Месяца декабря в 25-й день

В начале втораго часа знаменует в кампан. И собравшимся во храм, облачится иерей в фелонь, диакон же в стихарь. И поставляет параекклисиарх аналогий украшен прямо царских врат, и вжигает свещу на свещнице. Иерей же исходит со Евангелием во храм, или в трапезу царскими враты, предходящу ему диакону с кадилом. И полагает иерей святое Евангелие на аналогии и, став пред аналогом, творит начало по обычаю. И по начале чтец: Сла́ва Тебе́,

Бо́же наш, сла́ва Тебе́. И Царю́ Небе́сный: и прочая. И по возгласе кадит священник святое

Евангелие на аналогии окрест и прочия иконы, и храм весь, и настоятеля, и братию.

Чтец же чтет: Ами́нь. Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды. Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Иерей: Я́ко Твое́ есть Ца́рство, и си́ла, и сла́ва, Отца́, и Сына́, и Свята́го Ду́ха, ны́не и при́сно, и во ве́ки веко́в.

Таже чтец: Ами́нь. Го́споди, поми́луй, 12, Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 5

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра услы́ши глас мой: Зау́тра предста́ну Ти, и у́зриши мя. Я́ко Бог, не хотя́й беззако́ния, Ты еси́, не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма. Возненави́дел еси́ вся, де́лающия беззако́ние. Погуби́ши вся, глаго́лющия лжу, му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́ вни́ду в дом Твой, поклоню́ся ко хра́му свято́му Твоему́ в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их, язы́ки свои́ми льща́ху. Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я́, я́ко преогорчи́ша Тя, Го́споди. И да возвеселя́тся вси, упова́ющии на Тя, во век возра́дуются, и всели́шися в них. И похва́лятся о Тебе́ лю́бящии И́мя Твое́. Я́ко Ты благослови́ши пра́ведника, Го́споди, я́ко ору́жием благоволе́ния венча́л еси́ нас.

Псалом 44

Отры́гну се́рдце мое́ сло́во бла́го, глаго́лю аз дела́ моя́ Царе́ви, язы́к мой – трость кни́жника скоропи́сца. Красе́н добро́тою па́че сыно́в челове́ческих, излия́ся благода́ть во устна́х Твои́х, сего́ ра́ди благослови́ Тя Бог во век. Препоя́ши меч Твой по бедре́ Твое́й, Си́льне. Красото́ю Твое́ю и добро́тою Твое́ю и наляцы́, и успева́й, и ца́рствуй и́стины ра́ди, и кро́тости, и пра́вды, и наста́вит Тя ди́вно десни́ца Твоя́. Стре́лы Твоя́ изощре́ны, Си́льне, лю́дие под Тобо́ю паду́т в се́рдцы враг царе́вых. Престо́л Твой, Бо́же, в век ве́ка: жезл пра́вости, жезл Ца́рствия Твоего́. Возлюби́л еси́ пра́вду и возненави́дел еси́ беззако́ние: сего́ ра́ди пома́за Тя, Бо́же, Бог Твой еле́ем ра́дости па́че прича́стник Твои́х. Сми́рна, и ста́кти, и касси́я от риз Твои́х, от тя́жестей слоно́вых, из ни́хже возвесели́ша Тя. Дще́ри царе́й в че́сти Твое́й. Предста́ Цари́ца одесну́ю Тебе́, в ри́зах позлаще́нных оде́яна, преиспещре́на. Слы́ши, Дщи, и виждь, и приклони́ у́хо Твое́, и забу́ди лю́ди Твоя́ и дом отца́ Твоего́, и возжела́ет Царь добро́ты Твоея́: зане́ Той есть Госпо́дь Твой, и поклони́шася Ему́. И дщи Ти́рова с да́ры, лицу́ Твоему́ помо́лятся бога́тии лю́дстии. Вся сла́ва Дще́ре Царе́вы внутрь, ря́сны златы́ми оде́яна и преиспещре́на. Приведу́тся Царю́ де́вы в след Ея́. И́скренния Ея́ приведу́тся Тебе́, приведу́тся в весе́лии и ра́довании, введу́тся в храм Царе́в. Вме́сто оте́ц Твои́х бы́ша сы́нове Твои́, поста́виши я́ кня́зи по всей земли́. Помяну́ И́мя Твое́ во вся́ком ро́де и ро́де. Сего́ ра́ди лю́дие испове́дятся Тебе́ в век и во век ве́ка.

Псалом 45

Бог нам прибе́жище и си́ла, Помо́щник в ско́рбех, обре́тших ны зело́. Сего́ ра́ди не убои́мся, внегда́ смуща́ется земля́ и прелага́ются го́ры в сердца́ морска́я. Возшуме́ша и смято́шася во́ды их, смято́шася го́ры кре́постию Его́. Ре́чная устремле́ния веселя́т град Бо́жий: освяти́л есть селе́ние Свое́ Вы́шний. Бог посреде́ его́, и не подви́жится, поможе́т ему́ Бог у́тро зау́тра. Смято́шася язы́цы, уклони́шася ца́рствия, даде́ глас Свой Вы́шний, подви́жеся земля́. Госпо́дь Сил с на́ми, Засту́пник наш Бог Иа́ковль. Прииди́те и ви́дите дела́ Бо́жия, я́же положи́ чудеса́ на земли́. Отъе́мля бра́ни до коне́ц земли́, / лук сокруши́т, и сло́мит ору́жие, и щиты́ сожже́т огне́м. Упраздни́теся и разуме́йте, я́ко Аз есмь Бог: вознесу́ся во язы́цех, вознесу́ся на земли́. Госпо́дь Сил с на́ми, Засту́пник наш Бог Иа́ковль.

Сла́ва, и ны́не, Аллилу́иа, (3). Го́споди, поми́луй, (3).

Слава, тропарь предпразднства, глас 4:

Написова́шеся иногда́ со ста́рцем Ио́сифом, / я́ко от се́мене Дави́дова, в Вифлее́ме Мариа́м, / чревонося́щи безсе́менное Рожде́ние. / Наста́ же вре́мя Рождества́, / и ме́сто ни еди́ноже бе обита́лищу, / но, я́коже кра́сная пала́та, верте́п Цари́це показа́шеся. / Христо́с ражда́ется пре́жде па́дший воскреси́ти о́браз.

И ныне, Богородичен: Что Тя нарече́м, о Благода́тная? / Не́бо, я́ко возсия́ла еси́ Со́лнце Пра́вды. / Рай, я́ко прозябла́ еси́ цвет нетле́ния. / Де́ву, я́ко пребыла́ еси́ нетле́нна. / Чи́стую Ма́терь, я́ко име́ла еси́ на святы́х Твои́х объя́тиях Сы́на, всех Бо́га. / Того́ моли́ спасти́ся душа́м на́шим.

Таже тропари сия по дважды поем.

Творение Софрония, патриарха Иерусалимскаго, глас 8:

Вифлее́ме, угото́вися, / благоукраси́теся, я́сли, / верте́пе, приими́: И́стина прии́де. / Сень мимотече́, и Бог челове́ком от Де́вы яви́ся, / вообрази́вся я́коже мы и обожи́в плоть. / Тем Ада́м обновля́ется, со Е́вою зову́ще: / на земли́ благоволе́ние яви́ся спасти́ род наш.

Вторый лик, тойже тропарь без припева:

Стих: Бог от ю́га прии́дет / и Святы́й из Горы́ приосене́нныя ча́щи.

Глас 3: Ны́не проро́ческое прорица́ние испо́лнитися гряде́т, / та́йно глаго́лющее: / и ты, Вифлее́ме, земле́ Иу́дова, / ника́коже нарече́шися ме́нши во влады́ках, / предуготовля́ющи верте́п: / из тебе́ бо ми изы́дет Игу́мен язы́ков во пло́ти, / от Де́вы Отрокови́цы Христо́с Бог, / И́же упасе́т лю́ди Своя́ но́ваго Изра́иля; / дади́м Ему́ вси вели́чие.

Стих: Го́споди, услы́шах слух Твой и убоя́хся; / Го́споди, разуме́х дела́ Твоя́ и ужасо́хся.

Паки тойже тропарь. Таже:

Слава, глас 8: Сия́ глаго́лет Ио́сиф к Де́ве: / Мари́е, что де́ло сие́, е́же в Тебе́ зрю? / Недоуме́ю, и удивля́юся, и умо́м ужаса́юся; / о́тай у́бо от Мене́ бу́ди вско́ре. / Мари́е, что де́ло сие́, е́же в Тебе́ ви́жу? / За честь – срамоту́, за весе́лие – скорбь, / вме́сто е́же хвали́тися, укори́зну ми принесла́ еси́. / Ктому́ не терплю́ уже́ поноше́ний челове́ческих, / и́бо от иере́й из Це́ркве Госпо́дни я́ко непоро́чную Тя прия́х, / и что ви́димое?

И ныне, паки тойже.

Посем прокимен, глас 4: Госпо́дь рече́ ко Мне: / Сын Мой еси́ Ты, Аз днесь роди́х Тя.

Стих: Проси́ от Мене́, и дам Ти язы́ки достоя́ние Твое́, и одержа́ние Твое́ концы́ земли́.

Таже, паремия.

Проро́чества Михе́ина чте́ние

Та́ко глаго́лет Госпо́дь: и ты, Вифлее́ме, до́ме Евфра́фов, еда́ мал еси́ е́же бы́ти в ты́сящах Иу́довыхъ? Из тебе́ бо Мне изы́дет Старе́йшина, е́же бы́ти в кня́зя во Изра́или́, и исхо́ди Его́ из нача́ла от дней ве́ка. Сего́ ра́ди даст я́, до вре́мене ражда́ющия роди́т, и про́чии от бра́тий Его́ обратя́тся к сыно́м Изра́илевым. И ста́нет, и у́зрит, и упасе́т ста́до Свое́ кре́постию Госпо́дь. И в сла́ве и́мени Го́спода Бо́га Своего́ пребу́дут, зане́ ны́не возвели́чится да́же до коне́ц земли́.

Мих.5:2–4

К Евре́ем посла́ния свята́го апо́стола Па́вла чте́ние

Многоча́стне и многообра́зне дре́вле Бог, глаго́лавый отце́м во проро́цех. В после́док дний сих глаго́ла нам в Сы́не, Его́же положи́ насле́дника всем, И́мже и ве́ки сотвори́. И́же Сый сия́ние сла́вы и о́браз Ипоста́си Его́, нося́ же вся́ческая глаго́лом си́лы Своея́, Собо́ю очище́ние сотвори́в грехо́в на́ших, се́де одесну́ю Престо́ла вели́чествия на высо́ких. Толи́ко лу́чший быв А́нгел, ели́ко пресла́внее па́че их насле́дствова и́мя. Кому́ бо рече́ когда́ от А́нгел: Сын Мой еси́ Ты, Аз днесь роди́х Тя; и па́ки: Аз бу́ду Ему́ во Отца́, и Той бу́дет Мне в Сы́на. Егда́ же па́ки вво́дит Перворо́днаго во вселе́нную, глаго́лет: и да покло́нятся Ему́ вси А́нгели Бо́жии. И ко А́нгелом у́бо глаго́лет: творя́й А́нгелы Своя́ ду́хи и слуги́ Своя́ огнь паля́щ. К Сы́ну же: престо́л Твой, Бо́же, в век ве́ка, жезл пра́вости, жезл Ца́рствия Твоего́. Возлюби́л еси́ пра́вду и возненави́дел еси́ беззако́ние, сего́ ра́ди пома́за Тя, Бо́же, Бог Твой еле́ем ра́дости па́че прича́стник Твои́х. И па́ки: в нача́ле Ты, Го́споди, зе́млю основа́л еси́, и дела́ руку́ Твое́ю суть небеса́. Та́ поги́бнут, Ты же пребыва́еши, и вся, я́коже ри́за, обетша́ют, и, я́ко оде́жду, свие́ши их, и изменя́тся; Ты же то́йжде еси́, и ле́та Твоя́ не оскуде́ют.

Зачало 303. Евр.1:1–12

Иерей: От Матфе́я свята́го Ева́нгелия чте́ние

Иису́с Христо́во Рождество́ си́це бе: обруче́нней у́бо бы́вши Ма́тери Его́ Мари́и Ио́сифови, пре́жде да́же не сни́тися и́ма, обре́теся иму́щи во чре́ве от Ду́ха Свя́та. Ио́сиф же, муж Ея́, пра́веден сый и, не хотя́ Ея́ обличи́ти, восхоте́ тай пусти́ти Ю́. Сия́ же ему́ помы́слившу, се А́нгел Госпо́день во сне яви́ся ему́, глаго́ля: Ио́сифе, сы́не Дави́дов, не убо́йся прия́ти Мариа́м, жены́ твоея́: ро́ждшее бо ся в Ней от Ду́ха есть Свя́та. Роди́т же Сы́на, и нарече́ши и́мя Ему́ Иису́с. Той бо спасе́т лю́ди Своя́ от грех их. Сие́ же все бысть, да сбу́дется рече́нное от Го́спода проро́ком, глаго́лющим: Се́ Де́ва во чре́ве прии́мет и роди́т Сы́на, и нареку́т и́мя Ему́ Емману́ил, е́же есть сказа́емо, с на́ми Бог. Воста́в же Ио́сиф от сна, сотвори́, я́коже повеле́ ему́ А́нгел Госпо́день, и прия́т Жену́ свою́. И не зна́яше Ея́, до́ндеже роди́ Сы́на Своего́ пе́рвенца, и нарече́ и́мя Ему́ Иису́с.

Зачало 2. Мф.1:18–25

Посем тропарь:

Стопы́ моя́ напра́ви по словеси́ Твоему́ / и да не облада́ет мно́ю вся́кое беззако́ние. / Изба́ви мя от клеветы́ челове́ческия, и сохраню́ за́поведи Твоя́. / Лице́ Твое́ просвети́ на раба́ Твоего́ / и нау́чи мя оправда́нием Твои́м.

Да испо́лнятся уста́ моя́ хвале́ния Твоего́, Го́споди, / я́ко да воспою́ сла́ву Твою́, / весь день великоле́пие Твое́.

Таже Трисвятое и по О́тче наш:

Кондак, глас 3:

Де́ва днесь Преве́чное Сло́во / в верте́пе гряде́т роди́ти неизрече́нно: / лику́й, вселе́нная, услы́шавши, / просла́ви со А́нгелы и па́стырьми / хотя́щаго яви́тися Отроча́ Мла́до, Преве́чнаго Бо́га.

Го́споди, поми́луй, 40.

И молитва:

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй (3).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

И́менем Госпо́дним благослови́, о́тче.

Священник возглашает:

Бо́же, уще́дри ны и благослови́ ны, просвети́ лице́ Твое́ на ны и поми́луй ны.

Таже молитву сию:

Христе́, Све́те и́стинный, просвеща́яй и освяща́яй вся́каго челове́ка, гряду́щаго в мир, да зна́менается на нас свет Лица́ Твоего́, да в нем у́зрим Свет непристу́пный, и испра́ви стопы́ на́ша к де́ланию за́поведей Твои́х моли́твами Пречи́стыя Твоея́ Ма́тере и всех Твои́х святы́х, ами́нь.

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Таже псалом 66

Бо́же, уще́дри ны, и благослови́ ны, и просвети́ лице́ Твое́ на ны, и поми́луй ны: позна́ти на земли́ путь Твой, во всех язы́цех спасе́ние Твое́. Да испове́дятся Тебе́ лю́дие, Бо́же, да испове́дятся Тебе́ лю́дие вси. Да возвеселя́тся и да возра́дуются язы́цы, я́ко су́диши лю́дем правото́ю и язы́ки на земли́ наста́виши. Да испове́дятся Тебе́ лю́дие, Бо́же, да испове́дятся Тебе́ лю́дие вси. Земля́ даде́ плод свой. Благослови́ ны, Бо́же, Бо́же наш. Благослови́ ны, Бо́же, и да убоя́тся Его́ вси концы́ земли́.

Псалом 86

Основа́ния Его́ на гора́х святы́х, лю́бит Госпо́дь врата́ Сио́ня па́че всех селе́ний Иа́ковлих. Пресла́вная глаго́лашася о тебе́, гра́де Бо́жий. Помяну́ Раа́в и Вавило́на ве́дущим Мя; и се иноплеме́нницы, и Тир, и лю́дие Ефио́пстии, си́и бы́ша та́мо. Ма́ти Сио́н рече́т: Челове́к и Челове́к роди́ся в нем, и Той основа́ и Вы́шний. Госпо́дь пове́сть в писа́нии люде́й и князе́й сих, бы́вших в нем. Я́ко веселя́щихся всех жили́ще в Тебе́.

Псалом 50

Поми́луй мя, Бо́же, по вели́цей ми́лости Твое́й и по мно́жеству щедро́т Твои́х, очи́сти беззако́ние мое́. Наипа́че омы́й мя от беззако́ния моего́ и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х. Я́ко да оправди́шися во словесе́х Твои́х и победи́ши внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и Дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу – дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Твой тельцы́.

Сла́ва, и ны́не, Аллилу́иа, (3). Го́споди, поми́луй, (3).

Слава, тропарь, глас 4:

Написова́шеся иногда́ со ста́рцем Ио́сифом, / я́ко от се́мене Дави́дова, в Вифлее́ме Мариа́м, / чревонося́щи безсе́менное Рожде́ние. / Наста́ же вре́мя Рождества́, / и ме́сто ни еди́ноже бе обита́лищу, / но, я́коже кра́сная пала́та, верте́п Цари́це показа́шеся. / Христо́с ражда́ется пре́жде па́дший воскреси́ти о́браз.

И ныне, Богородичен: Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся: / моли́ся, Влады́чице, со святы́ми апо́столы / поми́ловати ду́ши на́ша.

Таже тропари сия по дважды поем. Глас 6:

Сей Бог наш, / не вмени́тся ин к Нему́, / роди́выйся от Де́вы, и с челове́ки поживе́; / во я́слех убо́гих / Сын Единоро́дный лежа́щь ви́дится челове́к / и пелена́ми повива́ется, и́же сла́вы Госпо́дь. / И волхво́м звезда́ возвеща́ет в Его́ поклоне́ние. / И мы пои́м: Тро́ице Свята́я, спаси́ ду́ши на́ша. (2)

Таже поем, глас 8:

Стих: Бог от ю́га прии́дет / и Святы́й из Горы́ приосене́нныя ча́щи.

Пре́жде Рождества́ Твоего́, / тре́петно зря́ще та́инство Твое́, Го́споди, / разу́мная во́инства дивля́хуся: / я́коже бо Младе́нец роди́тися благоизво́лил еси́, / не́бо украси́вый звезда́ми, / и во я́слех безслове́сных возлежи́ши, / дла́нию содержа́й всея́ земли́ концы́. / Таковы́м бо смотре́нием уве́дено бысть милосе́рдие Твое́, Христе́, / ве́лия ми́лость Твоя́, сла́ва Тебе́.

Стих: Го́споди, услы́шах слух Твой и убоя́хся; / Го́споди, разуме́х дела́ Твоя́ и ужасо́хся.

И паки поем тойже тропарь. Посем:

Слава, глас 3: Ио́сифе, рцы нам: / ка́ко, Ю́же от святы́х прия́л еси́, / Де́ву непра́здну приво́диши в Вифлее́м? / Аз, рече́, проро́ки испыта́х / и, весть прие́м от А́нгела, уве́рихся, / я́ко Бо́га роди́т Мари́я несказа́нно; / Ему́же на поклоне́ние волсви́ от восто́ков прии́дут, / с да́ры честны́ми служа́ще. / Воплоти́выйся нас ра́ди, Го́споди, / сла́ва Тебе́.

И ныне, паки тойже тропарь.

Прокимен, глас 4:

Отроча́ роди́ся нам, / Сын, и даде́ся нам.

Стих: Его́же нача́льство бысть на ра́ме Его́.

Проро́чества Вару́хова чте́ние

Сей Бог наш, и не приложи́тся ин к Нему́. Изобре́те всяк путь худо́жества, и даде́ и Иа́кову, о́троку Своему́, и Изра́илю, возлю́бленному от Него́. Посе́м же на земли́ яви́ся и с челове́ки поживе́. Сия́ кни́га повеле́ний Бо́жиих, и зако́н сый во ве́ки; вси, держа́щиися ея́, в живо́т вни́дут, оста́вившии же ю, у́мрут. Обрати́ся, Иа́кове, и ими́ся ея́. Поиди́ к сия́нию пря́мо све́та ея́. Не даждь ино́му сла́вы твоея́ и поле́зных тебе́ язы́ку чужде́му. Блаже́ни есмы́, Изра́илю, я́ко уго́дная Бо́гу нам разу́мна суть.

Вар.3:36–38, 4:1–4

Таже Апостол.

К Гала́том посла́ния свята́го апо́стола Па́вла чте́ние

Бра́тие, пре́жде, прише́ствия ве́ры, под зако́ном стрего́ми бе́хом, затворе́ни в хотя́щую ве́ру откры́тися. Те́мже зако́н пе́стун нам бысть во Христа́, да от ве́ры оправди́мся. Прише́дшей же ве́ре, уже́ не под пе́стуном есмы́. Вси бо вы сы́нове Бо́жии есте́ ве́рою о Христе́ Иису́се: ели́цы бо во Христа́ крести́стеся, во Христа́ облеко́стеся. Несть иуде́й, ни е́ллин, несть раб, ни свобо́дь, несть му́жеский пол, ни же́нский: вси бо вы еди́но есте́ о Христе́ Иису́се. А́ще ли вы Христо́вы: у́бо Авраа́мле се́мя есте́ и по обетова́нию насле́дницы.

Зачало 208А. Гал.3:23–29

Иерей: От Луки́ свята́го Ева́нгелия чте́ние

Во днех о́нех изы́де повеле́ние от ке́саря А́вгуста написа́ти всю вселе́нную. Сие́ написа́ние пе́рвое бысть, владя́щу Сири́ею Кирини́ю. И идя́ху вси написа́тися, ко́ждо во свой град. Взы́де же и Ио́сиф от Галиле́и из гра́да Назаре́та во Иуде́ю, во град Дави́дов, и́же нарица́ется Вифлее́м, зане́ бы́ти ему́ от до́му и оте́чества Дави́дова, написа́тися с Мари́ею, обруче́нною ему́ Жено́ю, су́щею непра́здною. Бысть же, егда́ бы́ша та́мо, испо́лнишася дни́е роди́ти Ей. И роди́ Сы́на Своего́ пе́рвенца, и пови́т Его́, и положи́ Его́ в я́слех, зане́ не бе им ме́ста во оби́тели. И па́стырие бе́ху в то́йже стране́, бдя́ще, и стрегу́ще стра́жу нощну́ю о ста́де свое́м. И се А́нгел Госпо́день ста в них, и сла́ва Госпо́дня осия́ их, и убоя́шася стра́хом ве́лиим. И рече́ им А́нгел: не бо́йтеся, се бо благовеству́ю вам ра́дость ве́лию, я́же бу́дет всем лю́дем, я́ко роди́ся вам днесь Спас, и́же есть Христо́с Госпо́дь, во гра́де Дави́дове. И се вам зна́мение: обря́щете Младе́нца пови́та, лежа́ща в я́слех. И внеза́пу бысть со А́нгелом мно́жество вой Небе́сных, хва́лящих Бо́га и глаго́лющих: сла́ва в Вы́шних Бо́гу, и на земли́ мир, в челове́цех благоволе́ние. И бысть, я́ко отыдо́ша от них на Не́бо А́нгели, и челове́цы па́стырие ре́ша друг ко дру́гу: пре́йдем до Вифлее́ма и ви́дим глаго́л сей бы́вший, его́же Госпо́дь сказа́ нам. И приидо́ша, поспе́шшеся, и обрето́ша Мариа́м же и Ио́сифа и Младе́нца, лежа́ща во я́слех. Ви́девше же, сказа́ша о глаго́ле, глаго́ланном им о Отроча́ти Сем. И вси слы́шавшии диви́шася о глаго́ланных от па́стырей к ним. Мариа́м же соблюда́ше вся глаго́лы сия́, слага́ющи в се́рдцы Свое́м. И возврати́шася па́стырие, сла́вяще и хва́ляще Бо́га о всех

я́же слы́шаша и ви́деша, я́коже глаго́лано бысть к ним.

Зачало 5. Лк.2:1–20

Таже:

Госпо́дь Бог благослове́н, / благослове́н Госпо́дь день дне, / поспеши́т нам Бог спасе́ний на́ших, / Бог наш, Бог спаса́ти.

Посем Трисвятое, и по О́тче наш:

Кондак, глас 3:

Де́ва днесь Преве́чное Сло́во / в верте́пе гряде́т роди́ти неизрече́нно: / лику́й, вселе́нная, услы́шавши, / просла́ви со А́нгелы и па́стырьми / хотя́щаго яви́тися Отроча́ Мла́до, Преве́чнаго Бо́га.

Го́споди, поми́луй, 40.

И молитва:

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй (3).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

И́менем Госпо́дним благослови́, о́тче.

Иерей: Бо́же, уще́дри ны и благослови́ ны, просвети́ лице́ Твое́ на ны и поми́луй ны.

Посем молитва:

Влады́ко Бо́же, О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше, еди́но Божество́, еди́на си́ла, поми́луй мя, гре́шнаго, и, и́миже ве́си судьба́ми, спаси́ мя недосто́йнаго раба́ Твоего́, я́ко благослове́н еси́ во ве́ки веко́в, ами́нь.

На третием и шестом часех кадит диакон Евангелие и иконы, и настоятеля, и лики токмо.

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

И псалом 71

Бо́же, суд Твой царе́ви даждь и пра́вду Твою́ сы́ну царе́ву: суди́ти лю́дем Твои́м в пра́вде и ни́щим Твои́м в суде́. Да восприи́мут го́ры мир лю́дем и хо́лми пра́вду. Су́дит ни́щим людски́м, и спасе́т сы́ны убо́гих, и смири́т клеветника́. И пребу́дет с со́лнцем и пре́жде луны́ ро́да родо́в. Сни́дет, я́ко дождь на руно́, и, я́ко ка́пля, ка́плющая на зе́млю. Возсия́ет во днех Его́ пра́вда и мно́жество ми́ра, до́ндеже оты́мется луна́. И облада́ет от мо́ря до мо́ря и от рек до коне́ц вселе́нныя. Пред Ним припаду́т ефио́пляне, и врази́ Его́ персть поли́жут. Ца́рие Фарси́йстии и о́строви да́ры принесу́т. Ца́рие Ара́встии и Сава́ да́ры приведу́т. И покло́нятся Ему́ вси ца́рие зе́мстии, вси язы́цы порабо́тают Ему́. Я́ко изба́ви ни́ща от си́льна и убо́га, Ему́же не бе помо́щника. Пощади́т ни́ща и убо́га и ду́ши убо́гих спасе́т. От ли́хвы и от непра́вды изба́вит ду́ши их, и че́стно И́мя Его́ пред ни́ми. И жив бу́дет, и да́стся Ему́ от зла́та арави́йска, и помо́лятся о Нем вы́ну: весь день благословя́т Его́. Бу́дет утвержде́ние на земли́ на версе́х гор, превознесе́тся па́че лива́на плод Его́. И процвету́т от гра́да, я́ко трава́ земна́я. Бу́дет И́мя Его́ благослове́нно во ве́ки, пре́жде со́лнца пребыва́ет и́мя Его́, и благословя́тся в Нем вся коле́на земна́я, вси язы́цы ублажа́т Его́. Благослове́н Госпо́дь, Бог Изра́илев, творя́й чудеса́ еди́н. И благослове́но и́мя сла́вы Его́ во век и в век ве́ка; и испо́лнится сла́вы Его́ вся земля́: бу́ди, бу́ди.

Псалом 131

Помяни́, Го́споди, Дави́да и всю кро́тость его́. Я́ко кля́тся Го́сподеви, обеща́ся Бо́гу Иа́ковлю: а́ще вни́ду в селе́ние до́му моего́ или́ взы́ду на одр посте́ли моея́, а́ще дам сон очи́ма мои́ма, и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се слы́шахом я́ во Евфра́фе, обрето́хом я́ в поля́х дубра́вы. Вни́дем в селе́ния Его́, поклони́мся на ме́сто, иде́же стоя́сте но́зе Его́. Воскресни́, Го́споди, в поко́й Твой, Ты и киво́т святы́ни Твоея́. Свяще́нницы Твои́ облеку́тся пра́вдою, и преподо́бнии Твои́ возра́дуются. Дави́да ра́ди раба́ Твоего́ не отврати́ лице́ пома́заннаго Твоего́. Кля́тся Госпо́дь Дави́ду и́стиною и не отве́ржется ея́: от плода́ чре́ва твоего́ посажду́ на престо́ле твое́м. А́ще сохраня́т сы́нове твои́ заве́т Мой и свиде́ния Моя́ сия́, и́мже научу́ я́, и сы́нове их до ве́ка ся́дут на престо́ле твое́м. Я́ко избра́ Госпо́дь Сио́на, изво́ли и в жили́ще Себе́. Сей поко́й Мой во век ве́ка, зде вселю́ся, я́ко изво́лих и. Лови́тву его́ благословля́яй благословлю́, ни́щия его́ насыщу́ хле́бы. Свяще́нники его́ облеку́ во спасе́ние, и преподо́бнии его́ ра́достию возра́дуются. Та́мо возращу́ рог Дави́дови, угото́вах свети́льник пома́занному Моему́. Враги́ его́ облеку́ студо́м, на не́мже процвете́т святы́ня Моя́.

Псалом 90

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна. Плещма́ Свои́ма осени́т тя, и под криле́ Его́ наде́ешися, ору́жием обы́дет тя и́стина Его́. Не убои́шися от стра́ха нощна́го, от стрелы́, летя́щия во дни, от ве́щи, во тме преходя́щия, от сря́ща и бе́са полу́деннаго. Паде́т от страны́ твоея́ ты́сяща и тма одесну́ю тебе́, к тебе́ же не прибли́жится. Оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище Твое́. Не прии́дет к тебе́ зло, и ра́на не прибли́жится телеси́ твоему́. Я́ко А́нгелом Свои́м запове́сть о тебе́ сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́. На а́спида и васили́ска насту́пиши и попере́ши льва и зми́я. Я́ко на Мя упова́, и изба́влю и́; покры́ю и́, я́ко позна́ и́мя Мое́. Воззове́т ко Мне, и услы́шу его́; с ним есмь в ско́рби, изму́ его́ и просла́влю его́. Долгото́ю дней испо́лню его́ и явлю́ ему́ спасе́ние Мое́.

Сла́ва, и ны́не, Аллилу́иа, (3). Го́споди, поми́луй, (3).

Слава, тропарь, глас 4:

Написова́шеся иногда́ со ста́рцем Ио́сифом, / я́ко от се́мене Дави́дова, в Вифлее́ме Мариа́м, / чревонося́щи безсе́менное Рожде́ние. / Наста́ же вре́мя Рождества́, / и ме́сто ни еди́ноже бе обита́лищу, / но, я́коже кра́сная пала́та, верте́п Цари́це показа́шеся. / Христо́с ражда́ется пре́жде па́дший воскреси́ти о́браз.

И ныне, Богородичен: Я́ко не и́мамы дерзнове́ния за премно́гия грехи́ на́ша, / Ты и́же от Тебе́ Ро́ждшагося моли́, Богоро́дице Де́во, / мно́го бо мо́жет моле́ние Ма́тернее ко благосе́рдию Влады́ки. / Не пре́зри гре́шных мольбы́, Всечи́стая, / я́ко ми́лостив есть и спасти́ моги́й, / И́же и страда́ти о нас изво́ливый.

Таже тропари сия, глас 1:

Прииди́те, ве́рнии, возведе́мся Боже́ственне / и ви́дим схожде́ние Боже́ственное свы́ше, / в Вифлее́ме к нам явле́нне, / и, умо́м очи́стившеся, житие́ принесе́м доброде́тели, / вме́сто ми́ра предуготовля́юще ве́рно рожде́ственныя вхо́ды, / от душе́вных сокро́вищ зову́ще: / в Вы́шних сла́ва Бо́гу, / су́щему в Тро́ице, / Его́же ради в человецех благоволение явися, Адама избавляя первородныя клятвы, я́ко Человеколюбец. (2)

Стих: Бог от ю́га прии́дет / и Святы́й из Горы́ приосене́нныя ча́щи.

Глас 4: Слы́ши, Не́бо, и внуши́, земле́, / да подви́жатся основа́ния, / да прии́мут тре́пет преиспо́дняя: / я́ко Бог же и Творе́ц в плотско́е оде́яся зда́ние, / и И́же держа́вною руко́ю созда́вый тварь, / утро́бы зри́тся зда́ние. / О, глубина́ бога́тства, и прему́дрости, и ра́зума Бо́жия! / Я́ко неиспы́таны судьбы́ Его́ / и неизсле́довани путие́ Его́.

Стих: Го́споди, услы́шах слух Твой и убоя́хся, / Го́споди, разуме́х дела́ Твоя́ и ужасо́хся.

И паки тойже.

Слава, глас 5: Прииди́те, христоно́снии лю́дие, да ви́дим чу́до, / вся́кий ра́зум ужаса́ющее и обдержа́щее, / и, благоче́стно воспева́юще, ве́рнии, поклони́мся. / Днесь к Вифлее́му непра́здна су́щи Де́ва прихо́дит роди́ти Го́спода, / ли́цы же а́нгельстии предтеку́т. / И, сия́ ви́дев, вопия́ше Ио́сиф обру́чник: / что́ е́же в Тебе́ стра́нное та́инство, Де́во? / И ка́ко хо́щеши роди́ти, Неискусобра́чная Ю́нице?

И ныне, паки тойже.

Прокимен, глас 4:

Из чре́ва пре́жде денни́цы роди́х Тя, / кля́тся Госпо́дь и не раска́ется.

Стих: Рече́ Госпо́дь Го́сподеви моему́: седи́ одесну́ю Мене́.

И паремия.

Проро́чества Иса́иина чте́ние

Приложи́ Госпо́дь глаго́лати ко Аха́зу, глаго́ля: проси́ себе́ зна́мения у Го́спода Бо́га твоего́ во глубину́ или́ в высоту́. И рече́ Аха́з: не и́мам проси́ти, ниже́ искуси́ти Го́спода. И рече́ Иса́иа: услы́шите у́бо, до́ме Дави́дов: еда́ мал вам труд дая́ти челове́ком, и ка́ко Го́споду труд даете́? Сего́ ра́ди даст Госпо́дь Сам вам зна́мение: се Де́ва во чре́ве прии́мет и роди́т Сы́на, и нареку́т и́мя Его́ Емману́ил; ма́сло и мед и́мать сне́сти, пре́жде не́же уве́дети Ему́ или́ изво́лити лука́вое, избере́т благо́е: Зане́ пре́жде, не́же разуме́ти Отроча́ти благо́е или́ зло́е, отри́нет лука́вая, избере́т благо́е. И рече́ Госпо́дь ко мне: приими́ себе́ сви́ток нов, вели́к и напиши́ в нем писа́лом челове́ческим, е́же ско́ро плене́ние сотвори́ коры́стей, настоя́т бо. И свиде́тели мне сотвори́ ве́рны челове́ки, Ури́ю иере́я, и Заха́рию, сы́на Варахи́ина. И приступи́х ко проро́чице, и во чре́ве прия́т и роди́ сы́на. И рече́ мне Госпо́дь: нарцы́ и́мя ему́, ско́ро плени́ и напра́сно испрове́рзи. Зане́ пре́жде, не́же разуме́ти Отроча́ти назва́ти отца́ или́ ма́терь, прии́мет си́лу дама́скову и коры́сти самари́йския пря́мо царю́ ассири́йскому. С на́ми Бог, разуме́йте, язы́цы, и покаря́йтеся. Услы́шите да́же до после́дних земли́, могу́щии, покаря́йтеся, а́ще бо па́ки возмо́жете и па́ки побежде́ни бу́дете. И и́же а́ще сове́т совещава́ете, разори́т Госпо́дь, и Сло́во, е́же а́ще возглаго́лете, не пребу́дет в вас, я́ко с на́ми Бог.

Ис.7:10–16, 8:1–4, 8–10

Ко Евре́ем посла́ния свята́го апо́стола Па́вла чте́ние

В нача́ле Ты, Го́споди, зе́млю основа́л еси́, и дела́ руку́ Твое́ю суть Небеса́. Та поги́бнут, Ты же пребыва́еши, и вся, я́коже ри́за, обетша́ют, и, я́ко оде́жду, свие́ши их, и изменя́тся, Ты же то́йжде еси́, и ле́та Твоя́ не оскуде́ют. Кому́ же от А́нгел рече́ когда́: седи́ одесну́ю Мене́, до́ндеже положу́ враги́ Твоя́ подно́жие ног Твои́х. Не вси ли суть служе́бнии ду́си, в служе́ние посыла́еми за хотя́щих насле́довати спасе́ние? Сего́ ра́ди подоба́ет нам ли́шше внима́ти слы́шанным, да не когда́ отпа́днем. А́ще бо глаго́ланное А́нгелы сло́во бысть изве́стно и вся́ко преступле́ние и ослуша́ние, пра́ведное прия́т мздовоздая́ние. Ка́ко мы убежим, о толи́цем неради́вше спасе́нии, е́же зача́ло прие́мше, глаго́латися от Го́спода слы́шавшими в нас извести́ся?

Зачало 304. Евр.1:10–2:3

Иерей: От Матфе́я свята́го Ева́нгелия чте́ние

Иису́су ро́ждшуся в Вифлее́ме Иуде́йстем во дни И́рода царя́, се волсви́ от восто́к приидо́ша во Иерусали́м, глаго́люще: где есть рожде́йся Царь Иуде́йский? Ви́дехом бо звезду́ Его́ на восто́це и приидо́хом поклони́тися Ему́. Слы́шав же, И́род царь смути́ся, и весь Иерусали́м с ним. И собра́в вся первосвяще́нники и кни́жники людски́я, вопроша́ше от них: где Хри́стос ражда́ется? Они́ же реко́ша ему́: в Вифлее́ме Иуде́йстем; та́ко бо пи́сано есть проро́ком: и ты, Вифлее́ме, земле́ Иу́дова, ничи́мже ме́ньши еси́ во влады́ках Иу́довых, из тебе́ бо изы́дет Вождь, и́же упасе́т лю́ди Моя́ Изра́иля. Тогда́ И́род тай призва́ волхвы́ и испы́товаше от них вре́мя я́вльшияся звезды́. И, посла́в их в Вифлее́м, рече́: ше́дше, испыта́йте изве́стно о Отроча́ти; егда́ же обря́щете, возвести́те ми, я́ко да и аз, шед, поклоню́ся Ему́. Они́ же, послу́шавше царя́, идо́ша. И се́ звезда́, ю́же ви́деша на восто́це, идя́ше пред ни́ми, до́ндеже, прише́дше, ста верху́, иде́же бе Отроча́. Ви́девше же звезду́, возра́довашася ра́достию ве́лиею зело́. И, прише́дше в хра́мину, ви́деша Отроча́ с Мари́ею, Ма́терию Его́, и, па́дше, поклони́шася Ему́, и, отве́рзше сокро́вища своя́, принесо́ша Ему́ да́ры, зла́то, и лива́н, и сми́рну. И, весть прие́мше во сне, не возврати́тися ко И́роду, ины́м путе́м отыдо́ша во страну́ свою́.

Зачало 3. Мф.2:1–12

Таже:

Ско́ро да предваря́т ны щедро́ты Твоя́, Го́споди, / я́ко обнища́хом зело́; / помози́ нам, Бо́же, Спа́се наш, / сла́вы ра́ди И́мене Твоего́, Го́споди, изба́ви нас / и очи́сти грехи́ на́ша, И́мене ра́ди Твоего́.

Посем Трисвятое, и по О́тче наш:

Кондак, глас 3:

Де́ва днесь Преве́чное Сло́во / в верте́пе гряде́т роди́ти неизрече́нно: / лику́й, вселе́нная, услы́шавши, / просла́ви со А́нгелы и па́стырьми / хотя́щаго яви́тися Отроча́ Мла́до, Преве́чнаго Бо́га.

Го́споди, поми́луй, 40.

И молитва:

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй (3).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

И́менем Госпо́дним благослови́, о́тче.

Иерей: Бо́же, уще́дри ны и благослови́ ны, просвети́ лице́ Твое́ на ны и поми́луй ны.

Посем молитва Великаго Василия:

Бо́же и Го́споди сил и всея́ тва́ри Соде́телю, И́же за милосе́рдие безприкла́дныя ми́лости Твоея́ Единоро́днаго Сы́на Твоего́, Го́спода на́шего Иису́са Христа́, низпосла́вый на спасе́ние ро́да на́шего, и честны́м Его́ Кресто́м рукописа́ние грех на́ших растерза́вый, и победи́вый тем нача́ла и вла́сти тьмы. Сам, Влады́ко Человеколю́бче, приими́ и нас, гре́шных, благода́рственныя сия́ и моле́бныя моли́твы и изба́ви нас от вся́каго всегуби́тельнаго и мра́чнаго прегреше́ния и всех озло́бити нас и́щущих ви́димых и неви́димых враг. Пригвозди́ стра́ху Твоему́ пло́ти на́ша и не уклони́ серде́ц на́ших в словеса́ или́ помышле́ния лука́вствия, но любо́вию Твое́ю уязви́ ду́ши на́ша, да, к Тебе́ всегда́ взира́юще и е́же от Тебе́ све́том наставля́еми, Тебе́, непристу́пнаго и присносу́щнаго зря́ще Све́та, непреста́нное Тебе́ испове́дание и благодаре́ние возсыла́ем, Безнача́льному Отцу́ со Единоро́дным Твои́м Сы́ном и Всесвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в, ами́нь.

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

И псалом 109

Рече́ Госпо́дь Го́сподеви моему́: седи́ одесну́ю Мене́, до́ндеже положу́ враги́ Твоя́ подно́жие ног Твои́х. Жезл си́лы по́слет Ти Госпо́дь от Сио́на, и господству́й посреде́ враго́в Твои́х. С Тобо́ю нача́ло в день си́лы Твое́я, во све́тлостех святы́х Твои́х. Из чре́ва пре́жде Денни́цы роди́х Тя. Кля́тся Госпо́дь и не раска́ется, Ты Иере́й во век, по чи́ну Мелхиседе́кову. Госпо́дь одесну́ю Тебе́ сокруши́л есть в день гне́ва Своего́ цари́. Су́дит во язы́цех, испо́лнит паде́ния, сокруши́т главы́ на земли́ мно́гих. От пото́ка на пути́ пие́т, сего́ ра́ди вознесе́т главу́.

Псалом 110

Испове́мся Тебе́, Го́споди, всем се́рдцем мои́м в сове́те пра́вых и со́нме. Ве́лия дела́ Госпо́дня, изы́скана во всех во́лях Его́. Испове́дание и великоле́пие де́ло Его́, и пра́вда Его́ пребыва́ет в век ве́ка. Па́мять сотвори́л есть чуде́с Свои́х, ми́лостив и щедр Госпо́дь: пи́щу даде́ боя́щимся Его́, помяне́т в век заве́т Свой. Кре́пость дел Свои́х возвести́ лю́дем Свои́м, да́ти им достоя́ние язы́к. Дела́ рук Его́, и́стина и суд: ве́рны вся за́поведи Его́, утверже́ны в век ве́ка, сотворе́ны во и́стине и правоте́. Избавле́ние посла́ лю́дем Свои́м, запове́да в век заве́т Свой, свя́то и стра́шно И́мя Его́. Нача́ло прему́дрости – страх Госпо́день, ра́зум же благ всем творя́щим и. Хвала́ Его́ пребыва́ет в век ве́ка.

Псалом 85

Приклони́, Го́споди, у́хо Твое́ и услы́ши мя, я́ко нищ и убо́г есмь аз. Сохрани́ ду́шу мою́, я́ко преподо́бен есмь; спаси́ раба́ Твоего́, Бо́же мой, упова́ющаго на Тя. Поми́луй мя, Го́споди, я́ко к Тебе́ воззову́ весь день. Возвесели́ ду́шу раба́ Твоего́, я́ко к Тебе́ взях ду́шу мою́. Я́ко Ты, Го́споди, благ, и кро́ток, и многоми́лостив всем, призыва́ющим Тя. Внуши́, Го́споди, моли́тву мою́ и вонми́ гла́су моле́ния моего́. В день ско́рби моея́ воззва́х к Тебе́, я́ко услы́шал мя еси́. Несть подо́бен Тебе́ в бозе́х, Го́споди, и несть по дело́м Твои́м. Вси язы́цы, ели́ки сотвори́л еси́, прии́дут, и покло́нятся пред Тобо́ю, Го́споди, и просла́вят И́мя Твое́, я́ко ве́лий еси́ Ты и творя́й чудеса́, Ты еси́ Бог еди́н. Наста́ви мя, Го́споди, на путь Твой, и пойду́ во и́стине Твое́й: да возвесели́тся се́рдце мое́ боя́тися И́мене Твоего́. Испове́мся Тебе́, Го́споди Бо́же мой, всем се́рдцем мои́м и просла́влю И́мя Твое́ в век. Я́ко ми́лость Твоя́ ве́лия на мне, и изба́вил еси́ ду́шу мою́ от а́да преиспо́днейшаго. Бо́же, законопресту́пницы воста́ша на мя, и сонм держа́вных взыска́ша ду́шу мою́ и не предложи́ша Тебе́ пред собо́ю. И Ты, Го́споди Бо́же мой, ще́дрый и ми́лостивый, долготерпели́вый, и многоми́лостивый, и и́стинный, при́зри на мя и поми́луй мя, даждь держа́ву Твою́ о́троку Твоему́ и спаси́ сы́ на рабы́ Твоея́. Сотвори́ со мно́ю зна́мение во бла́го, и да ви́дят ненави́дящии мя и постыдя́тся, я́ко Ты, Го́споди, помо́гл ми и уте́шил мя еси́.

Сла́ва, и ны́не, Аллилу́иа, (3). Го́споди, поми́луй, (3).

Слава, тропарь, глас 4:

Написова́шеся иногда́ со ста́рцем Ио́сифом, / я́ко от се́мене Дави́дова, в Вифлее́ме Мариа́м, / чревонося́щи безсе́менное Рожде́ние. / Наста́ же вре́мя Рождества́, / и ме́сто ни еди́ноже бе обита́лищу, / но, я́коже кра́сная пала́та, верте́п Цари́це показа́шеся. / Христо́с ражда́ется пре́жде па́дший воскреси́ти о́браз.

И ныне, Богородичен: И́же нас ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть и воскресе́ние явле́й я́ко Бог, / не пре́зри, я́же созда́л еси́ руко́ю Твое́ю. / Яви́ человеколю́бие Твое́, Ми́лостиве. / Приими́ ро́ждшую Тя Богоро́дицу, моля́щуюся за ны. / И спаси́, Спа́се наш, лю́ди отча́янныя.

Таже тропари сия, глас 7:

Удивля́шеся И́род, / зря волхво́в благоче́стие, / и, гне́вом побежда́емь, / ле́та испыта́ше разстоя́ния; / ма́тери безча́дствуемы быва́ху, / и безвре́менный во́зраст младе́нцев го́рце пожина́шеся, / сосцы́ ссыха́хуся, / и исто́чницы мле́чнии удержава́хуся, / ве́лие бя́ше лю́тое. / Те́мже благоче́стно, ве́рнии, соше́дшеся, / поклони́мся Христо́ву Рождеству́. (2)

Стих: Бог от ю́га прии́дет / и Святы́й из Горы́ приосене́нныя ча́щи.

Тропарь, глас 2: Егда́ Ио́сиф, Де́во, печа́лию уязвля́шеся, / к Вифлее́му идя́, вопия́ла еси́ к нему́: / что́ Мя зря непра́здну дря́хлуеши и смуща́ешися, / не ве́дый вся́ко е́же во Мне стра́шнаго та́инства? / Про́чее отложи́ страх всяк, пресла́вное познава́я: / Бог бо низхо́дит на зе́млю ми́лости ра́ди, / во чре́ве Мое́м ны́не а́ще и плоть прия́т. / Его́же, ражда́ема, у́зриши, я́коже благоизво́ли, / и, ра́дости испо́лнився, поклони́шися я́ко Зижди́телю твоему́, / Его́же А́нгели пою́т непреста́нно / и славосло́вят со Отце́м и Ду́хом Святы́м.

Стих: Го́споди, услы́шах слух Твой и убоя́хся; / Го́споди, разуме́х дела́ Твоя́ и ужасо́хся.

Паки тойже тропарь.

Таже, став посреде церкве, канонарх прочитает велегласно всю стихиру сию.

Глас 6: Днесь ражда́ется от Де́вы / руко́ю всю содержа́й тварь, / пелена́ми, я́коже зе́мен, повива́ется, / И́же существо́м неприкоснове́нен Бог. / В я́слех возлежи́т / утверди́вый Небеса́ сло́вом в нача́лех, / от сосце́в млеко́м пита́ется, / И́же в пусты́ни ма́нну одожди́вый лю́дем, / волхвы́ призыва́ет Жени́х церко́вный, / да́ры сих прие́млет Сын Де́вы. / Покланя́емся Рождеству́ Твоему́, Христе; / покланя́емся Рождеству́ Твоему́, Христе; / покланя́емся Рождеству́ Твоему́, Христе: / покажи́ нам и Боже́ственная Твоя́ Богоявле́ния.

И творим три поклоны.

Потом глаголет велегласно многолетны священник или диакон.

Ведомо же буди, яко сие многолетное поздравление в соборных церквах при архиереех и инде, где прилично, творится в навечерии по отпусте святыя Литургии, или по вечерни, егда бывает навечерие в субботу и неделю; во обителех же во всех Типиках чин положен сему бывати на часех в сем месте.

Таже оба лика вкупе поют предреченную стихиру. Слава, и ныне, глас 6: Днесь ражда́ется от Де́вы:

На девятом часе кадит диакон весь храм.

Прокимен, глас 4:

Ма́ти Сио́н рече́т: / Челове́к, и Челове́к роди́ся в нем.

Стих: Основа́ния Его́ на гора́х святы́х.

Проро́чества Иса́иина чте́ние

Отроча́ роди́ся нам, Сын, и даде́ся нам, Его́же нача́льство бысть на ра́ме Его́; и нарица́ется И́мя Его́: вели́каго сове́та А́нгел, чу́ден Сове́тник, Бог Кре́пок, Власти́тель, Нача́льник ми́ра, Оте́ц бу́дущаго ве́ка, приведе́т бо мир на нача́льники, и здра́вие Его́, и ве́лие нача́льство Его́, и ми́ра Его́ несть преде́ла, на престо́л Дави́дов и на ца́рство Его́, испра́вити е и заступи́ти е судьбо́ю и пра́вдою от ны́не и до ве́ка. Ре́вность Го́спода Савао́фа сотвори́т сия́.

Ис.9:6–7

Ко Евре́ем посла́ния свята́го апо́стола Па́вла чте́ние

Бра́тие, святя́й и освяща́емии, от Еди́наго вси, ея́же ра́ди вины́ не стыди́тся бра́тию нарица́ти их, глаго́ля: возвещу́ И́мя Твое́ бра́тии Мое́й, посреде́ Це́ркве воспою́ Тя. И па́ки: Аз бу́ду наде́яся Нань. И па́ки: се Аз и де́ти, я́же Ми дал есть Бог. Поне́же у́бо де́ти приобщи́шася пло́ти и кро́ви, и Той прии́скренне приобщи́ся те́хже, да сме́ртию упраздни́т иму́щаго держа́ву сме́рти, си́речь диа́вола, и изба́вит сих, ели́цы стра́хом сме́рти чрез все житие́ пови́нни бе́ша рабо́те. Не от А́нгел у́бо когда́ прие́млет, но от се́мене Авраа́мова прие́млет; отню́дуже до́лжен бе по всему́ подо́битися бра́тии, да ми́лостив бу́дет и ве́рен первосвяще́нник в тех, я́же к Бо́гу, во е́же очи́стити грехи́ людски́я. В не́мже бо пострада́, Сам искуше́н быв, мо́жет и искуша́емым помощи́.

Зачало 306. Евр.2:11–18

Иерей: От Матфе́я свята́го Ева́нгелия чте́ние

Отше́дшим волхво́м, се А́нгел Госпо́день во сне яви́ся Ио́сифу, глаго́ля: воста́в, поими́ Отроча́ и Ма́терь Его́, и бежи́ во Еги́пет, и бу́ди та́мо, до́ндеже реку́ ти: хо́щет бо И́род иска́ти Отроча́те, да погуби́т Е. Он же, воста́в, поя́т Отроча́ и Ма́терь Его́ но́щию и оты́де во Еги́пет. И бе та́мо до уме́ртвия И́родова, да сбу́дется рече́нное от Го́спода проро́ком, глаго́лющим: от Еги́пта воззва́х Сы́на Моего́. Тогда́ И́род, ви́дев, я́ко пору́ган бысть от волхво́в, разгне́вася зело́ и, посла́в, изби́ вся де́ти, су́щия в Вифлее́ме и во всех преде́лех его́, от двою́ ле́ту и нижа́йше по вре́мени, е́же изве́стно испыта́ от волхво́в. Тогда́ сбы́стся рече́нное Иереми́ем проро́ком, глаго́лющим: глас в Ра́ме слы́шан бысть, плачь, и рыда́ние, и вопль мног. Рахи́ль пла́чущися чад свои́х и не хотя́ше уте́шитися, я́ко не суть. Уме́ршу же И́роду, се А́нгел Госпо́день во сне яви́ся Ио́сифу во Еги́пте, глаго́ля: воста́в, поими́ Отроча́ и Ма́терь Его́ и иди́ в зе́млю Изра́илеву: изомро́ша бо и́щущии души́ Отроча́те. Он же, воста́в, поя́т Отроча́ и Ма́терь Его́ и прии́де в зе́млю Изра́илеву. Слы́шав же, я́ко Архела́й ца́рствует во Иуде́и вме́сто И́рода, отца́ своего́, убоя́ся та́мо ити́. Весть же прие́мь во сне, оты́де в преде́лы Галиле́йския. И, прише́д, всели́ся во гра́де, нарица́емем Назаре́т. Я́ко да сбу́дется рече́нное проро́ки, я́ко Назоре́й нарече́тся.

Зачало 4. Мф.2:13–23

Таже:

Не преда́ждь нас до конца́ И́мене Твоего́ ра́ди, / и не разори́ заве́та Твоего́, / и не отста́ви ми́лости Твоея́ от нас / Авраа́ма ра́ди, возлю́бленнаго от Тебе́, / и за Исаа́ка, раба́ Твоего́, / и Изра́иля, свята́го Твоего́.

Посем Трисвятое, и по О́тче наш:

Кондак, глас 3:

Де́ва днесь Преве́чное Сло́во / в верте́пе гряде́т роди́ти неизрече́нно: / лику́й, вселе́нная, услы́шавши, / просла́ви со А́нгелы и па́стырьми / хотя́щаго яви́тися Отроча́ Мла́до, Преве́чнаго Бо́га.

Го́споди, поми́луй, 40.

И молитва:

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй (3).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

И́менем Госпо́дним благослови́, о́тче.

Иерей: Бо́же, уще́дри ны и благослови́ ны, просвети́ лице́ Твое́ на ны и поми́луй ны.

Посем молитва Великаго Василия:

Влады́ко Го́споди, Иису́се Христе́, Бо́же наш, долготерпе́вый о на́ших согреше́ниих и да́же до ны́нешняго часа́ приведы́й нас, в о́ньже, на Животворя́щем Дре́ве ви́ся, благоразу́мному разбо́йнику и́же в рай путесотвори́л еси́ вход и сме́ртию смерть разруши́л еси́: очи́сти нас, гре́шных и недосто́йных раб Твои́х, согреши́хом бо и беззако́нновахом и не́смы досто́йни возвести́ очеса́ на́ша и воззре́ти на высоту́ Небе́сную, зане́ оста́вихом путь пра́вды Твоея́ и ходи́хом в во́лях серде́ц на́ших. Но мо́лим Твою́ безме́рную бла́гость: пощади́ нас, Го́споди, по мно́жеству ми́лости Твоея́, и спаси́ нас И́мене Твоего́ ра́ди свята́го, я́ко исчезо́ша в суете́ дни́е на́ши, изми́ нас из руки́ сопроти́внаго, и оста́ви нам грехи́ на́ша, и умертви́ плотско́е на́ше мудрова́ние, да, ве́тхаго отложи́вше челове́ка, в но́ваго облеце́мся и Тебе́ поживе́м, на́шему Влады́це и Благоде́телю. И та́ко, Твои́м после́дующе повеле́нием, в ве́чный поко́й дости́гнем, иде́же есть всех веселя́щихся жили́ще. Ты бо еси́ вои́стинну и́стинное весе́лие и ра́дость лю́бящих Тя, Христе́ Бо́же наш, и Тебе́ сла́ву возсыла́ем со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не, и при́сно, и во ве́ки веко́в, ами́нь.

Псалом 102

Благослови́, душе́ моя́, Го́спода, и вся вну́тренняя моя́ И́мя свято́е Его́. Благослови́, душе́ моя́, Го́спода и не забыва́й всех воздая́ний Его́. Очища́ющаго вся беззако́ния твоя́, исцеля́ющаго вся неду́ги твоя́. Избавля́ющаго от истле́ния живо́т твой, венча́ющаго тя ми́лостию и щедро́тами. Исполня́ющаго во благи́х жела́ние твое́, обнови́тся, я́ко о́рля, ю́ность твоя́. Творя́й ми́лостыни Госпо́дь и судьбу́ всем обиди́мым. Сказа́ пути́ Своя́ Моисе́ови, сыново́м Изра́илевым хоте́ния Своя́. Щедр и ми́лостив Госпо́дь, долготерпели́в и многоми́лостив. Не до конца́ прогне́вается, ниже́ в век вражду́ет. Не по беззако́нием на́шим сотвори́л есть нам, ниже́ по грехо́м на́шим возда́л есть нам. Я́ко по высоте́ Небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть, есмы́. Челове́к, я́ко трава́, дни́е его́, я́ко цвет се́льный, та́ко оцвете́т. Я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́. И пра́вда Его́ на сыне́х сыно́в, храня́щих заве́т Его́ и по́мнящих за́поведи Его́ твори́ти я́. Госпо́дь на Небеси́ угото́ва престо́л Свой, и Ца́рство Его́ все́ми облада́ет. Благослови́те Го́спода, вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода, вся си́лы Его́, слуги́ Его́, творя́щии во́лю Его́. Благослови́те Го́спода, вся дела́ Его́, на вся́ком ме́сте Влады́чества Его́; благослови́, душе́ моя́, Го́спода.

Сла́ва Отцу́ и Сы́ну и Свято́му Ду́ху.

Псалом 145

Хвали́, душе́ моя́, Го́спода, восхвалю́ Го́спода в животе́ мое́м. Пою́ Бо́гу моему́, до́ндеже есмь. Не наде́йтеся на кня́зи, на сы́ны челове́ческия, в ни́хже несть спасе́ния. Изы́дет дух его́ и возврати́тся в зе́млю свою́, в той день поги́бнут вся помышле́ния Его́. Блаже́н, ему́же Бог Иа́ковль помо́щник его́, упова́ние его́ на Го́спода Бо́га своего́, сотво́ршаго Не́бо и зе́млю, мо́ре и вся, я́же в них, храня́щаго и́стину в век, творя́щаго суд оби́димым, даю́щаго пи́щу а́лчущим. Госпо́дь реши́т окова́нныя, Госпо́дь умудря́ет слепцы́, Госпо́дь возво́дит низве́рженныя, Госпо́дь лю́бит пра́ведники, Госпо́дь храни́т прише́льцы, си́ра и вдову́ прии́мет и путь гре́шных погуби́т. Воцари́тся Госпо́дь во век, Бог Твой, Сио́не, в род и род.

И ны́не и при́сно и во ве́ки веко́в, ами́нь.

Единоро́дный Сы́не и Сло́ве Бо́жий, Безсме́ртен Сый / и изво́ливый спасе́ния на́шего ра́ди / воплоти́тися от Святы́я Богоро́дицы и Присноде́вы Мари́и, / непрело́жно вочелове́чивыйся, / распны́йся же, Христе́ Бо́же, / сме́ртию смерть попра́вый, / Еди́н Сый Святы́я Тро́ицы, / спрославля́емый Отцу́ и Свято́му Ду́ху, / спаси́ нас.

Таже:

Во Ца́рствии Твое́м помяни́ нас, Го́споди, егда́ прии́деши, во Ца́рствии Твое́м.

Блаже́ни ни́щии ду́хом, я́ко тех есть Ца́рство Небе́сное.

Блаже́ни пла́чущии, я́ко ти́и уте́шатся. Блаже́ни кро́тции, я́ко ти́и насле́дят зе́млю.

Блаже́ни а́лчущии и жа́ждущии пра́вды, я́ко ти́и насы́тятся.

Блаже́ни ми́лостивии, я́ко ти́и поми́ловани бу́дут.

Блаже́ни чи́стии се́рдцем, я́ко ти́и Бо́га у́зрят.

Блаже́ни миротво́рцы, я́ко ти́и сы́нове Бо́жии нареку́тся. Блаже́ни изгна́ни пра́вды ра́ди, я́ко тех есть Ца́рство Небе́сное.

Блаже́ни есте́, егда́ поно́сят вам, и изжену́т, и реку́т всяк зол глаго́л на вы, лжу́ще Мене́ ра́ди.

Ра́дуйтеся и весели́теся, я́ко мзда ва́ша мно́га на Небесе́х.

Сла́ва, и ны́не:

Помяни́ нас, Го́споди, егда́ прии́деши, во Ца́рствии Твое́м.

Помяни́ нас, Влады́ко, егда́ прии́деши, во Ца́рствии Твое́м.

Помяни́ нас, Святы́й, егда́ прии́деши, во Ца́рствии Твое́м.

Лик Небе́сный пое́т Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

Стих: Приступи́те к Нему́ и просвети́теся, и ли́ца ва́ша не постыдя́тся.

Лик Небе́сный пое́т Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

Слава: Лик святы́х А́нгел и Арха́нгел со все́ми Небе́сными си́лами пое́т Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

И ныне:

Исповедание Православныя веры:

(Аще есть Литургия, зде не глаголем, но по И ны́не, глаголем: Осла́би, оста́ви: и прочая.)

Ве́рую во Еди́наго Бо́га Отца́ Вседержи́теля, Творца́ Не́бу и земли́, ви́димым же всем и неви́димым. И во Еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, не сотворе́нна, Единосу́щна Отцу́, И́мже вся бы́ша. Нас ра́ди челове́к, и на́шего ра́ди спасе́ния сше́дшаго с Небе́с, и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны при Понти́йстем Пила́те, и страда́вша, и погребе́нна, и воскре́сшаго в тре́тий день, по писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но Креще́ние во оставле́ние грехо́в. Ча́ю воскресе́ния ме́ртвых и жи́зни бу́дущаго ве́ка, ами́нь.

Молитва:

Осла́би, оста́ви, прости́, Бо́же, прегреше́ния на́ша, во́льная и нево́льная, я́же в сло́ве и в де́ле, я́же в ве́дении и не в ве́дении, я́же во дни и в нощи́, я́же во уме́ и в помышле́нии, вся нам прости́, я́ко Благ и Человеколю́бец.

Посем, О́тче наш, И́же еси́ на Небесе́х! Да святи́тся И́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный даждь нам днесь, и оста́ви нам до́лги на́ша, я́коже и мы оставля́ем должнико́м на́шим, и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство: Чтец: Аминь.

Кондак, глас 3:

Де́ва днесь Преве́чное Сло́во / в верте́пе гряде́т роди́ти неизрече́нно: / лику́й, вселе́нная, услы́шавши, / просла́ви со А́нгелы и па́стырьми / хотя́щаго яви́тися Отроча́ Мла́до, Преве́чнаго Бо́га.

Го́споди, поми́луй, 40.

Таже молитву сию:

Всесвята́я Тро́ице, / Единосу́щная Держа́во, / Неразде́льное Ца́рство, / всех благи́х Вина́: / благоволи́ же и о мне, гре́шнем, / утверди́, вразуми́ се́рдце мое́ / и всю мою́ отыми́ скве́рну. / Просвети́ мою́ мысль, / да вы́ну сла́влю, пою́, и покланя́юся, и глаго́лю: / Еди́н Свят, Еди́н Госпо́дь, Иису́с Христо́с / во сла́ву Бо́га Отца́, ами́нь.

Таже, Досто́йно есть: И отпуст дне. И бывает росход до часа вечерняго. Вечерня же бывает с Литургиею Василия Великаго во свое время. Псалом же, Благословлю́ Го́спода: глаголем на Литургии по заамвонной молитве.

Аще же несть литургии. глаголем зде:

Бу́ди И́мя Госпо́дне благослове́но от ны́не и до ве́ка. (3)

Сла́ва, и ны́не: псалом 33

Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тции и возвеселя́тся. Возвели́чите Го́спода со мно́ю, и вознесе́м И́мя Его́ вку́пе. Взыска́х Го́спода, и услы́ша мя и от всех скорбе́й мои́х изба́ви мя. Приступи́те к Нему́ и просвети́теся, и ли́ца ва́ша не постыдя́тся. Сей ни́щий воззва́, и Госпо́дь услы́ша и, и от всех скорбе́й его́ спасе́ и. Ополчи́тся А́нгел Госпо́день о́крест боя́щихся Его́ и изба́вит их. Вкуси́те и ви́дите, я́ко благ Госпо́дь. Блаже́н муж, и́же упова́ет Нань. Бо́йтеся Го́спода вси святи́и Его́, я́ко несть лише́ния боя́щимся Его́. Бо́га́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ вас. Кто есть челове́к, хотя́й живо́т, любя́й дни ви́дети бла́ги? Удержи́ язы́к твой от зла и устне́ твои́, е́же не глаго́лати льсти. Уклони́ся от зла и сотвори́ бла́го; взыщи́ ми́ра и пожени́ и. О́чи Госпо́дни на пра́ведныя и у́ши Его́ в моли́тву их. Лице́ же Госпо́дне на творя́щия зла́я, е́же потреби́ти от земли́ па́мять их. Воззва́ша пра́веднии, и Госпо́дь услы́ша их и от всех скорбе́й их изба́ви их. Близ Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от всех их изба́вит я́ Госпо́дь. Храни́т Госпо́дь вся ко́сти их, ни еди́на от них сокруши́тся. Смерть гре́шников люта́, и ненави́дящии пра́веднаго прегреша́т. Изба́вит Госпо́дь ду́ши раб Свои́х, и не прегреша́т вси, упова́ющии на Него́.

Досто́йно есть: И отпуст.

Подобает ведати: Аще в субботу или в неделю будет навечерие, Литургия Златоустова поется. Великаго же Василия Литургия поется на самый праздник. Такожде творим и на праздник святых Богоявлений. Блюди, яко егда несть субботы или недели в навечерие, тогда бывает Литургия Василия Великаго, а в день праздника Литургия Златоустова бывает. Сице же и в праздник Богоявления.

Разумно же буди и о сем, яко от Христова Рождества и до святых Богоявлений никакоже пост, ни коленопоклонения бывают, ниже в церкви, ниже в келлиах.

Ведомо же буди: Аще случится Рождество Христово или Богоявление в неделю, воскресно ничтоже поем.

При часе 7-м дне ударяет в великий кампан и во вся тяжкая; и, собравшеся во храм, начинаем вечерню по обычаю. Диакон глаголет: Благослови́, влады́ко. Иерей: Благослове́но Ца́рство: и по Аминь: предстоятель: Царю́ Небе́сный: Трисвятое и по О́тче наш: Го́споди, помилуй: 12, Сла́ва, и ны́не: Прииди́те, поклони́мся: трижды. И псалом: Благослови́, душе́ моя́, Го́спода: Посем диакон глаголет ектению великую. И аще убо в субботу вечера, поем: Блаже́н муж: кафисму всю, аще же в неделю вечера, поем точию 1-й антифон. Аще ли ин день, стихология не бывает, но по ектении абие поем: Го́споди, воззва́х к Тебе́: на глас 2. Иерей же творит проскомидию. Таже диакон кадит храм по обычаю, ликове же поют:

Стихиры праздника на 8.

Глас 2, самогласны

Германово: Прииди́те, возра́дуемся Го́сподеви, настоя́щую та́йну сказу́юще: / средосте́ние граде́жа разруши́ся, / пла́менное oру́жие плещи́ дае́т, / и Херуви́м отступа́ет от дре́ва жи́зни, / и аз ра́йския пи́щи причаща́юся, / от него́же произгна́н бых преслуша́ния ра́ди; / неизме́нный бо о́браз Oте́чь, / о́браз присносу́щия Eго́, / зрак раба́ прие́млет, / от

Неискусобра́чныя Ма́тере проше́д, / не преложе́ние претерпе́в, / éже бо бе пребы́сть, Бог Сый и́стинен, / и éже не бе прия́т, Челове́к быв человеколю́бия ра́ди. / Тому́ возопии́м: / рожде́йся от Де́вы Бо́же, поми́луй нас. (2)

Анатолиево: Го́споду Иису́су ро́ждшуся от Святы́я Де́вы, / просвети́шася вся́чeская: / па́стырeм бо свиря́ющим и волхво́м покланя́ющимся, / А́нгелом воспева́ющим, И́род мятя́шеся, / я́ко Бог во пло́ти яви́ся, / Спас душ на́ших. (2)

Ца́рство Твое́, Христе́ Бо́же, / Ца́рство всех веко́в, / и Влады́чество Твое́ во вся́ком ро́де и ро́де, / воплоти́выйся от Ду́ха Свята́го / и от Присноде́вы Мари́и вочелове́чивыйся, / свет нам возсия́, Христе́ Бо́же, / Твое́ прише́ствие; / Свет от Све́та, Óтчее сия́ние, / всю тварь просвети́л eси́, / вся́кое дыха́ние хва́лит Тя. / О́браз сла́вы Óтчия, / Сый, и пре́жде Сый, / и возсия́вый от Де́вы, Бо́же, поми́луй нас. (2)

Что́ Тебе́ принесе́м, Христе́, / я́ко яви́лся eси́ на земли́ / я́ко Челове́к нас ра́ди? / Ка́яждо бо от Тебе́ бы́вших тва́рей благодаре́ние Тебе́ прино́сит: / А́нгели – пе́ние; небеса́ – звезду́; / волсви́ – да́ры; па́стырие – чу́до; / земля́ – верте́п; пусты́ня – я́сли; / мы же – Ма́терь Де́ву. / И́же пре́жде век, Бо́же, поми́луй нас. (2)

Слава, и ныне, глас тойже. Кассиино:

А́вгусту eдинонача́льствующу на земли́, / многонача́лие челове́ков преста́; / и Тебе́ вочелове́чшуся от Чи́стыя, / многобо́жие и́долов упраздни́ся, / под eди́нем ца́рством мирски́м гра́ди бы́ша, / и во Eди́но Влады́чество Божества́ язы́цы ве́роваша. / Написа́шася лю́дие повеле́нием ке́саревым, / написа́хомся, ве́рнии, И́менем Божества́, / Тебе́, вочелове́чшагося Бо́га на́шего. / Ве́лия Твоя́ ми́лость, Го́споди, сла́ва Тебе́.

Вход со Евангелием. Све́те Ти́хий: Прокимен дне. И чтения по чину их, с тропари и со стихи их.

Аще прилучится навечерие Рождества Христова в пяток, прокимен поется: Кто Бог ве́лий, я́ко Бог наш: со стихи своими. Дневный же оставляется.

Бытия́ чте́ние

В нача́ле сотвори́ Бог Не́бо и зе́млю. Земля́ же бе неви́дима и неустро́ена, и тьма верху́ бе́здны, и Дух Бо́жий ноша́шеся верху́ воды́. И рече́ Бог: да бу́дет свет. И бысть свет. И ви́де Бог свет, я́ко добро́; и разлучи́ Бог между́ све́том и между́ тьмо́ю. И нарече́ Бог свет день, и тьму нарече́ нощь. И бысть ве́чер, и бысть у́тро, день еди́н. И рече́ Бог: да бу́дет твердь посреде́ воды́, и да бу́дет разлуча́ющи посреде́ воды́ и воды́. И бысть та́ко. И сотвори́ Бог твердь; и разлучи́ Бог между́ водо́ю, я́же бе под тве́рдию, и между́ водо́ю, я́же бе над тве́рдию. И нарече́ Бог твердь не́бо; и ви́де Бог, я́ко добро́. И бысть ве́чер, и бысть у́тро, день вторы́й. И рече́ Бог: да собере́тся вода́, я́же под небесе́м, в собра́ние еди́но, и да яви́тся су́ша. И бысть та́ко. И собра́ся вода́, я́же под небесе́м, в собра́ния своя́, и яви́ся су́ша. И нарече́ Бог су́шу зе́млю и собра́ния вод нарече́ моря́. И ви́де Бог, я́ко добро́. И рече́ Бог: да прорасти́т земля́ бы́лие травно́е, се́ющее се́мя по ро́ду и по подо́бию, и дре́во плодови́тое, творя́щее плод, ему́же се́мя его́ в нем, по ро́ду на земли́. И бысть та́ко. И изнесе́ земля́ бы́лие травно́е, се́ющее по ро́ду и по подо́бию, и дре́во плодови́тое, творя́щее плод, ему́же се́мя его́ в нем по ро́ду на земли́. И ви́де Бог, я́ко добро́. И бысть ве́чер, и бысть у́тро, день тре́тий.

Быт.1:1–13

Чисел чте́ние

Бысть Дух Бо́жий на Валаа́ме и, восприе́м при́тчи своя́, рече́: коль добри́ до́ми твои́, Иа́кове, и ски́ния твоя́, Изра́илю? Я́ко страны́ осеня́ющия, я́ко са́дие при река́х, и я́ко ски́ния, я́же водрузи́ Госпо́дь, и я́ко ке́дри при вода́х. Изы́дет челове́к от се́мене его́, и облада́ет язы́ки мно́гими, и возвы́сится ца́рство его́, и возрасте́т. Бог наста́вит его́ из Еги́пта, я́ко сла́ву единоро́га его́. Поя́ст язы́ки враг свои́х, и то́лщу их изможди́т, и стрела́ми свои́ми устрели́т врага́. Возле́г, почи́, я́ко лев и я́ко ски́мен, кто возста́вит его́? Благословя́щии Тя благослове́ни, и проклина́ющии Тя про́кляти. Возсия́ет звезда́ от Иа́кова, и воста́нет челове́к от Изра́иля, и ссече́т кня́зи Моави́тския, и плени́т вся сы́ны Си́фовы, и бу́дет Едо́м достоя́ние, и бу́дет насле́дие Иса́в враг его́, и Изра́иль сотвори́ кре́пость.

Числ.24:2–3, 5–9, 17–18

Проро́чества Михе́ина чте́ние

Во днех о́нех глаго́лет Госпо́дь: соберу́ сокруше́нную и отринове́нную прииму́, я́же отри́нух. И положу́ сотре́нную во оста́нок и отринове́нную в язы́к кре́пок, и воцари́тся Госпо́дь над ни́ми в горе́ Сио́нстей от ны́не и во ве́ки. И ты, Вифлее́ме, до́ме Евфра́фов, еда́ мал еси́, е́же бы́ти в ты́сящах Иу́довых. Из тебе́ бо Мне изы́дет Старе́йшина, е́же бы́ти в Кня́зя во Изра́или́; и исхо́ди Его́ из нача́ла, от дней ве́ка. Сего́ ра́ди даст я́, до вре́мене ражда́ющия породи́т, и про́чии от бра́тий Его́ обратя́тся к сыно́м Изра́илевым. И ста́нет, и у́зрит, и упасе́т па́ству Свою́ кре́постию Госпо́дь. И в сла́ве И́мене Го́спода Бо́га своего́ пребу́дут, за́не ны́не возвели́чится да́же до коне́ц земли́.

Мих.4:6–7, 5:2–4

Таже возгласит чтец, глас 6,

и нам, воставшим, глаголет тропарь сей:

Та́йно роди́лся еси́ в верте́пе, / но Не́бо Тя всем пропове́да, / я́коже уста́, звезду́ предлага́я, Спа́се, / и волхвы́ Ти приведе́, ве́рою покланя́ющияся Тебе́; / с ни́миже поми́луй нас.

Стих 1: Основа́ния Его́ на гора́х святы́х, / лю́бит Госпо́дь врата́ Сио́ня па́че всех селе́ний Иа́ковлих, / пресла́вная глаго́лашася о Тебе́, гра́де Бо́жий. / Помяну́ Ра́ав и Вавило́на, ве́дущим мя.

И поем конец: И волхвы́ Ти приведе́, ве́рою покланя́ющияся Тебе́; с ни́миже поми́луй нас.

Стих 2: И се иноплеме́нницы, и Тир, и лю́дие Ефио́пстии, / си́и бы́ша та́мо. / Ма́ти Сио́н рече́т: / Челове́к и Челове́к роди́ся в нем, / и Той основа́ и Вы́шний.

И паки: И волхвы́ Ти приведе́, ве́рою покланя́ющияся Тебе́; с ни́миже поми́луй нас.

Стих 3: Госпо́дь пове́сть в писа́нии люде́й / и князе́й сих, бы́вших в нем, / я́ко веселя́щихся всех жили́ще в Тебе́.

И паки: И волхвы́ Ти приведе́, ве́рою покланя́ющияся Тебе́; с ни́миже поми́луй нас.

Таже, Сла́ва: поет лик правый конец тропаря. И ны́не: левый поет такожде конец. Посем глаголет чтец весь тропарь. И поет сам конец его:

Та́йно роди́лся еси́ в верте́пе, / но Не́бо Тя всем пропове́да, / я́коже уста́, звезду́ предлага́я, Спа́се, / и волхвы́ Ти приведе́, ве́рою покланя́ющияся Тебе́; / с ни́миже поми́луй нас.

И чтутся паки по обычаю чтения сия:

Проро́чества Иса́иина чте́ние

Та́ко глаго́лет Госпо́дь: изы́дет Жезл от ко́рене Иессе́ова, и Цвет от ко́рене его́ взы́дет, и почи́ет на Нем Дух Бо́жий, Дух му́дрости и ра́зума, Дух сове́та и кре́пости, Дух ве́дения и благоче́стия, Дух стра́ха Бо́жия испо́лнит Его́. Не по сла́ве су́дит, ниже́ по глаго́ланию обличи́т, но су́дит пра́вдою смире́нных суд, и обличи́т пра́востию сла́вныя земли́, и порази́т зе́млю сло́вом уст Свои́х, и Ду́хом усте́н убие́т нечести́ваго. И бу́дет пра́вдою препоя́сан по чре́слех Свои́х и и́стиною обви́т по ре́бром Свои́м. Тогда́ пожиру́ет волк со а́гнцем, и рысь почи́ет с ко́злищем, и теле́ц, и лев, и юне́ц вку́пе пожиру́ют, и отроча́ ма́ло поведе́т их. Теле́ц и лев вку́пе пасу́тся, и вку́пе ча́да их бу́дут; и лев, я́ко вол, снесть пле́вы. И отроча́ мла́до на пеще́ру а́спидску и на ло́же пле́мене а́спидска ру́ку возложи́т. И не сотворя́т зла, ниже́ и́мут погуби́ти ни еди́наго же на горе́ святе́й Мое́й, зане́же напо́лнися вся земля́ позна́ти Го́спода, я́ко воде́ мно́зе покры́ти моря́. И бу́дет в день он ко́рень Иессе́ев и возстая́й владе́ти язы́ки; на него́ язы́цы упова́ют, и бу́дет поко́й его́ честь.

Ис.11:1–10

Проро́чества Вару́хова чте́ние

Сей Бог наш, и не приложи́тся ин к Нему́. Изобре́те всяк путь худо́жества, и даде́ и Иа́кову, о́троку Своему́, и Изра́илю, возлю́бленному от Него́. Посе́м же на земли́ яви́ся и с челове́ки поживе́. Сия́ кни́га повеле́ний Бо́жиих, и зако́н сый во ве́ки; вси, держа́щиися ея́, в живо́т вни́дут, оста́вившии же ю, у́мрут. Обрати́ся, Иа́кове, и ими́ся ея́. Поиди́ к сия́нию пря́мо све́та ея́. Не даждь ино́му сла́вы твоея́ и поле́зных тебе́ язы́ку чужде́му. Блаже́ни есмы́, Изра́илю, я́ко уго́дная Бо́гу нам разу́мна суть.

Вар.3:36–38, 4:1–4

Проро́чества Дании́лова чте́ние

Рече́ Дании́л Навуходоно́сору: ты, царю́, ви́дел еси́, и се о́браз еди́н, о́браз о́ный вели́к, и обли́чие его́ окру́гло, стоя́ше пред лице́м твои́м, и виде́ние его́ стра́шно. О́браз, его́же глава́ от зла́та чи́ста; ру́це, и пе́рси, и мы́шцы его́ сре́бряны; чре́во и сте́гны ме́дяны; го́лени желе́зны; но́зе часть у́бо желе́зна, и часть не́кая скуде́льна. Ви́дел еси́, до́ндеже отто́ржеся ка́мень от горы́ без рук и порази́ о́браз, на но́ги желе́зныя и скуде́льныя, и истни́ я́ до конца́. Тогда́ истни́шася во еди́но скуде́ль, желе́зо, медь, сребро́, зла́то, и бы́ша, я́ко прах от гумна́ жа́твеннаго, и взят я́ мно́жество дохнове́ния, и ме́сто не обре́теся им; ка́мень же, порази́вый о́браз, бысть в го́ру ве́лию и испо́лни всю зе́млю. Сие́ есть со́ние, и сказа́ние его́ рече́м пред царе́м: возста́вит Бог Небе́сный Ца́рство, е́же во ве́ки не истле́ет, и Ца́рство Его́ лю́дем ины́м не оста́вится. И истни́т, и изможди́т вся ца́рствия, и то воста́нет во ве́ки. И́мже о́бразом ви́дел еси́, я́ко от горы́ отсече́ся ка́мень без рук и сотры́ скуде́ль, желе́зо, медь, сребро́, зла́то. Бог вели́кий сказа́ царю́, и́мже подоба́ет быти по сих, и и́стинно со́ние и ве́рно сказа́ние Его́.

Дан.2:31–36, 44–45

Посем чтец глаголет тропарь сей, глас 6:

Возсия́л еси́, Христе́, от Де́вы, разу́мное Со́лнце Пра́вды, / и звезда́ Тя показа́ в верте́пе, вмеща́ющася Невмести́маго. / Волхвы́ наста́вил еси́ на поклоне́ние Твое́, / с ни́миже Тя велича́ем: / Жизнода́вче, сла́ва Тебе́.

Стих 1, псалом 92: Госпо́дь воцари́ся, в ле́поту облече́ся, / облече́ся Госпо́дь в си́лу и препоя́сася, / и́бо утверди́ вселе́нную, я́же не подви́жится. / Гото́в престо́л Твой отто́ле, / от ве́ка Ты еси́.

Таже, паки: Волхвы́ наста́вил еси́ на поклоне́ние Твое́, с ни́миже Тя велича́ем: Жизнода́вче, сла́ва Тебе́.

Стих 2: Воздвиго́ша ре́ки, Го́споди, / воздвиго́ша ре́ки гла́сы своя́. / Во́змут ре́ки сотре́ния своя́ / от гласо́в вод мно́гих.

Таже, паки: Волхвы́ наста́вил еси́ на поклоне́ние Твое́, с ни́миже Тя велича́ем: Жизнода́вче, сла́ва Тебе́.

Стих 3: Ди́вны высоты́ морски́я, / ди́вен в высо́ких Госпо́дь. / Свиде́ния Твоя́ уве́ришася зело́: / до́му Твоему́ подоба́ет святы́ня, Го́споди, в долготу́ дний.

Сла́ва, конец тропаря. И ны́не, паки конец.

Таже тропарь, весь:

Возсия́л еси́, Христе́, от Де́вы, разу́мное Со́лнце Пра́вды, / и звезда́ Тя показа́ в верте́пе, вмеща́ющася Невмести́маго. / Волхвы́ наста́вил еси́ на поклоне́ние Твое́, / с ни́миже Тя велича́ем: / Жизнода́вче, сла́ва Тебе́.

Конец же тропаря поет чтец сам и посем чтет:

Проро́чества Иса́иина чте́ние

Отроча́ роди́ся нам, Сын, и даде́ся нам, Его́же нача́льство бысть на ра́ме Его́; и нарица́ется И́мя Его́: вели́каго сове́та А́нгел, чу́ден Сове́тник, Бог Кре́пок, Власти́тель, Нача́льник ми́ра, Оте́ц бу́дущаго ве́ка, приведе́т бо мир на нача́льники, и здра́вие Его́, и ве́лие нача́льство Его́, и ми́ра Его́ несть преде́ла, на престо́л Дави́дов и на ца́рство Его́, испра́вити е и заступи́ти е судьбо́ю и пра́вдою от ны́не и до ве́ка. Ре́вность Го́спода Савао́фа сотвори́т сия́.

Ис.9:6–7

Проро́чества Иса́иина чте́ние

Приложи́ Госпо́дь глаго́лати ко Аха́зу, глаго́ля: проси́ себе́ зна́мения у Го́спода Бо́га твоего́ во глубину́ или́ в высоту́. И рече́ Аха́з: не и́мам проси́ти, ниже́ искуси́ти Го́спода. И рече́ Иса́иа: услы́шите у́бо, до́ме Дави́дов: еда́ мал вам труд дая́ти челове́ком, и ка́ко Го́споду труд даете́? Сего́ ра́ди даст Госпо́дь Сам вам зна́мение: се Де́ва во чре́ве прии́мет и роди́т Сы́на, и нареку́т и́мя Его́ Емману́ил; ма́сло и мед и́мать сне́сти, пре́жде не́же уве́дети Ему́ или́ изво́лити лука́вое, избере́т благо́е: Зане́ пре́жде, не́же разуме́ти Отроча́ти благо́е или́ зло́е, отри́нет лука́вая, избере́т благо́е. И рече́ Госпо́дь ко мне: приими́ себе́ сви́ток нов, вели́к и напиши́ в нем писа́лом челове́ческим, е́же ско́ро плене́ние сотвори́ коры́стей, настоя́т бо. И свиде́тели мне сотвори́ ве́рны челове́ки, Ури́ю иере́я, и Заха́рию, сы́на Варахи́ина. И приступи́х ко проро́чице, и во чре́ве прия́т и роди́ сы́на. И рече́ мне Госпо́дь: нарцы́ и́мя ему́, ско́ро плени́ и напра́сно испрове́рзи. Зане́ пре́жде, не́же разуме́ти отроча́ти назва́ти отца́ или́ ма́терь, прии́мет си́лу дама́скову и коры́сти самари́йския пря́мо царю́ ассири́йскому. С на́ми Бог, разуме́йте, язы́цы, и покаря́йтеся. Услы́шите да́же до после́дних земли́, могу́щии, покаря́йтеся, а́ще бо па́ки возмо́жете и па́ки побежде́ни бу́дете. И и́же а́ще сове́т совещава́ете, разори́т Госпо́дь, и Сло́во, е́же а́ще возглаго́лете, не пребу́дет в вас, я́ко с на́ми Бог.

Ис.7:10–16, 8:1–4, 8–10

Посем ектениа малая и по возгласе Трисвятое.

Прокимен, глас 1:

Госпо́дь рече́ ко Мне: Сын Мой еси́ Ты, / Аз днесь роди́х Тя.

Стих: Проси́ от Мене́, и дам Ти язы́ки, достоя́ние Твое́ и одержа́ние Твое́ концы́ земли́.

Апостол ко Евреем, зачало 303

Многоча́стне и многообра́зне дре́вле Бог, глаго́лавый отце́м во проро́цех. В после́док дний сих глаго́ла нам в Сы́не, Его́же положи́ насле́дника всем, И́мже и ве́ки сотвори́. И́же Сый сия́ние сла́вы и о́браз Ипоста́си Его́, нося́ же вся́ческая глаго́лом си́лы Своея́, Собо́ю очище́ние сотвори́в грехо́в на́ших, се́де одесну́ю Престо́ла вели́чествия на высо́ких. Толи́ко лу́чший быв А́нгел, ели́ко пресла́внее па́че их насле́дствова и́мя. Кому́ бо рече́ когда́ от А́нгел: Сын Мой еси́ Ты, Аз днесь роди́х Тя; и па́ки: Аз бу́ду Ему́ во Отца́, и Той бу́дет Мне в Сы́на. Егда́ же па́ки вво́дит Перворо́днаго во вселе́нную, глаго́лет: и да покло́нятся Ему́ вси А́нгели Бо́жии. И ко А́нгелом у́бо глаго́лет: творя́й А́нгелы Своя́ ду́хи и слуги́ Своя́ огнь паля́щ. К Сы́ну же: престо́л Твой, Бо́же, в век ве́ка, жезл пра́вости, жезл Ца́рствия Твоего́. Возлюби́л еси́ пра́вду и возненави́дел еси́ беззако́ние, сего́ ра́ди пома́за Тя, Бо́же, Бог Твой еле́ем ра́дости па́че прича́стник Твои́х. И па́ки: в нача́ле Ты, Го́споди, зе́млю основа́л еси́, и дела́ руку́ Твое́ю суть небеса́. Та́ поги́бнут, Ты же пребыва́еши, и вся, я́коже ри́за, обетша́ют, и, я́ко оде́жду, свие́ши их, и изменя́тся; Ты же то́йжде еси́, и ле́та Твоя́ не оскуде́ют.

Евр.1:1–12

Аллилуиа, глас 5

Стих: Рече́ Госпо́дь Го́сподеви моему́: седи́ одесну́ю Мене́, до́ндеже положу́ враги́ Твоя подно́жие ног Твои́х.

Стих: Жезл си́лы по́слет Ти Госпо́дь от Сио́на, и госпо́дьствуй посреде́ враго́в Твои́х. Стих: Из чре́ва пре́жде денни́цы роди́х Тя, кля́тся Госпо́дь и не раска́ется.

Евангелие Луки, зачало 5

Во днех о́нех изы́де повеле́ние от ке́саря А́вгуста написа́ти всю вселе́нную. Сие́ написа́ние пе́рвое бысть, владя́щу Сири́ею Кирини́ю. И идя́ху вси написа́тися, ко́ждо во свой град. Взы́де же и Ио́сиф от Галиле́и из гра́да Назаре́та во Иуде́ю, во град Дави́дов, и́же нарица́ется Вифлее́м, зане́ бы́ти ему́ от до́му и оте́чества Дави́дова, написа́тися с Мари́ею, обруче́нною ему́ Жено́ю, су́щею непра́здною. Бысть же, егда́ бы́ша та́мо, испо́лнишася дни́е роди́ти Ей. И роди́ Сы́на Своего́ пе́рвенца, и пови́т Его́, и положи́ Его́ в я́слех, зане́ не бе им ме́ста во оби́тели. И па́стырие бе́ху в то́йже стране́, бдя́ще, и стрегу́ще стра́жу нощну́ю о ста́де свое́м. И се А́нгел Госпо́день ста в них, и сла́ва Госпо́дня осия́ их, и убоя́шася стра́хом ве́лиим. И рече́ им А́нгел: не бо́йтеся, се бо благовеству́ю вам ра́дость ве́лию, я́же бу́дет всем лю́дем, я́ко роди́ся вам днесь Спас, и́же есть Христо́с Госпо́дь, во гра́де Дави́дове. И се вам зна́мение: обря́щете Младе́нца пови́та, лежа́ща в я́слех. И внеза́пу бысть со А́нгелом мно́жество вой Небе́сных, хва́лящих Бо́га и глаго́лющих: сла́ва в Вы́шних Бо́гу, и на земли́ мир, в челове́цех благоволе́ние. И бысть, я́ко отыдо́ша от них на Не́бо А́нгели, и челове́цы па́стырие ре́ша друг ко дру́гу: пре́йдем до Вифлее́ма и ви́дим глаго́л сей бы́вший, его́же Госпо́дь сказа́ нам. И приидо́ша, поспе́шшеся, и обрето́ша Мариа́м же и Ио́сифа и Младе́нца, лежа́ща во я́слех. Ви́девше же, сказа́ша о глаго́ле, глаго́ланном им о Отроча́ти Сем. И вси слы́шавшии диви́шася о глаго́ланных от па́стырей к ним. Мариа́м же соблюда́ше вся глаго́лы сия́, слага́ющи в се́рдцы Свое́м. И возврати́шася па́стырие, сла́вяще и хва́ляще Бо́га о всех я́же слы́шаша и ви́деша, я́коже глаго́лано бысть к ним.

Лк.2:1–20

(Дне же ряд: прокимен, апостол и Евангелие в навечерии Рождества Христова и Богоявления не чтется). И по ряду Божественная Литургия Великаго Василия.

Вместо Досто́йно: поем:

О Тебе́ ра́дуется, Благода́тная вся́кая тварь, / А́нгельский собор и челове́ческий род, / освяще́нный хра́ме и раю́ слове́сный, / девственная похвало́, / из Нея́же Бог воплоти́ся, / и Младе́нец бысть, пре́жде век Сый Бог наш: / ложесна́ бо Твоя́ престо́л сотвори́ / и чре́во Твое́ простра́ннее Небе́с соде́ла. / О Тебе́ ра́дуется, Благода́тная, вся́кая тварь, сла́ва Тебе́.

Причастен един:

Хвали́те Го́спода с Небе́с, / хвали́те Его́ в Вы́шних. / Аллилу́иа, трижды.

По отпусте Литургии вжигает параекклисиарх свещник и поставляет среди церкве. Клирицы же, ставше оба лика вкупе, поют возгласно тропарь праздника, глас 4: Рождество́ Твое́, Христе́ Бо́же наш: Сла́ва, и ны́не: кондак, глас 3: Де́ва днесь Пресу́щественнаго ражда́ет: По окончании же кондака, многолетие. И входим в трапезу, и ядим варение с елеем,

рыбы же не ядим, вино же пием, благодаряще Бога.

Ведати подобает, яко праздник Рождества Христова в кий день ни случится, поется повечерие великое сице:

О часе десятом нощи бывает благовест и потом трезвон во вся кампаны, иерей же со диаконом, оболкшеся, творят начало, якоже во вся праздники Владычни. Диакон глаголет:

Благослови́, влады́ко. Иерей: Благослове́н Бог наш: И кадящу иерею, глаголем повечерие великое от начала: Сла́ва Тебе́ Бо́же наш, сла́ва Тебе́. Царю́ Небе́сный: Трисвятое, и прочее. С на́ми Бог: поем с пением. И вместо тропарей обычных: Просвети́ о́чи мои́: глаголем тропарь праздника; и вместо: Поми́луй нас, Го́споди, поми́луй нас: глаголем кондак праздника. По Сла́ва в Вы́шних: исходим в притвор, поюще.

На литии стихиры самогласны, глас 1.

Иоанна монаха:

Не́бо и земля́ днесь проро́чески да возвеселя́тся, / А́нгели и челове́цы духо́вно да торжеству́ют, / я́ко Бог во пло́ти яви́ся / су́щим во тьме и се́ни седя́щим, рожде́йся от Де́вы; / верте́п и я́сли прия́ша Того́; / па́стырие чу́до пропове́дуют; / волсви́ от восто́к в Вифлее́м да́ры прино́сят. / Мы же хвалу́ недосто́йными устна́ми а́нгельски Тому́ принесе́м: / сла́ва в Вы́шних Бо́гу, и на земли́ мир, / прии́де бо Ча́яние язы́ков, / прише́д, спасе́ нас от рабо́ты вра́жия.

Не́бо и земля́ днесь совокупи́шася, / ро́ждшуся Христу́. / Днесь Бог на зе́млю прии́де, / и челове́к на Небеса́ взы́де. / Днесь ви́димь eсть пло́тию, / eстество́м неви́димый, челове́ка ра́ди. / Сего́ ра́ди и мы, славосло́вяще, возопии́м Eму́: / Сла́ва в Вы́шних Бо́гу, и на земли́ мир, / дарова́ бо прише́ствие Твое́, / Спа́се наш, сла́ва Тебе́.

Сла́ва в Вы́шних Бо́гу, / в Вифлее́ме слы́шу от Безпло́тных днесь, / на земли́ мир благоволи́вшему бы́ти. / Ны́не Де́ва Небе́с ши́рши: / возсия́ бо свет омрачéнным / и смирéнныя возвы́си, а́нгельски пою́щия: / сла́ва в Вы́шних Бо́гу.

По о́бразу и по подо́бию, истле́вша преступле́нием / ви́дев, Иису́с, приклони́в Небеса́, сни́де / и всели́ся во утро́бу де́вственную неизме́нно, / да в ней истле́вшаго Ада́ма обнови́т, зову́ща: / сла́ва явле́нию Твоему́, Изба́вителю мой и Бо́же.

Слава, глас 5. Иоанна монаха:

Волсви́, перси́дстии ца́рие, / позна́вше я́ве на земли́ ро́ждшагося Царя́ Небе́снаго, / от све́тлыя звезды́ води́ми, / достиго́ша в Вифлее́м, да́ры нося́ще избра́нныя, / зла́то, и лива́н, и сми́рну, / и, па́дше, поклони́шася: / ви́деша бо в верте́пе Младе́нца лежа́ща безле́тнаго.

И ныне, глас 6: [Германово:]

Лику́ют А́нгели вси на Небеси́, / и ра́дуются челове́цы днесь, / игра́ет же вся тварь ро́ждшагося ра́ди в Вифлее́ме Спа́са Го́спода, / я́ко вся́кая лесть и́дольская преста́, / и ца́рствует Христо́с во ве́ки.

На стиховне стихиры самогласны, глас 2

Германово: Ве́лие и пресла́вное чу́до соверши́ся днесь: / Де́ва ражда́ет, и утро́ба не истлева́ет, / Сло́во воплоща́ется и Oтца́ не отлуча́ется, / А́нгели с па́стырьми сла́вят, / и мы с ни́ми вопие́м: / сла́ва в Вы́шних Бо́гу, и на земли́ мир.

Глас 3. Стих: Из чре́ва пре́жде денни́цы роди́х Тя: / кля́тся Госпо́дь и не раска́ется.

Днесь ражда́ет Де́ва Творца́ всех, / Eде́м прино́сит верте́п, / и звезда́ показу́ет Христа́ со́лнца су́щим во тьме; / с да́ры волсви́ поклони́шася, / ве́рою просвеща́еми, / и па́стырие ви́деша чу́до, / А́нгелом воспева́ющим и глаго́лющим: / сла́ва в Вы́шних Бо́гу.

Глас тойже. Стих: Рече́ Госпо́дь Го́сподеви моему́: / седи́ одесну́ю Мене́.

Анатолиево: Го́споду Иису́су ро́ждшуся в Вифлее́ме Иуде́йстем, / от восто́к прише́дше, волсви́ / поклони́шася Бо́гу вочелове́чшуся / и, сокро́вища своя́ усе́рдно отве́рзше, / да́ры честны́я приноша́ху: / искуше́но зла́то, я́ко Царю́ веко́в; / и лива́н, я́ко Бо́гу всех; / я́ко тридне́вному же мертвецу́, сми́рну Безсме́ртному. / Вси язы́цы, прииди́те, поклони́мся ро́ждшемуся / спасти́ ду́ши на́ша.

Слава, глас 4. Иоанна монаха: Весели́ся, Иерусали́ме, / торжеству́йте, вси, лю́бящии Сио́на: / днесь вре́менный разреши́ся соу́з осужде́ния Ада́мова. / Рай нам отве́рзеся. / Змий упраздни́ся, / ю́же бо прельсти́ пе́рвее, / ны́не узре́ Соде́телеву бы́вшу Ма́терь. / О, глубина́ бога́тства, и прему́дрости, и ра́зума Бо́жия! / Я́же исхода́таивши смерть всей пло́ти, грехо́вный сосу́д / спасе́ния нача́ло бысть ми́ру всему́ Богоро́дицы ра́ди. / Младе́нец бо ражда́ется из Нея́, Всесоверше́нный Бог, / и Рождество́м де́вство печа́тствует, / плени́цы грехо́вныя разреша́яй пелена́ми, / и младе́нства ра́ди Éвины врачу́ет я́же в печа́лех боле́зни; / да ликовству́ет у́бо вся тварь и да игра́ет, / обнови́ти бо ю прии́де Христо́с и спасти́ ду́ши на́ша.

И ныне, глас тойже: В верте́п всели́лся eси́, Христе́ Бо́же, / я́сли Тя восприя́ша, / па́стырие же и волсви́ поклони́шася. / Тогда́ у́бо проро́ческая испо́лнися про́поведь, / и А́нгельския си́лы дивля́хуся, вопию́ще и глаго́люще: / сла́ва схожде́нию Твоему́, Eди́не Человеколю́бче.

Таже, Ны́не отпуща́еши: Трисвятое. По О́тче наш:

Тропарь, глас 4:

Рождество́ Твое́, Христе́ Бо́же наш, / возсия́ ми́рови свет ра́зума, / в нем бо звезда́м служа́щии / звездо́ю уча́хуся / Тебе́ кла́нятися, Со́лнцу Пра́вды, / и Тебе́ ве́дети с высоты́ восто́ка. / Го́споди, сла́ва Тебе́. (3)

Таже, Бу́ди И́мя Госпо́дне: пением трижды; псалом 33: Благословлю́ Го́спода на вся́кое вре́мя: Конец: Не лиша́тся вся́каго бла́га. Таже чтение праздника в толковании, еже от Матфея, слово 4. Посем, Сла́ва в Вы́шних Бо́гу: и ексапсалмы, по обычаю.

На Бог Госпо́дь:

тропарь праздника трижды, глас 4:

Рождество́ Твое́, Христе́ Бо́же наш, / возсия́ ми́рови свет ра́зума, / в нем бо звезда́м служа́щии / звездо́ю уча́хуся / Тебе́ кла́нятися, Со́лнцу Пра́вды, / и Тебе́ ве́дети с высоты́ восто́ка. / Го́споди, сла́ва Тебе́. (3)

По 1-й стихологии седален, глас 1.

Подобен: Гроб Твой, Спа́се:

Во я́слех нас ра́ди безслове́сных положи́лся еси́, / Долготерпели́ве Спа́се, младе́нствовав во́лею; / па́стырие же Тя воспе́ша со А́нгелы, зову́ще: / сла́ва и хвала́ на земли́ рожде́нному / и обожи́вшему земноро́дных существо́ / Христу́ Бо́гу на́шему.

Сла́ва, и ны́не, тойже и чтение.

По 2-м стихологии седален, глас 3.

Подобен: Красоте́ де́вства:

Преве́чнаго и Непостижи́маго, / Соприсносу́щнаго Неви́димому Отцу́, / во утро́бе пло́тски носи́ла еси́, Богоро́дице, / еди́но и неслия́нное Тро́ицы Божество́. / Просия́ благода́ть Твоя́ в ми́ре, Всепе́тая. / Те́мже непреста́нно вопие́м: / ра́дуйся, Чи́стая Де́во Ма́ти.

Сла́ва, и ны́не, тойже и чтение.

Величание:

Велича́ем Тя, / Живода́вче Христе́, / нас ра́ди ны́не пло́тию ро́ждшагося / от Безневе́стныя и Пречи́стыя Де́вы Мари́и.

Псалом избранный

Лик 1: Воскли́кните Го́сподеви вся земля́. 2: По́йте же и́мени Его́. Дади́те сла́ву хвале́ Его́. 1: Пове́дите вся чудеса́ Его́. 2: Рцы́те Бо́гу: коль стра́шна дела́ Твоя́. 1: Да возвеселя́тся небеса́, и возра́дуется земля́. 2: Воспо́йте Го́сподеви, по́йте и́мени Его́. 1: Испове́дание и великоле́пие де́ло Его́. 2: Избавле́ние посла́ лю́дем Свои́м. 1: Свя́то и стра́шно и́мя Его́. 2: От Сио́на благоле́пие красоты́ Его́. 1: Бог же наш на небеси́ и на земли́ вся, ели́ка восхоте́, сотвори́. 2: Ми́лости Твоя́, Го́споди, во век воспою́. 1: Той воззове́т Мя: Оте́ц Мой еси́ Ты. 2: И Аз пе́рвенца положу́ Его́. Высока́ па́че царе́й земны́х. 1: И покло́нятся Ему́ вси ца́рие зе́мстии. 2: Кто бог ве́лий, я́ко Бог наш? Ты еси́ Бог творя́й чудеса́. 1: Мы́шцею си́лы Твоея́ разгна́л еси́ враги́ Твоя́. 2: Из чре́ва пре́жде денни́цы роди́х Тя. 1: Кля́тся Госпо́дь, и не раска́ется. 2: Ты иере́й во век, по чи́ну Мелхиседе́кову. 1: Госпо́дь рече́ ко Мне: Сын Мой еси́ Ты. 2: Аз днесь роди́х Тя. 1: Проси́ от Мене́, и дам Ти язы́ки достоя́ние Твое́. 2: И одержа́ние Твое́ концы́ земли́. 1: В глави́зне кни́жней писа́ся о Мне. 2: Престо́л Твой Бо́же, в век ве́ка. 1: Жезл пра́вости, жезл ца́рствия Твоего́. 2: Сего́ ра́ди пома́за Тя Бо́же, Бог Твой еле́ем ра́дости. 1: Я́ко Ты насле́диши во всех язы́цех. 2: Благослове́н Госпо́дь во век, бу́ди, бу́ди.

Сла́ва, и ны́не: Аллилу́иа, трижды.

По полиелеи седален, глас 4.

Подобен: Удиви́ся Ио́сиф:

Прииди́те, ви́дим, ве́рнии, где роди́ся Христо́с, / после́дуем про́чее, а́може и́дет звезда́ с волхвы́, восто́чными цари́; / Его́же А́нгели пою́т непреста́нно та́мо, / па́стырие свиря́ют песнь досто́йную, / сла́ва в Вы́шних, глаго́люще, / днесь в верте́пе Ро́ждшемуся от Де́вы и Богоро́дицы / в Вифлее́ме Иуде́йстем.

Сла́ва, и ны́не, тойже.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой. Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Из чре́ва пре́жде денни́цы роди́х Тя, / кля́тся Госпо́дь и не раска́ется. Стих: Рече́ Госпо́дь Го́сподеви моему́: седи́ одесну́ю Мене́, до́ндеже положу́ враги́ Твоя́ подно́жие ног Твои́х.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Матфея, зачало 2

Иису́с Христо́во Рождество́ си́це бе: обруче́нней у́бо бы́вши Ма́тери Его́ Мари́и Ио́сифови, пре́жде да́же не сни́тися и́ма, обре́теся иму́щи во чре́ве от Ду́ха Свя́та. Ио́сиф же, муж Ея́, пра́веден сый и, не хотя́ Ея́ обличи́ти, восхоте́ тай пусти́ти Ю́. Сия́ же ему́ помы́слившу, се А́нгел Госпо́день во сне яви́ся ему́, глаго́ля: Ио́сифе, сы́не Дави́дов, не убо́йся прия́ти Мариа́м, жены́ твоея́: ро́ждшее бо ся в Ней от Ду́ха есть Свя́та. Роди́т же Сы́на, и нарече́ши и́мя Ему́ Иису́с. Той бо спасе́т лю́ди Своя́ от грех их. Сие́ же все бысть, да сбу́дется рече́нное от Го́спода проро́ком, глаго́лющим: Се́ Де́ва во чре́ве прии́мет и роди́т Сы́на, и нареку́т и́мя Ему́ Емману́ил, е́же есть сказа́емо, с на́ми Бог. Воста́в же Ио́сиф от сна, сотвори́, я́коже повеле́ ему́ А́нгел Госпо́день, и прия́т Жену́ свою́. И не зна́яше Ея́, до́ндеже роди́ Сы́на Своего́ пе́рвенца, и нарече́ и́мя Ему́ Иису́с.

Мф.1:18–25

По 50-м псалме,

вместо Моли́твами Богоро́дицы:

Сла́ва: Вся́ческая днесь ра́дости исполня́ются, / Христо́с роди́ся от Де́вы.

И ны́не: Вся́ческая днесь ра́дости исполня́ются, / Христо́с роди́ся в Вифлее́ме.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира, глас 6:

Сла́ва в Вы́шних Бо́гу, / и на земли́ мир, / днесь восприе́млет Вифлее́м седя́щаго при́сно со Отце́м, / днесь А́нгели Младе́нца, рожде́ннаго боголе́пно, славосло́вят: / сла́ва в Вы́шних Бо́гу, и на земли́ мир, / в челове́цех благоволе́ние.

Канона два. Ирмосы обою канонов по дважды. Тропари же на 12.

Канон первый, глас 1,

творение кир Космы, егоже краегранесие:

Христо́с вочелове́чився, е́же бе, Бог пребыва́ет.

Песнь 1

Ирмос: Христо́с ражда́ется – сла́вите, / Христо́с с Небе́с – сря́щите. / Христо́с на земли́ – возноси́теся. / По́йте Го́сподеви, вся земля́, / и весе́лием воспо́йте, лю́дие, / я́ко просла́вися.

Истле́вша преступле́нием, по Бо́жию о́бразу бы́вшаго, всего́ тле́ния су́ща, / лу́чшия отпа́дша Боже́ственныя жи́зни, / па́ки обновля́ет му́дрый Соде́тель, я́ко просла́вися.

Ви́дев Зижди́тель ги́блема челове́ка, рука́ми его́же созда́, / приклони́в Небеса́, схо́дит; / Сего́ же от Де́вы Боже́ственныя Чи́стыя / всего́ осуществу́ет, вои́стинну вопло́щься, я́ко просла́вися.

Му́дрость, Сло́во и Си́ла, / Сын Сый О́тчий и сия́ние, Христо́с Бог, сил утаи́вся, / ели́ко преми́рных и ели́ко на земли́, / и, вочелове́чся, обнови́л есть нас, / я́ко просла́вися.

Другий канон, глас тойже. Творение кир Иоанна.

Песнь 1

Ирмос: Спасе́ лю́ди чудоде́йствуяй Влады́ка, / мо́крую мо́ря во́лну оземлени́в дре́вле; / во́лею же ро́ждся от Де́вы, / стезю́ прохо́дну Небесе́ полага́ет нам. / Его́же, по Существу́ ра́вна же Отцу́ и челове́ком, сла́вим.

Изнесе́ чре́во свяще́нное Сло́во, я́ве неопа́льно живопи́санное купино́ю, / смеше́на зра́ком челове́чим Бо́га, / Е́вы окая́нную утро́бу кля́твы дре́вния разреша́ющее го́рькия, / Его́же, земни́и славим.

Показа́ звезда́ пре́жде со́лнца Сло́во, прише́дшее уста́вити грехи́, / волхво́м я́ве во убо́зем верте́пе, ми́лостиваго Тебе́, пелена́ми пови́та, / Его́же, ра́дующеся, ви́дяху Самого́ – и Челове́ка, и Го́спода.

Катавасия первого канона, ирмос, 1-й лик, и второго, 2-й лик.

Песнь 3

Ирмос: Пре́жде век от Отца́ рожде́нному нетле́нно Сы́ну / и в после́дняя от Де́вы / воплоще́нному безсе́менно, / Христу́ Бо́гу возопии́м: / вознесы́й рог наш, / свят еси́, Го́споди.

И́же дохнове́ния прича́щся лу́чшаго Ада́м пе́рстный / и к тле́нию попо́лзся же́нскою ле́стию, / Христа́ от Жены́ ви́дя, вопие́т: / И́же мене́ ра́ди по мне быв, Свят еси́, Го́споди.

Сообра́зен бре́нному умале́нию растворе́нием, Христе́, быв / и прича́стием пло́ти го́ршия, пода́в Боже́ственнаго естества́, / зе́млен быв, и пребы́в Бог, / и возвы́сивый рог наш, / Свят еси́, Го́споди.

Вифлее́ме, весели́ся, князе́й Иу́довых Сый Царь: / Изра́иля бо пасы́й на ра́мех херуви́мских, из тебе́ про́йде Христо́с я́ве / и вознесы́й рог наш над все́ми воцари́ся.

Ин. Ирмос: При́зри на пе́ния рабо́в, Благоде́телю, / врага́ смиря́я вознесе́нную горды́ню, / нося́й же, Всеви́дче, греха́ превы́шше, / непоколе́блемо утвержде́нныя, Бла́же, певцы́ / основа́нием ве́ры.

Неве́сты Пречи́стыя пребога́тое Рождество́ ви́дети па́че ума́ сподо́бився, / лик свиря́ющих преклоня́шеся стра́нным о́бразом, / чин же пою́щих Безпло́тных, Царя́ Христа́, безсе́менно вопло́щшагося.

Высото́ю ца́рствуяй Небе́с / милосе́рдием соверша́ет о нас из Безневе́стныя Отрокови́цы:

/ невеще́ствен Сый пре́жде, / но по́слежде Сло́во, одебеле́вшо пло́тию, / да па́дшаго к Себе́ привлече́т первозда́ннаго.

Ипакои, глас 8:

Нача́ток язы́ков Не́бо Тебе́ принесе́, лежа́щему Младе́нцу во я́слех, / звездо́ю волхвы́ призва́вый, я́же и ужаса́ше / не ски́птры и престо́ли, но после́дняя нищета́: / что́ бо ху́ждше верте́па? / Что́ же смире́ншее пеле́н? / В ни́хже просия́ Божества́ Твоего́ бога́тство. / Го́споди, сла́ва Тебе́.

Песнь 4

Ирмос: Жезл из ко́рене Иессе́ева / и цвет от него́, Христе́, / от Де́вы прозя́бл еси́, / из горы́, Хва́льный, приосене́нныя ча́щи, / прише́л еси́, вопло́щся от Неискусому́жныя, / Невеще́ственный и Бо́же: / сла́ва си́ле Твое́й, Го́споди.

Его́же дре́вле прорече́ Иа́ков, / язы́ков ожида́ние, Христе́, от коле́на Иу́дова возсия́л еси́ / и си́лу Дама́скову, Самари́йскую же коры́сть прише́л еси́ испроврещи́, / лесть пременя́я в ве́ру боголе́пну: / сла́ва си́ле Твое́й, Го́споди.

Волхва́ дре́вле Валаа́ма словесы́ ученики́, / му́дрыя звездоблюсти́тели, / ра́дости испо́лнил еси́, / звезда́ от Иа́кова, возсия́в, Влады́ко, / язы́ков нача́ток вводи́мый прия́л же еси́ я́ве: / сла́ва си́ле Твое́й, Го́споди.

Я́ко на руно́, во чре́во Де́вы сшел еси́ дождь, Христе́, / и я́ко ка́пли, на зе́млю ка́плющия. / Ефио́пия, и Фарси́с, и Арави́тстии о́строви же, / Сава́, Ми́дов всю зе́млю держа́щии, припадо́ша Тебе́, Спа́се: / сла́ва си́ле Твое́й, Го́споди.

Ин. Ирмос: Ро́да челове́ча обновле́ние / дре́вле, поя́, проро́к Авваку́м предвозвеща́ет, / ви́дети неизрече́нно сподо́бився о́браз: / млады́й Младе́нец бо из горы́ – Де́вы изы́де / люде́й во обновле́ние, Сло́во.

Ра́вен произы́де челове́ком Вы́шний, / во́лею плоть прии́м от Де́вы, / яд очи́стити зми́евы главы́, / приводя́ вся к Све́ту живоно́сному, / Бог Сый, от врат безсо́лнечных.

Язы́цы, и́же дре́вле тле́ю погруже́ни, / па́губы зело́ вра́жия убежа́вше, / возно́сят ру́ки с похва́льными пе́сньми, / еди́наго чту́ще Христа́, я́ко Благоде́теля, / к нам ми́лостивно прише́дшаго.

Из ко́рене изра́стши Иессе́ева, Де́во, / уста́вы прешла́ еси́ челове́ческаго существа́, / О́тчее ро́ждши Преве́чное Сло́во, / я́ко благоволи́ Сам запеча́танную утро́бу проити́ / истоща́нием стра́нным.

Песнь 5

Ирмос: Бог сый ми́ра, Оте́ц щедро́т, / Вели́каго Сове́та Твоего́ А́нгела, / мир подава́юща, посла́л еси́ нам: / тем, Богоразу́мия к све́ту наста́вльшеся, / от но́щи у́тренююще, / славосло́вим Тя, Человеколю́бче.

В рабе́х ке́саревым повеле́нием написа́тися поко́рься, / и нас, рабы́ су́щия, врага́ и греха́ свободи́л еси́, Христе́, / весь же по нам обнища́в, / и пе́рстнаго от самаго́ едине́ния и обще́ния богосоде́лал еси́.

Се Де́ва, я́коже дре́вле рече́, / во чре́ве прие́мши, родила́ есть Бо́га вочелове́чшася и пребыва́ет Де́ва. / Ея́же ра́ди примири́вшеся Бо́гу, гре́шнии, / Богоро́дицу су́щую вои́стинну, ве́рнии, воспои́м.

Ин. Ирмос: Из но́щи дел омраче́нныя пре́лести / очище́ние нам, Христе́, бо́дренно ны́не соверша́ющим песнь, я́ко Благоде́телю, / прииди́, подава́яй удо́бну стезю́, / по не́йже востека́юще, обря́щем сла́ву.

Лю́тую вражду́, ю́же к нам Влады́ка отсека́я па́ки плотски́м прише́ствием, / да держа́щаго разруши́т душетле́ющаго, / мир сочета́я с невеще́ственными существы́, / положи́в присту́пна, Ро́ждшаго, тва́ри.

Лю́дие ви́деша, дре́вле омраче́ннии, по днех свет вы́шния све́тлости, / язы́ки же Бо́гу насле́дие Сын прино́сит, / подая́ та́мо неизрече́нную благода́ть, / иде́же мно́жайший процвете́ грех.

Песнь 6

Ирмос: Из утро́бы Ио́ну младе́нца изблева́ морски́й зверь, / якова́ прия́т, / в Де́ву же все́льшееся Сло́во / и плоть прие́мшее про́йде сохра́ншее нетле́нну. / Его́же бо не пострада́ истле́ния, / Ро́ждшую сохрани́ неврежде́нну.

Прии́де, вопло́щься, Христо́с Бог наш из чре́ва, / Его́же Оте́ц пре́жде денни́цы ражда́ет; / правле́ния же держа́ пречи́стых сил, / в я́слех ско́тиях возлежи́т и пелена́ми повива́ется, / разреша́ет же многоплете́нныя плени́цы прегреше́ний.

Ю́но из Ада́ма отроча́ смеше́ния, роди́ся Сын и ве́рным даде́ся, / бу́дущаго ве́ка Сей есть Оте́ц и Нача́льник / и нарица́ется Вели́каго Сове́та А́нгел. / Сей кре́пок Бог есть / и держа́й о́бластию всю тварь.

Ин. Ирмос: Обита́я Ио́на в преиспо́дних морски́х, / приити́ моля́шеся и бу́рю утоли́ти; / унзе́н же аз муча́щаго стрело́ю, / Христу́ воспева́ю, зол губи́телю, / ско́ро приити́ Тебе́ к мое́й ле́ности.

И́же бе испе́рва к Бо́гу, Бог Сло́во / ны́не утвержда́ет немощно́е дре́вле / ви́дев сохрани́ти, е́же по нам существо́, / и́мже Себе́ вторы́м обще́нием а́бие проявля́я страсте́й свобо́дное.

Гряде́т нас ра́ди из Авраа́млих чресл / темнопа́дшия во мра́це прегреше́ний / сы́ны воздви́гнути, до́лу пони́кших, / и́же во све́те обита́яй и я́слех чрез достоя́ние, / ны́не благоволи́в в челове́ческое спасе́ние.

Кондак, глас 3. Самоподобен:

Де́ва днесь Пресу́щественнаго ражда́ет, / и земля́ верте́п Непристу́пному прино́сит. / А́нгели с па́стырьми славосло́вят, / волсви́ же со звездо́ю путеше́ствуют: / нас бо ра́ди роди́ся

/ Oтроча́ Мла́до, Преве́чный Бог.

Икос: Еде́м Вифлее́м отве́рзе, / прииди́те, ви́дим, пи́щу в та́йне обрето́хом; / прииди́те, прии́мем су́щая ра́йская внутрь верте́па: / та́мо яви́ся ко́рень ненапое́н, / прозяба́я отпуще́ние,

/ та́мо обре́теся кла́дезь неиско́пан, / из него́же Дави́д пи́ти дре́вле возжада́ся. / Та́мо Де́ва ро́ждши Младе́нца, / жа́жду уста́ви а́бие Ада́мову и Дави́дову. / Сего́ ра́ди к Нему́ и́дем, / где роди́ся Отроча́ Мла́до, Преве́чный Бог.

Песнь 7

Ирмос: О́троцы, благоче́стию совоспита́ни, / злочести́ваго веле́ния небре́гше, / о́гненнаго преще́ния не убоя́шася, / но, посреде́ пла́мени стоя́ще, поя́ху: / отце́в Бо́же, благослове́н еси́.

Па́стырие, свиря́юще, ужа́сно светоявле́ние получи́ша: / сла́ва бо Госпо́дня облиста́ их, и А́нгел, воспо́йте, – вопия́, – я́ко роди́ся Христо́с, отце́в Бог благослове́нный.

Внеза́пу с сло́вом А́нгеловым Небе́сная во́инства, / сла́ва, – вопия́ху, – Бо́гу в Вы́шних, на земли́ мир, в челове́цех благоволе́ние: / Христо́с возсия́, отце́в Бог благослове́нный.

Глаго́л что сей? – реко́ша па́стырие, – / прише́дше, уви́дим бы́вшее, Боже́ственнаго Христа́. / Вифлее́ма же доше́дше, с Ро́ждшею покланя́хуся, воспева́юще: / отце́в Бо́же, благослове́н еси́.

Ин. Ирмос: Всецаря́ любо́вию уловле́ннии, о́троцы / укори́ша безчи́сленно яря́щася мучи́теля злобо́жное языковре́дие, / и́мже повину́ся огнь мно́гий, / Влады́це глаго́лющим: / во ве́ки благослове́н еси́.

Слуги́ у́бо неи́стовно попаля́ет, / спаса́ет же всепаля́щая со стра́хом ю́ныя, / седмочи́сленным разжже́нием возвы́шена; / и́хже венча́ пла́мень, незави́стно Го́споду подаю́щу благоче́стия ра́ди ро́су.

Помо́щниче, Христе́, челове́ком, / проти́вное гада́ние, воплоще́ние неизглаго́ланное име́яй, посрами́л еси́; / бога́тство обоже́ния нося́й, вообра́жся ны́не, / Его́же ра́ди упова́нием свы́ше в преиспо́дний приидо́хом мрак.

Зле неудержа́нно возвыша́емый, / нече́стно беся́щийся от развраще́ния ми́ра, / низложи́л еси́ всемо́щне грех, / я́же привлече́ пре́жде, днесь же от се́тей спаса́еши, / вопло́щся во́лею, Благоде́телю.

Песнь 8

Ирмос: Чу́да преесте́ственнаго / росода́тельная изобрази́ пещь о́браз: / не бо, я́же прия́т, пали́т ю́ныя, / я́ко ниже́ огнь Божества́ Де́вы, / в Ню́же вни́де утро́бу. / Тем воспева́юще, воспое́м: / да благослови́т тварь вся Го́спода / и превозно́сит во вся ве́ки.

Влече́т Вавило́ня дщи о́троки плене́нныя Дави́довы от Сио́на к себе́, / дароно́сцы же слет волхвы́ де́ти, / Дави́дове Богоприя́тней дще́ри моля́щияся. / Тем, воспева́юще, воспои́м: / да благослови́т тварь вся Го́спода и превозно́сит во вся ве́ки.

Орга́ны уклони́ша плаче́вныя пе́сни, / не поя́ху бо в земли́ чужде́й о́троцы Сио́новы, / вавило́нскую же разреша́ет лесть всю и мусики́йския соста́вы, / в Вифлее́ме возсия́в, Христо́с. / Тем, воспева́юще, воспои́м: / да благослови́т тварь вся Го́спода и превозно́сит во вся ве́ки.

Коры́сти Вавило́н ца́рства Сио́ня и плене́нное бога́тство прия́т, / сокро́вища же Христо́с в Сио́н сего́, / и цари́ звездо́ю наставля́я, звездоблюсти́тели влече́т. / Тем, воспева́юще, воспои́м: / да благослови́т тварь вся Го́спода и превозно́сит во вся ве́ки.

Ин. Ирмос: Утро́бу неопа́льну образу́ют Отрокови́цы / и́же в Ве́тсем опаля́емии ю́ноши, / преесте́ственно ражда́ющую запечатле́нну. / Обоя́ же, содева́ющи чудоде́йство еди́но, / лю́ди к пе́нию возставля́ет благода́ть.

Па́губы убежа́вши, / е́же обожи́тися пре́лестию, непреста́нно пое́т излия́вшагося Сло́ва / ю́ношески вся с тре́петом тварь, / несла́вну хвалу́, боя́щися, прино́сит, тле́нна су́щи, / а́ще и му́дре терпя́ше.

Гряде́ши, заблу́ждшее на па́жить обраща́я цветотво́рную / из пусты́нных холмо́в язы́ков воста́ние, челове́ческое естество́, / си́лу ну́жную человекоуби́йцы угаси́ти, / муж же яви́вся и Бог промышле́нием.

На 9-й песни вжигают свещи братия. Честне́йшую: не поем, но поем припев праздника.

Велича́й, душе́ моя́, / Честне́йшую и Сла́внейшую Го́рних во́инств, Де́ву Пречи́стую, Богоро́дицу.

Песнь 9

И ирмос: Та́инство стра́нное ви́жу и пресла́вное: / Не́бо – верте́п, Престо́л Херуви́мский – Де́ву, / я́сли – вмести́лище, / в ни́хже возлеже́ Невмести́мый – Христо́с Бог, / Его́же, воспева́юще, велича́ем.

Таже вторый лик поет тойже припев и ирмос. И прочих шесть припевов припеваем на кийждо тропарь по единожды:

Велича́й, душе́ моя́, / от Де́вы Бо́га, пло́тию ро́ждшагося.

Велича́й, душе́ моя́, / в верте́пе ро́ждшагося Царя́.

Изря́дное тече́ние зря́ще / волсви́ необы́чныя но́выя звезды́ новосия́ющия, / Небеса́ просвеща́ющия, Христа́ Царя́ зна́менующия на земли́, / ро́ждшагося в Вифлее́ме на спасе́ние на́ше.

Велича́й, душе́ моя́, / от волхво́в Бо́га покланя́емаго. Велича́й, душе́ моя́, / от звезды́ волхво́м Возвеще́ннаго.

Новорожде́нное, – волхво́м, глаго́лющим, – / Отроча́ Царь, Его́же звезда́ яви́, где есть? / Тому́ бо поклони́тися приидо́хом. / Яря́ся, И́род смуща́шеся, / Христа́ уби́ти богобо́рец шата́яся.

Велича́й, душе́ моя́, / Чи́стую Де́ву и Еди́ну Богоро́дицу, ро́ждшую Христа́ Царя́.

Волсви́ и па́стырие приидо́ша поклони́тися Христу́, / ро́ждшемуся в Вифлее́ме гра́де.

Испыта́ И́род вре́мя звезды́, / ея́же вожде́нием волсви́ в Вифлее́ме покланя́хуся Христу́ с да́ры; / е́юже, ко оте́честву наставля́еми, / лю́таго детоуби́йцу оста́виша пору́гана.

Таже первый лик поет втораго канона припев:

Днесь Де́ва ражда́ет Влады́ку / внутрь верте́па.

И ирмос: Люби́ти у́бо нам, я́ко безбе́дное стра́хом / удо́бее молча́ние, / любо́вию же, Де́во, / пе́сни тка́ти, спротяже́нно сложе́нныя, неудо́бно есть; / но и, Ма́ти, си́лу, ели́ко есть произволе́ние, даждь.

Вторый же лик поет припев:

Днесь Влады́ка ражда́ется, я́ко Младе́нец, / от Ма́тере Де́вы.

И ирмос тойже: Люби́ти у́бо нам:

Прочии же припеваем к тропарем:

Днесь па́стырие ви́дят Спа́са, пелена́ми обви́та / и лежа́ща во я́слех. Днесь Влады́ка ру́бищем пелена́ется, неося́заный, / я́ко Младе́нец.

Днесь вся́ка тварь весели́тся и ра́дуется, / я́ко Христо́с роди́ся от Де́вы Отрокови́цы.

О́бразы несве́тлы и се́ни приведе́ны, / о Ма́ти Чи́стая, ви́девше Сло́ва, / но́ва я́вльшагося от врат заключе́нных, / мня́щии же и́стинную све́тлость, досто́йно Твою́ благослови́м утро́бу.

Небе́сныя си́лы ро́ждшагося Спа́са Го́спода и Влады́ку / возвеща́ют ми́ру.

Вместо Сла́ва: Велича́й, душе́ моя́, / Триипоста́снаго и Неразде́льнаго Божества́ держа́ву.

Вместо же И ны́не: Велича́й, душе́ моя́, / Изба́вльшую нас от кля́твы.

Жела́ние получи́вше и Бо́жия прише́ствия христокра́снии лю́дие сподо́бльшеся, / ны́не утеша́ются па́ки бытие́м: / я́ко живоно́сну благода́ть дае́ши, Де́во Чи́стая, / поклони́тися сла́ве.

Таже оба лика, сошедшеся вкупе, поют первый припев праздника и ирмос: Та́инство стра́нное ви́жу: Посем втораго канона припев и ирмос: Люби́ти у́бо нам: И поклон.

Светилен:

Посети́л ны есть свыше Спас наш, Восто́к восто́ков, / и су́щии во тьме и се́ни обрето́хом и́стину, / и́бо от Де́вы роди́ся Госпо́дь. (3)

На хвалитех поем стихиры самогласны 4,

Андрея Иерусалимскаго, глас 4:

Весели́теся, пра́веднии, / Небеса́, ра́дуйтеся, / взыгра́йте, го́ры, Христу́ ро́ждшуся; / Де́ва седи́т, Херуви́мов подо́бящися, / нося́щи в не́дрех Бо́га Сло́ва воплоще́нна; / па́стырие рожде́нному дивя́тся; / волсви́ Влады́це да́ры прино́сят, / А́нгели, воспева́юще, глаго́лют: / Непостижи́ме Го́споди, сла́ва Тебе́.

Богоро́дице Де́во, ро́ждшая Спа́са, / упраздни́ла eси́ пе́рвую кля́тву Éвину, / я́ко Ма́ти была́ eси́ благоволе́ния Óтча, / нося́щи в не́дрех Бо́жие Сло́во воплоще́нное. / Не терпи́т та́йна испыта́ния. / Ве́рою eди́ною Сию́ вси сла́вим, / зову́ще с Тобо́ю и глаго́люще: / Неизрече́нне Го́споди, сла́ва Тебе́.

Прииди́те, воспои́м Ма́терь Спа́сову, / по Рождестве́ па́ки я́вльшуюся Де́ву: / ра́дуйся, гра́де одушевле́нный Царя́ и Бо́га, / в не́мже Христо́с пожи́в, спасе́ние соде́ла. / С Гаврии́лом воспое́м, / с па́стырьми просла́вим, зову́ще: / Богоро́дице, моли́ из Тебе́ Воплоще́ннаго спасти́ся нам.

Отец благоизво́ли, / Сло́во плоть бысть, / и Де́ва роди́ Бо́га вочелове́чшася; / звезда́ возвеща́ет, волсви́ покланя́ются, / па́стырие чудя́тся, и тварь ра́дуется.

Слава, глас 6. Германово: Егда́ вре́мя éже на зе́млю прише́ствия Твоего́ / пе́рвое написа́ние вселе́нней бысть, / тогда́ восхоте́л eси́ челове́ков написа́ти имена́, / ве́рующих Рождеству́ Твоему́. / Сего́ ра́ди таково́е повеле́ние от ке́саря возгласи́ся, / ве́чнаго бо Твоего́ Ца́рствия безнача́льное / Рождество́м Твои́м обнови́ся. / Тем Тебе́ прино́сим и мы па́че име́ннаго данносло́вия / правосла́внаго бога́тства Богосло́вия, / я́ко Бо́гу и Спа́су душ на́ших.

И ныне, глас 2. Иоанна монаха: Днесь Христо́с в Вифлее́ме ражда́ется от Де́вы; днесь Безнача́льный начина́ется, / и Сло́во воплоща́ется; / си́лы Небе́сныя ра́дуются, / и земля́ с челове́ки весели́тся; / волсви́ Влады́це да́ры прино́сят, / па́стырие Рожде́нному дивя́тся. / Мы же непреста́нно вопие́м: / сла́ва в Вы́шних Бо́гу, и на земли́ мир, / в челове́цех благоволе́ние.

Славословие великое. По трисвятом тропарь праздника и ектении.

Отпуст:

И́же в верте́пе Роди́выйся и в я́слех возлеги́й, на́шего ра́ди спасе́ния, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, и всех святы́х, поми́лует и спасе́т нас, я́ко Благ и Человеколю́бец.

И знаменует игумен святым елеем братию от святаго кандила, еже пред праздничною иконою, поющим нам стихиру самогласну праздника и час первый. На 1-м часе тропарь праздника. По Трисвятом кондак праздника и прочая, и совершенный отпуст.

Антифон 1-й, псалом 110, глас 2:

Стих 1: Испове́мся Тебе́, Го́споди, всем се́рдцем мои́м, / пове́м вся чудеса́ Твоя́. Припев: Моли́твами Богоро́дицы, Спа́се, спаси́ нас.

Стих 2: В сове́те пра́вых и со́нме / ве́лия дела́ Госпо́дня. Припев: Моли́твами Богоро́дицы, Спа́се, спаси́ нас. Стих 3: Изы́скана во всех во́лях Его́.

Припев: Моли́твами Богоро́дицы, Спа́се, спаси́ нас.

Стих 4: Испове́дание и великоле́пие де́ло Его́, / и пра́вда Его́ пребыва́ет в век ве́ка. Припев: Моли́твами Богоро́дицы, Спа́се, спаси́ нас.

Таже оба лика: Сла́ва, и ны́не: Моли́твами Богоро́дицы:

Антифон 2-й, псалом111, глас 2:

Стих 1: Блаже́н муж, боя́йся Го́спода, / в за́поведех Его́ восхо́щет зело́.

Припев: Спаси́ ны, Сы́не Бо́жий, рожде́йся от Де́вы, пою́щия Ти: аллилу́иа.

Стих 2: Си́льно на земли́ бу́дет се́мя Его́, / род пра́вых благослови́тся.

Припев: Спаси́ ны, Сы́не Бо́жий, рожде́йся от Де́вы, пою́щия Ти: аллилу́иа.

Стих 3: Сла́ва и бога́тство в дому́ Его́, / и пра́вда Его́ пребыва́ет в век ве́ка. Припев: Спаси́ ны, Сы́не Бо́жий, рожде́йся от Де́вы, пою́щия Ти: аллилу́иа. Стих 4: Возсия́ во тьме свет пра́вым, / ми́лостив и щедр, и пра́веден.

Припев: Спаси́ ны, Сы́не Бо́жий, рожде́йся от Де́вы, пою́щия Ти: аллилу́иа.

Таже оба лика вкупе: Сла́ва, и ны́не: Единоро́дный Сы́не:

Антифон 3, псалом 109, глас 4: Стих 1: Рече́ Госпо́дь Го́сподеви моему́: / седи́ одесну́ю Мене́.

Тропарь, глас 4:

Рождество́ Твое́, Христе́ Бо́же наш, / возсия́ ми́рови свет ра́зума, / в нем бо звезда́м служа́щии / звездо́ю уча́хуся / Тебе́ кла́нятися, Со́лнцу Пра́вды, / и Тебе́ ве́дети с высоты́ восто́ка. / Го́споди, сла́ва Тебе́.

Стих 2: До́ндеже положу́ враги́ Твоя́ / подно́жие ног Твои́х. Тропарь: Рождество́ Твое́, Христе́ Бо́же наш:

Стих 3: Жезл си́лы по́слет Ти Госпо́дь от Сио́на, / и госпо́дствуй посреде́ враго́в Твои́х. Тропарь: Рождество́ Твое́, Христе́ Бо́же наш:

Стих 4: С Тобо́ю нача́ло в день си́лы Твоея́, / во све́тлостех святы́х Твои́х.

Тропарь: Рождество́ Твое́, Христе́ Бо́же наш:

Входное:

Из чре́ва пре́жде денни́цы роди́х Тя, / кля́тся Госпо́дь и не раска́ется: / Ты Иере́й во век по чи́ну Мелхиседе́кову.

Тропарь высочайшим гласом, глас 4:

Рождество́ Твое́, Христе́ Бо́же наш, / возсия́ ми́рови свет ра́зума, / в нем бо звезда́м служа́щии / звездо́ю уча́хуся / Тебе́ кла́нятися, Со́лнцу Пра́вды, / и Тебе́ ве́дети с высоты́ восто́ка. / Го́споди, сла́ва Тебе́.

Сла́ва, и ны́не: кондак, глас 3:

Де́ва днесь Пресу́щественнаго ражда́ет, / и земля́ верте́п Непристу́пному прино́сит. / А́нгели с па́стырьми славосло́вят, / волсви́ же со звездо́ю путеше́ствуют: / нас бо ра́ди роди́ся / Oтроча́ Мла́до, Преве́чный Бог.

Вместо Трисвятаго:

Ели́цы во Христа́ крести́стеся, / во Христа́ облеко́стеся. Аллилу́иа.

Прокимен, глас 8:

Вся земля́ да покло́нится Тебе́ и пое́т Тебе́, / да пое́т же И́мени Твоему́ Вы́шний.

Стих: Воскли́кните Го́сподеви, вся земля́, по́йте же И́мени Его́, дади́те сла́ву хвале́ Его́.

Апостол к Галатом, зачало 209

Бра́тие, егда́ прии́де кончи́на ле́та, посла́ Бог Сы́на Своего́ Eдиноро́днаго, ражда́емаго от жены́, быва́ема под зако́ном, да подзако́нныя иску́пит, да всыновле́ние восприи́мем. Да я́ко eсте́ сы́нове, посла́ Бог Ду́ха Сы́на Своего́ в сердца́ ва́ша, вопию́ща: А́вва, Óтче. Те́мже уже́ не́си раб, но сын: а́ще ли же сын, и насле́дник Бо́жий Иису́с Христо́м.

Гал.4:4–7

Аллилуиа, глас 1

Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Стих: День дни отрыга́ет глаго́л, и нощь но́щи возвеща́ет ра́зум.

Евангелие Матфея, зачало 3

Иису́су ро́ждшуся в Вифлее́ме Иуде́йстем во дни И́рода царя́, се волсви́ от восто́к приидо́ша во Иерусали́м, глаго́люще: где есть рожде́йся Царь Иуде́йский? Ви́дехом бо звезду́ Его́ на восто́це и приидо́хом поклони́тися Ему́. Слы́шав же, И́род царь смути́ся, и весь Иерусали́м с ним. И собра́в вся первосвяще́нники и кни́жники людски́я, вопроша́ше от них: где Хри́стос ражда́ется? Они́ же реко́ша ему́: в Вифлее́ме Иуде́йстем; та́ко бо пи́сано есть проро́ком: и ты, Вифлее́ме, земле́ Иу́дова, ничи́мже ме́ньши еси́ во влады́ках Иу́довых, из тебе́ бо изы́дет Вождь, и́же упасе́т лю́ди Моя́ Изра́иля. Тогда́ И́род тай призва́ волхвы́ и испы́товаше от них вре́мя я́вльшияся звезды́. И, посла́в их в Вифлее́м, рече́: ше́дше, испыта́йте изве́стно о Отроча́ти; егда́ же обря́щете, возвести́те ми, я́ко да и аз, шед, поклоню́ся Ему́. Они́ же, послу́шавше царя́, идо́ша. И се́ звезда́, ю́же ви́деша на восто́це, идя́ше пред ни́ми, до́ндеже, прише́дше, ста верху́, иде́же бе Отроча́. Ви́девше же звезду́, возра́довашася ра́достию ве́лиею зело́. И, прише́дше в хра́мину, ви́деша Отроча́ с Мари́ею, Ма́терию Его́, и, па́дше, поклони́шася Ему́, и, отве́рзше сокро́вища своя́, принесо́ша Ему́ да́ры, зла́то, и лива́н, и сми́рну. И, весть прие́мше во сне, не возврати́тися ко И́роду, ины́м путе́м отыдо́ша во страну́ свою́.

Мф.2:1–12

Вместо Достойно:

Велича́й, душе́ моя́, / Честне́йшую и Сла́внейшую Го́рних во́инств, Де́ву Пречи́стую, Богоро́дицу.

И ирмос, глас 1: Люби́ти у́бо нам, я́ко безбе́дное стра́хом / удо́бее молча́ние, / любо́вию же, Де́во, / пе́сни тка́ти, спротяже́нно сложе́нныя, неудо́бно есть; / но и, Ма́ти, си́лу, ели́ко есть произволе́ние, даждь.

Причастен:

Избавле́ние посла́ Госпо́дь лю́дем Свои́м. Аллилу́иа, трижды.

На трапезе бывает утешение братии великое, и чтем слово Златоустаго, емуже начало: Дре́вле у́бо патриа́рх:

Аще праздник Рождества Христова случится быти в среду и пяток, разрешаем убо миряне – на мясо, монаси же – на сыр и яица; и ядим убо от Рождества Христова по вся дни до навечерия Святаго Богоявления, мирстии убо – мясо, монаси же – сыр и яица.