20/3 Предпразднство Введения во храм Пресвятой Богородицы. Преподобного Григория Декаполита (816). Святителя Прокла, архиепископа Константинопольского (446–447). Преподобного Диодора (Дамиана) Юрьегорского, Каргопольского (1633). Иконы Божией Матери «Соболевская» (1282; под Киевом).

Тропарь предпразднству, глас 4

Ра́дость предобруча́ет всем Анна ны́не,/ печа́ли сопроти́вный плод прозя́бши, еди́ну Присноде́ву,/ ю́же и приво́дит, моли́твы исполня́ющи,/днесь веселя́щися, в храм Госпо́день,/я́ко су́щий храм Бо́га Сло́ва и Ма́терь Чи́стую.

Кондак, глас тойже

Весе́лия днесь вселе́нная испо́лнися вся/ в благознамени́том пра́зднице Богоро́дицы,/ зовуще:/ Та есть сень Небе́сная.

Тропарь общий преподобному Григорию Декаполиту и Проклу, архиепископу Константинопольскому, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Тропарь преподобному Григорию Декаполиту, глас 3

Образ был еси́ воздержа́ния,/ Боже́ственным Ду́хом вся просвети́в,/ правове́рия тече́ние соверши́л еси,/ уче́нием мир просвети́л еси́/ и злове́рных обличи́л еси́ смы́слы,/ о́тче преподо́бне Григо́рие,/ Христа́ Бо́га моли́ дарова́ти нам ве́лию ми́лость.

Кондак, глас тойже

Све́тлое тя со́лнце Це́рковь познава́ет,/ доброде́телей красота́ми и исцеле́ний луча́ми/ всех просвеща́я, Христо́в уго́дниче./ Те́мже пра́зднуем честну́ю па́мять твою́/ и почита́ем по́двиги твоя́,/ всеблаже́нне о́тче, прему́дре Григо́рие.

Величание

Ублажа́ем тя,/ преподо́бне о́тче Григо́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Проклу, архиепископу Константинопольскому, глас 4

И́же Боже́ственным нача́лом прему́дрости,/ стра́хом Госпо́дним утве́рждся,/ отту́ду свяще́нными восхожде́нии возше́л еси́/ во учени́чество Златоу́ста,/ и, архиере́йскаго того́ престо́ла досто́ин быв чистоты́ добро́тами,/ апо́стольским пра́вилом себе́ вообрази́в,/ не себе́ живы́й, но Христу́ и ста́ду твоему́/ Тем в нетле́нный живо́т апо́стольски всели́лся еси́,/ иера́рше Про́кле,/ моли́ Христа́ Бо́га/ спасти́ся душа́м на́шим.

Кондак, глас 4

Досто́йно днесь торжеству́ет/ всех градо́в честне́йший вои́стину, в честно́м преставле́нии твое́м,/ о́тче отце́в, Про́кле му́дре.

Ин кондак, глас 8

Всечестна́го святи́теля, Ца́рскаго гра́да престо́л украси́вшаго/ и сокро́вищем безце́нным того́ обога́щшаго, пречестны́ми мощми́ Златоу́стовыми,/ и́мже сло́во живо́тно* стяжа́, просвеща́я ве́рно чту́щия его́,/ пе́сньми похвале́ния того́ ра́достно ублажи́м, зову́ще:/ ра́дуйся, архиере́ю, о́тче свяще́нный.

Величание

Велича́ем тя,/ святи́телю о́тче Про́кле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Диодору (Дамиану) Юрьегорскому, Каргопольскому, глас 2

Жела́нием ду́ха распали́вся,/ мяте́ж мирски́й отри́нув,/ ко Еди́ному Бо́гу любо́вию прилепи́ся/ и Того́ вседу́шне взыску́я,/ во вну́треннюю пусты́ню оты́де,/ при вода́х всели́ся,/ иде́же в слеза́х и труде́х пребыва́я многоде́тное вре́мя,/ в терпе́нии мно́зе житие́ а́нгельское проходи́л еси́/ в наставле́нии Боже́ственнаго Ра́зума,/ ста́до и́нок собра́ му́дре,/ и́хже посеща́я, не оста́ви, Диодо́ре преподо́бне ,/ о́тче наш, Пресвяте́й Тро́ице моля́ся/ от зол вся́ческих изба́вити и спасти́ ду́ши на́ша.

Кондак, глас 2

От ю́ности, преподо́бне ,/ плотску́ю во́лю в поста́х и моли́твах источи́л еси́,/ крест свой взем, Христо́ви после́довал еси́,/ те́мже и к Вы́шним тече́нием ра́достно устреми́л себе́,/ иде́же со все́ми святы́ми Святе́й Тро́ице предстои́ши,/ но и ны́не ста́до свое́ посеща́я,/ помина́й чту́щих пресвяту́ю па́мять твою́,/ да вси благода́рно вопие́м ти:/ ра́дуйся, богому́дре Диодо́ре, наста́вниче наш пусты́нный.

Величание

Ублажа́ем тя,/ преподо́бне о́тче Диодо́ре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.