Месяца сентября в 26-й день
Святаго апостола и евангелиста Иоанна Богослова
На малей вечерни
На Го́споди воззва́х, стихиры: глас 2.
Подобен: Егда́ от Дре́ва:
Прииди́те, прему́дрости глубину́ / и правосла́вных догма́тов списа́теля, / ве́рнии, пе́сньми боже́ственными днесь венча́им, / Иоа́нна сла́внаго и возлю́бленнаго, / сей бо возгреме́, е́же в нача́ле бе Сло́во. / Отону́дуже громогла́сен показа́ся, / я́ко благове́стие ми́ру просия́в, / многому́дренне, приснопа́мятный. [Дважды.]
Вои́стинну ты яви́лся еси́ и́стинен друг, / напе́рсник вели́к Учи́телю Христу́. / На пе́рси бо возле́г, / отону́дуже поче́рпл еси́ прему́дрости догма́ты, / и́миже обогаща́еши о́крест всю зе́млю, / я́ко богоглаго́льник Бо́жий. / Те́мже и содержа́щи сия́, / кра́сная Христо́ва Це́рковь / ны́не ра́дующися весели́тся.
Ра́дуйся, Богосло́ве, и́стинно, / ра́дуйся, Ма́тере Госпо́дни сы́не вселюбе́зне, / ты бо предстоя́ при Кресте́ Христо́ве, / Боже́ственный слы́шал еси́ глас Влады́ки: / се ны́не Ма́ти твоя́, / к тебе́ возопи́вшаго. / Отону́дуже досто́йно тя вси, / я́ко апо́стола Христо́ва вели́каго и возлю́бленнаго, / ублажа́ем.
Слава, глас 2. Самогласен: Апо́столов верх, богосло́вия трубу́, / духо́внаго воево́ду, вселе́нную Бо́гу покори́вшаго, / прииди́те, ве́рнии, ублажи́м Иоа́нна приснопа́мятнаго, / от земли́ преселя́ющагося и земли́ не отступа́ющаго, / но живу́ща и жду́ща стра́шное Влады́ки Второ́е Прише́ствие, / е́же неосужде́нно сре́сти нам испроси́, / люби́миче, таи́нниче, Христо́в напе́рсниче, / любо́вию соверша́ющим па́мять твою́.
И ныне, Богородичен.
На стиховне стихиры, глас 1.
Подобен: Всехва́льнии му́ченицы:
Богосло́ве сла́вне, / твои́ми боже́ственными уче́нии / и чуде́с явле́ньми / пре́лести отгна́л еси́ мглу всю / и лю́ди просвети́л еси́ / к зна́нию и́стинныя ве́ры. / И ны́не моли́ дарова́ти душа́м на́шим мир / и ве́лию ми́лость.
Стих: Во всю зе́млю изы́де веща́ние их / и в концы́ вселе́нныя глаго́лы их.
Иоа́нне всему́дре, / Христо́в люби́миче при́сный, / к пло́ти любве́ мя избавля́я, / Влады́це всех, боже́ственными твои́ми мольба́ми водружи́, / де́тельми благоче́стия, / и моли́ся пода́ти ми / оставле́ние прегреше́ний / и ве́лию ми́лость.
Стих: Небеса́ пове́дают сла́ву Бо́жию, / творе́ние же руку́ Его́ возвеща́ет твердь.
Богови́дче всесвяще́нне, / страсте́й и бед изба́ви / и от неду́г и скорбе́й благохва́лящия тя, / и почита́ющия любо́вию, / и ве́рно притека́ющия, / и к покро́ву твоему́ боже́ственному приходя́щия / и умоли́ дарова́ти душа́м на́шим мир / и ве́лию ми́лость.
Слава, глас 2: Богосло́ве де́вственниче, / учениче́ возлю́бленне Спа́сов, / моли́твами твои́ми нас спаса́й, мо́лимся, от вся́каго вре́да, / я́ко твое́ есмы́ ста́до.
И ныне, Богородичен: Все упова́ние мое́ на Тя возлага́ю, / Ма́ти Бо́жия, / сохрани́ мя под кро́вом Твои́м.
Тропарь, глас 2:
Апо́столе, Христу́ Бо́гу возлю́бленне, / ускори́ изба́вити лю́ди безотве́тны: / прие́млет тя припа́дающа / И́же па́дша на пе́рси Прие́мый. / Его́же моли́, Богосло́ве, / и належа́щую мглу язы́ков разгна́ти, / прося́ нам ми́ра и ве́лия ми́лости.
Слава, и ныне, Богородичен воскресен: Вся па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго; / Того́ моли́ спасти́ся душа́м на́шим.
На велицей вечерни
Стихологисуем, Блаже́н муж, первый антифон.
На Го́споди воззва́х: стихиры на 8, глас 1.
Подобен: Небе́сных чино́в:
Зри́тель неизрече́нных открове́ний / и сказа́тель вы́шних Бо́жиих тайн, / сын Зеведе́ев, / написа́в нам Христо́во Ева́нгелие, / богосло́вити Отца́ и Сы́на и Ду́ха Свята́го, / научи́л есть. [Трижды.]
Богодви́жимая цевни́ца Небе́сных пе́ний, / тайнопи́сец сый, / богосказа́нная уста́, пе́ние пе́сней пое́т красно́, / устне́ бо движа́, я́ко стру́ны, / я́коже бряца́ло язы́к движа́, / мо́лится спасти́ся нам. [Трижды.]
Громогла́сным твои́м язы́ком / извеща́я Бо́жия му́дрости / сокрове́нное сло́во, Бо́гу возлю́бленне, / зове́ши при́сно, движа́ устна́ми ча́сто, / е́же в нача́ле бе Сло́во. / И науча́еши вся́каго челове́ка к зна́нию Бо́га. [Дважды.]
Слава, глас 2. Самогласен: Сы́на гро́мова, основа́ние Боже́ственных слове́с, / нача́льника богосло́вия / и пропове́дника пе́рвейшаго и́стины догма́тов Бо́жия му́дрости, / возлю́бленнаго Иоа́нна и де́вственника, / челове́ческий род по до́лгу благопохва́лим: / сей бо непреста́нно в себе́ име́я Боже́ственное, / е́же в нача́ле бе, рече́, Сло́во, / а́бие же ко Отцу́ неразлу́чное, / и ра́вное по сих О́тча Существа́, / показу́я нам Собо́ю правосла́вие Святы́я Тро́ицы: / Соде́теля же су́ща со Отце́м и жизнь нося́ща, / и Свет И́стинный Того́жде показа́ нам. / О чудесе́ ужа́снаго и ве́щи мудри́тельныя! / Я́ко полн сый любве́, / полн бысть и богосло́вия, / сла́вою, и че́стию, и ве́рою / основа́тель сый чи́стыя на́шея ве́ры, / ея́же ра́ди получи́м ве́чная блага́я в День Су́дный.
И ныне, Богородичен: Пре́йде сень зако́нная, / благода́ти прише́дши, / я́коже бо купина́ не сгара́ше опаля́ема, / та́ко Де́ва родила́ еси́ / и Де́ва пребыла́ еси́. / Вме́сто столпа́ о́гненнаго, / пра́ведное возсия́ Со́лнце: / вме́сто Моисе́я, Христо́с, / Спасе́ние душ на́ших.
Вход. Прокимен дне. Чтения три.
Соборнаго послания Иоаннова чтение
Возлю́бленнии, а́ще се́рдце на́ше не за́зрит нам, дерзнове́ние и́мамы к Бо́гу. И Его́же а́ще про́сим, прие́млем от Него́: я́ко за́поведи Его́ соблюда́ем и уго́дная пред Ним твори́м. И сия́ есть за́поведь Его́, да ве́руем во и́мя Сы́на Его́, Иису́са Христа́, и лю́бим друг дру́га, я́коже дал есть за́поведь нам. И соблюда́яй за́поведи Его́ в Нем пребыва́ет, и Той в нем, и о сем разуме́ем, я́ко пребыва́ет в нас, от Ду́ха, Его́же дал есть нам. Возлю́бленнии, не вся́кому ду́ху ве́руйте, но искуша́йте ду́хи, а́ще от Бо́га суть, я́ко мно́зи лжепроро́цы изыдо́ша в мир. О сем познава́йте ду́ха Бо́жия и ду́ха ле́стча. Всяк дух, и́же испове́дует Иису́са Христа́, во пло́ти прише́дша, от Бо́га есть. И всяк дух, и́же не испове́дует Иису́са Христа́, во пло́ти прише́дша, от Бо́га несть, и сей есть анти́христов, его́же слы́шасте, я́ко гряде́т, и ны́не в ми́ре есть уже́. Вы от Бо́га есте́, ча́дца, и победи́сте тех, я́ко бо́лий есть, И́же в вас, не́жели и́же в ми́ре. Они́ от ми́ра суть, се́го ра́ди от ми́ра глаго́лют, и мир тех послу́шает. Мы от Бо́га есмы́, и́же зна́ет Бо́га, послу́шает нас и и́же несть от Бо́га, не послу́шает нас.
Соборнаго послания Иоаннова чтение
Возлю́бленнии, а́ще си́це возлюбил есть нас Бог, и мы до́лжни есмы́ друг дру́га люби́ти. Бо́га никто́же нигде́же ви́де. А́ще друг дру́га лю́бим, Бог в нас пребыва́ет и любы́ Его́ соверше́нна есть в нас. О сем разуме́ем, я́ко в Нем пребыва́ем и Той в нас, я́ко от Ду́ха Своего́ дал есть нам. И мы ви́дехом и свиде́тельствуем, я́ко Оте́ц посла́ Сы́на Спаси́теля ми́ру. И́же а́ще испове́сть, я́ко Иису́с есть Сын Бо́жий, Бог в нем пребыва́ет и той в Бо́зе. И мы позна́хом и ве́ровахом, любо́вь ю́же и́мать Бог в нас. Бог Любы́ есть, и пребыва́яй в любви́ в Бо́зе пребыва́ет, и Бог в нем пребыва́ет.
Соборнаго послания Иоаннова чтение
Возлю́бленнии, а́ще кто рече́т, я́ко люблю́ Бо́га, а бра́та своего́ ненави́дит, лож есть, и́бо не любя́й бра́та своего́, его́же ви́де, Бо́га, Его́же не ви́де, ка́ко мо́жет люби́ти? И сию́ за́поведь и́мамы от Него́, да любя́й Бо́га, лю́бит и бра́та своего́. Всяк ве́руяй, я́ко Иису́с есть Христо́с, от Бо́га рожде́н есть; и всяк, любя́й Ро́ждшаго, лю́бит и Рожде́ннаго из Него́. О сем ве́мы, я́ко лю́бим ча́да Бо́жия, егда́ Бо́га лю́бим, и за́поведи Его́ соблюда́ем. Сия́ бо есть любы́ Бо́жия, да за́поведи Его́ соблюда́ем, и за́поведи Его́ тя́жки не суть. Я́ко всяк рожде́нный от Бо́га побежда́ет мир, и сия́ есть побе́да побе́ждшая мир, ве́ра на́ша. Кто есть побежда́яй мир? То́кмо ве́руяй, я́ко Иису́с есть Сын Бо́жий?
На литии стихира храма.
Таже апостола. Глас 1
Германово: Ре́ки богосло́вия из честны́х твои́х уст / истеко́ша, Апо́столе, / из ни́хже Це́рковь Бо́жия напая́ема, / покланя́ется правосла́вно Тро́ице Единосу́щней, / Ю́же и ны́не моли́, Иоа́нне Богосло́ве, / утверди́ти и спасти́ ду́ши на́ша.
Андрея Пирра: Сад чистоты́, ми́ро благово́ния / па́ки возсия́ нам в прису́щем пра́зднице, / возопи́ти к нему́: / возлеги́й на пе́рси Влады́чня / и одожди́ в сло́во ми́ру, Иоа́нне Апо́столе, / Де́ву сохрани́вый, я́ко зе́ницу о́ка, / испроси́ нам от Христа́ ве́лию ми́лость.
Учениче́ Спа́сов, / де́вственниче и богосло́ве, / тебе́, я́ко де́вственнику, / Де́ву и Богоро́дицу, / Христо́с Бог распина́емь предаде́, / и Сию́ сохрани́л еси́ я́ко зе́ницу о́ка. / Тем моли́ спасти́ся душа́м на́шим.
Я́ко неизрече́нных та́ин самови́дец, / воззва́л еси́, вопия́, / Преве́чное Сло́во в нача́ле бы́ти к Бо́гу / и Того́ бы́ти Бо́га, / Иоа́нне Апо́столе, / напе́рсниче Христо́в и дру́же при́сный, / Тро́ицы сла́досте, / Ефе́са и Па́тма утвержде́ние непоколеби́мо, / на́ша же по́мощь, / моли́ся, Богосло́ве всеблаже́нне, / от злочести́вых враго́в, чу́вственных и мы́сленных, / изба́витися лю́дем, / па́мять твою́ при́сно соверша́ющим ве́рно.
Слава, глас 4: Возле́г на пе́рси Учи́теля Христа́ / на ве́чери Госпо́дни, возлю́бленне учениче́, / отту́ду позна́л еси́ неизрече́нная / и Небе́сный всем возгреме́л еси́ глас: / в нача́ле бе Сло́во, / и Сло́во бе к Бо́гу, / и Бог бе Сло́во, / Свет И́стинный, просвеща́яй вся́каго челове́ка в мир гряду́щаго, / Христо́с Бог и Спас душ на́ших.
И ныне, Богородичен, глас тойже: Со Отце́м и Ду́хом славосло́вимый Сын, / в вы́шних от Херуви́мов, / первозда́ннаго назда́ти хотя́й, / всего́ Себе́ Сама́го истощи́ неизрече́нно / во утро́бе Твое́й, Богоро́дице Всепе́тая, / и из Тебе́ возсия́в, просвети́ весь мир Божество́м, / избавля́я идолонеи́стовства, / и в Себе́ обожи́в, / на Небеса́ возведе́ челове́чество, / Христо́с Бог и Спас душ на́ших.
На стиховне стихиры, глас 4.
Подобен: Зва́нный свы́ше:
Сы́на Вы́шняго богосло́вив, / Отцу́ соприсносу́щна / и Единосу́щественна, / Свет из Све́та непреме́нен / и начерта́ние Ипоста́си Роди́телевы, / безле́тно возсия́вша и безстра́стно из Него́, / Соде́теля же и Го́спода всех веко́в, / возлю́бленне, ты пропове́дал еси́ Сего́ ми́ру, / я́ко изве́дша свет из тьмы, / Христа́ Бо́га на́шего, / Его́же моли́ / спасти́ и просвети́ти ду́ши на́ша.
Стих: Во всю зе́млю изы́де веща́ние их / и в концы́ вселе́нныя глаго́лы их.
Уте́шителев свет восприе́м, / И́мже и просвеща́емь, богосло́вил еси́ / от Отца́ происходя́щаго, / чрез Сы́на же челове́честву явля́ема, / Единоче́стна, Сопресто́льна и Единосу́щна / су́ща Отцу́ Безнача́льному же и Бо́жию Сло́ву, / возлю́бленне, всем пропове́дал еси́. / Те́мже в пе́снех Тя почита́ем, / я́ко ве́ры боже́ственное основа́ние, / ю́же незы́бленну соблюда́й / ко Го́споду моли́твами твои́ми.
Стих: Небеса́ пове́дают сла́ву Бо́жию, / творе́ние же руку́ Его́ возвеща́ет твердь.
На высоту́ возше́д богосло́вия, / научи́лся еси́ неизрече́нным Бо́жиим та́йнам / о еди́ном Существе́ Божества́, / Сла́ве же еди́ной, / и Ца́рстве, и Госпо́дстве, / тре́ми Ипоста́сьми разделя́емем при́сно, / су́щественно неразде́льнем и соедине́ннем / в неслия́нном Боже́ственном Еди́нстве; / си́це сла́вя, пропове́дал еси́, Богосло́ве, / Тро́ицу Неразде́льну, / Ю́же моли́ / спасти́ и просвети́ти ду́ши на́ша.
Слава, глас 6. Иоанна монаха: Апо́столе Христо́в, евангели́сте Богосло́ве, / неизрече́нных таи́нник быв, / прему́дрости неизглаго́ланная нам возгреме́л еси́ уче́ния, / Е́же в нача́ле бе, уясни́в ве́рным / и е́же не бе, отложи́в, / ерети́чествующих отрева́я словеса́, / напе́рсник яви́вся и друг возлю́блен; / я́коже Иса́ия велегла́снейший / и Моисе́й Богови́дец, / дерзнове́ние име́я к Бо́гу, / приле́жно моли́ся о душа́х на́ших.
И ныне, Богородичен, глас тойже: Творе́ц и Изба́витель мой, Пречи́стая, / Христо́с Госпо́дь из Твои́х ложе́сн проше́д, / в мя Оболки́йся, / пе́рвыя кля́твы Ада́ма свободи́. / Те́мже Ти, Всечи́стая, / я́ко Бо́жии Ма́тери же и Де́ве, / вои́стинну вопие́м немо́лчно: / ра́дуйся А́нгельски, ра́дуйся, Влады́чице, / Предста́тельство и Покро́ве, / и Спасе́ние душ на́ших.
На благословении хлебов
тропарь святаго дважды, глас 2:
Апо́столе, Христу́ Бо́гу возлю́бленне, / ускори́ изба́вити лю́ди безотве́тны: / прие́млет тя припа́дающа / И́же па́дша на пе́рси Прие́мый. / Его́же моли́, Богосло́ве, / и належа́щую мглу язы́ков разгна́ти, / прося́ нам ми́ра и ве́лия ми́лости.
И Богоро́дице Де́во: и чтение.
На утрени
На Бог Госпо́дь:
тропарь святаго дважды, глас 2:
Апо́столе, Христу́ Бо́гу возлю́бленне, / ускори́ изба́вити лю́ди безотве́тны: / прие́млет тя припа́дающа / И́же па́дша на пе́рси Прие́мый. / Его́же моли́, Богосло́ве, / и належа́щую мглу язы́ков разгна́ти, / прося́ нам ми́ра и ве́лия ми́лости.
Слава, и ныне, Богородичен: Вся па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго; / Того́ моли́ спасти́ся душа́м на́шим.
По 1-м стихословии седален, глас 8.
Подобен: Прему́дрости:
Ты сын назва́лся еси́ Боже́ственнаго гро́ма, / во е́же оглуши́ти ушеса́ злочести́вых, / и трубы́ сладча́е возгласи́в, о всему́дре, в пра́вая сердца́ Сло́ва воплоще́ния, / и я́ко и́скренний друг, на пе́рси возле́гл еси́, / отону́дуже поче́рп ра́зума явле́ние, / всем пропове́дал еси́ Отцу́ Собезнача́льнаго, Иоа́нне Апо́столе, / моли́ся Христу́ Бо́гу прегреше́ний оставле́ние дарова́ти / пра́зднующим любо́вию святу́ю па́мять твою́. [Дважды.]
Слава, и ныне, Богородичен: Прему́дрость и Сло́во в Твое́м чре́ве заче́нши неопа́льно, Ма́ти Бо́жия, / ми́ру родила́ еси́ мир Содержа́щаго / и в объя́тиих име́ла еси́ вся Содержа́щаго, / Пищеда́теля всех и Творца́ тва́ри. / Те́мже молю́ Тя, Всесвята́я Де́во, и ве́рою сла́влю Тя, / изба́витися мне прегреше́ний, / и в День Суда́, егда́ предста́ти и́мам пред Лице́м Созда́теля моего́, / Влады́чице Де́во Чи́стая, Твою́ по́мощь тогда́ пода́ждь ми, / вся бо мо́жеши, ели́ка хо́щеши, Всепе́тая.
По 2-м стихословии седален, глас 8.
Подобен: Прему́дрости:
Глубину́ ловле́ния оста́вив, / Креста́ тро́стию вся я́ве в ве́ре улови́л еси́, я́ко ры́бы, язы́ки, / и́бо, я́коже тебе́ рече́ Христо́с, / показа́лся еси́ лове́ц челове́ков, к благоче́стию уловля́я. / Те́мже насе́ял еси́ и Сло́ва ра́зум во всем Па́тме, / и Ефе́с приобре́л еси́ слове́сы твои́ми, Богосло́ве Апо́столе, / моли́ Христа́ Бо́га прегреше́ний оставле́ние дарова́ти / пра́зднующим любо́вию святу́ю па́мять твою́. [Дважды.]
Слава, и ныне, Богородичен: Пречи́стая Де́во Ма́ти Бо́жия, / ду́ши моея страсти лютыя исцели, молю́ся: / и прощение даруй мне моих прегреше́ний, яже безумне содеях, / ду́шу и тело оскверних окаянный. / Увы мне, что сотворю в час оный, / внегда А́нгели ду́шу мою́ разлучат от страстнаго моего́ телесе? / Тогда Помощница мне буди и Предстательница теплейшая: / Тя бо и́мам надежду, раб Твой.
Величание:
Велича́ем тя, / Апо́столе Христо́в и Евангели́сте Иоа́нне Богосло́ве, / и чтим боле́зни и труды́ твоя́, / и́миже труди́лся еси́ / во благове́стии Христо́ве.
Псалом избранный
Лик 1: Небеса́ пове́дают сла́ву Бо́жию, творе́ние же руку́ Его́ возвеща́ет твердь. 2: Испове́дят Небеса́ чудеса́ Твоя́, Го́споди. 1: Вме́сто оте́ц Твои́х бы́ша сы́нове Твои́. 2: Поста́виши я́ кня́зи по всей земли́. 1: Бог бого́в Госпо́дь глаго́ла и призва́ зе́млю. 2: От восто́к со́лнца до за́пад хва́льно И́мя Госпо́дне. 1: Освети́ша мо́лния Его́ вселе́нную, 2: возвести́ша Небеса́ пра́вду Его́, 1: и ви́деша вси лю́дие сла́ву Его́. 2: Кня́зи Иу́довы влады́ки их. 1: Воцари́ся Бог над язы́ки. 2: Бог прославля́емь в сове́те святы́х. 1: Ве́лий и стра́шен есть над все́ми окре́стными Его́. 2: Рцы́ те во язы́цех, я́ко Госпо́дь воцари́ся. 1: Возвести́те во язы́цех сла́ву Его́, во всех лю́дех чудеса́ Его́. 2: Во всю зе́млю изы́де веща́ние их, 1: и в концы́ вселе́нныя глаго́лы их. 2: Покори́ лю́ди нам и язы́ки под но́ги на́ша. 1: Ве́лий Госпо́дь наш и ве́лия кре́пость Его́. 2: Той даст си́лу и держа́ву лю́дем Свои́м: благослове́н Бог.
Сла́ва, и ны́не: Аллилу́иа, трижды.
По полиелеи седален, глас 8.
Подобен: Прему́дрости:
Возле́г на пе́рси Иису́совы, дерзнове́ние получи́л еси́, / я́ко учени́к вопроша́я: кто есть преда́тель Твой, Го́споди? / И, я́ко возлю́блену зело́ су́щу, всехва́льне, хле́бом сего́ я́ве тебе́ показа́. / Те́мже, я́ко таи́нник неизрече́нных быв, / Сло́ва Воплоще́ния науча́еши концы́. Богосло́ве Апо́столе, / моли́ Христа́ Бо́га, согреше́ний оставле́ние дарова́ти / пра́зднующим любо́вию святу́ю па́мять твою́. [Дважды.]
Слава, и ныне, Богородичен: Небе́сную дверь и киво́т, всесвяту́ю го́ру, / све́тлый о́блак воспои́м, неопали́мую купину́, слове́сный рай, / Е́вы воззва́ние, вселе́нныя всея́ вели́кое сокро́вище, / я́ко спасе́ние в Ней соде́лася ми́ру и оставле́ние дре́вних согреше́ний. / Сего́ ра́ди вопие́м Ей: / моли́ся Сы́ну Твоему́ прегреше́ний оставле́ние дарова́ти / благоче́стно покланя́ющимся всесвято́му Рождеству́ Твоему́.
Степенна, 1-й антифон 4-го гласа:
От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.
Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.
Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.
Прокимен, глас 4:
Во всю зе́млю изы́де веща́ние их / и в концы́ вселе́нныя глаго́лы их. Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.
Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.
Евангелие от Иоанна, зачало 67
Во вре́мя о́но, яви́ся Иису́с ученико́м Свои́м, воста́в от ме́ртвых. И глаго́ла Си́мону Петру́: Си́моне Ио́нин, лю́биши ли Мя па́че сих? Глаго́ла Ему́: ей, Го́споди, Ты ве́си, я́ко люблю́ Тя. Глаго́ла ему́: паси́ а́гнцы Моя́. Глаго́ла ему́ па́ки второ́е: Си́моне Ио́нин, лю́биши ли Мя? Глаго́ла ему́: ей, Го́споди, Ты ве́си, я́ко люблю́ Тя. Глаго́ла ему́: паси́ о́вцы Моя́. Глаго́ла ему́ тре́тие: Си́моне Ио́нин, лю́биши ли Мя? Оскорбе́ же Петр, я́ко рече́ ему́ тре́тие, лю́биши ли Мя; и глаго́ла Ему́: Го́споди, Ты вся ве́си, Ты ве́си, я́ко люблю́ Тя. Глаго́ла ему́ Иису́с: паси́ о́вцы Моя́. Ами́нь, ами́нь, глаго́лю тебе́, егда́ бе юн, поя́сашеся сам, и хожда́ше, а́може хотя́ше, егда́ же состаре́ешися и возде́жеши ру́це твои́, и ин тя поя́шет, и веде́т, а́може не хо́щеши. Сие́ же рече́, назна́менуя, ко́ею сме́ртию просла́вит Бо́га. И сия́ рек, глаго́ла ему́: иди́ по Мне. Обра́щься же Петр, ви́де ученика́, его́же любля́ше Иису́с, во след иду́ща, и́же и возлеже́ на ве́чери на пе́рси Его́, и рече́: Го́споди, кто есть предая́й Тя? Сего́ ви́дев Петр, глаго́ла Иису́сови: Го́споди, сей же что? Глаго́ла ему́ Иису́с: а́ще хощу́, да той пребыва́ет, до́ндеже прииду́, что к тебе́? Ты по Мне гряди́. Изы́де же сло́во се в бра́тию, я́ко учени́к той не у́мрет; и не рече́ ему́ Иису́с, я́ко не у́мрет, но а́ще хощу́ тому́ пребыва́ти, до́ндеже прииду́, что к тебе́? Сей есть учени́к свиде́тельствуяй о сих, и́же и написа́ сия́, и вем, я́ко и́стинно есть свиде́тельство его́. Суть же и и́на мно́га, я́же сотвори́ Иису́с, я́же а́ще по еди́ному пи́сана быва́ют, ни самому́ мню всему́ ми́ру вмести́ти пи́шемых книг. Ами́нь.
По 50-м псалме
Слава: Моли́твами Апо́стола и Евангели́ста Иоа́нна Богосло́ва, / Ми́лостиве, очи́сти / мно́жества согреше́ний на́ших.
И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.
Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.
И стихира, глас 2:
Богосло́ве де́вственниче, / учениче́ возлю́бленне Спа́сов, / моли́твами твои́ми нас спаса́й, мо́лимся, от вся́каго вреда, / я́ко твое́ есмы́ ста́до.
Канон Богородицы со ирмосом на 6, и Апостола оба канона на 8.
Канон Богородицы, глас 2.
Песнь 1
Ирмос: Во глубине́ постла́ иногда́ / фараони́тское всево́инство преоруже́нная си́ла, / вопло́щшееся же Сло́во всезло́бный грех потреби́ло есть, / препросла́вленный Госпо́дь, / сла́вно бо просла́вися.
Я́ко кра́сную, я́ко предо́брую всю, / я́ко непоро́чную в жена́х, / Бог Тя избра́в, во утро́бу Твою́ всели́ся непоро́чную, / Его́же моли́, Всенепоро́чная, поро́ка грехо́в изба́вити вся пою́щия Тя.
Псало́мски, Чи́стая, одесну́ю, я́коже Цари́ца, / от Твоея́ утро́бы возсия́вшаго Царя́ предста́ла еси́, / Его́же моли́, Всенепоро́чная, / да десна́го предста́теля пока́жет мя в день воздая́ния, Богоневе́сто.
Пресо́хшее естество́ челове́ческое вся́кими безме́стии, / Ро́ждшая Дождь Небе́сный, вся обнови́ла еси́; / но молю́ся: и души́ моея́ бразду́ изсо́хшую / покажи́ плодоно́сну, Богоневе́сто.
Умертви́вшеся са́дом ра́зума, / Дре́вом же Жи́зни, Чи́стая, к жи́зни ве́чной призва́ни бы́хом, / от Тебе́, Богоро́дице, процве́тшим па́че смы́сла Христо́м Бо́гом, / Его́же со дерзнове́нием моли́ спасти́ся душа́м на́шим.
Канон апостола, егоже краегранесие:
Сы́на гро́мoва христокра́сно пою́.
Феофаново. Глас 2.
Песнь 1. Ирмос тойже:
Ца́рство Небе́сное, блаже́нне, е́же пропове́дал еси́, восприи́м / и Сло́ву собесе́дник быв Небе́сному, / ве́рующия честно́му твоему́ пропове́данию и богосло́вию / твои́ми моли́твами сохрани́.
Кре́пок смысл явля́я, / о всех небре́гл еси́ су́щих на земли́ и уз естества́ / и Сло́ву, всему́дре, слове́сне же и у́мне сопребыва́я, / от безслове́сия безслове́сне живу́щия свободи́л еси́.
Небе́сных ра́зум прии́м богослове́снейше, / Бо́га Сло́ва пропове́дал еси́: / в нача́ле бе Сло́во, и Сло́во бе к Своему́ Роди́телю, и Бог бе Сло́во, / благовеству́я научи́л еси́.
Богородичен: Отрокови́ц боже́ственных лик, / боже́ственнейше в жена́х Тя до́брую воспева́ют, / Богоро́дице Влады́чице, добро́тами укра́шену Божества́, / добротвори́тельное бо Сло́во па́че сло́ва родила́ еси́.
Другий канон Апостола, егоже краегранесие:
Моле́ния боже́ственному таи́ннику несу́.
Творение Иосифово. Глас 6. Песнь 1
Ирмос: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.
Во глубины́ ду́ха мы́слию озари́вся, прини́к, / и рождество́ стра́шное нам я́сно сказа́л еси́, вопия́, Богосло́ве: / в нача́ле бе Сло́во Бо́жие.
Приклоня́еми мно́жеством напа́стей, / и страсте́й, и скорбе́й, и лю́тых нахожде́ньми, / ве́рою прибега́ем к тебе́, Богосло́ве, / помо́щник бу́ди рабо́м твои́м.
Душ на́ших стра́сти лю́тыя, / я́ко врач изря́ден, уврачи́в, му́дре, / ве́чнаго изба́ви ны осужде́ния и огня́ хода́тайством твои́м.
Богородичен: Бо́га заче́ншая, нас ра́ди бы́вшаго Челове́ка, / Того́ умоли́, Чи́стая, / в День Суда́ нас уще́дрити, мно́гая согреши́вших Ему́.
Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.
Песнь 3
Ирмос: Процвела́ есть пусты́ня, я́ко крин, Го́споди, / язы́ческая неплодя́щая Це́рковь / прише́ствием Твои́м, / в не́йже утверди́ся мое́ се́рдце.
Облече́ся в мя, челове́ка, / от чре́ва Твоего́ проше́д, Творе́ц, Всенепоро́чная, / нетле́ния оде́жду да́руя, / обна́жшемуся мно́гими безме́стии.
Пречестно́е родила́ еси́ Бо́га Сло́во, Влады́чице, / Его́же приле́жно моли́ уще́дрити смире́нную мою́ ду́шу, / сла́достей безче́стии се́тующую.
Я́звы исцели́ ду́ши моея́, Пречи́стая, / и смире́нное се́рдце мое́, огорче́нное я́дом змии́ным, / де́йственною Твое́ю лечбо́ю уврачу́й.
Я́ко Ма́ти, иму́щи дерзнове́ние, Влады́чице, к Сы́ну Твоему́, / проси́ по́мощи озло́бленным лю́дем, / беззако́нных же низложи́ шата́ние.
Ин. Ирмос тойже.
Тро́ицы яви́л еси́ богосло́вным язы́ком твои́м / ю́же па́че ума́ та́йну, Иоа́нне богоблаже́нне, / в не́йже утверди́ся мое́ се́рдце.
Язы́к твой бысть Пи́сменника трость, Всесвята́го Ду́ха, / богопи́санно зна́менующий честно́е твое́ и боже́ственное Ева́нгелие.
Му́дрости ты бе́здну поче́рпл еси́, всему́дре, / возле́г богому́дренным дерзнове́нием на Прему́дрости Исто́чнице, / и Сего́ богопропове́дник был еси́.
Богородичен: Еди́ну Де́вствующую и Ма́терь чтим, / я́ко спасе́ния Хода́таицу бы́вшу нам, Всенепоро́чная, / и мир изба́вльшую моли́твами Твои́ми.
Ин. Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.
Умо́м све́тлым и чи́стым бесе́довав к Сло́ву, Богосло́ве треблаже́нне, / тайно научи́лся eси́ от Него́ су́щим вы́шше сло́ва я́ве / и всю тварь просвети́ л еси́.
Уз мя изба́ви лю́тых греха́, треблаже́нне, / любо́вию связу́я мя Влады́ки и Бо́га, / Его́же возлюби́л еси́ те́пле и Богосло́в Того́ наре́клся еси́.
Да́лся еси́ защи́тник нам, и хода́тай, и изба́витель, / и ко Го́споду моле́бник, и чуде́с самоде́латель, и исто́чник исцеле́ний, Богосло́ве. / Те́мже тя почита́ем.
Богородичен: Егда́ Сло́во, Е́же из Тебе́ воплоти́вшееся неизрече́нно, Богоро́дице, / на Дре́во вознесе́ся Креста́, / де́вственнику ученику́, я́ко Де́ву Отрокови́цу, Тебе́ вручи́.
Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.
Седален, глас 8.
Подобен: Прему́дрости:
Прему́дрости на пе́рси возле́г и ра́зуму су́щих научи́ вся, / боже́ственно возгреме́л еси́: / в нача́ле бе Сло́во, / до́бре написа́в пе́рвый безнача́льное рождество́, / и пропове́дал еси́ всем Сло́ва воплоще́ние. / Те́мже и язы́ком, я́ко мре́жею, улови́в язы́ки, / благода́тию Ду́ха изуча́еши концы́ и просвеща́еши чудесы́, / Богосло́ве Апо́столе, моли́ Христа́ Бо́га грехо́в оставле́ние дарова́ти / пра́зднующим любо́вию святу́ю па́мять твою́. [Дважды.]
Слава, и ныне, Богородичен: В напа́сти многоплете́нныя впад от враг ви́димых и неви́димых, / бу́рею одержи́м безчи́сленных согреше́ний мои́х; / и я́ко к те́плому Твоему́ заступле́нию и покро́ву моему́, Чи́стая, / ко приста́нищу притека́ю Твоея́ бла́гости. / Те́мже, Пречи́стая, из Тебе́ Воплоще́нному безсе́менно / моли́ся приле́жно о всех рабе́х Твои́х, / непреста́нно моля́щих Ти ся, Богоро́дице Пречи́стая, / моля́щи Его́ при́сно согреше́ний оставле́ние дарова́ти / воспева́ющим досто́йно сла́ву Твою́.
Песнь 4
Ирмос: Прише́л еси́ от Де́вы не хода́тай, ни А́нгел, / но Сам, Го́споди, вопло́щся, / и спасл еси́ всего́ мя челове́ка. / Тем зову́ Ти: / сла́ва си́ле Твое́й, Го́споди.
Ка́плю ми умиле́ния одожди́, Влады́чице, / отъе́млющи весь се́рдца моего́ вар и печа́ль мою́ / и па́костныя прило́ги отгоня́ющи.
Ору́жием мя сла́дости уя́звлена и лежа́ща в ра́нах, / Пречи́стая, не пре́зри, но исцели́ / копие́м и Кро́вию распе́ншагося Сы́на Твоего́ и Бо́га на́шего.
Обогати́вшаяся влады́чеством вся́каго зда́ния, / лю́те мя обнища́вша благода́ти Боже́ственныя удосто́й, / я́ко да велича́ю Тя, я́ко благу́ю мою́ Предста́тельницу, Всенепоро́чная.
Возсия́ из утро́бы Твоея́, Отрокови́це неискусобра́чная, / О́тчая заря́, Христо́с, / и просвети́ вселе́нную распина́емь, и де́монскую тьму потреби́.
Ин. Ирмос тойже.
Сло́во тя Богосло́ва досто́йно показа́, / Того́ Божества́ тайнонаучи́в, преизя́щнейше, / и е́же по челове́ку строе́нию научи́в неизрече́нному.
Ум божестве́н и де́вственно те́ло стяжа́в, / храм был еси́ живы́й же и одушевле́нный, сла́вне, / и жили́ще Всепе́тыя Тро́ицы свяще́ннейшее.
Сыновство́м Пречи́стыя Де́вы почествова́лся еси́, / де́вственниче блаже́нне, и брат показа́лся еси́ Избра́вшему тя, / и ученика́ Богосло́ва Соверши́вшему.
Богородичен: Исцеля́я Е́вы дре́внее преступле́ние, / в Тя, Всенепоро́чную и Пречи́стую, всели́ся Пребоже́ственный, / всего́ мя, челове́ка, вообрази́ти па́дша.
Ин. Ирмос: Христо́с моя́ си́ла, / Бог и Госпо́дь, / честна́я Це́рковь / боголе́пно пое́т, взыва́ющи, / от смы́сла чи́ста о Го́споде пра́зднующи.
Ка́плями напои́л еси́ Сло́ва, сла́вне, подсо́лнечную всю, / му́тныя нече́стия во́ды изсуши́л еси́, благоче́стне: / сего́ ра́ди тя почита́ем.
Кре́постию опоя́ши и держа́вою, молю́ся, / разсла́бленную вся́кими нанесе́ньми ду́шу мою́, всему́дре, / от нечи́стых враго́в прибега́ющую в кров твой.
Храм быв Боже́ственнаго Ду́ха, / в хра́ме твое́м боже́ственнем ве́рою приседя́щия / хра́мы покажи́ Бо́жия, Богосло́ве, хода́тайством твои́м.
Богородичен: Боже́ственный Храм Бо́жий воспои́м, / Святу́ю Де́ву я́сне вси блажи́м, / обоже́ни бы́вше Е́ю и от лю́тых избавля́еми.
Катавасия: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.
Песнь 5
Ирмос: Хода́тай Бо́гу и челове́ком был еси́, Христе́ Бо́же: / Тобо́ю бо, Влады́ко, к Светонача́льнику, Отцу́ Твоему́ / от но́щи неве́дения / приведе́ние и́мамы.
Путь жи́зни ро́ждшая, Пречи́стая, / путево́ждствуй мя ны́не на путь пра́вый, / в безпу́тие и про́пасть лю́тых паде́ний безслове́сно низринове́ннаго.
Устрани́вся без ума́ от ра́зума Бо́жия, блу́дно пожи́х, / во стране́ да́льней страсте́й заблуди́в; / но возврати́, Де́во Чи́стая, спаси́ Твои́ми мя утеше́ньми.
Вода́ми Твои́ми живото́чными напо́й раба́ Твоего́, / пла́менем сожига́емаго грехо́в и пали́маго прило́ги де́монскими, / Де́во Ма́ти Пречи́стая.
Се во чре́ве, Богоро́дице Пречи́стая, / Христа́ Бо́га па́че сло́ва име́ла еси́, я́коже Иса́ия провозгласи́, / и па́че естества́ Сего́, Богороди́тельница, родила́ еси́.
Ин. Ирмос тойже.
Небе́сный ум, Богосло́ве, яви́лся еси́ благода́тию, / весь свет быв е́же к Началосве́ту приближе́нием / и чи́стым твои́м зре́нием, е́же к Не́му, обожа́емь.
Умо́м чи́стым и святы́ми устна́ми, богодохнове́нне, / и пречи́стыми усты́ твое́ Ева́нгелие пропове́дал еси́ / и о́бщее спасе́ние всем ве́рным предложи́л еси́.
Со Христо́м живы́й от младе́нства, / орга́н благода́ти от Него́ предложе́н был еси́, / богосло́вии изобуча́емь и Тро́ичестей сла́ве па́че естества́ науча́емь.
Богородичен: Глаго́лы Твоя́ помина́юще, Тя ны́не блажи́м: / Тобо́ю, Всенепоро́чная, блаже́нство неизрече́нное / и жизнь нестаре́ющуюся и́стинно прия́хом.
Ин. Ирмос: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / И́стиннаго Бо́га, / от мра́ка грехо́внаго взыва́юща.
Я́ко у́тро, просия́л еси́ су́щим на земли́, / Восто́к мы́сленный я́сно пропове́дуя, Апо́столе, ми́ру, / во Пло́ти прише́дший и многобо́жия тьму разори́вший.
Богосло́вии твои́ми свяще́нными вся́ку напои́л еси́ ду́шу, / священнопропове́дниче Апо́столе. / Те́мже ти зову́: / изсо́хшее се́рдце мое́ грехми́, все напо́й.
Ура́нихся стрела́ми вра́жиими, / всего́ мя уздра́ви, му́дре, / предста́тельством твои́м, молю́ся, / и на пути́ мя Бо́жия упра́ви, при́сно в беззако́ниих заблужда́ема.
Богородичен: Егда́ предста́ла еси́ со возлю́бленным ученико́м / у Креста́ Сы́на Твоего́, Всенепоро́чная, / стена́ла еси́ пла́чущи, и диви́лася еси́ / Того́, е́же к челове́ком мно́гому сострада́нию.
Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Песнь 6
Ирмос: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.
Не яви́ мене́ де́моном в ра́дость на суди́щи бу́дущем, Влады́чице, / но благосе́рдно воззре́вши на мя, / Судию́ и Сы́на Твоего́ умоли́.
По́мыслы прогне́вах Тя, Го́споди, / и лука́выми и беззако́нными мои́ми дея́ньми, / в моли́тву привожду́ Ти Ма́терь Твою́, / уще́дрив, спаси́ мя.
Осужде́ния изба́ви мя, Влады́чице, / самоосужде́нна су́ща прегреше́ньми, / я́ко Судию́ ро́ждшая и Бо́га вся́ческих, Всепе́тая.
Иису́са Спа́са моли́, / Его́же па́че естества́ пло́тию родила́ еси́, Де́во Ма́ти Пречи́стая, / изба́витися от бед рабо́м Твои́м.
Ин. Ирмос тойже.
Иису́с, Бог мой и Госпо́дь, / твою́ чистоту́ прии́м и всесоверше́нную свя́тость, / бра́та тя, Богосло́ве, прия́т.
Венча́в свя́то житие́ твое́, / си́це упова́в, Му́дрости возле́гл еси́ на пе́рси, сла́вне, / и благода́ть отту́ду извле́кл еси́.
Вели́кая и боже́ственная сия́ния богосло́вия твоего́ / всю просвети́ша, сла́вне, вселе́нную / и све́том Трисо́лнечным озари́ша.
Богородичен: Не́бо простры́й во́лею, / Не́бо земно́е ино́е распрoстре́ Тя, Богома́ти Чи́стая, / и из Тебе́ возсия́в, яви́ся.
Ин. Ирмос: Жите́йское мо́ре / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.
Бысть я́ко трость скоропи́сца, и́стинно богосло́вный язы́к твой, / добропи́шущий разуме́ние и́стинное и зако́н, зело́ нове́йший, / на скрижа́лех, Богосло́ве, серде́ц на́ших.
Увяди́вый искоре́нно нече́стия о́трасли, / я́ко возде́латель всеизря́днейший, / в души́ же мое́й страх Бо́жий насади́, сла́вне, / доброде́телей благопло́дие процвета́ющее.
Сы́на Де́вы тя из Тоя́ Проше́дый преявле́нно именова́; / с Не́юже моли́ся, / положе́нием всем сыно́м Бо́жиим бы́ти, всеприснопа́мятне, / творя́щим благоуго́дная Ему́.
Богородичен: В подо́бии Пло́ти позна́ся челове́ком Бог / из Тебе́, Всепепоро́чная, / Его́же моли́ всегда́ / пло́ти на́шея мудрова́ния, Всечи́стая, умертви́ти па́губная.
Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.
Кондак, глас 2:
Вели́чия твоя́, де́вственниче, кто пове́сть? / То́чиши бо чудеса́, и излива́еши исцеле́ния, / и мо́лишися о душа́х на́ших, / я́ко Богосло́в и друг Христо́в.
Икос: Высоты́ небе́сныя уве́дети и мо́ря глубины́ испыта́ти де́рзостно есть и непости́жно, / я́коже бо зве́зды исчи́слити и примо́рский песо́к невозмо́жно отню́д, / си́це ниже́ я́же Богосло́вова рещи́ дово́льно: / толи́цеми того́ венцы́ Христо́с, его́же возлюби́, венча́, / Ему́же и на пе́рси возле́г и на Та́йней ве́чери с Ним яде́, / я́ко Богосло́в и друг Христо́в.
Песнь 7
Ирмос: Богопроти́вное веле́ние беззако́ннующаго мучи́теля / высо́к пла́мень вознесло́ есть, / Христо́с же простре́ богочести́вым отроко́м ро́су духо́вную, / сый Благослове́н и Препросла́влен.
Кре́пость моя́, и пе́ние, и спасе́ние, и тве́рдое заступле́ние, / и стена́ непобеди́ма су́щи, Влады́чице, / борю́щия мя де́моны побори́, / при́сно и́щущия умертви́ти мя.
Бо́га вопло́щши де́вственными Твои́ми кровьми́, обожи́ла еси́, Де́во, челове́чество. / Те́мже молю́ся Тебе́: / страстьми́ оскверне́ннаго мя и растле́ннаго вра́жиими кова́рствы / изба́ви моли́твами Твои́ми.
Пещь прообразова́ше Рождество́ Твое́, Всенепоро́чная: / о́троки бо не опали́, я́ко ниже́ ложесна́ Твоя́ Огнь нестерпи́мый. / Те́мже мо́лим Тя: / изба́ви рабы́ Твоя́ огня́ ве́чнаго.
Пречи́стое зача́тие, нетле́нное Рождество́ / Ты еди́на показа́ла еси́, Де́ва пребы́вши: / Бо́га бо зачала́ еси́, над все́ми Су́щаго, Чи́стая, Челове́ка бы́вша, / ве́рных на спасе́ние и избавле́ние.
Ин. Ирмос тойже.
Боже́ственным сия́я светоли́тием, / Ду́ха Свята́го я́сно богосло́вил еси́, / исходя́ща из Безнача́льнаго Отца́ и почива́юща в Сы́не неотхо́дно, / я́ко Единосу́щна.
В тебе́, блаже́нне, положи́ пра́вды Со́лнце селе́ние, / не́бо приснодви́жимо тя соде́лавый / и богосло́вным твои́м язы́ком пропове́дуемый Христо́с, / возлю́бленне, препросла́вленный.
Глаго́л твои́х си́ла, боже́ственное веща́ние изы́де, / всеблаже́нне досточу́дне, / и преми́рное твое́ Ева́нгелие всю объя́ше зе́млю / догма́тов вели́чеством.
Богородичен: Пречи́стое зача́тие, нетле́нно Рождество́ / Ты еди́на показа́ла еси́, Де́ва пребы́вши: / Бо́га бо зачала́ еси́, над все́ми Су́щаго, Чи́стая, Челове́ка бы́вша, / ве́рных на спасе́ние и избавле́ние.
Ин. Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: / благослове́н еси́, Бо́же оте́ц на́ших.
Гром разшуме́вший во вся концы́ воспои́м, Богосло́ва, / и́мже всяк и́стинно слух огромле́н взя́тся от земли́ / и велича́ется Христо́с, всех Творе́ц.
Обзо́рно до́му твоего́ благоле́пие вся́ку просвеща́ет мысль, / в не́мже всегда́ собира́ющеся, боголе́пне пое́м вся́ческих Творца́ / и благохва́лим тя ве́рно, су́ща предста́теля на́шего.
Я́ко звезду́ тя светлосия́ющую ве́мы, / светоно́сными сия́нии твои́ми просвеща́тися, учениче́, мо́лимся, Христо́в, / избавля́ющиися от тьмы страсте́й и напа́стей всера́зных, хода́тайством твои́м.
Богородичен: Благослови́м Тя, Всенепоро́чная, ро́ждшую благослове́ннаго Го́спода, / благослове́ньми разо́ршаго Бо́жескими прокля́тое естество́ челове́ческое / и обнови́вшаго ны, обветша́вшия тле́ю.
Катавасия: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.
Песнь 8
Ирмос: Пещь иногда́ о́гненная в Вавило́не де́йства разделя́ше, / Бо́жиим веле́нием халде́и опаля́ющая, / ве́рныя же ороша́ющая, пою́щия: / благослови́те, вся дела́ Госпо́дня, Го́спода.
Ревну́й до́брым, злых удали́вшися / попече́нием Боже́ственных дея́ний, душе моя́, / моля́щуюся о тебе́ Богома́терь и всех непосты́дную иму́щи Предста́тельницу, / я́ко ми́лостиву и человеколюби́ву.
Разреши́ла еси́ уз челове́чество дре́вняго осужде́ния, Богороди́тельнице. / Те́мже молю́ Тя: / разреши́ всяк соу́з зло́бный се́рдца моего́, / связа́вши мя, Пречи́стая, Боже́ственною любо́вию Зижди́теля.
Сла́вы О́тчую Зарю́ ро́ждши, Богоро́дице, / безсла́вием прегреше́ний се́тующее се́рдце мое́ уясни́ / и сла́вы присносу́щныя покажи́ мя прича́стника, / я́ко да ве́рою сла́влю Тя.
Яви́ся нам из Тебе́, Богороди́тельнице, пра́вды и́стинное Со́лнце, / просвеща́я вся́ческая луча́ми Божества́, / вопло́щся Вы́шний, Его́же песносло́вим.
Ин. Ирмос тойже.
Я́коже мо́лния све́тлая проходя́щи, вселе́нней, блаже́нне, яви́лся еси́, / чистоты́ све́тлостию, де́вства же блиста́нием / и благоче́стия догма́ты мир просвеща́я, / возлю́бленне Христу́ Бо́гу.
Те́ло, и ду́шу, и ум очи́стив, / благовести́л еси́ Небе́сное Христо́во Ева́нгелие, / и А́нгелом единожи́тель на Небесе́х быв, зове́ши ны́не: / благослови́те, вся дела́ Госпо́дня, Го́спода.
Столп све́тел, возложе́ние же боже́ственно Небе́снаго хра́ма был еси́, / и престо́л чу́вствия, и му́дрости прия́телище, / богосло́вия орга́н, поя́: / благослови́те, вся дела́ Госпо́дня, Го́спода.
Богородичен: Да кля́тву пе́рвую истреби́ши / и сме́ртное осужде́ние дре́вле прама́тере, / из Де́вы Богома́тере, Сло́ве Бо́жий, роди́лся еси́, / всем дарова́в безсме́ртие неги́блемо.
Ин. Ирмос: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.
Ри́торствующим язы́ком, блаже́нне, благооби́льствовал еси́ / и уме́ршия зло́бою вся живоулови́л еси́, / свяще́нную твою́ прие́мшия про́поведь. / Те́мже тя честву́ем, я́ко таи́нника неизрече́нных.
Я́ко ины́й рай боже́ственный, дом твой показа́ся, / чудесы́, я́коже цве́ты, всех ду́ши веселя́, Апо́столе, / и страсте́й прогоня́я злово́ние.
Бо́же, Бо́же мой, вонми́ ми / и изба́ви мя от враго́в, на ки́йждо день находя́щих мне / и смире́нное сокруша́ющих се́рдце мое́, / име́я моля́щагося Тебе́ боже́ственнаго ученика́ Твоего́.
Богородичен: Иису́са Спа́са, / Его́же воплоти́ла еси́ от чи́стых крове́й Твои́х, Богора́дованная, / испроси́ уще́дрити ны, рабы́ Твоя́, / и от ве́чныя му́ки изъя́ти.
Катавасия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́ те Его́ во вся ве́ки.
Песнь 9
Ирмос: Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся, / омраче́нная просвети́ти, собра́ти расточе́нная, / тем Всепе́тую Богоро́дицу велича́ем.
Вкуси́в Ада́м от дре́ва сне́ди неподоба́ющия, / смерть от дре́ва го́рько обра́; / на Дре́ве пригвозди́вся, Сын Твой, Пречи́стая, / сла́дость безсме́ртия источи́; / сего́ ра́ди Тя почита́ем.
Цари́ца еси́, / Царя́ Христа́ и Го́спода, па́че сло́ва ро́ждши, / разори́вшаго а́дова ца́рства, / Его́же приле́жно моли́, Отрокови́це, / Вы́шняго Ца́рствия удосто́ити вся честву́ющия Тя.
Ублагости́, Влады́чице, смире́нное се́рдце мое́, / озло́бленное сла́достными потопле́ньми, / я́ко Блага́го ро́ждшая и Блага́я су́щи вся, / и к покая́нию мя благи́х двере́й введи́.
Мертв быв, на Кресте́ возноси́мь, сим умори́вый зми́я, / те́мже зову́ Ти: / умерщвле́нную ду́шу мою́ лука́выми де́лы / поми́луй, Сло́ве, и оживи́ моли́твами Ро́ждшия Тя.
Ин. Ирмос тойже.
Ны́не не в гада́ниих, но лице́м к лицу́ / сла́дости пото́к зре́ти удосто́ился еси́, / и реку́ ми́ра, и исто́чник безсме́ртия, / и́мже ны́не напая́емь, наслажда́ешися обоже́ния.
Назе́мное проси́л еси́ седа́лище прия́ти от Христа́, / но Он тебе́ пе́рси Своя́ да́рует, / на ня́же возле́г, Богосло́ве, / тве́рдым и пребыва́ющим седе́нием до́брым обогати́лся еси́, / апо́столов украше́ние.
Му́дрости погаси́л еси́ е́ллинския безбо́жное, / в нача́ле бе Сло́во, му́дре, провеща́в, / и к Бо́гу бе Сло́во, и и́стинно Бог бе Сло́во, / И́мже вся бы́ша, ви́димая же и неви́димая.
Богородичен: Я́ко у́тро обрела́ся еси́ у́треннее в нощи́ жития́, / де́вства заря́ми облиста́ющи, / восто́к Со́лнца мы́сленнаго пра́вды нам я́вльшая, / Богома́ти Всечи́стая.
Ин. Ирмос: Бо́га / челове́ком невозмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю бо, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и / Тя ублажа́ем.
Часо́в и време́н Госпо́дь, сый Изба́витель, / в преполове́нии дне на Кресте́ ви́сяше / и тебе́ предаде́, я́коже де́вственнику, блаже́нне, Присноде́ву, / сла́ву неотъе́млему дая́, е́же велича́ти тя.
Сый с го́рними боже́ственными Си́лами / и с ни́ми боже́ственное восклица́я песнопе́ние, / я́же в дому́ твое́м свято́м пою́щия и песносло́вящия Преблага́го / спаса́й хода́тайствы твои́ми честны́ми, Христо́в Апо́столе.
Ве́рою прося́щия тя спаса́й ны от вся́кия беды́, Богосло́ве блаже́нне, / ше́ствия на́ша я́же ко Го́споду, ду́хом направля́я / и путево́ждствуя ны на путь ми́ра, за́поведей Вседержи́теля.
Богородичен: Глас прино́сим Ти благода́рствен, Бо́жии Ма́тери, све́тло и возопие́м: / ра́дуйся, престо́ле Бо́жий превысоча́йший, / ра́дуйся, Све́та о́блаче, / ра́дуйся, раю́, Е́юже ра́йския сла́дости сподо́бихомся.
Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.
Светилен. Подобен: Ду́хом:
Я́ко душе́ю де́вственна тя и те́лом, блаже́нне, Сло́во избра́, / Богосло́ве де́вственниче, / и Того́ Божества́ чу́дна показа́ писца́ и слугу́, / и́же и от земли́ преста́вился еси́, не у́мер, / но в Бо́зе жив и безсме́ртен пребыва́я.
Слава. Подобен: Жены́, услы́шите:
Гро́мов сын быв, челове́ком богосло́вил еси́, / е́же в нача́ле бе Сло́во, Апо́столе Иоа́нне: / возлеги́й бо на пе́рси ве́рно Влады́ки твоего́ / и отту́ду поче́рп богосло́вия струи́, / тварь всю напая́еши.
И ныне, Богородичен: При Кресте́ Сы́на Твоего́ и Бо́га стоя́щи Всечи́стая со ученико́м де́вственником, / се, глаго́лет, сын Твой, услы́ша Созда́вшаго; / ученику́ же: се, глаго́лет, Ма́ти твоя́. / С ни́мже Тя вси пое́м, Богороди́тельнице Де́во.
На хвалитех стихиры, на 4, глас 8.
Подобен: О пресла́внаго чудесе́:
Блаже́нне Иоа́нне всему́дре, / оби́льною теплото́ю Христо́вы любве́ / мно́жае всех был еси́ ученико́в / люби́мь Всеви́дцу Сло́ву / и судя́щему пра́выми ме́рами / всей вселе́нней, / чистоты́ и де́вства добро́тами озари́вся / те́лом и по́мыслом, / богоблаже́нне.
Де́вства процвете́ние, / честны́х доброде́телей прия́тное жили́ще, / му́дрости орга́н, / Ду́ха храм, / светоно́сная уста́ благода́ти, / Це́ркве светле́йшее о́ко, / всечестна́го Иоа́нна / пе́сньми духо́вными ны́не восхва́лим, / я́ко служи́теля Христо́ва.
Богосло́вия во́ды, / на пе́рси возле́г Му́дрости, / поче́рпл еси́ / и мир напои́л еси́, / Иоа́нне всеизя́щнейше, / Тро́ицы ве́дением / мо́ре изсуши́л еси́ безбо́жия, / столп быв и о́блак одушевле́н, / наставля́я ны к Небе́сному насле́дию.
Евангели́сте боже́ственне, / благи́х исто́чник, / Ца́рство недви́жное, жизнь ве́чную, / и ра́дость неизглаго́ланную, / и зре́ния Боже́ственнаго наслажде́ние, / и богатода́тно Христо́ва дарова́ния, / ум превосходя́й и челове́ческий по́мысл, / сы́не гро́мов, / благовеству́яй ми́ру уясни́л еси́.
Слава, глас 8. Самогласен: Благове́стниче Иоа́нне, / равноа́нгельне, де́вственниче, / Богосло́ве, богонауче́нне, / правосла́вно ми́ру пречи́стое ребро́, / Кровь и во́ду источи́вшее, пропове́дал еси́, / и́мже ве́чную жизнь обрета́ем душа́м на́шим.
И ныне, Богородичен: Влады́чице, приими́ моли́твы раб Твои́х / и изба́ви нас / от вся́кия ну́жды и печа́ли.
Славословие вели́кое.
По Трисвятом тропарь апо́стола. Слава, и ныне, Богородичен: Вся па́че смы́сла:
Ектения, и отпуст. И поем стихиру самогласну святаго, юже хощет екклисиарх. И исходит иерей с кадилом, предыдущу ему светильнику, кадит на аналогии икону святаго апостола. И отдав кадило, стоит одесную страну аналогиа. И приходит игумен ко аналогию, и творит два поклона, и целует икону святаго апостола. И по целовании един поклон, и взем стручец на то устроенный, помазует себе от кандила святым елеем крестообразно на челе своем. И братия подобне целуют икону святаго. Игумен же помазует святым елеем иереа и прочию братию. По помазании же святаго елеа, поем час 1-й. На 1-м часе тропарь и кондак апостола. И бывает конечный отпуст.
Сице помазание бывает всегда, и во вся праздники великих святых, в нихже бывают бдения.
На литургии
Блаженна, от канона 2-го гласа, песнь 3-я на 4, и 6-го гласа, песнь 6-я на 4.
По входе тропарь храма Христова, и Богородицы, и апостола. А храмов святых тропари и кондаки не глаголются. По сем кондак храма Христова. Таже, Сла́ва, кондак апостола. И ны́не, храма Богородицы. Аще ли несть храма Богородицы: И ны́не, храма Христова. Аще ли несть храма Христова, и Богородицы, глаголем тропарь сице: тропарь апостола. Сла́ва, кондак его. И ны́не, Предста́тельство христиа́н:
Тропарь апостола, глас 2:
Апо́столе, Христу́ Бо́гу возлю́бленне, / ускори́ изба́вити лю́ди безотве́тны: / прие́млет тя припа́дающа / И́же па́дша на пе́рси Прие́мый. / Его́же моли́, Богосло́ве, / и належа́щую мглу язы́ков разгна́ти, / прося́ нам ми́ра и ве́лия ми́лости.
Кондак апостола, глас тойже:
Вели́чия твоя́, де́вственниче, кто пове́сть? / То́чиши бо чудеса́, и излива́еши исцеле́ния, / и мо́лишися о душа́х на́ших, / я́ко Богосло́в и друг Христо́в.
Прокимен, глас 8:
Во всю зе́млю изы́де веща́ние их / и в концы́ вселе́нныя глаго́лы их. Стих: Небеса пове́дают сла́ву Бо́жию, творе́ние же руку́ Его́ возвеща́ет твердь.
Соборнаго послания Иоаннова,
зачало 73, от полу
Возлю́бленнии, Бо́га никто́же нигде́же ви́де. А́ще друг дру́га лю́бим, Бог в нас пребыва́ет, и любы́ Его́ соверше́нна есть в нас. О сем разуме́ем, я́ко в Нем пребыва́ем, и Той в нас, я́ко от Ду́ха Своего́ дал есть нам. И мы ви́дехом и свиде́тельствуем, я́ко Оте́ц посла́ Сы́на Спаси́теля ми́ру. И́же а́ще испове́сть, я́ко Иису́с есть Сын Бо́жий, Бог в нем пребыва́ет, и той в Бо́зе. И мы позна́хом и ве́ровахом любо́вь, ю́же и́мать Бог к нам. Бог любы́ есть, и пребыва́яй в любви́, в Бо́зе пребыва́ет, и Бог в нем пребыва́ет. О сем соверша́ется любы́ с на́ми, да дерзнове́ние и́мамы в день су́дный, зане́, я́коже Он есть, и мы есмы́ в ми́ре сем. Стра́ха несть в любви́, но соверше́нна любы́ вон изгоня́ет страх, я́ко страх му́ку и́мать, боя́йся же не соверши́ся в любви́. Мы лю́бим Его́, я́ко Той пе́рвее возлюби́л есть нас.
Аллилуиа, глас 1
Стих: Испове́дят Небеса́ чудеса́ Твоя́, Го́споди. Стих: Бог прославля́емь в сове́те святы́х.
Евангелие Иоанна, зачало 61
Во вре́мя о́но, стоя́ху при Кресте́ Иису́сове Ма́ти Его́, и сестра́ Ма́тере Его́, Мари́я Клео́пова, и Мари́я Магдали́на. Иису́с же, ви́дев Ма́терь и ученика́ стоя́ща, его́же любля́ше, глаго́ла Ма́тери Свое́й: Же́но, се сын Твой. Пото́м глаго́ла ученику́: се Ма́ти твоя́. И от того́ часа́ поя́т Ю́ учени́к во своя́ си. Сей есть учени́к свиде́тельствуяй о сих, и́же и написа́ сия́, и вем, я́ко и́стинно есть свиде́тельство его́. Суть же и и́на мно́га, я́же сотвори́ Иису́с, я́же а́ще бы по еди́ному пи́сана бы́ша, ни самому́ мню всему́ ми́ру вмести́ти пи́шемых книг. Ами́нь.
Причастен:
Во всю зе́млю изы́де веща́ние их / и в концы́ вселе́нныя глаго́лы их. / Аллилу́иа, трижды.