Понедельник

На Го́споди воззва́х, пое́м я́ко обы́чно, стихи́ры осмогла́сника 3: и мине́и настоя́щаго свята́го 3. Сла́ва, и ны́не, богоро́дичен.

На стихо́вне же оставля́ется осмогла́сник, и пое́м самогла́сен дне́, о́ба ли́ка вку́пе. Гла́с 8:

Ласкосе́рдствовавше пе́рвую подъя́хом наготу́, победи́вшеся го́рьким вку́сом, и от Бо́га изгна́ни бы́хом. Но возведе́мся к покая́нию, и чу́вства очи́стим, к ни́мже бра́нь, вхо́д поста́ творя́ще: наде́ждею благода́ти сердца́ известву́юще, не бра́шны, в ни́хже не по́льзовашася ходи́вшии. И сне́стся на́ми А́гнец Бо́жий, во свяще́нной и светоно́сной но́щи воскресе́ния, на́с ра́ди приведе́нное заколе́ние, ученико́м приобще́нное в ве́чер Та́инства, и тьму́ разоря́ющее неве́дения све́том Его́ воскресе́ния.

Сти́х: К Тебе́ возведо́х о́чи мои́, Живу́щему на небеси́. Се́ я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

И па́ки то́йже самогла́сен: Ласкосе́рдствовавше:

Сти́х 2: Поми́луй на́с Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

И пое́м му́ченичен в то́йже гла́с: Му́ченицы Госпо́дни, вся́ко ме́сто освяща́ете, и вся́к неду́г врачу́ете: и ны́не моли́те, изба́витися се́тей вра́жиих душа́м на́шим, мо́лимся.

Сла́ва, и ны́не, богоро́дичен, гла́с то́йже: Небе́сная пою́т Тя́ Благода́тная, Ма́ти безневе́стная: и мы́ славосло́вим неизсле́дованное Твое́ рождество́, Богоро́дице, моли́ спасти́ся душа́м на́шим.

на Бо́г Госпо́дь, тропа́рь свято́му, два́жды. Сла́ва, и ны́не, богоро́дичен по гла́су. По 1-м стихосло́вии седа́лен осмогла́сника. И чте́м сло́во Вели́каго Васи́лия [о е́же, Внима́й себе́.]

По 2-м стихосло́вии пое́м трио́ди, гла́с 1.

Подо́бен: Ка́мени запеча́тану:

Отверзо́шася боже́ственнаго покая́ния преддве́рия:/ присту́пим усе́рдно,/ очи́стивше телеса́,/ бра́шен и страсте́й отложе́ния творя́ще,/ я́ко послу́шницы Христа́,/ призва́вшаго ми́р в Ца́рствие Небе́сное,/ десяти́ны всего́ ле́та принося́ще все́х Царю́,// я́ко да и воскресе́ние Его́ любо́вию у́зрим.

Сла́ва, то́йже па́ки. И ны́не, богоро́дичен: Ру́це Твои́ боже́ственнии,/ и́миже Соде́теля носи́ла еси́ Де́во Пресвята́я,/ воплоще́нна Божество́м, просте́рши умоли́,/ изба́витися на́м от искуше́ний, и страсте́й и бе́д,/ восхваля́ющим Тя́ любо́вию, и вопию́щим Тебе́:/ сла́ва Все́льшемуся в Тя́,/ сла́ва Проше́дшему из Тебе́,// сла́ва Свободи́вшему на́с рождество́м Твои́м.

Кано́ны же пое́м я́коже обы́чай во окто́ихе: и в мине́и свято́му. В ко́их же пе́снех прихо́дит трипе́снец, а́ще ли е́сть двоирмо́сен, оставля́ем о́ба кано́на окто́иха: и пое́м в мине́и кано́н со ирмосо́м на 6: и в трио́ди на 8. Кано́н мине́и, и настоя́щий трипе́снец.

Творе́ние господи́на Ио́сифа, гла́с 1.

Пе́снь 1

Ирмо́с: Пе́снь побе́дную пои́м вси́ Бо́гу:

Све́тлая предпра́зднства воздержа́ния, све́тлая предпу́тия поста́ дне́сь. Те́мже стеце́мся в наде́жде бра́тие, и усе́рдии мно́зем.

Ада́му пра́отцу преступле́нием поревнова́в, изгна́н бы́х от сла́дости окая́нный. Те́мже припа́даю Ти́ в покая́нии и пла́чи: Го́споди, спаси́ мя.

Нача́ло умиле́ния и покая́ния, злы́х отчужде́ние, и страсте́й воздержа́ние. Те́мже потщи́мся отсече́ние лука́вых де́л сотвори́ти.

Богоро́дичен: Но́щию прегреше́ний омраче́н, к Тебе́ ро́ждшей су́щим во тьме́ Со́лнце пра́вды Христа́, ны́не прибега́ю приле́жно, Влады́чице спаси́ мя.

И́ный трипе́снец.

Ирмо́с то́йже:

Се́ предотве́рзеся покая́ния две́рь боголю́бцы, прииди́те у́бо, потщи́мся вни́ти то́ю, пре́жде да́же не заключи́т сию́ Христо́с, я́ко недосто́йным на́м.

Ве́сну возвеща́ющая прибли́жися сия́, ны́не предочисти́тельная седми́ца всечестна́я, свяще́нных посто́в, телеса́ и ду́ши все́х просвеща́ющая.

Сла́ва, тро́ичен: Несли́тная, несозда́нная, Тро́ице Свята́я, Еди́нице преблага́я, О́тче и Сы́не, и Ду́ше сро́дный, покланя́ющися Тебе́ ве́рно, при́сно спаса́й.

Богоро́дичен: Победи́шася, Всечестна́я, в Тебе́ преде́лы Де́во естества́: пребыва́еши бо ро́ждши без му́жа Бо́га, я́коже пре́жде рождества́ чи́стая, па́ки невреди́ма.

Та́же ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.

По 3-й пе́сни седа́лен: Сла́ва, и ны́не, богоро́дичен.

По 6-й пе́сни конда́к, и и́кос свята́го.

Пе́снь 8

Ирмо́с: Его́же ужаса́ются А́нгели:

Житие́ мое́ все́ блу́дно ижди́в, гра́жданом рабо́тах го́рьким и лука́вым: но жела́юща мя́ к Твои́м щедро́там ны́не обрати́тися Христе́, не пре́зри.

О́браз жития́ моего́ сра́мный, и лю́тый: ми́лость безме́рная, Человеколю́бче Спа́се, Твоего́ благоутро́бия, покая́ния вре́мя да́ждь ми́ прося́щу, и любо́вию Тя́ пою́щу.

Ка́инову поревнова́х окая́нному житию́, ума́ достоя́ние умертви́в и́стинно, и трепе́щу суда́ Твоего́ Благоде́телю: не осуди́ мене́ с си́м во ве́ки.

Богоро́дичен: Де́во всепе́тая, еди́на к Бо́гу ве́рных су́щи по́мощь тве́рдая, тьмы́ мя изба́ви, и муче́ния належа́щаго лука́вно живу́щим.

Ины́й.

Ирмо́с: Пе́снь Тебе́ прино́сим:

Сие́ вре́мя е́сть покая́ния, те́мже благому́дренно начне́м бра́тие, вопию́ще: благослови́те дела́ Госпо́дня Го́спода.

Дне́сь бра́шен отре́кшеся, потщи́мся де́лом и прегреше́ний досто́йно ка́ятися: благослови́те дела́ Госпо́дня Го́спода.

Благослови́м Отца́, и Сы́на, и Свята́го Ду́ха, Го́спода.

Тро́ичен: Сла́ва Тебе́ неви́димая Тро́ице Свята́я, во еди́нице покланя́емая, ю́же ве́рно сла́вим: спаса́й рабы́ Твоя́ от вся́каго вре́да.

Богоро́дичен: Ра́дуйся всеблаже́нная чи́стая Де́во: ра́дуйся Госпо́дня рабо́, и Ма́ти: ра́дуйся покро́ве ми́ра Богоро́дице благослове́нная, Мари́е всесве́тлая.

Хва́лим, благослови́м, покланя́емся Го́сподеви:

Ирмо́с: Пе́снь Тебе́ прино́сим безпло́тных, я́коже о́троцы в пещи́, и пою́ще глаго́лем: благослови́те вся дела́ Госпо́дня Го́спода.

Пе́снь 9

Ирмо́с: Светоно́сный о́блак:

Ми́рным постоя́нием, чи́стою любо́вию свяще́ннейшее вре́мя свята́го поста́ восприи́мем ве́рнии, прося́ще оставле́ния, и́хже ки́йждо согреши́: я́ко да та́мошнюю улучи́м ра́дость.

Се́ вре́мя покая́ния, предпра́зднственный се́й посто́в вхо́д: воста́ни душе́ моя́, Благоде́телю и Бо́гу те́пле прими́рися, я́ко да суда́ избе́гнеши о́наго пра́веднаго и стра́шнаго вои́стинну.

Посто́в вхо́ды и преддве́рия, вси́ да не оскверни́м зле́ невоздержа́нием и пия́нством: но в чистоте́ помышле́ний усе́рдно вни́дем, прие́мше нетле́ния венцы́ и трудо́в досто́йне плоды́.

Богоро́дичен: О на́с моля́щи Блага́го не преста́й, не́мощь на́шу ве́дущаго еди́наго: гла́да же, и па́губы, и тру́са, и вся́каго озлобле́ния изба́витися чту́щему Тя́ гра́ду, Богоро́дице, упова́ние земноро́дных.

Ины́й. Ирмо́с: Тебе́ ви́деную две́рь:

Введе́ся вре́мя душе́ моя́ покая́ния, не небрези́: а́лчущим да́ждь хле́б, моли́ся Го́сподеви на вся́кий де́нь, и но́щь, и ча́с, да спасе́т тя́.

Мя́с, и про́чих бра́шен я́коже удале́ние сотвори́хом, та́ко и вся́кия вражды́ к бли́жним вку́пе, блуда́ же и лжи́, и вся́кия зло́бы убежи́м.

Сла́ва, тро́ичен: Еди́ному покланя́юся естество́м безнача́льному Божеству́, треми́ же ли́цами сла́влю в Тро́ице Еди́ницу неразде́льную, и сопресто́льную.

Богоро́дичен: Ты еси́ ве́рных Де́во похвала́, упова́ние и предста́тельство: Тя́ пе́сньми пе́ний сла́вим непреста́нно Богоро́дице Мари́е, спаси́ рабы́ Твоя́.

Ирмо́с: Тебе́ ви́денную две́рь Иезеки́илем проро́ком, е́юже никто́же про́йде, то́кмо Бо́г еди́н, Богоро́дице Де́во, пе́сньми почита́ем.

Свети́лен окто́иха: Сла́ва: свято́му, а́ще е́сть. А́ще ли ни́: Сла́ва, и ны́не, богоро́дичен.

На стихо́вне стихи́ра самогла́сна, Гла́с 3:

На вся́кое вре́мя по́ст поле́зен е́сть, изволя́ющим и творя́щим и: ниже́ бо искуше́ние де́монское дерза́ет на постя́щагося: но и храни́тели жи́зни на́шея А́нгели, люботру́днейше с на́ми пребыва́ют, посто́м очи́стившимися.

Сти́х: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́ в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

И пое́м па́ки ту́же стихи́ру.

Та́же сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Святы́х страстоте́рпцев па́мять, прииди́те лю́дие вси́ почти́м: зане́ позо́р бы́вше А́нгелом и челове́ком, побе́дныя венцы́ от Христа́ прия́ша, и мо́лятся о душа́х на́ших.

Сла́ва, и ны́не, богоро́дичен, то́йже глас:

Без се́мене зачала́ еси́ от Ду́ха Свята́го, и славосло́вяще воспева́ем Тя́: ра́дуйся Всесвята́я Де́во.

Ве́домо же бу́ди, я́ко в понеде́льник сы́рныя неде́ли яди́м дважды дне́м.