Глас 6

на Го́споди, воззва́х: поста́вим стихо́в 4. И пое́м 3, воскре́сны гла́са, повторя́юще пе́рвую. Гла́с 6:

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Побе́ду име́я, Христе́, ю́же на а́да, на Кре́ст возше́л еси́, да во тьме́ сме́рти седя́щия воскреси́ши с Собо́ю, И́же в ме́ртвых свобо́дь, источа́яй живо́т от Своего́ све́та, Всеси́льне Спа́се, поми́луй на́с.

Дне́сь Христо́с сме́рть попра́в, я́коже рече́, воскре́се, и ра́дование ми́рови дарова́, да вси́ взыва́юще, пе́снь та́ко рце́м: Исто́чниче жи́зни, Непристу́пный Све́те, Всеси́льне Спа́се, поми́луй на́с.

Тебе́, Го́споди, су́щаго по все́й тва́ри, гре́шнии ка́мо бежи́м? На Небеси́ Са́м живе́ши; во а́де попра́л еси́ сме́рть. Во глубины́ морски́я? Та́мо рука́ Твоя́, Влады́ко. К Тебе́ прибега́ем, Тебе́ припа́дающе мо́лимся: Воскресы́й из ме́ртвых, поми́луй на́с.

Сла́ва, и ны́не: Богоро́дичен: Досто́йно е́сть я́ко вои́стинну блажи́ти Тя́, Богоро́дицу: в Твое́ бо пречи́стое вше́д чре́во все́х Соде́тель, пло́ть бы́сть, не преложи́вся естество́м, ниже́ мечта́вся о смотре́нии, но восприя́тей из Тебе́ слове́сно одушевле́нней пло́ти соедини́вся, по ипоста́си. Отню́дуже благоче́стно, во обои́х естества́х явля́ющихся, ра́знство твори́м. Того́ моли́, Честна́я Пресвята́я, низпосла́ти на́м ми́р и ве́лию ми́лость.

Та́же, Све́те ти́хий: Посе́м проки́мен: Госпо́дь воцари́ся: Три́жды. Сти́х: Облече́ся Госпо́дь в си́лу, и препоя́сася. Та́же, Сподо́би, Го́споди, в ве́чер се́й:

Иере́й же ектении́ не глаго́лет, но пое́м на стихо́вне стихи́ру воскре́сну, гла́с 6:

Воскресе́ние Твое́, Христе́ Спа́се, а́нгели пою́т на Небесе́х, и на́с на земли́ сподо́би, чи́стым се́рдцем Тебе́ сла́вити.

И ины́я стихи́ры Пресвяты́я Богоро́дицы.

Подо́бен: Всю́ отложи́вше:

Сти́х: Помяну́ и́мя Твое́ во вся́ком ро́де и ро́де.

Кля́твою я́ко обеща́ Твоему́ пра́отцу дре́вле Бо́г Преле́тный, в после́дняя ле́та соверши́, произше́д, Пречи́стая, от чре́ва Твоего́ Боже́ственнаго, и́бо вои́стинну возсия́ из Тебе́ Госпо́дь, дла́нию содержа́й концы́, Его́же и мне́ благоуве́тлива сотвори́ в Ча́с Су́дный, Де́во Мари́е, Того́ Ца́рствия мя́ получи́ти, доброде́телей возвыше́нием, и страсте́й умерщвле́нием.

Сти́х: Слы́ши, Дщи́, и ви́ждь, и приклони́ у́хо Твое́.

Ума́ чистото́ю Иса́ия, Де́во, издале́ча прорече́, роди́ти иму́щую Созда́теля всея́ тва́ри, Тя́, Честна́я Пречи́стая: Ты́ бо яви́лася еси́ еди́на во ве́ки, Всенепоро́чная. Те́мже Тя́ молю́: оскверне́ную мою́ ду́шу очи́сти, и све́тлости Боже́ственныя о́бщника мя́ покажи́, и Боже́ственнаго Сы́на Твоего́ стоя́ния десна́го, егда́ ся́дет, я́коже пи́сано е́сть, суди́ти ми́ру всему́.

Сти́х: Лицу́ Твоему́ помо́лятся бога́тии лю́дстии.

Сме́рти разруше́ние Рождество́м Твои́м яви́ся, Ты́ бо, Отрокови́ца, еси́ живота́ нетле́ннаго пребыва́ние. Те́мже Тя́ молю́: во гробе́х а́довых страсте́й мои́х слежа́ща Ты́ воскреси́, и к весе́лию и оживле́нию, Де́во, руководи́, ко блаже́нному воздая́нию, и неги́блемыя и Боже́ственныя сподо́би ра́дости, иде́же сла́дость присносу́щная, иде́же Све́т Невече́рний.

Сла́ва, и ны́не: Богоро́дичен: Прииди́те, вси́ язы́цы, во гла́се ра́дования Пресвяту́ю Де́ву и Богоро́дицу восхва́лим, челове́ческаго существа́ горни́ло, неизрече́нных чуде́с де́лателище, о То́й бо бы́ша но́вая: Безнача́льный начина́ется, Сло́во одебелева́ет, Бо́г Челове́к быва́ет, да бо́га челове́ка соде́лает. Не премене́нием есте́ств, но соедине́нием по ипоста́си: происхо́дит бо еди́н от двою́ сопроти́вных, во двои́х соверше́нных естества́х неразде́льне познава́емый, хоте́тельне же и де́тельне по обою́ существу́. То́йже по исто́тному ве́руемь быва́я, ра́ди спаси́тельнаго смотре́ния Христо́с Бо́г на́ш, ми́ру подая́ очище́ние, ми́р и ве́лию ми́лость.

Та́же, Ны́не отпуща́еши: Трисвято́е по О́тче на́ш: Тропа́рь воскре́сен. Сла́ва, и ны́не: Богоро́дичен его́. И отпу́ст.

на Го́споди, воззва́х: поста́вим стихо́в 10: и пое́м настоя́щия стихи́ры воскре́сны, гла́с 6:

Сти́х: Изведи́ из темни́цы ду́шу мою́, испове́датися и́мени Твоему́.

Побе́ду име́я, Христе́, ю́же на а́да, на Кре́ст возше́л еси́, да во тьме́ сме́рти седя́щия воскреси́ши с Собо́ю, И́же в ме́ртвых свобо́дь, источа́яй живо́т от Своего́ све́та, всеси́льне Спа́се, поми́луй на́с.

Сти́х: Мене́ жду́т пра́ведницы, до́ндеже возда́си мне́.

Дне́сь Христо́с сме́рть попра́в, я́коже рече́, воскре́се, и ра́дование ми́рови дарова́, да вси́ взыва́юще, пе́снь та́ко рце́м: Исто́чниче жи́зни, Непристу́пный Све́те, всеси́льне Спа́се, поми́луй на́с.

Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.

Тебе́, Го́споди, су́щаго по все́й тва́ри, гре́шнии ка́мо бежи́м? На небеси́ Са́м живе́ши, во а́де попра́л еси́ сме́рть. Во глубины́ морски́я? Та́мо рука́ Твоя́, Влады́ко. К Тебе́ прибега́ем, Тебе́ припа́дающе мо́лимся: Воскресы́й из ме́ртвых, поми́луй на́с.

И́ны стихи́ры Анато́лиевы, гла́с то́йже.

Сти́х: Да бу́дут у́ши Твои́, вне́млюще гла́су моле́ния моего́.

Кресто́м Твои́м, Христе́, хва́лимся, и Воскресе́ние Твое́ пое́м и сла́вим: Ты́ бо еси́ Бо́г на́ш. Ра́зве Тебе́ ина́го не ве́мы.

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Вы́ну благословя́ще Го́спода, пое́м Воскресе́ние Его́: Кре́ст бо претерпе́в, сме́ртию сме́рть погуби́.

Сти́х: И́мене ра́ди Твоего́, потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Сла́ва си́ле Твое́й, Го́споди, я́ко упраздни́л еси́ держа́ву иму́щаго сме́рти; обнови́л еси́ на́с Кресто́м Твои́м, да́руя на́м живо́т и нетле́ние.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Погребе́ние Твое́, Го́споди, у́зы а́довы сокруши́вшее растерза́; е́же из ме́ртвых воскресе́нием¹⁰ ми́р просвети́. Го́споди, сла́ва Тебе́.

И́ны стихи́ры Богоро́дице, творе́ние Па́вла Аморре́йскаго, гла́с 3:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Ви́дящи не́мощь мою́ теле́сную, и душе́вное страда́ние, и серде́чное озлобле́ние, посеще́ния сподо́би мя́ Боже́ственнаго, Всенепоро́чная Де́во, спаси́ мя, молю́ся, те́плыми Твои́ми моли́твами.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Все́х преидо́х, Влады́чице, согреше́ньми, но мно́жества си́х, Де́во, очи́щши, ми́лостей получи́ти ми́, Чи́стая, сподо́би, в бу́дущем суде́ Сы́на и Бо́га Твоего́.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Мно́жество согреше́ний мои́х, зову́щаго очи́сти, Чи́стая, и чу́вствий мои́х неуста́вная движе́ния, моли́твенным мече́м ссецы́: я́ко да ве́рою и любо́вию пою́ Твое́ безсе́менное Рождество́.

Сла́ва, и ны́не: Богоро́дичен: Кто́ Тебе́ не ублажи́т, Пресвята́я Де́во? Кто́ ли не воспое́т Твоего́ Пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́, Чи́стыя, про́йде, неизрече́нно вопло́щся, естество́м Бо́г сы́й, и естество́м бы́в Челове́к на́с ра́ди, не во двою́ лицу́ разделя́емый, но во двою́ естеству́ несли́тно познава́емый. Того́ моли́, Чи́стая, Всеблаже́нная, поми́ловатися душа́м на́шим.

Та́же, Све́те ти́хий: Проки́мен дне́: Госпо́дь воцари́ся: И про́чее по обы́чаю.

На стихо́вне стихи́ры. Гла́с 6:

Воскресе́ние Твое́, Христе́ Спа́се, а́нгели пою́т на Небесе́х, и на́с на земли́ сподо́би, чи́стым се́рдцем Тебе́ сла́вити.

По алфави́ту.

Сти́х: Госпо́дь воцари́ся, в ле́поту облече́ся.

Врата́ сокруши́в ме́дная, и вереи́ а́довы сотры́й, я́ко Бо́г всеси́лен, ро́д челове́ческий па́дший воскреси́л еси́. Сего́ ра́ди и мы́ согла́сно вопие́м: Воскресы́й из ме́ртвых, Го́споди, сла́ва Тебе́.

Сти́х: И́бо утверди́ вселе́нную, я́же не подви́жится.

Тле́ния на́с дре́вняго Христо́с испра́вити хотя́, на Кресте́ пригвожда́ется, и во гро́бе полага́ется, Его́же мироно́сицы жены́ со слеза́ми иска́ху, пла́чуща глаго́лаху: увы́ на́м, Спа́се все́х, ка́ко изво́лил еси́ во гро́бе всели́тися? Всели́выйся же хотя́, ка́ко укра́ден бы́л еси́? Ка́ко преложи́лся еси́? Ко́е же ме́сто Твое́ Живоно́сное сокры́ Те́ло? Но, Влады́ко, я́ко обеща́лся еси́ на́м яви́ся, и утоли́ от на́с рыда́ние сле́з. Пла́чущимся же и́м, А́нгел к ни́м возопи́: от пла́ча преста́вша апо́столом рцы́те, я́ко воскре́се Госпо́дь, ми́рови да́руя очище́ние, и ве́лию ми́лость.

Сти́х: До́му твоему́ подоба́ет святы́ня, Го́споди, в долготу́ дни́й.

Распны́йся я́ко восхоте́л еси́, Христе́, и сме́рть погребе́нием Твои́м плени́вый, тридне́вен воскре́сл еси́, я́ко Бо́г со сла́вою, ми́рови да́руя безконе́чную жи́знь, и ве́лию ми́лость.

Сла́ва, и ны́не: Богоро́дичен: Творе́ц и Изба́витель мо́й, Пречи́стая, Христо́с Госпо́дь из Твои́х ложе́сн проше́д, в мя́ оболки́йся, пе́рвыя кля́твы Ада́ма свободи́. Те́мже Ти́, Всечи́стая, я́ко Бо́жии Ма́тери же и Де́ве, вои́стинну вопие́м немо́лчно: ра́дуйся, а́нгельски, ра́дуйся, Влады́чице, предста́тельство и покро́ве, и спасе́ние ду́ш на́ших.

Та́же, Ны́не отпуща́еши: Трисвято́е по О́тче на́ш:

Тропа́рь воскре́сен, гла́с 6:

А́нгельския Си́лы на гро́бе Твое́м, и стрегу́щии омертве́ша; и стоя́ше Мари́я во гро́бе, и́щущи Пречи́стаго Те́ла Твоего́. Плени́л еси́ а́д, не искуси́вся от него́, сре́тил еси́ Де́ву да́руяй живо́т. Воскресы́й из ме́ртвых, Го́споди, сла́ва Тебе́.

Сла́ва, и ны́не: Богоро́дичен: Благослове́нную нареки́й Твою́ Ма́терь, прише́л еси́ на Стра́сть во́льным хоте́нием, возсия́в на Кресте́, взыска́ти хотя́ Ада́ма, глаго́ля а́нгелом: сра́дуйтеся Мне́, я́ко обре́теся поги́бшая дра́хма, вся́ му́дре устро́ивый, Бо́же на́ш, сла́ва Тебе́.

Посе́м отпу́ст,

Кано́н Пресвяте́й Богоро́дице. Гла́с 6:

Пе́снь 1

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м вопия́ше.

Припе́в: Пресвята́я Богоро́дице, спаси́ на́с.

Неоску́дну благода́ть иму́щи я́ко Боже́ственную, Ма́ти Безневе́стная, к Тебе́ прибега́ющих не пре́зри, от бе́д и скорбе́й при́сно спаса́ющи.

Се́ вре́мя наста́ моего́ уны́ния, воста́ни, Пречи́стая Влады́чице, и по́мощи да́ждь ми́ ру́ку: Ты́ бо ми́р Боже́ственнаго весе́лия испо́лнила еси́.

Сла́ва: Держа́вный Тво́й покро́в, Богороди́тельнице, я́ко засту́пница су́щи, да́ждь ми́ вско́ре напа́стьми одержи́му, и невре́дна от си́х сохрани́ мя.

И ны́не: Души́ мое́й сме́рть притека́ет, искуше́ния же ненави́дящих, я́ко а́спиды обыдо́ша погуби́ти мя́: но Сама́ мя, Богоро́дице, спаси́.

Пе́снь 3

Ирмо́с: Разшири́шася на враги́ моя́ уста́ моя́, я́ко утверди́ся о Го́споде се́рдце мое́.

Умерщвле́нную ду́шу мою́ прегреше́ньми, Живо́т я́ко ро́ждшая, Богоро́дице, оживи́.

От вся́каго искуше́ния соблюди́, к Тебе́ прибега́ющих, Богоро́дице, упова́ние на́ше.

Сла́ва: От востаю́щих на мя́ напа́стей го́рько, спаси́ мя, Ма́ти Го́спода моего́ Пренепоро́чная.

И ны́не: Я́же ми́рови спасе́ние подаю́щи Боже́ственным Рождество́м Твои́м, от бе́д мя́ премени́.

Пе́снь 4

Ирмо́с: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися, и челове́ком яви́тися, и глаго́лаше: услы́шах слу́х Тво́й, и убоя́хся. Сла́ва си́ле Твое́й, Го́споди.

Изнемо́же нището́ю кре́пость души́ моея́, Богороди́тельнице, и лю́тое на мя́ омраче́ние нападе́, от прегреше́ний иму́щее нахо́д: при́зри я́ко светоно́сный о́блак Бо́жий, и просвети́ мя, молю́ся.

Бу́ри зо́л мои́х, и смуще́ние прегреше́ний, преложи́ в тишину́ спасе́ния, я́ко су́щи приста́нище, Всенепоро́чная. Рыка́юще и́щут мя́, я́ко льво́ве пожре́ти, па́губы те́х изба́ви мя́, молю́ся.

Сла́ва: В нощи́ и во дни́, на земли́ же и в мо́ри, и на вся́ком ме́сте, спасе́ние тве́рдо су́щи, Богоро́дице, покро́ве непобеди́мый, спаса́й мя́: по Бо́зе бо на Тя́ вои́стинну христиа́не упова́ем.

И ны́не: От вели́ких и разли́чных прегреше́ний же и напа́стей, всегда́ спаса́еши мя́. Те́мже я́ко ро́ждшую Тя́ Го́спода молю́, и к Тебе́ прибега́ю, непобеди́мей по́мощи скорбя́щим: от бе́д изведи́ мольба́ми Твои́ми.

Пе́снь 5

Ирмо́с: Све́т возсия́й ми́ру, Христе́, просвети́ се́рдце мое́ от но́щи Тебе́ зову́ща, и спаси́ мя.

Спасе́ния Тя́ покро́в сла́вим, Сло́ва Ма́ти, Всенепоро́чная, наве́т не боя́щеся челове́ческих.

Иму́ще Тя́ сте́ну необори́му, искуше́ний же и печа́ли воста́ния избавля́емся, Пречи́стая.

Сла́ва: Изми́ мя от злы́х челове́к язы́ка, Чи́стая, я́коже бо бри́тва изостри́ся, погуби́ти иски́й ду́шу мою́ го́рько.

И ны́не: Приле́жно Ти́ припа́даю, моля́ся: я́ко Ма́ти Зижди́теля моего́, одержа́щих мя́ бе́д свободи́.

Пе́снь 6

Ирмо́с: Ки́том пожре́н грехо́вным, вопию́ Тебе́, Христе́, я́ко проро́ка из истле́ния мя́ свободи́.

Го́рести вку́с прие́м, Боже́ственныя сла́дости отчужди́хся, Пречи́стая, те́мже вопию́ Ти: да́руй ми́ по́мощь.

Омраче́ние страсте́й, раба́ мя тли́ соде́ла: те́мже Све́т ро́ждшая, свободи́ мя, Влады́чице.

Сла́ва: Согла́сно Тебе́ и ве́рно испове́даюся, Пречи́стая, и пожру́ Ти́ же́ртву, Тобо́ю изба́влься ско́рби.

И ны́не: Отверзо́шася на мя́ непра́вды уста́, Влады́чице: те́мже мя́ я́ко Засту́пница, си́х вско́ре свободи́.

Та́же, Го́споди, поми́луй, три́жды: Сла́ва, и ны́не:

Конда́к, гла́с 6: Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы, но предвари́ я́ко Блага́я на по́мощь на́с, ве́рно зову́щих Ти́. Ускори́ на моли́тву, и потщи́ся на умоле́ние предста́тельствующи при́сно, Богоро́дице, чту́щих Тя́.

Пе́снь 7

Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Искуше́ния ду́ши моея́, ю́же ту́чнии юнцы́ ны́не обыдо́ша, Пресвята́я Де́во, Сама́ мя си́х свободи́.

Защища́ющи то́щно, в беде́ су́щих и в печа́ли, ра́дость, Богоро́дице, подае́ши всегда́.

Сла́ва: Побежде́на мя́ всего́ отча́янием де́л и печа́ли, огради́ мя, Де́во, я́ко покро́в все́м неруши́мый.

И ны́не: Предста́тельством Твои́м избавля́емся бе́д и скорбе́й, и обрета́ем бога́тство ве́лие неистоща́емо.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти, Тя́ превозно́сим во вся́ ве́ки.

От челове́ческих снеда́юся озлобле́ний, и молю́ся Богоро́дице, изба́ви мя́ су́етнаго сове́та и́х.

Победи́хся в печа́лех искуше́нии мои́ми, и молю́ся, Влады́чице, от си́х мя́ спаси́ невреди́ма.

Сла́ва: Спаси́ мя, Чи́стая, от челове́ка льсти́ва, и язы́ка, и у́ст, и мучи́тельства, и вся́кия ну́жды.

И ны́не: И́же нра́вом прельща́емь е́смь, без отве́та сы́й, к Богоро́дице зову́: вся́ческих мя́ изба́ви зо́л.

Пе́снь 9

Ирмо́с: Е́же ра́дуйся от А́нгела прии́мшая, и ро́ждшая Созда́теля Своего́, Де́во, спаси́ Тя велича́ющия.

Ми́лостива ми́ в печа́лех жития́, Богоро́дице, бу́ди, и спаси́ от бе́д ны́не прибега́ющаго к Тебе́.

Вои́стинну еди́на на земли́ и в мо́ри яви́лася еси́, Чи́стая, кро́в неразори́мь, прибега́ющим Ти́ несумне́нною душе́ю.

Сла́ва: Без ума́ себе́ вся́ческими порабо́тившу лю́тыми паде́ньми, мольба́ми Твои́ми свобо́ду пода́ждь ми́, Всепе́тая.

И ны́не: Тя́ наде́жду и заступле́ние тве́рдо стяжа́в, Чи́стая, велича́я Тя́ я́ко Богоро́дицу, пе́снь ве́рою скончава́ю.

Та́же, Досто́йно е́сть: И Трисвято́е по О́тче на́ш: конда́к гла́са.И про́чее по обы́чаю, и отпу́ст.

Кано́н Пресвяте́й и Живонача́льней Тро́ице, [его́же краестро́чие: Шесто́е пе́ние приноша́ю Тебе́, Божество́.] Творе́ние Митрофа́ново. Гла́с 6.

Пе́снь 1

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припе́в: Пресвята́я Тро́ице Бо́же на́ш, сла́ва Тебе́.

Три́ ипоста́си пое́м Богонача́льныя, Еди́нственнаго естества́ неизме́нный зра́к, блага́го Человеколю́бца Бо́га, прегреше́ний очище́ние на́м да́рующа.

Пресу́щный еди́не, и трисия́нный начерта́ньми Го́споди, в Божестве́ еди́ном сы́й, вразуми́ на́с, и сподо́би Твоего́ Боже́ственнаго сия́ния.

Сла́ва: Невестоукраси́в Па́вел, ю́же от язы́к Це́рковь, Еди́ному Тебе́ Триипоста́сному Бо́гу покланя́тися научи́, от Него́же, и И́мже, и в Не́мже вся́ бы́ша.

И ны́не: Богоро́дичен: Из чре́ва Твоего́ про́йде у́мное, Богоро́дице, Со́лнце, и осия́ на́с Трисве́тлаго Божества́ заря́ми. Его́же пою́ще, благоче́стно Тя́ ублажа́ем.

Пе́снь 3

Ирмо́с: Не́сть свя́т, я́коже Ты́, Го́споди, Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Украси́в, Трисве́тлый Бо́же, чи́ны Небе́сныя, устро́ил еси́ пе́ти Тя́ трисвяты́ми гла́сы. С ни́миже приими́ и на́с воспева́ющих Твою́ бла́гость.

Еди́но непрело́жное тро́ичное, сообра́зное еди́нственное Богонача́лие пою́ще, мо́лим Тя́ те́пле, грехо́в мно́гих низпосла́ти ны́не на́м проще́ние.

Сла́ва: У́ме Безнача́льный О́тче, сообра́зный Бо́жий Сло́ве, и Ду́ше Боже́ственный, Благи́й и Пра́вый, воспева́ющия ве́рно Твою́ держа́ву, соблюди́ я́ко Благоутро́бен.

И ны́не: Богоро́дичен: Па́жить потреби́ тли́, челове́к по существу́ бы́в Бо́г мо́й, во утро́бе Твое́й, Чи́стая, и родонача́льники пре́жняго осужде́ния Еди́н свободи́.

Та́же, Го́споди поми́луй, три́жды.

Седа́лен, гла́с 6. Подо́бен: Е́же о на́с:

Влады́ко Бо́же, при́зри с Небесе́, и ви́ждь на́ше смире́ние я́ко Ще́др, и умилосе́рдися, Человеколю́бче Преблаги́й: ни отку́ду бо наде́емся проще́ние получи́ти злы́х, и́миже согреши́хом. Те́мже бу́ди с на́ми, и никто́же на ны́.

Сла́ва, и ны́не: Богоро́дичен: Влады́чице Чи́стая, при́зри, Богоро́дице, ви́ждь на́ших я́зв боле́зни, и умилосе́рдися, Пречи́стая, и исцели́ со́вестное жже́ние, Твое́ю ми́лостию ороша́ющи, и вопию́щи рабо́м Твои́м: Аз е́смь с ва́ми, и никто́же на вы́.

Пе́снь 4

Ирмо́с: Христо́с моя́ си́ла, Бо́г и Го́сподь, честна́я Це́рковь, боголе́пно пое́т взыва́ющи, от смы́сла чи́ста о Го́споде пра́зднующи.

Возвыша́яй мы́сль, Еди́нице Трисве́тлая, и ду́шу и се́рдце Твои́х певе́ц ско́ро возведи́, и сия́ния Твоего́ и све́тлости сподо́би.

Претвори́ и преобрази́ от зло́бы мя́ вся́кия к доброде́тели, Еди́на неизображе́нная, и неизме́нная Тро́ице, и Твои́ми заря́ми просвети́.

Сла́ва: Помы́слив пре́жде, му́дре соста́вил еси́ а́нгелов чи́ны, служи́тельныя Твоея́ бла́гости, Триипоста́сная Еди́нице, с ни́миже приими́ мою́ хвалу́.

И ны́не: Богоро́дичен: И́же естество́м несозда́нный Бо́г Присносу́щный, созда́нное восприе́м челове́ческое естество́, возобрази́ во Святе́й Твое́й утро́бе, Богоро́дице Присноде́во.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, И́стиннаго Бо́га, от мра́ка грехо́внаго взыва́юща.

Помышля́юще естество́ Богонача́льное, промысли́тельное и спаси́тельное все́х су́щее, Владыко, Трисве́тлое же Еди́но, к Тебе́ у́тренюем, проще́ния прося́ще грехопаде́ний.

О́тче Безнача́льный Бо́же, и Соприсносу́щный Сы́не, и Ду́ше Святы́й, утверди́, Единонача́льная Тро́ице, Твоя́ певцы́, и от вся́кия напа́сти изба́ви и ско́рби.

Сла́ва: Управля́яй сия́ньми Богоде́тельными, и к благоугожде́нию Твоего́ Триипоста́снаго Божества́, Со́лнце Сла́вы, наставля́я мя́ при́сно, и Боже́ственнаго Ца́рствия сотвори́ прича́стника.

И ны́не: Богоро́дичен: И́же вся́ нося́й и соблюда́яй всеси́льною Твое́ю руко́ю, Сло́ве Бо́жий неизме́нне, сохрани́ и соблюди́ Тя сла́вящия, моли́твами Ро́ждшия Тя́ Богома́тере.

Пе́снь 6

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Прему́дрость и ра́зум, Богонача́лие Трисве́тлое певце́м Твои́м да́руй, и добро́ты луча́ми светоде́тельныя Твоея́ бла́гости, осиява́тися все́х сподо́би. [Два́жды.]

Сла́ва: Све́те Неразде́льный по существу́, Трисия́нне, Вседержи́тельне, Непристу́пне, сердца́ озари́ ве́рно хва́лящих держа́ву Твою́, и к Боже́ственней любви́ впери́.

И ны́не: Богоро́дичен: В Тя́ всели́ся, Присноде́во, я́ве Вседержи́тель и Госпо́дь все́х, и Еди́ному Трисия́нному зра́ку Божества́ челове́ки покланя́тися научи́.

Го́споди, поми́луй, три́жды.

Седа́лен, гла́с 6: Подо́бен: Е́же о на́с:

О́тче и Сы́не со Ду́хом Святы́м, при́зри на ны́ ве́рою Тебе́ покланя́ющияся, и сла́вящия держа́ву Твою́, Благоутро́бне, со о́гненными бре́ннии, ино́го бо ра́зве Тебе́ не ве́мы, и возопи́й пою́щим Тя́: Аз е́смь с ва́ми, и никто́же на вы́.

Сла́ва, и ны́не: Богоро́дичен: При́зри на ны́, Всепе́тая Богоро́дице, возсия́й просвеще́ние сердца́м омраче́нным, и озари́ ста́до Твое́, Пречи́стая. Ели́ко бо хо́щеши и мо́жеши, я́ко Ма́ти су́щи Зижди́теля Твоего́, и возопи́й моля́щим Тя́: Аз е́смь с ва́ми, и никто́же на вы́.

Пе́снь 7

Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Кре́пкую мне́ мы́сль устро́й, Трисве́тлая Начерта́ньми Еди́нице, е́же храни́ти и соблюда́ти Боже́ственныя за́поведи Твоя́, и всегда́ пе́ти Тебе́ ве́рно: благослове́н еси́, Бо́же оте́ц на́ших.

Я́ко то́ждеством естества́ пое́мый неизрече́нно, Еди́нственный Бо́же, ли́цы же Тро́ицы нося́ число́, соблюди́ все́х на́с от разли́чных искуше́ний и обстоя́ний.

Сла́ва: Соесте́ственна и Соприсносу́щна сла́вим, Еди́наго Тя́ по существу́ Бо́га, сво́йствы неслия́нне ипоста́сными Тро́ице, разли́чное про́сто предлага́юще, во зра́це непреме́ннем я́ве.

И ны́не: Богоро́дичен: Бо́г Пресу́щный прия́т, Пречи́стая, от чре́ва Твоего́ чи́стаго на́ше человеколюбе́зне смеше́ние я́ве, и все́х научи́ вопи́ти: благослове́н еси́, Бо́же оте́ц на́ших.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Очище́ние прегреше́ний ско́ро пода́ждь ми́, и страсте́й многообра́зных избавле́ние, сообра́зная Тро́ице, Еди́нице Триипоста́сная: да Тя́ сла́влю во вся́ ве́ки.

Воли́тель ми́лости изве́ствован, я́ко Бо́г ми́лостив, все́х поми́луй, Трисве́тлая Еди́нице и Тро́ице Преблага́я, славосло́вящих Твое́ вели́чествие.

Сла́ва: От Све́та Присносу́щнаго Отца́, Све́та Соприсносу́щна ро́ждшася Сло́ва, со Ду́хом исхо́дным Све́том, ве́рою сла́вим, и превозно́сим во вся́ ве́ки.

И ны́не: Богоро́дичен: Врача́ челове́ком, Пречи́стая, родила́ еси́ Всеси́льнаго Сло́ва, Христа́ Го́спода, прароди́тельныя я́звы все́х исцеля́юща, превознося́щих Его́ во ве́ки.

Пе́снь 9

Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти. Тобо́ю же, Всечи́стая, яви́ся челове́ком Сло́во Воплоще́нно. Его́же велича́юще, с Небе́сными во́и Тя́ ублажа́ем.

Зре́ти чи́нове херуви́мстии, Влады́ко, добро́ты Твоея́ сла́вы не могу́ще, кри́лы покрыва́ющеся, непреста́нно тро́ичную пе́снь вопию́т, Триипоста́сную Твоего́ Богонача́лия Еди́нственнаго держа́ву сла́вяще.

Твоя́ сия́ния, Со́лнце Незаходи́мое, Твои́х рабо́в пода́ждь сердца́м, и просвети́ ду́ши, и изба́ви от мно́гих прегреше́ний, Еди́не Всеми́лостиве, и Триипоста́сне, и нетле́нныя Твоея́ жи́зни на́с сподо́би.

Сла́ва: Е́же Све́т Единоче́стный, и Трисо́лнечный, и Светоде́тельный, Божество́ су́щее, озари́ ве́рою Тя́ пою́щих, и от мра́чнаго изба́ви злоде́йства, и сподо́би светле́йших Твои́х селе́ний, я́ко Преблаги́й.

И ны́не: Богоро́дичен: Прему́дре челове́ка пре́жде созда́ Сы́н Тво́й, Де́во, и истле́вшаго обнови́ Тобо́ю, Всепе́тая, и Боже́ственнаго Све́та зари́ невече́рния все́х испо́лни, Тя́ Богоро́дицу и́стинну ве́рою сла́вящих.

Посе́м припе́в Григо́рия Синаи́та, Досто́йно е́сть: И про́чее полу́нощницы.

По екса́ псалме́х, Бо́г Госпо́дь, и яви́ся: на гла́с 6, и глаго́лем тропа́рь: А́нгельския си́лы на гро́бе Твое́м: [Два́жды.] Сла́ва, и ны́не: Благослове́нную нареки́й Твою́ Ма́терь: И обы́чное стихосло́вие Псалти́ря.

По 1-м стихосло́вии, седа́льны воскре́сны, гла́с 6:

Гро́бу отве́рсту, а́ду пла́чущуся, Мари́я вопия́ше ко скры́вшимся апо́столом: изыди́те виногра́да де́лателие, пропове́дите Воскресе́ния сло́во: воскре́се Госпо́дь, подая́ ми́рови ве́лию ми́лость.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Го́споди, предстоя́ше гро́бу Твоему́ Мари́я Магдали́на, и пла́каше вопию́щи, вертогра́даря Тя́ мня́щи, глаго́лаше: где́ сокры́л еси́ Ве́чный Живо́т? Где́ положи́л еси́, И́же на престо́ле Херуви́мстем¹¹? Стрегу́щии бо Сего́, от стра́ха омертве́ша. Или́ Го́спода моего́ дади́те ми́, или́ со мно́ю возопи́йте: И́же в ме́ртвых бы́в, и ме́ртвыя воскреси́в, сла́ва Тебе́.

Сла́ва, и ны́не: Богоро́дичен: Преднапису́ет Гедео́н Зача́тие, и сказу́ет Дави́д Рождество́ Твое́, Богоро́дице: сни́де бо я́ко до́ждь на руно́, Сло́во во чре́во твое́, и прозябла́ еси́ без се́мене, земле́ свята́я, ми́рови спасе́ние, Христа́ Бо́га на́шего, Благода́тная.

По 2-м стихосло́вии седа́льны воскре́сны, гла́с 6:

Живо́т во гро́бе возлежа́ше, и печа́ть на ка́мени надлежа́ше. Я́ко Царя́ спя́ща во́ини стрежа́ху Христа́, и враги́ Своя́ неви́димо порази́вый, воскре́се Госпо́дь.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Преднапису́ет Ио́на гро́б Тво́й, и сказу́ет Симео́н воста́ние Боже́ственное, безсме́ртне Го́споди: соше́л бо еси́ я́ко ме́ртв во гро́б, разруши́вый а́дова врата́. Воскре́сл же еси́ кроме́ тле́ния я́ко Влады́ка, во спасе́ние ми́ра, Христе́ Бо́же на́ш, просвети́вый су́щия во тьме́.

Сла́ва, и ны́не: Богоро́дичен: Богоро́дице Де́во, моли́ Сы́на Твоего́, во́лею пригвожде́ннаго на Кресте́, и воскре́сшаго из ме́ртвых Христа́ Бо́га на́шего, спасти́ся душа́м на́шим.

По непоро́чных, ипакои́, гла́с 6:

Во́льною и животворя́щею Твое́ю сме́ртию, Христе́, врата́ а́дова сокруши́в я́ко Бо́г, отве́рзл еси́ на́м дре́вний Ра́й, и воскре́с из ме́ртвых, изба́вил еси́ от тле́ния живо́т на́ш.

Та́же степе́нна, гла́с 6. Антифо́н 1, и́хже повторя́юще пое́м.

На не́бо о́чи мои́ возвожу́, к Тебе́, Сло́ве: уще́дри мя́, да живу́ Тебе́.

Поми́луй на́с уничиже́нных, устроя́я благопотре́бныя Твоя́ сосу́ды, Сло́ве.

Сла́ва: Свято́му Ду́ху, вся́кая всеспаси́тельная вина́, а́ще ко́ему Се́й по достоя́нию дхне́т, ско́ро взе́млет от земны́х: восперя́ет, возраща́ет, устроя́ет горе́.

И ны́не: то́йже.

Антифо́н 2:

А́ще не Госпо́дь бы бы́л в на́с, никто́же от на́с проти́ву возмо́гл бы вра́жиим бра́нем одоле́ти: побежда́ющии бо от зде́ возно́сятся.

Зубы́ и́х да не я́та бу́дет душа́ моя́ я́ко птене́ц, Сло́ве. Увы́ мне́, ка́ко и́мам от врага́ избы́ти грехолюби́в сы́й!

Сла́ва: Святы́м Ду́хом обоже́ние все́м, благоволе́ние, ра́зум, ми́р и благослове́ние: равноде́телен бо е́сть Отцу́ и Сло́ву.

И ны́не: то́йже.

Антифо́н 3:

Наде́ющиися на Го́спода враго́м стра́шни, и все́м ди́вни: горе́ бо зря́т.

В беззако́ния ру́к свои́х, пра́ведных жре́бий, помо́щника Тя́ име́я, Спа́се, не простира́ет.

Сла́ва: Свята́го Ду́ха держа́ва на все́х – Ему́же вы́шняя во́инства покланя́ются, со вся́ким дыха́нием до́льным.

И ны́не: то́йже.

Проки́мен гла́с 6: Го́споди, воздви́гни си́лу Твою́, и прииди́ во е́же спасти́ на́с. Сти́х: Пасы́й Изра́иля вонми́, наставля́яй я́ко овча́ Ио́сифа. Вся́кое дыха́ние: Сти́х: Хвали́те Бо́га во святы́х Его́: Ева́нгелие воскре́сно, Воскресе́ние Христо́во: Псало́м пятидеся́тый. И про́чая по ря́ду.

Кано́н воскре́сен. Гла́с 6.

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припе́в: Сла́ва, Го́споди, свято́му Воскресе́нию Твоему́.

Распросте́ртыма дла́ньма на Кресте́, Оте́ческаго испо́лнил еси́ благоволе́ния, Благи́й Иису́се, вся́ческая. Те́мже побе́дную пе́снь Тебе́ вси́ пои́м.

Стра́хом к Тебе́ я́ко рабы́ня, сме́рть повеле́на приступи́ Влады́це живота́, то́ю подаю́щему на́м безконе́чный живо́т и воскресе́ние.

Богоро́дичен: Своего́ прие́мши Соде́теля, я́ко Са́м восхоте́, от безсе́меннаго Твоего́ чре́ва, па́че ума́ воплоща́ема, Чи́стая, тва́рей вои́стинну яви́лася еси́ Влады́чица.

И́н кано́н, кре́стовоскре́сен.

Пе́снь 1. Ирмо́с: Волно́ю морско́ю:

Суди́лищу Пила́тову предстои́т хотя́ беззако́нному суду́, я́ко суди́мь Судия́, и от руки́ непра́вды по лицу́ зауша́ется Бо́г, Его́же трепе́щут земля́, и Небе́сная.

Просте́рл еси́ Боже́ственнеи дла́ни Твои́, Спа́се, на Пречи́стем Твое́м и Живоно́снем Кресте́, и собра́л еси́ язы́ки в позна́ние Твое́, Влады́ко, покланя́ющияся, Го́споди, сла́вному Твоему́ Распя́тию.

Крестобогоро́дичен: Стоя́ше сле́з исто́чники испуща́ющи, Пренепоро́чная, при Кресте́ Твое́м, Спа́се, Я́же от ребра́ Твоего́ ка́пли крове́й зря́щи, Христе́, и Твою́ безприкла́дную ми́лость сла́вящи.

И́н кано́н Пресвяте́й Богоро́дице, [его́же краестро́чие: Ма́ти Бо́жия, незави́стную ми́ да́ждь благода́ть.]

Ирмо́с: Я́ко по су́ху пешеше́ствовав Изра́иль:

Прича́щшися Е́ва саду́, преслуша́ннаго бра́шна¹², кля́тву введе́: но сию́ разре́шила еси́, Чи́стая, благослове́ния нача́ток Христа́ ро́ждши.

Я́же би́сера от Боже́ственныя мо́лнии Христа́ ро́ждши, страсте́й мои́х мглу́, и прегреше́ний смуще́ние, Чи́стая, разжени́ све́том Твоея́ све́тлости.

Язы́ков ча́яние, Иа́ков из Тебе́ воплоща́емаго предзря́ше та́йно у́мныма очи́ма Бо́га, изба́вльшаго на́с хода́тайством Твои́м.

Оскуде́вшим князе́м от коле́на Иу́дова, Пречи́стая, Сы́н Тво́й и Бо́г, проше́д Во́ждь, над концы́ земны́ми ны́не вои́стинну воцари́ся.

Катава́сия: Отве́рзу уста́ моя́:

Пе́снь 3

Ирмо́с: Не́сть свя́т, я́коже Ты́, Го́споди, Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Бо́га распина́ема пло́тию зря́щи тва́рь растаява́шеся стра́хом, но содержи́тельною дла́нию на́с ра́ди Распя́таго, кре́пко держи́ма бе́.

Сме́ртию сме́рть разоре́на лежи́т окая́нная без дыха́ния: Живота́ бо не терпя́щи Боже́ственнаго прираже́ния, умерщвля́ется кре́пкий¹³, и да́руется все́м воскресе́ние.

Богоро́дичен: Боже́ственнаго Рождества́ Твоего́, Чи́стая, вся́кий естества́ чи́н превосхо́дит чу́до: Бо́га бо преесте́ственне зачала́ еси́ во чре́ве, и ро́ждши пребыва́еши при́сно Де́ва.

И́н. Ирмо́с: Тебе́ на вода́х:

Во гро́бе тридне́вствовавый воскреси́л еси́ животворя́щим Воста́нием Твои́м пре́жде умерщвле́нныя, и осужде́ния разреши́вшеся ра́достно веселя́хуся, се́ избавле́ние прише́л еси́, Го́споди, взыва́юще.

Сла́ва Твоему́ Воста́нию, Спа́се на́ш, я́ко на́с от а́да тле́ния, и сме́рти изба́вил еси́ я́ко Всеси́лен, и пою́ще глаго́лем: не́сть свя́т ра́зве Тебе́, Го́споди Человеколю́бче.

Богоро́дичен: Ты́ от Тебе́ Ро́ждшагося я́ко ви́дела еси́ уя́звлена копие́м, уязви́лася еси́ се́рдцем, Пресвята́я Всенепоро́чная, и ужаса́ющися глаго́лала еси́: что́ Тебе́ воздаде́, Ча́до, наро́д пребеззако́нный?

И́н. Ирмо́с: Не́сть свя́т, я́коже Ты́:

Тле́нную мою́ пло́ть и сме́ртную, Всечи́стая Богома́ти, из чре́ва Твоего́ несказа́нно прие́м Благи́й, и обезтле́нив сию́, ве́чне Себе́ связа́л е́сть.

Бо́га воплоща́ема из Тебе́ зря́ще, Де́во, ужаса́хуся стра́хом ли́цы а́нгельстии, и я́ко Ма́терь Бо́жию немо́лчными пе́сньми Тя́ почита́ют.

Ужасе́ся, го́ру у́мную ви́дев Тя́ проро́к Дании́л, из нея́же ка́мень отсече́ся кроме́ ру́к, и де́монская ка́пища, Богома́ти, кре́пко сокруши́.

Не мо́жет сло́во Тя́ челове́ческое, ниже́ язы́к, Де́во, похвали́ти досто́йно: из Тебе́ бо без се́мене Жизнода́вец Христо́с воплоти́тися, Пречи́стая, благоволи́.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь Боголе́пно пое́т взыва́ющи, от смы́сла чи́ста о Го́споде пра́зднующи.

Дре́во процвело́ е́сть, Христе́, и́стинныя жи́зни: Кре́ст бо водрузи́ся, и напое́н бы́в кро́вию и водо́ю от нетле́ннаго Твоего́ ребра́, живо́т на́м прозябе́.

Не ктому́ зми́й мне́ ло́жне обоже́ние подлага́ет: Христо́с бо Богоде́латель челове́ческаго естества́, ны́не невозбра́нно стезю́ живота́ мне́ отве́рзе.

Богоро́дичен: Я́ко вои́стинну неизвеща́нна и непостижи́ма, я́же Твоего́ боголе́пнаго, Богоро́дице, су́ть Рождества́, су́щим на земли́ и на Небеси́, Присноде́во, та́инства.

И́н. Ирмо́с: На Кресте́ Твое́ Боже́ственное истоща́ние:

Честны́й Кре́ст Тво́й почита́ем, и гво́зди, Христе́, и свято́е копие́ с тро́стию, вене́ц и́же от те́рний, и́миже от а́дова истле́ния изба́вихомся.

Гро́б, Cпа́се, Тя́ подъя́т во́лею ме́ртва о на́с я́вльшагося, но ника́коже возмо́же, Сло́ве, удержа́ти: я́ко Бо́г бо воскре́сл еси́, спаса́я ро́д на́ш.

Крестобогоро́дичен: Богороди́тельнице Присноде́во, Спа́са Христа́ челове́ком ро́ждшая, от бе́д и му́к изба́ви на́с, прибега́ющих ве́рою к Боже́ственному Покро́ву Твоему́.

И́н. Ирмо́с: Христо́с моя́ си́ла:

Пое́м, Пречи́стая, Тебе́ Всенепоро́чную, и́же Тобо́ю спа́сшиися, и благоче́стно пою́ще взыва́ем: благослове́нна, Я́же Бо́га, Присноде́во, ро́ждшая.

Све́т незаходи́мый, Де́во, родила́ еси́, су́щим во тьме́ жития́, пло́тию светя́щ, Всеблаже́нная, и пою́щим Тя́, ра́дость, Присноде́во, источи́ла еси́.

Благода́ть процвете́, Зако́н преста́, Тобо́ю, Всесвята́я: Ты́ бо, Чи́стая, родила́ еси́ Го́спода, подаю́щаго на́м, Присноде́во, оставле́ние.

Ме́ртва мя́ показа́ сада́ вкуше́ние, Жи́зни же Дре́во из Тебе́ я́вльшееся, Пречи́стая, воскреси́, и ра́йския сла́дости насле́дника мя́ устро́и.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Уступа́ют мне́ Херуви́ми ны́не, и пла́менное ору́жие, Влады́ко, плещи́ мне́ дае́т, Тя́ ви́девше, Сло́ве Бо́жий, и́стиннаго Бо́га, разбо́йнику пу́ть сотво́ршаго в Ра́й.

Не ктому́ бою́ся, е́же в зе́млю, Влады́ко Христе́, возвраще́ния: Ты́ бо от земли́ мя́ возве́л еси́ забве́нна, благоутро́бия ра́ди мно́гаго, к высоте́ нетле́ния Воскресе́нием Твои́м.

Богоро́дичен: И́же Богоро́дицу Тя́ от души́, Влады́чице ми́ра Блага́я, испове́дающих спаси́: Тебе́ бо предста́тельство непобори́мое и́мамы, и́стинную Богороди́тельницу.

И́н. Ирмо́с: Богоявле́ния Твоего́, Христе́:

Сне́дию дре́ва во Еде́ме прельсти́выйся в тлю́ поползе́ родонача́льник, преслу́шавый, Го́споди, за́поведи Твоя́, Преблаги́й, но сего́ Кресто́м па́ки возве́л еси́ в пе́рвую добро́ту, послушли́в Отцу́, Спа́се, бы́вый.

Твое́ю сме́ртию, Бла́же, сме́рти потреби́ся держа́ва, исто́чник жи́зни на́м источи́, и безсме́ртие дарова́ся – сего́ ра́ди Погребе́нию Твоему́ и Воскресе́нию ве́рою покланя́емся, и́мже я́ко Бо́г ми́р ве́сь просвети́л еси́.

Крестобогоро́дичен: Живы́й на Небесе́х и Творе́ц все́х Госпо́дь, во Твою́, Всенепоро́чная, всели́ся неизрече́нно утро́бу, просла́вивый Тя́ превы́шшую Небе́с, и святе́йшую чино́в невеще́ственных – те́мже ны́не и́же на земли́ Тя ублажа́ем.

И́н. Ирмо́с: Бо́жиим све́том Твои́м:

Чистото́ю возсия́вши све́тло Боже́ственное пребыва́ние Влады́ки, Всепе́тая, была́ еси́. Ты́ бо еди́на Ма́ти Бо́жия яви́лася еси́, во объя́тиих я́ко младе́нца Сего́ носи́вши.

Нося́щи добро́ту у́мную, красне́йшия Твоея́ души́, Неве́ста Бо́жия была́ еси́, запеча́тствована де́вством, Чи́стая, и све́том чистоты́ ми́р просвеща́ющи.

Да рыда́ет собра́ние злочести́вых, не пропове́дающих Тя́ я́ве Чи́стую Богома́терь: Ты́ бо врата́ Бо́жия све́та яви́лася еси́ на́м, мра́к прегреше́ний разгоня́ющи.

Пе́снь 6

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Распина́емь, Влады́ко, гвоздьми́ у́бо кля́тву ю́же на на́с потреби́л еси́; копие́м же пробода́емь в ребро́, Ада́мово рукописа́ние растерза́в, ми́р свободи́л еси́.

Ада́м низведе́ся, ле́стию запя́т бы́в, ко а́дове про́пасти, но И́же естество́м, Бо́г же и Ми́лостив, сше́л еси́ на взыска́ние, и на ра́му поне́с, совоскреси́л еси́.

Богоро́дичен: Пречи́стая Влады́чице, ро́ждшая челове́ком Ко́рмчию – Го́спода, страсте́й мои́х непостоя́нное и лю́тое утоли́ смуще́ние, и тишину́ пода́ждь се́рдцу моему́.

И́н. Ирмо́с: Я́т бы́сть:

Христоуби́йца и пророкоуби́йца бы́сть евре́йское мно́жество: я́ко бо проро́ки дре́вле и́стины су́щия та́йныя лучи́, уби́ти не убоя́ся, си́це и ны́не Го́спода, Его́же пропове́даху они́ тогда́, за́вистию влеко́ми уби́ша, но на́м бы́сть живо́т умерщвле́ние Его́.

Я́т бы́л еси́, но не удержа́н, Спа́се, во гро́бе, а́ще бо и во́лею вкуси́л еси́ сме́рти, Сло́ве, но воскре́сл еси́ я́ко Бо́г Безсме́ртен, совоздви́гнувый у́зники су́щия во а́де, и ра́дость жена́м вме́сто печа́ли пре́жния, па́ки премени́вый.

Богоро́дичен: Безче́стен Тво́й и ску́ден яви́ся ви́д плотски́й па́че челове́ков, во вре́мя Стра́сти, и́бо Божества́ существо́м, красе́н добро́тою Дави́ду показа́ся, но жезло́м Твоего́ Ца́рствия враго́в сотры́й кре́пость, – глаго́лаше Чи́стая – о Сы́не Мо́й и Бо́же, от гро́ба воста́ни.

И́н. Ирмо́с: Жите́йское мо́ре:

Вели́кий преднаписа́ во проро́цех Моисе́й Тя́, ковче́г, и трапе́зу, и све́щник, и ру́чку, обра́зно назна́менуя воплоще́ние, е́же из Тебе́ Вы́шняго, Ма́ти Де́во.

Умерщвля́ется сме́рть, и тле́ние упраждня́ется Ада́мова осужде́ния, о Влады́чице, Плоду́ Твоему́ прирази́вшееся: Жи́знь бо родила́ еси́, от истле́ния избавля́ющую пою́щих Тя́.

Зако́н изнемо́же, и се́нь ми́мо и́де, па́че ума́ и смы́сла я́вльшейся ми́ благода́ти, е́же от Тебе́, Де́во, Рождества́, Бо́га и Спа́са, Многопе́тая.

Конда́к, гла́с 6: Живонача́льною дла́нию, уме́ршия от мра́чных удо́лий, Жизнода́вец воскреси́в все́х Христо́с Бо́г, воскресе́ние подаде́ челове́ческому ро́ду: е́сть бо все́х Спаси́тель, Воскресе́ние и Живо́т, и Бо́г все́х.

И́кос: Кре́ст и погребе́ние Твое́, Жизнода́вче, воспева́ем ве́рнии, и покланя́емся, я́ко а́д связа́л еси́, Безсме́ртне, я́ко Бо́г Всеси́льный, и ме́ртвыя совоскреси́л еси́, и врата́ сме́ртная сокруши́л еси́, и держа́ву а́дову низложи́л еси́, я́ко Бо́г. Те́мже земноро́днии славосло́вим Тя́ любо́вию, воскре́сшаго, и низложи́вшаго вра́жию держа́ву всепа́губную, и все́х воскреси́вшаго в Тя́ ве́ровавших, и ми́р изба́вльшаго от стре́л змии́ных, и от пре́лести вра́жия, я́ко Бо́г все́х.

Пе́снь 7

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Рыда́ющее во Стра́сти Твое́й со́лнце, во мра́к облече́ся, и во дни́ по все́й, Влады́ко, земли́ све́т поме́рче, вопия́: благослове́н еси́, Бо́же оте́ц на́ших.

Облеко́шася, Христе́, схожде́нием Твои́м во све́т преиспо́дняя, пра́отец же весе́лия испо́лнь яви́ся ликовству́я, взыгра́ся вопия́: благослове́н еси́, Бо́же оте́ц на́ших.

Богоро́дичен: Тобо́ю, Ма́ти Де́во, Све́т возсия́ все́й вселе́нней све́тлый: Зижди́теля бо Ты́ все́х родила́ еси́ Бо́га. Его́же проси́, Всечи́стая, на́м низпосла́ти ве́рным ве́лию ми́лость.

И́н. Ирмо́с: Неизрече́нное чу́до:

О, стра́ннаго о́браза! Изра́иля Избавле́й от рабо́ты фарао́нския, распина́ется во́лею от него́, и разреша́ет вери́ги согреше́ний. Ему́же ве́рою пое́м: Изба́вителю Бо́же, благослове́н еси́.

Тебе́, Спа́са, на Ло́бнем распя́ша пребеззако́нных о́троцы нечести́вии, врата́ ме́дная и вереи́ сломи́вшаго, во спасе́ние на́с пою́щих: изба́вителю Бо́же, благослове́н еси́.

Богоро́дичен: Е́вы дре́вния свобожде́ние ро́ждшая от кля́твы, разреша́еши Ада́ма, Де́во Чи́стая. Те́мже со а́нгелы Тя́, с Сы́ном Твои́м пое́м и вопие́м: изба́вителю Бо́же, благослове́н еси́.

И́н. Ирмо́с: Росода́тельну у́бо пе́щь:

Ю́нош трие́х пе́щь не опали́, Рождество́ прообразу́ющих Твое́: Боже́ственный бо О́гнь Тебе́ не опали́в, всели́ся в Тя́, и вся́ научи́ вопи́ти: благослове́н еси́, Бо́же оте́ц на́ших.

Блажа́т концы́ Тя, Всечи́стая Ма́ти, я́коже прорекла́ еси́, просвеща́еми светолу́чными сия́ньми Твои́ми, и благода́тию пою́ще, вопию́т: благослове́н еси́, Бо́же оте́ц на́ших.

Па́губныя у́бо зу́бы в мя́ вонзе́ зми́й лука́внейший: но Са́м¹⁴ Тво́й, Богома́ти, сокруши́ Сы́н, кре́пость же мне́ даде́ вопи́ти: благослове́н еси́, Бо́же оте́ц на́ших.

Очисти́лище естества́ Ты́ еси́, еди́на Богоблаже́нная, на ра́му бо херуви́мску седя́щаго Бо́га во объя́тиих нося́щи вопие́ши: благослове́н еси́, Бо́же оте́ц на́ших.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти, Тя́ превозно́сим во вся́ ве́ки.

Иуде́йския дре́вле пророкоуби́йцы лю́ди, богоуби́йцы за́висть ны́не соде́ла, Тебе́ на Кре́ст возне́сшия, Сло́ве Бо́жий, Его́же превозно́сим во вся́ ве́ки.

Небе́снаго кру́га не оста́вил еси́, и во а́д соше́д, всего́ совоздви́гл еси́ лежа́щаго во гно́ищи, Христе́, челове́ка, Тя́ превознося́ща во вся́ ве́ки.

Богоро́дичен: От Све́та Светода́вца Сло́ва зачала́ еси́, и ро́ждши неизрече́нно Сего́, просла́вилася еси́: Ду́х бо в Тя́, Отрокови́це, Бо́жий всели́ся. Те́мже Тя́ пое́м во вся́ ве́ки.

Ин. Ирмо́с: Ужасни́ся боя́йся не́бо:

Ужасе́ся вся́к слу́х, ка́ко Вы́шний во́лею прии́де на зе́млю, а́дову кре́пость разруши́ти Кресто́м и погребе́нием, и вся́ воздви́гнути зва́ти: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Преста́ а́дово мучи́тельство, и ца́рство уничижи́ся про́чее, на Кресте́ бо на земли́ водру́зився, И́же над все́ми Бо́г, сего́ могу́тство низложи́. Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.

О, неизрече́ннаго Твоего́, Христе́, человеколю́бия, и неизглаго́ланных бла́г! Мене́ бо ви́дя погиба́юща во а́дове темни́це, Стра́сти претерпе́вый изба́вил еси́. Те́мже Тя́ благослови́м все́х Влады́ку, и превозно́сим во вся́ ве́ки.

Ин. Ирмо́с: Из пла́мене преподо́бным:

Позлаще́ною ри́зою я́коже Цари́цу Сы́н Тво́й просвети́в заре́ю Ду́ха, Тебе́ одесну́ю Себе́ поста́ви, Пречи́стая. Его́же превозно́сим во вся́ ве́ки.

И́же хоте́нием еди́ным ми́р водрузи́вый, от пречи́стыя Твоея́ утро́бы пло́ть взе́млет, свы́ше сию́ назда́ти хотя́. Его́же превозно́сим во вся́ ве́ки.

Счета́нием Сло́ва ко мне́ челове́ку, Боже́ственное жили́ще была́ еси́, Пречи́стая, просия́вши я́ве де́вства све́тлостию. Те́мже Тя́ пое́м во вся́ ве́ки.

Златоза́рный Тя́ све́щник предвообрази́, прие́мшую несказа́нно Све́т Непристу́пный, ра́зумом Свои́м озаря́ющ вся́ческая. Те́мже Тя́ пое́м, Чи́стая, во ве́ки.

Та́же, пое́м пе́снь Богоро́дицы: Вели́чит душа́ моя́ Го́спода: с припе́вом: Честне́йшую Херуви́м:

Пе́снь 9

Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти. Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем.

Страсте́й неприча́стен Ты́ пребы́л еси́, Сло́ве Бо́жий, пло́тию приобщи́вся страсте́м. Но реши́ши от страсте́й челове́ка, страсте́м бы́в стра́сть, Спа́се на́ш: Еди́н бо еси́ Безстра́стен, и Всеси́лен.

Тлю́ сме́ртную прие́м, тле́ния соблю́л еси́ те́ло Твое́ невку́сно, Твоя́ же Животворя́щая и Боже́ственная, Влады́ко, душа́, во а́де не оста́влена бы́сть, но я́коже от сна́ воскре́с, на́с совоздви́гл еси́.

Тро́ичен: Бо́га Отца́, Сы́на Собезнача́льна, вси́ челове́цы устна́ми у́бо чи́стыми сла́вим, неизрече́нную же и пресла́вную Ду́ха Всесвята́го си́лу чти́м: Еди́на бо еси́ Всеси́льная Тро́ица неразлу́чная.

И́н. Ирмо́с: Не рыда́й Мене́, Ма́ти:

А́ще и во гро́б соше́л еси́ я́ко ме́ртв, Жизнода́вче, но а́дову кре́пость разруши́л еси́, Христе́, совоздви́гнув ме́ртвыя, я́же и поглоти́, и воскресе́ние все́м по́дал еси́, я́ко Бо́г, ве́рою и любо́вию Тя́ велича́ющим.

Да ра́дуется тва́рь, и да процвете́т я́ко кри́н: Христо́с бо от ме́ртвых воста́ я́ко Бо́г. Где́ Твое́, сме́рте, ны́не жа́ло, воззове́м? Где́ Твоя́, а́де, побе́да? Низложи́ Тя в зе́млю, Возвы́сивый ро́г на́ш, я́ко Благоутро́бен.

Крестобогоро́дичен: Но́сиши Нося́щаго вся́, и держи́ши я́ко младе́нца в рука́х, из руки́ Избавля́ющаго на́с бори́теля врага́, Пречи́стая Влады́чице, и ви́диши на Кре́ст дре́ва возвыша́ема, от ро́ва зло́бы на́с возвы́сивша.

И́н. Ирмо́с: Бо́га челове́ком не возмо́жно:

Звезда́ сия́ющи заря́ми Божества́ от Иа́кова, от мра́ка содержи́мым возсия́: Тобо́ю бо, Всечи́стая, Христо́с Бо́г Сло́во соплоще́нно. И́мже просвеща́еми, с Небе́сными во́и Тя́ ублажа́ем.

Укре́плься си́лою Твое́ю и благода́тию, Тебе́ пе́снь усе́рдно от се́рдца возложи́х, но сию́ приими́, Де́во Чи́стая, благода́ть воздаю́щи Твою́ многосве́тлую, от нетле́нных сокро́вищ, Богоблаже́нная.

Поста́в показа́лася еси́ я́ве Божества́, в не́мже ри́зу телесе́ Сло́во истка́, богосоде́лав мо́й, Де́во, зра́к, в него́же обле́кся, все́х Спасе́, от смы́сла чи́ста Тебе́ велича́ющих.

Ме́ртвым воскресе́ние ны́не дарова́ся, Твои́м несказа́нным и неизрече́нным Рождество́м, Богоро́дице Всечи́стая: жи́знь бо из Тебе́ пло́тию обле́кшися, все́м возсия́, и сме́ртную дря́хлость я́ве разруши́.

По катава́сии ектения́ ма́лая. Та́же: Свя́т Госпо́дь Бо́г на́ш: Ексапостила́рий у́тренний.

На хвали́тех стихи́ры воскре́сны, гла́с 6:

Сти́х: Сотвори́ти в ни́х су́д напи́сан: сла́ва сия́ бу́дет все́м преподо́бным Его́.

Кре́ст Тво́й, Го́споди, жи́знь и воскресе́ние лю́дем Твои́м е́сть, и наде́ющеся на́нь, Тебе́ воскре́сшаго Бо́га на́шего пое́м: поми́луй на́с.

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Погребе́ние Твое́, Влады́ко, Ра́й отве́рзе ро́ду челове́ческому, и от истле́ния изба́вльшеся, Тебе́ воскре́сшаго Бо́га на́шего пое́м: поми́луй на́с.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Со Отце́м и Ду́хом Христа́ воспои́м, воскре́сшаго из ме́ртвых, и к Нему́ вопии́м: Ты́ Живо́т еси́ на́ш, и Воскресе́ние, поми́луй на́с.

Сти́х: Хвали́те Его́ во гла́се тру́бнем, хвали́те Его́ во псалти́ри и гу́слех.

Тридне́вен воскре́сл еси́, Христе́, от гро́ба я́коже пи́сано е́сть, совоздви́гнувый пра́отца на́шего. Те́мже Тя́ и сла́вит ро́д челове́ческий, и воспева́ет Твое́ Воскресе́ние.

И́ны стихи́ры Анато́лиевы.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Го́споди, ве́лие и стра́шно е́сть Твоего́ Воскресе́ния та́инство: та́ко бо произше́л еси́ от гро́ба, я́ко жени́х от черто́га, сме́ртию сме́рть разруши́вый, да Ада́ма свободи́ши. Те́мже на Небесе́х а́нгели ликовству́ют, и на земли́ челове́цы сла́вят, е́же на на́с бы́вшее благоутро́бие Твое́, Человеколю́бче.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния – вся́кое дыха́ние да хва́лит Го́спода.

О, пребеззако́ннии иуде́е, где́ су́ть печа́ти и сре́бреницы, я́же да́сте во́ином? Не укра́дено бы́сть сокро́вище, но воскре́се я́ко Си́лен. Са́ми же посрами́стеся отве́ргшиися Христа́, Го́спода Сла́вы, пострада́вша и погребе́нна, и воскре́сша из ме́ртвых. Тому́ поклони́мся.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Запеча́тану гро́бу, ка́ко окра́дени бы́сте иуде́е, стра́жи поста́вльше, и зна́мения поло́жше, две́рем заключе́нным про́йде Ца́рь? Или́ я́ко ме́ртва предста́вите, или́ я́ко Бо́гу поклони́теся, с на́ми пою́ще: сла́ва, Го́споди, Кресту́ Твоему́, и Воскресе́нию Твоему́.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Живоприя́тнаго Твоего́ гро́ба, мироно́сицы жены́ рыда́юща, достиго́ша, Го́споди, и ми́ра нося́ща, Те́ло Твое́ Пречи́стое пома́зати иска́ху. Обрето́ша же светоно́сна А́нгела на ка́мени седя́ща, и к ни́м веща́юща, и глаго́люща: что́ слезите́, из ре́бр источи́вшаго жи́знь ми́рови? Что́ и́щете я́ко ме́ртва во гро́бе Безсме́ртнаго? Те́кша же па́че возвести́те Того́ ученико́м, сла́внаго Его́ Воскресе́ния всеми́рное ра́дование, и́мже и на́с, Спа́се, просвети́вый, да́руй очище́ние и ве́лию ми́лость.

Сла́ва: стихи́ра у́тренняя ева́нгельская. И ны́не: Преблагослове́нна еси́: Славосло́вие вели́кое.

Та́же, тропа́рь воскре́сен.

Воскре́с из гро́ба, и у́зы растерза́л еси́ а́да, разруши́л еси́ осужде́ние сме́рти, Го́споди, вся́ от сете́й врага́ изба́вивый. Яви́вый же Себе́ апо́столом Твои́м, посла́л еси́ я́ на про́поведь, и те́ми ми́р Тво́й по́дал еси́ вселе́нней, Еди́не Многоми́лостиве.

Та́же, ектении́. И отпу́ст.

Помяни́ мя, Бо́же Спа́се мо́й, егда́ прии́деши во Ца́рствии Твое́м, и спаси́ мя я́ко еди́н Человеколю́бец.

Сти́х: Блаже́ни чи́стии се́рдцем, я́ко ти́и Бо́га у́зрят.

Дре́вом Ада́ма прельсти́вшагося, Дре́вом Кре́стным па́ки спа́сл еси́ и разбо́йника, вопию́ща: помяни́ мя, Го́споди, во Ца́рствии Твое́м.

Сти́х: Блаже́ни миротво́рцы, я́ко ти́и сы́нове Бо́жии нареку́тся.

А́дова врата́ и вереи́ сокруши́вый, Жизнода́вче, воскреси́л еси́ вся́, Спа́се, вопию́щия: сла́ва Воста́нию Твоему́.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Помяни́ мя, И́же сме́рть плени́вый погребе́нием Твои́м, и Воскресе́нием Твои́м ра́дости вся́ испо́лнивый, я́ко Благоутро́бен.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Мироно́сицы ко гро́бу прише́дша, А́нгела зову́ща слы́шаху: Христо́с воскре́се, просвети́вый вся́ческая.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

На Дре́ве Кре́стнем пригвозди́вшагося, и ми́р от пре́лести изба́вльшаго, согла́сно вси́ Христа́ воспои́м.

Сла́ва: тро́ичен: Отца́, и Сы́на славосло́вим, и Ду́ха Свята́го, глаго́люще: Тро́ице Свята́я, спаси́ ду́ши на́ша.

И ны́не: Богоро́дичен: Неизрече́нно в после́дняя заче́нши, и ро́ждши Созда́теля Твоего́, Де́во, спаса́й Тя́ велича́ющия.

Проки́мен: гла́с 6: Спаси́, Го́споди, лю́ди Твоя́, и благослови́ достоя́ние Твое́.

Сти́х: К Тебе́, Го́споди, воззову́, Бо́же мо́й, да не премолчи́ши от мене́.

Аллилу́ия: Живы́й в по́мощи Вы́шняго, в кро́ве Бо́га Небе́снаго водвори́тся.

Сти́х: Рече́т Го́сподеви: Засту́пник мо́й еси́, и прибе́жище мое́, Бо́г мо́й, и упова́ю на Него́.

На Го́споди, воззва́х: стихи́ры покая́нны, творе́ние Ио́сифово. Гла́с 6.

Подо́бен: А́нгельския си́лы:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Сле́зы, Спа́се, покая́ния ми́ да́ждь сокруше́нною мы́слию, я́ко да омы́ю скве́рну души́ моея́, ю́же зле́ окаля́х, де́яй непра́ведная на вся́к ча́с, име́я на сие́ моля́щую, Тебе́ Ро́ждшую, и а́нгельския ли́ки, и Твое́ человеколю́бие.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Гряди́, о душе́! И раска́йся о мно́гих гресе́х, я́же соде́яла еси́ в житии́, и мно́жеству Вы́шних во́инств моли́ся, со воздыха́нием же и слеза́ми, я́ко да вре́мя пода́стся тебе́ покая́ния, да не я́ко непло́дная смоко́вница отсле́шися во о́гнь гее́нский, всестра́стная.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Ни еди́ну на земли́ за́поведь Твою́ сотвори́х, ка́ко явлю́ся Тебе́ седя́щему на престо́ле, и сло́во да́ти, и су́д подъя́ти о все́х, я́же в ве́дении, и не в ве́дении, ко́еждо соде́ях, Христе́ мо́й? Те́мже зову́ Тебе́, Твои́х слу́г моли́твами спаси́ мя блу́днаго.

Та́же Мине́и стихи́ры свято́му. А́ще ли не́сть Мине́и, и́ны стихи́ры святы́м Небе́сным безпло́тным а́нгелом, гла́с 6.

Подо́бен: Тридне́вно воскре́сл еси́:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

А́нгельския си́лы, Христе́, предстоя́ще престо́лу Твоему́, мо́лятся о ро́де челове́честем. Те́х у́бо моли́твами ми́р все́м да́руяй, язы́ков де́рзость укроти́.

Сти́х: Хвали́те Го́спода вси́ язы́цы, похвали́те Его́ вси́ лю́дие.

О́крест престо́ла все́х Царя́, при́сно лику́юще а́нгельстии вси́ чи́нове, на́с сохраня́йте, ве́рою ва́с призыва́ющих, и муче́ний избавля́йте.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Оте́ц И́же над все́ми Бо́г, Си́лы Небе́сных умо́в, безобра́зны и невеще́ственны певцы́, Трисо́лнечныя Сла́вы Своея́ приведе́, и Еди́нственное Сло́во, и Ду́х.

Сла́ва, и ны́не: Богоро́дичен: Сло́во собезнача́льное Отцу́ же и Ду́ху, арха́нгельским гла́сом, Богоро́дице, во утро́бе заче́нши, Херуви́мов, и Серафи́мов, и Престо́лов яви́лася еси́ превы́шши.

Та́же, Све́те ти́хий: Проки́мен дне́. И Сподо́би, Го́споди, в ве́чер се́й:

На стихо́вне стихи́ры покая́нны, гла́с 6:

Во Стра́шное Прише́ствие Твое́, Христе́, да не услы́шим: не ве́м ва́с. Упова́ние бо на Тя́, Спасе́, возложи́хом, а́ще и Твоя́ повеле́ния не сохрани́хом за небреже́ние на́ше: но пощади́ ду́ши на́ша, мо́лимся.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Покая́ния не стяжа́х, ниже́ па́ки сле́з. Сего́ ра́ди молю́ Тя, Христе́ Бо́же, пре́жде конца́ обрати́ти и да́ти умиле́ние мне́, я́ко да изба́влюся от му́ки.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченицы Твои́, Го́споди, не отверго́шася Тебе́, ни отступи́ша от за́поведей Твои́х. Те́х моли́твами поми́луй на́с.

Сла́ва, и ны́не: Богоро́дичен: Арха́нгельски воспои́м ве́рнии, Небе́сный черто́г, и Две́рь запеча́тану вои́стинну: ра́дуйся, Ея́же ра́ди отрасте́ на́м Спа́с все́х Христо́с, Жизнода́вец и Бо́г. Низложи́, Влады́чице, мучи́тели, безбо́жныя враги́ на́ша, руко́ю Твое́ю, Пречи́стая, упова́ние христиа́н.

Та́же, Ны́не отпуща́еши раба́ Твоего́, Влады́ко: Трисвято́е по О́тче на́ш: тропа́рь, ектения́ и отпу́ст.

Кано́н Пресвяте́й Богоро́дице, гла́с 6.

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Моего́ ума́ о́блак страсте́й отжени́, Чи́стая, и возсия́й ми́ све́т, ро́ждшая, Пречи́стая, Сы́на, Сия́ние О́тчее, я́ко да воспою́ Тя.

Я́ко Гаврии́л Де́ве, прииди́те, ве́рнии, и мы́ вопие́м благогове́нием душе́вным: вои́стинну укра́шена, Чи́стая, ро́ждшая Ра́дость, ра́дуйся, Пречи́стая.

Сла́ва: И́же безстра́стно пре́жде ве́к от Отца́ рожде́ннаго, Пречи́стая, в после́дняя дни́ во утро́бе нося́щи Сы́на, родила́ еси́ сугу́ба, Бо́га и Челове́ка.

И ны́не: Бо́га родила́ еси́ Еди́наго без тли́, и Де́ва пребыла́ еси́ по Рождестве́, я́коже бе́ и пре́жде Рождества́, Пречи́стая – сего́ ра́ди, ве́рнии, ра́дуйся, Тебе́ зове́м.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Не́сть непоро́чны, я́коже Ты́, Пречи́стая Богоро́дице, ро́ждшая Зижди́теля и Влады́ку вся́ческим. Те́мже Ти́ вси́ ве́рнии благода́рственно, ра́дуйся, взыва́ем.

Страсте́й смуща́ет мя́ лю́тое волне́ние, Чи́стая, и го́рестьми мно́гих паде́ний во глубину́ помета́емь вои́стинну злы́х мои́х, да́ждь ми́ ру́ку, Чи́стая, и спаси́ мя.

Сла́ва: Тьму́ разруши́ мои́х прегреше́ний, Де́во, и озари́ све́том безстра́стия жи́знь несказа́нно, Чи́стая, ро́ждшая Со́лнце Неприкоснове́нное.

И ны́не: Огне́м стра́ха Бо́жия очи́стивши мя́, Отрокови́це, от прегреше́ний и скве́рны, облецы́ светоза́рною оде́ждею доброде́телей, и лико́м святы́х сочета́й.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста, о Го́споде пра́зднующи.

Све́т ро́ждшая, тьму́ разруши́ мно́гих мои́х прегреше́ний Твое́ю заре́ю, Пренепоро́чная Влады́чице, Я́же Со́лнце Пра́вды ве́рным возсия́вшая.

Наде́жду, Тебе́, Пречи́стая, ны́не предлага́ю моего́ неможе́ния: да от Тебе́ не неде́йствован отыду́, спасе́ние же получи́в воспою́ ра́дуяся.

Сла́ва: Бога́тыя щедро́ты Твоя́ да́руй на́м, Пречи́стая, ве́рою и любо́вию в Тво́й хра́м притека́ющим, и от вся́ких искуше́ний и скорбе́й изба́ви.

И ны́не: Сло́во, Пречи́стая, в Тя́ всели́ся, безслове́сия страсте́й ми́р избавля́я, Влады́чице, и Ца́рствия Небе́снаго сподобля́я воспева́ющия Тя́.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся: Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Боже́ственною заре́ю от Твои́х чре́сл Возсия́вшаго, мою́ ду́шу во тьме́ спя́щую просвети́, Де́во, и грехо́вную мглу́ отжени́, све́том мя́ Твои́м просвеща́ющи.

Ду́шу мою́ исцели́, Блага́я, впа́дающу в разбо́йники, ми́лостивне еле́й иска́пающи, и вино́ благосе́рдия Твоего́, ра́зумы незави́стно подаю́щи ми́.

Сла́ва: Плотски́я неду́ги, и душе́вныя исцели́ на́м к Тебе́ прибега́ющим, Всепе́тая: кре́пость бо еси́ притека́ющим под кро́в Твоея́ моли́твы, Богороди́тельнице.

И ны́не: Боже́ственный Ду́х Святы́й все́лься, Пресвята́я Чи́стая, в Твое́ чре́во, осени́в Тя́ показа́ до́м Тро́ицы, благоволе́нием О́тчим Сло́во заче́нши, и Сего́ ро́ждши.

Пе́снь 6

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Тьму́ разруши́ окая́нныя моея́ души́, и све́том просвети́ мя, Пречи́стая, возсия́вшим от Твои́х ложе́сн, и все́ челове́ческое естество́ озари́вшим.

Вра́г ви́димых и неви́димых наве́та изба́ви мя́, Чи́стая, и пода́ждь ми́ кро́в держа́вный Твоего́ заступле́ния: к Тебе́ бо, Де́во, ны́не прибего́х.

Сла́ва: Созда́вый вся́ческая, в после́дния дни́ от святы́я утро́бы Твоея́ воплоти́ся, челове́ческое естество́ е́же от Ада́ма лю́те попо́лзшееся устро́ив, ми́р обнови́.

И ны́не: Святы́х а́нгел благоле́пие пое́т Тя́, и а́з молю́, Пренепоро́чная: отыми́ от мене́ неле́пая бесо́в мечта́ния, в тишине́ соблюда́ющи се́рдце мое́.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 6:

Прило́зи сопроти́вных бо́рют достоя́ние Твое́, Влады́чице Чи́стая, разори́ те́х кова́рствия, и низложи́ на зе́млю горды́нное шата́ние: Ты́ бо еси́ Засту́пница ве́рно моля́щимся Ти́.

Пе́снь 7

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Просвети́вши мя́ Све́том Непристу́пным, Пречи́стая, во тьме́ неразуме́ния, и к Све́ту наста́ви ве́рно вопи́ти Сы́ну Твоему́ благоче́стно: благослове́н Бо́г оте́ц на́ших.

Омраче́нный о́блак отжени́ от души́ моея́, Богороди́тельнице, осия́вши све́том все́х Творца́: прия́телище бо еси́ Све́та Преве́чнаго, от Отца́ безстра́стно возсия́вшаго.

Сла́ва: Приклони́ся на́шим мольба́м, Чи́стая Богороди́тельнице, моли́твою ми́лостивно подви́гнися к Бо́гу: и Сего́ ми́лостива сотвори́ на́м, на Тя́, Блага́я, при́сно наде́ющимся.

И ны́не: Оскверне́на мя́ су́ща страстьми́ лука́вых дея́ний, очисти́лище да́ждь ми́, Чи́стая, сле́з ка́пли омыва́ющи сту́д лука́вый греха́ моего́, окая́ния исто́чник.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Я́же Влады́ку все́х пло́тию ро́ждшая, наси́льствия страсте́й исхити́ мя, Отрокови́це, и Творцу́ вся́ческих присво́й любо́вию, пою́щаго во вся́ ве́ки.

На одре́ боле́зненне слежа́щу ми́, посеще́нием Твои́м, Отрокови́це, возста́ви мя́, и душе́вное и теле́сное да́руй ми́ здра́вие, воспева́ющу Христа́ во ве́ки.

Сла́ва: Страсте́й мои́х пла́мень угаси́ росо́ю моли́тв Твои́х, Влады́чице: и мене́ спаси́, я́коже пре́жде Сы́н Тво́й изба́ви о́троки, превознося́щия Его́ во ве́ки.

И ны́не: Не ужаса́юся ла́яния борца́, на Тя́ упова́ние ча́яния моего́ имы́й, Блага́я: заступа́еши бо всегда́ спаса́ющи от бе́д, Тя́ восхваля́ющих.

Пе́снь 9

Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти. Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем.

Зо́л вся́ческих изба́ви к Тебе́ прибега́ющаго ве́рою, Де́во Пречи́стая, и здра́вие да́ждь ми́ прибе́гшему в покро́в Тво́й, Отрокови́це, и лю́тых избавле́ние, я́ко да во гла́сех благода́рственно при́сно сла́влю Тя́.

Кля́тву печа́ли разруши́ла еси́, Чи́стая, и ра́дость источи́ла еси́ ми́ру Рождество́м Твои́м, благослове́ния Исто́чник ро́ждши. Те́мже восхваля́юще Тя́, Всепе́тую, вси́ благода́рственно ве́рнии ублажа́ем при́сно.

Сла́ва: Све́та прия́телище, Богороди́тельнице, Твое́ чре́во бы́сть, Всепе́тая, от Отца́ возсия́вшаго пре́жде все́х ве́к. Те́мже Тя́ Богоро́дицу вси́ сла́вим – Сего́ я́ко Сы́на Твоего́ и Бо́га велича́ем.

И ны́не: Сы́на безле́тна от Отца́ возсия́вшаго, Еди́на Чи́стая, родила́ еси́ в ле́то, Ду́ха наи́тием Боже́ственнаго. Те́мже Тя́, Пречи́стая, Богоро́дицу неискусому́жную вси́ язы́ком и се́рдцем ве́рнии испове́дуем.

Та́же: Досто́йно е́сть: И покло́н и Трисвято́е по О́тче на́ш: тропа́рь. И про́чее обы́чно. И отпу́ст.

По 1-м стихосло́вии седа́льны покая́нны, гла́с 6:

П омышля́ю де́нь стра́шный, и пла́чуся дея́ний мои́х лука́вых, ка́ко отвеща́ю безсме́ртному Царю́? Ко́им же дерзнове́нием воззрю́ на Судию́ блу́дный а́з? Благоутро́бный О́тче, Сы́не Единоро́дный, и Ду́ше Святы́й, поми́луй мя́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

В о удо́ли плаче́вней, на ме́сте иде́же положи́, егда́ ся́деши, Ми́лостиве, сотвори́ти пра́ведный су́д, не обличи́ моя́ сокрове́нная, ниже́ посрами́ мене́ пред а́нгелы, но пощади́ мя, Бо́же, и поми́луй мя́.

Сла́ва, и ны́не: Богоро́дичен: Пресла́вную Бо́жию Ма́терь, и святы́х а́нгел святе́йшую, немо́лчно воспое́м се́рдцем и усты́, Богоро́дицу сию́ испове́дающе, я́ко вои́стинну ро́ждшую Бо́га воплоще́нна и моля́щуюся непреста́нно о душа́х на́ших.

По 2-м стихосло́вии седа́льны, гла́с 6:

П оми́луй на́с, Го́споди, поми́луй на́с: вся́каго во отве́та недоуме́юще, сию́ Ти моли́тву я́ко Влады́це гре́шнии прино́сим, поми́луй на́с.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Г о́споди, поми́луй на́с, на Тя́ бо упова́хом, не прогне́вайся на ны́ зело́, ниже́ помяни́ беззако́ний на́ших, но при́зри и ны́не я́ко Благоутро́бен, и изба́ви ны́ от вра́г на́ших. Ты́ бо еси́ Бо́г на́ш, и мы́ лю́дие Твои́, вси́ дела́ руку́ Твое́ю, и и́мя Твое́ призыва́ем.

Сти́х: Ди́вен Бо́г во святы́х Свои́х, Бо́г Изра́илев.

С ве́т пра́ведным при́сно, святи́и бо о Тебе́ просве́щшеся, сия́ют всегда́ я́ко свети́ла, све́щник неве́рных угаси́вше. И́хже моли́твами, Спа́се на́ш, Ты́ просвети́ свети́льник мо́й, Го́споди, и спаси́ мя.

Сла́ва, и ны́не: Богоро́дичен: В хра́ме стоя́ще Сла́вы Твоея́, на Небеси́ стоя́ти мни́м. Богоро́дице, две́рь небе́сная, отве́рзи на́м две́ри ми́лости Твоея́.

По 3-м стихосло́вии седа́льны, гла́с 6:

Подо́бен: Упова́ние:

С тра́шнаго Дне́ прише́ствия Твоего́ ужаса́юся, Христе́, и неумоле́ннаго суди́ща бою́ся и трепе́щу, я́ко имы́й мно́жество согреше́ний. Но пре́жде конца́ мя обрати́в спаси́ я́ко ми́лостив Бо́г, а́нгел Твои́х моли́твами, благоутро́бне Спа́се, еди́не Человеколю́бче.

Д уше́, в ле́ности жи́знь провожда́ющи всю́, Дне́ Су́днаго гро́знаго во уме́ не прие́млеши, воспряни́ у́бо, и покая́ние себе́ избери́, обрати́ся и возопи́й ко Христу́: Ще́дре, не воспомяни́ на́ших мно́гих согреше́ний, в ча́с осужде́ния.

Сла́ва, и ны́не: Богоро́дичен: Упова́ние, и покро́в, и приста́нище на Тя́ наде́ющимся, Богороди́тельнице блага́я, Предста́тельнице ми́ру, моли́ со Безпло́тными приле́жно, Его́же родила́ еси́ человеколю́бнаго Бо́га, изба́витися душа́м на́шим от вся́каго преще́ния, еди́на Благослове́нная.

Кано́н покая́нен ко Го́споду на́шему Иису́су Христу́ и святы́м Его́ му́чеником, [его́же краегране́сие: О́чию мое́ю Христе́ пла́ч приими́] Творе́ние Ио́сифово, гла́с 6

Пе́снь 1

Ирмо́с: Чу́вственный фарао́н потопле́н бы́сть со всево́инством, Изра́иль же проше́д посреде́ мо́ря, вопия́ше: Го́сподеви Бо́гу на́шему пои́м, я́ко просла́вися.

В па́дшаго, Христе́, разбо́йников в ру́це лука́вых, и я́звами душетле́нными, и́сполу ме́ртва бы́вша, ми́лости еле́ем уврачева́в уще́дри мя́, да Тя́ прославля́ю.

Я́ ко согреши́х мно́го, верте́п бы́х разбо́йником, рожде́йся в верте́пе Христе́, сле́з ту́чу да́руй ми́, и очи́сти, я́ко да Свято́му Ду́ху Твоему́ це́рковь бу́ду.

Му́ченичен: Ю́ношески врага́ низложи́вше, страда́льцы, богоплете́нными вои́стинну венцы́ украси́стеся, и Бо́гу в вы́шних со а́нгелы предстоите́, сла́вы исполня́еми.

Му́ченичен: И́же крове́й глубино́ю фарао́на мы́сленнаго удави́вше иногда́, честни́и великому́ченицы, к земли́ обетова́ния Небе́сней преидо́сте, Христа́ сла́вяще.

Богоро́дичен: С му́ченики, Чи́стая, с Боже́ственными проро́ки и со все́ми а́нгелы, Зижди́теля все́х моли́, спасти́ ве́рою Тя́ сла́вящих и велича́ющих.

Други́й кано́н, святы́м Небе́сным безпло́тным а́нгелом, [его́же краегране́сие: Шесто́е быва́ет у́мных пе́ние.] Творе́ние Феофа́ново. Гла́с 6.

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Н ебе́сных ли́к восхваля́ю кра́сное благоле́пие, те́х све́тлыми мо́лниями просвети́тися вопию́, молю́ Тя, Христе́, еди́наго Благоутро́бнаго. [Два́жды.]

У краше́й Сло́вом вся́, и и́же из Тебе́ Всесвяты́м Ду́хом а́нгельския ли́ки, Тебе́ ю́же все́х вину́ пе́ти устро́ил еси́ те́х, я́ко Всеси́лен.

Богоро́дичен: Твоего́ прие́мши Соде́теля я́ко Са́м восхоте́, из безсе́меннаго Твоего́ чре́ва па́че ума́ воплоща́ема, Чи́стая, тва́рем вои́стинну яви́ся Влады́чица.

Пе́снь 3

Ирмо́с: На тве́рдем ве́ры Твоея́ ка́мени помышле́ние утверди́в души́ моея́, утверди́, Го́споди: Тя́ бо и́мам, Бла́же, прибе́жище и утвержде́ние.

П ока́ятися Христо́ви обеща́хся, и от злы́х ника́коже отступа́ю. Что́ бу́ду, слепото́ю обложе́н мно́гою? Сы́не Бо́жий, Ты́ мя уще́дри.

П омышля́ю Бо́жие долготерпе́ние, изжи́в жи́знь в ле́ности окая́нный, и бою́ся, да не внеза́пу посече́ние сме́ртное предвари́т мя́.

Му́ченичен: Гоне́ния, боле́зней же и бе́д я́коже пи́щи жела́юще, му́ченицы веселя́хуся, зря́ще мы́сленныма очи́ма ве́чнующее наслажде́ние.

Му́ченичен: Я́коже на тве́рдем благоче́стия ка́мени помышле́ние утверди́вше прему́дренно, кре́постию, святи́и, многообра́зных ра́н не убоя́стеся, му́ченицы.

Богоро́дичен: Но́в на́м ра́й яви́лася еси́, Жи́зни, Чи́стая, посреде́ Дре́во иму́щий, от него́же яды́й, Пречи́стая, умерщвле́ния Ада́м лука́ваго отпуща́ется.

И́н. Ирмо́с: Не́сть свя́т, я́коже Ты́, Го́споди, Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

И́ же вся́кое слове́сное естество́, от не су́щих хоте́нием Соде́лавшее, трисвяты́ми гла́сы пое́тся в Три́ Ли́ца, и славосло́вится ве́рно. [Два́жды.]

И сточа́я ны́не благо́е, Влады́ко вся́ческих, и бога́тне излива́я, прича́стием благи́х, безпло́тныя ли́ки а́нгельския показа́л еси́, Человеколю́бче.

Богоро́дичен: Даде́ся отпуще́ние на́м Тебе́ ра́ди, Богоро́дице, Зако́на бо Влады́ка из Тебе́ вопло́щся, Стра́сти на́с ра́ди претерпе́в, и все́х изба́вил е́сть.

Пе́снь 4

Ирмо́с: Покры́ла е́сть небеса́ доброде́тель Твоя́, Христе́, и Твоего́ хвале́ния, Го́споди, вся́ испо́лнишася.

Н е осуди́ на́с согреши́вших Ти́ мно́го, но обы́чною Твое́ю, Влады́ко, ми́лостию уще́дри.

П у́ть сы́й живота́, Спа́се, смертоно́сных путе́й греха́ уклоня́тися ми́ при́сно сподо́би.

Му́ченичен: Воспаля́ющимися ра́нами угаси́сте о́гнь, пострада́вшии му́ченицы, росо́ю Боже́ственнаго Ду́ха, пребы́сте неопаля́еми.

Му́ченичен: Пото́ка Боже́ственныя пи́щи наслажда́етеся превы́спрь, му́ченицы, кро́вными тече́нии, сию́ бога́тно насле́довавше.

Богоро́дичен: Ле́ностию жи́знь мою́ ижди́в, Пречи́стая, к Твоему́ притека́ю заступле́нию, уще́дривши спаси́ мя.

И́н. Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста о Го́споде пра́зднующи.

Т ли́ неприя́тное естество́ иму́ще, боже́ственнейшии уми́ Твои́ честни́и, престо́л обстоя́т, безсме́ртия Тя́ исто́чник насле́довавшии, Человеколю́бче. [Два́жды.]

О т Свята́го Ду́ха освяща́еми а́нгельстии собо́ри, на зло́ пребыва́ют недви́жими, е́же к пе́рвому благо́му восхожде́нию обожа́еми.

Богоро́дичен: Кля́тва разори́ся прама́терняя, Тебе́ ра́ди, Богоро́дице Всенепоро́чная: Ты́ бо на́м, Пречи́стая, благослове́ния Исто́чник приснотеку́щ родила́ еси́.

Пе́снь 5

Ирмо́с: Све́т возсия́вый ми́ру, Христе́, просвети́ се́рдце мое́ от но́щи Тебе́ зову́ща, и спаси́ мя.

И́ же от Иессе́ова ко́рене израсты́й, Христе́, изсуши́ прозябе́ния страсте́й мои́х, всажда́я во мне́ стра́х Тво́й.

В оздыха́ния я́коже мыта́рь стя́жим, и злы́х отсту́пим, я́ко да воздыха́ния убежи́м ве́чнующаго.

Му́ченичен: Уя́звлени Боже́ственным ти́ жела́нием, му́ченицы Твои́, Го́споди, уязвля́еми му́ками ра́довахуся.

Му́ченичен: От коне́ц телесе́м стра́ждуще, му́ченицы, воззва́сте, и Христо́с гла́с ва́ш услы́шал е́сть.

Богоро́дичен: Небе́сная Врата́ воспое́м – Богоро́дицу, и́миже вхо́дят вси́ гре́шнии ко вхо́дом проще́ния.

И́н. Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся: Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Н а престо́ле херуви́мсте ви́дев Тя́ проро́к, Всеви́дче, Зижди́теля и Бо́га седя́ща, зна́меньми Твоему́ науча́ется влады́честву и госпо́дьству. [Два́жды.]

Т ьмы́ тьма́ми, и ты́сяща ты́сящами а́нгел, Тебе́ окружа́ема, Влады́ко, Дании́л зря́ше, совокупле́на челове́ческому зра́ку: держа́ве Твоея́ сла́вы тайнонауча́ется.

Богоро́дичен: Красе́н добро́тою Тво́й Сы́н яви́ся, па́че сыно́в земноро́дных, Всенепоро́чная Влады́чице: Сло́во бо е́сть И́же над все́ми Бо́г, а́ще и естество́ челове́ческое из Тебе́ прия́т.

Пе́снь 6

Ирмо́с: Ки́том пожре́н грехо́вным, вопию́ Тебе́, Христе́, я́ко проро́ка из истле́ния мя́ свободи́.

Воочи́вый слепы́я, Христе́, души́ моея́ отве́рзи о́чи, я́ко да све́т Тво́й у́зрю, и страсте́й тьмы́ изба́влюся.

Во́д животво́рных покая́ния испо́лнену ду́шу мою́ сотвори́, Ще́дре, ре́ки сле́з да́руя ми́.

Му́ченичен: Юдо́лия му́ченическая кри́ны исцеле́ний израща́ют, и все́х сердца́ благочести́вых облагоуха́ют.

Му́ченичен: Разреша́еми му́ками телесе́ тле́ющаго святи́и, любо́вию же ко Влады́це и се́рдцем привяза́стеся.

Богоро́дичен: Свята́я Ма́ти Бо́жия, оскверне́ное се́рдце мое́ дея́нии нечи́стыми, моли́твами Твои́ми очи́сти.

И́н. Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Ума́ чистото́ю зря́ Иа́ков, на ле́ствице низходя́ща а́нгелы Твоя́, Влады́ко, све́тло, издале́ча Твоему́ науча́шеся в пло́ти прише́ствию я́вственнейше. [Два́жды.]

Разуме́в Боже́ственное а́нгелов све́тлое ополче́ние, ра́довашеся уго́дник Тво́й, Влады́ко, Изра́иль, благочи́нно ликовству́ющее, и Твою́ неизрече́нную Сла́ву обстоя́щее.

Богоро́дичен: Го́р небе́сных вои́стинну превы́шши, а́нгельских Си́л, яви́ся гора́ я́вственная, Отрокови́ца Влады́чица, Я́же Твою́ вмести́вшая Лучу́ Божества́.

Пе́снь 7

Ирмо́с: Преподо́бных Твои́х отроко́в пе́снь услы́шавый, и пе́щь горя́щую ороси́вый, благослове́н еси́, Го́споди Бо́же оте́ц на́ших.

От зе́льныя зло́бы умо́м ослепи́хся, и не воззре́х на све́т покая́ния, Христе́ Спа́се мо́й, спаси́ мя.

Наде́юся на Твое́ благоутро́бие, припа́даю Ти́, Ще́дре, прошу́ зо́л мои́х разреше́ния, не пре́зри мя́, Влады́ко.

Му́ченичен: Преми́рною сла́вою облеки́й святы́я Твоя́ пострада́вшия в ми́ре, моли́твами и́х, Христе́ мо́й, спаси́ мя.

Му́ченичен: Законоположе́ния непра́ведная поплева́сте, пра́веднаго зако́на су́ще боже́ственнии храни́телие, ве́рою зако́нно пострада́вше.

Богоро́дичен: Ра́бий зра́к прие́мшаго Влады́ку, Отрокови́це, ражда́еши. Его́же моли́, Чи́стая, страсте́й мя́ рабо́ты свободи́ти.

И́н. Ирмо́с: Росода́тельну у́бо пе́щь соде́ла А́нгел преподо́бным отроко́м. Халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Красото́ю светле́етеся вси́ святи́и а́нгели Вседержи́теля, приближа́ющеся неизрече́нней сла́ве Христо́вей, и любо́вию всегда́ пою́ще ему́: благослове́н еси́, Бо́же, во ве́ки. [Два́жды.]

Мы́сленно о Тебе́, Влады́ко, обраща́ющеся а́нгели, непости́жно светоявле́ние Твое́ прие́млют присносу́щне, пою́ще и глаго́люще всегда́: благослове́н еси́, Бо́же, во ве́ки.

Богоро́дичен: С тобо́ю, благослове́нная, Госпо́дь, – безпло́тный Арха́нгел рече́. Истле́вшее бо естество́ обнови́ти хотя́, во чре́во Твое́ всели́ся, Чи́стая, Благослове́нная, Я́же Бо́га пло́тию ро́ждшая.

Пе́снь 8

Ирмо́с: Преподо́бнии Твои́ о́троцы в пещи́ Херуви́мы подража́ху, трисвяту́ю пе́снь воспева́юще: благослови́те, по́йте, и превозноси́те во вся́ ве́ки.

Поревнова́х немилосе́рдию бога́таго нра́вом, и презира́я моего́ обнища́вшаго ума́, пред две́рьми покая́ния огное́наго зло́бою, Христе́, да не во о́гнь по́слеши негаси́мый.

Зиме́ и в суббо́ту, до́брых пра́здности, да не от жития́ мя по́ймеши негото́ва, зи́му грехо́вную утоли́вый, Ще́дрый, но обраще́ние Боже́ственное пода́ждь ми́.

Му́ченичен: Му́ченицы нельсти́вною ве́рою ле́сть попира́юще, вся́ко му́к претерпе́ша треволне́ние, благосло́вяще, пою́ще, и превознося́ще Христа́ во ве́ки.

Му́ченичен: Возжига́ющий пла́мень му́к угаси́вше терпе́ния росо́ю, святи́и, ве́щь попали́сте безбо́жия ре́вностию Боже́ственныя любве́ распала́еми, добропобе́днии му́ченицы.

Богоро́дичен: Су́щи а́нгел честне́йшая, Бо́га Пресвята́го родила́ еси́, премно́жественне освя́щшися, Богоро́дице Де́во: те́мже ду́шу мою́ освяти́.

И́н. Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Я́коже Елиссе́я дре́вле Твоего́ уго́дника во́инствы безпло́тными огради́л еси́, та́кожде и ны́не, Христе́, Це́рковь Твою́ Тебе́ превознося́щую огради́ во ве́ки. [Два́жды.]

Изба́витися от прегреше́ний, моли́теся, Архистрати́зи Боже́ственнии, я́ко предстоя́ще престо́лу гро́зному, любо́вию сла́вящим и превознося́щим Христа́ во вся́ ве́ки.

Богоро́дичен: Я́ко Ма́тери и Де́ве, ра́дуйся, Тебе́ вопие́м с Гаврии́лом Боже́ственным, Богора́дованная: Сло́во бо на́м Бо́жие пло́тию родила́ еси́, Его́же превозно́сим во вся́ ве́ки.

Та́же, пое́м пе́снь Богоро́дицы: Вели́чит душа́ моя́ Го́спода: и про́чия стихи́.

Пе́снь 9

Ирмо́с: Е́же ра́дуйся от А́нгела прии́мшая, и ро́ждшая Созда́теля Своего́, Де́во, спаси́ Тя велича́ющия.

Ио́сиф у́бо целому́дрствовав, пшеницода́вец позна́н бы́сть – а́з же блу́дствуя, гла́дом одержи́мь е́смь доброде́тельных дея́ний.

Я́ко Пе́тр пока́явся, Христе́, сле́зы приношу́, я́ко мыта́рь воздыха́ю, я́ко блу́дный из глубины́ зову́: согреши́х, прости́ мя.

Му́ченичен: Посо́бием Христо́вым, прему́дрии, низложи́сте зло́бу вра́жию, венцы́ побе́ды с высоты́ прия́сте.

Му́ченичен: Свята́я му́ченик па́мять все́х освяща́ет Святы́м Ду́хом, правосла́вно сию́ освяща́ющих.

Богоро́дичен: Просвети́ мя омраче́ннаго грехи́, безстра́стия Све́т ро́ждшая, я́ко да пою́ Тя, Чи́стая Присноде́во.

И́н. Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти. Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем.

Дави́ду проро́ку Твоему́, я́ко преста́ти сотвори́л еси́, Твоя́ лю́ди поража́юща ору́жием Ти́ А́нгела – я́ко Ще́др пода́ждь ми́р, Христе́, все́м це́рквам, надлежа́щая ны́не облегча́я искуше́ния, я́ко Многоми́лостив. [Два́жды.]

Ви́дев люде́й Твои́х, Христе́, озлобле́ние, я́ко Вра́ч ду́ш же и теле́с исцели́ мольба́ми, Влады́ко, Твои́х служи́телей, ны́не о́крест стоя́щих Тебе́ все́х Царя́ и гла́сы непреста́нными я́ко Бо́га славосло́вящих Тя́.

Богоро́дичен: Нача́ла, Арха́нгели, Госпо́дьствия и Серафи́ми, Си́лы, вла́сти и А́нгели, Престо́ли с Херуви́мы, ны́не препросла́вленное Рождество́ Твое́ чту́ще, Тя́, Ма́ти Де́во, благогове́йно при́сно сла́вят.

Та́же, Досто́йно е́сть: И покло́н. Та́же, ектения́, и свети́лен, и псалмы́ обы́чныя.

На стихо́вне стихи́ры покая́нны, гла́с 6:

На́га мя́ обре́т от доброде́телей вра́г, стрело́ю грехо́вною уязви́: но Ты́ я́ко Вра́ч ду́ш же и теле́с, я́звы души́ моея́ исцели́, Бо́же, и поми́луй мя́.

Сти́х: Испо́лнихомся зау́тра ми́лости Твоея́ Го́споди и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Се́рдца моего́ стру́пы от мно́гих согреше́ний возра́стшия ми́ исцели́, Спа́се, я́ко ду́ш и теле́с Вра́ч, подая́ прося́щим согреше́ний проще́ние, при́сно подая́ ми сле́зы покая́ния, и да́руй ми́ разреше́ние долго́в, Го́споди, и поми́луй мя́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Го́споди, в па́мяти святы́х Твои́х, вся́ тва́рь пра́зднует, Небеса́ ра́дуются со а́нгелы, и земля́ весели́тся с челове́ки: те́х моли́твами поми́луй на́с.

Сла́ва, и ны́не: Богоро́дичен: Арха́нгельское сло́во прия́ла еси́ и херуви́мский престо́л показа́лася еси́, и на руку́ носи́ла еси́, Богоро́дице, наде́жду ду́ш на́ших.

Та́же, Бла́го е́сть испове́датися Го́сподеви: Трисвято́е по О́тче на́ш: тропа́рь, и ектения́. Та́же, ча́с 1-й: псалмы́ обы́чныя, и про́чее, и отпу́ст.

Помяни́ мя, Бо́же Спа́се мо́й, егда́ прии́деши во Ца́рствии Твое́м, и спаси́ мя, я́ко еди́н Человеколю́бец.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Пре́зри я́же в ве́дении и не в ве́дении соде́янная моя́, Иису́се Человеколю́бче, и спаса́емых ча́сти сподо́би мя́.

Сти́х: Блаже́ни есте́, егда́ поно́сят ва́м, и изжену́т и реку́т вся́к зо́л глаго́л, на вы́ лжу́ще Мене́ ра́ди.

Просвети́вый а́нгельския ли́ки, те́х мольба́ми, Христе́, зра́к се́рдца моего́ просвети́.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Вся́ко искуше́ние ра́н подъе́мше, страстоно́сцы, ра́ны и стру́пы челове́ком ве́рующим при́сно исцеля́ете.

Сла́ва: Тро́ице Святе́й поклони́мся, пое́мей а́нгельскими во́инствы, То́й вопию́ще: спаси́ ду́ши на́ша.

И ны́не: Изба́ви мя́ огня́ ве́чнаго, и му́к належа́щих ми́, Богороди́тельнице, я́ко да ублажа́ю Тя́.

на Го́споди, воззва́х; стихи́ры покая́нны, гла́с 6:

Подо́бен: Отча́янная жития́ ра́ди:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Кто́ мене́ не пла́чется, преступи́вшаго за́поведь Вы́шняго, невоздержа́ния ра́ди? Во а́д всели́хся, вме́сто Рая́, сне́ди сла́дкия виде́нием, сме́рть исхода́тайствующия, и стра́нен ея́ ра́ди Бо́жия сла́вы и жи́зни яви́хся: но приими́ мя ка́ющася, Го́споди, я́ко Ми́лостив и Человеколю́бец, вели́кия ра́ди Твоея́ ми́лости.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Ви́ждь мою́ ско́рбь и боле́знь, и прегреше́ний безме́рное мно́жество, души́ моея́ озлобле́ние, и у́мное прельще́ние, разуме́й гла́с отча́яннаго и осужде́ннаго. И да́ждь ми́, Го́споди, ду́х сокруше́н, и смире́нно се́рдце, и пода́ждь исто́чник сле́з, и мно́гих прегреше́ний проще́ние, вели́кия ра́ди Твоея́ ми́лости.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Бо́же, хотя́й все́м челове́ком спасти́ся, при́зри и услы́ши моли́тву мою́, и да не моя́ сле́зы отри́неши, я́ко су́етны. Кто́ бо прии́де к Тебе́ пла́ча, и не а́бие спасе́н бы́в? Кто́ же ли возопи́ те́пле к Тебе́, и не а́бие услы́шан бы́сть? Но, о Влады́ко! Ско́р обрета́ешися во спасе́ние моля́щимся Ти́ все́м, я́ко в ми́лости непобеди́м.

Та́же Мине́и стихи́ры свято́му. А́ще ли не́сть Мине́и: и́ны стихи́ры свято́му и вели́кому Иоа́нну Предте́чи. Гла́с то́йже.

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

В пути́ заблуди́вшаго мя́ жития́, не пре́зри, Предте́че Спа́сов: серде́чнии бо о́чи к тебе́ возвожду́, и поста́ви на ка́мени покая́ния стопы́ души́ моея́, покажи́ пу́ть пра́в ходи́ти ми́, вводя́щий во врата́ спаси́тельная, и не отри́ни стена́ние скорбя́щаго се́рдца моего́, в рожде́нных все́х преизя́щный.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Крести́телю и Предте́че Спа́сов, помо́щник ми́ бу́ди, блаже́нне, угле́бшему в тиме́нии помышле́ний нечи́стых, ру́ку ми́ пода́ждь прикосну́вшуюся верху́ нетле́нному, дела́ твори́ти покая́ния укрепи́ до́блественне, е́же пропове́дал еси́, и Ца́рствия вну́трь бы́ти, е́же пе́рвый научи́л еси́, сподо́би мя́ раба́ твоего́.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

И́же ма́тернее непло́дство, и о́тчее безгла́сие разреши́вый рождество́м твои́м, безпло́дствие разреши́ безча́днаго моего́ се́рдца; вся́ко же безслове́сие души́ отыми́ вско́ре, Сло́ву бо гла́с сы́й, возглаша́ющ покая́ние, е́же сподо́би мя́ сие́ соверша́ти всегда́, от Бо́га удали́вшагося ле́ности ра́ди, Христо́в Крести́телю.

Сла́ва, и ны́не: Богоро́дичен: Человеколю́бия Твоего́ пучи́ну, и благоутро́бия Твоего́ глубину́, и бла́гости щедро́ты неизче́тныя покажи́, Пречи́стая Де́во, на мне́ окая́ннем. Утоли́ па́жить грехо́вную, целому́дрие пода́вши, и соблюди́ с душе́ю и те́ло мое́ нескве́рно, я́же Спа́са ро́ждшая.

Та́же, Све́те ти́хий: Проки́мен дне́. Сподо́би, Го́споди, в ве́чер се́й:

На стихо́вне, стихи́ры покая́нны, гла́с 6:

Во стра́шное прише́ствие Твое́, Христе́, да не услы́шим: не ве́м ва́с. Упова́ние бо, Спа́се, на Тя́ возложи́хом, а́ще и Твоя́ повеле́ния не сохрани́хом за небреже́ние на́ше, но пощади́ ду́ши на́ша, мо́лимся.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Покая́ния не стяжа́х, ниже́ па́ки сле́з, сего́ ра́ди молю́ Тя, Христе́ Бо́же, пре́жде конца́ обрати́ти, и да́ти умиле́ние мне́, я́ко да изба́влюся от му́ки.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Страстоте́рпцы му́ченицы, Небе́снии гра́ждане, на земли́ пострада́вше, мно́ги му́ки претерпе́ша: моли́твами и́х, Го́споди, и моле́нием, все́х на́с сохрани́.

Сла́ва, и ны́не: Богоро́дичен: Никто́же притека́яй к Тебе́, посра́млен от Тебе́ исхо́дит, Пречи́стая Богоро́дице Де́во, но про́сит благода́ти, и прие́млет дарова́ние к поле́зному проше́нию.

Та́же, Ны́не отпуща́еши: Трисвято́е по О́тче на́ш: тропа́рь, ектения́ и отпу́ст.

Кано́н Пресвяте́й Богоро́дице, гла́с 6:

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Преклоне́н мно́жеством искуше́ний, и лю́тых дея́ний, вы́ю душе́вную и теле́сную преклоня́ю Тебе́, Чи́стая, и вопию́ Ти приле́жно: Ты́ мя испра́ви.

О, Всенепоро́чная Отрокови́це, кре́пкая ве́рных по́мощь, и упова́ние христиа́н! Ты́ мя свободи́ плотски́х сласте́й же и страсте́й, борю́щихся со мно́ю.

Сла́ва: Световоди́тельница су́щим во тьме́, Све́т мы́сленный ро́ждши, Пречи́стая, просвети́ мою́ ду́шу, и у́м освяти́, страсте́й и прегреше́ний тьму́ реша́щи.

И ны́не: Омраче́нныя души́ моея́, наведе́ньми безме́стных помышле́ний тьму́ разруши́, Богоро́дице Влады́чице, све́том святы́х за́поведей Воплоще́ннаго из Тебе́.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

На Тя́, Чи́стая и Пречи́стая, наде́явся, да не отпаду́ е́же к Тебе́ ча́яния, я́ко Ма́ти Человеколю́бца Бо́га ми́лостива, сете́й мя́ вра́жиих изба́ви.

Мари́е, Ма́ти Бо́жия, спасе́ния Две́ре, Е́юже про́йде Еди́н И́же все́х Творе́ц, покая́ния ны́не Боже́ственныя две́ри отве́рзи ми́, Пречи́стая.

Сла́ва: Приста́нище бу́ди ми́ и Храни́тельница чи́стая, лю́тыми треволне́нии страсте́й обурева́емому всегда́ в мо́ри жития́, Еди́на Присноде́во.

И ны́не: Мари́е, Ма́ти Бо́жия, просвети́ ду́шу мою́ помраче́ную лю́те мно́гими грехи́, и стрело́ю лука́ваго уя́звленую, и изнемо́гшую.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста, о Го́споде пра́зднующи.

Кре́пость моя́, Пречи́стая, и прибе́жище, и необоримая стена́, и к Бо́гу моли́твенница су́щи, ве́чнующаго пла́мене и гее́нны свободи́ мя.

Мари́е Всечи́стая, страсте́й молву́ моего́ ума́, и искуше́ний бу́рю разори́, Я́же безстра́стия Исто́чник ро́ждши, Ма́ти Присноде́во.

Сла́ва: Чи́стая и Всенепоро́чная, Я́же чистоты́ бы́вши прия́телище вме́стне Боже́ственнаго вселе́ния, душе́вную мою́ скве́рну и нечистоту́ потреби́.

И ны́не: Еди́ну Пречи́стую, Еди́ну Нескве́рную, молю́ Тя, Отрокови́це, сла́достными оскверни́вшася страстьми́, и окаля́вша ду́шу, Твои́ми моли́твами очи́сти.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Оскверне́н по́мыслом и окаля́н мно́гими паде́ньми, Ма́ти Бо́жия, Тя́ молю́, Еди́на Нескве́рная, уще́дри и спаси́ мя хода́тайством Твои́м.

Боже́ственным сия́нием Твои́м, Блага́я, просвети́ ду́шу мою́ омраче́нную сладостьми́, и к спасе́ния стези́ напра́ви, Еди́на Спа́са Христа́ ро́ждшая.

Сла́ва: Грехо́вныя ми́ плени́цы расто́ргни Твои́м хода́тайством, Де́во, и заступле́нием, и ра́дости Боже́ственныя тишины́ испо́лни ду́шу мою́ окая́нную, и тьмы́ изба́ви.

И ны́не: Тя́ Еди́ну Боже́ственное прибе́жище ны́не стяжа́в, Блага́я, зову́ Ти, и ве́рно припа́даю: Ты́ мне́ заступле́ние, и покро́в спасе́ния бу́ди, Влады́чице ми́ра, и спаси́ мя.

Пе́снь 6

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Пови́нен сы́й греха́ми, и лю́те уязви́хся окая́нный, к Тебе́, Богома́ти, ми́лостивей прибега́ю моля́ся: нападе́ния потреби́ прегреше́ний мои́х.

Две́ре благода́тная, отве́рзшая ве́рным две́рь Небе́сную, покая́ния две́рь све́тлую отве́рзи ми́, Влады́чице, и вра́т сме́ртных свободи́.

Сла́ва: Страстьми́ мя преклоне́на от сопроти́вных прило́г, Ма́ти Бо́жия, утверди́, Я́же безстра́стия ро́ждши Исто́чник: к Тебе́ бо прибего́х, окая́нныя моея́ души́ Уте́шительнице.

И ны́не: При́зри, Влады́чице, на мя́ смире́ннаго, и ненаде́ждно спаси́ мя: Ты́ бо еси́ упова́ние и покро́в ми́, жи́знь и све́т се́рдцу моему́, Богоро́дице, и утвержде́ние.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 6:

Безпомо́щным кре́пость, Ты́ вои́стинну, Пресвята́я Де́во Ма́ти, отсю́ду смире́ннии Тобо́ю возвыша́емся, о Тебе́ высо́це держи́мся: все́м Ты́ еси́ покро́в, и к Бо́гу хода́таица.

Пе́снь 7

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Очище́ние и́мамы Тя́ всегда́ к Бо́гу, Пренепоро́чная. Те́мже испроси́ изба́вити все́х, Пречи́стая, та́мо муче́ний стра́шных, Богоро́дицу вои́стинну испове́дающих тя́.

Ле́ностию мя́ одержи́ма, воздви́гни к де́ланию, Пречи́стая, Боже́ственных дея́ний, укрепля́ющи мя́ на враги́ при́сно борю́щия мя́ лю́те, и сопроти́вными помышле́нии прельща́ющия.

Сла́ва: Не оста́ви мене́, Де́во, погиба́ти, ни попусти́ сне́дь бы́ти при́сно жа́ждущему мою́ па́губу зми́ю лю́тому, но пода́ждь ми́ Твою́ бога́тую ми́лость.

И ны́не: Моля́щи не преста́й Человеколю́бца Бо́га на́шего, Всенепоро́чная, я́ко да прии́мем соверше́нное проще́ние, Чи́стая: и улучи́м Небе́сных угото́ванных бла́г, и неотъе́млемую ра́дость.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти, Тя́ превозно́сим во вся́ ве́ки.

Я́коже Рождество́м Твои́м, Всечи́стая, благи́х де́л покажи́ плодоно́сно непло́дное се́рдце мое́, Бо́га умоля́ющи.

Мольбу́, Де́во, Бо́гу принеси́, ду́ши на́ша спасти́, Богоблагода́тная, и страсте́й прия́тия изба́ви на́с, и от бесо́в зла́го искуше́ния.

К Твоему́ прибега́ю покро́ву, Всенепоро́чная, и предста́тельницу живота́ моего́ ны́не предлага́ю, изба́ви мя́, Отрокови́це, суда́ стра́шнаго, и испыта́ния, и огня́ ве́чнаго.

Поколеба́вшуюся зло́бою борца́ ду́шу мою́ утверди́, Де́во Чи́стая, и о́гненнаго изми́ мя муче́ния, и ко́злищ боле́зненныя ча́сти.

Пе́снь 9

Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти. Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем.

Страсте́й волне́ние смуща́ет мя́, и сластьми́ погружа́ет мя́, Де́во Пренепоро́чная, Я́же Ко́рмчию – Христа́ ро́ждшая, ру́ку ми́ по́мощи простри́ и спаси́ мя, Еди́на спасе́ние ве́рою блажа́щих Тя́.

Черто́же и престо́ле Ца́рствующаго, горо́ Бо́жия, и гра́де избра́нный, и раю́, Со́лнца о́блаче всесве́тлый, просвети́ ду́шу мою́, о́блак отгоня́ющи грехо́в мои́х мно́гих, Богоблагода́тная.

Сла́ва: Чи́стая Де́во Богообра́дованная, две́ре Све́та две́ри души́ моея́ отве́рзи, греха́ вхо́д заключа́ющи, да мя́ не прии́мет рука́ льсти́ваго, веду́щи лю́те ко всепа́губней и стра́шней му́це.

И ны́не: Душе́, возни́кни, и побди́ в моли́твах и во всеблаги́х попече́ниих уны́ния со́н отгоня́ющи, бо́друю засту́пницу иму́щи всегда́, Чи́стую Ма́терь Бо́жию Всеще́друю.

Та́же, Досто́йно е́сть: И Трисвято́е по О́тче на́ш: тропа́рь и про́чее по обы́чаю, и отпу́ст.

По 1-м стихосло́вии, седа́льны покая́нны, гла́с 6:

Помышля́ю де́нь стра́шный, и пла́чуся дея́ний мои́х лука́вых. Ка́ко отвеща́ю Безсме́ртному Царю́? Ко́им же дерзнове́нием воззрю́ на Судию́, блу́дный а́з? Благоутро́бный О́тче, Сы́не Единоро́дный, и Ду́ше Святы́й, поми́луй мя́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Во удо́ли плаче́вней, на ме́сте, иде́же положи́, егда́ ся́деши, Ми́лостиве, сотвори́ти пра́ведный су́д, не обличи́ моя́ сокрове́нная, ниже́ посрами́ мене́ пред а́нгелы, но пощади́ мя, Бо́же, и поми́луй мя́.

Сла́ва, и ны́не: Богоро́дичен: Милосе́рдия две́ри отве́рзи на́м, Благослове́нная Богоро́дице Де́во, наде́ющиися на Тя́ да не поги́бнем, но да изба́вимся Тобо́ю о бе́д: Ты́ бо еси́ спасе́ние ро́да христиа́нскаго.

По 2-м стихосло́вии седа́льны, гла́с 6:

Душе́ моя́, вску́ю уныва́ющи греху́ рабо́таеши? И вску́ю боля́щи, ко врачу́ не прихо́диши? Возни́кни про́чее от зо́л, я́же соде́лала еси́, и возопи́й ко Спа́су, глаго́лющи: Наде́ждо ненаде́жных, Животе́ отча́янных, Спа́се, воздви́гни, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Му́дрых де́в да́руй ми́, Го́споди, бде́ние, и души́ моея́ свещу́ просвети́ еле́ем щедро́т Твои́х, да пе́снь а́нгельскую пою́ Ти: аллилу́ия.

Сти́х: Ди́вен Бо́г во святы́х Свои́х, Бо́г Изра́илев.

Страстоте́рпческий по́двиг претерпе́вше, святи́и, и по́чести побе́ды от Тебе́ прия́ша; упраздни́ша помышле́ния беззако́нных, и восприя́ша венцы́ нетле́нныя. Те́х ра́ди, Бо́же, умоле́н бы́в, да́руй на́м ве́лию ми́лость.

Сла́ва, и ны́не: Богоро́дичен: Упова́ние ми́ра, блага́я Богоро́дице Де́во, Твое́ и еди́ное стра́шное предста́тельство про́сим: умилосе́рдися на лю́ди безпомо́щныя, моли́ ми́лостиваго Бо́га, изба́витися душа́м на́шим от вся́каго преще́ния, еди́на Благослове́нная.

По 3-м стихосло́вии седа́льны, гла́с 6:

Подо́бен: Всю́ отложи́вше:

Живота́ я́ко показа́л еси́ пути́ лю́дем, Иоа́нне, вопия́: испра́вите сердца́ ва́ша Го́сподеви. Спаси́ многогре́шную мою́ ду́шу, ко умиле́нию приведи́ окамене́ную мы́сль, и изба́ви бу́дущия му́ки твои́ми моли́твами, Предте́че Спа́сов.

Страсте́й мя́ бу́ря, и лю́тое треволне́ние прегреше́ний, во отча́яния глубины́ потопи́, Сло́ве. Но простри́ ми держа́вную Твою́ десни́цу, и спаси́ мя я́коже Петра́, свяще́нными моли́твами Предте́чи Твоего́, из глубины́ злолю́тых беззако́ний мои́х.

Сла́ва, и ны́не: Богоро́дичен: И́же пре́жде ве́к от Отца́ без ма́тере, ро́ждшагося Сы́на и Сло́ва Бо́жия, и в после́дняя ле́та родила́ еси́ воплоще́нна от чи́стых крове́й Твои́х, Богороди́тельнице, кроме́ му́жа, Его́же моли́, дарова́ти на́м грехо́в проще́ние пре́жде конца́.

Кано́н покая́нен ко Го́споду на́шему Иису́су Христу́, и святы́м му́чеником. Творе́ние ки́р Ио́сифа. Гла́с 6.

Пе́снь 1

Ирмо́с: Помо́щник и Покрови́тель бы́сть мне́ во спасе́ние, Се́й мо́й Бо́г, и просла́влю Его́, Бо́г отца́ моего́, и вознесу́ Его́: сла́вно бо просла́вися.

Изба́вителю мо́й, Иису́се, я́коже изба́вил еси́ мно́гих прегреше́ний блудни́цу, иногда́ пока́явшуюся до́бре, молю́ся Ти́, и мене́ изба́ви безчи́сленных зо́л мои́х, я́ко Ми́лостив.

Пла́вая в су́етнем помышле́нии жития́, Иису́се, лю́тую сию́ пучи́ну, во истопле́ния впадо́х мно́гая, от ни́хже изба́вив спаси́ мя.

Му́ченичен: До́блественныя страда́льцы, чужда́го потреби́тели, терпели́вно пострада́вшия, и венцы́ прии́мшия, от Бо́га побе́дныя, ра́достно да почти́м.

Му́ченичен: Вети́йствующе, му́дрии, дерзнове́нием Бо́га Сло́ва вети́й злы́х победи́сте, и вся́к ви́д подъе́мше ра́н, вельми́ просла́вистеся.

Богоро́дичен: Яви́лася еси́ врата́ Живота́, сме́рти врата́ затво́рши Рождество́м Твои́м, Чи́стая; яви́лася еси́ Земля́ избра́нная, е́юже вознесе́ся от земли́ на Небеса́ челове́ческое смеше́ние.

И́н кано́н свято́му и вели́кому Иоа́нну Предте́чи. Творе́ние Ио́сифово. Гла́с 6.

Ирмо́с: Чу́вственный фарао́н потопле́н бы́сть со всево́инством, Изра́иль же проше́д посреде́ мо́ря, вопия́ше: Го́сподеви Бо́гу на́шему пои́м, я́ко просла́вися.

А́нгел Боже́ственный твое́ рождество́, а́нгеле Бо́жий, предвозвеща́ет отцу́; с ни́мже на́с помяни́, е́же в Де́нь Су́дный обрести́ на́м ми́лость, святы́й Предте́че.

Прозябе́ние сы́й кра́сное пусты́нное, Предте́че Христо́в, во мне́ непреста́нно прозяба́ющую ле́ность из ко́рене исто́ргнув, покая́ния мя́ приноси́ти плоды́ сотвори́.

Утро́ба безча́дна тя́, пло́д ражда́ет пресла́вно, благопло́дная сердца́, я́же пре́жде непло́дная показа́вшая, но ве́рою вопию́ ти: Крести́телю, непло́дная моя́ помышле́ния исто́ргни.

Богоро́дичен: Ле́стию непреста́нно вра́г ло́вит мя́ лука́вый, того́ мя́ ловле́ния, Всенепоро́чная, исхити́, и твори́ти, Богоро́дице, наста́ви Влады́чнюю Боже́ственную во́лю.

Пе́снь 3

Ирмо́с: Утверди́, Го́споди, на ка́мени за́поведей Твои́х, подви́гшееся се́рдце мое́, я́ко Еди́н Свя́т еси́ и Госпо́дь.

Ми́лостивным Твои́м о́ком при́зри на мя́, егда́ хощу́ пред Тобо́ю предста́ти, и суди́тися, Еди́не Благопремени́телю Го́споди.

Воздыха́юща мя́ приими́, я́коже мытаря́ из глубины́ душе́вныя, и покая́ние ми́ да́руй, Спа́се, греха́ вся́каго мя́ избавля́ющее.

Му́ченичен: Тече́нием, святи́и, пресвяты́х ва́ших крове́й, ме́рзская кро́вь преста́, приноси́мая бесо́м иногда́ в тре́бищах.

Му́ченичен: Ду́хом Пресвяты́м укрепля́еми, святи́и, низверго́сте ка́пища поги́бельная, все́х к ве́ре утвержда́юще.

Богоро́дичен: Зачала́ еси́, Пресвята́я, содержа́щаго ве́сь ми́р – сего́ ра́ди молю́ся Ти́, изба́ви мя́ вся́каго содержа́щаго муче́ния.

И́н. Ирмо́с: На тве́рдем ве́ры Твоея́ ка́мени помышле́ние утверди́в души́ моея́, утверди́, Го́споди: Тя́ бо и́мамы, Бла́же, прибе́жище и утвержде́ние.

Обраще́ние от пути́ заблу́ждшему да́ждь ми́ ны́не: и простри́ ми́ ру́ку, блаже́нне Предте́че, в пучи́не лю́тых всегда́ пла́вающу.

Живу́ ле́ностно, и посече́ние приближа́ется; твои́ми моли́твами возникнове́ние ми́ да́ждь, присносла́вный Предте́че, да не я́ко безпло́ден отсла́н бу́ду во о́гнь неугаси́мый.

Стра́шный Де́нь при две́рех, и лю́тыми обложе́н е́смь бре́меньми, от ни́хже мя́ облегчи́, Госпо́день Крести́телю, чи́стыми твои́ми мольба́ми.

Богоро́дичен: Престо́л Бо́жий яви́лася еси́, Богоро́дице, на не́мже пло́тию се́де Христо́с, от пе́рваго паде́ния челове́ки воздви́же, во гла́сех ра́достных пою́щия Тя́.

Пе́снь 4

Ирмо́с: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися, и челове́ком яви́тися, и глаго́лаше: услы́шах слу́х Тво́й и убоя́хся. Сла́ва си́ле Твое́й, Го́споди.

То́ки сле́з да́ждь ми́ изсуша́ющия страсте́й мои́х исто́чники, и греха́ вся́каго тиме́ния отмыва́ющия, Ще́дре, Многоми́лостиве, и угаша́ющия огня́ гее́нскаго ве́чнующий пла́мень неугаси́мый.

Непреста́нно чешу́ стру́пы души́ моея́ сластолю́бием, и пребыва́ю неисце́лен, в чу́вство са́м приити́ не хотя́. Кто́ бу́ду и что́ сотворю́? Христе́ Ще́дрый, исцели́в спаси́ мя.

Му́ченичен: Во́д поги́бельных, и бу́ри зло́бныя окормле́нием Боже́ственным, му́ченицы присноблаже́ннии, ве́рою преплы́вше пучи́ну непостоя́нную, в безбе́дное и небу́рное Ца́рствия Небе́снаго приста́нище доспе́сте.

Му́ченичен: Просве́щницы благоче́стия, свети́ла и́стины бы́вше, све́том по́двигов потреби́сте тьму́ безбо́жия многоболе́зненную; чуде́с же заря́ми му́ченицы страсте́й мглу́ разгоня́ете.

Богоро́дичен: Седмосве́тлый Тя́ све́щник, о́гнь богоразу́мия нося́щ, Отрокови́це, проро́к дре́вле прови́де, светя́щ во тьме́ неве́дения бе́дствующим. Те́мже вопию́ Ти, Всенепоро́чная: просвети́ мя, молю́ся.

И́н. Ирмо́с: Услы́шах слу́х Тво́й и убоя́хся, разуме́х дела́ Твоя́, и ужасо́хся: сла́ва си́ле Твое́й, Го́споди.

Уврачу́й, Предте́че, уя́звленое на путе́х разбо́йнических се́рдце мое́, молю́ся ти́, де́тельною боже́ственных твои́х моли́тв цельбо́ю.

Низложи́, Предте́че, и́же еще́ живу́щий в души́ мое́й гре́х, и возникнове́ние ны́не да́руй ми́, к сласте́м пополза́ющемуся.

Приста́нище на́м яви́ся обурева́емым в пучи́не жите́йския бу́ри, преложи́ все́х в тишину́, пребога́те.

Богоро́дичен: Да не осу́диши мене́, Го́споди, по дело́м мои́м, но ми́лостив ми́ яви́ся, Всеще́дрый: мо́лит Тя́ со Крести́телем Ро́ждшая Тя́.

Пе́снь 5

Ирмо́с: От но́щи у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́.

Се́ и́же тала́нт Тво́й сокры́вый, Христе́, лени́вый ра́б Тво́й, и упраздни́выйся лука́выми страсте́й дея́нии, а́з е́смь: те́мже не посли́ мене́ во о́гнь.

Тво́й сы́н бы́в благода́тию, благоутро́бне Христе́, порабо́тихся врагу́, и от Тебе́ удали́хся жи́в блу́дно. Те́мже обрати́в мя́ спаси́.

Му́ченичен: Му́ченицы стоя́ху пред суди́щем, щи́т ве́ры обнося́ще. Те́мже стрела́ми ле́стными, уязви́ти те́х лю́тый отсту́пник не возмо́же.

Му́ченичен: Умерщвля́еми телесы́ му́ченицы, вся́ умертви́ша ко́зни вра́жия, и к жи́зни нестаре́ющейся приидо́ша в ра́дости, венцы́ побе́ды прии́мше.

Богоро́дичен: Врата́ непроходи́мая, отве́рзи ми́ врата́, молю́ся, покая́ния и́стиннаго, и покажи́ ми стезю́ покая́ния, Чи́стая, все́х Наста́внице.

И́н. Ирмо́с: К Тебе́ у́тренюю, милосе́рдия ра́ди себе́ истощи́вшему непрело́жно, и до Страсте́й безстра́стно прекло́ньшемуся, Сло́ве Бо́жий, ми́р пода́ждь ми́ па́дшему, Человеколю́бче.

Хра́м бы́л еси́ Боже́ственныя Тро́ицы, и в хра́ме твое́м свято́м се́м со́браннии, ве́рою те́плою мо́лим тя́, Предте́че: изба́ви на́с от искуше́ний и скорбе́й, всехва́льне.

Устрани́выйся вся́кия доброде́тели у́м мо́й, тебе́ стра́нным ходи́вша путе́м в житии́, блаже́нне, ны́не молю́: вся́ческих Бо́гу мя́ присво́й, лу́чша творя́ мя изя́щными припода́ньми.

Погрузи́вый во Иорда́нских струя́х, Бе́здну Милосе́рдия, проро́че, то́ки страсте́й мои́х моли́твами твои́ми изсуши́ ны́не, исто́чники ми́ сле́з подава́я.

Богоро́дичен: Преукраше́нна Боже́ственными луча́ми, Кра́снаго Добро́тою родила́ еси́, Де́во. Того́ у́бо при́сно моли́, спасти́ на́с от тли́, и́же ве́рою и любо́вию Тя́ сла́вящия.

Пе́снь 6

Ирмо́с: Возопи́х все́м се́рдцем мои́м к ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.

Не покажи́ мене́ бесо́м обра́дование в Де́нь Стра́шный, Христе́ Иису́се, да не услы́шу тогда́ гла́са отсыла́ющаго во о́гнь гее́нский.

Погрузи́ мя во глубине́ прегреше́ний, и́же пра́ведных вра́г. И к щедро́т Твои́х притека́ю пучи́не, Иису́се, к приста́нищу жи́зни ны́не напра́ви мя́.

Му́ченичен: Боле́зней мно́гих ра́лом, обно́вльше, душе́вную бразду́, прему́дрии, Боже́ственным се́менем ве́ры, многопло́дный муче́ния кла́с я́ве плодоноси́сте.

Му́ченичен: Я́звами уязви́сте уязви́вшаго ва́с, благочести́вии ору́жницы. Те́мже преста́вльшеся к жи́зни, стра́сти ны́не челове́ческия исцеля́ете.

Богоро́дичен: Хра́м Бо́гу яви́лася еси́, Всенепоро́чная, во́ньже всели́вся свяще́нне, челове́ческое существо́ обожи́, сотвори́л е́сть ве́рных хра́мы себе́.

И́н. Ирмо́с: Бе́здна после́дняя грехо́в обы́де мя́, и волне́ния не ктому́ терпя́, я́ко Ио́на, Влады́це, вопию́ ти: от тли́ мя возведи́.

О́трасль, Проро́че, ко́рене прозя́бл еси́, и сердца́ непло́дная вся́каго благоразу́мия, благопло́дна в похвалу́ Бо́гу показа́л еси́.

Сокруши́ вско́ре лука́ваго нога́ми на́шими, и испра́ви стопы́ на́ша мы́сленныя на пу́ть ми́ра, предста́тельствы твои́ми, Предте́че.

Огради́, Проро́че, пра́вдою ста́до твое́, избавля́я на́с вся́каго наве́та бесо́вскаго, и ве́чнующия му́ки.

Богоро́дичен: Пе́снь тебе́, Де́во, благодаре́ния прино́сим ны́не: Тобо́ю, Чи́стая, спасе́ни бы́вше от кля́твы дре́вния, и вся́ко благослове́ние плоди́м.

Пе́снь 7

Ирмо́с: Согреши́хом, беззако́нновахом, непра́вдовахом пред тобо́ю, ниже́ соблюдо́хом, ниже́ сотвори́хом, я́коже запове́дал еси́ на́м. Но не преда́ждь на́с до конца́, отце́в Бо́же.

Взира́ю на ми́лость Твою́ безме́рную, безме́рно согреши́вый, ве́м Твое́ милосе́рдие, ве́м долготерпе́ние и незло́бие: покая́ния ми́ да́руй плоды́, ще́дрый Христе́, и спаси́ мя.

Уврачу́й, Ще́дре, се́рдца моего́ неисце́льныя стра́сти, да́руй отсече́ние долго́в мои́х, тя́жкое бре́мя облегчи́, да во умиле́нии Тя́ сла́влю при́сно, отце́в Бо́га.

Му́ченичен: Вя́жеми, ссеца́еми, и снеда́еми огне́м веще́ственным, льво́м предае́ми на сне́дь, и протяза́еми на колесе́х, не отверго́шася тебе́, Жива́го Бо́га на́шего, боже́ственнии и свяще́ннии страда́льцы.

Му́ченичен: Разделя́еми бы́сте от теле́с, но не разделе́ни от Бо́га яви́стеся, му́ченицы, совокупле́ния ра́ди Боже́ственнаго, Себе́ соедини́вшаго на́м нетле́нно. Его́же при́сно моли́те, изба́витися на́м вся́кия ну́жды.

Богоро́дичен: Прозябла́ еси́ без се́мене, Его́же роди́ Оте́ц нетле́нно, пребыла́ еси́ по Рождестве́ Де́ва, я́коже и пре́жде Рождества́. Те́мже ублажа́ема еси́, и прославля́ема, Пречи́стая, непреста́нно, я́ко Ма́ти су́щи Бо́жия.

И́н. Ирмо́с: О́троцы в Вавило́не пе́щнаго пла́мене не убоя́шася, но посреде́ пла́мене вве́ржени, ороша́еми поя́ху: благослове́н еси́, Го́споди Бо́же оте́ц на́ших.

Гла́с сы́й Сло́ва, ны́не гла́сы на́ша приими́, Крести́телю, и страсте́й и бе́д, и мно́гих обстоя́ний, и ве́чнаго муче́ния изба́ви лю́ди твоя́.

Руко́ю показу́еши Проро́че, А́гнца Бо́жия, ми́ра взе́млющаго грехи́. Его́же при́сно моли́, отъя́ти моя́ согреше́ния лю́тая, и ле́ты удержа́нная, и живота́ сподо́бити мя́.

Душе́ моя́, потщи́ся, и возопи́й, омраче́ние оста́вльши безслове́сных дея́ний: уще́дри мя́, Иису́се, мольба́ми Крести́теля, и исхити́ мя тиме́ния де́л мои́х.

Богоро́дичен: Ему́же предстоя́т с тре́петом Небе́снии чи́ни, Того́ родила́ еси́, Чи́стая, соедини́вшагося челове́ком за бла́гость. Его́же приле́жно моли́ уще́дрити рабы́ Твоя́.

Пе́снь 8

Ирмо́с: Его́же во́инства Небе́сная сла́вят, и трепе́щут Херуви́ми и Серафи́ми, вся́ко дыха́ние и тва́рь, по́йте, благослови́те, и превозноси́те во вся́ ве́ки.

Взира́ю на вели́кую ми́лость щедро́т Твои́х, Христе́, я́коже Дави́д, согреши́в па́че о́наго, и зову́ со о́нем: еди́не Ми́лостиве, поми́луй мя́ вско́ре.

Коне́ц бла́г бы́ти ми́ молю́ся, положи́ти же лука́вым дея́нием когда́ коне́ц, не усе́рдствую, ожесточе́нное име́я мое́ се́рдце: уще́дри мя́, Бо́жий Сло́ве.

Му́ченичен: Я́ко избра́нныя и непоро́чныя же́ртвы, поже́ршемуся на́с ра́ди, Единоро́дному Сло́ву, во́лею принесо́стеся, же́ртвы вся́ упражня́юще де́монския, страстоно́сцы.

Му́ченичен: Жи́лам сече́ния, зубо́м искорене́ния, отъя́тие же рука́м, раздробле́ние удо́м, и вся́кое томле́ние и́ное претерпе́сте до́блественне, му́ченицы, пою́ще Христа́, еди́наго Подвигополо́жника.

Богоро́дичен: Но́ва на́м Младе́нца родила́ еси́, Ве́тхаго Де́ньми, но́выя на земли́ стези́ показу́ющаго, и обетша́вшее естество́ обновля́юща, Безневе́стная Благослове́нная.

И́н. Ирмо́с: За зако́ны оте́ческия блаже́ннии в Вавило́не ю́ношы предбе́дствующе, царю́ющаго оплева́ша повеле́ние безу́мное, и совоку́плени и́мже не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.

Над Сло́во креща́емо, в ви́де голуби́не, низходя́ща ви́дел еси́ Ду́ха Свята́го, и гла́с Оте́ч слы́шати сподо́бился еси́, блаже́нне: Се́й е́сть Сы́н Мо́й сопресто́льный, Его́же пое́т вся́ тва́рь: Го́спода по́йте, дела́, и превозноси́те во вся́ ве́ки.

Огне́м, Проро́че, твои́х моли́тв хвра́стныя стра́сти смы́сла моего́ попали́в, и угаше́нный се́рдца моего́ све́щник возжзи́ па́ки, я́ко да я́сно смотря́я, воспева́ю созда́вшаго све́т повеле́ний: Го́спода по́йте, дела́, и превозноси́те во вся́ ве́ки.

Сокры́вый ра́б тала́нт, его́же в де́лание от Тебе́ прия́х, а́з е́смь окая́нный, и что́ сотворю́, егда́ на су́д прии́деши, коего́ждо де́ло истязу́я? Но пощади́ мя мольба́ми Предте́чи Твоего́, и не во о́гнь посли́ вопию́ща: Го́спода воспева́йте, дела́, и превозноси́те Его́ во ве́ки.

Богоро́дичен: Соблюди́ мо́й смы́сл во смире́нии, Отрокови́це Богоблагода́тная, я́же Рождество́м Твои́м сокруши́вшая возноше́ние де́монское, и воздви́гни мя́ от гно́ища страсте́й, и а́лчуща мя́ насы́ти благода́ти Твоея́, пою́ща: Го́спода по́йте, дела́, и превозноси́те во вся́ ве́ки.

Та́же, пое́м пе́снь Богоро́дицы: Вели́чит душа́ моя́ Го́спода: И покло́ны.

Пе́снь 9

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди я́ко Богоневе́стную Ма́терь, правосла́вно велича́ем.

Иису́се Человеколю́бче, еди́не не́мощь на́шу ве́дый: в сию́ бо обле́клся еси́ милосе́рдия ра́ди, хотя́ сию́ очи́стити. Те́мже скве́рны лука́выя и гное́ния зо́л мои́х очи́сти, и спаси́ мя.

Я́ко блудни́ца сле́зы приношу́ Ти, Человеколю́бче; я́ко мыта́рь стеня́ взыва́ю Ти́: очи́сти, и спаси́ мя. Я́коже ханане́я вопию́: поми́луй мя́; я́коже Петра́ пока́явшася, проще́ния сподо́би.

Му́ченичен: Пло́тию спле́тшеся безпло́тному мироде́ржцу, по́двигами страда́ний того́ низложи́сте, и побе́ды венцы́ прия́сте досто́йно. Те́мже моли́теся приле́жно о все́х, ве́рою восхваля́ющих ва́с, святи́и.

Му́ченичен: Освяти́л еси́, Го́споди, зе́млю святы́ми кровьми́ святы́х Твои́х, и те́х, Всесвя́те, ду́хи, духово́м Си́л святы́х совокупи́л еси́; всегда́ же си́ми освяща́еши ве́рою и́стинною Тебе́ освяща́ющия.

Богоро́дичен: Гла́с Ти́ прино́сим арха́нгелов, Всечи́стая, Благослове́нная: ра́дуйся, вмести́вшая Бо́га невмести́маго; ра́дуйся кля́твы разреше́ние, и благослове́ния введе́ние; ра́дуйся, еди́на ра́йскую две́рь отве́рзшая.

И́н. Ирмо́с: Стра́нствия влады́чня, и безсме́ртныя трапе́зы на го́рнем ме́сте, высо́кими умы́, ве́рнии, прииди́те наслади́мся, возше́дша Сло́ва, от Сло́ва научи́вшеся, Его́же велича́ем.

Уврачу́й мо́й у́м, сластолю́бием жите́йским лю́те уязвле́ный, и утоли́ зе́льне возмуща́ющую мя́ бу́рю, и покажи́ ми покая́ния пути́ пра́выя, Госпо́день Предте́че.

Ви́ден бы́л еси́ посреде́ стоя́ Ве́тхаго же и Но́ваго, о́вому у́бо проро́че, преста́ти творя́, о́ваго же све́т явля́я, и́мже ходи́ти спе́шно наста́ви на́с, со́вестию Боже́ственною, я́ко да тьмы́ изба́вимся ве́чнующия.

Сочета́лся еси́ с во́инствы Небе́сными, богому́дре, с ни́миже Христа́ моли́, су́щих на земли́ на́с спасти́ почита́ющих Тя́ в честне́м твое́м се́м хра́ме, Крести́телю Иоа́нне, Госпо́день Предте́че.

Де́нь испо́лнь я́рости, де́нь тьмы́ е́сть, дела́ иму́щим те́мная, Су́д Стра́шный, Крести́телю Христо́в и Предте́че: моли́твами твои́ми тогда́ изба́ви осужде́ния вся́каго, тебе́ почита́ющих.

Богоро́дичен: Яви́лася еси́ Херуви́м святе́йши Де́во, я́ко Бо́га ро́ждши Пресвята́го, все́х на́с освяти́, во гла́сех святы́х ве́рою, в нощи́ и во дни́ Тебе́ освяща́ющих.

Та́же, Досто́йно е́сть: И покло́н. И ектения́ ма́лая, и свети́лен, и псалмы́ обы́чныя, и про́чая.

На стихо́вне стихи́ры покая́нны, гла́с 6:

На́га мя́ обре́т доброде́телей вра́г, стрело́ю грехо́вною уязви́: но Ты́ я́ко Вра́ч ду́ш и теле́с, я́звы души́ моея́ исцели́, и поми́луй мя́.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Се́рдца моего́ стру́пы, от мно́гих согреше́ний возра́стшия ми́ исцели́, Спа́се, я́ко ду́ш и теле́с Вра́ч, подая́ прося́щим прегреше́ний проще́ние, при́сно да́руй ми́ сле́зы покая́ния, дая́ ми разреше́ние долго́в, Го́споди, и поми́луй мя́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Го́споди, а́ще не бы́хом святы́я Твоя́ име́ли моли́твенники, и благосты́ню Твою́ ми́лующую на́с, ка́ко сме́ли бы́хом, Спа́се, пе́ти Тя́, Его́же славосло́вят непреста́нно а́нгели? Сердцеве́дче, пощади́ ду́ши на́ша.

Сла́ва, и ны́не: Богоро́дичен: Вели́ких дарова́ний, чи́стая Де́во Богома́ти, ты́ сподо́билася еси́, я́ко родила́ еси́ пло́тию еди́наго от Тро́ицы, Христа́ Жизнода́вца, во спасе́ние ду́ш на́ших.

Та́же, Бла́го е́сть испове́датися Го́сподеви: Трисвято́е по О́тче на́ш: тропа́рь, ектения́. Та́же, ча́с пе́рвый: псалмы́ обы́чныя, и про́чее, и отпу́ст.

Помяни́ мя, Бо́же Спа́се мо́й, егда́ прии́деши во Ца́рствии Твое́м, и спаси́ мя, я́ко еди́н Человеколю́бец.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

И́же Петро́во прие́мый рыда́ние, приими́ и мое́, Христе́, покая́ние, и да́руй ми́ согреше́ний проще́ние.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Пропове́давый покая́ние челове́ком, Госпо́день Крести́телю и Предте́че, пока́ятися ми́ от души́, моли́ся.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Треволне́ния претерпе́вше страда́ний, страстоте́рпцы, челове́ков неду́ги ны́не исцеля́ете: те́мже блажи́ми есте́.

Сла́ва: И́же проро́ки прославля́емый Бо́г в Тро́ице, про́стей же и неслия́нней, Предте́чи мольба́ми спаси́ мя.

И ны́не: Предста́тельство кре́пкое су́щим в ско́рбех, предста́ни ми́ жите́йским страсте́м приобща́ющемуся, и спаси́ мя, молю́ся.

на Го́споди, воззва́х: стихи́ры кре́стны, гла́с 6:

Подо́бен: Тридне́вно воскре́сл еси́:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Распе́ншуся Ти́, долготерпели́ве Го́споди, поколеба́л еси́ зе́млю всю́, ве́рных же утверди́в сердца́. Те́мже Тя́ воспева́ем, и любо́вию покланя́емся непостижи́мей си́ле Твое́й.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

В лани́ту зауше́н бы́л еси́, Спа́се, и оплева́н, ядови́таго зауши́л еси́ врага́ зло́бу, отъе́мля паде́ние, е́же подъя́т Ада́м, укра́ден бы́в виде́ния ра́ди.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Со́лнце помрачи́ся, и земля́ вся́ тряса́шеся, и ка́мение распаде́ся, я́ко ви́деша Тя́, Спа́се, на Дре́ве пове́шена непра́ведно, и оставля́юща хоте́ния.

Та́же Мине́и стихи́ры свято́му, а́ще и́мать. А́ще ли не́сть, и́ны стихи́ры, гла́с и подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Предстоя́щи у Креста́ иногда́ во вре́мя распя́тия Де́ва, с де́вственником ученико́м, и пла́чущи вопия́ше: увы́ мне́, ка́ко стра́ждеши, Христе́, все́х сы́й безстра́стие?

Сти́х: Хвали́те Го́спода вси́ язы́цы, похвали́те Его́ вси́ лю́дие.

Зача́тие Твое́ безсе́менное, и Рождество́ Пречи́стое помышля́ющи, удивля́юся зело́. Ка́ко си́це я́ко злоде́й, благоволи́л еси́ умре́ти, Спа́се? Пречи́стая взыва́ше.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Распина́юся у́бо на Дре́ве, и пригвожда́юся я́ко челове́к, и во гро́бе полага́юся я́ко ме́ртв, Ма́ти Чи́стая Де́во – я́ко Бо́г же, во сла́ве па́ки воскресну́ тридне́вен.

Сла́ва, и ны́не: Крестобогоро́дичен: Лю́ди беззако́ннейшия, без пра́вды пригвожда́юща Тя́ на Дре́ве, Де́ва, и Чи́стая Ма́ти Твоя́ зря́щи, я́коже Симео́н прорече́, утро́бою, Спа́се, уязвля́шеся.

Та́же, Све́те ти́хий: Проки́мен дне́ и Сподо́би, Го́споди, в ве́чер се́й:

На стихо́вне стихи́ры кре́стны. Гла́с 6:

Кре́ст Тво́й, Го́споди, жи́знь и заступле́ние лю́дем Твои́м е́сть, и на́нь наде́ющеся, Тебе́ распе́ншагося пло́тию, Бо́га на́шего пое́м, поми́луй на́с.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Кре́ст Тво́й, Го́споди, Ра́й отве́рзе ро́ду челове́ческому, и от истле́ния изба́вльшеся, Тебе́ распе́ншагося пло́тию Бо́га на́шего пое́м, поми́луй на́с.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Страда́вшии Тебе́ ра́ди, Христе́, мно́гия му́ки претерпе́ша, и соверше́нныя восприя́ша венцы́ на Небесе́х, да мо́лятся о душа́х на́ших.

Сла́ва, и ны́не: Крестобогоро́дичен: На Дре́ве Живо́т на́ш зря́щи Всенепоро́чная Богоро́дица ви́сящ, ма́терски рыда́ющи вопия́ше: Сы́не Мо́й, и Бо́же Мо́й, спаси́ любо́вию пою́щия Тя́.

Та́же, Ны́не отпуща́еши: Трисвято́е по О́тче на́ш: тропа́рь, ектения́, и отпу́ст.

Кано́н Пресвяте́й Богоро́дице. Гла́с 6:

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припе́в: Пресвята́я Богоро́дице, спаси́ на́с.

Вся́ко моего́ рыда́ю жития́ скве́рнаго, и мно́жества безме́рных ми́ зо́л: что́ же испове́м Ти́, Чи́стая? Недоуме́ю и ужаса́юся: но помози́ ми, Влады́чице.

Отку́ду начну́ глаго́лати лука́вая и лю́тая моя́ паде́ния, стра́стный а́з? Увы́ мне́, что́ бу́ду про́чее? Но, Влады́чице, пре́жде конца́ уще́дри мя́.

Сла́ва: Сме́ртный у́бо ча́с, и Суди́ще Стра́шное всегда́ помышля́ю, Пречи́стая, обы́чаем же всезлы́м прельща́юся лю́те: но помози́ ми.

И ны́не: Благи́х тли́тель смотря́я мя́ ны́не на́га Боже́ственных доброде́телей, и дале́че отсту́пльша и отчужде́на от Бо́га, поглоти́ти мя́ устремля́ется: Влады́чице, предвари́.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Ду́шу окаля́х скве́рно от безме́рных зо́л мои́х стра́стный а́з, Богоро́дице Влады́чице. И ка́мо про́чее пойду́, отча́янием ве́сь одержи́мь?

И е́же по о́бразу себе́ окаля́х блу́днаго, увы́ мне́, Чи́стая, высокому́дренною во́лею: по подо́бию бо и де́лом, и сло́вом, и по́мыслом соде́ях безме́стная.

Сла́ва: Не́сть и́н в челове́цех, и́же неподо́бная соде́яв, ни роди́ся в ми́ре, я́коже а́з, Блага́я, помраче́н умо́м, ибо Креще́ние Боже́ственное оскверни́х.

И ны́не: На коне́ц достиго́х злы́х, Пресвята́я Де́во, Ты́ помози́ ми вско́ре: не́бо и земля́ вопию́т го́рце, от безме́стных дея́ний неподо́бных.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста о Го́споде пра́зднующи.

А́нгельстии чи́нове, и во́инства Небе́сных си́л Твоего́ Сы́на ужаса́ются держа́вы, Чи́стая: ны́не же а́з отча́явся, безстра́шием одержи́мь е́смь.

Удиви́ся вся́ земля́ и ужасе́ся, зря́щи лю́тая, и зла́я творя́щу ми́, и безме́стная: и Твоего́ Сы́на мно́гому милосе́рдию чуди́тся.

Сла́ва: Це́рковь оскверни́х зле́ теле́сную, и Це́рковь Госпо́дню, в ню́же челове́цы трепе́щуще вхо́дят: а́з же блу́дный без студа́ вхожду́, увы́ мне́!

И ны́не: Не яви́, Влады́чице, не яви́ стра́нна мя́ устра́ншася кро́ва Сы́на твоего́, вся́ко недосто́йнаго, но омы́й мене́ от скве́рны прегреше́ний мои́х.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́ молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Боже́ственным сия́нием твои́м, Блага́я, исцели́ душе́вныя моя́ стра́сти, я́же ми́ тли́тель все́я, и изба́ви мя́ сего́ плене́ния го́рькаго: смее́тся бо зря́ мене́ без заступле́ния.

Ада́м преступи́ у́бо за́поведь еди́ну Сы́на Твоего́, Де́во, и во изгна́ние впаде́. Ка́ко же рыда́ю прегреше́ний мои́х бе́здну, а́з престу́пный, и отсту́пник Его́?

Сла́ва: Уби́йца у́бо я́влься дре́вле, и братоуби́йца Ка́ин, Бо́гом прокля́т бы́сть. Что́ же сотворю́ а́з вседе́рзый, ду́шу у́бо уби́в ны́не, и не стыжду́ся?

И ны́не: Иса́ву поревнова́х лю́тому, чревообъяде́нием, и сы́тостию ве́сь. Ду́шу оскверни́х пия́нством, и ласкосе́рдством житие́ мое́, и кто́ мене́ не пла́чет стра́стнаго? Увы́ мне́!

Пе́снь 6

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Житие́ мое́ блу́дно, душа́ моя́ скверна́ва, и живо́т ве́сь окая́нен, те́ло же мое́ все́ во злы́х лю́те окаля́х. Те́мже потщи́ся, Де́во, помощи́ ми.

Коне́ц предста́, и не терплю́, Блага́я, со́весть облича́ет мя́: предстоя́т бо ми́ дея́ния лука́вая, и житие́́ блу́дное, и Суди́ща ужаса́юся Сы́на Твоего́, Чи́стая.

Сла́ва: Пло́ти моея́ разжже́ние, река́ о́гненная стра́шна и неугаси́ма жде́т вои́стинну, и че́рвь неусыпа́яй: но угаси́ ми сия́ моли́твами Твои́ми, Пречи́стая.

И ны́не: Ны́не тре́петом одержи́мь е́смь, Блага́я, и ужаса́юся лука́ваго ловле́ния, пре́жде бо конца́ хо́щет мя́ тли́тель уби́ти, держа́ мя я́ко плене́на всего́, и на́га доброде́телей.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 6:

Упова́ние и стена́, и приста́нище лю́дем Твои́м, Де́во, из Нея́же роди́ся безстра́стно Спа́с вся́ческих, и спасе́ упова́ющия на Тя́, я́коже пла́чася Твоего́ Сы́на при Кресте́, Того́ и ны́не моли́ изба́вити от тли́ вся́ пою́щия Тя́.

Пе́снь 7

Ирмо́с: Росода́тельну у́бо пе́щь соде́ла А́нгел, преподо́бным отроко́м; халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Се́дмь седми́цею пла́мень разжже́ ми страстьми́ лука́вый, и любодея́ньми се́рдце мое́ всегда́ умерщвля́ет. Те́мже то́ками мои́х сле́з угаси́ его́, Ма́ти Бо́жия, и спаси́ мя.

Окаля́ема ти́ною прегреше́ний мои́х, не отри́ни мене́, Влады́чице Блага́я, и́бо зря́ мя во отча́янии су́ща, смее́тся прелука́вый вра́г: но Сама́ Твое́ю держа́вною руко́ю возста́ви.

Сла́ва: Стра́шное у́бо Суди́ще, стра́стная душе́ моя́ и нечу́вственная, и муче́ние же неконча́емое и гро́зное: но оба́че ны́не припади́ к Ма́тери Судии́ твоего́ и Бо́га, не отча́йся сама́

И ны́не: Омрачи́хся стра́стный мно́жеством безме́рных зо́л, и оскверни́х ду́шу и те́ло же и у́м: те́мже, Пречи́стая, све́том твои́х сия́ний, к безстра́стию сла́дости ско́ро введи́ мя.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Я́же от Тро́ицы еди́наго Бо́га ро́ждшая, и на руку́ носи́вшая, Де́во Ма́ти, угаси́ страсте́й огнепа́льную пе́щь, и сле́зными то́ки омы́й ду́шу мою́.

Прихо́да сме́ртнаго ужаса́юся, Пречи́стая, и Суда́ о́наго ве́сь ны́не убоя́хся, де́я же зла́я, ника́коже стыжду́ся: уще́дри мя́ пре́жде конца́ моли́твами твои́ми, Де́во.

Сла́ва: Стена́ния немо́лчная, Влады́чице, да́руй ми́, и сле́з ту́чи да́ждь, да отмы́ю моя́ прегреше́ния мно́гая, и неисце́льныя я́звы, я́ко да улучу́ жи́знь ве́чную.

И ны́не: Зо́л мои́х мно́жество тебе́ испове́дах, Влады́чице, я́ко ниеди́н в ми́ре и́н прогне́ва та́ко Бо́га, Сы́на и Го́спода Твоего́ – Сего́ ми на ми́лость вско́ре премени́, Де́во.

Пе́снь 9

Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти. Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с Небе́сными во́и, Тя́ ублажа́ем.

Се́ прихожду́ Ти́, Пречи́стая, со стра́хом мно́гим и любо́вию, кре́пость ве́дый мно́гия моли́твы Твоея́ ра́б Тво́й: мно́го бо мо́жет вои́стинну, Влады́чице, мольба́ ма́терня к сы́ну, милосе́рдием бо преклоня́ется.

Л и́ки приими́ арха́нгел же, и мно́жество вы́шних во́инств Зижди́теля моего́, апо́стол же и проро́к собо́ры, и му́ченики, и преподо́бныя, и священному́ченики; и моли́тву сотвори́, Чи́стая, за на́с к Бо́гу.

Сла́ва: И ны́не и тогда́ Твою́ по́мощь да обря́щу, Чи́стая, в ча́с, во́ньже изы́дет ду́х мо́й, вско́ре изыма́ющи, изба́ви мя́ бесо́вскаго мучи́тельства, Пренепоро́чная, и не оста́ви мене́, Блага́я, пре́дану бы́ти и́м.

И ны́не: Судии́ Ще́драго ча́ю, и человеколюби́ваго Твоего́ Сы́на, Чи́стая, не пре́зри мене́, но Того́ ми сотвори́ благопреме́нна, поста́вити мене́ одесну́ю тогда́, Всенепоро́чная, Пречи́стому Суди́щу Его́, на Тя́ бо упова́х.

Та́же, Досто́йно е́сть, и покло́н. И Трисвято́е по О́тче на́ш: тропа́рь, и про́чее обы́чно, и отпу́ст.

По 1-м стихосло́вии, седа́льны кре́стны, гла́с 6:

Кре́ст Тво́й, Го́споди, освяти́ся: те́м бо быва́ют исцеле́ния немощству́ющим грехми́. Сего́ ра́ди Тебе́ припа́даем, поми́луй на́с.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

То́кмо водрузи́ся Дре́во, Христе́, Креста́ Твоего́, основа́ния поколеба́шася сме́рти, Го́споди. Его́же бо пожре́ любо́вию а́д, отпусти́ трепе́ща, показа́л еси́ на́м спасе́ние Твое́, Святы́й: и славосло́вим Тя́, Сы́не Бо́жий, поми́луй на́с.

Сла́ва, и ны́не: Крестобогоро́дичен: Наде́ждо и заступле́ние и приста́нище люде́й Твои́х, Де́во, из Тебе́ бо роди́ся вои́стинну ми́ру спасе́ние. Я́коже пла́кася у Креста́ Твоего́ Сы́на и Бо́га, и спаса́еши упова́ющих на Тя́: Того́ ны́не умоли́, изба́вити от тли́ все́х воспева́ющих Тя́.

По 2-м стихосло́вии седа́льны кре́стны, гла́с 6:

Дне́сь проро́ческое испо́лнися сло́во: се́ бо покланя́емся на ме́сте, иде́же стоя́сте но́зе Твои́, Го́споди, и Дре́ва спасе́ния вкуси́вше, от грехо́вных страсте́й свобо́ду улучи́хом, моли́твами Богоро́дицы, еди́не Человеколю́бче.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Го́споди, осуди́ша Тя́ иуде́и на сме́рть, Жи́знь все́х. И́же Чермно́е мо́ре жезло́м проше́дшии, ко Кресту́ Тя пригвозди́ша; и от ка́мене ме́д сса́вшии, же́лчь Тебе́ принесо́ша. Но во́лею претерпе́л еси́, да на́с свободи́ши от рабо́ты вра́жия: Христе́ Бо́же на́ш, сла́ва Тебе́.

Сти́х: Ди́вен Бо́г во святы́х Свои́х, Бо́г Изра́илев.

Страда́льческая сопротивле́ния на суди́щи, мучи́тельския ра́ны на му́ченицех, и стоя́ху ли́цы безпло́тных, по́чести держа́ще побе́ды, удиви́ша мучи́тели и цари́, прему́дрии, низложи́ша престу́пника испове́данием Христо́вым: укрепи́вый и́х Го́споди, сла́ва Тебе́.

Сла́ва, и ны́не: Крестобогоро́дичен: Предстоя́щи у Креста́ Неискусобра́чная Ма́ти, И́же из Тебе́ ро́ждшемуся без се́мене, вопия́ше: ору́жие се́рдце мое́ про́йде, о Сы́не, не терпя́щи ви́сима на Дре́ве Тя́ зре́ти, Его́же трепе́щут вся́ческая, я́ко Созда́теля и Бо́га: долготерпели́ве Го́споди, сла́ва Тебе́.

По 3-м стихосло́вии седа́льны кре́стны, гла́с 6:

Подо́бен: Всю́ отложи́вше:

На Кресте́ Тя во́лею на́с ра́ди пригвожде́на, Христе́, тва́рь ви́девши, колеба́шеся стра́хом, со́лнце ве́сь помрачи́ све́т, ка́мение распаде́ся, и це́ркви Боже́ственная заве́са раздра́ся, на обличе́ние лю́тых и беззако́нных евре́й.

Дре́во принесе́ тле́ние во Еде́ме родонача́льнику – Кре́стное же Дре́во жи́знь процвете́ на Ло́бнем Ме́сте: и́бо попра́на бы́сть зло́ба вра́жия. Поми́лован же бы́сть пригвожде́нием Христо́вым, и обре́те Ра́й, вопия́ Ада́м: о Дре́во благослове́нное!

Сла́ва, и ны́не: Крестобогоро́дичен: Тебе́ ро́ждшая, Христе́, Присноде́ва Отрокови́ца, на Кресте́ зря́щи Тя́ на́с ра́ди вознесе́на, уязвля́ше Свое́ печа́ли ору́жием се́рдце и ду́шу, и пла́каше рыда́ющи ма́терски. Тоя́ моли́твами поми́луй на́с.

Кано́н Честно́му и Животворя́щему Кресту́, [его́же краегране́сие: Спаса́еши мя́, Спа́се, пригво́ждься на Дре́ве.] Творе́ние Ио́сифово, гла́с 6.

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Ты́ дла́ни просте́р на Кресте́, объя́л еси́, Влады́ко, отринове́нныя челове́ки, и к Твоему́ приве́л еси́ Отцу́, я́ко Сы́н возлю́блен и единосу́щен.

Я́коже а́гнец воздви́жен бы́л еси́ на Кре́ст, Сло́ве, Твоего́ овча́те ища́ заблу́ждшаго; и обре́т сочета́л еси́ то́ к незаблу́ждшим, Иису́се: сла́ва держа́ве Твое́й.

Му́ченичен: Жи́зни вы́шния жела́юще, благосла́внии страстоте́рпцы му́ченицы, умертви́шася на земли́, претерпе́вше муче́ния мно́гая и разли́чныя напа́сти, достоблаже́ннии.

Му́ченичен: На суди́щах непра́ведных за Христа́ все́х пра́веднаго предста́вше страда́льцы, су́д вся́к непра́ведный ва́с оправда́ющ, о Бо́зе претерпе́ли есте́.

Богоро́дичен: Да безстра́стие все́м, и́же из Ада́ма, исхода́тайствуеши, Влады́ко, стра́сть терпи́ши на Кресте́, и зря́щи Тя́ земля́ тряса́шеся, – рыда́ющи ма́терски вопия́ше, Влады́чице.

Други́й кано́н Пресвяте́й Богоро́дице. Гла́с 6.

Ирмо́с то́йже.

Тебе́, Всесвята́я Де́во, не́бо простры́й Госпо́дь, и зе́млю основа́вый, из Тебе́ проше́д с пло́тию, не́бо земно́е на́м показа́л е́сть.

Я́же Бо́га Заче́ншая, на́с ра́ди бы́вшаго Челове́ка, Того́ моли́, Чи́стая, в Де́нь Су́дный на́с уще́дрити мно́го согреши́вшия ему́.

Светле́йшими луча́ми возсия́вшее Со́лнце от свята́го Твоего́ чре́ва, всю́ зе́млю озаря́ет, Влады́чице, те́мже просве́щшеся, Тя́ Бо́жию Ма́терь чти́м.

Омраче́ния души́ моея́ безме́стных помышле́ний мглу́ разруши́, наведе́ньми, Богоро́дице Влады́чице, све́том святы́х за́поведей Вопло́щшагося из Тебе́.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Кре́ст водружа́шеся на земли́, и низпада́ше ле́сть, и тва́рь колеба́шеся, и сердца́ коле́блемая вра́жиими напа́стьми, утвержде́ние ве́рою приима́ху.

Беси́вшеся непра́веднии лю́дие, Тебе́ пра́веднаго еди́наго осуди́ша на сме́рть, оправда́юща земны́я, и от непра́ведныя руки́ льсти́ваго си́х изыма́юща.

Му́ченичен: Подвиза́ше всю́ свою́ зло́бу льсти́вый, со святы́ми боря́ся, но побежда́шеся, зря́ непоко́ршихся те́х, и Боже́ственныя све́тлости о́бщников.

Му́ченичен: Теле́сная красота́ зе́льными изменя́шеся ра́нами, но облистава́ше па́че све́тлость душе́вная страстоте́рпец Христо́вых, де́йством Свята́го Ду́ха.

Богоро́дичен: Кра́сна добро́тою Тя́, Сы́не, па́че все́х челове́к, внегда́ ражда́ти ми́ разуме́х: и ка́ко распина́емь ны́не, добро́ты не и́маши, Христе́, Де́во глаго́лаше слезя́щи.

Ирмо́с то́йже.

Руко́ю держа́щи Христа́ содержа́щаго вся́, от руки́ лука́ваго диа́вола, и вся́каго врежде́ния изба́ви на́с, Богороди́тельнице Чи́стая, пою́щих Тя́.

Бесо́вскаго смуще́ния изба́ви на́с, Де́во, и челове́к непра́ведных, и вся́ких искуше́ний, и неду́г тлетво́рных Твои́ми моли́твами, Влады́чице Всенепоро́чная.

Се́ Тебе́ вси́ ро́дове блажа́т, Отрокови́це, безле́тное Сло́во в пло́ти под ле́ты ро́ждши преесте́ственно, и Девою́ па́ки пребы́вши.

Я́же Человеколю́бца Бо́га ро́ждшая, Де́во, непотре́бнаго мя́ Твоего́ раба́, в ча́с Стра́шнаго Прише́ствия Его́, изба́ви вся́каго осужде́ния.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста, о Го́споде пра́зднующи.

Распя́та на Дре́ве Тя́, Со́лнце Незаходи́мое, Христе́, зря́ со́лнце помрача́шеся стра́хом, и те́мныя пре́лести отпуще́на быва́ше вся́ тва́рь, воспева́ющая Тя́.

Вяза́ху ру́це Твои́, Спа́се, лю́дие законопресту́пнии, и свя́заннии нереши́мых у́з вси́ отпуща́еми быва́ху; и свя́зан быва́ше вра́г, и ле́сть разруша́шеся.

Му́ченичен: Тече́нием крове́й потопи́сте, му́ченицы, фарао́на гони́теля, умовре́дно безме́рно хва́лящася, и к земли́ благо́й веселя́щеся преидо́сте.

Му́ченичен: Крила́ми ду́ха прелете́вше се́ти вра́жия, страда́льцы, ра́дующеся востеко́сте, иде́же пе́рвая бла́гость, и жи́знь, и Све́т Невече́рний.

Богоро́дичен: Ору́жием уязви́лася еси́ Страсте́й, Влады́чице, из Тебе́ воплоти́вшагося, егда́ Того́ ви́дела еси́ распина́ема, и копие́м в пречи́стая ре́бра на́с ра́ди пробода́ема.

Ирмо́с то́йже.

Хра́м Бо́жий воспои́м – Святу́ю Де́ву, све́тло вси́ блажа́ще, обожи́вшеся ея́ ра́ди, и лю́тых изба́вльшеся.

Я́ко две́рь веду́щую к Боже́ственному вхо́ду, я́ко ра́й Боже́ственный, я́ко мы́сленно ме́сто свяще́ния, я́ко добро́ту Иа́ковлю, Де́ву ублажа́ем.

Приста́нище благоути́шное Тя́ показа́ Христо́с, Влады́чице Всенепоро́чная, ве́рою и любо́вию от мы́сли чи́сты призыва́ющим Тебе́, Богоро́дицу и́стинную.

Мари́е Пречи́стая, чисте́йшее была́ еси́ прия́телище простра́нное Боже́ственнаго вселе́ния, душе́вную мою́ скве́рну и ка́л потреби́.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́ молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Облача́яй не́бо о́блаки, Христе́, на Кресте́ на́г пригвозди́лся еси́ во́лею, наготу́ зло́бы моея́ приодева́яй, и в ри́зы нетле́ния обле́к просвеща́я, Влады́ко.

На Кресте́ ра́спят бы́сть и́стинный Виногра́д – Христо́с, я́ко вои́стинну сы́й сла́дость душа́м на́шим, мсто́ иска́пая, пре́лести вся́кое пия́нство бори́теля потребля́я.

Му́ченичен: Испещре́ннии свяще́нными я́звами Христо́вы страда́льцы, и венцы́ украша́емии, пло́тию пострада́вшему Бо́гу предстоя́ще, на́ших прегреше́ний разреше́ние про́сят.

Му́ченичен: Взира́юще страстоте́рпцы к та́мошней сла́ве, и жи́зни, и и́стинному весе́лию, вся́ко треволне́ние лю́тых подъя́сте, Стра́стию Влады́чнею укрепля́еми.

Богоро́дичен: Во чре́во вмести́вшая Тя́, Христе́, Еди́наго Невмести́маго все́ми, боле́зней кроме́ породи́х, ны́не же боле́зную, распина́ему Ти́, Христе́, – Пречи́стая Де́ва пла́чущи глаго́лаше.

Ирмо́с то́йже.

И́же сло́вом вся́ созда́вый, и му́дрым про́мыслом Госпо́дь окормля́я еди́н, я́коже хо́щет, благоутро́бием создава́ется из Тебе́, Пречи́стая, и Пло́ть несказа́нно быва́ет.

Се́ Де́во, проро́чески зача́т во утро́бе над все́ми Бо́га Влады́ку и Го́спода, и неизрече́нно того́, Чи́стая, родила́ еси́, и по Рождестве́, Де́во, нетле́нна пребы́вши.

Мари́е, Влады́чице все́х, изба́ви мя́, я́ко Ми́лостива, стра́шнаго плене́ния, молю́ся; и греха моего́ рукописа́ние раздери́, копие́м Вопло́щшагося из Тебе́.

Греха́ моего́ плени́цу, Твои́м хода́тайством и предста́тельством, Де́во, расто́ргни: отча́янным бо Ты́ еси́ наде́жда, ве́рою притека́ющим к Боже́ственному покро́ву Твоему́.

Пе́снь 6

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Венча́лся еси́, Долготерпели́ве, те́рнием, посека́я страсте́й те́рние; копие́м в ре́бра прободе́н бы́в, умертви́л еси́ зми́я многоко́зненнаго, на́с ме́ртвы соде́лавшаго.

На Кре́ст воздви́жен бы́л еси́, низлага́я вра́жию си́лу, Влады́ко; рабо́ты же го́рькия мене́ свобожда́я, прия́т зауше́ние: покланя́юся Твоему́, Ще́дре, долготерпе́нию.

Му́ченичен: Кресто́м огражда́еми, страда́льцы, пре́лести сте́ны лука́выя разверго́ша, и к Вы́шнему гра́ду пресели́шася, побе́дными венцы́ укра́шени. Те́мже ублажа́еми су́ть.

Му́ченичен: На высоту́ пресла́вно муче́ния са́ми себе́ возве́дше, святи́и, лука́вая возноше́ния вра́жия на зе́млю низверго́сте, и венцы́ свы́ше прия́сте.

Богоро́дичен: О́тчее Сия́ние, ка́ко воздви́жеся на Кре́ст, просвеща́я вся́ческая, и низлага́я тьмы́ нача́льника? – Пречи́стая Влады́чица ма́терски пла́чущи веща́ше.

Ирмо́с то́йже.

Не опали́вши утро́бу Твою́, О́гнь сы́й Иису́с, из Тебе́ пло́тию проше́д. Того́, Чи́стая, моли́, огня́ и вся́кия му́ки изба́витися ве́рою воспева́ющим Тя́.

Святы́х а́нгел Тя́ благоле́пие воспева́ю, Всенепоро́чная, и молю́: неле́потная потреби́ от мене́ бесо́вская мечта́ния, в тишине́ соблюда́ющи се́рдце мое́.

Пло́тным воображе́нием соедини́вся, И́же от Отца́ Единоро́дный, во утро́бе Твое́й Еди́н от двою́, без се́мене про́йде, и соблюде́ неврежде́нно честно́е де́вство Твое́, Всенепоро́чная.

Мно́жество очи́сти мои́х грехо́в, мно́жеством ми́лости Твоея́, и спаси́ мя раба́ Твоего́, Блага́я, к Тебе́ прибега́ющаго, и моля́щася ве́рно ми́лости Твое́й.

Пе́снь 7

Ирмо́с: Росода́тельну у́бо пе́щь соде́ла А́нгел, преподо́бным отроко́м; халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Ядови́тую зауши́л еси́ зми́я зло́бу, зауше́н бы́в, пове́шен на Дре́ве, Еди́не Си́льне, все́х просвети́л еси́ вопи́ти: благослове́н еси́, Бо́же оте́ц на́ших.

От дре́ва вку́ш Ада́м пе́рвый челове́к, обре́те сме́рть – вторы́й же на не́м Христо́с, умертви́вся, безсме́ртную жи́знь да́рует, умертви́в врага́ многоко́зненнаго.

Му́ченичен: Терпя́ще стра́сть, му́ченицы, муче́нием Го́сподеви возведо́стеся, и на ка́мени ста́сте тве́рдем ве́ры, вся́ку лука́вую низлага́юще зло́бу вра́жию Боже́ственным манове́нием.

Му́ченичен: Просвети́вшеся страда́ньми, страда́льцы, облиста́ете со́лнца светле́йше, и тьмы́ вла́сти вся́ разруши́сте, пою́ще Христо́ви: благослове́н Бо́г оте́ц на́ших.

Богоро́дичен: И́же сы́й неизме́нен Божество́м, измени́л еси́, пове́шен на Кресте́, тва́рь всю́, – Де́ва глаго́лаше Сы́ну; и зря́щи сия́ пла́каше, дивя́щися мно́гому Твоему́ долготерпе́нию.

И́н. Ирмо́с то́йже.

Седя́й в не́дрех Роди́теля Неопи́санный, ны́не седи́т опи́сан, Пречи́стая, в не́дрех Твои́х, Твои́м обложе́н зра́ком, за е́же спасти́ Ада́ма, но́в Ада́м бы́в.

Моля́щи не преста́й человеколю́бца Бо́га на́шего, Всенепоро́чная, я́ко да прии́мем всеконе́чное проще́ние злы́х. И улучи́м я́же на Небесе́х угото́ванная блага́я лю́бящим Его́.

Благослови́м Тя́, Пренепоро́чная, ро́ждшую благослове́ннаго Го́спода, благослове́ньми венча́ющаго Боже́ственными естество́ челове́ческое, и но́во творя́ща то́ обетша́вшее пре́жде.

Спасе́ния Твоего́ приста́нищем обогати́вшеся, Чи́стая, от бу́ри спаса́емся, и наде́жду я́же на Тя́ я́ко кре́пость души́ содержа́ще, зове́м: благослове́нная Я́же Бо́га пло́тию ро́ждши.

Пе́снь 8

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Прего́рдаго зми́я Ты́ смири́л еси́, Вы́шний Бо́же, смире́нием се́рдца возноси́мь на Дре́во, и Ада́ма страстьми́ смире́ннаго возне́сл еси́, Ще́дре.

Дре́внюю го́ресть претворя́яй на Дре́во вознесе́н бы́л еси́, же́лчь вкуша́я, все́х Сла́досте и Жи́знь единоипоста́сная сы́й Влады́ко, и Све́т и Спасе́ние.

Му́ченичен: Не преклони́сте коле́н истука́нным, всехва́льнии, но поже́рти бы́сте я́ко а́гнцы непоро́чнии; и лука́ваго кре́пость преклони́сте, песносло́вяще Христа́ во ве́ки.

Му́ченичен: Хра́мы Ду́ха Жива́го яви́стеся, му́ченицы, хра́мы и́дольския низложи́сте, и к Хра́му Небе́сному взя́ти бы́сте, песносло́вяще Христа́ во ве́ки.

Богоро́дичен: Иа́ков Тя́ предви́де, Де́во, ле́ствицу, к небе́сней высоте́ на́с возводя́щую, во глубину́ злы́х попо́лзшихся – те́мже Чи́стую Тя́ благослови́м во ве́ки.

И́н. Ирмо́с то́йже.

Вои́стинну Богоро́дицу испове́дуем Тя́; со А́нгелом, е́же ра́дуйся, ве́рно вопие́м Ти́: еди́на бо су́щим на земли́ Ра́дость родила́ еси́, обра́дованная Чи́стая, и Благослове́нная.

Боговеща́нная цевни́ца Твоего́ пра́отца, ковче́г Тя́ пресвя́т предвообража́ше, нося́щу Бо́га во пло́ти, Всенепоро́чная, Его́же превозно́сим Го́спода во ве́ки.

Неискусобра́чная Отрокови́це Богора́дованная, и приста́нище су́щим в бу́ри христиа́ном, и упова́ние, изба́ви от напа́стей, и страсте́й и озлобле́ния, и от ве́чнаго огня́ рабы́ Твоя́.

Егда́ прии́деши во сла́ве суди́ти вся́ческим, десны́м мя́ овца́м причти́, Влады́ко, гре́шнаго, Ма́тере Твоея́ мольба́ми: да Тя́ сла́влю во вся́ ве́ки.

Та́же, пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти. Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с Небе́сными во́и, Тя́ ублажа́ем.

Времено́м и ле́том сы́й Госпо́дь, посреде́ земли́ в полу́дне на Дре́во возне́слся еси́, распина́емь Еди́не Долготерпели́ве, и посреде́ Рая́ претерпе́вшаго поползнове́ние, пло́д тлетво́рный исправля́я.

Кре́ст водружа́шеся, и мучи́тель в души́ сме́ртную я́зву приима́ше, и свя́заннии от тли́ отреша́еми быва́ху; ра́зум же во вся́ челове́ки всажда́шеся, вра́г упраждня́шеся, и ра́дости вся́ исполня́хуся.

Му́ченичен: Земля́ совокупи́ся, Госпо́дни му́ченицы, с Небесы́, отне́леже Христо́с пожре́ся, распина́емь. И ва́ше мно́жество привлече́, мно́жество зе́льных му́к претерпе́вшия, и мно́жеству Боже́ственных слу́г сооблиста́вшия.

Му́ченичен: Све́том невеще́ственным облиста́еми, положе́нием бо́зи бы́сте, Госпо́дни му́ченицы, в перворо́дных селе́ниих водворя́еми, и ве́чныя сла́вы исполня́еми – те́мже по до́лгу ве́рнии ва́с почита́ем.

Богоро́дичен: Стра́шно Рождество́ претерпе́х, Влады́ко, внегда́ стра́нно Тебе́ роди́х, Долготерпели́ве, Его́же тва́рь распина́ема на Дре́ве во́лею, зря́щи устраши́ся, дре́вле Непоро́чная пла́каше вопию́щи ма́терски, Ю́же велича́ем.

И́н. Ирмо́с то́йже.

Сы́н, Сло́во Бо́жие Безнача́льное, вопло́щся, Сы́н Де́выя быва́ет; благоволе́нием же Отца́ и Ду́ха Боже́ственнаго де́йством, ве́сь обнови́ истле́вший мо́й зра́к я́ко всеси́лен.

Душе́, возни́кни, и бо́дрствуй к моли́твам, и ко все́м благи́м; прилежа́нием ле́ность со́нную отве́ржи, бо́друю иму́щи храни́тельницу всегда́, Чи́стую Ма́терь Бо́жию, Юже велича́ем.

Упова́ние и покро́в, и ра́дование, Ты́ ве́рным еси́, Богоро́дице Всенепоро́чная. Сего́ ра́ди молю́ся Твои́м щедро́там: просвети́ ду́шу мою́, ю́же омрачи́ тьма́ мно́гих грехо́в, и лука́вых помышле́ний.

Свята́я Де́во Богора́дованная, две́ри све́та отве́рзи ми́, но́щь греха́ да мя́ не покры́ет; испра́ви жи́знь мою́, к приста́нищу благоути́шному Боже́ственных повеле́ний из Тебе́ Вочелове́чившагося.

Та́же, Досто́йно е́сть: Ектения́, и свети́лен. Посе́м псалмы́ обы́чны.

На стихо́вне стихи́ры кре́стны, гла́с 6:

О Кресте́ упова́ние име́ю, Христе́, и о не́м хваля́ся вопию́: Человеколю́бче Го́споди, горды́ню низложи́, не испове́дающих Тебе́ Бо́га и Челове́ка.

Сти́х: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

И́же Кресто́м огражда́еми, врагу́ противля́емся, не боя́щеся ко́зней его́ и ла́яния. Я́ко бо го́рдый упраздни́ся, и попра́н бы́сть си́лою на Дре́ве пригвожде́ннаго Христа́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Па́мять му́ченик – ра́дость боя́щимся Го́спода. Пострада́вше бо Христа́ ра́ди, венцы́ от Него́ прия́ша, и ны́не со дерзнове́нием мо́лятся о душа́х на́ших.

Сла́ва, и ны́не: Крестобогоро́дичен:

Подо́бен: Всю́ отложи́вше:

А́гнца Своего́, А́гница Нескве́рная дре́вле и Непоро́чная Влады́чица, на Дре́ве Кре́стнем я́ко узре́, ма́терски восклица́ше, и дивя́щися вопия́ше: Ча́до Сладча́йшее, что́ зре́ние сие́ но́вое и пресла́вное? Ка́ко со́нм безблагода́тный суди́щу Пила́тову предаде́ Тя, и осужда́ет на сме́рть Живота́ вся́ческих? Но воспева́ю Твое́ неизрече́нное, Сло́ве, снизхожде́ние.

Та́же, Бла́го е́сть: Трисвято́е по О́тче на́ш: тропа́рь, ектения́, и ча́с 1-й: псалмы́ обы́чны, и про́чее, и отпу́ст.

Помяни́ мя, Бо́же, Спа́се мо́й, егда́ прии́деши во Ца́рствии Твое́м, и спаси́ мя, я́ко еди́н Человеколю́бец.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Во́лею возне́слся еси́ на Дре́ве, во глубину́ зо́л попо́лзшихся призва́л еси́, Еди́не Многоми́лостиве.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Земля́ потрясе́ся, и со́лнце угасе́, ви́дяще Тя́ на Дре́ве – Со́лнца Пра́веднаго, во́лею стра́ждуща.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Страсте́м Спа́совым страстоте́рпцы приобща́ющеся, и Боже́ственныя све́тлости сопричаща́етеся, прича́стием обожа́еми.

Сла́ва: Вознеси́ мя из глубины́ грехо́вныя, Христе́ мо́й, И́же от Тро́ицы Еди́ный во́лею претерпе́вый распя́тие.

И ны́не: Предстоя́щи у Креста́, Де́во Ма́ти, и зря́щи Сы́на во́лею стра́ждуща, Того́ велича́ше.

на Го́споди, воззва́х: стихи́ры святы́м апо́столом, гла́с 6.

Подо́бен: Тридне́вен воскре́сл еси́:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Вели́ким та́йнам Бо́жиим служи́телие бы́сте, богосло́вцы и богови́дцы, ученицы́; и благода́ть исцеле́ний прия́сте, и все́м челове́ком боле́зни исцеля́ете.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Вели́кое прибе́жище и покро́в душа́м на́шим, духо́в лю́тых прогна́ние, вы́ есте́, богови́дцы апо́столи Госпо́дни. Те́мже ва́с при́сно почита́ем.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

От вся́каго обстоя́ния, и вре́да бесо́вскаго, и прегреше́ний, и зла́го плене́ния изба́вите, ве́рою ва́с восхваля́ющих, боже́ственнии апо́столи, блаже́ннии.

Та́же, в Мине́и стихи́ры свято́му. А́ще ли не́сть Мине́и, и́ны стихи́ры свято́му и вели́кому чудотво́рцу Никола́ю, гла́с 6, и подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Нико́лае блаже́нне, припа́дающа мя́ уще́дри, молю́ся ти́, му́дре, и о́чи просвети́ души́ моея́, да чи́сте ви́жду Светода́вца ще́драго.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Враго́в и́щущих мя́ озло́бити, изба́ви мя́, свя́те, дерзнове́ние к Бо́гу я́ко имы́й, святи́телю Нико́лае блаже́нне, спаси́ мя от вре́да, и от му́ж крове́й изба́ви мя́.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Приста́нище Тя́ небу́рное, и сте́ну необори́мую, святи́телю, ны́не стяжа́хом ве́рнии, и сто́лп кре́пости, и две́рь покая́ния, и наста́вника ду́ш на́ших, и забра́ло.

Сла́ва, и ны́не: Богоро́дичен: Зави́дя сопроти́вник лука́вый ста́ду Твоему́, Пречи́стая, всегда́ бо́рет, хотя́ себе́ сне́дь сотвори́ти: но Ты́, Богоро́дице, изба́ви на́с от того́ вре́да.

Та́же, Све́те ти́хий: Проки́мен: Бо́же, во и́мя Твое́ спаси́ мя: Сти́х: Бо́же, услы́ши моли́тву мою́: и Сподо́би, Го́споди, в ве́чер се́й:

На стихо́вне стихи́ры святы́м апо́столом, гла́с 6:

Го́споди, апо́столи спостиго́ша иногда́ у́бо сетьми́ глубину́ морску́ю, иногда́ же высоту́ Ца́рствия уче́ний ра́ди. О́во у́бо худо́жеством непостижи́мую глубину́ испыта́ша, о́во же ве́рою неопи́саннаго Твоего́ не́дра достиго́ша, и ми́ру пропове́даша безле́тнаго Твоего́ Сы́на. Те́х моли́твами, и все́х святы́х поми́луй на́с.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Иногда́ ученицы́ Твои́, Христе́, в корабли́ обурева́еми вопия́ху: Учи́телю, спаси́ на́с, погиба́ем. И ны́не мы́ вопие́м: Человеколю́бче, Спа́се на́ш, изба́ви на́с от бе́д на́ших, мо́лимся.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Кре́ст Тво́й, Го́споди, му́чеником бы́сть ору́жие непобеди́мое: ви́деша бо предлежа́щую сме́рть, и прездря́ще бу́дущую жи́знь, упова́нием е́же на Тя́ укрепля́хуся: те́х моли́твами поми́луй на́с.

Сла́ва, и ны́не: Богоро́дичен: О́ко се́рдца моего́ возпуща́ю к Тебе́, Влады́чице: не пре́зри ма́лаго моего́ воздыха́ния в ча́с, егда́ су́дит Сы́н Тво́й ми́ру, бу́ди ми́ покро́в и помо́щница.

Та́же, Ны́не отпуща́еши: И отпу́ст.

Кано́н Пресвяте́й Богоро́дице.

Творе́ние Иоа́нна иеромона́ха, [его́же краегране́сие: Пресвята́я, приими́ Иоа́нна рыда́ние.] Гла́с 6.

Пе́снь 1

Ирмо́с: Помо́щник и покрови́тель бы́сть мне́ во спасе́ние, Се́й мо́й Бо́г, и просла́влю Его́, Бо́г отца́ моего́, и вознесу́ Его́, сла́вно бо просла́вися.

Запе́в: Пресвята́я Богоро́дице, спаси́ на́с.

Ка́ко приступлю́ к Тебе́, Чи́стая, отча́ян окая́нный а́з, ве́сь стра́стен нечистота́ми бы́в? Но уще́дривши спаси́ окая́нную мою́ ду́шу, Богороди́тельнице Пречи́стая.

Воста́вши, смире́нная душе́, от глубины́ безче́стия, возопи́й те́пле к Еди́ней Чи́стей: поми́луй мя́, Отрокови́це Пренепоро́чная Чи́стая, и страсте́й мя́ изба́ви.

Сла́ва: Бу́рею напа́стей потопле́н бы́х грехи́ – простри́ ми ны́не по́мощи ру́ку, Чи́стая, и изба́ви безче́стия страсте́й, я́ко да при́сно сла́влю Тя́.

И ны́не: Греха́ лю́тыя бу́ри изба́ви мя́, Богороди́тельнице, от нея́же ве́сь скве́рнен е́смь. Те́мже Ти́ притека́ю, облегчи́ ми́ ны́не тяготу́ прегреше́ний мои́х.

Пе́снь 3

Ирмо́с: Утверди́, Го́споди, на ка́мени за́поведей Твои́х, подви́гшееся се́рдце мое́, я́ко Еди́н Свя́т еси́ и Госпо́дь.

Состаре́вшася страстьми́ безче́стными греха́, мла́да сотвори́ мя, Пренепоро́чная, соу́зы прегреше́ний облегча́ющи.

От бре́ния мя́ очи́сти, и ти́ны грехо́вныя, и хра́м мя́ Боже́ственный сотвори́, Богоро́дице, чи́сте к Тебе́ прибега́ющаго.

Сла́ва: Возни́кни, окая́нная душе́, от сна́ уны́ния: очи́ма же воззри́ к Еди́ней спаса́ющей Тя́ Отрокови́це Богоневе́стней.

И ны́не: Прихожду́, Влады́чице, отча́ян и сокруше́н, и к моли́тве Твоея́ те́плей прибега́ю: спаси́ мя, Чи́стая, раба́ Твоего́.

Пе́снь 4

Ирмо́с: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: услы́шах слу́х Тво́й, и убоя́хся. Сла́ва си́ле Твое́й, Го́споди.

Глаго́л же и веще́й, пра́во хощу́ суди́тися, Богороди́тельнице, к Твоему́ Сы́ну, Пренепоро́чная, да обря́щу Тя́ тогда́ прибе́жище, и заступле́ние держа́внейшее, му́к все́х избавля́ющее мя́.

Житие́ мое́ окаля́но, нечи́ст же нра́в греха́ми, ве́сь стра́стен бы́х, Чи́стая: очи́сти мя́ от скве́рны прегреше́ний, и убели́ я́ко сне́г Твои́м хода́тайством к Бо́гу благосе́рдому.

Сла́ва: Плени́цами мои́х согреше́ний стя́гнут е́смь отвсю́ду, к покая́нным путе́м уклоня́тися не моги́й: простри́ ми ру́ку, Пренепоро́чная, упра́ви же ми́ стезю́ к спасе́ния пути́ наставля́ющую мя́.

И ны́не: Лю́тых мя́ му́к, и тьмы́ кроме́шныя, и гее́нны Твои́ми моли́твами свободи́, Де́во: и́маши бо во́лю и си́лу, Го́спода ро́ждшая Еди́наго Преблага́го.

Пе́снь 5

Ирмо́с: От но́щи у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́.

В Де́нь Суда́ яви́ся, Влады́чице, и предста́ни ми́, му́ки и огня́ свобожда́ющи, да спа́сся воспою́ Твою́ необори́мую благода́ть.

Устра́ншася, Влады́чице, кро́ва Твоего́, вра́г ви́дя мя́ ври́ну во глубину́ прегреше́ний ду́шу мою́, и зря́ мя смее́тся: но помози́ ми.

Сла́ва: Возни́кнути сотвори́, Чи́стая, окая́нную и стра́стную мою́ ду́шу, молю́ Тя, Пренепоро́чная, и изми́ тяготы́ ея́, мно́гих грехо́в.

И ны́не: Мольбу́ приношу́ Ти, Пренепоро́чная, от скве́рных и окая́нных и нечи́стых мои́х усте́н: уще́дри мя́ Твое́ю моли́твою, молю́ Тя.

Пе́снь 6

Ирмо́с: Возопи́х все́м се́рдцем мои́м к Ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.

Блу́днаго мене́ и преокая́ннаго приими́, Влады́ко Христе́, и му́ки изба́ви, мольба́ми Тебе́ Ро́ждшия, и шу́ия ча́сти изба́ви мя́.

Те́мный а́да одержи́т мя́ стра́х, Чи́стая, и ко́злищ ча́сть смуща́ет мя́, ея́же изба́ви мя́, Пречи́стая Богоро́дице, молю́ Тя.

Сла́ва: Умертви́вши пло́ти моея́ стра́стное, Влады́чице Богоро́дице, оживотвори́ мою́, Чи́стая, ду́шу преокая́нную, и на пу́ть пра́вый наста́ви мя́.

И ны́не: Ра́бское приноша́ю Ти́ моле́ние, неразу́мный а́з, и к Твоему́ прибега́ю благоутро́бному милосе́рдию: не возврати́ мене́, Чи́стая, посра́млена.

Та́же: Го́споди, поми́луй, три́жды. Сла́ва, и ны́не:

Седа́лен, гла́с 6:

От се́рдца стена́ние, и от утро́бы приноша́ю Ти́, Пренепоро́чная, Твоего́ прося́ благопребы́тнаго заступле́ния: поми́луй всестра́стную мою́ ду́шу: умилосе́рди многоми́лостиваго Бо́га, изба́вити мя́ суда́ и е́зера о́гненнаго, еди́на Благослове́нная.

Пе́снь 7

Ирмо́с: Согреши́хом, беззако́нновахом, непра́вдовахом пред Тобо́ю: ниже́ соблюдо́хом, ниже́ сотвори́хом, я́коже запове́дал еси́ на́м: но не преда́ждь на́с до конца́, отце́в Бо́же.

Я́ко ми́лостиву, я́ко благолюби́ву Де́ву Ма́терь, всю́ Тя я́ко Чи́стую све́дый, прибега́ю а́з окая́нный: но не отврати́ мене́, Всенепоро́чная, посра́млена от Тебе́.

Возни́кни, о стра́стная душе́, и воста́ни, окая́нная. Би́й из глубины́ в пе́рси, и испусти́ сле́з исто́чники, да тя́ поми́лует окая́нную милосе́рдия Ма́ти Христа́ и Бо́га.

Сла́ва: Хра́м Бо́жий бы́в, от Креще́ния Боже́ственнаго дре́вле, ве́сь оскверни́хся окая́нный, и низлежу́ ужа́сно паде́нием лю́те: но Ты́ мя возста́ви, Пренепоро́чная, отча́янных наде́жда.

И ны́не: О́блак тя́жек покры́ преокая́нное мое́ се́рдце, тьма́ и мра́к на́йде на стра́стную мою́ ду́шу, Богоневе́сто: покая́ния луча́ми озари́ мя, да сла́влю Тя́.

Пе́снь 8

Ирмо́с: Его́же во́инства Небе́сная сла́вят, и трепе́щут Херуви́ми и Серафи́ми, вся́ко дыха́ние и тва́рь, по́йте, благослови́те, и превозноси́те во вся́ ве́ки.

Река́ о́гненная смуща́ет, и мра́к несвети́мый всего́ мя коле́блет, че́рвь мя́ ужаса́ет и скре́жет зубны́й, Де́во: да обря́щу Тя́ тогда́ засту́пницу держа́вну.

Возгнеще́ние огню́ да не бу́ду, Го́споди, ни да услы́шу гла́с преще́ния Твоего́, име́я моля́щую Тя́, Твою́ Чи́стую Ма́терь. Ея́же мольба́ми поми́луй мя́, взыва́ю Ти́.

Сла́ва: Боже́ственнаго гла́са услы́шати сотвори́ мя, и стоя́ния избра́нных покажи́ мя, Христе́, прича́стника, да не плаче́вное ме́сто мя́ прии́мет, иму́ща моля́щую Тя́ о се́м Богоро́дицу.

И ны́не: Струи́ сле́з ны́не низпосли́ ми, и стена́ние от души́ сотвори́ во мне́, Чи́стая, всегда́ припа́дати Твоему́ покро́ву, я́ко да обря́щу разреше́ние грехо́в мои́х Твое́ю моли́твою.

Пе́снь 9

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди я́ко Богоневе́стную Ма́терь, правосла́вно велича́ем.

Де́нь Суда́ стра́шный смуща́ет мя́, Де́во, скре́жет зубо́в тли́т се́рдце мое́, стоя́ние ко́злищ ужаса́ет мя́, но по́мощь в лю́тых да обря́щу Тя́, Богоро́дицу, егда́ хощу́ осуди́тися.

Ны́не тре́пет содержи́т мя́, и стра́х смуща́ет мя́ гее́нский, и что́ соде́яти, не ве́м окая́нный и осужде́нный. Те́мже притека́ю к Тебе́, и те́плым умиле́нием вопию́ Ти: не пре́зри мене́, Пречи́стая.

Сла́ва: Зря́ Суди́ще, и помышля́я су́д Тво́й, Христе́ мо́й, в не́мже хощу́ суди́тися пра́ведно о де́лех осужде́нный. Но и́мам Моле́бницу тогда́, к щедро́там Твои́м мно́гим, моля́щую Богоневе́стную Ма́терь Твою́.

И ны́не: Мы́сленно прикаса́яся Твои́м стопа́м, Всенепоро́чная, молю́ Тя́: приими́ рыда́ние мое́, пе́ние внуши́, и прегреше́ний разреше́ние пода́ждь ми́, вопию́ Ти, моли́твами Твои́ми, Де́во, да любо́вию Тя́ велича́ю.

Та́же, Досто́йно е́сть: Трисвято́е по О́тче на́ш: тропа́рь, и про́чее обы́чно, и отпу́ст.

По 1-м стихосло́вии, седа́льны. апо́стольски, гла́с 6:

Я́ко посреде́ ученико́в Твои́х, прише́л еси́, Спа́се, ми́р Тво́й дая́ и́м: прииди́ и к на́м, и спаси́ на́с.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Ученико́в Твои́х ли́к вселе́нную просвети́. Бы́вше бо иногда́ ловцы́ ры́б, ны́не же – челове́ков бы́ша. Те́х ра́ди, Бо́же, поми́луй на́с.

Сла́ва, и ны́не: Богоро́дичен: Мно́гая мно́жества мои́х, Богоро́дице, прегреше́ний, к Тебе́ прибего́х, Чи́стая, спасе́ния тре́буя: посети́ немощству́ющую мою́ ду́шу, и моли́ Сы́на Твоего́, и Бо́га на́шего, да́ти ми́ оставле́ние, я́же соде́ях лю́тых, еди́на Благослове́нная.

По 2-м стихосло́вии седа́льны, гла́с 6:

Ученицы́ Твои́, Спа́се, в концы́ земли́ посыла́еми, язы́ки благоче́стно я́ко ры́бы улови́вше, приведо́ша Твое́й бла́гости. Те́х ра́ди у́бо вопие́м Ти́, Христе́: лю́дем твои́м пода́ждь ве́лию ми́лость.

Сти́х: Испове́дят Небеса́ чудеса́ Твоя́, Го́споди.

Двоенадеся́тица апо́стол, Го́споди, двоенадесятолу́чная я́ко со́лнце яви́ся земли́: те́х бо ра́ди увяди́л еси́ пре́лести израсти́теля, те́х ра́ди озаря́еши ду́ши Твои́х рабо́в, и на́с и́х ра́ди спаса́й, я́ко Благоутро́бен.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Го́споди, святы́х Твои́х па́мять дне́сь яви́ся, я́ко Ра́й, и́же во Еде́ме: в не́й бо ра́дуется вся́ тва́рь, и подае́ши на́м те́х моли́твами ми́р и ве́лию ми́лость.

Сла́ва, и ны́не: Богоро́дичен: Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя́, но Сама́ заступи́, и поми́луй мя́.

По 3-м стихосло́вии, седа́льны, гла́с 6:

Подо́бен: Всю́ отложи́вше:

Во всю́ зе́млю я́ко мо́лния прему́дрых ученико́в Твои́х, Влады́ко Христе́, изы́де спаси́тельное веща́ние, и озари́ су́щия во тьме́ и лю́тых, сы́ны дне́ и све́та на́с соде́лавшее. Те́мже Тя́ вся́ тва́рь благоче́стно сла́вит.

Мре́жею Боже́ственныя ве́ры лю́дие преврати́вше ры́барие, из глубины́ су́етства извлеко́ша все́х, и преда́ша и́х Бо́гу, благоче́ствующих, и Того́ при́сно велича́ющих.

Сла́ва, и ны́не: Богоро́дичен: Свята́я Влады́чице, Христа́ Бо́га на́шего Ма́ти, я́ко все́х Творца́ неизрече́нно ро́ждшая, моли́ со апо́столы свяще́нными всегда́ бла́гость Его́, страсте́й на́с изба́вити, и оставле́ние на́м да́ти грехо́в.

Кано́н святы́м сла́вным и всехва́льным апо́столом. Творе́ние Феофа́ново, гла́с 6

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Све́т бы́вше ми́ру, богоглаго́ливии, све́тлыми блиста́ньми озари́те на́с, и страсте́й изба́вите но́щи, и мглы́ искуше́ний, богоблаже́ннии. [Два́жды.]

Кня́зи честны́я по все́й земли́ Ду́х ва́с че́стно поста́ви, Госпо́дни ученицы́. Те́мже возду́шнаго кня́зя победи́вше, ве́рныя избавля́ете.

От огня́ невеще́ственнаго, я́ко светоза́рное разже́гшеся у́глие, веще́ственныя моя́, прему́дрии, стра́сти попали́те, к све́ту безстра́стия и живота́ наставля́юще мя́.

Богоро́дичен: Апо́стол моли́твами, проро́к, и му́ченик, и Ро́ждшия Тя́, Чи́стыя, Го́споди Иису́се, все́х Царю́, уще́дри лю́ди согреши́вшия Ти́.

Други́й кано́н свято́му чудотво́рцу Никола́ю, [его́же краегране́сие.Шесто́е пе́ние, Нико́лае, приими́] Творе́ние Ио́сифово. Гла́с 6.

Ирмо́с: Чу́вственный фарао́н пото́плен бы́сть со всево́инством – Изра́иль же проше́д посреде́ мо́ря, вопия́ше: Го́сподеви Бо́гу на́шему пои́м, я́ко просла́вися.

На Небесе́х живы́й ра́достно, о́тче прему́дре, на земли́ ве́рою согла́сно тебе́ пою́щих, вся́кую ско́рбь се́рдца лука́вую разжени́ хода́тайством твои́м.

На стра́сти вре́дныя, на враги́ тлетво́рныя, на вся́кую льсти́ваго зло́бу, укрепи́ ны́не, о́тче Нико́лае, к покро́ву твоему́ свято́му ве́рою притека́ющия.

Уя́звленных на́с от неви́димых стреле́ц, врачевство́м твоея́, Нико́лае, моли́твы претвори́, я́ко да здра́во ходи́ти на́м по путе́м Госпо́дним.

Богоро́дичен: И́же сы́й со Отце́м соприсносу́щный Сы́н, напосле́док восхоте́в всели́ся в ложесна́ Твоя́ на на́ше, Богоро́дице, ве́рных отрожде́ние: те́мже воспева́ем Тя́.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Боже́ственный Ду́х ва́ша язы́ки извари́в наше́ствием стра́шным, сокруше́нныя челове́ки к животу́ обновля́ет ва́ми, сла́внии апо́столи. [Два́жды.]

В ра́зуме согреша́яй, ко́е обря́щу поми́лование, Сло́ве, в Де́нь Су́дный? Сего́ ра́ди вопию́ Ти: Твои́х ра́ди учени́к уще́дри мя́ самоосужде́ннаго.

Уподо́бльшиися Христо́вым спаси́тельным Страсте́м, души́ моея́ стра́сти ле́тныя и лю́тыя исцели́те, вра́чеве су́ще, сла́внии апо́столи.

Богоро́дичен: Согреши́вшаго мя́, Христе́, Богоро́дицы ра́ди и Твои́х апо́стол, обрати́в я́ко Бо́г поми́луй, и огня́ ве́чнаго, Спа́се, свободи́.

И́н. Ирмо́с: На тве́рдем ве́ры Твоея́ ка́мени помышле́ние утверди́в души́ моея́, утверди́, Го́споди: Тя́ бо и́мам, Бла́же, прибе́жище и утвержде́ние.

Побе́ды я́ве на душетле́нныя стра́сти прия́л еси́, Нико́лае всеблаже́нне, от ни́хже зле́ всегда́ побежда́емых на́с Твои́ми моли́твами изба́ви.

У́ды плотски́я умертви́в воздержа́нием, к жи́зни преше́л еси́ нестаре́ющейся, ю́же и на́м восприя́ти моли́ся, му́дре, ра́достно восхваля́ющим Тя́.

Посеща́ти на́с от Небе́сныя высоты́ не преста́й, святи́телю, отгоня́ всю́ жите́йскую тесноту́, к Бо́гу твои́ми моли́твами.

Богоро́дичен: Разреше́ние на́м грехо́в да́ти, Чи́стая, Изба́вителя умоли́, помраче́ние все́ от ду́ш на́ших при́сно Твои́ми моли́твами разгоня́ющи.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста о Го́споде пра́зднующи.

Приста́нища благоути́шная, приста́нища небу́рная, к ти́хому мя́ приста́нищу доведи́те, прегреше́ний лю́тых треволне́нием обурева́ема. [Два́жды.]

Душе́ моя́, воздохни́, душе́ моя́, прослези́ся! Смире́нное се́рдце мое́ благо́му отню́д прилепи́ся, я́ко да бу́дущаго Тя́ пла́мене и му́ки изба́вит Бо́г.

Спа́са Го́спода моли́те, спаси́телие су́ще челове́ков, всеблаже́ннии апо́столи, да на́с спасе́т от искуше́ний злы́х, я́ко Человеколю́бец.

Богоро́дичен: Де́во Пречи́стая, Де́во Непоро́чная, со апо́столы о на́с мольбу́ сотвори́, я́ко да изба́вимся лю́тых искуше́ний и бе́д.

И́н. Ирмо́с: Услы́шах слу́х Тво́й, и убоя́хся, разуме́х дела́ Твоя́, и ужасо́хся: сла́ва си́ле Твое́й, Го́споди.

Уврачу́й, свя́те, уя́звленое от льсти́ваго неиспра́вленое се́рдце мое́, умоли́в благода́вца Бо́га на́шего, Нико́лае.

Сокруши́л еси́ ка́пища поги́бели, Христо́в уго́дниче. Те́мже ве́рою молю́ тя, Нико́лае, ума́ моего́ зло́бныя куми́ры потреби́.

Миродохнове́нен бы́л еси́ пра́ведными делесы́, богому́дре, и в Ми́рех украси́л еси́ престо́л, о́тче святи́телю Нико́лае.

Богоро́дичен: Безневе́стная Влады́чице, благослове́нная Богороди́тельнице, пою́щия Тя́ спаса́й от вся́каго вре́да, еди́на челове́ков Помо́щнице.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́шы любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Пу́ть вводя́щий в живо́т, зело́ тесне́йшим ше́ствием искуше́ний и скорбе́й, ученицы́ Сло́ва, я́ве ходи́вшии, стезю́ души́ моея́ угла́дите. [Два́жды.]

Свети́льницы Боже́ственнаго Восто́ка, изба́вите мя́ от тьмы́ страсте́й, и сласте́й помраче́ния, и напа́стей, и обстоя́ний, и бу́ри, и бе́д, Христо́вы апо́столи.

Сви́тцы Сло́ва богозра́чнии, в Кни́зе мя́ Живо́тней написа́тися моли́те, апо́столи, грехо́в мои́х зло́е растерза́юще писа́ние моли́твами ва́шими.

Богоро́дичен: Спасе́ние мое́ и упова́ние, спаси́ мя упова́ющаго на Тя́, все́х упова́ние непосты́дное, я́же к Сы́ну Твоему́ мольба́ми, и боже́ственных учени́к, Отрокови́це, еди́на Всепе́тая.

И́н. Ирмо́с: Све́т возсия́вый ми́ру, Христе́, просвети́ се́рдце мое́ от но́щи Тебе́ зову́ща, и спаси́ мя.

Дрема́нием ле́ности одержи́ма, усе́рдно мя́ устро́й свяще́нными хода́тайствы Твои́ми, Нико́лае.

Иису́са Спа́са умоли́, святи́телю Нико́лае, ве́чнаго мя́ изба́вити муче́ния.

Мирски́х мя́ собла́зн соблюди́, и от бесо́вскаго озлобле́ния, моли́твами Твои́ми, святи́телю Нико́лае.

Богоро́дичен: Е́же бы́ти на́м подава́яй, в Твою́ утро́бу всели́ся, Богоро́дице. Его́же моли́ спасти́ на́с.

Пе́снь 6

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Я́ко скрижа́ли богопи́санная Ду́ха, я́ве честна́я законоположе́ния, сла́внии, в душа́х име́сте нело́жно, и́миже в Писа́ниих упраздни́сте Зако́н, ми́р спа́сше. [Два́жды.]

Душе́ согреша́ющи, обы́чаем же злы́м умовре́дно рабо́тающи, обраще́нием обрати́ся, и Го́сподеви ще́дрому возопи́й: апо́стол ра́ди, Сло́ве, спаси́ мя.

Овца́м десны́м сочета́й мя́, во ужа́сном и стра́шном Прише́ствии Твое́м, избра́нным Твои́м, моли́твами боже́ственных пропове́дник Твои́х, закла́выйся за все́х, А́гнче незло́бивый.

Богоро́дичен: Ли́к мо́лит Тя́ безпло́тных слу́г, Сы́не Бо́жий Пребезнача́льне, мо́лит Тя́ собо́р ученико́в с Ро́ждшею Тя́: лю́дем Твои́м пода́ждь ми́лости Твоя́.

И́н. Ирмо́с: Ки́том пожре́н грехо́вным, вопию́ Тебе́, Христе́: я́ко проро́ка из истле́ния мя́ свободи́.

Свети́льника Тя́ разу́мнаго иму́щи тва́рь, Нико́лае, просвеща́ется заря́ми неисче́тных чуде́с твои́х.

Недрема́нный моли́твенниче, к тебе́ притека́ющим, Нико́лае, от сна́ зла́го ле́ности изба́ви мя́.

Изба́вил еси́ дре́вле, му́дре, хотя́щия непра́ведно умре́ти, та́кожде и мене́ изба́ви от бе́д и прегреше́ний, Нико́лае.

Богоро́дичен: Де́во, еди́на Чи́стая, Обра́дованная, помози́ ми, при́сно обурева́ему жите́йскими напа́стьми.

Пе́снь 7

Ирмо́с: Росода́тельну у́бо пе́щь соде́ла А́нгел преподо́бным отроко́м; халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

У́дицею сло́ва, апо́столи, извле́кше все́х из глубины́ пре́лести, приведо́сте к закла́вшемуся Сло́ву на́с ра́ди, пою́ще ему́: благослове́н Бо́г оте́ц на́ших. [Два́жды.]

Я́вльшемуся ве́щию теле́сною, апо́столи, нехода́тайственне бесе́довавше, просвети́стеся светода́тельными блиста́ньми Его́. Те́мже мя́ просвети́те вопию́ща: благослове́н Бо́г оте́ц на́ших.

Па́стыря до́браго умоли́те, Боже́ственнии ученицы́, в гора́х мя́ заблу́ждшаго преступле́ния взыска́ти, и спасти́ вопию́щаго приле́жно: благослове́н Бо́г оте́ц на́ших.

Богоро́дичен: Со проро́ки, апо́столы же и му́ченики, Де́во, Его́же родила́ еси́, моли́, земны́х мя́ изба́вити зо́л, и прича́стника Небе́сных бла́г бы́ти мя́ сподо́би, Влады́чице.

И́н. Ирмо́с: Преподо́бных Твои́х отроко́в моли́тву услы́шавый, и пе́щь горя́щую ороси́вый, благослове́н еси́, Го́споди Бо́же оте́ц на́ших.

Си́лою Бо́жиею, преблаже́нне, ерети́чествующих полки́ попра́л еси́, и от те́х пре́лести ста́до твое́ спа́сл еси́, Нико́лае.

Явле́йся пла́вающим, и тво́й гра́д препита́л еси́ стра́ждущ – душетле́ннаго мя́ гла́да изба́ви, моли́твами твои́ми, о́тче Нико́лае.

Утверди́, о́тче, моли́твами твои́ми тебе́ призыва́ющия на по́мощь, Нико́лае, утиша́я бесо́вскую лука́вую бу́рю.

Богоро́дичен: Влады́чице все́х челове́к, свята́я Богоро́дице, рабо́ты мя́ стра́стныя Твои́ми моли́твами до конца́ свободи́.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Моли́тв серпо́м очи́стите пле́велы вся́ мы́сли моея́, Боже́ственнии де́латели Спа́совы апо́столи, я́ко да спаси́тельнаго плода́ принесу́ кла́с. [Два́жды.]

Олядене́вшая сердца́ обнови́сте ра́лом сло́ва, и все́явше уче́ние честно́е, кла́с стори́чествующ спа́сшихся пожа́сте, богови́дцы.

Вра́жию зло́бу успи́вше, усну́ли есте́ сно́м пра́ведных подо́бным, неусы́пнии о на́с моли́твенницы бы́вше, ученицы́ Сло́ва, во вся́ ве́ки.

Богоро́дичен: Огня́ негаси́маго изба́ви мя́, Го́споди, проро́к, и му́ченик, и апо́стол Твои́х, и во утро́бу вмести́вшия Тя́ неизрече́нно, Де́вы Неискусому́жныя, Ще́дре, моли́твами.

И́н. Ирмо́с: Преподо́бнии Твои́ о́троцы в пещи́ Херуви́мы подража́ху, трисвяту́ю пе́снь воспева́юще: благослови́те, по́йте, и превозноси́те во вся́ ве́ки.

На высоту́ жития́ светле́йшаго восте́к яви́лся еси́, и зна́емь вселе́нней, Богоно́сне, чудодея́нии разли́чными просвеща́я су́щих во тьме́, Нико́лае.

Облагодати́ боже́ственне бо́дрствующия, тя́ чту́щия, Нико́лае, успи́ зло́бу вражду́ющих челове́к, на на́с находя́щих, блаже́нне.

И́же вся́ се́ти вра́жия кре́постию сокруши́в духо́вною, от те́х изба́ви мя́ твои́ми моли́твами, окормля́я живо́т мо́й, богому́дре, святи́телю Нико́лае.

Богоро́дичен: Пое́м тя́, Де́во Богороди́тельнице, Ея́же ра́ди кля́тва непло́дна бы́сть и благослове́ние все́м прии́де, ве́дущим Тя́ еди́ну Ма́терь Бо́га на́шего безму́жную.

Та́же пое́м пе́снь Богоро́дицы: Вели́чит душа́ моя́ Го́спода: с припе́вы, и покло́ны.

Пе́снь 9

Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти. Тобо́ю же, Всечи́стая, яви́ся челове́ком Сло́во воплоще́нно. Его́же велича́юще, с Небе́сными во́и Тя́ ублажа́ем.

Бо́га челове́ком приобщи́вшася, и ме́ртвенное совокупле́нием без сравне́ния обожи́вшаго, во все́м ми́ре пропове́давше, все́х безбо́жныя пре́лести свободи́сте. Те́мже ублажа́еми есте́ при́сно, боже́ственнии апо́столи. [Два́жды.]

Христо́ву Стра́сть изобрази́вше, апо́столи, страстьми́ телесе́ разли́чными, пло́ти моея́ стра́сти умертви́те, и изнемо́гшую, и бе́дствующую, и умерщвле́ную мою́ ду́шу оживотвори́те.

Пу́ть бу́ди ми́ наставля́ющий мя́ к незаблу́дному пути́ за́поведей Твои́х, Человеколю́бче, в про́пасть грехо́вную впа́дшему, и заблужда́ющу, и укло́ншуся к путе́м лука́вым, и бе́дствующу.

Богоро́дичен: Ли́ки А́нгел и Арха́нгел же, Вла́сти и Си́лы, Нача́ла, Госпо́дствия, Херуви́ми и Серафи́ми и Престо́ли, Христе́, собо́р апо́стол, с Ро́ждшею Тя́, мо́лятся Тебе́, еди́не Царю́, спаси́ рабы́ Твоя́.

И́н. Ирмо́с: Е́же ра́дуйся от А́нгела прии́мшая, и ро́ждшая Созда́теля Твоего́, Де́во, спаси́ Тя велича́ющия.

Святи́телей удобре́ние, чуде́с исто́чниче, Нико́лае, умоли́ Бо́га Человеколю́бца, обрести́ на́м грехо́в оставле́ние.

Я́коже дре́вле у́зники изба́вил еси́ от сме́рти, та́ко и на́с изба́ви искуше́ний жите́йских, Нико́лае.

Ты́ в Ми́рех Лики́йских погребе́н бы́л еси́, ми́ро то́чиши всегда́, Нико́лае, злово́ния страсте́й отгоня́я при́сно.

Зижди́теля прише́ствие при две́рех, не лени́ся, душе́ моя́, но возопи́й: Никола́я моли́твами, Христе́, спаси́ мя.

Богоро́дичен: Све́т ро́ждшая, Всепе́тая, се́рдца моего́ зе́ницу осле́пшую просвети́, да пою́ Тя и́же Тебе́ ра́ди спаса́емь.

Та́же, Досто́йно е́сть: и покло́н. Ектения́, свети́лен и псалмы́ обы́чныя.

На стихо́вне стихи́ры апо́столом, гла́с 6:

Бу́рю утиши́вше ле́сти бесо́вския му́дре в тишину́, апо́столи Христо́ви, ве́сь ми́р наста́висте в ве́ру правосла́вную, и ны́не моли́теся о душа́х на́ших.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Па́мять прему́дрых учени́к Христа́, Царя́ на́шего, досто́йно пе́сньми почти́м, ве́рнии: ти́и бо Тро́ическую ве́ру в ми́ре пропове́даша.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Избра́нныя удиви́ и святы́я Бо́г на́ш. Ра́дуйтеся и весели́теся, вси́ раби́ Его́, ва́м бо угото́ва венцы́ и Ца́рствие Свое́: но мо́лим вы́, и на́с не забу́дите.

Сла́ва, и ны́не: Богоро́дичен: Преложе́ние скорбя́щих, премене́ние боля́щих еси́, Богоро́дице Всепе́тая, спаси́ гра́д и лю́ди, бори́мых умире́ние, обурева́емых тишина́, еди́на Предста́тельнице ве́рных.

Та́же, Бла́го е́сть: И Трисвято́е по О́тче на́ш: Тропари́, и ектения́, и ча́с пе́рвый: псалмы́ обы́чныя, и про́чее, и отпу́ст.

Помяни́ мя, Бо́же Спа́се мо́й, егда́ прии́деши во Ца́рствии Твое́м, и спаси́ мя, я́ко еди́н Человеколю́бец.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Я́ко лучи́ та́йныя, проте́кше в ми́ре, апо́столи сла́внии, челове́ческий ро́д ве́рою просвети́ли есте́.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Я́ко о́блацы окропи́ли есте́ во́ду в ми́ре, Боже́ственнаго ра́зума, просвеще́ннии Госпо́дни апо́столи.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Муче́ния огню́ приближа́ющеся, Боже́ственную ро́су, прохлажда́ющую ва́с, от Бо́га восприя́сте, му́ченицы.

Сла́ва: Святе́й и Честне́й Тро́ице, ве́рнии покланя́ющеся, согла́сно возопии́м: апо́стол мольба́ми спаси́ все́х на́с.

И ны́не: Ро́ждшая Сло́во па́че словесе́, Богоро́дице, Отцу́ собезнача́льнаго, Того́ моли́ спасти́ся душа́м на́шим.

стихи́ры подо́бны кре́стныя, гла́с 6:

Подо́бен: Тридне́вно:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Долготерпели́ве и Человеколю́бче, Бо́же мо́й, Многоми́лостиве и Ще́дре, ка́ко претерпе́л еси́ закала́ние и умерщвле́ние на Дре́ве, за ро́д челове́ческий? Славосло́вим Твое́ благоутро́бие.

Сти́х: И́мене ра́ди Твоего́, потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Зауше́ния претерпе́л еси́, и распя́тие, Долготерпели́ве, и уничиже́ния, хотя́ все́х изба́вити лестца́, еди́не Живода́вче, и вся́ терпи́ши, Преблаги́й.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Возше́л еси́, Па́стырю, на Кре́ст, и просте́рл еси́ ру́це, вопия́: прииди́те ко Мне́, и просвети́теся, челове́цы, и́же пре́лестию помрачи́вшиися: Аз бо Све́т е́смь. Сла́ва Тебе́, еди́не Светопода́телю.

И́ны стихи́ры подо́бны Богоро́дичны, гла́с то́йже:

Подо́бен: Отча́янная:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Преклоне́нну тягча́йшею тягото́ю прегреше́ний ду́шу мою́, и сля́ченную возста́ви, Де́во, Ты́ бо низве́рженныя возставля́юща Спа́са и́маши, повину́ющася удо́бно ма́тернему дерзнове́нию. И раздери́ Твои́м хода́тайством грехо́вное рукописа́ние, молю́ся, за ве́лию Твою́ ми́лость.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Отча́яннаго грехми́ и оскверне́на беззако́ньми, презре́вшаго Бо́жия повеле́ния ви́ждь, и не отве́ржи мене́ от лица́ Твоего́: Ты́ бо еси́, Богоро́дице, упова́ние мое́, и Предста́тельнице. Те́мже вонми́ мои́м моле́нием, и от вся́кия мя́ скве́рны очи́сти, за ве́лию Твою́ ми́лость.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Отве́рзи ми́ две́ри покая́ния, да́ждь ми́, Пресвята́я, исто́чник сле́з, пода́ждь умиле́ние и целому́дренное се́рдце: Тебе́ бо еди́ну изве́стное предста́тельство напису́ю, вся́кое на Тя́ ча́яние мое́ возношу́. Не отри́ни мене́ посра́млена, но приими́, и спаси́, Влады́чице, за ве́лию Твою́ ми́лость.

Сла́ва, и ны́не: Крестобогоро́дичен:

Подо́бен: Тридне́вно:

Зря́щи Тя́ Пречи́стая, на Дре́ве пригвожда́ема вопия́ше: о, Сы́не мо́й и Бо́же, что́ пресла́вное Твое́, и слы́шание стра́нное, е́же претерпева́еши за мно́гую ми́лость?

Та́же, Све́те ти́хий: Проки́мен дне́: По́мощь моя́ от Го́спода, сотво́ршаго не́бо и зе́млю. Сти́х: Возведо́х о́чи мои́ в го́ры, отню́дуже прии́дет по́мощь моя́. Сподо́би, Го́споди, в ве́чер се́й:

На стихо́вне стихи́ры кре́стны, гла́с 6:

Кре́ст Тво́й, Го́споди, жи́знь и заступле́ние лю́дем Твои́м е́сть, и на́нь наде́ющеся, Тебе́ распе́ншагося пло́тию Бо́га на́шего пое́м: поми́луй на́с.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Кре́ст Тво́й, Го́споди, Ра́й отве́рзе ро́ду челове́ческому. И от истле́ния изба́вльшеся, Тебе́ распе́ншагося пло́тию Бо́га на́шего пое́м: поми́луй на́с.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Му́ченицы Твои́, Го́споди, не отверго́шася Тебе́, ни отступи́ша от за́поведей Твои́х. Те́х моли́твами поми́луй на́с.

Сла́ва, и ны́не: Крестобогоро́дичен:

Подо́бен: Тридне́вно воскре́сл еси́, Христе́:

Предстоя́щи у Дре́ва иногда́ во вре́мя распя́тия, Де́ва с де́вственным ученико́м, и пла́чущи вопия́ше: увы́ мне́, ка́ко стра́ждеши, все́х, Христе́, сы́й безстра́стие?

Та́же, Ны́не отпуща́еши: Трисвято́е по О́тче на́ш: тропа́рь, ектения́, и отпу́ст.

Кано́н Пресвяте́й Богоро́дице, [его́же краегране́сие си́це: Да́ждь ми́, Де́во, сле́зы покая́ния.] Гла́с 6.

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Приими́, Де́во, мольбу́ мою́ из у́ст недосто́йных, от скве́рных усте́н дерзнове́нно приноси́ти устреми́вшагося: и све́т умиле́ния, Чи́стая, озари́ рабу́ Твоему́.

Ту́чи сле́з ми́ пода́ждь, Твои́ми моли́твами, Де́во Ма́ти Чи́стая, я́ко да пла́чу те́пле, о и́хже соде́лах на земли́, и убе́гну Тобо́ю му́ки вся́кия.

Сла́ва: Моего́ рыда́ния не отри́ни, Я́же Исто́чник Милосе́рдия ро́ждшая: но ми́лостивно, Блага́я, Твои́м ми́лостивным о́ком, Богоро́дице, души́ моея́ стра́сти исцели́.

И ны́не: Стена́нием пла́чися, душе́ моя́, и себе́ отню́д рыда́й, покланя́ющися Ма́тери Бо́жии, и глаго́лющи: мене́ пови́ннаго изба́ви му́ки стра́шныя.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Не́сть и́н я́коже а́з прегреши́в, Пресвята́я Чи́стая, порабо́щся зло́бами безме́рных помышле́ний: но на Тя́ наде́явся молю́, си́х мя́ исхити́.

Се́ наидо́ша на мя́ я́ко ра́ны, вся́ вра́жия зло́бы отяготе́вше, и зело́ возсмерде́ша, и ду́шу веду́т на вся́ко паде́ние.

Сла́ва: Мно́гое мно́жество мои́х прегреше́ний – сего́ ра́ди, Пресвята́я, ве́рою припа́дая, вопию́ Ти смире́нный, в ча́с стра́шный умоли́ти, Его́же воплоти́ла еси́.

И ны́не: Свята́я Богоро́дице, мене́ пови́ннаго вся́кому осужде́нию изми́, дерзнове́ние к Бо́гу я́ко иму́щи ма́терне, и черто́гу Сего́ учини́ мя.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста, о Го́споде пра́зднующи.

Исто́чник ми́ сле́з да́руй, Влады́чице, я́ко да отмы́ю скве́рну смире́нныя души́ моея́, и обря́щу добро́ту, ю́же погуби́х сове́том змии́ным.

Бо́же мо́й Милосе́рде, Бо́же Человеколю́бче, воли́телю ми́лости, ны́не на мя́ изли́й Твою́ ми́лость: мо́лит Тя́ наде́жда и Засту́пница моя́, Ма́ти Твоя́.

Сла́ва: Мене́ блу́днаго, мене́ ужа́снаго, без ума́ и безсту́дно мно́го согре́шша к Тебе́, Пренепоро́чная, уще́дривши спаси́, и гее́нны свободи́.

И ны́не: Па́жить потреби́ сме́рти, ро́ждши Жи́знь вся́ческих. Те́мже и а́з зову́ Ти: согреши́х, спаси́ мя, Чи́стая, ма́терними Твои́ми мольба́ми.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Поми́луй мя́, Чи́стая, на Тя́ всю́ наде́жду мою́ возложи́вшаго, и уще́дри, ве́рою взыва́ю Ти́, презре́вши души́ моея́ вся́ стра́сти лю́тыя.

Спаси́ мя от страсте́й, ско́рби и вре́да, лука́вых сопроти́вных, и изба́ви си́х ла́яния смире́нную мою́ ду́шу, да не реку́т, Де́во: укрепи́хомся на́нь.

Сла́ва: Чиста́ те́лом и душе́ю, Пречи́стая, я́вльшися, ду́шу мою́ от скве́рны свободи́, дая́ ми чи́сто жи́ти, и наста́ви твори́ти ми́ Госпо́дню Боже́ственную во́лю.

И ны́не: Тя́ еди́ну и́мам прибе́жище, и к Бо́гу премене́ние, и́же во мно́гих прегреше́ниих все́ житие́ мое́ ижди́х. Те́мже мя́, Богоро́дице, Ты́ уще́дри.

Пе́снь 6

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Испра́ви, Влады́чице, ма́лое мое́ стена́ние, и рука́ма воздея́ние, я́коже благово́нну же́ртву, и Тво́й сподо́би зра́к чи́стою со́вестию узре́ти.

Глаго́л мои́х, Влады́чице Блага́я, не пре́зри моле́ние, Роди́тельнице Ми́лостиваго Бо́га, от Твоея́ утро́бы возсия́вшаго, но да́ждь ми́ пре́жде конца́ Боже́ственное оставле́ние.

Сла́ва: Преклони́хся страстьми́ блу́дно преокая́нный, и удали́хся от Бо́га. Его́же моли́ спасти́ мя, Блага́я, к Тебе́ бо прибего́х, и оде́ждами мя́ пре́дними украси́.

И ны́не: Не опали́ ложе́сн Твои́х О́гнь сы́й Иису́с, из Тебе́ пло́тию прихо́дит. Сего́, Чи́стая, моли́ огня́ и вся́кия му́ки изба́вити, ве́рою воспева́ющих Тя́.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 6:

Чи́стая Де́во и Сла́вная, а́нгелов сла́во, егда́ предста́ла еси́ Кресту́ Сы́на и Бо́га Твоего́, не терпя́щи озлобле́ния вра́г, взыва́ла еси́ рыда́ющи стена́ньми, Еди́на Благослове́нная: ка́ко терпи́т Человеколю́бец, си́х все́х наноси́мая?

Пе́снь 7

Ирмо́с: О́троцы в Вавило́не пе́щнаго пла́мене не убоя́шася, посреде́ пла́мене вве́ржени, ороша́еми поя́ху: благослове́н еси́ Го́споди, Бо́же оте́ц на́ших.

Возни́кни, о душе́ моя́, от злы́х, я́же соде́яла еси́! Что́ спи́ши про́чее, что́ сно́м уны́ния низлежи́ши? Богоро́дице возопи́й: Пресвята́я, помози́ ми!

О́браз ви́да Твоего́ чту́, и не сме́ю воззре́ти к Тебе́, Пресвята́я; молю́ прия́ти долго́в проще́ние, и чи́сто ви́дети Твою́ пречи́стую ико́ну.

Сла́ва: В Твое́ прибега́ю, Богороди́тельнице, заступле́ние, и припа́даю прия́ти проще́ние: не пре́зри мене́, Влады́чице, но уще́дривши спаси́ мя.

И ны́не: Многообра́зными зло́бами душетле́ннаго оскверни́х ду́шу и у́м, молю́ Тя, Пречи́стая, не пре́зри, и того́ искуше́ний исхити́ раба́ Твоего́.

Пе́снь 8

Ирмо́с: За зако́ны оте́ческия блаже́ннии в Вавило́не ю́ношы предбе́дствующе, царю́ющаго оплева́ша повеле́ние безу́мное, и совоку́плени и́мже не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.

Безме́рно согреши́в, и оскверни́в мое́ во гресе́х те́ло неразу́мный, помышля́ю необыме́ннаго Суда́ Де́нь, и недоуме́вся, убоя́хся, и ужаса́юся и трепе́щу, ко благоутро́бию Твоему́, Влады́чице, припа́даю: не отри́ни мене́, но ви́ждь мою́ ско́рбь, и изба́ви вся́каго осужде́ния му́к многообра́зных.

Зако́н Боже́ственный презре́в, в ле́ности ве́сь слежу́ окая́нный. Призре́вши, Пречи́стая, возста́ви вско́ре, и спасе́нных сотвори́ мя ча́сти получи́ти, да ра́дуяся зову́ Ти: ра́дуйся, Ра́досте ми́ру, еди́на Предста́тельнице, ве́рою призыва́ющим Тво́й тве́рдый покро́в.

Сла́ва: Увы́ мне́, душе́ моя́! Ка́ко предста́нем тогда́ во стра́се и тре́пете Суди́щу Стра́шному, егда́ а́нгели предста́нут во стра́се и тре́пете? Богоро́дицу иму́щи бла́гу засту́пницу, преклони́ коле́но, и воздежи́ ру́це к высоте́, вопию́щи: при́зри и пощади́ Твои́м ми́лостивным тогда́ взо́ром, Де́во.

И ны́не: Покажи́ кре́пость Твою́ непосты́дну заступле́ние ны́не, я́ко должни́к бо ма́терними мольба́ми преклони́тся Тво́й Сы́н, Де́во. Предвари́ у́бо ны́не в ну́ждный ча́с, да не отыду́ негото́в, но поживу́ и еще́, Препе́тая Богоро́дице Чи́стая.

Пе́снь 9

Ирмо́с: Не рыда́й мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно, я́ко Бо́г, ве́рою и любо́вию Тя́ велича́ющия.

Да Вы́шния сла́вы получу́, Де́во, молю́ся Тебе́: осла́би ми́, и изба́ви долго́в тьмы́, вся́ презре́вши, Пречи́стая, я́же в неве́дении, и ра́зуме, вку́пе дневна́я и нощна́я, я́ко да благода́рственную пе́снь ра́дуяся принесу́ Ти.

От вся́ких мя́ скорбе́й исхити́, Отрокови́це, и на ка́мени поста́ви но́зе мои́ Боже́ственнаго спасе́ния: Тя́ бо Предста́тельницу необори́му ны́не стяжа́в, упова́ю прейти́ сте́ну и прегра́ду, ю́же преслуша́нием дре́ва созда́х.

Сла́ва: Тя́ молю́ ро́ждшую милосе́рдаго Судию́ и Влады́ку: приими́ де́рзость скве́рных усте́н, и убо́гое пе́ние мое́, и не омерзи́ мене́ па́че все́х челове́к грешне́йшаго: Тя́ бо по Бо́зе засту́пницу име́ю ра́б Тво́й.

И ны́не: Я́ко вы́шши су́щи созда́ний вся́ческих, во утро́бе Твое́й име́ла еси́, Богоро́дице, Бо́га воплоще́нна. Сего́ приле́жно моли́, Чи́стая, разреши́ти вся́каго настоя́ния раба́ Твоего́, да свобо́дным гла́сом Тя́ славосло́влю и а́з.

Та́же, Досто́йно е́сть: Покло́н до земли́. Трисвято́е по О́тче на́ш: тропари́, и про́чее обы́чно, и отпу́ст.

По 1-м стихосло́вии, седа́льны кре́стныя, гла́с 6:

Дне́сь проро́ческое испо́лнися сло́во: се́ бо покланя́емся на ме́сте, иде́же стоя́сте но́зе Твои́, Го́споди, и Дре́во спасе́ния вкуси́вше, и́же от греха́ страсте́й свобожде́ние улучи́хом, моли́твами Богоро́дицы, еди́не Человеколю́бче.

Сти́х. Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

То́кмо водрузи́ся Дре́во, Христе́, Креста́ Твоего́, основа́ния подвиза́шася сме́рти, Го́споди. Его́же бо пожре́ любо́вию а́д, отпусти́ тре́петом. Показа́л еси́ на́м спасе́ние Твое́, Святы́й, и славосло́вим Тя́, Сы́не Бо́жий, поми́луй на́с.

Сла́ва, и ны́не: Крестобогоро́дичен.

Подо́бен: Упова́ние ми́ра:

Еди́на Непоро́чная А́гница, Богоро́дице Де́во, от крове́й Твои́х чи́стых Вопло́щшагося зря́щи ви́сяща во́лею на Кресте́, взыва́ла еси́, Отрокови́це, со слеза́ми го́рькими: Сы́не Мо́й Незло́бивый, пою́ Твое́ стра́шное все́ смотре́ние.

По 2-м стихосло́вии, седа́льны кре́стныя, гла́с 6:

Кре́ст Тво́й, Го́споди, освяти́ся: те́м бо быва́ют исцеле́ния боля́щим во гресе́х. Сего́ ра́ди Тебе́ припа́даем, поми́луй на́с.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Го́споди, осуди́ша Тя́ иуде́е на сме́рть, Жи́знь все́х. И́же Чермно́е мо́ре жезло́м проше́дшии, ко Кресту́ Тя пригвозди́ша; и от ка́мене ме́д сса́вшии, же́лчь Тебе́ принесо́ша. Но во́лею претерпе́л еси́, да на́с свободи́ши от рабо́ты вра́жия. Го́споди, сла́ва Тебе́.

Сла́ва, и ны́не: Крестобогоро́дичен.

Подо́бен: Упова́ние ми́ра:

Предстоя́щи у Креста́ Де́ва и Ма́ти, без стра́сти из Нея́ па́че ума́ Вопло́щшагося, взыва́ше слезоточа́щи ма́терски: не терплю́ Тя ме́ртва ви́сяща ви́дети, дыха́ние подаю́ща живу́щим на земли́, о Сы́не и Бо́же мо́й!

По 3-м стихосло́вии седа́льны, гла́с 6:

Подо́бен: Упова́ние ми́ра:

Кре́сте, де́монов гони́телю, врачу́ неду́гующих, кре́посте и храни́телю ве́рных, похвало́ правосла́вных вои́стинну, утвержде́ние Це́ркве Христо́вы, бу́ди на́м забра́ло и стена́ и храни́тель, Дре́во благослове́нное.

На Дре́ве Кре́стнем милосе́рдия ра́ди и ми́лости возне́слся еси́ и в ребро́ прободе́н бы́в копие́м, растерза́л еси́ грехо́вное лю́тое рукописа́ние, я́ко всеси́льный Бо́г. Те́мже Твое́ неизрече́нное пои́м, Сло́ве, благоче́стно смотре́ние.

Му́ченичен: Све́т пра́ведным вы́ну, святи́и бо Тобо́ю просвети́вшеся, сия́ют при́сно я́ко свети́ла, све́щник нечести́вых угаси́вше. И́хже моли́твами, Спа́се на́ш, Ты́ просвеща́еши свети́льник мо́й, Го́споди, и спаси́ мя.

Сла́ва, и ны́не: Крестобогоро́дичен: Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя́, но Сама́ заступи́, и поми́луй мя́.

Кано́н Честно́му и Животворя́щему Кресту́. Гла́с 6.

Пе́снь 1

Ирмо́с: Волно́ю морско́ю Скры́вшаго дре́вле гони́теля мучи́теля под земле́ю скры́ша спасе́нных о́троцы: но мы́ я́ко отрокови́цы, Го́сподеви пои́м, сла́вно бо просла́вися.

Стра́стию Твое́ю честно́ю почти́л еси́ обезче́стенное естество́ челове́ческое. Те́мже чту́ще Тя́ со стра́хом, велича́ем держа́ву Твою́, и ве́рно сла́вим: сла́вно бо просла́вися.

Кро́вию Твое́ю, Сло́ве, крове́й непра́ведное проли́тие уста́вил еси́, и очи́стил еси́ от скве́рны зло́бныя естество́ челове́ческое, Всеси́льне. Те́м сла́вим спаса́емии держа́ву Твою́.

Му́ченичен: Зве́ря кровопи́йцу победи́ вои́стинну, достохва́льное му́ченик сопротивостоя́ние, о́гненное покори́ естество́ росо́ю Боже́ственныя благода́ти, и зе́льну бу́рю многобо́жия уста́ви.

Му́ченичен: Ту́чами крове́й одожде́ния пре́лести изсуши́вше, ту́чи исцеле́ний то́чите ми́рови, и пла́мень страсте́й отгоня́ете безбо́жия. Те́мже, му́ченицы, блажи́ми есте́.

Богоро́дичен: Добро́ты, ни ви́да иму́ща внегда́ страда́ти, Кра́снаго Добро́тою, Неискусобра́чная Отрокови́це, смотря́ющи Тя́ ве́рных удобре́ние, ма́терски восклица́ше, и любо́вию Тя́ сла́вляше.

И́н кано́н ко Пресвяте́й Богоро́дице, [его́же краестро́чие по алфави́ту.] Гла́с и ирмо́с то́йже.

Пречи́стая Е́во, Благода́тная Мари́е сла́вная, ра́дости Хода́таице, певцы́ Твоя́ Боже́ственными благода́тьми благода́тствуй, я́ко да благода́рственную пе́снь Тебе́ возсле́м.

Оле Твои́х та́инств, Богома́ти! Творе́ний бо яви́лася еси́ Влады́чица, Его́же не дерза́ют взира́ти а́нгелов во́инства, во объя́тиих нося́щи. Те́мже Тя́ ублажа́ем.

Ро́д челове́ческий ве́сь тле́нием сме́ртным осуди́ся, прама́терним вкуше́нием дре́ва – Тобо́ю же воззва́ся, я́ко Живо́т ро́ждшею, Чи́стая, нетле́нный.

Пе́снь 3

Ирмо́с: Тебе́ на вода́х пове́сившаго всю́ зе́млю неодержи́мо, тва́рь ви́девши на Ло́бнем ви́сима, у́жасом мно́гим содрага́шеся, не́сть свя́т ра́зве Тебе́, Го́споди, взыва́ющи.

Тебе́ на вода́х пове́сившаго всю́ зе́млю неодержи́мо на Дре́во вознесе́на, и в ре́бра пробода́ема, смотря́ющее со́лнце помрача́шеся, все́х просвеще́ние разуме́ющее Тя́, Го́споди.

Уязвля́ется Твои́ми гвоздьми́, Долготерпели́ве, и́же в Раи́ дре́вле уязви́вый Ада́ма злоде́й, и уязви́вся, неисце́льный во ве́ки пребы́сть. Ве́рнии же обрето́хом все́х я́зв исцеле́ние.

Му́ченичен: Егда́ ли́к а́нгельский, зря́ше му́чеников стада́ за А́гнца поже́ршагося сдробля́ема, дивля́шеся: ка́ко веще́ственнии невеще́ственныя враги́ побежда́ху, побе́ды венцы́ прие́млюще?

Му́ченичен: Си́лою одева́еми святи́и, в кре́пости Еди́наго вся́ могу́щаго, со враго́м сплета́хуся, и того́ некре́пкую попира́ху си́лу, венцы́ от Бо́га прие́млюще.

Богоро́дичен: Ты́ из Тебе́ Ро́ждшагося, я́ко ви́дела еси́ уя́звлена копие́м, уязви́лася еси́ се́рдцем, Пречи́стая Всенепоро́чная, и дивя́щися глаго́лала еси́: что́ Ти воздаде́, Ча́до, собо́р пребеззако́нный?

И́н. Ирмо́с то́йже.

Ле́стию мя́ прельсти́вый обоже́ния жела́нием вра́г дре́вле, из Еде́ма, Богома́ти, на зе́млю пресмыка́вый сокруши́. Но Христо́с уще́дрив мя́, от ложе́сн Твои́х пло́ть восприи́м, возсозда́.

Живота́ яви́лася еси́ врата́, проро́ку дре́вле Иезеки́илю, Отрокови́це, я́же Госпо́дь еди́н воплоще́нный про́йде, и заключе́нная Тя́, Чи́стая, соблюде́, я́ко е́сть Вы́шний.

Разреши́ся кля́твы дре́вния осужде́ние, Богома́ти, Твои́м хода́тайством: яви́вся бо Ти́, Госпо́дь, все́ незави́стно источи́, я́ко Преблаги́й, все́м благослове́ние, Пречи́стая.

Пе́снь 4

Ирмо́с: На Кресте́ Твое́ Боже́ственное истоща́ние прови́дя Авваку́м, ужа́сся вопия́ше: Ты́ си́льных пресе́кл еси́ держа́ву, Бла́же, приобща́яся су́щим во а́де, я́ко Всеси́лен.

Просте́ртие руки́, Го́споди, неудержа́нное, ко дре́внему вкуше́нию отъе́мляй, ме́ртв на Дре́ве пожре́н бы́л еси́, спасти́ восхоте́вый, из ре́бр иска́паеши свя́занным оставле́ние.

Страда́ти претерпе́л еси́, Преблаги́й, я́ко да разреши́ши на́с от страсте́й безслове́сия; же́лчь вкуси́л еси́, Влады́ко, источа́яй мне́ Боже́ственную сла́дость; умертви́лся еси́, Живо́т мне́ подава́я.

Му́ченичен: О́гнь Боже́ственныя любве́ в души́ слове́сней нося́ще, пла́мень пребеззако́ннующих угаси́ша, и просвети́тельныя свещи́ Христо́вы страстоте́рпцы яви́шася.

Му́ченичен: Боже́ственнии дру́зи Всецаря́, плотски́я себе́ отлучи́вше дру́жбы, устреми́шася ко вся́кому муче́нию кре́пко, и победи́вше, сла́вою венча́шася.

Богоро́дичен: Кроме́ стра́сти роди́х Тя́, и ка́ко ви́жу Тя́ ны́не стра́сти причаща́ющася? Ка́ко терпи́ши сие́? – взыва́ше Де́ва. – Сы́не Безнача́льне, сла́влю Твое́ долготерпе́ние.

И́н. Ирмо́с то́йже.

Избра́нная же и Пречи́стая от все́х родо́в я́вльшися еди́на, я́же доброде́тельми возсия́вшая, Нескве́рная, Честна́я, и́же Тя́ песносло́вящия све́тлостию Твое́ю просвети́.

Бо́га пло́тию, Де́во, родила́ еси́, из чи́стых Твои́х, Чи́стая, крове́й, Ма́ти, Спа́са избавля́ющаго вся́ от лю́тых, пою́щия Тя́, Отрокови́це Богоблагода́тная.

Священноде́йствует Боже́ственному Рождеству́ Твоему́, Богоро́дице Чи́стая, невеще́ственных естество́, и челове́ков собра́ние любо́вию Тя́ пое́т: Твои́м сия́нием на́с озари́.

Пе́снь 5

Ирмо́с: К Тебе́ у́тренюю, милосе́рдия ра́ди Себе́ истощи́вшему непрело́жно, и до страсте́й безстра́стно прекло́ньшемуся, Сло́ве Бо́жий, ми́р пода́ждь ми́ па́дшему, Человеколю́бче.

Ме́ртв зри́шися на Ло́бнем, умертви́в а́да Стра́стию пло́ти Твоея́. Ни ви́да Ты́, Христе́, ни добро́ты име́л еси́ пове́шен, удобри́ти мя́ хотя́, я́ко Человеколю́бец.

Ада́ма пе́рваго пригвозди́ти хотя́ стра́стная любле́ния, гвоздьми́ пригвожда́ешися, и копие́м пробо́дься, пла́менному оружию возбраня́еши, Христе́, не возбрани́ти рабо́м Твои́м вхо́да.

Му́ченичен: После́дствующе Страсте́м Влады́чним, ли́цы му́ченичестии на дре́ве пригвожда́ются, и рука́ми ку́пно отъе́млются, и нога́ми к стези́ честна́го муче́ния боже́ственне исправля́еми.

Му́ченичен: Умо́м соверше́нным, ума́ го́рдаго, вознося́щася де́рзостию, низложи́сте соверше́нно смири́вшеся в подража́нии, вся́ возне́сшаго смире́нием се́рдца, Христо́вы му́ченицы.

Богоро́дичен: От ко́рене, Де́во, Иессе́ова прозяба́еши, и я́ко цве́т произно́сиши Насади́теля ми́ру, о́трасли безбо́жия изсуши́вша Боже́ственным са́дом Креста́, его́же пло́тию прия́т.

И́н. Ирмо́с то́йже.

Ле́ствица я́вльшися обра́зно Иа́кову, к высоте́ превзя́тая, Твоего́, Богоневе́стная, яви́ Рождества́ вои́стинну изря́дное: Тобо́ю бо вои́стинну на́м Бо́г споживе́ схожде́нием Боже́ственным, и живо́т подаде́ челове́ком.

Изба́вльшеся Тобо́ю прама́терния печа́ли, Богороди́тельнице, утеше́ния испо́лнени бы́хом, весе́лие все́м ро́ждшая, и всеми́рную ра́дость. Те́мже, Всепе́тая, Твоя́ песносло́вцы от бе́д Твои́ми моли́твами соблюди́.

Та́йно научи́мь Твоему́ богови́дне Моисе́й о́бразу, предзря́ше купину́ неопали́мую огне́м, Де́во Всенепоро́чная: в Тя́ бо Созда́тель все́лься, не опали́ Тя вы́шшую все́х творе́ний, Богоневе́стная.

Пе́снь 6

Ирмо́с: Я́т бы́сть, но неудержа́н в пе́рсех ки́товых Ио́на: Тво́й бо о́браз нося́, страда́вшаго и погребе́нию да́вшагося, я́ко от черто́га от зве́ря изы́де; приглаша́ше же кустоди́и: храня́щии су́етная и ло́жная, ми́лость сию́ оста́вили есте́.

Пременя́я ру́це дре́вле Иа́ков прообразова́ше Кре́ст, благословля́я о́троки. Те́мже Вы́шний на того́ восходя́й, кля́твы дре́вния реши́ши челове́чество, и источа́еши ны́не благослове́ние, благословя́щим Тя́, Еди́не Благослове́нне, и Соде́телю Преблаги́й.

Твою́ Стра́сть прообразу́яй, Сло́ве, вели́кий Моисе́й вознесе́ дре́вле ме́днаго зми́я на дре́во, отъе́мляй зря́щия от ядови́таго угрызе́ния змии́на. И́бо, Влады́ко, ра́спяту бы́вшу Ти́, врежде́ния змии́наго богоме́рзскаго вси́ ве́рнии изба́вихомся.

Му́ченичен: Я́коже ино́му стра́ждущу боже́ственнии дре́вле и честни́и страда́льцы бя́ху страда́льчествующе, предзря́ще воздая́ния ве́чная и ра́дование. Моли́твами и́х, Христе́ Ще́дре, воспева́ющия Тя́ изба́ви от искуше́ний, и грехо́в, и обстоя́ний.

Му́ченичен: Пото́ки уста́виша пре́лести, струя́ми крове́й, честни́и и боже́ственнии страстоте́рпцы, и исто́чницы вои́стинну яви́шася, ве́рным богове́дения точа́ще во́ду. Моли́твами и́х, Спа́се ми́ра, одожди́ оставле́ние все́м, и живо́т, и очище́ние грехо́в, и ве́лию ми́лость.

Богоро́дичен: Па́стыря Пе́рваго и Влады́ку, воздви́жена на Дре́ве зря́щи А́гница, пла́чущи ма́терски вопия́ше: что́ сие́, Ча́до, но́вое та́инство? Ка́ко безсме́ртен по существу́ сы́й сме́рть прия́л еси́, челове́ки хотя́ из тли́ изба́вити?

И́н. Ирмо́с то́йже.

Зако́ннии Тя́ о́брази, Богоро́дице, и прорече́ние я́ве проро́ков явля́ху, иму́щую роди́ти ми́ру Изба́вителя, и Благоде́теля всея́ тва́ри, многоча́стно и многообра́зно благоде́йствовавшаго, ве́рою и любо́вию, Влады́чице Чи́стая, славосло́вящих Тя́.

Устрани́вшияся дре́вле от пре́лести человекоуби́йцы врага́, Бо́жия первозда́нныя пи́щи ра́йския, еди́на Богороди́тельнице, па́ки возвела́ еси́ к Раю́ ро́ждши Спа́са Го́спода, распя́тие и погребе́ние Боже́ственною вла́стию претерпе́вшаго.

И́же во́лею Боже́ственною, и си́лою соде́тельною Свое́ю, вся́ от не су́щих составле́й, Чи́стая, про́йде от Твои́х ложе́сн и Бо́г и Челове́к, и и́же во тьме́ неве́дения пре́жде су́щия, сия́ньми Боже́ственными, Влады́чице Чи́стая, све́тло озари́.

Пе́снь 7

Ирмо́с: Неизрече́нное чу́до, в пещи́ изба́вивый преподо́бныя о́троки из пла́мене, во гро́бе ме́ртв бездыха́нен полага́ется, во спасе́ние на́с пою́щих: Изба́вителю Бо́же, благослове́н еси́.

Егда́ Тя на Кресте́ собо́р евре́йский осуди́, зря́щи земля́ ужасе́ся; со́лнце све́т сво́й сокры́, и су́щии во тьме́ све́т ви́деша, пою́ще: Изба́вителю Бо́же, благослове́н еси́.

Досажде́ние претерпе́л еси́, Спа́се, тро́стию бие́мь, и те́рниями я́ко Ца́рь, во́лею, Христе́ Бо́же, венчава́емь, на спасе́ние на́с пою́щих: Изба́вителю Бо́же, благослове́н еси́.

Му́ченичен: Связу́етеся, всю́ диа́волю пре́лесть, всехва́льнии му́ченицы, реша́юще я́ве; терпите́ му́ки и сме́рть непра́ведную, жи́зни жела́юще го́рния, и вопию́ще: Изба́вителю Бо́же, благослове́н еси́.

Му́ченичен: Ста́сте посреде́ пла́мене, всехва́льнии му́ченицы, пре́лесть попаля́юще я́ве, и ороше́нием Боже́ственныя благода́ти не опали́вшеся, вопие́те пою́ще: Изба́вителю Бо́же, благослове́н еси́.

Богоро́дичен: Распина́ешися хотя́й, Безнача́льне Сы́не, – Богоро́дица взыва́ше зря́щи Тя́, – печа́лию души́ ны́не погружа́юся, умира́еши подая́й жи́знь пою́щим: Изба́вителю Бо́же, благослове́н еси́.

И́н. Ирмо́с то́йже.

Преукра́шенну Тя́, иму́щую позлаще́нное, Богома́ти, украше́ние благоле́пное, восхоте́ Тво́й Сы́н же и Госпо́дь, во спасе́ние на́с вопию́щих Ти́: Пло́д Тво́й, Чи́стая, благослове́нный.

Ши́пок посреде́ те́рний обре́т, Пречи́стая, Влады́ка, испо́лни на́с благоуха́ньми Твои́ми кра́сными благода́тей духо́вных, вопию́щия ему́ во умиле́нии: Изба́вителю Бо́же, благослове́н еси́.

Зна́мения вси́ Твои́ боже́ственнии проро́цы ви́девше Твоего́ Боже́ственнаго Рождества́, сла́вно вопия́ху, Чи́стая: Бо́г прии́дет от Де́вы, е́же спасти́ вопию́щия: Изба́вителю Бо́же, благослове́н еси́.

Пе́снь 8

Ирмо́с: Ужасни́ся боя́йся не́бо, и да подви́жатся основа́ния земли́ – се́ бо в мертвеце́х вменя́ется в Вы́шних Живы́й, и во гро́б ма́л странноприе́млется. Его́же о́троцы, благослови́те; свяще́нницы, воспо́йте; лю́дие, превозноси́те во вся́ ве́ки.

Пие́ши ча́шу, Христе́, ю́же возжеле́л еси́ стра́стию Кре́стною, исто́чники ми́ пролива́яй оставле́ния от живоно́сных ре́бр, ра́ди ребра́ уме́ршему. Пою́ Тя воспева́яй: свяще́нницы, благослови́те; лю́дие, превозноси́те во вся́ ве́ки.

Егда́ Тя беззако́ннии лю́дие осуди́ша распя́ти, Иису́се, посреде́ беззако́нных, Жизнода́вче Го́споди, потрясе́ся земля́, и вси́ воспева́ху со стра́хом: о́троцы, благослови́те; свяще́нницы, воспо́йте; лю́дие, превозноси́те во вся́ ве́ки.

Му́ченичен: Честна́ пред Бо́гом яви́ся ва́ша сме́рть страда́льцы: мно́гим бо причасти́вшеся страсте́м, Стра́сти честны́я Христо́вы о́бщницы показа́стеся, вопию́ще единому́дренно: о́троцы, благослови́те; свяще́нницы, воспо́йте; лю́дие, превозноси́те во вся́ ве́ки.

Му́ченичен: Вои́стинну не плотска́я ва́ша ору́жия, му́ченицы, ко ополче́нию враго́в – наде́жда же, ве́ра и и́стина, и́миже улучи́вше Бо́га, а́нгельским лико́м сочета́стеся вопию́ще Влады́це: свяще́нницы, благослови́те; лю́дие, превозноси́те во вся́ ве́ки.

Богоро́дичен: Вы́шний Безнача́льне Сы́не, терпи́ши оплева́ния, поноше́ния и Кре́ст, тро́стию руга́тельно бие́мь, – Богоро́дица вопия́ше, – сла́влю Твое́ долготерпе́ние. Его́же о́троцы благословя́т, свяще́нницы воспева́ют, лю́дие превозно́сят во вся́ ве́ки.

И́н. Ирмо́с то́йже.

Боже́ственному Дании́лу ны́не предви́дена была́ еси́ несеко́мая гора́: из Тебе́ бо, Отрокови́це, ка́мень отсече́ся Христо́с, Еди́н бо, Де́во, кроме́ руки́ челове́ческия. Его́же о́троцы, благослови́те; свяще́нницы, воспо́йте; лю́дие, превозноси́те во вся́ ве́ки.

Пе́сньми Рождество́ Твое́, Чи́стая, при́сно сла́вят го́рнии во́ини, и Тебе́ же, Отрокови́це Присноде́во, ра́достно с на́ми я́ко Богома́терь воспева́ют, Ю́же о́троцы благословя́т, свяще́нницы воспева́ют, лю́дие превозно́сят во вся́ ве́ки.

Све́та Твоего́ заря́ми, Тя́ му́дрствующия ны́не Богоро́дицу и́стинную, Мари́е, светоза́рны соде́лай, Богороди́тельнице Чи́стая: Све́та бо селе́ние яви́лася еси́, Де́во, ве́рою Ти́ вопию́щим: ра́дуйся, благослове́нная и препросла́вленная во вся́ ве́ки.

Та́же пое́м пе́снь Богоро́дицы: Вели́чит душа́ Моя́ Го́спода: с покло́ны.

Пе́снь 9

Ирмо́с: Не рыда́й мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно я́ко Бо́г, ве́рою и любо́вию Тя́ велича́ющия.

Да сне́дию истле́вшаго сла́достною дре́ва, еди́не Спа́се, я́ко Бла́г изба́виши от тли́, распя́тися пло́тию, и умертви́тися изво́лил еси́: пое́м непреста́нно, Иису́се, мно́гое благоутро́бие и си́лу Твою́.

О, ка́ко претерпе́л еси́ боле́зни, на Кресте́ простира́емь, от боле́зней лю́тых изыма́я мя́, Спа́се? Ка́ко те́рниями венча́выйся, все́ попали́л еси́ страсте́й те́рние? Ка́ко о́цта напои́выйся, весе́лия ча́шу на́м раствори́л еси́?

Му́ченичен: Стесня́еми вси́, и в темни́цы вмета́еми, и на у́ды страда́льцы разсеца́еми лю́те, и по колесе́х же́стоко протяза́еми, и во снеде́ние звере́м вдава́еми, Христа́ все́х Влады́ки не отверго́стеся.

Му́ченичен: Со́лнечных сия́ний мно́жайши сия́ет страда́лец всесве́тлая и благознамени́тая па́мять, и ду́ши благочести́вых просвеща́ет всегда́, и отгоня́ет тьму́ страсте́й, и искуше́ний, и де́монский расточа́ет мра́к глубоча́йший.

Богоро́дичен: Но́сиши Нося́щаго вся́, и держи́ши я́ко младе́нца на руку́, Изба́вльшаго на́с от руки́ бори́теля врага́, Пречи́стая Влады́чице, и зри́ши возвы́шена на Дре́ве Кре́стнем из я́мы зло́бы на́с Изба́вльшаго.

И́н. Ирмо́с то́йже.

Ра́дости на́м ве́чныя и жи́зни яви́лася еси́ преесте́ственне, Богороди́тельнице, Хода́таица, Чи́стая, Спа́са все́х ро́ждшая, от лица́ земна́го вся́ку сле́зу я́ве отъе́мшаго, и все́м ра́дость пода́вшаго.

Поя́ Дави́д, Тво́й пра́отец, ковче́г Тя́ прорече́ знамена́тельне, и Боже́ственныя ма́нны злату́ю ру́чку, Моисе́й, Богоро́дицу, и́бо Еди́на вмести́ла еси́ И́же в не́дрех Отчих су́ща при́сно, Богоро́дице. Те́мже Тя́ пе́сньми сла́вим.

Я́ко вои́стинну превы́шши всея́ тва́ри еси́: Бо́га бо все́х родила́ еси́ пло́тию. Те́мже Тя́ предста́тельницу и́мамы, Влады́чице, и наде́жду изве́стну, и сте́ну тве́рду, Тобо́ю спасе́ние улучи́ти наде́ющеся.

Та́же, Досто́йно е́сть: Ектения́, и свети́лен, и про́чее.

На стихо́вне стихи́ры кре́стны, гла́с 6:

О Кресте́ упова́ние и́мам, и о не́м хваля́ся вопию́: Человеколю́бче Го́споди, горды́ню низложи́ не испове́дающих Тебе́ Бо́га и Челове́ка.

Сти́х: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

И́же Кресто́м огражда́еми, врагу́ противля́емся, не боя́щеся того́ кова́рства, ни лови́тельства: я́ко бо го́рдый упраздни́ся, и попра́н бы́сть на Дре́ве си́лою распя́таго Христа́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Го́споди, в па́мять святы́х Твои́х вся́ тва́рь пра́зднует: Небеса́ ра́дуются со а́нгелы, и земля́ весели́тся с челове́ки. Те́х моли́твами поми́луй на́с.

Сла́ва, и ны́не: Крестобогоро́дичен: Пригвозди́хся у́бо я́ко челове́к на Дре́ве, и умертви́хся, и во гро́бе положе́н бы́х, я́ко сме́ртный, но я́ко Бо́г во сла́ве, Ма́ти Чи́стая Де́во, па́ки востаю́ тридне́вен.

Та́же, Бла́го е́сть: И Трисвято́е по О́тче на́ш: тропа́рь и ектения́, и ча́с 1-й: псалмы́ обы́чны, и про́чее, и отпу́ст.

Помяни́ мя, Бо́же, Спа́се мо́й, егда́ прии́деши во Ца́рствии Твое́м, и спаси́ мя, я́ко еди́н Человеколю́бец.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Распросте́р дла́ни на Дре́ве, объя́л еси́ язы́ки пою́щия Твое́ благоутро́бие, Христе́ Бо́же на́ш.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Пригвозди́лся еси́ на Дре́ве во́лею, и жа́ла го́рдаго Твое́ю, Христе́, си́лою соверше́нно сокруши́л еси́.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ками наслажда́ющеся, страстоте́рпцы, ра́йскаго наслажде́ния сподо́бистеся, о ми́ре непреста́нно моля́щеся.

Сла́ва: От вся́кия изми́ на́с му́ки, О́тче, и Сы́не и сопресто́льный Ду́ше, рабы́ Твоя́, Го́споди.

И ны́не: Зря́щи Тя́ на Кресте́ распросте́рта, Де́ва воздыха́ше слезя́щи. Ея́же моли́твами спаси́ на́с, Го́споди.

на Го́споди, воззва́х: стихи́ры святы́м му́чеником, и святи́телем, и преподо́бным, гла́с 6.

Подо́бен: Всю́ отложи́вше:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Христо́вых Страсте́й по стопа́м ходя́ все́ му́ченическое сосло́вие, кре́пко за́йде к подвиго́м мно́гим, и Того́ пред нечести́выми мучи́тели, и беззако́нными цари́ Бо́га пропове́даша, и мно́ги му́ки претерпе́ша, по́чести ча́юще Небе́сныя восприя́ти. И́хже ны́не ви́дяще ра́дуются, и со все́ми ли́ки Безпло́тных Си́л Го́сподеви предстоя́т.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в Сло́во Твое́, упова́ душа́ моя́ на Го́спода.

Ста́до богоизбра́нное, Христа́, Пе́рваго Па́стыря, подо́бницы бы́сте, па́стырие всесвяще́ннии: сохрани́сте невре́дно до конца́, благоче́стия Боже́ственная сокро́вища, отгна́вше ди́вия во́лки – то́ же во огра́ду Небе́сную до́бре возведо́сте. Иде́же у́бо ны́не водворя́еми, помина́йте любо́вию ва́с восхваля́ющих, и Христу́ со дерзнове́нием моли́теся о душа́х на́ших.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Преподо́бно пожи́вше, отцы́ преподо́бнии вси́, бе́сы победи́сте, и со́вестная муче́ния страсте́й угаси́вше, разжже́ния до́блественне претерпе́сте, блаже́ннии, и ра́дуетеся ны́не с Небе́сными Си́лами, я́ко уподо́бистеся житию́ в пло́ти те́х безпло́тных. С ни́миже моли́те Христа́, Преблага́го Бо́га, избавле́ние обрести́ паде́ний, ва́с почита́ющим.

И́ны стихи́ры, гла́с и подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Му́ченичен: Му́ченицы Твои́, Го́споди, не отверго́шася Тебе́, ни отступи́ша от за́поведей Твои́х. Те́х моли́твами поми́луй на́с.

Сти́х: Хвали́те Го́спода вси́ язы́цы, похвали́те Его́ вси́ лю́дие.

И па́ки то́йже му́ченичен.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Страстоте́рпцы му́ченицы, Небе́снии гра́ждане, на земли́ пострада́вше, мно́гия му́ки терпе́ша. Моли́твами и́х, Го́споди, и моле́нием все́х на́с сохрани́.

Сла́ва, и ны́не: Богоро́дичен: Кто́ Тебе́ не ублажи́т, Пресвята́я Де́во? Кто́ ли не воспое́т Твоего́ Пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́, Чи́стыя, про́йде, неизрече́нно вопло́щся, естество́м Бо́г Сы́й, и естество́м бы́в Челове́к на́с ра́ди, не во двою́ лицу́ разделя́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́м на́шим.

Та́же, Све́те ти́хий: и проки́мен дне́.

На стихо́вне стихи́ры му́ченичны, гла́с 6:

Страда́вшии Тебе́ ра́ди, Христе́, мно́гия му́ки претерпе́ша, и соверше́нныя венцы́ прия́ша на Небесе́х, да мо́лятся о душа́х на́ших.

Кре́ст Тво́й, Го́споди, му́чеником бы́сть ору́жие непобеди́мое: ви́дяху бо предлежа́щую сме́рть, и предзря́ще бу́дущую жи́знь, упова́нием е́же на Тя́ укрепля́хуся. Те́х моли́твами поми́луй на́с.

Ме́ртвен: Нача́ток ми́ и соста́в зижди́тельное Твое́ бы́сть повеле́ние: восхоте́в бо от неви́димаго и ви́димаго естества́, жи́ва мя́ соста́вити, от земли́ у́бо те́ло созда́в, да́л же ми́ еси́ ду́шу, Боже́ственным Твои́м и животворя́щим вдохнове́нием. Те́мже, Спа́се, рабы́ Твоя́ во стране́ живы́х, и в кро́вех пра́ведных упоко́й.

Сла́ва, и ны́не: Богоро́дичен: Моли́твами Ро́ждшия Тя́, Христе́, му́ченик Твои́х, и апо́стол, и проро́к, и святи́телей, преподо́бных, и пра́ведных, и все́х святы́х, усо́пшия рабы́ Твоя́ упоко́й.

Кано́н моле́бный Пресвяте́й Богоро́дице. Гла́с 6:

Пе́снь 1

Ирмо́с: Помо́щник и Покрови́тель бы́сть мне́ во спасе́ние, Се́й мо́й Бо́г, и просла́влю Его́, Бо́г отца́ моего́, и вознесу́ Его́: сла́вно бо просла́вися.

Припе́в: Пресвята́я Богоро́дице, спаси́ на́с.

Не отри́ни, Блага́я, не омерзи́ мене́, не пре́зри мене́ под Твое́ милосе́рдие, Чи́стая, те́пле прите́кшаго: но да́ждь ми́ е́же в Тебе́ напита́тися благода́тию.

Богоро́дице Блага́я, скорбя́щих Засту́пнице, приими́ мое́ от души́ стена́ние, и изба́ви мя́ от все́х безме́рных зо́л, я́же лю́те соде́ях.

Сла́ва: Тебе́ припа́даю, Блага́я, ско́рбных Предста́тельнице: изба́ви мя́ огня́ ве́чнующаго, и тьмы́ и про́пасти, во вся́ком житии́ зле́ пожи́вшаго.

И ны́не: Увы́ мне́! Ка́ко Тя́, Изба́вителю, умолю́, Иису́се мо́й, безме́рно к Тебе́ согреши́в? Про́чее Хода́таицу Ти́ приноша́ю ро́ждшую Тя́, Чи́стую, поми́луй и спаси́ мя.

Пе́снь 3

Ирмо́с: Утверди́, Го́споди, на ка́мени за́поведей Твои́х подви́гшееся се́рдце мое́, я́ко еди́н Свя́т еси́ и Госпо́дь.

Припа́даю Ти́, Ма́ти Сло́ва, приими́ мя щедро́тами Твои́ми; прося́щему же прегреше́ний проще́ние пода́ждь, те́плыми моли́твами Твои́ми.

Поми́луй мя́, Влады́чице, поми́луй, и изба́ви от вся́каго лука́вствия, и озлобле́ния бесо́в, и ве́чнаго муче́ния.

Сла́ва: Укроти́, Влады́чице, сласте́й мои́х го́рькое пия́нство, трезве́ние Боже́ственное ми́ подаю́щи покая́ния, и обраще́ние спаси́тельное.

И ны́не: Вся́ческих Го́спода и Содержи́теля, Богороди́тельнице, неизглаго́ланно ро́ждши, умоли́ Сего́, е́же спасти́ ста́до Твое́.

Пе́снь 4

Ирмо́с: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися, и челове́ком яви́тися и глаго́лаше: услы́шах слу́х Тво́й, и убоя́хся. Сла́ва си́ле Твое́й, Го́споди.

Я́звы души́ моея́ не престая́ чешу́ любосла́стьми, и приложи́шася мне́ стру́пов боле́зни, и пребыва́ю нечу́вствен и неисцели́мь: поми́луй, Богороди́тельнице, и исцели́, и спаси́ мя моли́твами Твои́ми.

Тьма́ грехо́вная покры́ ду́шу мою́, Богороди́тельнице, я́ко в нощи́ си́це хожду́ во све́те, не ве́дый Христо́вы за́поведи. Све́т ро́ждшая Боже́ственный, поми́луй мя́ и просвети́, молю́ся.

Сла́ва: Сло́во Бо́га Жива́го сни́де во утро́бу Твою́, Ма́ти Де́во, и прие́м от Твои́х крове́й пречи́стых все́ мое́ смеше́ние, прихо́дит сугу́б во еди́ной ипоста́си, Его́же моли́ спасти́ ду́ши на́ша.

И ны́не: Теле́сная хоте́ния приле́жно преидо́х, и сла́сти вся́, и растле́н бы́х ве́сь, и скве́рнен и ме́рзок: Пречи́стая Богороди́тельнице, поми́луй, и спаси́ мя милосе́рдием Твои́м.

Пе́снь 5

Ирмо́с: От но́щи у́тренююща, Человеколю́бче, просвети́, молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́.

О́гнь гее́нский себе́ разжего́х, де́я неподо́бная, и гне́в Бо́жий лю́те привлеко́х: помози́ ми, Чи́стая, и не оста́ви мене́.

Прегреше́ний оставле́ния прося́ при́сно, де́яти не престаю́ пребеззако́нная, и Тебе́, Пречи́стая, огорчева́ю: Очище́ние ве́рных, уще́дри мя́.

Сла́ва: Его́же от Твои́х крове́й родила́ еси́, Чи́стая, соверше́нна Челове́ка, и Бо́га и́стинна, Иису́са, умоли́ Того́ изба́витися на́м огня́ ве́чнаго.

И ны́не: Две́ре непроходи́мая, молю́ся, отве́рзи ми́ две́ри покая́ния и́стиннаго, и покажи́ ми стези́ покая́ния, Чи́стая, Я́же все́х Наста́вница.

Пе́снь 6

Ирмо́с: Возопи́х все́м се́рдцем мои́м к Ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.

Во́лны неподо́бных помышле́ний погружа́ют мя́ ны́не: но Ты́, Влады́чице, к ти́хому приста́нищу наста́ви покая́ния и́стиннаго Твои́м милосе́рдием.

Наде́жду и сте́ну необори́мую, и предста́тельницу тве́рду стяжа́вше Тя́, Отрокови́це, избавля́емся прегреше́ний и страсте́й лю́тых, и вся́каго вре́да.

Сла́ва: Припа́даю Ти́, Чи́стая Де́во, и вопию́ с пла́чем, Богоро́дице: изба́ви ду́шу мою́ окая́нную бу́дущаго суда́, и огня́ ве́чнаго.

И ны́не: Кре́пость Ты́ еси́, Пречи́стая, немощны́х душе́ю, Твои́ми мольба́ми: те́мже мя́ я́ко боля́ща душе́ю не пре́зри, но исцели́.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 6:

За милосе́рдие щедро́т, Христе́, соше́л еси́ на зе́млю, и от Де́вы вопло́щся, вся́ освяти́л еси́, я́же от земли́, и к Небеси́ все́х призва́л еси́. Те́мже упова́юще на Тя́, никогда́же погреши́м, но избавля́емся Тобо́ю настоя́ний: Ты́ бо еси́ Спа́с на́ш, Созда́телю Бо́же на́ш.

Пе́снь 7

Ирмо́с: Согреши́хом, беззако́нновахом, непра́вдовахом пред Тобо́ю: ниже́ соблюдо́хом, ниже́ сотвори́хом, я́коже запове́дал еси́ на́м: но не преда́ждь на́с до конца́, отце́в Бо́же.

Егда́ душа́ окая́нная моя́ от телесе́ стерпе́ти хо́щет разлуче́ние, и не бу́дет избавля́яй ю́, или́ утеша́яй ю́, тогда́, Влады́чице, предста́ни, и изба́ви мя́ бесо́в озлобле́ния.

Припа́даю Ти́, и приношу́ сле́з те́плыя ка́пли: ве́м Твое́ человеколю́бное, ве́м долготерпе́ние и незло́бие. Ты́ мя ны́не поми́луй, Чи́стая, прости́ и спаси́ мя.

Сла́ва: Поми́луй, Де́во, стра́стную и окая́нную мою́ ду́шу, ви́ждь страсте́й смуще́ние, ви́ждь и разгоре́ние пло́ти непостоя́нное, и по́мощь да́ждь ми́ спаси́тельную, и избавле́ние.

И ны́не: Отцу́ Единосу́щный, собезнача́льный Сы́н и Сло́во, пло́ть от Тебе́ прия́т ра́вну, у́мну, и одушевле́нну непрело́жно, я́ко ве́сть Са́м: и естество́ на́ше обнови́ в не́й лу́чше, Де́во Чи́стая.

Пе́снь 8

Ирмо́с: Его́же во́инства Небе́сная сла́вят, и трепе́щут Херуви́ми и Серафи́ми, вся́ко дыха́ние и тва́рь, по́йте, благослови́те, и превозноси́те во вся́ ве́ки.

Недоуме́ю помышля́я дея́ния моя́, и трепе́щу Судии́ Стра́шнаго Суди́ща. Ки́й отве́т окая́нный принесу́ тогда́? Влады́чице ми́ра, бу́ди ми́ засту́пница.

Не отве́ржи у́бо мене́ Сама́, Влады́чице, от лица́ Твоего́, егда́ к Твоему́ воззрю́ о́бразу, но ми́лостива бу́ди ми́, и настоя́щаго премени́ мя осужде́ния.

Сла́ва: Неве́сто Бо́жия, Мари́е Безневе́стная, от вся́каго лука́ваго вре́да изба́ви мя́, вопию́ Ти́, Твоего́ раба́, и в бу́дущей при́ предста́ни ми́, еди́на христиа́н Предста́тельнице.

И ны́не: Да челове́ки Сы́н Тво́й, Влады́чице, обожи́т, яви́ся из Тебе́ соверше́н Челове́к. Сего́ у́бо моли́, соверше́нно очи́щшася показа́ти прича́стника мя́ Боже́ственному Его́ Ца́рствию.

Пе́снь 9

Ирмо́с: Е́же ра́дуйся от А́нгела прии́мшая, и ро́ждшая Созда́теля Твоего́, Де́во, спаси́ Тя велича́ющия.

Ты́ Еди́на Предста́тельнице челове́ков еси́, Пречи́стая, Ты́ еси́ стена́ христиа́н, Чи́стая, Тя́ ны́не предлага́ю ко Христу́ хода́таицу о мне́ смире́нном, да Твои́ми моли́твами поми́лует мя́ окая́ннаго.

Но́щи дела́ соде́лах, и но́щь муче́ния хо́щет мя́ ны́не покры́ти пра́ведно су́етнаго, и вся́ко томле́ние прия́ти а́дово: но ро́ждшая Судию́, и Бо́га, Чи́стая Де́во, изба́ви мя́ вся́каго муче́ния.

Сла́ва: Вре́мя живота́ моего́ во злы́х изжи́х, и к две́рем а́да прибли́жихся, и ве́сь не гото́в иду́ та́мо: помози́ ми, Блага́я Богоро́дице, на Тя́ бо наде́жду возложи́х.

И ны́не: Благолюби́вая Влады́чице, а́нгелов украше́ние, му́чеников сла́во, с си́ми помоли́ся обрести́ на́м ми́лость, и разреше́ние долго́в, и возмощи́ все́м до́бре жи́зни на́шея тече́ние сконча́ти, Боже́ственная де́ющим.

Та́же, Досто́йно е́сть: и покло́н, и Трисвято́е по О́тче на́ш: тропари́, и про́чее обы́чно, и отпу́ст.

По 1-м стихосло́вии седа́льны му́ченичны, гла́с 6:

Све́т пра́ведным всегда́ Ты́, Го́споди: святи́и бо о Тебе́ просвети́вшеся, сия́ют при́сно я́ко свети́ла, свети́льник нечести́вых угаси́вше. И́хже моли́твами, Спа́се на́ш, Ты́ просвети́ свети́льник мо́й, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Страда́льческий по́двиг претерпе́вше святи́и, и по́чести побе́дныя от Тебе́ прия́ша, упраздни́ша помышле́ния беззако́нных, и прия́ша венцы́ нетле́нныя. Те́ми, Бо́же, умоле́н быва́я, да́руй на́м ве́лию ми́лость.

Сла́ва, и ны́не: Богоро́дичен: И́же Благослове́нную нареки́й Твою́ Ма́терь, прише́л еси́ на Стра́сть во́льным хоте́нием, возсия́в на Кресте́, взыска́ти хотя́ Ада́ма, глаго́ля а́нгелом: сра́дуйтеся Мне́, я́ко обре́теся поги́бшая дра́хма. Вся́ му́дре устро́ивый, Бо́же на́ш, сла́ва Тебе́.

По 2-м стихосло́вии седа́льны му́ченичны, гла́с 6:

Страда́льческое стоя́ние в по́двизе, и мучи́тельския ра́ны на му́ченицех, и стоя́ху ли́цы безпло́тных, по́чести держа́ще побе́дныя; удиви́ша му́дрии мучи́телей, и царе́й прему́дрии; низложи́ша отсту́пника испове́данием Христо́вым. Укрепи́вый и́х, Го́споди, сла́ва Тебе́.

Сти́х: Ди́вен Бо́г во святы́х Свои́х, Бо́г Изра́илев.

Го́споди, святы́х Твои́х па́мять дне́сь показа́ся, я́ко ра́й, и́же во Eде́ме, в не́й бо ра́дуется вся́ тва́рь: и подае́ши на́м те́х мольба́ми ми́р и ве́лию ми́лость.

Сти́х: Мно́ги ско́рби пра́ведным, и от все́х и́х изба́вит я́ Госпо́дь.

Ме́ртвен: Вои́стинну суета́ вся́ческая, житие́ же се́нь и со́н, и́бо всу́е мяте́тся вся́к земноро́дный, я́коже рече́ Писа́ние: егда́ ми́р приобря́щем, тогда́ во гро́б всели́мся, иде́же вку́пе ца́рие и убо́зии. Те́мже, Христе́ Бо́же, преста́вленныя упоко́й, я́ко Человеколю́бец.

Сла́ва, и ны́не: Богоро́дичен: От се́рдца воздыха́ния и от утро́бы приношу́ Ти. Твое́, Всенепоро́чная, молю́ благопремени́тельное заступле́ние: поми́луй всестра́стную мою́ ду́шу, умоли́ многоми́лостиваго Бо́га изба́вити мя́ суда́, и е́зера о́гненнаго, Еди́на Благослове́нная.

Кано́н святы́м му́чеником, и святи́телем, и преподо́бным, и усо́пшим. творе́ние Ио́сифово, гла́с 6.

Пе́снь 1

Ирмо́с: Чу́вственный фарао́н потопле́н бы́сть со всево́инством, Изра́иль же проше́д посреде́ мо́ря, вопия́ше: Го́сподеви Бо́гу на́шему пои́м, я́ко просла́вися.

Све́тлым умо́м те́мныя освети́вше, злочести́выя же мучи́тели му́ченицы посрами́вше, победоно́сцы бы́ша я́ве, и к Невече́рнему Све́ту преидо́ша.

Святи́телие Христо́вы, и преподо́бных ли́к, и проро́к, и пра́ведных все́х еди́нственное торжество́, доброде́тельными красота́ми блиста́ющеся, внидо́ша к Небе́сным селе́нием.

Же́н вся́ко мно́жество присво́ившеся Христо́ви, Е́ву лю́тым прельще́нием умори́вшаго попра́ша труды́ му́жескими, ублажа́ются Боже́ственными пе́сньми.

Сла́ва: поко́ин: И́же от земли́ в нача́ле созда́в челове́ка, Христе́, ду́ши Твои́х ра́б упоко́й, мо́лимся, во оби́телех пра́ведных и в ме́стех ослабле́ния, я́ко Пребла́г.

И ны́не: Богоро́дичен: Свяще́ннейши, Чи́стая, Херуви́м, и Серафи́м, яви́лася еси́ ро́ждши Творца́ тва́ри. Его́же непреста́нно моли́, уще́дрити рабы́ Твоя́ Тебе́ сла́вящия.

Други́й кано́н усо́пшим, пое́м его́ на ряду́, иде́же не́сть Мине́и. Творе́ние Феофа́ново.

Ирмо́с: Я́ко по су́ху:

Сти́х: Ди́вен Бо́г во святы́х свои́х, Бо́г Изра́илев.

В Небе́сных черто́зех, всегда́ до́блии му́ченицы мо́лят Тя́, Христе́: и́хже от земли́ преста́вил еси́ ве́рныя, ве́чных бла́г получи́ти сподо́би.

Сти́х: Поко́й, Го́споди, ду́ши ра́б Твои́х.

Украси́вый вся́ческая, живо́тное смеше́нное мя́ челове́ка, посреде́ смире́ния же вку́пе и вели́чества созда́л еси́: те́мже ра́б Твои́х ду́ши, Спа́се, упоко́й.

Сла́ва: Рая́ жи́теля, и де́лателя в нача́ле мя́ учини́л еси́ – преступи́вша же Твою́ за́поведь изри́нул еси́. Те́мже рабо́в Твои́х ду́ши, Спа́се, упоко́й.

И ны́не: Богоро́дичен: И́же от ребра́ созда́вый Е́ву пе́рвее на́шу прама́терь, из пречи́стаго Твоего́ чре́ва в пло́ть одева́ется. Е́юже сме́рти кре́пость, Чи́стая, разруши́л е́сть.

Пе́снь 3

Ирмо́с: На тве́рдем ве́ры Твоея́ ка́мени помышле́ние утверди́в души́ моея́, утверди́, Го́споди: Тя́ бо и́мам, Бла́же, прибе́жище и утвержде́ние.

Теле́сным примеси́вшеся боле́знем страда́льцы, на неболе́зненное взира́ху воздая́ние ра́дующеся, и ны́не утоля́ют на́ша боле́зни мно́гия благода́тию.

Ра́зумом тве́рдым отгоня́юще зве́ри лука́выя, боже́ственнии святи́телие, изба́виша неврежде́нны от зло́б те́х, Христо́ва Боже́ственная воспита́ния.

Во́лею и́гу Госпо́дню подвозше́дый ли́к преподо́бных, умертви́в мудрова́ние плотско́е, и живо́т ве́чный восприя́т.

Сла́ва: Изба́ви, Христе́, огня́ ве́чнаго, благоче́стно от жития́ преста́вльшияся, и оставле́ние да́ждь долго́в и́х, Бла́же, и ве́чное наслажде́ние.

И ны́не: Я́же Христа́ возлюби́вшыя жены́, Тебе́ Того́ неизрече́нно Ро́ждшую, Всесвята́я Влады́чице, ра́достною мы́слию обстоя́ще ликовству́ют.

И́н. Ирмо́с: Не́сть свя́т я́коже Ты́:

Зако́нно пострада́вше Твои́ му́ченицы, Жизнода́вче, и венцы́ побе́ды украси́вшеся от Тебе́, приле́жно преста́вльшимся ве́рным ве́чное хода́тайствуют поче́стие.

Наказа́в пре́жде мно́гими чудесы́ и зна́меньми мене́ заблу́ждшаго, напосле́док Самого́ Себе́ истощи́л еси́, я́ко сострада́телен, и поиска́в обре́л, и спа́сл еси́.

Сла́ва: От теку́щаго непостоя́тельныя тли́, к Тебе́ прише́дшия, в селе́ниих ве́чных всели́тися ра́достно сподо́би, Бла́же, оправда́в ве́рою же и благода́тию.

И ны́не: Не́сть непоро́чны, я́коже Ты́, Пречи́стая Богома́ти: еди́на бо от ве́ка и́стиннаго Бо́га зачала́ еси́ во чре́ве, сме́рти разруши́вшаго си́лу.

Пе́снь 4

Ирмо́с: Услы́шах слу́х Тво́й, и убоя́хся, разуме́х дела́ Твоя́, и ужасо́хся: сла́ва си́ле Твое́й, Го́споди.

Стоя́ще зря́ху го́рдаго страстоте́рпцы, пред нога́ми и́х попира́ема: и вся́ческих Зижди́теля благода́рственно сла́вляху.

Глаго́л светлостьми́ святи́телие вооружи́вшеся, к све́ту разуме́ния, челове́ки от тьмы́ ересе́й спасо́ша.

Я́ко у́глие яви́шася, к Бо́гу те́плым разуме́нием, и стра́сти попали́вше веще́ственныя преподо́бнии, вельми́ прославля́ются.

Сла́ва: Живы́ми Ты́, Го́споди, и ме́ртвыми облада́я, и́хже преста́вил еси́, упоко́й со все́ми благоугоди́вшими Тебе́, Влады́ко.

И ны́не: Госпо́дь, Пречи́стая, из Тебе́ неизрече́нно в пло́ть облеки́йся, же́н сосло́вие му́жественне подвиза́вшихся прия́т.

И́н. Ирмо́с: Христо́с моя́ си́ла:

Прему́дрости бо́льшее явля́я позна́ние, и о даре́х многосоверше́нную, Влады́ко, благосты́ню, му́ченическия ли́ки а́нгелом сочета́л еси́.

Пречи́стую сла́ву Твою́ получи́ти сподо́би к Тебе́ преста́вленным, иде́же, Христе́, веселя́щихся е́сть жили́ще, и гла́с чи́стаго ра́дования.

Сла́ва: Пою́щия приими́ Боже́ственною держа́вою Твое́ю, и́хже от земли́ прия́т, ча́да све́ту те́х соде́лав, грехо́вную мглу́ очища́я, Многоми́лостиве.

И ны́не: Прия́телище пречи́стое, Це́рковь непоро́чную, Ковче́г всесвя́т, де́вственное ме́сто свяще́ния, Тебе́, Добро́ту Иа́ковлю, Влады́ка избра́л е́сть.

Пе́снь 5

Ирмо́с: Све́т возсия́вый ми́ру, Христе́, просвети́ се́рдце мое́ от но́щи Тебе́ зову́ща, и спаси́ мя.

Истка́ную от вы́шния благода́ти, обле́кшеся во оде́жду, страда́льцы, врага́ обнажи́сте.

Со святы́ми проро́ки почти́м первосвяще́нники богому́дрыя, и преподо́бныя Бо́гу благоугоди́вшия.

Во псалме́х и пе́снех восхва́лим же́н сосло́вие: я́ко Бо́гу до́бре угоди́вшия.

Сла́ва: В селе́ниих пра́ведных Твои́х, Го́споди, Твоя́ рабы́ учини́, презира́я те́х, я́же в житии́ согреше́ния.

И ны́не: Избавля́ющи на́с вся́каго вра́жия вре́да, яви́лася еси́, Влады́чице, моля́щи Христа́, еди́наго Благоутро́бнаго.

И́н. Ирмо́с: Бо́жиим све́том Твои́м:

Я́ко всепло́дие свяще́нное, и я́ко нача́ток челове́ческаго естества́, му́ченицы, просла́вленному прине́сшеся Бо́гу, на́м спасе́ние при́сно хода́тайствуют.

Небе́снаго пребыва́ния, и раздая́ния дарова́ний сподо́би, Го́споди, пре́жде усо́пшия ве́рныя рабы́ Твоя́, подая́ прегреше́ний избавле́ние.

Сла́ва: И́же еди́н естество́м Животво́рец, И́же бла́гости вои́стинну неизсле́димая пучи́на, сконча́вшияся Ца́рствия Твоего́ сподо́би, Ще́дре, еди́не Безсме́ртне.

И ны́не: Кре́пость и пе́ние, И́же из Тебе́, Влады́чице, ми́ру рожде́йся, и спасе́ние бы́сть поги́бшим, И́же от а́довых вра́т избавля́я ве́рою Тебе́ блажа́щия.

Пе́снь 6

Ирмо́с: Ки́том пожре́н грехо́вным, вопию́ Тебе́, Христе́: я́ко проро́ка из истле́ния мя́ свободи́.

Крове́й боже́ственных тече́нием мы́сленныя враги́ погрузи́сте, ве́рных же сердца́ страстоте́рпцы напои́сте.

Распе́нше себе́ ми́ру и страсте́м, преподо́бнии, и прему́дрии святи́телие, Боже́ственныя сла́вы сподо́бистеся.

Проро́ков ли́к, и честны́х же́н собо́р, до́бре подвиза́вшихся по до́лгу ублажа́ем.

Сла́ва: Поко́й, Бо́же, преждеусо́пших ду́ши со избра́нными Твои́ми, презира́я те́х прегреше́ния.

И ны́не: Пло́тию роди́вшая Христа́, пло́ти моея́ стра́сти умертви́; и оживи́, Де́во, ду́шу мою́ хода́тайством Твои́м.

И́н. Ирмо́с: Жите́йское мо́ре:

На Кресте́ пригвожда́емь, му́ченическия ли́ки к Себе́ собра́л еси́, подо́бящияся Стра́сти Твое́й, Бла́же. Те́мже Тя́ мо́лим: к Тебе́ преста́вленныя упоко́й.

Неизрече́нною сла́вою Твое́ю, егда́ прии́деши стра́шно суди́ти ми́ру всему́ на о́блацех, благоволи́, Изба́вителю, све́тло сре́сти Тебе́, я́же от земли́ прия́л еси́ ве́рныя рабы́ Твоя́.

Сла́ва: Исто́чник жи́зни сы́й, Влады́ко, в му́жестве Боже́ственнем, окова́нныя изводя́ рабы́ Твоя́ я́же к Тебе́ ве́рно отше́дшия, в пи́щи ра́йстей всели́.

И ны́не: В зе́млю возврати́хомся, преступи́вше Бо́жию за́поведь – Тебе́ же ра́ди, Де́во, на небеса́ от земли́ вознесо́хомся, тлю́ сме́ртную оттря́сше.

Пе́снь 7

Ирмо́с: Преподо́бных Твои́х отроко́в пе́снь услы́шавый и пе́щь горя́щую ороси́вый, благослове́н еси́, Го́споди Бо́же оте́ц на́ших.

Христо́вы страстоте́рпцы, угаси́вшия пла́мень лю́таго безбо́жия ту́чами крове́й, пе́сньми почти́м.

Благосла́внии иера́рси, зи́му ересе́й разруши́вше, и к весне́ Боже́ственней ра́дующеся приидо́ша.

Терпе́нием бога́тую Ду́ха благода́ть насле́довасте, по́стницы, и мно́жество бесо́в погуби́сте.

Сла́ва: Рая́ пи́щи Твоея́ насле́довати сподо́би, Ще́дре, ве́рою преста́вленныя от жития́, Многоми́лостиве.

И ны́не: И́же Тебе́ Де́ву показа́вый, Чи́стая, и по Рождестве́, святы́х же́н ли́ки Тебе́ насле́довавшия спа́сл е́сть.

И́н. Ирмо́с: Росода́тельну у́бо пе́щь:

Изба́вльшиися Твое́ю Кро́вию му́ченицы, пе́рваго преступле́ния, окропи́вшеся же свое́ю кро́вию, прообразу́ют я́ве Твое́ заколе́ние. Благослове́н еси́, Бо́же оте́ц на́ших.

Свире́пеющую сме́рть умертви́л еси́, Сло́ве Живонача́льнейший, в ве́ре же Твое́й усо́пшия приими́ Тебе́ пою́щия, Христе́, и глаго́лющия: благослове́н Бо́г оте́ц на́ших.

Сла́ва: Воодуши́в мя́ челове́ка вдохнове́нием Боже́ственным, Богонача́льнейший Влады́ко, преста́вленныя Ца́рствия Твоего́ сподо́би, пе́ти Тебе́, Спасе́: благослове́н Бо́г оте́ц на́ших.

И ны́не: Превы́шши все́х тва́рей, Пренепоро́чная была́ еси́, заче́нши Бо́га сокруши́вшаго сме́ртная врата́, и вереи́ сте́ршаго. Те́мже Тя́, Чи́стая, песносло́вим ве́рнии, я́ко Богома́терь.

Пе́снь 8

Ирмо́с: Преподо́бнии Твои́ о́троцы в пещи́ Херуви́мы подража́ху, трисвяту́ю пе́снь воспева́юще: благослови́те, по́йте, и превозноси́те во вся́ ве́ки.

До́блественне муче́ний треволне́нием ураня́еми, боже́ственнии му́ченицы, благода́тию проше́дше в тишину́ глубо́кую, Вы́шняго Ца́рствия достиго́ша.

Преподо́бнии, всему́дрии святи́телие, просия́вше я́ко со́лнце, просвеща́ют вселе́нную уче́ний луча́ми, и исцеле́ний светлостьми́.

Сла́внии проро́цы, и первосвяще́нницы, преподо́бнии вси́, и пра́веднии, му́ченик мно́жества, и же́н, ста́до ва́ше все́ сохрани́те от бесо́в непоколеби́мо.

Сла́ва: Воспое́м я́же от ве́ка пра́ведныя, и богоглаго́ливыя проро́ки, и возопие́м со умиле́нием. Те́х, Сло́ве, моли́твами в ве́ре усо́пшия упоко́й.

И ны́не: Всю́ Тя бли́жнюю добро́ту Бо́га, Де́во, ли́к же́нский возлюби́, и во сле́д Тебе́ приведо́шася Влады́це все́х, согла́сно блажа́ще Тя́, Пречи́стая.

И́н. Ирмо́с: Из пла́мене преподо́бным:

Кре́пко по́двиги показу́юще, побе́ды венцы́ прия́сте, му́ченицы страстоте́рпцы, Христо́ви зову́ще: Тя́ превозно́сим Го́спода во ве́ки.

Свяще́нно ве́рныя жите́йская оста́вльшия, и к Тебе́, Влады́це, отлучи́вшияся приими́ кро́тко, и упоко́й, я́ко Милосе́рд, Тя́ превознося́щих Го́спода во ве́ки.

Сла́ва: Ны́не в земли́ кро́тких, все́м водворя́тися пре́жде усо́пшим, Спа́се, благоволи́, ве́рою Твое́ю оправда́в и благода́тию, Тя́ превознося́щих Го́спода во ве́ки.

И ны́не: Блажи́м Тя́ вси́, Преблаже́нная, я́ко Сло́во вои́стинну су́щее блаже́нное Ро́ждшую, пло́ть бы́вшее на́с ра́ди. Его́же превозно́сим во вся́ ве́ки.

Та́же пое́м пе́снь Богоро́дицы: Вели́чит душа́ моя́ Го́спода: И про́чыя стихи́ с припе́вы.

Пе́снь 9

Ирмо́с: Е́же ра́дуйся, от А́нгела прии́мшая, и ро́ждшая Созда́теля Твоего́, Де́во, спаси́ Тя велича́ющия.

Овча́та чи́стая приведо́стеся ко Влады́це, страстоте́рпцы му́ченицы, Того́ моли́те спасти́ ду́ши на́ша.

Я́ко па́стырие на зла́це благоче́стия святи́телие, ве́рныя упасо́сте, и ны́не во огра́ду Боже́ственную всели́стеся.

Со святы́ми святи́тели, и проро́ки, и со жена́ми кре́пко пострада́вшими, и преподо́бных ли́ки да ублажи́м.

Сла́ва: Ему́же причаща́ются весе́лию присносу́щному святы́х собо́ри, сподо́би преста́вленных улучи́ти, Многоми́лостиве.

И ны́не: Све́т ро́ждшая, Де́во, просвети́ ду́шу мою́, тьму́ отгоня́ющи греха́ и ле́ности моея́.

И́н. Ирмо́с: Бо́га челове́ком:

Наде́жда му́чеников ли́ки укрепи́, и к Твое́й любви́ распале́нием впери́, бу́дущий си́м предвообрази́вше непоколеби́мый вои́стинну поко́й, его́же преста́вленныя, Бла́же, ве́рныя сподо́би.

Све́тлое Твое́, Христе́, и Боже́ственное улучи́ти сия́ние ве́рою преста́вленным благоволи́, И́же в ло́нех Авраа́мовех поко́й, я́ко еди́н Ми́лостив, те́м да́руя, и ве́чнаго сподобля́я блаже́нства.

Сла́ва: И́же сы́й естество́м Бла́г и Милосе́рд, и Хоти́тель ми́лостей, и благоутро́бия пучи́на, и́хже от ме́ста сего́ озлобле́ния, и се́ни сме́ртныя преста́вил еси́, иде́же сия́ет Тво́й све́т, Спа́се, те́х учини́.

И ны́не: Се́нь святу́ю, Чи́стая, ве́мы Тя́, и ковче́г, и скрижа́ли, Зако́на и благода́ти: Тебе́ бо ра́ди оставле́ние дарова́ся, оправда́ным Кро́вию Воплоще́ннаго из Твоего́ чре́ва, Всенепоро́чная.

Та́же, Досто́йно е́сть: Ектения́, и свети́лен, и псалмы́ обы́чныя.

На хвали́тех стихи́ры му́ченичны, гла́с 6:

Го́споди, в па́мять святы́х Твои́х, вся́ тва́рь пра́зднует, Небеса́ ра́дуются со а́нгелы, и земля́ весели́тся с челове́ки. Те́х моли́твами поми́луй на́с.

Го́споди, а́ще не бы́хом святы́я Твоя́ име́ли моли́твенники, и благосты́ню Твою́ ми́лующую на́с, ка́ко сме́ли бы́хом, Спа́се, пе́ти Тя́, Его́же славосло́вят непреста́нно а́нгели? Сердцеве́дче, пощади́ ду́ши на́ша.

Па́мять му́ченик – ра́дость боя́щимся Го́спода: пострада́вше бо Христа́ ра́ди, венцы́ от Него́ прия́ша, и ны́не со дерзнове́нием мо́лятся о душа́х на́ших.

Избра́нныя удиви́ святы́я Бо́г на́ш, ра́дуйтеся и весели́теся вси́ раби́ Его́, ва́м бо угото́вал е́сть венцы́ и Ца́рствие Свое́, но мо́лим вы́, и на́с не забу́дите.

Ме́ртвен: Боле́знь Ада́му бы́сть, дре́ва вкуше́ние дре́вле во Еде́ме, егда́ зми́й я́д отры́гну: того́ бо ра́ди вни́де сме́рть всеро́дная снеда́ющи челове́ка. Но прише́д Влады́ка, низложи́ зми́я, и воскресе́ние на́м дарова́. К нему́же у́бо возопии́м: пощади́, Спа́се, и и́хже прия́л еси́, со святы́ми упоко́й, я́ко Человеколю́бец.

Сла́ва, и ны́не: Богоро́дичен: Бо́га из Тебе́ воплоти́вшагося разуме́хом, Богоро́дице Де́во: Того́ моли́ о спасе́нии ду́ш на́ших.

На стихо́вне стихи́ры поко́йны, гла́с 6:

Подо́бен: Всю́ отложи́вше:

Име́яй непостижи́мое е́же о на́с благоутро́бие, и исто́чник неистощи́мый Боже́ственныя бла́гости, Многоми́лостиве, и́же к Тебе́, Влады́ко, преше́дшия, на земли́ живы́х всели́, в селе́ния возлю́бленная и жела́емая, одержа́ние да́руя, всегда́ пребыва́ющее. Ты́ бо за все́х пролия́л еси́ Кро́вь Твою́, Спа́се, и живоно́сною цено́ю ми́р искупи́л еси́.

Сти́х: Блаже́ни, я́же избра́л и прия́л еси́, Го́споди.

Умерщвле́ние претерпе́л еси́ животворя́щее во́лею и живо́т источи́л еси́, и пи́щу присносу́щную ве́рным да́л еси́, в не́йже учини́ усо́пшия о упова́нии воскресе́ния, те́х согреше́ния вся́ проща́я благода́тию, я́ко еди́н Безгре́шен, и еди́н Бла́г и Человеколю́бец, да все́ми пое́тся Твое́ И́мя, Христе́, спаси́тельное сла́вим Человеколю́бие Твое́.

Сти́х: Ду́ши и́х во благи́х водворя́тся.

Живы́ми госпо́дьствующа, Богонача́льною вла́стию, и ме́ртвыми влады́чествующа, Тебе́, Христе́, зна́юще мо́лимся, ве́рныя рабы́ Твоя́, к Тебе́ еди́ному Благода́телю отше́дшия, те́х упоко́й со избра́нными Твои́ми, Человеколю́бче, на ме́сте утеше́ния, во святы́х све́тлостех: Воли́тель бо ми́лости еси́, и спаса́еши я́ко Бо́г, и́хже по о́бразу Твоему́ созда́л еси́, еди́не Многоми́лостиве.

Сла́ва, и ны́не: Богоро́дичен: Яви́лася еси́ пребыва́лище боголе́пно, Пречи́стая: Бо́га бо вмести́ла еси́, и Христа́ родила́ еси́, Неискусобра́чная Ма́ти Де́во, во двою́ существу́, во еди́ной же ипоста́си. Того́ умоли́, Чи́стая, Единоро́днаго Пе́рвенца, Тя́ Де́ву Непоро́чную, и по Рождестве́ сохра́ншаго, ду́ши упоко́ити ве́рою усо́пших во све́те, и в нетле́ннем блаже́нстве.

Та́же, Бла́го е́сть: и Трисвято́е по О́тче на́ш: тропа́рь, и ектения́, и отпу́ст, и ча́с пе́рвый: псалмы́ обы́чныя, и коне́чный отпу́ст.

Помяни́ мя, Бо́же, Спа́се мо́й, егда́ прии́деши во Ца́рствии Твое́м, и спаси́ мя, я́ко еди́н Человеколю́бец.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Огня́ и меча́, и звере́й ди́виих устремле́ния свире́паго, страстоте́рпцы сла́внии не убоя́вшеся, присносу́щнаго живота́ сподо́бистеся.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

И́же проро́ки и учи́тели, и преподо́бныя и пра́ведныя просла́вивый, Человеколю́бче, те́х моли́твами спаси́ ду́ши на́ша.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Со все́ми святы́ми и пра́ведными учини́, Сло́ве, и́хже в ве́ре преста́вил еси́ от вре́менных, я́ко да сла́вим Тя́.

Сла́ва: Отца́ и Сы́на славосло́вим, и Свята́го Ду́ха, глаго́люще: Тро́ице Свята́я, спаси́ ду́ши на́ша.

И ны́не: Блаже́нна в роде́х все́х яви́лася еси́: Бо́га бо вои́стинну Блаже́ннаго несказа́нно родила́ еси́, Пречи́стая.

Коне́ц шесто́му гла́су.