Пятница

На Го́споди воззва́х: поста́вим стихо́в 6: пра́здника 3, и мине́и, 3.

Стихи́ры пра́здника, гла́с 4.

Подо́бен: Да́л еси́ зна́мение:

Дне́сь на́йде Пресвята́го Твоего́ Ду́ха де́йствие Го́споди на апо́столы Твоя́, и прему́дры показа́в богове́дением, испо́лни я́ блаже́ннаго уче́ния Твоего́. Те́мже Твое́ спаси́тельное смотре́ние сла́вим, Иису́се всеси́льне, Спа́се ду́ш на́ших.

Дне́сь ду́х Тво́й всеси́льный Влады́ко, от Отца́ посыла́ется, Тебе́ единосу́щный, во о́гненных язы́цех, подая́ти же вели́чия Твоя́ глаго́лати Апо́столы Твоя́ устро́и. Те́мже спаси́тельное Твое́ смотре́ние сла́вим, Иису́се всеси́льне, Спа́се ду́ш на́ших.

Дне́сь излия́л еси́ Уте́шителя Твоего́ Ду́ха, Спа́се, дарова́ния, пода́в челове́ческому естеству́ проро́чествовати, я́коже ре́кл еси́ Сло́ве, и Тро́ице покланя́тися неразде́льно наказа́л еси́. Те́мже Твое́ спаси́тельное смотре́ние сла́вим, Иису́се всеси́льне, Спа́се ду́ш на́ших.

Сла́ва, и ны́не: гла́с 2:

Тро́ицу единосу́щную песносло́вим, Отца́ и Сы́на, со Святы́м Ду́хом: сию́ бо пропове́даша вси́ проро́цы, и апо́столи с му́ченики.

Та́же: Све́те ти́хий:

На стихо́вне стихи́ры, гла́с 1.

Подо́бен: Небе́сных чино́в:

Моисе́й на горе́ су́щаго огне́м ви́де, но и Богови́дцем и му́дрым апо́столом, Ду́х огнезра́чно схо́дит ны́не, а́ки я́вственно просвеща́я, я́коже еди́н Бо́г глаго́лавый тогда́, и ны́не в то́ждестве естества́.

Сти́х: Се́рдце чи́сто сози́жди во мне́ Бо́же:

Огнезра́чными язы́ки богоглаго́ливии, к воде́ креще́ния Боже́ственнаго зову́ще, ри́торов буесло́вия безбо́жных огне́м Ду́ха попали́ша: но просвети́ Уте́шителю, и на́с ве́рно богосло́вящих Тя́.

Сти́х: Не отве́ржи мене́ от лица́ Твоего́:

И и́же в веществе́ Бо́же мо́й Тебе́ послужи́вшыя прие́мшыя дебе́лость вещества́ неизрече́нно, я́коже дре́вле невеще́ственных огне́м новотвори́ши пла́менныя ду́ха, я́ко многопева́емь еси́, я́ко чу́ден в де́лех Твои́х Человеколю́бче.

Сла́ва и ны́не: гла́с 6:

Уте́шителя иму́ще ко Отцу́ Христа́ Бо́га, Уте́шителю ино́му прише́дшу к на́м на зе́млю дне́сь, Ду́ху Свято́му ве́рою поклони́мся.

Та́же: Ны́не отпуща́еши: тропа́рь пра́здника, и отпу́ст.

² Зна́й и се́, я́ко слу́жбы святы́х, прилучи́вшихся в суббо́ту гряду́щую, и неде́лю все́х святы́х, пое́м еди́наго напреди́, а друга́го в настоя́щий пято́к на повече́рии.

На Бо́г Госпо́дь: тропа́рь пра́здника, три́жды. По 1-й кафи́сме седа́лен, гла́с 1.

Подо́бен: Гро́б тво́й:

Се́ проро́ческая исполня́ются прорече́ния, сия́ бо заря́ми примра́чными покры́вый, в бу́дущих явле́ние, я́ко Бо́г Уте́шитель, ны́не излия́ся апо́столом бога́тно, те́ми же и ве́рно покланя́ющымся Тро́ице несозда́нней.

Сла́ва, и ны́не: то́йже.

По 2-й кафи́сме седа́лен, гла́с 8.

Подо́бен: Прему́дрости:

Всесвяты́й Ду́х ны́не соше́д на апо́столы ви́дом огня́, у́жасом испо́лни язы́к собра́ния: язы́ки бо о́гненными Человеколю́бче глаго́лющым, свою́ ки́йждо бесе́ду слы́шаше. Те́мже и чу́до неве́рным, я́ко пия́нство, ве́рным же спасе́ние вои́стинну познава́шеся: сего́ ра́ди сла́вим держа́ву Твою́ Христе́ Бо́же, прегреше́ний оставле́ния прося́ще, низпосла́ти бога́тно рабо́м Твои́м.

Сла́ва, и ны́не: то́йже.

Кано́н пра́здника, гла́с 4, со ирмосо́м на 8. И свята́го на 4. По 9-й пе́сни ексапостила́рий пра́здника два́жды.

На стихо́вне стихи́ры, гла́с 6.

Подо́бен: Тридне́вен:

Ду́ху Всесвято́му, со Отце́м пева́емому, и с Сы́ном же, воспои́м ве́рнии, кла́няющеся непреста́нно: Тро́ицу пресвяту́ю Бо́га лю́дие славосло́вим.

Сти́х: Се́рдце чи́сто сози́жди во мне́ Бо́же:

Тебе́ Ду́ха Уте́шителя ве́рно восхва́лим, со свяще́нными и боже́ственными апо́столы: в тре́тий бо ча́с, я́коже обеща́, Тебе́ от Отца́ све́тов посла́ Христо́с.

Сти́х: Не отве́ржи мене́ от лица́ Твоего́:

Тро́ице Свята́я, сла́ва Тебе́, в пе́снех покланя́юся тро́ически, Отцу́, и Ду́ху пра́вому, с Сы́ном: и поя́ Тебе́ Тро́ице боже́ственне, достодо́лжно ве́рно почита́ю.

Сла́ва, и ны́не: гла́с 8:

Егда́ ду́ха Твоего́ посла́л еси́ Го́споди, седя́щым апо́столом, тогда́ евре́йския де́ти зря́ще ужаса́хуся у́жасом: слы́шаху бо я́ веща́ющя ины́ми стра́нными язы́ки, я́коже Ду́х подава́ше и́м. Неве́жди бо су́ще умудри́шася, и язы́ки в ве́ру улови́вше, боже́ственная вети́йствоваху. Те́мже и мы́ вопие́м Ти́: и́же на земли́ явле́йся, и от пре́лести спасы́й на́с, Го́споди сла́ва Тебе́.

Та́же, ча́с пе́рвый. И отпу́ст.

На литурги́и блаже́нна от кано́на пра́здника, пе́снь 7-я и 8-я на 6.