10/23 Священномученика Харалампия, епископа Магнезийского и иже с ним (202). Преподобного Лонгина Коряжемского (1540). Преподобного Прохора Печерского, Лебедника, в Ближних пещерах почивающего (1107). Благоверной княгини Анны Новгородской (1056). Собор Новгородских святителей. Иконы Божией Матери «Огневидная».

Тропарь священномученику Харалампию, епископу Магнезийскому, глас 4

Я́ко столп избра́нный Це́ркве Христо́вой/ и свети́льник присносве́тлый всея́ вселе́нныя,/ прему́дре, показа́ся, Харала́мпие,/ возсия́ в ми́ре муче́нием,/ разруши́ и́дольское мракобе́сие, блаже́нне,/ сего́ ра́ди яви́ся предста́тель Христу́,/ моли́ся спасти́ся нам.

Ин тропарь, глас 2

Моли́твами твои́ми ко Го́споду/ от зол, бед, напа́стей свободи́,/ ве́рно к тебе́ прибега́ющих/ и сете́й изба́ви вра́жиих,/ ве́лий страстоте́рпче Харала́мпие.

Кондак, глас 8

Подо́бствовав благода́тию свяще́нства, сла́вне,/ Це́рковь све́тло украси́л еси́ Боже́ственным страда́нием,/ е́же за Христа́ прия́л еси́ до́блественно, ра́дуяся, Харала́мпие,/ честны́й, свети́льниче всеми́рный, осиява́яй концы́,/ я́ко непобеди́мый.

Тропарь Харалампию на молебне, глас 4

Страстоте́рпцу Харала́мпию присту́пим/ и о́бразу его́ поклони́мся, от се́рдца вопию́ще:/ му́чениче Харала́мпие и о́тче,/ от вся́каго обстоя́ния и всех бед свои́х раб изба́ви нас,/ в Це́ркви Бо́жией вы́ну пребыва́ющих.

Ин тропарь, глас тойже

Я́ко столп избра́нный Це́ркве Христо́вой/ и свети́льник присносве́тлый всея́ вселе́нныя,/ прему́дре показа́ся, Харала́мпие,/ возсия́ в ми́ре муче́нием,/разруши́ и́дольское мракобе́сие, блаже́нне,/ сего́ ра́ди яви́ся предста́тель Христу́,/ моли́ся спасти́ся нам.

Ин тропарь, глас тойже

Пострада́вый му́жески и му́ченическим увенча́н венце́м,/ священному́чениче пресла́вне Харала́мпие,/ свободи́ раб твои́х от губи́тельства и вся́каго зла, напа́стей и бед,/ свя́те, с любо́вию твое́ призыва́ющих чу́дное и́мя.

Кондак Харалампию на молебне, глас 6

Я́ко му́ченик и испове́дник цвет,/ двойны́м венце́м Христо́с тя увенча́,/ возвели́чив безчи́сленными чудесы́ на земли́,/ но я́ко благода́ть Госпо́дню явля́я нам,/ ве́рно к тебе́ прибега́ющим,/ да́руй мир, помози́ в напа́стех и лю́тых беда́х,/ святе́йший Харала́мпие.

Величание

Велича́ем тя,/ священному́чениче Харала́мпие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Лонгину, игумену Коряжемскому, чудотворцу, глас 1

От мяте́жа мирска́го удали́вся,/ к немерца́ющему Све́ту прите́кл еси́,/ преподо́бне о́тче Ло́нгине,/ и ны́не чи́сте зри́ши Святу́ю Тро́ицу,/ ю́же моли́ за ны недосто́йныя,/ да спасе́т ду́ши на́ша.

Кондак, глас 8

По словеси́ Учи́теля Христа́/ крест на ра́мо твое́ прия́л еси́,/ вся жите́йская отри́нув,/ и о́браз Животворя́щаго Дре́ва в пусты́ню прине́ся еси́,/ иде́же доны́не исцеле́ния неоску́дно источа́ются/ с ве́рою приходя́щим к тебе́.

Величание

Ублажа́ем тя,/ преподо́бне о́тче Ло́нгине,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Прохору Печерскому, Лебеднику, в Ближних пещерах почивающему, глас 4

Преподо́бне чудотво́рче, о́тче Про́хоре,/ препита́вый во гла́де а́лчущия хле́бом от бы́лия и со́лею от пе́пела./ Напита́й и нас пи́щею духо́вною,/ моля́ Христа́ Бо́га о душа́х на́ших.

Кондак, глас 2

Ве́лием воздержа́нием удруча́я плоть свою́, свя́те,/ лиши́вся пи́щи челове́ческия,/ зе́лием и траво́ю вме́сто хле́ба, пе́пелом же, а́ки со́лею, пита́лся еси́,/ чудоде́йственне Про́хоре./ Е́же ви́дя, Госпо́дь приложи́ зе́лие во хлеб и пе́пел в соль,/ и́миже ты мно́жество гла́дных препита́л еси́,/ тем тя чтим и ублажа́ем.

Величание

Ублажа́ем тя,/ преподо́бне о́тче Про́хоре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверной княгине Анне Новгородской, глас 4

От за́пада возсия́вши, я́ко звезда́ небосве́тлая,/ прия́ти Правосла́вную ве́ру сподо́билася еси́,/ в не́йже плод благосла́вный Росси́йстей земли́ прине́сши,/ свята́я благове́рная княги́не Анно,/ Христа́ всем се́рдцем возлюби́ла еси́,/ Того́ оправда́ния и зако́ны храня́щи./ Те́мже днесь всесвяту́ю па́мять твою́ пра́зднующе,/ грехо́в оставле́ние моли́твами твои́ми прие́млем.

Кондак, глас тойже

Днесь в све́тлой па́мяти твое́й/ Вели́кий Но́вград весели́тся,/ созыва́я всех ве́рных све́тло пра́здновати па́мять твою́,/ и мы ны́не, духо́вно ликовству́юще,/ ра́достно сла́вим тя и мо́лим:/ свята́я благове́рная княги́не Анно,/ предстоя́ Святе́й Тро́ице/ моли́ изба́вити Вели́кий Но́вград и всю зе́млю Ру́сскую/ от вся́ких бед и обстоя́ний и всем нам спасти́ся.

Величание

Ублажа́ем тя,/ свята́я благове́рная княги́не Анно,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.