[глⷡ҇а ѕ҃і] Ѡ҆ свѣти́льнахъ на ᲂу҆́трени. По ѳ҃-й пѣ́сни, по́слѣ досто́йна, ка́кѡ глаго́лютсѧ въ седми́цѣ, кромѣ̀ недѣ́ли

Свѣти́ленъ ѻ҆ктѡ́иха, Сла́ва, и҆ ны́нѣ, бг҃оро́диченъ є҆гѡ̀.

А҆́ще ли бꙋ́детъ въ мине́и свѣти́ленъ ст҃а́гѡ, рцы̀ є҆го̀ на Сла́вꙋ, по́слѣ дневна́гѡ свѣти́льна: И҆ ны́нѣ, бг҃оро́диченъ є҆гѡ̀.

А҆́ще ли бꙋ́детъ въ мине́и два̀ ст҃ы́хъ, и҆ свѣти́льна два̀: И҆ глаго́лемъ пе́рвый ѻ҆ктѡ́иха, та́же ст҃а́гѡ:

Сла́ва, дрꙋга́гѡ ст҃а́гѡ.

И҆ ны́нѣ, бг҃оро́диченъ є҆гѡ̀.

А҆́ще ли среда̀, и҆ пѧто́къ. И҆ ны́нѣ, крⷭ҇тобг҃оро́диченъ ѻ҆ктѡ́иха.

Въ сꙋббѡ́тꙋ же а҆́ще и҆́мать рѧдовы́й ст҃ы́й, по ѳ҃-й пѣ́сни свѣти́ленъ глаго́лемъ ст҃а́гѡ пре́жде мине́и:

Та́же, Сла́ва, ѻ҆ктѡ́иха:

И҆ ны́нѣ, бг҃оро́диченъ є҆гѡ̀.

Си́це глаго́лютсѧ свѣти́льны, є҆гда̀ ѻ҆ктѡ́ихъ съ мине́ею пое́тсѧ.