[глⷡ҇а н҃д] Столпѝ є҆ѵⷢ҇льстїи

гла́съ, а҃. є҆ѵⷢ҇лїе, воскре́сно, в҃.

гла́съ, в҃. є҆ѵⷢ҇лїе, воскре́сно, г҃.

гла́съ, г҃. є҆ѵⷢ҇лїе, воскре́сно, д҃.

гла́съ, д҃. є҆ѵⷢ҇лїе, воскре́сно, є҃.

гла́съ, є҃. є҆ѵⷢ҇лїе, воскре́сно, ѕ҃.

гла́съ, ѕ҃. є҆ѵⷢ҇лїе, воскре́сно, з҃.

гла́съ, з҃. є҆ѵⷢ҇лїе, воскре́сно, и҃.

гла́съ, и҃. є҆ѵⷢ҇лїе, воскре́сно, ѳ҃.

гла́съ, а҃. є҆ѵⷢ҇лїе, воскре́сно, і҃.

гла́съ, в҃. є҆ѵⷢ҇лїе, воскре́сно, а҃і.

гла́съ, г҃. є҆ѵⷢ҇лїе, воскре́сно, а҃.

гла́съ, д҃. є҆ѵⷢ҇лїе, воскре́сно, в҃.

гла́съ, є҃. є҆ѵⷢ҇лїе, воскре́сно, г҃.

гла́съ, ѕ҃. є҆ѵⷢ҇лїе, воскре́сно, д҃.

гла́съ, з҃. є҆ѵⷢ҇лїе, воскре́сно, є҃.

гла́съ, и҃. є҆ѵⷢ҇лїе, воскре́сно, ѕ҃.

гла́съ, а҃. є҆ѵⷢ҇лїе, воскре́сно, з҃.

гла́съ, в҃. є҆ѵⷢ҇лїе, воскре́сно, и҃.

гла́съ, г҃. є҆ѵⷢ҇лїе, воскре́сно, ѳ҃.

гла́съ, д҃. є҆ѵⷢ҇лїе, воскре́сно, і҃.

гла́съ, є҃. є҆ѵⷢ҇лїе, воскре́сно, а҃і.

гла́съ, ѕ҃. є҆ѵⷢ҇лїе, воскре́сно, а҃.

гла́съ, з҃. є҆ѵⷢ҇лїе, воскре́сно, в҃.

гла́съ, и҃. є҆ѵⷢ҇лїе, воскре́сно, г҃.

гла́съ, а҃. є҆ѵⷢ҇лїе, воскре́сно, д҃.

гла́съ, в҃. є҆ѵⷢ҇лїе, воскре́сно, є҃.

гла́съ, г҃. є҆ѵⷢ҇лїе, воскре́сно, ѕ҃.

гла́съ, д҃. є҆ѵⷢ҇лїе, воскре́сно, з҃.

гла́съ, є҃. є҆ѵⷢ҇лїе, воскре́сно, и҃.

гла́съ, ѕ҃. є҆ѵⷢ҇лїе, воскре́сно, ѳ҃.

гла́съ, з҃. є҆ѵⷢ҇лїе, воскре́сно, і҃.

гла́съ, и҃. є҆ѵⷢ҇лїе, воскре́сно, а҃і.

гла́съ, а҃. є҆ѵⷢ҇лїе, воскре́сно, а҃.

гла́съ, в҃. є҆ѵⷢ҇лїе, воскре́сно, в҃.

гла́съ, г҃. є҆ѵⷢ҇лїе, воскре́сно, г҃.

гла́съ, д҃. є҆ѵⷢ҇лїе, воскре́сно, д҃.

гла́съ, є҃. є҆ѵⷢ҇лїе, воскре́сно, є҃.

гла́съ, ѕ҃. є҆ѵⷢ҇лїе, воскре́сно, ѕ҃.

гла́съ, з҃. є҆ѵⷢ҇лїе, воскре́сно, з҃.

гла́съ, и҃. є҆ѵⷢ҇лїе, воскре́сно, и҃.

гла́съ, а҃. є҆ѵⷢ҇лїе, воскре́сно, ѳ҃.

гла́съ, в҃. є҆ѵⷢ҇лїе, воскре́сно, і.

гла́съ, г҃. є҆ѵⷢ҇лїе, воскре́сно, а҃і.

гла́съ, д҃. є҆ѵⷢ҇лїе, воскре́сно, а҃.

гла́съ, є҃. є҆ѵⷢ҇лїе, воскре́сно, в҃.

гла́съ, ѕ҃. є҆ѵⷢ҇лїе, воскре́сно, г҃.

гла́съ, з҃. є҆ѵⷢ҇лїе, воскре́сно, д҃.

гла́съ, и҃. є҆ѵⷢ҇лїе, воскре́сно, є҃.

Нача́ло воскрⷭ҇ныхъ є҆ѯапостїла́рїй, и҆ ᲂу҆́треннихъ самогла́сныхъ, си́рѣчь є҆ѵⷢ҇льскихъ стїхи́ръ. И҆ ᲂу҆́треннїѧ ᲂу҆́бѡ стїхи̑ры сꙋ́ть творе́нїе льва̀ царѧ̀ премꙋ́драгѡ, є҆ѯапостїла́рїи же сы́на є҆гѡ̀ кѡнстанті́на царѧ̀.

Є҆ѯапостїла́рїй а҃:

Со ᲂу҆ч҃нкѝ взы́демъ на го́рꙋ галїле́йскꙋю, вѣ́рою хрⷭ҇та̀ ви́дѣти, глаго́люща вла́сть прїѧ́ти вы́шнихъ и҆ ни́жнихъ: наꙋчи́мсѧ, ка́кѡ ᲂу҆чи́тъ креща́ти, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, ꙗ҆зы́ки всѧ̑, и҆ пребыва́ти съ таи́нники, ꙗ҆́коже ѡ҆бѣща́сѧ, до сконча́нїѧ вѣ́ка.

Бг҃оро́диченъ:

Со ᲂу҆ч҃нкѝ ра́доваласѧ є҆сѝ бцⷣе дв҃о, ꙗ҆́кѡ хрⷭ҇та̀ ви́дѣла є҆сѝ воскрⷭ҇шаго ѿ гро́ба тридне́вна, ꙗ҆́коже речѐ: и҆̀мже и҆ ꙗ҆ви́сѧ, наꙋча́ѧ и҆ ꙗ҆влѧ́ѧ лꙋ̑чшаѧ, и҆ креща́ти во ѻ҆ц҃ѣ̀, и҆ сн҃ѣ, и҆ дс҃ѣ повелѣва́ѧ: є҆́же вѣ́ровати на́мъ тогѡ̀ воста́нїю, и҆ сла́вити тѧ̀ ѻ҆трокови́це.

Оу҆́треннѧѧ стїхи́ра, гла́съ а҃:

На го́рꙋ ᲂу҆ч҃нкѡ́мъ и҆дꙋ́щымъ за земно́е вознесе́нїе, предста̀ гдⷭ҇ь: и҆ поклони́вшесѧ є҆мꙋ̀, и҆ да́нныѧ вла́сти вездѣ̀ наꙋчи́вшесѧ, въ поднбⷭ҇нꙋю посыла́хꙋсѧ, проповѣ́дати є҆́же и҆з̾ ме́ртвыхъ воскрⷭ҇нїе, и҆ є҆́же на нб҃са̀ возше́ствїе: и҆̀мже и҆ во вѣ́ки спребыва́ти нело́жный ѡ҆бѣща́сѧ хрⷭ҇то́съ бг҃ъ, и҆ сп҃съ дꙋ́шъ на́шихъ.

Є҆ѯапостїла́рїй в҃:

Ка́мень ᲂу҆зрѣ́вше ѿвале́нъ мѷронѡ́сицы ра́довахꙋсѧ, ви́дѣвше бо ю҆́ношꙋ сѣдѧ́ща во гро́бѣ, и҆ то́й тѣ̑мъ речѐ: сѐ хрⷭ҇то́съ воста́лъ є҆́сть, рцы́те съ петро́мъ ᲂу҆ч҃нкѡ́мъ: на го́рꙋ приспѣ́йте галїле́йскꙋю, та́мѡ ва́мъ ꙗ҆ви́тсѧ, ꙗ҆́коже предречѐ дрꙋгѡ́мъ.

Бг҃оро́диченъ:

А҆́гг҃лъ ᲂу҆́бѡ принесѐ дв҃ѣ, є҆́же ра́дꙋйсѧ, пре́жде твоегѡ̀ зача́тїѧ хрⷭ҇тѐ: а҆́гг҃лъ же ка́мень ѿвалѝ гро́ба твоегѡ̀. вмѣ́стѡ печа́ли, ѻ҆́въ ᲂу҆́бѡ ра́дости неизрече́нныѧ зна́мєнїѧ: ѻ҆́въ же въ сме́рти мѣ́сто, пода́телѧ тѧ̀ жи́зни проповѣ́дꙋѧ и҆ велича́ѧ, и҆ глаго́лѧ воскрⷭ҇нїе жена́мъ и҆ таи́нникѡмъ.

Оу҆́треннѧѧ стїхи́ра, гла́съ в҃.

Съ мѵ́ры прише́дшымъ ꙗ҆̀же съ мр҃і́ею жена́мъ, и҆ недоꙋмѣва́ющымсѧ, ка́кѡ бꙋ́детъ и҆̀мъ ᲂу҆лꙋчи́ти жела́нїе, ꙗ҆ви́сѧ ка́мень взѧ́тый, бж҃е́ственный ю҆́ноша ᲂу҆толѧ́ѧй мѧте́жъ дꙋ́шъ и҆́хъ: воста́ бо, глаго́летъ, і҆и҃съ гдⷭ҇и. тѣ́мже проповѣ́дите проповѣ́дникѡмъ є҆гѡ̀ ᲂу҆ч҃нкѡ́мъ въ галїле́ю тещѝ, и҆ ви́дѣти є҆го̀ воскрⷭ҇ша и҆з̾ ме́ртвыхъ, ꙗ҆́кѡ жизнода́вца и҆ гдⷭ҇а.

Є҆ѯапостїла́рїй г҃:

Ꙗ҆́кѡ хрⷭ҇то́съ воскр҃се, никто́же ꙾да не вѣ́рꙋетъ꙾[[꙾не не вѣ́рꙋй꙾]]: ꙗ҆ви́сѧ бо марі́и, пото́мъ же ви́дѣнъ бы́сть на село̀ и҆дꙋ́щима, таи́нникѡмъ же па́ки ꙗ҆ви́сѧ, возлежа́щымъ є҆динона́десѧтимъ, и҆̀хже креща́ти посла́въ, на нб҃са̀ вознесе́сѧ, ѿню́дꙋже и҆ сни́де. ᲂу҆твержда́ѧй проповѣ́данїе мно́жествы зна́менїй.

Бг҃оро́диченъ:

Возсїѧ́вшее со́лнце, ꙗ҆́кѡ ѿ черто́га жени́хъ, и҆з̾ гро́ба дне́сь, и҆ а҆́дъ плѣни́въ, и҆ сме́рть ᲂу҆праздни́въ: тебѐ ро́ждшїѧ мл҃твами, свѣ́тъ на́мъ низпослѝ, свѣ́тъ, просвѣща́ѧ сердца̀ и҆ дꙋ́шы: свѣ́тъ, ходи́ти всѣ́хъ наставлѧ́ѧ на стєзѝ повелѣ́нїй твои́хъ, и҆ на пꙋ́ть ми́ра.

Оу҆́треннѧѧ стїхи́ра, гла́съ г҃:

Магдали́нѣ марі́и, сп҃сово бл҃говѣствꙋ́ющей и҆з̾ ме́ртвыхъ воскрⷭ҇нїе и҆ ꙗ҆вле́нїе: невѣ́рꙋюще же ᲂу҆ч҃нцы, поноси́ми бы́ша ѡ҆ жестосе́рдїи: но зна́меньми воѡрꙋ́жшесѧ и҆ чꙋдесы̀, ко проповѣ́данїю посыла́хꙋсѧ. и҆ ты̀ ᲂу҆́бѡ гдⷭ҇и, къ нача́льномꙋ свѣ́тꙋ возне́слсѧ є҆сѝ ѻ҆ц҃ꙋ̀: ѻ҆ни́ же проповѣ́даша всю́дꙋ сло́во чꙋдесы̀ ᲂу҆вѣрѧ́юще. тѣ́мже просвѣти́вшесѧ тѣ́ми, сла́вимъ твоѐ є҆́же и҆з̾ ме́ртвыхъ воскрⷭ҇нїе, чл҃вѣколю́бче гдⷭ҇и.

Є҆ѯапостїла́рїй д҃:

Добродѣ́тельми блиста́вшесѧ, ви́димъ предстоѧ́щыѧ въ живоно́снѣмъ гро́бѣ мꙋ́жы въ блеща́щихсѧ ри́захъ, мѷроно́сицамъ прекло́ншымъ ли́ца на зе́млю, нб҃сы̀ влⷣчествꙋющагѡ воскрⷭ҇нїю да наꙋчи́мсѧ, и҆ къ живота̀ гро́бꙋ съ петро́мъ притеце́мъ, и҆ содѣ́ѧнномꙋ ᲂу҆ди́вльшесѧ, пребꙋ́демъ хрⷭ҇та̀ ви́дѣти.

Бг҃оро́диченъ:

Ра́доватисѧ вѣща́вый, претвори́лъ є҆сѝ печа́ль прароди́телей гдⷭ҇и, ра́дость вносѧ́й, воста́нїѧ твоегѡ̀ въ мі́рѣ. тогѡ̀ ᲂу҆́бѡ живода́вче, ро́ждшею тѧ̀ свѣ́тъ щедро́тъ твои́хъ сердца̀ просвѣща́ѧ, низпослѝ є҆́же вопи́ти тебѣ̀: чл҃вѣколю́бче, бг҃очеловѣ́че, сла́ва твоемꙋ̀ воста́нїю.

Оу҆́треннѧѧ стїхи́ра, гла́съ д҃:

Оу҆́тро бѣ̀ глꙋбоко̀, и҆ жєны̀ прїидо́ша на гро́бъ тво́й хрⷭ҇тѐ: но тѣ́ло не ѡ҆брѣ́тесѧ жела́емое и҆́ми. тѣ́мже недоꙋмѣва́ющымсѧ, и҆̀же въ ри́захъ блеща́щихсѧ предста́вшїи, глаго́лахꙋ: что̀ жива́гѡ съ ме́ртвыми и҆́щете; воста̀, ꙗ҆́коже предречѐ. что̀ не по́мните глагѡ́лъ є҆гѡ̀, и҆̀мже вѣ́ровавше ви̑дѣннаѧ проповѣ́дахꙋ; но мнѧ́хꙋсѧ лжа̀ бл҃говѣ́щєнїѧ. та́кѡ бы́ша є҆щѐ ко́сни ᲂу҆ч҃нцы̀: но пе́тръ течѐ, и҆ ви́дѣвъ просла́ви твоѧ̑ въ себѣ̀ чꙋдеса̀.

Є҆ѯапостїла́рїй є҃:

Живо́тъ и҆ пꙋ́ть, хрⷭ҇то́съ воста̀ и҆з̾ ме́ртвыхъ, клео́пѣ и҆ лꙋцѣ̀ спꙋтеше́ствова, и҆́маже и҆ позна́сѧ во є҆ммаꙋ́сѣ, преломлѧ́ѧй хлѣ́бъ: и҆́хже дꙋ́шы и҆ сердца̀ горѧ́ща бѧ́хꙋ, є҆гда̀ тѣ́ма глаго́лаше на пꙋтѝ, и҆ писа̑нїѧ ска́зоваше, ꙗ҆̀же претерпѣ̀. съ ни́ми же воста̀, зове́мъ: ꙗ҆ви́сѧ же и҆ петро́ви.

Бг҃оро́диченъ:

Пою̀ безчи́сленнꙋю твою̀ млⷭ҇ть, тво́рче мо́й, ꙗ҆́кѡ себѐ и҆стощи́лъ є҆сѝ, понестѝ и҆ сп҃стѝ человѣ́ческое є҆стество̀ ѡ҆ѕло́бленное: и҆ бг҃ъ сы́й, и҆зво́лилъ є҆сѝ ѿ чⷭ҇тыѧ бг҃оѻтрокови́цы по мнѣ̀ бы́ти, и҆ сни́ти да́же до а҆́да, хотѧ́ ми сп҃сти́сѧ, мл҃твами ро́ждшїѧ тѧ̀, влⷣко всеще́дрый.

Оу҆́треннѧѧ стїхи́ра, гла́съ є҃:

Ѽ премꙋ́дрыхъ сꙋде́бъ твои́хъ хрⷭ҇тѐ, ка́кѡ петрꙋ̀ ᲂу҆́бѡ плащани́цами є҆ди́нѣми да́лъ є҆сѝ разꙋмѣ́ти твоѐ воскрⷭ҇нїе: лꙋцѣ́ же и҆ клео́пѣ. спꙋтеше́ствꙋѧ, бесѣ́довалъ є҆сѝ: и҆ бесѣ́дꙋѧй, не а҆́бїе. себѐ ꙗ҆влѧ́еши. Тѣ́мже и҆ поноси́мь быва́еши, ꙗ҆́кѡ є҆ди́нъ прише́льствꙋѧй во і҆ерⷭ҇ли́мъ, и҆ не причаща́ѧйсѧ въ коне́цъ совѣ́та и҆́хъ. но и҆́же всѧ̑ къ созда́нїѧ по́льзѣ стро́ѧ, и҆ ꙗ҆̀же ѡ҆ тебѣ̀ прⷪ҇ро́чєствїѧ ѿкры́лъ є҆сѝ, и҆ внегда̀ бл҃гослови́ти хлѣ́бъ позна́лсѧ є҆сѝ и҆̀мъ: и҆̀хже и҆ пре́жде тогѡ̀ сердца̀ къ позна́нїю твоемꙋ̀ распала́стасѧ. и҆̀же и҆ ᲂу҆ч҃нкѡ́мъ со́браннымъ, ᲂу҆жѐ ꙗ҆́снѡ проповѣ́даста твоѐ воскрⷭ҇нїе, и҆́мже поми́лꙋй на́съ.

Є҆ѯапостїла́рїй ѕ҃:

Показꙋ́ѧ, ꙗ҆́кѡ чл҃вѣ́къ є҆сѝ сп҃се по сꙋществꙋ̀, посредѣ̀ ста́въ воскр҃съ ѿ гро́ба, и҆ бра́шна сопричасти́лсѧ є҆сѝ, ᲂу҆чи́лъ є҆сѝ кр҃ще́нїю покаѧ́нїѧ: а҆́бїе же къ нбⷭ҇номꙋ возне́слсѧ є҆сѝ ѻ҆ц҃ꙋ̀ и҆ ᲂу҆ч҃нкѡ́мъ ᲂу҆тѣ́шителѧ посла́ти ѡ҆бѣща́лъ є҆сѝ пребж҃е́ственный бг҃очеловѣ́че, сла́ва твоемꙋ̀ воста́нїю.

Бг҃оро́диченъ:

Творе́цъ созда́нїѧ, бг҃ъ всѣ́хъ, пло́ть чл҃вѣ́ческꙋю прїѧ́тъ ѿ пречⷭ҇тыхъ крове́й твои́хъ, всест҃а́ѧ дв҃о, и҆ и҆стлѣ́вшее моѐ всѐ є҆стество̀ новосодѣ́ла, па́ки ꙗ҆́коже пре́жде ржⷭ҇тва̀, ѡ҆ста́вль по ржⷭ҇твѣ̀. тѣ́мже тѧ̀ вѣ́рнѡ всѝ восхвалѧ́емъ, зовꙋ́ще: ра́дꙋйсѧ влⷣчце мі́ра.

Оу҆́треннѧѧ стїхи́ра, гла́съ ѕ҃:

И҆́стинный ми́ръ ты̀ хрⷭ҇тѐ къ человѣ́кѡмъ, бж҃їй ми́ръ тво́й даѧ́й по воста́нїи ᲂу҆ч҃нкѡ́мъ, пристра́шны показа́лъ є҆сѝ ѧ҆̀, мнѧ́щыѧ дꙋ́хъ ви́дѣти: но ᲂу҆ти́шилъ є҆сѝ мѧте́жъ дꙋшѝ и҆́хъ, показа́вый рꙋ́цѣ и҆ но́зѣ твоѝ. ѻ҆ба́че невѣ́рꙋющымъ є҆щѐ, бра́шенъ причаще́нїемъ и҆ ᲂу҆че́нїй воспомина́нїемъ, ѿве́рзлъ є҆сѝ и҆́хъ ᲂу҆́мъ, є҆́же разꙋмѣ́ти писа̑нїѧ: и҆̀мже и҆ ѻ҆ч҃еское ѡ҆бѣтова́нїе ѡ҆бѣща́въ, и҆ бл҃гослови́въ ѧ҆̀, ѿстꙋпи́лъ є҆сѝ на нб҃о. тѣ́мже съ ни́ми покланѧ́емсѧ тебѣ̀, гдⷭ҇и сла́ва тебѣ̀.

Є҆ѯапостїла́рїй з҃:

Ꙗ҆́кѡ взѧ́ша гдⷭ҇а, марі́и ре́кшей, на гро́бъ теча́ста, сі́мѡнъ пе́тръ и҆ дрꙋгі́й таи́нникъ хрⷭ҇то́въ, є҆го́же люблѧ́ше. теча́ста же ѻ҆́ба. и҆ ѡ҆брѣто́ста плащани̑цы є҆ди́ны внꙋ́трь лежа́щѧ: и҆ главны́й же бѣ̀ сꙋда́рь кромѣ̀ и҆́хъ. тѣ́мже па́ки ᲂу҆молча́ста, до́ндеже хрⷭ҇та̀ ви́дѣста.

Бг҃оро́диченъ:

Вє́лїѧ и҆ пресла̑внаѧ менѐ ра́ди содѣ́лалъ є҆сѝ хрⷭ҇тѐ мо́й многомлⷭ҇тиве: ѿ дв҃ы бо ѻ҆трокови́цы роди́лсѧ є҆сѝ несказа́ннѡ, и҆ крⷭ҇тъ под̾ѧ́лъ є҆сѝ, и҆ сме́рть претерпѣ́вый, воскрⷭ҇лъ є҆сѝ во сла́вѣ: и҆ на́ше є҆стество̀ ѿ сме́рти свободи́лъ є҆сѝ. сла́ва хрⷭ҇тѐ сла́вѣ твое́й, сла́ва си́лѣ твое́й.

Оу҆́треннѧѧ стїхи́ра, гла́съ з҃:

Сѐ тьма̀ и҆ ра́нѡ, и҆ что̀ ᲂу҆ гро́ба марі́е стои́ши, мно́гꙋю тьмꙋ̀ и҆мѣ́ющи въ ра́зꙋмѣ, въ не́йже гдѣ̀ положе́нъ бы́сть, вопроша́еши, і҆и҃съ; но ви́ждь сри́щꙋщѧсѧ ᲂу҆ч҃нкѝ, ка́кѡ плащани́цами и҆ сꙋдаре́мъ воскрⷭ҇нїе ѡ҆брѣто́ша, и҆ помѧнꙋ́ша ꙗ҆̀же ѡ҆ си́хъ писа̑нїѧ; съ ни́миже и҆ и҆́миже и҆ мы̀ вѣ́ровавше. воспѣва́емъ тѧ̀ жизнода́вца хрⷭ҇та̀.

Є҆ѯапостїла́рїй и҃:

Два̀ а҆́гг҃ла ви́дѣвши внꙋ́трь гро́ба марі́а, ᲂу҆дивлѧ́шесѧ, и҆ хрⷭ҇та̀ не зна́ющи, ꙗ҆́кѡ вертогра́дарѧ вопроша́ше: гдⷭ҇и, гдѣ̀ положи́лъ є҆сѝ тѣ́ло і҆и҃са моегѡ̀; зва́нїемъ же того̀ позна́вши бы́ти самого̀ сп҃са, слы́ша, не прикаса́йсѧ мнѣ̀: ко ѻ҆ц҃ꙋ̀ ѿхождꙋ̀, рцы̀ бра́тїи мое́й.

Бг҃оро́диченъ:

Ѿ трⷪ҇цы родила̀ є҆сѝ ѻ҆трокови́це є҆ди́наго неизрече́ннѡ во двою̀ є҆стествꙋ̀ сꙋ́ща, и҆ сꙋгꙋ́ба дѣ́йствомъ, и҆ є҆ди́наго ѵ҆поста́сїю. того̀ ᲂу҆̀бо молѝ при́снѡ, ѡ҆ и҆̀же вѣ́рою покланѧ́ющихсѧ, ѿ всѧ́кагѡ навѣ́та вра́жїѧ и҆зба́витисѧ: ꙗ҆́кѡ всѝ къ тебѣ̀ ны́нѣ прибѣга́емъ влⷣчце бцⷣе.

Оу҆́треннѧѧ стїхи́ра, гла́съ и҃:

Марі́ины сле́зы не всꙋ́е пролива́ютсѧ те́плѣ, се́ бо сподо́бисѧ и҆ ᲂу҆ча́щихъ а҆́гг҃лѡвъ, и҆ видѣ́нїѧ самогѡ̀ і҆и҃са: но є҆щѐ земна̑ѧ мꙋ́дрствꙋетъ, ꙗ҆́кѡ жена̀ немощна́ѧ. тѣ́мже и҆ ѿсыла́етсѧ не прикаса́тисѧ хрⷭ҇тꙋ̀: но ѻ҆ба́че проповѣ́дница посыла́етсѧ твои́мъ ᲂу҆ч҃нкѡ́мъ, и҆̀мже бл҃говѣствова́нїе носѧ́щи, є҆́же ко ѻ҆ч҃ескомꙋ жре́бїю восхо́дъ возвѣща́ющи. съ не́юже сподо́би и҆ на́съ ꙗ҆вле́нїѧ твоегѡ̀ влⷣко гдⷭ҇и.

Є҆ѯапостїла́рїй ѳ҃:

Заключє́нымъ влⷣко две́ремъ, ꙗ҆́кѡ вше́лъ є҆сѝ, а҆пⷭ҇лы и҆спо́лнилъ є҆сѝ дх҃а прест҃а́гѡ, ми́рнѡ дꙋ́нꙋвъ: и҆̀мже вѧза́ти же и҆ рѣша́ти грѣхѝ, ре́клъ є҆сѝ. и҆ по ѻ҆смѝ дне́хъ, твоѧ̑ ре́бра ѳѡмѣ̀ показа́лъ є҆сѝ, и҆ рꙋ́цѣ, съ ни́мже вопїе́мъ: гдⷭ҇ь и҆ бг҃ъ ты̀ є҆сѝ.

Бг҃оро́диченъ:

Твоего̀ сн҃а ꙗ҆́кѡ ви́дѣла є҆сѝ ѿ гро́ба воскⷭ҇рша тридне́внаго, бг҃оневѣ́стнаѧ, прест҃а́ѧ дв҃о, всю̀ ско́рбь ѿложи́ла є҆сѝ: ю҆́же под̾ѧ́ла є҆сѝ ꙗ҆́кѡ мт҃и, є҆гда̀ ᲂу҆зрѣ́ла є҆сѝ стра́ждꙋща, и҆ ра́дости и҆спо́лншисѧ со ᲂу҆ч҃нкѝ є҆гѡ̀, почита́ющи того̀ пое́ши. тѣ́мже и҆̀же бцⷣꙋ тѧ̀ ны́нѣ и҆сповѣ́дающихъ сп҃са́й.

Оу҆́треннѧѧ стїхи́ра, гла́съ є҃:

Ꙗ҆́кѡ въ послѣ́днѧѧ лѣ́та, сꙋ́щꙋ по́здѣ ѿ сꙋббѡ́тъ предста́лъ є҆сѝ дрꙋгѡ́мъ хрⷭ҇тѐ: и҆ чꙋдесе́мъ чꙋ́до и҆звѣствꙋ́еши, заключє́ннымъ вхо́дѡмъ две́рнымъ, є҆́же и҆з̾ ме́ртвыхъ твоѐ воскрⷭ҇нїе. но и҆спо́лнилъ є҆сѝ ра́дости ᲂу҆ч҃нкѝ, и҆ дх҃а ст҃а́го препо́далъ є҆сѝ и҆̀мъ: и҆ вла́сть по́далъ є҆сѝ ѡ҆ставле́нїѧ грѣхѡ́въ, и҆ ѳѡмꙋ̀ не ѡ҆ста́вилъ є҆сѝ въ невѣ́рствїѧ погрꙋжа́тисѧ бꙋ́ри. тѣ́мже пода́ждь и҆ на́мъ ра́зꙋмъ и҆́стинный, и҆ ѡ҆ставле́нїе прегрѣше́нїй бл҃гоꙋтро́бне гдⷭ҇и.

Є҆ѯапостїла́рїй і҃:

Тїверїа́дское мо́ре съ дѣтьмѝ зеведе́євыми, наѳана́ила съ петро́мъ же, и҆ съ дрꙋги́ма двѣма̀ дре́вле, и҆ ѳѡмꙋ̀ и҆мѧ́ше на ло́вѣ: и҆̀же хрⷭ҇то́вымъ повелѣ́нїемъ ѡ҆деснꙋ́ю вве́ргше, мно́жество и҆звлеко́ша ры́бъ, є҆го́же пе́тръ позна́въ, къ немꙋ̀ бродѧ́ше. и҆̀мже тре́тїе ꙗ҆вле́йсѧ, и҆ хлѣ́бъ показа̀, и҆ ры́бꙋ на ᲂу҆́глехъ.

Бг҃оро́диченъ:

Воскрⷭ҇шаго гдⷭ҇а тридне́вна ѿ гро́ба, дв҃о молѝ, ѡ҆ воспѣва́ющихъ тѧ̀, и҆ любо́вїю блажа́щихъ: тебе́ бо и҆́мамы всѝ прибѣ́жище сп҃си́тельное, и҆ хода́таицꙋ къ немꙋ̀. наслѣ́дїе бо твоѐ, и҆ рабѝ є҆смы̀ бцⷣе, и҆ къ твоемꙋ̀ застꙋпле́нїю всѝ взира́емъ.

Оу҆́треннѧѧ стїхи́ра, гла́съ ѕ҃:

По є҆́же во а҆́дъ соше́ствїи, и҆ є҆́же и҆з̾ ме́ртвыхъ воскрⷭ҇нїи, скорбѧ́ще, ꙗ҆́коже досто́ѧше, ѡ҆ разлꙋче́нїи твое́мъ хрⷭ҇тѐ ᲂу҆ч҃нцы̀, на дѣ́ланїе ѡ҆брати́шасѧ, и҆ па́ки кораблѝ и҆ мрє́жи, и҆ ло́ва нигдѣ́же: но ты̀ сп҃се ꙗ҆ви́всѧ ꙗ҆́кѡ влⷣка всѣ́хъ, ѡ҆деснꙋ́ю мрє́жи повелѣва́еши воврещѝ, и҆ бы́сть сло́во дѣ́ло вско́рѣ, и҆ мно́жество ры́бъ мно́гое, и҆ ве́черѧ стра́ннаѧ гото́ва на землѝ, є҆ѧ́же причасти́вшымсѧ тогда̀ твои̑мъ ᲂу҆ч҃нкѡ́мъ, и҆ на́съ ны́нѣ мы́сленнѣ сподо́би наслади́тисѧ, чл҃вѣколю́бче гдⷭ҇и

Є҆ѯапостїла́рїй а҃і:

По бж҃е́ственнѣмъ воста́нїи, три́жды петра̀, лю́биши ли мѧ̀, вопроша́ѧй гдⷭ҇ь, свои́хъ ѻ҆ве́цъ предлага́етъ пастыренача́льника, и҆́же ви́дѧ, є҆го́же люблѧ́ше і҆и҃съ, во слѣ́дъ грѧдꙋ́ща, вопроша́ше влⷣкꙋ: се́й же что̀; а҆́ще хощꙋ̀, речѐ пребыва́ти семꙋ̀, до́ндеже и҆ па́ки прїидꙋ̀, что̀ къ тебѣ̀ дрꙋ́же пе́тре;

Бг҃оро́диченъ:

Ѽ стра́шное та́инство! ѽ пресла́вное чꙋ́до! сме́ртїю сме́рть всеконе́чнѣ погꙋбле́на бы́сть. кто̀ ᲂу҆́бѡ не воспое́тъ; и҆ кто̀ не поклони́тсѧ твоемꙋ̀ воскрⷭ҇нїю, сло́ве, и҆ чи́стѡ ро́ждшей тѧ̀ пло́тїю бцⷣѣ; є҆ѧ́же мл҃твами, всѣ́хъ гее́нны и҆зба́ви.

Оу҆́треннѧѧ стїхи́ра, гла́съ и҃:

Ꙗ҆влѧ́ѧ себѐ ᲂу҆ч҃нкѡ́мъ твои̑мъ сп҃се по воскрⷭ҇нїи, сі́мѡнꙋ да́лъ є҆сѝ ѻ҆ве́цъ па́ствꙋ, за любвѐ воздаѧ́нїе, ꙗ҆̀же ѡ҆ па́ствѣ попече́нїѧ и҆ща̀. Тѣ́мже и҆ глаго́лалъ є҆сѝ: а҆́ще лю́биши мѧ̀ пе́тре, пасѝ а҆́гнцы моѧ̑, пасѝ ѻ҆́вцы моѧ̑. ѻ҆́нъ же а҆́бїе показꙋ́ѧ дрꙋголю́бное, ѡ҆ дрꙋзѣ́мъ ᲂу҆ч҃нцѣ̀ вопроша́ше: и҆́хже мл҃твами хрⷭ҇тѐ, ста́до твоѐ сохранѧ́й ѿ волкѡ́въ гꙋбѧ́щихъ є҆̀.