Понедельник

На Господи воззвах, поста́вим стихо́в 10, и пое́м 4 стихиры Осмогла́сника умили́тельны гласа: и трипе́снца 3, подо́бны господи́на Ио́сифа, гла́с 8. Подо́бен: Господи, аще и на судищи:

Господи, на Кресте волею простерл еси длани Твоя, сему умилением сердца поклонитися и нас сподоби, просвещенных добре постом и молитвами, и воздержанием и благотворением, яко Благ и Человеколюбец

Подо́бен:

Господи, грехов моих множества, по множеству очисти щедрот Твоих Всещедре, и Крест Твой сподоби чистою душею видети, и целовати, в настоящей седмице воздержания, яко Человеколюбец.

Ина стихи́ра, господи́на Фео́дора, гла́с 3. Подо́бен: Велие чудо:

Велие чудо, Древо видится, на немже Христос волею распятся плотию: поклоняется мир, и просвещаемь взывает: о Креста сило, и зримый демоны палит, и воображаемь сих паля является! Ублажаю тя пречистое Древо, почитаю и покланяюся со страхом, и Бога славлю, тобою даровавшаго мне жизнь безконечную.

И мине́и 3. Сла́ва, и ны́не, Богоро́дичен. Све́те Ти́хий:

По вхо́де, проки́мен, гла́с 8: Дал еси достояние боящимся Тебе Господи. Стих: От конец земли к Тебе воззвах. Стих: Покрыюся в крове крил Твоих. Стих: Тако воспою имени Твоему.

На стихо́вне самогла́сен дне́, два́жды, гла́с 8:

Воззрети очима на небо не смею окаянный аз, от лукавых моих деяний: но яко мытарь стеня взываю Ти: Боже, очисти мя грешнаго, и фарисейскаго лицемерия избави мя, яко един Благоутробен.

Стих 1: К Тебе возведох очи мои:

Стих: Помилуй нас Господи:

Му́ченичен: Му́ченицы Госпо́дни, вся́ко ме́сто освяща́ете и вся́к неду́г врачу́ете, и ны́не моли́те изба́витися сете́й вра́жиих душа́м на́шим, мо́лимся.

Сла́ва, и ны́не, Богоро́дичен, гла́с то́йже:

Небе́сная пою́т Тя́, Обра́дованная, Ма́ти Безневе́стная, и мы́ славосло́вим неизсле́дованное Твое́ Рождество́, Богоро́дице, моли́ спасти́ся душа́м на́шим.

на у́трени тро́ичны случи́вшагося гла́са. По 1-м стихосло́вии глаго́лем седа́льны умили́тельны осмогла́сника. По 2-м же стихосло́вии глаго́лем настоя́щий седа́лен, гла́с 8, господи́на Ио́сифа.

Подо́бен: Воскре́сл еси́:

Всечестно́му ве́рнии поклони́мся Дре́ву, на не́мже Творе́ц все́х вознесе́ся. Предлежи́т освяща́я приступа́ющия душе́ю и те́лом, скве́рну очища́я греха́, постя́щихся ве́рно, и воспева́ющих всегда́ Христа́, еди́наго Благоде́теля.

Сла́ва, то́йже.

И ны́не, Богоро́дичен. Подо́бен:

Сло́во О́тчее на зе́млю сни́де, и а́нгел све́та Богоро́дице вопия́ше: ра́дуйся Благослове́нная, черто́г еди́на сохра́ншая, зача́тие прие́мшая преве́чнаго Бо́га и Го́спода: да от пре́лести спасе́т я́ко Бо́г, ро́д челове́ческий.

По 3-м стихосло́вии седа́лен, гла́с 3.

Подо́бен: Красоте́ де́вства:

Преполови́вше ны́не воздержа́ние, и на поклоне́ние Христе́ предвари́вше живоно́снаго Твоего́ Креста́, припа́дающе вопие́м Ти́: ве́лий еси́ Человеколю́бче, и ве́лия дела́ Твоя́, я́ко яви́л еси́ Кре́ст Тво́й честны́й, ему́же со стра́хом покланя́ющеся взыва́ем: сла́ва кра́йнему благоутро́бию Твоему́.

Сла́ва, то́йже.

И ны́не, Богоро́дичен. Подо́бен:

Я́коже неде́ланная Де́во лоза́, прекра́снейший гро́зд прозябла́ еси́, источа́ющий на́м вино́ спаси́тельное, веселя́щее все́х ду́ши и телеса́. Те́мже я́ко вино́вную Тя́ до́брых ублажа́юще, при́сно со а́нгелом вопие́м Ти́: ра́дуйся Благода́тная.

Кано́н Мине́и, и настоя́щий трипе́снец, и стихосло́вится пе́снь.

Гла́с 8.

Пе́снь 1.

Ирмо́с: Колесницегони́теля фарао́ня:

Светоно́сное Креста́ поклоне́ние все́м яви́ся, со́лнечную зарю́ спасе́ния испуща́ющее, и все́х озаря́ющее страсте́й омраче́нием одержи́мых: стеце́мся се́й чи́сте облобыза́ти.

Поста́ очи́стившеся благода́тию, Чи́стым умо́м, Чи́стому еди́ному, прииди́те, возопии́м гла́сом благодаре́ния: Ты́ кро́вь Твою́ Сло́ве за ны́ вся́ да́л еси́, Ты́ и Кресто́м освяща́еши ны́.

Запе́нся прило́ги змии́ными, паде́нием ужа́сным всегда́ лежу́, Спа́се, паде́ние первозда́ннаго стра́стию Твое́ю и Кресто́м испра́вивый, испра́ви, и наста́ви к хоте́ний Твои́х исполне́нию.

Богоро́дичен: Предстоя́щи Кресту́ Твоему́ Го́споди, Неискусобра́чная, и Твоя́ я́звы зря́щи Влады́ко, уязвля́ема глаго́лаше: увы́ Мне́ Ча́до, боле́зни избе́гши в рождестве́ Твое́м, ны́не боле́зненно уязвля́юся.

И́ный, господи́на Фео́дора. Гла́с 3.

Ирмо́с: Пои́м Го́сподеви сотво́ршему ди́вная чудеса́:

Седми́ца свята́я сия́ и светоно́сная: Кре́ст всечестны́й предлага́ет ми́рови: прииди́те, поклони́мся, стра́хом же и любо́вию ду́ши просвети́вше, на не́м пригвозди́вшагося Христа́ в пе́снех сла́вяще.

Кресту́ Твоему́ вси́ покланя́емся Христе́, предпровожде́ние творя́ще Воскресе́ния Твоего́: пое́м гво́здия Твоя́, чти́м и копие́ Твое́, устна́ма и очи́ма, душе́ю же и те́лом си́ми очища́еми.

Сла́ва, Тро́ичен: Тро́ице во еди́ном Существе́ пева́емая, О́тче, Сы́не, со Ду́хом Святы́м, безнача́льное, присносу́щное, несозда́нное Божество́, све́та исто́чниче и жи́зни: Тебе́ покланя́емся вси́ челове́цы, все́ осуществи́вшему.

Богоро́дичен: Пое́м Тя́ Де́во Богоро́дице Чи́стая, херуви́мскую колесни́цу, из нея́же Бо́г роди́ся: Ты́ бо еди́на была́ еси́ исто́чник нетле́ния, источа́ющий все́м жи́знь, из него́же почерпа́юще исцеле́ние прие́млем.

Сла́ва Тебе́ Бо́же на́ш, сла́ва Тебе́.

Четы́редесяте по́стных ста́дий преполовля́юще, прииди́те любо́вию со Христо́м и́дем к Боже́ственней стра́сти, да сраспе́ншеся Ему́, о́бщницы бу́дем Того́ Воскресе́нию.

Ирмо́с: Пои́м Го́сподеви, сотво́ршему ди́вная чудеса́ в Чермне́м мо́ри: по́нтом бо покры́ проти́вныя, и спасе́ Изра́иля. Тому́ еди́ному пои́м, я́ко просла́вися.

Пе́снь 8.

Ирмо́с: Седмери́цею пе́щь:

Ядови́тыми страстьми́ и ду́шу и мы́сль уя́звлену стяжа́вшаго, Го́споди поми́луй, уще́дри Твои́м Кресто́м. Защити́ и от ре́бр Твои́х излия́нными ка́плями, да усе́рдно пою́: свяще́нницы благослови́те, лю́дие превозноси́те во вся́ ве́ки.

На горе́ дре́вле тебе́ Моисе́й прообрази́, ру́це возвы́сив, и Амали́ка побежда́я, Кре́сте всечестны́й, ему́же кла́няющеся дне́сь, побежда́ем де́монов иноплеме́нныя полки́, и ве́рою пое́м: свяще́нницы благослови́те, лю́дие превозноси́те во вся́ ве́ки.

Страстьми́ преклоне́на, враги́ запина́ема, обы́чаем лука́вым влеко́ма, уще́дри Благоутро́бне, Твои́м Кресто́м защити́, я́ко да пою́ неукло́нным се́рдцем: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Богоро́дичен: Боле́зненно стеня́щи, ма́терски восклица́ющи, и от вну́тренних ско́рби не терпя́щи, на Кре́ст взира́ла еси́ к Рожде́нному из Твоего́ чре́ва, Ча́до, вопию́щи, что́ виде́ние сие́? ка́ко стра́ждеши, естество́м безстра́стный, вся́ко хотя́ ро́д челове́ческий от тли́ свободи́ти?

И́ный. Ирмо́с: А́нгельми немо́лчно:

В це́ркви предложе́нный Кре́ст Христо́в ви́дяще, стра́хом и ве́рою бра́тие прише́дше поклони́мся, Тому́ вопию́ще: Ты́ жи́знь процве́л еси́ челове́ком светоно́сне.

Победоно́сна в бра́нех, не́бо тя́ показа́ животво́рный на́м Кре́сте, ору́жие непобеди́мое, враго́м низложе́ние, Це́рквам ро́г, и ве́рным спасе́ние.

Благослови́м Отца́, и Сы́на, и Свята́го Ду́ха, Го́спода.

Тро́ичен: Отца́ Свята́го сла́влю, и Сы́на Свята́го чту́, и Ду́ха Свята́го пою́, единосу́щную Тро́ицу про́стую, Бо́га коего́ждо Си́х, Све́ты и Све́т, я́ко от со́лнца еди́наго происходя́ща.

Богоро́дичен: Ра́дуйся две́ре непроходи́мая: ра́дуйся купино́ неопали́мая: ра́дуйся ру́чко злата́я: ра́дуйся горо́ несеко́мая: ра́дуйся Богоро́дице, упова́ние неруши́мое, и стено́ на Тя́ наде́ющимся.

Сла́ва Тебе́ Бо́же на́ш, сла́ва Тебе́.

По́ст преполови́вше, дерза́им ду́хом на гряду́щее ю́ношески, благотеку́ще с Бо́гом бра́тие, я́ко да и Па́сху ра́достно у́зрим Христу́ воскре́сшу.

Хва́лим, благослови́м, покланя́емся Го́сподеви:

Ирмо́с: А́нгельми немо́лчно в вы́шних сла́вимаго Бо́га, небеса́ небе́с, земля́, и го́ры, и хо́лми, и глубина́, и ве́сь ро́д челове́ческий, пе́сньми Того́ я́ко Созда́теля, и Изба́вителя благослови́те, и превозно́сите во вся́ ве́ки.

Пе́снь 9.

Ирмо́с: Устраши́ся вся́к:

Вну́чата дре́вле Иа́ков благословля́я, прообража́ше све́тло Кре́ст честны́й, и́мже Ще́дре на́с благослови́, освяще́ния пода́тельную благода́ть подая́ покланя́ющимся ему́ и все́х Изба́вителя Тя́ прославля́ющим.

Поще́ния водо́ю ве́рнии очи́стившеся, и душе́ю и мы́слию, животода́тельное и боже́ственное Дре́во облобыза́им: предлежи́т бо я́ве все́м, источа́я боже́ственное оставле́ние, и све́т небе́сный, и жи́знь, и и́стинное ра́дование.

Судию́ Тя ве́м стра́шна, гряду́ща во сла́ве Божества́, все́х сокрове́нная обличи́ти тогда́ хотя́ща Го́споди. Те́мже Тебе́ зову́ Бла́же: согреши́х, прости́, не обличи́ моя́ мно́гая и лю́тая согреше́ния.

Богоро́дичен: А́гнца дре́вле А́гница зря́щи на Кресте́ пригвожде́на, и омрача́ему со́лнечному сия́нию, пла́чущи глаго́лаше: Со́лнце сла́вы Иису́се, заше́л еси́ умерщвля́емь: но возсия́й воста́ния све́т лю́бящим Тя́.

И́ный. Ирмо́с: На Сина́йстей горе́:

На ме́сте, иде́же но́зе стоя́сте [Тебе́] Влады́ки и Бо́га, поклони́мся вси́ дне́сь Кресту́ всечестно́му, я́коже Дави́д взыва́ет богогла́снейший: и́бо вся́ содержа́й го́рстию, на се́м вознесе́ся.

На земли́ живу́щии приступи́те, посто́м чи́стии, и предлежа́щий ви́дяще дне́сь всечестны́й Кре́ст, поклони́теся стра́хом и ве́рою, весели́теся и сра́дуйтеся, освяще́ние душа́м почерпа́юще.

Тро́ичен: Существо́м Еди́ница е́сть несеко́ма, Пребоже́ственная Тро́ица, соединя́ема Естество́м, дели́тся Ли́цы сво́йственно: несеко́ма бо сече́тся, еди́но су́щи трои́тся. Сия́ Оте́ц е́сть, Сы́н, и Ду́х Живы́й, соблюда́ющая все́.

Богоро́дичен: Деторо́дную де́ву кто́ слы́ша? и ма́терь без му́жа? Мари́е, соверша́еши чу́до: но скажи́ ми, ка́ко? Не испыту́й глубины́ Богорожде́ния Моего́. Сие́ всеи́стинное, па́че челове́ческаго ума́ постиже́ние.

Сла́ва Тебе́ Бо́же на́ш, сла́ва Тебе́.

Благода́рную хвалу́ принесе́м Бо́гу вси́ лю́дие, я́ко ви́дяще ны́не облобыза́ем всесвяты́й Кре́ст. Разуме́йте у́бо и покаря́йтеся в се́м де́мони: язы́цы ва́рварстии разуме́йте, и покаря́йтеся, и́мже с на́ми Бо́г.

Ирмо́с: На Сина́йстей горе́, ви́де Тя́ в купине́ Моисе́й, неопа́льно о́гнь Божества́ заче́ншую во чре́ве: Дании́л же Тя́ ви́де го́ру несеко́мую: же́зл прозя́бший, Иса́иа взыва́ше, от ко́рене Дави́дова.

Свети́лен гла́са.

На стихо́вне самогла́сен, два́жды, гла́с 6:

Изря́дный пу́ть возноше́ния Христе́, смире́ние показа́л еси́, Са́м Себе́ истощи́в, и зра́к раба́ прии́м: фарисе́а велехва́льныя моли́твы не послу́шав, мытаря́ же сокруше́нное стена́ние, я́ко же́ртву непоро́чную в вы́шних прие́м. Те́мже и а́з вопию́ Ти: очи́сти Бо́же, очи́сти Спа́се мо́й, и спаси́ мя.

Му́ченичен: Го́споди, в па́мять святы́х Твои́х вся́ тва́рь пра́зднует, небеса́ ра́дуются со а́нгелы, и земля́ весели́тся с челове́ки. Те́х моли́твами поми́луй на́с.

Сла́ва, и ны́не, гла́с то́йже: Арха́нгельское сло́во прия́ла еси́, и херуви́мский престо́л показа́лася еси́, и на объя́тиих Твои́х носи́ла еси́ Богоро́дице, наде́жду ду́ш на́ших.

На пе́рвом часе́ твори́м поклоне́ние честно́му Кресту́ я́коже и в Неде́лю, по напи́санному о́бразу, пою́ще вме́сто, Стопы́ моя́: Кресту́ Твоему́ покланя́емся Влады́ко: На часе́х же по О́тче на́ш: Конда́к: Не ктому́ пла́менное ору́жие:

Та́кожде и в сре́ду и пято́к, четы́ре сия́ дни́: в пято́к же сохраня́ем Кре́ст я́коже та́мо положи́ся.

На 6-м часе́ тропа́рь проро́чества, гла́с 7:

Го́споди, да не я́ростию Твое́ю обличи́ши лю́ди согреши́вшия, ниже́ гне́вом Твои́м нака́жеши на́с Бла́г сы́й: Тебе́ бо сла́вит вся́ земля́, и мо́лимся, пощади́ на́с Святы́й.

Проки́мен, псало́м 61, гла́с 6: О Бо́зе спасе́ние мое́, и сла́ва моя́. Сти́х: Не Бо́гу ли повине́тся душа́ моя́?

Проро́чества Иса́иина чте́ние. [Ис. 14:24–32.]

Та́ко глаго́лет Госпо́дь Савао́ф: я́коже глаго́лах, та́ко бу́дет, и я́коже совеща́х, та́ко пребу́дет: Е́же погуби́ти ассири́ан на земли́ Мое́й, и на гора́х Мои́х: и бу́дут в попра́ние, и оти́мется от ни́х яре́м и́х, и сла́ва и́х от ра́мен и́х оти́мется. Се́й сове́т, его́же совеща́ Госпо́дь на всю́ вселе́нную, и сия́ рука́ на вся́ язы́ки вселе́нныя. Я́же бо Бо́г Святы́й совеща́, кто́ разори́т? и ру́ку Его́ высо́кую кто́ отврати́т? В ле́то, в не́же у́мре Аха́з ца́рь, бы́сть глаго́л се́й: Не ра́дуйтеся вси́ иноплеме́нницы, сокруши́ся бо яре́м бию́щаго вы́: от се́мене бо змии́на изы́дут исча́дия а́спидов, и исча́дия и́х изы́дут змии́ паря́щии. И упасу́тся убо́зии и́м: ни́щии же челове́цы в ми́ре почи́ют: и потреби́т гла́дом се́мя твое́, и оста́нок тво́й избие́т. Воспла́читеся врата́ градо́в, да возопию́т гра́ды смяте́ннии, иноплеме́нницы вси́: зане́ ды́м от се́вера и́дет, и не́сть, и́же пребу́дет. И что́ отвеща́ют ца́рие язы́ков, я́ко Госпо́дь основа́ Сио́на, и Те́м спасу́тся смире́ннии люде́й Его́.

Проки́мен, псало́м 62, гла́с 4: Та́ко благословлю́ тя в животе́ мое́м. Сти́х: Бо́же Бо́же мо́й, к Тебе́ у́тренюю, возжада́ Тебе́ душа́ моя́.