13/26 Преподобного Мартиниана (V). Преподобного Стефана, в иночестве Симеона, царя Сербского, Мироточивого (1200). Долинской иконы Божией Матери.

Тропарь преподобному Мартиниану, глас 8

Пла́мень искуше́ний слез тече́ньми погаси́л еси́, блаже́нне,/ и, морска́я волне́ния и звере́й стремле́ния обузда́вый, взыва́л еси́:/ препросла́влен еси́, Всеси́льне, огня́ и бу́ри спасы́й мя.

Кондак, глас 2

Я́ко подви́жника благоче́стия иску́сна,/ и страда́льца произволе́нием честна́го,/ и пусты́ни жи́теля и все́льника,/ в пе́снех досто́йно восхва́лим Мартиниа́на присночестна́го,/ той бо зми́я попра́.

Величание

Ублажа́ем тя,/ преподо́бне о́тче Мартиниа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Стефану, в иночестве Симеону, царю Сербскому, Мироточивому, глас 3

Боже́ственною благода́тию просвети́вся,/ и по сме́рти показу́еши све́тлость жития́ твоего́,/ источа́еши бо ми́ро благоуха́ния/ притека́ющим к ра́це моще́й твои́х,/ и лю́ди твоя́ наста́вил еси́ к све́ту Богоразу́мия,/ Симео́не о́тче наш,/ Христа́ Бо́га моли́/ дарова́ти нам ве́лию ми́лость.

Кондак, глас 6

А́нгельское возлюби́в на земли́ житие́,/ миродержа́ние и мир оста́вив,/ поще́нием Христу́, Симео́не, после́довал еси́,/ к Нему́же, лю́бящих тя апо́стольски наста́вил еси́, вопия́:/ возлюби́те Бо́га, я́коже Он возлюби́л нас.

Ин кондак, глас 2

И́го Христо́во прие́м, Симео́не,/ и, Того́ крест взем, после́довал Ему́/ насажде́н в дому́ Госпо́днем, процвете́, я́ко фи́никс,/ я́коже кедр, и́же в Лива́не, умно́жил еси́ ча́да твоя́,/ муж жела́ний духо́вных, чудотво́рец бо яви́ся,/ Христа́ Бо́га моли́ непреста́нно о всех нас.

Тропарь общий Симеону Мироточивому и сыну его, святителю Савве I, архиепископу Сербскому, глас 1

Оби́тели Хиланда́рския свяще́нных строи́телей/ и Афо́на свети́льники, Се́рбии похвалу́/ Симео́на велича́йшаго, преподо́бных ле́поту/ и род его́ чу́дный, святи́теля, – глаго́лю, – Са́вву,/ придайте согла́сно почти́м, глаго́ля:/ моли́те Христа́ Бо́га/ о па́стве ва́шей, блаже́ннии,/ и о е́же Це́ркви свобо́дней бы́ти от обстоя́ний.

Ин тропарь, глас тойже

И́же те́плыя засту́пники в ско́рбех и напа́стех иму́ще,/ Симео́на Богоно́снаго и Са́вву первосвяти́теля,/ припаде́м к ни́ма с ве́рою,/ я́ко да моли́твами их от напа́стей избавля́еми,/ по до́лгу благове́рно Спа́са и Бо́га просла́вим, глаго́люще:/ сла́ва Да́вшему вам кре́пость,/ сла́ва Просла́влыпему вы чудесы́,/ сла́ва Изба́влынему нас от скорбе́й моли́твами ва́шими.

Кондак, глас 4

Днесь Симео́н с Са́ввою, блаже́ннии, в ду́се прише́дше,/ спаса́ют от обстоя́ний па́ству их:/ сии́ бо Тро́ицу пропове́даша Еди́наго Бо́га,/ Це́ркве яви́шася утвержде́ние,/ в преподо́бных Мироточи́вый и во святы́х чудотво́рец:/ сии́ бо и во бра́нех необори́мии защи́тницы показа́шася,/ Афо́на похвала́ и наро́да се́рбскаго кре́пость.

Ин кондак, глас 2

Го́рнюю жи́знь возлюби́вше, сла́внии,/ жизнь су́щую на земли́ презре́сте./ Сего́ ра́ди в вы́шних со а́нгелы всегда́ лику́юще,/ моли́те о всех нас.

Величание преподобному Симеону Мироточивому

Ублажа́ем тя,/ преподо́бне о́тче Симео́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.