Месяца марта в 25-й день

Ведати подобает, яко навечерие Благовещения аще случится в субботу, или неделю, поется сице.

На Го́споди, воззва́х: стихиры на 4, глас 4.

Подобен: Зва́нный свы́ше:

Уще́дрив тварь Зижди́тель, / милосе́рдием же Свои́м преклоня́емь, / во утро́бу Де́вы Богоотрокови́цы всели́тися спеши́т. / К Не́йже вели́кий прии́де Арха́нгел, – / ра́дуйся, – провещава́я, – Богора́дованная, / ны́не с Тобо́ю Бог наш. / Не ужаса́йся мене́, Царе́ва Архистрати́га, / обрела́ бо еси́ благода́ть, / ю́же погуби́ Е́ва пре́жде, прама́ти Твоя́, / и зачне́ши и роди́ши / Отцу́ Единосу́щнаго. (2)

Стра́нно есть сло́во Твое́ и воззре́ние, / стра́нны Твои́ глаго́лы и возвеще́ния, – / Мари́я ко А́нгелу, – / да не прельсти́ши Мене́, / Де́ва бо есмь, бра́ка не зна́ющи, / глаго́леши, я́ко зачну́ Необыме́ннаго, / и ка́ко вмести́т утро́ба Моя́, / Его́же вели́чества Небе́сная вмести́ти не мо́гут? / Авраа́мов кров да научи́т Тя ны́не, / Бо́га вмести́вый, / прообразу́ющий издале́ча, Де́во, / Богоприя́тную Твою́ утро́бу.

В Назаре́т ны́не град прише́д, / град Тя одушевле́н Царя́ Христа́ / Гаврии́л лобыза́ет, вопия́ Тебе́: / ра́дуйся, Благослове́нная Богора́дованная, / прии́меши во утро́бе Твое́й Бо́га воплоща́ема / и Тобо́ю челове́чество / на дре́внее блаже́нство за благоутро́бие призыва́юща. / Благослове́н чре́ва Твоего́ / Боже́ственный Плод безсме́ртный, / подая́й ми́ру очище́ние / и ве́лию ми́лость.

Слава, и ныне, глас 1: В шесты́й ме́сяц Архистрати́г по́слан бысть / к Тебе́, Де́ве и Чи́стей, / возвести́ти Тебе́ сло́во спасе́ния, / вку́пе же и зва́ти Тебе́: / ра́дуйся, Обра́дованная, Госпо́дь с Тобо́ю, / роди́ши Сы́на Преве́чнаго из Отца́, / и спасе́т лю́ди Своя́ от грех их.

На стиховне стихиры, глас 8.

Подобен: О, пресла́вного чудесе́:

Нача́льник Вы́шних сил, / с Небе́с в Назаре́т слете́в, / Де́ву лобыза́ет, – / ра́дуйся, – глаго́ля, – / колесни́це чи́стая Божества́: / Тя от ве́ка Бог возлюби́, в жили́ще изво́ли. / Раб Влады́чень, к Тебе́ прише́льствуяй есмь вопи́ти: / роди́ши бо Го́спода / и нетле́нна пребу́деши.

Стих: Благовести́те день от дне / спасе́ние Бо́га на́шего.

Что твой вид о́гненный? – / Гаврии́лу Чи́стая со удивле́нием рече́, – / что твое́ досто́инство и слове́с си́ла? / Зача́ти Сы́на провещава́еши Ми, / Аз же иску́са му́жеска не вем, / отыди́ дале́че, не прельсти́ши челове́че, / я́коже пре́жде Е́ву прама́терь змий льсти́вый.

Стих: Воспо́йте Го́сподеви песнь но́ву, / воспо́йте Го́сподеви, вся земля́.

Дух Бо́жий Пресвяты́й / прии́дет, Пречи́стая, на Тя, / Боговмести́мая Влады́чице, / и си́ла Вы́шняго осени́т Тя, / и роди́ши Сы́на, / соблюда́юща Твое́ де́вство неврежде́нно. / Сей Сын есть неродосло́вим, / Сей, я́влься, спасе́т лю́ди Своя́, / я́ко благоизво́ли.

Слава, и ныне, глас 4: В шесты́й ме́сяц по́слан бысть Арха́нгел / к Де́ве Чи́стей / и, ра́доватися Ей прире́к, / благовести́ из Нея́ Изба́вителю проити́. / Те́мже, прие́мши целова́ние,

/ зача́т Тя, Преве́чнаго Бо́га, / несказа́нно благоволи́вшаго вочелове́читися / во спасе́ние душ

на́ших.

Тропарь, глас 4:

Днесь спасе́ния на́шего глави́зна / и е́же от ве́ка та́инства явле́ние: / Сын Бо́жий Сын Де́вы быва́ет, / и Гаврии́л благода́ть благовеству́ет. / Те́мже и мы с ним Богоро́дице возопии́м: / ра́дуйся, Благода́тная, / Госпо́дь с Тобо́ю.

Сий праздник начинается от четвертка 3-я недели святых постов и восходит до среды светлыя седмицы. И аще есть пост, начинаем вечерню без кафизмы и без поклонов.

На Го́споди, воззва́х: ставим стихов 10, и поем Триоди самогласен дне дважды, и подобны 3.

И праздника 3, повторяюще две, глас 6.

Подобен: Всю отложи́вше:

Сове́т преве́чный / открыва́я Тебе́, Отрокови́це, / Гаврии́л предста́, / Тебе́ лобза́я и веща́я: / ра́дуйся, земле́ ненасе́янная; / ра́дуйся, купино́ неопали́мая; / ра́дуйся, глубино́ неудобозри́мая; / ра́дуйся, мо́сте, к Небесе́м преводя́й, / и ле́ствице высо́кая, / ю́же Иа́ков ви́де; / ра́дуйся, Боже́ственная ста́мно ма́нны; / ра́дуйся, разреше́ние кля́твы; / ра́дуйся, Ада́мово воззва́ние: / с Тобо́ю Госпо́дь. (2)

Явля́ешися Мне, я́ко челове́к, – / глаго́лет нетле́нная Отрокови́ца ко Архистрати́гу, – / и ка́ко веща́еши глаго́лы па́че челове́ка? / Со Мно́ю бо, рекл еси́, Бо́гу бы́ти / и всели́тися во утро́бу Мою́. / И ка́ко бу́ду, глаго́ли Ми, / вмести́лище простра́нное и ме́сто свяще́ния / Херуви́мы Превосходя́щаго? / Да не прельсти́ши Мене́ ле́стию, / не бо позна́х сла́сти, / бра́ку есмь неприча́стна, / ка́ко у́бо Отроча́ рожду́? (2)

Бог иде́же хо́щет, / побежда́ется естества́ чин, – / глаго́лет безпло́тный, – / и я́же па́че челове́ка содева́ются, / мои́м ве́руй и́стинным глаго́лом, / Всесвята́я Пренепоро́чная. / Она́ же возопи́: / бу́ди Мне ны́не по глаго́лу твоему́, / и рожду́ Безпло́тнаго, / плоть от Мене́ заи́мствовавшаго, / я́ко да возведе́т челове́ка, / я́ко еди́н си́лен, / в пе́рвое достоя́ние срастворе́нием.

Слава, и ныне, глас тойже,

самогласен. Иоанна монаха:

По́слан бысть с Небесе́ Гаврии́л Арха́нгел / благовести́ти Де́ве зача́тие / и, прише́д в Назаре́т, / помышля́ше в себе́, чудеси́ удивля́яся: / о, ка́ко, в Вы́шних непостижи́м Сый от Де́вы ражда́ется! / Име́яй престо́л Не́бо и подно́жие зе́млю / во утро́бу вмеща́ется Деви́чу! / На Него́же шестокрила́тии и многоочи́тии зре́ти не мо́гут, / сло́вом еди́нем от Сея́ воплоти́тися благоизво́ли. / Бо́жие есть сло́во настоя́щее. / Что у́бо стою́ и не глаго́лю Де́ве: / ра́дуйся, Благода́тная, Госпо́дь с Тобо́ю; / ра́дуйся, Чи́стая Де́во; / ра́дуйся, Неве́сто Неневе́стная; / ра́дуйся, Ма́ти Живота́, / благослове́н Плод чре́ва Твоего́!

Вход. Све́те Ти́хий: Прокимен, и чтение дне, и праздника три.

Бытия́ чте́ние

Изы́де Иа́ков от студенца́ кля́твеннаго и и́де в Харра́нь. И обре́те ме́сто, и спа та́мо: за́йде бо со́лнце, / и взят от ка́мения ме́ста того́, и положи́ возгла́вие себе́, и спа на ме́сте о́ном. И сон ви́де. И се ле́ствица, утвержде́на на земли́, eя́же глава́ досяза́ше до небе́с, и А́нгели Бо́жии восхожда́ху и низхожда́ху по ней. Госпо́дь же утвержда́шеся на ней, и рече́: Аз Бог Авраа́мов, отца́ твоего́, и Бог Исаа́ков, не бо́йся: земля́, иде́же ты спи́ши на ней, тебе́ дам ю и се́мени твоему́. И бу́дет се́мя твое́, я́ко песо́к земны́й, и распространи́тся на мо́ре, и ли́ву, и се́вер, и на восто́ки; и возблагословя́тся о тебе́ вся коле́на земна́я и о се́мени твое́м. И се Аз с тобо́ю, сохраня́яй тя на вся́ком пути́, а́може а́ще по́йдеши. И возвращу́ тя в зе́млю сию́, я́ко не и́мам тебе́ оста́вити, до́ндеже сотвори́ти Ми вся, ели́ка глаго́лах тебе́. И воста́ Иа́ков от сна своего́, и рече́: я́ко eсть Госпо́дь на ме́сте сем, аз же не ве́дех. И убоя́ся, и рече́: я́ко стра́шно ме́сто сие́; несть сие́, но дом Бо́жий и сия́ врата́ Небе́сная.

Быт.28:10–17

Прoро́чества Иезеки́илева чте́ние

Та́ко глаго́лет Госпо́дь: бу́дет от дне осма́го и про́чее, сотворя́т иере́и на олтари́ всесожже́ния ва́шего и я́же спасе́ния ва́шего, и прииму́ вы, глаго́лет Адонаи́ Госпо́дь. И обрати́ мя на путь врат святы́х вне́шних, зря́щих на восто́ки, и сия́ бя́ху затворе́на. И рече́ Госпо́дь ко мне: врата́ сия́ затворе́на бу́дут и не отве́рзутся, и никто́же про́йдет сквозе́ их; я́ко Госпо́дь Бог Изра́илев про́йдет и́ми, и бу́дут затворе́на. Я́ко Игу́мен ся́дет в них сне́сти хлеб, по пути́ Ела́мских врат вни́дет и по пути́ его́ изы́дет. И введе́ мя по пути́ врат святы́х, су́щих к се́веру, пря́мо хра́му, и ви́дех, и се испо́лнь сла́вы храм Госпо́день.

Иез.43:27, 44:1–4

При́тчей чте́ние

Прему́дрость созда́ Себе́ дом и утверди́ столпо́в седмь. Закла́ Своя́ же́ртвенная, и раствори́ в ча́ши Свое́й вино́, и угото́ва Свою́ трапе́зу. Посла́ Своя́ рабы́, созыва́ющи с высо́ким пропове́данием на ча́шу, глаго́лющи: И́же есть безу́мен, да уклони́тся ко Мне. И тре́бующим ума́ рече́: Прииди́те, яди́те Мой хлеб, и пи́йте вино́, е́же раствори́х вам. Оста́вите безу́мие и жи́ви бу́дете, и взыщи́те ра́зума, да поживете́, и испра́вите ра́зум в ве́дении. Наказу́яй злы́я прии́мет себе́ безче́стие, облича́яй же нечести́ваго опоро́чит себе́: обличе́ния бо нечести́вому ра́ны ему́. Не облича́й злых, да не возненави́дят тебе́. Облича́й прему́дра, и возлю́бит тя. Даждь прему́дрому вину́, и прему́дрший бу́дет. Сказу́й пра́ведному, и приложи́т приима́ти. Нача́ло прему́дрости страх Госпо́день и сове́т святы́х ра́зум: разуме́ти бо зако́н по́мысла есть блага́го. Сим бо о́бразом мно́гое поживе́ши вре́мя, и приложа́тся тебе́ ле́та живота́.

Притч.9:1–11

Таже, Да испра́вится моли́тва моя́: И поклоны 3 великия, и прочее преждесвященных.

Аще же несть преждесвященных. На Го́споди, воззва́х: стихиры подобны 3, в Триоди, и праздника 5. Сла́ва, и ны́не: По́слан бысть: Вход. Прокимен. И чтения дне и праздника 3. Таже Сподо́би, Го́споди: На стиховне Триоди самогласен дне, дважды, и мученичен. Сла́ва, и ны́не: Днесь ра́дость: По Ны́не отпуща́еши: тропарь праздника, ектения и 3 поклоны великия, и отпуст. На трапезе же разрешаем на вино и елей, в кийлибо день случится, во славу Пресвятыя Богородицы.

Потреба есть ведати, яко аще случится Благовещение в которую субботу поста.

Чтутся чтения прежде дне и по сих праздника 5:1. Вни́де Моисе́й: 2. Госпо́дь созда́ мя: 3. Изы́де Иа́ков: 4. Бу́дет от дне осма́го: 5. Прему́дрость созда́ Себе́ дом: Подобне чтутся чтений праздника 5, аще Благовещение случится и в неделю.

При часе же 1-м нощи ударяет в великий кампан довольно и потом во вся. И, собравшеся во храм, благословившу иерею, и кадящу, поем повечерие великое, и С на́ми Бог: с пением, на глас 8, на оба лика. И обычныя тропари: День преше́д: По 1-м трисвятом тропарь праздника: Днесь спасе́ния на́шего: По 2-м кондак праздника: Взбра́нной Воево́де: И по Сла́ва в Вы́шних: творим исхождение в притвор. И бывает лития по обычаю.

И поем стихиры праздника,

самогласны 3. Глас 1

Византиево: В шесты́й ме́сяц Архистрати́г по́слан бысть / к Тебе́, Де́ве и Чи́стей, / возвести́ти Тебе́ сло́во спасе́ния, / вку́пе же и зва́ти Тебе́: / ра́дуйся, Обра́дованная, Госпо́дь с Тобо́ю, / роди́ши Сы́на преве́чнаго из Отца́, / и спасе́т лю́ди Своя́ от грех их.

Анатолиево: В ме́сяц шесты́й по́слан бысть с Небесе́ Гаврии́л Арха́нгел / во град галиле́йский Назаре́т / принести́ Отрокови́це ра́дость благове́щения. / И, прише́д к Ней, возопи́, глаго́ля: / ра́дуйся, Обра́дованная, Госпо́дь с Тобо́ю; / ра́дуйся, вмести́лище невмести́маго естества́, / Его́же бо Небеса́ не вмести́ша, / утро́ба Твоя́ вмести́, Благослове́нная; / ра́дуйся, честно́е Ада́мово воззва́ние, Е́вино избавле́ние, / и ра́дость ми́ра, / и весе́лие ро́да на́шего.

По́слан бысть Арха́нгел Гаврии́л с Небесе́ от Бо́га / к Де́ве нескве́рней во град галиле́йский Назаре́т / благовести́ти Ей стра́ннаго о́браза зача́тие. / По́слан бысть раб безпло́тен / ко одушевле́нному гра́ду и две́ри мы́сленней / возвести́ти Влады́чняго прише́ствия сни́тие. / По́слан бысть во́ин Небе́сный ко Пресвяты́я сла́вы пала́те / проугото́вати Зижди́телю жили́ще неотъе́млемо, / и, прише́д к Ней, взыва́ше: / ра́дуйся, престо́ле огнезра́чный, / четверозра́чных пресла́внейший; / ра́дуйся, седа́лище Царя́ Небе́снаго; / ра́дуйся, горо́ несеко́мая, прия́телище пречестно́е, / в Тебе́ бо все исполне́ние всели́ся Божества́ теле́сне / благоволе́нием Отца́ присносу́щнаго / и соде́йством Всесвята́го Ду́ха; / ра́дуйся, Обра́дованная, Госпо́дь с Тобо́ю.

Аще суббота или неделя.

Слава, глас 8. Иоанна монаха:

Да веселя́тся Небеса́, и ра́дуется земля́, / и́бо Отцу́ Соприсносу́щный, Собезнача́льный и Сопресто́льный, / щедро́тство прие́м и человеколю́бную ми́лость, / Себе́ поста́ви во истоща́ние / благоволе́нием и сове́том О́тчим / и во утро́бу всели́ся Деви́чу, предочище́нную Ду́хом. / О, чудесе́! Бог в челове́цех, / Невмести́мый в ложесна́х, Безле́тный в ле́то, / и е́же пресла́внее, я́ко и зача́тие безсе́менно, / и истоща́ние несказа́нно, и та́инство ели́ко. / Бог бо истощава́ется, и воплоща́ется, и зи́ждется, / А́нгелу к Чи́стей зача́тие глаго́лавшу: / ра́дуйся, Обра́дованная, Госпо́дь с Тобо́ю, / име́яй ве́лию ми́лость.

И ныне, глас 2: Благовеству́ет Гаврии́л Благода́тней днесь: / ра́дуйся, неневе́стная Ма́ти и неискусобра́чная. / Не удивля́йся стра́нному моему́ зра́ку, / ни ужаса́йся, Арха́нгел бо есмь. / Змий прельсти́ Е́ву иногда́, / ны́не же благовеству́ю Тебе́ ра́дость, / и пребу́деши нетле́нна, / и роди́ши Го́спода, Пречи́стая.

Аще же день постен: Сла́ва, и ны́не: Благовеству́ет Гаврии́л: Таже молитвы обычныя бдения. И, вшедше во храм, поем.

На стиховне стихиры самогласны, глас 4:

В шесты́й ме́сяц по́слан бысть Арха́нгел / к Де́ве Чи́стей / и, ра́доватися Ей прире́к, / благовести́ из Нея́ Изба́вителю проити́. / Те́мже, прие́мши целова́ние, / зача́т Тя, Преве́чнаго Бо́га, / несказа́нно благоволи́вшаго вочелове́читися / во спасе́ние душ на́ших.

Стих: Благовести́те день от дне / спасе́ние Бо́га на́шего.

Язы́ка, его́же не ве́дяше, / услы́ша Богоро́дица: / глаго́лаше бо к Ней Арха́нгел Благове́щения глаго́лы, / отону́дуже ве́рно, прии́мше целова́ние, / зача́т Тя Преве́чнаго Бо́га. / Те́мже и мы, ра́дующеся, вопие́м Ти: / из Нея́ воплоти́выйся непрело́жно Бо́же, / мир ми́рови да́руй / и душа́м на́шим ве́лию ми́лость.

Стих: Воспо́йте Го́сподеви песнь но́ву, / воспо́йте Го́сподеви, вся земля́.

Се воззва́ние ны́не яви́ся нам: / па́че сло́ва Бог челове́ком соединя́ется, / Арха́нгеловым гла́сом пре́лесть отгоня́ется. / Де́ва бо прие́млет ра́дость, / земна́я бы́ша Не́бо, / мир разреши́ся пе́рвыя кля́твы. / Да ра́дуется тварь и гла́сы да воспое́т: / Тво́рче и Изба́вителю наш, / Го́споди, сла́ва Тебе́.

Слава, и ныне, глас тойже

Андрея Иеросолимиты: Днесь ра́дость благове́щения, / де́вственное торжество́, / ни́жняя с Вы́шними совокупля́ются. / Ада́м обновля́ется, / и Е́ва пе́рвыя печа́ли свобожда́ется, / и сень на́шего существа́, / обоже́нием прие́мшаго смеше́ние, / Це́рковь Бо́жия бысть. / О, та́инство! О́браз истоща́ния неве́домь, / бога́тство бла́гости несказа́нно: / А́нгел слу́жит чудеси́, / Деви́ча утро́ба Сы́на прие́млет, / Дух Святы́й низпосыла́ется, / Оте́ц свы́ше благоволи́т, / и измене́ние о́бщим твори́тся сове́том, / в не́мже и и́мже спа́сшеся, / вку́пе с Гаврии́лом к Де́ве возопии́м: / ра́дуйся, Обра́дованная, / из Нея́же спасе́ние – Христо́с Бог наш, / е́же по нам прие́м естество́, / к Себе́ возведе́. / Того́ моли́ спасти́ся душа́м на́шим.

Таже, Ны́не отпуща́еши. И по О́тче наш:

На благословении хлебов тропарь, глас 4:

Днесь спасе́ния на́шего глави́зна / и е́же от ве́ка та́инства явле́ние: / Сын Бо́жий Сын Де́вы быва́ет, / и Гаврии́л благода́ть благовеству́ет. / Те́мже и мы с ним Богоро́дице возопии́м: / ра́дуйся, Благода́тная, / Госпо́дь с Тобо́ю. (3)

И Бу́ди И́мя Госпо́дне: с пением, трижды. И чтение праздника.

На Бог Госпо́дь:

тропарь праздника, трижды, глас 4:

Днесь спасе́ния на́шего глави́зна / и е́же от ве́ка та́инства явле́ние: / Сын Бо́жий Сын Де́вы быва́ет, / и Гаврии́л благода́ть благовеству́ет. / Те́мже и мы с ним Богоро́дице возопии́м: / ра́дуйся, Благода́тная, / Госпо́дь с Тобо́ю. (3)

По 1-й кафизме оба седальна Триоди без ектении и чтение дне.

По 2-й же кафизме

ектения и седален праздника, глас 1.

Подобен: Гроб Твой:

Вели́кий воево́да невеще́ственных А́нгел, во град Назаре́т предста́в, / Царя́ возвеща́ет Тебе́, Пречи́стая, веко́в и Го́спода, / ра́дуйся, – глаго́ля Тебе́, – Благослове́нная Мари́е, / непостижи́мое и несказа́нное чу́до, челове́ков обновле́ние.

Сла́ва, и ны́не, тойже, и чтение праздника.

По 3-й кафизме седален, глас 3.

Подобен: Красоте́:

Днесь вся тварь ра́дуется, / я́ко – е́же ра́дуйся, – Тебе́ глаго́лет Арха́нгел, / благослове́нная честна́я и пречи́стая Ма́ти Христа́ Бо́га. / Днесь омрача́ется змии́но шата́ние,

/ кля́твы бо пра́отчи разреша́ется сою́з. / Те́мже и непреста́нно вопие́м Ти: / ра́дуйся, Обра́дованная.

Сла́ва, и ны́не, тойже.

По чтении же даются свещи братии.

Величание:

Арха́нгельский глас / вопие́м Ти, Чи́стая: / ра́дуйся Благода́тная, / Госпо́дь с Тобо́ю.

Псалом избранный

Лик 1: Бо́же суд Твой царе́ви даждь, 2: И пра́вду Твою́ сы́ну царе́ву. 1: Суди́ти лю́дем Твои́м в пра́вде, 2: И ни́щим Твои́м в суде́. 1: Су́дит ни́щим людски́м, и спасе́т сы́ны убо́гих. 2: Благовести́те день от дне спасе́ние Бо́га на́шего. 1: Госпо́дь даст глаго́л благовеству́ющим си́лою мно́гою. 2: Кля́тся Госпо́дь Дави́ду и́стиною, и не отве́ржется ея́. 1: От плода́ чре́ва твоего́ посажду́ на престо́ле твое́м. 2: Сни́дет я́ко дождь на руно́, 1: И я́ко ка́пля ка́плющая на зе́млю. 2: И приклони́ небеса́ и сни́де, и мрак под нога́ма Его́. 1: Я́ко избра́ Госпо́дь Сио́на, изво́ли его́ в жили́ще Себе́. 2: Освяти́л есть селе́ние Свое́ Вы́шний. 1: Бог посреде́ его́, и не подви́жится. 2: Пощади́т ни́ща и убо́га, и ду́ши убо́гих спасе́т. 1: Вси язы́цы порабо́тают Ему́. 2: Весь день благословя́т Его́. 1: Бу́дет утвержде́ние на земли́ на версе́х гор. 2: Бу́дет И́мя Его́ благослове́но во ве́ки. 1: И благословя́тся в Нем вся коле́на земна́я. 2: Благослове́н Госпо́дь Бог Изра́иле́в, творя́й чудеса́ Еди́н. 1: И благослове́но И́мя сла́вы Его́ в век, и в век ве́ка. 2: И испо́лнится сла́вы Его́ вся земля́: бу́ди, бу́ди.

Сла́ва, и ны́не: Аллилу́иа, трижды.

По полиелеи седален, глас 4.

Подобен: Удиви́ся:

Гаврии́л с Небесе́, е́же ра́дуйся, зове́т Честне́й, / я́ко зачне́т во чре́ве Преве́чнаго Бо́га, / сло́вом концы́ соста́вльшаго. / Те́мже Мариа́м отвещава́ше: / безму́жна есмь и ка́ко рожду́ Сы́на? / Безсе́менное рожде́ние кто ви́де? И, сказу́я, глаго́лаше А́нгел Богоро́дице и Де́ве: / на́йдет на Тя Дух Святы́й, / и си́ла Вы́шняго осени́т Тя.

Слава, и ныне, глас и подобен тойже

По́слан бысть Гаврии́л к Де́ве Мари́и и возвести́ Ей неизглаго́ланную ра́дость, / я́ко безсе́менно зачне́т и не истле́ет, / роди́ши бо Сы́на, Предве́чнаго Бо́га, и спасе́т лю́ди Своя́ от грех их. / И свиде́тельствует посла́вый мя вопи́ти Тебе́, Благослове́нная, е́же ра́дуйся: / Де́ва роди́ши, и по рождестве́ па́ки пребу́деши Де́ва.

И чтение праздника.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой. Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Благовести́те день от дне / спасе́ние Бо́га на́шего. Стих: Воспо́йте Го́сподеви песнь но́ву, воспо́йте Го́сподеви, вся земля́.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Луки, зачало 4

Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, я́ко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́мь с не́ю я́ко три ме́сяцы, и возврати́ся в дом Свой.

Лк.1:39–49, 56

По 50-м псалме

Слава: Моли́твами Богоро́дицы, / Ми́лостиве, очи́сти / мно́жества согреше́ний на́ших.

И ныне, тойже.

И посем, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира, глас 2. Самогласна:

Благовеству́ет Гаврии́л Благода́тней днесь: / ра́дуйся, Неневе́стная Ма́ти и Неискусобра́чная. / Не удивля́йся стра́нному моему́ зра́ку, / ни ужаса́йся, Арха́нгел бо есмь. / Змий прельсти́ Е́ву иногда́, / ны́не же благовеству́ю Тебе́ ра́дость, / и пребу́деши нетле́нна, / и роди́ши Го́спода, Пречи́стая.

Канон праздника, ирмосы по дважды, тропари же на 12. Катавасия праздника, оба лика вкупе. А идеже трипеснец, тамо поем праздника со ирмосом на 6 и трипеснец на 8. Катавасия Триоди, оба лика вкупе.

Канон, творение кир Феофана,

егоже краегранесие по алфавиту до 8-й песни.

Глас 4. Песнь 1

Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Да пое́т Тебе́, Влады́чице, дви́жа свире́ль духо́вную, Дави́д, пра́отец Твой: / послу́шай, Дщи, ра́дованнаго гла́са от А́нгела, / ра́дость бо возвеща́ет Тебе́ неизглаго́ланную.

А́нгел возопи́: Вопию́ Тебе́, веселя́ся, / приклони́ у́хо Твое́ и вонми́ ми, / Бо́жие возвеща́ющу безсе́менное зача́тие, / обрела́ бо еси́ благода́ть пред Бо́гом, / ея́же никогда́же обре́те друга́я, Всечи́стая.

Богоро́дица рече́: Да разуме́ю, А́нгеле, твои́х глаго́л си́лу, / ка́ко бу́дет, е́же рекл еси́, глаго́ли я́вственнейше? / Ка́ко зачну́, Де́ва су́щи, Отрокови́ца? / Ка́ко же и Ма́ти бу́ду Зижди́теля Моего́?

А́нгел возопи́: Ле́стно мя веща́ти помышля́еши, я́ко мню, / и ра́дуюся, зря Твое́ утвержде́ние. / Дерза́й, Влады́чице, / Бо́гу бо хотя́щу, удо́бь сконча́ются и пресла́вная.

Песнь 3

Ирмос: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Богоро́дица рече́: Оскуде́ князь от Иу́ды, вре́мя наста́ про́чее, / в не́же яви́тся язы́ков наде́жда, Христо́с; / ты же, ка́ко Сего́ рожду́, Де́ва су́щи, скажи́?

А́нгел возопи́: И́щеши от Мене́ уве́дети Де́во, о́браз зача́тия Твоего́, / но той несказа́нен есть: / Дух же Святы́й, зижди́тельною си́лою осени́в Тя, соверши́т.

Богоро́дица рече́: Моя́ прама́ти, прие́мши ра́зум змии́н, пи́щи Боже́ственныя изгна́на бысть, / те́мже и Аз бою́ся целова́ния стра́ннаго твоего́, / стыдя́щися поползнове́ния.

А́нгел возопи́: Бо́жий предста́тель, по́слан есмь Боже́ственный пове́дати Тебе́ сове́т. / Что мене́ бои́шися, Всенепоро́чная, па́че Тебе́ боя́щагося? / Что благогове́еши мне, Влады́чице, / Тебе́ че́стно благогове́ющему?

Седален, глас 8.

Подобен: Свире́лей па́стырских:

Сло́во Бо́жие на зе́млю ны́не сни́де, А́нгел предста́, вопия́ Де́ве: / ра́дуйся, Благослове́нная, Я́же печа́тию еди́на сохра́ншися, / во утро́бе прие́мши предве́чнаго Сло́ва и Го́спода, / да от пре́лести спасе́т, я́ко Бог, род челове́ческий.

Слава, и ныне, глас тойже.

Подобен: Повеле́нное:

По́слан бысть с Небесе́ Архистрати́г Гаврии́л от Бо́га, / ско́ро предста́ ко одушевле́нному гра́ду, глаго́ля к Ней я́вственно: / Зижди́теля прии́меши, Де́во, во утро́бе / и роди́ши Сего́ непрело́жне с пло́тию. / Те́мже по́слан есмь возвести́ти Тебе́ стра́нное рождество́, Чи́стая, / и стою́, зовя́ Тебе́: / ра́дуйся, Неве́сто Неневе́стная.

Песнь 4

Ирмос: Седя́й в сла́ве на престо́ле Божества́ / во о́блаце ле́гце, / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.

Богоро́дица рече́: Свяще́нную не́кую Де́ву ражда́ющую слы́шах проро́ка, дре́вле Емману́ила проре́кша; / хощу́ же разуме́ти, ка́ко Божества́ растворе́ние естество́ челове́ческое претерпи́т?

А́нгел возопи́: Яви́ла есть купина́, неопа́льна пребы́вши, / прие́мши пла́мень, обра́дованная Всепе́тая, на Тебе́ таи́нства пресла́вное: / по рождестве́ бо пребу́деши Чи́стая Присноде́ва.

Богоро́дица рече́: Освеща́емь сия́нием Бо́га Вседержи́теля, / и́стины пропове́дниче, глаго́ли, Гаврии́ле, и́стиннейшая: / ка́ко, нетле́нне бы́вши чистоте́ Мое́й, / Сло́ва рожду́, с пло́тию Безпло́тнаго?

А́нгел возопи́: Со стра́хом Тебе́, я́ко раб Госпоже́, предстою́, / с боя́знию, Отрокови́це, ны́не смотри́ти стыжду́ся Тебе́, / я́ко бо дождь на руно́, сни́дет на Тя Сло́во О́тчее, я́ко благоволи́.

Песнь 5

Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ безле́тнаго Сы́на, / всем воспева́ющим Тя / мир подава́ющая.

Богоро́дица рече́: Разуме́ти не могу́ Твои́х слове́с изве́стия: / чудеса́ бо бы́ша мно́жицею, / Боже́ственною си́лою чудоде́йствуема, / зна́мения и о́бразы зако́ннии, / роди́ же де́ва неискусому́жне никогда́же.

А́нгел возопи́: Диви́т, Всенепоро́чная, и стра́нно бо чу́до Твое́, / еди́на бо Ты всех Царя́ прии́меши во утро́бе воплоща́ема, / и Тя прообразу́ют проро́ческая рече́ния, и гада́ния, и зако́ннии о́бразы.

Богоро́дица рече́: Все́ми Невмести́мый и все́ми Неви́димый, / ка́ко сей мо́жет во чре́ве деви́че всели́тися, е́же Сам созда́? / Ка́ко же и зачну́ Бо́га Сло́ва, собезнача́льна Отцу́ и Ду́ху?

А́нгел возопи́: К Твоему́ пра́отцу Дави́ду обеща́вся / посади́ти от плода́ Твоего́ чре́ва на престо́ле ца́рства его́, / Иа́ковлю Тя добро́ту, еди́ну избра́ в слове́сное селе́ние.

Песнь 6

Ирмос: Возопи́, прообразу́я погребе́ние тридне́вное, / проро́к Ио́на, в ки́те моля́ся: / от тли изба́ви мя, / Иису́се, Царю́ сил.

Богоро́дица рече́: Глаго́л твои́х, Гаврии́ле, глас ра́дованен прие́мши, весе́лия Боже́ственнаго испо́лнихся: / ра́дость бо пове́даеши и весе́лие возвеща́еши безконе́чное.

А́нгел возопи́: Тебе́ даде́ся ра́дость, Богома́ти Боже́ственная, / Тебе́, е́же ра́дуйся, вся тварь вопие́т, Богоневе́сто: / Ты бо еди́на Ма́ти Сы́на Бо́жия пронарече́ся, Чи́стая.

Богоро́дица рече́: Е́вы Мно́ю ны́не да упраздни́тся осужде́ние, / да возда́стся Мно́ю долг днесь, / Мно́ю заи́мствование дре́внее да да́стся преиспо́лнено.

А́нгел возопи́: Обеща́ся Бог Авраа́му пра́отцу / благослови́тися в се́мене его́ язы́ком, Чи́стая, / Тобо́ю же коне́ц обеща́ние прие́млет днесь.

Кондак, глас 8:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

Икос: А́нгел предста́тель с Небесе́ по́слан бысть рещи́ Богоро́дице: ра́дуйся! / И со безпло́тным гла́сом воплоща́ема Тя зря, Го́споди, ужаса́шеся / и стоя́ше, зовы́й к Ней такова́я: / ра́дуйся, Е́юже ра́дость возсия́ет; / ра́дуйся, Е́юже кля́тва исче́знет. / Ра́дуйся, па́дшаго Ада́ма воззва́ние; / ра́дуйся, слез Е́виных избавле́ние. / Ра́дуйся, высото́ неудобовосходи́мая челове́ческими по́мыслы; / ра́дуйся, глубино́ неудобозри́мая и А́нгельскима очи́ма. / Ра́дуйся, я́ко еси́ Царе́во седа́лище; / ра́дуйся, я́ко но́сиши нося́щаго вся. / Ра́дуйся, звездо́, явля́ющая Со́лнце; / ра́дуйся, утро́бо Боже́ственнаго воплоще́ния. / Ра́дуйся, Е́юже обновля́ется тварь; / ра́дуйся, Е́юже покланя́емся Творцу́. / Ра́дуйся, Неве́сто Неневе́стная.

Песнь 7

Ирмос: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Богоро́дица рече́: Свет невеще́ственный пове́дая, в веще́ственне телеси́ совокупля́емь за милосе́рдие мно́гое, / све́тлое благове́щение, Боже́ственная пропове́дания, ны́не взыва́еши Ми: / благослове́н, Всечи́стая, Плод Твоего́ чре́ва.

А́нгел возопи́: Ра́дуйся, Влады́чице Де́во, / ра́дуйся, Пречи́стая, / ра́дуйся, прия́телище Бо́жие, / ра́дуйся, све́щниче Све́та, Ада́мово воззва́ние, / Е́вы избавле́ние, горо́ свята́я, / прея́вственное свяще́ние и черто́г безсме́ртия.

Богоро́дица рече́: Ду́шу очи́сти, те́ло освяти́, / це́рковь сотвори́ Мя вмести́тельну Бо́га, / ски́нию Богоукра́шену, одушевле́н храм наи́тием Пресвята́го Ду́ха / и Жи́зни чи́стую Ма́терь.

А́нгел возопи́: Я́ко многосве́тлую свещу́ и Богоде́ланен черто́г, / ви́жу Тя ны́не, я́ко злат киво́т, / зако́на Пода́теля приими́, Богоневе́сто, / благоизво́лившаго челове́ческое изба́вити Тобо́ю тле́нное существо́.

Песнь 8

Ирмос: Слы́ши, Отрокови́це, Де́во чи́стая, / да рече́т у́бо Гаврии́л / сове́т Вы́шняго дре́вний и́стинный: / бу́ди к прия́тию гото́ва Бо́жию, / Тобо́ю бо Невмести́мый с челове́ки поживе́. / Тем и, ра́дуяся вопию́: / благослови́те, вся дела́ Госпо́дня, Го́спода.

Богоро́дица рече́: Ум всяк побежда́ется земны́х, – отвеща́ Деви́ца, – / и́щущи, я́же Мне веща́еши, пресла́вная: / слы́шах твоя́ словеса́, но бою́ся, ужаса́ющися, / да не ле́стию Мя, я́ко Е́ву, дале́че по́слеши от Бо́га. / Но оба́че се вопию́: / благослови́те, вся дела́ Госпо́дня, Го́спода и превозноси́те Его́ во ве́ки.

А́нгел возопи́: Се Тебе́ недоуме́нное разреши́ся, – глаго́лет к сим Гаврии́л, – до́бре бо рекла́, еси́, вещь неудобопости́жна. / Словесе́м Твои́х усте́н повину́ющися про́чее, / не сумни́ся, я́ко ле́сти, я́коже ве́щи, ве́руй. / Аз бо, ра́дуяся, вопию́: / благослови́те, вся дела́ Госпо́дня, Го́спода и превозноси́те Его́ во ве́ки.

Богоро́дица рече́: Зако́н сей от Бо́га есть челове́ком, – Непоро́чная а́бие глаго́лет, – / от о́бщия любве́ рождество́ происхо́дит. / Не вем супру́жника сла́сти всеконе́чно, / ка́ко, у́бо глаго́леши, я́ко рожду́? / Бою́ся, еда́ лесть глаго́леши? / Но оба́че се вопию́: / благослови́те, вся дела́ Госпо́дня, Го́спода и превозноси́те Его́ во ве́ки.

А́нгел возопи́: Глаго́лы, я́же мне веща́еши, Чи́стая, – / А́нгел па́ки глаго́лет, – / обы́чая есть рождества́ челове́ков сме́ртных, / и́стинно Бо́га Тебе́ обещава́ю, / па́че сло́ва же и смы́сла воплоща́ема, я́ко весть, из Тебе́. / Те́мже и, ра́дуяся, вопию́: / благослови́те, вся дела́ Госпо́дня, Го́спода и превозноси́те Его́ во ве́ки.

Богоро́дица рече́: Явля́ешися Мне и́стины веща́тель, – рече́ Де́ва, – / ра́дости бо о́бщия прише́л еси́ благове́стник. / Ду́шу у́бо очи́стих с те́лом, и по глаго́лу твоему́ бу́ди Мне, / да всели́тся Бог в Мя, к Нему́же вопию́ с тобо́ю: / благослови́те, вся дела́ Госпо́дня, Го́спода и превозноси́те Его́ во ве́ки.

На 9-й песни паки вжигают свещи братия.

Честне́йшую: не поем, но поем припев праздника: Благовеству́й, земле́, ра́дость ве́лию, / хвали́те, Небеса́, Бо́жию сла́ву. Таже ирмос: Я́ко одушевле́нному: Подобне и 2-й лик припев, и ирмос, и к прочим тропарем праздника тойже припев. У трипеснца же к тропарем припеваем: Сла́ва Тебе́, Бо́же наш, сла́ва Тебе́. К Богородичным припеваем припев праздника.

Песнь 9

Ирмос: Я́ко одушевле́нному Бо́жию киво́ту, / да ника́коже ко́снется рука́ скве́рных. / Устне́ же ве́рных, Богоро́дице, немо́лчно, / глас А́нгела воспева́юще, / с ра́достию да вопию́т: / ра́дуйся, Благода́тная, / Госпо́дь с Тобо́ю.

Па́че смы́сла заче́нши Бо́га, естества́ обы́чая утаи́ся, Отрокови́це, / Ты бо в рождестве́ ма́терскаго избежа́ла еси́ тле́ннаго естества́ / и превы́шши су́щи. / Те́мже досто́йно слы́шиши: / ра́дуйся, Благода́тная, Госпо́дь с Тобо́ю.

Ка́ко то́чиши млеко́, Де́во Чи́стая, не мо́жет изрещи́ язы́к зе́млен, / стра́нну бо естества́ показу́еши вещь, зако́ннаго рождества́ уста́в прехо́диши. / Те́мже досто́йно слы́шиши: / ра́дуйся, Благода́тная, Госпо́дь с Тобо́ю.

Та́йно во свяще́нных писа́ниих / глаго́лася о Тебе́, Ма́ти Вы́шняго, / ле́ствицу бо дре́вле Иа́ков, Тя образу́ющую, ви́дев, рече́: / степе́нь Бо́жия сия́. / Те́мже досто́йно слы́шиши: / ра́дуйся, Благода́тная, Госпо́дь с Тобо́ю.

Чу́дное священноявле́нному Моисе́ю / купина́ и огнь показа́ чу́до, / ища́й же конца́ в прехожде́нии време́н, во Отрокови́це чи́стей, рече́, узрю́. / Е́йже, я́ко Богоро́дице, да рече́тся: / ра́дуйся, Благода́тная, Госпо́дь с Тобо́ю.

Дании́л Тя го́ру нарече́ мы́сленную, / роди́тельницу же Бо́жию Иса́ия, / ви́дит же, я́ко руно́, Гедео́н, / Дави́д же свяще́ние глаго́лет, дверь же Тя ин. / Гаврии́л же Тебе́ взыва́ет: / ра́дуйся, Благода́тная, Госпо́дь с Тобо́ю.

Таже ирмос Триоди, и праздника припев, и ирмос оба лика вкупе.

Светилен

Подобен: Со ученики́:

А́нгельских сил Архистрати́г / по́слан бысть от Бо́га Вседержи́теля к Чи́стей и Де́ве / благовести́ти стра́нное и неизрече́нное чу́до: / зане́ Бог, я́ко Челове́к, из Нея́ младоде́йствуется без се́мене, / назида́яй весь челове́ческий род. / Лю́дие, благовести́те обновле́ние ми́ра. (2)

Слава, и ныне, ин светилен.

Подобен: Жены́, услы́шите:

Е́же от ве́ка днесь познава́ется та́инство Бо́жие: / Бог Сло́во Сын Де́вы Мари́и за милосе́рдие быва́ет, / и ра́дость благове́щения Гаврии́л провещава́ет. / С ни́мже возопие́м Ей: / ра́дуйся, Ма́ти Госпо́дня.

На хвалитех

Вся́кое дыха́ние: и поем стихиры, на 4.

Глас 1. Подобен: Небе́сных чино́в:

С Небе́сных круго́в слете́в Гаврии́л в Назаре́т, / прии́де к Де́ве Мари́и, / вопия́ Ей: ра́дуйся! / Зачне́ши Сы́на, Ада́ма дре́внейшаго, / Творца́ веко́в и Изба́вителя / вопию́щих Тебе́: / ра́дуйся, Чи́стая.

Соприсносу́щное Сло́во Пребезнача́льного Отца́, / не разлучи́вся Го́рних, / ны́не предста́ до́льным, ра́ди кра́йняго благоутро́бия, / ми́лость прие́м, е́же на ны поползнове́ния, / и, Ада́мову нищету́ восприе́м, / вообрази́ся в чужде́е.

Гаврии́л, Де́ве благове́стие с Небесе́ прине́с, / вопия́ше: ра́дуйся! / Зачне́ши во чре́ве Твое́м / Тобо́ю вмести́маго, / Невмести́маго же все́ми, / и ражда́ющая яви́шися / от Отца́ пре́жде денни́цы возсия́вшаго.

Пресу́щественное Сло́во, / пло́тию всели́вся в Тя / О́тчим сове́том, Богоро́дице Де́во, / назда́ род, и́же по нам, / па́дший от дре́вния кля́твы. / Тем – е́же ра́дуйся – Тебе́ вси, Ма́ти Христо́ва, / со А́нгелом вопие́м ве́рно.

Слава, и ныне, глас 2. Феофаново:

Е́же от ве́ка та́инство открыва́ется днесь, / и Сын Бо́жий Сын челове́чь быва́ет: / да, ху́ждшее восприе́м, пода́ст ми лу́чшее. / Солга́ся дре́вле Ада́м, / и Бог, возжеле́в бы́ти, не бысть: / Челове́к быва́ет Бог, / да бо́га Ада́ма соде́лает. / Да весели́тся тварь, да ликовству́ет естество́, / я́ко Арха́нгел Де́ве со стра́хом предстои́т / и – е́же ра́дуйся – прино́сит, печа́ли сопроти́вное. / За милосе́рдие ми́лости вочелове́чивыйся, / Бо́же наш, сла́ва Тебе́.

Аще есть суббота или неделя, славословие великое, и ектении, и отпуст. Аще же день постен, поем на стиховне Триоди самогласен дне, дважды и мученичен.

Слава, и ныне, праздника, глас 8:

Да веселя́тся Небеса́, и ра́дуется земля́, / и́бо Отцу́ Соприсносу́щный, Собезнача́льный и Сопресто́льный, / щедро́тство прие́м и человеколю́бную ми́лость, / Себе́ поста́ви во истоща́ние / благоволе́нием и сове́том О́тчим / и во утро́бу всели́ся Деви́чу, предочище́нную Ду́хом. / О, чудесе́! Бог в челове́цех, / Невмести́мый в ложесна́х, Безле́тный в ле́то, / и е́же пресла́внее, я́ко и зача́тие безсе́менно, / и истоща́ние несказа́нно, и та́инство ели́ко. / Бог бо истощава́ется, и воплоща́ется, и зи́ждется, / А́нгелу к Чи́стей зача́тие глаго́лавшу: / ра́дуйся, Обра́дованная, Госпо́дь с Тобо́ю, / име́яй ве́лию ми́лость.

Таже, Бла́го есть: единожды. По О́тче наш: тропарь праздника, и ектения, в конец три поклоны великия, без отпуста утрени; дается же и святый елей братии, и поется стихира самогласна, и час 1-й с кафизмою. Тропарь и кондак праздника, и в конец три поклоны великия, и молитва: Христе́, Све́те и́стинный:

Отпуст:

Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

В 3-й же час дне исходим со кресты с литиею вне монастыря и, возвращшеся, входим в трапезу и поем часы 3-й и 6-й с кафизмами без поклонов, тропарь и кондак праздника.

На часех же в кампан не ударяем, на 6-м часе поем тропарь паремии Триоди и прочая, по чину их, и паремия и чтем слово, емуже начало: Па́ки ра́дость благове́щения: Присовокупляем же и 9-й час с кафизмою и чтением. Посем, Блаженны: скоро без пения и без поклонов. Помяни́ нас, Го́споди: Лик Небе́сный: Сла́ва: Лик святы́х А́нгел: И ны́не: Осла́би, оста́ви: По О́тче наш: кондак праздника. Го́споди, поми́луй, 40. Сла́ва, и ны́не: Честне́йшую Херуви́м: и поклоны три великия и молитва: Всесвята́я Тро́ице: и отпуст. И поем вечерню без кафизмы и без поклонов.

На Го́споди, воззва́х: поем Триоди самогласен дне, дважды, без мученична, и подобны Триоди три, и праздника три, и Архангела три.

Стихиры праздника, глас 4. Самогласны:

В шесты́й ме́сяц по́слан бысть Арха́нгел / к Де́ве Чи́стей / и, ра́доватися Ей прире́к, / благовести́ из Нея́ Изба́вителю проити́. / Те́мже, прие́мши целова́ние, / зача́т Тя, Преве́чнаго Бо́га, / несказа́нно благоволи́вшаго вочелове́читися / во спасе́ние душ на́ших.

Язы́ка, его́же не ве́дяше, услы́ша Богоро́дица, / глаго́лаше бо к Ней Арха́нгел благове́щения глаго́лы, / отону́дуже ве́рно, прии́мши целова́ние, / зача́т Тя, Преве́чнаго Бо́га. / Те́мже и мы, ра́дующеся, вопие́м Ти: / из Нея́ воплоти́выйся непрело́жно Бо́же, / мир ми́рови да́руй / и душа́м на́шим ве́лию ми́лость.

Се воззва́ние ны́не яви́ся нам, / па́че Сло́ва Бог челове́ком соединя́ется, / Арха́нгеловым гла́сом пре́лесть отгоня́ется, / Де́ва бо прие́млет ра́дость, / земна́я бы́ша Не́бо, / мир разреши́ся пе́рвыя кля́твы. / Да ра́дуется тварь и гла́сы да воспое́т: / Тво́рче и Изба́вителю наш, / Го́споди, сла́ва Тебе́.

Архангела стихиры, глас 1.

Подобен: Всехва́льнии му́ченицы:

Гаврии́л вели́кий, / ум Богови́днейший, светоза́рный и спаси́тельный, / Свет Трисо́лнечный зрит / и пое́т с Вы́шними чи́ны / Боже́ственное и стра́шное пе́ние, / мо́лит дарова́ти душа́м на́шим / мир и ве́лию ми́лость.

Вели́кое та́инство, / пе́рвее А́нгелом неве́домое / и пре́жде век соблюда́емое, / еди́ному уве́рися тебе́, Гаврии́ле, / и сие́ еди́ней пове́дал еси́ Чи́стей, в Назаре́т прише́д. / С Не́юже моли́ / дарова́ти душа́м на́шим / мир и ве́лию ми́лость.

К 11-му стиху припев: Творя́й А́нгелы Своя́ ду́хи / и слуги́ Своя́ пла́мень о́гненный.

Све́та сый испо́лнь при́сно, / и творя́ хоте́ние, / и скончава́я повеле́ния Вседержи́теля, / нача́льниче А́нгелов, / Гаврии́ле всеизря́дне, / любо́вию тя чту́щия спаса́й, / при́сно прося́ / дарова́ти душа́м на́шим / мир и ве́лию ми́лость.

Слава, и ныне, глас 6-й. Самогласен:

По́слан бысть с Небесе́ Гаврии́л Арха́нгел / благовести́ти Де́ве зача́тие / и, прише́д в Назаре́т, / помышля́ше в себе́, чудеси́ удивля́яся: / о, ка́ко, в Вы́шних непостижи́м Сый от Де́вы ражда́ется! / Име́яй престо́л Не́бо и подно́жие зе́млю / во утро́бу вмеща́ется Деви́чу! / На Него́же шестокрила́тии и многоочи́тии зре́ти не мо́гут, / сло́вом еди́нем от Сея́ воплоти́тися благоизво́ли. / Бо́жие есть сло́во настоя́щее. / Что у́бо стою́ и не глаго́лю Де́ве: / ра́дуйся, Благода́тная, Госпо́дь с Тобо́ю; / ра́дуйся, Чи́стая Де́во; / ра́дуйся, Неве́сто Неневе́стная; / ра́дуйся, Ма́ти Живота́, / благослове́н Плод чре́ва Твоего́!

Иерей же творит проскомидию в стихиры. Вход со Евангелием, Све́те ти́хий:

Прокимен, и чтения дне, и праздника две:

Исхо́да чте́ние

Вни́де Моисе́й в го́ру Бо́жию Хори́в, яви́ся же ему́ А́нгел Госпо́день в пла́мени о́гненне из купины́, и ви́де, я́ко купина́ горя́ше огне́м и купина́ не сгара́ше. Рече́ же Моисе́й: преше́д, узрю́ виде́ние вели́кое сие́, что я́ко не сгара́ет купина́? Я́коже ви́де Госпо́дь, я́ко приступа́ет ви́дети, призва́ его́ Госпо́дь, из купины́ глаго́ля: Моисе́е, Моисе́е. Он же рече́: что есть? И рече́: не прибли́жися се́мо. Иззу́й сапо́г от ногу́ твое́ю: ме́сто бо, на не́мже ты стои́ши, земля́ свята́ есть. И рече́ ему́: Аз есмь Бог отца́ твоего́, Бог Авраа́мов, и Бог Исаа́ков, и Бог Иа́ковль. Отврати́ же Моисе́й лице́ свое́, стыдя́ше бо ся зре́ти пред Бо́гом. Рече́ же Госпо́дь к Моисе́ю: ви́дя, ви́дех озлобле́ние люде́й Мои́х, и́же во Еги́пте, и вопль их услы́шах от наси́льствующих в де́лех. Вем бо боле́знь их, и снидо́х, е́же изъя́ти их от руки́ еги́птян, и извести́ их от земли́ о́ныя, и ввести́ их в зе́млю бла́гу и мно́гу, в зе́млю, точа́щу мед и млеко́.

Исх.3:1–8

При́тчей чте́ние

Госпо́дь созда́ мя нача́ло путе́й Свои́х в дела́ Своя́. Пре́жде век основа́ мя в нача́ле, пре́жде не́же зе́млю сотвори́ти, и пре́жде не́же бе́здны соде́лати, пре́жде не́же произы́ти исто́чником вод, пре́жде, не́же гора́м водрузи́тися, пре́жде же всех холмо́в ражда́ет мя. Госпо́дь сотвори́ страны́, и пусты́ни, и концы́, населе́ны под Небесе́м. Егда́ гото́вяше не́бо, с Ним бех, и егда́ отлуча́ше Себе́ престо́л на ве́трех, егда́ кре́пки творя́ше вы́шния о́блаки и я́ко тве́рды полага́ше исто́чники поднебе́сныя. Внегда́ полага́ти мо́рю преде́л его́, и во́ды не ми́мо и́дут уст Его́, и кре́пки творя́ше основа́ния земли́, бех при Нем устроя́я подо́бна. Аз бех, о не́йже ра́довашеся: по вся же дни веселя́хся пред лице́м Его́ на вся́ко вре́мя.

Притч.8:22–30

Таже ектения малая, и возглас трисвятаго, и трисвятое.

Аще случится Благовещение в субботу или в неделю, поем Литургию, и Блаженны от канона праздника, песнь 3-я на 4, и 6-я на 4. Аще изволит предстоятель, поем антифоны праздника.

Антифон 1, глас 2

Стих 1: Бо́же, суд Твой Царе́ви даждь, / и пра́вду Твою́ Сы́ну Царе́ву.

Моли́твами Богоро́дицы, Спа́се, / спаси́ нас.

Стих 2: Да восприи́мут го́ры мир лю́дем / и хо́лми пра́вду.

Моли́твами Богоро́дицы, Спа́се, / спаси́ нас.

Стих 3: Благовести́те день от дне / спасе́ние Бо́га на́шего.

Моли́твами Богоро́дицы, Спа́се, / спаси́ нас.

Стих 4: Кля́тся Госпо́дь Дави́ду и́стиною / и не отве́ржется ея́.

Моли́твами Богоро́дицы, Спа́се, / спаси́ нас.

Сла́ва, и ны́не: Моли́твами Богоро́дицы, Спа́се, / спаси́ нас.

Антифон 2, глас 2

Стих 1: Сни́дет, я́ко дождь на руно́, / и я́ко ка́пля, ка́плющая на зе́млю.

Спаси́ ны, Сы́не Бо́жий, / нас ра́ди воплоти́выйся, пою́щия Ти: аллилу́иа.

Стих 2: Освяти́л есть / селе́ние Свое́ Вы́шний.

Спаси́ ны, Сы́не Бо́жий, / нас ра́ди воплоти́выйся, пою́щия Ти: аллилу́иа.

Стих 3: Бог я́ве прии́дет, / Бог наш, и не премолчи́т.

Спаси́ ны, Сы́не Бо́жий, / нас ра́ди воплоти́выйся, пою́щия Ти: аллилу́иа.

Стих 4: Возсия́ет во днех Его́ пра́вда / и мно́жество ми́ра.

Спаси́ ны, Сы́не Бо́жий, / нас ра́ди воплоти́выйся, пою́щия Ти: аллилу́иа.

Сла́ва, и ны́не: Единоро́дный Сы́не:

Антифон 3, глас 4

Стих 1: Бу́дет и́мя Его́ / благослове́но во ве́ки.

Тропарь, глас 4:

Днесь спасе́ния на́шего глави́зна / и е́же от ве́ка та́инства явле́ние: / Сын Бо́жий Сын Де́вы быва́ет, / и Гаврии́л благода́ть благовеству́ет. / Те́мже и мы с ним Богоро́дице возопии́м: / ра́дуйся, Благода́тная, / Госпо́дь с Тобо́ю.

Стих 2: Благослове́н Госпо́дь Бог Изра́илев, / творя́й чудеса́ Еди́н. Тропарь: Днесь спасе́ния на́шего глави́зна:

Стих 3: Благослове́но и́мя сла́вы Его́ / во век и в век ве́ка. Тропарь: Днесь спасе́ния на́шего глави́зна:

Вход

Стих: Благовести́те день от дне / спасе́ние Бо́га на́шего.

Мы же: Прииди́те, поклони́мся и припаде́м ко Христу́, / спаси́ ны, Сы́не Бо́жий, / нас ра́ди воплоти́выйся, пою́щия Ти: / аллилу́иа.

Тропарь праздника, глас 4:

Днесь спасе́ния на́шего глави́зна / и е́же от ве́ка та́инства явле́ние: / Сын Бо́жий Сын Де́вы быва́ет, / и Гаврии́л благода́ть благовеству́ет. / Те́мже и мы с ним Богоро́дице возопии́м: / ра́дуйся, Благода́тная, / Госпо́дь с Тобо́ю.

Сла́ва, и ны́не, кондак, глас 8:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

Прокимен, глас 4:

Благовести́те день от дне / спасе́ние Бо́га на́шего. Стих: Воспо́йте Го́сподеви песнь но́ву, воспо́йте Го́сподеви вся земля́.

Апостол ко Евреем, зачало 306

Бра́тие, святя́й и освяща́емии, от Еди́наго вси, ея́же ра́ди вины́ не стыди́тся бра́тию нарица́ти их, глаго́ля: возвещу́ И́мя Твое́ бра́тии Мое́й, посреде́ Це́ркве воспою́ Тя. И па́ки: Аз бу́ду наде́яся Нань. И па́ки: се Аз и де́ти, я́же Ми дал есть Бог. Поне́же у́бо де́ти приобщи́шася пло́ти и кро́ви, и Той прии́скренне приобщи́ся те́хже, да сме́ртию упраздни́т иму́щаго держа́ву сме́рти, си́речь диа́вола, и изба́вит сих, ели́цы стра́хом сме́рти чрез все житие́ пови́нни бе́ша рабо́те. Не от А́нгел у́бо когда́ прие́млет, но от се́мене Авраа́мова прие́млет; отню́дуже до́лжен бе по всему́ подо́битися бра́тии, да ми́лостив бу́дет и ве́рен первосвяще́нник в тех, я́же к Бо́гу, во е́же очи́стити грехи́ людски́я. В не́мже бо пострада́, Сам искуше́н быв, мо́жет и искуша́емым помощи́.

Евр.2:11–18

Аллилуиа, глас 1

Стих: Сни́дет, я́ко дождь на руно́, / и, я́ко ка́пля, ка́плющая на зе́млю. Стих: Бу́дет и́мя Его́ благослове́нно во ве́ки, пре́жде со́лнца пребыва́ет и́мя Его́.

Евангелие от Луки, зачало 3

Во дне́х о́нех зача́т Eлисаве́т, жена́ Заха́риина, и тая́шеся ме́сяц пять, глаго́лющи: я́ко та́ко мне сотвори́ Госпо́дь во дни, в ня́же призре́ отъя́ти поноше́ние мое́ в челове́цех. В ме́сяц же шесты́й по́слан бысть А́нгел Гаврии́л от Бо́га во град Галиле́йский, eму́же и́мя Назаре́т, к Де́ве обруче́нней му́жеви, eму́же и́мя Ио́сиф, от до́му Дави́дова, и и́мя Де́ве, Мариа́м. И вшед к Ней А́нгел, рече́: ра́дуйся Благода́тная, Госпо́дь с Тобо́ю, благослове́на Ты в жена́х. Oна́ же ви́девши смути́ся о словеси́ eго́, и помышля́ше, каково́ бу́дет целова́ние сие́. И рече́ А́нгел Eй: не бо́йся Мариа́м, обре́те бо благода́ть от Бо́га. И се зачне́ши во чре́ве, и роди́ши Сы́на, и нарече́ши и́мя Eму́ Иису́с. Сей бу́дет ве́лий, и Сын Вы́шняго нарече́тся, и даст Eму́ Госпо́дь Бог престо́л Дави́да oтца́ Eго́, и воцари́тся в дому́ Иа́ковли во ве́ки, и Ца́рствию Eго́ не бу́дет конца́. Рече́ же Мариа́м ко А́нгелу: ка́ко бу́дет сие́, иде́же му́жа не зна́ю? И отвеща́в А́нгел, рече́ Eй: Дух Святы́й на́йдет на Тя, и си́ла Вы́шняго осени́т Тя, те́мже и ражда́емое Свя́то, нарече́тся Сын Бо́жий. И се Eлисаве́т, ю́жика Твоя́, и та зача́т сы́на в ста́рости свое́й, и сей ме́сяц шесты́й eсть eй, нарица́емей непло́ды. Я́ко не изнемо́жет от Бо́га всяк глаго́л. Рече́ же Мариа́м: се раба́ Госпо́дня, бу́ди Мне по глаго́лу твоему́. И оты́де от Нея́ А́нгел.

И прочая Божественныя Литургии Златоустаго.

Лк.1:24–38

Вместо Достойно:

Благовеству́й, земле́, ра́дость ве́лию, / хвали́те, Небеса́, Бо́жию сла́ву.

Ирмос, глас 4: Я́ко одушевле́нному Бо́жию киво́ту, / да ника́коже ко́снется рука́ скве́рных. / Устне́ же ве́рных, Богоро́дице, немо́лчно, / глас А́нгела воспева́юще, / с ра́достию да вопию́т: / ра́дуйся, Благода́тная, / Госпо́дь с Тобо́ю.

Причастен:

Избра́ Госпо́дь Сио́на / и изво́ли его́ в жили́ще Себе́. / Аллилу́иа, трижды.