Тропари, кондаки и величания двунадесятых праздников, воскресные восьми гласов, дневные на всю седмицу, на разные случаи

Тропарь, глас 4

Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце пра́вды Христо́с Бог наш,/ и разруши́в кля́тву, даде́ благослове́ние,/ и упраздни́в смерть, дарова́ нам живо́т ве́чный.

Кондак, глас тойже

Иоаки́м и А́нна поноше́ния безча́дства,/ и Ада́м и Е́ва от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:/ непло́ды ражда́ет Богоро́дицу и пита́тельницу жи́зни на́шея.

Величание

Велича́ем Тя,/ Пресвята́я Де́во,/ и чтим святы́х Твои́х роди́телей,/ и всесла́вное сла́вим/ рождество́ Твое́.

Тропарь, глас 1

Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя/ и Твое́ сохраня́я Кресто́м Твои́м жи́тельство.

Кондак, глас 4

Вознесы́йся на Крест во́лею,/ тезоимени́тому Твоему́ но́вому жи́тельству⁵⁸/ щедро́ты Твоя́ да́руй, Христе́ Бо́же,/ возвесели́ си́лою Твое́ю ве́рныя лю́ди Твоя́,/ побе́ды дая́ нам на сопоста́ты,/ посо́бие иму́щим Твое́, ору́жие ми́ра,/ непобеди́мую побе́ду⁵⁹.

Величание

Велича́ем Тя,/ Живода́вче Христе́,/ и чтим Крест Твой Святы́й,/ и́мже нас спасл еси́ от рабо́ты вра́жия.

Запев Кресту

Сла́ва, Го́споди, Кресту́ Твоему́ честно́му.

Тропарь, глас 4

Днесь благоволе́ния Бо́жия предображе́ние,/ и челове́ков спасе́ния пропове́дание,/ в хра́ме Бо́жии я́сно Де́ва явля́ется,/ и Христа́ всем предвозвеща́ет./ Той и мы велегла́сно возопии́м:/ ра́дуйся, смотре́ния Зижди́телева исполне́ние.

Кондак, глас тойже

Пречи́стый храм Спа́сов,/ многоце́нный Черто́г и Де́ва,/ свяще́нное Сокро́вище сла́вы Бо́жия,/ днесь вво́дится в дом Госпо́день, благода́ть совводя́щи,/ я́же в Ду́се Боже́ственном,/ ю́же воспева́ют а́нгели Бо́жии:/ Сия́ есть селе́ние небе́сное.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим е́же в храм Госпо́день вхожде́ние Твое́.

Тропарь, глас 4

Рождество́ Твое́, Христе́ Бо́же наш,/ возсия́ ми́рови свет ра́зума:/ в нем бо звезда́м служа́щии,/ звездо́ю уча́хуся,/ Тебе́ кла́нятися Со́лнцу пра́вды/ и Тебе́ ве́дети с высоты́ Восто́ка./ Го́споди, сла́ва Тебе́.

Кондак, глас 3

Де́ва днесь Пресу́щественнаго ражда́ет,/ и земля́ верте́п Непресту́пному прино́сит,/ а́нгели с па́стырьми славосло́вят,/ волсви́ же со звездо́ю путеше́ствуют:/ нас бо ра́ди роди́ся Отроча́ мла́до, Преве́чный Бог.

Величание

Велича́ем Тя,/ Живода́вче Христе́,/ нас ра́ди ны́не пло́тию ро́ждшагося/ от Безневе́стныя/ и Пречи́стыя Де́вы Мари́и.

Тропарь, глас 1

Во Иорда́не креща́ющуся Тебе́, Го́споди,/ Тро́ическое яви́ся поклоне́ние:/ Роди́телев бо глас свиде́тельствоваше Тебе́,/ возлю́бленнаго Тя Сы́на имену́я,/ и Дух в ви́де голуби́не,/ изве́ствоваше словесе́ утвержде́ние⁶⁰./ Явле́йся, Христе́ Бо́же,/ и мир просвеще́й, сла́ва Тебе́.

Кондак, глас 4

Яви́лся еси́ днесь вселе́нней,/ и свет Твой, Го́споди, зна́менася на нас,/ в ра́зуме пою́щих Тя:/ прише́л еси́, и яви́лся еси́,/ Свет непристу́пный.

Величание

Велича́ем Тя,/ Живода́вче Христе́,/ нас ра́ди ны́не пло́тию крести́вшагося/ от Иоа́нна/ в вода́х Иорда́нских.

Тропарь, глас 1

Ра́дуйся, Благода́тная Богоро́дице Де́во,/ из Тебе́ бо возсия́ Со́лнце пра́вды Христо́с Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,/ да́рующаго нам воскресе́ние.

Кондак, глас тойже

Утро́бу Деви́чу освяти́вый рождество́м Твои́м,/ и ру́це Симео́не благослови́вый,/ я́коже подоба́ше, предвари́в,/ и ны́не спасл еси́ нас, Христе́ Бо́же,/ но умири́ во бране́х жи́тельство⁶¹ на́ше,/ еди́не Человеколю́бче.

Величание

Велича́ем Тя,/ Живода́вче Христе́,/ и чтим Пречи́стую Ма́терь Твою́,/ Е́юже по зако́ну ны́не/ прине́слся еси́ в храм Госпо́день.

Тропарь, глас 4

Днесь спасе́ния на́шего глави́зна,/ и е́же от ве́ка та́инства явле́ние:/ Сын Бо́жий Сын Де́вы быва́ет,/ и Гаврии́л благода́ть благовеству́ет./ Те́мже и мы с ним Богоро́дице возопии́м:/ ра́дуйся, Благода́тная, Госпо́дь с Тобо́ю.

Кондак, глас 8

Взбра́нной Воево́де победи́тельная⁶²,/ я́ко изба́вльшеся от злых,/ благода́рственная воспису́ем Ти раби́ Твои́, Богоро́дице,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

Величание

Арха́нгельский глас вопие́м Ти, Чи́стая:/ ра́дуйся, Благода́тная, Госпо́дь с Тобо́ю.

Тропарь, глас 1

Общее воскресе́ние/ пре́жде Твоея́ Стра́сти уверя́я,/ из ме́ртвых воздви́гл еси́ Ла́заря, Христе́ Бо́же./ Те́мже и мы, я́ко о́троцы, побе́ды зна́мения нося́ще,/ Тебе́, Победи́телю сме́рти, вопие́м:/ оса́нна в вы́шних,/ благослове́н Гряды́й во и́мя Госпо́дне.

Ин тропарь, глас 4

Спогре́бшеся Тебе́ Креще́нием, Христе́ Бо́же наш,/ безсме́ртныя жи́зни сподо́бихомся воскресе́нием Твои́м,/ и воспева́юще зове́м:/ оса́нна в вы́шних,/ благослове́н Гряды́й во и́мя Госпо́дне.

Кондак, глас тойже

На престо́ле на небеси́,/ на жребя́ти на земли́ носи́мый, Христе́ Бо́же,/ а́нгелов хвале́ние и дете́й воспева́ние/ прия́л еси́, зову́щих Ти:/ благослове́н еси́, Гряды́й Ада́ма воззва́ти.

Величание

Велича́ем Тя,/ Живода́вче Христе́,/ оса́нна в вы́шних,/ и мы Тебе́ вопие́м:/ благослове́н Гряды́й во и́мя Госпо́дне.

Тропарь, глас 4

Возне́слся еси́ во сла́ве, Христе́ Бо́же наш,/ ра́дость сотвори́вый ученико́м/ обетова́нием Свята́го Ду́ха,/ извеще́нным им бы́вшим благослове́нием⁶³,/ я́ко Ты еси́ Сын Бо́жий, Изба́витель ми́ра.

Кондак, глас 6

Е́же о нас испо́лнив смотре́ние,/ и я́же на земли́ соедини́в небе́сным,/ возне́слся еси́ во сла́ве, Христе́ Бо́же наш,/ ника́коже отлуча́лся,/ но пребыва́я неотсту́пный,/ и вопия́ лю́бящим Тя:/ Аз есмь с ва́ми и никто́же на вы.

Величание

Велича́ем Тя,/ Живода́вче Христе́,/ и почита́ем е́же на Небеса́/ с Пречи́стою Твое́ю Пло́тию/ Боже́ственное вознесе́ние.

Тропарь, глас 8

Благослове́н еси́, Христе́ Бо́же наш,/ И́же прему́дры ловцы́ явле́й⁶⁴,/ низпосла́в им Ду́ха Свята́го/ и те́ми уловле́й вселе́нную:/ Человеколю́бче, сла́ва Тебе́.

Кондак, глас тойже

Егда́ снизше́д язы́ки слия́,/ разделя́ше язы́ки⁶⁵ Вы́шний,/ егда́ же о́гненныя язы́ки раздая́ше,/ в соедине́ние вся призва́,/ и согла́сно сла́вим Всесвята́го Ду́ха.

Величание

Велича́ем Тя,/ Живода́вче Христе́,/ и чтим Всесвята́го Ду́ха Твоего́,/ Его́же от Отца́ посла́л еси́ Боже́ственным ученико́м Твои́м.

Тропарь, глас 7

Преобрази́лся еси́ на горе́, Христе́ Бо́же,/ показа́вый ученико́м Твои́м сла́ву Твою́,/ я́коже можа́ху⁶⁶:/ да возсия́ет и нам гре́шным/ свет Твой присносу́щный,/ моли́твами Богоро́дицы./ Светода́вче, сла́ва Тебе́.

Кондак, глас тойже

На горе́ преобрази́лся еси́,/ и я́коже вмеща́ху ученицы́ Твои́/ сла́ву Твою́, Христе́ Бо́же, ви́деша:/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стинну о́тчее сия́ние.

Величание

Велича́ем Тя,/ Живода́вче Христе́,/ и почита́ем Пречи́стыя Пло́ти Твоея́/ пресла́вное преображе́ние.

Тропарь, глас 1

В рождестве́⁶⁷ де́вство сохрани́ла еси́,/ во успе́нии ми́ра не оста́вила еси́, Богоро́дице:/ преста́вилася еси́ к животу́, Ма́ти су́щи Живота́,/ и моли́твами Твои́ми избавля́еши от сме́рти ду́ши на́ша.

Кондак, глас 2

В моли́твах неусыпа́ющую Богоро́дицу,/ и в предста́тельствах непрело́жное упова́ние,/ гроб и умерщвле́ние не удержа́ста:/ я́коже бо Живота́ Ма́терь/ к животу́ преста́ви/ во утро́бу Всели́выйся Присноде́вственную.

Величание

Велича́ем Тя,/ Пренепоро́чная Ма́ти Христа́ Бо́га на́шего,/ и всесла́вное сла́вим/ Успе́ние Твое́.

Тропарь

Ка́мени запеча́тану от иуде́й/ и во́ином стрегу́щим Пречи́стое Те́ло Твое́,/ воскре́сл еси́ тридне́вный, Спа́се,/ да́руяй ми́рови жизнь./ Сего́ ра́ди Си́лы Небе́сныя вопия́ху Ти, Жизнода́вче:/ сла́ва воскресе́нию Твоему́, Христе́,/ сла́ва Ца́рствию Твоему́,/ сла́ва смотре́нию Твоему́, Еди́не Человеколю́бче.

Кондак

Воскре́сл еси́, я́ко Бог, из гро́ба во сла́ве/ и мир совоскреси́л еси́,/ и естество́ челове́ческое, я́ко Бо́га, воспева́ет Тя,/ и смерть исчезе́;/ Ада́м же лику́ет, Влады́ко;/ Е́ва ны́не от уз избавля́ема, ра́дуется, зову́щи:/ Ты еси́ и́же всем подая́, Христе́, воскресе́ние.

Тропарь

Егда́ снизше́л еси́ к сме́рти, Животе́ Безсме́ртный,/ тогда́ ад умертви́л еси́ блиста́нием Божества́;/ егда́ же и уме́ршия от преиспо́дних воскреси́л еси́,/ вся Си́лы Небе́сныя взыва́ху:/ Жизнода́вче Христе́ Бо́же наш, сла́ва Тебе́.

Кондак

Воскре́сл еси́ от гро́ба, Всеси́льне Спа́се;/ и ад ви́дев чу́до, ужасе́ся,/ и ме́ртвии воста́ша;/ тварь же, ви́дящи, сра́дуется Тебе́,/ и Ада́м свесели́тся,/ и мир, Спа́се мой, воспева́ет Тя при́сно.

Тропарь

Да веселя́тся небе́сная,/ да ра́дуются земна́я,/ я́ко сотвори́ держа́ву/ мы́шцею Свое́ю Госпо́дь,/ попра́ сме́ртию смерть,/ пе́рвенец ме́ртвых бысть;/ из чре́ва а́дова изба́ви нас/ и подаде́ ми́рови ве́лию ми́лость.

Кондак

Воскре́сл еси́ днесь из гро́ба, Ще́дре,/ и нас возве́л еси́ от врат сме́ртных;/ днесь Ада́м лику́ет, и ра́дуется Е́ва,/ вку́пе же и проро́цы с патриа́рхи воспева́ют непреста́нно/ Боже́ственную Держа́ву вла́сти Твоея́.

Тропарь

Све́тлую воскресе́ния про́поведь/ от а́нгела уве́девша Госпо́дни ученицы́/ и пра́деднее осужде́ние⁶⁸ отве́ргша,/ апо́столом хва́лящася глаго́лаху:/ испрове́ржеся смерть,/ воскре́се Христо́с Бог,/ да́руяй ми́рови ве́лию ми́лость.

Кондак

Спас и Изба́витель мой/ из гро́ба, я́ко Бог, воскреси́ от уз земноро́дныя,/ и врата́ а́дова сокруши́,/ и, я́ко Влады́ка, воскре́се тридне́вен.

Тропарь

Собезнача́льное Сло́во Отцу́ и Ду́хови, от Де́вы ро́ждшееся на спасе́ние на́ше,/ воспои́м, ве́рнии, и поклони́мся,/ я́ко благоволи́ пло́тию взы́ти на крест,/ и смерть претерпе́ти,/ и воскреси́ти уме́ршия/ сла́вным Воскресе́нием Свои́м.

Кондак

Ко а́ду, Спа́се мой, соше́л еси́,/ и врата́ сокруши́вый я́ко Всеси́лен,/ уме́рших, я́ко Созда́тель, совоскреси́л еси́,/ и сме́рти жа́ло сокруши́л еси́,/ и Ада́м от кля́твы изба́влен бысть, Человеколю́бче;/ те́мже вси зове́м:/ спаси́ нас, Го́споди.

Тропарь

А́нгельския си́лы на гро́бе Твое́м/ и стрегу́щия омертве́ша,/ и стоя́ше Мари́я во гро́бе,/ и́щущи Пречи́стаго Те́ла Твоего́./ Плени́л еси́ ад, не искуси́вся от него́;/ сре́тил еси де́ву⁶⁹, да́руяй живо́т./ Воскресый из ме́ртвых, Го́споди, сла́ва Тебе́.

Кондак

Живонача́льною дла́нию/ уме́ршия от мра́чных удо́лий/ Жизнода́вец воскреси́в всех Христо́с Бог,/ воскресе́ние подаде́ челове́ческому ро́ду:/ есть бо всех Спаси́тель,/ Воскресе́ние и Живо́т, и Бог всех.

Тропарь

Разруши́л еси́ Кресто́м Твои́м смерть,/ отве́рзл еси́ разбо́йнику рай,/ мироно́сицам плач преложи́л еси́/ и апо́столом пропове́дати повеле́л еси́,/ я́ко воскре́сл еси́, Христе́ Бо́же,/ да́руяй ми́рови ве́лию ми́лость.

Кондак

Не к тому́ держа́ва сме́ртная возмо́жет держа́ти челове́ки:/ Христо́с бо сни́де, сокруша́я и разоря́я си́лы ея́;/ связу́емь быва́ет ад, проро́цы согла́сно ра́дуются,/ предста́, глаго́люще, Спас су́щим в ве́ре:/ изыди́те, ве́рнии, в воскресе́ние.

Тропарь

С высоты́ снизше́л еси́, Благоутро́бне,/ погребе́ние прия́л еси́ тридне́вное,/ да нас свободи́ши страсте́й,/ Животе́ и Воскресе́ние на́ше, Го́споди, сла́ва Тебе́.

Кондак

Воскре́с из гро́ба, уме́ршия воздви́гл еси́,/ и Ада́ма воскреси́л еси́, и Е́ва лику́ет во Твое́м воскресе́нии,/ и мирсти́и концы́⁷⁰ торжеству́ют/ е́же из ме́ртвых воста́нием Твои́м, Многоми́лостиве.

Тропарь, глас 4

Небе́сных во́инств Архистрати́зи,/ мо́лим вас при́сно мы недосто́йнии,/ да ва́шими моли́твами оградите́ нас/ кро́вом крил невеще́ственныя ва́шея сла́вы,/ сохраня́юще нас припа́дающия приле́жно и вопию́щия:/ от бед изба́вите нас,/ я́ко чинонача́льницы Вы́шних Сил.

Кондак, глас 2

Архистрати́зи Бо́жии,/ служи́телие Боже́ственныя сла́вы,/ а́нгелов нача́льницы и челове́ков наста́вницы,/ поле́зная нам проси́те и ве́лию ми́лость,/ я́ко Безпло́тных Архистрати́зи.

Тропарь, глас 2

Па́мять пра́веднаго с похвала́ми,/ тебе́ же довле́ет свиде́тельство Госпо́дне, Предте́че,/ показа́л бо ся еси́ вои́стинну и проро́ков честне́йший,/ я́ко и в струя́х крести́ти сподо́бился еси́ Пропове́даннаго./ Те́мже за и́стину пострада́в ра́дуяся,/ благовести́л еси́ и су́щим во а́де Бо́га, я́вльшагося пло́тию,/ взе́млющаго грех ми́ра,/ и подаю́щаго нам ве́лию ми́лость.

Кондак, глас 2

Проро́че Бо́жий и Предте́че Благода́ти,/ главу́ твою́, я́ко шипо́к свяще́ннейший,/ от земли́ обре́тше, исцеле́ния всегда́ прие́млем,/ и́бо па́ки, я́коже пре́жде, в ми́ре/ пропове́дуеши покая́ние.

Тропарь, глас 1

Спаси́, Го́споди, лю́ди Твоя́,/ и благослови́ достоя́ние Твое́,/ побе́ды на сопроти́вныя да́руя/ и Твое́ сохраня́я Кресто́м Твои́м жи́тельство.

Кондак, глас 4

Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же;/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое, ору́жие ми́ра,/ непобеди́мую побе́ду.

Тропарь апостолам, глас 3

Апо́столи святи́и,/ моли́те Ми́лостиваго Бо́га,/да прегреше́ний оставле́ние/ пода́ст душа́м на́шим.

Тропарь святителю, глас 4

Пра́вило ве́ры, и о́браз кро́тости,/ воздержа́ния учи́теля, яви́ тя ста́ду твоему́/ я́же веще́й и́стина;/ сего́ ра́ди стяжа́л еси́ смире́нием высо́кая,/ нището́ю бога́тая,/ о́тче священнона́чальниче Нико́лае,/ моли́ Христа́ Бо́га/ спасти́ся душа́м на́шим.

Кондак апостолам, глас 2

Тве́рдыя и боговеща́нныя пропове́датели,/ верх апо́столов Твои́х, Го́споди,/ прия́л еси́ в наслажде́ние благи́х Твои́х и поко́й;/ боле́зни бо о́нех и смерть прия́л еси́/ па́че вся́каго всепло́дия,/ Еди́не све́дый серде́чная.

Кондак святителю, глас 3

В Ми́рех, свя́те, священноде́йствитель показа́лся еси́:/ Христо́во бо, преподо́бне, Ева́нгелие испо́лнив,/ положи́л еси́ ду́шу твою́ о лю́дех твои́х/ и спасл еси́ непови́нныя от сме́рти;/ сего́ ра́ди освяти́лся еси́,/ я́ко вели́кий таи́нник Бо́жия благода́ти.

Тропари, глас 2

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га, моли́те/ спасти́ся, мо́лимся, душа́м на́шим.

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,/ моги́й и преста́вленным да́ти поко́й.

Кондаки, глас 8

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це/ Це́рковь Твою́, жи́тельство Твое́, Богоро́дицею соблюди́, Многоми́лостиве.

Со святы́ми упоко́й,/ Христе́, ду́ши раб Твои́х,/ иде́же несть боле́знь, ни печа́ль, ни воздыха́ние,/ но жизнь безконе́чная.

Тропарь, глас 6

Царю́ Небе́сный,/ Уте́шителю, Ду́ше и́стины,/ и́же везде́ сый/ и вся исполня́яй,/ Сокро́вище благи́х/ и жи́зни Пода́телю,/ прииди́ и всели́ся в ны,/ и очи́сти ны от вся́кия скве́рны/ и спаси́, Бла́же, ду́ши на́ша.

Ин тропарь, глас 2

Тво́рче и Созда́телю вся́ческих, Бо́же,/ дела́ рук на́ших, к сла́ве Твое́й начина́емая,/ Твои́м благослове́нием спе́шно испра́ви/ и нас от вся́каго зла изба́ви,/ я́ко Еди́н всеси́лен и Человеколю́бец.

Кондак, глас 6

Ско́рый в заступле́нии и кре́пкий в по́мощь,/ предста́ни благода́тию си́лы Твоея́ ны́не/ и, благослови́в, укрепи́,/ и в соверше́ние наме́рения блага́го де́ла рабо́в Твои́х произведи́:/ вся бо, ели́ка хо́щеши,/ я́ко Си́льный Бог, твори́ти мо́жеши.

Тропарь, глас 4

Сою́зом любве́ а́постолы Твоя́ связа́вый, Христе́,/ и нас, Твои́х ве́рных рабо́в, к Себе́ тем кре́пко связа́в,/ твори́ти за́поведи Твоя́/ и друг дру́га люби́ти нелицеме́рно сотвори́/ моли́твами Богоро́дицы, еди́не Человеколю́бче.

Кондак, глас 5

Пла́менем любве́ распали́ к Тебе́ сердца́ на́ша, Христе́ Бо́же,/ да то́ю разжиза́еми,/ се́рдцем, мы́слию же и душе́ю и все́ю кре́постию на́шею возлю́бим Тя,/ и и́скренняго своего́, я́ко себе́,/ и повеле́ния Твоя́ храня́ще,/ сла́вим Тя, всех благ Да́теля.

Тропарь, глас 4

О распе́нших Тя моли́выйся, любоду́шне Го́споди,/ и рабо́м Твои́м о вразе́х моли́тися повеле́вый,/ ненави́дящих и оби́дящих нас прости́/ и от вся́каго зла и лука́вства к братолю́бному и доброде́тельному наста́ви жи́тельству,/ смире́нно мольбу́ Тебе́ прино́сим,/ да в согла́сном единомы́слии сла́вим Тя,/ еди́наго Человеколю́бца.

Кондак, глас 5

Я́коже первому́ченик твой Стефа́н/ о убива́ющих его́ моля́ще Тя, Го́споди,/ и мы припа́дающе мо́лим:/ ненави́дящих всех и оби́дящих нас прости́,/ во е́же ни еди́ному от них нас ра́ди поги́бнути,/ но всем спасти́ся благода́тию Твое́ю,/ Бо́же Всеще́дрый.

Тропарь, глас 4

Ско́ро предвари́, пре́жде да́же не порабо́тимся враго́м,/ хуля́щим Тя и претя́щим нам, Христе́ Бо́же наш:/ погуби́ Кресто́м Твои́м борю́щия нас,/ да уразуме́ют, ка́ко мо́жет правосла́вных ве́ра,/ моли́твами Богоро́дицы, еди́не Человеколю́бче.

Кондак, глас 8

Взбра́нный Воево́до и Го́споди, а́да Победи́телю!/ Я́ко изба́влься от ве́чныя сме́рти,/ похва́льная воспису́ю Ти, созда́ние и раб Твой,/ но я́ко име́яй милосе́рдие неизрече́нное,/ от вся́ких мя бед свободи́, зову́ща:/ Иису́се, Сы́не Бо́жий, поми́луй мя.

(Тропарь и кондак составлены в память избавления от землетрясения в Константинополе в 740 году)

Тропарь, глас 8

Призирая́й на зе́млю и творя́й ю́ трясти́ся,/ изба́ви ны стра́шнаго тру́са преще́ния, Христе́ Бо́же наш,/ и низпосли́ нам бога́тыя ми́лости Твоя́,/ моли́твами Богоро́дицы, и спаси́ ны.

Кондак, глас 6

Изба́ви тру́са тя́жкаго всех нас, Го́споди,/ и я́звы нестерпи́мыя, грех ра́ди на́ших./ Пощади́, Го́споди, лю́ди Твоя́,/ я́же стяжа́л еси́ Твое́ю Кро́вию, Влады́ко,/ и град не преда́ждь в поги́бель трусо́м стра́шным,/ ина́го бо ра́зве Тебе́ Бо́га не ве́мы,/ и воззови́ пою́щим:/ Аз е́смь с ва́ми, и никто́же на вы.

Тропарь, глас 6

Я́ко посреде́ ученико́в Твои́х,/ прише́л еси́, Спа́се, мир дая́ им,/ прииди́ к нам, и спаси́ нас.

Ин тропарь, глас тойже

Безкни́жныя ученики́ Дух Твой Святы́й наказа́тели яви́, Христе́ Бо́же,/ и многовеща́нным сли́чием* пре́лесть* упраздни́,/ я́ко Всеси́лен.

Слава: глас 8:

Благослове́н еси́, Христе́ Бо́же наш,/ И́же прему́дрый ловцы́ явле́й,/ низпосла́в им Ду́ха Свята́го,/ и те́ми уловле́й вселе́нную,/ Человеколю́бче, сла́ва Тебе́.

И ныне: глас 6:

Предста́тельство христиа́н непосты́дное,/ ходата́йство ко Творцу́ непрело́жное,/ не презри́ гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чтущих Тя.

Тропарь, глас 4

Ско́рый в заступле́нии Еди́н сый, Христе́,/ ско́рое свы́ше покажи́ посеще́ние стра́ждущему рабу́ Твоему́/ и изба́ви от неду́г и го́рьких боле́зней,/ и воздви́гни во е́же пе́ти Тя и сла́вити непреста́нно,/ моли́твами Богоро́дицы, еди́не Человеколю́бче.

Кондак, глас 2

На одре́ боле́зни лежа́щаго и сме́ртною ра́ною уязвле́ннаго,/ я́коже иногда́ воздви́гл еси́, Спа́се, Пе́трову те́щу,/ и рассла́бленнаго, на одре́ носи́маго,/ си́це и ны́не, Милосе́рде, стра́ждущаго посети́ и исцели́:/ Ты бо еди́н еси́ неду́ги и боле́зни ро́да на́шего понесы́й,/ и вся моги́й, я́ко Многоми́лостив.

Тропарь, глас 2

Помяни́, Го́споди, я́ко благ, рабы́ Твоя́,/ и ели́ка в жити́и согреши́ша, прости́,/ никто́же бо без греха́, то́кмо Ты еди́н,/ моги́й и преста́вленным да́та поко́й.

Ин тропарь, глас 8

Глубино́ю му́дрости человеколю́бно вся строя́й,/ и поле́зное всем подава́яй,/ еди́не Соде́телю, упоко́й, Го́споди, ду́ши раб Твои́х:/ на Тя бо упова́ние возложи́ша,/ Творца́ и Зижди́теля и Бо́га на́шего.

Слава, Кондак, глас 8

Со святы́ми упоко́й,/ Христе́, ду́ши раб Твои́х,/ иде́же несть боле́знь, ни печа́ль, ни воздыха́ние,/ но жизнь безконе́чная.

И ныне, Богородичен, глас 8

Тебе́ и сте́ну и приста́нище и́мамы,/ и моли́твенницу благоприя́тну к Бо́гу,/ Его́же родила́ еси́, Богоро́дице безневе́стная, ве́рных спасе́ние.

Тропарь, глас 2

Путь и И́стина сый, Христе́,/ спу́тника а́нгела Твоего́ рабо́м Твои́м ны́не,/ я́коже Тови́и иногда́,/ поели́, сохраня́юща,/ и невреди́мых к сла́ве Твое́й, от вся́каго зла/ во вся́ком благополу́чии соблюда́юща,/ моли́твами Богоро́дицы, еди́не Человеколю́бче.

Кондак, глас 2

Луце́ и Клео́пе в Еммау́с спутеше́ствовавый, Спа́се,/ сше́ствуй и ны́не рабо́м Твои́м,/ путеше́ствовати хотя́щим,/ от вся́каго избавля́я их зла́го обстоя́ния;/ вся бо Ты, я́ко Человеколю́бец, мо́жеши, хотя́й.

Тропарь, глас 2

К Тебе́, Спа́се, прибега́ющих/ и от Твоея́ всеси́льныя десни́цы по́мощи и благослове́ния,/ я́ко от Творца́ и Влады́ки и́щущих не пре́зри;/ но я́коже иногда́ на мо́ри/ сло́вом тишину́ апо́столом свои́м пода́л еси́,/ и ны́не ти́хое и безмяте́жное пла́вание, со здра́вием им да́руй,/ моли́твами Богоро́дицы,/ Еди́не Человеколю́бче.

Слава: глас 5:

Всю наде́жду на Тя возложи́вшим, Спа́се,/ бу́ди помо́щник и изба́витель,/ и благо́е наме́рение де́ла с путеше́ствием их благослови́,/ да вси сла́вим Тя,/ Еди́наго всех благ Пода́теля.

И ныне: глас тойже:

Под Твой покро́в прибега́ем, Богоро́дице Де́во,/ моли́тв на́ших не пре́зри в ско́рбех,/ но от бед изба́ви нас,/ Еди́на Чи́стая и Благослове́нная.

Тропарь, глас 2

К Тебе́, Спа́се, прибега́ющих,/ и от Твоея́ всеси́льныя десницы помощи́ и благослове́ния,/ я́ко от Творца́ и Влады́ки, и́щущих не пре́зри,/ но я́коже апо́столы Твоя́ дре́вле/ на погребе́ние Пречи́стыя Ма́тере Твоея́ от коне́ц о́блаки принесы́й,/ си́це и ны́не рабо́м Твои́м сим/ ско́рое и безмяте́жное по во́здуху превожде́ние со здра́вием да́руй,/ моли́твами Преблагослове́нныя Богоро́дицы,/ Еди́не Человеколю́бче.

Слава: глас 5:

Всю наде́жду на Тя возложи́вшим, Спа́се,/ бу́ди помо́щник и изба́витель,/ и благо́е наме́рение де́ла с возду́шным путеше́ствием их благослови́,/ да вси сла́вим Тя,/ Еди́наго всех благ Пода́теля.

И ныне: глас тойже:

Под Твой покро́в прибега́ем, Богоро́дице Де́во,/ моли́тв на́ших не пре́зри в ско́рбех,/ но от бед изба́ви нас,/ Еди́на Чи́стая и Благослове́нная.

Тропарь, глас 2

Возду́ха благорастворе́ние повеле́нием Твои́м содева́яй, Го́споди,/ во́льный дождь да́руй земли́,/ е́же приноси́ти лю́дем Твои́м плоды́ изоби́льныя/ и насыща́ти вся́кое живо́тно Твои́м благоволе́нием,/ моли́твами Богоро́дицы и всех святы́х Твои́х.

Кондак, глас 6

Всех Творца́ и Зижди́теля/ и благи́х Да́теля Тя све́дуще, Го́споди,/ к Тебе́ припа́даем и приле́жно мо́лим:/ пощади́, Милосе́рде, и прости́, я́ко Благ, беззако́ния на́ша/ и настоя́щаго пра́веднаго гне́ва изба́ви рабы́ Твоя́,/ подая́, я́ко Благ, жа́ждущей земли́ благопло́дныя дожди́,/ я́ко еди́н Многоми́лостив.

Тропарь, глас 2

При́зри ми́лостивно, Бо́же, на лю́ди согре́шшия/ и не пре́зри в покая́нии к Тебе́ припа́дающих,/ но, я́ко Бла́г, помилуй/ и вско́ре пра́веднаго Твоего́ изба́ви преще́ния,/ моли́твами Богоро́дицы, еди́не Человеколю́бче.

Кондак, глас 2

Не отри́ни до конца́ согре́шшия лю́ди Твоя́, Влады́ко,/ ниже́ оста́ви ми́лости и щедро́ты Твоя́ от нас,/ но, я́ко бе́здна сый щедро́т и милосе́рдия пучи́на,/ приими́ мольбы́ на́ша/ и изба́ви нас от належа́щия бе́ды и ну́жды,/ еди́н бо еси́ Благоуве́тлив.

Тропарь, глас 4

Благода́рни су́ще недосто́йнии раби́ Твои́, Го́споди,/ о Твои́х вели́ких благодея́ниих, на нас бы́вших,/ сла́вяще Тя, хва́лим, благослови́м, благодари́м, пое́м и велича́ем Твое́ благоутро́бие,/ и ра́бски любо́вию вопие́м Ти:/ Благоде́телю Спа́се наш, сла́ва Тебе́.

Кондак, глас 3

Твои́х благодея́ний и даро́в ту́не,/ я́ко ра́би непотре́бнии, сподо́бльшеся, Влады́ко,/ к Тебе́ усе́рдно притека́юще, благодаре́ние по си́ле прино́сим,/ и Тебе́, я́ко Благоде́теля и Творца́ сла́вяще, вопие́м:/ сла́ва Тебе́, Бо́же Всеще́дрый.

Тропарь, глас 2

Манасси́ю от уз и го́рькаго заточе́ния/ моли́тв ра́ди свободи́вый, всеще́дрый Бо́же,/ и ра́ба Твоего́, на́ми ны́не моля́щагося от уз и заточе́ния свободи́,/ и от вся́каго зла́го обстоя́ния изба́ви,/ я́ко еди́н Человеколю́бец.

Кондак, глас 5

Я́ко милосе́рдия исто́чник/ и бла́гости пучи́на, Христе́ Бо́же,/ не пре́зри в ско́рбех и бе́дах Тебе́ ве́рно призыва́ющих,/ но я́ко Щедр, поми́луй/ и от уз ско́ро свободи́, да пое́м Ти: Аллилу́иа.

Тропарь, глас 8

Я́коже Закхе́еву до́му, Твои́м, Христе́, вхо́дом спасе́ние бысть,/ си́це и ны́не вхо́дом свяще́нных служи́телей Твои́х и с ни́ми святы́х Твои́х а́нгел/ мир Твой пода́ждь до́му сему́ и ми́лостивно благослови́ его́,/ спаса́я и просвеща́я всех жи́ти хотя́щих в нем.

Кондак, глас 4

Фарисе́ева убежи́м высокоглаго́лания,/ и мыта́реве научи́мся высоте́ глаго́л смире́нных,/ покая́нием взыва́юще:/ Спа́се ми́ра,/ очи́сти рабы́ Твоя́.

Ин кондак, глас 3

Воздыха́ния принесе́м мыта́рская Го́сподеви,/ и к Нему́ присту́пим гре́шнии, я́ко Влады́це:/ хо́щет бо спасе́ния всех челове́ков,/ оставле́ние подае́т всем ка́ющимся,/ нас бо ра́ди воплоти́ся, Бог сый,/ Отцу́ Собезнача́льный.

Кондак, глас 3

Оте́ческия сла́вы Твоея́ удали́хся безу́мно,/ в злых расточи́в, е́же ми преда́л еси́ бога́тство./ Те́мже Ти блу́днаго глас приношу́: согреши́х пред Тобо́ю, Отче ще́дрый,/ приими́ мя ка́ющася,/ и сотвори́ мя яко еди́наго от нае́мник Твои́х.

Кондак, глас 1

Егда́ прии́деши, Бо́же, на зе́млю со сла́вою,/ и трепе́щут вся́ческая:/ река́ же о́гненная пред суди́щем влече́т,/ кни́ги разгиба́ются, и та́йная явля́ются;/ тогда́ изба́ви мя от огня́ неугаси́маго,/ и сподо́би мя одесну́ю Тебе́ ста́ти, Судие́ Пра́веднейший.

Кондак, глас 6

Прему́дрости Наста́вниче, смы́сла Пода́телю,/ нему́дрых Наказа́телю, и ни́щих Защи́тителю,/ утверди́, вразуми́ се́рдце мое́, Влады́ко!/ Ты даждь ми сло́во, О́тчее Сло́во,/ се бо устне́ мои́ не возбраню́, во е́же зва́ти Тебе́:/ Ми́лостиве, поми́луй мя па́дшаго.

Богоро́дице Де́во, ра́дуйся, Благода́тная Мари́е, Госпо́дь с Тобо́ю:/ благослове́на Ты в жена́х, и благослове́н Плод чре́ва Твоего́,/ я́ко Спа́са роди́ла еси́ душ на́ших.

Слава: Крести́телю Христо́в, всех нас помяни́,/ да изба́вимся от беззако́ний на́ших:/ тебе́ бо даде́ся благода́ть моли́тися за ны.

И ныне: Моли́те за ны святи́и апо́столи, святи́и вси,/ да изба́вимся от бед и скорбе́й:/ вас бо те́плыя предста́тели ко Спа́су стяжа́хом.

Под Твое́ благоутро́бие прибега́ем, Богоро́дице,/ моле́ния на́ша не пре́зри во обстоя́нии;/ но от бед изба́ви ны, Еди́на Чи́стая, Еди́на Благослове́нная.

Первого часа тропарь, глас 6:

Зау́тра услы́ши глас мой, Царю́ мой и Бо́же мой.

Стих 1: Глаго́лы моя́ внуши́, Го́споди, разуме́й зва́ние мое́.

Стих 2: Я́ко к Тебе́ молю́ся, Го́споди.

Третьего часа тропарь, глас 6:

Го́споди, И́же Пресвята́го Твоего́ Ду́ха/ в тре́тий час апо́столом Твои́м низпосла́вый,/ Того́, Благи́й, не отыми́ от нас,/ но обнови́ нас, моля́щих Ти ся.

Стих 1: Се́рдце чи́сто сози́жди во мне, Бо́же, и дух прав обнови́ во утро́бе мое́й.

Стих 2: Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́.

Шестого часа тропарь, глас 2:

И́же в шесты́й день же и час,/ на кресте́ пригвожде́й/ в рай дерзнове́нный Ада́мов грех,/ и согреше́ний на́ших рукописа́ние раздери́,/ Христе́ Бо́же, и спаси́ нас.

Стих 1: Внуши́, Бо́же моли́тву мою́, и не пре́зри моле́ния моего́.

Стих 2: Аз к Бо́гу воззва́х, и Госпо́дь услы́ша мя.

Девятого часа тропарь, глас 8

И́же в девя́тый час/ нас ра́ди пло́тию смерть вкуси́вый,/ умертви́ пло́ти на́шея мудрова́ние,/ Христе́ Бо́же, и спаси́ нас.

Стих 1: Да прибли́жится моли́тва моя́ пред Тя, Го́споди, по словеси́ Твоему́ вразуми́ мя.

Стих 2: Да вни́дет проше́ние мое́ пред Тя, Го́споди, по словеси́ Твоему́ изба́ви мя.

Кондак Великого канона, глас 6:

Душе́ моя́, душе́ моя́,/ воста́ни что спи́ши?/ Коне́ц приближа́ется,/ и и́маши смути́тися;/ воспря́ни у́бо,/ да пощади́т Тя Христо́с Бог,/ везде́ сый и вся исполня́яй.

Тропарь, глас 2

Ве́лия ве́ры исправле́ния,/ во исто́чнице пла́мене, я́ко на воде́ упокое́ния,/ святы́й му́ченик Фео́дор ра́довашеся;/ огне́м бо всесожже́гся,/ я́ко хлеб сла́дкий Тро́ице принесе́ся./ Того́ моли́твами, Христе́ Бо́же,/ спаси́ ду́ши на́ша.

Кондак, глас 8

Ве́ру Христо́ву, я́ко щит внутрь прии́м в се́рдцы твое́м,/ проти́вныя си́лы попра́л еси́ многострада́льче,/ и венце́м небе́сным венча́лся еси́ ве́чно,/ Фео́доре, я́ко непобеди́мый.

Тропарь, глас 2

Пречи́стому о́бразу Твоему́ покланя́емся, Благи́й,/ прося́ще проще́ния прегреше́ний на́ших, Христе́ Бо́же;/ во́лею бо благоволи́л еси́ пло́тию взы́ти на крест,/ да изба́виши я́же созда́л еси́ от рабо́ты вра́жия./ Тем благода́рственно вопие́м Ти:/ ра́дости испо́лнил еси́ вся, Спа́се наш,/ прише́дый спасти́ мир.

Кондак, глас 2

Неопи́санное Сло́во О́тчее,/ из Тебе́, Богоро́дице, описа́ся воплоща́емь:/ и оскверни́вшийся о́браз в дре́внее вообрази́в,/ Боже́ственною добро́тою смеси́./ Но испове́дающе спасе́ние,/ де́лом и сло́вом, сие́ вообража́ем.

Тропарь святителю Григорию, глас 8

Правосла́вия свети́льниче,/ Це́ркве утвержде́ние и учи́телю,/ мона́хов добро́то, богосло́вов побо́рниче непреобори́мый,/ Григо́рие чудотво́рче, Фессалони́тская похвало́,/ пропове́дниче благода́ти,/ моли́ся вы́ну спасти́ся душа́м на́шим.

Кондак, глас 8

Прему́дрости свяще́нный и Боже́ственный орга́н,/ Богосло́вия све́тлую согла́сно трубу́/ воспева́ем тя, Григо́рие богоглаго́льниче,/ но я́ко ум, Уму́ Пе́рвому предсто́яй,/ к Не́му ум наш, о́тче, наста́ви, да зове́м: ра́дуйся, пропове́дниче благода́ти.

Кондак второй недели Великого поста, глас 4

Ны́не вре́мя де́лательное яви́ся,/ при две́рех суд, воста́нем у́бо постя́щеся,/ принесе́м сле́зы умиле́ния,/ ми́лостынями, зову́ще:/ согреши́хом па́че песка́ морска́го,/ но осла́би, Соде́телю всех,/ я́ко да прии́мем нетле́нныя венцы́.

Тропарь, глас 1

Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя,/ и Твое́ сохраня́я Кресто́м Твои́м жи́тельство.

Кондак, глас 7

Не ктому́ пла́менное ору́жие/ храни́т врат Еде́мских;/ на ты́я бо на́йде пресла́вный соу́з дре́во кре́стное,/ сме́ртное жа́ло, и а́дова побе́да прогна́ся./ Предста́л бо еси́, Спа́се мой,/ вопия́ су́щим во а́де,/ вни́дите па́ки в рай.

Тропарь на поклонение Кресту, глас 6

Кресту́ Твоему́ покланя́емся, Влады́ко,/ и свято́е воскресе́ние Твое́ сла́вим.

Тропарь, глас 1

Пусты́нный жи́тель и в телеси́ а́нгел,/ и чудотво́рец яви́лся еси́, богоно́се о́тче наш Иоа́нне;/ посто́м, бде́нием, моли́твою небе́сная дарова́ния прии́м,/ исцеля́еши неду́жныя, и ду́ши ве́рою притека́ющих ти./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 4

На высоте́ Госпо́дь воздержа́ния/ и́стинна тя положи́,/ я́коже звезду́ неле́стную,/ световодя́щую концы́,/ наста́вниче Иоа́нне, о́тче наш.

Тропарь, глас 8

В тебе́, ма́ти, изве́стно спасе́ся е́же по о́бразу;/ прии́мши бо крест, после́довала еси́ Христу́,/ и де́ющи учи́ла еси́ презира́ти у́бо плоть, прехо́дит бо,/ прилежа́ти же о души́ ве́щи безсме́ртней./ Те́мже и со а́нгелы сра́дуется, преподо́бная Мари́е, дух твой.

Кондак, глас 3

Блуда́ми пе́рвее преиспо́лнена вся́ческими,/ Христо́ва неве́ста днесь покая́нием яви́ся,/ а́нгельское жи́тельство подража́ющи,/ де́моны Креста́ ору́жием погубля́ет./ Сего́ ра́ди Ца́рствия неве́ста яви́лася еси́, Мари́е пресла́вная.

Тропарь, глас 1

О́бщее воскресе́ние пре́жде Твоея́ Стра́сти уверя́я,/ из ме́ртвых воздви́гл еси́ Ла́заря, Христе́ Бо́же./ Те́мже и мы, я́ко о́троцы,/ побе́ды зна́мения нося́ще,/ Тебе́, Победи́телю сме́рти, вопие́м:/ оса́нна в вы́шних,/ благослове́н Гряды́й во и́мя Госпо́дне.

Ин тропарь, глас 4

Спогре́бшеся Тебе́ Креще́нием, Христе́ Бо́же наш,/ безсме́ртныя жи́зни сподо́бихомся воскресе́нием Твои́м,/ и воспева́юще зове́м:/ оса́нна в вы́шних,/ благослове́н Гряды́й во и́мя Госпо́дне.

Кондак, глас 4

На престо́ле на небеси́, на жребя́ти на земли́ носи́мый, Христе́ Бо́же,/ а́нгелов хвале́ние и дете́й воспева́ние прия́л еси́,/ зову́щих Ти:/ благослове́н еси́,/ Гряды́й Ада́ма воззва́ти.

Величание

Велича́ем Тя,/ Живода́вче Христе́,/ оса́нна в вы́шних, и мы Тебе́ вопие́м:/ благослове́н Гряды́й во и́мя Госпо́дне.

Тропарь, глас 8

Се Жени́х гряде́т в полу́нощи,/ и блаже́н раб, его́же обря́щет бдя́ща;/ недосто́ин же па́ки, его́же обря́щет уныва́юща./ Блюди́ у́бо, душе́ моя́,/ не сном отяготи́ся,/ да не сме́рти пре́дана бу́деши,/ и Ца́рствия вне затвори́шися,/ но воспря́ни, зову́щи:/ Свят, Свят, Свят еси́, Бо́же,/ Богоро́дицею поми́луй нас.

Кондак, глас 8

Иа́ков рыда́ше Ио́сифова лише́ния,/ той же до́блий седя́ше на колесни́це, я́ко царь почита́емы/ египтя́ныни бо тогда́ сласте́м не порабо́тав,/ воспрославля́шеся от Ве́дущаго челове́ческая сердца́,/ и Посыла́ющаго вене́ц нетле́нный.

Тропарь, глас 8

Се Жени́х гряде́т в полу́нощи,/ и блаже́н раб, его́же обря́щет бдя́ща;/ недосто́ин же па́ки, его́же обря́щет уныва́юща./ Блюди́ у́бо душе́ моя́,/ не сном отяготи́ся,/ да не сме́рти пре́дана бу́деши,/ и Ца́рствия вне затвори́шися,/ но воспря́ни, зову́щи: Свят, Свят, Свят еси́, Бо́же,/ Богоро́дицею поми́луй нас.

Кондак, глас 2

Час, душе́, конца́ помы́сливши,/ и посече́ния смоко́вницы убоя́вшися,/ да́нный тебе́ тала́нт трудолю́бно де́лай, окая́нная,/ бо́дрствующи и зов́ущи:/ да не пребу́дем вне черто́га Христо́ва.

Тропарь, глас 8

Се Жени́х гряде́т в полу́нощи,/ и блаже́н раб, его́же обря́щет бдя́ща;/ недосто́ин же па́ки, его́же обря́щет уныва́юща./ Блюди́ у́бо, душе́ моя́,/ не сном отяготи́ся,/ да не сме́рти пре́дана бу́деши,/ и Ца́рствия вне затвори́шися,/ но воспря́ни, зову́щи:/ Свят, Свят, Свят еси́, Бо́же,/ Богоро́дицею поми́луй нас.

Кондак, глас 4

Па́че блудни́цы, Бла́же, беззако́нновав,/ слез ту́чи ника́коже Тебе́ принесо́х;/ но молча́нием моля́ся, припа́даю Ти,/ любо́вию облобыза́л пречи́стеи Твои́ но́зе,/ я́ко оставле́ние мне, я́ко Влады́ка, пода́си долго́в,/ зову́щу Ти, Спа́се:/ от скве́рных дел мои́х изба́ви мя.

Тропарь, глас 8

Егда́ сла́внии ученицы́/ на умове́нии вече́ри просвеща́хуся,/ тогда́ Иу́да злочести́вый,/ сребролю́бием неду́говав, омрача́шеся,/ и беззако́нным судия́м Тебе́, Пра́веднаго Судию́, предае́т./ Ви́ждь, име́ний рачи́телю,/ сих ра́ди удавле́ние употреби́вша!/ Бежи́, несы́тыя души́,/ Учи́телю такова́я дерзну́вшия;/ И́же о всех Благи́й, Го́споди, сла́ва Тебе́.

Кондак, глас 2

Хлеб прие́м в ру́це преда́тель,/ сокрове́нно ты́я простира́ет,/ и прие́млет це́ну Созда́вшаго Свои́ма рука́ма челове́ка,/ и неиспра́влен пребы́сть Иу́да раб и льстец.

Тропарь, глас 8

Егда́ сла́внии ученицы́/ на умове́нии вече́ри просвеща́хуся,/ тогда́ Иу́да злочести́вый,/ сребролю́бием неду́говав, омрача́шеся,/ и беззаконным судия́м Тебе́, Пра́веднаго Судию́, предае́т./ Виждь, име́ний рачи́телю,/ сих ра́ди удавле́ние употреби́вша!/ Бежи́, несы́тыя души́,/ Учи́телю такова́я дерзну́вшия;/ И́же о всех Благи́й, Го́споди, сла́ва Тебе́.

Ин тропарь, глас 4

Искупи́л еси́ от кля́твы зако́нный Честно́ю Твое́ю Кро́вию,/ на Кресте́ пригвозди́вся и копие́м пробо́дся;/ безсме́ртие источи́л еси́ челове́ком,/ Спа́се наш, сла́ва Тебе́.

Кондак, глас 8

Нас ра́ди Распя́таго, прииди́те, вси воспои́м,/ Того́ бо ви́де Мари́я на дре́ве, и глаго́лаше:/ а́ще и распя́тие терпи́ши, Ты еси́ Сын и Бог Мой.

На 1-м часе тропарь, глас 1

Распе́ншуся Тебе́, Христе́,/ поги́бе мучи́тельство, по́прана бысть си́ла вра́жия:/ ниже́ бо а́нгел, ниже́ челове́к,/ но Сам, Го́споди, спасл еси́ нас, сла́ва Тебе́.

На 3-м часе тропарь, глас 6

Го́споди, осуди́ша Тя иуде́е на смерть, Жизнь всех;/ и́же Че́рмное мо́ре жезло́м проше́дший,/ на Кресте́ Тя пригвозди́ша,/ и и́же от ка́мене мед сса́вшии,/ желчь Тебе́ принесо́ша./ Но во́лею претерпе́л еси́, да нас свободи́ши от рабо́ты вра́жия,/ Христе́ Бо́же, сла́ва Тебе́.

На 6-м часе тропарь, глас 2

Спасе́ние соде́лал еси́ посреди́ земли́ Христе́ Бо́же;/ на Кресте́ пречи́стеи ру́це Твои́ просте́рл еси́,/ собира́я вся язы́ки, зову́щия:/ Го́споди, сла́ва Тебе́.

На 9-м часе тропарь, глас 8

Ви́дя разбо́йник Нача́льника жи́зни на Кресте́ вися́ща, глаго́лаше:/ а́ще не бы Бог был вопло́щся И́же с на́ми Распны́йся,/ не бы со́лнце лучи́ своя́ потаи́ло, ниже́ бы земля́, трепе́щущи, трясла́ся./ Но вся Терпя́й, помяни́ мя, Го́споди, во Ца́рствии Твое́м.

Тропарь, глас 2

Благообра́зный Ио́сиф,/ с дре́ва снем пречи́стое Те́ло Твое́,/ плащани́цею чи́стою обви́в,/ и воня́ми, во гро́бе но́ве, покры́в, положи́.

Слава: Егда́ снизше́л еси́ к сме́рти, Живо́те Безсме́ртный,/ тогда́ ад умертви́л еси́ блиста́нием Божества́./ Егда́ же и уме́ршия от преиспо́дних воскреси́л еси́,/ вся си́лы небе́сныя взыва́ху:/ Жизнода́вче Христе́ Бо́же наш, сла́ва Тебе́.

И ныне: Мироно́сицам жена́м, при гро́бе предста́в, а́нгел вопия́ше:/ ми́ра ме́ртвым суть прили́чна,/ Христо́с же истле́ния яви́ся чуждь.

На повечерии кондак, глас 8

Нас ра́ди Распя́таго прииди́те, вси воспои́м,/ Того́ бо ви́де Мари́я на дре́ве, и глаго́лаше:/ а́ще и распя́тие терпи́ши, Ты еси́ Сын и Бог Мой.

На утрени и часах кондак, глас 6

Бе́здну заключи́вый, мертв зри́тся,/ и сми́рною и плащани́цею обви́вся,/ во гро́бе полага́ется, я́ко сме́ртный, Безсме́ртный;/ жены́ же приидо́ша пома́зати Его́ ми́ром,/ плачу́щия го́рько и вопию́щия:/ сия́ суббо́та есть преблагослове́нная,/ в не́йже Христо́с, усну́в, воскре́снет тридне́вен.

Стихира, глас 6

Воскресе́ние Твое́, Христе́ Спа́се,/ а́нгели пою́т на Небесе́х,/ и нас на земли́ сподоби́ чи́стым се́рдцем/ Тебе́ слая́ите.

Тропарь, глас 5

Христо́с воскре́се из ме́ртвых,/ сме́ртию сме́рть попра́в/ и су́щим во гробе́х живо́т дарова́в.

Кондак, глас 8

Аще и во гроб снизше́л еси́, Безсме́ртне,/ но а́дову разруши́л еси́ си́лу,/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: Ра́дуйтеся! и Твои́м апо́столом мир да́руяй,/ па́дшим подая́й Воскресе́ние.

Тропарь, глас 7

Запеча́тану гро́бу,/ Живо́т от гро́ба возсия́л еси́, Христе́ Бо́же,/ и две́рем заключе́нным,/ ученико́м предста́л еси́,/ всех Воскресе́ние,/ дух пра́вый те́ми обновля́я нам/ по вели́цей Твое́й ми́лости.

Кондак, глас 8

Любопы́тною десни́цею/ жизнопода́тельная Твоя́ ре́бра Фома́ испыта́, Христе́ Бо́же:/ созаключе́нным бо две́рем я́ко вшел еси́,/ с про́чими апо́столы вопия́ше Тебе́:/ Госпо́дь еси́ и Бог мой.

Величание

Велича́ем Тя,/ Живода́вче Христе́,/ нас ра́ди во ад сше́дшаго,/ и с Собо́ю вся воскреси́вшаго.

Тропари, глас 2

Егда́ снизше́л еси́ к сме́рти, Животе́ Безсме́ртный,/ то́гда ад умертви́л еси́ блиста́нием Божества́./ Егда́ же и уме́ршия от преиспо́дних воскреси́л еси́,/ вся си́лы небе́сныя взыва́ху:/ Жизнода́вче Христе́ Бо́же наш сла́ва Тебе́.

Сла́ва: Благообра́зный Ио́сиф, с дре́ва, снем Пречи́стое Твое́ Те́ло,/ плащани́цею чи́стою обви́в,/ и благоуха́ньми во гро́бе но́ве, закры́в, положи́;/ но тридне́вен воскре́сл еси́, Го́споди,/ подая́й ми́рови ве́лию ми́лость.

И ныне: Мироно́сицам жена́м при гро́бе предста́в, а́нгел вопия́ше: ми́ра ме́ртвым суть прили́чна/ Христо́с же истле́ния яви́ся чу́ждь./ Но возопи́йте: воскре́се Госпо́дь,/ подая́й ми́рови ве́лию милость.

Кондак, глас 2

Радова́тися мироно́сицам повеле́л еси́,/ плач прама́тере Е́вы утоли́л еси́/ воскресе́нием Твои́м, Христе́ Бо́же,/ апо́столом же Твои́м пропове́дати повеле́л еси́:/ Спас воскре́се от гро́ба.

Тропарь воскресный 3 гласа:

Да веселя́тся небе́сная...

Кондак, глас 3

Ду́шу мою́, Го́споди, во гресе́х вся́ческих,/ и безме́стными дея́ньми лю́те разсла́блену,/ воздви́гни Боже́ственным Твои́м предста́тельством,/ я́коже и разсла́бленнаго воздви́гл еси́ дре́вле,/ да зову́ Ти спаса́емы/ Ще́дрый, сла́ва, Христе́, держа́ве Твое́й.

Тропарь, глас 8

Преполови́вшуся пра́зднику,/ жа́ждущую ду́шу мою́ благоче́стия напо́й вода́ми,/ я́ко всем, Спа́се, возопи́л еси́:/ жа́ждай да гряде́т ко Мне и да пие́т./ Исто́чниче жи́зни на́шея, Христе́ Бо́же, сла́ва Тебе́.

Кондак, глас 4

Пра́зднику зако́нному преполовля́ющуся,/ всех Тво́рче и Влады́ко,/ к предстоя́щим глаго́лал еси́, Христе́ Бо́же:/ прииди́те и почерпи́те во́ду безсме́ртия./ Те́мже Тебе́ припа́даем, и ве́рно вопие́м:/ щедро́ты Твоя́ да́руй нам,/ Ты бо еси́ Исто́чник жи́зни на́шея.

Тропарь воскресный 4 гласа:

Све́тлую воскресе́ния пропове́дь...

Кондак, глас 8

Ве́рою прише́дшая на кла́дезь самаряны́ня,/ ви́дя Тя, прему́дрости во́ду,/ е́юже напои́вшися оби́льно,/ Ца́рствие вы́шнее насле́дова ве́чно, я́ко присносла́вная.

Тропарь воскресный 5 гласа

Собезнача́льное Сло́во Отцу́ и Ду́хови...

Кондак, глас 4

Душе́вныма очи́ма ослепле́н,/ к Тебе́, Христе́, прихожду́,/ я́коже слепы́й от рожде́ния,/ покая́нием зову́ Ти:/ Ты су́щих во тьме Свет пресве́тлый.

Тропарь, глас 8

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый,/ и те́ми ко и́стинней ве́ре, вся ны наста́вивый,/ Многоблагоутро́бне, сла́ва Тебе́.

Кондак, глас 8

Апо́стол пропове́дание, и оте́ц догма́ты,/ Це́ркви еди́ну ве́ру запечатле́ша,/ я́же и ри́зу нося́щи и́стины,/ истка́ну от еже свы́ше богосло́вия,/ исправля́ет и сла́вит благоче́стия вели́кое та́инство.

Тропарь святым, глас 4

И́же во всем ми́ре му́ченик Твои́х,/ я́ко багряни́цею и ви́ссоном,/ кровьми́ Це́рковь Твоя́ украси́вшися, те́ми вопие́т Ти, Христе́ Бо́же:/ лю́дем Твои́м щедро́ты Твоя́ низпосли́,/ мир жи́тельству Твоему́ да́руй,/ и душа́м на́шим ве́лию ми́лость.

Кондак, глас 8

Я́ко нача́тки естества́, Насади́телю тва́ри/ всела́нная прино́сит Ти, Го́споди, богоно́сныя му́ченики:/ тех моли́твами в ми́ре глубо́це,/ Це́рковь Твою́, жи́тельство Твое́ Богоро́дицею соблюди́, Многоми́лостиве.