12/25 Отдание праздника Рождества Пресвятой Богородицы. Священномученика Автонома, епископа Италийского (313)⁷. Перенесение мощей праведного Симеона Верхотурского (1704).

Тропарь священномученику Автоному, епископу Италийскому, глас 4

И нра́вом прича́стник, и престо́лом наме́стник... (общий священномученику).

Кондак, глас 2

Боже́ственная, прему́дре, непоро́чне тайново́дил еси́,/ же́ртва прия́тна был еси́, Богоблаже́нне,/ Христо́ву бо пил еси́ ча́шу, пресла́вне,/ свети́льниче всеми́рный,/ моля́ непреста́нно о всех нас.

Величание

Велича́ем тя,/ священному́чениче Автоно́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь праведному Симеону Верхотурскому на перенесение мощей, глас 4

Днесь ра́дуется сла́вная страна́ Сиби́рь,/ обре́тши святы́я твоя́ мо́щи внутрь себе́./ Архиере́и, свяще́нницы и весь сонм людски́й,/ духо́вне веселя́щеся, вопие́м ти: о богому́дре Симео́не!/ Изба́ви нас, к тебе́ прибега́ющих, от всех бед,/ прося́ще пода́тися всем по коего́ждо проше́нию/ и изба́витися стране́ сей и гра́ду от о́гненнаго запале́ния и пога́нскаго наше́ствия и междоусо́бныя бра́ни и от вся́каго зла./ Чту́ще же ны́не честны́х и многоцеле́бных моще́й твои́х пренесе́ние, но́вый целе́бниче, вси мы вопие́м:/ сла́ва Да́вшему тобо́ю всем исцеле́ние!

Ин тропарь на прославление, глас тойже

Мирска́го мяте́жа бе́гая, все жела́ние обрати́л еси́ к Бо́гу,/ да в виде́ния восхо́д обря́щеши горе́,/ и та́ко не уклони́вся в лука́вствия се́рдца,/ но очи́стив ду́шу и те́ло, прия́л еси́ благода́ть точи́ти цельбы́ ве́рным и неве́рным, притека́ющим к ра́це моще́й твои́х, Симео́не пра́ведне./ Те́мже, по да́нному ти да́ру, испроси́ у Христа́ Бо́га исцеле́ние нам боля́щим душе́вными страстьми́/ и моли́ спасти́ ду́ши на́ша.

Кондак на перенесение мощей, глас 4

Наста́ днесь всечестна́я па́мять но́ваго целе́бника пра́веднаго Симео́на,/ созыва́ет же лю́ди в пречестны́й храм свята́го Бо́жия архиере́я Никола́я,/ иде́же ра́достно соше́дшеся благочести́вых мно́жества,/ ве́село пра́зднуют пренесе́ние честны́х и многоцеле́бных моще́й твои́х пра́здник./ Ты бо яви́лся еси́ гра́ду на́шему и всей Сиби́ри врачевство́ безме́здное,/ подава́я исцеле́ние с ве́рою приходя́щим к тебе́, Симео́не всеблаже́нне!/ Но я́ко име́яй дерзнове́ние ко Влады́це Христу́,/ Того́ моли́ спасти́ град и лю́ди, моля́щияся тебе́,/ па́че же хода́тай бу́ди ко Го́споду во дни наше́ствия печа́ли рабо́м твои́м,/ да зове́м ти: ра́дуйся, Сиби́рстей стране́ похвало́ и утвержде́ние гра́ду на́шему.

Ин кондак на прославление, глас 2

Ми́ра суе́тнаго отве́рглся еси́, да бла́га ве́чныя жи́зни насле́диши,/ возлюби́в незло́бие и чистоту́ души́ и те́ла./ Сниска́л еси́, е́же возлюби́л, свиде́тельствуют бо о сем гроб и нетле́ние моще́й твои́х, и благода́ть чудотворе́ния наипа́че./ То́чиши бо цельбы́ всем притека́ющим к тебе́ и непросвеще́нным, Симео́не блаже́нне, чудотво́рче преди́вный.

Величание

Ублажа́ем тя,/ святы́й пра́ведный Симео́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.