28/10 Мученицы Параскевы, нареченной Пятницы (III). Мучеников Терентия и Неониллы и семи чад их (249–250). Преподобного Стефана Савваита,творца канонов (IX). Святителя Арсения I, архиепископа Сербского (1266). Преподобного Иова, игумена Почаевского (1651). Святителя Димитрия, митрополита Ростовского (1709). Преподобного Нестора, некнижного, Печерского, в Дальних пещерах почивающего (XIV).

Тропарь мученице Параскеве Пятнице, глас 4

Прему́драя и всехва́льная Христо́ва му́ченица Параске́ва,/ му́жескую кре́пость прии́мши,/ же́нскую же не́мощь отве́ргши,/ диа́вола победи́, и мучи́теля посрами́,/ вопию́щи и глаго́лющи:/ прииди́те, те́ло мое́ мече́м ссецы́те, и огне́м сожги́те,/ аз бо, ра́дующися, иду́ ко Христу́, Жениху́ моему́/ Тоя́ моли́твами, Христе́ Бо́же, спаси́ ду́ши на́ша.

Ин тропарь, глас 8

И́же ве́руя, и му́жеством душе́вным, тезоимени́тне,/ диа́вола посрами́ла еси́/ и мучи́тельское преще́ние и ра́ны до́блественне победи́ла еси́,/ му́ченице Параске́во, вопия́:/ мече́м сосеца́йте и огне́м сожиза́йте те́ло мое́,/ я́ко да, ра́дуяся, прииду́ Жениху́ моему́ Христу́ Бо́гу./ Его́же моли́ спасти́ся душа́м на́шим.

Кондак, глас 3

Всесвято́е и непоро́чное муче́ние прине́сши,/ я́ко ве́но* пречестно́е безсме́ртному Жениху́ Христу́/ а́нгельское ликостоя́ние возвесели́ла еси́,/ и победи́ла еси́ де́монския ко́зни;/ сего́ ра́ди тя че́стно ве́рою чтим,/ му́ченице Параске́во, многострада́льная.

Величание

Велича́ем тя,/ страстоте́рпице Христо́ва Параске́во,/ и чтим честно́е страда́ние твое́,/ е́же за Христа́/ претерпе́ла еси́.

Тропарь мученикам Терентию, Неонилле и их чадам, глас 4

Му́ченицы Твои́, Го́споди... (общий мученикам).

Кондак, глас тойже

Му́ченическая честна́я па́мять прии́де днесь, веселя́щи вся́ческая,/ Тере́нтия прему́драго и подру́жии его́./ Те́пле у́бо стеце́мся, да прии́мем исцеле́ние,/ си́и бо благода́ть прия́ша от Ду́ха Свята́го,/ исцеля́ти неду́ги и боле́зни душ на́ших.

Величание

Велича́ем вас,/ страстоте́рпцы святи́и Тере́нтие и Неони́лле со ча́дами,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Стефану Савваиту, творцу канонов, глас 8

Правосла́вия наста́вниче... (общий исповеднику).

Ин тропарь, глас 5

Воздержа́нием житие́ украси́ и стра́сти умертви́в,/ посрами́л еси́ вра́жия прило́ги, о́тче Стефа́не,/ и приложи́ся к Бо́гу, чудотво́рец показа́ся,/ в ве́чней сла́ве со а́нгелы лику́я,/ с ни́ми же моли́ поми́ловати ду́ши на́ша.

Кондак, глас 4

Насади́л еси́ доброде́телей рай,/ и напои́л еси́ то́ками слез твои́х,/ я́ко жи́зни, всесла́вне, дре́во получи́в,/ спаси́ моли́твами твои́ми от тли ста́до твое́,/ изба́ви от обстоя́ний те́пле чту́щих тя, Стефа́не,/ тя бо предста́теля велича́йша, му́дре,/ вси ве́рою и любо́вию стяжа́хом.

Величание

Ублажа́ем тя,/ преподо́бне о́тче Стефа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Арсению I, архиепископу Сербскому, глас 8

Ми́лости наста́вниче, и благоутро́бия сокро́вище,/ е́же всем отве́рзл еси́,/ правове́рия учи́телю, и архиере́ев Боже́ственное удобре́ние,/ о́тче наш иера́рше Арсе́ние,/ ни́щих был еси́ засту́пник./ Тем моли́ Христа́ Бо́га,/ просвети́ти ду́ши на́ша, да не когда́ у́снем в смерть.

Кондак, глас 2

В пи́щи слове́с твои́х, Богоно́се Арсе́ние,/ разу́мно ча́да твоя́ пита́я,/ язы́ком хваля́, устна́ми же пе́ние принося́, веща́нием зовы́й:/ Христе́, Ты еси Свет неизрече́нный.

Величание

Велича́ем тя,/ святи́телю о́тче Арсе́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Иову, игумену Почаевскому, глас 4

Многострада́льнаго пра́отца долготерпе́ние стяжа́в,/ Крести́телеву воздержа́нию уподобля́яся,/ Боже́ственныя же ре́вности обою́ приобща́лся,/ тех имена́ досто́йно прия́ти сподо́бился еси́,/ и и́стинныя ве́ры был еси́ пропове́дник безбоя́знен;/ те́мже мона́хов мно́жества ко Христу́ приве́л еси́,/ и вся лю́ди в Правосла́вии утверди́л еси́,/ И́ове преподо́бне о́тче наш,/ моли́ спасти́ся душа́м на́шим.

Ин тропарь на обретение мощей, глас тойже

Возложи́в на ся и́го Христо́во от ю́ности,/ преподо́бне о́тче И́ове,/ многоле́тне свя́то подвиза́лся еси́/ на по́прище благоче́стия во оби́тели У́горницкой/ и на о́строве Дубе́нстем,/ и прите́кл к горе́ Поча́евской,/ знамена́нней цельбоно́сною стопо́ю Пресвяты́я Богоро́дицы,/ в те́сной пеще́ре ка́менней/ богомы́слия ра́ди и моли́твы многокра́тно заключа́лся еси́,/ и, благода́тию Бо́жиею укрепля́лся,/ му́жественно потруди́лся еси́/ на по́льзу оби́тели твоея́,/ ку́пно же и проти́ву враго́в Правосла́вия/ и благоче́стия христиа́нскаго,/ и наста́вив сицево́му ополче́нию и́ночествующих,/ победи́тели тех предста́вил еси́ своему́ Влады́це и Бо́гу./ Того́ моли́ спасти́ся душа́м на́шим.

Кондак, глас тойже

Яви́лся еси́ и́стинныя ве́ры столп,/ Ева́нгельских же за́поведей ревни́тель,/ горды́ни обличе́ние, смире́нным же предста́тель и науче́ние;/ те́мже и ублажа́ющим тя грехо́в отпуще́ние испроси́,/ и оби́тель твою́ невреди́му сохрани́,/ И́ове о́тче наш,/ многострада́льному подо́бный.

Ин кондак на обретение мощей, глас 8

Возсия́ от спу́да земна́го благода́тная луча́ честны́х моще́й твои́х,/ уго́дниче Бо́жий,/ я́же благоче́стно пожи́в в ве́ре Христа́ Бо́га на́шего,/ дости́гл еси́ доброде́телей соверше́нства,/ и, оста́вль сла́дость жития́ преходя́щаго,/ в пеще́ре горы́ Поча́евския в поще́нии, моли́твах и труде́х свя́то потруди́лся еси́,/ и те́ми те́ло твое́ увяди́л еси́./ Ны́не же прише́д к Бо́гу в безмяте́жный и ве́чный поко́й,/ мо́лишися о всех, с ве́рою к тебе́ прибега́ющих./ Те́мже благода́рне вопие́м ти:/ ра́дуйся, о́тче Йове, пресла́вный уго́дниче Бо́жий/ и оби́тели Поча́евския украше́ние.

Величание

Ублажа́ем тя,/ преподо́бне о́тче Йове,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Димитрию, митрополиту Ростовскому, глас 8

Правосла́вия ревни́телю, и раско́ла искорени́телю,/ Росси́йский целе́бниче, и но́вый к Бо́гу моли́твенниче,/ списа́ньми твои́ми бу́их уцелому́дрил еси́;/ цевни́це духо́вная, Дими́трие блаже́нне,/ моли́ Христа́ Бо́га спасти́ся душа́м на́шим.

Кондак, глас 4

Звезду́ Росси́йскую от Ки́ева возсия́вшую,/ и чрез Но́вград Се́верский в Росто́в дости́гшую,/ всю же страну́ сию́ уче́ньми и чудесы́ озари́вшую,/ ублажи́м златослове́снаго учи́теля Дими́трия,/ той бо всем вся написа́, я́же к наставле́нию,/ да всех приобря́щет, я́коже Па́вел Христу́,/ и спасе́т правове́рием ду́ши на́ша.

Величание

Велича́ем тя,/ святи́телю о́тче Дими́трие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Нестору, некнижному, Печерскому, в Дальних пещерах почивающему, глас 2

Чист и прав сый се́рдцем,/ и свят, преподо́бне Не́сторе, душе́ю,/ прост же па́ки и не уме́я сам чести́ кни́ги,/ сего́ ра́ди чту́щим я приле́жно внима́л еси́,/ и, о́ная в себе́ соблюда́я, спе́шно тща́лся еси́ исправля́ти,/ я́же я́ко разу́мен испо́лнив, обре́л еси́ Ца́рствие Небе́сное.

Кондак, глас 5

Ди́вный во святы́х Свои́х Госпо́дь/ удиви́ся изря́дне в сем святе́м Не́сторе,/ я́же а́ще и безкни́жен сый и прост,/ но превзы́де прему́дрых и посрами́ кни́жников,/ чту́щих и не творя́щих,/ насле́ди бла́га ве́чныя/ и мо́лит при́сно е́же спасти́ся нам.

Величание

Ублажа́ем тя,/ преподо́бне о́тче Не́сторе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.