28/11 Преподобного Харитона Исповедника (ок. 350). Преподобных схимонаха Кирилла и схимонахини Марии, родителей преподобного Сергия Радонежского (ок. 1337). Собор преподобных отцев Киево-Печерских, в Ближних пещерах (преподобного Антония) почивающих. Преподобного Иродиона Илоезерского (1541). Благоверного князя Вячеслава Чешского (935).

Тропарь преподобному Харитону Исповеднику, глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́/ и был еси́ свети́льник вселе́нней, сия́я чудесы́, Харито́не о́тче наш./ Моли́ Христа́ Бо́га спасти́ся душа́м на́шим.

Кондак, глас 2

Наслади́вся, богому́дре, воздержа́ния,/ и пло́ти твоея́ вожделе́ния обузда́в,/ яви́лся еси́ ве́рою возраща́емь/ и, я́ко жи́зни дре́во, посреде́ рая́ процве́л еси́,/Харито́не всеблаже́нне, свяще́ннейший.

Величание

Ублажа́ем тя,/ преподо́бне о́тче Харито́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобным схимонаху Кириллу и схимонахине Марии, родителям преподобного Сергия Радонежского, глас 3

Блаже́нств Христо́вых прича́стницы,/ честна́го супру́жества и попече́ния о ча́дех до́брый о́бразе,/ пра́веднии Кири́лле и Мари́е,/ плод благоче́стия, Се́ргия преподо́бнаго нам яви́вший,/ с ни́мже усе́рдно моли́те Го́спода/ низпосла́ти нам дух любве́ и смиренному́дрия,/ да в ми́ре и единомы́слии просла́вим Тро́ицу Единосу́щную.

Кондак, глас 4

Днесь, ве́рнии, соше́дшеся,/ восхва́лим дво́ицу блаже́нную, благове́рнаго Кири́лла и Мари́ю добронра́вную,/ ты́я бо мо́лятся вку́пе со возлю́бленным сы́ном свои́м, преподо́бным Се́ргием,/ ко Еди́ному во Святе́й Тро́ице Бо́гу/ оте́чество на́ше в правове́рии утверди́ти,/ до́мы ми́ром огради́ти,/ ю́ныя от напа́стей и собла́знов изба́вити,/ ста́рость укрепи́ти и спасти́ ду́ши на́ша.

Величание

Ублажа́ем вас,/ преподо́бнии Кири́лле и Мари́е,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобным отцам Киево-Печерским, в Ближних (Антониевых) пещерах почивающих, глас 4

Столп огнезра́чный и светоно́сное со́лнце, возсия́вшее на горе́ Пече́рстей,/ вели́каго Анто́ния со всем собо́ром Богоно́сных оте́ц приво́дим Тебе́, Христе́, в моли́тву,/ и́хже ра́ди мо́лим пода́ждь оби́тели на́шей благода́ть и душа́м на́шим ве́лию ми́лость.

Ин тропарь, глас 2

Егда́ снидо́сте во гро́бы и саме́х себе́ заключи́сте,/ тогда́ стра́сти умертви́вше плотски́я,/ спогребо́стеся Христу́, Богоно́снии,/ и диа́вольския в подзе́мных разруши́сте огра́ды./ Сего́ ра́ди а́нгели венцы́ с Небе́с вам подаю́т.

Кондак, глас 8

Отцы́ всечестни́и, ли́че богокра́сный,/ чуде́с мно́гих исто́чницы, ми́ро источа́ющий,/ сокро́вища краснобога́тная Госпо́дня, в земли́ сокрове́нная,/ не преста́йте, мо́лим вы, о нас моли́тися ко Го́споду,/ да зове́м вам:/ ра́дуйтеся, всему́ ми́ру свети́льницы.

Ин кондак, глас 2

Лик по́стнический собра́ся у́мне,/ мы́сленныма зря́ще очи́ма,/ прииди́те, лю́дие, хвала́ми почти́те,/ покланя́ющеся моще́м их,/любо́вныя принеси́те да́ры,/ ти́и бо суть к Бо́гу хода́тае и моли́твенницы о душа́х на́ших.

Величание

Велича́ем вас,/ преподо́бнии отцы́ на́ши Пече́рскии,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.

Тропарь преподобному Иродиону Илоезерскому, глас 4

Возсия́ днесь све́тло, ра́дуется град Белое́зеро,/ име́я во о́бласти свое́й вели́каго свети́льника, блаже́ннаго отца́ Иродио́на./ Соше́дшеся у́бо и ви́девше лю́дие многоцеле́бную ра́ку его́, пресве́тло осиява́ющу мно́гими дея́нии чуде́с да́ра./ Прося́щим с ве́рою исцеле́ния,/ стра́ждущим от разли́чных неду́гов подае́т здра́вие./ я́ко фи́никс насажде́н в дому́ Бо́жия Ма́тере,/ я́ко кедр при вода́х благода́тию Христо́вою расту́щ,/ и я́коже шипо́к благово́нен обстоя́нии вода́ми огражде́н./ И мы, ча́да твоя́ су́ще, припа́дающе мо́лимтися:/ моли́ Пресвяту́ю Тро́ицу,/ е́же сохранится гра́ду на́шему от нахожде́ния иноплеме́нник/ и от враг ви́димых и неви́димых./ Я́ко да твои́ми ко Го́споду моли́твами спаса́емии,/ всегда́ про́сим ве́рою у тебе́:/ моли́ о нас Христа́ Бо́га спасти́ся душа́м на́шим.

Кондак, глас 1

Слы́шавше, отцы́ и бра́тия, неме́дленно притеце́м/ и немо́лчно и усе́рдно вопие́м ему́, глаго́люще:/ о пресве́тлый наш о Го́споде учи́телю, о́тче Иродио́не!/ Во спаса́емых по́двигах ревни́тель был еси́/ преподо́бному Корни́лию и стопа́м после́довал еси́ его́./ И еди́н Еди́ному Бо́гу изво́ли служи́ти,/ слеза́ми и посто́м и бде́нием изнуря́я те́ло свое́ ве́чныя ра́ди жи́зни./ Го́сподеви рабо́тая, крест Госпо́день на ра́мо взем, после́довал еси́ Ему́/ бо́дренными свои́ми моли́твами вооружа́лся неви́димо на врага́. И ны́не зре́ти сподо́бися во све́те неизрече́нныя ра́дости Пресвяту́ю Тро́ицу./ Сла́ва Бо́гу Все́льшемуся в тя,/ сла́ва Укре́пльшему тя,/ сла́ва Де́ющу тобо́ю все́м исцеле́ние.

Величание

Ублажа́ем тя,/ преподо́бне о́тче Иродио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверному князю Вячеславу Чешскому, глас 4

Дне́сь а́нгели с челове́ки ра́дуются вку́пе о́бщим весе́лием./ Не́бо и земля́ све́тло лику́ют в па́мять ти, свя́те. И мы, гре́шнии, приле́жно ти вопие́м:/ помоли́сь к Влады́це о нас, изба́вити ны от напа́сти, ви́димых и неви́димых враг, чту́щих пресве́тлую ти па́мять.

Ин тропарь, глас 1

Благочести́ваго ко́рене отра́сль пречестна́я,/ святы́й благове́рный вели́кий кня́же Вячесла́ве,/ побо́рник быв Восто́чныя в Че́хах Це́ркве/ и прибе́жище те́плое убо́гим и си́рым,/ я́ко вторы́й Авель, незло́биве претерпе́л еси́ смерть,/ во главу́ усече́н руко́ю бра́та пред враты́ церко́вными./ Те́мже и всели́ тя Христо́с,/ я́ко испове́дника пра́выя ве́ры во оби́тели Небе́сныя,/ просла́ви всечестну́ю па́мять твою́ в слове́нских язы́цех/ и дарова́ тя ско́раго помо́щника всем, почита́ющим тя./ Моли́ся о лю́дех твои́х ко Го́споду,/ да обрати́т их в ло́но Правосла́вныя Це́ркве и спасе́т ду́ши на́ша.

Кондак, глас 1

С ли́ки а́нгельскими предстоя́, блаже́нне кня́же Вячесла́ве,/ наслажда́ешися Боже́ственныя и неизрече́нныя добро́ты,/ и отту́ду благоде́тельныя да́ры поче́рп чуде́с,/ всем притека́ющим ве́рою под твою́ святы́ню/ источа́еши цельба́м дарова́ние.

Величание

Велича́ем тя,/ благове́рный кня́же Вячесла́ве,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.