10/23 Мучениц Минодоры, Митродоры и Нимфодоры (305–311). Преподобного Павла Послушливого, Печерского, в Дальних пещерах почивающего (XII-XIV). Преподобного князя Андрея, в иночестве Иоасафа, Спасокубенского (1453). Святителя Феодорита, архиепископа Рязанского и Муромского (1617).

Тропарь мученицам Минодоре, Митродоре и Нимфодоре, глас 1

Агницы слове́сныя Агнцу и Па́стырю приведо́стеся муче́нием ко Христу́,/ тече́ние сконча́вше, и ве́ру соблю́дше./ Те́мже днесь ра́достною душе́ю соверша́ем, досточу́днии, святу́ю ва́шу па́мять,/ Христа́ велича́юще.

Кондак мученицам, глас 4

За Тро́ицу терпели́во страда́льчествовавшия,/ многоко́зненнаго врага́ победи́сте,/ бра́тски обле́кшеся ду́хом./ Те́мже водвори́стеся с пятьми́ де́вами⁶/ в Небе́сном, страстоте́рпицы, черто́зе,/ и со а́нгелы Всецарю́/ в весе́лии непреста́нно предстоите́.

Величание

Велича́ем вас,/ страстоте́рпицы святы́я Минодо́ро, Митродо́ро и Нимфодо́ро,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Павлу Послушливому, Печерскому, в Дальних пещерах почивающему, глас 3

Послуша́нию Христо́ву подража́вый,/ и и́мени Его́ ра́ди во вся́ком послуша́нии,/ терпели́вне, да́же до сме́рти, Па́вле всече́стне, потруди́выйся,/ мзду же ны́не послуша́ния своего́ трудолю́бно от Го́спода прие́м,/ к Нему́ всегда́ моли́ся о нас, пою́щих тя.

Кондак, глас 1

Послу́шника и́стинна и преподо́бным равноче́стна,/ всеблаже́ннаго отца́ на́шего Па́вла,/ прииди́те, люби́мицы, усе́рдие ублажи́м,/ я́ко моля́щася непреста́нно о всех нас.

Величание

Ублажа́ем тя,/ преподо́бне о́тче Па́вле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Иоасафу Спасокубенскому (Каменскому), глас 2

Насажде́нный при вода́х воздержа́ния,/ струя́ми слез твои́х напая́ем,/ я́ко ле́торасль* живоно́сная в вертогра́де Це́ркве Бо́жия процве́л еси́, блаже́нне Иоаса́фе,/ плоды́ доброде́телей возраща́я и ду́ши ве́рующих пита́я./ Те́мже и Христо́с в Небе́сныя страны́ тя пресели́./ Но помина́й нас, любо́вию святу́ю па́мять твою́ чту́щих, благове́рне кня́же,/ и моли́ Пресвяту́ю Тро́ицу, во е́же спасти́ся душа́м на́шим.

Ин тропарь, глас тойже

Я́ко дре́во насажде́нно при вода́х воздержа́ния,/ струя́ми слез твои́х напая́ем, преподо́бне о́тче Иоаса́фе,/ се́яв бо слеза́ми, в ра́дости жне́ши доброде́тельныя рукоя́ти./ Тем Вели́кий Мздовоздая́тель в жи́тницах Небе́сных тя сокро́вище положи́,/ но помина́й чту́щих любо́вию пресве́тлую па́мять твою́,/ моли́ Святу́ю Тро́ицу, преподо́бне Иоаса́фе,/ спасти́ся душа́м на́шим.

Кондак, глас 4

Яви́ся ве́лие со́лнце Христо́ве Це́ркви,/ просвеща́я тех житие́м свои́м, всече́стне,/ я́ко черпа́лом златы́м от кла́дезя неиско́паннаго,/ чудеса́ поче́рпл еси́ от Исто́чника неистощи́маго,/ на успе́ние свое́ прише́л еси́, всеблаже́нне Иоаса́фе,/ ныне́ всем дае́ши грехо́м проще́ние.

Величание

Ублажа́ем тя,/ преподо́бне о́тче Иоаса́фе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Феодориту, архиепископу Рязанскому и Муромскому, глас 5

Наста́вниче смире́ния и благоче́стия,/ пра́вило ве́ры и доброде́тели,/ Це́ркве свети́льниче, святи́телю Феодори́те,/ па́ству свою́ благоче́стно упа́сл еси́/ и ко Христу́ приве́л еси́,/ те́мже венце́м сла́вы от Го́спода укра́шен,/ моли́ся приле́жно Царю́ Сла́вы,/ да спасе́т ду́ши на́ша.

Кондак, глас тойже

До́брый ко́рмчий быв кораблю́ Це́ркве ряза́нския,/ моли́твенниче о па́стве свое́й неусы́пный,/ храня́ дух ве́ры в ней и благоче́стия,/ святы́я мо́щи святи́теля Васи́лия прене́сл еси́/ и чудотво́рный о́браз Богома́тери Феодо́тьевския/ в годи́ну напа́стей ей указа́л еси́,/ я́ко исто́чник исцеле́ний и неоску́днаго утеше́ния,/ попече́ние о земле́ Росси́йстей творя́,/ на ца́рство Ру́сское царя́ Михаи́ла воззва́л еси́./ Святи́телю о́тче Феодори́те,/ помина́й нас, досто́йно чту́щих святу́ю па́мять твою́,/ да спасе́т Госпо́дь ду́ши на́ша.

Величание

Велича́ем тя,/ святи́телю о́тче Феодори́те,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.