Источник

В 15-й день

Свята́го великому́ченика Ники́ты

ВЕ́ЧЕР

На Го́споди, воззва́х: стихи́ры пра́здника и свята́го на 6.

Стихи́ры Креста́, глас 5. Самоподо́бен:

Ра́дуйся, живоно́сный Кре́сте,/ благоче́стия непобеди́мая побе́да,/ дверь ра́йская,/ ве́рных утвержде́ние,/ Це́ркве огражде́ние,/ и́мже тля разори́ся и упраздни́ся,/ и попра́ся сме́ртная держа́ва,/ и вознесо́хомся от земли́ к Небе́сным;/ ору́жие непобеди́мое,/ бесо́в сопротивобо́рче,/ сла́ва му́чеников,/ преподо́бных я́ко вои́стину удобре́ние,/ приста́нище спасе́ния,// да́руяй ми́ру ве́лию ми́лость.

Ра́дуйся, Госпо́день Кре́сте,/ и́мже разреши́ся от кля́твы челове́чество,/ су́щия ра́дости зна́мение,/ прогоня́яй враги́ во твое́м воздви́жении, всече́стне,/ нам помо́щниче, царе́й держа́во,/ кре́пость пра́ведных,/ свяще́нников благоле́пие,/ вообража́емый, и лю́тых избавля́яй,/ жезл си́лы, и́мже пасе́мся,/ ору́жие ми́ра, его́же со стра́хом обстоя́т Ангели,/ Христа́ Боже́ственная сла́ва,// подаю́щаго ми́ру ве́лию ми́лость.

Ра́дуйся, слепы́х наста́вниче,/ немощны́х врачу́,/ воскресе́ние всех уме́рших,/ воздви́гнувый ны, во тлю па́дшия,/ Кре́сте честны́й,/ и́мже разруши́ся кля́тва, и процвете́ нетле́ние,/ и земни́и обожи́хомся,/ и диа́вол всеконе́чно низве́ржеся./ Днесь воздвиза́ема тя ви́дяще рука́ми архиере́йскими,/ возно́сим Вознесе́ннаго посреде́ тебе́/ и тебе́ покланя́емся,// почерпа́юще бога́тно ве́лию ми́лость.

И́ны стихи́ры святаго, глас 1.

Подо́бен: Небе́сных чино́в:

Благочести́вым всеору́жием оде́явся,/ побо́рник яви́лся еси́ Христа́ Всецаря́,/ Ники́то страстоте́рпче,/ я́коже дре́вле Гедео́н всекре́пкий,/ иноплеме́нных полки́ низложи́в// до́блественным твои́м дерзнове́нием.

Иноплеме́ннаго, му́чениче, пора́товал еси́/ всеси́льною ве́рою Спа́совою, богому́дре,/ претерпе́вый стра́сти./ Тем му́дре ва́рвары обрати́л еси́/ ко Творцу́ и Влады́це всех,// и сла́вят Его́ благочести́во.

Нача́тки, му́чениче, от ва́рвар Христу́ сла́ву принесы́й,/ яви́лся еси́ страда́лец богоглаго́ливый,/ и, у́мер за Тро́ицу,/ тем я́вственно и вене́ц восприя́л еси́,/ и, я́ко свети́ло, сия́еши боголе́пно// в ми́ре, достосла́вне.

Сла́ва, свята́го, глас 6. Феофа́ново:

Свети́льника му́чеников тя позна́хом,/ Ники́то, Христо́в страда́льче:/ ты бо, су́щаго на земли́ досто́инства сла́ву оста́вив/ и оте́ческое безбо́жие возненави́дев,/ бо́ги их сокруши́л еси́/ и победи́тельно ва́рвары посрами́л еси́,/ за Христа́ му́ченичество испове́дания испо́лнил еси́/ и во́ин Небе́снаго Бо́га был еси́./ О нас моли́ся Благоде́телю всех,// е́же уще́дрити и спасти́ ду́ши на́ша.

И ны́не, пра́здника, глас то́йже:

Проро́ков гла́си/ Дре́во свято́е предвозвести́ша,/ и́мже дре́вния свободи́ся кля́твы сме́ртныя Ада́м,/ тварь же, днесь возноси́му тому́, совозвыша́ет глас,/ от Бо́га прося́щи бога́тыя ми́лости;/ но, Еди́ный в благоутро́бии безме́рный, Влады́ко,/ очище́ние бу́ди нам,/ и спаси́ ду́ши на́ша.

Вход, проки́мен, глас 7: Бог наш на Небеси́ и на земли́,// вся, ели́ка восхоте́, сотвори́.

Стих: Во исхо́де Изра́илеве от Еги́пта, до́му Иа́ковля, из люде́й ва́рвар, бысть Иуде́я святы́ня его́.

Стих: Мо́ре ви́де и побеже́, Иорда́н возврати́ся вспять.

Стих: Что ти есть, мо́ре, я́ко побе́гло еси́? И тебе́, Иорда́не, я́ко возврати́лся еси́ вспять?

Та́же ектения́: Рцем вси:

Аще ли прилучи́тся суббо́та, пое́м проки́мен дне. Госпо́дь воцари́ся: А вели́кий проки́мен пое́м в на́вечерии пра́здника.

На стихо́вне стихи́ры, глас 6.

Подо́бен: Все отло́жше:

Крест, воздвиза́емь,/ на нем Вознесе́ннаго Страсть пречи́стую/ пе́ти повелева́ет тва́ри всей./ На том бо уби́в нас уби́вшаго,/ умерщвле́нныя оживи́л есть,/ и удобри́, и на Небесе́х жи́ти сподо́би, я́ко Милосе́рд,/ премно́жеством бла́гости./ Тем, ра́дующеся, вознесе́м и́мя Его́// и Того́ возвели́чим кра́йнее снизхожде́ние.

Стих: Возноси́те Го́спода Бо́га на́шего// и покланя́йтеся подно́жию но́гу Его́, я́ко свя́то есть.

Моисе́й предобрази́ тя,/ ру́ки просте́р на высоту́,/ и побежда́ше Амали́ка мучи́теля,/ Кре́сте честны́й,/ ве́рных похвало́,/ страда́льцев утвержде́ние,/ апо́столов удобре́ние,/ пра́ведных побо́рниче,/ всех преподо́бных спаси́телю./ Тем, тя воздвиза́ема зря́щи, тварь весели́тся/ и торжеству́ет, сла́вящи Христа́,// тобо́ю разстоя́щая собра́вшаго кра́йнею бла́гостию.

Стих: Бог же, Царь наш пре́жде ве́ка,/ соде́ла спасе́ние посреде́ земли́.

Кре́сте пречестны́й,/ его́же обстоя́т чи́ни а́нгельстии, веселя́щеся,/ днесь воздвиза́емь,/ Боже́ственным манове́нием возно́сиши вся/ окраде́нием сне́ди отгна́нныя/ и в смерть попо́лзшияся./ Те́мже тя сердцы́ и устна́ми, ве́рнии, лобыза́юще,/ свяще́ние почерпа́ем,/ возноси́те, вопию́ще, Христа́, Преблага́го Бо́га,// и Того́ покланя́йтеся Боже́ственному подно́жию.

Сла́ва, свята́го, глас 8:

Побе́ды тезоимени́т показа́лся еси́,/ му́чениче всече́стне Ники́то,/ в по́двизе пропове́дав Христа́ Бо́га на́шего,/ и пред цари́ и мучи́тели Того́ испове́дал еси́./ Тем не преста́й моля́ся о ми́ре ми́ра, и христолюби́вых царе́х,/ и о всех па́мять твою́ соверша́ющих ве́рно/ Еди́ному Человеколю́бцу,// изба́вити вся́каго гне́ва.

И ны́не, глас то́йже:

Глас проро́ка Твоего́ Моисе́я, Бо́же,/ испо́лнися, глаго́ляй:/ у́зрите Живо́т ваш ви́сящь пред очесы́ ва́шими./ Днесь Крест воздвиза́ется,/ и мир от ле́сти свобожда́ется,/ днесь Христо́во Воскресе́ние обновля́ется,/ и концы́ земли́ ра́дуются,/ в кимва́лех дави́дски песнь Тебе́ принося́ще и глаго́люще:/ соде́лал еси́ спасе́ние посреде́ земли́, Бо́же,/ Крест и Воскресе́ние,/ и́хже ра́ди нас спасл еси́, Бла́же и Человеколюбче,/ Всеси́льне Го́споди, сла́ва Тебе́.

Тропа́рь, глас 4:

Му́ченик Твой, Го́споди, Ники́та/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

Или́ сей, глас то́йже:

Крест Христо́в, я́ко не́кое ору́жие, усе́рдно восприи́м,/ и к боре́нию враго́в прите́кл еси́,/ и, за Христа́ пострада́в,/ последи́ огне́м свяще́нную твою́ ду́шу Го́споду пре́дал еси́,/ отону́дуже и даро́в исцеле́ния/ от Него́ сподо́бился еси́ прия́ти,/ великому́чениче Ники́то./ Моли́ Христа́ Бо́га// спасти́ся душа́м на́шим.

Сла́ва, и ны́не, пра́здника: Спаси́, Го́споди, лю́ди Твоя́:

НА У́ТРЕНИ

На Бог Госпо́дь: тропа́рь пра́здника два́жды.

Сла́ва, свята́го. И ны́не, пра́здника.

По 1-м стихосло́вии седа́лен, глас 2.

Подо́бен: Благоутро́бия су́щи:

Распе́ншуся Тебе́, Влады́ко Христе́,/ сме́рти держа́ва и кре́пость разруши́ся,/ и мучи́тельство попра́ся все вра́жие,/ и оживле́ни бы́хом, дре́вле уме́ршии дре́вом преступле́ния, Дре́вом кре́стным./ Тем пое́м Стра́сти Твоя́.

Сла́ва, и ны́не, то́йже.

По 2-м стихосло́вии седа́лен, глас 3.

Подо́бен: Красоте́ де́вства:

Крест и смерть пострада́ти изво́лил еси́,/ посреде́ тва́ри сего́ водрузи́в,/ егда́ благоволи́л еси́, Спа́се, Те́ло Твое́ пригвозди́ти,/ тогда́ и со́лнце лучи́ сокры́;/ сия́ и разбо́йник зря, на Кресте́ Тя воспе́, вопия́:/ помяни́ мя, Го́споди! И прия́т, ве́ровав, рай.

Сла́ва, и ны́не, то́йже.

Кано́н пра́здника со ирмосо́м на 6 и свята́го на 6.

Кано́н пра́здника, глас 8.

Песнь 1.

Ирмо́с: Крест начерта́в, Моисе́й/ впря́мо жезло́м Чермно́е пресече́,/ Изра́илю пешеходя́щу,/ то́же обра́тно фарао́новым колесни́цам,/ уда́рив, совокупи́,/ вопреки́ написа́в непобеди́мое ору́жие. // Тем Христу́ пои́м, Бо́гу на́шему, я́ко просла́вися.

О́браз дре́вле Моисе́й пречи́стыя Стра́сти в себе́ само́м прообрази́,/ свяще́нных среде́ стоя́:/ Крест же вообрази́в,/ просте́ртыми побе́ду дла́ньми воздви́же,/ держа́ву погуби́в Амали́ка всегуби́теля./ Тем Христу́ пои́м, Бо́гу на́шему, я́ко просла́вися.

Возложи́ Моисе́й на столпе́ врачевство́,/ тлетвори́ваго избавле́ние и ядови́таго угрызе́ния,/ и дре́ву о́бразом Креста́/ по земли́ пресмыка́ющагося зми́я привяза́,/ лука́вный в сем обличи́в вред./ Тем Христу́ пои́м, Бо́гу на́шему, я́ко просла́вися.

Показа́ не́бо Креста́ побе́ду благоче́стия держа́телю и царю́ богому́дру,/ враго́в в не́мже злосе́рдных низложи́ся свире́пство,/ лесть же преврати́ся,/ и ве́ра распростре́ся земны́м конце́м Боже́ственная./ Тем Христу́ пои́м, Бо́гу на́шему, я́ко просла́вися.

Ин кано́н свята́го, его́же краегране́сие: Побе́ды тя пою́ тезоимени́таго, Ники́ту. Творе́ние Феофа́ново. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Умертви́в пло́ти моея́ мудрова́ние,/ ум озари́ просвети́тельною све́тлостию,/ твое́ воспе́ти торжество́,/ я́ко победи́тель всеизя́щнейш, умоля́я, о Ники́то, Христа́.

Яд, от страсте́й бы́вший, отложи́в,/ ра́ны претерпе́л еси́ кре́пце/ и в ри́зу че́стну страда́льчески оде́ялся еси́,/ от твои́х крове́й истка́нную.

Нов же и чу́ден яви́л еси́ путь страда́ния,/ за ны на Дре́ве пригвозди́вся:/ нача́ло бо был еси́ му́чеников, Влады́ко,/ испове́дания и кре́пости.

Богоро́дичен: Дверь я́же к нам Твоего́, Го́споди, снизше́ствия,/ Восто́к, и Со́лнце, и Свет та́инственно Тя нарица́ем,/ преесте́ственно просия́,/ сугу́ба естество́м, Человеколю́бца.

Песнь 3

Ирмо́с: Жезл во о́браз та́йны приемлется,/ прозябе́нием бо предразсужда́ет свяще́нника,/ неплодя́щей же пре́жде Це́ркви,/ ны́не процвете́ Дре́во Креста́,// в держа́ву и утвержде́ние.

Я́ко испусти́, ударя́емь, во́ду краесеко́мый/ непокори́вым лю́дем и жестосе́рдым,/ богозва́нныя проявля́ше Це́ркве та́инство,/ ея́же Крест держа́ва и утвержде́ние.

Ре́бром пречи́стым, копие́м прободе́нным,/ вода́ с Кро́вию истече́,/ обновля́ющая Заве́т и омыва́тельная греха́:/ ве́рных бо Крест похвала́ и царе́й держа́ва и утвержде́ние.

Ин

Ирмо́с: Весели́тся о Тебе́ Це́рковь Твоя́, Христе́, зову́ще:/ Ты моя́ кре́пость, Го́споди,// и прибе́жище, и утвержде́ние.

Тве́рдостию души́ мучи́тельская преще́ния претерпе́л еси́,/ му́чениче Христо́в сла́вне,/ Боже́ственною си́лою возмога́емь.

Пло́ти твоей расточе́ния и уде́с отсече́ние претерпе́в,/ му́чениче Христо́в всехва́льне,/ твою́ ду́шу приобре́л еси́.

Весели́тся о тебе́ му́чеников Христо́вых собра́ние,/ па́мять твою́ днесь соверша́ему ви́дяще.

Богоро́дичен: Мари́е, чи́стое де́вства и честно́е селе́ние,/ лю́тыя стру́пы моего́ се́рдца исцели́.

Конда́к, глас 4. Самоподо́бен:

Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.

И́кос:

И́же до тре́тияго Небесе́ восхище́н бысть в рай/ и глаго́лы слы́шав неизрече́нныя и Боже́ственныя,/ и́хже не леть язы́ки (челове́ческими) глаго́лати,/ что Гала́том пи́шет, я́ко рачи́телие Писа́ний прочто́сте и позна́сте:/ мне, глаго́лет, хвали́тися да не бу́дет, то́кмо во еди́ном Кресте́ Госпо́дни,/ на не́мже, страда́в, уби́ стра́сти./ Того́ у́бо и мы изве́стно держи́м, Крест Госпо́день, хвалу́ вси:/ есть бо нам спаси́тельное сие́ Дре́во/ ору́жие ми́ра, непобеди́мая побе́да.

Седа́лен свята́го, глас 4.

Подо́бен: Вознесы́йся:

Непобеди́мь яви́вся во́ин, ва́рварския ко́зни победи́л еси́/ и, пострада́в, сла́вне, крепча́йше полк пора́товал еси́ неви́димых враго́в,/ тем и диади́му прия́л еси́ побе́ды,/ о нас моля́ся не преста́й, блаже́нне Ники́то, ве́рою пою́щих тя.

Сла́ва, и ны́не, пра́здника, глас то́йже:

Просте́р Моисе́й ру́це к высоте́ небе́сней,/ прообразова́ше Креста́ Боже́ственное ору́жие ве́рных,/ на не́мже Христо́с грехи́ пригвозди́./ Тем и враг пла́каше стра́стно, боле́знуя чу́вствы свои́ми, глаго́лаше:/ древяно́е мя копие́ прободе́ посреде́ се́рдца моего́./ Христо́с вся от а́дских уз реши́т.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Горькоро́дныя преложи́ дре́вом Моисе́й/ исто́чники в пусты́ни дре́вле,/ Кресто́м ко благоче́стию язы́ков/ проявля́я преложе́ние.

Глубине́ вне́дривый секу́щую/ издаде́ Иорда́н дре́ву,/ Кресто́м и креще́нием/ сече́ние ле́сти зна́менуя.

Свяще́нно ополча́ются/ четвероча́стнии лю́дие, предходя́ще/ о́бразом свиде́тельства ски́нии,/ крестообра́зными чи́нми прославля́еми.

Чу́дно простира́емь,/ солнечныя лучи́ испуща́ше Крест,/ и пове́даша небеса́/ сла́ву Бо́га на́шего.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Иску́плен Кро́вию Влады́чнею, страда́лец Ники́та/ свою́ кровь, ра́дуяся, прино́сит Христу́,/ те́мже, закала́емь,/ сла́ва Тебе́, Бо́же мой, вопия́ше.

Разжигаемь раче́нием Влады́чним,/ и́дольский, му́чениче, попра́л еси́ пла́мень/ и всю де́монскую кре́пость, зовы́й Созда́телю:/ сла́ва си́ле Твое́й, Го́споди.

Наслажда́яся Госпо́дним виде́нием/ и Того́ све́тлостию насыща́яся,/ му́ченик, стражда́, не ощуща́ше и, ра́дуяся, зва́ше:/ сла́ва си́ле Твое́й, Го́споди.

Богоро́дичен: Украша́емо разли́чным светоли́тием не́бо одушевле́нное Твое́,/ Царя́ ца́рствующих, Христе́,/ Де́ва Пречи́стая,/ ны́не я́ко Богоро́дица сла́вится.

Песнь 5

Ирмо́с: О треблаже́нное Дре́во,/ на не́мже распя́ся Христо́с, Царь и Госпо́дь,/ и́мже паде́ дре́вом прельсти́вый,/ тобо́ю прельсти́вся,/ Бо́гу пригвозди́вшуся Пло́тию,// подаю́щему мир душа́м на́шим.

Тебе́, приснопе́тое Дре́во, на не́мже простре́ся Христо́с,/ Еде́м храня́щее обраща́ющееся ору́жие, Кре́сте, устыде́ся:/ стра́шный же Херуви́м уступи́ на тебе́ пригвожде́нному Христу́,/ подаю́щему мир душа́м на́шим.

Подзе́мных си́лы проти́вныя Креста́ страша́тся/ начерта́ема зна́мения на возду́се,/ по нему́же хо́дят Небе́сных и земноро́дных ро́ди,/ коле́на преклоня́юще Христу́,/ подаю́щему мир душа́м на́шим.

Заря́ми нетле́нными я́влься Боже́ственный Крест/ омраче́нным язы́ком, заблужде́нным в пре́лести,/ Боже́ственный свет облиста́в,/ усвоя́ет на нем пригвожде́нному Христу́,/ подаю́щему мир душа́м на́шим.

Ин

Ирмо́с: Ты, Го́споди, мой Свет,/ в мир прише́л еси́,/ Свет Святый, обраща́яй из мра́чна неве́дения// ве́рою воспева́ющия Тя.

Кто мо́жет изрещи́ твои́х, Ники́то, натрижне́ний10, всехва́льне, венцы́,/ я́же дарова́ тебе́ Христо́с,/ за Него́ пострада́вшу?

Му́ченицы, на земли́ по́двиги сконча́вше,/ Небе́сное в высоча́йших от Тебе́, Жизнода́вче,/ воздая́ние прия́ша.

Ны́не сия́еши, я́ко свети́ло, о Ники́то всехва́льне,/ свет вторы́й быва́еши,/ Све́ту вели́кому сла́вно предстоя́.

Богоро́дичен: Свет безле́тный нам, подле́тен бывш,/ родила́ еси́, Богома́ти,/ су́щим во тьме жития́,/ и мир весь просвети́ла еси́.

Песнь 6

Ирмо́с: Во́днаго зве́ря во утро́бе/ дла́ни Ио́на крестови́дно распросте́р,/ спаси́тельную Страсть прообража́ше я́ве./ Тем, тридне́вен изше́д,/ преми́рное Воскресе́ние прописа́ше/ Пло́тию пригвожде́ннаго Христа́ Бо́га // и тридне́вным Воскресе́нием мир просве́щшаго.

Ста́ростию преклони́вся и неду́гом отягче́н, испра́вися Иа́ков, ру́це премени́в,/ де́йствие явля́я жизноно́снаго Креста́:/ и́бо ве́тхость зако́ннаго сено́внаго писа́ния новописа́ на сем Пло́тию пригвозди́выйся Бог/ и душегуби́тельный неду́г ле́сти отгна́.

На ю́ныя возложи́в дла́ни боже́ственный Изра́иль, крестови́дно главы́ явля́ше,/ я́ко старе́йшая сла́ва, законослужи́тели лю́дие./ Те́мже, подмне́вся та́ко испрельсти́тися, не измени́ жизноно́снаго о́браза:/ превзы́дут бо лю́дие Христо́вы Бо́жии новоутвержде́ннии,/ вопия́ху, Кресто́м огражда́еми.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Вожделе́в добро́ты Созда́вшаго, сла́вне,/ и отту́ду сия́ния прие́м, му́чениче,/ впери́лся еси́ и, о сме́рти небре́г,/ Тому́ приступи́л еси́.

Теку́щих по́мыслом прие́м целому́дренным,/ неистощи́мая, му́чениче, предче́ствовав,/ те́ло твое́ му́кам, о Ники́то,/ с весе́лием, ра́дуяся, преда́л еси́.

Богоро́дичен: Я́ко я́блоко в дубра́ве еди́ну Тя обре́т,/ и чисте́йший крин,/ и удо́льный цвет, о Богома́ти,/ Жени́х мы́сленный в Тя всели́ся.

Конда́к свята́го, глас 2.

Подо́бен: Вы́шних ища́:

Пре́лести посе́к держа́ву стоя́нием твои́м/ и побе́ды прии́м вене́ц во страда́льчествех твои́х,/ со А́нгелы, сла́вне, ра́дуешися,/ Ники́то тезоимени́те,// с ни́ми Христа́ Бо́га моля́ непреста́нно о всех нас.

И́кос:

Зна́ние Твое́ вложи́в души́ мое́й, очи́сти мой по́мысл/ и Твои́х за́поведей де́лателя, Спа́се, покажи́,/ да возмогу́ победи́ти страсте́й мои́х ра́зная привоста́ния,/ победи́тельную по́честь прие́м безстра́стия,/ моли́твами Твоего́ до́бляго страстоте́рпца Ники́ты, Человеколю́бче:/ и́бо сам нас воспомина́ти того́ в па́мяти его́ созва́,/ моля́ся непреста́нно о всех нас.

Песнь 7

Ирмо́с: Безу́мное веле́ние/ мучи́теля злочести́ваго лю́ди поколеба́,/ ды́шущее преще́ние и злохуле́ние богоме́рзкое;/ оба́че три о́троки не устраши́ я́рость зве́рская,/ ни огнь снеда́яй,/ но, противоды́шущу росоно́сному Ду́ху,/ со огне́м су́ще, поя́ху:// препе́тый отце́в и нас Бо́же, благослове́н еси́.

От дре́ва вкуси́в, пе́рвый в челове́цех в тле́ние всели́ся:/ отверже́нием бо жи́зни безче́стнейшим осуди́вся,/ всему́ ро́ду телотле́нен не́кий я́ко вред неду́га преподаде́;/ но, обре́тше, земноро́днии, воззва́ние кре́стным Дре́вом, зове́м:/ препе́тый отце́в и нас Бо́же, благослове́н еси́.

Разруши́ повеле́ние Бо́жие преслуша́ние,/ и дре́во принесе́ смерть челове́ком,/ е́же неблаговре́менно прича́стно бы́вшее;/ во утвержде́ние же зело́ честна́го/ отту́ду жи́зни дре́во возбраня́емо бе,/ е́же разбо́йнику злоуме́ршу отве́рзе, благоразу́мно зову́щу:/ препе́тый отце́в и нас Бо́же, благослове́н еси́.

Жезла́ объе́млет край Ио́сифова,/ бу́дущая зря, Изра́иль,/ Ца́рствия держа́вное,/ я́ко возыму́ществит пресла́вный Крест, проявля́я:/ сей бо царе́й победоно́сная хвала́ и свет ве́рою зову́щим:/ препе́тый отце́в и нас Бо́же, благослове́н еси́.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

Ны́не непристу́пною заре́ю осия́емь, му́чениче,/ пою́щия ны́не твой пра́здник све́том твои́м просвети́,/ благослове́н еси́, Бо́же мой, зовы́й, и Го́споди.

Преудиви́шася твоему́ му́жеству во́инства а́нгельская, блаже́нне,/ зря́ще терпели́вно стра́ждуща тя и глаго́люща:/ благослове́н еси́, Бо́же всех и Го́споди.

Богоро́дичен: С вы́шним ликостоя́нием безпло́тный:/ ра́дуйся, Богоро́дице Чи́стая, Гаврии́л, веселя́ся, зовя́ше Ти:/ благослове́нна Ты в жена́х еси́, Всенепоро́чная Влады́чице.

Песнь 8

Ирмо́с: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во,/ и огнь в ро́су претво́ршее,/ и превозноси́те всем жизнь подава́ющаго// Ду́ха Всесвята́го во ве́ки.

Возвыша́ему Дре́ву,/ окропле́ну Кро́вию вопло́щшагося Сло́ва Бо́га,/ по́йте, Небе́сныя Си́лы;/ земны́х воззва́ние пра́зднующе, лю́дие,/ поклони́теся Христо́ву Кресту́,/ и́мже ми́ру воста́ние во ве́ки.

Земноро́днии, дла́ньми, строи́телие благода́ти,/ Крест, на не́мже стоя́ше Христо́с Бог, возноси́те священноле́пно/ и копие́, Бо́жия Сло́ва Те́ло пробо́дшее,/ да ви́дят язы́цы вси спасе́ние Бо́жие,/ сла́вяще Его́ во ве́ки.

Боже́ственным судо́м предызбра́ннии, весели́теся,/ христиа́нстии ве́рнии ца́рие,/ хвали́теся победоно́сным ору́жием,/ прие́мше от Бо́га Крест честны́й:/ в сем бо коле́на бра́ней, де́рзости и́щуще,/ разсыпа́ются во ве́ки.

Ин

Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:// благослови́те, вся дела́ Госпо́дня, Го́спода.

Всеце́лу же́ртву и прия́тну тебе́ сама́го прине́сл еси́, му́чениче непобеди́ме,/ и всепло́дие был еси́ благово́нно Влады́це твоему́, распе́ншемуся нас ра́ди,/ с весе́лием вопия́:/ благослови́те, вся дела́ Госпо́дня, Го́спода.

Зако́нне, я́ко боже́ственный хра́брник, вра́жия полки́ низврати́в,/ досто́йне прия́л еси́ вене́ц побе́ды неувяда́ющий от жизноно́сныя Десни́цы,/ Е́йже ны́не предстои́ши, воспева́я:/ благослови́те, вся дела́ Госпо́дня, Го́спода.

Возлюби́л еси́ безме́рно Христа́ и Того́ Кро́ви твою́ кровь примеси́л еси́,/ и раздробля́емь ра́нами, и разли́чно убива́емь./ Ему́же и ны́не, я́ко подо́бник, сца́рствуеши, вопия́:/ благослови́те, вся дела́ Госпо́дня, Го́спода.

Богоро́дичен: Скве́рну естества́ на́шего,/ Христа́ ро́ждши Еди́наго Пречи́стаго,/ я́ве отмы́ла еси́, Чи́стая, Богоро́дице Всенепоро́чная,/ и Херуви́м и Серафи́м была́ еси́ превы́шше, вопию́щих:/ благослови́те, вся дела́ Госпо́дня, Го́спода.

Песнь 9

Ирмо́с: Та́ин еси́, Богоро́дице, рай,/ невозде́ланно возрасти́вший Христа́,/ Имже кре́стное живоно́сное на земли́ насади́ся Дре́во;/ тем, ны́не возноси́му,// покланя́ющеся Ему́, Тя велича́ем.

Да возра́дуются древа́ дубра́вная вся, освяти́вшуся естеству́ их,/ от Него́же изнача́ла насади́шася,/ Христу́ распросте́ршуся на Дре́ве;/ тем, ны́не возноси́му,/ покланя́ющеся Ему́, Тя велича́ем.

Свяще́нный воста́ рог/ и глава́ всем богому́дрым, Крест,/ и́мже гре́шных мы́сленно стира́ются ро́зи вси;/ тем, ны́не возноси́му,/ покланя́ющеся ему́, Тя велича́ем.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем.

Всего́ мене́ сама́го тебе́ приношу́, богоблаже́нне Ники́то,/ да обря́щу тя предста́теля ко Влады́це,/ спаса́ти могу́ща от вся́каго обстоя́ния,/ и спасе́ния Боже́ственнаго хода́тая.

Свиде́тель и́стинно был еси́ и́стины, страстоте́рпче,/ ипоста́сней и честне́й ны́не и́стине, ра́дуяся, предстои́ши,/ по́двигов натрижне́ния со дерзнове́нием прие́мля.

Ко приста́нищу ти́хому приста́в, почи́ от боле́зней/ и венцено́сец лику́еши в раи́ с му́ченики Христо́выми./ Тем тя ны́не, я́ко богопросла́вленна, вси досто́йно сла́вим.

Богоро́дичен: Зако́нов есте́ственных кроме́ Законода́вца ражда́еши,/ Плоть бы́вша невра́щно за благоутро́бие неизрече́нное,/ Благослове́нная Чи́стая,/ во двух существа́х познава́ема.

Свети́лен.

Подо́бен: Жены́, услы́шите:

Ору́жием честна́го Твоего́ Креста́ огради́вся,/ страстоте́рпец Твой, Сло́ве,/ проти́вныя си́лы кре́пко препобеди́,/ и мучи́тели посрами́, и за Тя пострада́,/ и с Тобо́ю, Христе́ мой, Всецарю́, Ники́та ца́рствует.

Сла́ва, и ныне, Креста́:

Крест возвыша́ется днесь, и мир освяща́ется,/ чи́ни а́нгельстии пою́т нас ра́ди Распе́ншагося,/ и торжеству́ют с на́ми, и сра́дуются, дави́дски зову́ще:/ соде́ла спасе́ние посреде́ земли́, Влады́ко.

На стихо́вне стихи́ры, глас 2.

Подо́бен: До́ме Евфра́фов:

Днесь Крест Христо́в/ возвыша́ется,/ живоно́сное Дре́во,/ на не́мже Пло́тию пригвозди́ся,/ вся призыва́я.

Стих: Возноси́те Го́спода Бо́га на́шего// и покланя́йтеся подно́жию но́гу Его́, я́ко свя́то есть.

Ра́дуйся, ве́рных/ хране́ние Боже́ственное,/ необори́мая стено́,/ Кре́сте Госпо́день,// и́мже от земли́ вознесо́хомся.

Стих: Бог же, Царь наш пре́жде ве́ка,// соде́ла спасе́ние посреде́ земли́.

Прииди́те ве́село,/ целу́ем вси/ живоно́сное Дре́во,/ на не́мже распростре́ся// Христо́с, Избавле́ние.

Сла́ва, свята́го, глас 6:

Днесь вселе́нная вся/ страстоте́рпца ра́дуется страда́нием,/ и Христо́ва Це́рковь, цве́ты украша́ема,/ му́чениче Христо́в, вопие́т ти:/ уго́дниче Христо́в и предста́телю тепле́йший,// не преста́й моля́ся о рабе́х твои́х.

И ны́не, глас то́йже:

Днесь сад жи́зни/ от земны́х незаходи́мых недр происхо́дит,/ на нем пригвожде́ннаго Христа́ известву́ет Воскресе́ние/ и, воздвиза́емый рука́ми свяще́нническими,/ Того́ на Небеса́ возвеща́ет возноше́ние,/ и́мже на́ше смеше́ние, от е́же на зе́млю паде́ния,/ на Небесе́х жи́тельствует./ Те́мже благода́рственне возопие́м:/ Го́споди, вознесы́йся на нем и тем совозне́с нас,/ Небе́сный Твоея́ ра́дости сподо́би,// я́ко Человеколю́бец.

На ЛИТУРГИ́И

Блаженны пра́здника, песнь 1-я, на 4, и свята́го, песнь 6-я, на 4. По вхо́де: Спаси́ ны, Сы́не Бо́жий, Пло́тию распны́йся, пою́щия Ти: аллилу́ия. Си́це пое́м и до отда́ния. Проки́мен пра́здника, и до отда́ния. И свята́го, глас 7: Возвесели́тся пра́ведник о Го́споде// и упова́ет на Него́. Стих: Услы́ши, Бо́же, глас мой: Апо́стол к Тимофе́ю, зача́ло 292. Аллилу́ия, глас 4: Пра́ведник, я́ко фи́никс, процвете́т: Стих: Насажде́ни в дому́ Госпо́дни, во дво́рех Бо́га на́шего. Ева́нгелие от Матфе́я, зача́ло 36. Прича́стен пра́здника, и до отда́ния. И свята́го: В па́мять ве́чную бу́дет пра́ведник:

Зри

Суббо́та по Воздви́жении. Апо́стол к Кори́нфяном, зача́ло 125, от полу́. Ева́нгелие от Иоа́нна, зача́ло 30.

Зри

Неде́ля по Воздви́жении. Проки́мен пра́здника. Апо́стол к Гала́том, зача́ло 203. Ева́нгелие от Ма́рка, зача́ло 37. Прича́стен дне и пра́здника.

Зри

Подоба́ет ве́дати: А́ще случи́тся Воздви́жение честна́го Креста́ в суббо́ту: Неде́ля по Воздви́жении: чте́тся апо́стол и Ева́нгелие на у́трии пра́здника, в Неде́лю. В сле́дующую же суббо́ту, во отда́ние пра́здника, апо́стол и Ева́нгелие пре́жде суббо́те по Воздви́жении и пото́м ряд.

Подоба́ет ве́дати, а́ще случи́тся попра́зднство Воздви́жения честна́го Креста́ в Неде́лю, а святы́й пое́тся на 4 или́ на 6. В суббо́ту на ма́лей вече́рни стихи́ры воскре́сны, и Богоро́дицы, по обы́чаю. Тропа́рь воскре́сен: Сла́ва, и ны́не, Богоро́дичен его́.

На вели́цей вече́рни, по обы́чной кафи́сме На Го́споди, воззва́х: стихи́ры воскре́сны 3, и Анато́лиева еди́на, и пра́здника 3, того́ дне, и свята́го мине́и 3. А́ще пое́тся святы́й на 6, или́ ему́же и полиеле́й, и пое́м стихи́ры воскре́сны 3, и пра́здника 3, и свята́го 4. Сла́ва, свята́го. И ны́не, Богоро́дичен догма́тик гла́са. На лити́и стихи́ры пра́здника того́ дне рядовы́я, стихо́вныя. Сла́ва, и ны́не, пра́здника, пи́сан на у́трени на стихо́вне. А́ще ли и́мать святы́й Сла́ву: Сла́ва, свята́го. И ны́не, пра́здника. На стихо́вне стихи́ры воскре́сны. Сла́ва, свята́го, а́ще есть. И ны́не, пра́здника. А́ще ли ни: Сла́ва, и ны́не, пра́здника. На благослове́нии хле́бов тропа́рь: Богоро́дице, Де́во: два́жды, и пра́здника, еди́ножды.

На у́трени: на Бог Госпо́дь: тропа́рь воскре́сен, два́жды: Сла́ва, свята́го, а́ще есть. И ны́не, пра́здника. А́ще ли ни: Сла́ва, и ны́не, пра́здника. По кафи́смах седа́льны воскре́сны, с Богоро́дичны их. И чте́ние во Ева́нгелии толково́м, Неде́ля по Воздви́жении. И непоро́чны с тропари́, ипакои́ гла́са. И чте́ние во Ева́нгелии толково́м, Неде́ля ряд. А́ще ли святы́й и́мать полиеле́й, по дву кафи́смах пое́м свята́го полиеле́й, и по полиеле́и тропари́: А́нгельский собо́р: и ипакои́ гла́са, и седа́льны свята́го вси, и чте́ние. Степе́нны, и проки́мен гла́са, и Вся́кое дыха́ние: Ева́нгелие воскре́сно, и стихи́ра воскре́сна, и про́чее воскре́сно. Кано́н воскре́сен со ирмосо́м на 4, и Богоро́дицы на два, и пра́здника на 4, и свята́го на 4. Катава́сия пра́здника. Аще и́мать святы́й полиеле́й или́ славосло́вие, и пое́м кано́н воскре́сен со ирмосо́м на 4, и пра́здника на 4, и свята́го на 6. По 3-й пе́сни конда́к и и́кос пра́здника, и свята́го, а́ще и́мать, и и́кос, и седа́лен свята́го. Сла́ва, и ны́не, пра́здника. И чте́ние. По 6-й пе́сни конда́к воскре́сен, и и́кос, и про́лог. На 9-й пе́сни пое́м Честне́йшую: Свети́лен воскре́сен. Сла́ва, свята́го, а́ще и́мать; а́ще ли ни: Сла́ва, и ны́не, пра́здника. На хвали́тех стихи́ры воскре́сны 4, и свята́го, а́ще и́мать, подо́бны 3, и самогла́сен, и́же на Сла́ву, пое́м с припе́вы его́. А́ще ли не и́мать святы́й хвали́тных, и пое́м стихи́ры воскре́сны 4, и пра́здника 4, того́ дне стихо́вныя у́трени, с припе́вы пра́здника. Сла́ва, стихи́ра ева́нгельская. И ны́не, Преблагослове́нна еси́: Славосло́вие вели́кое. И по Трисвято́м тропа́рь воскре́сен то́чию. Ектении́, и отпу́ст. И оглаше́ние, и обы́чное исхожде́ние в притво́р.

Та́же час 1-й. На 1-м часе́ тропа́рь воскре́сен. Сла́ва, пра́здника. И ны́не, Богоро́дичен часо́в. По О́тче наш: конда́к пра́здника. Та́кожде и в про́чия часы́, глаго́лем конда́к пра́здника и воскре́сен пременя́юще, а́ще полиеле́й, и свята́го.

На литурги́и: блаже́нны гла́са, на 6, и пра́здника песнь рядова́я, на 4. А́ще ли и́мать святы́й песнь, и блаже́нны воскре́сна, на 4, и пра́здника песнь рядова́я, на 4, и свята́го песнь 6-я, на 4. По вхо́де тропа́рь воскре́сен, и пра́здника, та́же хра́ма, и свята́го, а́ще и́мать. Сла́ва, конда́к свята́го. И ны́не, пра́здника. А́ще ли не и́мать святы́й тропаря́ и кондака́, конда́к воскре́сен. Сла́ва, хра́ма. И ны́не, пра́здника. Проки́мен, апо́стол, аллилу́ия и Ева́нгелие Неде́ли по Воздви́жении; та́же свята́го, а́ще и́мать, а́ще ли ни, ряд. А проки́мен гла́са оставля́ется. Прича́стен: Хвали́те Го́спода с Небе́с: Друго́й свята́го, а́ще и́мать; а́ще ли ни, пра́здника.

Святой великомученик Никита († 372), гот по происхождению, родился в IV в., когда христианская вера только начала распространяться за Дунаем. Готский епископ Феофил, принимавший участие в I Никейском Соборе, просветил светом веры и крестил одного из выдающихся и знатных людей той страны – Никиту.

В те времена происходили среди готов разделение и вражда: язычники-варвары, раздраженные распространением новой веры, стали преследовать последователей Христа. Одна часть готов объединилась вокруг гонителя христиан Афанариха, другая имела своим вождем некоего Фритигерна. Произошло сражение, во время которого Афанарих разбил Фритигерна, и тот был вынужден бежать в Грецию. Получив подкрепление от императора Валента (364–378), Фритигерн вернулся и выступил против своего соперника. Переходя через реку Дунай (ранее Истр), он приказал сделать изображение Креста и, нося его перед своими полками, одолел Афанариха, который едва спасся бегством с небольшой частью дружины. С тех пор христианская вера стала быстро распространяться, так как многие язычники уверовали в силу Креста, проявившуюся в сражении.

Преемник епископа Феофила, епископ Ульфила (311–383), был ученым мужем и ревностным проповедником. Он изобрел и составил для готов азбуку и перевел на готский язык много священных книг. Тогда же способствовал утверждению Христовой веры и святой Никита, который был в своем народе видным и знатным вождем. Он послужил делу Христову, убеждая варваров в истинности христианства и приводя их к крещению своим собственным примером.

Спустя некоторое время Афанарих вернулся на родину с намерением отомстить христианам за свое поражение и начал преследовать их в своей области и предавать мучениям. Тогда святой Никита оказал Афанариху открытое сопротивление, обличая его в жестокости и бесчеловечности по отношению к своим единоплеменникам. Схватив святого Никиту, Афанарих различными муками принуждал его отречься от Христа, но не мог победить непреклонной твердости святого, бестрепетно переносившего все истязания за Христа Спасителя. После пыток Афанарих приговорил святого Никиту к сожжению. Мученик был брошен в огонь и там предал свою душу Богу.

Тело святого осталось не поврежденным огнем, но Афанарих запретил предавать его погребению. Друг святого Никиты – христианин Мариан из города Мопсуестии (Киликия), тайно темной и дождливой ночью отправился искать тело мученика. Господь послал ему помощь – небесная звезда засияла над местом, где лежало тело святого Никиты. Обвив тело пеленами, Мариан унес его в свой дом и, уезжая на родину, увез с собой мощи святого. Бог послал благословение Мариану, и дом его пребывал в благополучии. Весь город собирался к дому Мариана, так как от мощей святого Никиты подавались исцеления больным. Дом Мариана не мог вместить огромное количество стекавшегося народа, поэтому решили соорудить храм во имя святого мученика Никиты и, когда он был построен, туда перенесли святые мощи. Впоследствии мощи святого Никиты были перенесены в Константинополь.

* * *

10

Натрижне́ний – трудов, подвигов; наград за подвиг.


Источник: Минея. - М. : Издат. совет Русской Православной Церкви, 2002-. 12 том. / Сентябрь. А. - 2003. – 924 с. ISBN 5-94625-051-5

Комментарии для сайта Cackle