Понедельник

поста́вим стихо́в 10 и глаго́лем стихи́ры умили́тельныя осмогла́сника покая́нны 4 и трио́ди подо́бны, господи́на Ио́сифа, гла́с 4. Подо́бен: Да́л еси́ зна́мение.

Да́ждь ми́ умиле́ние, и злы́х отчужде́ние, и соверше́нное исправле́ние, в стра́сти теле́сней ны́не погруже́ному и отдале́ному от Тебе́, Бо́же Всецарю́, и ниотку́дуже упова́ния иму́щу, и спаси́ мя́ блу́днаго за мно́гую бла́гость, Иису́се Всеси́льне, Спа́се ду́ш на́ших.

Моисе́й ди́вный, посто́м очи́щся, ви́де Жела́емаго. Сему́ у́бо поревнова́вши, смире́нная душе́ моя́, потщи́ся в де́нь воздержа́ния от злы́х очи́ститися, я́ко да Го́спода, даю́щаго тебе́ оставле́ние, и очище́ние, и избавле́ние, у́зриши су́щаго Блага́го и Человеколюби́ваго.

Други́й, ки́р Фео́дора, гла́с 6. Подо́бен: Арха́нгельски.

Посто́в ны́не двоеседми́чие све́тло начне́м, соверша́юще де́нь от дне́, бра́тие, колесни́цу о́гненну соде́лавше на́м, я́коже Илия́ Фесви́тянин, четы́ре вели́кия доброде́тели, у́м возвы́сим безстра́стием, пло́ть вооружи́м чистото́ю, теку́ще и побежда́юще врага́.

И мине́и 3. Сла́ва, и ны́не, Богоро́дичен. Вхо́д. Све́те Ти́хий...

Проки́мен, гла́с 8: Да́л еси́ достоя́ние боя́щимся Тебе́, Го́споди. Сти́х 1: От коне́ц земли́ к Тебе́ воззва́х. Сти́х 2: Покры́юся в кро́ве кри́л Твои́х. Сти́х 3: Та́ко воспою́ и́мени Твоему́ во ве́ки. И па́ки: Да́л еси́ достоя́ние боя́щимся...

[Зри́:] Подоба́ет ве́дати, я́ко сия́ два́ вели́кия проки́мены, е́же е́сть: Не отврати́ лица́ Твоего́... и Да́л еси́ достоя́ние.., со стиха́ми и́х, еди́н по еди́ному пое́тся чрез ве́сь святы́й по́ст; начина́ем от неде́ли сы́рныя, до неде́ли пя́тыя поста́. И от Сподо́би Го́споди... начина́ются покло́ны.

На стихо́вне самогла́сен дне́, два́жды, гла́с 8:

Прииди́те, очи́стим себе́ ми́лостынями и щедро́тами убо́гих, не трубя́ще, ни явля́юще на́ше благотворе́ние, да не уве́сть шу́ица десни́цы де́ло, да не расточи́т тщесла́вие пло́д ми́лостыни, но в та́йне та́йная Ве́дущему воззове́м: О́тче, оста́ви прегреше́ния на́ша, я́ко Человеколю́бец.

Му́ченичен: Му́ченицы Госпо́дни, вся́ко ме́сто освяща́ете, и вся́к неду́г врачу́ете, и ны́не моли́те изба́витися се́тей вра́жиих душа́м на́шим, мо́лимся.

Сла́ва, и ны́не, Богоро́дичен:

Небе́сная пою́т Тя́, Обра́дованная Ма́ти Безневе́стная, и мы́ славосло́вим неизсле́дованное Твое́ Рождество́, Богоро́дице, моли́ спасти́ся душа́м на́шим.

И про́чее после́дование, я́ко обы́чно.

Пое́м кано́н святы́м проро́ком, его́же краегране́сие: Ли́к да пле́щет проро́ков благото́чно. Феофа́ново, гла́с 5.

Пе́снь 1.

Ирмо́с: Коня́ и вса́дника в мо́ре Чермно́е:

Благода́ть мне́ да́ти Боже́ственнаго Ду́ха, честну́ю ва́шу па́мять пою́щу, Всевино́внаго Христа́ умоли́те, и согреше́ний оставле́ние, я́ко проро́цы Боже́ственныя благода́ти.

Сосу́ди Богодухнове́нных слове́с согла́сныя и зерца́ла Боже́ственнаго блиста́ния, явле́ние Боже́ственно прие́млющия, проро́ки вся́ богому́дрыя воспои́м.

Глаго́лы зако́нныя на горе́ Сина́йстей Моисе́й Богови́дец от Бо́га прие́мь, лице́м просвети́ся Боговиде́ния, благода́тию зна́менуемь чу́дный.

Сла́ва: Ту́чами богоразу́мия мо́ре язы́к многобо́жия благода́тию [проро́честии] о́блацы Бо́жии с шу́мом разори́ша, Единонача́льную Си́лу богому́дренно пропове́дающе.

И ны́не, Богоро́дичен: Трубы́ богогла́сныя, Ма́терь Тя́ Бо́жию, напосле́док веко́в ро́ждшую, Пречи́стая, проро́цы веща́ют, научи́вшеся свы́ше, Богоро́дице, Твои́м та́йнам.

Пе́снь 3.

Ирмо́с: Водрузи́вый на ничесо́мже:

Цевни́цы духо́вныя, бряца́лом ударя́емы, проро́цы вси́, подо́бный гла́с Твоего́ позна́ния, Христе́, все́м богоглася́ще боголюбе́зным воспева́ют, свы́ше богатя́ще сия́ние.

Ору́жия востаю́щая, повеле́нием Твои́м, проро́цы вси́ многомяте́жную ле́сть пресеца́ют, Христе́, Боже́ственною Твое́ю си́лою благоче́стно оде́явшеся и непостижи́мою держа́вою Твое́ю.

Сла́ва: Боже́ственныя и мы́сленныя ча́ши ра́зума, проро́цы всю́ зе́млю упои́ша, прообража́юще я́ве Твоего́ смотре́ния неудо́бное та́инство, и́ный и́нако Тебе́ пропове́дающе.

И ны́не, Богоро́дичен: Дре́вле повеле́нное, Де́во, та́инство и пре́жде веко́в предразумева́емое, вся́ ве́дущим Бо́гом, в после́днее вре́мя во чре́ве Твое́м, Пренепоро́чная, коне́ц прие́мшее яви́ся.

Пе́снь 4.

Ирмо́с: Боже́ственное Твое́:

Ду́хом, проро́цы, веща́юще, и́стины неле́стнии свети́льницы яви́стеся, прему́дрии, просвеща́юще вся́ язы́ки жития́ све́тлостию.

Се́ ны́не сбытия́ зря́ще рече́нных от ва́с, проро́цы боже́ственнии, сла́вим ва́ми Пропове́даннаго и де́лом прорече́ния Испо́лншаго.

Сла́ва: Прему́дростию, боже́ственнии, просвеща́еми, язы́ков приведе́ние Бо́жиею благода́тию проразуме́сте, Изра́илево же паде́ние и все́х благи́х запусте́ние.

И ны́не, Богоро́дичен: Бо́га воплоще́нна зря́ще, на боже́ственней стра́жи ста́вше, Сего́, всебога́тии, сподо́бистеся ви́дети, от горы́ Де́выя приходя́ща.

Пе́снь 5.

Ирмо́с: Одея́йся све́том:

У́тренева ду́х тво́й к Седя́щему на престо́ле превознесе́нне, Иса́ие прему́дре, и с вы́шними ли́ки воспе́л еси́.

Язы́ки Ду́хом дви́жуще, святи́и, Сего́ словеса́ вселе́нней благопостоя́нно пропове́дующе, богоразу́мия зарю́ уясни́сте.

Сла́ва: Я́коже жили́ща Бо́жия бы́вше, вы́ше естества́ соверша́юща, Сего́ в себе́ име́сте, Ему́же ны́не предстоя́ще, о на́с моли́теся.

И ны́не, Богоро́дичен: У́м Сво́й прему́дрый и дре́вний Сове́т ва́м, проро́цы и́стины, Бо́г сказа́л е́сть, от Де́вы рожде́йся, я́ко еди́н Милосе́рд.

Пе́снь 6.

Ирмо́с: Неи́стовствующееся бу́рею:

Житие́ боже́ственное, благоче́стия сло́во и́стинное стяжа́вше, пропове́дницы бы́сте всеи́стиннии Боже́ственнаго воплоще́ния, святи́и.

Си́лу боже́ственную иму́ще, царе́й неудержа́нное стремле́ние и звере́й уста́ загради́сте, из чре́ва ки́това це́лы спасо́стеся.

Сла́ва: Из ложе́сн, святи́и, ми́ру сия́юще всему́, доброде́тели учи́телие бы́сте и насади́телие, проро́цы вси́ пребога́тии.

И ны́не, Богоро́дичен: Боголюби́вая иму́ще помышле́ния, Рождество́ Твое́ проро́цы, Влады́чице, провозвести́ша многообра́зными начерта́ньми и о́бразы, Чи́стая.

Го́споди, поми́луй, три́жды. Сла́ва, и ны́не.

Седа́лен, гла́с 2, самогла́сен:

Ли́к проро́ческий с Моисе́ом и Ааро́ном весе́лием ра́дуется дне́сь, я́ко коне́ц проро́чества наводя́й: сия́ет Кре́ст, и́мже на́с спа́сл еси́. Те́х моли́твами, Христе́ Бо́же, поми́луй на́с.

Пе́снь 7.

Ирмо́с: Превозноси́мый отце́в:

Неизче́тная си́ла Госпо́дня веле́ния в ро́ве львы́ обузда́, вопию́щу проро́ку: Бо́же, благослове́н еси́.

Тро́ицы равночи́сленнии честны́я су́ще, пла́мень угаси́ша всему́дрии о́троцы Твои́, согла́сно пою́ще: Бо́же, благослове́н еси́.

Сла́ва: Я́ко свети́ла сия́юще, доброде́тельными цве́ты зе́млю онебеси́вше, Авраа́мстии о́трасли, проро́цы, пою́ще: Бо́же, благослове́н еси́.

И ны́не, Богоро́дичен: Зако́ны естества́ превозшла́ еси́, Влады́чице, ро́ждши Го́спода, зако́ном облада́юща, Ему́же вси́ пое́м: Бо́же, благослове́н еси́.

Пе́снь 8.

Ирмо́с: Тебе́, Вседе́телю:

Вну́трь сла́дости ра́йския су́ще, проро́цы богоприя́тнии, ли́к соста́вльше, все́м ве́рою ва́с восхваля́ющим, изба́витися от бе́д Христа́ умоли́те.

Пе́ние, ве́рнии, богогла́сным все́м проро́ком принесе́м, ли́к испле́тше вси́, си́х словесы́ утверди́вшеся, да моли́твами и́х оправди́мся.

Сла́ва: Сосу́ди мы́сленнии благоуха́ния вси́, проро́цы, я́ве Ду́ху бы́сте, вся́ язы́ки к ра́зуму наставля́юще и превознося́ще Христа́ во ве́ки.

И ны́не, Богоро́дичен: От Отца́ Безнача́льную Зарю́, Де́во, родила́ еси́ пло́ти прия́тием, те́мже, – ра́дуйся! – непреста́нно Тебе́ зове́м и превозно́сим, Чи́стая, во ве́ки.

Пе́снь 9.

Ирмо́с: Иса́ие, лику́й, [Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем].

Единому́дренно прииди́те ны́не, проро́ки вся́ Бо́жия всечестны́я, чуде́с соверши́тели преесте́ственных, ве́твь честну́ю, избра́ние Иа́ковле, я́ко пропове́давшия Христа́, восхва́лим.

Ра́дости всеми́рныя провозве́стницы, пропове́дницы я́ве и ра́зума сокро́вища, све́тлии Боже́ственнии прему́дрости бы́сте всеи́стинныя, уста́ чи́стая, язы́цы Ду́ха Свята́го, всечестни́и.

Сла́ва: Я́ко проро́цы прему́дрии, все́х Созда́теля и Бо́га я́ко си́льна зря́ще, и от Него́ све́том освеща́еми, ва́шу па́мять благоче́стно ве́рою чту́щих от бе́д спаса́йте.

И ны́не, Богоро́дичен: Спасе́ния Хода́таица челове́ком была́ еси́, Чи́стая, ро́ждши пло́тски Соде́теля и Го́спода, Тебе́ ра́ди все́м очище́ние, велича́ющим Тя́, Де́во, подаю́щаго.

Та́же стихи́ры проро́ком, гла́с 1. Подо́бен: Прехва́льнии.

Проро́цы пресла́внии, вы́ царя́ обличи́сте, лю́дем же де́рзостным сопроти́вистеся, в Тро́ице Еди́наго Бо́га пропове́дающе, и те́пле отгоня́юще от земли́ ле́сть многобо́жную; и ны́не моли́теся дарова́ти душа́м на́шим ми́р и ве́лию ми́лость.

Проро́цы пресла́внии, вы́ благоче́стно заблужда́юще в пусты́нях и гора́х, и озлобля́еми в гла́де и жа́жде, я́ко Бо́жии уго́дницы, со Христо́м на небесе́х водворя́етеся; и ны́не моли́теся дарова́ти душа́м на́шим ми́р и ве́лию ми́лость.

Проро́цы прехва́льнии, вы́ терпели́вно претре́ни, ка́мением же побива́еми и умерщвля́еми ме́чным усече́нием, благоче́стия ра́ди све́тли страда́нми бы́сте; и ны́не моли́теся дарова́ти душа́м на́шим ми́р и ве́лию ми́лость.

Сла́ва, и ны́не, Богоро́дичен:

Вои́стинну па́че ума́, Чу́дная Богоневе́сто, вели́чия Рождества́ Твоего́, я́же пропове́даша проро́цы вси́, всепресла́вное Зача́тие и Рождество́, Всепе́тая, недомы́сленное и несказа́нное, и́мже ми́р спасе́ся.

По 1-м стихосло́вии седа́льны умили́тельныя осмогла́сника: и Богоро́дичен. По 2-м же стихосло́вии седа́лен, гла́с 4.

Подо́бен: Удиви́ся Ио́сиф:

Преступле́ния плодо́м умерщвле́на душе́ю оживотвори́ Христе́ посто́м и́стинным и покая́нием, молю́ся я́ко ще́др: и да́ждь ми́ в путе́х при́сно ходи́ти пра́вых и до́брых, честны́х Твои́х за́поведей, я́ко да Боже́ственныя сла́вы Твоея́ улучи́в, со все́ми лю́бящими Тя́ славосло́влю Твою́ о все́х Иису́се бла́гость.

Сла́ва, то́йже.

И ны́не, Богоро́дичен. Подо́бен:

Треволне́ньми страсте́й безсо́вестный а́з обурева́емь Чи́стая, призыва́ю Тя́ те́пле, не пре́зри мя́ окая́ннаго поги́бнути, бе́здну ми́лости ро́ждшая: ра́зве бо Тебе́ наде́жды не стяжа́х. Да не у́бо враго́м пора́дование и сме́х упова́яй на Тя́ явлю́ся: и́бо мо́жеши ели́ка и хо́щеши, я́ко Ма́ти су́щи все́х Бо́га.

По 3-м стихосло́вии седа́лен, гла́с 6.

Подо́бен: Го́споди поми́луй:

Го́споди напра́ви ны́ по́ст повторя́ющыя, освяще́ние на́м осия́й и просвеще́ние оправда́ний Твои́х: и сподо́би на́с приноси́ти Тебе́ благоприя́тну моли́тву, коле́на приклоня́ющих. Ты́ бо еси́ Оте́ц на́ш, и мы́ сы́нове Твои́, и Тя́ со стра́хом пое́м, и и́мя Твое́ призыва́ем.

Сла́ва, то́йже.

И ны́не, Богоро́дичен: Нача́ло спасе́ния Гаврии́лово провеща́ние к Де́ве бы́сть. Слы́ша бо, е́же ра́дуйся, не отбеже́ целова́ния, не усумне́ся я́ко Са́рра в се́ни, но си́це глаго́лаше: се́ раба́ Госпо́дня, бу́ди Мне́ по глаго́лу твоему́.

Кано́н мине́и, и трипе́снец господи́на Ио́сифа. И стихосло́вятся пе́сни. Гла́с 4.

Пе́снь 1.

Ирмо́с: Триста́ты кре́пкия:

Еди́не благи́й, исто́чниче ми́лости, А́гнче Бо́жий, взе́мляй я́ко Бо́г ми́ра согреше́ния, спаси́ мя́ грехо́в треволне́нием погружа́ема, к приста́нищу покая́ния наставля́я мя́.

По́ст чи́стый, удале́ние греха́, отчужде́ние страсте́й, любо́вь к Бо́гу, моли́твы прилежа́ние, сле́зы со умиле́нием, и о убо́гих попече́ние, Христо́с в писа́ниих завеща́.

Уя́звлена душе́ю, грехо́вным ору́жием, и ура́нена су́ща мно́гими злы́ми, Врачу́ ду́ш на́ших, исцели́ я́ко Благоде́тель, наложи́в мне́ лека́рства му́дрых за́поведей Твои́х, Человеколю́бче.

Богоро́дичен: Нескве́рная Ски́ние, Пресвята́я Де́во, оскверне́ннаго мя́ лю́тых страсте́й наведе́ньми, исто́чником ми́лости Твоея́ очи́сти, и да́ждь ми́ умиле́ния ту́чы Влады́чице, греха́ глубину́ потребля́ющи.

И́ный, господи́на Фео́дора, гла́с 6.

Ирмо́с: Помо́щник и покрови́тель бы́сть мне́:

Я́ко попра́здничную ра́дость, и втору́ю седми́цу светотво́рных посто́в бра́тие прии́мше, любо́вию воспои́м Христа́, Боже́ственно веселя́щеся.

Умиле́ния вре́мя по́стное ны́не обре́тше, воспла́чим зе́льно и воздохне́м, и воздежи́м ру́це ко Еди́ному Изба́вителю: е́же спасти́ ду́шы на́шя.

Тро́ичен: Триипоста́сная Еди́нице, нача́льнейшая Госпоже́ все́х, совершеннонача́льная, пренача́льная, Сама́ на́с спаси́, О́тче, и Сы́не, и Ду́ше Пресвяты́й.

Богоро́дичен: Кто́ роди́ Сы́на невсе́яна О́тчим зако́ном; Сего́ у́бо ражда́ет Оте́ц без ма́тере: пресла́вное чу́до, Ты́ бо родила́ еси́ чи́стая, Бо́га вку́пе и Челове́ка.

Сла́ва Тебе́ Бо́же на́ш, сла́ва Тебе́.

Ка́ко понесу́ гне́в Тво́й Христе́ мо́й, егда́ на су́д прии́деши; ко́е же обре́т сло́во да́м та́мо, не соде́яв, ни сотвори́в Твою́ во́лю Христе́: те́мже пре́жде конца́ осла́би ми́.

Ирмо́с: Помо́щник и покрови́тель бы́сть мне́ во спасе́ние, се́й мо́й Бо́г, и просла́влю Его́, Бо́г отца́ моего́, и вознесу́ Его́: сла́вно бо просла́вися.

Пе́снь 8.

Ирмо́с: Изба́вителю все́х:

Мимоходя́ жития́ непостоя́нное, в разбо́йническия по́мыслы впадо́х, и уя́звлен возсмерде́хся: Врачу́ неду́гующих, да́ждь ми́ ру́ку, святы́х Твои́х все́х мольба́ми.

Лю́таго греха́ бу́ря мое́ помышле́ние смуща́ет, я́коже Петра́ спаси́ мя́ Иису́се, пою́ща: вся́ дела́ благослови́те, по́йте Го́спода.

Воздержа́нием стра́сти умертви́м, поще́нием ду́х впери́м к небеси́, и воззове́м умиле́нием се́рдца: согреши́хом Ти́ Бо́же, я́ко ще́дрый прости́.

Богоро́дичен: Во чре́во Твое́ всели́вся Вы́шний, небе́с ши́ршую Тя́ показа́, и предста́тельство необори́мое вопию́щих Де́во: вся́ дела́ благослови́те, по́йте Го́спода.

И́ный. Ирмо́с: Его́же во́инства:

Страсте́й мучи́тельством Го́споди, не порабоще́ну ду́шу мою́ покажи́: да свобо́дно творя́ во́лю Твою́ ра́дуюся, и сла́влю держа́ву Твою́ во ве́ки.

Иса́вово невоздержа́ние возненави́ждь душе́ моя́, и Иа́ковлим ревну́й до́брым дело́м, обольсти́ Велиа́ра воздержа́нием, обогати́ся Боже́ственными, и воспо́й во ве́ки.

Благослови́м Отца́, и Сы́на, и Свята́го Ду́ха, Го́спода.

Тро́ичен: Еди́наго Бо́га по существу́ почита́ю, Три́ Ипоста́си пою́ определи́тельно, и́ныя, но не и́накия. Поне́же Божество́ Еди́но, и Еди́на в Трие́х держа́ва: и́бо Оте́ц, Сы́н и Ду́х.

Богоро́дичен: Из све́тлыя проше́д утро́бы Твоея́, я́ко Жени́х от черто́га, возсия́ Христо́с, све́т су́щым во тьме́ вели́кий: и́бо Пра́вды Со́лнце облиста́в просвети́ чи́стая ми́р.

Сла́ва Тебе́ Бо́же на́ш, сла́ва Тебе́.

Во́ду пия́й никто́же обезу́мися, яви́ся же Но́е на́г вино́м иску́шься: се́мена же зло́бы Ло́т отсю́ду ражда́ет. Бе́гай о душе́ моя́ си́х подража́ния, Христа́ пою́щи.

Ирмо́с: Его́же во́инства Небе́сная сла́вят, и трепе́щут Херуви́ми и Серафи́ми, вся́ко дыха́ние и тва́рь, по́йте, благослови́те и превозноси́те во вся́ ве́ки.

Пе́снь 9.

Ирмо́с: Е́ва у́бо неду́гом:

Пости́мся от страсте́й гне́ва, наслади́мся любве́ нело́жныя, напита́им убо́гия хле́бом, боже́ственною пита́еми благода́тию, и слеза́ми сле́зы угаси́м бу́дущаго изрече́ния.

Окая́нная душе́ воздохни́, се́туй, покая́ния о́бразы покажи́, ны́не при две́рех де́нь, судя́й нелицеме́рно седи́т, кому́ждо отдава́я досто́йная соде́янных, я́коже пи́сано е́сть.

Не стяжа́х дея́ний благи́х, оскверни́х ри́зу, ю́же прия́х, боже́ственнаго креще́ния одея́ние: во тьме́ неве́дения хожду́: све́том мя́ лица́ Твоего́ Го́споди, отча́яна ны́не испра́ви.

Богоро́дичен: Мари́е Госпоже́ вся́ческих, вся́ким мя́ грехо́м порабоще́на, Ты́ свободи́ Де́во, Свободи́теля ду́ш на́ших поро́ждшая: ты́ бо па́че сло́ва родила́ еси́ Существи́тельную Бла́гость.

И́ный. Ирмо́с: Безсе́меннаго зача́тия:

Ны́не злопостра́ждим я́ко во́ини Христо́вы: ели́ко бо ели́ко вре́мя мимохо́дит, венцы́ плету́тся подвиза́ющымся, я́же возда́ст Христо́с, егда́ прии́дет со сла́вою а́нгельскою суди́ти все́й земли́.

Ве́сь уязви́хся, ве́сь, Христе́ мо́й, острупи́хся, исцели́ моя́ гно́йныя я́звы, страстна́я угрызе́ния су́щая от греха́, да услы́шу, я́ко прокаже́нный, гла́с Тво́й святы́й: я́ко хощу́, очи́стися.

Тро́ичен: Еди́наго Единороди́телю, Единоро́днаго Сы́на О́тче: и Еди́не Еди́наго Све́те, Све́та сия́ние: и Еди́ный Еди́не Еди́наго Бо́га, Святы́й Ду́ше, Го́спода Госпо́дь вои́стинну сы́й: о Тро́ице Еди́нице Свята́я, спаси́ мя́ богосло́вяща Тя́.

Богоро́дичен: Чу́до рождества́ твоего́ ужаса́ет мя́, всенепоро́чная, ка́ко зачина́еши безсе́менно непостижи́маго; рцы́, ка́ко де́вствуеши, ро́ждши я́ко Ма́ти; е́же па́че естества́ ве́рою прие́мь, рожде́нному поклони́ся, ели́ка хо́щет бо, и мо́жет.

Сла́ва Тебе́ Бо́же на́ш, сла́ва Тебе́.

По́ст Моисе́а Богови́дца соде́ла, Илию́ дре́вле пла́меннаго воза́тая, Па́вла же, душе́ моя́, стра́шнаго неботе́чника. Те́мже пости́мся от зло́б, и на высоту́ безстра́стия и мы́ восхи́тимся.

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо рожде́ние обновля́ет естества́. Те́мже Тя́ вси́ ро́ди, я́ко Богоневе́стную Ма́терь, правосла́вно велича́ем.

Свети́лен гла́са.

На стихо́вне стихи́ра самогла́сна, гла́с 5:

Ди́вное ору́жие, моли́тва и по́ст: се́й Моисе́а законописа́теля показа́, и Илию́ в же́ртвах ревни́теля. В то́м пребыва́юще ве́рнии, Спа́су возопии́м: Тебе́ Еди́ному согреши́хом, поми́луй на́с. [Два́жды.]

Му́ченичен: Благослове́нное во́инство Царя́ Небе́снаго: А́ще бо и земноро́днии бя́ху страстоте́рпцы, но А́нгельский са́н потща́шася дости́гнути, о телесе́х небре́гше, и страстьми́ безпло́тных удосто́ившеся че́сти: моли́твами и́х, Го́споди, спаси́ ду́шы на́шя.

Сла́ва, и ны́не, Богоро́дичен. Тебе́ мо́лимся, я́ко Бо́жии Ма́тери, благослове́нная, моли́ о спасе́нии ду́ш на́ших.

На 6-м часе́, тропа́рь проро́чества, гла́с 5:

Созда́вый наедине́ сердца́ на́ша, помяни́, я́ко пе́рсть есмы́, не осуди́ на́с в преиспо́дних земли́ безгре́шне.

Проки́мен, псало́м 21, гла́с 6: Боя́щиися Го́спода восхвали́те Его́. Сти́х: Бо́же, Бо́же Мо́й, вонми́ Ми, вску́ю оста́вил Мя́ еси́;

Проро́чества Иса́иина чте́ние. [Ис. 4:1–6, 5:1–7.]

Та́ко глаго́лет Госпо́дь. В де́нь о́ный возсия́ет Бо́г в сове́те со сла́вою на земли́, е́же вознести́ и просла́вити оста́нок Изра́иля. И бу́дет оста́нок в Сио́не, и оста́нок во Иерусали́ме, свя́ти нареку́тся вси́, напи́саннии в жи́знь во Иерусали́ме. Я́ко отмы́ет Госпо́дь скве́рну сыно́в и дще́рей сио́нских, и кро́вь иерусали́мску очи́стит от среды́ и́х ду́хом суда́, и ду́хом зно́я. И прии́дет Госпо́дь, и бу́дет все́ ме́сто горы́ Сио́ни, и вся́ я́же о́крест ея́ осени́т о́блак во дни́, и я́ко ды́ма и све́та о́гненна горя́ща в нощи́, все́ю сла́вою покры́ется: И бу́дет в се́нь от зно́я, и в покро́в и в сокрове́ние от же́стости и дождя́. Воспою́ ны́не возлю́бленному пе́снь, возлю́бленнаго Моего́ виногра́ду Моему́: виногра́д бы́сть возлю́бленному в ро́зе, на ме́сте ту́чне. И огражде́нием огради́х, и окопа́х, и насади́х ло́зу избра́нну, и созда́х сто́лп посреде́ его́, и предточи́лие ископа́х в не́м: и жда́х, да сотвори́т гро́здие, и сотвори́ те́рние, и ны́не живу́щии во Иерусали́ме, и челове́че Иу́дин, суди́те между́ Мно́ю и виногра́дом Мои́м. Что́ сотворю́ еще́ виногра́ду Моему́, и не сотвори́х ему́; зане́же жда́х, да сотвори́т гро́здие, сотвори́ же те́рние. Ны́не у́бо возвещу́ ва́м, что́ а́з сотворю́ виногра́ду Моему́: отиму́ огражде́ние его́, и бу́дет в разграбле́ние, и разорю́ сте́ну его́, и бу́дет в попра́ние. И оста́влю виногра́д Мо́й, и ктому́ не обре́жется, ниже́ покопа́ется, и взы́дет на не́м, я́коже на ляди́не, те́рние: и облако́м запове́м, е́же не одожди́ти на него́ дождя́. Виногра́д бо Го́спода Савао́фа, до́м Изра́илев е́сть, и челове́к Иу́дин, но́вый са́д возлю́бленный.

Проки́мен, псало́м 22, гла́с 6: Же́зл Тво́й и па́лица Твоя́, та́ мя́ уте́шиста. Сти́х: Госпо́дь пасе́т мя́, и ничто́же мя́ лиши́т.