23/5 Священномученика Климента, епископа Анкирского (312). Преподобного Геннадия Костромского и Любимоградского (Любомирского) (1565). Перенесение мощей святителя Феоктиста, архиепископа Новгородского (1786). Собор Костромских святых. Воспоминание VI Вселенского Собора (680–681).

Тропарь священномученику Клименту, епископу Анкирскому, глас 4

Лоза́ преподо́бства и сте́бль страда́льчества,/ цвет свяще́ннейший и плод богода́нный/ ве́рным, всесвяще́нне, присноцвету́щ дарова́лся еси́,/ но я́ко му́чеников сострада́лец/ и священнонача́льников сопресто́льник,/ моли́ Христа́ Бо́га/ спасти́ся душа́м на́шим.

Кондак, глас тойже

Лозы́ был еси́ честна́я розга́ Христо́ва,/ многострада́льне Кли́менте всехва́льне, я́влься,/ со стра́ждущими же взыва́л еси:/ Ты му́чеников, Христе́, све́тлое ра́дование.

Ин кондак, глас тойже

Сад благоцвету́щ израсте́ во оте́чествии свое́м,/ красе́н плод прозябе́ по вселе́нней во вре́мя страда́ний твои́х,/ те́мже па́мять твою́ чтим, преподо́бне Кли́менте./ Сего́ ра́ди источа́еши ми́ро, веселя́щее ду́ши на́ша.

Величание

Велича́ем тя,/ священному́чениче Кли́менте,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Геннадию, Костромскому и Любимоградскому (Любомирскому), глас 4

Я́ко пустыннолюби́вая го́рлица,/ от су́етнаго и многомяте́жнаго ми́ра в пусты́ню удали́вся,/ чистото́ю и гове́нием, моли́твами и тружде́нием/ просла́вил еси́ Бо́га в душе́ и телеси́ свое́м./ И та́ко благоче́стно пожи́в,/ яви́лся еси́, преподо́бне Генна́дие, пусты́ни Любимогра́дския украше́ние,/ и́ноком честна́го жития́ о́браз/ и те́плый моли́твенник за всех,/ притека́ющих к тебе́ с ве́рою.

Кондак, глас 3

Моли́твою и посто́м, тружде́нием и терпе́нием/ умертви́вый вся́кое пло́ти мудрова́ние,/ чистоты́ сосу́д благоле́пен,/ Боже́ственных даро́в и чуде́с прича́стник,/ и́ноком же до́блий наста́вник был еси́,/ сподвиза́яся блаже́нному Корни́лию, о́тче Богому́дре./ Сего́ ра́ди вопие́м:/ моли́ся ко Го́споду,/ да моли́твами твои́ми да́рует мир и спасе́ние душа́м на́шим.

Величание

Ублажа́ем тя,/ преподо́бне о́тче Генна́дие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Собору Костромских святых, глас 4

Днесь град Кострома́ вельми́ ва́ми хва́лится:/ в преде́лах бо земли́ Костромски́я,/ я́ко зве́зды светоза́рныя, возсия́вше,/ чудесы́ свои́ми вся озари́ли есте́./ И ны́не мо́литеся ко Го́споду, отцы́ преблаже́ннии Генна́дие, Паи́сие, Авраа́мие, Иа́кове, Мака́рие и Пахо́мие, со и́ными мно́гими на́шего края́ Небе́сными покрови́телями/ за град Кострому́ и всяк град, и страну́, и лю́ди,/ ве́рою и любо́вию вас почита́ющия,/ и о спасе́нии душ на́ших.

Кондак, глас 8

Костромска́го кра́я благоче́стия подви́жники и за гра́ды и ве́си страны́ Росси́йския те́плыя предста́тели яви́стеся,/ отцы́ преблаже́ннии, Христа́ Бо́га моли́те о нас,/ свяще́нный ваш собо́р почита́ющих/ и с любо́вию вопию́щих:/ ра́дуйтеся, отцы́ преди́внии, Костромска́го кра́я и всея́ Росси́и похвало́ и утвержде́ние.

Величание

Велича́ем вас,/ вси святи́и земли́ Костромски́я,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Ино величание

Ублажа́ем вас,/ преподо́бне о́тче Генна́дие/ и всех святы́х отце́в собо́р, Костромска́го края покрови́телей,/ вы бо мо́лите за нас/ Христа́ Бо́га на́шего.

Тропарь святителю Феоктисту, архиепископу Новгородскому, глас 3

Бо́жия Сло́ва Прему́дрости изря́дный служи́тель,/ а́нгельскаго жи́тельства и́стинный подража́тель,/ Боже́ственныя чистоты́ рачи́тель,/ архиере́ом сопресто́льниче, преподо́бным сожи́тельниче,/ па́стырская красота́,/ Вели́кому Но́вуграду похвала́,/ святи́телю пречестны́й Феокти́сте, о́тче наш,/ Ему́же, Сло́ву Бо́жию, в житии́ сем послужи́л еси́,/ моли́ спасти́ся душа́м на́шим.

Кондак, глас 8

Архиере́йское украше́ние,/ Вели́кому Но́вуграду Богодухнове́нное удобре́ние,/ су́щия бо в нем лю́ди на па́житех живоно́снаго зако́на Госпо́дня упа́сл еси́,/ и сего́ ра́ди в лице́ святы́х водворя́тися сподо́бися,/ и святу́ю твою́ па́мять мно́гими ле́ты сотвори́ неоскверне́нну,/ в не́йже, тя почита́юще, ра́дуйся, от души́ вопие́м ти,/ святи́телю о́тче Феокти́сте,/ Вели́кому Но́вуграду похвала́ и утвержде́ние.

Величание

Велича́ем тя,/ святи́телю о́тче Феокти́сте,/ и чтим святу́ю па́мять твою́, /ты бо мо́лиши за нас/ Христа́ Бо́га на́шего.