Вторник

На Го́споди воззва́х: стихи́ры пра́здника, 3. И мине́и, 3.

Вознесе́ния, гла́с 4. Подо́бен: Да́л еси́ зна́мение:

Пострада́л еси́ я́ко Челове́к Безстра́стный Божество́м, и воскре́сл еси́ тридне́вен Плени́вый сме́рть, и Совоскреси́в вся́ истле́вшыя, и Возне́слся еси́ Христе́ ко Отцу́, обеща́в посла́ти Уте́шителя свяще́нным апо́столом Твои́м, Иису́се Всеси́льне, Спа́се ду́ш на́ших.

Вы́ что́ стоите́ зря́ще на не́бо? Ви́димии а́нгели, я́ко челове́цы глаго́лаху, Сло́ва таи́нником: се́й, Его́же зрите́ о́блаком све́тлым Вознося́щася, То́йже прии́дет, и́мже о́бразом ви́десте Его́, суди́ти ми́ру, я́коже рече́: ше́дше у́бо вся́ рече́нная сотвори́те.

По е́же от гро́ба Твоего́ па́че постиже́ния Воста́нии, Всеси́льне Го́споди, прии́м и́хже возлюби́л еси́, да́же до Вифа́нии изве́л еси́ Сло́ве, и на горе́ бы́в Елео́нстей, си́х благослови́в, и та́ко Возне́слся еси́, повину́ющымся а́нгелом Тебе́, Иису́се Всеси́льне, Спа́се ду́ш на́ших.

Сла́ва, и ны́не: гла́с 4:

Егда́ прише́л еси́ на го́ру Христе́ Елео́нскую, О́тчее соверши́ти благоволе́ние, ужасо́шася небе́снии а́нгели, и устраши́шася преиспо́днии, предста́ша же ученицы́ с ра́достию тре́петни, я́ко глаго́лал еси́ и́м: я́ко престо́л же готовля́шеся проти́в о́блак жду́щий: врата́ же не́бо отве́рзшее добро́ту явля́ше, и земля́ сокро́вища открыва́ет, Ада́мову схожде́нию я́ко позна́тися, и па́ки восхожде́нию. Но стопы́ у́бо возвыша́хуся, я́коже ру́це, уста́ же вельми́ благословля́ху, я́коже слы́шашеся. о́блак подъе́мляше, и не́бо вну́трь Тебе́ прия́т. Де́ло сие́ Го́споди соде́лал еси́ вели́кое и пресла́вное, во спасе́ние ду́ш на́ших.

На стихо́вне стихи́ры, гла́с 2. Подо́бен: До́ме Евфра́фов:

Испо́лнивый Бла́же Оте́ческое благоволе́ние, соедини́вый же го́рняя до́льним, возне́слся еси́ во сла́ве к пе́рвейшым.

Сти́х: Вси́ язы́цы восплещи́те рука́ми:

Возне́слся еси́ к Твоему́ Роди́телю Ще́дре, отону́ду же не разлучи́лся еси́, и возне́сл еси́ до́лу лежа́щее естество́ Влады́ко.

Сти́х: Взы́де Бо́г в воскликнове́нии:

О́блак Тя́ све́та восприя́т на высоту́, и а́нгели со стра́хом и тре́петом служа́ху Боже́ственному Твоему́ Вознесе́нию.

Сла́ва, и ны́не: гла́с 4:

Низше́дшее естество́ Ада́мово в до́льнейшыя страны́ земли́, Бо́же новосотвори́вый Собо́ю, превы́ше вся́каго нача́ла и вла́сти возве́л еси́ дне́сь: я́ко бо возлюби́в, спосади́л еси́: я́коже поми́ловав, соедини́л еси́ Себе́: я́ко соедини́вый спострада́л еси́: я́ко безстра́стен пострада́в, и спросла́вил еси́. Но безпло́тнии, кто́ есть Се́й, глаго́лаху, кра́сный Му́ж, но не челове́к то́чию, Бо́г же и Челове́к, совокупле́нно и явля́емо? Те́мже удивле́ни а́нгели, во оде́ждах лета́юще о́крест ученико́в, друзи́и же стоя́ще вопия́ху: му́жие галиле́йстии, И́же от ва́с оти́де, Се́й е́сть Иису́с Челове́к Бо́г, Бо́г Челове́к па́ки прии́дет, Судия́ живы́х и ме́ртвых, ве́рным же да́руяй грехо́в проще́ние и ве́лию ми́лость.

По 1-м стихосло́вии седа́лен, гла́с 2.

Подо́бен: Вы́шних ищя́:

Свы́ше на зе́млю Христе́ соше́л еси́, и па́ки от земли́ на высоту́ восте́кл еси́ к Твоему́ Роди́телю, ученико́м зря́щым Твое́ восхожде́ние: с ни́ми у́бо пра́зднующе пое́м Твое́, Спа́се, Вознесе́ние. [Два́жды].

По 2-м стихосло́вии седа́лен, гла́с 3. Подо́бен: Красоте́ де́вства:

Преве́чное Сло́во и Безнача́льное, е́же у́бо взя́т естество́ челове́ческое, обоготвори́в та́йно, дне́сь вознесе́: а́нгели предтеку́ще апо́столом пока́зоваху Сего́, иду́ща на небеса́ со сла́вою мно́гою. Ему́же поклони́вшеся глаго́лаху: сла́ва Бо́гу Возне́сшемуся. [Два́жды.]

Псало́м 50. Кано́н пра́здника со ирмосы́ на 8: и мине́и на 4. Конда́к и ексапостила́рий пра́здника.

На стихо́вне стихи́ры, гла́с 2. Подо́бен: До́ме Евфра́фов:

Не оста́влю си́рых, я́же А́з собра́х, Госпо́дь друго́м глаго́лаше, но послю́ ва́м Ду́ха Свята́го.

Сти́х: Вси́ язы́цы восплещи́те рука́ми:

А́нгели прему́дрым вопия́ху апо́столом: о му́жие галиле́йстии, и́мже о́бразом зрите́, То́й па́ки прии́дет.

Сти́х: Взы́де Бо́г в воскликнове́нии:

Снидо́ша с ра́достию от Елео́нския горы́ ученицы́ Твои́ Сло́ве, сла́вяще и пою́ще Боже́ственное Твое́ Вознесе́ние.

Сла́ва, и ны́не: гла́с 4:

Егда́ возне́слся еси́ во сла́ве Христе́ Бо́же, ученико́м зря́щым, о́блацы подъима́ху Тя́ с пло́тию, врата́ взя́шася небе́сная, ли́к а́нгельский ра́довашеся с весе́лием, го́рнейшыя си́лы зовя́ху глаго́люще: возми́те врата́ кня́зи ва́шя, и вни́дет ца́рь сла́вы. Ученицы́ же дивя́щеся глаго́лаху: не разлучи́ся на́с Па́стырю до́брый, но посли́ на́м Ду́ха Твоего́ Пресвята́го, наставля́юща, и утвержда́юща, и просвеща́юща и освяща́юща ду́шы на́шя.

На литурги́и блаже́нна от кано́на пе́снь 6-я, на 6.