Месяца июня в 24-й день

На Го́споди, воззва́х: стихиры на 4, глас 4.

Подобен: Зва́нный свы́ше:

Из непло́дныя роди́лся еси́ утро́бы, / разреши́вый непло́дие серде́ц на́ших / и благоча́дие в ве́ре же и и́стине, / душа́м непло́дным сло́во да́руя, / сла́вный Предте́че прише́ствия Христо́ва. / Глас Сло́ва благознамени́тый, / покая́ния прознамена́тель велегла́сный, / ве́тхаго же и но́ваго Боже́ственный хода́тай, / я́ве познава́емь, / его́же рождество́ любо́вию пра́зднуем, веселя́щеся. (2)

Упита́нный ны́не воздержа́ния теле́ц / от непло́дныя роди́ся, / показу́я нам от Де́вы Отрокови́цы А́гнца рожде́на / и ми́ра взе́млющаго согреше́ния. / Го́рлица пустынелю́бная я́ве возсия́, / Боже́ственную ве́сну возвеща́ющая, / и́мже преста́ безбо́жия зима́ лю́тая / и Жениха́ друг и́скренний / све́тло прии́де Иоа́нн, / моля́ спасти́ся душа́м на́шим.

И́же по Боже́ственному ро́ждься обетова́нию, / егда́ пречу́дный и вели́кий Арха́нгел / в це́ркви роди́телю твоему́ моля́щуся / благовествова́ твое́ рожде́ние, / тогда́ не ве́рующу и прекосло́вящу свяще́ннику, / я́коже пи́шет, / безгла́сие Гаврии́л наведе́ и оглохнове́ние, да́же до рождества́. / Ты же, Предте́че, от отца́ ро́ждься, / соу́з язы́ка свободи́л еси́, блаже́нне, / и мо́лишися о всех нас.

Слава, глас 8. Самогласен: Подоба́ет Иоа́нну благово́ние, / подоба́ет Крести́телю пе́сней красота́, / сей бо пропове́да нача́ток на́шего спасе́ния, / взыгра́выйся во чре́ве / и вопия́ в пусты́ни: пока́йтеся, / Царе́в во́ин, Предте́ча благода́ти, / А́гнца провозвеща́я и Спа́са моля́ о душа́х на́ших.

И ныне, Богородичен, глас тойже: Влады́чице, приими́ моли́твы рабо́в твои́х, / и изба́ви нас / от вся́кия ну́жды и печа́ли.

На стиховне стихиры, глас 2.

Подобен: До́ме Евфра́фов:

Уясни́ твой язы́к / све́тло, Заха́рие, / проро́к отроча́ Бо́жий бу́дет, возопи́в, / и Сло́ва Боже́ственнаго / Предте́ча.

Стих: Благослове́н Госпо́дь, Бог Изра́илев, / я́ко посети́ и сотвори́ избавле́ние лю́дем Свои́м.

Яви́лся еси́ / от ма́терних ложе́сн, Иоа́нне, / Бо́гу освяще́н: / не воста́ бо бо́лий в челове́цех, / никто́же па́че тебе́ нигде́же.

Стих: И ты, отроча́, / проро́к Вы́шняго нарече́шися.

Разреши́л еси́ о́тчее, / преблаже́нне, безгла́сие: / я́коже безча́дства ключи́ / разреши́л еси́ ро́ждшия, / роди́вся от Боже́ственныя благода́ти.

Слава, и ныне, глас 8: Виждь Елисаве́ть, к Де́ве Мари́и глаго́лющу: / что пришла́ еси́ ко мне, Ма́ти Го́спода моего́? / Ты Царя́ но́сиши, и аз во́ина. / Ты Законода́вца, и аз законоположи́теля. / Ты Сло́ва, и аз глас, пропове́дающ Ца́рство Небе́сное.

Тропарь, глас 4:

Проро́че и Предте́че прише́ствия Христо́ва, / досто́йно восхвали́ти тя недоуме́ем мы, любо́вию чту́щии тя: / непло́дство бо ро́ждшия и о́тчее безгла́сие разреши́ся / сла́вным и честны́м твои́м рождество́м, / и воплоще́ние Сы́на Бо́жия ми́рови пропове́дуется.

Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

По обычном псалме поем: Блаже́н муж: 1-й антифон.

На Го́споди, воззва́х: стихиры на 8. Глас 4.

Самогласны. Иоанна монаха:

Разреша́ет Заха́риино молча́ние рожде́йся Иоа́нн, / и́бо не подоба́ше отцу́ молча́ти, прише́дшу гла́су, / но, я́коже не ве́ровавшу пе́рвее / язы́к связа́, / си́це я́вльшуся да́ти отцу́ свобожде́ние. / Ему́же и благовести́ся, / и роди́ся глас Сло́ва / и Све́та Предте́ча, моля́ о душа́х на́ших. (2)

Днесь глас Сло́ва, / глас, за неве́рие держи́мый, разреша́ет оте́ч / и Це́ркви явля́ет благоча́дие, / соу́зы непло́дствия разреша́я ма́терни. / Свети́льник Све́та предгряде́т, / заря́ Со́лнца пра́вды возвеща́ет прише́ствие / в созда́ние всех и спасе́ние душ на́ших.

Анатолия: Бо́жию Сло́ву хотя́щу от Де́вы роди́тися, / А́нгел от ста́рческих чресл происхо́дит, / вели́кий в рожде́нных жена́ми / и проро́ков превы́шший: / подоба́ше бо Боже́ственных веще́й пресла́вным бы́ти нача́лом, / кроме́ во́зраста исча́дие / и без се́мене зача́тие. / Творя́й чудеса́ во спасе́ние на́ше, / сла́ва Тебе́.

Андрея Критскаго: Яви́ся днесь вели́кий Предте́ча, / от непло́дных ложе́сн Елисаве́ти произше́д, / бо́лий всех проро́ков проро́к, / и ин несть, ниже́ воста́: / я́ко Предте́чи, свети́льнику, Свет после́дова пресве́тлый, / и гла́су – Сло́во, / и невестово́дцу – Жени́х, / гото́вящему Го́сподеви лю́ди изря́дныя / и предочища́ющу при Ду́се водо́ю, / Заха́риино прозябе́ние / и пусты́ни до́брое воспита́ние, / покая́ния пропове́дник, / очище́ние согреше́ний, / су́щим во а́де благовеству́яй из ме́ртвых воста́ние / и моля́ о душа́х на́ших.

Проро́к и Предте́ча из утро́бы яви́лся еси́, / Христо́в Крести́телю Иоа́нне, / игра́я и ра́дуяся во чре́ве ма́терни, / зря Цари́цу, прише́дшу к рабе́, / нося́щую Безле́тнаго, от Отца́ без ма́тере, / к тебе́, от непло́дныя и ста́рца по обетова́нию возсия́вшему. / Того́ моли́ поми́ловати ду́ши на́ша.

О, пресла́внаго чудесе́! / И́же сло́ву А́нгела не ве́ровавый, глаго́лющу, / я́ко зачне́т Елисаве́ть и роди́т сы́на, глаго́ля: / ка́ко та́я роди́т, / зане́ аз заматере́х / и о́ныя удеса́ умертви́шася? / Осуди́выйся молча́ти за неве́рие / днесь зрит ражда́емо обеща́нное / и, молча́ния разре́шься, / в весе́лие вхо́дит, / благослове́н, – вопия́, – Госпо́дь, Бог Изра́илев, / я́ко посети́ и сотвори́ избавле́ние лю́дем Свои́м, / подая́й ми́рови ве́лию ми́лость.

Иоа́нне прехва́льне, / и вселе́нский апо́столе, / Гаврии́лово благовествова́ние, / и непло́дныя прозябе́ние, / и пусты́ни до́брое воспита́ние, / и и́скренний дру́же Жениха́ Христа́, / Того́ моли́ поми́ловатися душа́м на́шим.

Слава, глас 6. Византиево: Днесь Све́та свети́льник / предпу́тие твори́т прише́ствию Бо́жия Сло́ва, / я́ко звезда́ све́тлая, / днесь Заха́риин язы́к уясни́ся, / молча́ние держа́в, А́нгелу повеле́вшу, / подоба́ше бо си́це отцу́ / глас немолча́нием храни́ти, произше́дш из утро́бы непло́дныя / и всего́ ми́ра избавле́ние благовеству́ющ / со дерзнове́нием мно́гим.

И ныне, глас тойже: Елисаве́ть зача́т Предте́чу благода́ти, / Де́ва же Го́спода сла́вы, / целова́стеся о́бе ма́тери, / и младе́нец взыгра́ся, / внутрь бо раб хваля́ше Влады́ку. / Удиви́вшися же, ма́ти Предте́чева нача́т вопи́ти: / отку́ду мне се, да Ма́ти Го́спода моего́ прии́де ко мне? / Да спасе́т лю́ди отча́янныя / Име́яй ве́лию ми́лость.

Вход. Прокимен дне.

Бытия́ чте́ние

Рече́ Бог Авраа́му: Са́ра, жена́ твоя́, не нарече́тся и́мя ей Са́ра, но Са́рра бу́дет и́мя ей. Благословлю́ же ю, и дам тебе́ от нея́ ча́до, и благословлю́ е, и бу́дет во язы́ки, и ца́рие язы́к от него́ изы́дут. И паде́ Авраа́м на лице́ свое́м, и рече́ в мы́сли свое́й: а́ще столе́тну роди́тся сын? И Са́рра, де́вятьдесят лет су́щи, роди́т? Рече́ же Бог Авраа́му: ей, се Са́рра, жена́ твоя́, роди́т тебе́ сы́на, и нарече́ши и́мя ему́ Исаа́к. И положу́ заве́т Мой к нему́ в заве́т ве́чен. Авраа́м же и Са́рра престаре́вшася во днех. Возсмея́ же ся Са́рра в себе́, глаго́лющи: не у ми бысть да́же до ны́не, господи́н же мой стар. И рече́ Госпо́дь Бог Авраа́му: что я́ко возсмея́ся Са́рра в себе́, глаго́лющи: у́бо вои́стинну ли рожду́? Аз же состаре́хся. Еда́ не возмо́жет от Бо́га всяк глаго́л? И Госпо́дь Бог посети́ Са́рру, я́коже глаго́ла. И, заче́нши, роди́ Авраа́му сы́на в ста́рости, я́коже глаго́ла ему́ Госпо́дь Бог. Обре́за же его́ в день осмы́й, я́коже запове́да ему́ Госпо́дь Бог. И Авраа́м бя́ше лет ста, егда́ бысть ему́ Исаа́к, сын его́. Рече́ же Са́рра: смех ми сотвори́ Госпо́дь Бог. И́же бо а́ще услы́шит, сра́дуется мне. И рече́: кто возвести́т Авраа́му, я́ко сосца́ми пита́ет отроча́ Са́рра, я́ко роди́х отроча́ в ста́рости мое́й? И возрасте́ отроча́, и преста́ сосца́ми пита́тися. И сотвори́ Авраа́м учрежде́ние ве́лие, во́ньже день отдои́ся Исаа́к, сын его́.

Быт.17:15–17,19, 18:11–14, 21:1–2, 4–8

Суде́й чте́ние

Во дни о́ны бысть муж от коле́на Да́нова, и и́мя ему́ Мано́е, и жена́ его́ непло́ды, и не ражда́ше. И яви́ся А́нгел Госпо́день к жене́, и рече́ к ней: се ты непло́ды, и во чре́ве прии́меши, и роди́ши сы́на. И ны́не сохрани́ся, не пий вина́ и сике́ра и не яждь вся́ко нечи́сто. Зане́ се ты во чре́ве прии́меши и роди́ши сы́на, и желе́зо не взы́дет на главу́ его́, я́ко освяще́нно Бо́гу бу́дет отроча́ из чре́ва. И прии́де жена́, и рече́ му́жу своему́, глаго́лющи: я́ко челове́к Бо́жий прии́де ко мне, и виде́ние его́, я́ко виде́ние А́нгела Бо́жия све́тло зело́. И рече́: се во чре́ве прии́меши и роди́ши сы́на; и ны́не не пий вина́ и сике́ра и не яждь вся́ко нечи́сто, я́ко освяще́нно Бо́гу бу́дет отроча́ из чре́ва да́же до дне сме́рти его́. И помоли́ся Мано́е Бо́гу, и рече́: ко мне, Го́споди, челове́к Бо́жий, его́же посла́л еси́ к нам, да прии́дет у́бо и просвети́т нас, что сотвори́м отроча́ти ражда́ющемуся? Прии́де же А́нгел к Мано́ю и рече́: от всех, и́хже реко́х жене́ твое́й, да сохрани́тся, ели́ка исхо́дят от виногра́да, да не яст и вина́ и сике́ра да не пие́т. И рече́ Мано́е ко А́нгелу Госпо́дню: что и́мя твое́? Да егда́ прии́дет глаго́л твой, просла́вим тя. И рече́ ему́ А́нгел Госпо́день: вску́ю ты вопроша́еши и́мене моего́? И то есть чу́дно. И не приложи́ ктому́ А́нгел Госпо́день яви́тися к Мано́ю и жене́ его́.

Суд.13:2–8, 13–14, 17–18, 21

Проро́чества Иса́иина чте́ние

Та́ко глаго́лет Госпо́дь: утеша́йте, утеша́йте лю́ди Моя́, глаго́лет Бог: свяще́нницы, глаго́лите в се́рдцы Иерусали́му, умоли́те его́, я́ко умно́жися смире́ние его́. Разреши́ся бо грех его́, я́ко прия́т из руки́ Госпо́дни сугу́ба согреше́ния своя́. Глас вопию́щаго в пусты́ни: угото́вайте путь Госпо́день, пра́вы твори́те стези́ Бо́гу на́шему. На го́ру высо́ку взы́ди, благовеству́й Сио́ну, возвыша́й кре́постию глас свой, благовеству́й Иерусали́му: вознеси́те, не бо́йтеся, Аз Госпо́дь Бог, Аз услы́шу убо́гих, Изра́илев, и не оста́влю тех. Но отве́рзу от гор ре́ки и посреде́ по́ля исто́чники сотворю́, пусты́ню в луг и жа́ждущую зе́млю во исто́чники водны́я. Да возвесели́тся не́бо свы́ше, и о́блацы да кропя́т пра́вду, да возсия́ет земля́, и да прозя́бнет ми́лость, и пра́вда да возсия́ет вку́пе. Глас весе́лия возвести́те, и услы́шано да бу́дет, возвести́те да́же до коне́ц земли́, глаго́лите, я́ко изба́ви Госпо́дь раба́ Своего́ Иа́кова, и а́ще вжа́ждут в пусты́ни, источи́т им во́ду из ка́мене. Возвесели́ся, непло́ды неражда́ющая, расто́ргни и возопи́й, неболе́вшая, я́ко мно́га ча́да пусты́я па́че, не́жели иму́щия му́жа.

Ис.40:1–3, 9, 41:17–18, 45:8, 48:20–21, 54:1

На литии стихиры самогласны, глас 1:

Иска́пайте, го́ры, сла́дость, / и хо́лми, я́ко а́гнцы, взыгра́йте, / я́ко роди́ся от Елисаве́ти / хотя́й с на́ми водвори́тися Госпо́день Предте́ча, / разреши́вый в рождестве́ о́тчее безгла́сие. / Тем и мы вопие́м ему́: / Крести́телю Христо́в, моли́ спасти́ся душа́м на́шим.

Богознамени́тый глас, Све́та свети́льник, / Госпо́день Предте́ча, / Христо́м свиде́тельствованный, / пе́рвый во проро́цех, о ми́ре моли́тву творя́й, / изря́дно ста́до твое́ помина́й, спасти́ невреди́мо.

Пропове́дник был еси́ А́гнца Бо́жия и Сло́ва, / Иоа́нне проро́че и Предте́че, / прорица́еши бу́дущая и предглаго́леши конце́м: / се А́гнец Бо́жий, взе́мляй ми́ра грехи́ / и подая́й всем ве́лию ми́лость.

Слава, глас 5. Андрея Критскаго: Проро́ков преде́л и нача́ло апо́столов, / земна́го А́нгела и Небе́снаго челове́ка, / глас Сло́ва, во́ина и Предте́чу Христо́ва, / от обеща́ния предвзыгра́вшася / и пропове́давша пре́жде рождества́ Со́лнца пра́вды, / днесь Елисаве́ть ражда́ет, и ра́дуется, / и чуди́тся Заха́рия в ста́рости, / молча́ние, а́ки у́зу обложе́нну, отложи́в, / и я́ко роди́тель гла́са проро́чествует явле́ннейше: / ты бо, отроча́, проро́к Вы́шняго нарече́шися / и предъи́деши пути́ гото́вити Ему́. / Те́мже, А́нгеле, проро́че, апо́столе, / во́ине, Предте́че, / Крести́телю, и пропове́дниче покая́ния, и наста́вниче, / я́ко глас све́та, Сло́ва, / непреста́нно моли́ся о нас, / ве́рою творя́щих твою́ па́мять.

И ныне, глас тойже: Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой Христо́с Госпо́дь, / во тьме спя́щим яви́ся, / со́лнце сый пра́вды, / просвети́ти хотя́, я́же созда́ по о́бразу Своему́ руко́ю Свое́ю: / те́мже, Всепе́тая, / я́ко ма́терне дерзнове́ние к Нему́ стяжа́вши, / непреста́нно моли́ / спасти́ся душа́м на́шим.

На стиховне стихиры самогласны, глас 2:

И́же от проро́ка проро́ка / и непло́дныя прозябе́ние, / в рожде́нных жена́ми превы́шша всех, / пусты́ннаго граждани́на, Иоа́нна сла́внаго / псалмы́ и пе́ньми и пе́сньми духо́вными восхва́лим, / вопию́ще к нему́: / Крести́телю Спа́сов и Предте́че, / я́ко име́я дерзнове́ние, / в честне́м твое́м рождестве́ / умоли́ Христа́ дарова́ти мир ми́ру / и душа́м на́шим ве́лию ми́лость.

Стих: Благослове́н Госпо́дь, Бог Изра́илев, / я́ко посети́ и сотвори́ избавле́ние лю́дем Свои́м.

Прии́де глас благода́ти Сло́ва, / Со́лнца пропове́дник, / роди́выйся днесь от непло́дове безча́дныя, / от обетова́ния Иоа́нн Предте́ча. / Лю́дие, ра́дуйтеся: / прии́де угото́вати путь нам спасе́ния, / Ему́же и, взыгра́в, поклони́ся, / во чре́ве су́щу Ма́терни, / А́гнцу, взе́млющему грехи́ ми́ра / и подаю́щему нам ве́лию ми́лость.

Стих: И ты, отроча́, / проро́к Вы́шняго нарече́шися.

И́же из чре́ва ма́терня освя́щся / и проро́чества прие́м исполне́ние, / днесь от непло́дныя ражда́ется, / Госпо́дне прише́ствие пропове́дая я́сно: / пока́йтеся, прибли́жися бо Ца́рство Небе́сное.

Слава, глас 8. Кассии монахини:

Иса́ии ны́не проро́ка глас / днесь в бо́льшаго от проро́к рожде́нии Иоа́нна испо́лнися: / се бо, – рече́, – послю́ А́нгела Моего́ пред лице́м Твои́м, / и́же угото́вит путь Твой пред Тобо́ю. / Сей у́бо, Небе́снаго Царя́ во́ин, предте́к, / я́ко вои́стинну пра́вы творя́ше стези́ Бо́гу на́шему, / челове́к у́бо естество́м, А́нгел же житие́м сый, / чистоту́ бо коне́чно и целому́дрие целова́в, / имя́ше у́бо по естеству́, / бежа́ же я́же чрез естество́, / па́че естества́ подвиза́вся. / Тому́, вси ве́рнии, доброде́тельми подо́бящеся, / моли́ти о нас мо́лимся, / во е́же спасти́ ду́ши на́ша.

И ныне, глас тойже: Виждь Елисаве́ть к Де́ве Мари́и глаго́лющу: / что пришла́ еси́ ко мне, Ма́ти Го́спода моего́? / Ты Царя́ но́сиши, и аз во́ина. / Ты Законода́вца, и аз законоположи́теля. / Ты Сло́ва, и аз глас, / пропове́дающ Ца́рство Небе́сное.

На благословении хлебов

тропарь, глас 4, дважды:

Проро́че и Предте́че прише́ствия Христо́ва, / досто́йно восхвали́ти тя недоуме́ем мы, любо́вию чту́щии тя: / непло́дство бо ро́ждшия и о́тчее безгла́сие разреши́ся / сла́вным и честны́м твои́м рождество́м, / и воплоще́ние Сы́на Бо́жия ми́рови пропове́дуется.

И Богоро́дице Де́во: единожды.

На Бог Господь:

тропарь Предтечи, дважды, глас 4:

Проро́че и Предте́че прише́ствия Христо́ва, / досто́йно восхвали́ти тя недоуме́ем мы, любо́вию чту́щии тя: / непло́дство бо ро́ждшия и о́тчее безгла́сие разреши́ся / сла́вным и честны́м твои́м рождество́м, / и воплоще́ние Сы́на Бо́жия ми́рови пропове́дуется. (2)

Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

По 1-й кафизме седален, глас 4.

Подобен: Удиви́ся Ио́сиф:

Ны́не прозябе́ нам Заха́риин плод и весели́т разу́мно мы́сли ве́рных, / пусты́нное украше́ние и проро́ков степе́нь, / те́мже Христо́в яви́ся Предте́ча и свиде́тель нело́жен прише́ствия Его́. / Духо́вными у́бо пе́сньми согла́сно Крести́телю возопие́м: / проро́че и пропове́дниче и́стины, моли́ спасти́ся нам. (2)

Слава, и ныне, Богородичен: Удиви́ся Ио́сиф, е́же па́че естества́ зря и внима́ше мы́слию, / и́же на руно́ дождь, в безсе́менном зача́тии Твое́м, Богоро́дице, / купину́, огне́м неопали́мую, жезл Ааро́нов прозя́бший, / и, свиде́тельствуя, обру́чник Твой и храни́тель свяще́нником взыва́ше: / Де́ва ражда́ет и по Рождестве́ па́ки Де́вою пребыва́ет.

По 2-й кафизме, седален, глас 8.

Подобен: Прему́дрости:

Христо́ва прише́ствия нача́ток, пресла́вно роди́лся еси́, / я́ко вои́стинну, Иоа́нне всехва́льне, проро́ков глави́зна, / и, я́ко глас Сло́ва сый, взыва́л еси́: / пока́йтеся, прибли́жися Ца́рство Небе́сное. / Те́мже, угото́вавый путь Госпо́день, благода́ти Предте́ча яви́лся еси́ конце́м. / Крести́телю и апо́столе, моли́ Христа́ Бо́га прегреше́ний оставле́ние дарова́ти / пра́зднующим любо́вию святу́ю па́мять твою́. (2)

Слава, и ныне, Богородичен: Пресвята́я Де́во, Ма́ти Христо́ва, души́ моея́ стра́сти лю́тыя исцели́, молю́ся, / и проще́ние да́руй мои́м прегреше́ниям, и́хже безу́мне соде́ях, / ду́шу и те́ло оскверни́в, окая́нный. / Увы́ мне, что сотворю́ в час он, / внегда́ А́нгели ду́шу мою́ разлуча́т от стра́стнаго моего́ телесе́? / Тогда́ Помо́щница ми бу́ди и Предста́тельница тепле́йшая, Тя бо и́мам наде́жду, раб Твой.

Величание:

Велича́ем тя, / Предте́че Спа́сов Иоа́нне, / и чтим е́же от непло́дове / пресла́вное рождество́ твое́.

Псалом избранный

Лик 1: Благослове́н Госпо́дь, Бог Изра́илев, я́ко посети́ и сотвори́ избавле́ние лю́дем Свои́м. 2: И воздви́же рог спасе́ния нам в дому́ Дави́дове, о́трока Своего́. 1: Кля́тся Госпо́дь Дави́ду и́стиною и не отве́ржется ея́. 2: Та́мо возращу́ рог Дави́ду, угото́вах свети́льник пома́занному Моему́. 1: Си́льно на земли́ бу́дет се́мя Его́. 2: Род пра́вых благослови́тся. 1: Служи́ти Ему́ в преподо́бии и пра́вде пред Ним вся дни живота́ на́шего. 2: И ты, отроча́, проро́к Вы́шняго нарече́шися. 1: Преды́деши бо пред лице́м Госпо́дним угото́вати пути́ Его́, 2: да́ти ра́зум спасе́ния лю́дем Его́ 1: во оставле́ние грехо́в их милосе́рдия ра́ди ми́лости Бо́га на́шего, 2: напра́вити но́ги на́ша на путь ми́ра.

Сла́ва, и ны́не: Аллилу́иа, трижды.

По полиелеи седален, глас 8.

Подобен: Повеле́нное:

Да ра́дуется оте́ц, ма́ти, возвесели́ся, / я́ко проро́ка на земли́ родила́ еси́ днесь, Богозва́ннаго Предте́чу от обеща́ния. / Непло́ды младе́нца пита́ет Крести́теля, и ра́дуется Заха́рия, рожде́нному глаго́ля: / разреши́ся язы́к мой твои́м прише́ствием на зе́млю, свети́льниче вели́каго Све́та. / Вои́стинну чу́до пресла́вно! (2)

Слава, и ныне, Богородичен: Благодари́м Тя при́сно, Богоро́дице, и велича́ем, Чи́стая, и покланя́емся, / воспева́юще Рождество́ Твое́, Благода́тная, вопию́ще непреста́нно: / спаси́ нас, Де́во Всеми́лостивая, я́ко Блага́я, / и де́монов исхити́ словоположе́ния стра́шнаго в час испыта́ния, / да не посрами́мся, раби́ Твои́.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой. Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

И ты, отроча́, / проро́к Вы́шняго нарече́шися. Стих: Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Свои́м.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Луки, зачало 3

Во дне́х о́нех зача́т Eлисаве́т, жена́ Заха́риина, и тая́шеся ме́сяц пять, глаго́лющи: я́ко та́ко мне сотвори́ Госпо́дь во дни, в ня́же призре́ отъя́ти поноше́ние мое́ в челове́цех. Елисаве́ти же испо́лнися вре́мя роди́ти ей, и роди́ сы́на. И слы́шаша о́крест живу́щии и у́жики ея́, я́ко возвели́чил есть Госпо́дь ми́лость свою́ с не́ю: и ра́довахуся с не́ю. И бысть во осмы́й день, приидо́ша обре́зати отроча́, и нарица́ху е и́менем отца́ его́, Заха́рию. И отвеща́вши ма́ти его́, рече́: ни, но да нарече́тся Иоа́нн. И ре́ша к ней: я́ко никто́же есть в родстве́ твое́м, и́же нарица́ется и́менем тем. И помава́ху отцу́ его́, е́же ка́ко бы хоте́л нарещи́ е. И испро́шь дщи́цу, написа́, глаго́ля: Иоа́нн бу́дет и́мя ему́. И чудя́хуся вси. Отверзо́шася же уста́ его́ а́бие и язы́к его́, и глаго́лаше благословя́ Бо́га. И бысть на всех страх живу́щих о́крест их, и во всей стране́ иуде́йстей пове́даеми бя́ху вси глаго́ли си́и. И положи́ша вси слы́шавшии в се́рдце свое́м, глаго́люще: что у́бо отроча́ сие́ бу́дет? И рука́ Госпо́дня бе с ни́м. И Заха́рия оте́ц его́ испо́лнися Ду́ха Свя́та, и проро́чествова, глаго́ля: благослове́н Госпо́дь Бог Изра́илев, я́ко посети́ и сотвори́ избавле́ние лю́дем свои́м. И ты, отроча́, проро́к Вы́шняго нарече́шися, преды́деши бо пред лице́м Госпо́дним, угото́вати пути́ Его́. Отроча́ же растя́ше и крепля́шеся ду́хом, и бе в пусты́нях до дне явле́ния своего́ ко Изра́илю.

Лк.1:24–25, 57–68, 76, 80

По 50-м псалме

Слава: Моли́твами свята́го сла́внаго Проро́ка, Предте́чи и Крести́теля Госпо́дня Иоа́нна, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира, глас 2:

И́же из чре́ва ма́терня освя́щся / и проро́чества прие́м исполне́ние, / днесь от непло́дныя ражда́ется, / Госпо́дне прише́ствие пропове́дая я́сно: / пока́йтеся, прибли́жися бо Ца́рство Небе́сное.

Канона первый, творение Иоанна монаха,

со ирмосом на 8, глас 4. Песнь 1

Ирмос: Триста́ты кре́пкия, / Рожде́йся от Де́вы, / безстра́стия во глубине́ / души́ трича́стное потопи́, молю́ся, / да Тебе́, я́ко в тимпа́не, / во умерщвле́нии телесе́ / побе́дное воспою́ пе́ние.

Я́ко у́тро благоле́пно, Со́лнца предтеки́й, / непло́дныя прозябе́ние пропове́дает я́ве Де́вы Рождество́, / всей ны́не вселе́нней сия́ет конце́м просвеще́ние благоче́стия и благода́ти.

Проро́к Вы́шняго и́стинно нарече́шися, / предъи́деши бо пред лице́м Христа́, – вопие́т тебе́, сы́ну, Иоа́нне прехва́льне, / Ду́хом Заха́рия Пресвяты́м носи́м, – путь угото́вати Зижди́телю.

Глаго́лы Гаврии́ла Заха́рия слы́шав, веща́ния Боже́ственнаго, яви́ся непокори́в, / и молча́нием осужда́ется, реши́тся же внеза́пу от сего́: / глас бо роди́ся Сло́ва, Иоа́нн Предте́ча.

Богородичен: Град Бо́жий, Всецаря́ Богоприя́тное селе́ние, сокро́вище честно́е, / Богоро́дице Пренепоро́чная, сохрани́ достоя́ние Твое́, / при́сно восхваля́ющее Тя и чту́щее ве́рою Рождество́ Твое́.

Другий канон, творение Андреево,

на 6, глас тойже. Песнь 1

Ирмос: Наста́вльшему дре́вле Изра́иля, / бежа́щаго от рабо́ты фарао́новы, / и в пусты́ни пита́вшему, / пои́м Изба́вителю, Бо́гу на́шему, / я́ко просла́вися.

Молча́ние ста́рчо зако́ннаго писа́ния о́браз но́сит та́ин. / И́бо, прише́дши благода́ти, Моисе́й умолча́: / подоба́ше бо, прему́дрости сокро́вищу я́вльшуся, всем молча́ти.

В це́ркви кадя́щу свяще́ннику, А́нгел предста́ свы́ше, вопия́: / стра́нна рождества́ благове́стие, приидо́х, тебе́ нося́, ста́рче: / прии́меши бо от непло́дове рожде́ния плод, Крести́теля Христо́ва.

Что удиви́лся еси́, ста́рче? / Что, не ве́руя, стои́ши, глаго́лющему тебе́ сия́? / А́нгел бо есть веща́яй, а́ще и о́браз но́сит челове́ч. / Бу́ди нем у́бо на вре́мя, да́же до рождества́ Сло́ва гла́са.

И́же молча́ние Заха́риино, молча́ния положи́в о́браз зако́ну напи́санному / и тем показа́в ми покая́ния пропове́дника зову́ща, / гла́са вопию́щаго подава́ет, непло́дствующей сы́на.

О, пресла́вных веще́й Христо́ва Предте́чи! / И́же, пре́жде пеле́н позна́в плени́цы на́ша Разре́шшаго и наро́ды Освя́щша, / днесь, от Елисаве́ти роди́вся, разреша́ет отцу́ глас.

Богородичен: Тя, Бо́жие вмести́лище и мы́сленную ле́ствицу, е́юже сни́де Бог / и, вообра́жся, на́ше у́бо существо́ на Небеса́ возведе́, / вси я́ко спасе́нию Хода́таицу восхваля́ем.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3

Ирмос: Не му́дростию, и си́ лою, и бога́тством хва́лимся, / но Тобо́ю, О́тчею Ипоста́сною Му́дростию, Христе́: / несть бо свят, па́че Тебе́, Человеколю́бче.

Влады́чне у́бо от Де́вы соверша́ется рожде́ние, / но раба́ любе́зна от ста́рицы и непло́дныя ма́тере: / в ле́поту предти́чет у́бо чу́до чудеси́.

Ста́рица и непло́ды Де́ву Ма́терь лобза́ет, позна́вши нело́жно Сея́ Рождество́, / я́ко разреши́ся соу́з непло́дства Боже́ственным хоте́нием.

Богородичен: Неискусобра́чно Бо́га воплоще́нна ро́ждши, / страсте́й прило́ги обурева́емаго мя утверди́: / несть бо, Пречи́стая, ра́зве Тебе́ помо́щницы.

Ин. Ирмос: Утвержда́яй гром и созида́яй дух, / утверди́ мене́, Го́споди, / да Тя пою́ и́стинно / и творю́ во́лю Твою́, / я́ко несть свят, я́ко Ты, Бо́же наш.

Елисаве́ть, пре́жде непло́ды су́щи, Христе́, Це́рковь Твою́ прообража́ше, я́же от язы́к, / и, ро́ждши пресла́вно, па́ки показу́ет многоча́дну / непло́ды я́вльшуюся иногда́.

Пути́ у́бо испра́вль Госпо́дни, стезю́ проугото́вав, / покая́ния же плоды́ показа́л еси́ челове́ком и жи́зненному научи́л еси́ пути́, / проро́че и пропове́дниче Христо́в.

Елисаве́ть, днесь игра́ющи, но́сит тя, Предте́че, / на объя́тиях состаре́вшихся и вопие́т, хва́лящися: / несть свят, я́коже Ты, Го́споди Бо́же наш.

Богородичен: Пра́отцев разреши́ла еси́ печа́ль, ра́дость нам ро́ждшая, Животода́вца и Изба́вителя, / Его́же, Пречи́стая Богоро́дице, приле́жно моли́ спасти́ся ста́ду Твоему́.

Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Седален, глас 8.

Подобен: Повеле́нное:

Заха́риин глас све́тло разреши́ Словесе́ глас ро́ждься, Предте́ча, / и зако́на непло́дие всем показа́, зовы́й: / пока́йтеся, су́щии на земли́, се бо прии́де и яви́ся Иису́с, / вся хотя́ изба́вити от пе́рвыя кля́твы, просвеща́я Креще́нием. / Вои́стинну чу́до пресла́вно!

Слава, глас 4. Подобен: Удиви́ся:

Я́коже со́лнце све́тло, из чре́ва Елисаве́ти возсия́ нам Заха́риин сын, / и о́тчее разреши́ безгла́сие, / и всем лю́дем в дерзнове́нии мно́зе, испра́вите, – вопия́, – путь Госпо́день, / и́бо Той свободи́т и спасе́т к Нему́ притека́ющия. / Его́же пропове́дал еси́, Иоа́нне, моли́ спасти́ся душа́м на́шим.

И ныне, Богородичен: Обнови́ла еси́, Чи́стая, Боже́ственным Рождество́м Твои́м / истле́вшее во страсте́х земноро́дных ме́ртвенное существо́ / и воздви́гла еси́ вся от сме́рти к животу́ нетле́ния. / Те́мже Тя по до́лгу блажи́м вси, Де́во Препросла́вленная, я́коже прорекла еси́.

Песнь 4

Ирмос: Седя́й в сла́ве на Престо́ле Божества́ / во о́блаце ле́гце, / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.

Та́ин неизрече́нных предхо́дит та́инство / новосече́нием законоположе́ния есте́ственнаго, / боле́зни разреше́ние провозвеща́ющи, исправле́ние сея́, Христе́, и обоже́ние.

Иса́ия от Отца́ Сы́ну проро́чествова, воплоти́тися хотя́щему: / А́нгела земноро́дна равноа́нгельна се Аз посыла́ю пред лице́м Твои́м, зову́ща: / сла́ва, Христе́, си́ле Твое́й.

Служи́ти, я́ко раб Влады́це, роди́хся: / на се бо приидо́х, Сего́ возвести́ти прише́ствие, / я́ко да Де́вы Рождество́ предуве́рит, пресла́вно непло́дствующая ста́рица прозя́бши.

Богородичен: Свята́я Богоро́дица, в Ню́же всели́тися благоизво́ли, / я́ко во благово́нен дом, Сло́во О́тчее Пребоже́ственное, / не растле́ся утро́бою, ни поболе́, / и́бо роди́ Емману́ила, Бо́га и Челове́ка.

Ин. Ирмос: Услы́шах сла́вное смотре́ние Твое́, Христе́ Бо́же, / я́ко роди́лся еси́ от Де́вы, / да от ле́сти изба́виши зову́щия: / сла́ва си́ле Твое́й, Го́споди.

Покая́ние отве́рзеся твои́м рождество́м, Предте́че и пропове́дниче. / Ты бо еди́н пропове́дал еси́, взыва́я: / пока́йтеся, Ца́рство Небе́сное прибли́жися.

Де́вство утвержда́ется и целому́дрие торжеству́ет, / пусты́ня весели́тся и мир пра́зднует рождество́м твои́м, Предте́че.

Елисаве́ть ра́дуется, и Заха́рия веща́ет па́ки: / о́ба у́бо обновля́ются по ста́рости Иоа́нновым а́бие гла́сом и просвеща́ются.

Богородичен: Неопали́мую купину́ Тя законополо́жник зря́ще дре́вле, / Дании́л же го́ру святу́ю смотря́ше, еди́на Ма́ти Де́во, Влады́чице.

Катавасия: Седя́й в сла́ве на Престо́ле Божества́, / во о́блаце ле́гце, / прии́де Иису́с Пребоже́ственный, / нетле́нною дла́нию, и спасе́ зову́щия: / сла́ва, Христе́, си́ле Твое́й.

Песнь 5

Ирмос: Ны́не воста́ну, проро́чески рече́ Бог, / ны́не просла́влюся, ны́не вознесу́ся, / па́дшаго прие́м от Де́вы / и к све́ту у́мному вознося́й Моего́ Божества́.

Земля́ израсти́ всеи́стинна пропове́дника, / гла́са, всем пропове́дающа язы́ком Ду́ха, Де́вы Сы́на, / Пра́вду, с Небесе́ на нас прини́чущую ве́щию теле́сною.

Положи́ Госпо́дь всеи́стинна свети́льника тя Христо́ва, вся просвеща́ющаго, / еди́ны одева́юща вражду́ющия Ему́, я́ко ри́зою, в студ, / нело́жно Бо́жия Сло́ва Сы́на пропове́дающа.

Весели́тся вся тварь твои́м рождество́м, Боже́ственне: / ты бо зе́млен А́нгел, Предте́че, и Небе́сный челове́к показа́лся еси́, / Небе́снаго Бо́га провозвеща́я нам воплоще́нна.

Богородичен: От Тебе́ ражда́ется от Отца́ Сый, / с Тобо́ю при́сно, Сло́во присносу́щное и неразде́льное, я́ко Сын Единоро́дный, / и напосле́док от Де́вы То́йже от Свята́го воплоща́ется Ду́ха.

Ин. Ирмос: Возсия́й ми, Го́споди, свет повеле́ний Твои́х, / я́ко к Тебе́ дух мой у́тренюет и пое́т Тя: / Ты бо еси́ Бог наш, / и к Тебе́ прибега́ю, Царю́ ми́ра.

Звезду́ проугото́вал еси́, Пра́вды Со́лнце, / Крести́теля Твоего́ Иоа́нна, / от обеща́ния рожде́ннаго днесь и ро́ждшаго разре́шша глас.

Не веща́й, не сопроти́в глаго́ли, ста́рче освяще́ние, / Гаврии́л бо глаго́лет ти, пе́рвый во Арха́нгелех, / Бо́жия та́инства и е́же к нам Того́ сни́тие сказу́я.

Ста́рче, не неве́руй, Бог бо обещава́ет, / я́ко в ста́рости роди́ши сы́на, его́же о рождестве́ мно́зи возра́дуются, / той бо прии́дет си́лою Илиино́ю.

Проро́че, пропове́дниче, Предте́че, е́же от непло́ды прозябе́ние, / возвести́телю покая́ния, пусты́нное овча́, Све́та свети́льниче, / о всех моли́, чту́щих тя ве́рно.

Богородичен: Я́ко дверь непроходи́му, и купину́ неопали́му, / и несеко́му го́ру, от нея́же ка́мень усече́ся, / И́же из Тебе́ воплоща́емый, воспева́ем, Влады́чице, Ма́ти всех Творца́.

Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Песнь 6

Ирмос: Приидо́х во глубины́ морски́я, / и потопи́ла мя есть бу́ря мно́гих грехо́в, / но, я́ко Бог, из глубины́ возведи́ живо́т мой, Многоми́лостиве.

Бо́га Сло́ва позна́л еси́, я́ко проро́к, в ма́терней утро́бе, / и, сея́ язы́ка употреби́в, богосло́виши в те́мне черто́зе, / обожа́емь Све́том Непристу́пным.

Немо́лчно, я́ко глас вопию́щаго, Изба́вителя ми́ра, Крести́телю, моля́ не преста́й / душе́вное разреши́ти непло́дие пою́щих твое́ рождество́.

Богородичен: Непристу́пнаго Божества́ селе́ние, Чи́стая, Твоя́ утро́ба яви́ся, о Богоро́дице, / на ню́же без боя́зни Небе́снии чи́нове взира́ти не мо́гут.

Ин. Ирмос: Бу́ря мя помышле́ний, пости́гши, / во глубину́ низвлачи́т мя безме́рных грехо́в, / но Ты, Упра́вителю Благи́й, / предвари́в, упра́ви, / я́ко проро́ка, и спаси́ мя.

Днесь пусты́нный граждани́н Иоа́нн ражда́ется, / покая́ния пропове́дник и благода́ти свиде́тель и́стинен, / Предте́ча Сло́ва и Све́ту предсия́ющая звезда́.

Днесь секи́ра, искова́вшися, посече́ние предлага́ет душа́м непло́дия, / и насажда́ет плоды́ доброде́тельныя, / преды́дет тве́рдо в рождестве́ твое́м, Предте́че.

Возра́довася Иорда́н пресла́вно и игра́ет, науча́яся, / Иоа́нна слы́ша, от непло́дна рожде́на чре́ва, / мо́ре же лику́ет водны́ми игра́нии.

Свети́льник, Све́та прише́ствие предте́к, / пропове́да А́гнца Бо́жия, Спа́са, / свет возсия́вшаго земли́, естества́ же всего́ духо́вне преджре́на.

Богородичен: Бе́здну ми́лости ро́ждшая, / страсте́й мои́х бе́здну пучи́ною щедро́т Твои́х потопи́вши, / ту́чу от души́ пода́ждь ми слез, Богороди́тельнице Всенепоро́чная.

Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Кондак, глас 3.

Подобен: Де́ва днесь:

Пре́жде непло́ды днесь Христо́ва Предте́чу ражда́ет, / и той есть исполне́ние вся́каго проро́чества: / Его́же бо проро́цы пропове́даша, / на Сего́ во Иорда́не ру́ку положи́в, / яви́ся Бо́жия Сло́ва проро́к, пропове́дник, вку́пе и Предте́ча.

Икос: Восхва́лим ны́не Госпо́дня Предте́чу, / его́же свяще́ннику Елисаве́ть роди́ из ложе́сн непло́дных, но не без се́мене: / Христо́с бо еди́н вмести́лище про́йде непроходи́мо без се́мене. / Иоа́нна непло́ды роди́, без му́жа же сего́ не роди́, / Иису́са же, осене́нием Отца́ и Ду́ха Бо́жия, Де́ва роди́ Чи́стая. / Но Безсе́менному яви́ся от непло́дныя проро́к и пропове́дник, вку́пе и Предте́ча.

Песнь 7

Ирмос: Ю́ноши три в Вавило́не, / веле́ние мучи́телево на бу́йство прело́жше, / посреде́ пла́мене вопия́ху: / благослове́н еси́, Го́споди, / Бо́же оте́ц на́ших.

Бя́ше пе́рвее во мра́це вся́ко земноро́дных естество́, о Предте́че, / но у́тро, вопия́, яви́лся еси́: / благослове́н еси́, Го́споди, Бо́же оте́ц на́ших.

Неду́говавшее исцели́ естество́ все, сла́вное от непло́дныя твое́ рождество́, / научи́вшее, Предте́че, пе́ти: / благослове́н еси́, Го́споди, Бо́же оте́ц на́ших.

Роди́лся еси́, Предте́че, от непло́дныя, / прии́де бо всеи́стинно, зако́ну непло́дствующу, благода́ть, Христу́ пою́щи: / благослове́н еси́, Го́споди, Бо́же оте́ц на́ших.

Богородичен: Де́во Благослове́нная, моли́ о нас, моля́щих Тя, / на Тя бо упова́ем вси и Тебе́ вопие́м: / Влады́чице, не пре́зри рабо́в Твои́х.

Ин. Ирмос: В пещи́ авраа́мстии о́троцы перси́дстей, / любо́вию благоче́стия па́че, / не́жели пла́менем, опаля́еми, взыва́ху: / благослове́н еси́ в хра́ме сла́вы Твоея́, Го́споди.

Заха́рия, умолча́в на вре́мя, возвести́ молча́ние писа́нием / и, па́ки провеща́в, рождество́м твои́м, Предте́че, / Ду́ха благода́ть возвеща́ет пресла́вно.

Це́ркви подо́бится непло́ды безча́дная, Елисаве́ть всечестна́я, / я́же пе́рвее у́бо су́щи тре́бами и сква́рами очерне́на, / ны́не же хва́лящися и добро́тою и рожде́нием.

Предте́чи рождество́м остри́тся днесь секи́ра духо́вная, / е́юже вся посека́ются страсте́й взыгра́ния, / та́йно же процвета́ют плоды́ покая́ния.

Я́ко ве́тхаго и но́ваго хода́тая тя, Предте́че, / и стези́ исправля́юща Христо́вы, / очища́ющаго согреше́ний гумно́ духо́вною лопа́тою, почита́ем, Иоа́нне.

И́же пред Со́лнцем те́кшаго, Христо́м Бо́гом на́шим, Иоа́нна сла́внаго, / я́ко звезду́, Предте́чу и покая́ния пропове́дника воспое́м вси, от непло́дныя проше́дшаго.

Богородичен: Во чре́во Твое́, Де́во, безсе́менно все́льшася, / и ро́ждшася за неизрече́нное и коне́чное смире́ние, и нас ради Обнища́вшаго / о всех моли́ти не преста́й, Богоро́дице.

Катавасия: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Песнь 8

Ирмос: Изба́вителю всех Всеси́льне, / посреде́ пла́мене благоче́ствовавшия, / снизше́д, ороси́л еси́ / и научи́ л еси́ пе́ти: / вся дела́, благослови́те, по́йте Го́спода.

Законополо́жник раб бя́ше Моисе́й, Иису́с же – Бог Заве́та Но́ваго, / ны́не же обои́х Предте́ча пое́т, я́ко хода́тай: / вся дела́, благослови́те Госпо́дня Го́спода.

От пу́ста чре́ва го́рлица прии́де, я́ко богосажде́нная дубра́ва, / ны́не принесе́ Це́ркви Предте́чу Христо́ва и воспева́ет: / вся дела́, благослови́те Госпо́дня Го́спода.

Богоно́снии лю́дие, язы́к свят, го́рлице Христо́вей уподо́битеся / и медото́чно воспо́йте, в целому́дрии живу́ще: / вся дела́, благослови́те Госпо́дня Го́спода.

Троичен: Тричи́сленным све́том озаря́еми, Несозда́нное Еди́ное Божество́, / немо́лчными усты́ правосла́вно вопию́ще, почти́м: / вся дела́, благослови́те Госпо́дня Го́спода.

Ин. Ирмос: Вся́ческая, Влады́ко, прему́дростию Твое́ю соста́вил еси́, / земли́ же па́ки утверди́л еси́, я́коже ве́си, дно, / основа́нием водрузи́вый на вода́х безме́рных. / Тем вси вопие́м, воспева́юще: / благослови́те, дела́ Госпо́дня, непреста́нно Го́спода.

Позна́л еси́, Предте́че, Ему́же поклони́лся еси́ пре́жде рождества́ / и пре́жде пеле́н твои́х, Христа́ Жизнода́вца, / и взыгра́ньми показа́л еси́ Сего́, Го́спода Твоего́ наре́к, / взаи́м взем ма́терний язы́к к пе́нию Христа́, Бо́га на́шего.

Концы́ днесь вселе́нстии предпра́зднуют, / ра́дуются А́нгели и ду́си пра́ведных, / живу́щии веселя́тся, уме́ршии же па́ки, Иоа́нну ро́ждшуся, / прие́мше им про́поведь всех Спа́са Го́спода.

Подо́бяся днесь Иоа́нну, Иорда́н мо́крыми быстрина́ми игра́ше пресла́вно, / слы́ша ражда́ема равноа́нгельнаго житие́м от ста́рицы непло́дны, / исправля́ющаго пути́ и стези́ Госпо́дни и мир крести́вшаго.

Начерта́ днесь Заха́рия на дсце / и́мя богонарече́нное проро́ка и Предте́чи, молча́ же воззва́: / Иоа́нн да нарече́тся рожде́йся мне на ста́рость. / Подо́бно есть от обеща́ния ро́ждшемуся стра́нное зва́ние.

Богородичен: Кре́пко утеше́ние и непосты́дну наде́жду, / сте́ну необори́му и Боже́ственно предста́тельство лю́дие Твои́ и́мут Тя, / и́же Тя сла́вят, Де́во, и, спаса́еми, зову́т приле́жно: / благослови́те, вся дела́ Госпо́дня, непреста́нно Го́спода.

Катавасия: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Песнь 9

Ирмос: Сокрове́нное Бо́жие неизрече́нное / в Тебе́ соверша́ется я́вственное та́инство, / Де́во Пречи́стая, / и́бо Бог из Тебе́ воплоти́ся за милосе́рдие. / Те́мже Тя я́ко Богоро́дицу велича́ем.

Се глас Предте́чи непло́дным и пусты́м предста́ сердца́м вопию́щ: / путь Христо́в ны́не угото́вите, я́ко во сла́ве гряде́т, / Ему́же повину́ющеся, велича́ем.

Я́коже дре́вле Ду́хом Пресвяты́м я́ве пропове́дал еси́ / Сы́на, Предте́че, А́гнца Бо́жия, ми́ра взе́млющаго грехи́, / ста́ду твоему́ согреше́ний разреше́ние испроси́.

Троичен: Еди́ницу Тричи́сленную, Тро́ицу Единосу́щную, / правосла́вно пою́ще, ве́рнии, просла́вим, / богоде́тельне нас озаря́ющую / и светлостьми́ незаходи́маго све́та исполня́ющую ду́ши на́ша.

Богородичен: Все́ми влады́чествующая творе́нии, лю́дем Твои́м да́руй побе́ду одоле́ния, / непокори́ваго подложи́ под но́зе во́инству: / да Тя я́ко Богоро́дицу велича́ем.

Ин. Ирмос: Я́ко сотвори́ Мне вели́чия Си́льный, / и свя́то И́мя Его́, / и ми́лость Его́ / в род и род боя́щимся Его́.

В тебе́ вели́кое се и пресла́вное Бог сотвори́ зна́мение, свяще́нниче: / по ста́рости бо сы́на и по умерщвле́нии удо́в ражда́еши Предте́чу.

Да слы́шат непло́ды и да воспою́т Бо́га, / се бо Елисаве́ть вопие́т: / по ста́рости сы́на и по умерщвле́нии удо́в ражда́ю Предте́чу.

Весели́ся, Заха́рие, и ра́дуйся ны́не о Бо́зе: / се бо Елисаве́ть сосцы́ пита́ет по ста́рости сы́на / и по умерщвле́нии удо́в ражда́ет Предте́чу.

Сла́ва Да́вшему непло́дней по ста́рости плод, ста́рцу и проро́ку сы́на, / гото́вяща Ему́ лю́ди соверше́нны, / Боже́ственнаго Предте́чу.

Богородичен: В Тя всели́вся, И́же в не́дрех сый Оте́ческих роди́ся без стра́сти и тли / и приведе́ нас за милосе́рдие Отцу́ и Боже́ственному Ду́ху.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.

Светилен.

Подобен: Жены́, услы́шите:

Предте́чево днесь радостотво́рное рожде́ние / се́тование реши́т о́тча безгла́сия и ро́ждшия непло́дство, / возвеща́ет же настоя́щую ра́дость и весе́лие. / Те́мже и вся тварь све́тло то́е пра́зднует. (2)

Богородичен. Подобен: Проро́цы пропове́даша, апо́столи научи́ша / и му́ченицы богому́дренно Твоего́ Сы́на, Богоро́дице, я́сно испове́даша, Бо́га всех, Пречи́стая. / С ни́ми же Тя велича́ем, Тобо́ю изба́вльшеся дре́вняго осужде́ния.

На хвалитех стихиры на 4, глас 8.

Подобен: О, пресла́внаго чудесе́:

О, пресла́внаго чудесе́! / Из престаре́лыя ма́тере / Бо́жия Сло́ва провозве́стник, / Иоа́нн днесь произы́ти тщи́тся, / свя́занный язы́к ясне́йше рождество́м глаго́лати явля́ет. / О, неизглаго́ланнаго Твоего́ смотре́ния, Влады́ко! / И́мже, Христе́, / спаси́ ду́ши на́ша, / я́ко еди́н Милосе́рд.

О, пресла́внаго чудесе́! / В рожде́нных жена́ми / проро́к же превы́шший / ма́терняго непло́дства разреша́ет осужде́ние, / и́же ду́хом и си́лою прише́д Илиино́ю / путь Госпо́день испра́вити. / О, неизглаго́ланнаго Твоего́ благоутро́бия, Влады́ко! / И́мже, Христе́, спаси́ ду́ши на́ша, / я́ко еди́н Милосе́рд.

О, пресла́внаго чудесе́! / Пропове́давый Христо́во к челове́ком истоща́ние / превы́ше показу́ет всех Того́ гла́сом / и ро́ждшия разреша́ет непло́дие / си́лою Боже́ственною / и Заха́риин язы́к. / О, вели́ких Твои́х чуде́с, Влады́ко! / И́миже, Христе́, / спаси́ чту́щия Твоего́ вели́каго Предте́чу.

О, пресла́внаго чудесе́! / В рожде́нных жена́ми / проро́к и Предте́ча превы́ше явля́ется, / проро́ков же превы́шший / и прише́ствия Христо́ва предвозве́стник, / предвзыгра́вый во утро́бе ма́терни. / О, зело́ вели́ких Твои́х дарова́ний, Человеколю́бче! / И́миже, Христе́, спаси́ ду́ши на́ша, / я́ко Всеси́лен.

Слава, глас 6. Анатолиево: Звезда́ звезд, Предте́ча / от непло́дныя утро́бы на земли́ ражда́ется днесь, / Иоа́нн Боговожделе́нный, / и Христо́ву явля́ет зарю́, восто́к свы́ше, / в пра́вое ве́рных прехожде́ние.

И ныне, Богородичен, глас тойже: Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся: / моли́ся, Влады́чице, со святы́ми апо́столы / поми́ловати ду́ши на́ша.

Славословие великое. И отпуст.

Блаженны Предтечи перваго канона, песнь 3-я на 4, и втораго, песнь 6-я на 4.

По входе тропарь храма Христова и Богородицы, аще есть, таже тропарь Предтечи. Посем кондак храма Христова. Сла́ва, Предтечи. И ны́не, храма Богородицы. Аще несть храма Богородицы, И ны́не, кондак храма Христова. Аще несть храма Христова, глаголем тропарь прежде Предтечи. Сла́ва, кондак его. И ны́не, Предста́тельство христиа́н:

Тропарь Предтечи, глас 4:

Проро́че и Предте́че прише́ствия Христо́ва, / досто́йно восхвали́ти тя недоуме́ем мы, любо́вию чту́щии тя: / непло́дство бо ро́ждшия и о́тчее безгла́сие разреши́ся / сла́вным и честны́м твои́м рождество́м, / и воплоще́ние Сы́на Бо́жия ми́рови пропове́дуется.

Кондак Предтечи, глас 3.

Подобен: Де́ва днесь:

Пре́жде непло́ды днесь Христо́ва Предте́чу ражда́ет, / и той есть исполне́ние вся́каго проро́чества: / Его́же бо проро́цы пропове́даша, / на Сего́ во Иорда́не ру́ку положи́в, / яви́ся Бо́жия Сло́ва проро́к, пропове́дник, вку́пе и Предте́ча.

Прокимен, Апостол и Евангелие чтем Предтечи един, такожде и причастен.

Прокимен, глас 7:

Возвесели́тся пра́ведник о Го́споде / и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́.

Апостол к Римляном, зачало 112

Бра́тие, ны́не ближа́йшее нам спасе́ние, не́жели егда́ ве́ровахом. Нощь у́бо пре́йде, а день прибли́жися: отложи́м у́бо дела́ те́мная, и облече́мся во ору́жие све́та. Я́ко во дни, благообра́зно да хо́дим, не козлогласова́нии и пия́нствы, не любодея́нии и студодея́нии, не рве́нием и за́вистию, но облецы́теся Го́сподем на́шим Иису́с Христо́м, и пло́ти уго́дия не твори́те в по́хоти. Изнемога́ющаго же в ве́ре прие́млите, не в сомне́ние помышле́ний. Ов бо ве́рует я́сти вся, а изнемога́яй зе́лия да яст. Яды́й не яду́щаго да не укоря́ет, и не яды́й яду́щаго да не осужда́ет, Бог бо его́ прия́т. Ты кто еси́ судя́й чужде́му рабу́? Своему́ Го́сподеви стои́т, или́ па́дает, ста́нет же, си́лен бо есть Бог поста́вити его́.

Рим.13:11Б–14:4

Аллилуиа, глас 1

Стих: Благослове́н Госпо́дь, Бог Изра́илев, я́ко посети́ и сотвори́ избавле́ние лю́дем Свои́м. Стих: И ты, отроча́, проро́к Вы́шняго нарече́шися.

Евангелие от Луки, зачало 1

Поне́же у́бо мно́зи нача́ша чини́ти по́весть о изве́ствованных в нас ве́щех, я́коже преда́ша нам, и́же испе́рва самови́дцы и слуги́ бы́вшии словеси́, изво́лися и мне после́довавшу вы́ше всех испы́тно, по ря́ду писа́ти тебе́, держа́вный Фео́филе, да разуме́еши, о ни́хже научи́лся еси́ словесе́х утвержде́ние. Бысть во дни И́рода, царя́ Иуде́йска, иере́й не́кий, и́менем Заха́рия, от дневны́я чреды́ Авиа́ни, и жена́ его́ от дще́рей Ааро́новех, и и́мя ей Елисаве́ть. Бе́ста же пра́ведна о́ба пред Бо́гом, ходя́ща во всех за́поведех и оправда́ниих Госпо́дних безпоро́чна. И не бе и́ма ча́да, поне́же Елисаве́ть бе непло́ды, и о́ба заматоре́вша во днех свои́х бе́ста. Бысть же служа́щу ему́ в чину́ чреды́ своея́ пред Бо́гом, по обы́чаю свяще́нничества, ключи́ся ему́ покади́ти вшед в це́рковь Госпо́дню, и все мно́жество люде́й бе моли́тву де́я вне, в год фимиа́ма. Яви́ся же ему́ А́нгел Госпо́день, стоя́ одесну́ю олтаря́ кади́льнаго, и смути́ся Заха́рия ви́дев, и страх нападе́ нань. Рече́ же к нему́ А́нгел: не бо́йся, Заха́рие, зане́ услы́шана бысть моли́тва твоя́, и жена́ твоя́ Елисаве́ть роди́т сы́на тебе́, и нарече́ши и́мя ему́ Иоа́нн, и бу́дет тебе́ ра́дость и весе́лие, и мно́зи о рождестве́ его́ возра́дуются. Бу́дет бо ве́лий пред Го́сподем, и вина́ и сике́ра не и́мать пи́ти, и Ду́ха Свята́го испо́лнится еще́ из чре́ва ма́тере своея́. И мно́ги от сыно́в изра́илевых обрати́т ко Го́споду Бо́гу их. И той преды́дет пред Ним ду́хом и си́лою Илиино́ю, обрати́ти сердца́ отце́м на ча́да, и проти́вныя в му́дрости пра́ведных, угото́вати Го́сподеви лю́ди соверше́ны. И рече́ Заха́рия ко А́нгелу: по чесому́ разуме́ю сие́? Аз бо есмь стар, и жена́ моя́ заматоре́вши во днех свои́х. И отвеща́в А́нгел, рече́ ему́: аз есмь Гаврии́л предстоя́й пред Бо́гом, и по́слан есмь глаго́лати к тебе́ и благовести́ти тебе́ сия́. И се бу́деши молчя́, и не моги́й проглаго́лати, до него́же дне бу́дут сия́, зане́ не ве́ровал еси́ словесе́м мои́м, я́же сбу́дутся во вре́мя свое́. И бе́ша лю́дие жду́ще Заха́рию, и чудя́хуся косня́щу ему́ в це́ркви. Изше́д же не можа́ше глаго́лати к ним, и разуме́ша, я́ко виде́ние ви́де в це́ркви, и той бе помава́я им, и пребыва́ше нем. И бысть я́ко испо́лнишася дни́е слу́жбы его́, и́де в дом свой. По сих же днех зача́т Eлисаве́т, жена́ Заха́риина, и тая́шеся ме́сяц пять, глаго́лющи: я́ко та́ко мне сотвори́ Госпо́дь во дни, в ня́же призре́ отъя́ти поноше́ние мое́ в челове́цех. Елисаве́ти же испо́лнися вре́мя роди́ти ей, и роди́ сы́на. И слы́шаша о́крест живу́щии и у́жики ея́, я́ко возвели́чил есть Госпо́дь ми́лость свою́ с не́ю: и ра́довахуся с не́ю. И бысть во осмы́й день, приидо́ша обре́зати отроча́, и нарица́ху е и́менем отца́ его́, Заха́рию. И отвеща́вши ма́ти его́, рече́: ни, но да нарече́тся Иоа́нн. И ре́ша к ней: я́ко никто́же есть в родстве́ твое́м, и́же нарица́ется и́менем тем. И помава́ху отцу́ его́, е́же ка́ко бы хоте́л нарещи́ е. И испро́шь дщи́цу, написа́, глаго́ля: Иоа́нн бу́дет и́мя ему́. И чудя́хуся вси. Отверзо́шася же уста́ его́ а́бие и язы́к его́, и глаго́лаше благословя́ Бо́га. И бысть на всех страх живу́щих о́крест их, и во всей стране́ иуде́йстей пове́даеми бя́ху вси глаго́ли си́и. И положи́ша вси слы́шавшии в се́рдце свое́м, глаго́люще: что у́бо отроча́ сие́ бу́дет? И рука́ Госпо́дня бе с ни́м. И Заха́рия оте́ц его́ испо́лнися Ду́ха Свя́та, и проро́чествова, глаго́ля: благослове́н Госпо́дь Бог Изра́илев, я́ко посети́ и сотвори́ избавле́ние лю́дем свои́м. И ты, отроча́, проро́к Вы́шняго нарече́шися, преды́деши бо пред лице́м Госпо́дним, угото́вати пути́ Его́. Отроча́ же растя́ше и крепля́шеся ду́хом, и бе в пусты́нях до дне явле́ния своего́ ко Изра́илю.

Лк.1:5–25, 57–68, 76, 80

Причастен:

В па́мять ве́чную бу́дет пра́ведник, / от слу́ха зла не убои́тся. / Аллилу́иа, трижды.

Ряд же, Апостол и Евангелие вычитаем напреди. Подобает ведати, яко аще случится праздник Иоанна Предтечи в неделю, предваряются вся воскресная.

Молитва:

Крести́телю Христо́в, пропове́дниче покая́ния, ка́ющагося не пре́зри мене́, но, совокупля́яся с во́и Небе́сными, моли́ся ко Влады́це за мене́, недосто́йнаго, уны́лаго, немощна́го и печа́льнаго, во мно́гия бе́ды впа́дшаго, утружде́ннаго бу́рными по́мыслы ума́ моего́. Аз бо есмь верте́п злых дел, отню́д не име́яй конца́ грехо́вному обы́чаю: пригвожде́н бо есть ум мой земны́м веще́м. Что сотворю́, не вем, и к кому́ прибе́гну, да спасе́на бу́дет душа́ моя́, то́кмо к тебе́, святы́й Иоа́нне, благода́ти тезоимени́те, я́ко тя пред Го́сподем, по Богоро́дице, вем бо́льша бы́ти рожде́нных всех: ты бо сподо́бился еси́ косну́тися верху́ Царя́ Христа́, взе́млющаго грехи́ ми́ра, А́гнца Бо́жия. Его́же моли́ за гре́шную мою́ ду́шу, да поне́ отны́не, в пе́рвый на́десять час, понесу́ тяготу́ благу́ю и прииму́ мзду с после́дними. Ей, Крести́телю Христо́в, честны́й Предте́че, кра́йний проро́че, пе́рвый во благода́ти му́чениче, по́стников и пусты́нников наста́вниче, чистоты́ учи́телю и бли́жний дру́же Христо́в, тя молю́, к тебе́ прибега́ю, не отри́ни мене́ от твоего́ заступле́ния, но возста́ви мя, па́дшагося мно́гими грехи́: обнови́ ду́шу мою́ покая́нием, я́ко вторы́м креще́нием, поне́же обоего́ нача́льник еси́: креще́нием омыва́яй грех, покая́ние же пропове́дуяй во очище́ние кого́ждо дел скве́рных: очи́сти у́бо мя, грехми́ оскверне́ннаго и пону́ди вни́ти, а́може ничто́же скве́рно вхо́дит в Ца́рствие Небе́сное. Ами́нь.