь, и҆ бы́сть мнѣ̀ во сп҃се́нїе. Сті́хъ: Наказꙋ́ѧ наказа́ мѧ гдⷭ҇ь, сме́рти же не предаде́ мѧ. А҆по́столъ къ ри́млѧнѡмъ, зача́ло рѕ҃і. А҆ллилꙋ́їа, гла́съ є҃: Млⷭ҇ти твоѧ̑ гдⷭ҇и во вѣ́къ воспою̀. Є҆ѵⷢ҇лїе лꙋкѝ, зача́ло ч҃д.

Тре́тїй і҆ере́й глаго́летъ: прокі́менъ, гла́съ г҃: Гдⷭ҇ь просвѣще́нїе моѐ, и҆ сп҃си́тель мо́й, когѡ̀ ᲂу҆бою́сѧ; Сті́хъ: Гдⷭ҇ь защи́титель живота̀ моегѡ̀, ѿ когѡ̀ ᲂу҆страшꙋ́сѧ; А҆по́столъ къ корі́нѳѧнѡмъ, зача́ло рн҃г. А҆ллилꙋ́їа, гла́съ в҃. Сті́хъ: На тѧ̀ гдⷭ҇и ᲂу҆пова́хъ, да не постыжꙋ́сѧ во вѣ́къ. Є҆ѵⷢ҇лїе матѳе́а, зача́ло л҃д ѿ полꙋ̀.

Четве́ртый і҆ере́й глаго́летъ: прокі́менъ, гла́съ д҃: Во́ньже а҆́ще де́нь призовꙋ́ тѧ, ско́рѡ ᲂу҆слы́ши мѧ̀. Сті́хъ: Гдⷭ҇и ᲂу҆слы́ши мл҃твꙋ мою̀, и҆ во́пль мо́й къ тебѣ̀ да прїи́детъ. А҆по́столъ къ корі́нѳѧнѡмъ, зача́ло рп҃в ѿ полꙋ̀. А҆ллилꙋ́їа, гла́съ в҃. Сті́хъ: Терпѧ̀ потерпѣ́хъ гдⷭ҇а, и҆ внѧ́тъ мѝ. Є҆ѵⷢ҇лїе матѳе́а, зача́ло к҃ѕ.

Пѧ́тый і҆ере́й глаго́летъ: прокі́менъ, гла́съ є҃: Ты̀ гдⷭ҇и сохрани́ши ны̀, и҆ соблюде́ши ны̀ ѿ ро́да сегѡ̀ и҆ во вѣ́къ. Сті́хъ: Сп҃си́ мѧ гдⷭ҇и, ꙗ҆́кѡ ѡ҆скꙋдѣ̀ прпⷣбный. А҆по́столъ къ корі́нѳѧнѡмъ, зача́ло рѯ҃и. А҆ллилꙋ́їа, гла́съ є҃. Сті́хъ: Млⷭ҇ти твоѧ̑ гдⷭ҇и во вѣ́къ воспою̀. Є҆ѵⷢ҇лїе матѳе́а, зача́ло р҃д.

Шесты́й і҆ере́й глаго́летъ: прокі́менъ, гла́съ ѕ҃: Поми́лꙋй мѧ̀ бж҃е по вели́цѣй млⷭ҇ти твое́й. Сті́хъ: Се́рдце чи́сто сози́жди во мнѣ̀ бж҃е, и҆ дꙋ́хъ нра́въ ѡ҆бновѝ во ᲂу҆тро́бѣ мое́й. А҆по́столъ къ гала́тѡмъ, зача́ло сг҃і. А҆ллилꙋ́їа, гла́съ ѕ҃. Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀. Є҆ѵⷢ҇лїе матѳе́а, зача́ло ѯ҃в.

Седмы́й і҆ере́й глаго́летъ: прокі́менъ, гла́съ з҃: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ. Сті́хъ: Поми́лꙋй мѧ̀ гдⷭ҇и, ꙗ҆́кѡ не́мощенъ є҆́смь. А҆по́столъ къ солꙋ́нѧнѡмъ. зача́ло сѻ҃г. А҆ллилꙋ́їа, гла́съ з҃. Сті́хъ: Оу҆слы́шитъ тѧ̀ гдⷭ҇ь въ де́нь печа́ли, защи́титъ тѧ̀ и҆́мѧ бг҃а і҆а́кѡвлѧ. Є҆ѵⷢ҇лїе, матѳе́а, зача́ло л҃.

А҆́ѵгꙋста въ а҃-й де́нь, на ѡ҆сщ҃е́нїе воды̀:

Прокі́менъ, гла́съ г҃: Гдⷭ҇ь просвѣще́нїе моѐ: Сті́хъ: Гдⷭ҇ь защи́титель живота̀ моегѡ̀: А҆по́столъ ко є҆вре́ємъ, зача́ло т҃ѕ. А҆ллилꙋ́їа, гла́съ ѕ҃. Сті́хъ: Ѿры́гнꙋ се́рдце моѐ сло́во бл҃го. Сті́хъ: Глаго́лю а҆́зъ дѣла̀ моѧ̑ цр҃е́ви: Є҆ѵⷢ҇лїе і҆ѡа́нна, зача́ло д҃і.

На ѡ҆сщ҃е́нїе цр҃кве:

Прокі́менъ, гла́съ д҃: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й. Сті́хъ: Гдⷭ҇ь воцр҃и́сѧ въ лѣ́потꙋ ѡ҆блече́сѧ. А҆по́столъ ко є҆вре́ємъ, зача́ло т҃з. А҆ллилꙋ́їа, гла́съ а҃: Ѡ҆снова̑нїѧ є҆гѡ̀ на гора́хъ ст҃ы́хъ, лю́битъ гдⷭ҇ь врата̀ сїѡ́нѧ па́че всѣ́хъ селе́нїй і҆а́кѡвлихъ. Сті́хъ: Пресла̑внаѧ глаго́лашасѧ ѡ҆ тебѣ̀ гра́де бж҃їй. Є҆ѵⷢ҇лїе і҆ѡа́нна, зача́ло л҃з ѿ полꙋ̀. Прича́стенъ: Гдⷭ҇и, возлюби́хъ бл҃голѣ́пїе до́мꙋ твоегѡ̀, и҆ мѣ́сто селе́нїѧ сла́вы твоеѧ̀.

На ѡ҆снова́нїе и҆ на ѡ҆бновле́нїе гра́да:

Прокі́менъ, гла́съ д҃: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й. Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ: А҆по́столъ дѣѧ́нїй, зача́ло м҃ ѿ полꙋ̀. А҆ллилꙋ́їа, гла́съ в҃: Ѡ҆снова̑нїѧ є҆гѡ̀ на гора́хъ ст҃ы́хъ: Сті́хъ: Пресла̑внаѧ глаго́лашасѧ ѡ҆ тебѣ̀ гра́де бж҃їй. Є҆ѵⷢ҇лїе матѳе́а, зача́ло ѯ҃з. Прича́стенъ: Гдⷭ҇и, возлюби́хъ. бл҃голѣ́пїе до́мꙋ твоегѡ̀:

Вослѣ́дованїе въ бездо́ждїе:

Прокі́менъ, гла́съ д҃: Бразды̑ зємны́ѧ ᲂу҆по́й, и҆ ᲂу҆мно́жи жи̑та є҆ѧ̀. Сті́хъ: Въ ка́плѧхъ є҆ѧ̀ возвесели́тсѧ возсїѧ́ющи. А҆по́столъ і҆а́кѡвлѧ посла́нїѧ, зача́ло н҃ѕ. А҆ллилꙋ́їа, гла́съ и҃: Бл҃гослови́ши вѣне́цъ лѣ́та бл҃гости твоеѧ̀, и҆ полѧ̀ твоѧ̑ и҆спо́лнѧтсѧ тꙋ́ка. Сті́хъ: Разботѣ́ютъ кра̑снаѧ пꙋсты́ни, и҆ ра́достїю хо́лми препоѧ́шꙋтсѧ. Є҆ѵⷢ҇лїе матѳе́а, зача́ло ѯ҃є. Прича́стенъ: Ча́шꙋ сп҃се́нїѧ прїимꙋ̀:

Во вре́мѧ безве́дрїѧ:

Прокі́менъ, гла́съ д҃: Сп҃си́ мѧ бж҃е, ꙗ҆́кѡ внидо́ша во́ды до дꙋшѝ моеѧ̀. Сті́хъ: Оу҆глѣбо́хъ въ тимѣ́нїи глꙋбины̀, и҆ нѣ́сть постоѧ́нїѧ. А҆по́столъ къ ри́млѧнѡмъ, зача́ло ч҃и. А҆ллилꙋ́їа гла́са, Сп҃си́ мѧ ѿ бре́нїѧ, да не ᲂу҆глѣ́бнꙋ, и҆ ѿ глꙋбо́кихъ во́дъ. Сті́хъ: Да не потопи́тъ менѐ бꙋ́рѧ водна́ѧ, нижѐ да пожре́тъ менѐ глꙋбина̀. Є҆ѵⷢ҇лїе матѳе́а, зача́ло к҃ ѿ полꙋ̀.

Во стра́хъ трꙋ́са:

Прокі́менъ, гла́съ и҃: Гдⷭ҇и, да не ꙗ҆́ростїю твое́ю ѡ҆бличи́ши менѐ. Сті́хъ: Не ѿвратѝ лица̀ твоегѡ̀ ѿ ѻ҆́трока твоегѡ̀: А҆по́столъ ко є҆вре́ємъ, зача́ло тл҃а ѿ полꙋ̀. А҆ллилꙋ́їа, гла́съ є҃: Бж҃е ѿри́нꙋлъ ны̀ є҆сѝ, и҆ низложи́лъ є҆сѝ на́съ. Сті́хъ: Стрѧ́слъ є҆сѝ зе́млю, и҆ смꙋти́лъ є҆сѝ ю҆̀: и҆сцѣлѝ сокрꙋше́нїе є҆ѧ̀, ꙗ҆́кѡ подви́жесѧ. Є҆ѵⷢ҇лїе матѳе́а, зача́ло к҃з. Прича́стенъ: Призира́ѧй на зе́млю, и҆ творѧ́й ю҆̀ трѧсти́сѧ.

Вослѣ́дованїе во вре́мѧ ꙗ҆́звъ:

Прокі́менъ, гла́съ д҃: Гдⷭ҇и, да не ꙗ҆́ростїю твое́ю ѡ҆бличи́ши менѐ: Сті́хъ: Нѣ́сть и҆сцѣле́нїѧ въ пло́ти мое́й, ѿ лица̀ гнѣ́ва твоегѡ̀. Є҆ѵⷢ҇лїе лꙋкѝ, зача́ло ѕ҃і.

Вослѣ́дованїе во ѻ҆бщенꙋ́ждїи:

Прокі́менъ, гла́съ д҃: Да́ждь на́мъ по́мощь ѡ҆ ско́рби: Сті́хъ: Ѡ҆ бз҃ѣ сотвори́мъ си́лꙋ: Є҆ѵⷢ҇лїе ма́рка, зача́ло н҃а.

Вослѣ́дованїе за +і҆мпера́тора+, и҆ за лю́ди во вре́мѧ бра́ни:

Прокі́менъ, гла́съ д҃: Гдⷭ҇и, си́лою твое́ю возвесели́тсѧ ца́рь, и҆ ѡ҆ сп҃се́нїи твое́мъ возра́дꙋетсѧ ѕѣлѡ̀. Сті́хъ: Жела́нїе се́рдца є҆гѡ̀ да́лъ є҆сѝ є҆мꙋ̀, и҆ хотѣ́нїѧ ᲂу҆стнꙋ̀ є҆гѡ̀ нѣ́си лиши́лъ є҆го̀. А҆по́столъ ко є҆фесе́ємъ, зача́ло сл҃г. А҆ллилꙋ́їа, гла́съ в҃: Оу҆слы́шитъ тѧ̀ гдⷭ҇ь въ де́нь печа́ли, защи́титъ тѧ̀ и҆́мѧ бг҃а і҆а́кѡвлѧ. Сті́хъ: Гдⷭ҇и, сп҃сѝ царѧ̀, и҆ ᲂу҆слы́ши ны̀, во́ньже а҆́ще де́нь призове́мъ тѧ̀. Є҆ѵⷢ҇лїе ма́рка, зача́ло н҃а. Прича́стенъ: Хвали́те гдⷭ҇а съ нб҃съ:

Въ наше́ствїи ва̑рваръ:

Прокі́менъ, гла́съ д҃: Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀. Сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ. А҆по́столъ къ є҆фесе́ємъ, зача́ло с҃к. А҆ллилꙋ́їа. Сті́хъ: Гдⷭ҇ь сокрꙋша́ѧй бра̑ни: Є҆ѵⷢ҇лїе лꙋкѝ, зача́ло ѻ҃. Прича́стенъ: Гдⷭ҇ь крѣ́покъ и҆ си́ленъ, гдⷭ҇ь си́ленъ во бра́ни.

Ѡ҆ ᲂу҆мире́нїи и҆ соедине́нїи правосла́вныѧ вѣ́ры:

Прокі́менъ, гла́съ з҃: Гдⷭ҇ь крѣ́пость лю́демъ свои̑мъ да́стъ, гдⷭ҇ь бл҃гослови́тъ лю́ди своѧ̑ ми́ромъ. Сті́хъ: Въ хра́мѣ є҆гѡ̀ всѧ́кїй глаго́летъ сла́вꙋ. Є҆ѵⷢ҇лїе матѳе́а, зача́ло к҃ ѿ полꙋ̀.

Ѡ҆ ᲂу҆мире́нїи и҆ соедине́нїи цр҃кве:

Прокі́менъ, гла́съ д҃: Да воскрⷭ҇нетъ бг҃ъ: Сті́хъ: Ꙗ҆́кѡ и҆счеза́етъ ды́мъ: Є҆ѵⷢ҇лїе ма́рка, зача́ло н҃а.

Вослѣ́дованїе за творѧ́щихъ ми́лостыню:

Прокі́менъ, гла́съ д҃: Оу҆пова́й на гдⷭ҇а, и҆ творѝ бл҃госты́ню. Сті́хъ: Ве́сь де́нь ми́лꙋетъ, и҆ взаи́мъ дае́тъ првⷣный. Є҆ѵⷢ҇лїе матѳе́а, зача́ло к҃ ѿ полꙋ̀.

Въ запале́нїи ѻ҆гнѧ̀:

Прокі́менъ, гла́съ а҃: Бꙋ́ди гдⷭ҇и млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. Сті́хъ: Сѐ ѻ҆́чи гдⷭ҇ни на боѧ́щыѧсѧ є҆гѡ̀, и҆ ᲂу҆пова́ющыѧ на млⷭ҇ть є҆гѡ̀. А҆по́столъ ко є҆вре́ємъ, зача́ло тл҃в. А҆ллилꙋ́їа: Ще́дръ и҆ млⷭ҇тивъ гдⷭ҇ь, всѣ̑мъ призыва́ющымъ є҆гѡ̀. Є҆ѵⷢ҇лїе лꙋкѝ, зача́ло ѯ҃ѳ.

Над̾ болѧ́щимъ,

Прокі́менъ, гла́съ а҃: А҆́зъ рѣ́хъ: гдⷭ҇и поми́лꙋй мѧ̀, и҆сцѣлѝ дꙋ́шꙋ мою̀, ꙗ҆́кѡ согрѣши́хъ тебѣ̀. Сті́хъ: Бл҃же́нъ разꙋмѣва́ѧй на ни́ща и҆ ᲂу҆бо́га, въ де́нь лю́тъ и҆зба́витъ є҆го̀ гдⷭ҇ь. А҆по́столъ і҆а́кѡвлѧ посла́нїѧ, зача́ло н҃з. А҆ллилꙋ́їа, гла́съ и҃: При́зри на мѧ̀ и҆ поми́лꙋй мѧ̀. а҃-е, є҆ѵⷢ҇лїе матѳе́а зача́ло к҃ѕ. в҃-е, є҆ѵⷢ҇лїе ма́рка, зача́ло к҃а. г҃-е, є҆ѵⷢ҇лїе і҆ѡа́нна, зача́ло г҃і. Прича́стенъ: Ча́шꙋ сп҃се́нїѧ прїимꙋ̀:

На постриже́нїе мона́хѡвъ:

Прокі́менъ, гла́съ г҃: Гдⷭ҇ь просвѣще́нїе моѐ: Сті́хъ: Гдⷭ҇ь защи́титель живота̀ моегѡ̀: А҆по́столъ къ є҆фесе́ємъ, зача́ло сл҃г. А҆ллилꙋ́їа, гла́съ а҃: Се́й ни́щїй воззва̀. и҆ гдⷭ҇ь ᲂу҆слы́ша и҆̀, и҆ ѿ всѣ́хъ скорбе́й є҆гѡ̀ сп҃сѐ и҆̀. Є҆ѵⷢ҇лїе матѳе́а, зача́ло л҃ѳ. Прича́стенъ: Ча́шꙋ сп҃се́нїѧ прїимꙋ̀:

За всѧ́кое проше́нїе:

Є҆ѵⷢ҇лїе матѳе́а, зача́ло к҃ ѿ полꙋ̀. И҆лѝ ма́рка, н҃а: И҆лѝ лꙋкѝ, зача́ло п҃и.

На креще́нїи человѣ́кѡвъ:

Прокі́менъ, гла́съ г҃: Гдⷭ҇ь просвѣще́нїе моѐ: Сті́хъ: Гдⷭ҇ь защи́титель живота̀ моегѡ̀: А҆по́столъ къ ри́млѧнѡмъ, зача́ло ч҃а. Є҆ѵⷢ҇лїе матѳе́а, зача́ло рѕ҃і.

Во вре́мѧ бра́ка:

Прокі́менъ, гла́съ и҃: Положи́лъ є҆сѝ на глава́хъ и҆́хъ вѣнцы̀, ѿ ка́меней чⷭ҇тны́хъ: живота̀ проси́ша ᲂу҆ тебѐ, и҆ да́лъ є҆сѝ и҆̀мъ. Сті́хъ: Ꙗ҆́кѡ да́си и҆̀мъ бл҃гослове́нїе въ вѣ́къ вѣ́ка, возвесели́ши ѧ҆̀ ра́достїю съ лице́мъ твои́мъ. А҆по́столъ къ є҆фесе́ємъ, зача́ло с҃л. А҆ллилꙋ́їа, гла́съ є҃: Сті́хъ: Ты̀ гдⷭ҇и сохрани́ши ны̀, и҆ соблюде́ши ны̀ ѿ ро́да сегѡ̀, и҆ во вѣ́къ. Є҆ѵⷢ҇лїе і҆ѡа́нна, зача́ло ѕ҃.

И҆сповѣ́данїю:

Є҆ѵⷢ҇лїе матѳе́а, заⷱ҇ л҃: и҆лѝ лꙋкѝ, заⷱ҇ ѻ҃и.

Же́нъ и҆сповѣ́данїю:

Є҆ѵⷢ҇лїе і҆ѡа́нна, зача́ло к҃и.

Над̾ и҆мꙋ́щимъ дꙋ́хъ недꙋ́га:

Є҆ѵⷢ҇лїе матѳе́а, зача́ло к҃и: и҆лѝ ѻ҃в. Ма́рка, зача́ло ѳ҃і: и҆лѝ м҃. Лꙋкѝ, м҃ѕ.

На погребе́нїи мїрѧ́нъ:

Прокі́менъ, гла́съ ѕ҃: Бл҃же́нъ пꙋ́ть, во́ньже и҆́деши дне́сь дꙋшѐ, ꙗ҆́кѡ ᲂу҆гото́васѧ тебѣ̀ мѣ́сто ᲂу҆покое́нїѧ. Сті́хъ: Къ тебѣ̀ гдⷭ҇и воззовꙋ̀: А҆по́столъ къ солꙋ́нѧнѡмъ, зача́ло с҃ѻ. А҆ллилꙋ́їа, гла́съ ѕ҃: Бл҃же́нъ, є҆го́же и҆збра́лъ, и҆ прїѧ́лъ є҆сѝ гдⷭ҇и. Є҆ѵⷢ҇лїе і҆ѡа́нна, зача́ло ѕ҃і.

На погребе́нїи мона́хѡвъ:

Прокі́менъ, гла́съ ѕ҃: Бл҃же́нъ пꙋ́ть, во́ньже и҆́деши бра́те дне́сь. Сті́хъ: Ѡ҆брати́сѧ дꙋшѐ моѧ̀ въ поко́й тво́й, ꙗ҆́кѡ гдⷭ҇ь бл҃годѣ́йствова тѧ̀. А҆по́столъ, А҆ллилꙋ́їа, и҆ є҆ѵⷢ҇лїе, пи́санъ въ погребе́нїи мїрѧ́нъ.

На погребе́нїи і҆ере́євъ:

Прокі́менъ, гла́съ ѕ҃: Бл҃же́нъ пꙋ́ть, во́ньже и҆́деши дне́сь дꙋшѐ: Сті́хъ: Ѡ҆брати́сѧ дꙋшѐ моѧ̀ въ поко́й тво́й: А҆по́столъ къ солꙋ́нѧнѡмъ, зача́ло с҃ѻ. А҆ллилꙋ́їа, гла́съ и҃: Бл҃же́нъ, є҆го́же и҆збра́лъ, и҆ прїѧ́лъ є҆сѝ гдⷭ҇и. Є҆ѵⷢ҇лїе і҆ѡа́нна, зача́ло ѕ҃і.

Вторы́й прокі́менъ, гла́съ ѕ҃: Бл҃же́нъ, є҆го́же и҆збра́лъ: Сті́хъ: Тебѣ̀ подоба́етъ пѣ́снь бж҃е въ сїѡ́нѣ: А҆по́столъ къ ри́млѧнѡмъ, зача́ло п҃ѳ, ѿ полꙋ̀. А҆ллилꙋ́їа, гла́съ ѕ҃: Бл҃же́нъ, є҆го́же и҆збра́лъ: Є҆ѵⷢ҇лїе і҆ѡа́нна, зача́ло є҃і.

Тре́тїй прокі́менъ, гла́съ ѕ҃: Бл҃же́нъ, є҆го́же и҆збра́лъ: Сті́хъ: Па́мѧть є҆гѡ̀ въ ро́дъ и҆ ро́дъ: А҆по́столъ къ корі́нѳѧнѡмъ, зача́ло рн҃и. А҆ллилꙋ́їа. Сті́хъ: Бл҃же́нъ, є҆го́же и҆збра́лъ: Є҆ѵⷢ҇лїе і҆ѡа́нна, зача́ло к҃а.

Четве́ртый прокі́менъ, гла́съ ѕ҃: Дꙋша̀ є҆гѡ̀ во бл҃ги́хъ водвори́тсѧ: Сті́хъ: Къ тебѣ̀ гдⷭ҇и воззовꙋ̀: А҆по́столъ къ корі́нѳѧнѡмъ, зача́ло р҃ѯ. А҆ллилꙋ́їа: Бл҃же́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе і҆ѡа́нна, зача́ло к҃в.

Пѧ́тый прокі́менъ, гла́съ ѕ҃: Бл҃же́нъ, є҆го́же и҆збра́лъ: Сті́хъ: Дꙋша̀ є҆гѡ̀ во бл҃ги́хъ водвори́тсѧ. А҆по́столъ къ ри́млѧнѡмъ, зача́ло рг҃і. А҆ллилꙋ́їа, гла́съ ѕ҃: Бл҃же́нъ, є҆го́же и҆збра́лъ, и҆ прїѧ́лъ є҆сѝ гдⷭ҇и: Сті́хъ: Дꙋша̀ є҆гѡ̀ во бл҃ги́хъ водвори́тсѧ. Є҆ѵⷢ҇лїе і҆ѡа́нна, зача́ло к҃г.

На погребе́нїи младе́нцєвъ:

Прокі́менъ, гла́съ ѕ҃: Бл҃же́нъ пꙋ́ть, во́ньже по́йдеши дꙋшѐ: Сті́хъ: Ѡ҆брати́сѧ дꙋшѐ моѧ̀ въ поко́й тво́й: А҆по́столъ къ корі́нѳѧнѡмъ, зача́ло рѯ҃в. А҆ллилꙋ́їа. Сті́хъ: Бл҃же́нъ є҆го́же и҆збра́лъ, и҆ прїѧ́лъ є҆сѝ, гдⷭ҇и. Сті́хъ: Дꙋша̀ є҆гѡ̀ во бл҃ги́хъ водвори́тсѧ. Є҆ѵⷢ҇лїе і҆ѡа́нна, зача́ло к҃а.

Послѣ́дованїе въ ми́ръ:

Прокі́менъ, гла́съ д҃: Ми́ръ мно́гъ лю́бѧщымъ тѧ̀ гдⷭ҇и. Сті́хъ: Ча́ѧхъ бг҃а сп҃са́ющаго мѧ̀: А҆по́столъ ко є҆фесе́ємъ, зача́ло ск҃а. А҆ллилꙋ́їа, гла́съ д҃: Вопроси́те ꙗ҆̀же ѡ҆ ми́рѣ і҆ерⷭ҇ли́ма. Є҆ѵⷢ҇лїе і҆ѡа́нна, зача́ло м҃и, ѿ полꙋ̀: Прича́стенъ: Ча́шꙋ сп҃се́нїѧ прїимꙋ̀: