Глас 8

на Го́споди, воззва́х: стихи́ры воскре́сны 3, повторя́юще пе́рвую. Гла́с 8:

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Вече́рнюю пе́снь, и слове́сную слу́жбу, Тебе́, Христе́, прино́сим: я́ко благоволи́л еси́ поми́ловати на́с Воскресе́нием.

Го́споди, Го́споди, не отве́ржи на́с от Твоего́ лица́: но благоволи́ поми́ловати на́с Воскресе́нием.

Ра́дуйся, Сио́не святы́й, ма́ти церкве́й, Бо́жие жили́ще: Ты́ бо прия́л еси́ пе́рвый, оставле́ние грехо́в, Воскресе́нием.

Сла́ва, и ны́не: Богоро́дичен догма́тик. Гла́с 8.

Ка́ко Тя́ ублажи́м, Богоро́дице? Ка́ко же воспои́м, Преблагослове́нная, непостижи́мое та́инство рожде́ния Твоего́? Веко́в бо Творе́ц, и на́шего Соде́тель естества́, Сво́й о́браз уще́дрив, низведе́ Самаго́ Себе́ во истоща́ние неизсле́димое, сы́й в невеще́ственных не́дрех О́тчих, во утро́бе Твое́й, Чи́стая, всели́ся, и Пло́ть непрело́жно бы́сть, от Тебе́, Неискусобра́чная, пребы́в у́бо, Е́же бе́ естество́м Бо́г. Те́мже Ему́ покланя́емся Бо́гу соверше́нну, и Челове́ку соверше́нну, Тому́ во обое́м зра́це: и́бо обое́ естество́ в Не́м е́сть вои́стинну: сугу́ба же вся́ пропове́дуем есте́ственная Его́ сво́йства, по сугу́бому существу́, два́ почита́юще де́йства и хоте́ния. Единосу́щен бо сы́й Бо́гу и Отцу́, самовла́стно хо́щет и де́йствует я́ко Бо́г: единосу́щен же сы́й и на́м, самовла́стно хо́щет, и де́йствует я́ко Челове́к. Того́ моли́, Чи́стая Всеблаже́нная, спасти́ся душа́м на́шим.

Та́же, Све́те ти́хий: Посе́м проки́мен: Госпо́дь воцари́ся, в ле́поту облече́ся. Три́жды. Сти́х: Облече́ся Госпо́дь в си́лу, и препоя́сася. Та́же, Сподо́би, Го́споди, в ве́чер се́й:

Иере́й же ектении́ не глаго́лет, но пое́м на стихо́вне стихи́ру воскре́сну, гла́с 8:

Возше́л еси́ на Кре́ст, Иису́се, снизше́дый с Небесе́: прише́л еси́ на сме́рть, Животе́ Безсме́ртный, к су́щим во тьме́, Све́т И́стинный: к па́дшим, все́х Воскресе́ние, просвеще́ние, и Спа́се на́ш, сла́ва Тебе́.

Та́же, богоро́дичны подо́бны, три́. Гла́с 8:

Подо́бен: О пресла́внаго чудесе́!

Сти́х: Помяну́ и́мя Твое́ во вся́ком ро́де и ро́де.

Ра́дуйся, Богоро́дице всепе́тая. Ра́дуйся, Исто́чниче живота́ ве́рным источа́ющ. Ра́дуйся, все́х Влады́чице, и Госпоже́ тва́ри Благослове́нная. Ра́дуйся, Всенепоро́чная, Препросла́вленная. Ра́дуйся, Всепречи́стая. Ра́дуйся, Пала́то. Ра́дуйся, Боже́ственное Селе́ние. Ра́дуйся, Чи́стая. Ра́дуйся, Ма́ти Де́во. Ра́дуйся, Богоневе́сто.

Сти́х: Слы́ши, Дщи́, и ви́ждь, и приклони́ у́хо Твое́.

Ра́дуйся, Богома́ти Пречи́стая. Ра́дуйся, ве́рных наде́ждо. Ра́дуйся, ми́ра очище́ние. Ра́дуйся, вся́кия ско́рби избавля́ющи рабы́ Твоя́. Ра́дуйся, челове́ков утеше́ние живоно́сное. Ра́дуйся, заступле́ние. Ра́дуйся, предсто́лпие призыва́ющих Тя́. Ра́дуйся, Бо́жие Боже́ственное пребыва́ние, и Горо́ Свята́я.

Сти́х: Лицу́ Твоему́ помо́лятся бога́тии лю́дстии.

Ра́дуйся, Богоро́дице, Ма́ти Христо́ва. Ра́дуйся, еди́на наде́ждо, челове́ков заступле́ние. Ра́дуйся, прибе́жище. Ра́дуйся, Све́щниче Све́та све́тлый. Ра́дуйся, Свеще́ освяще́нная. Ра́дуйся, Пала́то. Ра́дуйся, Раю́. Ра́дуйся, Боже́ственное Селе́ние. Ра́дуйся, Исто́чниче, источа́ющ во́ды притека́ющим к Тебе́.

Сла́ва, и ны́не: Богоро́дичен догма́тик:

Его́же не́бо не вмести́, Де́во Богоро́дице, во чре́ве Твое́м нетесноме́стно вмести́ся: и пребыла́ еси́, Чи́стая, сло́вом неизрече́нным, ничи́мже де́вству оскве́рншуся. Ты́ бо еди́на была́ еси́ в жена́х, и Ма́ти, и Де́ва: и Ты́ еди́на Пречи́стая, воздои́ла еси́ Сы́на Живода́вца, и на объя́тиях Твои́х носи́ла еси́ Недре́млющее О́ко: но не оста́ви не́дра О́тча, я́коже пре́жде ве́к предбы́сть. Но горе́ ве́сь Бо́г со а́нгелы, до́ле ве́сь из Тебе́ с челове́ки, и везде́ несказа́нно. Того́ моли́, Всесвята́я Влады́чице, спасти́ся, правосла́вно Богоро́дицу Чи́стую испове́дающим Тя́.

Та́же, Ны́не отпуща́еши: Трисвято́е, и по О́тче на́ш: Тропа́рь воскре́сен. Сла́ва, и ны́не: Богоро́дичен его́, и отпу́ст.

на Го́споди, воззва́х: поста́вим стихо́в 10, и пое́м стихи́ры воскре́сны, гла́с 8:

Сти́х: Изведи́ из темни́цы ду́шу мою́, испове́датися и́мени Твоему́.

Вече́рнюю пе́снь, и слове́сную слу́жбу, Тебе́, Христе́, прино́сим: я́ко благоволи́л еси́ поми́ловати на́с Воскресе́нием.

Сти́х: Мене́ жду́т пра́ведницы, до́ндеже возда́си мне́.

Го́споди, Го́споди, не отве́ржи на́с от Твоего́ лица́: но благоволи́ поми́ловати на́с Воскресе́нием.

Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.

Ра́дуйся, Сио́не святы́й, ма́ти церкве́й, Бо́жие жили́ще, ты́ бо прия́л еси́ пе́рвый, оставле́ние грехо́в, Воскресе́нием.

И́ны стихи́ры Анато́лиевы, гла́с то́йже.

Сти́х: Да бу́дут у́ши Твои́, вне́млюще гла́су моле́ния моего́.

Е́же от Бо́га Отца́ Сло́во, пре́жде ве́к ро́ждшееся, в после́дняя же времена́, То́ежде от Неискусобра́чныя вопло́щшееся во́лею, распя́тие сме́ртное претерпе́: и дре́вле умерщвле́ннаго челове́ка спасе́ Свои́м Воскресе́нием.

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Е́же из ме́ртвых Твое́ Воскресе́ние славосло́вим, Христе́, и́мже свободи́л еси́ Ада́мский ро́д от а́дова мучи́тельства: и дарова́л еси́ ми́рови я́ко Бо́г жи́знь ве́чную, и ве́лию ми́лость.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Сла́ва Тебе́, Христе́ Спа́се, Сы́не Бо́жий единоро́дный, пригвозди́выйся на Кресте́, и воскресы́й из гро́ба тридне́вен.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Тебе́ сла́вим, Го́споди, во́лею на́с ра́ди Кре́ст претерпе́вшаго, и Тебе́ покланя́емся, Всеси́льне Спа́се: не отве́ржи на́с от лица́ Твоего́, но услы́ши и спаси́ ны Воскресе́нием Твои́м, Человеколю́бче.

И́ны стихи́ры Богоро́дице, Па́вла Аморре́йскаго. Гла́с 4:

Подо́бен: Я́ко до́бля:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

А́нгельстии чи́нове Тя́, Богома́ти, сла́вят: Бо́га бо, Пречи́стая, родила́ еси́, И́же со Отце́м и Ду́хом Присносу́щнаго, и а́нгельская во́инства, от не су́щих хоте́нием соста́вльшаго. Его́же моли́, спасти́ и просвети́ти ду́ши, и́же правосла́вно я́ко Богоро́дицу воспева́ющих Тя́.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Я́ко исто́чник освяще́ния, ковче́г же всезлаты́й, Боже́ственным Ду́хом озаря́емь, молю́ и припа́даю: страсте́м пре́данную и окая́нную мою́ ду́шу просвети́, Влады́чице, избавля́ющи мя́ го́рькаго мучи́тельства бесо́вскаго, и пу́ть мне́ спасе́ния подаю́щи непреткнове́нен.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Престо́ли егда́ поста́вятся, и кни́ги разгну́тся, и дела́ облича́тся, и вся́к ко́ждо предста́нет обремене́н и обнаже́н, ве́сь трепе́ща негодова́ния Бо́жия, и пра́веднаго Того́ отвеща́ния: тогда́ мя́ пощади́, Влады́чице, и вся́каго суда́ исхити́, вся́ческих томле́ний су́щаго вино́вна.

Сла́ва, и ны́не: Богоро́дичен: Ца́рь Небе́сный за человеколю́бие на земли́ яви́ся, и с челове́ки поживе́: от Де́вы бо Чи́стыя пло́ть прие́мый, и из Нея́ проше́дый с восприя́тием: Еди́н е́сть Сы́н, сугу́б естество́м, но не ипоста́сию. Те́мже соверше́нна Того́ Бо́га, и соверше́нна Челове́ка вои́стинну пропове́дающе, испове́дуем Христа́ Бо́га на́шего: Его́же моли́, Ма́ти Безневе́стная, поми́ловатися душа́м на́шим.

Вхо́д. Све́те ти́хий: Проки́мен дне́: Госпо́дь воцари́ся: и про́чее по обы́чаю.

На стихо́вне стихи́ры воскре́сны, гла́с 8:

Возше́л еси́ на Кре́ст, Иису́се, снизше́дый с Небесе́: прише́л еси́ на сме́рть, Животе́ Безсме́ртный, к су́щим во тьме́ Све́т И́стинный: к па́дшим все́х Воскресе́ние, Просвеще́ние, и Спа́се на́ш, сла́ва Тебе́.

И́ны стихи́ры, по алфави́ту.

Сти́х: Госпо́дь воцари́ся, в ле́поту облече́ся.

Христа́ славосло́вим, воскре́сшаго от ме́ртвых: Ду́шу бо и Те́ло прие́м, стра́сти отобою́ду отсече́, пречи́стей у́бо Души́ во а́д соше́дшей, его́же и плени́: во гро́бе же истле́ния не ви́де свято́е Те́ло, Изба́вителя ду́ш на́ших.

Сти́х: И́бо утверди́ вселе́нную, я́же не подви́жится.

Псалмы́ и пе́сньми славосло́вим, Христе́, от ме́ртвых Твое́ Воскресе́ние: и́мже на́с свободи́л еси́ мучи́тельства а́дова, и я́ко Бо́г дарова́л еси́ жи́знь ве́чную, и ве́лию ми́лость.

Сти́х: До́му Твоему́ подоба́ет святы́ня, Го́споди, в долготу́ дни́й.

О Влады́ко все́х, Непостижи́ме, Тво́рче небесе́ и земли́, Кресто́м пострада́вый, мне́ безстра́стие источи́л еси́: погребе́ние же прие́м, и воскре́с во сла́ве, совоскреси́л еси́ Ада́ма руко́ю всеси́льною. Сла́ва Твоему́ тридне́вному Воста́нию, и́мже дарова́л еси́ на́м ве́чную жи́знь, и очище́ние грехо́в, я́ко Еди́н Благоутро́бен.

Сла́ва, и ны́не: Богоро́дичен: Безневе́стная Де́во, Я́же Бо́га неизрече́нно заче́нши пло́тию, Ма́ти Бо́га Вы́шняго, Твои́х рабо́в мольбы́ приими́, Всенепоро́чная, все́м подаю́щи очище́ние прегреше́ний: ны́не на́ша моле́ния прие́млющи, моли́ спасти́ся все́м на́м.

Та́же, Ны́не отпуща́еши: Трисвято́е и по О́тче на́ш:

Тропа́рь воскре́сен, гла́с 8:

С высоты́ снизше́л еси́, Благоутро́бне, погребе́ние прия́л еси́ тридне́вное, да на́с свободи́ши страсте́й, Животе́ и Воскресе́ние на́ше, Го́споди, сла́ва Тебе́.

Сла́ва, и ны́не: Богоро́дичен: И́же на́с ра́ди рожде́йся от Де́вы, и распя́тие претерпе́в, Благи́й, испрове́ргий сме́ртию сме́рть, и Воскресе́ние явле́й я́ко Бо́г, не пре́зри я́же созда́л еси́ руко́ю Твое́ю: яви́ человеколю́бие Твое́, Ми́лостиве, приими́ ро́ждшую Тя́ Богоро́дицу моля́щуюся за ны́: и спаси́, Спа́се на́ш, лю́ди отча́янныя.

Та́же, и отпу́ст.

Кано́н моле́бный Пресвяте́й Богоро́дице. Гла́с 8:

Пе́снь 1

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припе́в: Пресвята́я Богоро́дице, спаси́ на́с.

Прииди́те та́йно, бра́тие, я́ко от нача́ла Святе́й Богоро́дице, внесе́м, ве́рнии, пе́снь но́ву, дне́сь похваля́юще вели́чия Ея́.

Дре́вле боговиде́нием Моисе́й озари́вся умо́м, Твоему́ я́сно науча́шеся, Чи́стая, боголе́пному Зача́тию, па́че естества́, Де́во, я́вльшуся ему́ в купине́ саду́.

Сла́ва: Тебе́ предлага́ю серде́чная дея́ния, и прия́тно подаю́ писа́ние – бли́з су́щий Боже́ственный заступле́ния кро́в, ко Влады́це Христу́ Тебе́ предложи́в.

И ны́не: Приклони́ ми у́хо Твое́, Чи́стая, правосла́вною ве́рою, в се́ни лица́ Твоего́, че́стно любо́вию Ти́ притека́ющему, и стра́хом покланя́ющуся, моле́бный мо́й гла́с услы́ши.

Пе́снь 3

Ирмо́с: Ты́ еси́ утвержде́ние притека́ющих к Тебе́, Го́споди: Ты́ еси́ све́т омраче́нных, и пое́т Тя́ ду́х мо́й.

Ле́ствица дре́вле патриа́рхова Тя́ прообража́ше, Пренепоро́чная: а́нгельско бо явля́ше сни́тие Бо́жие к на́м, Боже́ственное соше́ствие во утро́бе Твое́й.

Иу́дово коле́но всели́ся, ю́же Иа́ков прорече́, от коле́на его́ прорасти́ти избавле́ние, Иису́са Христа́: Его́же Ты́ ро́ждши, Пречи́стая, просла́вилася еси́.

Сла́ва: Грехми́ отча́ян, обрето́х Тя́ приста́нище спасе́ния, Пречи́стая Богоро́дице, упова́ние на́ше и по́моще: те́мже мя́ к покая́нию наста́ви.

И ны́не: Бли́з Тя́ су́щу Влады́ки и́мам, Пресла́вная Влады́чице, дея́ний мои́х кни́гу возложи́х на Тя́ ве́рою: не премолчи́ уще́дрити мя́.

Пе́снь 4

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися, богови́дно усмотри́, и со стра́хом славосло́вяше си́лу Твою́.

Ты́ я́ко мони́сты златы́ми оде́яна Неве́ста О́тча, благода́ть прие́мши, укра́шшися добро́тою де́вства, Ма́ти яви́лася еси́ Сы́на Бо́жия.

Тя́ и́стинный Сио́н, Христо́с Сло́во, изво́ли Себе́ в Боже́ственное селе́ние, я́ко избра́нну избра́в, Богоро́дице, на обновле́ние всего́ ми́ра.

Сла́ва: Ра́дуйся, кра́сная пала́то Сло́ва, де́вственный черто́же Царя́; ра́дуйся, похвало́ все́х безпло́тных; ра́дуйся, челове́ков по́моще.

И ны́не: Удаля́ются от Бо́га, те́мже и погиба́ют, отмета́ющии о́бразы Сы́на Твоего́, Ма́ти Бо́жия Де́во Богоро́дице: и́миже спаса́ются чту́щии Тя́.

Пе́снь 5

Ирмо́с: Мра́к души́ моея́ разжени́, Светода́вче Христе́ Бо́же, началоро́дную тьму́ изгна́в бе́здны: и да́руй ми́ све́т повеле́ний Твои́х, Сло́ве, да у́тренюя сла́влю Тя́.

С Боже́ственным соше́дшеся Гаврии́лом, возопии́м Богоро́дице ве́рно: ра́дуйся, Де́во Свята́я, Благода́тная, Госпо́дь с Тобо́ю, И́же Тебе́ ра́ди потреби́в печа́ль, подаде́ ра́дование.

Пречи́стое Твое́ чре́во Гедео́н ви́де, Де́во Чи́стая, в не́же я́ко до́ждь Сло́во соше́д, воплоти́ся Боже́ственным Ду́хом, О́тча неразлу́чен сы́й Божества́.

Сла́ва: Помо́щница ми́ра, и Засту́пница еси́ челове́ков гре́шных, Богороди́тельнице Де́во: и ве́рою и любо́вию прибега́ющым к Тебе́, премене́ние спаси́тельное, и реши́ло прегреше́ний мно́гих.

И ны́не: Прорасти́ла еси́ без се́мене, И́же пре́жде вся́кия тва́ри, Прозябе́ние – Сы́на О́тча, Безле́тно же и Безнача́льно, Ду́хом Боже́ственным, Богороди́тельнице Чи́стая: Его́же подо́бие ви́да вси́ почита́ем.

Пе́снь 6

Ирмо́с: Содержи́ма мя́ приими́, Человеколю́бче, грехи́ мно́гими, и припа́дающа щедро́там Твои́м, я́ко проро́ка, Го́споди, и спаси́ мя.

Де́вства Тя́ зерца́ло су́що, и прия́телище чи́сто Божества́ восхваля́ем, Де́во Неискусобра́чная, пе́сньми.

Бо́г во утро́бе Твое́й воплоти́ся, безстра́стно и ужа́сно, Богоневе́сто, я́коже в сви́тце но́ве пи́сан пе́рстом О́тчим.

Сла́ва: Очище́ние и́мамы покро́в Тво́й, и изве́стную наде́жду и заступле́ние, Де́во Чи́стая: не посрами́, Влады́чице, рабы́ Твоя́.

И ны́не: Страсте́й неуста́вное беше́ние, предста́нием Твои́м, Богоневе́сто, уста́ви в тишину́: и ко приста́нищу наста́ви на́с тишины́.

Та́же: Го́споди, поми́луй, три́жды. Сла́ва, и ны́не:

Конда́к, гла́с 8:

Взбра́нной Воево́де победи́тельная, я́ко изба́вльшеся от злы́х, благода́рственная воспису́ем Ти́, раби́ Твои́, Богоро́дице: но я́ко иму́щая держа́ву непобеди́мую, от вся́ких на́с бе́д свободи́, да зове́м Ти́: ра́дуйся, Неве́сто Неневе́стная.

Пе́снь 7

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших.

Ра́дости на́шея хода́таица яви́лася еси́ Де́во, и благода́ти принося́ще вене́ц любо́вию, ра́дуйся, вопие́м Ти́, Благослове́нная Чи́стая, похваля́юще.

Гора́ Свята́я еси́ Бо́жия приосене́нная, гора́ ту́чна, Пренепоро́чная: гора́ усыре́нна Боже́ственными сия́нии: гора́, в не́йже Бо́г благоволи́ жи́ти.

Сла́ва: Побежда́яй благода́ть Твою́ не́сть гре́х, ма́терне бо дерзнове́ние и во́лю и́маши, и реши́ши прегреше́ния моли́твами Твои́ми, и прево́диши вся́ стремле́ния.

И ны́не: От Тро́ицы родила́ еси́ Еди́наго, Богоро́дице, бы́вша непрело́жна плотски́м соедине́нием, сугу́ба су́ща естество́м: Его́же ви́да о́браз почита́ем.

Пе́снь 8

Ирмо́с: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте, и превозноси́те во вся́ ве́ки.

Кади́льница яви́лася еси́ проро́ку, Боже́ственнаго У́гля су́щи, грехи́ оте́млющаго, Богоро́дице Де́во, Ма́ти Бо́га на́шего.

Дании́л прови́де Тя́ го́ру ве́лию, Богоро́дице Де́во: из нея́же честны́й Ка́мень Христо́с, пло́тию облече́ся, и ле́сти низложи́ и́дольския хра́мы.

Сла́ва: Вели́кий ки́т и́щет пожре́ти мя́, лю́таго греха́ и страсте́й мои́х отча́яния: но предвари́ и спаси́ раба́ Твоего́, Влады́чице.

И ны́не: И́же Тобо́ю бесе́довавый к челове́ком, Бо́г сы́й вся́ческих, зра́к челове́ка восприя́т: Его́же взо́р почита́ем, Де́во, в писа́ниих.

Пе́снь 9

Ирмо́с: Вои́стинну Богоро́дицу Тя́ испове́дуем спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Вертогра́д затворе́н Тя́, Де́во Богоро́дице, и запеча́тан исто́чник Ду́хом Боже́ственным, прему́дрый в пе́снех пое́т: те́мже я́ко Са́д жи́зни, воплоща́ется Христо́с.

Твоего́ неска́заннаго Рождества́ пропису́я проро́к, кни́гу запеча́тану прови́де, ея́же никто́же та́инство разуме́, вочелове́чения Рождества́ Твоего́.

Сла́ва: Тебе́ во умиле́нии души́ мо́лимся вси́: не пре́зри, Влады́чице, на́ша мольбы́, но бу́ди благоуве́тлив на́м покро́в, и моли́тву на́шу услы́ши.

И ны́не: Твоему́ и Сы́на Твоего́ припа́даю образо́м: и сомня́щихся почита́ти, я́ко Ма́нентовы лжи́ отмета́ю, Богоро́дице Де́во: те́мже правосла́вно пе́снь скончава́ю.

Та́же, Досто́йно е́сть: Трисвято́е по О́тче на́ш: конда́к, и про́чее по обы́чаю, и отпу́ст.

Кано́н Пресвяте́й и Живонача́льней Тро́ице,[его́же краестро́чие: Тро́ице Еди́нице, спаси́ мя, Твоего́ раба́.] Творе́ние Митрофа́ново. Гла́с 8:

Пе́снь 1

Ирмо́с: Колесницегони́теля фарао́ня погрузи́, чудотворя́й иногда́ Моисе́йский же́зл, крестообра́зно порази́в, и раздели́в мо́ре: Изра́иля же беглеца́ пешехо́дца спасе́, пе́снь Бо́гови воспева́юща.

Припе́в: Пресвята́я Тро́ице, Бо́же на́ш, сла́ва Тебе́.

Трисо́лнечному Царю́, и Строи́телю, и Промысли́телю вся́ческих, и Благо́му Еди́ному, Есте́ственне Су́щему, и Еди́нственную иму́щему Божества́ сла́ву, Бо́гу Единонача́льному припа́даем, пе́снь Трисвяту́ю пою́ще.

Рече́ния Боже́ственная, и проро́чествия я́же свы́ше по́мняще я́ве, Богонача́льное Естество́ Еди́нственное сла́вим, Присносу́щное, Собезнача́льное, в Трие́х Ли́цех, Отце́, и Сы́не, и Ду́се, Соде́тельное, Всеси́льное.

Священнотаи́нник Авраа́м бы́в, священнообра́зно дре́вле, Творца́ все́х и Бо́га и Го́спода, в Трие́х у́бо Ипоста́сех прия́т ра́дуяся, и Тре́х Ипоста́сей держа́ву Еди́нственную позна́.

Богоро́дичен: Неискусобра́чно Христа́ родила́ еси́, е́же по на́м, на́с ра́ди восприе́мша естество́, Пречи́стая, и Непрело́жна по обою́ пребы́вша. Его́же моли́ непреста́нно, грехо́в ми́ дарова́ти и искуше́ний избавле́ние.

Пе́снь 3

Ирмо́с: Утвержде́й в нача́ле небеса́ ра́зумом, и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Тебе́ Непристу́пнаго Бо́га и Царя́ Сла́вы на престо́ле Иса́ия ви́де высо́це, и Херуви́мы и Серафи́мы сла́вящия непреста́нными пе́сньми, Еди́нственнаго Триипоста́снаго.

Еди́наго от Отца́ я́ко от Ума́ рожде́наго Сло́ва, и Ду́ха происходя́ща неизглаго́ланно, по коему́ждо помышле́нии, и кни́жными уче́нии пости́гше, Еди́наго Бо́га Трисо́лнечнаго почита́ем.

И́же сы́й Нерожде́нный Оте́ц, и Своего́ Существа́ Сия́ние роди́в нетле́нно Сы́на, Све́т от Све́та: исхо́дне предлага́ет сра́сленный Све́т Ду́ха, Вседе́тельна, и Единоче́стна.

Богоро́дичен: Хра́м яви́лася еси́ чи́ст, Де́во Ма́ти Мари́е, вся́ всеси́льно и прему́дро соста́вльшему Христу́, и в чи́не поло́жшему и нося́щему: Его́же Ми́лостива ми́ сотвори́ ма́терними Твои́ми моли́твами.

Го́споди, поми́луй, три́жды.

Та́же, седа́лен, гла́с 8: Подо́бен: Повеле́нное та́йно:

Трисо́лнечнаго и Честна́го Богонача́лия си́лу ве́рнии ны́не восхва́лим, я́ко ма́нием то́кмо вся́ соста́вил вы́шняя ликостоя́ния а́нгельская, и ни́жняя священнонача́лия церко́вная, е́же взыва́ти: Свя́т, Свя́т, Свя́т еси́, Бо́же Преблаги́й: сла́ва и пе́ние держа́ве Твое́й.

Сла́ва, и ны́не: Богоро́дичен: Я́же Непреме́ннаго Бо́га поро́ждшая, пременя́емое при́сно се́рдце мое́ грехо́м и ле́ностию, прило́гми льсти́ваго, утверди́, Блага́я, моли́твами ма́терними Твои́ми: я́ко да и а́з благода́рно сла́влю Тя́, Богороди́тельнице Мари́е, поми́луй ста́до Твое́, е́же стяжа́ла еси́, Всенепоро́чная.

Пе́снь 4

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Восто́к я́вльшися Божества́ су́щим во тьме́, всю́ разгна́ несве́тлую но́щь страсте́й: и Пра́вды Со́лнце возсия́, про́сто у́бо по Существу́, Трисия́нно же Ли́цы: Е́же пое́м при́сно, и сла́вим.

Серафи́мскими усты́ воспева́емаго, бре́нными устна́ми сла́вим Еди́нственнаго, и Тро́ичнаго Го́спода Сла́вы, Естество́м и Ипоста́сьми, вопию́ще: О Всецарю́, Твои́м рабо́м пода́ждь разли́чных прегреше́ний проще́ние!

Содержи́тельная все́х су́щих, Неви́димая, Всеще́драя, Благоутро́бная, Человеколюби́вая Тро́ице Честна́я, и Богонача́льная, не забу́ди мене́, Твоего́ раба́, в коне́ц: ниже́ разори́ и́же завеща́л еси́ Твои́м рабо́м Заве́т, за неизрече́нную ми́лость.

Богоро́дичен: Кра́сную Тя́, Всечи́стая, еди́ну обре́т от ве́ка добро́ту Иа́ковлю, Пребезнача́льное Сло́во, и всели́ся в Тя́ благоутро́бия ра́ди, обнови́ челове́ческое естество́: Его́же моли́ непреста́нно, от вся́кия мне́ изба́витися ско́рби.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́ окая́ннаго: но обрати́ мя, и к све́ту за́поведей Твои́х пути́ моя́ напра́ви, молю́ся.

Соприсносу́щная Три́ Ли́ца сла́вим, Еди́наго же Го́спода, Тя́ Боже́ственное Естество́, разделя́юще про́сто, и совокупля́юще, и ве́рно вопие́м: Богонача́льная Тро́ице Свята́я, Твоя́ рабы́ от ско́рби изба́ви.

Рыда́ю зе́льне за не́мощь мы́сли моея́, ка́ко не хотя́ стражду́ нево́льное вои́стинну измене́ние? Сего́ ра́ди зову́: Живонача́льная Тро́ице Свята́я, до́брых в стоя́нии мя́ учини́.

Дрема́нием отягче́на мя́ грехо́вным, и порева́ема в со́н сме́ртный, я́ко Человеколюби́вая и Преблага́я, и Всеми́лостивая, Богонача́льная Тро́ице Свята́я, уще́дри и возста́ви мя́.

Богоро́дичен: Ма́ти Де́во Отрокови́це, Пречи́стая, Всенепоро́чная, Богоблагода́тная, Твои́ми моли́твами Сы́на и Бо́га Твоего́ и Го́спода ми́лостива сотвори́ мне́: и страсте́й, и прегреше́ний Твоего́ раба́ изба́ви вско́ре.

Пе́снь 6

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Небе́сных умо́в чинонача́лия подража́юще, Единонача́льная все́х Тро́ице Пресу́щественная, Трисвяты́ми пе́сньми Тя́ славосло́вим, бре́нными на́шими усты́.

И́же по о́бразу Твоему́ челове́ка созда́вшему, и от не су́щих все́ прему́дро соста́вльшему, Бо́гу Триипоста́сному покланя́юся, и чту́, и пою́, и велича́ю Тя́.

Вседержи́телю Бо́же, и Еди́не Неопределе́нный, всели́ся в мя́ за неизрече́нную ми́лость, Трисо́лнечный Влады́ко: и озари́ мя, и вразуми́, я́ко Благоутро́бен.

Богоро́дичен: Хра́м яви́лася еси́ Бо́га Невмести́маго, Пречи́стая, хра́м и мене́ Того́ покажи́, Боже́ственныя благода́ти Пресвята́я Влады́чице, Твои́ми мольба́ми, и соблюди́ невреди́ма.

Го́споди, поми́луй, три́жды.

Седа́лен, гла́с 8: Подо́бен: Повеле́нное та́йно:

Отца́ Безнача́льна ве́рнии, Сы́на Собезнача́льна, и Ду́ха Боже́ственнаго вои́стинну песносло́вим, Неслия́нне, Непревра́тне и Неизме́нне, Тро́ицу Про́сту, и Свя́ту, и Сра́слену, вопию́ще со а́нгелы: Свя́т еси́ О́тче, Сы́не, со Ду́хом Пресвяты́м и Честны́м. Поми́луй, я́же созда́л еси́ по о́бразу Твоему́, Влады́ко.

Сла́ва, и ны́не: Богоро́дичен: Благодари́м Тя́ при́сно, Богоро́дице, и велича́ем, Чи́стая, и покланя́емся, воспева́юще Рождество́ Твое́, Благода́тная, вопию́ще непреста́нно: спаси́ на́с, Де́во Преми́лостивая, я́ко Блага́я в ча́с испыта́ния, да не посра́млени бу́дем раби́ Твои́.

Пе́снь 7

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще поя́ху: благослове́н еси́, Бо́же оте́ц на́ших.

Прему́дростию неизглаго́ланною Твое́ю, и пучи́ною благосты́ни, ту́не Твоего́ раба́ поми́лованна покажи́ мя: и ны́не, я́коже дре́вле, изба́ви озлобле́ния, Тро́ице Еди́нице Бо́же, грехо́в и страсте́й. [Два́жды.]

У́м Нерожде́нный Оте́ц, и Сло́во ро́ждшееся от Него́, и Ду́х Боже́ственный, непости́жне исхо́ден сы́й, Бо́же Единонача́льне, Трисо́лнечне, пою́ Тебе́: благослове́н Бо́г О́те́ц на́ших.

Богоро́дичен: Умерщвле́н бы́х, Пречи́стая, грехо́вным я́дом напое́н, и притека́ю к Тебе́ ве́рою, ро́ждшей Нача́льника живота́: Твои́ми моли́твами раба́ Твоего́ оживи́, и искуше́ний и страсте́й изба́ви, Еди́на Чи́стая.

Пе́снь 8

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Све́т сы́й Незаходи́м, Трисия́нен и Трисо́лнечный и Единонача́лен, Самодержа́вен, Просте́йший, Бо́г Непостижи́мый, и Самодержа́вен Госпо́дь, ны́не те́мное и омраче́нное мое́ се́рдце озари́: и покажи́ светоза́рно и светоно́сно пе́ти Тя́, и сла́вити во вся́ ве́ки.

Свяще́ннейшими крилы́, Серафи́ми Боже́ственнейшии, ли́ца и но́ги благогове́йно покрыва́ют, сла́вы не терпя́ще непостижи́мыя добро́ты Твоея́, Благонача́льная, Богонача́льная, Единонача́льная Тро́ице Пресвята́я: оба́че и мы́ воспева́ти Тя́ дерза́ем, и сла́вити ве́рно во ве́ки.

Господонача́лие Безнача́льное, Всеси́льную и Пребла́гу, Совершеннонача́льну, Благоде́йственну, Неопреде́льну, Вину́ Невино́вну, Твори́тельну, Присносу́щну, Промысли́тельну и Спаси́тельную все́м Едини́цу по Существу́, и Тро́ицу Ли́цы, сла́влю Тя́, Бо́же мо́й, ве́рно во ве́ки.

Богоро́дичен: На земли́ возсия́ Невече́рнее Со́лнце, Рождество́м е́же из Тебе́ де́вственным, Пречи́стая Влады́чице, и челове́ки изба́ви от и́дольскаго помраче́ннаго мра́ка. Те́мже и ны́не мя́ па́че Того́ Богонача́лия озари́ луча́ми, и соблюди́ Твоего́ раба́.

Пе́снь 9

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют.

И́же все́ми Ца́рствующее, и Вседе́тельное Пренача́льное Естество́, Вышшеле́тную, Живонача́льную, Благоутро́бну, Человеколюби́вую, Благу́ю, Единонача́льную Тро́ицу Тя́ ны́не славосло́вяще, грехо́в проще́ния про́сим, ми́рови ми́ра, и це́рквам единомы́слия. [Два́жды.]

Еди́но Госпо́дьство и Трисия́нное, Еди́нственное Богонача́лие Трисо́лнечное, певцы́ приими́ Твоя́ боголе́пно, и прегреше́ний изба́ви, и искуше́ний и лю́тых: и вско́ре ми́р пода́ждь человеколю́бно, и це́рквам соедине́ние.

Богоро́дичен: Во утро́бу, Христе́ Спа́се мо́й, деви́ческую все́лься, яви́лся еси́ ми́ру Твоему́ богому́жно, Непревра́тен, Неслия́нен вои́стинну: и обеща́л еси́ всегда́ с Твои́ми рабы́ бы́ти я́ве. Те́мже Тебе́ Ро́ждшия моли́твами, ми́р всему́ ста́ду Твоему́ устро́й.

Посе́м припе́вы Григо́рия Синаи́та, Досто́йно е́сть: И про́чее полу́нощницы, пи́сано в конце́ кни́ги сея́.

Бо́г Госпо́дь, и яви́ся на́м: на гла́с 8, и глаго́лем тропа́рь воскре́сен: С высоты́ снизше́л еси́: два́жды. Сла́ва, и ны́не: Богоро́дичен: И́же на́с ра́ди рожде́йся от Де́вы: Та́же обы́чное стихосло́вие Псалти́ря.

По 1-м стихосло́вии, седа́льны воскре́сны, гла́с 8:

Воскре́сл еси́ из ме́ртвых, Животе́ все́х, и А́нгел све́тел жена́м вопия́ше: преста́ните от сле́з, апо́столом благовести́те, возопи́йте пою́ща: я́ко воскре́се Христо́с Госпо́дь, благоволи́вый спасти́ я́ко Бо́г ро́д челове́ческий.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Воскресы́й из гро́ба я́ко вои́стинну, преподо́бным повеле́л еси́ жена́м пропове́дати Воста́ние апо́столом, я́коже пи́сано е́сть: и ско́рый Пе́тр предста́ гро́бу, и све́т зря́ во гро́бе, ужаса́шеся. Те́мже и уви́дев плащани́цы, кроме́ Боже́ственнаго Те́ла в не́м лежа́щия, со стра́хом возопи́: сла́ва Тебе́, Христе́ Бо́же, я́ко спаса́еши вся́, Спасе́ на́ш: О́тчее бо еси́ Сия́ние.

Сла́ва, и ны́не: Богоро́дичен: Небе́сную две́рь, и киво́т, всесвяту́ю го́ру, светоза́рный о́блак воспои́м, небе́сную ле́ствицу, слове́сный ра́й, Е́вино избавле́ние, вселе́нныя всея́ вели́кое сокро́вище, я́ко спасе́ние в Не́й соде́лася ми́рови, и оставле́ние дре́вних согреше́ний. Сего́ ра́ди вопие́м Ти́: моли́ Сы́на Твоего́ и Бо́га, прегреше́ний оставле́ние дарова́ти, благоче́стно покланя́ющимся Пресвято́му Рождеству́ Твоему́.

По 2-м стихосло́вии седа́льны воскре́сны, гла́с 8:

Челове́цы, Спа́се, гро́б Тво́й запеча́таша; А́нгел ка́мень от двере́й отвали́; жены́ ви́деша воста́вша от ме́ртвых, и ты́я благовести́ша ученико́м Твои́м в Сио́не, я́ко воскре́сл еси́, Животе́ все́х, и разреши́шася у́зы сме́ртныя: Го́споди, сла́ва Тебе́.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Ми́ра погреба́тельная жены́ прине́сша, гла́с а́нгельский из гро́ба слы́шаху: преста́ните от сле́з, и вме́сто печа́ли ра́дость приими́те, возопи́йте пою́ща: я́ко воскре́се Христо́с Госпо́дь, благоволи́вый спасти́ я́ко Бо́г ро́д челове́ческий.

Сла́ва, и ны́не: Богоро́дичен: не седя́ще пое́м, но стоя́ще, и со стра́хом и благогове́нием:

О Тебе́ ра́дуется, Благода́тная, вся́кая тва́рь, а́нгельский собо́р, и челове́ческий ро́д, Освяще́нный Хра́ме, и Раю́ слове́сный: де́вственная похвало́, из Нея́же Бо́г воплоти́ся, и Младе́нец бы́сть, пре́жде ве́к сы́й Бо́г на́ш: ложесна́ бо Твоя́ престо́л сотвори́, и чре́во Твое́ простра́ннее небе́с соде́ла. О Тебе́ ра́дуется, Благода́тная, вся́кая тва́рь, сла́ва Тебе́.

Ипакои́, гла́с 8: Мироно́сицы Жизнода́вца предстоя́ща гро́бу, Влады́ку иска́ху в ме́ртвых Безсме́ртнаго, и ра́дость благове́щения от А́нгела прие́мша, апо́столом возвеща́ху: я́ко воскре́се Христо́с Бо́г, подая́й ми́рови ве́лию ми́лость.

Степе́нна, гла́с 8. И́хже стихи́ повторя́юще пое́м.

Антифо́н 1:

От ю́ности моея́ вра́г мя́ искуша́ет, сластьми́ пали́т мя́: а́з же наде́яся на Тя́, Го́споди, побежда́ю сего́.

Ненави́дящии Сио́на, да бу́дут у́бо пре́жде исторже́ния я́ко трава́: ссе́чет бо Христо́с вы́я и́х, усече́нием му́к.

Сла́ва: Святы́м Ду́хом, е́же жи́ти вся́ческим: Све́т от Све́та, Бо́г Вели́к: со Отце́м пое́м Ему́, и с Сло́вом.

И ны́не: то́йже.

Антифо́н 2:

Се́рдце мое́ стра́хом Твои́м да покры́ется смиреному́дрствующее: да не возне́сшееся отпаде́т от Тебе́, Всеще́дре.

На Го́спода име́вый наде́жду, не устраши́тся тогда́, егда́ огне́м вся́ суди́ти и́мать, и му́кою.

Сла́ва: Святы́м Ду́хом, вся́к кто́ Боже́ственный ви́дит, и предглаго́лет, чудоде́йствует вы́шняя, в Трие́х Еди́наго Бо́га поя́: а́ще бо и трисия́ет, единонача́льствует Божество́.

И ны́не: то́йже.

Антифо́н 3:

Воззва́х Тебе́, Го́споди, вонми́, приклони́ ми у́хо Твое́ вопию́щу, и очи́сти, пре́жде да́же не во́змеши мене́ отсю́ду.

В ма́тери свое́й земли́ отходя́й вся́к, па́ки разреша́ется, прия́ти му́ки, или́ по́чести пожи́вших.

Сла́ва: Святы́м Ду́хом богосло́вие, Еди́ница Трисвята́я: Оте́ц бо Безнача́лен: от Него́же роди́ся Сы́н безле́тно, и Ду́х Сопресто́лен, Сообра́зен, от Отца́ спросия́вший.

И ны́не: то́йже.

Антифо́н 4:

Се́ ны́не что́ добро́, или́ что́ красно́; но е́же жи́ти бра́тии вку́пе: в се́м бо Госпо́дь обеща́ живо́т ве́чный.

О ри́зе свое́й, И́же кри́ны се́льныя украша́яй, повелева́ет, я́ко не подоба́ет пещи́ся.

Сла́ва: Святы́м Ду́хом, Единови́дною Вино́ю, вся́ содержа́тся миропода́тельне: Бо́г бо Се́й е́сть, Отцу́ же и Сы́нови Единосу́щен госпо́дственне.

И ны́не: то́йже.

Проки́мен, гла́с 8: Воцари́тся Госпо́дь во ве́к, Бо́г тво́й, Сио́не, в ро́д и ро́д. Сти́х: Хвали́, душе́ моя́, Го́спода, восхвалю́ Го́спода в животе́ мое́м. Вся́кое дыха́ние: и Ева́нгелие воскре́сно у́треннее. Воскресе́ние Христо́во. Псало́м 50. И про́чая поря́ду.

Кано́н воскре́сен. Гла́с 8:

Пе́снь 1

Ирмо́с: Колесницегони́теля фарао́ня погрузи́, чудотворя́й иногда́ Моисе́йский же́зл, крестообра́зно порази́в, и раздели́в мо́ре: Изра́иля же беглеца́, пешехо́дца спасе́, пе́снь Бо́гови воспева́юща.

Припе́в: Сла́ва, Го́споди, свято́му Воскресе́нию Твоему́.

Всеси́льну Христо́ву Божеству́ ка́ко не диви́мся? От Страсте́й у́бо все́м ве́рным, безстра́стие и нетле́ние точа́щу, от Ребра́ же свята́го исто́чник безсме́ртия иска́пающу, и Живо́т из гро́ба Присносу́щный.

Я́ко благоле́пен жена́м А́нгел ны́не яви́ся, све́тлыя нося́ о́бразы есте́ственныя невеще́ственныя чистоты́, зра́ком же возвеща́я све́т Воскресе́ния, зовы́й: воскре́се Госпо́дь.

Богоро́дичен: Пресла́вная возглаго́лашася о Тебе́ в роде́х родо́в, Бо́га Сло́ва во чре́ве вме́щшая, чиста́ же пребы́вши, Богоро́дице Мари́е. Те́мже Тя́ вси́ почита́ем, су́щее по Бо́зе заступле́ние на́ше.

Кано́н кре́стовоскре́сен.

Ирмо́с: Во́ду проше́д я́ко су́шу:

Взя́шася врата́ боле́зненная, и ужасо́шася вра́тницы а́довы, зря́ще в преиспо́днейшая Соше́дшаго, И́же на высоте́ все́х превы́ше естества́.

Удиви́шася чи́ни а́нгельстии, зря́ще на Престо́ле посажде́но О́тчи, отпа́дшее естество́ челове́ческое, затворе́ное в преиспо́дних земли́.

Чи́ни Тя́ а́нгельстии и челове́честии, Безневе́стная Ма́ти, хва́лят непреста́нно: Зижди́теля бо си́х, я́ко Младе́нца на объя́тиих Твои́х носи́ла еси́.

И́н кано́н Пресвяте́й Богоро́дице.

Ирмо́с: Пои́м Го́сподеви, прове́дшему лю́ди Своя́:

Пречи́стая Богоро́дице, вопло́щшееся Присносу́щное и Пребоже́ственное Сло́во, па́че естества́ ро́ждши, пое́м Тя́.

Гро́зд Тя́ Живоно́сен, всеми́рнаго иска́пающ сла́дость спасе́ния, Де́ва, Христе́, роди́.

Ро́д Ада́мль, ко е́же па́че ума́ блаже́нству, Тобо́ю возведе́нный, Богоро́дице, досто́йно сла́вит Тя́.

Катава́сия: Отве́рзу уста́ моя́:

Пе́снь 3

Ирмо́с: Утвержде́й в нача́ле небеса́ ра́зумом, и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Осужде́на бы́вша Ада́ма вкуше́нием греха́, пло́ти Твоея́ спаси́тельною стра́стию оправда́л еси́, Христе́: Са́м бо непови́нен сме́ртнаго иску́са бы́л еси́, Безгре́шне.

Воскресе́ния све́т возсия́ су́щим во тьме́, и се́ни сме́ртней седя́щим, Бо́г мо́й Иису́с, и Свои́м Божество́м кре́пкаго связа́в, сего́ сосу́ды расхи́тил е́сть.

Богоро́дичен: Херуви́мов и Серафи́мов превы́шши яви́лася еси́, Богоро́дице: Ты́ бо Еди́на прия́ла еси́ Невмести́маго Бо́га в Твое́м чре́ве, Нескве́рная: те́мже Тя́ ве́рнии вси́ пе́сньми, Чи́стая, ублажа́ем.

И́н. Ирмо́с: Небе́снаго кру́га Верхотво́рче Го́споди:

Отве́ргшагося пре́жде за́поведи, Го́споди, изринове́на мя́ от Тебе́ сотвори́л еси́, в него́же вообрази́вся, послуша́нию же навы́к, себе́ па́ки назда́л еси́ распя́тием.

Прему́дростию вся́ проуве́девый, Го́споди, и ра́зумом Твои́м водрузи́вый преиспо́дняя, не не сподо́бил еси́ снизхожде́нием Твои́м, Сло́ве Бо́жий, воскреси́ти, е́же по о́бразу Твоему́.

Богоро́дичен: Всели́вся в Де́ву теле́сне, Го́споди, яви́лся еси́ челове́ком, я́коже подоба́ше ви́дети Тебе́: Ю́же и показа́л еси́ я́ко и́стинную Богоро́дицу, и ве́рных Помо́щницу, Еди́не Человеколю́бче.

И́н. Ирмо́с: Ты́ еси́ утвержде́ние:

Да́ждь на́м по́мощь Твои́ми моли́твами, Всечи́стая, прило́ги отража́ющи лю́тых обстоя́ний.

Е́ве прама́тери Ты́ исправле́ние была́ еси́, Нача́льника жи́зни ми́рови, Христа́, Богоро́дице, ро́ждши.

Препоя́ши мя́ си́лою, Всечи́стая, Я́же вои́стинну Бо́га ро́ждши пло́тию, О́тчую Ипоста́сную Си́лу.

Пе́снь 4

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Ты́ врага́ су́ща мя́ зело́ возлюби́л еси́: Ты́ истоща́нием стра́нным соше́л еси́ на зе́млю, Благоутро́бне Спа́се, после́дняго моего́ досажде́ния не отве́ргся, и пребы́в на высоте́ пречи́стыя Твоея́ сла́вы, пре́жде безче́ствованнаго просла́вил еси́.

Кто́ зря́, Влады́ко, ны́не не ужаса́ется, стра́стию сме́рть разруша́ему, Кресто́м бежа́щее тле́ние, и сме́ртию а́д бога́тства истощава́емый, Боже́ственною си́лою Тебе́ распя́таго? Чу́дно де́ло, Человеколю́бче!

Богоро́дичен: Ты́ ве́рным похвала́ еси́ Безневе́стная, Ты́ Предста́тельнице, Ты́ и прибе́жище христиа́н, стена́ и приста́нище: к Сы́ну бо Твоему́ мольбы́ но́сиши, Всенепоро́чная, и спаса́еши от бе́д, ве́рою и любо́вию Богоро́дицу Чи́стую Тебе́ зна́ющих.

И́н. Ирмо́с: Услы́шах, Го́споди.

На Кресте́ Тя пригвозди́ша законопресту́пных де́ти, Христе́ Бо́же: и́мже спа́сл еси́ я́ко Благоутро́бен, сла́вящия Твоя́ страда́ния.

Воскре́с от гро́ба, вся́ совоскреси́л еси́ су́щия во а́де ме́ртвыя, и просвети́л еси́ я́ко Благоутро́бен, сла́вящия Твое́ Воскресе́ние.

Богоро́дичен: Бо́га, Его́же родила́ еси́, Пречи́стая Мари́е, Того́ моли́ дарова́ти рабо́м Твои́м согреше́ний проще́ние.

И́н. Ирмо́с то́йже.

Кла́с возрасти́вшая животво́рный, неора́нная Ни́во, подаю́щаго ми́рови жи́знь, Богоро́дице, спаса́й пою́щия Тя́.

Богоро́дицу Тя́, Всечи́стая, просве́щшиися вси́ пропове́дуем: Со́лнце бо Пра́вды родила́ еси́, Присноде́во.

Очище́ние да́руй на́шим неве́дением, я́ко Безгре́шен: и умири́ ми́р Тво́й, Бо́же, моли́твами Ро́ждшия Тя́.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́ окая́ннаго; но обрати́ мя, и к све́ту за́поведей Твои́х пути́ моя́ напра́ви, молю́ся.

Оде́ятися претерпе́л еси́ в багряни́цу пре́жде стра́сти Твоея́, Спа́се, поруга́емь, первозда́ннаго покрыва́я безобра́зное обнаже́ние: и на́г пригвозди́лся еси́ на Кресте́ пло́тию, совлача́я, Христе́, ри́зу умерщвле́ния.

От пе́рсти сме́ртныя, Ты́ па́дшее мое́ па́ки назда́л еси́ существо́, воскре́с: и нестаре́ющееся, Христе́, устро́ил еси́, яви́в па́ки я́коже ца́рский о́браз, нетле́ния жи́знь блиста́ющ.

Богоро́дичен: Ма́тернее дерзнове́ние, е́же к Сы́ну Твоему́ иму́щи, Всечи́стая, сро́днаго промышле́ния, е́же о на́с, не пре́зри, мо́лимся: я́ко Тебе́ и Еди́ну христиа́не ко Влады́це очище́ние ми́лостивно предлага́ем.

И́н. Ирмо́с: Просвети́ на́с:

Наста́ви на́с си́лою Креста́ Твоего́, Христе́: те́м бо Тебе́ припа́даем, ми́р пода́ждь на́м, Человеколю́бче.

Окорми́ живо́т на́ш, я́ко Преблаги́й пою́щих Твое́ Воста́ние, и ми́р пода́ждь на́м, Человеколю́бче.

Богоро́дичен: Умоли́, Чи́стая, Сы́на Твоего́ и Бо́га на́шего, Неискусобра́чная Мари́е Пречи́стая, е́же низпосла́ти на́м ве́рным ве́лию ми́лость.

И́н. Ирмо́с: У́тренююще, вопие́м Ти́:

Утоли́ нестерпи́мую бу́рю страсте́й мои́х, Я́же Бо́га ро́ждшая Окорми́теля и Го́спода.

Слу́жат Рождеству́ Твоему́, Пречи́стая Богоро́дице, а́нгельстии чи́нове, и челове́ков собра́ние.

Мари́е Богоро́дице Безневе́стная, упова́ния враго́в осуети́, и пою́щия Тя́ возвесели́.

Пе́снь 6

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Дре́вом кре́пко низложи́ мя началозло́бный: Ты́ же, Христе́, возне́сся на Кресте́, кре́пльшаго низложи́л еси́, посрами́в сего́, па́дшаго же воскреси́л еси́.

Ты́ уще́дрил еси́ Сио́на, возсия́вый от гро́ба, но́ваго вме́сто ве́тхаго соверши́в, я́ко Благоутро́бен, Боже́ственною Твое́ю Кро́вию: и ны́не ца́рствуеши в не́м во ве́ки, Христе́.

Богоро́дичен: Да изба́вимся от лю́тых прегреше́ний, мольба́ми Твои́ми, Богороди́тельнице Чи́стая, и да улучи́м, Пречи́стая, Боже́ственное Сия́ние, из Тебе́ неизрече́нно воплоще́ннаго Сы́на Бо́жия.

И́н. Ирмо́с: Моли́тву пролию́ ко Го́споду:

Дла́ни на Кресте́ распросте́рл еси́, исцеля́яй неудержа́нно просте́ртую во Еде́ме ру́ку первозда́ннаго: и Твое́ю во́лею же́лчи вкуси́в, и спа́сл еси́, Христе́, я́ко Си́лен, сла́вящия Твоя́ страда́ния.

Сме́рти Изба́витель вкуси́, дре́вняго осужде́ния, я́ко да и тле́ния ца́рство разруши́т, и во а́дская сше́д, воскре́се Христо́с, и спасе́ я́ко Си́лен пою́щия Его́ Воскресе́ние.

Богоро́дичен: Не преста́й за ны́ моля́щи, Пречи́стая Богоро́дице Де́во, я́ко ве́рным утвержде́ние Ты́ еси́: наде́ждою Твое́ю крепи́мся, и любо́вию Тя́, и из Тебе́ воплоще́ннаго неизрече́нно сла́вим.

И́н. Ирмо́с: Ри́зу мне́ пода́ждь све́тлу:

Хра́м Тя́ Бо́жий и ковче́г, и черто́г одушевле́нный, и две́рь небе́сную, Богоро́дице, ве́рнии возвеща́ем.

Тре́бищ разруши́тель я́ко Бо́г, бы́вшее Рождество́ Твое́, Мари́е Богоневе́сто, покланя́емо е́сть со Отце́м и Ду́хом.

Сло́во Бо́жие Тебе́ земны́м, Богоро́дице, показа́ Небе́сную Ле́ствицу: Тобо́ю бо к на́м сни́де.

Конда́к, гла́с 8: Подо́бен: Я́ко нача́тки:

Воскре́с из гро́ба, уме́ршия воздви́гл еси́, и Ада́ма воскреси́л еси́, и Е́ва лику́ет во Твое́м Воскресе́нии, и мирсти́и концы́ торжеству́ют, е́же из ме́ртвых Воста́нием Твои́м, Многоми́лостиве.

И́кос: А́дова ца́рствия плени́вый, и ме́ртвыя воскреси́вый, Долготерпели́ве, жены́ мироно́сицы сре́тил еси́, вме́сто печа́ли ра́дость принесы́й; и апо́столом Твои́м возвести́л еси́ победи́тельная, Спа́се мо́й, зна́мения Живода́телю, и тва́рь просвеща́еши, Человеколю́бче. Cего́ ра́ди и ми́р сра́дуется, е́же из ме́ртвых Воста́нию Твоему́, Многоми́лостиве.

Пе́снь 7

Ирмо́с: Бо́жия снизхожде́ния о́гнь устыде́ся в Вавило́не иногда́: сего́ ра́ди о́троцы в пещи́ ра́дованною ного́ю, я́ко во цве́тнице лику́юще поя́ху: благослове́н еси́, Бо́же оте́ц на́ших.

Сла́вное истоща́ние, Боже́ственное бога́тство Твоея́ нищеты́, Христе́, удивля́ет а́нгелы, на Кресте́ зря́щия Тя́ пригвожда́ема, за е́же спасти́ ве́рою зову́щия: благослове́н еси́, Бо́же оте́ц на́ших.

Боже́ственным Твои́м соше́ствием све́та испо́лнил еси́ преиспо́дняя, и тьма́ прогна́на бы́сть пре́жде гоня́щая. Отню́дуже воскресо́ша и́же от ве́ка ю́зницы, зову́ще: благослове́н Бо́г оте́ц на́ших.

Тро́ичен: Все́м у́бо Го́спода, Еди́ному же то́чию Единоро́дному Сы́ну правосла́вно Отца́, богосло́вяще Тя́ возвеща́ем, и Еди́наго ве́дяще от Тебе́ исходя́ща Ду́ха Пра́ваго, Соесте́ственна и Соприсносу́щна.

И́н. Ирмо́с: От Иуде́и доше́дше:

Спасе́ние соде́лал еси́ посреде́ вселе́нныя, проро́чески, Бо́же: на Дре́во бо вознесе́н бы́в, вся́ призва́л еси́ ве́рою зову́щия: оте́ц на́ших Бо́же, благослове́н еси́.

Воскре́с от гро́ба, я́коже от сна́, Ще́дре, все́х изба́вил еси́ от тли́, тва́рь же уверя́ется апо́столы пропове́дающими воста́ние: отце́в Бо́же, благослове́н еси́.

Богоро́дичен: Равноде́тельное Ро́ждшему, Равноси́льное Сло́во и Соприсносу́щное, во утро́бе Де́вы, Отца́ благоволе́нием, и Ду́ха, созида́ется: отце́в на́ших Бо́же, благослове́н еси́.

И́н. Ирмо́с то́йже.

От Де́вственных ложе́сн вопло́щся, яви́лся еси́ на спасе́ние на́ше. Те́мже Твою́ Ма́терь ве́дяще Богоро́дицу правосла́вно зове́м: отце́в Бо́же, благослове́н еси́.

Же́зл прорасти́ла еси́, Де́во, от ко́рене Иессе́ова, Всеблаже́нная, Пло́д цветонося́щи спаси́тельный, ве́рою Сы́ну Твоему́ зову́щим: отце́в Бо́же, благослове́н еси́.

Прему́дрости испо́лни все́х и си́лы Боже́ственныя, Ипоста́сная Прему́дросте Вы́шняго, Богоро́дицею, ве́рою Тебе́ пою́щих: отце́в на́ших Бо́же, благослове́н еси́.

Пе́снь 8

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Иису́сова Божества́ Пребоже́ственная си́ла, в на́с боголе́пно возсия́ла е́сть: пло́тию бо вку́ш за все́х сме́рть кре́стную, разруши́ а́дову кре́пость. Его́же непреста́нно де́ти благослови́те, свяще́нницы воспо́йте, лю́дие превозноси́те во вся́ ве́ки.

Распны́йся воста́, великовы́йный паде́, пады́й и сокруше́нный испра́вися, тля́ отве́ржена бы́сть, и нетле́ние процвете́: Жи́знию во ме́ртвенное поже́рто бы́сть. Де́ти благослови́те, свяще́нницы воспо́йте, лю́дие превозноси́те во вся́ ве́ки.

Тро́ичен: Трисве́тлое Божество́, Еди́ну сия́ющее Зарю́ от Еди́наго Триипоста́снаго Естества́, Роди́теля Безнача́льна: Единоесте́ственно же Сло́во Отцу́, и Сца́рствующаго Единосу́щнаго Ду́ха, де́ти благослови́те, свяще́нницы воспо́йте, лю́дие превозноси́те во вся́ ве́ки.

И́н. Ирмо́с: Победи́тели мучи́теля:

На Дре́ве ру́це мне́ Просте́ршаго обнаже́нному, призыва́юща мя́, Свое́ю благообра́зною согре́яти нагото́ю: благослови́те вся́ дела́ Госпо́дня, и превозноси́те Его́ во ве́ки.

Из преиспо́дняго а́да Возне́сша мя́ па́дшаго, и высокопресто́льною сла́вою Роди́теля поче́тшаго: благослови́те вся́ дела́ Госпо́дня Го́спода, и превозноси́те Его́ во ве́ки.

Богоро́дичен: Ада́ма, Де́во, па́дшаго у́бо яви́лася еси́ Дщи́, Бо́га же Ма́ти, обнови́вшаго мое́ существо́: Его́же пое́м вся́ дела́ я́ко Го́спода, и превозно́сим во вся́ ве́ки.

И́н. Ирмо́с: Царя́ Небе́снаго:

Сопроти́вных разжже́нныя и пламенови́дныя на на́с угаси́ стре́лы: я́ко да пое́м Тя́ во вся́ ве́ки.

Преесте́ственне Соде́теля и Спа́са, Бо́га Сло́ва родила́ еси́, Де́во: те́мже Тя́ пое́м, и превозно́сим во вся́ ве́ки.

Просвети́тельную Тя́, и Златоза́рную, все́льшийся в Тя́ Све́т Непристу́пный, Де́во, показа́ Свещу́ во вся́ ве́ки.

Та́же пое́м пе́снь Богоро́дицы: Вели́чит душа́ моя́ Го́спода: С припе́вом: Честне́йшую Херуви́м:

Пе́снь 9

Ирмо́с: Ужасе́ся о Се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют.

Боже́ственным и Безнача́льным Естество́м про́ст сы́й, сложи́лся еси́ прия́тием пло́ти, в Тебе́ Само́м сию́ соста́вив, Сло́ве Бо́жий, и пострада́в я́ко челове́к, пребы́л еси́ кроме́ страсте́й я́ко Бо́г. Те́мже Тя́ во Двою́ Существу́ неразде́льно и неслия́нно велича́ем.

Отца́ по Существу́ Боже́ственному, я́коже естество́м бы́в челове́к, ре́кл еси́ Бо́га Вы́шний рабо́м снизходя́, воскре́с от гро́ба, благода́тию Отца́ земноро́дным поло́ж, И́же по естеству́ Бо́га же и Влады́ку, с Ни́мже Тя́ вси́ велича́ем.

Богоро́дичен: Яви́лася еси́, О Де́во Ма́ти Бо́жия, па́че естества́ ро́ждши пло́тию Бо́га Сло́ва, Его́же Оте́ц отры́гну от се́рдца Своего́ пре́жде все́х ве́к, я́ко Бла́г, Его́же ны́не и теле́с превы́шша разуме́ем, а́ще и в те́ло облече́ся.

И́н. Ирмо́с: Устраши́ся:

Бо́жия Тя́ естество́м у́бо Сы́на, зача́таго во утро́бе све́мы Богома́тере, и бы́вшаго на́с ра́ди Челове́ка, и зря́ще Тя́ на Кресте́ естество́м у́бо стра́ждуща челове́ческим, безстра́стна же я́ко Бо́га пребыва́юща велича́ем.

Разруши́ся тьма́ дря́хлая, от а́да бо возсия́ Со́лнце Пра́вды Христо́с, земли́ просвеща́я вся́ концы́, сия́я Божества́ све́том, Небе́сный Челове́к, Бо́г земны́й: Его́же во двою́ естеству́ велича́ем.

Напрязи́, и успева́й, и ца́рствуй, Сы́не Богома́тере, исма́ильтеския лю́ди покаря́я, борю́щия ны́, я́ко ору́жие непобеди́мое, приходя́щим к Тебе́ Кре́ст с копие́м да́руя.

И́н. Ирмо́с: Вои́стинну Богоро́дицу:

Ра́дости и весе́лия испо́лнь е́сть па́мять Твоя́, приступа́ющим исцеле́ния точа́щи, и благоче́стно Богоро́дицу Тя́ возвеща́ющим.

Псалмы́ Тя́ воспева́ем, Благода́тная, и немо́лчно, е́же ра́дуйся, прино́сим: Ты́ бо источи́ла еси́ все́м ра́дость.

Красе́н, Богоро́дице, прорасте́ Пло́д Тво́й, не тли́ причаща́ющимся хода́тайствен, но жи́зни, ве́рою Тя́ велича́ющим.

По катава́сии ектения́ ма́лая.

Та́же, Свя́т Госпо́дь Бо́г на́ш. Посе́м ексапостила́рий.

На хвали́тех стихи́ры воскре́сны, гла́с 8:

Сти́х: Сотвори́ти в ни́х су́д напи́сан: сла́ва сия́ бу́дет все́м преподо́бным Его́.

Го́споди, а́ще и суди́лищу предста́л еси́ от Пила́та суди́мый, но не отступи́л еси́ от престо́ла со Отце́м седя́: и воскре́с из ме́ртвых, ми́р свободи́л еси́ от рабо́ты чужда́го, я́ко Ще́др и Человеколю́бец.

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Го́споди, ору́жие на диа́вола Кре́ст Тво́й да́л еси́ на́м: трепе́щет бо и трясе́тся, не терпя́ взира́ти на си́лу его́: я́ко ме́ртвыя возставля́ет, и сме́рть упраздни́. Сего́ ра́ди покланя́емся погребе́нию Твоему́ и Воста́нию.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Го́споди, а́ще и я́ко ме́ртва во гро́бе иуде́и положи́ша: но я́ко Царя́ спя́ща во́ини Тя́ стрежа́ху, и я́ко живота́ сокро́вище, печа́тию печа́таша: но воскре́сл еси́, и по́дал еси́ нетле́ние душа́м на́шим.

Сти́х: Хвали́те Его́ во гла́се тру́бнем, хвали́те Его́ во псалти́ри и гу́слех.

А́нгел Тво́й, Го́споди, Воскресе́ние пропове́давый, стра́жи у́бо устраши́, жена́м же возгласи́ глаго́ля: что́ и́щете Жива́го с ме́ртвыми; воскре́се Бо́г сы́й, и вселе́нней жи́знь дарова́.

И́ны стихи́ры Анато́лиевы, гла́с то́йже.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Пострада́л еси́ Кресто́м, Безстра́стный Божество́м, погребе́ние прия́л еси́ тридне́вное, да на́с свободи́ши от рабо́ты вра́жия, и обезсме́ртив оживотвори́ши на́с, Христе́ Бо́же, Воскресе́нием Твои́м, Человеколю́бче.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Покланя́юся, и сла́влю, и воспева́ю, Христе́, Твое́ из гро́ба Воскресе́ние, и́мже свободи́л еси́ на́с от а́довых нереши́мых у́з: и дарова́л еси́ ми́рови я́ко Бо́г жи́знь ве́чную, и ве́лию ми́лость.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Жизноприе́мнаго Твоего́ гро́ба стрегу́ще законопресту́пнии, с кустоди́ею запеча́таша тогда́: Ты́ же я́ко Безсме́ртен Бо́г и Всеси́лен, воскре́сл еси́ тридне́вен.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Доше́дшу Ти́ во врата́ а́дова, Го́споди, и сия́ сокруши́вшу, пле́нник си́це вопия́ше: кто́ Се́й е́сть, я́ко не осужда́ется в преиспо́дних земли́, но и я́ко се́нь разруши́ сме́ртное узи́лище; прия́х Того́ я́ко ме́ртва, и трепе́щу я́ко Бо́га. Всеси́льне, поми́луй на́с.

Сла́ва: стихи́ра ева́нгельская. И ны́не: Богоро́дичен: Преблагослове́нна еси́, Богоро́дице Де́во: Славосло́вие вели́кое.

Та́же, тропа́рь воскре́сен:

Воскре́с из гро́ба, и у́зы растерза́л еси́ а́да, разруши́л еси́ осужде́ние сме́рти, Го́споди, вся́ от сете́й врага́ изба́вивый: яви́вый же Себе́ апо́столом Твои́м, посла́л еси́ я́ на про́поведь, и те́ми ми́р Тво́й по́дал еси́ вселе́нней, Еди́не Многоми́лостиве.

Та́же ектении́: и отпу́ст.

Помяни́ на́с, Христе́ Спа́се ми́ра, я́коже разбо́йника помяну́л еси́ на Дре́ве: и сподо́би все́х, Еди́не Ще́дре, Небе́сному Ца́рствию Твоему́.

Сти́х: Блаже́ни чи́стии се́рдцем, я́ко ти́и Бо́га у́зрят.

Слы́ши Ада́ме, и ра́дуйся со Е́вою: я́ко обнажи́вый пре́жде обоя́, и пре́лестию взе́м ва́с пле́нники, Кресто́м Христо́вым упраздни́ся.

Сти́х: Блаже́ни миротво́рцы, я́ко ти́и сы́нове Бо́жии нареку́тся.

На Дре́ве пригвожде́н бы́в, Спа́се на́ш, во́лею, я́же от дре́ва кля́твы Ада́ма изба́вил еси́, воздая́ я́ко Ще́др е́же по о́бразу, и ра́йское селе́ние.

Сти́х: Блаже́ни изгна́ни пра́вды ра́ди. Я́ко те́х е́сть Ца́рство Небе́сное.

Дне́сь Христо́с воскре́с от гро́ба, все́м ве́рным подая́ нетле́ние, и ра́дость обновля́ет мироно́сицам по Стра́сти и Воскресе́нии.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Ра́дуйтеся му́дрыя жены́ мироно́сицы, пе́рвыя Христо́во Воскресе́ние ви́девша, и его́ возвести́вша апо́столом, всего́ ми́ра воззва́ние.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Дру́зи Христо́вы апо́столи я́вльшеся, сопресто́льни Его́ сла́ве бы́ти иму́ще, со дерзнове́нием Тому́ на́м предста́ти, я́ко ученицы́ Его́ моли́теся.

Сла́ва: тро́ичен: Безнача́льная Тро́ице, Неразде́льное Существо́, Сопресто́льная Еди́нице, Единоче́стная сла́вою, Пренача́льное Естество́ и Ца́рство, спаса́й и́же ве́рою воспева́ющих Тя́.

И ны́не: Богоро́дичен: Ра́дуйся, Бо́жие простра́нное Вмести́лище; ра́дуйся, Ковче́же но́ваго заве́та; ра́дуйся, Ру́чко, из Нея́же Ма́нна все́м даде́ся Небе́сная.

Проки́мен, гла́с 8: Помоли́теся, и воздади́те Го́сподеви Бо́гу на́шему. Сти́х: Ве́дом во Иуде́и Бо́г, во Изра́или ве́лие и́мя Его́. Аллилу́ия: Прииди́те, возра́дуемся Го́сподеви, воскли́кнем Бо́гу Спас́ителю на́шему. Сти́х: Предвари́м лице́ Его́ во испове́дании, и во псалме́х воскли́кнем Ему́.

на Го́споди, воззва́х: стихи́ры покая́нны, гла́с 8.

Подо́бен: Го́споди, а́ще и суди́лище:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Го́споди, прише́дый в ми́р гре́шники призва́ти, и разбо́йники, и мытаря́, и блудни́цу, и блу́днаго прие́мый: па́че все́х мене́ согреши́вшаго Тебе́, Христе́ мо́й, и ника́коже ктому́ ка́ющася, человеколю́бне призови́.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Го́споди, И́же от мытаре́й па́стыри Це́ркви Твое́й поставле́й, и И́же то́й пре́жде гони́теля, ны́не засту́пника соде́лав: и мене́ те́х моли́твами Твое́ овча́ покажи́, Спа́се, и да не в сне́дь чужде́му непотре́бный бу́ду.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Пла́чи, окая́нная душе́, пре́жде конца́, и Бо́гу прилепи́ся, зову́щи Ему́ от се́рдца и стена́ньми, о всескве́рная: согреши́х Ти́, Христе́, не гнуша́йся мене́, молю́ся, но обрати́в мя́ я́ко Ми́лостив, и проще́ния сподо́би.

Та́же Мине́и стихи́ры свято́му, а́ще и́мать. А́ще не́сть Мине́и, и́ны стихи́ры, безпло́тным святы́м а́нгелом, подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Го́споди, безпло́тных собо́ри непреста́нно сла́вят Тя́, Tвоея́ наслажда́ющеся красоты́, и неизрече́нною добро́тою, и трисо́лнечными луча́ми бога́тно озаря́еми: и́хже моли́твами и предста́тельством, Спа́се, спаси́ ду́ши на́ша.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Го́споди, всесли́чныя ли́ки а́нгельския, Ты́ поста́вил еси́ Всеси́льным Твои́м Сло́вом, и Пресвяты́м Твои́м Ду́хом, неотпа́дающими заря́ми сия́ние дарова́в. И́хже мольба́ми и предста́тельствы, Спа́се, спаси́ ду́ши на́ша.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Го́споди, Серафи́ми воспева́ют Тя́, и Вла́сти, и А́нгели, Нача́ла, Госпо́дьствия, Престо́ли и Си́лы, и Арха́нгели, и Херуви́ми стра́шнии хвале́ние Тебе́ прино́сят: и́хже мольба́ми и предста́тельствы, Спа́се, спаси́ ду́ши на́ша.

Сла́ва, и ны́не: Богоро́дичен: Всегда́ Творца́ а́з, тва́рь, оскорбля́ю и прогневля́ю, да́ждь ми́ исправле́ние, Отрокови́це, пре́жде Того́ премени́вши, и по́мощию Твое́ю к дело́м уго́дным возста́ви, я́ко да улучу́ спасе́ние и оставле́ние.

Та́же, Све́те ти́хий: Проки́мен дне́: и Сподо́би, Го́споди, в ве́чер се́й:

На стихо́вне стихи́ры покая́нны, гла́с 8:

Тебе́ Царя́ и Влады́ку, а́нгели непреста́нно воспева́ют, а́з же Ти́ припа́даю, я́ко мыта́рь зовы́й: Бо́же, очи́сти мя́, и поми́луй мя́.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Безсме́ртна су́щи, душе́ моя́, волна́ми жите́йскими не покрыва́йся, но возни́кни вопию́щи к своему́ Благода́телю: Бо́же, очи́сти мя́, и спаси́ мя.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченицы Госпо́дни, вся́ко ме́сто освяща́ете, и вся́к неду́г уврачу́ете: и ны́не моли́теся, изба́витися от се́тей вра́жиих душа́м на́шим, мо́лим вы́.

Сла́ва, и ны́не: Богоро́дичен: Арха́нгела Гаврии́ла гла́с восприи́мше, рце́м: ра́дуйся Ма́ти Бо́жия, Я́же Жизнода́вца Христа́ ми́ру ро́ждши.

Та́же, Ны́не отпуща́еши: И Трисвято́е по О́тче на́ш: тропа́рь, ектения́, и отпу́ст.

Кано́н Пресвяте́й Богоро́дице. Гла́с 8:

Пе́снь 1

Ирмо́с: Колесницегони́теля фарао́ня погрузи́, чудотворя́й иногда́ Моисе́йский же́зл, крестообра́зно порази́в и раздели́в мо́ре: Изра́иля же беглеца́, пешехо́дца спасе́, пе́снь Бо́гови воспева́юща.

Припе́в: Пресвята́я Богоро́дице, спаси́ на́с.

Пресла́вная о Тебе́ возглаго́лашася, Пречи́стая, ве́рных сла́ва еди́на бы́вша. Те́мже бу́дущия сла́вы прича́стника мя́ покажи́ Твои́ми моли́твами, сла́вящаго Тя́, Пресвята́я Де́во Всепе́тая.

Благослове́н Пло́д, Пречи́стая, чре́ва Твоего́, И́мже земни́и вси́ кля́твы изба́вихомся, Благослове́нная Всечи́стая. О, несказа́ннаго чудесе́, недоуме́ннаго слы́шания, все́х же ве́рных спасе́ния!

Сла́ва: А́нгел мо́лит Тя́, Го́споди, мно́жество всегда́: ученик собо́р, и проро́к, сосло́вия му́ченик, и преподо́бных Твои́х: Богоро́дицы ра́ди грехо́в проще́ние да́руй на́м, я́ко Человеколю́бец.

И ны́не: Тебе́, Пречи́стую, Ю́же в ложесна́х прие́мшую О́гнь нестерпи́мый, молю́ ве́рою: гее́нны огня́ изба́вити мя́ и исхити́ти, и ве́чнующаго муче́ния свободи́ти Твои́ми благоприя́тными моли́твами.

Пе́снь 3

Ирмо́с: Небе́снаго кру́га Верхотво́рче Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Чи́стаго жития́ отпа́д, Пречи́стая, приложи́хся ското́м, и осужде́н ве́сь бы́х: Я́же Судию́ ро́ждшая, вся́каго осужде́ния изба́ви, и спаси́ мя.

Стена́ния, Чи́стая, и душе́вную сле́зу, и при́сное ми́ умиле́ние пода́ждь, Отрокови́це: я́ко да пла́чу одержа́щия мя́ стра́сти от невня́тия, Богоблагода́тная.

Сла́ва: Небе́снии чи́нове, служе́бнии ду́си, собо́р проро́к и апо́стол, и му́ченик Твои́х мо́лят Тя́ непреста́нно, Ще́дре: лю́дем Твои́м да́руй прегреше́ний оставле́ние.

И ны́не: Милосе́рдия мя́ Боже́ственнаго, я́ко ми́лостива, Пречи́стая, ны́не сподо́бити умоли́ Милосе́рдаго: нра́вы бо неми́лостивы немилосе́рдно стяжа́в, ве́чному огню́ досто́ин бы́х.

Пе́снь 4

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Лука́вое грехо́в мои́х рукописа́ние раздери́, Пречи́стая, Боже́ственным копие́м, пробо́дшим Боже́ственная ре́бра, вочелове́читися из Тебе́ Восхоте́вшаго: и моли́ Cего́, в Кни́зе мя́ спасе́нных написа́ти, безу́мно от Него́ удали́вшагося.

Да гла́сы благода́рственными сла́влю Тя́, да любо́вию Боже́ственною велича́ю Тя́, Пренепоро́чная: е́же вели́ким Твои́м Рождество́м, вся́ удали́вшияся возвели́чивши, вельми́ удали́вшагося и лю́те па́дшаго мя́, проще́ния Боже́ственнаго сподо́би.

Сла́ва: Зако́ны в Тебе́ испраздни́шася естества́, па́че бо естества́ Бо́га Сло́ва родила́ еси́. Те́мже Тя́ ве́рою молю́, Пренепоро́чная: па́че естества́ челове́ческаго мно́го согре́шша, и Бо́га уда́льшася, обра́щшагося спаси́ моли́твами Твои́ми.

И ны́не: Вра́г у́бо грехо́вными стрела́ми ду́шу мою́ всю́ уязви́, и оскверни́ сластьми́ мое́ се́рдце, и от пути́ отведе́ пра́ваго. Сего́ ра́ди, Де́во, вопию́ Ти: обрати́вши исцели́ и спаси́ мя.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Ро́дове родо́в Тя́, Де́во, Присноблаже́нную ны́не блажа́т, Небе́сныя Си́лы, я́ко до́льняя с вы́шними совоку́пльшую, восхваля́ют Еди́ну в жена́х Благослове́нную, па́дшаго Ада́ма исправле́ние.

Пребы́ти ми́ це́лу, и непрело́жна стоя́ния улу́чшу, но благоше́ствующу же, и Бо́гу уго́дная де́лающу, Блага́я, моли́, Блага́го ро́ждши Сло́ва, на́с безслове́сия изба́вльшаго.

Сла́ва: И́же Кро́вь Свою́, Сло́ве, на Кресте́ пролия́вый, за премно́гую ми́лости бе́здну, страсте́й мои́х бе́здну изсуши́: и во умиле́нии Тебе́ Бо́гу угоди́ти, Богоро́дицы ра́ди сподо́би.

И ны́не: Ма́ти Де́во Отрокови́це, Я́же Необъиме́ннаго пло́тию ро́ждшая, а́нгелов сла́ву, и бесо́в я́зву, Богоневе́сто, мое́ се́рдце уязви́вшееся грехо́м, цельбы́ Боже́ственныя сподо́би.

Пе́снь 6

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Поми́ловася Тобо́ю естество́ челове́ческое, ми́лостивая Влады́чице: Ми́лостиваго бо родила́ еси́, Пречи́стая. Те́мже молю́ Тя, мою́ ду́шу поми́луй.

Безпло́тных чи́нове мо́лят Тя́, Христе́, му́ченик, проро́к, и апо́стол Твои́х: Ро́ждшия Тя́ ра́ди, лю́ди Твоя́ спаси́ от вся́каго обстоя́ния.

Сла́ва: Я́же неде́ланная Земля́, Де́лателя ро́ждши, и все́х Зижди́теля, олядене́вшую ду́шу мою́ страстьми́, плодоно́сну покажи́ Боже́ственным разуме́нием.

И ны́не: Преступи́х за́поведи я́же к Бо́гу веду́щия мя́, и не хотя́ порабо́тихся лука́вым страсте́м: те́мже молю́ Тя, Присноде́во, исхити́ мя от те́х влады́чествия.

Та́же, Го́споди поми́луй, три́жды. Сла́ва, и ны́не:

Седа́лен, гла́с 8.

Небе́сное благоче́стие Си́лам, и похва́льную высоту́ душа́м на́шим, Ма́тереде́ву Отрокови́цу восхва́лим ве́рнии: ра́дуйся, Я́же а́нгелом Творца́ во утро́бе заче́нши, ра́дуйся, па́дающих очище́ние, Бо́га Сло́ва вопло́щши. Ра́дуйся, Неве́сто Неневе́стная.

Пе́снь 7

Ирмо́с: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́ ра́дованною ного́ю, я́ко во цве́тнице лику́юще поя́ху: благослове́н еси́, Бо́же оте́ц на́ших.

Неизрече́нным Рождество́м Твои́м, стра́шных и неизглаго́ланных веще́й на́с сподо́била еси́, Богоро́дице: те́мже мя́ стра́шныя му́ки изба́ви, и неизрече́нныя мя́ ра́дости испо́лни, да пою́ Тя при́сно, Многопе́тую.

В ле́ности житие́ мое́ ижди́в, бы́х безпло́ден, и ужаса́юся пре́ния, и гее́нны огня́ негаси́маго: Я́же Огнь ро́ждшая, Богоро́дице, Нестерпи́мый, приложи́ изба́вити мя́ моли́твами Твои́ми.

Сла́ва: Чуде́с превы́ше вели́кое чу́до Твоего́ Рождества́, Чи́стая Де́во, сего́ ра́ди вопию́ Ти, Богороди́тельнице: Твоя́ ми́лости на мне́ удиви́, и бу́дущаго гне́ва изба́ви, и спаси́ мя.

И ны́не: Мене́ жи́вшаго в ле́ности, и презре́вшаго святы́я зако́ны Твоя́, и честна́я Твоя́, Христе́, повеле́ния, уще́дри, Спа́се, Ро́ждшия Тя́ ра́ди, я́ко Благода́тель Бо́г, и Многоми́лостив.

Пе́снь 8

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Умерщвле́ную оживи́, па́дшую возста́ви, уя́звеную ду́шу мою́ исцели́, у́м мо́й умири́, искуше́ний во́лны укроти́, Де́во, и вопию́ща мя́ спаси́: о́троцы благослови́те, свяще́ннии воспо́йте, лю́дие превозноси́те Его́ во ве́ки.

Я́ко разбо́йник взыва́ю Ти́, помяни́ мя, Человеколю́бче; пла́чу я́ко блудни́ца, и вопию́: согреши́х я́коже дре́вле блу́дный, ка́ющася приими́ мя отча́яннаго, Богоро́дицы ра́ди, да усе́рдно вопию́ Ти: свяще́ннии воспо́йте, лю́дие превозноси́те Его́ во ве́ки.

Сла́ва: Раболе́пно вопие́м Ти́, Богоро́дице Всепе́тая: со безчи́сленными у́мными Си́лами, проро́ки и преподо́бными, и апо́столы же и му́ченики, сотвори́ мольбу́ за вся́ челове́ки, боже́ственне пою́щия: свяще́ннии воспо́йте, лю́дие превозноси́те Его́ во ве́ки.

И ны́не: Честне́йши еси́, Богоро́дице Всенепоро́чная, преми́рных а́нгельских чино́в: си́х бо родила́ еси́ Созда́теля и Го́спода, от деви́ческия неискусобра́чныя утро́бы, во Дву́х Существа́х, несме́сно и непрело́жно, Еди́ну Ипоста́сь, Богоро́дице, воплоща́ему.

Пе́снь 9

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к: те́мже Тя́, Пречи́стую Богоро́дицу, ве́рнии велича́ем.

О Боже́ственный О́дре Соломо́нов, Его́же окружа́ют ны́не си́льнии шестьдеся́т, глаго́лы Боже́ственнаго Писа́ния, на Не́мже Бо́г почи́, тьма́ми мя́ при́сно де́моны окруже́на, невре́дна сохрани́ си́лою Твое́ю, Чи́стая Присноде́во.

Иска́пающая Боже́ственную сла́дость, всех Сла́дость ро́ждшая, ду́шу мою́ услади́, я́дом змии́ным огорче́ную, отчужда́ющи мя́ го́рькаго вре́да, всегда́ хода́тайством Твои́м, Предста́тельнице ве́рных Непосты́дная.

Сла́ва: Со́лнце Сла́вы, Иису́се, окая́нную мою́ ду́шу просвети́, мольба́ми Тебе́ ро́ждшия Чи́стыя Богоотрокови́цы: и безпло́тных слу́г, честны́х апо́стол Твои́х, и святи́телей, и проро́к, и му́ченик избра́нных, и преподо́бных Твои́х.

И ны́не: Страшу́ся, Еди́не Царю́, Твоего́ Втора́го и Стра́шнаго Прише́ствия, ве́сь осужде́н и недоуме́нен сы́й, Го́споди. Те́мже пре́жде конца́ вопию́ Ти: Ро́ждшия Тя́ ра́ди пощади́ мя, и спаси́, Ми́лостиве, Благи́й Человеколю́бче.

Та́же, Досто́йно е́сть: И покло́н. Трисвято́е по О́тче на́ш: тропа́рь, и про́чее обы́чное, и отпу́ст.

По 1-м стихосло́вии седа́льны покая́нны, гла́с 8:

О́ком благоутро́бным, Го́споди, ви́ждь мое́ смире́ние, я́ко вма́ле жи́знь моя́ скончава́ется, и от де́л не́сть мне́ спасе́ния. Сего́ ра́ди молю́ся: о́ком благоутро́бным, Го́споди, ви́ждь мое́ смире́ние, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Я́ко Судии́ су́щу, попецы́ся, о душе́, и Стра́шнаго Дне́ ча́с помышля́й: су́д бо без ми́лости е́сть не сотво́ршым ми́лости. Те́мже пре́жде конца́ возопи́й: пощади́ мя, Спа́се, Eди́н бо еси́ Безгре́шен.

Сла́ва, и ны́не: Богоро́дичен: Повеле́нное та́йно прии́м в ра́зуме, в кро́ве Ио́сифове, тща́нием предста́ Безпло́тный, глаго́ля Неискусобра́чней: приклони́вый схожде́нием Небеса́, вмеща́ется неизме́нно ве́сь в Тя́. Его́же и ви́дя в ложесна́х Твои́х прие́мша ра́бий зра́к, ужаса́юся зва́ти Тебе́: ра́дуйся, Неве́сто Неневе́стная.

По 2-м стихосло́вии седа́льны, гла́с 8:

Де́нь о́н стра́шный помышля́ющи, душе́ моя́, побди́, вжига́ющи свещу́ Твою́, еле́ем просвеща́ющи, не ве́си бо, когда́ прии́дет к тебе́ гла́с глаго́лющий: се́ Жени́х. Блюди́ у́бо, душе́ моя́, да не воздре́млеши, и пребу́деши вне́ толку́щи я́ко пя́ть де́в: но бо́дренно пожди́, да усря́щеши Христа́ еле́ем масти́тым, и да́ст ти́ черто́г Боже́ственный сла́вы Своея́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Я́ко блудни́ца припа́даю Ти́, да прииму́ оставле́ние, и вме́сто ми́ра сле́зы от се́рдца приношу́ Ти: да я́ко о́ную уще́дриши мя́, Спа́се, и пода́си ми́ очище́ние грехо́в. Я́ко о́ная бо зову́ Ти: изба́ви мя́ от тиме́ния де́л мои́х.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Све́том Небе́сным просвеща́ется дне́сь се́й хра́м: в не́м бо во́инства а́нгельская ра́дуются, с ни́миже и пра́ведных ли́цы веселя́тся, в па́мять страстоте́рпец. Те́х моли́твами низпосли́ ми́ру Твоему́ ми́р, Христе́, и ве́лию ми́лость.

Сла́ва, и ны́не: Богоро́дичен: Ра́дуйся, Врата́ Царя́ Сла́вы Я́же Вы́шний еди́н про́йде, и еди́ну запеча́тану сохрани́, во спасе́ние ду́ш на́ших.

По 3-м стихосло́вии, седа́льны, гла́с 8:

Подо́бен: Повеле́нное:

Доко́ле, душе́ моя́, живе́ши в нераде́нии? Доко́ле во уны́нии скончава́еши? От сна́ уны́ния воста́ни, окая́нная, во у́м прие́мши дея́ния твоя́: возстени́, и Пра́веднаго Судии́ вострепещи́ изрече́ния, что́ отвеща́ти и́маши в ча́с о́н? Или́ ка́ко ожида́ющаго тя́ изба́вишися опале́ния, неиспра́влена пребыва́ющи? Возопи́й пре́жде конца́ к Судии́: прегреше́ний да́ждь ми́, Спа́се, оставле́ние, Ты́ бо Еди́н еси́ Долготерпели́в.

Мытаре́во стена́ние, и блудни́цы рыда́ние, душе́, пре́жде конца́ восприими́, ве́дущему та́йная дела́ Твоя́, не преста́й рыда́нием испове́дающися и пла́чем, посто́м и бде́нием, и моли́твою вопию́щи: согреши́х, очи́сти мя́, Спа́се, моли́твами а́нгел Твои́х, я́ко Ще́др, и спаси́ мя.

Сла́ва, и ны́не: Богоро́дичен: Богора́дованная, Чи́стая, Благослове́нная, за милосе́рдие щедро́т из Тебе́ Ро́ждшагося, с вы́шними Си́лами и арха́нгелы, и со все́ми безпло́тными, о на́с моли́ непреста́нно, да́ти на́м пре́жде конца́ проще́ние и очище́ние грехо́в, и жития́ исправле́ние: я́ко да обря́щем ми́лость.

Кано́н покая́нен ко Го́споду на́шему Иису́су Христу́, и святы́м его́ му́чеником. Творе́ние Ио́сифово. Гла́с 8.

Пе́снь 1

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Изба́ви мя́ гее́нны, ю́же себе́ де́лы безме́стными исхода́таих, Изба́вителю: и Твоея́ любве́ возжзи́ ми в помышле́нии о́гнь Боже́ственный.

Подклони́хся страсте́м и омрачи́хся, и безслове́сен яви́хся, сло́вом почте́н бы́в: Го́споди, возникнове́ние да́ждь души́ мое́й, и и́миже ве́си судьба́ми, спаси́ мя.

Му́ченичен: Дручи́мо те́ло бие́ньми, явля́ше нра́ва пра́вое же и непрекло́нное, и е́же к Зижди́телю любо́вь, венцено́сцы всехва́льнии му́ченицы.

Му́ченичен: Крове́й поте́кша ре́ки теле́с святы́х, сла́вных Твои́х страда́лец, идолобе́сия те́рние Твое́ю си́лою, Ще́дре, подави́ша.

Богоро́дичен: Исцели́, Чи́стая, неду́гующа мя́ лю́те смертоно́сным грехо́м, плотски́х и душе́вных страсте́й, я́ко да ве́рою при́сно ублажа́ю Тя́.

Други́й кано́н безпло́тным святы́м а́нгелом. Творе́ние ки́р Феофа́на. Гла́с 8. Ирмо́с то́йже.

Святы́х а́нгел я́ко началово́дцы, и боговиде́ния наслажда́ющеся све́тлостно, Благода́вца и Спа́са о на́с моли́те, арха́нгели. [Два́жды.]

Ну́ждными одержи́ми напа́стьми, к ва́м я́ко предста́телем ны́не прибега́ем ве́рнии, арха́нгели Боже́ственнии, Влады́ку ны́не о на́с приле́жно умоли́те.

Богоро́дичен: Бу́ди ми́, Де́во, прибе́жище, приста́нище же и стена́ и предста́тельница, Я́же Бо́га пло́тию ро́ждши Богома́ти, Изба́вителя Всеще́драго.

Пе́снь 3

Ирмо́с: Небе́снаго кру́га Верхотво́рче Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Кото́рыми узрю́ Тя тогда́, Христе́ Спа́се, очи́ма, ниеди́ну на земли́ за́поведь Твою́ сотвори́в? Ка́ко нестерпи́мому Твоему́ предста́ну Престо́лу, безме́рных ми́ зо́л творя́щу отве́т?

Просте́р ру́це Твои́х щедро́т, приими́ мя я́коже пре́жде блу́днаго, подо́бными о́бразы порабо́тившагося безче́стным страсте́м, и от Тебе́ удали́вшася, Иису́се Человеколю́бче Преблаги́й.

Му́ченичен: Утверди́вшеся на ка́мени Бо́жияго ра́зума, му́ченицы Христо́вы страстоте́рпцы, ору́жием ве́ры искорени́сте неразу́мия те́рние, и плоды́ страда́ния возде́ласте.

Му́ченичен: Непоколеби́мии столпи́, и́стинныя ве́ры пресве́тлая церко́вная удобре́ния, свяще́ннейшая овча́та Христо́ва, во́лею заколе́ная, му́ченицы да похва́лятся.

Богоро́дичен: Тебе́ храни́тельницу, Пресвята́я, в напа́стех стяжа́х: Тебе́ по Бо́зе мою́ предста́тельницу и́мам неусы́пну: Тебе́ да обря́щу, Пречи́стая, избавля́ющую мя́ в Де́нь Суда́ вся́каго осужде́ния.

И́н. Ирмо́с то́йже.

Дарми́ многообра́зными а́нгельскаго чи́на, я́ко чинонача́льницы явля́еми, архистрати́зи, украша́еми. Христо́вы Це́ркви тве́рдо сохраня́йте предста́тельствы ва́шими. [Два́жды.]

Ору́жием благоволе́ния, ве́рных исполне́ния, правосла́вия добро́тами ны́не венчава́еми, от напа́стей я́ко благосла́внии предста́телие Бо́жии изба́вите, Боже́ственнии арха́нгели.

Богоро́дичен: Жи́зни нетле́нныя Боже́ственная Се́нь была́ еси́, еди́на от ве́к я́вльшися, Де́во Ма́ти Чи́стая. Те́мже, Всепе́тая, су́щаго мя́ в се́ни сме́ртней, к животу́ наста́ви ны́не моли́твами Твои́ми.

Пе́снь 4

Ирмо́с: Из горы́ приосене́нныя, Сло́ве, проро́к, Еди́ныя Богоро́дицы, хотя́ща воплоти́тися, богови́дно усмотри́. И со стра́хом славосло́вяше си́лу Твою́.

Вели́к по́двиг души́ разлуча́ющейся, тре́пет стра́шен, Судии́ седя́щу, и суди́мым челове́ком согреши́вшим: увы́ мне́, что́ сотворю́ осужде́ный?

Име́я се́рдце скве́рн испо́лнено, и грехо́в неудо́бь носи́мая бремена́, и к щедро́там Твои́м притека́ю, Влады́ко: не пре́зри мене́, но уще́дри мя́, молю́ся.

Му́ченичен: Честна́ ва́ша сме́рть показа́ся пред Бо́гом, до́блии страстоте́рпцы: не бо́ отверго́стеся Того́, боле́зней тма́ми и ра́нами окружа́еми.

Му́ченичен: Ура́нен бы́сть вра́г ра́ною му́ченик, паде́ его́ бро́вь возвыша́емая: и велича́ется те́х Венцеда́тель, пе́сньми Боже́ственными прославля́емь.

Богоро́дичен: Тебе́, Чи́стое Прия́телище Влады́ки, Богороди́тельнице, ве́рою молю́: очи́сти мя́ от вся́кия скве́рны, и до́м покажи́ Вседе́тельнаго и Боже́ственнаго Ду́ха.

И́н. Ирмо́с: Услы́шах, Го́споди, смотре́ния Твоего́ та́инство: разуме́х дела́ Твоя́, и просла́вих Твое́ Божество́.

Дво́ице пе́рвенствующая арха́нгельскому ны́не собра́нию, притека́ющия к покро́ву ва́шему, от вся́кия беды́ спаса́йте. [Два́жды.]

Зри́телие све́тлости богонача́льная, и благодая́ния, архистрати́зи всесла́внии, ны́не ста́до ва́ше просвеща́йте.

Богоро́дичен: Свяще́нно Тя́ сла́вят безпло́тных Боже́ственная во́инства, Богома́ти Всенепоро́чная: Зижди́теля бо и́х родила́ еси́.

Пе́снь 5

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою, Тво́й ми́р пода́ждь на́м, Человеколю́бче.

Нра́вом лука́вым преогорчи́х Тя́, Го́споди, де́лаяй безме́стная: но уще́дри мя́ обраща́ющагося, и спаси́.

Име́яй по́мысл от злы́х невозница́ющ, не чу́вствую несмы́сленный, недоуме́ние мое́, Иису́се, разреши́, и спаси́ мя.

Му́ченичен: Положи́ ва́с, Боже́ственнии му́ченицы, Светода́тель, я́коже ка́мения сия́ющая богоразу́мием, и пре́лести тьму́ разоря́ющая.

Му́ченичен: Зако́ном лука́вым зако́ны Боже́ственныя сопротивоположи́сте, и Бо́га пропове́дающе, умертви́тися Его́ ра́ди усе́дрно подъя́сте.

Богоро́дичен: Умертви́, Чи́стая, пло́ти моея́ двиза́ния, умертви́вшая Рождество́м Твои́м, Отрокови́це, живу́щий гре́х пра́отца.

И́н. Ирмо́с то́йже.

О́крест Бо́га предстоя́ще, архистрати́зи, и отту́ду истека́ющими заря́ми просвеща́еми, ста́до ва́ше сохрани́те. [Два́жды.]

Избавле́ние на́м дарова́ти, моли́теся Влады́це и Бо́гу на́шему, я́ко предста́телие все́х избавле́ния.

Богоро́дичен: Ми́ро та́йное имену́ем Тя́, Всечи́стая, су́щее, ро́ждшую Бо́га пло́тию, благоуха́ния точа́щаго дарова́ния.

Пе́снь 6

Ирмо́с: Ио́ну в ки́те, Го́споди, еди́наго всели́л еси́, мене́ же свя́заннаго мре́жами вра́жиими, я́ко от тли́ о́наго спаси́.

Со́лнечный све́т покая́ния возсия́й ми́, Христе́ Светода́телю, су́щему во тьме́ прегреше́ний, да пою́ Твою́ благосты́ню.

Твоего́ Стра́шнаго Суди́ща трепе́щу всегда́, злы́х же не отступа́ю, рабо́тая зло́му обы́чаю: испра́ви мя́, Христе́, да пою́ Твою́ благосты́ню.

Му́ченичен: Ли́цы честны́х му́ченик пострада́ша, и полки́ победи́ша бесо́вския, и лико́м а́нгельским совокупи́шася в ра́дости: те́х моли́твами, Го́споди, спаси́ ду́ши на́ша.

Му́ченичен: Кре́постию Твое́ю си́льны показа́л еси́ му́ченики Твоя́, Го́споди, и всю́ си́лу низложи́ша ве́тхаго запина́теля: те́х моли́твами, Го́споди, спаси́ ду́ши на́ша.

Богоро́дичен: Да гла́сы благода́рственне всегда́ сла́влю Тя́, Всенепоро́чная, души́ моея́ отжени́ тьму́, и покая́ния све́том разреши́ ми́ мра́чная согреше́ния.

И́н. Ирмо́с: Моли́тву пролию́ ко Го́споду, и Тому́ возвещу́ печа́ли моя́: я́ко зо́л душа́ моя́ испо́лнися, и живо́т мо́й а́ду прибли́жися: и молю́ся я́ко Ио́на: от тли́, Бо́же, возведи́ мя.

Ны́не Престо́лу стра́шному предстоя́ти неукло́нно сподо́бившеся, богови́дцы, и озаре́нии Святы́я Тро́ицы насыща́етеся: к ва́м прибега́ющым от напа́стей и страсте́й моли́те изба́витися, арха́нгели. [Два́жды.]

Стра́нствия Влады́чняго моли́теся ва́с пе́сненно воспева́ющим получи́ти, и ра́дости присносу́щныя сподо́битися, и Боже́ственныя све́тлости, арха́нгели богови́днии, Гаврии́ле и Михаи́ле всесла́внии.

Богоро́дичен: Одушевле́нный Влады́чний Черто́г, И́же све́тлыми луча́ми де́вства светови́дне, я́коже кри́н сия́ющий посреде́ терно́внаго мяте́жа, Пречи́стая и Благоле́пная Богоро́дица Де́ва да сла́вится.

Пе́снь 7

Ирмо́с: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша пою́ще: отце́в Бо́же, благослове́н еси́.

Воздыха́ние ми́ да́ждь, Христе́, я́коже иногда́ мытарю́, и я́коже блудни́це, слеза́ми отмы́в гное́ния зо́л мои́х, и вопию́ща мя́ уще́дри: оте́ц на́ших Бо́же, благослове́н еси́.

В разбо́йники душегуби́тельныя, Спа́се, впа́дшаго, и уя́звленнаго лю́те, исцели́ еле́ем и́скренняго покая́ния, и умили́ пе́ти Тебе́: оте́ц на́ших Бо́же, благослове́н еси́.

Му́ченичен: Умертви́стеся ми́ру, и ме́ртва бы́вша живоно́снаго Христа́, ника́коже отверго́стеся, до́блественнии страстоно́сцы, страда́льчествующе и пою́ще: оте́ц на́ших Бо́же, благослове́н еси́.

Му́ченичен: Еди́но естество́ Тро́ицы, в трие́х ипоста́сех испове́дающе му́дрии, многобо́жную пре́лесть и́дольскую страстоте́рпцы разруши́сте, пою́ще: оте́ц на́ших Бо́же, благослове́н еси́.

Богоро́дичен: И́же Бо́жие Бо́г Сло́во, во утро́бу Твою́ все́лься, Де́во Ма́ти Чи́стая, все́м засту́пницу оби́димым явля́ет Тя́, вопию́щим: оте́ц на́ших Бо́же, благослове́н еси́.

И́н. Ирмо́с то́йже.

Многоразли́чную благода́ть, архистрати́зи Боже́ственнии, ва́м дарова́л е́сть, И́же все́х Благода́тель, Его́же ны́не Це́рковь пою́щую спаса́йте: оте́ц на́ших Бо́же, благослове́н еси́. [Два́жды.]

Си́лою Всеви́дца укрепля́еми, вся́ концы́ земли́ я́сно назира́ете, и все́х спаса́ете ве́рою пою́щих: оте́ц на́ших Бо́же, благослове́н еси́.

Богоро́дичен: Спаси́тельное приста́нище, Богоро́дице Де́во, Тя́ ны́не иму́ще, жите́йских бе́д избега́ем и мяте́жей, Сы́ну Твоему́ зову́ще: оте́ц на́ших Бо́же, благослове́н еси́.

Пе́снь 8

Ирмо́с: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте, и превозноси́те во вся́ ве́ки.

Отведе́наго мя́ плотски́ми любосла́стии, и от Тебе́, Сло́ве, безу́мно удали́вшагося, и уподо́бльшася все́м ското́м, не пре́зри, Спа́се, но пре́жде конца́ обрати́в спаси́ мя.

От гре́х ника́коже остаю́ся, обраще́ния никогда́же творя́, и вопию́ окая́нный: согреши́х Ти́, Го́споди, и ожесте́вшую умили́ ду́шу мою́, Ще́дре.

Му́ченичен: До́блии Госпо́дни страстоте́рпцы, кро́вными струя́ми крести́вшеся, вторы́ми скве́рнами не оскверни́шася, и венцено́сцы со а́нгелы ликовству́ют непреста́нно.

Му́ченичен: Вжи́лившеся наде́ждею бу́дущих, благоче́стия му́ченицы, му́к лю́тость до́блии претерпе́ша: и сконча́вшеся, Престо́лу Влады́чню предстоя́т непреста́нно.

Богоро́дичен: Стоя́щих утвержде́ние еси́, и па́дших исправле́ние, Де́во. Те́мже па́дшаго мя́ возста́ви, да Тя́ сла́влю, Благослове́нную и Обра́дованную.

И́н. Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

Предстоя́тели и певцы́ неизрече́нныя и неизглаго́ланныя Твоея́ сла́вы, приими́ Тебе́ ны́не моля́щияся, Христе́, во ве́ки. [Два́жды.]

Еди́не Бла́же, Христе́, о на́с моля́щаяся ны́не во́инства а́нгельская приими́, Тебе́ воспева́ющая во ве́ки.

Богоро́дичен: Светле́йшими Твои́ми блиста́ньми, Богома́ти, ве́рою пою́щия Тя́ просвеща́еши, Тя́ восхваля́ющия во вся́ ве́ки.

Та́же, пое́м пе́снь Богоро́дицы: Вели́чит душа́ моя́ Го́спода: С припе́вом: Честне́йшую Херуви́м:

Пе́снь 9

Ирмо́с: Устра́шися вся́к слу́х неизрече́нна Бо́жия снисхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу ве́рнии велича́ем.

Я́коже дре́вле блудни́цу, с пла́чем припа́дшую к Тебе́, Спа́се, очи́стил еси́: и я́коже оправда́л еси́ мытаря́, Сло́ве, то́чию воздохну́вша: и я́коже прия́л еси́ Манасси́ю, и я́ко Дави́да поми́ловал еси́ пока́явшася: та́ко и мене́ приими́, и спаси́ мя́, Человеколю́бче.

Воздохни́ и прослези́ся, душе́, пе́рвых твои́х согреше́ний отступи́, и к ве́дущему та́йная Твоя́ я́вственно припади́ и возопи́й те́пле: согреши́х Ти́, Го́споди, ту́не мя́ уще́дри, име́яй утро́бы щедро́т, Многоми́лостиве.

Му́ченичен: Пострада́вше богозра́чнии страстоте́рпцы на земли́ терпели́вне, и непоколеби́мое ны́не Ца́рствия насле́дие прия́ша, и ра́йския сла́дости причаща́ются ра́дующеся: те́х моли́твами, Христе́ Бо́же, Твоея́ сла́вы прича́стники сотвори́ на́с.

Му́ченичен: Свети́ла восто́к невече́рний просвети́вше яви́стеся, и но́щь безбо́жия потреби́сте, прему́дрии, и луча́ми свяще́нными все́х озаря́ете, светоно́сный ва́ш, страстоно́сцы, пра́здник велича́ющих.

Богоро́дичен: Просвети́, Влады́чице, Две́ре Мве́та, се́рдца моего́ о́чи молю́ся, и́хже омрачи́ грехо́вная тьма́ глубо́кая, и покая́ния ми́ зарю́ низпосли́, и огня́ ве́чнаго хода́тайством Твои́м, Чи́стая, свободи́.

И́н. Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Лико́м безпло́тных ны́не Твою́ Це́рковь доброде́телию подража́ющу покажи́, огражда́я а́нгелы, Христе́, ста́до Твое́.

Душа́м спасе́нию от Бо́га дарова́тися, а́нгели засту́пницы моли́теся, прибега́ющим под кро́в ва́ш, всесла́внии.

Богоро́дичен: Я́ко у́тро су́щим во тьме́ и заблу́ждшим, Де́во, Пра́ведное Со́лнце на руку́ держа́щи Христа́, возсия́ла еси́.

Та́же, Досто́йно е́сть: и покло́н. Посе́м ектения́ ма́лая, и свети́лен, и псалмы́ обы́чныя, и про́чее.

На стихо́вне стихи́ры покая́нны, гла́с 8:

Егда́ прииму́ во уме́ мно́жество соде́янных мно́ю зо́л, и в помышле́ние прииду́ стра́шнаго о́наго испыта́ния, тре́петом содержи́мь к Тебе́ прибега́ю, Человеколю́бцу Бо́гу. Те́мже не пре́зри мене́, молю́ Тя́, Еди́не Безгре́шне: да́руй умиле́ние смире́нней мое́й души́ пре́жде конца́, и спаси́ мя.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Сле́зы ми́ да́ждь, Бо́же, я́коже иногда́ жене́ гре́шнице: и сподо́би мя́ омочи́ти но́зе Твои́, я́же мя́ от пути́ пре́лести свободи́вшия, и ми́ро благоуха́ния Тебе́ приноси́ти житие́ чи́сто, покая́нием ми́ созда́нное, да услы́шу и а́з жела́емый Тво́й гла́с: ве́ра Твоя́ спасе́ Тя, иди́ в ми́ре.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Что́ ва́с нарече́м, святи́и? Херуви́мы ли, я́ко на ва́с почи́л е́сть Христо́с? Серафи́мы ли, я́ко непреста́нно просла́висте его́? А́нгелы ли, те́ла бо отврати́стеся? Си́лы ли, де́йствуете бо чудесы́? Мно́гая ва́ша имена́, и бо́льшая дарова́ния: моли́те спасти́ся душа́м на́шим.

Сла́ва, и ны́не: Богоро́дичен: Небе́сная пою́т Тя́, Обра́дованная Ма́ти Безневе́стная: и мы́ славосло́вим неизсле́дованное Твое́ Рождество́, Богоро́дице, моли́ спасти́ся душа́м на́шим.

Та́же, Бла́го е́сть: И Трисвято́е по О́тче на́ш: тропа́рь, и ектения́. Та́же, ча́с пе́рвый, псалмы́ обы́чны: и про́чее, и отпу́ст.

Помяни́ на́с, Христе́ Спа́се ми́ра, я́коже разбо́йника помяну́л еси́ на Дре́ве: и сподо́би все́х, Еди́не Ще́дре, Небе́сному Ца́рствию Твоему́.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Исцели́, Христе́, стра́сти ду́ши моея́, Еди́не Врачу́ ду́ш и теле́с: и умиле́ния струя́ми мя́ омы́в, всего́ очи́сти я́ко Благоутро́бен.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Престо́л Честна́го обстоя́ще Богонача́лия, Престо́ли, Херуви́ми, Нача́ла и Вла́сти, и про́чая безпло́тных чинонача́лия, свяще́нно воспева́ют.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Разгоре́нием распала́ющеся Христо́вы любве́, неопали́ми пребы́ша посреде́ огня́, страда́льцы, попали́вше те́рние злоче́стия Боже́ственною благода́тию.

Сла́ва: О Тро́ице Пресвята́я, Еди́нице Нача́льнейшая! Изба́ви рабы́ Твоя́ огня́ негаси́маго, мольба́ми Боже́ственных безпло́тных Твои́х Си́л, и Ца́рствия Твоего́ сподо́би.

И ны́не: Сви́ток Тя́ иногда́ прови́де Иса́ия, Богоблагода́тная, в не́мже Отчим пе́рстом написа́ся Сло́во несказа́нно, в Кни́гах Живо́тных напису́ющее на́с.

на Го́споди, воззва́х: стихи́ры покая́нны, гла́с 8:

Подо́бен: О пресла́внаго чудесе́!

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у Tебе́ очище́ние е́сть.

Ни умиле́ния стяжа́х, ниже́ сле́з исто́чника, ни те́плаго испове́дания, ниже́ пла́ча омыва́ющаго, ни серде́чнаго смире́ния: ни мытарю́ ревни́тель бы́х, ниже́ блудни́це, ниже́ блу́дному о́троку. Ка́ко у́бо обря́щу мои́х мно́гих грехо́в оставле́ние? Но и́миже, Христе́, ве́си судьба́ми, спаси́ мя.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стра́нен вся́кия сотвори́хся Боже́ственныя за́поведи: о доброде́тели же лу́чшей вся́ко небрего́х, и безу́мно пожи́х в ле́ности все́ житие́ мое́, в блуде́ вся́ дела́ моя́ соде́ях, неподо́бная и беззако́нная. Те́мже, Христе́, уще́дри я́ко Благоутро́бен, и ту́не мя́ спаси́.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Не я́ростию Твое́ю обличи́ мене́, де́ло ру́к Твоея́ бла́гости, отто́ргшася умо́м неразу́мным, И́же мене́ ра́ди по мне́ благоизво́ливый бы́ти, неизрече́нныя ра́ди благоутро́бия пучи́ны, Человеколю́бче: но моли́твами Присноде́вы, Твоея́, Сло́ве, Ма́тере, Боже́ственнаго сподо́би мя́ обраще́ния, я́ко Бо́г.

И́ны стихи́ры свято́му и вели́кому Иоа́нну Предте́чи.

Гла́с и подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Блаже́нне Иоа́нне Предте́че, смире́нную мою́ ду́шу, я́же ко Го́споду любо́вию возвраща́й всегда́, свяще́нными хода́тайствы Твои́ми сласте́й мои́х о́гнь угаси́, приводя́ мя ко исполне́нию Боже́ственных повеле́ний, и се́рдца моего́ очища́я вои́стинну чу́вствия, да сла́влю тя́.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Непло́дныя прозябе́ние, и чистоты́ са́д Влады́чний, челове́ков удобре́ние, Предте́че Иоа́нне всехва́льне, храни́телю Боже́ственный смире́нныя моея́ души́, твои́ми моли́твами и по́мощию благоуве́тие да́ждь, избавля́я от зми́ева кова́рства, и лука́вых того́ ла́яний и прило́г.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Ве́сь еси́ сладча́йший, и сла́дости Боже́ственныя испо́лнен, присносла́вне, и весели́ши вся́ ве́рно приходя́щия к тебе́, услажда́я чу́вства душе́вная же и теле́сная, неду́г и скорбе́й, и нахожде́ний злы́х, и сласте́й душетле́нных, всегда́ разреша́я на́с.

Сла́ва, и ны́не: Богоро́дичен: Ве́рою притека́ю к покро́ву Твоему́, Богороди́тельнице Чи́стая, от напа́стей и бе́д и стра́стнаго слия́ния, и от бесо́вскаго озлобле́ния спаси́ мя: я́ко ми́лости иму́щи пучи́ну, и спасе́ния я́вльшися Хода́таица, Влады́чице, Я́же Бо́га ро́ждши Ми́лостиваго, Еди́наго Всеще́драго, и Многоблагоутро́бнаго.

Та́же, Све́те ти́хий: И проки́мен дне́. Посе́м: Сподо́би, Го́споди, в ве́чер се́й:

На стихо́вне стихи́ры покая́нны, гла́с 8:

Тебе́ Царя́ и Влады́ку, а́нгели непреста́нно воспева́ют, а́з же Ти́ припа́даю я́ко мыта́рь зовы́й: Бо́же, очи́сти мя́, и поми́луй мя́.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Безсме́ртна су́щи, душе́ моя́, волна́ми жите́йскими не покрыва́йся, но возни́кни вопию́щи к твоему́ Благода́телю: Бо́же, очи́сти мя́, и поми́луй мя́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Му́ченицы Госпо́дни, моли́те Бо́га на́шего, и испроси́те душа́м на́шим мно́жество щедро́т, и очище́ние мно́гих прегреше́ний, мо́лим вы́.

Сла́ва, и ны́не: Богоро́дичен: Ра́дуйся, вселе́нныя похвало́. Ра́дуйся, хра́ме Госпо́день. Ра́дуйся, горо́ приосене́нная. Ра́дуйся, все́х прибе́жище. Ра́дуйся, све́щниче златы́й. Ра́дуйся, сла́во правосла́вных честна́я. Ра́дуйся, Мари́е Ма́ти Христа́ Бо́га. Ра́дуйся, раю́. Ра́дуйся, Боже́ственная трапе́зо. Ра́дуйся, се́не. Ра́дуйся, ру́чко всезлата́я. Ра́дуйся, все́х упова́ние.

Та́же, Ны́не отпуща́еши: Трисвято́е по О́тче на́ш: тропа́рь, и отпу́ст.

Кано́н моле́бный Пресвяте́й Богоро́дице, гла́с 8:

Пе́снь 1

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припе́в: Пресвята́я Богоро́дице, спаси́ на́с.

Во́д исто́чник моли́твенный, Тя́ Богороди́тельницу ве́дуще вси́, источа́ющ ве́рным струи́ душа́м и те́лом: те́мже Тя́ непреста́нно сла́вим.

Па́че естества́ Богонача́льное Сло́во родила́ еси́, Де́во, и естество́ от тли́ изба́вила еси́: те́мже безслове́сных мя́, и чрезъесте́ственных страсте́й свободи́.

Сла́ва: Па́жити страсте́й плотски́х ны́не окружа́ют мя́, и оскорбля́ют лю́те: посети́ ско́ро раба́ Твоего́, Де́во, и от озлобля́ющих мя́ спаси́.

И ны́не: И́же всю́ тва́рь содержа́й и нося́й и спаса́яй, на руку́ Твое́ю, Чи́стая, опи́сан яви́ся, и челове́ческий ро́д обнови́.

Пе́снь 3

Ирмо́с: Ты́ еси́ утвержде́ние притека́ющих к Тебе́, Го́споди: Ты́ еси́ све́т омраче́нных, и пое́т Тя́ ду́х мо́й.

Успи́ смуще́ние лю́таго неду́га обдержа́щаго мя́ ны́не, Пречи́стая Влады́чице, и прегреше́ний и страсте́й свободи́.

Неизрече́нна пучи́на щедро́т Твои́х, Пречи́стая, и́миже и мене́ изба́ви прегреше́ний, и неду́гов.

Сла́ва: Ускори́ и посети́, Пречи́стая, неду́гующаго мя́, и тя́жкия боле́зни изба́ви, и вся́кия ско́рби.

И ны́не: Возвели́чи ми́лость и заступле́ние, Пречи́стая, Твои́х моли́тв на мне́: и изба́ви мя́ от напа́стей и скорбе́й.

Пе́снь 4

Ирмо́с: Услы́шах, Го́споди, смотре́ния Твоего́ та́инство: разуме́х дела́ Твоя́, и просла́вих Твое́ Божество́.

Очисти́лище всегда́ моему́ се́рдцу покажи́, Пречи́стая, святы́х воспомина́ние, и прегреше́ний очище́ние.

Спасе́ние пода́ждь ми́ душе́вное и теле́сное, Пренепоро́чная: и боля́щему да́ждь цельбу́, и лю́тых избавле́ние.

Сла́ва: Кова́рствия упраздни́ лука́вых бесо́в, Пречи́стая, и страсте́й воста́ния, и немощны́м на́м си́лу пода́ждь.

И ны́не: От ложе́сн Твои́х, Пречи́стая, Пра́вды Со́лнце возсия́, и ми́р просвети́: Его́же Боже́ственными заря́ми и мене́ просвети́.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Разреши́шася Твои́м Рождество́м у́зы сме́ртныя, и связа́ся тли́ держа́ва, Пресвята́я Де́во Всепе́тая. Те́мже разреши́ вско́ре и мои́х прегреше́ний плени́цы, и тя́жкия печа́ли.

Лука́вствия бесо́в, и зло́бы челове́ческия изба́ви, Влады́чице: и душе́вный неду́г и теле́сный ско́ро уврачу́й, ро́ждшая еди́на вся́кия пло́ти и духо́в Врача́, Спа́са и Го́спода.

Сла́ва: Я́ко Клеща́ Боже́ственнаго У́гля, Пречи́стая, молю́ Тя, попали́ вся́кую стра́стную по́хоть раба́ Твоего́, и неможе́ния лю́тая неудо́бь стерпи́мая, и изсуши́ пото́ки печа́лей.

И ны́не: Спасе́ние Тя́ все́м пода́л е́сть Сы́н Тво́й, Всечи́стая Влады́чице, ве́ровавшим в Него́, и Бо́га пропове́дающим воплоще́нна от Тебе́ я́ве: те́мже мя́ спаси́ от разли́чных бе́д и скорбе́й.

Пе́снь 6

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

При́зри на мя́ ми́лостивным Твои́м о́ком, Влады́чице, и от неду́гов лю́тых изба́ви вско́ре, и вся́каго озлобле́ния ча́емаго ны́не, и се́тей, и паде́ния.

Безу́мнаго нра́ва стра́стнаго, и за́висти неподо́бных, и вся́кия зло́бы, и озлобле́ния жите́йскаго изба́ви мя́, Пречи́стая Влады́чице, Твои́ми мольба́ми.

Сла́ва: Созда́вый на́с, в Тебе́, Де́во, созда́ся, естество́ челове́ческое от тли́ избавля́я, и мене́ у́бо изба́ви, Чи́стая, от одержа́щих мя́ искуше́ний Твои́ми моли́твами.

И ны́не: Хра́м показа́лася еси́ Бо́га Невмести́маго пречи́ст, Ты́, Пречи́стая Влады́чице: хра́м и мене́ покажи́ Того́ благода́ти, Твои́ми моли́твами, и соблюди́ невреди́ма.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 8:

Я́ко Де́ву и еди́ну в жена́х, Тя́ без се́мене ро́ждшую Бо́га пло́тию, вси́ блажи́м ро́ди челове́честии: О́гнь бо всели́ся в Тя́ Божества́, и я́ко Младе́нца дои́ши Зижди́теля и Го́спода. Те́мже а́нгельский и челове́ческий ро́д досто́йно сла́вим Пресвято́е Рождество́ Твое́, и согла́сно вопие́м Ти́: моли́ Христа́ Бо́га согреше́ний оставле́ние дарова́ти воспева́ющым досто́йно сла́ву Твою́.

Пе́снь 7

Ирмо́с: От Иуде́и доше́дше о́троцы в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Тя́жкия боле́зни воздая́ния обрето́х, и мно́гим неду́гом одержи́мь болю́: но молю́ Тя, Богоро́дице, помози́ ми, и пода́ждь здра́вие вско́ре Твои́ми моли́твами.

Блаже́нная Де́во, прибе́жище скорбя́щих все́х ве́рных, от вся́каго искуше́ния и печа́ли и зло́бы зави́дящих мне́ изми́, и от гре́х и разли́чных неду́г изба́ви.

Сла́ва: Златокова́нная Ста́мно, из Нея́же истече́ Ми́ро животво́рное ве́рным, отыми́ души́ моея́ и те́ла неду́г, и прегреше́ний скве́рну, заступле́ньми Твои́ми, Чи́стая Богороди́тельнице.

И ны́не: Рожде́ннаго неизрече́нно из Тебе́, Богома́ти, Собезнача́льнаго Сло́ва Отцу́ и Ду́ху сла́вяще непреста́нно, во хвале́нии пое́м: оте́ц на́ших Бо́же, благослове́н еси́.

Пе́снь 8

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Вели́чествия разли́чных чуде́с Твои́х, Влады́чице, вси́ пропове́дуем, ве́рно притека́ющии к Твоему́ заступле́нию: но ны́не мя́ от неду́га лю́та и боле́зней душе́вных же и теле́сных премени́, и покажи́ здра́ва обою́ду, сла́вити Сы́на Твоего́ Христа́ во ве́ки.

Напра́сно возве́яша зави́дящих ве́три, и злолю́тых ре́ки припро́шася зело́ хра́мине мое́й у́мней, Де́во Чи́стая: но я́коже безу́мно волну́ющагося мо́ря, разори́ стремле́ние печа́льных все́х: да́ждь и мне́ Твои́ми моли́твами тишину́ во вся́ ве́ки.

Сла́ва: Созда́вый бре́нное те́ло челове́ка, Та́же ду́шу ему́ вложи́вый безсме́ртну, в Тебе́ зи́ждется, Де́во, Сы́й, и обновля́ет па́ки того́: Его́же мне́ благоуве́тлива, и благопреме́нна покажи́ Твои́ми моли́твами, и си́лу пода́ждь все́м скорбя́щим, и избавле́ние вско́ре.

И ны́не: Све́том озаря́еши всегда́, Пречи́стая, сла́вящих Тя́: из Твоея́ бо утро́бы возсия́ Све́т Невече́рний, и от стра́ха нощна́го и те́мнаго и бесо́вскаго ла́яния избавля́еши Твоя́ рабы́: от ни́хже изми́ и мене́, и спаси́ от одержа́щих зо́л твои́ми моли́твами.

Пе́снь 9

Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Вознеси́ ро́г Це́ркве, Пречи́стая, ве́рным пода́ждь кре́пость и утверди́.

Низложи́ вознесе́нныя, и победи́ полки́ иноплеме́нных хотя́щия бра́ней, Де́во Чи́стая: и Твоя́ рабы́ невре́дны от си́х свободи́, Отрокови́це.

Сла́ва: Еди́на побо́рнице христиа́ном правосла́вным, Тебе́ сла́вящим, моли́твами Твои́ми ага́ряны оружено́сныя вско́ре посрами́.

И ны́не: Вразуми́, Де́во, ве́рных ли́ки, на враги́ неви́димыя и ви́димыя укре́пльши, и спаси́ от вся́кия ско́рби.

Та́же, Досто́йно е́сть: и покло́н. Трисвято́е по О́тче на́ш: тропари́, и про́чее обы́чно, и отпу́ст.

По 1-м стихосло́вии седа́льны покая́нны, гла́с 8:

О́ком благоутро́бным, Го́споди, ви́ждь мое́ смире́ние, я́ко пома́ле жи́знь моя́ скончава́ется, и от де́л не́сть мне́ спасе́ния. Сего́ ра́ди молю́ся: о́ком благоутро́бным ви́ждь мое́ смире́ние, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Я́ко Судии́ прише́дшу попецы́ся, о душе́! И Стра́шнаго Дне́ ча́с помышля́й: су́д бо без ми́лости е́сть не соде́лавшим ми́лости. Те́мже пре́жде конца́ вопи́й: пощади́ мя, Спа́се, Еди́н бо еси́ Безгре́шен.

Сла́ва, и ны́не: Богоро́дичен: Недви́жимое утвержде́ние ве́ры, и честны́й да́р ду́ш на́ших, Богоро́дицу пе́сньми велича́ем ве́рнии: ра́дуйся, Ка́мень Жи́зни во чре́ве Твое́м вмести́вшая. Ра́дуйся, конце́в наде́ждо, скорбя́щих заступле́ние. Ра́дуйся, Неве́сто Неневе́стная.

По 2-м стихосло́вии седа́лен, гла́с 8:

Я́ко блудни́ца припа́даю Ти́, да прииму́ оставле́ние, и вме́сто ми́ра сле́зы от се́рдца приношу́ Ти: да я́ко о́ную уще́дриши мя́, Спа́се, и пода́си ми́ очище́ние грехо́в. Я́ко о́ная бо зову́ Ти: изба́ви мя́ от тиме́ния де́л мои́х.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Ве́к мо́й скончава́ется, житие́ мимохо́дит, и стра́шный Тво́й Престо́л гото́вится, Спа́се: су́д мене́ жде́т, претя́ мне́ о́гненною му́кою, пла́менем негаси́мым: сле́з ту́чу да́ждь ми́, и угаси́ его́ си́лу, хотя́й спасти́ся все́м челове́ком.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Свети́ла у́мная яви́стеся, святи́и му́ченицы: мглу́ бо пре́лести упраздни́сте ве́рою, душе́вныя ва́ша свещи́ просвети́сте, и с Женихо́м со сла́вою внидо́сте в Небе́сный Черто́г; и ны́не моли́теся спасти́ся, мо́лимся, душа́м на́шим.

Сла́ва, и ны́не: Богоро́дичен: Пречи́стая Де́во, Ма́ти Христо́ва, души́ моея́ стра́сти лю́тыя исцели́, молю́ся, и проще́ние да́руй мои́х прегреше́ний, я́же безу́мне соде́ях, ду́шу мою́ оскверни́в, и те́ло окаля́х окая́нный. Увы́ мне́, что́ сотворю́ в ча́с о́н, внегда́ а́нгели ду́шу мою́ разлуча́т от убо́гаго моего́ телесе́? Тогда́ Помо́щница ми́ бу́ди и Предста́тельница: Тебе́ бо и́мам упова́ние, ра́б Тво́й.

По 3-м стихосло́вии седа́льны, гла́с 8:

Подо́бен: Повеле́нное та́йно:

Стра́шнаго и ужа́снаго и неумы́тнаго Суди́ща Твоего́, Влады́ко Христе́, во уме́ прие́млю де́нь и ча́с, трепе́щу я́ко злоде́й: сту́дная дела́ и́мам, и дея́ния лю́тая, я́же еди́н соде́ях приле́жно. Те́мже со стра́хом припа́даю Ти́, и вопию́ боле́зненно: моли́твами Предте́чи Твоего́, Многоми́лостиве, спаси́ мя.

Душе́ моя́, неради́во жи́знь изнуря́ющи, воста́ни не́когда, к покая́нию воззри́: воспла́чися го́рце из глубины́ серде́чныя, да не ка́ко возрыда́еши та́мо без успе́ха: содрогни́ся, помышля́ющи Влады́чнее Второ́е Прише́ствие, и пре́жде суда́ сама́ себе́ осуди́: и убе́гнеши о́наго суда́ пра́веднаго.

Сла́ва, и ны́не: Богоро́дичен: Безпло́тных Твои́х, Христе́, и Предте́чи Твоего́, и учени́к, и проро́к, и му́ченик, и святы́х все́х, и Богоро́дицы Неискусому́жныя и Благи́я Ма́тере Твоея́ моли́твами умоле́н бы́в, да́ждь на́м во све́те Твое́м ходи́ти: и сподо́би на́с улучи́ти Ца́рствие Твое́, за милосе́рдие ми́лости Твоея́.

Кано́н покая́нен ко Го́споду на́шему Иису́су Христу́, и святы́м Его́ му́чеником. Творе́ние ки́р Ио́сифа, гла́с 8:

Пе́снь 1

Ирмо́с: Сокруши́вшему бра́ни мы́шцею Свое́ю, и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу: я́ко просла́вися.

Испо́лни мое́ се́рдце умиле́ния, Христе́, я́ко да вни́ду покая́нием в селе́ния Твоя́: и испове́данием помолю́ся Тебе́, от долго́в мя́ разреша́ющу.

Разреши́ мя, Сло́ве, от соу́з безчи́сленных мои́х зо́л, да ше́ствую в покая́нии пра́ведныя стези́ Твоя́, в Боже́ственное наставля́ющия поко́ище ве́чных красо́т.

Му́ченичен: Взя́тся к высоте́ вели́кое му́ченик Твои́х, Христе́, великоле́пие, всесла́вно бо пострада́вше, и превели́кими Твои́ми благода́тьми возвели́чишася.

Му́ченичен: Кропле́нием Боже́ственных крове́й святы́х страда́лец, кро́вь тре́бищная приноси́мая врагу́ преста́, и освяти́шася земна́я Ду́ха благода́тию.

Богоро́дичен: Покая́ния ми́, Де́во, покажи́ пути́, и от водя́щия мя́ ко греху́ возврати́ стези́: да Тя́ пою́ многопе́тую Бо́жию Роди́тельницу.

И́н кано́н свято́му и вели́кому Иоа́нну Предте́чи, гла́с 8:

Ирмо́с: Истря́сшему в мо́ри мучи́тельство фарао́не, и Изра́иля су́шею наста́вльшему пои́м Христу́ я́ко просла́вися во ве́ки.

Предте́че, пропове́дателю покая́ния, пока́ятися ми́ от души́ всея́, моли́ Спа́са и Го́спода, у́м мо́й просвеща́я и се́рдце, любо́вию чту́щаго тя́.

Я́ко пусты́нное красне́йшее овча́, Предте́че, му́чениче Христо́в, ны́не в пусты́ни мя́ страсте́й водворя́ющася, наста́ви к жи́зни покая́ния, Боже́ственною твое́ю моли́твою.

Му́чащаго мя́ греха́ ско́ро свободи́, хода́тайством твои́м, му́дре Предте́че, молю́ся, и разруши́ на мя́ дви́жимую бесо́вскую бу́рю.

Богоро́дичен: Спаси́ мя, Ма́ти И́стины, обурева́емаго лю́те от страсте́й, и ча́сто погружа́ема, и испра́ви мя́, Чи́стая, к спасе́ния благоути́шному приста́нищу.

Пе́снь 3

Ирмо́с: Уверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Скве́рны зло́бныя отмы́в моего́ се́рдца, и яви́тися ми́ непоро́чну пред Тобо́ю в Де́нь Стра́шный сподо́би, Христе́ мо́й, я́ко Преблаги́й.

Возмо́же лука́вством умертви́ти мя́ отсту́пник, жа́лом, Сло́ве, грехо́вным: но са́м мя́, Христе́, живоно́сным исцели́ бы́лием покая́ния.

Му́ченичен: Ста́нем му́жески, возглаша́ху, страстоте́рпцы, дру́г дру́гу, да не кто́ во́инства отве́ржется: Влады́ка помо́щник на́м предстои́т, стра́ждущим до́блественным умо́м.

Му́ченичен: Пречестно́е ка́мение Це́ркве, Боже́ственныя столпы́ благоче́стия, пре́лести победи́тели, вси́ в пе́снех почти́м ве́рнии му́ченики Госпо́дни.

Богоро́дичен: Низпа́дшим исправле́ние, Богоро́дице, па́дшаго мя́ воздви́гни из ро́ва зо́л мои́х: и утверди́, Влады́чице, на ка́мени за́поведей Бо́жиих.

И́н. Ирмо́с: Утверди́ на́ш у́м и сердца́, небеса́ Сло́вом утвержде́й, во е́же пе́ти и сла́вити Тя́, во спасе́ние ду́ш на́ших.

Одожди́ и мне́ ка́пли покая́ния, и́же в реце́ бе́здну крести́вый благоутро́бия, Го́спода все́х, Предте́че, му́чениче достосла́вне.

Напа́стными волна́ми жития́ всегда́ умо́м коле́блемь, прибега́ю под кро́в тво́й, Предте́че Спа́сов, потщи́ся помощи́ ми рабу́ твоему́.

В нощны́х моли́твах призыва́ю дневна́го свети́льника тебе́ ми́ру, богоблаже́нне Предте́че, просвети́ моя́ серде́чная чу́вства.

Богоро́дичен: Ра́дуйся, от на́с, Свята́я Богоро́дице; ра́дуйся, Я́же Ра́дость ро́ждшая ми́ру; ра́дуйся, Ру́чко, из Нея́же Ма́нна Небе́сная все́м ве́рным даде́ся.

Пе́снь 4

Ирмо́с: Услы́шах, Го́споди, слу́х Тво́й, и убоя́хся: я́ко неизрече́нным сове́том, Бо́г сы́й Присносу́щный, от Де́вы проше́л еси́ вопло́щься: сла́ва снизхожде́нию Твоему́, Христе́, сла́ва си́ле Твое́й.

Прельсти́ мя́ вкуше́нием грехо́вным вра́г льсте́ц, и от Тебе́, Бла́же, дале́че удали́, и зубо́м свои́м сне́дь соде́ла мя́: Еди́не Спа́се, потщи́ся изъя́ти мя́.

Неявле́ная, Го́споди, и сокрове́ная моя́ Са́м ве́си, согреши́вшаго Ти́ мно́го: мно́гими Твои́ми щедро́тами уще́дри, Сло́ве Бо́жий, я́ко Ми́лостив, и покая́ния ми́ вре́мя пода́ждь очисти́тельно.

Му́ченичен: Я́ко волна́ми муче́ньми потопля́еми му́ченицы, окормле́нием Христо́вым ко приста́нищем приведо́стеся Небе́снаго Ца́рствия, от Него́ победоно́сными венцы́ вои́стинну удобря́еми.

Му́ченичен: Обнови́вше, му́ченицы, благоче́стием зе́млю серде́чную, испове́дания на не́й се́мя вложи́сте: и муче́ния пожа́сте я́ве стори́чествующий кра́сный кла́с благода́тию.

Богоро́дичен: Всепе́тая Влады́чице, велегла́сно воспева́ющаго Ти́, испо́лни вся́кия ра́дости мою́ мы́сль, подаю́щи ми́ пла́ч бла́г, и покая́ния вины́, и ра́зум спасе́ния.

И́н. Ирмо́с: Услы́шах, Го́споди, смотре́ния Твоего́ та́инство: разуме́х дела́ Твоя́, и просла́вих Твое́ Божество́.

Себе́ самого́ пла́чу, житие́ неиспра́влено име́я всегда́: спаси́ и уще́дри мя́, Предте́че, грехи́ погиба́ющаго.

В моли́твах и моле́ниих да обря́щу тя́ помо́щника, блаже́нне, ду́шу мою́ укрепля́юща, и помышле́ние мое́ озаря́юща.

Потопля́ема бу́рею согреше́ний, и бе́дствующа мя́, Крести́телю Христо́в, окорми́ к приста́нищу Боже́ственнаго ра́зума.

Богоро́дичен: Смири́вши мя́ высокому́дренно живу́щаго, спаси́, Пречи́стая, ро́ждшая Возне́сшаго смири́вшееся естество́.

Пе́снь 5

Ирмо́с: Мра́к души́ моея́ разжени́, светода́вче Христе́ Бо́же, началоро́дную тьму́ изгна́в бе́здны: и да́руй ми́ све́т повеле́ний Твои́х, Сло́ве, да у́тренюя сла́влю Тя́.

И́же блудни́цу очи́стивый, и прокаже́нныя, Твои́м повеле́нием, Соде́телю вся́ческих, скве́рнаго греха́ смире́нную ду́шу мою́ очи́сти, и оде́ждами блиста́ющими красну́ соде́лай, Влады́ко, молю́ся.

От у́з разреши́в мя́ мно́гих мои́х прегреше́ний, Христе́ Бо́же, невозбра́нно ходи́ти напра́ви в пути́ Твоя́: я́ко да отреши́вся от пло́ти, в Поко́ища Свята́я всели́вся, сла́влю Тя́.

Му́ченичен: Истка́вше от боле́зней себе́ ри́зу сла́вы му́ченицы, и оде́явшеся красно́, в вы́шнем живу́т Ца́рствии в ра́дости, побе́ды венцы́ кра́сными удобря́еми.

Му́ченичен: Теку́щими стоя́щая измени́ша благому́дренно му́ченицы: теснота́ми бо муче́ний разли́чных объя́ти бы́вше, к простра́нству и́стинному Небе́снаго Ца́рствия, му́дрии, достиго́сте ра́дующеся.

Богоро́дичен: Свята́я Богоро́дице, Я́же Свято́е Сло́во ро́ждшая пло́тию, Еди́наго почива́ющаго на все́х святы́х, освяти́ мо́й у́м в лука́вых де́лех при́сно пребыва́ющий.

И́н. Ирмо́с: От но́щи неве́дения, богове́дения де́нь во све́те лица́ Твоего́, Христе́, да возсия́ет, ко у́тру хвале́ние Твое́ в сердца́х на́ших.

В нощи́ жития́ заблу́ждшаго мя́ просвети́, сла́вный Предте́че, свети́льник сы́й Со́лнца Пра́веднаго.

В бу́дущем Суде́, егда́ и́мам Го́сподеви предста́ти, да обря́щу тя́ предста́теля, Предте́че, осужде́ния мя́ стра́шнаго изыма́юща.

Напа́ствуемаго мя́, и искуше́ньми бесо́вскими коле́блемаго, утверди́ на ка́мени Боже́ственных хоте́ний, приснопева́емый.

Богоро́дичен: Я́ко превы́шшая все́х тва́рей, Ма́ти Бо́жия Присноде́во, вы́шша покажи́ мя вра́жиих се́тей.

Пе́снь 6

Ирмо́с: Я́коже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви я́ко Человеколю́бец, и упра́ви живо́т мо́й, молю́ся.

Ка́ющася приими́ мя, я́коже иногда́ ниневи́тяны, ве́ровавшия Боже́ственней про́поведи, Христе́, проро́ка Твоего́: и окорми́ живо́т мо́й, молю́ся Ти́.

Я́ко мыта́рь воздыха́ю, я́коже блудни́ца слезю́, я́ко Пе́тр вопию́, мно́гими погружа́емь прегреше́нии, Христе́: по́мощи ми́ ру́ку да́ждь, и спаси́ мя.

Му́ченичен: Я́ко богосве́тлая свети́ла, му́ченицы, луча́ми страда́ния озаря́ете всегда́ земны́й ми́р, и отгоня́ете пре́лести тьму́ глубо́кую.

Му́ченичен: Блаже́ннейший коне́ц обре́тше, всесвяти́и му́ченицы, почита́ете всегда́ Бо́га Блаже́ннаго, наслажда́еми Того́ све́тлостию.

Богоро́дичен: Манноприе́мная ру́чка, Тя́, Богоро́дице, иногда́ прообрази́: Христа́ бо носи́ла еси́, ма́нну ра́зума одожди́вшаго все́м чту́щим Тя́.

И́н. Ирмо́с: Ри́зу мне́ пода́ждь све́тлу, одея́йся све́том. я́ко ри́зою, Многоми́лостиве Христе́ Бо́же на́ш.

Секи́рою покая́ния и́стиннаго все́ очи́сти се́рдце мое́, Иоа́нне прему́дре, плодоно́сно доброде́тельми соде́ловая е́.

Ки́том содержи́мь напа́стей, из глубины́ се́рдца моего́ взыва́ю ти́, Предте́че: боле́зней мя́ лю́тых свободи́.

Душе́ моя́, пока́йся те́пле, се́ Суди́ще прии́де, возни́кни зову́щи: Иису́се Бо́же мо́й, Предте́чи ра́ди Твоего́ Ты́ мя уще́дри.

Богоро́дичен: Еди́на сло́вом, пло́тию Сло́во ро́ждшая, Чи́стая, мо́лимся, изба́ви се́тей вра́жиих ду́ши на́ша.

Пе́снь 7

Ирмо́с: А́нгелом о́троки из огня́ спасы́й, и гремя́щую пе́щь преложи́вый на ро́су, благослове́н еси́, Бо́же оте́ц на́ших.

Я́ко в беззако́ниих зача́т и роди́хся, Ще́дре, согреши́х па́че все́х челове́к: обраще́ния ми́ пода́ждь вре́мя оправда́ющее мя́.

Превозне́слся безу́мно, я́коже пре́жде фарисе́й, и паде́нием лю́тым падо́хся, и ви́дя мя́ ра́дуется вражде́бный: Сло́ве Бо́жий, не пре́зри мене́.

Му́ченичен: Собо́р честны́х му́ченик, во́инство непобори́мое, по́лк же святы́й, гра́ду написа́ся на Небесе́х, на земли́ му́жествовавшее.

Му́ченичен: Во́лею стра́сть проше́дше, му́ченицы, хода́таицу безсме́ртия, струю́ исцеле́ний источа́ете, челове́ков стра́сти отгоня́ющу.

Богоро́дичен: Па́че вины́ ражда́еши все́х Вину́, премно́жеством бла́гости Челове́ка бы́вшаго: те́мже согла́сно Тя́, Чи́стая, ублажа́ем.

И́н. Ирмо́с: В нача́ле зе́млю основа́вый, и небеса́ Сло́вом утверди́вый, благослове́н еси́ во ве́ки, Го́споди Бо́же оте́ц на́ших.

И́же пути́ Госпо́дни угото́вавый, Предте́че, к Тому́же испра́ви и моя́ стези́, да зову́: благослове́н еси́, Бо́же оте́ц на́ших.

Пропове́дниче Све́та, просвети́ ду́шу мою́, и лю́тыя тьмы́, и гее́нны паля́щия изба́ви мя́, прибега́ющаго к тебе́ несумне́нною душе́ю.

Непло́дныя израще́ние плодови́тое сы́й, моего́ се́рдца непло́дие во благопло́дие претвори́ твои́ми моли́твами, му́дре Крести́телю Христо́в.

Богоро́дичен: Избра́нная Агнице Бо́жия Сло́ва, моли́ из Тебе́ вопло́щшагося Бо́га, ко избра́нным овца́м мя́ причта́ти в Ча́с Стра́шный.

Пе́снь 8

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Ру́це вся́кими оскверни́ла еси́ злодея́ньми, душе́ моя́: и ка́ко те́х воздева́еши на высоту́ бесе́дующи Бо́гу? Но́зе непотре́бны сотвори́ла еси́, на дела́ ходя́щи сту́дная: потщи́ся ходи́ти покая́нием в пути́ спаси́тельныя.

Не пребы́х, Го́споди, в за́поведех Твои́х никогда́же, не сотвори́х ни еди́н де́нь Твоего́ хоте́ния, Бла́же: кото́рыма у́бо очи́ма воззрю́ на Тя́ тогда́, творя́ща су́д пра́ведный, и пови́нныя отсыла́юща во о́гнь гее́нский?

Му́ченичен: Разжже́нныя угаси́сте пе́щи многобо́жия, му́дрии страда́льцы, я́коже во́ду излива́юще мно́гу ва́ша кро́ви, непра́ведно пролия́вшияся, за любо́вь Творца́: те́мже пото́к сла́достный насле́дуете.

Му́ченичен: Превзыдо́сте, святи́и, смире́ния земно́е те́ло, и му́ки я́коже стра́ждущу ино́му претерпе́сте, отсече́ние рука́м же и нога́м: отню́дуже превы́шшия ны́не сподо́бистеся жи́зни во ве́ки.

Богоро́дичен: Волну́ема мя́ бу́рею грехо́вною, вопию́ Ти, Влады́чице Чи́стая, Твои́м хода́тайством напра́ви мя́ ко спаси́тельному покая́нию, и ко всеути́шному приста́нищу: я́ко да уви́жу све́т спасе́ния, омрача́емый при́сно ле́ностию.

И́н. Ирмо́с: Безнача́льнаго Царя́ Сла́вы, Его́же трепе́щут Небе́сныя Си́лы, по́йте свяще́нницы, лю́дие превозноси́те во вся́ ве́ки.

Взе́млющаго грехи́ ми́ра Агнца Бо́жия, Его́же показа́л еси́ все́м, моли́, Крести́телю, стра́сти моя́ умертви́ти, и спасти́ ду́шу мою́.

Облегчи́ бре́мя души́ моея́, побори́ борю́щия мя́, Госпо́день Крести́телю: и не уя́звлена мя́ покажи́ от те́х злоде́йствия.

Удали́лся еси́ бе́гаяй, Проро́че, водвори́лся же еси́ в пусты́ню непрохо́дную: те́мже тя́ молю́, стра́сти души́ моея́ пу́сты сотвори́ вско́ре.

Богоро́дичен: Лоза́ еси́, Де́во, я́же Гро́зд Зре́л ро́ждшая, умиле́ния питие́м напоя́ющи мя́ ны́не, отыми́ пия́нство зо́л мои́х.

Та́же, пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м, в дому́ Дави́дове о́трока своего́. В ни́хже посети́ на́с Восто́к с высоты́, и напра́вил ны́ е́сть на пу́ть ми́ра.

Да и а́з спаса́емь благода́рственно Тебе́, Христе́, велича́ю, при́зри на мя́ мно́ги ра́ны на плещу́ прие́мшаго, и исцели́, вино́ на ни́х и еле́й возлива́я, Твоего́, Спа́се, благоутро́бия позна́ние.

Я́коже разбо́йника благонра́внаго испусти́вшаго гла́с, изба́вил еси́ уби́йства и те́м злы́х, я́коже уще́дрил еси́ блудни́цу прослези́вшуюся, я́ко Петра́ вели́каго ученика́, и Дави́да проро́ка: и мене́, Спа́се, поми́луй отча́яннаго.

Му́ченичен: Сообра́зни бы́вше страсте́м, Страда́вшаго на́с ра́ди, страстоте́рпцы, с Ни́м ны́не ку́пно прославля́етеся, обожа́еми Боже́ственными прича́стии, и сия́юще па́че заре́й чу́вственнаго со́лнца, и просвеща́юще ве́рных сердца́.

Му́ченичен: Доброде́тель возсия́ святы́х страда́лец, вся́к гра́д си́ми сокро́вищи вои́стинну некра́домыми обогаща́ется ве́рою, облиста́ющих благода́ть оби́льно чуде́с пресла́вных: я́же песносло́вим я́ко те́плыя предста́тели.

Богоро́дичен: Просвети́тельными мо́лниями, Всенепоро́чная, из Твоея́ проше́дшаго утро́бы, Сы́на Бо́жия, ве́рою пою́щия Тя́ просвети́: и тьмы́ на́с несвети́мыя, и ве́чныя му́ки изми́ Твои́м предста́тельством.

И́н. Ирмо́с: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Хотя́щу стра́шному Твоему́ предста́ти Престо́лу, Сло́ве, и дея́ний мои́х истяза́емей бы́ти вине́, кото́рый обря́щу отве́т, окая́нный? Твоего́ ра́ди Крести́теля, Го́споди Бо́же мо́й, тогда́ пощади́ мя.

Я́ко гла́с Сло́ва, испра́ви гла́сы моя́ к Бо́гу, прему́дре Крести́телю, и изба́ви мя́ зло́бы бесо́вския и искуше́ния челове́к: да по до́лгу ублажа́ю тя́.

Напита́й мя́ пи́щею безсме́ртною Христо́вых за́поведей, напо́й мя́ питие́м живо́тным, Крести́телю и Проро́че: и предста́ви Бо́гу спасе́на, под кро́в тво́й притека́ющаго.

Богоро́дичен: Влады́чице Де́во Чи́стая, и Препросла́вленная, с Предте́чею Сы́на Твоего́ и Царя́ моли́, от вся́кия ну́жды спасти́ ве́рою Тя́ блажа́щия.

Та́же, Досто́йно е́сть: и покло́н, и ектения́, и свети́лен, и псалмы́ обы́чныя.

На стихо́вне стихи́ры покая́нны, гла́с 8:

Егда́ прииму́ во уме́ мно́жество соде́янных мно́ю зо́л, и в помышле́ние прииду́ стра́шнаго о́наго испыта́ния? Тре́петом содержи́мь к Тебе́ прибега́ю, Человеколю́бцу Бо́гу. Те́мже не пре́зри мене́, молю́ Тя, Еди́не Безгре́шне: да́руй умиле́ние смире́нней мое́й души́ пре́жде конца́, и спаси́ мя.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́ша возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Сле́зы ми́ да́ждь, Бо́же, я́коже иногда́ жене́ гре́шнице, и сподо́би мя́ омочи́ти но́зе Твои́, я́же мя́ от пути́ пре́лести свободи́вшия, и ми́ро благоуха́ния Тебе́ приноси́ти житие́ чи́сто, покая́нием ми́ созда́ное, да услы́шу и а́з жела́емый Тво́й гла́с: ве́ра твоя́ спасе́ тя, иди́ в ми́ре.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Вельми́ подвиза́стеся, святи́и, му́ки от беззако́нник претерпе́вше до́блественне, и Христа́ испове́давше пред цари́; и преста́вльшеся от жития́ па́ки си́лы де́йствуете в ми́ре, и неду́гующия исцеля́ете страстьми́ свои́ми, святи́и. Моли́те спасти́ся душа́м на́шим.

Сла́ва, и ны́не: Богоро́дичен: Кро́в тво́й, Богоро́дице Де́во, врачевство́ е́сть духо́вное: во́нь бо прибега́юще, от душе́вных неду́г избавля́емся.

Та́же, Бла́го е́сть: Трисвято́е по О́тче на́ш: тропа́рь, и ектения́. Та́же, ча́с 1-й, и псалмы́ обы́чны, и про́чее, и отпу́ст.

Помяни́ на́с, Христе́ Спа́се ми́ра, я́коже разбо́йника помяну́л еси́ на Дре́ве: и сподо́би все́х, Еди́не Ще́дре, Небе́сному Ца́рствию Твоему́.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Пучи́ну я́ко име́я, Христе́, милосе́рдия, изсуши́ мои́х прегреше́ний пучи́ну: и умиле́ния слеза́ми ду́шу мою́ окамене́нную претвори́.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Дре́вле Христа́ в воде́ крести́в, Боже́ственный Крести́телю, от страсте́й мя́ треволне́ния обурева́ема, ко приста́нищу покая́ния твои́ми мольба́ми устреми́.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Кровьми́ ва́шими, святи́и страстоте́рпцы, угаси́вше о́гнь идолобе́сия, струи́ источа́ете, всегда́ исцеле́ний, стра́сти разли́чныя исцеля́юще.

Сла́ва: Безнача́льне О́тче, и Сы́не, и Боже́ственный Ду́ше, Крести́теля моли́твами, многоле́тныя стра́сти души́ моея́ утоли́, молю́ся: и спаси́ мя раба́ Твоего́.

И ны́не: Изба́ви на́с от страсте́й безче́стия, и лю́таго во а́де муче́ния. Мольба́ми Твои́ми, Пречи́стая Богоро́дице, благоче́стно Тя́ ублажа́ющих.

на Го́споди, воззва́х: стихи́ры кре́стны, гла́с 8:

Подо́бен: Му́ченицы Госпо́дни:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

На Кресте́, Христе́, пригво́ждся, пронза́емь в ру́це и но́зе, в ребро́ же свято́е прободе́н бы́л еси́, источа́я ми́ ка́пли Боже́ственнаго спасе́ния, Преблаги́й, Кро́вь же и во́ду, я́ко да омы́еши мо́й гно́й и скве́рну: сла́ва Твое́й, Всеще́дре, бла́гости.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Страда́ти претерпе́л еси́, Влады́ко, я́ко да безстра́стие все́м пода́си, покланя́ющимся Твои́м Страсте́м, и во́льному заколе́нию, и копию́, и гвозде́м, и тро́сти, я́же долготерпели́вно хотя́ претерпе́л еси́: я́ко да и мне́ исхода́таиши, Го́споди, ра́ди страсте́й Твои́х безстра́стие.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Ю́ница Нескве́рная, Юнца́ ви́дящи на Дре́во воздви́жена во́лею, рыда́ющи уми́льно вопия́ше: увы́ Мне́, Возлю́бленнейшее Ча́до, что́ Ти со́нм воздаде́ безблагода́тный евре́йский, хотя́ Мя́ безча́дствовати от Тебе́, Вселюби́мый?

Та́же, Мине́и стихи́ры свято́му. А́ще ли не́сть Мине́и:

И́ны стихи́ры Богоро́дице, гла́с 8:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Не терплю́, Ча́до, зре́ти Тя́ на Дре́ве усну́вша, бо́дрость все́м даю́щаго: я́ко да дре́вле от преступле́ния плода́, сно́м всепа́губным усну́вшим, Боже́ственную и спаси́тельную бо́дрость пода́си, Де́ва глаго́лаше пла́чущися, Ю́же велича́ем.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Собо́р непра́ведный Тебе́ на Кре́ст воздви́же А́гнца, взе́млющаго ми́ра прегреше́ния, и копие́м Твоя́ ре́бра прободо́ша, Долготерпели́ве, и ру́ки пригвозди́ша Твоя́ и но́ги. О суро́вства зла́го! Оле дерзнове́ния! Пречи́стая сия́ взыва́ше уми́льно слезя́щи.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Что́ зри́мое сие́, е́же ны́не ви́жду, Влады́ко? И́же го́рстию всю́ тва́рь пречу́дне содержа́й, на Дре́ве я́коже А́гнец непра́ведне ви́сиши, Сло́ве Бо́жий, от ра́б непокори́вых пове́шен? Оле терпе́ния! Оле Твоея́ бла́гости, Всеще́дре! Слезя́щи глаго́лаше Пренепоро́чная.

Сла́ва, и ны́не: Крестобогоро́дичен: А́гнца Тя́ егда́ А́гница и Де́вая к заколе́нию ведо́ма узре́ со слеза́ми, Сло́ве, после́доваше, и взыва́ше: где́ тщи́шися, Ча́до Мое́? Сше́ствую Тебе́, Сладча́йший, не терплю́ бо не зре́ти Тебе́, Иису́се Мо́й Многоми́лостиве.

Та́же, Све́те ти́хий: и проки́мен дне́. И Сподо́би, Го́споди, в ве́чер се́й:

На стихо́вне стихи́ры кре́стны, гла́с 8:

Вознесы́йся на Кре́ст, Христе́ Бо́же, и спа́сл еси́ челове́ческий ро́д: сла́вим страда́ния Твоя́.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий Свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Пригвозди́лся еси́ на Кресте́, Христе́ Бо́же, и отве́рзл еси́ ра́йския две́ри: сла́вим Божество́ Твое́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченицы Твои́, Го́споди, забы́ша жите́йская, небре́гше о муче́ниих, бу́дущия ра́ди жи́зни, тоя́ насле́дницы яви́шася: те́мже и со а́нгелы ра́дуются. Те́х моли́твами да́руй лю́дем Твои́м ве́лию ми́лость.

Сла́ва, и ны́не: Крестобогоро́дичен:

Подо́бен: Го́споди, а́ще и на суди́щи:

Го́споди, егда́ Тя Со́лнца Пра́веднаго со́лнце ви́де на Дре́ве пове́шена, лучи́ скры́, и луна́ све́т во тьму́ преложи́: Всенепоро́чная же Твоя́ Ма́ти утро́бою уязвля́шеся.

Та́же, Ны́не отпуща́еши: И Трисвято́е по О́тче на́ш: тропа́рь, и ектения́, и отпу́ст.

Кано́н моле́бный Пресвяте́й Богоро́дице, гла́с 8:

Пе́снь 1

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припе́в: Пресвята́я Богоро́дице, спаси́ на́с.

Мно́гими содержи́мь напа́стьми, к Тебе́ прибега́ю спасе́ния иски́й, о Ма́ти Сло́ва и Де́во, от тя́жких и лю́тых мя́ спаси́.

Страсте́й мя́ смуща́ют прило́зи, мно́гаго уны́ния испо́лнити мою́ ду́шу: умири́, Отрокови́це, тишино́ю Сы́на и Бо́га Твоего́, Всенепоро́чная.

Сла́ва: Спа́са ро́ждшую Тя́ и Бо́га, молю́, Де́во, изба́вити ми ся лю́тых: к Тебе́ бо ны́не прибега́я, простира́ю и ду́шу и помышле́ние.

И ны́не: Неду́гующа те́лом и душе́ю, посеще́ния Боже́ственнаго, и промышле́ния от Тебе́ сподо́би, Еди́на Богома́ти, я́ко Блага́я, Блага́го же Роди́тельнице.

Пе́снь 3

Ирмо́с: Небе́снаго кру́га Верхотво́рче Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Предста́тельство и покро́в жи́зни моея́, полага́ю Тя́, Богороди́тельнице Де́во, Ты́ мя окорми́ ко приста́нищу Твоему́, благи́х вино́вна, ве́рных утвержде́ние, Еди́на Всепе́тая.

Молю́, Де́во, душе́вное смуще́ние, и печа́ли моея́ бу́рю разори́ти: Ты́ бо, Богоневе́стная, Нача́льника тишины́ Христа́ родила́ еси́, Еди́на Пречи́стая.

Сла́ва: Благоде́теля ро́ждши до́брых вино́внаго, благодея́ния бога́тство все́м источи́: вся́ бо мо́жеши, я́ко Си́льнаго в кре́пости Христа́ ро́ждши, Богоблаже́нная.

И ны́не: Лю́тыми неду́ги, и боле́зненными страстьми́ истяза́ему, Де́во, Ты́ ми помози́, исцеле́ний бо неоску́дное Тя́ зна́ю сокро́вище, Пренепоро́чная, неиждива́емое.

Пе́снь 4

Ирмо́с: Услы́шах, Го́споди, смотре́ния Твоего́ та́инство: разуме́х дела́ Твоя́, и просла́вих Твое́ Божество́.

Страсте́й мои́х смуще́ние, Ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.

Милосе́рдия Твоего́ бе́здну призыва́ющу пода́ждь ми́, Я́же Благосе́рдаго ро́ждшая, и Спа́са все́х пою́щих Тя́.

Сла́ва: Наслажда́ющеся, Пречи́стая, Твои́х дарова́ний, благода́рственное воспева́ем пе́ние, ве́дуще Тя́ Богома́терь.

И ны́не: На одре́ боле́зни моея́, и не́мощи низлежа́щу ми́, я́ко Благолюби́ва помози́, Богоро́дице, Еди́на Присноде́во.

Пе́снь 5

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Испо́лни, Чи́стая, весе́лия се́рдце мое́, Твою́ нетле́нную даю́щи ра́дость, весе́лия ро́ждшая Вино́внаго.

Изба́ви на́с от бе́д, Богоро́дице Чи́стая, ве́чное ро́ждши Избавле́ние, и Ми́р вся́к у́м преиму́щий.

Сла́ва: Разреши́ мглу́ прегреше́ний мои́х, Богоневе́сто, просвеще́нием Твоея́ све́тлости, Све́т ро́ждшая Боже́ственный и Преве́чный.

И ны́не: Исцели́, Чи́стая, души́ моея́ неможе́ние, посеще́ния Твоего́ сподо́бльшая, и здра́вие моли́твами Твои́ми пода́ждь ми́.

Пе́снь 6

Ирмо́с: Моли́тву пролию́ ко Го́споду, и Тому́ возвещу́ печа́ли моя́, я́ко зо́л душа́ моя́ испо́лнися, и живо́т мо́й а́ду прибли́жися, и молю́ся я́ко Ио́на: от тли́, Бо́же, возведи́ мя.

Сме́рти и тли́ я́ко спа́сл е́сть, Са́м Ся́ изда́в сме́рти, тле́нием и сме́ртию мое́ естество́ я́то бы́вшее, Де́во, моли́ Го́спода и Сы́на Твоего́, враго́в злоде́йствия мя́ изба́вити.

Предста́тельницу Тя́ живота́ ве́м, и Храни́тельницу тве́рду, Де́во, и напа́стей реша́щу молвы́, и нало́ги бесо́в отгоня́ющу: и молю́ся всегда́, от тли́ страсте́й мои́х изба́вити мя́.

Сла́ва: Я́ко сте́ну прибе́жища стяжа́хом, и ду́ш всесоверше́нное спасе́ние, и простра́нство в ско́рбех, Отрокови́це, и просвеще́нием Твои́м при́сно ра́дуемся. О Влады́чице, и ны́не на́с от страсте́й и бе́д спаси́.

И ны́не: На одре́ ны́не немощству́яй лежу́, и не́сть исцеле́ния пло́ти мое́й: но Бо́га и Спа́са ми́ру, и Изба́вителя неду́гов ро́ждшая, Тебе́ молю́ся Благо́й, от тли́ неду́г возста́ви мя́.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 8:

А́гнца и Па́стыря, и Спа́са ми́ра, на Кресте́ зря́щи, Ро́ждшая Тя́, глаго́лаше слезя́щи: ми́р у́бо ра́дуется, прие́мля избавле́ние: утро́ба же Моя́ гори́т, зря́щи Твое́ распя́тие, е́же за все́х терпи́ши Сы́не и Бо́же Мо́й.

Пе́снь 7

Ирмо́с: От Иуде́и доше́дше о́троцы в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

На́ше спасе́ние я́коже восхоте́л еси́, Спа́се, устро́ити, во утро́бу Де́выя всели́лся еси́, Ю́же ми́ру Предста́тельницу показа́л еси́: оте́ц на́ших Бо́же, благослове́н еси́.

Воли́теля ми́лости, Его́же родила́ еси́, Ма́ти Чи́стая, умоли́, изба́витися от прегреше́ний, и душе́вных скве́рн, ве́рою зову́щим: оте́ц на́ших Бо́же, благослове́н еси́.

Сла́ва: Сокро́вище спасе́ния, и исто́чник нетле́ния, Тя́ ро́ждшую, и сто́лп утвержде́ния, и две́рь покая́ния зову́щим показа́л еси́: оте́ц на́ших Бо́же, благослове́н еси́.

И ны́не: Теле́сныя сла́бости, и душе́вныя неду́ги Богороди́тельнице, любо́вию приступа́ющих к кро́ву Твоему́, Де́во, исцели́ти сподо́би, Спа́са Христа́ на́м ро́ждшая.

Пе́снь 8

Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

По́мощи я́же от Тебе́ тре́бующия не пре́зри, Де́во, пою́щия и превознося́щия Тя́ во ве́ки.

Неможе́ние души́ моея́ исцеля́еши, и теле́сныя боле́зни, Де́во, да Тя́ просла́влю, Чи́стая, во ве́ки.

Сла́ва: Исцеле́ний бога́тство излива́еши, ве́рно пою́щим Тя́, Де́во, и превознося́щим неизрече́нное Твое́ Рождество́.

И ны́не: Напа́стей Ты́ прило́ги отгоня́еши, и страсте́й нахо́ды, Де́во: те́мже Тя́ пое́м во вся́ ве́ки.

Пе́снь 9

Ирмо́с: Вои́стинну Богоро́дицу Тя́ испове́дуем спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

То́ка сле́з мои́х не отврати́ся, Я́же от вся́каго лица́ вся́ку сле́зу оте́мшаго, Де́во, Христа́ ро́ждшая.

Ра́дости мое́ се́рдце испо́лни, Де́во: Я́же ра́дости прие́мшая исполне́ние, грехо́вную печа́ль потребля́ющи.

Сла́ва: Све́та Твоего́ заря́ми просвети́, Де́во, мра́к неве́дения отгоня́щи, благове́рно Богоро́дицу Тя́ испове́дающих.

И ны́не: На ме́сте озлобле́ния не́мощи смири́вшагося, Де́во, исцели́, из нездра́вия во здра́вие претворя́ющи.

Та́же, Досто́йно е́сть: и покло́н. Трисвято́е по О́тче на́ш: Тропа́рь, и про́чее обы́чно, и отпу́ст.

По 1-м стихосло́вии седа́льны кре́стны, гла́с 8:

Ви́дя разбо́йник Нача́льника жи́зни, на Кресте́ ви́сяща, глаго́лаше: а́ще не бы Бо́г бы́л вопло́щься, И́же с на́ми распны́йся: не бы́ со́лнце лучи́ своя́ потаи́ло, ниже́ бы земля́ трепе́щущи трясла́ся: но вся́ терпя́й, помяни́ мя, Го́споди, во Ца́рствии Твое́м.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Посреде́ двою́ разбо́йнику, ме́рило пра́ведное обре́теся Кре́ст Тво́й: о́вому у́бо низводи́му во а́д тягото́ю хуле́ния: друго́му же легча́щуся от прегреше́ний к позна́нию богосло́вия. Христе́ Бо́же, сла́ва Тебе́.

Сла́ва, и ны́не: Крестобогоро́дичен: А́гнца и Па́стыря, и Изба́вителя, А́гница зря́щи на Кресте́ непра́ведно воздви́жена, пла́чущися го́рько взыва́ше: ми́р у́бо ра́дуется, прие́мля Тобо́ю избавле́ние; утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости, Бо́же Преблаги́й, Безгре́шне Го́споди. Е́йже ве́рно возопии́м: благоутро́бие покажи́, Де́во, на ны́, и согреше́ний оставле́ние да́руй, покланя́ющимся Того́ страда́нием.

По 2-м стихосло́вии седа́льны, гла́с 8:

Посреде́ Еде́ма дре́во процвете́ сме́рть, посреде́ же всея́ земли́ Дре́во возрасти́ жи́знь: вкуси́вше бо пе́рвее плода́, нетле́нни су́ще, тле́нни бы́хом: улучи́вше же второ́е, нетле́ния наслади́хомся: Кресто́м бо спаса́еши я́ко Бо́г, ро́д челове́ческий.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

В Раи́ мя пре́жде дре́во обнажи́, вкуше́нием вра́г внося́ умерщвле́ние: Креста́ же Дре́во, жи́зни ве́чныя одея́ния челове́ком нося́, водрузи́ся на земли́, и ми́р ве́сь испо́лнися вся́кия ра́дости. Его́же зря́ще возноси́ма, Бо́гу ве́рою лю́дие согла́сно возопии́м: испо́лнь сла́вы до́м Тво́й.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Вселе́нней свети́ла присносве́тлая показа́стеся ве́рою: му́ченическую всю́ возложи́вше наде́жду на Бо́га, и мы́сленным еле́ем Ду́ха Свята́го, душе́вныя свещи́ ва́ша просвети́сте. Те́мже и ча́ши у́мныя, челове́ком пролива́юще исцеле́ния я́коже во́ды, Це́ркви яви́стеся, страстоте́рпцы всехва́льнии. Моли́те Христа́ Бо́га, прегреше́ний оставле́ние дарова́ти, пра́зднующим любо́вию святу́ю па́мять ва́шу.

Сла́ва, и ны́не: Крестобогоро́дичен: Де́во, из Тебе́ вопло́щшагося, я́ко ви́дела еси́ возвыша́ема на Кре́ст посреде́ двою́ разбо́йнику, пла́ч восприе́мши вопия́ше: увы́ мне́, Ча́до сладча́йшее, ка́ко во́лею ра́спят бы́сть, И́же грехи́ взе́мляй ми́ра я́ко Благоутро́бен? Челове́ческим хотя́, я́ко Бо́г, пе́снем хвале́ния приноси́мым бы́ти Тебе́.

По 3-м стихосло́вии седа́льны, гла́с 8:

Подо́бен: Повеле́нное та́йно:

На Кресте́ Тя́ ви́девше возвы́шена, Со́лнца Незаходи́маго, Христе́, стра́хом со́лнце помрачи́ся а́бие: земля́ поколеба́ся, и ка́мение тре́петом распада́шеся, и церко́вная заве́са раздра́ся, и ме́ртвии от гро́б воста́ша, славосло́вяще стра́шное Твое́ и Боже́ственное снизхожде́ние, Еди́наго Бо́га на́шего.

Дре́во го́ресть во Еде́ме пре́жде произнесе́, Дре́во же Кре́стное сла́дкую жи́знь процвете́; Ада́м бо яды́й во тлю́ поползе́ся: мы́ же наслажда́ющеся Пло́ти Христо́вы оживля́еми быва́ем, и обожа́еми та́инственне, Ца́рствие прие́млюще Присносу́щное Бо́жие. Те́мже и ве́рою зове́м: сла́ва, Сло́ве, Стра́сти Твое́й.

Сла́ва, и ны́не: Крестобогоро́дичен: Сы́на Твоего́ и Бо́га Кресто́м, Де́во, сохраня́еми при́сно, бесо́вския прило́ги и ко́зни побежда́ем, су́щую Богоро́дицу Тя́ вои́стинну воспева́юще; и любо́вию вси́ ро́ди блажи́м, Пречи́стая, я́коже прорекла́ еси́. Те́мже согреше́ний на́ших оставле́ние моли́твами твои́ми да́руй.

Кано́н Честно́му и Животворя́щему Кресту́, [его́же краегране́сие без богоро́дичнов: Пригво́ждшемуся на Дре́ве Бо́гу благода́ть.] Творе́ние Ио́сифово. Гла́с 8:

Пе́снь 1

Ирмо́с: Колесницегони́теля фарао́ня погрузи́, чудотворя́й иногда́ Моисе́йский же́зл, крестообра́зно порази́в, и раздели́в мо́ре: Изра́иля же беглеца́ пешехо́дца спасе́, пе́снь Бо́гови воспева́юща.

И́же от дре́ва сла́стною сне́дию ме́ртва мя́ бы́вшаго, на Кресте́ Сло́ве умертви́выйся, оживи́л еси́, и сла́вою удобри́л еси́: покланя́юся Твое́й держа́ве, славосло́вя страда́ния, и благоутро́бие неисче́тное.

Егда́ распростре́ся на Дре́ве виногра́д невозде́ланный, вино́ на́м Боже́ственныя благода́ти источи́, сердца́ веселя́щее, и пре́лести пия́нство отню́д потребля́ющее, и грехи́ очища́ющее.

Му́ченичен: Преиспещре́ни ра́нами, великому́ченицы, и страда́ний боле́зньми украша́еми, красны́ добротвори́тельному Влады́це предста́сте со сла́вою, всесла́вно веселя́щеся, и богови́дны познава́еми.

Му́ченичен: Си́лою Боже́ственною проявле́нно укрепля́еми, святи́и, си́льнаго всю́ кре́пость губи́тельную му́жески низложи́сте: и венча́вшеся красно́ победи́тельными венцы́, ра́дующеся Бо́гу предста́сте.

Богоро́дичен: Предстоя́щи Кресту́ Твоему́, Го́споди, Неискусобра́чная, и Твое́ уязвле́ние зря́щи, Влады́ко, уязвля́ема глаго́лаше: увы́ Мне́, Ча́до, боле́зни избе́гши в Рождестве́ Твое́м, ны́не боле́зненно терза́юся.

Други́й кано́н Пресвяте́й Богоро́дице. Гла́с 8: Ирмо́с то́йже.

На Тя́, Де́во, наде́жду возложи́х спасе́ния моего́, грехо́вныя скве́рны всего́ мя омы́й, и чи́ста соде́лай, Бо́гу и Сы́ну Твоему́ благоугожда́ти и де́яти, и Того́ всесвято́му и́мени.

Две́ри Све́та, о́чи мои́ просвети́, и́же помрачи́ мра́чный зми́й тьмо́ю прегреше́ний, и две́ри ми́ отве́рзи покая́ния, Де́во, и к животу́ наста́ви мя́, от пла́мене и тьмы́ исхити́.

Ма́ти Бо́жия, я́ко дерзнове́ние иму́щи к ро́ждшемуся из Тебе́, Единоро́дному Сло́ву, и Отцу́ Собезнача́льному, моли́, Всенепоро́чная, ду́шу мою́ изба́вити от бесо́вскаго озлобле́ния, и огня́, и вся́каго муче́ния.

Благослове́н Пло́д, Богоневе́сто, Твоего́ чре́ва, И́мже земни́и вси́ от кля́твы изба́вихомся, Благослове́нная, Пречи́стая, несказа́нное чу́до, недоразуме́емое ве́дение, все́х ве́рных спасе́ние.

Пе́снь 3

Ирмо́с: Утвержде́й в нача́ле Небеса́ ра́зумом, и зе́млю на вода́х основа́вый, на ка́мени мя́, Христе́, за́поведей Твои́х утверди́: я́ко не́сть свя́т, па́че Тебе́, Еди́не Человеколю́бче.

Утвержде́й Небеса́, и зе́млю основа́вый, и мо́ре сло́вом связа́вый, Ты́ свя́зан бы́л еси́ мене́ ра́ди, и на Кресте́ пригвожда́емь: я́ко да от у́з греха́ разреши́ши мя́, Человеколю́бче.

Кре́стному Дре́ву вра́г прирази́вся, умертви́ся с бе́сы свои́ми злоде́йственными: и вкуше́нием лука́вым осужде́нный, поми́лован бы́сть, и утвержде́нием благоче́стия тва́рь утверди́ся.

Му́ченичен: Многови́дным ра́нам, и мече́м, и звере́м, и обнаже́нием теле́сным вдава́еми, лука́вым гони́телем, Боже́ственнии и до́блии страда́льцы, и не я́ты пребы́ша манове́нием лу́чшим.

Му́ченичен: Взира́юще помышле́нием, и тре́звенною мы́слию к бу́дущим, и теку́щия до конца́ пренебрего́ша Христо́вы му́ченицы сла́внии: те́мже нестерпи́мыя боле́зни претерпе́ша ра́дующеся.

Богоро́дичен: Многопе́тая А́гница, А́гнца зря́щи воздвиза́ема на Дре́во непра́ведне, пла́чущи восклица́ше, ма́терски слезя́щи: и долготерпе́ние поя́ше, Того́ сла́вящи.

И́н. Ирмо́с: Ты́ еси́ Утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Все́ мое́ жела́ние к Тебе́ движа́, Влады́чице Чи́стая, плотски́х мя́ жела́ний вско́ре премени́.

Возсия́й ми́ покая́ния чи́стыя зари́, Влады́чице, Две́ре Све́та, и грехо́в мои́х мглу́ потреби́.

Еди́на Всенепоро́чная, поро́ка вся́каго на́с изба́ви, и искуше́ний находя́щих, и огня́ ве́чнующаго.

Ускори́ посети́ти боля́щаго, Пречи́стая, и от лю́тыя ра́ны изба́ви мя́, и вся́кия ско́рби.

Пе́снь 4

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Ро́д челове́ческий от паде́ния призва́ся, его́же подъя́т дре́вле первозда́нный: все́х бо Соде́тель воздви́жен бы́сть на Дре́во, пе́рсты окровавля́емь, и гвоздьми́ во́лею пригвожда́емь в ру́це, и в ре́бра копие́м пробода́емь.

Ста́ Кре́ст, и ле́сть вся́ низпаде́ся: Тебе́, Спа́се, обнаже́ну бы́вшу, обнажи́ся чу́ждий: и Ада́м Боже́ственнаго нетле́ния ри́зою оде́ян бы́сть, тва́рь просвети́ся помрача́ему со́лнцу, на Дре́ве, Христе́, распина́ему Ти́.

Му́ченичен: Но́ваго заколе́ния, я́коже овча́та, му́ченицы, пожре́ному Сло́ву принесо́стеся: кро́вными тече́нии, пре́лести моря́ изсуши́вше Боже́ственною благода́тию, излия́ние страсте́й одожде́нием чуде́с потребля́ете всегда́, сла́внии.

Му́ченичен: Отсече́ние удо́в все́х подъя́сте, му́ченицы, и зубо́в и ногте́й искорене́ние, ру́к отре́зание неща́дно, язы́ка же и но́г и соста́вов теле́сных: те́мже превели́кия сподо́бистеся сла́вы, все́х Бо́гу предстоя́ще.

Богоро́дичен: Своего́ Си Юнца́ Непоро́чная Ю́ница ви́девши на Дре́во воздви́жена, вопия́ше со восклица́нием: Ча́до, ка́ко Тя́ законопресту́пных со́нм отню́д не уще́дри, уще́дрившаго и́? Но усмотре́нием льсти́вым сме́рти преда́ти непра́ведно произво́ли.

И́н. Ирмо́с: Услы́шах, Го́споди, смотре́ния Твоего́ та́инство: разуме́х дела́ Твоя́, и просла́вих Твое́ Божество́.

Ду́шу мою́, омраче́нную прегреше́ньми, озари́ све́том, Присноде́во, Я́же Со́лнце ро́ждшая Пра́вды.

Искуше́ний мя́ исхити́, и жития́ душетле́нныя бу́ри, и огня́ ве́чнаго свободи́ мя, Богоневе́сто.

Де́вства свяще́нный Сосу́де, и Невмести́маго естество́м вселе́ние, ду́шу мою́ омраче́нную от мно́гих страсте́й, просвети́.

Всесвята́я Богоневе́сто, Влады́чице ми́ра, Ты́ мя спаси́, от бе́д избавля́ющи, и страсте́й молву́ отгоня́ющи.

Пе́снь 5

Ирмо́с: Вску́ю мя́ отри́нул еси́ от Лица́ Твоего́, Све́те Незаходи́мый, и покры́ла мя́ е́сть чужда́я тьма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Да сла́стнаго вкуше́ния изба́виши мя́, же́лчи, Долготерпели́ве вкуси́л еси́ хотя́: и я́ко да ме́ртвости совлече́ши мя́, Иису́се, страсте́й, на́г пригвозди́тися изво́лил еси́ на Дре́ве: пою́ Твое́ благоутро́бное.

Истле́вшую страстьми́ ду́шу мою́, Сло́ве, но́ву творя́, ду́шу пре́дал еси́ Отцу́, на Дре́ве ви́ся, и не терпи́т безду́шная земля́ сия́ поразумева́ющи, но стра́хом коле́блется воспева́ющи Тя́.

Му́ченичен: Украси́стеся, му́ченицы, Боже́ственными страстьми́ удобря́еми, и стопа́м после́довавше страстьми́ все́м безстра́стие пода́вшему, Сло́ву Единоро́дному, Отца́ Безнача́льнаго: сего́ ра́ди с Ни́м прославля́етеся.

Му́ченичен: Устрани́вшеся до́льних, неви́димыя насле́довасте, в Небе́сных водворя́ющеся Боже́ственных селе́ниих, и прича́стием Боже́ственным обожа́еми невеще́ственно, Спа́совы непобеди́мии му́ченицы.

Богоро́дичен: Стра́нно виде́ние, ви́жу, взыва́ше Препе́тая: ка́ко И́же зре́нием всю́ зе́млю коле́бляй, на Дре́ве возвыша́емь усну́л еси́, спя́щия от ве́ка хотя́ возбуди́ти? Покланя́юся, Сы́не, Твоему́ долготерпе́нию.

И́н. Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве Тебе́ ино́го не ве́мы.

Пое́м Тя́, Де́во Всепе́тая, Я́же Сло́во Бо́жие вмести́вшая во чре́ве Твое́м, Пренепоро́чная.

Огня́ негаси́маго, и че́рвия изба́ви мя́, Ма́ти Бо́жия, я́ко иму́щая е́же ми́ловати целе́бно.

Стена́ Ты́ ве́рных и держа́ва всесвята́я еси́, спаса́ющи от искуше́ний пою́щия Тя́.

Неду́гующую ду́шу мою́ исцели́, ро́ждшая все́х Спасе́ние, и взе́млющаго неду́ги, Пречи́стая Влады́чице.

Пе́снь 6

Ирмо́с: Бе́здна грехо́в и прегреше́ний бу́ря мя́ смуща́ет, и во глубину́ ну́жднаго ре́ет мя́ отча́яния: но Твою́ кре́пкую ру́ку мне́ простри́ я́ко Петро́ви, о Упра́вителю, и спаси́.

Воспе́ша Небе́сныя Си́лы вся́ и удиви́шася, на Кресте́ Тя, Сло́ве, взира́юще ви́сяща: и Ада́м уя́звленный, Спа́се, исцеле́ я́звою Твое́ю, и кля́тва прогна́на бы́сть.

Разреша́ется от у́з нереши́мых челове́чество, Тебе́, Сло́ве, пло́тию свя́зану бы́вшу: и связу́ется мучи́тель я́ко пти́ца, и от все́х ве́рных наруга́емь: сла́ва, Христе́, благоутро́бию Твоему́.

Му́ченичен: Яви́стеся, богозра́чнии страстоте́рпцы, я́коже у́глие, вся́ку злоче́стия ве́щь попаля́юще благода́тию, на у́глиях же огня́ всесожига́еми, и Боже́ственное прохлажде́ние прие́млюще.

Му́ченичен: Овча́та и́стиннаго Па́стыря, страстоно́сцы, явля́еми, посреде́ ди́виих волко́в неврежде́ни пребы́сте, и сконча́вше до́бре тече́ние, Боже́ственнии, ко огра́ду Небе́сную всели́стеся.

Богоро́дичен: Го́спода Тя́ Живота́ породи́х, и кра́сна добро́тою па́че сыно́в челове́ческих, Де́ва взыва́ше: и ка́ко ны́не умира́еши, Сы́не, добро́ты не име́я в распя́тии, удобри́вый вся́ манове́нием?

И́н. Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Мари́е, чи́стое и всечестно́е жили́ще все́х Соде́теля, ду́шу очища́ющия пода́ждь ми́ сле́зы, и бу́дущаго суда́ и му́ки исхити́ мя.

Две́ри Бо́жия, вхо́ды Боже́ственныя покажи́ смире́нней мое́й души́: в ня́же вше́д испове́даяся, злы́х разреше́ние, Богоро́дице, восприиму́.

Пучи́на грехо́в, и во́лны отча́яния обурева́ют мо́й у́м: умилосе́рдися, Влады́чице, и ру́ку ми́ простри́, и спаси́ мя, Я́же Спа́са ро́ждшая.

Тя́ Предста́тельницу и Сте́ну ве́рнии вси́ и́мамы, и́же во глубине́ злы́х, и мяте́жей и скорбе́й при́сно бе́дствующии, Богоро́дице, еди́на ве́рных прибе́жище.

Пе́снь 7

Ирмо́с: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших.

Ура́нен бы́л еси́ в ру́це Твои́, Христе́, и́маже соде́лал еси́ чудеса́; и ра́ны претерпе́л еси́, ра́ны моя́ вся́ исцеля́я. Пою́ Тя, Еди́не Долготерпели́ве, зовы́й: благослове́н Бо́г оте́ц на́ших.

Пригвожде́н бы́л еси́ в ру́це Твои́ и но́зе гвоздьми́, Спа́се, распина́емь, и в ре́бра прободе́н бы́в, ка́пли источа́я все́м оставле́ния пою́щим непреста́нно, и глаго́лющим: благослове́н Бо́г оте́ц на́ших.

Му́ченичен: Ли́к соста́вим песносло́вяще Бо́жия му́ченики, и́же лико́м а́нгельским сопричте́ныя, и земны́я просвеща́ющия, и всегда́ пою́щия: благослове́н Бо́г оте́ц на́ших.

Му́ченичен: Во святы́х све́тлостех освяти́вшеся всели́стеся, посыла́юще все́м освяще́ние же и избавле́ние, восхваля́ющим ва́с, Боже́ственнии му́ченицы, и воспева́ющим Христа́: оте́ц на́ших Бо́же благослове́н еси́.

Богоро́дичен: Незаходи́мое Со́лнце, ка́ко за́йде на Дре́ве распина́емь? Де́ва вопия́ше Ти́, Сло́ве: и ви́дев со́лнце, оста́ви тече́ние, свети́ти не моги́й, Тебе́ стра́ждущу, Влады́ко. Песносло́влю Твое́, Сы́не, беззло́бие.

И́н. Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Молю́ Тя, Пречи́стая, умертви́ живу́щий во мне́ гре́х, и живота́ получи́ти сподо́би мя́, Де́во: и ча́сти мя́ изба́ви та́мо му́чимых.

Стра́сти разли́чныя мя́ обурева́ют, Ро́ждшая, Чи́стая, Исто́чника безстра́стия, те́х одержа́ния, и огня́ ве́чнаго изба́ви мя́, Богоро́дице, моли́твами Твои́ми.

Нра́вом во́льным согреша́ю, и порабоща́емь е́смь безме́стным обы́чаем, ны́не ко обы́чней Твое́й ми́лости притека́ю: отча́яннаго спаси́ мя, Всесвята́я Богоро́дице.

Угаси́ пла́мень страсте́й мои́х, и утиши́ бу́рю се́рдца моего́, Богома́ти Чи́стая: и изба́ви мя́, Пречи́стая, от бесо́в мучи́тельства, и огня́ ве́чнаго.

Пе́снь 8

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Из ко́рене, Христе́, прозя́бл еси́ Иессе́ова воплоща́емь, и искореня́еши изра́стшее те́рние Ада́мова преступле́ния, вене́ц нося́й терно́в: на Дре́ве же пригво́ждься, ю́же от дре́ва исцеля́еши изра́стшую кля́тву, и пою́щия спаса́еши: свяще́нницы воспо́йте, лю́дие превозноси́те во вся́ ве́ки.

Да бо́га челове́ка соде́лаеши, Человеколю́бче, бы́л еси́ Челове́к, и Кресту́ приобщи́вся в ре́бра пробода́емь, и оцтом с же́лчию напоя́емь, отону́дуже спа́сшиися Твои́ми страстьми́, Сло́ве, вопие́м благода́рственно: свяще́нницы воспо́йте, лю́дие превозноси́те Христа́ во вся́ ве́ки.

Му́ченичен: Свя́зани бы́вше, му́ченицы, и я́ко а́гнцы закала́еми, и на огни́ неми́лостивно испеца́еми, звере́м же отдава́еми, и в главы́ усека́еми, ра́довастеся ра́достию неизглаго́ланною, вопию́ще: де́ти благослови́те, свяще́нницы воспо́йте, лю́дие превозноси́те Христа́ во ве́ки.

Му́ченичен: Венцено́сцы му́ченицы, а́нгелом соприча́стницы, и́же безпло́тныя враги́ попра́вше, моли́тву сотвори́те о на́с ко Го́споду, я́ко да в любви́ и во мно́зе единомы́слии поживе́м, вопию́ще несумне́нным се́рдцем: де́ти благослови́те, свяще́нницы воспо́йте, лю́дие превозноси́те Христа́ во ве́ки.

Богоро́дичен: Боле́зненне стеню́щи, ма́терски восклица́ше, и утро́бнаго смуще́ния не терпя́щи на Кресте́, взира́ше к Ро́ждшемуся из Твоего́ чре́ва, вопию́щи: что́ зре́ние сие́, Ча́до, ка́ко стра́ждеши, И́же естество́м Безстра́стный, вся́ко хотя́ ро́д челове́ческий от страсте́й свободи́ти?

И́н. Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

Богороди́тельнице Де́во, Ты́ моя́ грехи́ и бре́мя облегчи́ от прегреше́ний, я́ко да Тя́ велича́ю.

Я́же Судию́ ро́ждши и Бо́га, мольба́ми благопремени́тельными Твои́ми ми́лостива мне́ Того́ покажи́, Чи́стая: я́ко да спасе́т мя́ от ве́чнаго огня́.

Прегреше́ния моя́ мно́га превзыдо́ша, Богоро́дице, да́ждь ми́ ны́не ру́ку по́мощи, и от пла́мене негаси́маго изба́ви мя́ непотре́бнаго.

Просвети́, Пречи́стая, се́рдца моего́ о́чи молю́ся, че́рностию грехо́вною ослепле́ныя, и прия́тны Боже́ственнаго сия́ния покажи́, я́ко да явлю́ся Тебе́ ра́ди Твоему́ Сы́ну чи́ст.

Пе́снь 9

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют.

Исцели́л еси́, Влады́ко, моя́ я́звы, уязви́вся и окровави́в ру́це свои́, и к путе́м ходи́ти спаси́тельным, я́ко Бла́г напра́вил мя́ еси́, Го́споди, но́зе ископа́в Своя́ на Кресте́, и́хже дре́вле родонача́льницы ви́девше ходя́ща тя́ в Раи́, сокрыва́хуся.

Испра́вившуся Ти́ на Кресте́, испра́вися пады́й паде́нием ве́лиим первозда́нный. Кре́пость же вся́ паде́ся вра́жия, вся́ же земля́ освяти́ся Кро́вию и водо́ю, от ре́бр Твои́х излия́нною. Те́мже Тя́, Всеще́дре, непреста́нно велича́ем.

Му́ченичен: Вя́жеми, святи́и му́ченицы, вяза́ния лука́ваго разруши́сте, и у́зами, я́же претерпе́сте терпели́вно, того́ связа́сте, и покори́сте под но́зе, студа́ испо́лнена, и сме́х зря́щим сотвори́сте, благода́тию Боже́ственною.

Му́ченичен: Земля́ положе́нием свяще́нных му́ченик моще́й освяти́ся: и́бо исто́чник источа́ющ исцеле́ний вся́ческих сия́ Боже́ственнаго стяжава́ет, стра́сти теле́сныя и душе́вныя непреста́нно исцеля́ющи, и врежде́ние бесо́вское отрева́ющи Боже́ственною благода́тию.

Богоро́дичен: Избе́гши боле́зней ма́терних во вре́мя рожде́ния, Долготерпели́ве, егда́ же Ти́ ны́не стра́сти во́льней причасти́вшуся, и боле́зни прии́мшу, поболе́х утро́бою, и душе́ю боле́зни испо́лнихся, Пречи́стая вопия́ше, Юже досто́йно велича́ем.

И́н. Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к: те́мже Пречи́стую Богоро́дицу ве́рнии велича́ем.

Уще́дри, Пречи́стая, окая́нную мою́ ду́шу, и умертви́ стра́сти губи́тельныя, и мучи́тельное недоуме́ние отжени́: струи́ же сле́з святы́я да́руй присноживо́тныя, и́миже изба́влюся жду́щаго мя́ лю́таго осужде́ния.

Стена́ христиа́ном, и прибе́жище тве́рдое ми́ру, в не́мже спаса́емся, Ты́ еси́ Де́во Чи́стая Богоневе́сто: из Тебе́ бо Бо́г воплоти́вся, Тебе́ все́м подаде́ покро́в спаси́тельный. Те́мже, Чи́стая, спаси́ мя недосто́йнаго.

Безнача́льне Сло́ве О́тчий, и Сы́не Мо́й, и Свято́му Ду́ху Сопресто́льный, ка́ко Свои́ пречи́стеи дла́ни на Кресте́ просте́рл еси́? Что́ ны́не толи́кая Твоя́ нищета́, Преблаги́й? Предстоя́щи Твоему́ распя́тию, вопия́ше Всенепоро́чная.

Иска́пающи Боже́ственную сла́дость, Я́же все́х Сла́дость ро́ждшая, услади́ ду́шу мою́, огорче́нную я́дом зми́я, отчужда́ющи мя́ го́рькаго греха́ всегда́ хода́тайством Твои́м, Предста́тельнице ве́рных Непосты́дная.

Та́же, Досто́йно е́сть: И покло́н, ектения́, и свети́лен, и псалмы́ обы́чныя.

На стихо́вне стихи́ры кре́стны, гла́с 8:

Моисе́ев же́зл прообража́ше Честны́й Кре́ст Тво́й, Спа́се на́ш: те́м бо спаса́еши я́ко из глубины́ морски́я, лю́ди Твоя́, Человеколю́бче.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́ша возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я. и при́зри на рабы́ Твоя́, и на дела́ Твоя́, и наста́ви сы́ны и́х.

Е́же дре́вле во Еде́ме в раи́, дре́во сне́дное прозябло́ е́сть посреде́ садо́в; Це́рковь же Твоя́, Христе́, Кре́ст Тво́й процвете́, источа́ющ всему́ ми́ру жи́знь. Но о́но у́бо умертви́ сне́дию я́дшаго Ада́ма; сие́ же жи́ва сотвори́, ве́рою спа́сшася разбо́йника: его́же спасе́ния прича́стники и на́с яви́, Христе́ Бо́же, И́же стра́стию Твое́ю разруши́в, я́же на ны́ ко́зни вра́жия, и сподо́би на́с Ца́рствия Твоего́, Го́споди.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Му́ченицы Христо́вы непобеди́мии, победи́вше ле́сть си́лою Кре́стною, восприя́сте благода́ть ве́чныя жи́зни, мучи́телей преще́ния не убоя́вшеся, му́ками ураня́еми весели́стеся: и ны́не кро́ви ва́ша бы́ша исцеле́ния душа́м на́шим. Моли́те спасти́ся душа́м на́шим.

Сла́ва, и ны́не: Крестобогоро́дичен: На Кресте́ пове́шена зря́щи Чи́стая Тебе́ ро́ждшая, Го́споди, и бли́з бы́вши, пла́чущи глаго́лаше: Ча́до, что́ сия́ стра́ждеши пло́тию, и тщи́шися безча́дствовати Мя́? Потщи́ся просла́витися, я́ко да возвели́чуся Стра́стию Твое́ю.

Та́же, Бла́го е́сть: И Трисвято́е по О́тче на́ш: тропа́рь, и ектения́, и ча́с 1-й, и отпу́ст.

Помяни́ на́с, Христе́ Спа́се ми́ра, я́коже разбо́йника помяну́л еси́ на Дре́ве: и сподо́би все́х, Еди́не Ще́дре, Небе́сному Ца́рствию Твоему́.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Жезло́м Моисе́й Кре́ст вообража́я, разделя́ше глубину́, лю́ди изра́ильтеския преводя́: мы́ же того́ вообража́юще, мы́сленныя враги́ побежда́ем.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Дре́вле Иа́ков благословля́я о́троки, сы́ны сыно́в свои́х, ру́це пременя́я простира́ше, зна́меная Тво́й Кре́ст, Христе́ Спа́се, и́мже вси́ от кля́твы свободи́хомся.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Страсте́м Христо́вым ревну́юще страстоте́рпцы, му́ки го́рькия подъя́сте му́жески, и нетле́нными венцы́ венча́вшеся, на Небесе́х живете́.

Сла́ва: Сла́ва Отцу́ Еди́ному Безсме́ртному: сла́ва Сы́ну во ве́ки живу́щему: сла́ва ку́пно Ду́ху Всесвято́му, всю́ тва́рь освяща́ющему.

И ны́не: Из деви́ческаго чре́ва Твоего́, Чи́стая, возсия́ Соде́тель со́лнца и луны́: Его́же зря́щи пове́шена на Дре́ве, вся́ тва́рь колеба́шеся.

на Го́споди, воззва́х: стихи́ры святы́м апо́столом. Гла́с 8:

Подо́бен: Го́споди, а́ще и на суди́щи:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Го́споди, Ты́ Уте́шителя заря́ми апо́столы Твоя́ просвети́л еси́, и свети́ла положи́в те́х ве́ре утвержде́ние, у́мным просвеще́нием ра́зума Твоего́, Влады́ко: сего́ ра́ди покланя́емся неизрече́нному человеколю́бию Твоему́.

Сти́х: Имене ра́ди Твоего́, потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Го́споди, Ты́ апо́стол моли́твами огради́л еси́ ста́до Твое́ сие́, от враго́в искуше́ния невре́дно сохраня́я: зане́ честно́ю то́ искупи́л еси́ Кро́вию от рабо́ты чужда́го, я́ко Ще́др и Человеколю́бец.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Яви́стеся ку́пно во основа́нии церко́внем, я́ко честно́е ка́мение, заре́ю све́тлою вселе́нней блиста́юще богоразу́мие изве́стно, апо́столи Боже́ственнии, Тро́ице предстоя́тели, и моли́твенницы о душа́х на́ших.

Та́же в Мине́и стихи́ры свято́му, а́ще и́мать. А́ще не́сть Мине́и, и́ны стихи́ры свято́му и вели́кому чудотво́рцу Никола́ю, гла́с 8:

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

Го́споди, Ты́ честна́го Твоего́ святи́теля Никола́я в конца́х просла́вил еси́, да́в тому́ чуде́с благода́ть; и побо́рника показа́л еси́ су́щим в беда́х лю́тых, и в ско́рбех и зло́бах припа́дающим, и прося́щим того́ при́сно заступле́ния.

Сти́х: Хвали́те Го́спода вси́ язы́цы, похвали́те его́ вси́ лю́дие.

Го́споди, Ты́ святи́теля Твоего́ Боже́ственными мольба́ми умилосе́рдися; и вся́кия беды́, и вся́каго озлобле́ния, и нахожде́ния вра́жия свободи́ рабы́ Твоя́, ве́рою покланя́ющияся Твое́й держа́ве непобеди́мей.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Иму́ще тебе́ ко Влады́це предста́теля, и засту́пника те́пла, Нико́лае, к тебе́ притека́ем ве́рою, и взыва́ем: не отврати́ на́с безде́льны от покро́ва твоего́, но покажи́ твое́ милосе́рдие просте́рто на рабы́ твоя́.

Сла́ва, и ны́не: Богоро́дичен: Ви́ждь моего́ сокруше́ннаго се́рдца воздыха́ние, Богоневе́сто, приими́, Де́во Мари́е Чи́стая, ру́к мои́х воздея́ние, я́ко человеколюби́ва, и не отри́ни, Всенепоро́чная: да пою́ и велича́ю тя́ возвели́чившую ро́д на́ш.

Та́же, Све́те ти́хий: Проки́мен дне́: И Сподо́би Го́споди, в ве́чер се́й:

На стихо́вне стихи́ры апо́стольския. Гла́с 8:

Го́споди, Тебе́ усе́рдно на земли́ апо́столи возлюби́вше, уме́ты вмени́ша вся́, да Тебе́ еди́наго приобря́щут, и за Тя́ на ра́ны телеса́ своя́ преда́ша: сего́ ра́ди просла́влени бы́вше, и мо́лятся о душа́х на́ших.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Го́споди, Ты́ апо́столов па́мять на земли́ возвели́чил еси́: вси́ бо вку́пе соше́дшеся в не́й славосло́вим Тя́, я́ко подае́ши на́м те́х ра́ди исцеле́ния, и всему́ ми́ру умире́ние моли́твами и́х, и ве́лию ми́лость.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: А́ще ка́я доброде́тель, и а́ще ка́я похвала́ подоба́ет святы́м; мече́м бо преклони́ша вы́и, Тебе́ ра́ди прекло́ньшаго небеса́ и соше́дша; пролия́ша кро́ви своя́ Тебе́ ра́ди истощи́вшаго себе́, и зра́к раба́ прие́мша; смири́шася да́же до сме́рти, нищете́ Твое́й подо́бящеся: и́хже моли́твами, по мно́жеству щедро́т Твои́х, Бо́же, поми́луй на́с.

Сла́ва, и ны́не: Богоро́дичен: А́з, Де́во Свята́я Богоро́дице, к покро́ву Твоему́ прибега́ю: ве́м, я́ко обря́щу Тобо́ю спасе́ние, мо́жеши бо, Чи́стая, помощи́ мне́.

Та́же, Ны́не отпуща́еши: и Трисвято́е по О́ тче на́ш: тропа́рь, и ектения ́, и отпу́ст.

Кано́н моле́бный ко Пресвяте́й Богоро́дице. Гла́с 8:

Пе́снь 1

Ирмо́с: Колесницегони́теля фарао́ня погрузи́, чудотворя́й иногда́ Моисе́йский же́зл, крестообра́зно порази́в, и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Сло́во Бо́жие родила́ еси́ воплоще́нно, Е́же пре́жде Безпло́тное, па́че естества́, Всенепоро́чная Богоро́дице Де́во, богому́жно в ми́ре пожи́вшее: те́мже Тя́ вси́ сла́вим, су́щее по Бо́зе заступле́ние на́ше.

Испещре́на разли́чием ша́ра Богоблагода́тная, О́тчее Сло́во пло́ть бы́вшее за милосе́рдие неизрече́нное, па́че ума́ и сло́ва, Благослове́нная, родила́ еси́, пребы́вши Де́ва Нескве́рная.

Сла́ва: От ко́рене, Чи́стая, ца́рска прозябла́ еси́, Царя́ Христа́, Бо́жие Сло́во, па́че ума́ и смы́сла, воплоще́нна родила́ еси́ от чи́стых крове́й Твои́х, сугу́ба естество́м показу́ема, и еди́нственна во ипоста́си.

И ны́не: И́же Богоро́дицу Тя́ пропове́дует, Пречи́стая, на вся́кия е́реси побежде́ние но́сит: пло́ть у́бо бы́вшаго неизме́нно породила́ еси, Богороди́тельнице, вы́шша вся́кия тва́ри, Сло́во Бо́жие Присносу́щное.

Пе́снь 3

Ирмо́с: Утвержде́й в нача́ле Небеса́ ра́зумом, и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Во Твою́ святу́ю утро́бу Бо́г всели́ся, и воплоти́ся я́коже ве́сть, Богома́ти, и спасе́ на́с живоно́сными страстьми́: те́м Тя́ спасе́ния Две́рь сла́вим.

На земли́ вопло́щься и поживе́ с челове́ки, И́же ду́шу все́м челове́ком вдохну́вый, от утро́бы Твоея́ проше́д, без се́мене Пребоже́ственный: те́мже Тя́ ве́рнии вси́ пе́сньми, Чи́стая, ублажа́ем.

Сла́ва: От Отца́ пре́жде ве́к рожде́на во утро́бе Твое́й заче́нши, Де́во, неискусобра́чно, и родила́ еси́ на́м вку́пе Бо́га и Челове́ка, во обою́ естеству́ соверше́нна и неразде́льна.

И ны́не: Же́зл прозя́бший Цве́т нетле́ния Христа́, и злату́ю кади́льницу вси́ Тя́ зна́ем, Чи́стая, Боже́ственное существо́ нося́щую на руку́ у́гль, Де́во Богоблаже́нная.

Пе́снь 4

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в: те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Киво́т издале́ча прообрази́ прие́мший Зако́н Богопи́санный, во утро́бе Живонача́льное Сло́во, зача́тое несказа́нно, Пренепоро́чная, пита́ющее бога́тно ду́ши пою́щих: си́ле Твое́й сла́ва, Человеколю́бче.

Ты́ и́стинная спасе́ния вина́, Богома́ти, еди́на была́ еси́, Творцу́ и Зижди́телю, от Твои́х пречи́стых крове́й пло́ть взаи́м да́вши: е́юже сме́ртныя сокруши́шася две́ри, и жи́знь челове́ком дарова́ся.

Сла́ва: Да о́браз погребе́ный страстьми́ взы́щеши бога́тством бла́гости, в Де́выя всели́лся еси́ утро́бу, из нея́же Ты́, Прему́дрость Бо́жия, хра́м созда́л еси́: и́мже пожи́в с челове́ки, Ще́дре, и спа́сл еси́ ми́ра концы́.

И ны́не: По Бо́зе Тя́ Предста́тельницу стяжа́хом, Пренепоро́чная: Ты́ бо Бо́жия Ма́ти была́ еси́ Творца́ и Зижди́теля, и на́ш зра́к прие́мшаго, и си́й спа́сша от тли́ и бе́д, и сла́вою Боже́ственною просла́вльша.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Я́ко Бо́га заче́ншую, Пречи́стая, Зижди́теля, Соде́теля же и Го́спода, ро́дове Тя́ все́х челове́к блажа́т, и безпло́тных у́мнии чинонача́льницы, я́ко Ма́терь Тя́ Бо́га сла́вят.

Во́инства Вы́шних Си́л, Пречи́стая, блажа́т Тя́: Тобо́ю бо то́кмо, и́же на земли́ с Небе́сными совоку́пльшеся, пое́м Рождество́ Твое́.

Сла́ва: Несказа́нным, Де́во, о́бразом, Сло́во всели́ся в Тя́ и Челове́к бы́сть, И́же пре́жде ве́к от Отца́ возсия́вый, и челове́ки от тли́ избавля́я, к жи́зни нетле́нней возводя́, Еди́н Благосе́рдый.

И ны́не: Украси́лася еси́, Пречи́стая Де́во, де́вства добро́тами, и пе́рвыя Е́вы отпусти́ла еси́ злообра́зное, Христа́ ро́ждши, оде́жду безсме́ртия да́рующаго, Тебе́ пою́щим.

Пе́снь 6

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

И́же вседержа́вною си́лою нося́й вся́ческая, в неможе́ние плотско́е от Тебе́ облече́ся, Де́во Всенепоро́чная, во благодея́ние челове́ков, я́ко Человеколю́бец.

На́йде на Тя́ Вседе́тельный Ду́х, Всенепоро́чная, и Сло́во Бо́жие в Тя́ всели́ся, и пло́ть бы́сть несказа́нно, пребы́в неизме́нен.

Сла́ва: Просвети́ ду́ши правосла́вно пою́щих Тя́: рече́ния проро́к Твое́ провозвести́ша Пречи́стое зача́тие, и па́че сло́ва, Богоневе́стная, Рождество́.

И ны́не: Селе́ние Бо́жие, Боже́ственное вои́стинну и Пречестно́е, пое́м благоче́стно Мари́ю Пречи́стую: Бо́га бо вмести́, восприе́мши Невмести́маго и Непостижи́маго.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 8:

Я́ко Всенепоро́чная Неве́сто Творцу́, я́ко Неискусому́жная Ма́ти Изба́вителя, я́ко Прия́телище су́щи Уте́шителя, Всепе́тая: беззако́нию мя́ су́ща скве́рно жили́ще, и бесо́м игра́лище в ра́зуме бы́вша, потщи́ся и си́х злоде́йствия мя́ изба́вити, све́тло жили́ще доброде́тельми соде́лавши, Светода́тельная и Нетле́нная; разжени́ о́блак страсте́й, и вы́шняго прича́стия сподо́би, и Све́та Невече́рняго моли́твами Твои́ми.

Пе́снь 7

Ирмо́с: Бо́жия снизхожде́ния о́гнь устыде́ся в Вавило́не иногда́: сего́ ра́ди о́троцы в пещи́ ра́дованною ного́ю, я́ко во цве́тнице лику́юще поя́ху: благослове́н еси́, Бо́же оте́ц на́ших.

Пречи́стая Влады́чице, заче́ншая Изба́вителя все́х, несказа́ннаго и Боже́ственнаго сподо́би мя́ избавле́ния, велегла́сно вопию́щаго, и пою́ща: благослове́н Бо́г оте́ц на́ших.

Ны́не вся́ испо́лнишася Све́та Боже́ственнаго, Тобо́ю, Пречи́стая: Ты́ бо Две́рь яви́лася еси́, Е́юже ми́рови Бо́г бесе́дова, просвеща́я ве́рою зову́щия: благослове́н Бо́г оте́ц на́ших.

Сла́ва: Се́ ны́не испо́лнися Дави́да Боже́ственнаго Боже́ственное прорече́ние: мо́лятся вои́стинну Твоему́ лицу́, Богороди́тельнице Чи́стая, стяжа́вшии бога́тство благода́ти, ны́не благословя́ще Бо́га оте́ц на́ших.

И ны́не: Зачала́ еси́, Пречи́стая, над все́ми Бо́га и Го́спода, благоволи́вшаго спасти́ челове́ческий ро́д от сме́рти и тли́, Его́же досто́йно пою́ще, зове́м: благослове́н Бо́г оте́ц на́ших.

Пе́снь 8

Ирмо́с: Победи́тели мучи́теля и пла́мене, благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те вся́ дела́ Госпо́дня Го́спода.

Благослове́нная Пречи́стая, души́ моея́ я́звы, и грехо́вныя стру́пы очи́сти, Бо́га ро́ждшая И́же над все́ми, Отрокови́це Чи́стая, от деви́ческия неискусобра́чныя утро́бы: Его́же де́ти благослови́те, и превозноси́те во ве́ки.

Све́та Незаходи́маго была́ еси́ прия́телище, Всечи́стая, де́вства добро́тами сия́ющи: и все́х озари́ла еси́, Богоро́дицу Тя́ и́стинную испове́дающих от души́, и вопию́щих: де́ти благослови́те, свяще́нницы воспо́йте, и превозноси́те Его́ во ве́ки.

Сла́ва: Освя́щшися Ду́хом Святы́м, Богоро́дице Всенепоро́чная, вои́стинну прия́ла еси́ во утро́бе Безнача́льна Сы́на и Соприсносу́щна Отцу́, в Тебе́, Чи́стая, воплоща́ема, во благодея́ние ве́рою вопию́щим: де́ти благослови́те, свяще́нницы по́йте, и превозноси́те Его́ во ве́ки.

И ны́не: Я́ко Бо́га ро́ждши па́че сло́ва и смы́сла, Сего́ умоли́, Пречи́стая Богома́ти, бы́ти благоуве́тливу недосто́йным на́м все́м, во стра́шное Его́ и ужа́сное прише́ствие, егда́ хо́щет суди́ти челове́ческому естеству́, наги́м стоя́щим все́м, и со стра́хом суди́мым.

Пе́снь 9

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́ Богоро́дицу, а́нгелов и челове́к чинонача́лия велича́ют.

Отве́рженых ве́чнаго пребыва́ния, и па́дших окая́нно в сме́рть, па́ки на́с призвала́ еси́, Пречи́стая, Ма́ти бы́вши Изба́вителя, и к пре́жнему тещи́ сподо́била еси́ Оте́честву: те́м Тя́, Богома́ти, непреста́нно велича́ем.

Удо́бь, Богоро́дице, пода́ждь ми́ преити́ жития́ во́лну напа́стей, и настоя́ния страсте́й, я́ко Блага́ укротя́щи, и наставля́ющи к доброде́тели Небе́снаго ше́ствия: да я́ко Благода́тельницу непреста́нно велича́ю Тя́.

Сла́ва: Чи́стая Пресла́вная Ма́ти Бо́жия, пою́щия Тя́ любо́вию спаси́ от напа́стей, молву́ реша́ющи ми́лостивно, я́ко Бо́га у́бо ро́ждши: вся́, ели́ко хо́щеши твори́ти, твори́ши невозбра́нно, и мо́жеши, Де́во. Те́мже Тя́ вси́ велича́ем.

И ны́не: Побежда́ющую е́реси ю́ношския, честну́ю Це́рковь покажи́, ю́же Христо́с Сы́н Тво́й, Обра́дованная, Кро́вию честно́ю Свое́ю я́ко Бла́г стяжа́, и спасе́ от бе́д и от наси́лия одержа́щаго на́с, Влады́чице.

Та́же, Досто́йно е́сть: Трисвято́е по О́тче на́ш: тропа́рь, и отпу́ст.

По 1-м стихосло́вии седа́льны апо́стольския. Гла́с 8:

Я́ко свети́ла ми́ра, и наста́вники на́шего спасе́ния, и́же от нача́ла Боже́ственныя воспои́м ученики́ Бо́га на́шего, я́ко све́т су́щим во тьме́ на́м возсия́ша, и Со́лнце Сла́вы все́м сказа́ша. Те́мже и ле́сть и́дольскую низложи́ша, Тро́ицу пропове́давше во Еди́ном Божестве́. Сего́ ра́ди мо́лимся ва́м апо́столи, Христа́ Бо́га моли́те, грехо́в оставле́ние дарова́ти на́м, и ве́лию ми́лость.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Во вся́ концы́ изше́дшее прему́дрое ва́ше веща́ние, я́ко вои́стинну ми́ру, прехва́льнии Госпо́дни апо́столи, богоразу́мие все́м я́ве возпропове́да, и язы́ческое неве́дение, во уве́дение преведе́. Отону́дуже и и́дольскую мглу́ отгна́вше, Све́т Ра́зума су́щим во тьме́ возсия́. Сего́ ра́ди мо́лимся, моли́теся Христу́ Бо́гу, прегреше́ний оставле́ние дарова́ти, чту́щим любо́вию святу́ю па́мять ва́шу.

Сла́ва, и ны́не: Богоро́дичен: Во искуше́ния многоплете́ная впа́д, от вра́г ви́димых и неви́димых, и бу́рею безчи́сленных мои́х грехо́в одержи́мь е́смь, Пречи́стая: да я́ко к те́плому заступле́нию, и покро́ву, и к приста́нищу моему́ притека́ю Твоея́ бла́гости. Те́мже, Пречи́стая, из Тебе́ Воплоти́вшагося без се́мене моли́ о все́х рабе́х Твои́х, непреста́нно пою́щих Тя́, Богоро́дице Пречи́стая, моля́щи Того́ приле́жно, согреше́ний оставле́ние дарова́ти покланя́ющимся ве́рою Рождеству́ Твоему́.

По 2-м стихосло́вии, седа́льны, гла́с 8:

Во всю́ зе́млю, я́коже рече́ проро́к, изы́де прему́дрых апо́стол веща́ние: пропове́давше бо Сло́во, язы́ки вся́ просвети́ша, те́мже те́х по до́лгу восхваля́юще пе́сньми почти́м, я́ко мо́лят всегда́ Христа́, спасти́ся душа́м на́шим.

Сти́х: Испове́дят небеса́ чудеса́ Твоя́, Го́споди.

Госпо́дня завеща́ния в души́, я́ко сокро́вище богатотво́рное, ве́рою восприе́мше апо́столи, яви́шася все́м благода́телие, нищету́ отгоня́юще бесо́вскую, и все́х обогаща́юще бога́тством Бо́жиим, к ни́мже вси́ возопии́м: обогати́те и на́с доброде́тельными дея́нии ны́не обнища́вших, мо́лимся.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Воздержа́нием страсте́й огнепа́льныя умертви́вше зра́ки и двиза́ния, Христо́ву прия́ша благода́ть, му́ченицы, неду́ги отгоня́ти боля́щим, и живу́ще, и по кончи́не чудеса́ твори́ти: вои́стинну чу́до пресла́вно, я́ко ко́сти на́ги источа́ют исцеле́ния. Сла́ва Еди́ному Прему́дрому Зижди́телю Бо́гу.

Сла́ва, и ны́не: Богоро́дичен: Предста́тельнице ве́рных, Богороди́тельнице, скорбя́щих ра́досте, и пла́чущих вели́кое утеше́ние, из чре́ва Твоего́, Де́во, всесвята́го, па́че естества́ Ро́ждшагося непреста́нно о на́с со апо́столы святы́ми моли́, изба́вити на́с в ча́с испыта́ния, лю́таго осужде́ния.

По 3-м стихосло́вии седа́льны, гла́с 8:

Подо́бен: Повеле́нное:

Свети́ла яви́стеся све́тлая, Христо́вы самови́дцы, всегда́ всю́ зе́млю просвеща́юще, и тьму́ отгоня́юще многобо́жия, све́том благоче́стия уче́ньми: те́мже мя́ су́ща во тьме́ страсте́й, без стра́ха ходя́ща, просвети́те ва́шими святы́ми моли́твами, богоно́снии апо́столи.

Мре́жею слове́с Боже́ственных, а́ки ры́бы живоловя́ще слове́сныя, те́х приведо́сте, нача́ток Бо́гу на́шему: и Христо́вы ра́ны возлю́бльше, в ни́х облеко́стеся, и подража́телие страсте́й Его́ яви́стеся. Те́мже соше́дшеся по до́лгу почита́ем, апо́столи сла́внии, ва́ше ны́не торжество́, и согла́сно зове́м: моли́теся Христу́ Бо́гу, прегреше́ний оставле́нию дарова́тися, чту́щим любо́вию святу́ю па́мять ва́шу.

Сла́ва, и ны́не: Богоро́дичен: Непостижи́маго Сло́ва Сы́на Бо́жия, несказа́нно па́че ума́ из Тебе́ ро́ждшагося, Богоро́дице, моли́ со апо́столы, умире́ние чи́сто вселе́нней пода́ти, и прегреше́ний дарова́ти на́м пре́жде конца́ проще́ние, и Ца́рствия Небе́снаго, кра́йния ра́ди бла́гости, сподо́бити рабы́ Твоя́.

В четверто́к кано́н святы́м сла́вным и всехва́льным апо́столом. Творе́ние Феофа́ново. Гла́с 8:

Пе́снь 1

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Ли́че апо́стольский светови́дный, Све́ту Вели́кому предстоя́й, мое́ омраче́ное озари́ се́рдце, и ко спаси́тельным стезя́м наста́ви. [Два́жды.]

И́скреннии дру́зи Изба́вителя, страсте́й мя́ любве́ изба́вите, мно́гими лестьми́ жития́ прельще́наго, и неразу́мия но́щию покрыва́емаго.

Ору́жием уя́звленыя лука́ваго исцели́те, стре́лы су́ще си́льнаго, апо́столи Боже́ственнии, ве́рою под кро́в ва́ш прибега́ющия.

Богоро́дичен: По́лный истощава́ется боголе́пно, и от Твоего́ чре́ва Плотоно́сец, Ма́ти Чи́стая, происхо́дит, спаса́яй благоутро́бием прельще́ныя зло́бою зми́евою.

Други́й кано́н свято́му чудотво́рцу Никола́ю. Гла́с 8:

Ирмо́с: Посе́ченый несеко́маго пресече́, и ви́де со́лнце зе́млю, ю́же не ви́де: лю́таго врага́ вода́ потопи́, и непроходи́мое про́йде Изра́иль: пе́снь же воспева́шеся, Го́сподеви пои́м, сла́вно бо просла́вися.

С ли́ки Вы́шних Си́л, Царю́ все́х, блаже́нне, предстоя́й, на́с на земли́ при́сно призыва́ющих тя́, вся́каго искуше́ния зла́го, Нико́лае, спаса́й, разреше́ния прося́ прегреше́ний на́ших.

И́же тобо́ю предста́телем обога́щшиися, Нико́лае, во дни́ же и в нощи́ ве́рою тебе́ взыва́ем: ны́не предвари́ ны вельми́ бе́дствующия бесо́вскими лука́выми наве́ты, и тлетво́рных челове́к: я́ко да тишину́ получи́вше, восхваля́ем тя́.

Кре́пкими жи́лами моли́тв твои́х, Нико́лае, удави́ти на́с тща́щихся коне́чному удавле́нию преда́ждь, избавля́я на́с от те́х лука́ваго наве́та, во хвале́нии зову́щия: Го́сподеви пои́м, сла́вно бо просла́вися.

Богоро́дичен: Зако́нов есте́ственных кроме́, родила́ еси́ Бо́га и Законода́вца, Челове́ка бы́вша. Того́, я́ко Бла́га, моли́, Всенепоро́чная, на́ша беззако́ния презре́ти, вопию́щих всегда́: Го́сподеви пои́м, сла́вно бо просла́вися.

Пе́снь 3

Ирмо́с: Ты́ еси́ Утвержде́ние притека́ющих к Тебе́, Го́споди: Ты́ еси́ Све́т омраче́нных, и пое́т Тя́ ду́х мо́й.

Си́лою препоя́шите, Спа́совы апо́столи, изнемо́гшее страстьми́ и помышле́ньми се́рдце мое́. [Два́жды.]

Еди́но возвеща́юще ученицы́, Трисве́тлое Бо́жие Сия́ние, многобо́жия мглу́ потреби́ша.

Гно́й лука́вый се́рдца моего́ утоли́те, я́ко вра́чеве Боже́ственнаго рукоде́йствия, ученицы́ Бо́га на́шего.

Богоро́дичен: Спаси́ мя, Чи́стая Влады́чице, ро́ждшая па́че естества́ Изба́вителя все́х, и Влады́ку, и Спа́са и Го́спода.

И́н. Ирмо́с то́йже.

Да тя́ почита́ем, да пое́м тя́ всегда́, пода́ждь на́м ру́ку по́мощи, святи́телю Нико́лае.

Успи́, Нико́лае, твои́ми неусыпа́ющими моли́твами, я́же на ны́ востаю́щыя напа́сти, мо́лим тя́.

Всего́ мя страстьми́ напа́ствуема, и искуше́ний лука́вых челове́к, хода́тайством твои́м, свя́те Нико́лае, изба́ви.

Богоро́дичен: Разреше́ние грехо́в, Чи́стая, дарова́ти ми́, моли́ Изба́вителя, и жите́йских лю́тых напа́стей.

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Украси́стеся, сла́внии апо́столи, Боже́ственными све́тлостьми удобря́еми, и заря́ми просвеща́еми ва́с свети́ла показа́вшаго. [Два́жды.]

Бу́ри вся́кия изба́вите мя́, все́х ко́рмчии, Боже́ственнии апо́столи, в пучи́не бе́дствующаго, и напа́стьми жите́йскими коле́блемаго.

Мо́ре смуща́юще многобо́жия, ко́ни богоизбра́ннии, прегреше́ний мои́х бе́здну ва́шими моли́твами потопи́те.

Богоро́дичен: Равноде́йственно Роди́телю Сло́во, из боку́ Твое́ю воплоти́ла еси́, Де́во: те́мже яви́лася еси́ превы́шши все́х тва́рей, Влады́чице.

И́н. Ирмо́с то́йже.

От мно́жества прегреше́ний мои́х, во мно́гия впа́даю безчи́сленныя ско́рби: потщи́ся, свя́те Нико́лае, помощи́ ми, Благода́телю подо́бяся.

Себе́ самого́ пла́чуся погиба́юща, живы́й в ле́ности, моли́твами твои́ми, Нико́лае, к покая́нию руководи́ мя.

И́же три́ ю́ношы избавле́й, о́тче Нико́лае, умре́ти хотя́щия, вся́кия мя́ изба́ви тесноты́, и ве́чнаго осужде́ния.

Богоро́дичен: Де́лати ми́ ра́зумы Небе́сныя, Пречи́стая, укрепи́ мя, и души́ моея́ направля́ющи к живо́тным вхо́дом движе́ния.

Пе́снь 5

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш: ра́зве Тебе́ ино́го не ве́мы.

Стесня́ема мя́ мно́гими прегреше́ньми, к спаси́тельной широте́ испра́вите, я́ко окорми́телие апо́столи. [Два́жды.]

Почита́ющаго мя́ всечестны́й собо́р ва́ш, богови́дцы апо́столи, вся́каго изба́вите безче́стнаго дея́ния, молю́ся.

Я́ко Страсте́м уподо́бльшеся, святи́и, Спа́совым, вся́кое сладостра́стие от души́ моея́ отжени́те, апо́столи.

Богоро́дичен: Боля́щую ду́шу мою́ исцели́, ро́ждшая все́х взе́млющаго неду́ги, Пречи́стая Влады́чице.

И́н. Ирмо́с то́йже.

Укрепи́ на́с моли́твами твои́ми, богоблаже́нне Нико́лае, соблюда́ти повеле́ния Христа́, Еди́наго Бо́га на́шего.

В Ми́рех пожи́в, Нико́лае, благоуха́ния Боже́ственнаго на́с испо́лни, благоче́стно воспева́ющих тя́.

Уще́дри на́с моли́твами твои́ми, святи́телю, Бо́га Всеще́драго умоля́я, Нико́лае, да изба́вимся бе́д и скорбе́й.

Богоро́дичен: Во́д живото́чных испо́лнена су́щи, Отрокови́це, все́х на́с напо́й, благочестному́дренне пою́щия Тя́.

Пе́снь 6

Ирмо́с: Моли́тву пролию́ ко Го́споду, и Тому́ возвещу́ печа́ли моя́: я́ко зо́л душа́ моя́ испо́лнися, и живо́т мо́й а́ду прибли́жися, и молю́ся я́ко Ио́на: от тли́, Бо́же, возведи́ мя.

Сотря́сше моли́тв призыва́нием, низложи́сте хра́мы и́дольския, ученицы́ Христо́вы. Но молю́ся ве́рою: ума́ моего́ сокруши́те и́долы, и покажи́те хра́м Бо́жий мно́гими грехи́ пови́ннаго. [Два́жды.]

И́же на Ка́мени Непоколеби́мем созда́вшеся, я́ко ка́мение, избра́ннии богови́дцы, мое́ се́рдце в песце́ умовре́дно созда́нное спаси́те: стека́ются бо напа́стей ре́ки, и лю́те мя́ обурева́ют.

Любве́ льсти́выя я́же к пло́ти, и ме́рзка мно́гия ра́ди зло́бы я́вльшагося, изба́вите мя́, дру́зи Сло́ва: и к любви́ привяжи́те Возлюби́вшаго гре́шныя, мно́гия ра́ди ми́лости оставле́ния.

Богоро́дичен: Я́ко ши́пок, я́ко чисте́йший кри́н, я́ко благоуха́нное обоня́ние от кра́сных удо́лий мирски́х, Творе́ц избра́в Тя́, Отрокови́це, всели́вся во утро́бу Твою́, и роди́вся, благоуха́ния вся́ческая испо́лнил е́сть.

И́н. Ирмо́с то́йже.

Ра́й се́рдце твое́ яви́ся, Нико́лае, Жи́зни Дре́во посреде́ име́я, Изба́вителя Христа́: Его́же моли́ непреста́нно, Рая́ сотвори́ти жи́тели вся́ ны́, те́плым засту́пником тобо́ю обога́щшияся.

В ле́ности жи́знь мою́ прехожду́, и безбоя́зненно согреша́ю, окая́нный: и та́мо неотрица́емое Суди́ще помышля́я, стра́хом содержи́мь е́смь: уще́дри мя́, Бо́же, Никола́я моли́твами, я́ко Благоутро́бен.

Внеза́пу находя́щую ми́ бу́рю искуше́ний многообра́зных, за мно́жество мои́х согреше́ний, вопию́: не оста́ви мене́, блаже́нне, без заступле́ния, но простри́ ми я́ко ми́лостив по́мощи ру́ку, и спаси́ мя.

Богоро́дичен: Пала́та Высо́каго Царя́, и огнеобра́зный была́ еси́ Престо́л, Де́во, Херуви́м превы́шши, и Серафи́м, па́че ума́ бы́вшая. Те́мже Тя́ вся́кое дыха́ние сла́вит, я́ко Ма́терь Зижди́теля.

Пе́снь 7

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Но́щь мя́ содержи́т ле́ностей, и покрыва́ет мя́ тьма́ грехо́вная: све́т ми́ра, прему́дрии апо́столи, я́вльшеся, озари́ти потщи́теся омраче́нное мое́ се́рдце. [Два́жды]

Друго́е не́бо я́вльшеся, пове́дающе Бо́га на́шего сла́ву, безсла́вия страсте́й изба́вите, богоглаго́ливии, ве́рою прибега́ющия к держа́вному ва́шему покро́ву.

О́гненное у́глие я́вльшеся, апо́столи, возжига́еми огне́м Уте́шителя, вся́ку ве́щь попали́те на́шея зло́бы, и огня́ негаси́маго изба́вите на́с во ве́ки.

Богоро́дичен: Гора́ присе́нная яви́лася еси́ Нерукосе́чная, от Нея́же отсече́ся Ка́мень: те́мже, Влады́чице, умиле́ние души́ мое́й пода́ждь омраче́нней, и окамене́нней го́рькими любосла́стьми.

И́н. Ирмо́с то́йже.

Источи́л еси́ струи́ уче́ний, ересе́й изсуша́я пото́ки, и ве́рных ду́ши напоя́ющий бога́тно, священноде́йственниче Нико́лае: сего́ ра́ди тя́ почита́ем.

Укрепи́лся еси́ си́лою Тро́ическою возмога́емь, куми́ры ле́стныя погуби́ти, те́мже ве́рно молю́ся ти́, о́тче: ума́ моего́ и́долы стра́стныя отжени́.

Ми́рянов, преподо́бне, первопресто́льник бы́в, по сме́рти источа́еши Боже́ственное ми́ро, злосмра́дныя на́ша отгоня́я неду́ги, Нико́лае всеблаже́нне, ве́рно к тебе́ приступа́ющим.

Богоро́дичен: Укроти́ла еси́ тече́ние сме́ртное, Безсме́ртнаго Бо́га ро́ждшая: Его́же моли́, Чи́стая, стра́сти умертви́ти смире́ннаго моего́ телесе́, и жи́зни мя́ сподо́бити.

Пе́снь 8

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Коле́блемую страстьми́ ду́шу мою́ укрепи́те, Це́ркве неразори́мая основа́ния су́ще, и столпи́ непоколеби́мии, ве́рных предгра́дия, ловцы́ су́щих во глубине́ поги́бели, благоути́шная приста́нища ве́рно пою́щих: де́ти благослови́те, свяще́нницы воспо́йте, лю́дие превозноси́те Его́ во ве́ки. [Два́жды.]

И́же во гро́бе те́мнаго отча́яния, и в преиспо́дних паде́ния сласте́й лежа́щаго мя́, ва́шими моли́твами возвести́, умилосе́рдитеся, ученицы́ Спа́совы, и́же Учи́телева благоутро́бия обогати́тися я́ве сподо́бистеся, апо́столи богови́дцы во вся́ ве́ки. [Два́жды.]

Богоро́дичен: Я́ко светла́ в красота́х доброде́тели яви́лася еси́, Всечи́стая, добротвори́тельное Вседе́телево Благоле́пие во утро́бу вмести́ла еси́: Его́же приле́жно моли́, греха́ми страсте́й содержи́мую, и добро́ты дре́вния и́щущую, Чи́стая, зело́ благоле́пнейше ду́шу мою́ просвети́ти во вся́ ве́ки.

И́н. Ирмо́с: Богоглаго́ливии о́троцы в пещи́, со огне́м пла́мень попира́юще, поя́ху: благослови́те дела́ Госпо́дня Го́спода.

Просвеще́н сы́й, богому́дре святи́телю, светоза́рными луча́ми Трисо́лнечнаго Божества́, страсте́й мои́х тьму́ моли́твами твои́ми разори́, Нико́лае.

И́же воево́ды три́ избавле́й от сме́рти, прише́ствием стра́шным твои́м, священнотаи́нниче Нико́лае, от вся́каго смертоно́снаго вре́да и на́с изба́ви.

Коле́блющияся бесо́вскими искуше́нии, и от оби́дящих челове́к, твои́ми моли́твами утверди́ на́с, и невре́дны спаси́, всеблаже́нне Нико́лае.

Богоро́дичен: Мольбу́ принеси́ Го́сподеви, уще́дрити и спасти́ ве́рою к Тебе́ притека́ющия, Пресвята́я Де́во, челове́ком Помо́щнице.

Та́же, пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́ Богоро́дицу а́нгелов и челове́к чинонача́лия велича́ют.

Льво́в душетле́нных си́лою Бо́жиею сокруши́вше че́люсти, апо́столи, я́ко от Христа́ кня́зи поста́влени бы́сте на земли́, псало́мски ду́ху сию́ покаря́юще благоче́стно: те́мже безчи́нная двиза́ния моего́ се́рдца зако́ном Боже́ственным покори́те.

Кра́снаго па́че все́х сыно́в челове́ческих, я́вльшагося в ми́ре пропове́давше, Сло́ва Бо́жия, но́зе украси́сте я́ко благовеству́ющии всему́дрии, ми́р же и живо́т. Те́мже смуща́емую страстьми́ ду́шу мою́ ва́шими моли́твами умири́те.

Умертви́вше у́ды я́же на земли́, в живо́т вся́ческий облеко́стеся, страстьми́ Стра́сть изобразу́юще Честну́ю. Те́мже умерщвле́ннаго мя́ стрело́ю зло́бы лука́ваго, оживи́те лечьба́ми и́стиннаго покая́ния, богоблаже́ннии апо́столи.

Богоро́дичен: Неду́гующую ду́шу мою́ стра́стию лю́тою, Ро́ждшая Бо́га Преблага́го, я́ко Ми́лостива исцели́, и изба́ви мя́ при́сно, Пречи́стая, подстрека́ющих и находя́щих ми́ враго́в, я́ко да спаса́емь усе́рдно Тя́ велича́ю, возвели́чившую ро́д на́ш.

И́н. Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Я́ко изба́витель в ско́рби ве́рою тя́ моля́щим, изба́ви мя́ зло́бы вся́кия, Нико́лае, Блага́го моля́ Бо́га и Го́спода.

Сы́й с Небе́сными ны́не ликостоя́ньми, святе́йший о́тче Нико́лае, Блага́го умоли́ Бо́га, спасти́ на́с.

Су́д при две́рех, блюди́ душе́ моя́, и Судии́ Бо́гу возопи́й: Никола́я моли́твами спаси́ мя, Го́споди.

Богоро́дичен: Све́та су́щи прия́телище, Де́во, просвети́ омраче́нную страстьми́ ду́шу мою́: я́ко да ве́рою и любо́вию при́сно сла́влю Тя́.

Та́же, Досто́йно е́сть: И ектения́, и свети́лен, и псалмы́ обы́чныя.

На стихо́вне стихи́ры апо́стольския, гла́с 8:

Го́споди, Тебе́ усе́рдно на земли́ апо́столи возлюби́вше, уме́ты вся́ вмени́ша, да Тебе́ еди́наго приобря́щут: и за Тя́ на ра́ны телеса́ своя́ преда́ша. Сего́ ра́ди просла́вльшеся, мо́лятся о душа́х на́ших.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Го́споди, Ты́ апо́стольскую па́мять на земли́ возвели́чил еси́: вси́ бо в не́й вку́пе соше́дшеся славосло́вим Тя́: я́ко подае́ши на́м те́ми исцеле́ния, и всему́ ми́ру ми́р моли́твами и́х, и ве́лию ми́лость.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Во броня́ ве́ры обо́лкшеся до́бре, и ору́жием Кре́стным вооружи́вше себе́, во́ини кре́пцы яви́стеся, мучи́телем му́жески проти́вистеся, и диа́волю пре́лесть низложи́сте, победи́телие бы́вше, венце́в сподо́бистеся. Моли́те при́сно о на́с, спасти́ся душа́м на́шим.

Сла́ва, и ны́не: Богоро́дичен: Исхити́ мя, Влады́чице, руки́ зми́я человекоуби́йцы, хотя́ща мя́ лука́вством поглоти́ти до конца́. Сокруши́ че́люсти его́, молю́ Тя, и ко́зни разори́: я́ко да избы́в от ногте́й его́, велича́ю заступле́ние Твое́.

Та́же, Бла́го е́сть: И Трисвято́е по О́тче на́ш: тропа́рь, и ектения́, и ча́с 1-й, псалмы́ обы́чныя, и про́чее: и отпу́ст.

Помяни́ на́с, Христе́ Спа́се ми́ра, я́коже разбо́йника помяну́л еси́ на Дре́ве: и сподо́би все́х Еди́не Ще́дре, Небе́сному Ца́рствию Твоему́.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Трубы́ я́вльшеся, Христо́вы апо́столи, су́щия во гробе́х злове́рия лежа́щия воздви́гнули есте́, и Боже́ственныя жи́зни прича́стники соде́ласте.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Се́менем та́йным Сло́ва, богоглаго́ливии, все́х язы́к сердца́ непло́дная плодоно́сна соде́ласте Боже́ственнаго ра́зума: те́мже досто́йно блажи́ми есте́.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Вся́кия себе́ обнажи́вше зло́бы, посреде́ лю́тых проидо́ша до́блественно, и с Небесе́ в ри́зу спасе́ния страда́льцы оде́яшася.

Сла́ва: Умертви́ злотво́рных страсте́й воста́ния души́ моея́ окая́нныя, Честна́я Тро́ице Всесвята́я, моли́твами Боже́ственных апо́стол Твои́х, я́ко да спаса́емь сла́влю Тя́.

И ны́не: Ра́дуйся, Клеще́ У́гля Боже́ственнаго: ра́дуйся, проро́ков печа́ть, и апо́столов оглаше́ние, Пречи́стая Богоро́дице, Ея́же ра́ди от истле́ния свободи́хомся.

на Го́споди, воззва́х, стихи́ры кре́стны. Гла́с 8. Подо́бен:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

О пресла́внаго чудесе́! Живоно́сный са́д, Кре́ст Пресвяты́й, на высоту́ возноси́м явля́ется дне́сь: славосло́вят вси́ концы́ земни́и, устраша́ются де́монския полки́. О каковы́й да́р земны́м дарова́ся! И́мже, Христе́, спаси́ ду́ши на́ша, я́ко Еди́н Благоутро́бен.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

О пресла́внаго чудесе́! Я́ко гро́зд испо́лнен живота́, понесы́й Вы́шняго, от земли́ воздвиза́емь Кре́ст ви́дится дне́сь: и́мже вси́ к Бо́гу привлеко́хомся, и поже́рта бы́сть до конца́ сме́рть. О Дре́во Пречестно́е! И́мже восприя́хом во Еде́ме безсме́ртную пи́щу, Христа́ сла́вяще.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

О мно́гия Твоея́ бла́гости, я́же к на́м, Иису́се Бла́же! Ка́ко Себе́ смири́л еси́, и бы́л еси́ Челове́к, и пострада́ти изво́лил еси́, Кре́ст и сме́рть поно́сную, за непотре́бныя рабы́ претерпе́в? Кото́рый Ти́ досто́йный да́р принесе́м богоподо́бный? То́чию сла́вим Тя́ благодаря́ще, ве́рнии.

Та́же, Мине́и стихи́ры свято́му, а́ще и́мать. А́ще не́сть Мине́и, и́ны стихи́ры Пресвяте́й Богоро́дице, гла́с 8.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

О неизрече́нныя бла́гости вопло́щшагося из тебе́, Богоро́дице Всепе́тая! Кре́ст бо и сме́рть я́ко Человеколю́бец претерпе́в, да ми́р спасе́т, его́же созда́. Того́ моли́ и мене́ окая́ннаго и многоболе́зненнаго да изба́вит му́ки: и иде́же Све́т сия́ет Невече́рний, всели́т мя́.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Что́ зри́мое виде́ние, е́же Мои́ма очи́ма ви́дится, о Влады́ко, содержа́й всю́ тва́рь, на Дре́во воздви́жен бы́в, и умира́еши все́м дая́й жи́знь? Богоро́дица пла́чущися глаго́лаше, егда́ узре́ на Кресте́ возноси́ма из Нея́ неизрече́нно возсия́вшаго Бо́га и Челове́ка.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Ста́до е́же стяжа́, Пречи́стая, Сы́н Тво́й и Бо́г, окропи́вый Кро́вию, от бе́д изба́ви честны́ми моли́твами Твои́ми, ви́димыя и неви́димыя враги́ я́коже зве́ри отгоня́щи: и те́х ли́ца безче́стия испо́лни, я́коже Дави́д дре́вле провозгласи́ песнопе́вец, Чи́стая.

Сла́ва, и ны́не: Крестобогоро́дичен: Тя́ ви́дящи пригвожда́ема на Кресте́, Иису́се, и стра́сти прие́млюща во́лею, Де́ва и Ма́ти Твоя́, Влады́ко, увы́ мне́, вопия́ше, Ча́до сла́дкое, ра́ны непра́ведно ка́ко терпи́ши, Врачу́ исцели́вый челове́ческое неможе́ние, и от тли́ все́х изба́вивый милосе́рдием Твои́м?

Та́же, Све́те ти́хий: Проки́мен дне́: и Сподо́би, Го́споди, в ве́чер се́й:

На стихо́вне стихи́ры кре́стны, гла́с 8:

Возне́слся еси́ на Кре́ст, Христе́ Бо́же, и спа́сл еси́ челове́ческий ро́д: сла́вим страда́ния Твоя́.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Пригвозди́лся еси́ на Кресте́, Христе́ Бо́же, и отве́рзл еси́ ра́йския две́ри: те́мже сла́вим Божество́ Твое́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Му́ченицы Госпо́дни, вся́ко ме́сто освяща́ете, и вся́к неду́г уврачу́ете. И ны́не моли́теся, изба́витися от се́тей вра́жиих душа́м на́шим, мо́лим ва́с.

Сла́ва, и ны́не: Крестобогоро́дичен: Ю́ница Нескве́рная, Юнца́ ви́дящи на Дре́ве пригвожда́ема во́лею, рыда́ющи жа́лостне, увы́ Мне́, вопия́ше, люби́мейшее Ча́до! Что́ Тебе́ со́нм воздаде́ безблагода́тный евре́йский, хотя́ Мя обезча́дствовати от Тебе́, Вселюбе́зне?

Та́же, Ны́не отпуща́еши: Трисвято́е по О́тче на́ш: тропа́рь, и отпу́ст.

Кано́н Пресвяте́й Богоро́дице. Гла́с 8:

Пе́снь 1

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припе́в: Пресвята́я Богоро́дице, спаси́ на́с.

Ми́лостива мне́ Христа́ соде́лай, Де́во Пренепоро́чная, в де́нь при́ стра́шнаго осужде́ния изъима́ющи.

Одожди́ ми, Влады́чице, молю́ся, ка́пли умиле́ния, су́щую ми́ скве́рну отмыва́ющи, я́ко да сла́влю Тя́.

Сла́ва: Просвети́ мя, Де́во, Я́же Све́т Незаходи́мый ро́ждшая, моея́ ле́ности глубо́кую тьму́ отгоня́ющи.

И ны́не: Спаси́ мя, Богоро́дице, во мно́гих гресе́х поги́бшаго, и му́ки вся́кия, и лю́таго осужде́ния изба́ви.

Пе́снь 3

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Свяще́ннаго жития́ отпа́д, Пречи́стая, приложи́хся ското́м, и осужде́н ве́сь бы́х: но Ты́, Я́же Судию́ ро́ждшая, от вся́каго осужде́ния изба́ви мя́ и спаси́.

К Тебе́ прибега́ю, Влады́чице, всегда́ мно́жеством напа́стей обстои́ма, уще́дривши спаси́ мя, Я́же Спа́са ро́ждшая вся́ческих и Го́спода, Еди́на Препе́тая.

Сла́ва: Непроходи́мая Две́ре, Я́же к Бо́гу приводя́щи, Отрокови́це, две́ри покая́ния ми́ отве́рзи молю́ся, очи́стивши грехо́в мои́х скве́рну, ту́чами ми́лости Твоея́, Богоблагода́тная.

И ны́не: Изба́ви мя́ страсте́й наведе́ния, Влады́чице, и борю́щияся враги́ моя́ ны́не победи́: утверди́ мя на ка́мени Бо́жиих хоте́ний, и ду́шу мою́ просвети́, Две́ре Боже́ственнаго Све́та.

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Души́ моея́ я́звы исцели́, Богоблагода́тная Де́во; у́м мо́й просвети́, Чи́стая, омраче́нный стра́стными нахо́ды.

Уны́нием спя́щаго, и грехо́м покрове́ннаго, к покая́нию мя́, Пречи́стая, призови́, я́ко Ма́ти Сло́ва.

Сла́ва: Неискусобра́чная Влады́чице, Я́же воплоще́нное Сло́во ро́ждшая, ду́шу мою́ просвети́, и от гее́нны изба́ви и муче́ния.

И ны́не: На Тя́ наде́жду мою́ возложи́х всю́, Ма́ти Де́во: ду́шу мою́ соблюди́, Я́же Бо́га ро́ждши Спа́са моего́.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви молю́ся.

Души́ моея́ стра́сти всенеисце́льныя, Отрокови́це, исцели́, и уга́сший ле́ностию свети́льник мо́й возжзи́, и к покая́ния путе́м наста́ви, Де́во, да ве́рою и любо́вию тя́ сла́влю.

Себе́ осужда́ю пре́жде испыта́ния, Богора́дованная, сту́дная дела́ ношу́ еди́н осужде́нный: но предста́ни ми́ я́ко Предста́тельница су́щи все́м, и лю́таго осужде́ния изба́ви мя́.

Сла́ва: Избавля́ющи мя́ от плене́ния, и одержа́щия душетле́нныя молвы́, и страсте́й лю́тых умерщвля́ющих мя́, не преста́й, Пресвята́я Отрокови́це, гре́шником Засту́пнице, челове́ком гото́вая Помо́щнице.

И ны́не: Умерщвле́на мя́ всего́ жа́лом сме́ртным от преступле́ния оживи́, Пречи́стая, Я́же Жи́знь заче́ншая ми́рови Изба́вителя и Царя́, и к све́ту наста́ви мя́.

Пе́снь 6

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Умерщвле́на мя́ мно́гими преступле́ньми, Пречи́стая Де́во, оживи́, Я́же Жи́знь челове́ком неизрече́нно ро́ждшая, Богоро́дице, и твори́ти ми́ во́лю Госпо́дню наста́ви.

Тя́ Предста́тельницу и Сте́ну ве́рнии вси́ стяжа́хом, и́же во глубине́ зо́л, и мо́лв, и печа́лей потопля́емии при́сно, Богоро́дице, еди́на ве́рным прибе́жище.

Сла́ва: Увяди́вшая сады́ безбо́жия, Пренепоро́чная, Твои́м Святы́м Прозябе́нием, расту́щую во мне́ при́сно вра́жию зло́бу потреби́, Пречи́стая.

И ны́не: Освяти́ мо́й у́м, и просвети́ се́рдце мое́, Свята́я Ма́ти Бо́жия, и одержа́щих мя́ зо́л измени́: да Тя́ сла́влю тве́рдую Засту́пницу мою́.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 8:

О чудесе́ но́ваго! О стра́шнаго та́инства! Взыва́ше А́гница, Сы́на зря́щи на Дре́ве Кре́стнем просте́рта: что́ се́, Сло́ве Бо́жий Безсме́ртный? Ка́ко ме́ртв зри́шися, и зе́млю коле́блеши я́ко Всеси́лен? Но воспева́ю Твое́ стра́шное и Боже́ственное схожде́ние.

Пе́снь 7

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же во ве́ки.

Ми́лостива бу́ди ми́, Де́во, и ура́нена мя́ ору́жием греха́, пла́стырем исцели́ Твоея́ моли́твы: и огня́ негаси́маго исхити́ мя во ве́ки.

Изба́ви мя́, Ма́ти Спа́сова, одержа́щаго лю́таго плене́ния, помышле́ний лука́вых, и одержа́ний прегреше́ния, я́ко да при́сно спаса́емь, по до́лгу Тя́ сла́влю.

Сла́ва: Ны́не к Тебе́ прибега́ю, Богома́ти, прегреше́ний плени́цами стя́гнут: за милосе́рдие ми́лости разреши́ мя, Де́во, и от бесо́в изба́ви муче́ния и зло́бы.

И ны́не: Уще́дри и спаси́ мя, Де́во, Я́же Ще́драго ро́ждши Бо́жия Сло́ва: и све́том, и́же в Тебе́, озари́ ду́шу мою́, и от бесо́в изба́ви мя́ лю́таго кова́рства.

Пе́снь 8

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

И́же по всему́ соверше́н, и естество́м непристу́пен, яви́ся прикоснове́н мне́, пло́тию обложе́н из Тебе́, Неискусобра́чная: Его́же приле́жно моли́, беззако́ний мои́х бре́мя облегчи́ти, и суда́ бу́дущаго изба́вити мя́.

Я́же Судию́ и Го́спода ро́ждши па́че сло́ва, Сего́ я́ко Сы́на Твоего́, Пресвята́я, умоли́: в Ча́с Суда́ осужде́ния, и огня́, и тьмы́ несвети́мыя, и скре́жета зубна́го изба́вити мя́, ве́рою благоче́стно пою́щаго Тя́ всегда́.

Сла́ва: Богороди́тельнице Пречи́стая, души́ моея́ я́звы, и грехо́вныя собла́зны очи́сти, исто́чником отмыва́ющи, и́же из ре́бр Рождества́ Твоего́, и и́же от ни́х поте́кшими струя́ми: к Тебе́ бо взыва́ю, и к Тебе́ прибега́ю, и Тебе́ молю́ Богоблагода́тную.

И ны́не: Умерщвле́нную ду́шу мою́ угрызе́нием змии́ным, еди́на я́ве Живо́т ро́ждшая, Пренепоро́чная, оживи́: и на́с ра́ди, Де́во, Рожде́ннаго, де́йствовати поспеши́ хоте́ния, вопию́щу: о́троцы благослови́те, свяще́нницы воспо́йте, лю́дие превозноси́те Его́ во ве́ки.

Пе́снь 9

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́ Богоро́дицу а́нгелов и челове́к чинонача́лия велича́ют.

Просвети́, Две́ре Све́та, ослепле́нную ду́шу мою́ страстьми́, и лука́выми по́мыслы очерне́вшую, и бе́дствующую: и изба́ви мя́ напа́стей, и от бесо́в озлобле́ния и истяза́ния лю́таго, и бу́дущаго пла́мене и му́ки.

Пощади́ мя, Спа́се, рожде́йся от Де́вы, и сохрани́вый Ро́ждшую Тя́ нетле́нну и по Рождестве́: егда́ ся́деши суди́ти дело́м мои́м, беззако́ния и грехи́ моя́ пре́зри, я́ко Безгре́шен, и я́ко Бо́г Ми́лостив и Человеколю́бец.

Сла́ва: Нося́щи Небе́сный О́гнь рука́ма я́ко клеща́ми, Богоблагода́тная, ду́ши моея́ стра́сти попали́, Чи́стая, и стра́шнаго осужде́ния и огня́, и томле́ния лю́таго бесо́вскаго свободи́ мя.

И ны́не: Осия́нием Твои́м мы́сленным просвети́ на́ша помышле́ния, и сердца́ и ра́зумы, Отрокови́це Богоблагода́тная, я́ко да стезя́ми живо́тными пра́ве ходя́ще, ми́лость получи́м, возвеща́юще при́сно хвалы́ Твоя́.

Та́же, Досто́йно е́сть: Трисвято́е по О́тче на́ш: тропа́рь, и про́чее обы́чно, и отпу́ст.

По 1-м стихосло́вии седа́льны кре́стны, гла́с 8:

Ви́дя разбо́йник Нача́льника жи́зни на Кресте́ ви́сяща, глаго́лаше: а́ще не бы́ Бо́г бы́л вопло́щься, И́же с на́ми распны́йся, не бы со́лнце лучи́ своя́ потаи́ло, ниже́ бы земля́ трепе́щущи трясла́ся. Но вся́ терпя́й, помяни́ мя, Го́споди, во Ца́рствии Твое́м.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Посреде́ двою́ разбо́йнику ме́рило пра́ведное обре́теся Кре́ст Тво́й, о́вому у́бо низводи́му во а́д тягото́ю хуле́ния, друго́му же легча́щуся от прегреше́ний к позна́нию богосло́вия: Христе́ Бо́же, сла́ва Тебе́.

Сла́ва, и ны́не: Крестобогоро́дичен: Сы́на Твоего́, Де́во, и Бо́га Кресто́м сохраня́еми при́сно, бесо́вския прило́ги отгоня́ем и ко́зни: су́щую Тя́ Богоро́дицу вои́стинну воспева́юще, и любо́вию вси́ ро́ди блажи́м, Пречи́стая, я́коже прорекла́ еси́: те́мже на́м согреше́ний оставле́ние моли́твами Твои́ми да́руй.

По 2-м стихосло́вии седа́льны кре́стны, гла́с 8:

Посреде́ Еде́ма дре́во процвете́ сме́рть, посреде́ же всея́ земли́ Дре́во прозябе́ живо́т; вкуси́вше бо пе́рвое нетле́ннии су́ще, тле́нни бы́хом; получи́вше же второ́е, нетле́ния напита́хомся: Кресто́м бо спаса́еши я́ко Бо́г ро́д челове́ческий.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

В Раи́ мя́ у́бо пре́жде дре́во обнажи́, вкуше́нием вра́г внося́ умерщвле́ние: Кре́стное же Дре́во живота́ ве́чнаго одея́ние челове́ком нося́, водрузи́ся на земли́, и ми́р ве́сь испо́лнися вся́кия ра́дости: его́же зря́ще возноси́ма, Бо́гу ве́рою лю́дие согла́сно возопии́м: испо́лнь сла́вы до́м Тво́й.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Све́том Небе́сным просвеща́ется дне́сь се́й хра́м: в не́м бо во́инства а́нгельская ра́дуются, с ни́миже и челове́честии ли́цы веселя́тся, в па́мять страстоте́рпец. Те́х мольба́ми низпосли́, Христе́, ми́ру Твоему́ ми́р, и ве́лию ми́лость.

Сла́ва, и ны́не: Крестобогоро́дичен: И́же от крове́й Твои́х чи́стых вопло́щшагося, и па́че ума́ от Тебе́, Чи́стая, роди́вшагося, на Дре́ве ви́сяща посреде́ злоде́ев зря́щи, утро́бою боля́ше, и ма́терски пла́чущи вопия́ше: увы́ Мне́, Ча́до Мое́! Что́ Боже́ственное и неизрече́нное смотре́ние Твое́, и́мже оживи́л еси́ созда́ние Твое́? Воспева́ю Твое́ благоутро́бие.

По 3-м стихосло́вии седа́лен, гла́с 8:

Подо́бен: Повеле́нное:

Твои́м Кресто́м, Христе́ Спа́се, и сме́ртию, мучи́тельство вра́жие низложи́ся, и сме́рть умертви́ся, и ме́ртвыя я́же име́яше а́д от ве́ка в себе́ свя́занныя, внеза́пу отпусти́ пле́нники вся́, воспева́ющия держа́ву Твою́, и стра́шное Твое́, Бла́же, и Боже́ственное схожде́ние, и́мже все́х спа́сл еси́.

Обоже́ния ло́жнаго упова́ния родонача́льник тле́ния, я́же от него́ все́м вино́вен яви́ся. Ты́ же Кресто́м Твои́м жи́знь источа́еши я́ко Преблаги́й: во́лею бо пригвожде́н бы́л еси́, да от пе́рваго разреши́ши осужде́ния. Те́мже воспева́ем Твою́, Христе́, во́льную стра́сть.

Сла́ва, и ны́не: Крестобогоро́дичен: Нескве́рная А́гница, А́гнца и Па́стыря ви́сяща на Кресте́ зря́щи, вопия́ше: Ча́до Мое́, что́ стра́нное у́бо и ненаде́жное сие́ зре́ние? Ка́ко Жи́знь все́х сме́ртию осужда́ется земны́м подо́бне? Но воскресни́ тридне́вно из ме́ртвых, Сло́ве, я́коже ре́кл еси́: да ра́дующися сла́влю Тя́.

Кано́н Честно́му и Животворя́щему Кресту́. Творе́ние Ио́сифово. Гла́с 8:

Пе́снь 1

Ирмо́с: Кре́ст начерта́в Моисе́й впря́мо жезло́м Чермно́е пресече́, Изра́илю пешеходя́щу, то́же обра́тно фарао́новым колесни́цам уда́рив совокупи́, вопреки́ написа́в непобеди́мое ору́жие. Те́м Христу́ пои́м Бо́гу на́шему, я́ко просла́вися.

Дла́ни Боже́ственныя на Кресте́, Иису́се, распросте́р, к Себе́ собра́л еси́ руку́ Твое́ю созда́ние: и от ру́ки лука́ваго все́х свободи́л еси́, и покори́л еси́ и́ руко́ю держа́вною, Царю́ все́х. Те́мже ве́рнии пои́м вели́честву Твоему́, я́ко просла́вися.

Вре́дно бы́сть во Еде́ме дре́ва го́рькое вкуше́ние, сме́рть вве́дшее: Христо́с же умертви́вся на Дре́ве, все́м живо́т источи́, и уби́в зми́я Боже́ственною си́лою. Те́мже тому́ пои́м Бо́гу на́шему, я́ко просла́вися.

Му́ченичен: Хра́брствовавше, Иису́се, му́ченик мно́жество, Кресто́м же и Стра́стию Твое́ю на стра́сти проти́ву воста́ша, и пред враги́ Тя́ Ца́рствующаго тва́рию испове́даша: терпе́ша же муче́ния и беды́ безме́рныя. Те́мже Твою́ улучи́ша сла́ву вси́, Сла́вы Го́спода.

Му́ченичен: Кропле́нием богоде́тельныя честны́я Твоея́ Кро́ве, му́ченицы Твои́, Го́споди, избавле́ние обре́тше, кро́ви своя́ вои́стинну излия́ша, непра́ведно му́чими бы́ша же́ртвы приноси́ти скве́рным бесо́м душетле́нным. Те́мже честна́я заколе́ния Тебе́ принесо́ша, Царю́ все́х.

Богоро́дичен: Я́ко ви́де Тя́ на Кресте́ пригвожда́ема, вся́ ви́дящаго, Непоро́чная рыда́ющи глаго́лаше: что́ сие́, Ча́до Мое́? Что́ Ти́ возда́ша насла́ждшиися мно́гих Твои́х дарова́ний? Ка́ко претерплю́ боле́зни? Сла́ва Твоему́ благоутро́бию, и смотре́нию стра́шному, Долготерпели́ве.

Други́й кано́н Пресвяте́й Богоро́дице. Гла́с 8:

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Омраче́нную сластьми́ жития́ ду́шу мою́, Богома́ти, и мирски́ми печа́льми безвре́менно смуща́ему, просвеще́нием Твои́м просвети́.

Отверзо́шася две́ри Небе́сныя Боже́ственным Твои́м Рождество́м, Богома́ти: в ни́хже вхо́д да́ждь души́ мое́й я́ко Ми́лостива, и к те́м наста́ви мя́.

Устреле́ную стрело́ю лука́ваго, и ко́зньми о́наго, и кова́рствы уязвле́ную ду́шу мою́, Де́во, ми́лостию Твое́ю исцели́.

Я́же ненаде́ющихся наде́жда, па́дших исправле́ние, Све́т Боже́ственный ро́ждшая, ду́шу мою́ су́щую во тьме́ просвети́.

Пе́снь 3

Ирмо́с: Же́зл во о́браз та́йны прие́млется, прозябе́нием бо предразсужда́ет свяще́нника, неплодя́щей же пре́жде Це́ркви, ны́не процвете́ Дре́во Креста́ в держа́ву и утвержде́ние.

В че́рную у́тварь измени́ся со́лнце, зря́ на Дре́ве Тебе́ непра́ведно воздви́жена: и распаде́ся ка́мение, и земля́ вся́ стра́хом тряса́шеся, Еди́не Спа́се, все́х Избавле́ние.

Распросте́р ру́це Моисе́й, вообража́ше Кре́ст Честны́й: Его́же мы́ ны́не вообража́юще благому́дренне, полки́ иноплеме́нныя вся́ бесо́вския побежда́ем, вре́да вся́каго те́х кроме́ пребыва́юще.

Му́ченичен: Стра́сти терпя́ще страстоте́рпцы, стра́сть образова́ху, многообра́зным страсте́м причасти́шася, во́лею Страда́вшаго, и стра́сти Умертви́вшаго, и живо́т ми́ру Возсия́вшаго.

Му́ченичен: Невозвра́тно муче́ния пу́ть ше́ствовавше, преткнове́ния пре́лести от серде́ц низложи́ша благосла́внии страстоно́сцы, и устреми́шася ко упокое́нию Боже́ственному веселя́щеся.

Богоро́дичен: Зако́нных кроме́ обы́чаев челове́ческих, Тебе́, Ча́до, роди́х, Богоро́дица пла́чущи веща́ше: и ка́ко беззако́ннии воздвиго́ша Тя́ на Дре́во, посреде́ беззако́нных, Еди́наго зако́н жи́зни положи́вшаго?

И́н. Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Воздыха́ния немо́лчная, и приле́жныя сле́зы, и сокруше́нно се́рдце да́ждь ми́, Де́во, да пла́чуся соде́янных мно́ю, и совозраста́ющия моя́ стра́сти потреби́, Еди́на Всепе́тая.

Дрема́ньми отягче́нную грехо́вными, и ко а́дове утро́бе низпопо́лзшуюся ду́шу мою́ исхити́, Влады́чице, и помышле́ние покая́ния и́стиннаго пода́ждь ми́, Богоблаже́нная.

Умиле́ния любо́вь, и доброде́телей да́руй, Всенепоро́чная, погруже́нней души́ мое́й прегреше́ньми, и Небе́сное житие́ возлюби́ти, и Бо́жие жела́ние име́ти.

На Тя́ упова́ние возлага́ю, Ма́ти Бо́жия, и отча́яния вско́ре изба́влюся: ве́м бо, ве́м Твоего́ благоутро́бия бога́тство, и кре́пость све́дый дерзнове́ния Твоего́.

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Я́ко ке́др благоче́стие, ве́ру я́ко кипари́с, любо́вь же я́ко пе́вк нося́ще, Кресту́ Боже́ственному поклони́мся.

Кресто́м Твои́м, Спа́се, Ра́й отве́рзеся, и осужде́нный челове́к па́ки вни́де во́нь, Твою́ велича́я благосты́ню.

Умерщвле́ныя оживи́л еси́, Спа́се, челове́ки, ме́ртв бы́в, и зми́я умертви́л еси́ гре́х вве́дшаго.

Му́ченичен: Страсте́м бы́вше сообра́зни Христо́вым, Боже́ственнии му́ченицы, прича́стницы же и све́тлости Небе́сныя яви́шася.

Му́ченичен: Украси́стеся, му́ченицы, Сло́ву кра́сному соедини́вшеся: и све́тло просвети́стеся, Со́лнце Пра́ведное возлюби́вше.

Богоро́дичен: Но́во Отроча́ родила́ еси́, пре́жде ве́к су́ща Соверше́ннаго, Отрокови́це Всенепоро́чная, и Кресто́м соверша́юща вся́ческая, и бла́гостию.

И́н. Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Я́же Бо́га Сло́ва неизрече́нно ро́ждшая, души́ моея́ стру́пы обяжи́, де́йственным бы́лием, Кро́вь Сы́на Твоего́ честну́ю возлия́вши, разруши́вшаго а́дово душетле́нное чре́во, и источи́вшаго ми́ру Воскресе́ние.

Неве́сто Бо́жия, прегреше́ний очище́ние души́ мое́й струи́ низпосли́, и лука́вая отмы́й помышле́ния, чи́сте бы́ти то́й сподо́би: к Твоему́ бо хода́тайству, и Твое́й по́мощи, Богоро́дице Де́во, прибего́х.

К Твоему́ ны́не прибега́ю заступле́нию, Пречи́стая, предвари́ мя изба́вити лю́тыя бу́ри вра́жия, и смуща́ющих пото́ков беззако́ния: к Твоему́ же приста́нищу, и к Твое́й тишине́ неукло́нно, Богома́ти, наста́ви мя́.

Вра́г грехо́вными стрела́ми ду́шу мою́ всю́ уязви́, и оскверни́ сластьми́ мое́ се́рдце, и отврати́ от пути́ пра́ваго. Сего́ ра́ди вопию́ Ти: обрати́вши исцели́ мя, и спаси́.

Пе́снь 5

Ирмо́с: О треблаже́нное Дре́во! На не́мже распя́ся Христо́с, Ца́рь и Госпо́дь; и́мже паде́ дре́вом прельсти́вый, тобо́ю прельсти́вся, Бо́гу пригвозди́вшуся Пло́тию, подаю́щему ми́р душа́м на́шим.

Оде́ждею нетле́ния, обнаже́ныя ны́ облещи́ возжеле́в, совле́клся еси́, и на Кресте́ распя́тся, обнажи́л еси́ вра́жия, Христе́, кова́рства: сего́ ра́ди Твоя́ страда́ния сла́вим.

Кро́вь из ре́бр исте́кшая спаси́тельная я́ве, ми́р очи́стила е́сть, ка́пищныя же кро́ви разруши́, и истле́вшия плодо́м разу́мным обнови́, и источи́ нетле́ние душа́м на́шим.

Му́ченичен: Просвеще́ни добро́тою многови́дных ра́н, му́ченицы сла́внии, Боже́ственною же кро́вию зна́менавшеся, возбраня́ющее пре́жде ору́жие проидо́ша я́ве, и всели́шася ра́дующеся в Ра́й.

Му́ченичен: Я́ко ди́вен Ты́ еси́ во святы́х, Христе́, ве́рою Тебе́ возлюби́вших: от Тебе́ бо обогати́вшеся Боже́ственныя исцеле́ний ре́ки ми́рови источа́ют, и изсуша́ют излия́ние страсте́й на́ших.

Богоро́дичен: Неду́говавшия грехо́м ны́ исцели́ла еси́, Де́во, ро́ждши Спа́са и Врача́ все́х, на Дре́ве Кре́стнем пригвожде́ннаго, Пречи́стая, и источи́вша спасе́ние душа́м на́шим.

И́н. Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Со все́м усе́рдием тщу́ся к Твоему́, Всенепоро́чная, заступле́нию и душе́вное о́ко возвожду́: не отврати́ мене́, но заступи́ мя я́ко Блага́я, и изба́ви мя́, и прегреше́ний мои́х скве́рну отмы́й.

Я́д смертоно́сен грехо́вными зубы́ вложи́ся: но того́ погуби́ гвоздьми́ и копие́м Боже́ственным Рождества́ Твоего́, за милосе́рдие на́с ра́ди пло́тию пострада́вшаго, Еди́на Всепе́тая.

Умерщвле́нна мя́ нра́вом, и истле́вшаго прегреше́ньми, оживи́, Ро́ждшая Живо́т ве́чный, и обновле́нием духо́вным, к нетле́нию претвори́ мя, Богоблаже́нная.

Лука́вства бесо́вскаго, и зло́бы челове́ческия изба́ви мя́, Влады́чице, и душе́вную боле́знь, и теле́сную вско́ре исцели́, ро́ждшая еди́на вся́кия пло́ти и согреше́ний Врача́, Спа́са и Го́спода.

Пе́снь 6

Ирмо́с: Во́днаго зве́ря во утро́бе дла́ни Ио́на крестови́дно распросте́р, спаси́тельную Стра́сть прообража́ше я́ве: те́м тридне́вен изше́д, преми́рное Воскресе́ние прописа́ше, пло́тию пригвожде́наго Христа́ Бо́га, и тридне́вным Воскресе́нием ми́р просве́щшаго.

Кре́ст водрузи́ся на Ме́сте Ло́бнем посреде́ земли́, и посреде́ Рая́ прозя́бшую дре́вом я́зву исцели́: Месси́я бо Иису́с посреде́ беззако́нных разбо́йник, еди́н Пра́ведный яви́ся, с Собо́ю совоздви́же вся́, и с высоты́ па́дшаго в пропа́сть вве́рже.

Лу́к, Христе́, напря́г Боже́ственный, всечестны́й Тво́й Кре́ст, испусти́л еси́ стре́лы на уби́йцу; гво́зди же руку́ Твое́ю, Влады́ко, вонзи́л еси́ в того́ гневли́вое и всескверна́вое се́рдце: и до конца́ того́ умертви́л еси́, и от него́ умерщвле́ныя, Ще́дре, оживи́л еси́.

Му́ченичен: Кро́вным исте́кшим струя́м, из теле́с святы́х страда́лец, угаси́ша ду́хом ве́сь идолобе́сия пла́мень, и Це́ркве честны́я бразды́ напои́ша, и кла́с израсти́ти сотвори́ша спасе́ния наде́жды и ве́ры: и́мже пита́ется вся́ка душа́, Боже́ственною благода́тию.

Му́ченичен: Воспаля́хуся огня́ мно́жае нра́вом, стра́ждущии сла́внии страстоте́рпцы, егда́ веще́ственным огне́м опаля́тися лука́вными судия́ми судо́м отдава́еми, и неуя́звлени сохраня́еми быва́ху де́йством и благода́тию Свята́го Ду́ха, венча́вшаго те́х зако́нно пострада́вших.

Богоро́дичен: Ору́жие се́рдце Твое́ про́йде, Пречи́стая Отрокови́це, зря́щи Сы́на Твоего́ на Кресте́ просте́рта, и стра́сти терпя́ща, и копие́м в Боже́ственная ре́бра пробода́ема во́лею, и закала́юща тьмы́ бори́тельнаго зми́я: те́мже пла́чущи ма́терски, Того́ велича́ла еси́.

И́н. Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Отступи́х от Бо́га блу́дно жи́в, и ра́б сласте́й окая́нный бы́х, и вся́кия обнажи́хся доброде́тели Боже́ственныя: но посети́ мя́, Пречи́стая.

Бежа́тель бы́х от за́поведей да́нных ми́, и удали́вся от живота́ к сме́рти прибли́жихся: но наста́ви мя́ к возвраще́нию, Богома́ти Пречи́стая.

Житие́ мое́ лука́вно, испо́лнено нераде́ния: но ми́лость Твоя́ мно́гая и неизрече́нная, Пречи́стая, да одоле́ет и милосе́рдие бла́гости Твоея́ немощне́й мы́сли мое́й.

Спа́са и Изба́вителя ро́ждши, и Всеще́драго, уще́дри мя́, Чи́стая, и спаси́, и изба́ви от обыше́дших мя́, и напа́дающих неми́лостивно на не́мощь мою́.

Пе́снь 7

Ирмо́с: Безу́мное веле́ние мучи́теля злочести́ваго лю́ди поколеба́, ды́шущее преще́ние и злохуле́ние богоме́рзкое; оба́че три́ о́троки не устраши́ я́рость зве́рская, ни о́гнь снеда́яй, но проти́во ды́шущу росоно́сному Ду́ху, со огне́м су́ще поя́ху: препе́тый отце́в и на́с Бо́же, благослове́н еси́.

Егда́ распросте́рся на Дре́ве Кре́стнем, я́коже виногра́д Сло́во О́тчее, мсто́ иска́пал еси́ та́йны, изменя́ющее пия́нство преступле́ния, и все́х веселя́щее, ве́дущих Тя́ Бо́га и Зижди́теля, во́лею стра́ждуща, и спаса́ющее пою́щия: препе́тый отце́в и на́с Бо́же, благослове́н еси́.

Распя́тие претерпе́л еси́, Христе́ мо́й Иису́се, поно́сное, уставля́ющее челове́ком все́ поноше́ние и воздыха́ние, же́лчи же вкуси́л еси́, го́ресть вся́ку зло́бную отъе́мля, уязви́л еси́ ру́це Твои́, я́звы, Ще́дре, душе́вныя на́ша исцеля́я, и пе́ти повелева́я: препе́тый оте́ц на́ших Бо́же, благослове́н еси́.

Му́ченичен: Боле́зньми неболе́зненный живо́т, до́блии страда́льцы, притяжа́ли есте́; те́мже на́ша боле́зни облегча́ете отню́д, благода́ть прие́мше свы́ше, святи́и, исцелева́ти стра́сти, и ду́хи отгоня́ти; и ве́рным предстоите́, и спаса́ете вопию́щия: препе́тый оте́ц на́ших Бо́же, благослове́н еси́.

Му́ченичен: Ста́сте, му́ченицы, пред суди́щи Христа́ испове́дающе, пло́ть на́с ра́ди восприе́мшаго по на́м кроме́ тле́ния; и подо́бницы Страсте́м Его́ явля́еми вои́стинну, огня́ озлобле́ния, и вся́кия ины́я му́ки претерпе́сте, в весе́лии зову́ще: препе́тый оте́ц на́ших Бо́же, благослове́н еси́.

Богоро́дичен: Печа́ли испо́лнихся зря́щи Тебе́, Сы́не, без пра́вды стра́ждуща, уязвля́юся душе́ю, копие́м уя́звлену Ти́ в ре́бра, Богоро́дица вопия́ше пла́чущи и рыда́ющи, еди́на Влады́чица, Ю́же досто́йно вси́ ублажа́ем, и благоче́стно зове́м: препе́тый оте́ц на́ших Бо́же, благослове́н еси́.

И́н. Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Вся́ еси́ светоно́сна, Све́т Незаходи́мый, Де́во, прие́мши, и просвеща́ющи, Чи́стая, ве́рою Тебе́ вопию́щия: Благослове́н, Пречи́стая, Пло́д Твоего́ чре́ва.

Да Твое́ человеколю́бие и ми́лость, Де́во, яви́ши, из глубины́ мя зо́л возведи́ вопию́ща: благослове́н, Пречи́стая, Пло́д Твоего́ чре́ва.

К Тебе́, Ма́ти Де́во, притека́ю, уязвля́емь стрела́ми душетле́нными: всего́ мя моли́твою Твое́ю огради́ вопию́ща: благослове́н, Пречи́стая, Пло́д Твоего́ чре́ва.

Изба́ви мя́, Ма́ти Спа́сова, одержа́щаго лю́таго плене́ния, помышле́ний лука́вых, и ви́н грехо́вных: я́ко да при́сно спаса́емь по до́лгу Тя́ сла́влю.

Пе́снь 8

Ирмо́с: Благослови́те, о́троцы, Тро́ицы равночи́сленнии, Соде́теля Отца́ Бо́га, по́йте снизше́дшее Сло́во, и о́гнь в ро́су претво́ршее, и превозноси́те все́м жи́знь подава́ющаго, Ду́ха Всесвята́го во ве́ки.

Благослови́тся Дре́во, и́мже вся́ потреби́ся я́же во Еде́ме ле́стная кля́тва, возра́стшая сне́дию лука́вою дре́ва, и Христо́с возно́сится препросла́вленный, И́же вознести́ся на не́м во́лею Свое́ю восхоте́вый за милосе́рдие.

Свяще́нно во премене́нии рука́ма, присносла́вный, благословля́я вну́ки иногда́, о́браз явля́я свяще́ннаго Дре́ва, и́мже благослове́ние все́м дарова́ся, прокля́тым зло́ю дре́ва сне́дию, и попо́лзшимся во глубину́ зо́л.

Исправля́ется все́ челове́чество, Влады́ко, Тебе́ распросте́рту бы́вшу на Кресте́, и по́лк паде́ лука́вых бесо́в, и разстоя́щаяся совокупле́ние прие́млют: и превозно́сится держа́ва вла́сти Твоея́, и си́ла Твоя́ во ве́ки.

Му́ченичен: Блаже́нную сла́ву, и пи́щу нетле́нную, и светоза́рна селе́ния насле́довасте ны́не, Боже́ственнии страда́льцы Госпо́дни, и Небе́сным примеси́стеся чино́м, и присносла́вных наде́жд ва́ших коне́ц ны́не восприя́сте с весе́лием.

Му́ченичен: Ва́ше му́жество па́че со́лнца возсия́, светови́днии Христо́вы страда́льцы, и всю́ диа́волю пре́лесть Боже́ственною си́лою помрачи́ и ве́рных все́х сердца́ благочестному́дренне просвети́ во ве́ки.

Богоро́дичен: Мы́сленный О́блак, и Се́нь свяще́ния, Престо́л Бо́жий, и Две́рь Све́та, Свети́льник, и Восто́к Сло́ва, ве́рнии вси́ имену́ем Тя́, Пречи́стая Де́во, вся́ сотво́ршаго Ма́ти су́щи Благослове́нная.

И́н. Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Вседержи́тель Госпо́дь всели́выйся во утро́бу Твою́, и сто́лп утвержде́ния ве́рным Тя́ показа́; к Нему́же прибега́юще напа́стей избавля́емся и бе́д, и свобожда́емся искуше́ния, согла́сно пою́ще: свяще́нницы воспо́йте, лю́дие превозноси́те Его́ во ве́ки.

Свяще́ннаго, Влады́чице, отпадо́х жития́, ко греху́ невоздержи́мо влеко́м, и си́м порабоща́емь, свобожде́ния е́же о Христе́ и пра́вды и́стинныя обнажи́хся: но не пре́зри мя́, Сокро́вище спасе́ния, к Тебе́ прибега́ющаго, на́га и обнища́вшаго.

Да испра́вится мольба́ моли́твы моея́ ко Го́споду, из утро́бы Твоея́ произше́дшему, Влады́чице: и от преступле́ния за́поведей да изба́вит мя́, и осужде́ния и кля́твы зако́нныя, и скве́рну да отмы́ет лю́тых мои́х прегреше́ний, я́ко Еди́н Ми́лостив.

Богороди́тельнице Пречи́стая, души́ моея́ я́звы, и грехо́вныя собла́зны очи́сти, исто́чником отмыва́ющи, и́же из ре́бр Сы́на Твоего́, от ни́х поте́кшими струя́ми: к Тебе́ бо взыва́ю, и к Тебе́ прибега́ю, и Тебе́ призыва́ю, Богоблагода́тную.

Та́же, пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: Сне́дию дре́ва ро́ду прибы́вшая сме́рть, Кресто́м упраздни́ся дне́сь, и́бо прама́терняя всеро́дная кля́тва разруши́ся, прозябе́нием Чи́стыя Богома́тере: Ю́же вся́ Си́лы Небе́сныя велича́ют.

Свяще́ннейше Тя́ вознося́ще, Ще́дре, покланя́емся Твоему́ Кресту́, копию́ же и гу́бе, и тро́сти, и в руку́ вонзе́нным и в ногу́ святы́м гвозде́м, Влады́ко: и́миже обрето́хом соверше́нное оставле́ние, и ра́йскаго жития́ сподо́бихомся.

О ка́ко непра́ведно осужде́н бы́л еси́ пригвозди́тися на Дре́ве распина́емь, Пра́веднейший еди́не все́х Царю́, оправда́ти все́х ища́й, ве́рою сла́вящих страда́ния Твоя́ во́льная, и смотре́ние, и Тебе́, Христе́ мо́й, ве́рно велича́ющих.

Му́ченичен: Те́ло преда́вше му́кам вседу́шно, му́ченицы сла́внии, претерпе́ша ра́ны и ну́жную сме́рть, отсече́ние удо́в, и растерза́ния, и о́гненное опале́ние, любо́вию же разгара́еми ко Го́споду. Те́мже венцено́сцы на Небесе́х живу́т.

Му́ченичен: И́же апо́столов и му́чеников сла́досте, моли́твами и́х все́х на́с ми́лости испо́лни, я́ко Благоутро́бен, согреше́ний разреше́ние подая́, и лю́тых все́х избавле́ние, и Твоего́ Ца́рствия вселе́ние, Христе́ Бо́же, И́же на́с ра́ди явле́йся Челове́к.

Богоро́дичен: Светови́дный черто́г яви́лася еси́, Де́во, все́льшемуся в Твою́ нетле́нную утро́бу, и Стра́сть блаже́нную претерпе́вшему хоте́нием, и все́м безстра́стие пода́вшему за неизрече́нную ми́лость: Ему́же ве́рою покланя́ющеся, Тебе́ благоче́стно велича́ем.

И́н. Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́ Богоро́дицу а́нгелов и челове́к чинонача́лия велича́ют.

Вои́стинну Богома́ти су́щаго Бо́га, моля́щи не преста́й Его́же родила́ еси́, грехо́в оставле́ние рабо́м Твои́м пода́ти, и всесоверше́нное проще́ние те́м ны́не соде́янных зо́л: и си́х сподо́бити со все́ми святы́ми ве́чнаго наслажде́ния.

Кре́постию и си́лою духо́вною, и ору́жием, и держа́вою, препоя́ши смире́нную ду́шу мою́, Пресвята́я Богоро́дице, и Кре́стным ору́жием облецы́, и греха́ моего́ ра́ны очи́сти, росо́ю Твоего́ человеколю́бия, и вели́кою ми́лостию Твое́ю.

Спасе́ния бу́ди ми́ сто́лп, Чи́стая, бесо́в безде́льны сотвори́ полки́, и напа́стей молву́, и беды́ отгоня́ющи, и страсте́й нахо́ды дале́че прогоня́ющи, и чи́стое даю́щи свобожде́ние.

Чи́стая Препросла́вленная Ма́ти Бо́жия, пою́щия Тя́ любо́вию спаси́, и искуше́ний молву́ разоря́ющи ми́лостивно, я́ко Бо́га бо ро́ждши, Де́во, вся́ ели́ко хо́щеши твори́ти мо́жеши, и подае́ши ми́лость невозбра́нно. Те́мже Тя́ вси́ велича́ем.

Та́же, Досто́йно е́сть: Ектения́, и свети́лен, и псалмы́ обы́чныя.

На стихо́вне стихи́ры кре́стны, гла́с 8:

Моисе́ев же́зл прообража́ше Честны́й Кре́ст Тво́й, Спа́се на́ш: те́м бо спаса́еши, я́ко из глубины́ морски́я, лю́ди Твоя́, Человеколю́бче.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Е́же дре́вле во Еде́ме в раи́, дре́во сне́дное прозябло́ е́сть посреде́ садо́в: Це́рковь же Твоя́, Христе́, Кре́ст Тво́й процвете́, источа́ющ всему́ ми́ру жи́знь. Но о́но у́бо умертви́ сне́дию я́дшаго Ада́ма: сие́ же жи́ва сотвори́, ве́рою спа́сшася разбо́йника. Его́же спасе́ния прича́стники и на́с яви́, Христе́ Бо́же, И́же стра́стию Твое́ю разруши́вый, я́же на ны́ ко́зни вра́жия, и сподо́би на́с Ца́рствия Твоего́, Го́споди.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Что́ ва́с нарече́м, святи́и? Херуви́мы ли, я́ко на ва́с почи́л е́сть Христо́с? Серафи́мы ли, я́ко непреста́нно просла́висте Его́? А́нгелы ли, те́ла бо отврати́стеся? Си́лы ли, де́йствуете бо чудесы́? Мно́гая ва́ша имена́, и бо́льшая дарова́ния. Моли́те спасти́ся душа́м на́шим.

Сла́ва, и ны́не: Крестобогоро́дичен: Не терплю́, Ча́до, ви́дящи Тя́ на Дре́ве усну́вша, бо́дрость все́м подаю́щаго, я́ко да и́же дре́вле преступле́ния плодо́м, сно́м поги́бельным усну́вшим, Боже́ственную и спаси́тельную бо́дрость пода́си: Де́ва глаго́лаше пла́чущися, Ю́же велича́ем.

Та́же, Бла́го е́сть: Трисвято́е по О́тче на́ш: Тропа́рь, ектения́, и ча́с пе́рвый, псалмы́ обы́чныя, и отпу́ст.

Помяни́ на́с, Христе́ Спа́се ми́ра, я́коже разбо́йника помяну́л еси́ на Дре́ве: и сподо́би все́х, Еди́не Ще́дре, Небе́сному Ца́рствию Твоему́.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Распросте́рл еси́, Христе́, дла́ни на Дре́ве, и лука́вая нача́ла и вла́сти обличи́в, спа́сл еси́ от те́х вре́да благоче́стно славосло́вящия Тя́.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Копие́м прободе́ся ви́ся на Дре́ве, источи́л еси́ на́м пото́ки безсме́ртия, умерщвле́ным без ума́ преступле́нием: те́мже со стра́хом сла́вим Тя́.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Стра́нни земны́х явля́емых сла́дких введе́ния, стра́нным себе́ изда́ша му́кам страда́льцы, уязвля́юще отсту́пника свои́ми святы́ми я́звами.

Сла́ва: И́же от Безнача́льныя Тро́ицы еди́н сы́й, стра́сть на Кресте́ претерпе́л еси́ во́лею: страсте́й мои́х изсуши́ вся́ пото́ки, и спасе́ния сподо́би мя́.

И ны́не: Емману́ила А́гнца Бо́жия и Сло́ва, ви́дящи пло́тию ви́сяща на Дре́ве, А́гница еди́на Нескве́рная и Де́ва, печа́лию одержи́ма бя́ше слезя́щи.

на Го́споди, воззва́х: стихи́ры му́ченичны, гла́с 8:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Му́ченицы Госпо́дни вся́ко ме́сто освяща́ете, и вся́к неду́г уврачу́ете; и ны́не моли́те, изба́витися от се́тей вра́жиих душа́м на́шим, мо́лим вы́.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Му́ченицы Твои́, Го́споди, забы́вше жите́йская, и небре́гше о муче́ниих, бу́дущия ра́ди жи́зни, тоя́ насле́дницы яви́шася: те́мже и со а́нгелы ра́дуются. Те́х моли́твами, да́руй лю́дем Твои́м ве́лию ми́лость.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

А́ще ка́я доброде́тель, и а́ще ка́я похвала́, подоба́ет святы́м; мече́м бо преклони́ша вы́и, Тебе́ ра́ди прекло́ньшаго Небеса́ и соше́дшаго; излия́ша кро́ви своя́, Тебе́ ра́ди истощи́вшаго Себе́, и зра́к ра́бий прие́мша; смири́шася да́же до сме́рти, нищету́ Твою́ подража́юще. И́хже моли́твами, по мно́жеству щедро́т Твои́х, Бо́же, поми́луй на́с.

И́ны стихи́ры подо́бны, гла́с 8.

Подо́бен: О пресла́внаго чудесе́!:

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

Дре́ву непло́дному уподо́бихся, о́бразом я́ко ли́ствием тще́тным обложе́н: и бою́ся, Влады́ко, да не отсе́к, отсле́ши мя́ во о́гнь неугаси́мый ве́чный. Но пода́ждь обраще́ния мне́ вре́мя, я́ко да принесу́ Ти доброде́тельных дея́ний пло́д до́брый, и сподо́блюся Ца́рствия Твоего́.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Го́споди, Го́споди, Твоего́ раба́ мене́, мно́го прогневля́юща Твою́ бла́гость на вся́кий де́нь, Человеколю́бче, не отве́ржи от лица́ Твоего́, Христе́, ниже́ накажи́ твои́м пра́ведным гне́вом: согреши́х, согреши́х Ти́, я́ко никто́же и́н, испове́дую, уще́дри и спаси́ мя, Твоея́ Ма́тере моли́твами.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Егда́ ся́деши во сла́ве Твое́й, я́ко Ца́рь все́х, на престо́ле суда́, предстоя́щим стра́хом Ти́ святы́м а́нгелом Твои́м, и предста́нет Ти́ естество́ все́ челове́ческое, Христе́, суди́тися иму́щее: тогда́ моли́твами Ма́тере Твоея́, Го́споди, от все́х изба́ви му́к усо́пшия ве́рно.

Сла́ва, и ны́не: Богоро́дичен: Ца́рь Небе́сный за человеколю́бие на земли́ яви́ся, и с челове́ки поживе́: от Де́вы бо чи́стыя пло́ть прие́мый, и из Нея́ проше́дый с восприя́тием, еди́н е́сть Сы́н, сугу́б естество́м, но не ипоста́сию. Те́мже соверше́нна Того́ Бо́га, и соверше́нна Челове́ка вои́стинну пропове́дающе, испове́дуем Христа́ Бо́га на́шего: Его́же моли́, Ма́ти Безневе́стная, поми́ловатися душа́м на́шим.

Та́же, Све́те ти́хий: И про́чее я́ко обы́чай.

На стихо́вне стихи́ры, гла́с 8:

Му́ченицы Госпо́дни, моли́те Бо́га на́шего, и испроси́те душа́м на́шим мно́жество щедро́т, и очище́ние мно́гих прегреше́ний, мо́лимся.

Сти́х: Блаже́ни, я́же избра́л и прия́л еси́, Го́споди.

Поко́ин: Пла́чу и рыда́ю, егда́ помышля́ю сме́рть, и ви́жду во гробе́х лежа́щую, по о́бразу Бо́жию созда́нную на́шу красоту́, безобра́зну и безсла́вну, не иму́щую ви́да. Оле чудесе́, что́ е́же о на́с сие́ бы́сть та́инство! Ка́ко преда́хомся тле́нию? Ка́ко припряго́хомся сме́рти? вои́стинну Бо́жиим повеле́нием, я́коже е́сть пи́сано, подаю́щаго преста́вльшимся упокое́ние.

Сти́х: Ду́ши и́х во благи́х водворя́тся.

Сме́рть Твоя́, Го́споди, безсме́ртия бы́сть хода́таица: а́ще бы не во гро́бе положе́н бы́л еси́, не бы Ра́й отве́рзлся, те́мже преста́вльшихся упоко́й, я́ко Человеколю́бец.

Сла́ва, и ны́не: Богоро́дичен: Чи́стая Де́во, Сло́ва Врата́, Бо́га на́шего Ма́ти, моли́ спасти́ся на́м.

Та́же, Ны́не отпуща́еши: И про́чее я́ко обы́чай, и отпу́ст.

Кано́н Пресвяте́й Богоро́дице, гла́с 8:

Пе́снь 1

Ирмо́с: Пои́м Го́сподеви, прове́дшему лю́ди своя́ сквозе́ Чермно́е мо́ре, я́ко Еди́н сла́вно просла́вися.

Умертви́ пло́ти моея́ мудрова́ние, Пречи́стая Де́во, Я́же Жи́знь ро́ждшая, и му́ки вся́кия изба́ви мя́.

Заре́ю пресве́тлою, от Тебе́, Де́во, Возсия́вшаго, души́ моея́ зе́ницы просвети́: я́ко да сла́влю Тя́.

Сла́ва: Моли́ся, Влады́чице, Еди́на Свята́я Богоро́дице, я́ко да улучу́ в Де́нь Суда́ спасе́ние, и Боже́ственную све́тлость.

И ны́не: Пречи́стая Богоро́дице, утиши́ боле́зни се́рдца моего́, Я́же Христа́ неболе́зненно па́че ума́ и сло́ва ро́ждшая.

Пе́снь 3

Ирмо́с: Ты́ еси́ Утвержде́ние притека́ющих к Тебе́, Го́споди: Ты́ еси́ Све́т омраче́нных, и пое́т Тя́ ду́х мо́й.

Изба́ви мя́ моли́твами Твои́ми, Пречи́стая, вра́жиих стре́л: и от помышле́ний находя́щих, пощади́ се́рдце мое́.

Исцели́, Пренепоро́чная, души́ моея́ ра́ны, Ма́ти Бо́жия, утиши́ Твои́ми моли́твами серде́чное смуще́ние.

Сла́ва: Укроти́ неуста́вное помышле́ний мои́х, Чи́стая Влады́чице, и отыми́ от души́ вся́ку печа́ль, Я́же Ра́дость ро́ждшая.

И ны́не: Ра́дуйся, спасе́ние притека́ющих к Тебе́, Де́во Ма́ти Христо́ва: ра́дуйся, апо́столов и му́чеников похвало́.

Пе́снь 4

Ирмо́с: Услы́шах, Го́споди, смотре́ния Твоего́ та́инство: разуме́х дела́ Твоя́, и просла́вих Твое́ Божество́.

Души́ моея́ я́звы, Сло́ве Бо́жий, исцели́, уязви́выйся мене́ ра́ди я́ко Человеколю́бец, и ума́ моего́ тьму́ просвети́.

Дрема́нием ле́ности моея́ со́н грехо́вный пости́же, Де́во: бо́дренною Твое́ю моли́твою воздви́гни мя́ к покая́нию.

Сла́ва: Я́же от исто́чник источи́вшая во́ду оставле́ния, Пренепоро́чная, се́рдце мое́ напо́й изсо́хшее вся́кими преступле́ньми.

И ны́не: Пресвята́я Богоневе́сто, Влады́чице ми́ра, Ты́ мя спаси́, бе́д пременя́ющи, и страсте́й молву́ отгоня́ющи.

Пе́снь 5

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш: ра́зве Тебе́ ино́го не ве́мы.

При́зри, Пречи́стая, и услы́ши гла́с мо́й, и вся́ очи́сти беззако́ния моя́, Влады́чице.

Со́лнце Незаходи́мое ро́ждшая, Богоро́дице, всего́ мя просвети́ омраче́ннаго страстьми́: да сла́влю Тя́ и хвалю́, Пренепоро́чная.

Сла́ва: Уще́дри, Пресвята́я Отрокови́це, ду́шу мою́, и изба́ви суда́, и ве́чнующаго муче́ния.

И ны́не: Неду́говавшую ду́шу мою́ исцели́, ро́ждшая все́х Взе́млющаго неду́ги, Пресвята́я Влады́чице.

Пе́снь 6

Ирмо́с: Бе́здна грехо́в и прегреше́ний бу́ря мя́ смуща́ет, и во глубину́ ну́жднаго ре́ет мя́ отча́яния: но Твою́ кре́пкую ру́ку мне́ простри́, я́ко Петро́ви, о Упра́вителю, и спаси́.

Умертви́, Богоро́дице, пло́ти моея́ безчи́нная двиза́ния, Я́же умерщвле́ныя зло́бою оживи́вшая, Твои́м живы́м Рождество́м: я́ко да сла́влю Тя́, я́ко вину́ челове́ческаго обновле́ния.

Бе́здну щедро́т ро́ждши, Богоро́дице Де́во, ско́рбных жития́ ду́шу мою́ спаси́, и ра́дости духо́вныя две́ри отве́рзи ми́: на Тя́ бо еди́ну наде́жду возложи́х.

Сла́ва: Да Твоя́ ра́достно воспою́ вели́чия, Де́во Пречи́стая, и вели́кую благода́ть чуде́с, безме́стная помышле́ния томя́щая мя́ всегда́, моли́твами Твои́ми премени́.

И ны́не: Родила́ еси́ па́че естества́ не́др Оте́ческих Неразлу́чнаго, и Тобо́ю, Де́во к челове́ком бесе́довавша: но я́ко похвала́ на́с все́х, и утвержде́ние еси́, Богоро́дице, к Тебе́ прибега́ющия уще́дри.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 8:

Сло́во О́тчее на зе́млю сни́де, и А́нгел све́тел Богоро́дице глаго́лаше: ра́дуйся, Благослове́нная, Я́же черто́г еди́на сохра́ньшая, зача́тие прие́мши Преве́чнаго Бо́га и Го́спода, да от пре́лести я́ко Бо́г спасе́т ро́д челове́ческий.

Пе́снь 7

Ирмо́с: О́троцы евре́йстии в пещи́ попра́ша пла́мень дерзнове́нно: и на ро́су о́гнь преложи́ша вопию́ще: благослове́н еси́, Го́споди Бо́же, во ве́ки.

Увы́ мне́, ка́ко избе́гну му́к жду́щих мя́, зле́ пожи́в зде́? Ка́ко Судии́ Стра́шному явлю́ся окая́нный? Богороди́тельнице Влады́чице, помо́щница тогда́ бу́ди ми́.

Угаси́ пла́мень страсте́й мои́х, и утиши́ бу́рю се́рдца моего́, Богома́ти Чи́стая: и изба́ви мя́, Пречи́стая, бесо́в томле́ния, и огня́ ве́чнаго.

Сла́ва: Ви́ждь ско́рбь мою́, Де́во, ю́же наведе́ мно́жество зо́л мои́х; и пре́жде отше́ствия поко́й ми́ пода́ждь, ма́терними Твои́ми моли́твами умоля́ющи Сы́на Твоего́.

И ны́не: Пла́мень страсте́й се́рдца моего́ погаси́ росо́ю Твое́ю, Де́во, и огня́ стра́шнаго исхити́, Отрокови́це, и ве́чнаго суда́ и бесо́вскаго томле́ния.

Пе́снь 8

Ирмо́с: Благослови́те, о́троцы, Тро́ицы равночи́сленнии, Соде́теля Отца́ Бо́га, по́йте снизше́дшее Сло́во, и о́гнь в ро́су претво́ршее, и превозноси́те все́м жи́знь подава́ющаго, Ду́ха Всесвята́го во ве́ки.

Умертви́, Де́во, вся́ теле́сная на́ша двиза́ния, Я́же ме́ртва зми́я живоно́сным Рождество́м Твои́м соде́лавши: и жи́знь нестаре́ющую улучи́ти на́м помоли́ся, я́ко да Тя́ пое́м во ве́ки.

Тя́, Богороди́тельнице, на по́мощь всегда́ призыва́ю, не посрами́ мене́ стяжа́вшаго студу́ дела́: но уще́дри мя́, Пречи́стая, и пла́мене исхити́, и ве́чных изба́ви муче́ний.

Сла́ва: Обра́дованная, помо́щница ми́ яви́ся во обстоя́нии зо́л, избавля́ющи от находя́щих ми́ бесо́вских наве́т, я́ко да ублажа́ю Тя́ всегда́, Богоро́дице, Предста́тельнице все́х.

И ны́не: Пресвята́я Отрокови́це, апо́столов похвало́, му́чеников сла́во, сла́вы ве́чныя прича́стника мя́ сотвори́, взыва́юща: благослови́те Ду́ха Пресвята́го во ве́ки вся́.

Пе́снь 9

Ирмо́с: Уста́вы прешла́ еси́ естества́, Соде́теля заче́нши и Го́спода, и две́рь спасе́ния ми́рови была́ еси́: те́м Тя́, Богоро́дице, непреста́нно велича́ем.

Све́том Твои́м Невече́рним, Две́ре Све́та, души́ моея́ тьму́ отжени́ лю́тую, и покая́ния ми́ пути́ светоза́рныя покажи́: я́ко да ше́ствуя в ни́х, мра́ка отбе́гну грехо́внаго, и непреста́нно велича́ю Тя́.

Очи́сти рабы́ Твоя́, Бла́же, и прегреше́ний проще́ние да́руй: и ве́чнующаго пла́мене изба́ви на́с, и прича́стники соде́лай Твоего́ Ца́рствия, Сло́ве Бо́жий: и́бо за е́же хотя́ спасти́ ро́д челове́ч, Кре́ст претерпе́л еси́.

Сла́ва: Удо́бь, Богоро́дице, прейти́ ми жития́ пода́ждь прехожде́ние, и напа́стей воста́ния и страсте́й, я́ко Блага́ укротя́щи, и наставля́ющи к доброде́тели Небе́снаго Ца́рствия, и поко́я Боже́ственна: я́ко да спаса́емь прославля́ю Тя́.

И ны́не: Неду́говавшую ду́шу мою́ стра́стию лю́тою, Я́же ро́ждши Бо́га Преблага́го, я́ко Ми́лостива исцели́, и изба́ви при́сно оскорбля́ющих мя́, Пречи́стая, и прибыва́ющих злолю́тых: я́ко да спаса́емь, Тя́ усе́рдно велича́ю, возвели́чившую ро́д на́ш.

Та́же, Досто́йно е́сть: Трисвято́е по О́тче на́ш: тропа́рь, и отпу́ст.

По 1-м стихосло́вии, седа́льны му́ченичны, гла́с 8:

Свети́ла у́мная яви́стеся, святи́и му́ченицы, мглу́ бо пре́лести упраздни́сте ве́рою, и душе́вныя свещи́ ва́ша просвети́сте, и с Женихо́м со сла́вою внидо́сте в Небе́сный черто́г. И ны́не мо́лим вы́, моли́теся спасти́ся душа́м на́шим.

Подо́бен: Повеле́нное та́йно:

Сти́х: Ди́вен Бо́г во святы́х Свои́х, Бо́г Изра́илев.

Воздержа́нием страсте́й огнепа́льныя испепели́вше зра́ки и движе́ния, Христо́вы му́ченицы, прия́ша благода́ть, неду́ги отгоня́ти немощству́ющих, и живу́ще и по конце́ чудоде́йствовати. Вои́стинну чу́до пресла́вное, я́ко ко́сти на́ги источа́ют исцеле́ния: сла́ва Еди́ному Бо́гу на́шему.

Сла́ва, и ны́не: Богоро́дичен: И́же на́с ра́ди рожде́йся от Де́вы, и распя́тие претерпе́в, Благи́й, испрове́ргий сме́ртию сме́рть, и Воскресе́ние явле́й я́ко Бо́г, не пре́зри я́же созда́л еси́ руко́ю Твое́ю: яви́ человеколю́бие Твое́, Ми́лостиве, приими́ ро́ждшую Тя́ Богоро́дицу моля́щуюся за ны́, и спаси́, Спа́се на́ш, лю́ди отча́янныя.

По 2-м стихосло́вии седа́лен, гла́с 8:

Подо́бен: Повеле́нное та́йно:

Проро́цы, му́ченицы Христо́вы, и святи́телие, и́же по́двиг до́брый благочестному́дренно зако́нно сконча́вше, и прии́мше венцы́ неувяда́емыя от Бо́га, непреста́нно моли́те о на́с Его́ бла́гость: я́ко да да́рует на́м прегреше́ний проще́ние, я́ко Бо́г Благоуве́тлив.

Сти́х: Блаже́ни, я́же избра́л и прия́л еси́, Го́споди.

Ме́ртвен: Преста́вльшияся благоче́стно от вре́менных, в селе́ниих избра́нных с пра́ведными сопричти́, Влады́ко, те́х упокоева́я на ме́сте пра́зднующих, и в сла́дости неконча́емей ра́йстей, я́ко Бла́г, во́льная прегреше́ния и нево́льная и́х, за кра́йнюю бла́гость прости́вый, Человеколю́бче.

Сти́х: Ду́ши и́х во благи́х водворя́тся.

Ме́ртвен: Глубино́ю му́дрости человеколю́бно вся́ стро́яй, и поле́зное все́м подава́яй, Еди́не Соде́телю, упоко́й, Го́споди, ду́ши ра́б Твои́х: на Тя́ бо упова́ние возложи́ша, Творца́ и Зижди́теля и Бо́га на́шего.

Сла́ва, и ны́не: Богоро́дичен: Тебе́ и сте́ну, и приста́нище и́мамы, и моли́твенницу благоприя́тну к Бо́гу, Его́же родила́ еси́, Богоро́дице Безневе́стная, ве́рных спасе́ние.

Кано́н святы́м му́чеником, иера́рхом, преподо́бным и усо́пшим, [его́же краестро́чие си́це: Осмогла́сника но́ваго Боже́ственный коне́ц.] Тру́д же Ио́сифов. Гла́с 8:

Пе́снь 1

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Честни́и би́серие яви́стеся, вене́ц просвеща́юще честны́я Це́ркве, страстоте́рпцы Христо́вы до́блественнейшии.

Облиста́ша догма́т доброде́телей Боже́ственными светлостьми́ прему́дрии святи́телие, и ве́рных сердца́ просвети́ша.

Тебе́ в проро́цех и в преподо́бных чу́днаго мо́лим, Сло́ве: те́х мольба́ми спаси́ на́с.

Сла́ва: Егда́ су́д пра́ведный прии́деши сотвори́ти, Пра́веднейший, неосужде́нно, Сло́ве, те́х мольба́ми спаси́ на́с.

Богоро́дичен: Го́спода ро́ждшую Тя́ све́дый, же́нский ли́к Тебе́ во сле́д, Де́во, страда́льчествовав, Тому́ приведе́ся.

Други́й кано́н усо́пших, [его́же краестро́чие: Умира́ющым ве́рным осьмо́е плету́ пе́ние.] Гла́с 8:

Пе́снь 1

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Сме́ртию сме́рть Христо́ву, и страстьми́ Стра́сть подража́вше честну́ю, му́ченицы вси́, Боже́ственныя и блаже́нныя жи́зни получи́ша.

Ю́ности прегреше́ния презря́, и грехи́ превосходя́, Христе́ Спа́се, пре́жде усо́пшия рабы́ Твоя́ со избра́нными Твои́ми сопричти́.

Сла́ва: Ю́же получи́ша сла́ву же и ра́дость, и́же блаже́нное стяжа́вше пребыва́ние, пода́ждь бога́тно Твои́м рабо́м, я́же прия́л еси́, Многоми́лостиве.

И ны́не: Зачала́ еси́ Сло́во О́тчее, пло́ти соеди́ншееся по ипоста́си, Е́же из Тебе́, Всенепоро́чная Отрокови́це, а́д Боже́ственною си́лою упраздни́вшее.

Пе́снь 3

Ирмо́с: Утвержде́й в нача́ле Небеса́, и зе́млю основа́вый на вода́х мно́гих, утверди́ мя к пе́нию славосло́вия Твоего́, Го́споди.

Ме́рзкия же́ртвы страда́льцы крепча́йшею мы́слию оттря́сше, же́ртва чисте́йша Сло́ву поже́ршемуся бы́ша.

Обновля́юще словесы́ священноде́тельными обетша́вшая вся́кими страстьми́, обнови́вшаго ми́р Боже́ственнии ученицы́ яви́стеся.

Я́же проро́ком пре́жде явле́нно, да́нная благода́ть Всесвята́го Ду́ха, по́стники в после́дняя Боже́ственных дарова́ний испо́лни.

Сла́ва: Лико́м святы́х сочета́й, Бо́же, ве́рно от жития́ преше́дшия, и Рая́ жи́тели сотвори́, за неизрече́нную ми́лость.

Богоро́дичен: И́же ника́коже вмеща́емый Иису́с и Госпо́дь, нетесновме́стно в Твое́ всели́ся освяще́нное чре́во, Пречи́стая Де́во Всепе́тая.

И́н. Ирмо́с: Небе́снаго кру́га Верхотво́рче Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Очи́стившеся дре́вняго прароди́тельнаго паде́ния, креще́нием и па́ки порожде́нием, струя́ми же крове́й свои́х окропи́вшеся Христу́, блаже́ннии, сца́рствуете.

И́же ме́ртв во́лею поло́жся во гро́бе, и живу́щия во гробе́х взыва́яй, Спа́се, благоволи́, я́же от на́с прия́л еси́, в селе́ниих пра́ведных Твои́х си́м водворя́тися.

Сла́ва: Благоутро́бием Боже́ственныя Твоея́, Влады́ко, и соесте́ственне разумева́емыя бла́гости, умоле́н быва́я, грехо́в разреше́ние пода́в рабо́м Твои́м, Спа́се, упоко́й.

И ны́не: Вопло́щься из чре́ва Твоего́, и бы́в Челове́к, И́же изря́дне сы́й Еди́н Человеколю́бец, спаса́ет челове́ка от вра́т сме́ртных, Богома́ти Пречи́стая, Еди́на Всепе́тая.

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Преше́дше по́прище муче́ния, теплото́ю духо́вною, страда́льцы богоблаже́ннии, веще́ственную пре́лесть попали́сте.

Преподо́бныя Твоя́, Го́споди, и святи́тели све́тло просла́вил еси́: те́х Боже́ственными мольба́ми, прича́стника мя́ сла́вы Твоея́ сотвори́.

Е́же Боже́ственнаго Ду́ха вдохнове́ние, проро́ки просвети́вшее, жена́м кре́пость дарова́, враго́в погубля́ти шата́ния.

Сла́ва: Сликовствова́ти сподо́би со все́ми святы́ми, я́же преста́вил еси́, Преблаги́й, рабы́ Твоя́, в селе́ниих святы́х Твои́х, умоле́н быва́яй.

И ны́не: Зако́на Боже́ственнаго Пода́теля, естества́ зако́на вы́ше родила́ еси́, возсозида́юща, Всенепоро́чная, челове́ческое естество́ попо́лзшееся.

И́н. Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Да Твоея́, Влады́ко, сла́вы у́зрят, и све́тлость Твою́ светода́тельную на Небесе́х получа́т све́тло, вся́к ви́д муче́ний носи́ти претерпе́ша, му́ченицы Боже́ственнии, Тебе́, Христе́, пою́ще: си́ле Твое́й сла́ва, Человеколю́бче.

Мно́ги оби́тели у тебе́, Спа́се, су́ть, по достоя́нию все́м разделя́емы, по ме́ре доброде́телей: ты́я у́бо, Ще́дре, испо́лнити си́х сподо́би, я́же ве́рою преста́вльшияся, благоче́стно Тебе́ вопию́щия: си́ле Твое́й сла́ва, Человеколю́бче.

Сла́ва: Ра́вен на́м челове́к яви́лся еси́, Безсме́ртне, все́м ра́вно сме́рть претерпе́л еси́, и жи́зни показа́л еси́ пу́ть: ея́же преста́вльшияся сподо́би я́ко Человеколю́бец, проще́ние согреше́ний я́ко Влады́ка подава́я, и Све́та прича́стие да́руй.

И ны́не: Ты́ ве́рных похвала́ еси́, Безневе́стная, Ты́ предста́тельница, и Ты́ прибе́жище христиа́н: стена́ и приста́нище, к Сы́ну Твоему́ мольбы́ но́сиши, Всенепоро́чная, и спаса́еши от бе́д, и́же ве́рою и любо́вию Богоро́дицу Чи́стую Тя́ ве́дущия.

Пе́снь 5

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Претерпе́ша я́звы плотски́я Боже́ственнии му́ченицы, и сего́ ра́ди я́звы на́ша при́сно исцеля́ют, уязвля́юще де́моны.

Святи́и Бо́жии святи́тели, моли́те со все́ми преподо́бными Христа́, грехо́в оставле́ние дарова́ти на́м.

Пло́ть ра́нами и обуче́нием изнури́вше, жены́ преподо́бныя, Человеколю́бче, в наде́ждах благи́х сподо́бишася.

Сла́ва: Сме́рть погуби́в, сме́ртию Твое́ю, Безсме́ртне, уме́ршия в наде́жди и жи́зни, ве́рныя Твоя́ рабы́ я́ко Человеколю́бец упоко́й.

Богоро́дичен: Упраздни́ла еси́, Чи́стая, пра́отец осужде́ние, все́х оправда́вшаго пло́тию ро́ждши Иису́са Еди́наго Го́спода.

И́н. Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Несказа́нныя Твоея́ сла́вы, и е́же па́че сло́ва Твоего́ блаже́нства, в селе́ниих святы́х, иде́же гла́с красе́н пра́зднующих, преста́вленныя к безстра́стней жи́зни уще́дрив, сподо́би, Еди́не Человеколю́бче.

Иде́же чи́ни а́нгельстии, иде́же пра́ведных собо́ри ра́дуются, Авраа́ма в не́дрех всели́, Спа́се, рабы́ Твоя́, и со дерзнове́нием стра́шному и Боже́ственному Престо́лу предста́ти благоволи́, Благоутро́бне.

Сла́ва: Очище́ние на́м яви́лся еси́, пра́вда же и избавле́ние, и я́звою Твое́ю на́ша не́мощи уврачева́л еси́. Ты́ у́бо, Ще́дре, я́ко Бла́г, преста́вльшияся в сла́дости ра́йстей учини́.

И ны́не: Ми́лостивно, Ми́лостиве, челове́чества ме́ру восприя́л еси́, И́же Боже́ственныя сла́вы превы́шшими украша́яй возвыше́ньми, от Деви́ческих ложе́сн пло́ть прие́м одушевле́ну, слове́сну, е́юже сме́рть погуби́л еси́.

Пе́снь 6

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Гное́нии ва́шими честны́ми ду́ш исцеля́ете неду́ги, святи́и му́ченицы, и согни́тия теле́с при́сно отъе́млете, уязвля́юще лука́вых де́монов мно́жество.

Преподо́бных ли́к, святи́телей же сосло́вие, и же́н свяще́нных Боже́ственное сочета́ние, тве́рдо страда́льчествовавше, на Небесе́х наслажде́ния насле́доваша.

Умертви́вше, по́стницы, пло́ть, живо́т улучи́сте: па́сше же до́бре Христо́во ста́до, святи́телие прему́дрии, безсме́ртныя сла́вы по кончи́не сподо́бистеся.

Сла́ва: Живы́х, Сло́ве, живо́т, и уме́рших поко́й сы́й, я́же от на́с Боже́ственным Твои́м манове́нием, преста́вленыя рабы́ Твоя́, Авраа́ма в не́дра уго́дника Твоего́ всели́.

Богоро́дичен: Всели́ся в Тя́, Чи́стая, Отчее Сия́ние, и невеще́ственными заря́ми своего́ Божества́, тьму́ разруши́ многобо́жия, и ми́р просвети́.

И́н. Ирмо́с то́йже.

Му́ченицы Твои́, Спа́се, мно́гия му́ки претерпе́ша, любо́вию Твое́ю душа́ми уязви́вшеся святи́и, Твоея́ жела́юще присносу́щныя сла́вы, и сла́дкаго Твоего́ прича́стия.

Чре́во врага́ сме́ртию растерза́л еси́, Спа́се, и вся́ я́же в не́м ю́зники воскреси́л еси́, живо́т дарова́вый: его́же преста́вленыя, Благоде́телю, сподо́би.

Сла́ва: Сле́з и воздыха́ния су́щия во а́де рабы́ Твоя́ свободи́, Спа́се: я́ко Еди́н бо Благоутро́бен, отъя́л еси́ вся́ку сле́зу от вся́каго лица́, ве́рно благословя́щих Тя́.

И ны́не: И́же естество́м Соде́тель, соде́тельствуется в ложесна́х Твои́х, По́лный я́ко Бо́г, истощава́ется, Всенепоро́чная: Еди́н Безсме́ртный, за все́х спасе́ние умира́ет сме́ртию.

Конда́к, гла́с 8: Со святы́ми упоко́й, Христе́, ду́ши ра́б Твои́х, иде́же не́сть боле́знь, ни печа́ль, ни воздыха́ние, но жи́знь безконе́чная.

И́кос: Са́м еди́н еси́ Безсме́ртный, сотвори́вый и созда́вый челове́ка: земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́, созда́вый мя́, и реки́й ми́: я́ко земля́ еси́, и в зе́млю оты́деши, а́може вси́ челове́цы по́йдем, надгро́бное рыда́ние творя́ще пе́снь, аллилу́ия.

Пе́снь 7

Ирмо́с: О́троцы богочести́вии в Вавило́не о́бразу злато́му не поклони́шася, но посреде́ пе́щи о́гненныя ороша́еми пе́снь воспева́ху, глаго́люще: превозноси́мый отце́в и на́с Бо́же, благослове́н еси́.

Разруши́вше опло́т злоче́стия вяза́ньми свяще́нными ва́шими, всехва́льнии, мои́х согреше́ний бре́мя расточи́те, и вопию́ща, му́ченицы, спаси́те: благослове́н Бо́г оте́ц на́ших.

Ту́чами свяще́нных ва́ших крове́й, ересе́й о́гнь угаси́сте: и пла́менем, святи́телие прему́дрии, попали́сте нече́стия пре́лести пле́велы, и ве́рных ду́ши просвети́сте.

По́стницы воздержа́нием пло́ти умертви́вше, живу́т по сме́рти: проро́к же пра́ведных ли́к, и сочета́ние же́нское страда́льчествовавшее просла́вися. Те́х моли́твами, Христе́, от бе́д изба́ви на́с.

Сла́ва: Все́х в наде́жди жи́зни усо́пших ду́ши, Христе́, упоко́й, презира́яй я́же в житии́ те́х согреше́ния, за мно́гое благоутро́бие Твое́, Благоутро́бне Еди́не Спа́се, отце́в Бо́же, благослове́н еси́.

Богоро́дичен: Вся́ я́ко Чи́стая восприя́ла еси́ во утро́бу Сло́во воплоща́емо: Того́ моли́, Пречи́стая, прегреше́ний очи́стити мя́ души́ и те́ла, к Тебе́ чи́стою ве́рою притека́ющаго.

И́н. Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Все́ жела́ние му́чеников простре́ся ко Еди́ному Влады́це, любо́вию Тому́ соединя́емое, и пою́щее: благослове́н еси́, Го́споди Бо́же, во ве́ки.

Подае́ши ве́рою преста́вльшимся све́тлость Боже́ственнаго Ца́рствия, нетле́ния оде́жду да́руяй вопию́щим: благослове́н еси́, Го́споди Бо́же, во ве́ки.

Сла́ва: Испо́лни ра́дости и весе́лия, я́же преста́вил еси́ рабы́ Твоя́, Ще́дре, сподо́бивый и́х взыва́ти Тебе́ и пе́ти: благослове́н еси́, Го́споди Бо́же, во ве́ки.

И ны́не: Разреша́я Е́вину кля́тву, в Пренепоро́чную всели́лся еси́ Де́ву, благослове́ния исто́чник источа́я вопию́щим: благослове́н, Пречи́стая, Пло́д Твоего́ чре́ва.

Пе́снь 8

Ирмо́с: Богоглаго́ливии о́троцы в пещи́ со огне́м пла́мень попира́юще поя́ху: благослови́те дела́ Госпо́дня Го́спода.

Хра́мы и́дольския низложи́сте страда́льчествующе, и себе́ Тро́ицы Боже́ственныя хра́мы созда́сте, страстоте́рпцы Госпо́дни, а́нгелом собесе́дницы.

Свяще́нницы Твои́, Христе́, в пра́вду обле́кшеся преподо́бно с су́щими от ве́ка ны́не ра́дуются, Твою́ добро́ту зря́ще Боже́ственную ясне́йше.

Свяще́ннейших моли́твами проро́к Твои́х, и же́н присносла́вных, су́щих от ве́ка пра́ведных, ми́лости Твоя́, Сло́ве, ми́ру Твоему́ да́руй.

Благослови́м Отца́, и Сы́на, и Свята́го Ду́ха, Го́спода.

Правосу́де, егда́ хо́щеши суди́ти, я́же от на́с прия́л еси́, неосужде́ны соблюди́, презре́в те́х согреше́ния, Влады́ко.

Богоро́дичен: Я́вльшися, Де́во, души́ моея́ темне́йшыя о́блаки просвеще́нием Твои́м отжени́, Пра́вды Со́лнца ро́ждшая.

И́н. Ирмо́с: Мусики́йским орга́ном согласу́ющим, и лю́дем безчи́сленным покланя́ющымся о́бразу в Деи́ре, три́ о́троцы не повину́вшеся, Го́спода воспева́ху, и славосло́вляху во вся́ ве́ки.

Землены́я по́двиги проше́дше, Небе́сныя прия́ша венцы́ му́ченицы и́стиннии, вопию́ще Ти́ непреста́нно: Го́спода по́йте, и превозноси́те во вся́ ве́ки.

Соше́д в ро́в преиспо́днейший, и́же во гробе́х живу́щия воскреси́л еси́ живонача́льною дла́нию, и по́дал еси́ рабо́м Твои́м, ве́рою пре́жде усо́пшим поко́й, Ще́дре.

Сла́ва: Я́ко Исто́чник жи́зни присносу́щныя, я́ко сла́дости сы́й Пото́к, рабы́ Твоя́ благоче́стно к Тебе́ преста́вленыя сподо́би пе́ти, и славосло́вити Тя́ во вся́ ве́ки.

И ны́не: Мари́е Де́во Богоро́дице, Я́же Бо́га Спа́са челове́ком ро́ждшая теле́сно, спаса́й ве́рою пою́щия Твое́ Рождество́, и превознося́щия во вся́ ве́ки.

Та́же, пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: Тя́ Неискусобра́чную Ма́терь Бо́га Вы́шняго, Тя́ па́че ума́ ро́ждшую сло́вом вои́стинну Бо́га, вы́шшую пречи́стых Си́л, немо́лчными славословле́нии велича́ем.

Стоя́ху му́ченицы пред непра́ведными суди́щи, всю́ непра́вду благода́тию Христо́вою осуди́вше, и я́же от ни́х держи́мыя изъе́млюще, и венцы́ пра́вды прие́млюще.

Яви́стеся я́коже корми́ла Це́ркве, кора́бль ве́сь благоче́стно напра́вивше Бо́жиих за́поведей, вси́ первосвященнонача́льницы и па́стырие блаже́ннии: сего́ ра́ди я́ко окорми́тели ва́с чти́м.

Собо́р мо́лит Тя́, Го́споди, проро́к, и преподо́бных, сосло́вие же́н страда́льчествовавших светле́йше, и возсия́вших во обуче́нии, Человеколю́бче, мо́лит Тя́, щедро́ты Твоя́ на́м да́руй.

Сла́ва: Ея́же сподо́бишася че́сти и сла́вы ве́чныя вси́ святи́и Христо́вы: я́же ве́рно отше́дшия жития́ су́етнаго, причасти́тися рабы́ Твоя́ сподо́би, Ми́лостиве, моли́твами святы́х Твои́х.

Богоро́дичен: Нося́щи Исполне́ние благи́х во объя́тиих, Всенепоро́чная, испо́лни на́с мольбы́ ра́б Твои́х: и я́же к Бо́гу ше́ствия на́ша испра́ви, доброде́тельне укрепля́ющи жи́тельствовати.

И́н. Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шший во́лею сни́де да́же и до пло́ти, от Деви́ческаго чре́ва бы́в Челове́к. Те́мже Пречи́стую Богоро́дицу ве́рнии велича́ем.

Иму́ще му́ченицы Христо́вы непобеди́мую кре́пость, и неодоле́емую, уничижи́сте мучи́телей безбо́жное веле́ние, и Ца́рствия Небе́снаго я́ве сподо́бистеся, просвеща́еми Тро́ичными заря́ми достохва́льнии.

Разруши́ся а́д го́рький, разруши́вшу Ти́ его́, Человеколю́бче, и воскреси́вшу я́же от ве́ка та́мо спя́щия: но и ны́не я́ко Бла́г преше́дшия к Тебе́, Благоутро́бне, Невече́рняго Све́та Твоего́ сподо́би.

Сла́ва: Ве́сь еси́, Спа́се, сла́дость; ве́сь еси́ жела́ние, и любо́вь вои́стинну ненасы́тная; ве́сь еси́ добро́та несказа́нная: преста́вльшияся у́бо к Тебе́, Твоея́ красоты́ наслажда́тися благоволи́, и Боже́ственныя добро́ты Твоея́ сподо́би.

И ны́не: Спаси́ мя, ма́ти Бо́жия, ро́ждшая Христа́ Спа́са моего́, Бо́га и Челове́ка, сугу́ба естество́м, не ипоста́сию: Единоро́дна у́бо от Отца́, из Тебе́ же перворо́дна всея́ тва́ри: Его́же в сугу́бом естестве́ велича́ем.

Та́же, Досто́йно е́сть: ектения́, и свети́лен, и псалмы́ обы́чныя.

На хвали́тех стихи́ры му́ченичны, гла́с 8:

Вельми́ подвиза́стеся, святи́и, му́ки беззако́нных претерпе́сте до́блественне, и Христа́ испове́давше пред цари́; и па́ки преста́вльшеся от жития́, си́лы де́йствуете в ми́ре; и немощны́я исцеля́ете от страсте́й и́х, святи́и, моля́ще спасти́ся душа́м на́шим.

Му́ченицы Христо́вы непобеди́мии, победи́вше пре́лесть си́лою Кре́стною, наслажда́етеся благода́ти ве́чныя жи́зни; мучи́телей преще́ния не убоя́стеся, му́ками ураня́еми весели́стеся; и ны́не кро́ви ва́ша бы́ша исцеле́ния душа́м на́шим, моли́те спасти́ся душа́м на́шим.

Во броня́ ве́ры обо́лкшеся до́бре, и о́бразом Кре́стным вооружи́вше себе́, во́ини благомо́щнии яви́стеся: мучи́телем му́жески проти́вистеся, и диа́волю пре́лесть низложи́сте, побе́дницы бы́вше, венце́в сподо́бистеся, моля́щеся при́сно о на́с, во е́же спасти́ся на́м.

Поко́ин: Безме́рна е́сть блу́дно живу́щим му́ка, скре́жет зубо́в, и пла́ч неуте́шимый, гее́нна о́гненная, и тма́ кроме́шная, и че́рвь неусыпа́емый, сле́зы недействи́тельны, и су́д неми́лостивый. Сего́ ра́ди пре́жде конца́ возопии́м, глаго́люще: Влады́ко Христе́, я́же избра́л еси́, со избра́нными Твои́ми упоко́й.

Сла́ва, и ны́не: Богоро́дичен: А́з, Де́во Свята́я Богоро́дице, к покро́ву Твоему́ прибега́ю, ве́м, я́ко обря́щу Тобо́ю спасе́ние: мо́жеши бо, Чи́стая, помощи́ мне́.

На стихо́вне стихи́ры поко́йны, гла́с 8:

Подо́бен: О пресла́внаго чудесе́!

Ца́рское ми́ подписа́в свобожде́ние, ша́ры червле́ными, пе́рсты Твоя́ окровави́в Влады́ко, и обагри́в Твое́ю Кро́вию. Те́мже Тя́ ве́рою мо́лим: с перворо́дными Твои́ми причти́, и пра́ведных Твои́х ра́дости сподо́би улучи́ти, преше́дшия к Тебе́ Благоутро́бному.

Сти́х: Блаже́ни, я́же избра́л и прия́л еси́, Го́споди.

Свяще́нствовав я́ко Челове́к, закла́н бы́в я́ко А́гнец, приноше́ние приноси́лся еси́ Отцу́, челове́ка от тли́ изыма́я: преста́вльшияся у́бо я́ко Человеколю́бец, в живу́щих стране́ учини́, иде́же пото́цы сла́дости пролива́ются, иде́же исто́чницы присносу́щества истека́ют.

Сти́х: Ду́ши и́х во благи́х водворя́тся.

Глубино́ю му́дрости неизрече́нныя Твоея́ пределополага́еши живо́т, и прови́диши бу́дущая, и к жи́зни друго́й преселя́еши рабы́ Твоя́, я́же прия́л еси́ у́бо, учини́ на вода́х упокое́ния, во све́тлости святы́х, Го́споди, иде́же гла́с ра́дования и хвале́ния.

Сти́х: И па́мять и́х в ро́д и ро́д.

Сло́во сы́й Неви́димый, Единора́сленный Отцу́ и Ду́ху Созра́чный, мене́ ра́ди челове́ка пло́тию яви́лся еси́: я́ко Ми́лостив у́бо и Человеколю́бец, я́же от жития́ преше́дшия, благоле́пия Твоего́ и красоты́ добро́тами, те́х просвети́, Живонача́льнейший.

Сла́ва, и ны́не: Богоро́дичен: Я́ко заче́нши Безнача́льное Сло́во Бо́га Отца́, ма́терним Твои́м дерзнове́нием приле́жно моли́, Богороди́тельнице, учини́ти рабы́ Твоя́, иде́же ликова́ние пра́ведных непреста́нное веселя́щихся и хва́лящих Тя́, иде́же све́тлость ве́чнующая, и сла́дкий гла́с пра́зднующаго.

Тропа́рь, ектения́ и отпу́ст.

Помяни́ на́с, Христе́ Спа́се ми́ра, я́коже разбо́йника помяну́л еси́ на Дре́ве: и сподо́би все́х, Еди́не Ще́дре, Небе́снаго Ца́рствия Твоего́.

Все́м боле́знем кре́пко приобща́ющеся, я́звами ва́шими святы́ми, страстоте́рпцы, уязви́сте вся́ тмы́ бесо́в, Боже́ственною благода́тию.

Преподо́бнии Христо́вы, и Боже́ственнии святи́телие, собо́р проро́ческий, и все́х святы́х пра́ведных, Небе́сное получи́ша насле́дие: и́хже по достоя́нию да ублажи́м.

Все́х ве́рно от жития́ преста́вленных учини́, Бо́же, в страна́х пра́ведных: и Рая́ покажи́ насле́дники, боголе́пно песносло́вящих Тя́.

Сла́ва: Пе́ние Ти́, Тро́ице, приношу́ коне́чное: и́хже от земли́ преста́вила еси́ в ве́ре, святы́х сподо́би селе́ния, и мене́ блу́днаго поми́луй.

И ны́не: Богоро́дичен: Все́х до́брых Исполне́ние ро́ждши, испо́лни на́ша, Де́во, моле́ния. Согреше́ний на́м оставле́ния прося́щи, и просвеще́ния и ве́лия ми́лости.

Коне́ц осмо́му гла́су.