Акафист Пресвятей Богородице в честь иконы Ея «Киево-Печерския»
Кондак 1
Избранной от все́х родо́в Пресвяте́й Деве Мари́и Богоро́дице, я́ко вои́стину пло́тию ро́ждшей Иису́са Христа́, Спа́са и Бо́га на́шего, Влады́чице всея́ вселе́нныя, избра́вшей вторы́м земны́м жре́бием свои́м го́ру Пече́рскую, и оби́тель для и́ноков на́ ней созда́вшую, похва́льная прино́сим пения. Та́ же, о Всечестна́я на́ша Ма́ти и Засту́пница, храни́ и спаси́ оби́тель Твою́ и все́х на́с о́т вра́г ви́димых и неви́димых, да́ зовем Ти́: Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Икос 1
А́нгел земны́й и челове́к небе́сный преподо́бный Анто́ний прии́де в земны́й жре́бий Тво́й на́ го́ру Афо́нскую, хотя́ спасти́ ду́шу свою́ о́т суеты́ ми́ра сего́ и сконча́ти та́мо житие́ свое́ земно́е. Ты́ же́, Пресвята́я Де́во, избра́вши вторы́м жре́бием Свои́м го́ру Пече́рскую в новопросвеще́нней стране́ Ру́сской, посла́ла его́ я́ко апо́стола, да́ устро́ит оби́тель на́ не́й во́ сла́ву Твою́ и собере́т и́ноков, и да́ воспева́ют Ти́ та́ко: Ра́дуйся, Всечестна́я на́ша Ма́ти; ра́дуйся, дивная на́ша Игу́мения. Ра́дуйся, наде́ждо на́шего спасе́ния; ра́дуйся, горы́ Пече́рския храни́тельнице. Ра́дуйся, живу́щих на́ ней и́ноков руководи́тельнице; ра́дуйся, приходя́щих на́ ню правосла́вных христиа́н на́ поклоне́ние покрови́тельнице. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 2
Ви́дящи ско́рбный пу́ть спасе́ния для все́х и́ночествовати хотя́щих Госпо́дь на́ш Иису́с Христо́с, повеле́ Ма́тери Свое́й, да́ простре́т Сво́й Боже́ственный покро́в на́д горо́ю Пече́рскою, да́ вси́ спаса́ющиеся на́ не́й ви́дяще сие́, с преподо́бными Анто́нием и Феодо́сием вку́пе взыва́ют непреста́нно Спаси́телю Бо́гу: Аллилу́иа.
Икос 2
Ра́зум име́я Боже́ственный преподо́бный Феодо́сий, от души́ возлюби́в сла́ву небе́сную, ми́р со все́ми его́ пре́лестями возненави́дя, прии́де в Киев ко преподо́бному Анто́нию в пеще́ре су́шу, в ню́же всели́ся, и вку́пе со все́ми отцы, подвиза́ющимися та́мо, воспева́я Тя́, Честне́йшую все́х а́нгел, та́ко: Ра́дуйся, на́шего спасе́ния глави́зно; ра́дуйся, ра́досте на́ша в се́й и бу́дущей жи́зни. Ра́дуйся, отра́до Боже́ственная христо́вых подви́жников; ра́дуйся, я́ко Тобо́ю вси́ святи́и спаса́ются. Ра́дуйся я́ко вся́ вселе́нная Тобо́ю украша́ется; ра́дуйся, я́ко и́мя Твое́ от все́х небе́сных чино́в прославля́ется. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 3
Си́ла Вы́шняго осени́ подви́жников пеще́рных, егда́ пе́рвый игу́мен, преподо́бный Варлаа́м, устрои́ хра́м во и́мя Твоего́ сла́внаго Успе́ния на́ верху пеще́ры и в не́м прославля́я Тебе́, Честне́йшую Херуви́м и Сла́внейшую без сравне́ния Серафи́м, и Сы́ну Твоему́ вопия́: Аллилу́иа.
Икос 3
Иму́ще пла́менное жела́ние спасе́ния, преподо́бный Анто́ний, егда́ устро́ися оби́тель на́ холме́, в не́мже пещеры, нарица́емыя да́льния, жела́я безмо́лвия, пресели́ся на́ холм, в не́мже раскопа́ пеще́ры бли́жния, и та́мо собра́ после́дователи себе́, хотя́щии соверше́ннаго безмолвия, прославля́я Тебе́, свою́ уте́шительницу та́ко: Ра́дуйся, вселе́ния ра́йскаго руководи́тельнице; ра́дуйся, в по́двизех пеще́рных укрепи́тельнице. Ра́дуйся, благо́е нача́ло и сла́вный коне́ц все́х святы́х жития́; ра́дуйся, святы́я ра́дости Боже́ственная струя́. Ра́дуйся, цве́те Боже́ственнаго прозябе́ния; ра́дуйся, правосла́внаго мона́шества украше́ние. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 4
Бу́рю сомне́ний грехолюби́вых оста́вльше, возлюби́ша терни́стый пу́ть спасе́ния, стеко́шася и́ноцы в пеще́ру ко преподо́бному Феодо́сию. Он же, ви́дя в не́й тесноту́, устро́и на́ верху́ горы Пече́рстей хра́м, и ке́ллии сооруди́, и огра́дой огради́, и та́ко устро́ися оби́тель во и́мя Твое́, Влады́чице, в не́йже мона́си и ве́рнии лю́дие воспе́ша о Тебе́ Бо́гу: Аллилу́иа.
Икос 4
Слы́шаша и́ноцы Пече́рстии, я́ко разбо́йницы хотя́ще окра́сти хра́м Твой, Пречи́стая, моля́ху Тя́ о спасе́нии Его́. Ты́ же, Всеми́лостивая, сотвори́ла еси́ чу́до: хра́м Тво́й показа́ла еси́ в возду́се вися́щ, еже ви́дяще разбо́йницы в у́жасе разбего́шася, и́ноцы же воспе́ша Ти́ та́ко: Ра́дуйся, я́ко на́ горе Ки́евстей духовный са́д насади́ла еси́; ра́дуйся, я́ко та́мо живу́щим вся́ потре́бная подала́ еси́. Ра́дуйся, собра́вшая на́с от ми́ра грехо́внаго; ра́дуйся приве́дшая на́с во огра́ду оби́тели Пече́рския. Ра́дуйся, защища́ющая на́с от враго́в ви́димых; ра́дуйся, охраня́ющая на́с от супоста́т неви́димых. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 5
Боготе́чная звезда́ ми́ра яви́лася еси́, Влады́чице, егда́ восхоте́ла устро́ити Себе́ в Руси́ оби́тель Пече́рскую. Ме́сто, иде́же и́мать хра́м во и́мя Твое́ созда́тися, указа́ла еси́ о́гненною дуго́ю, протяже́нною от ве́тхаго монастыря́, и а́нгелы во о́бразе и́ноков на возду́се та́мо гряду́щих, еже ви́дяще и́ноцы пече́рстии, воспе́ша ра́достную пе́снь: Аллилу́иа.
Икос 5
Ви́деша гре́честии каменозда́телие в Царьгра́де ю́ношей, повелева́ющих и́м идти́ во Влахе́рнский хра́м к Цари́це, они́ же́ прише́дше узре́ша Тебе́ та́мо седя́щу во сла́ве, предстоя́щих с Тобо́ю ли́ки во́ев и преподо́бных Анто́ния и Феодо́сия, и повелева́юшу и́м идти́ в Ру́сскую зе́млю во гра́д Ки́ев, и устро́ити хра́м во и́мя Твое́, вручи́вшу им ико́ну Твоего́ сла́внаго Успе́ния и мо́щи святы́х му́ченик. Они же, поведе́нное слы́шавше, воспе́ша Ти́ тако: Ра́дуйся, Цари́це небесе́ и земли́, ра́дуйся, и́стинная Ма́ти на́шего Спаси́теля. Ра́дуйся, спа́сшая весь ро́д Ада́ма па́дшаго; ра́дуйся, ве́ры правосла́вныя Воево́до непобедимая. Ра́дуйся, покрови́тельнице Царьгра́да непосты́дная; ра́дуйся, и страны́ Ру́сския Засту́пнице усе́рдная. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 6
Пропове́дницы Твоего́ чуде́сного явле́ния во́ Влахе́рнстей це́ркви, гре́честии каменозда́телие, приидо́ша в Ки́ев ко́ преподо́бным Анто́нию и Феодо́сию, вручи́ша и́м ико́ну Твоего́ Успе́ния и мо́щи святы́х му́ченик, и пове́даша и́м Твою́ во́лю о созида́нии хра́ма во́ и́мя Твое́; они́ же слы́шаша и́х глаго́лы, о́бразу Твоему́ на́ ико́не изображе́нну поклони́шася, Бо́гу же вопию́ще: Аллилу́иа.
Икос 6
Возсия́ я́ко со́лнце ико́на Твоего́ Успе́ния, Пресвята́я Де́во, ю́же принесо́ша из Царьгра́да гре́честии каменозда́телие во́ оби́тель Пече́рскую, в не́йже и до ны́не пребыва́ет, подаю́щи исцеле́ния вопию́щим к Тебе́ та́ко: ра́дуйся, во́ Успе́нии Твое́м на́с не оставля́ющая; ра́дуйся чре́з ико́ну Твою́ на́м помога́ющая. Ра́дуйся ико́ною Твое́ю оби́тель Пече́рскую просла́вившая; ра́дуйся, ико́ною Твое́ю го́ру Пече́рскую просвети́вшая. Ра́дуйся, ико́ною Твое́ю гра́д Ки́ев спаса́ющая; ра́дуйся, то́юже ико́ною всю Русскую зе́млю охраня́ющая. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 7
Хотя́ще устро́ити но́вую оби́тель и в не́й хра́м во́ и́мя Твое́, Преблагослове́нная Де́во, преподо́бнии Анто́ний и Феодо́сий моли́ша Сы́на Твоего́ Христа́ Бо́га на́шего и Тебе́, да́ позна́ют ме́сто, на́ не́мже созда́н и́мать бы́ти хра́м, и указа́ Госпо́дь то ме́сто: е́же бы́ти по все́й земли́ росе́, а та́мо су́ше; и па́ки повсю́ду су́ше, на́ ме́сте же́ хра́ма росе́, и посла́ о́гнь с не́ба и пожже́ вся́ хвра́стия и ро́су поли́за и доли́ну устро́и. Преподо́бнии же́ вку́пе с ве́рными лю́ди та́мо су́щими, падо́ша на́ зе́млю, со́ стра́хом возопи́ша: Аллилу́иа.
Икос 7
Но́вый хра́м, небеси́ подо́бный, нача́ша созида́ти богоно́снии отцы́ Анто́ний и Феодо́сий, по сме́ртном же успе́нии и́х преподо́бный Стефа́н сконча́ и пресели́ бра́тию из ве́тхаго монастыря́ в но́вый. Блаже́нный же́ Ни́кон ико́ны, зла́том и сребро́м чу́дно украси́; в не́мже собра́шася ве́рнии, прославля́ху Тя́, Богоро́дице, си́це: Ра́дуйся, варя́га Си́мона во́ оби́тель Твою́ чу́дно призва́ла еси́; ра́дуйся, принесе́нным и́м по́ясом разме́р хра́ма Твоего́ указа́ла еси́. Ра́дуйся, зла́то на́ устрое́ние хра́ма Твоего́ чре́з гре́ки подала́ еси́; ра́дуйся, в созида́нии хра́ма Твоего́ неви́димо посо́бствовала еси́. Ра́дуйся, Ла́вры Пече́рския строи́тельнице; ра́дуйся, хра́мов ея́ украси́тельнице. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 8
Стра́нное чу́до показа́ся, егда́ украша́ху хра́м Твой, Пречи́стая, муси́ею2, тогда́ во алтаре́ на́ стене́ са́м изобрази́ся о́браз Тво́й, преподо́бному Али́пию со́ иконопи́сцы ту су́щими, и просвети́ся о́н па́че со́лнца. И се́ из у́ст о́браза Твоего́, Пресвята́я, излете́ го́лубь бе́л, и летя́ше ко́ о́бразу Спаси́телеву, и ко́ други́м о́бразам, напи́санным во́ хра́ме, па́ки лете́ ко́ о́бразу Спаси́телеву и влете́ во́ уста́ Его́ и та́мо скры́ся. Е́же ви́дящи гре́честии иконопи́сцы, во́ оби́тели Твоея́ и живо́т сво́й сконча́ша, мо́щи же́ и́х в пеще́рах положе́ни бы́ша, ду́шами же́ на́ небе́са́ пресели́шася, иде́же прославля́ют Тебе́ со́ а́нгелы, Сы́ну же́ Твоему́ зову́т: Аллилу́иа.
Икос 8
Ве́сь хра́м, небеси́ подо́бный, сия́я о́т Твоея́ ико́ны Пече́рския, Богоизбра́нная Де́во, е́же ви́дя блаже́нный Заха́рия, прии́де к нему́, защище́ния у Тебе́ прося, егда́ заимода́вец его́ Се́ргий не хотя́ше отда́ти ему́ зла́то и сребро́ оста́вленное ему́ отце́м сего́. Ты́ же́, Влады́чице, посла́ла а́нгела наказа́ти клятвопресту́пника; е́же ви́дя Заха́рия, оста́ви ми́р, прии́де во́ оби́тель Пече́рскую, поживе́ в не́й до конца́ дни́й свои́х, воспева́я Тебе́ си́це: Ра́дуйся, Честне́йшая всея́ тва́ри вселе́нныя; ра́дуйся, Сладча́йшаго Иису́са селе́ние. Ра́дуйся, святы́й Покро́в жи́зни на́шея; ра́дуйся, благода́тное утеше́ние ско́рби на́шея. Ра́дуйся, вся́ на́ша наде́ждо и покой; ра́дуйся, по Бо́зе на́ше упова́ние в жи́зни земно́й. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 9
Вся́кое мудрова́ние отве́ргше, удиви́мся чудесе́м Твои́м, Богоро́дице, егда́ бо́ приспе́ вре́мя освяще́нию Це́ркви Твоея́, дска́ ка́менна на́ Престо́л неви́димо принесе́на бы́сть а́нгелы; и́миже, во́ о́бразе ю́ношей, созва́ни бы́ша святи́тели на́ освяще́ние ея́, я́коже апо́столи Христо́вы со́брани бы́ша на́ погребе́ние Твое́. Святи́тель Иоа́нн, и́ноцы Пече́рстии и вси́ лю́дие, зря́ще сия, просла́виша Тебе́, Пречи́стая, ра́достно пра́здноваше пра́здник освяще́ния, Бо́гу воспе́ша пе́снь: Аллилу́иа.
Икос 9
Вити́и многовеща́ннии не мо́гут восхвали́ти Твоя́ чудеса́, Богоро́дице, соде́ланныя во́ оби́тели Пече́рстей, наипа́че при́ основа́нии, созда́нии и освяще́нии хра́ма в че́сть сла́внаго Успе́ния Твоего́; и ны́не не оставля́й на́с недосто́йных ча́д Твои́х, сохраня́й оби́тель Твою́, да́ вопие́м Ти́ та́ко; Ра́дуйся, я́ко Са́м Бо́г Оте́ц назна́мена су́шею ме́сто хра́ма; ра́дуйся, я́ко Тво́й Сы́н, и́же сни́де я́ко роса́ на́ руно́ во́ Твое́ чре́во, на́ то́жде ме́сто ро́су испусти́. Ра́дуйся, я́ко Ду́х Святы́й о́гнь с не́ба ниспосла́ на́ попале́ние ме́ста для хра́ма; ра́дуйся, я́ко Бо́г Оте́ц о́браз Тво́й во́ алтаре́ неви́димо изобрази́. Ра́дуйся, я́ко Бо́г Сы́н, Со́лнце пра́вды, сия́нием церковь Твою́ испо́лни; ра́дуйся, я́ко Святы́й Ду́х виде́нием голубя, излете́вшаго из у́ст о́браза, в хра́ме Твое́м показа́ся. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 10
Спасти́ хотя́ ду́шу свою́, преподо́бный Али́пий, прии́де во Твою́ оби́тель, Богоро́дице, и бы́сть та́мо иску́сен иконопи́сец, чре́з него́же просла́вилася, Богоневе́сто; ико́ны бо и́м пи́санныя бы́ша чудоде́йны, просия́ша бо па́че Со́лнца, не́кия ико́ны а́нгелы писа́ша и ины́ми мно́гими чудесы́ просла́вишася. От ни́хже и до ны́не не́кия сохрани́шася, источа́юще чудеса́ прославля́ющим Тебе́ и Бо́гу вопию́щим: Аллилу́иа.
Икос 10
Стена́ кре́пкая и заступле́ние яви́лася еси́, Влады́чице, новой оби́тели Твоея́ Све́нской, егда́ князь Рома́н проси́ и́ноков Пече́рских отпусти́ти ико́ну чудотво́рную, пи́санную преподо́бным Али́пием, для исцеле́ния от слепоты́. Егда́ же плову́щии с Твое́ю ико́ною приста́ша к бе́регу, ико́на Твоя́ неви́димо обре́теся на́ горе́ на́ дре́ве, юже обрето́ша, и князь Рома́н получи́ прозре́ние свои́м очесе́м, созда́ та́мо оби́тель, собра́ и́ноки и вку́пе с ни́ми возопи́ к Тебе́ та́ко: ра́дуйся, ико́ны Твоя́ чудесы́ просла́вившая; ра́дуйся, Ла́вру Пече́рскую и́ми же́ просла́вила еси́. Ра́дуйся, и но́вую оби́тель Све́нскую возлюби́ла еси́; ра́дуйся, я́ко и в не́й ико́ну Твою́ чудотво́рную показа́ла еси́. Ра́дуйся, ди́вны и вели́ки чудесы́ от нея яви́ла еси́; ра́дуйся, все́м прося́щим у Тебе́, чрез ико́ну Твою́ исцеле́ния источи́ла еси́. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 11
Пе́ние умиле́нное прино́сят пре́д ико́ною Твое́ю Пече́рскою не то́кмо во́ гра́де Ки́еве, но и в Све́нске, в Москве́ и Яросла́вле и в други́х граде́х и ве́сех правове́рнии лю́дие, призыва́я Теба́ на́ по́мощь вку́пе с преподо́бными Анто́нием и Феодо́сием, и получи́вше о́т Тебе́, Богоро́дице, по́мощь и заступле́ние, вопию́т Сы́ну Твоему́ и Бо́гу: Аллилу́иа.
Икос 11
Светоприе́мную свещу́, просвеща́ющую все́х Тебя́ призыва́ющих, иму́ще ми́р христиа́нский Тебе́, Де́во Богоро́дице, наипа́че Ла́вра Пече́рская прославля́ет Тя́, свою́ Покрови́тельницу, ю́же храни́ши Мно́ги ле́та о́т нахожде́ния агаря́н и вся́ких вра́г, и о́т еретико́в и междоусо́бныя бра́ни, и о́т нападе́ния иноплеме́нник. А́ще же́ иногда́ и попускала е́й разоре́ну бы́ти гре́х ра́ди на́ших, но па́ки еще́ благоле́пнее воздвиза́ла еси́ ю, и дара́ми земны́ми изоби́ловала насе́льников ея́ и дара́ми благода́ти обогаща́ла, вопию́щих Ти́ си́це: Ра́дуйся, ико́ною Успе́ния Твоего́ на́с защища́ющая; ра́дуйся, нерукотворе́нным о́бразом Твои́м на́с покрыва́ющая. Ра́дуйся, Пече́рскою ико́ною Твое́ю исцеле́ния на́м подаю́щая; ра́дуйся, све́нским о́бразом Твои́м на́с покрыва́ющая. Ра́дуйся сто́льный гра́д Москву́ Пече́рскою ико́ною посети́вшая; ра́дуйся, и гра́д Яросла́вль Твое́ю ико́ною озари́вшая. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 12
Благода́ть Боже́ственную, покро́в и заступле́ние пода́ждь на́м, Влады́чице на́ша и Ма́ти, припа́дающим пре́д ико́ною Твое́ю Пече́рскою. Воздви́гни на́с от грехо́внаго сна́, сохрани́ Лавру Твою́ и на́с, недосто́йных ча́д Твои́х, сподо́би на́с жи́тельствовати во огра́де оби́тели Пече́рския до конца́ дне́й на́ших, и прославля́ти Тебе́ и Сы́на Твоего́, Христа́ Бо́га на́шего, поя́ Ему́: Аллилу́иа.
Икос 12
Пою́ще Твоя́ ми́лости и чудеса́, явле́нныя во оби́тели Пече́рстей от ле́т дре́вних и до ны́не, покланя́емся пре́д о́бразом Твои́м, и́мже спаса́еши на́с и все́х призыва́ющих Тебе́ на́ по́мощь и вопию́щих Ти́ та́ко: Ра́дуйся, торжество ве́ры правосла́вныя в Ла́вре Пече́рстей явля́ющая; ра́дуйся, сердца́ челове́ческая любо́вию о Бо́зе распаля́ющая. Ра́дуйся, гору Печерскую, я́ко вторы́й Сина́й просла́вившая; ра́дуйся, ико́ны Твоя́ я́ко пропове́дницы спасе́ния показа́вшая. Ра́дуйся, с небе́сных высот на́ на́с призира́ющая; ра́дуйся, на́ благи́я дея́ния на́с наставля́ющая. Ра́дуйся, Пресвята́я Богоро́дице Де́во, Пече́рская похвало́ и на́ше утеше́ние.
Кондак 13
О Всепе́тая на́ша Ма́ти, Пресла́вная Влады́чице Богоро́дице! Приими́ сия́ похвалы́ и моле́ния, от скве́рных усте́н и нечи́стаго се́рдца возноси́мыя; сохрани́ Твою́ оби́тель, нашими грехми́ оскверне́нную; собери́ нас расточе́нных и сподо́би в чи́не а́нгельстем дости́гнути Небе́снаго Ца́рствия, и вку́пе с преподо́бными Анто́нием и Феодо́сием, и все́ми угодники Пече́рстими, прославля́ти ве́чно Тебе́, на́шу Ма́терь и Сы́на Твоего́ и Бо́га, и пе́ти пе́снь: Аллилу́иа.
Сей Кондак читается трижды, затем 1-й Икос и 1-й Кондак
Молитва 1-я
О Пресвята́я и Пренепоро́чная Де́во Богоро́дице, на́ша Пече́рская похвало́ и украше́ние, покро́ве и заступле́ние, и́стинная Влады́чице избра́ннаго уде́ла Твоего́; приими́ нас, недосто́йных рабо́в Твои́х, убо́гое моле́ние с ве́рою и любо́вию принося́щих пре́д чу́дным о́бразом Твои́м; посети́ ми́лостивно грехо́вное житие́ на́ше, просвеща́ющи све́том покая́ния, осени́ на́с, обремене́нных скорбьми́ мно́гими, Твое́ю небе́сною ра́достию и сподо́би на́с при́сно сла́вити Тя́ в ми́ре и благоче́стии во оби́тели Пече́рстей, да без поро́ка преше́дше зде́ пу́ть жития́ на́шего, по́мощию Твое́ю дости́гнем ве́чнаго весе́лия во све́тлостех святы́х и богоно́сных оте́ц на́ших Анто́ния и Феодо́сия и все́х преподо́бных пече́рских и еди́ными усты́ и се́рдцем воспое́м Тя́ и предве́чнаго Сы́на Твоего́, со Безнача́льным Его́ Отце́м и Пресвяты́м, Всеблаги́м, Животворя́щим и Единосу́щным Его́ Ду́хом во ве́ки веко́в. Ами́нь.
Молитва 2-я
О Пресвята́я и преблагослове́нная Ма́ти Го́спода и Спа́са на́шего Иису́са Христа́, Пречи́стая Присноде́во Богоро́дице Мари́е! Припа́даем и покланя́емся Тебе́ пре́д свято́ю и чудотво́рною ико́ною Твое́ю, юже от ле́т дре́вних чудесы́ мно́гими и исцеле́ньми просла́вити благоизво́лила еси́. Смире́нно мо́лимся Тебе́, благо́й и милосе́рдой засту́пнице на́шей: предста́тельством уго́дников Твои́х, преподо́бных Анто́ния и Феодо́сия Пече́рских, вонми́ гла́су гре́шных моле́ний на́ших, не пре́зри воздыха́ний от души́; ви́ждь ско́рби и беды, нас обыше́дшия и, я́ко любвеоби́льная вои́стинну Ма́ти, потщи́ся на по́мощь на́м безпо́мощным, уны́лым, во мно́гия и тя́жкия грехи́ впа́дшим и при́сно прогневля́ющим Го́спода и Созда́теля на́шего, Его́же умоли́, предста́тельнице на́ша, да не погуби́т на́с со беззако́нии на́шими, но да яви́т на́м человеколюби́вую Свою́ ми́лость. Испроси́, Влады́чице, у бла́гости Его́ все́м правосла́вным христиа́ном здра́вие и душе́вное спасе́ние, благоче́стное и ми́рное житие́, земли́ плодоно́сие, возду́ха благорастворе́ние, дожди́ благовре́менныя и благослове́ние свы́ше на вся́ блага́я дела́ и начина́ния на́ша; боля́щия исцели́, скорбя́щия уте́ши, бе́дствующим помози́; споспеши́ все́м на́м носи́ти и́го Христо́во в терпе́нии и смиренному́дрии и сподо́би нас благоче́стно житие́ земно́е сконча́ти, христианскую же непосты́дную кончи́ну получи́ти и Небе́сное Ца́рствие унасле́дити. О Цари́це всепе́тая, Ма́ти Бо́жия всеблага́я! Простри богоно́снеи ру́це Твои́ к возлю́бленному Сы́ну Твоему́ и Бо́гу на́шему, умоли́ Его́ спасти́ и изба́вити от поги́бели ве́чныя все́х и́ноков оби́тели Твоея́ Пече́рския. Я́коже дре́вле на горе́ Пече́рстей ми́лость явля́ла еси́, Влады́чице, си́це и ны́не яви́, Богоро́дице, Твоя́ щедро́ты́ над оби́телию Твое́ю и над на́ми, недосто́йными ча́ды Твои́ми; да и зде́, в земно́м стра́нствовании на́шем, и по кончи́не живота́ на́шего просла́вим Безнача́льнаго Отца́, Единоро́днаго Его́ Сы́на и Единосу́щнаго и Свята́го Его́ Ду́ха и Твое́ ми́лостивное предста́тельство во ве́ки веко́в. Ами́нь.
Тропарь, глас 4
Дне́сь све́тло торжеству́ет Пече́рская оби́тель, / и ра́дуется явле́нием о́браза Богома́тере безсме́ртный ли́к пече́рских отце́в, / с ни́миже и мы́ непреста́нно возопии́м: / Ра́дуйся, Благода́тная, / Пече́рская похвало́.
Кондак, глас 3
Де́ва дне́сь неви́димо предстои́т в це́ркви / и с ли́ки пече́рских отце́в мо́лится о на́с, / благогове́йно велича́ющих Ея́ безме́рную ми́лость к ро́ду на́шему, / я́вльшуюся в чу́дном о́бразе Ея́, / оби́тель Пече́рскую украша́ющем.
История этой иконы переносит нас в древние годы, когда пышно расцветала на Киевской Руси весна православия, когда преподобные отцы русского монашества Антоний и Феодосий Киево-Печерские собирали в темных пещерах благоговейную рать иноков, а Богоматерь, избравшая их монастырь как Свою земную обитель, великими и несказанными чудесами свидетельствовала о Своем благоволении к этому великому и чудному месту и, утвердив духовно обитель, пожелала воздвигнуть в нем Себе дивный храм. В 1075 году пришли из Царьграда четверо очень богатых, искусных церковных зодчих. Они были посланы явившейся им Богородицей и принесли переданные Ею им мощи, для того чтобы положить их в основание храма, и икону Успения Богоматери. Великие чудеса сопровождали все дело построения Киевской церкви, получившей имя «Великой». Чудотворная икона Успения, принесенная греческими зодчими из Константинополя, была утверждена на шелковых шнурах над царскими вратами главного иконостаса в «Великой» церкви Киево-Печерской лавры. Празднование этой иконе было установлено 3 мая / 16 мая.
* * *
Мусия – мозаика