Пятница
В четверто́к ве́чера Вознесе́ния
кафи́смы не глаго́лем: а́ще ли где́ всено́щное не бы́сть, кафи́сму глаго́лем рядову́ю.
На Го́споди воззва́х: поста́вим стихо́в 6: и пое́м стихи́ры самогла́сны пра́здника 3. И Мине́и 3.
Пра́здника, гла́с 1:
Возше́д на небеса́, отону́дуже и соше́л еси́, не оста́ви на́с си́рых Го́споди: да прии́дет Тво́й Ду́х, нося́ ми́р ми́рови, покажи́ сыново́м челове́ческим дела́ си́лы Твоея́, Го́споди Человеколю́бче.
Возше́л еси́ Христе́ к Безнача́льному Отцу́ Твоему́, неопи́санных Его́ не́др не разлучи́выйся, и прило́г си́лы хвале́ния трисвята́го не прия́ша, но еди́наго Сы́на и по вочелове́чении позна́ша Тя́ Го́споди, Единоро́дна Отцу́: во мно́жестве щедро́т Твои́х поми́луй на́с.
А́нгели Твои́ Го́споди, апо́столом глаго́лаху: му́жие галиле́йстии, что́ стоите́, зря́ще на не́бо? Се́й е́сть Христо́с Бо́г, Вознесы́йся от ва́с на не́бо, то́й прии́дет па́ки, и́мже о́бразом ви́десте Его́ иду́ща на не́бо: послужи́те Ему́ в преподо́бии и пра́вде.
Сла́ва: свята́го, а́ще и́мать, а́ще же ни́:
Сла́ва, и ны́не: гла́с 2:
Роди́лся еси́ я́ко Са́м восхоте́л еси́, яви́лся еси́ я́ко Са́м изво́лил еси́: пострада́л еси́ пло́тию Бо́же на́ш, из ме́ртвых воскре́сл еси́ попра́в сме́рть: Возне́слся еси́ во сла́ве, вся́ческая исполня́яй, и посла́л еси́ на́м Ду́ха Боже́ственнаго, е́же воспева́ти и сла́вити Твое́ Божество́.
Вхо́д. Све́те ти́хий: Проки́мен вели́кий, гла́с 7: Бо́г на́ш на небеси́ и на земли́, вся́ ели́ка восхоте́ сотвори́. Сти́х: Во исхо́де Изра́илеве от Еги́пта, до́му Иа́ковля: Сти́х: Мо́ре ви́де и побеже́, Иорда́н возврати́ся вспя́ть. Сти́х: Что́ ти е́сть мо́ре, я́ко побе́гло еси́? И тебе́ Иорда́не, я́ко возврати́лся еси́ вспя́ть? И па́ки: Бо́г на́ш на небеси́ и на земли́: Ектении́: Рце́м вси́: Испо́лним вече́рнюю моли́тву:
На стихо́вне стихи́ры, гла́с 2.
Подо́бен: Егда́ от дре́ва:
Глаго́лет И́же вся́ческая Исполня́яй, ко ученико́м на го́ру Елео́нскую возше́д: прибли́жися, о дру́зи Мои́, восхожде́ния вре́мя, ше́дше научи́те язы́ки сло́ву, е́же слы́шасте от гла́са Моего́. Тогда́ Возне́слся еси́ во сла́ве я́коже на колесни́це: те́мже тре́петом апо́столи ужаса́хуся.
Сти́х: Вси́ язы́цы восплещи́те рука́ми:
Егда́ Ма́тери со ученики́ спутеше́ствующым дру́г дру́гу в Вифа́нию Христе́, Возне́сл еси́ ру́це Твои́, во благослове́ние и́х, и внегда́ благослови́ти и́х, о́блак све́та от оче́с и́х а́бие взя́т Тя́: тогда́ Возне́слся еси́ во сла́ве, и Десноседа́тель вои́стинну яви́лся еси́ Отцу́ спокланя́емь.
Сти́х: Взы́де Бо́г в воскликнове́нии:
Прииди́те, совзы́дем ве́рнии на высо́кую го́ру Елео́нскую, я́коже апо́столи совосходя́ще, и на высоту́ взе́мше сердца́, и мы́сли, у́зрим Го́спода ны́не носи́ма. Те́мже и мы́ благода́рно ра́дующеся возопии́м: сла́ва Вознесе́нию Твоему́ Многоми́лостиве.
Сла́ва и ны́не: гла́с 6:
На гора́х святы́х зря́ще Твое́ Вознесе́ние Христе́, Сия́ние сла́вы О́тчи, воспева́ем Тво́й светообра́зный лица́ зра́к, кла́няемся Страсте́м Твои́м, почита́ем Воскресе́ние, сла́вное Вознесе́ние сла́вяще: поми́луй на́с.
Тропа́рь пра́здника: Возне́слся еси́: И отпу́ст.
Слу́жбу Мине́и рядова́го свята́го, случи́вшагося в пра́здник Вознесе́ния, пое́м на повече́рии.
В пято́к Вознесе́ния на У́трени
на Бо́г Госпо́дь: тропа́рь пра́здника.
По 1-м стихосло́вии седа́лен, гла́с 8.
Подо́бен: Повеле́нное та́йно:
На го́ру возше́д Елео́нскую Ми́лостиве Иису́се, отту́ду взя́лся еси́: све́тлый бо о́блак от земли́ Тя подъя́т, зря́щым ученико́м Твои́м чу́до стра́шное, вопию́щым безпло́тным на небесе́х вы́шшым во́инством: стра́хом врата́ возми́теся. С ни́миже Царя́ Тя́ пое́т вся́ тва́рь, все́х Бо́га.
Сла́ва, и ны́не: то́йже.
По 2-м стихосло́вии седа́лен, гла́с 8.
Подо́бен: Прему́дрости Сло́ва:
Все́д на о́блаки небе́сныя, оста́вив ми́р су́щым на земли́, возше́л и се́л еси́ одесну́ю Отца́, я́ко Единосу́щен Сему́ сы́й и Ду́ху: а́ще бо и в пло́ти яви́лся еси́, но непрело́жен пребы́л еси́. Те́мже ча́еши соверше́ния коне́ц, суди́ти Гряды́й на зе́млю ми́ру всему́. Правосу́де Го́споди, пощади́ ду́шы на́шя, прегреше́ний оставле́ние да́руя, я́ко Бо́г ми́лостив, рабо́м Твои́м.
Сла́ва, и ны́не: то́йже.
И псало́м 50. Кано́н пра́здника, ирмо́с по два́жды: тропари́ на 6, еди́н по еди́ному пременя́я на вся́к де́нь: и мине́и на 4. По 3-й пе́сни конда́к свята́го, и и́кос, и седа́лен его́. Сла́ва, и ны́не: пра́здника. По 6-й пе́сни конда́к пра́здника, и и́кос. По 9-й пе́сни свети́лен пра́здника. Сла́ва: Свята́го, а́ще и́мать: И ны́не: пра́здника. А́ще ли́ ни́, Сла́ва, и ны́не: пра́здника.
На стихо́вне стихи́ры пра́здника, гла́с 2.
Подо́бен: До́ме Евфра́фов:
Чу́до новоле́пное, челове́ческое бо естество́ на небеса́ взы́де, соедини́вшееся Сло́ву Бо́гу Вседержи́телю.
Сти́х: Вси́ язы́цы восплещи́те рука́ми:
Возсия́ я́сный и всесве́тлый де́нь Влады́ки, Боже́ственнаго на небеса́ восхожде́ния, просвеща́ющий вся́ческая.
Сти́х: Взы́де Бо́г в воскликнове́нии:
Я́коже ученико́м посла́л еси́ с высоты́ Сра́сленаго Твоего́ Ду́ха: и лю́дем Твои́м посли́ Христе́ Спа́се благода́ть Твою́.
Сла́ва, и ны́не: гла́с 5:
Го́споди, взе́млющу ти ся отону́дуже не разлучи́лся еси́, во́инства а́нгелов и все́х безпло́тных, ра́достию вопия́ху го́рншым си́лам: возми́те врата́ кня́зи ва́шя, и вни́дет Ца́рь Сла́вы: престо́л бо херуви́мский взя́т Тя́ с пло́тию, Го́споди сла́ва Тебе́.
И про́чее у́трени, и отпу́ст.
На литурги́и блаже́нна от кано́на пра́здника, пе́снь 1-я, со ирмосо́м на 6.