15/28 Апостола от 70-ти Онисима (ок. 109). Преподобного Пафнутия, затворника Печерского, в Дальних пещерах почивающего (XIII). Виленской (перенесение в Вильно в 1495 году), Далматской (1646) и Венской икон Божией Матери.

Тропарь апостолу Онисиму, глас 3

Апо́столе святы́й Они́симе,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кондак, глас 4

Я́ко луча́ возсия́л еси́ вселе́нней,/ заря́ми сия́я со́лнца, блаже́нне,/ всесве́тлаго Па́вла, мир просвети́вшаго;/ те́мже тя почита́ем, Они́симе сла́вне.

Величание

Велича́ем тя,/ апо́столе Христо́в Они́симе,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь преподобному Пафнутию, затворнику Печерскому, в Дальних пещерах почивающему, глас 2

Ве́лия ве́ры исправле́ния,/ в пеще́рнем затво́ре, я́ко на воде́ упокое́ния,/ преподо́бне о́тче Пафну́тие, ра́довался еси́,/ огне́м бо любве́ Боже́ственныя распаля́ем,/ бде́нием и моли́твою безстра́стия дости́гл еси́/ и яви́лся еси́ равноа́нгельный на земли́,/ того́ моли́твами, Христе́ Бо́же, спаси́ ду́ши на́ша.

Кондак, глас 8

Помышля́я исхо́д души́ твоея́/ и пра́ведное мздовоздая́ние по дело́м,/ непреста́нными слеза́ми умоли́л еси́ Го́спода/ дарова́ти тебе́ неизрече́нных ра́достей насле́дие,/ я́же уже́ со святы́ми предвкуша́я, Пафну́тие преподо́бне,/ помина́й и нас пред Бо́гом чту́щих тя.

Величание

Ублажа́ем тя,/ преподо́бне о́тче Пафну́тие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.