[Глава 4] Слу́жба о́бща святы́м а́нгелом и про́чым безпло́тным

На Го́споди воззва́х, стихи́ры, гла́с 4.

Подо́бен: Я́ко до́бля:

Трисо́лнечнаго Божества́ ꙳ предста́телие светле́йшии, ꙳ а́нгели явля́ющеся архистрати́зи, ꙳ со го́рними си́лами зове́те ра́дующеся: ꙳ свя́т еси́, О́тче, ꙳ свя́т еси́, Собезнача́льное Сло́во, ꙳ свя́т еси́, и Святы́й Ду́ше, ꙳ еди́на Сла́ва, еди́но ца́рство и естество́, ꙳ еди́но Божество́ и си́ла.

И ви́д ва́ш о́гнен, ꙳ и добро́та чу́дна, Михаи́ле и Гаврии́ле первоа́нгели: ꙳ невеще́ственным бо естество́м, прехо́дите концы́, ꙳ исполня́юще повеле́ние все́х Творца́, ꙳ си́льни в кре́пости ва́шей познава́еми, и исто́чницы исцеле́ний ꙳ хра́мы ва́ши соде́ловающе, ꙳ зна́нием ва́шим святы́м почита́емыя.

Творя́й а́нгелы Твоя́, ꙳ я́коже писа́ся, ду́хи, ꙳ и служа́щыя Тебе́ пла́мень о́гненный, ꙳ посреде́ чино́в пе́рвенствующа, ꙳ показа́л еси́, Го́споди, Твоего́ арха́нгела Михаи́ла, ꙳ со архистрати́гом Твои́м Гаврии́лом, ꙳ Твои́м манове́нием повину́ющася, Сло́ве, ꙳ и пе́снь трисвяту́ю, со стра́хом возглаша́юща сла́ве Твое́й.

Сла́ва, гла́с 6: Сра́дуйтеся на́м, вся́ а́нгельская чинонача́лия: первостоя́тели бо ва́ши, и на́ши предста́тели, вели́цыи архистрати́зи, в дне́шний де́нь, в честне́м и́х хра́ме, пресла́вно явля́ющеся освяща́ют. Те́мже по до́лгу воспева́юще, к ни́м возопии́м: покры́йте на́с кро́вом кри́л ва́ших, велича́йшии архистрати́зи.

И ны́не, Богоро́дичен: Сра́дуйтеся на́м, вся́ де́вственных ликостоя́ния: Предста́тельница бо на́ша, и Хода́таица, и Покро́в, и Вели́кое прибе́жище, в дне́шний де́нь, в честне́м Ея́ и Боже́ственнем хра́ме скорбя́щыя утеша́ет, те́мже по до́лгу воспева́юще Сию́, возопии́м: покры́й ны́ Боже́ственным предста́тельством Твои́м, Пречи́стая Богоро́дице Влады́чице.

Вхо́д. Проки́мен дне́.

Иису́са Нави́на чте́ние. [Глава́ 5.]

Бы́сть егда́ бя́ше Иису́с у Иерихо́на, и воззре́в очи́ма свои́ма, ви́де челове́ка стоя́ща пред ни́м, и ме́чь его́ обнаже́н в руце́ его́. И прише́д Иису́с, рече́ ему́: на́ш ли еси́, или́ от сопроти́вных на́ших? О́н же рече́ ему́: а́з архистрати́г си́лы Госпо́дни, ны́не приидо́х се́мо. Иису́с паде́ лице́м свои́м на зе́млю, и рече́ ему́: Влады́ко, что́ повелева́еши твоему́ рабу́, И рече́ архистрати́г Госпо́день ко Иису́су: разреши́ сапо́г тво́й от но́г твои́х: ме́сто бо, на не́мже ты́ стои́ши, свя́то е́сть. И сотвори́ Иису́с та́ко.

Суде́й изра́илевых чте́ние. [Глава́ 6.]

Бы́сть во дни́ о́ны, укрепи́ся Мадиа́м на сы́ны изра́илевы, и ти́и возопи́ша ко Го́споду Бо́гу: и се́ а́нгел Госпо́день прии́де, и се́де под ду́бом, и́же в Евфра́фе, в земли́ Иоа́са, отца́ Езри́мова, и Гедео́н сы́н его́ млатя́ше пшени́цу на гумне́, е́же бежа́ти с не́ю от лица́ мадиа́мля. И яви́ся ему́ а́нгел Госпо́день, и рече́ к нему́: Госпо́дь с тобо́ю, си́льный кре́постию. И рече́ к нему́ Гедео́н: во мне́, Го́споди мо́й, и а́ще е́сть Госпо́дь с на́ми, и чесо́ ра́ди обрето́ша ны́ вся́ зла́я сия́? и где́ су́ть вся́ чудеса́ его́, ели́ка пове́даша на́м отцы́ на́ши, глаго́люще: не из Еги́пта ли изведе́ на́с Госпо́дь? и ны́не отве́рже ны́ Госпо́дь, и предаде́ ны в ру́ку мадиа́млю. И воззре́ на него́ а́нгел Госпо́день, и рече́ ему́: иди́ в кре́пости твое́й се́й, и спасе́ши Изра́иля от руки́ мадиа́мли, и се́ посла́х тя́. И рече́ к нему́ Гедео́н: во мне́, Го́споди, в чесо́м спасу́ Изра́иля? се́ ты́сяща моя́ ху́ждша в Манасси́и, и а́з е́смь мни́й в дому́ отца́ моего́. И рече́ к нему́ Госпо́дь: поне́же а́з бу́ду с тобо́ю, и избие́ши Мадиа́ма я́ко му́жа еди́наго. И рече́ к нему́ Гедео́н: и а́ще обрето́х благода́ть пред очи́ма твои́ма, и да сотвори́ши мне́ дне́сь зна́мение, я́ко ты́ глаго́леши со мно́ю. Не отиди́ отсю́ду, до́ндеже приити́ мне́ к тебе́, и принесу́ же́ртву мою́, и пожру́ пред тобо́ю, и рече́ к нему́ а́нгел Госпо́день: а́з е́смь, и преме́длю, до́ндеже обрати́шися ты́. Гедео́н же вни́де, и сотвори́ ко́злище от ко́з, и че́тверть муки́ опресно́ков, и вложи́ с мя́сом в ко́шницу, и юху́ влия́ в горне́ц, и изнесе́ к нему́ под ду́б, и поклони́ся. И рече́ к нему́ а́нгел Госпо́день: возми́ мяса́ и хле́бы пре́сныя, и положи́ у ка́мене о́наго, и юху́ изле́й: и сотвори́ та́ко. И простре́ а́нгел Госпо́день коне́ц жезла́, су́щаго в руце́ его́: и косне́ся мясо́м и хле́бом пре́сным, и возгоре́ся о́гнь из ка́мене, и пояде́ мяса́ и опресно́ки. И а́нгел Госпо́день оти́де от оче́й его́. И ви́де Гедео́н, я́ко а́нгел е́сть Госпо́день, и рече́ Гедео́н: увы́ мне́, Го́споди, Го́споди, я́ко ви́дех а́нгела Госпо́дня лице́м к лицу́. И рече́ ему́ Госпо́дь: ми́р тебе́, не бо́йся, не у́мреши. И созда́ та́мо Гедео́н же́ртвенник Го́споду, и назва́ то́, ми́р Госпо́день, да́же до дне́ сего́.

Проро́чества Иса́иина чте́ние. [Глава́ 14.]

Та́ко глаго́лет Госпо́дь: вся́ земля́ да вопие́т с весе́лием, И древа́ лива́нова да возвеселя́тся о тебе́, и ке́дри лива́новы реку́т: отне́леже ты́ усну́л еси́, не взы́де секи́й на́с. А́д до́ле огорчи́ся, сре́тив тебе́, гряду́щу ти́ воздви́же на тя́ исполи́ны вся́, нача́льствовавшыя земле́, а́ще воста́ли бы́ша от престо́л свои́х вси́ ца́рие язы́честии, вси́ отвеща́ют, и реку́т тебе́: и ты́ плене́н еси́ я́коже и мы́, с на́ми же причта́лся еси́. Сни́де во а́д сла́ва твоя́ и мно́гое твое́ весе́лие: под тобо́ю посте́лют гни́лость, и покро́в тво́й че́рви. Ка́ко спаде́ с небесе́ денни́ца, зау́тра возсиява́ющая? сокруши́ся на зе́млю, посыла́яй ко все́м язы́ком, Ты́ бо ре́кл еси́ в помышле́нии твое́м: на не́бо взы́ду, верху́ зве́зды небе́сных поста́влю престо́л мо́й, и ся́ду на горе́ высо́цей, на гора́х высо́ких су́щих к се́веру: И взы́ду вы́шше облако́в, и бу́ду подо́бен вы́шнему. Ны́не же во а́д сни́деши, во основа́ния земли́, И ви́девшии тя́ почудя́тся, и реку́т о тебе́: Се́й челове́к, смуща́яй зе́млю, потряса́яй цари́: положи́вый вселе́нную всю́ пу́сту, и гра́ды ея́ низложи́, и плене́нных не разреши́ в до́мы и́х. Вси́ ца́рие язы́честии успо́ша в че́сти, челове́к в дому́ свое́м. Ты́ же отве́ржен бу́деши в гора́х, я́ко мертве́ц возгнуше́н со мно́гими мертвецы́, избоде́ными мече́м, низходя́щими во а́д. И́мже о́бразом ри́за кро́вию намоче́на, не бу́дет чиста́, си́це ниже́ ты́ бу́деши чи́ст: зане́ зе́млю мою́ погуби́л еси́, и лю́ди моя́ порази́л еси́, и не пребу́деши в ве́чное вре́мя.

На стихо́вне стихи́ры, гла́с 1:

У́мных си́л архистрати́зи, предстоя́ще непреста́нно Влады́чня Престо́лу, моли́теся ко Го́споду, ми́р ми́ру дарова́ти, и душа́м на́шым ве́лию ми́лость.

Сти́х: Творя́й а́нгелы своя́ ду́хи, и слуги́ своя́ пла́мень о́гненный.

Чинонача́льник вы́шних си́л, Михаи́л первостоя́тель Боже́ственных чино́в, дне́сь на́с к торжеству́ созва́, и́же всегда́ с на́ми ходя́й, и сохраня́яй вся́ от вся́каго диа́воля обстоя́ния: прииди́те у́бо, празднолю́бцы и Христолю́бцы, цве́ты доброде́телей взе́мше, чи́стыми по́мыслы, и со́вестию благостоя́нною, арха́нгелов собо́р почти́м: то́й бо непреста́нно Бо́гу предстоя́, и трисвяту́ю пе́снь воспева́я, мо́лит спасти́ся душа́м на́шым.

Гла́с 2:

Сти́х: Хвали́те его́, вси́ а́нгели его́, хвали́те его́, вся́ си́лы его́.

Невеще́ственное существо́ у́мных си́л предста́тельствующе, и трисо́лнечныя сла́вы блиста́ньми, светодаю́ще вселе́нней архистрати́зи, непреста́нным гла́сом трисвяту́ю пе́снь воспева́ете: те́мже моли́теся спасти́ся душа́м на́шым.

Сла́ва, и ны́не, гла́с 8:

Я́ко чинонача́льник и побо́рник, и а́нгелов началово́ждь, архистрати́же, вся́кия ну́жды и ско́рби, неду́гов и лю́тых грехо́в свободи́, ве́рно воспева́ющыя и моля́щыя тя́, сла́вне: я́ве я́ко невеще́ствен, невеще́ственнаго зря́, и не присту́пным све́том Влады́чния сла́вы осия́емь: То́й бо человеколю́бно пло́ть на́с ра́ди от Де́вы прия́т, спасти́ восхоте́в челове́чество.

Тропа́рь, гла́с 4:

Небе́сных во́инств архистрати́зи, мо́лим ва́с при́сно мы́ недосто́йнии: да ва́шими моли́твами огради́те на́с кро́вом кри́л невеще́ственныя ва́шея сла́вы, сохраня́юще ны́ припа́дающыя приле́жно, и вопию́щыя: от бе́д изба́вите ны́, я́ко чинонача́льницы вы́шних си́л.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже, два́жды.

Сла́ва, и ны́не, Богоро́дичен.

По 1-й кафи́сме, седа́лен, гла́с 6:

А́нгельския си́лы, Христе́, предстоя́ще Престо́лу Твоему́, мо́лятся о ро́де челове́честем: те́х у́бо моли́твами ми́р все́м подава́яй, язы́ков де́рзость укроти́. [Два́жды.]

Сла́ва, и ны́не, Богоро́дичен:

Сло́во собезнача́льное Отцу́ же и Ду́ху, арха́нгельским гла́сом, Богоро́дице, во утро́бе заче́нши, Херуви́м и Серафи́м и Престо́лов яви́лася еси́ превы́шши.

По 2-й кафи́сме седа́лен, гла́с 6:

О́крест Престо́ла все́х Царя́ при́сно лику́юще, а́нгелов вси́ чи́нове, на́с сохраня́йте ве́рою ва́с призыва́ющих, и муче́ний избавля́йте, [Два́жды.]

Сла́ва, и ны́не, Богоро́дичен.

Ра́дуйся, две́ре Бо́гу отве́рстая, неизглаго́ланно в Тя́ все́льшемуся и проше́дшему из Тебе́, Присноде́во.

По: Хвали́те и́мя Госпо́дне:

Припе́в: Велича́ем ва́с, Арха́нгели и А́нгели, и вся́ во́инства, Херуви́ми и Серафи́ми, сла́вящыя Го́спода.

Други́й: Велича́ем ва́с, Арха́нгели, А́нгели, Нача́ла, Вла́сти, Престо́ли, Госпо́дьствия, Си́лы и Херуви́ми, стра́шныя Серафи́ми, прославля́ющыя Го́спода.

Псало́м избра́нный: Испове́мся Тебе́, Го́споди, все́м се́рдцем мои́м:

По полиеле́и седа́лен, гла́с 6:

А́нгели све́тлии Бо́жии, предстоя́щии благода́ти Престо́лу Боже́ственному, смире́ние су́щее и просвеще́ние и́стинное, от све́та Боже́ственнаго восприе́млюще, на́с назира́йте с небе́сными человеколю́бцы, в бу́ри лю́тей мироде́ржца бе́дствующыя и во тме́ спя́щыя: прииди́те у́бо, Арха́нгели, на́м на по́мощь, и се́тей изба́вите на́с злонача́льнаго врага́: к ва́шему бо покро́ву, прехва́льнии, прибега́ем вси́. [Два́жды.]

Сла́ва, и ны́не, Богоро́дичен:

Упова́ние и покро́в, и приста́нище на Тя́ наде́ющихся, Богороди́тельнице Блага́я, Предста́тельнице ми́ра, моли́ со безпло́тными приле́жно, Его́же родила́ еси́ Человеколюби́ваго Бо́га, изба́витися душа́м на́шым от вся́каго преще́ния, еди́на благослове́нная.

Степе́нна, 1-й антифо́н 4-го гла́са.

Проки́мен: Творя́й а́нгелы своя́ ду́хи, и слуги́ своя́ пла́мень о́гненный.

Сти́х: Благослови́, душе́ моя́, Го́спода: Го́споди Бо́же мо́й, возвели́чился еси́ зело́.

Вся́кое дыха́ние: Ева́нгелие пи́сано в конце́ кни́ги сея́.

Сла́ва: Моли́твами арха́нгел: И ны́не: Моли́твами Богоро́дицы:

По 50-м псалме́ стихи́ра, гла́с 6:

А́нгели Твои́, Христе́, Престо́лу вели́чества во стра́се предстоя́ще, и Твои́м светоли́тием при́сно осиява́еми, в вы́шних песнопе́вцы Твои́, и сове́та Твоего́ служи́телие, от Тебе́ низпосыла́еми, даю́т просвеще́ния душа́м на́шым.

Кано́н, гла́с 8.

Пе́снь 1.

Ирмо́с: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́ Еди́ному Влады́це.

Вси́ воспои́м ве́рнии, вся́ управля́ющую невеще́ственныя Го́рних лико́в чинонача́лия, Тро́ицу несозда́нную, Свя́т, Свя́т, Свя́т еси́, вопию́ще, Бо́же Вседержи́телю.

Положи́л еси́ твое́й Нача́ло, существо́ Безпло́тное, Тво́рче А́нгелов, пречи́стый Тво́й Престо́л окружа́ющее, зва́ти Тебе́: Свя́т, Свя́т, Свя́т еси́ Бо́же Вседержи́телю.

Ра́дуйся, Гаврии́ле, тайнови́дче Бо́жия воплоще́ния, Михаи́ле же, чино́в невеще́ственных первостоя́телю, непреста́нно зову́ще: Свя́т, Свя́т, Свя́т еси́, Бо́же Вседержи́телю.

Богоро́дичен: Трепе́щу та́инства, Христе́, Твоего́ снизхожде́ния, я́ко И́же естество́м Бо́г, прия́л еси́ от Де́вы роди́тися я́ко Челове́к, да спасе́ши ми́р от рабо́ты проти́внаго.

Пе́снь 3.

Ирмо́с: Стра́х Тво́й, Го́споди, всади́ в сердца́ ра́б Твои́х и бу́ди на́м утвержде́ние, Тя́ во и́стине призыва́ющих.

Кре́постию поста́вил еси́, Безсме́ртне, си́льныя, соверша́ющыя всесвяту́ю Твою́ во́лю, Тебе́ в вы́шних всегда́ предстоя́щыя.

Таи́нники Твоего́ вочелове́чения, и честна́го воста́ния, А́нгельския чинонача́льники, Христе́, за ны́ приими́ моля́щыяся.

А́нгелы приста́вил еси́ храни́тели челове́ком, я́ко Благоутро́бен, служи́тели же показа́л еси́, Христе́, спасе́ния Твои́х уго́дников.

Богоро́дичен: Неизрече́нно зачала́ еси́ Го́спода и Спа́са, Богоневе́сто, избавля́ющаго ны́ лю́тых, Тя́ во и́стине призыва́ющыя.

Седа́лен, гла́с 8.

Подо́бен: Повеле́нное:

Небе́сных нача́льницы, и первостоя́телие высокопресто́льных и стра́шных Боже́ственныя сла́вы, Михаи́ле и Гаврии́ле Архистрати́зи, А́нгелов чинонача́льницы со все́ми Безпло́тными, о служи́телие Влады́чни! О ми́ре непреста́нно моля́щеся, испроси́те оставле́ние прегреше́нных на́ми, и ми́лость и благода́ть обрести́ в де́нь су́дный. [Два́жды.]

Сла́ва, и ны́не, Богоро́дичен:

В пучи́ну лю́те впа́д уны́ния, от мно́жества лука́вых и беззако́нных мои́х де́л, приидо́х в недоуме́ние, и отча́янием ны́не одержу́ся, Влады́чице Богоро́дице: Ты́ мя спаси́, Ты́ ми помози́: гре́шным бо Ты́ еси́ очище́ние и чистота́ спаси́тельная.

Крестобогоро́дичен: От чи́стых крове́й Твои́х вопло́щшагося, и па́че ума́ из Тебе́, чи́стая, ро́ждшагося, на дре́ве ви́сяща посреде́ злоде́ев зря́щи, утро́бою боле́зновала еси́, и ма́терски пла́чущи вопия́ла еси́: увы́ Мне́, Ча́до Мое́! что́ е́сть Боже́ственное и неизрече́нное смотре́ние Твое́, и́мже оживотвори́л еси́ созда́ние Твое́: пою́ Твое́ милосе́рдие.

Пе́снь 4.

Ирмо́с: Все́л еси́ на кони́ апо́столы Твоя́, Го́споди, и прия́л еси́ рука́ма Твои́ма узды́ и́х, и спасе́ние бы́сть ежде́ние Твое́ ве́рно пою́щым: сла́ва си́ле Твое́й, Го́споди.

Все́л еси́ на А́нгелы, я́коже на кони́, Человеколю́бче: и прия́л еси́ руко́ю Твое́ю брозды́ и́х, и спасе́ние бы́сть ежде́ние Твое́ непреста́нно вопию́щым: сла́ва си́ле Твое́й, Го́споди.

Покрыва́ет А́нгелы доброде́тель Твоя́, Человеколю́бче, и земли́ исполня́ет концы́ Твоего́ сла́внаго, Безнача́льне, Боже́ственнаго хвале́ния, с ни́ми Тебе́ вопию́щи: сла́ва си́ле Твое́й, Го́споди.

Изше́л еси́, Ще́дре, на спасе́ние люде́й Твои́х, Христе́, созыва́еши же дру́ги Си́лы Твоя́, и весе́лие бы́сть прише́ствие Твое́ ве́рно Тебе́ вопию́щым: сла́ва си́ле Твое́й, Го́споди.

Богоро́дичен: Де́ва и Ма́ти преесте́ственно яви́лася еси́, Всечи́стая: я́ко Бо́га Того́жде и Челове́ка Христа́ ро́ждшая, ему́же со стра́хом вопию́т А́нгельския чи́ны: сла́ва си́ле Твое́й, Го́споди.

Пе́снь 5.

Ирмо́с: От но́щи неве́дения, Богове́дением просвети́вый концы́, просвети́ мя у́тром человеколю́бия Твоего́, Го́споди.

Невозра́тным жела́нием при́сно к высоте́, к Тебе́, Христе́, носи́ми, кра́йнейшему все́х жела́ний, А́нгельския си́лы непреста́нно Тя́ сла́вят.

Ты́ у́мныя по существу́, нетле́нныя благода́тию Твое́ю, Христе́, устро́ил еси́ песнопе́вцы Твоего́ вели́чества, А́нгелы Твоя́ по о́бразу соде́лав Непостижи́ме.

Ты́ непрекло́нны на го́ршее, к Тебе́ приближе́нием, Христе́, сохрани́л еси́ Твоя́ слуги́: исто́чник бо бла́гости Ты́ еси́, благотвори́ши досто́йно Тебе́ служа́щыя.

Богоро́дичен: Умерщвле́нную мою́ ду́шу страстьми́ ме́рзкими, Всенепоро́чная, оживи́, жи́зни Храни́теля ро́ждшая: и к стези́ ве́чней, и блаже́нней жи́зни упра́ви.

Пе́снь 6.

Ирмо́с: Ио́ну в ки́те, Го́споди, еди́наго всели́л еси́, мене́ же свя́заннаго мре́жами вра́жиями, я́ко от тли́ о́наго спаси́.

Боголе́пне от не су́щих, Го́споди, сло́вом Твои́м приве́л еси́ существа́ Небе́сных безсме́ртных во́инств, светови́дны ты́я соде́ловая.

Таи́нницы честни́и Бо́жия хвале́ния бы́сте, Безпло́тнии, гра́ждане Небе́сныя и Боже́ственныя и́стинно ски́нии, Творцу́ досто́йно служа́ще.

Безпло́тных чи́ни у́мнии Тя́, Сы́не Бо́жий пребезнача́льный, хва́лят непреста́нно и славосло́вят, я́ко Творца́ и Созда́теля вся́ческим.

Богоро́дичен: Со Отце́м в вы́шних, Пречи́стая, безнача́льне седя́щаго, на объя́тиих Твои́х восклони́ти сподо́билася еси́: то́же на́м пода́ждь, Чи́стая, рабо́м Твои́м, Ми́лостива.

Конда́к, гла́с 2:

Архистрати́зи Бо́жии, служи́телие Боже́ственныя сла́вы, А́нгелов нача́льницы, и челове́ков наста́вницы, поле́зное на́м проси́те и ве́лию ми́лость, я́ко Безпло́тных Архистрати́зи.

И́кос: Ре́кл еси́, Человеколю́бче, в писа́ниих Твои́х, мно́жеству ра́доватися А́нгелов на Небеси́ о челове́це еди́ном ка́ющемся, Безсме́ртне: те́мже мы́ и́же в беззако́ниих, Безгре́шне еди́не Сердцеве́дче, Тя́ моли́ти всегда́ дерза́ем я́ко Благоутро́бнаго, уще́дрити, и низпосла́ти недосто́йным умиле́ние, Влады́ко, подая́й на́м проще́ние: о все́х бо на́с мо́лятся Тебе́ Безпло́тных Архистрати́зи.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Све́ты яви́л еси́, Ще́дре, А́нгелов Твои́х невеще́ственное существо́, неизрече́ннаго све́та исполня́еми непреста́нно, благослове́н еси́, зову́щыя, Бо́же, во ве́ки.

Ему́же предстоя́т непреста́нно, служа́ще, тмы́ А́нгелов, лица́ же зре́ти не терпя́т зре́ния, благослове́н еси́, зову́ще, Го́споди Бо́же, во ве́ки.

Сло́вом Твои́м Ипоста́сным А́нгельское естество́ соде́лал еси́, освяти́в же Боже́ственным Ду́хом, Тро́ицу Богосло́вити научи́л еси́, Бо́же, во ве́ки.

Тро́ичен: Три́ у́бо у́мствующе Ипоста́си, неопи́санное сла́вим Существо́, Отца́, Сло́ва со Ду́хом, вопию́ще: благослове́н еси́, Го́споди Бо́же, во ве́ки.

Пе́снь 8.

Ирмо́с: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

А́нгельскому поревну́ем житию́, и мы́сли впери́м к высоте́, и с ни́ми невеще́ственно воспои́м Го́спода, пою́ще и превознося́ще во вся́ ве́ки.

Лико́вственницы ликова́ния небе́снии, Престо́л обстоя́ще сла́вы, о́крест Бо́га же всегда́ обраща́ющеся, А́нгели пою́т и превозно́сят Его́ во вся́ ве́ки.

Невеще́ственнаго огня́ творя́щей пла́мень, на высоте́ непреста́нно служа́щыя, и А́нгелы ду́хи явля́ющей Тро́ице покланя́емся, и славосло́вим во вся́ ве́ки.

Богоро́дичен: Ему́же на Небеси́ предстоя́т с тре́петом тмы́ А́нгел и Арха́нгел, Того́ на объя́тиих носи́ти сподо́билася еси́, Богоро́дице: моли́ спасти́ся славосло́вящым Его́ во вся́ ве́ки.

Пе́снь 9.

Ирмо́с: Уста́вы прешла́ еси́ естества́, Соде́теля заче́нши и Го́спода, и две́рь спасе́ния ми́рови была́ еси́: Те́м Тя́, Богоро́дице, непреста́нно велича́ем.

Тя́ неизрече́нно соедини́вшаго Небе́сным, Христе́, земна́я, и еди́ну Це́рковь соверши́вша А́нгелов и челове́ков, непреста́нно велича́ем.

А́нгели же и Арха́нгели, Престо́ли, Вла́сти и Госпо́дства, Нача́ла же и Си́лы, Херуви́ми и Серафи́ми, с Богоро́дицею о ми́ре моли́теся.

Все́х предста́телие показу́ющиися, Михаи́л с Гаврии́лом, посети́те от любве́ чту́щыя всепра́зднственную па́мять ва́шу, и ве́рно воспева́ющыя спаса́йте от вся́каго обстоя́ния.

Богоро́дичен: Ра́дуйся, свята́я Богоневе́сто: ра́дуйся, Све́т ми́ру ро́ждшая ве́рным: ра́дуйся, стено́ и покро́ве все́х на́с, Бо́га я́ко Благоде́теля за ны́ непреста́нно моли́.

Свети́лен.

Подо́бен: Ду́хом во святи́лищи:

О́гненных Архистрати́же слу́г, предста́тельство от Отца́ прия́л еси́, Михаи́ле, све́тов: те́м и сия́ние Того́ сла́вы сия́ющее и́маши, о́крест пречи́стаго Престо́ла ты́ предстоя́, я́ко пе́рвый невеще́ственных чино́в.

Богоро́дичен: Почита́ют Рождество́ Твое́ безпло́тных чи́нове, ра́дости бо земноро́дныя Ты́ напо́лнила еси́ еди́на. Те́м Тя́, Всенепоро́чную, ве́рнии сла́вим, в пе́ниих славосло́вяще: све́т бо су́щым во тме́ возсия́ла еси́, я́ко у́тренний возсия́вший де́нь.

На хвали́тех стихи́ры, гла́с 2:

Невеще́ственный Престо́л окружа́юще у́мная существа́, Боже́ственнии безтеле́снии, трисвяту́ю пе́снь прави́телю Бо́гу пла́менными устна́ми поете́: Святы́й Бо́же, О́тче безнача́льный, Святы́й кре́пкий, Сы́не собезнача́льный, Святы́й безсме́ртный, Единосу́щный Ду́ше, Отцу́ и Сы́ну спрославля́емый. [Два́жды.]

Безтеле́сными устна́ми и у́мными усты́, а́нгельстии чи́ни непреста́нное пе́ние прино́сят Твоему́ непристу́пному Божеству́, Го́споди: и у́ми чи́стии и служи́телие Твоея́ сла́вы хва́лят Тя́, Го́споди, с ни́миже Михаи́л безтеле́сный, и Гаврии́л зело́ благоле́пнейший, и первостоя́телие го́рних си́л, архистрати́зи а́нгельстии, учреди́телие на́ши дне́сь бы́ша, пе́сни пе́сней повелева́юще на́м пе́ти непристу́пней сла́ве Твое́й, Человеколю́бче: е́йже мо́лятся непреста́нно за ду́шы на́ша.

Гла́с 4: О́гненными устна́ми пою́т Тя́ херуви́ми, Христе́ Бо́же, безтеле́сными же усты́ немо́лчно славосло́вит Тя́ арха́нгельский ли́к: Михаи́л же архистрати́г вы́шних си́л, побе́дную пе́снь непреста́нно прино́сит сла́ве Твое́й. То́й бо на́с дне́сь озари́ к торжеству́ све́тлому возбряца́ти досто́йне псало́мски, хвалу́ трисвяту́ю бре́нными устна́ми: я́ко вся́ческая твоего́ хвале́ния испо́лнишася, и подае́ши ми́ру те́м ве́лию ми́лость.

Сла́ва, гла́с 5. Самогла́сен:

Иде́же осеня́ет благода́ть твоя́, арха́нгеле, отту́ду диа́воля прого́нится си́ла: не терпи́т бо све́та твоего́ ви́дети спады́й денни́ца. Те́м мо́лим тя́, огнено́сныя его́ стре́лы, я́же на ны́ дви́жимыя, угаси́ хода́тайством твои́м, избавля́я на́с от собла́зн его́, достохва́льный [и́мярек] архистрати́же.

И ны́не, Богоро́дичен:

Блажи́м тя́, Богоро́дице Де́во, и сла́вим Тя́ ве́рнии по до́лгу: гра́д непоколеби́мый, сте́ну необори́му, тве́рдую предста́тельницу, и прибе́жище ду́ш на́ших.

Крестобогоро́дичен: А́гнца своего́ а́гница иногда́ зря́щи к заколе́нию тща́щагося усе́рдно после́доваше, сия́ вопию́щи ему́: ка́мо и́деши, Ча́до мое́ сладча́йшее Христе́? чесо́ ра́ди ско́рое тече́ние сие́, Долготерпели́ве, тече́ши неле́ностно? Иису́се возжеле́ннейший безгре́шный, многоми́лостиве Го́споди, да́ждь Мне́ сло́во рабе́ Твое́й, Сы́не мо́й вселюбе́знейший: не пре́зри, ще́дре, молча́, Тя́ стра́нно ро́ждшую, Бо́же всеще́дрый, да́руяй ми́ру ве́лию ми́лость.

На стихо́вне. Сла́ва, гла́с 4:

И́же со́лнечными луча́ми Боже́ственнаго све́та просвеща́еми, архистрати́зи, невеще́ственных озаря́ете чинонача́лия, я́ко све́т белообразу́юще в вы́шних, о́гнь облиста́ет в ми́ре непристу́пнаго Божества́: те́м и трисвяту́ю пе́снь пла́менными устна́ми немо́лчно поете́: Свя́т, Свя́т, Свя́т еси́, Бо́же на́ш, сла́ва Тебе́.

И ны́не, Богоро́дичен:

Богоро́дице все́х Цари́це, правосла́вных похвало́, ерети́чествующих шата́ния разори́, и ли́ца и́х посрами́ не кла́няющихся, ниже́ чту́щих, Пречи́стая, честны́й Тво́й о́браз.

Крестобогоро́дичен: Распина́ема ви́дящи, ꙳ и в ре́бра пробода́ема копие́м, ꙳ пречи́стая, Христа́ человеколю́бца, ꙳ пла́каше вопию́щи: ꙳ что́ сие́ Сы́не Мо́й? ꙳ что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м? и тщи́шися безча́дствовати Мя́ вселюбе́знейше: ꙳ дивлю́ся, благоутро́бне, Твоему́ во́льному распя́тию.