18/31 Святителей Афанасия (373) и Кирилла (444), архиепископов Александрийских. Преподобных схимонаха Кирилла и схимонахини Марии (ок. 1337), родителей преподобного Сергия Радонежского. Праведного Афанасия Наволоцкого (XVI-XVII). Святителя Максима Нового, бывшего деспота Сербского, архиепископа Влахозапланинского (1516).

Тропарь святителям Афанасию и Кириллу, архиепископам Александрийским, глас 3

Де́лы возсия́вше Правосла́вия,/ все погаси́вше злосла́вие,/ победи́телие, победоно́сцы бы́сте,/ благоче́стием вся обогати́вше,/ Це́рковь вельми́ украси́вше,/ досто́йно обрето́сте Христа́ Бо́га,/ да́рующаго нам ве́лию ми́лость.

Или сей тропарь, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви жи́вот наш.

Кондак, общий Афанасию и Кириллу Александрийским, глас 4

Священнонача́льницы велича́йшии благоче́стия/ и до́блии побо́рницы Це́ркве Христо́вы,/ вся соблюди́те пою́щия:/ спаси́, Ще́дре, ве́рою чту́щия Тя.

Тропарь святителю Афанасию, глас 3

Столп был еси́ Правосла́вия,/ Боже́ственными догма́ты подтвержда́я Це́рковь,/ священнонача́льниче Афана́сие,/ Отцу́ бо Сы́на единосу́щна пропове́дав,/ посрами́л еси́ А́рия./ О́тче преподо́бне ,/ Христа́ Бо́га моли́/ дарова́ти нам ве́лию ми́лость.

Кондак святителю Афанасию, глас 2

Правосла́вия насади́в уче́ния,/ злосла́вия те́рния изсе́кл еси́, умно́жив се́мя ве́ры одожде́нием Ду́ха, преподо́бне ;/ те́мже тя пое́м, Афана́сие.

Кондак святителю Кириллу, глас 6

Бе́здну нам уче́ний Богосло́вия источи́л еси́/ Я́ве от исто́чник Спа́совых, е́реси погружа́ющую,/ блаже́нне Кири́лле,/ и ста́до невреди́мо от треволне́ний спаса́ющую:/ страна́м бо всем наста́вник, преподо́бне ,/ я́ко Боже́ственная явля́я.

Величание

Велича́ем вас,/ святи́телие вели́ции Афана́сие и Кири́лле,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобным схимонаху Кириллу и схимонахини Марии, родителям преподобного Сергия Радонежского, глас 3

Блаже́нств Христо́вых прича́стницы,/ честна́го супру́жества и попече́ния о ча́дех до́брый о́бразе,/ пра́веднии Кири́лле и Мари́е,/ плод благоче́стия, Се́ргия преподо́бнаго, нам яви́вший,/ с ни́мже усе́рдно моли́те Го́спода/ низпосла́ти нам дух любве́ и смиренному́дрия,/да в ми́ре и единомы́слии просла́вим Тро́ицу Единосу́щную.

Кондак, глас 4

Днесь, ве́рнии, соше́дшеся,/ восхва́лим дво́ицу блаже́нную,/ благове́рнаго Кири́лла и Мари́ю добронра́вную,/ ти́и бо мо́лятся вку́пе со возлю́бленным сы́ном свои́м, преподо́бным Се́ргием,/ ко Еди́ному во Святе́й Тро́ице Бо́гу/ Оте́чество на́ше в правове́рии утверди́ти,/до́мы ми́ром огради́ти,/ ю́ныя от напа́стей и собла́знов изба́вити,/ ста́рость укрепи́ти и спасти́ ду́ши на́ша.

Величание

Ублажа́ем вас,/ преподо́бнии Кири́лле и Мари́е,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь праведному Афанасию Наволоцкому, глас 1

Боже́ственною благода́тию просвети́вся,/ и по сме́рти да́руеши исцеле́ния притека́ющим к ра́це моще́й твои́х, прему́дре Афана́сие./ Те́мже и мы ны́не чтим честны́х моще́й твои́х явле́ние,/ веселя́ще вку́пе ду́ши и телеса́./ Тем вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 8

Вы́шния красоты́ жела́я... (общий).

Величание

Ублажа́ем тя,/ святы́й пра́ведный Афана́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Максиму Новому, бывшему деспоту* Сербскому, архиепископу Влахозапланинскому, глас 3

Стра́нное рожде́ние и воспита́ние был еси́, о́тче, но па́ки водвори́ся во вла́сти у своего́ наро́да,/ Небе́снаго Ца́рствия жела́я,/ земно́е ца́рствие оста́вил еси́/ и смире́нием Вы́шнее сокро́вище получи́л еси́,/ преблаже́нне Макси́ме,/ моли́, мо́лимся, о душа́х на́ших.

Кондак, глас 2

Крест взем, мно́гия ско́рби и изгна́ния подъя́л еси́,/ святи́телю Макси́ме всеосвяще́нне,/ оте́чества твоего́ и Бо́гом вруче́ннаго ста́да лиша́емь,/ вся бо до́блественне терпе́л еси́,/ душе́внаго ра́ди твоего́ просвеще́ния.

Величание

Велича́ем тя,/ святи́телю о́тче Макси́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.