Четверг

На Го́споди воззва́х, поста́вим стихо́в 6: и пое́м настоя́щия самогла́сны, и му́ченичен, и в Мине́и 4. Самогла́сен. Гла́с 4:

По́ст благи́х хода́тай, свое́ преполове́ние ны́не введе́, преше́дшими де́ньми благоугоди́в, и про́чими по́льзование предложи́в: и́бо благи́х напряже́ние, мно́жайшее благодея́ние твори́т. те́мже все́х благи́х да́телю Христу́ благоугожда́юще, вопие́м: пости́выйся на́с ра́ди, и распя́тие претерпе́вый, неосужде́ны на́с сподо́би, причасти́тися и Боже́ственныя Па́схи Твоея́, в ми́ре пожи́вшия, и досто́йно со Отце́м Тебе́ и Ду́хом сла́вящия.

И́н. Гла́с 5: В та́йне доброде́тели де́лающии, духо́вная воздая́ния ча́ющии, не посреде́ то́ржищ и распу́тий явля́ют сия́, но вну́трь се́рдца но́сят па́че: и все́х ви́дяй быва́емая в та́йне, мзду́ воздержа́ния подае́т на́м. По́ст соверша́им, не се́тующе ли́цы, но в кле́тех ду́ш на́ших моля́щеся, непреста́нно возопии́м: О́тче на́ш, И́же еси́ на Небесе́х, не введи́ на́с во искуше́ние, мо́лимся, но изба́ви на́с от лука́ваго.

Му́ченичен: Несы́тною любо́вию души́, Христа́ не отверго́стеся святи́и му́ченицы, и́же разли́чныя ра́ны страсте́й претерпе́вше, мучи́телей де́рзость низложи́сте, непрекло́нну и невреди́му ве́ру сохра́нше, на небеса́ преста́вистеся. те́мже и дерзнове́ние получи́вше к Нему́, проси́те дарова́ти ми́р ми́рови, и душа́м на́шим ве́лию ми́лость.

И́ны стихи́ры, гла́с 1.

Подо́бен: Прехва́льнии му́ченицы:

Поста́ водо́ю, ду́ши вси́ омы́им, и приступи́вше к честно́му и животворя́щему Кресту́ Госпо́дню, ве́рою поклони́мся, Боже́ственное просвеще́ние почерпа́юще, и ве́чное спасе́ние ны́не приобрета́юще, ми́р и ве́лию ми́лость.

Апо́столов похвало́ кре́сте, его́же окружа́ют нача́ла, си́лы, арха́нгели, покланя́ющияся тебе́ от вся́каго вре́да спаса́й, и боже́ственное по́прище воздержа́ния на́с сподо́би до́бре соверша́ющия, де́нь спаси́тельный дости́гнути, и́мже и спаса́емся.

И́н подо́бен, гла́с 7:

Подобен: Дне́сь бди́т:

Дне́сь Кресту́ Госпо́дню покланя́ющеся возопии́м: ра́дуйся Дре́во жи́зни, а́да разори́телю. Ра́дуйся ра́досте ми́ра, и тле́ния потреби́телю. Ра́дуйся, бе́сы прогоня́яй си́лою твое́ю, ве́рных утвержде́ние, ору́жие неруши́мое, облобыза́ющия тя́ соблюди́, освяти́, мо́лимся.

И Мине́и 4. Сла́ва, и ны́не, самогла́сен, гла́с 8:

Дне́сь неприкоснове́нный существо́м, прикоснове́н мне́ быва́ет, и стра́ждет стра́сти, свобожда́яй мя́ от страсте́й, све́т подава́яй слепы́м, от беззако́нных усте́н оплева́ется, и дае́т плещи́ за плене́нныя на ра́ны. Сего́ Чи́стая Де́ва и Ма́ти на Кресте́ зря́щи, боле́зненно веща́ше: увы́ Мне́ Ча́до Мое́, что́ сие́ сотвори́л еси́? Кра́сный добро́тою па́че все́х челове́к, бездыха́нный, беззра́чный явля́ешися, не име́я ви́да, ниже́ добро́ты: увы́ Мне́ Мо́й све́те, не могу́ спя́ща зре́ти Тя́, утро́бою уязвля́юся, и лю́тое ору́жие се́рдце Мое́ прохо́дит. Воспева́ю Твоя́ стра́сти, покланя́юся благоутро́бию Твоему́: долготерпели́ве сла́ва Тебе́.

Вхо́д. Све́те ти́хий:

Проки́мен, псало́м 71, гла́с 4: Благослове́н Госпо́дь Бо́г Изра́илев, творя́й чудеса́ еди́н. Сти́х: Бо́же, су́д Тво́й царе́ви да́ждь, и пра́вду Твою́ сы́ну царе́ву.

Бытия́ чте́ние. [Быт. 9:18–24, 10:1.]

Бы́ша сы́нове Но́евы изше́дшии из ковче́га, Си́м, Ха́м, Иа́феф: Ха́м же бя́ше оте́ц Ханаа́нь. Трие́ си́и су́ть сы́нове Но́евы, от си́х разсе́яшася по все́й земли́. И нача́т Но́е челове́к де́латель [бы́ти] земли́, и насади́ виногра́д: И испи́ от вина́, и упи́ся, и обнажи́ся в дому́ свое́м. И ви́де Ха́м оте́ц Ханаа́нь, наготу́ отца́ своего́, и изше́д во́н пове́да обе́ма бра́тома свои́ма. И взе́мше Си́м и Иа́феф ри́зу, возложи́ша [ю́] на о́бе ра́ме свои́, и идо́ша вспя́ть зря́ще, и покры́ша наготу́ отца́ своего́, и лице́ и́х вспя́ть зря́, и наготы́ отца́ своего́ не ви́деша. Истрезви́ся же Но́е от вина́, и разуме́ ели́ка сотвори́ ему́ сы́н его́ юне́йший. И рече́: про́клят [бу́ди] Ханаа́н о́трок: ра́б бу́дет бра́тиям свои́м. И рече́: благослове́н Госпо́дь Бо́г Си́мов: и бу́дет Ханаа́н о́трок ра́б ему́. Да распространи́т Бо́г Иа́фефа, и да всели́тся в селе́ниих Си́мовых, и да бу́дет Ханаа́н ра́б ему́. Поживе́ же Но́е по пото́пе ле́т три́ста пятьдеся́т: И бы́ша вси́ дни́е Но́евы, ле́т де́вять со́т пятьдеся́т, и у́мре. Сия́ же [су́ть] бытия́ сыно́в Но́евых, Си́ма, Ха́ма, Иа́фефа: и роди́шася и́м сы́нове по пото́пе.

Проки́мен, псало́м 72, гла́с 4: Мне́ же прилепля́тися Бо́гови бла́го е́сть. Сти́х: Ко́ль бла́г Бо́г Изра́илев:

При́тчей чте́ние. [Притч. 12:23–28, 13:1–9.]

Му́ж разуми́вый престо́л чу́вствия: се́рдце же безу́мных сря́щет кля́твы. Рука́ избра́нных одержи́т удо́бь: льсти́вии же бу́дут в плене́нии. Стра́шное сло́во се́рдце му́жа пра́ведна смуща́ет: ве́сть же блага́я весели́т его́. Разуми́в пра́ведник себе́ дру́г бу́дет: мы́сли же нечести́вых некро́тки: согреша́ющих пости́гнут зла́я: пу́ть же нечести́вых прельсти́т я́. Не улучи́т льсти́вый лови́твы: стяжа́ние же честно́е му́ж чи́стый. В путе́х пра́вды живо́т: путие́ же злопо́мнящих в сме́рть. Сы́н благоразу́мный послушли́в отцу́: сы́н же непокорли́вый в поги́бель. От плодо́в пра́вды сне́сть благи́й: ду́ши же беззако́нных погиба́ют безвре́менно. И́же храни́т своя́ уста́, соблюда́ет свою́ ду́шу: проде́рзивый же устна́ма, устраши́т себе́. В по́хотех е́сть вся́к пра́здный: ру́ки же му́жественных в прилежа́нии. Словесе́ непра́ведна ненави́дит пра́ведник: нечести́вый же стыди́тся, и не возъиме́ет дерзнове́ния. Пра́вда храни́т незло́бивыя: нечести́выя же злы́ твори́т гре́х. Су́ть богатя́ще себе́, ничесо́же иму́ще: и су́ть смиря́ющеся во мно́зе бога́тстве. Избавле́ние му́жа души́ свое́ ему́ бога́тство: ни́щий же не терпи́т преще́ния. Све́т пра́ведным всегда́: све́т же нечести́вых угаса́ет, ду́ши льсти́выя заблужда́ют во гресе́х: пра́веднии же ще́дрят и ми́луют.

И про́чее после́дование Преждеосвяще́нных.

От сего́ же дне́ начина́ет свяще́нник, [или́ диа́кон, а́ще е́сть] двосугу́бая ели́ко оглаше́ния просвеща́емых и моли́тву. глаго́лются же да́же до Среды́ Вели́кия, кроме́ суббо́т и Неде́ль.

Тро́ичны случи́вшагося гла́са.

По 1-м стихосло́вии глаго́лем седа́льны апо́стольския осмогла́сника.

По 2-м же стихосло́вии глаго́лем настоя́щий седа́лен, господи́на Ио́сифа, гла́с 1.

Подо́бен: Ли́к а́нгельский:

Си́лою Креста́ утвержда́еми, всю́ ле́сть вра́жию вои́стинну разори́сте апо́столи сла́внии, моли́твенницы ду́ш на́ших. Те́мже дне́сь в поклоне́ние его́ ра́дуетеся, о на́с моля́ще еди́наго Человеколю́бца. Два́жды.

Богоро́дичен: Мари́е, честно́е Влады́ки прия́телище, возста́ви ны́ па́дшия в про́пасть лю́таго отча́яния, и прегреше́ний, и скорбе́й: Ты́ бо еси́ гре́шных спасе́ние и по́мощь, и держа́вное предста́тельство, и спаса́еши рабы́ Твоя́.

По 3-м стихосло́вии седа́лен, господи́на Фео́дора, гла́с 7.

Подо́бен: Го́споди, мы́ есмы́:

Го́споди, Тво́й Кре́ст зря́ще предлежа́щий дне́сь, приступа́ем ве́рно, в пе́ниих и пе́снех, облобыза́юще его́ в стра́се и ра́дости: освяти́ рабы́ Твоя́, умири́ ми́р Тво́й, сего́ явле́нием, еди́не Многоми́лостиве. [Два́жды.]

Богоро́дичен. Подо́бен:

Го́споди, мы́ есмы́ лю́дие Твои́, и о́вцы па́жити Твоея́, заблу́ждшия тле́нием, обрати́ на́с: расточе́нныя я́ко Па́стырь собери́ на́с, поми́луй ста́до Твое́ Человеколю́бче, умилосе́рдися моли́твами Богоро́дицы, еди́не безгре́шне.

Кано́н Мине́и, и настоя́щий трипе́снец господи́на Ио́сифа.

И стихосло́вится пе́снь. Гла́с 1.

Пе́снь 4.

Ирмо́с: На боже́ственней стра́жи:

Освяще́ния пода́тельную благода́ть да́руя на́м святы́й Кре́сте, апо́столом утвержде́ние и похвало́, предлежи́ши в поклоне́ние дне́сь все́й вселе́нней, по́стное вре́мя облегча́я на́м.

Сеннописа́в Кре́ст Моисе́й, распросте́р ру́це, Амали́ка победи́, его́же вообража́юще, ру́це простира́ем, посто́м и мольба́ми, я́ко да полки́ победи́м бесо́вския, борю́щия на́с всегда́ зави́стно.

Боже́ственным ра́лом Креста́ изъора́сте зе́млю, боже́ственнии ученицы́, плодоно́сну сию́ показа́вше, прозяба́ющую благоче́стие. Те́мже ва́с гла́сы моли́твенными восхваля́юще, Христа́ при́сно сла́вим.

Богоро́дичен: Ма́ти Бо́га блага́го, ублажи́ мою́ ду́шу, ю́же лука́вый обы́чаем злы́м озло́би окая́нно, прельсти́в мя́: да я́ко вину́ спасе́ния, песносло́влю Тя́ при́сно Многопе́тую.

И́н. Гла́с 7.

Ирмо́с: Плотско́е прише́ствие Твое́ Христе́:

Предлага́ется дне́сь всесвяты́й Кре́ст, присту́пим, целу́им его́: и́бо е́сть ро́г спасе́ния на́шего.

Благода́ть твоя́ и образова́ние твои́м прихо́дит, прогоня́ющи бесо́вское мно́жество, Кре́сте Христо́в, ору́жие необори́мое.

Тро́ичен: Еди́ницу Тя́ по Естеству́ воспева́ю, Тро́ицу же Ипоста́сьми чту́, О́тче, Сы́не, и Ду́ше Пресвяты́й.

Богоро́дичен: Родила́ еси́ Отрокови́це безму́жная Бо́га Всенепоро́чная, содержа́щаго го́рстию концы́, и все́х дре́внейшаго.

Сла́ва Тебе́ Бо́же на́ш, сла́ва Тебе́.

Апо́столи, ми́ра моли́твенницы, моли́те спасти́ся и на́м, содержа́щим ору́жие, Кре́ст Христо́в.

Ирмо́с: Плотско́е прише́ствие Твое́ Христе́ уверя́я проро́к Авваку́м, взыва́ше: сла́ва си́ле Твое́й Го́споди.

Пе́снь 8.

Ирмо́с: Се́й нарече́нный:

Ра́дуйся Кре́сте трича́стный и боже́ственный, на не́мже еди́н от Тро́ицы, пло́ть носи́в водрузи́ся, водруже́нныя ны́ во глубину́ нече́стия избавле́й, превознося́щия Его́ во ве́ки.

Си́лу держа́вную Кре́ст стяжа́вше, лю́тою вла́стию лука́ваго порабо́тившияся свободи́ша Сло́ва ученицы́, воспева́юще: Тя́ превозно́сим во ве́ки.

Увы́ мне́, что́ стра́шный престо́л о́ный, на не́мже Сло́ве се́д, соде́янная мно́ю та́йная яви́ши Христе́, облича́яй нечу́вствие мое́? Но естество́м сы́й ми́лостив, пощади́ мя тогда́.

Богоро́дичен: Не́др не отсту́пль Оте́ческих, в не́дрех возле́г еси́ Де́вы, на призва́ние ро́да челове́ческаго, его́же подо́бие, за милосе́рдие Иису́се носи́л еси́. Те́мже Тя́ пое́м челове́цы во ве́ки.

И́ный. Ирмо́с: Еди́наго безнача́льнаго:

Крестоно́сную твою́ седми́цу почита́ем, я́ко поклони́тельную, тебе́ бо Дре́во честно́е, покланя́ющеся вопие́м: по́йте свяще́нницы, лю́дие превозноси́те во вся́ ве́ки.

Оле чудесе́! Царю́ веко́в, я́ко Дре́во, на не́мже распя́лся еси́, сподо́бил ны́ еси́ Твоя́ рабы́ ви́дети, и поклони́тися. Те́мже Тя́ со стра́хом пое́м во ве́ки.

Благослови́м Отца́, и Сы́на, и Свята́го Ду́ха, Го́спода.

Тро́ичен: О единосу́щная, о Тро́ице Всесвята́я, О́тче, Сы́не, и Пресвяты́й Ду́ше, Божество́: неразде́льную Твою́ держа́ву сла́влю, и пою́ еди́но Ца́рство во вся́ ве́ки.

Богоро́дичен: Созда́вшаго Ада́ма по о́бразу, и от смеше́ния его́ произше́дшаго, и разруши́вшаго дре́внюю кля́тву, по́йте свяще́нницы, лю́дие превозноси́те во вся́ ве́ки.

Сла́ва Тебе́ Бо́же на́ш, сла́ва Тебе́.

Двоенадесятостру́нная цевни́це церко́вная, я́ко пою́щая прему́дрости сло́во, апо́столи ва́с воспева́ющия, проси́те ви́дети стра́сть Госпо́дню, и пе́ти во ве́ки.

Хва́лим, благослови́м, покланя́емся Госпо́деви, пою́ще и превознося́ще во вся́ ве́ки.

Ирмо́с: Еди́наго безнача́льнаго Царя́ сла́вы, Его́же благословя́т небе́сныя си́лы, и трепе́щут чи́ни а́нгельстии, по́йте свяще́нницы, лю́дие превозноси́те Его́ во ве́ки.

Пе́снь 9.

Ирмо́с: Свети́ся, свети́ся:

Уясни́ся, свети́ся Це́рковь Бо́жия, кре́стными заря́ми, его́же но́сиши предлежа́ща все́м ве́рным в поклоне́ние: ты́ же мно́жество все́ де́монское, тьмы́ испо́лншееся, избе́гни.

Кре́пость воздержа́ния, боже́ственный е́сть Кре́ст, соде́йственник бдя́щих, по́стников укрепле́ние, борю́щихся побо́рник: сему́ ве́рнии любо́вию приступи́вше, ра́достно поклони́мся.

Основа́ния боже́ственная Це́ркве Христо́вы, утвержде́нием благоче́стия вся́ соблюди́те, и на ка́мени утверди́те тве́рдем, избра́вшаго ва́с апо́столи сла́внии.

Богоро́дичен: Ра́дость прие́мшая арха́нгеловым гла́сом, моего́ ны́не се́рдца печа́ль потреби́ душетле́нную, и пода́ждь Чи́стая радостотво́рный пла́чь, я́ко да обря́щу та́мо Боже́ственное утеше́ние.

И́ный. Ирмо́с: Тя́ Пречи́стую Ма́терь и Де́ву:

Ты́ вообража́емый, Ме́ррския струи́ дре́вле услажда́еши всечестно́е Дре́во: ты́ мое́ услади́ воздержа́ние, Кре́сте Христо́в, дне́сь покланя́емый.

Тя́ необори́мое ца́рствия ору́жие, во́инства кре́пость, сигкли́та утвержде́ние, Кре́сте Христо́в, вси́ пе́сньми велича́ем.

Тро́ичен: Тя́ безнача́льнаго Отца́ и Влады́ку, и собезнача́льнаго Сло́ва, и Ду́ха Свята́го, благоче́стно ве́рнии вси́ велича́ем.

Богоро́дичен: Тя́ сла́вную, и еди́ну Богоро́дицу, невмести́мое Сло́во во чре́ве вмести́вшую и роди́вшую пло́тию, пе́сньми велича́ем.

Сла́ва Тебе́ Бо́же на́ш, сла́ва Тебе́.

Тебе́ о́гненный зву́к апо́столы, я́ко попали́вшия вся́кую ве́щь пре́лести, и благоче́стие насади́вшия в ми́ре, пе́сньми велича́ем.

Ирмо́с: Тя́ Пречи́стую Ма́терь и Де́ву, невмести́мое Сло́во во утро́бу вмести́вшую, и роди́вшую пло́тию, пе́сньми велича́ем.

Свети́лен гла́са.

На стихо́вне самогла́сен, два́жды. Гла́с 7:

Поревну́им ве́рнии мытаре́ву покая́нию, а не фарисе́йски похва́лимся: но из глубины́ се́рдца, стена́ние принесе́м Благоде́телю все́х Бо́гу. То́й бо запове́да глаго́ля: я́ко вся́к вознося́й себе́ смири́тся, смиря́яй же себе́ вознесе́тся. Те́мже единому́дренно возопии́м ему́: Бо́же очи́сти на́с гре́шных, и спаси́ на́с.

Му́ченичен: Еди́но ды́шуще, на еди́но взира́юще, страстоте́рпцы му́ченицы, еди́н пу́ть живота́ обре́тше, за Христа́ сме́рть, ре́вностию вообража́юще кончи́ну дру́г дру́гу. О чудесе́! я́коже сокро́вища му́ки предвосхища́юще, дру́г ко дру́гу глаго́лаху: я́ко а́ще и не ны́не у́мрем, у́мрем же вся́ко, и бытию́ до́лжная послу́жим. Сотвори́м ну́жду любоче́стия, о́бщее свое́ мня́ще, сме́ртию живо́т ку́пим. моли́твами и́х Бо́же поми́луй на́с.

Сла́ва, и ны́не, Богоро́дичен: Умири́ моли́твами Богоро́дицы, живо́т на́с вопию́щих Ти́ Ми́лостиве: Го́споди сла́ва Тебе́.

На 6-м часе́ тропа́рь проро́чества, гла́с 6:

Кресту́ Твоему́ покланя́емся Влады́ко, и свято́е Воскресе́ние Твое́ сла́вим.

Проки́мен, псало́м 70-г, гла́с 4: Бо́г же Ца́рь на́ш пре́жде ве́ка, соде́ла спасе́ние посреде́ земли́. Сти́х: Вску́ю Бо́же отри́нул еси́ до конца́?

Проро́чества Иса́иина чте́ние. [Ис. 28:14–22.]

Та́ко глаго́лет Госпо́дь: услы́шите сло́во госпо́дне му́жие озло́бленнии, и кня́зи люде́й су́щих во Иерусали́ме. Я́ко реко́сте, сотвори́хом заве́т со а́дом, и с сме́ртию сложе́ние: бу́ря носи́ма а́ще мимои́дет, не прии́дет на на́с: положи́хом лжу́ наде́жду на́шу, и лже́ю покры́емся. Сего́ ра́ди та́ко глаго́лет Госпо́дь: се́ А́з полага́ю во основа́ние Сио́ну ка́мень многоце́нен, избра́н, краеуго́лен, че́стен, во основа́ние ему́, и ве́руяй во́нь не постыди́тся. И положу́ су́д в наде́жду, ми́лость же Моя́ на ме́рилех, И упова́вшии вотще́ на лжу́: я́ко не мине́т ва́с бу́ря, И не оти́мет от ва́с заве́та сме́ртнаго, и наде́жда ва́ша, я́же ко а́ду, не пребу́дет. бу́ря иду́щая а́ще на́йдет, бу́дете е́й в попра́ние. Егда́ мимои́дет, во́змет ва́с: я́ко по вся́ко у́тро преходи́ти бу́дет в де́нь, в нощи́ бу́дет наде́жда зла́: научи́теся слы́шати утесня́емии: Не мо́жем ра́товати, са́ми же изнемога́ем, е́же собра́тися на́м. Я́коже гора́ на нечести́вых воста́нет Госпо́дь, и бу́дет [я́коже] в де́бри Гавао́нстей, с я́ростию сотвори́т дела́ Своя́, го́рести де́ло: я́рость же Его́ чу́ждо употреби́тся, и погубле́ние Его́ стра́нно. И вы́ не ра́дуйтеся, ниже́ да возмо́гут ва́ши у́зы: зане́ сконча́ны и сокраще́ны ве́щи слы́шах от Го́спода Савао́фа, я́же сотвори́т над все́ю земле́ю.

Проки́мен, псало́м 74, гла́с 4: А́з же возра́дуюся в ве́к, воспою́ Бо́гу Иа́ковлю. Сти́х: Испове́мыся Тебе́ Бо́же, испове́мыся Тебе́.