Пятница

По предначина́тельном стихосло́вим, вме́сто, Ко Го́споду внегда́ скорбе́ти ми́, кафи́сму 12. Кле́плет же свети́льничное поско́ру, труда́ ра́ди бде́ннаго. На Го́споди воззва́х, поста́вим стихо́в, 10.

И пое́м самогла́сен, два́жды. Гла́с 8:

Самовла́стно совлеко́хся, пе́рвым мои́м преступле́нием, доброде́телей благоле́пия, облеко́хся же в сие́ а́бие ко мне́ снизхожде́нием Твои́м Сло́ве Бо́жий. Не презре́л бо мя́ еси́ в лю́тых страсте́х впа́дша, и разбо́йнически на пути́ попра́на: но всекре́пкою Твое́ю си́лою снабде́в мя́, заступле́ния сподо́бил еси́ Многоми́лостиве.

Му́ченичен: Му́ченицы Госпо́дни, вся́ко ме́сто освяща́ете, и вся́к неду́г врачу́ете: и ны́не моли́те, изба́витися се́тей вра́жиих душа́м на́шым, мо́лимся.

И́ны стихи́ры, гла́с 1.

Подо́бен: Всехва́льнии му́ченицы:

Пригвожде́н Го́споди на Кресте́, Ада́мово рукописа́ние Боже́ственным копие́м растерза́л еси́: те́мже расто́ргни у́зы моя́ Сло́ве, я́ко да Тебе́ хвале́ния же́ртву пожру́ ве́рою, ра́дуяся, вре́мя благоприя́тное поста́ ны́не обреты́й, е́же все́х во спасе́ние показа́л еси́.

Поще́ния све́тлостию иногда́ Моисе́й сия́я, сла́ву Бо́жию ви́де: сему́ поревнова́вши смире́нная душе́ моя́, на Кресте́ распросте́ршему дла́ни тебе́ ра́ди бла́гостию, де́лы угоди́, воздержа́нием и моли́твою, я́ко да улучи́ши Боже́ственное наслажде́ние.

И́на стихи́ра, гла́с 6.

Подо́бен: Арха́нгельски воспои́м:

Животворя́щему покланя́ющеся Твоему́ Кресту́, неизрече́нныя к на́м безме́рныя Твоея́ бла́гости Христе́, и те́м просвети́вше ду́шы, воспева́ем Тя́ непреста́нно, прося́ще благоду́шно, ра́достию сконча́ти по́прище поще́ния, и дости́гнути стра́сти Твоя́ воспе́ти Го́споди, и́миже спа́сл еси́ ны́.

И в мине́и 4. Сла́ва, и ны́не, Крестобогоро́дичен.

Вхо́д. Све́те ти́хий:

Проки́мен, псало́м 98, гла́с 7: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть. Сти́х: Госпо́дь воцари́ся, да гне́ваются лю́дие.

Бытия́ чте́ние. [Быт.18:20–33]

Рече́ Госпо́дь: во́пль Содо́мский и Гомо́ррский умно́жися ко Мне́, и греси́ и́х вели́цы зело́. Соше́д у́бо узрю́, а́ще по во́плю и́х гряду́щему ко Мне́, соверша́ются: а́ще же ни́, да разуме́ю. И обрати́вшеся отту́ду му́жие, приидо́ша в Содо́м: Авраа́м же еще́ бя́ше стоя́й пред Го́сподем. И прибли́жився Авраа́м, рече́: погуби́ши ли пра́веднаго с нечести́вым, и бу́дет пра́ведник я́ко нечести́вый? А́ще бу́дут пятьдеся́т пра́ведницы во гра́де погуби́ши ли я́? не пощади́ши ли всего́ ме́ста пяти́десяти ра́ди пра́ведных, а́ще бу́дут в не́м? Ника́коже Ты́ сотвори́ши по глаго́лу сему́, е́же уби́ти пра́ведника с нечести́вым: и бу́дет пра́ведник я́ко нечести́вый: ника́коже. судя́й все́й земли́, не сотвори́ши ли суда́? Рече́ же Госпо́дь: а́ще бу́дут в Содо́мех пятьдеся́т пра́ведницы во гра́де, оста́влю ве́сь гра́д, и все́ ме́сто и́х ра́ди. И отвеща́в Авраа́м, рече́: ны́не нача́х глаго́лати ко Го́споду моему́, а́з же е́смь земля́ и пе́пел: А́ще же ума́лятся пятьдеся́т пра́ведницы в четы́редесять пя́ть, погуби́ши ли четы́редесяти пяти́х ра́ди ве́сь гра́д? и рече́: не погублю́, а́ще обря́щу та́мо четы́редесять пя́ть. И приложи́ еще́ глаго́лати к Нему́, и рече́: а́ще же обря́щутся та́мо четы́редесять? и рече́: не погублю́ ра́ди четы́редесяти. И рече́: что́ Го́споди, а́ще возглаго́лю: а́ще же обря́щется та́мо три́десять? и рече́: не погублю́ три́десятих ра́ди. И рече́: поне́же и́мам глаго́лати ко Го́споду: а́ще же обря́щутся та́мо два́десять? и рече́: не погублю́, а́ще обря́щутся та́мо два́десять. И рече́: что́ Го́споди: а́ще возглаго́лю еще́ еди́ною? а́ще же обря́щутся та́мо де́сять? и рече́: не погублю́ десяти́х ра́ди. Отъи́де же Госпо́дь, я́ко преста́ глаго́ля ко Авраа́му: и Авраа́м возврати́ся на ме́сто свое́.

Проки́мен, псало́м 99, гла́с 6: Воскли́кните Го́сподеви вся́ земля́.

Сти́х: Рабо́тайте Го́сподеви в весе́лии.

При́тчей чте́ние. [Притч.16:17–33,17:1–17]

Прие́мляй наказа́ние, во благи́х бу́дет: храня́й же обличе́ния, умудри́тся. и́же храни́т своя́ пути́, соблюда́ет свою́ ду́шу: любя́й же живо́т сво́й, щади́т своя́ уста́: Пре́жде сокруше́ния предваря́ет досажде́ние, пре́жде же паде́ния, злопомышле́ние. Лу́чше кроткоду́шен со смире́нием, не́жели и́же разделя́ет коры́сти с досади́тельми. Разу́мный в ве́щех, обрета́тель благи́х: наде́яйся же на Го́спода, блаже́н. Прему́дрыя и разу́мныя злы́ми нари́чут: сла́дции же в словеси́, мно́жае услы́шани бу́дут. Исто́чник живо́тен ра́зум стяжа́вшым: наказа́ние же безу́мных зло́. Се́рдце прему́драго уразуме́ет я́же от свои́х ему́ у́ст, во устна́х же но́сит ра́зум. Со́тове медо́внии, словеса́ до́брая: сла́дость же и́х исцеле́ние души́. Су́ть путие́ мня́щиися пра́ви бы́ти му́жу, оба́че после́дняя и́х зря́т во дно́ а́дово. Му́ж в труде́х тружда́ется себе́, и изнужда́ет поги́бель свою́: стропти́вый во свои́х уста́х но́сит поги́бель. Му́ж безу́мен копа́ет себе́ зла́я, и во устна́х свои́х сокро́виществует о́гнь. Му́ж стропти́вый разсыла́ет зла́я, и свети́льник льсти́ вжига́ет злы́м, и разлуча́ет дру́ги. Му́ж законопресту́пен прельща́ет дру́ги, и отво́дит и́х в пути́ небла́ги. утвержда́яй о́чи свои́, мы́слит развраще́нная, грызы́й же устне́ свои́, определя́ет вся́ зла́я: се́й пе́щь е́сть зло́бы. Вене́ц хвалы́ ста́рость: на путе́х же пра́вды обрета́ется. Лу́чше му́ж долготерпели́в па́че кре́пкаго, [и му́ж ра́зум име́яй па́че земледе́льца вели́каго:] удержава́яй же гне́в, па́че взе́млющаго гра́д. В не́дра вхо́дят вся́ непра́ведным: от Го́спода же вся́ пра́ведная. Лу́чше укру́х хле́ба с сла́стию в ми́ре, не́жели до́м испо́лнен мно́гих благи́х, и непра́ведных же́ртв с бра́нию. Ра́б смы́слен облада́ет влады́ки безу́мными: в бра́тиях же раздели́т [име́ние] на ча́сти. Я́коже искуша́ется в пещи́ сребро́ и зла́то: та́ко избра́нная сердца́ у Го́спода. Злы́й послу́шает язы́ка законопресту́пных: пра́ведный же не внима́ет устна́м лжи́вым. Руга́яйся убо́гому, раздража́ет Сотво́ршаго его́: ра́дуяйся же о погиба́ющем, не обезвини́тся: ми́луяй же поми́лован бу́дет. Вене́ц ста́рых ча́да ча́д: похвала́ же ча́дом отцы́ и́х. ве́рному ве́сь ми́р бога́тство, неве́рному же ниже́ пе́нязь. Не прили́чны су́ть безу́мному устне́ ве́рны, ниже́ пра́ведному устне́ лжи́вы. Мзда́ благода́тей наказа́ние употребля́ющым: и а́може а́ще обрати́тся, успе́ет. И́же таи́т оби́ды, и́щет любве́: а и́же ненави́дит скрыва́ти, разлуча́ет дру́ги и дома́шния. Сокруша́ет преще́ние се́рдце му́драго: безу́мный же бие́мь не чу́вствует [ра́н]. Прекосло́вия воздви́жет вся́к злы́й: Госпо́дь же А́нгела неми́лостна по́слет на́нь. Впаде́т попече́ние му́жу смы́сленну: безу́мнии же размышля́ют зла́я. Не воздае́т зла́я за блага́я, не подви́гнутся зла́я из до́му его́. Вла́сть дае́т словесе́м нача́ло пра́вды: предводи́тельствует же ску́дости пря́ и бра́нь. И́же су́дит пра́веднаго непра́ведным и непра́веднаго же пра́ведным нечи́ст и ме́рзок у Го́спода. Вску́ю бя́ше име́ние безу́мному, стяжа́ти бо прему́дрости безсе́рдый не мо́жет. и́же высо́к твори́т сво́й до́м, и́щет сокруше́ния: остроптева́яй же учи́тися, впаде́т в зла́я. На вся́кое вре́мя дру́г да бу́дет тебе́, бра́тия же в ну́ждах поле́зни да бу́дут.

И про́чее после́дование Преждеосвяще́нных, в не́мже причаща́емся и святы́х Христо́вых Та́инств.

На трапе́зе же яди́м еле́й и вино́ пие́м, труда́ ра́ди бде́ннаго.

В Студи́тове же Уста́ве повелева́ет су́хо я́сти всю́ ту́ю неде́лю, па́че ины́х, я́ко дни́е пла́ча су́ть, а не пра́здника: в си́х бо у́бо пе́ти до́лжно е́сть и Аллилу́иа. Во святы́я же горы́ Ти́пице разсужда́ет, на святы́х му́ченик 40, на Предте́чевы главы́ обре́тение, и в сре́ду Крестопокло́нную, и на Вели́кий кано́н, и на Неседа́льное, я́сти два́ варе́ния с еле́ем, и испива́ти по две́ ча́ши вина́. Сия́ же назна́меновахом любви́ ва́шей от обои́х, да произволя́яй спасти́ся, благоуго́днейшее пред Бо́гом избира́ет.

[зри́] Подоба́ет ве́дати, я́ко а́ще случи́тся Благове́щение Пресвяты́я Богоро́дицы в се́й де́нь, пое́тся после́дование Вели́каго кано́на пре́жде, с понеде́льника во вто́рник, си́речь в понеде́льник ве́чера. Пра́здник же быва́ет непрело́жный.

Тро́ичны гла́са. Та́же кафи́смы, 13, 14, 15. По 1-м стихосло́вии, глаго́лем седа́льны Кре́стныя Осмогла́сника, два́, и с Богоро́дичным.

По 2-м же стихосло́вии, глаго́лем настоя́щий седа́лен,

Гла́с 1. Подо́бен: Гро́б тво́й:

Просте́рл еси́ Христе́ дла́ни на Дре́ве, исцеля́я я́зву Ада́мову, я́звами Твои́ми. Те́мже молю́ Тя: я́звы моя́ исцели́, я́же наложи́ души́ мое́й льсте́ц, и сподо́би в моли́тве и посте́, Спа́се, угоди́ти Тебе́. [Два́жды.]

Крестобогоро́дичен. Подо́бен:

Зря́щи Тя́ Христе́, Всенепоро́чная Ма́ти, ме́ртва на Кресте́ просте́рта, вопия́ше: Сы́не Мо́й, собезнача́льный Отцу́ и Ду́хови, ко́е неизрече́нное смотре́ние Твое́ сие́, и́мже спа́сл еси́ пречи́стых ру́к Твои́х Ще́дре, созда́ние.

По 3-м стихосло́вии, седа́лен, гла́с 6:

Подо́бен: Упова́ние ми́ра:

Кре́сте, ми́ру храни́телю, де́монов прогони́телю, тя́ стяжа́вших во все́м предста́тельство необори́мое сподо́би поще́ния прейти́ про́чее, со́вестию чи́стою, исправля́я ду́шы на́шя пред Христо́м, дре́во благослове́нное. [Два́жды.]

Крестобогоро́дичен. Подо́бен:

Чи́стая Де́во и Честна́я, А́нгелов сла́во, егда́ предстоя́ла еси́ Кресту́ Сы́на и Бо́га Твоего́, не терпя́щи зре́ти поруга́ния враго́в, взыва́ла еси́ боля́щи ма́терски: ка́ко терпи́ши, о Человеколю́бче, все́х преще́ния? сла́ва долготерпе́нию Твоему́.

Трипе́снец господи́на Ио́сифа. И стихосло́вится пе́снь. Гла́с 1.

Пе́снь 5.

Ирмо́с: Просвети́вый сия́нием прише́ствия Твоего́ Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Простры́й не́бо я́ко ко́жу, просте́рл еси́ дла́ни на Кресте́ Иису́се преблаги́й: те́мже молю́ Тя, просте́рта мя́ вра́жиими искуше́нии, уще́дри.

Усну́л еси́ на Кресте́ Иису́се преблаги́й, бо́дрость спасе́ния на́м подая́ лежа́щым Го́споди, в до́льнейшей поги́бели: те́мже Тя́ ве́рою сла́вим.

Стра́сти Твоея́ ви́дети де́нь, сподо́би рабы́ Твоя́ просвеще́нны се́рдца све́тлостию, и живоно́сное Твое́ Спа́се Воскресе́ние, пою́щыя держа́ву Ца́рствия Твоего́.

Богоро́дичен: Зря́щи Тя́ воздви́жена на Кресте́ Всечи́стая восклица́ше уязвля́ема утро́бою, и глаго́лаше: за милосе́рдие Го́споди Твои́х щедро́т, страда́ти претерпе́л еси́, все́м подая́й безстра́стие.

И́ный, господи́на Фео́дора. Гла́с 6.

Ирмо́с: От нощи́ у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́: и научи́ мя Спа́се, твори́ти во́лю Твою́.

На Кресте́ ру́це Твои́ Человеколю́бче распросте́рл еси́, и гвоздьми́ пригвозди́ша, и ре́бра копие́м прободо́ша иуде́е, и терпи́ши вся́ Христе́, да мы́ спасе́мся.

Дре́ва сне́дию у́мре иногда́ Ада́м, па́ки же обре́те Дре́вом кре́стным жи́знь, и́мже щедро́т наслажда́ется пи́щи вну́трь рая́.

Тро́ичен: Еди́ну естество́м Тя́ Тро́ице воспева́ю, безнача́льную, несозда́нную, нача́льственную, ца́рственную, пресоверше́нную Еди́ницу, Бо́га, и Све́т, и Жи́знь, Зижди́теля ми́ру.

Богоро́дичен: В преесте́ственном Твое́м рождестве́ Чи́стая, зако́ны естества́ Тобо́ю разреша́ются я́ве: и́бо безсе́менно ражда́еши преве́чнаго Бо́га, от Отца́ рожде́ннаго.

Сла́ва Тебе́ Бо́же на́ш, сла́ва Тебе́.

Кре́ст, копие́, и гво́здия Твоя́ почита́ем Влады́ко: те́ми бо от тли́ на́с изба́вил еси́, Твое́ю стра́стию Христе́, обезсме́ртствовавшихся.

Ирмо́с: От но́щи у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́, и научи́ мя Спа́се, твори́ти во́лю Твою́.

Пе́снь 8.

Ирмо́с: Чу́да преесте́ственнаго росода́тельная изобрази́ пе́щь о́браз: не бо́ я́же прия́т пали́т ю́ныя, я́ко ниже́ о́гнь Божества́ Девы, в ню́же вни́де утробу́. Те́м воспева́юще воспое́м: да благослови́т тва́рь вся́ Го́спода, и превозно́сит во вся́ ве́ки.

Притупи́л еси́ лука́ваго, Спа́се, жа́ла, пригвожде́н гвоздьми́ на Дре́ве, терно́вным венце́м оде́ялся еси́ укори́зны, искореня́я преступле́ния те́рние. Те́мже воспева́юще тебе́ зове́м: да благослови́т тва́рь вся́ Го́спода, и превозно́сит во вся́ ве́ки.

Просте́рл еси́ на Кресте́ Христе́ дла́ни, челове́чество собира́я к твоему́ позна́нию, и копие́м Твои́м ре́бром пробости́ся претерпе́л еси́, источи́в на́м исто́чник спасе́ния, воспева́ющым: да благослови́т тва́рь вся́ Го́спода, и превозно́сит во вся́ ве́ки.

Струя́ми благоутро́бия Твоего́ Христе́ Ще́дре, очи́сти мое́ се́рдце, грехо́вным угрызе́нием оскверни́вшееся, и ре́ки умиле́ния источи́ти сподо́би мя́ Христе́ Иису́се, да зову́ Тебе́: да благослови́т тва́рь вся́ Го́спода, и превозно́сит во вся́ ве́ки.

Богоро́дичен: Ста́мну Тя́ Боже́ственную, ма́нну иму́щую Божества́, позна́хом Отрокови́це, ковче́г и трапе́зу и све́щник престо́л Бо́жий и пала́ту, и мо́ст, преводя́щий к Боже́ственной жи́зни, пою́щыя: да благослови́т тва́рь вся́ Го́спода, и превозно́сит во вся́ ве́ки.

И́ный.

Ирмо́с: Отроко́в пе́снь воспои́м Христу́, пою́ще с ни́ми: да благослови́т вся́ тва́рь Го́спода, и превозно́сит во вся́ ве́ки.

Распина́ется Христо́с, и оживля́емь а́з пою́ со о́троки: благослови́те дела́ Госпо́дня Го́спода и превозноси́те Его́ во ве́ки.

Ми́р от тли́ распя́тием Твои́м изба́вивыйся, пое́т со о́троки: благослови́те дела́ Госпо́дня Го́спода и превозноси́те Его́ во ве́ки.

Благослови́м Отца́, и Сы́на, и Свята́го Ду́ха, Го́спода.

Тро́ичен: Тро́ице равносла́вимая, пресу́щная Еди́нице, О́тче, и Сы́не, и Ду́ше, спаси́ ве́рою пою́щыя Тя́.

Богоро́дичен: Рождеству́ Чи́стыя Богоро́дицы покланя́юся, поя́ со о́троки: благослови́те дела́ Госпо́дня Го́спода, и превозноси́те Его́ во ве́ки.

Сла́ва Тебе́ Бо́же на́ш, сла́ва Тебе́.

Пою́ Тво́й Кре́ст, и́мже спа́сл мя́ еси́ Христе́, поя́ со о́троки: благослови́те дела́ Госпо́дня Го́спода, и превозноси́те Его́ во ве́ки.

Ирмо́с: Отроко́в пе́снь воспои́м Христу́, пою́ще с ни́ми: да благослови́т вся́ тва́рь Го́спода, и превозно́сит во вся́ ве́ки.

Пе́снь 9.

Ирмо́с: О́браз чи́стаго рождества́ Твоего́, огнепали́мая купина́ показа́ неопа́льная, и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

Ви́де Илиа́ Го́спода в то́нце ве́тре, истончи́в пе́рвее пло́ть моли́твами и посто́м: ему́же поревнова́вши душе́ моя́, отве́ржи сла́дости дебельства́, я́ко да у́зриши жела́емаго.

На дре́во возне́с пе́рвее Моисе́й зми́я Спа́се, вообража́ше Твое́ воздви́жение, е́же на Кресте́ Преблаги́й: и́мже ядови́тыя зло́бы зми́евы, изба́вил еси́ вся́ язы́ки покланя́ющыяся Тебе́.

Во гро́бе уны́ния лежа́, отягча́ющий име́я ка́мень недоуме́ния: присноживо́тнаго не разуме́я, Спа́се сло́ва Твоего́, и стра́ха Твоего́ не чу́вствуя, уще́дри мя́ и спаси́ Твое́ю бла́гостию, Многоми́лостиве.

Богоро́дичен: Все́х превы́шшая Влады́чице, страсте́й мя́ зло́бы вы́шша покажи́, сла́вяща Тя́ всеи́стинную Богоро́дицу, и пою́ща Рождество́ Твое́ Чи́стая, непостиже́нием, Богора́дованная, почита́емое.

И́ный.

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди я́ко Богоневе́стную Ма́терь, правосла́вно велича́ем.

Распина́ешися, и спаса́еши мя́: умира́еши, и оживля́еши мя́. О благоутро́бия, о человеколю́бия Твоего́! кто́ ви́де, кто́ слы́ша, Влады́ку за раба́ прие́млюща сме́рть поно́сную? Но сла́ва неизрече́нней бла́гости Твое́й Го́споди.

Со́лнце я́ко ви́де Тя́ распина́ема, за́йде: ка́ко бо сия́ло бы, укори́зну ви́дя Зижди́теля своего́? я́ко и тва́рь вся́ преклоня́ема, распина́телем вопия́ше молча́щи: я́ко Ты́ Бог еси́ все́х, а́ще и пло́тию стра́стен.

Тро́ичен: Еди́наго единороди́телю, единоро́днаго Сы́на О́тче: и еди́не еди́наго све́те, све́та сия́ние: и еди́ный еди́не еди́наго Бо́га, Святы́й Ду́ше, Го́спода Госпо́дь, вои́стинну сы́й: о Тро́ице Еди́нице Свята́я, спаси́ мя богосло́вяща Тя́.

Богоро́дичен: Чу́до рождества́ Твоего́ удивля́ет мя́ Всенепоро́чная, ка́ко зачина́еши безсе́менно необъиме́ннаго? рцы́, ка́ко де́вствуеши, ро́ждши я́ко Ма́ти? Е́же па́че естества́ ве́рою прие́мь, Рожде́нному поклони́ся: ели́ка хо́щет бо, и мо́жет.

Сла́ва Тебе́ Бо́же на́ш, сла́ва Тебе́.

На́с ра́ди подъя́т Тво́й ки́йждо у́д стра́сть: ударе́ние, глава́: лани́ты, зауше́ние: ру́це, пригвожде́ние, и ре́бра копие́: изря́днее же кре́ст. Но сла́ва неизрече́нному благоутро́бию Твоему́ Спа́се на́ш.

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди я́ко Богоневе́стную Ма́терь, правосла́вно велича́ем.

Свети́лен гла́са.

На стихо́вне, самогла́сен, два́жды. Гла́с 8:

С разбо́йники на Кресте́ пригвозди́выйся Христе́ Бо́же, и я́звою Твое́ю челове́ческое естество́ исцели́вый, не пре́зри мене́, в мы́сленныя путедержа́тели, и в разбо́йники безпло́тныя впа́дшаго, и доброде́тели от ни́х совлече́ннаго, и лю́те уя́звеннаго, ни от еди́наго же от преподо́бных исцели́тися возмо́гшаго: и́сполу бо ме́ртв е́смь, кратча́йший име́я жи́зни оста́нок, на Тя́ име́яй еди́ну наде́жду, ме́ртвым живо́т подаю́щаго: но обвяжи́ ми стру́пы, Твою́ иска́пав мне́ бла́гость, еди́не Человеколю́бче.

Му́ченичен: Что́ вы нарече́м святи́и? херуви́мы ли? я́ко на ва́с почи́л е́сть Христо́с. серафи́мы ли? я́ко непреста́нно просла́висте его́. А́нгелы ли? те́ла бо отврати́стеся. си́лы ли? де́йствуете бо чудесы́. мно́гая ва́ша имена́, и бо́льшая дарова́ния, моли́те спасти́ся душа́м на́шым.

Сла́ва, и ны́не, Крестобогоро́дичен, гла́с то́йже

Подо́бен: О пресла́внаго чудесе́!

О пресла́внаго чудесе́! о та́инства но́ваго! о ужа́снаго начина́ния! Де́ва глаго́лаше, на Кресте́ Тя́ я́ко ви́де, посреде́ двою́ разбо́йнику обе́шена, Его́же неболе́зненно ужа́сно породи́, пла́каше глаго́лющи: увы́ Мне́ Ча́до любе́знейшее, ка́ко Тя́ лю́тый наро́д и неблагода́рный ко Кресту́ пригвозди́?

На 1-м часе́, кафи́смы не́сть. На 3-м часе́, кафи́сма 19.

На 6-м часе́, 20. На 6-м же часе́: тропа́рь проро́чества, гла́с 8:

Препе́тый еси́ Христе́ Бо́же на́ш, поколеба́яй зе́млю, за е́же обрати́ти и спасти́ живу́щыя на не́й: и па́ки утвержда́яй ю́ за Свою́ бла́гость и неизрече́нное благоутро́бие, моли́твами Богоро́дицы поми́луй на́с.

Проки́мен, псало́м 100, гла́с 4: Ми́лость и су́д воспою́ Тебе́ Го́споди.

Сти́х: Пою́ и разуме́ю в пути́ непоро́чне.

Проро́чества Иса́иина чте́ние. [Ис.45:11–17].

Та́ко глаго́лет Госпо́дь Бо́г, Святы́й Изра́илев, Сотвори́вый гряду́щая: вопроси́те Мене́ о сыне́х Мои́х, и о дще́рех Мои́х, и о де́лех руку́ мое́ю запове́дите Мне́. А́з сотвори́х зе́млю и челове́ка на не́й, Аз руко́ю Мое́ю утверди́х не́бо, Аз все́м звезда́м запове́дах. А́з возста́вих его́ с пра́вдою царя́, и вси́ путие́ его́ пра́вы. се́й сози́ждет гра́д Мо́й, и плене́ние люде́й Мои́х возврати́т, не по мзде́, ни по даро́м, рече́ Госпо́дь Савао́ф. Та́ко глаго́лет Госпо́дь Савао́ф: утруди́ся Еги́пет, и ку́пли Ефио́пския, и Саваи́мстии му́жи высо́цыи к тебе́ пре́йдут, и тебе́ бу́дут раби́, и в сле́д тебе́ по́йдут свя́зани у́зами ручны́ми, и пре́йдут к тебе́, и покло́нятся тебе́, и в тебе́ помо́лятся, я́ко в тебе́ Бог е́сть, и реку́т: не́сть Бо́га ра́зве Тебе́. Ты́ бо еси́ Бо́г, и не ве́дехом, Бог Изра́илев Спа́с. Постыдя́тся и посра́мятся вси́ проти́вящиися ему́, и по́йдут в студе́: обновля́йтеся ко Мне́ о́строви. Изра́иль спаса́ется от Го́спода спасе́нием ве́чным: не постыдя́тся, ни посра́мятся да́же до ве́ка ктому́.

Проки́мен, псало́м 101, гла́с 4: Го́споди услы́ши моли́тву мою́, и во́пль мо́й к Тебе́ да прии́дет. Сти́х: Не отврати́ лица́ твоего́ от Мене́.

На 9-м часе́ кафи́смы не́сть.