8/21 Рождество Пресвятой Владычицы нашей Богородицы и Приснодевы Марии. Иконы Софии, Премудрости Божией (Киевской). Чтимые иконы Рождества Пресвятой Богородицы: Изяславская, Сямская (1524), Глинская (XVI), Лукиановская (XVI), Исааковская (1659). Холмской, Курской-Коренной «Знамение» (1295), Почаевской (1559), Леснинской и Домницкой (1696) икон Божией Матери.

Тропарь празднику, глас 4

Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце пра́вды, Христо́с Бог наш,/ и разруши́в кля́тву, даде́ благослове́ние,/ и упраздни́в сме́рть, дарова́ нам живо́т ве́чный.

Кондак, глас 4

Иоаки́м и А́нна поноше́ния безча́дства,/ и Ада́м и Е́ва от тли сме́ртныя свободи́стася, Пречи́стая, во святе́м рождестве́ Твое́м./ То пра́зднуют и лю́дие Твои́, вины́ прегреше́ний изба́вльшеся,/ внегда́ зва́ти Ти:/ непло́ды ражда́ет Богоро́дицу и Пита́тельницу жи́зни на́шея.

Величание

Велича́ем Тя,/ Пресвята́я Де́во,/ и чтим святы́х Твои́х роди́телей,/ и всесла́вное сла́вим рождество́ Твое́.

Тропарь Софии, Премудрости Божией, глас 4

Ве́лия и неизрече́нная Прему́дрости Бо́жия си́ла/ смотре́ния плотска́го та́инства!/ Софи́е Преимени́тая,/ де́вственных душе́ и неизглаго́ланнаго де́вства чистото́,/ смире́нныя му́дрости и́стино,/ поко́ище Свята́го Ду́ха,/ пречестны́й хра́ме непостижи́мыя сла́вы Его́,/ огнезра́чный престо́ле Христа́ Бо́га на́шего,/ в Тя бо всели́ся неизрече́нно Сло́во Бо́жие, и плоть бысть,/ Неви́димый яви́ся,/ и неприкоснове́нный из Тебе́ изы́де,/ и с челове́ком поживе́ врага́ иско́ннаго уловля́я/ и челове́ки от кля́твы дре́вния свобожда́я,/ возводя́ па́ки, отню́дуже испадо́хом./ Мо́лимтися, Влады́чице,/ отягче́нныя ны во гресе́х лю́тых поми́ловати/ и спасти́ ду́ши на́ша,/ и, я́ко человеколюби́вая и милосе́рдая Цари́ца,/ Ма́ти Прему́дрости Бо́жия Сло́ва,/ при́зри на ны, гре́шныя лю́ди Твоя́,/ и умилосе́рдися, заступи́ от напа́стей и скорбе́й лю́тых/ и гра́ды на́ша невреди́мы сохрани́,/ иде́же ны́не и́мя Твое́ пресвято́е боголе́пно сла́вится.

Ин тропарь, глас 1

Преве́чная Прему́дросте, Христе́ Бо́же наш!/ Боже́ственным смотре́нием Свои́м преклони́вый Небеса́,/ благоволи́л еси́ всели́тися во утро́бу Чи́стыя Отрокови́цы,/ средосте́ние вражды́ разруши́в,/ освяти́л еси́ естество́ на́ше/ и Ца́рствие Твое́ нам отве́рзл еси́;/ сего́ ра́ди Тебе́, Творца́ на́шего и Изба́вителя,/ и ро́ждшую Тя, спасе́ния на́шего та́йне послужи́вшую Де́ву Чи́стую,/ правосла́вно велича́ем.

Кондак, глас 8

Притыце́м, лю́дие, к чу́дному о́бразу Прему́дрости Бо́жия, Цари́цы и Богоро́дицы:/ Царя́ Небе́снаго Ма́ти, Христа́ Бо́га на́шего,/ услы́ши нас, гре́шных и недосто́йных раб Твои́х,/ в час сей припа́дающих и моля́щихся с воздыха́нием и слеза́ми,/ уми́льно глаго́лющих и приле́жно вопию́щих:/ от бед изба́ви нас, Влады́чице, и заступи́,/ и не пре́зри воздыха́ния на́шего и слез,/ и изми́ нас от вся́кия ско́рби и напа́сти,/ я́ко мо́жеши, хотя́щи,/ ра́зве Тебе́ Предста́тельницы ины́я и хода́тая те́пла не и́мамы к Сы́ну Твоему́ и Бо́гу на́шему,/ да спасе́т Тебе́ ра́ди ду́ши на́ша.

Ин кондак, глас 4

Притеце́м, правосла́внии лю́дие,/ к прему́дрости Бо́жией/ и ви́дим чудотво́рную ико́ну Пречи́стыя Богома́тере,/ ю́же имену́ем по явле́нию Софи́ю, Прему́дрость Бо́жию,/ зане́ храм бысть одушевле́н Единоро́днаго Сы́на и Сло́ва Бо́жия./ Сия́ у́бо светолу́чно сия́ет в пречестне́м хра́ме Свое́м/ и сердца́ на́ша весели́т, приходя́щих с ве́рою/ и взира́ющих со стра́хом и благогове́нием на пречи́стую сию́ ико́ну,/ помышля́юще в сердца́х на́ших,/ я́ко вои́стину Прему́дрости Бо́жия есть селе́ние/ и та́инства Его́ смотре́ние,/ на упова́ние бо ве́рным/ воображе́ние огнезра́чное Ея́ зрим/ и покланя́емся, я́ко и́стинному и непоро́чному Ея́ де́вству/ в рождестве́ и по рождестве́ па́ки;/ от Нея́же изы́де Огнь Боже́ственный,/ попаля́я тле́нныя стра́сти/ и просвеща́я ду́ши на́ша и чи́сты сотворя́я,/ и́мже и ве́ки сотвори́ Оте́ц/ Той же и Му́дрость, Сло́во и Си́ла нарече́тся,/ сия́ние сла́вы и О́браз О́тчи Ипоста́си./ И па́ки у́бо мо́лим/ и, припа́дающе, лобыза́ем пречестну́ю ико́ну Прему́дрости Бо́жия Ма́тере/ и велегла́сно вопие́м:/ о Милосе́рдая Влады́чице,/ спаси́ рабы́ Своя́ от наси́лия диа́воля,/ от нахожде́ния иноплеме́нных и междоусо́бныя бра́ни,/ я́ко Ты еси́ всех благи́х Пода́тельница и Покрови́тельница/ притека́ющим к Тебе́ с ве́рою и прося́щим ве́лия ми́лости.

Тропарь Божией Матери ради иконы Ее «Знамение» Курской-Коренной, глас 4

Я́ко необори́мую сте́ну и исто́чник чуде́с/ стяжа́вше Тя раби́ Твои́,/ Богоро́дице Пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй/ и душа́м на́шим ве́лию ми́лость.

Кондак, глас тойже

Честна́го о́браза Твоего́ зна́мение/ пра́зднующе лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:/ ра́дуйся, Де́во, христиа́н похвало́.

Величание

Досто́йно есть блажи́ти Тя,/ Богоро́дице Де́во,/ честне́йшую Херуви́м/ и сла́внейшую без сравне́ния Серафи́м.

Или:

Песнь вся́ку духо́вную принесе́м Богоро́дице.

Ино величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже ди́вную побе́ду на сопроти́вныя/ гра́ду Твоему́ дарова́ла еси́.

Ино величание

Велича́ем Тя,/ Пресвята́я Де́во,/ и чтим о́браз Твой честны́й,/ и́мже показа́ла еси́/ пресла́вное зна́мение.

Тропарь Божией Матери ради иконы Ее «Почаевская», глас 5

Пред свято́ю Твое́ю ико́ною, Влады́чице,/ моля́щийся исцеле́ний сподобля́ются,/ ве́ры и́стинныя позна́ние прие́млют,/ и ага́рянская наше́ствия отража́ют./ Те́мже и нам, к Тебе́ припа́дающим,/ грехо́в оставле́ние испроси́,/ по́мыслы благоче́стия сердца́ на́ша просвети́/ и к Сы́ну Твоему́ моли́тву вознеси́/ о спасе́нии душ на́ших.

Ин тропарь, глас 4

К Богоро́дице приле́жно ны́не притеце́м/ гре́шнии и смире́ннии и припаде́м/ к ди́вному о́бразу Ея́, и́же на горе́ Поча́евскей,/ к нему́же уми́льно взира́юще и моля́щеся,/ Цари́це и Влады́чице, из глубины́ души́ вопие́м:/ о Пречу́дная Де́во, Ма́ти Го́спода Вы́шняго,/ от лет дре́вних избра́вшая оби́тель Поча́евскую в ме́сто селе́ния Своего́!/ Зе́млю оте́чественную на́шу в Правосла́вии и ми́ре утверди́,/ христолюби́вому во́инству спобо́рствуй/ и спаси́ всех предстоя́щих и моля́щихся Тебе́/ умиле́нною душе́ю и сокруше́нным се́рдцем/ пред пречи́стым Твои́м о́бразом со слеза́ми./ Не отврати́ рабы́ Твоя́ тщи:/ Тя бо и еди́ну наде́жду и́мамы.

Кондак, глас 1

Исто́чник исцеле́ний и ве́ры Правосла́вныя утвержде́ние/ Поча́евская Твоя́ ико́на, Богоро́дице, яви́ся,/ те́мже и нас, к ней притека́ющих,/ от бед и искуше́ний свободи́,/ Ла́вру Твою́ невреди́му сохрани́,/ Правосла́вие во о́крест стоя́щих страна́х утверди́/ и грехи́ разреши́ моли́твенник Твои́х:/ ели́ка бо хо́щеши, мо́жеши.

Величание

Велича́ем Тя,/ Пресвята́я Де́во,/ и почита́ем честну́ю ико́ну Твою́,/ ю́же от лет дре́вних/ на горе́ Поча́евстей просла́вила еси́.

Тропарь Божией Матери ради иконы Ее «Глинская», глас 4

Дне́сь, благове́рнии лю́дие,/ осеня́емии святы́м Богома́тери о́бразом,/ во умиле́нии глаго́лем:/ Влады́чице, помози́ рабо́м Твои́м/ в напа́стех, ско́рбех и боле́знех,/ обремене́ны бо грехми́ мно́гими,/ и изба́ви ны от вся́каго зла,/ моля́щи Сы́на Твоего́, Христа́ Бо́га на́шего,/ спасти́ ду́ши на́ша.

Кондак, глас 8

Аще и мно́гажды ико́на Твоя́, Богоро́дице,/ уноси́ма бысть с ме́ста явле́ния,/ оба́че чуде́сне в пусты́ню возвраща́шеся,/ отону́дуже всем ве́рным подае́т бла́го потре́бное.

Величание

Велича́ем Тя,/ Пресвята́я Де́во,/ и чти́м о́браз Твой святы́й,/ и́мже боле́зни на́ша врачу́еши/ и ду́ши на́ша к Бо́гу возво́диши.