[Глава 31] Отпусти́тельнии, и кондаки́ Трио́ди, и 50-цы, начина́емии от неде́ли мытаря́ и фарисе́а, до все́х святы́х. Неде́ля о мытари́ и фарисе́и.
Тропа́рь воскре́сен гла́са.
Конда́к, гла́с 4.
Подо́бен: Яви́лся еси́ дне́сь:
Фарисе́ева убежи́м высокоглаго́лания, и мытаре́ве научи́мся высоте́ глаго́л смире́нных, покая́нием взыва́юще: Спа́се ми́ра, очи́сти рабы́ Твоя́.
Неде́ля блу́днаго.
Тропа́рь гла́са.
Конда́к, гла́с 3.
Подо́бен: Де́ва дне́сь:
Оте́ческия сла́вы Твоея́ удали́хся безу́мно, в злы́х расточи́в е́же ми́ пре́дал еси́ бога́тство. Те́мже Ти́ блу́днаго гла́с приношу́: согреши́х пред Тобо́ю О́тче ще́дрый, приими́ мя ка́ющася, и сотвори́ мя я́ко еди́наго от нае́мник Твои́х.
В суббо́ту мясопу́стную.
Тропа́рь, гла́с 8:
Глубино́ю му́дрости человеколю́бно вся́ стро́яй, и поле́зное все́м подава́яй Еди́не Соде́телю, упоко́й Го́споди, ду́шы ра́б Твои́х: на Тя́ бо упова́ние возложи́ша, творца́ и зижди́теля и Бо́га на́шего.
Конда́к, гла́с 8:
Со святы́ми упоко́й Христе́, ду́шы ра́б Твои́х, иде́же не́сть боле́знь, ни печа́ль, ни воздыха́ние, но жи́знь безконе́чная.
Неде́ля мясопу́стная.
Тропа́рь воскре́сен гла́са.
Конда́к, гла́с 1:
Егда́ прии́деши Бо́же на зе́млю со сла́вою, и трепе́щут вся́ческая, река́ же о́гненная пред суди́щем влече́т, кни́ги разгиба́ются, и та́йная явля́ются: тогда́ изба́ви мя́ от огня́ неугаси́маго, и сподо́би мя́ одесну́ю Тебе́ ста́ти, Судие́ Пра́веднейший.
В суббо́ту сыропу́стную
па́мять соверша́ем все́х в посте́ просия́вших, преподо́бных и Богоно́сных оте́ц на́ших.
Тропа́рь, гла́с 4:
Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с: но моли́твами и́х в ми́ре упра́ви живо́т на́ш.
Конда́к, гла́с 8.
Подо́бен: Я́ко нача́тки естества́:
Я́ко благоче́стия пропове́дники, и нече́стия обузда́тели, Богоно́сных собо́р уясни́л еси́, подсо́лнечную осиява́ющыя: в ми́ре соверше́нном те́х моли́твами, Тебе́ сла́вящыя и велича́ющыя сохрани́, пою́щыя Ти́ Го́споди: Аллилу́иа.
Подоба́ет ве́дати, я́ко в сре́ду и пято́к сыроя́стный, по 9-м часе́ яди́м сы́р и я́ица, ра́ди иакови́тов и тетради́тов, по кано́ну во святы́х отца́ на́шего Ники́фора, Патриа́рха Константинопо́льскаго.
Неде́ля сыропу́стная.
Тропа́рь воскре́сен гла́са.
Конда́к самогла́сен, гла́с 6:
Прему́дрости наста́вниче, смы́сла пода́телю, нему́дрых наказа́телю, и ни́щих защи́тителю, утверди́, вразуми́ се́рдце мое́ Влады́ко, Ты́ да́ждь ми́ сло́во, О́тчее Сло́во. Се́ бо устне́ мои́ не возбраню́, во е́же зва́ти Тебе́: ми́лостиве, поми́луй мя́ па́дшаго.
Того́же ве́чера,
пое́м настоя́щий проки́мен, во гла́с 8:
Не отврати́ лица́ Твоего́ от о́трока Твоего́, я́ко скорблю́: ско́ро услы́ши мя́, вонми́ души́ мое́й, и изба́ви ю́.
Сти́х: Спасе́ние Твое́ Бо́же, да прии́мет мя́.
Сти́х: Да у́зрят ни́щии, и возвеселя́тся.
Сти́х: Взыщи́те Бо́га, и жива́ бу́дет душа́ ва́ша.
Ве́домо бу́ди, я́ко по неде́ли сыропу́стной, с понеде́льника непреме́нно начина́ется по́ст святы́я и вели́кия четыредеся́тницы, и быва́ет до дне́ Святы́я Па́схи.
В суббо́ту пе́рвую посто́в,
па́мять соверша́ем бы́вшаго чудесе́ ко́ливы, от свята́го великому́ченика Фео́дора Ти́рона.
Тропа́рь, гла́с 2:
Ве́лия ве́ры исправле́ния, во исто́чнице пла́мене, я́ко на воде́ упокое́ния святы́й му́ченик фео́дор ра́довашеся: огне́м бо всесожже́гся, я́ко хле́б сла́дкий Тро́ице принесе́ся. Того́ моли́твами, Христе́ Бо́же, спаси́ ду́шы на́ша.
Конда́к, гла́с 8:
Ве́ру Христо́ву я́ко щи́т вну́трь прии́м в се́рдце твое́м, проти́вныя си́лы попра́л еси́ многострада́льче: и венце́м небе́сным венча́лся еси́ ве́чно Фео́доре, я́ко непобеди́мый.
В неде́лю пе́рвую посто́в,
си́речь Правосла́вия, па́мять соверша́ем святы́х проро́ков, Моисе́а и Ааро́на, и про́чих, и святы́х и честны́х ико́н возставле́ние.
Тропа́рь воскре́сный гла́са.
Сла́ва, гла́с 2:
Пречи́стому Твоему́ о́бразу покланя́емся Благи́й, прося́ще проще́ния прегреше́ний на́ших Христе́ Бо́же: во́лею бо благоволи́л еси́ пло́тию взы́ти на Кре́ст, да изба́виши, я́же созда́л еси́, от рабо́ты вра́жия. Те́м благода́рственно вопие́м Ти́: ра́дости испо́лнил еси́ вся́ Спа́се на́ш, прише́дый спасти́ ми́р.
И ны́не, Богоро́дичен:
Вся́ па́че смы́сла, вся́ пресла́вная Твоя́ Богоро́дице та́инства, чистоте́ запеча́танной и де́вству храни́му, Ма́ти позна́лася еси́ нело́жна, Бо́га ро́ждши и́стиннаго: Того́ моли́ спасти́ся душа́м на́шым.
Конда́к самогла́сен Гла́с 8:
Неопи́санное Сло́во О́тчее, из Тебе́ Богоро́дице, описа́ся воплоща́емь, и оскве́рншийся о́браз дре́внее вообрази́в, Боже́ственною добро́тою смеси́: но испове́дающе спасе́ние, де́лом и сло́вом сие́ вообража́ем.
В ве́чер пе́рвыя неде́ли
настоя́щий проки́мен, во гла́с 8:
Да́л еси́ достоя́ние боя́щымся Тебе́ Го́споди.
Сти́х: От коне́ц земли́ к Тебе́ воззва́х.
Сти́х: Покры́юся кро́вом кри́л Твои́х.
Сти́х: Та́ко воспою́ и́мени Твоему́ во ве́ки.
Пою́тся же проки́мени еди́н по еди́ному в ку́юждо неде́лю, до́ндеже сконча́ются неде́ли посто́в.
В неде́лю втору́ю посто́в
пое́м после́дование, и́же во святы́х отца́ на́шего Григо́риа, архиепи́скопа Селу́нскаго.
Тропа́рь, гла́с 8:
Правосла́вия наста́вниче, це́ркве утвержде́ние и учи́телю, мона́хов добро́то, богосло́вов побо́рниче непребори́мый, Григо́рие чудотво́рче, Фессалони́тская похвало́, пропове́дниче благода́ти, моли́ся вы́ну спасти́ся душа́м на́шым.
По 3-й пе́сни конда́к, гла́с 4:
Ны́не вре́мя де́лательное яви́ся, при две́рех су́д, воста́нем у́бо постя́щеся, принесе́м сле́зы умиле́ния ми́лостынями, зову́ще: согреши́хом па́че песка́ морска́го. Но осла́би, Соде́телю все́х, я́ко да прии́мем нетле́нныя венцы́.
По 6 пе́сни конда́к григо́риа, гла́с 8.
Подо́бен: Взбра́нной:
Прему́дрости свяще́нный и Боже́ственный орга́н, богосло́вия све́тлую согла́сно трубу́, воспева́ем тя́ Григо́рие Богоглаго́льниче, но я́ко у́м Уму́ пе́рвому предстоя́й, к Нему́ у́м на́ш о́тче наста́ви, да зове́м: ра́дуйся пропове́дниче благода́ти.
Неде́ля тре́тия посто́в,
пра́зднуем поклоне́ние Честна́го и Животворя́щаго Креста́.
Тропа́рь воскре́сен.
Сла́ва, гла́с 1:
Спаси́ Го́споди, лю́ди Твоя́, и благослови́ достоя́ние Твое́, побе́ды на сопроти́вныя да́руя, и Твое́ сохраня́я Кресто́м Твои́м жи́тельство.
И ны́не, Богоро́дичен.
Конда́к, гла́с 7:
Не ктому́ пла́менное ору́жие храни́т вра́т Еде́мских, на ты́я бо на́йде пресла́вный сою́з, дре́во кре́стное: сме́ртное жа́ло и а́дова побе́да прогна́ся. Предста́л бо еси́ Спа́се мо́й, вопия́ су́щым во а́де: вни́дите па́ки в ра́й.
Неде́ля четве́ртая посто́в,
пое́м после́дование преподо́бнаго отца́ на́шего Иоа́нна, списа́теля Ле́ствицы.
Тропа́рь, гла́с 1:
Пусты́нный жи́тель, и в телеси́ а́нгел, и чудотво́рец яви́лся еси́ Богоно́се о́тче на́ш Иоа́нне, посто́м, бде́нием, моли́твою небе́сная дарова́ния прии́м, исцеля́еши неду́жныя, и ду́шы ве́рою притека́ющих к тебе́. Сла́ва да́вшему тебе́ кре́пость: сла́ва венча́вшему тя́: сла́ва де́йствующему тобо́ю все́м исцеле́ния.
Конда́к, гла́с 4:
Подо́бен: Яви́лся еси́:
На высоте́ Госпо́дь воздержа́ния и́стинна тя́ положи́, я́коже звезду́ неле́стную, световодя́щую концы́, наста́вниче Иоа́нне о́тче на́ш.
В четверто́к пя́тыя седми́цы
пое́м после́дование вели́каго кано́на.
Конда́к, гла́с 6:
Душе́ моя́, душе́ моя́, воста́ни, что́ спи́ши? коне́ц приближа́ется, и и́маши смути́тися, воспряни́ у́бо, да пощади́т тя́ Христо́с Бо́г, везде́ сы́й, и вся́ исполня́яй.
В суббо́ту пя́тыя седми́цы
пое́м ко Пресвяте́й Богоро́дице неседа́льное пе́ние.
Тропа́рь, гла́с 8:
Повеле́нное та́йно прие́м в ра́зуме, в кро́ве Ио́сифове, тща́нием предста́ безпло́тный, глаго́ля Неискусобра́чней: Приклони́вый схожде́нием небеса́, вмеща́ется неизме́нно ве́сь в Тя́, Его́же и ви́дя в ложесна́х Твои́х, прие́мша ра́бий зра́к, ужаса́юся зва́ти Тебе́. Ра́дуйся, Неве́сто Неневе́стная.
Конда́к, гла́с 8:
Взбра́нной Воево́де победи́тельная, я́ко изба́вльшеся от злы́х благода́рственная воспису́ем Ти́ раби́ Твои́ Богоро́дице. Но я́ко иму́щая держа́ву непобеди́мую, от вся́ких на́с бе́д свободи́, да зове́м Ти́: ра́дуйся, Неве́сто Неневе́стная.
В пя́тую неде́лю посто́в
пое́м после́дование преподо́бныя ма́тере на́шея Мари́и еги́птяныни.
Тропа́рь, гла́с 8:
В тебе́, ма́ти, изве́стно спасе́ся, е́же по о́бразу: прии́мши бо кре́ст, после́довала еси́ Христу́, и де́ющи учи́ла еси́ презира́ти у́бо пло́ть, прехо́дит бо: прилежа́ти же о души́ ве́щи безсме́ртней. Те́мже и со а́нгелы сра́дуется, Преподо́бная Мари́е, ду́х тво́й.
Конда́к, гла́с 3.
Подо́бен: Де́ва дне́сь:
Блуда́ми пе́рвее преиспо́лнена вся́ческими, Христо́ва неве́ста дне́сь покая́нием яви́ся, а́нгельское жи́тельство подража́ющи, де́моны креста́ ору́жием погубля́ет: сего́ ра́ди Ца́рствия неве́ста яви́ся Мари́а Пресла́вная.
В суббо́ту свята́го и пра́веднаго Ла́заря.
Тропа́рь, гла́с 1:
О́бщее воскресе́ние пре́жде твоея́ стра́сти уверя́я, из ме́ртвых воздви́гл еси́ Ла́заря Христе́ Бо́же. Те́мже и мы́ я́ко о́троцы побе́ды зна́мения нося́ще, Тебе́ победи́телю сме́рти вопие́м: оса́нна в вы́шних, благослове́н гряды́й во и́мя Госпо́дне.
Конда́к, гла́с 2.
Подо́бен: Вы́шних ищя́:
Все́х ра́дость Христо́с, и́стина, све́т, живо́т и ми́ра воскресе́ние, су́щым на земли́ яви́ся, свое́ю бла́гостию, и бы́сть о́браз воскресе́ния, все́м подая́ Боже́ственное оставле́ние.
В неде́лю ва́ий.
Тропа́рь: О́бщее воскресе́ние: два́жды,
и се́й еди́ною, гла́с 4:
Спогре́бшеся Тебе́ креще́нием Христе́ Бо́же на́ш, безсме́ртныя жи́зни сподо́бихомся воскресе́нием Твои́м, и воспева́юще зове́м: оса́нна в вы́шних, благослове́н гряды́й во и́мя Госпо́дне.
По 3-й пе́сни ипакои́, гла́с 6:
С ве́твьми воспе́вше пре́жде, с древесы́ последи́ я́ша Христа́ Бо́га, неблагода́рнии иуде́е. Мы́ же ве́рою непрело́жною при́сно почита́юще я́ко благоде́теля, вы́ну вопие́м ему́: благослове́н еси́ гряды́й Ада́ма воззва́ти.
Конда́к, гла́с 6:
На Престо́ле на небеси́, на жребя́ти на земли́ носи́мый Христе́ Бо́же, а́нгелов хвале́ние, и дете́й воспева́ние прия́л еси́, зову́щих Ти́: благослове́н еси́ гряды́й Ада́ма воззва́ти.
Во святы́й и Вели́кий понеде́льник,
на у́трени во Аллилу́иа: Тропа́рь, гла́с 8:
Се́ Жени́х гряде́т в полу́нощи, и блаже́н ра́б, его́же обря́щет бдя́ща: недосто́ин же па́ки, его́же обря́щет уныва́юща. Блюди́ у́бо душе́ моя́, не сно́м отяготи́ся, да не сме́рти предана́ бу́деши, и Ца́рствия вне́ затвори́шися. Но воспряни́ зову́щи: свя́т, свя́т, свя́т еси́ Бо́же, Богоро́дицею поми́луй на́с.
Конда́к, гла́с 8.
Подо́бен: Я́ко нача́тки:
Иа́ков рыда́ше Ио́сифова лише́ния, и до́блий седя́ше на колесни́це, я́ко ца́рь почита́емь: еги́птяныни бо тогда́ сласте́м не порабо́тав, возпрославля́шеся от ве́дущаго челове́ческая сердца́, и посыла́ющаго вене́ц нетле́нный.
Во святы́й и Вели́кий вто́рник.
Тропа́рь: Се́ Жени́х гряде́т:
Конда́к, гла́с 2:
Подо́бен: Вы́шних ищя́:
Ча́с, душе́, конца́ помы́слиши, и посече́ния смоко́вницы убоя́вшися, да́нный тебе́ тала́нт трудолю́бно де́лай окая́нная, бо́дрствующи и зову́щи: да не пребу́дем вне́ черто́га Христо́ва.
Во святу́ю и Вели́кую сре́ду.
Тропа́рь: Се́ Жени́х гряде́т:
Конда́к, гла́с 4.
Подо́бен: Вознесы́йся на Кре́ст:
Па́че блудни́цы, бла́же, беззако́нновав, сле́з ту́чи ника́коже Тебе́ принесо́х: но молча́нием моля́ся припа́даю Ти́, любо́вию облобыза́я пречи́стеи Твои́ но́зе, я́ко да оставле́ние мне́ я́ко Влады́ка пода́си долго́в, зову́щу Ти́ Спа́се: от скве́рных де́л изба́ви мя́.
Во святы́й и Вели́кий четверто́к
во Аллилу́иа, тропа́рь, гла́с 8:
Егда́ сла́внии ученицы́, на умове́нии ве́чери просвеща́хуся, тогда́ Иу́да злочести́вый сребролю́бием неду́говав омрача́шеся, и беззако́нным судия́м Тебе́ Пра́веднаго Судию́ предае́т. Ви́ждь име́ний рачи́телю, си́х ра́ди удавле́ние употреби́вша: бежи́ несы́тыя души́, Учи́телю такова́я дерзну́вшия, и́же о все́х благи́й, Го́споди, сла́ва Тебе́.
Конда́к, гла́с 2.
Подо́бен: Вы́шних ищя́:
Хле́б прие́м в ру́це преда́тель, сокрове́нно ты́я простира́ет, и прие́млет це́ну Созда́вшаго свои́ма рука́ма челове́ка: и не испра́влен пребы́сть Иу́да ра́б и льсте́ц.
Во святы́й и Вели́кий пято́к.
Тропа́рь: Егда́ сла́внии ученицы́:
Конда́к, гла́с 8:
На́с ра́ди Распя́таго прииди́те вси́ воспои́м: Того́ бо ви́де Мари́а на дре́ве, и глаго́лаше: а́ще и распя́тие терпи́ши, Ты́ еси́ Сы́н и Бо́г Мо́й.
Тропа́рь во отпу́ст, гла́с 4:
Искупи́л ны́ еси́ от кля́твы зако́нныя, честно́ю Твое́ю кро́вию, на Кресте́ пригвозди́вся, и копие́м пробо́дся, безсме́ртие источи́л еси́ челове́ком, Спа́се на́ш, сла́ва Тебе́.
Тропа́рь 1-го часа́, гла́с 1:
Распе́ншуся Тебе́ Христе́, поги́бе мучи́тельство, попра́на бы́сть си́ла вра́жия: ниже́ бо а́нгел, ниже́ челове́к, но са́м Го́споди, спа́сл еси́ на́с, сла́ва Тебе́.
Сла́ва, и ны́не: Что́ Тя нарече́м:
Тропа́рь 3-го часа́, гла́с 6:
Го́споди, осуди́ша Тя́ иуде́е на сме́рть, жи́знь все́х: и́же Чермно́е мо́ре жезло́м проше́дшии, на Кресте́ Тя пригвозди́ша: и и́же от ка́мене ме́д сса́вшии, же́лчь Тебе́ принесо́ша: но во́лею претерпе́л еси́, да на́с свободи́ши от рабо́ты вра́жия, Христе́ Бо́же сла́ва Тебе́.
Сла́ва, и ны́не: Богоро́дице, Ты́ еси́ лоза́:
Тропа́рь 6-го часа́, гла́с 2:
Спасе́ние соде́лал еси́ посреде́ земли́ Христе́ Бо́же, на Кресте́ пречи́стеи ру́це Твои́ просте́рл еси́, собира́я вся́ язы́ки, зову́щыя: Го́споди, сла́ва Тебе́.
Сла́ва, и ны́не: Я́ко не и́мамы:
Тропа́рь 9-го часа́, гла́с 8:
Ви́дя разбо́йник Нача́льника жи́зни на Кресте́ ви́сяща, глаго́лаше: а́ще не бы́ Бо́г бы́л вопло́щься, и́же с на́ми распны́йся, не бы́ со́лнце лучи́ своя́ потаи́ло, ниже́ бы земля́ трепе́щущи трясла́ся: но вся́ терпя́й, помяни́ мя Го́споди, во Ца́рствии Твое́м.
Сла́ва, и ны́не: И́же на́с ра́ди рожде́йся от Де́вы:
Конда́к, гла́с 8:
На́с ра́ди Распя́таго прииди́те вси́ воспои́м: Того́ бо ви́де Мари́а на дре́ве, и глаго́лаше: а́ще и распя́тие терпи́ши, Ты́ еси́ Сы́н и Бо́г Мо́й.
Во святу́ю и Вели́кую суббо́ту.
Тропа́рь, гла́с 2:
Благообра́зный Ио́сиф, с дре́ва сне́м пречи́стое те́ло Твое́, плащани́цею чи́стою обви́в, и воня́ми во гро́бе но́ве покры́в положи́.
Сла́ва: Егда́ снизше́л еси́ к сме́рти Животе́ безсме́ртный, тогда́ а́д умертви́л еси́ блиста́нием Божества́. Егда́ же и уме́ршыя от преиспо́дних воскреси́л еси́, вся́ си́лы небе́сныя взыва́ху: жизнода́вче Христе́ Бо́же на́ш, сла́ва Тебе́.
И ны́не: Мироно́сицам жена́м, при гро́бе предста́в а́нгел вопия́ше: ми́ра ме́ртвым су́ть прили́чна, Христо́с же истле́ния яви́ся чу́ждь.
Конда́к, гла́с 6:
Подо́бен: Рукопи́саннаго:
Бе́здну заключи́вый ме́ртв зри́тся и сми́рною и плащани́цею обви́вся, во гро́бе полага́ется, я́ко сме́ртный, Безсме́ртный: жены́ же приидо́ша пома́зати Его́ ми́ром, пла́чущыя го́рько и вопию́щыя: сия́ суббо́та е́сть преблагослове́нная, в не́йже Христо́с усну́в, воскре́снет тридне́вен.
Во святую и Великую субботу
ве́чера, о часе́ 10-м дне́ кле́плет в вели́кое.
И собра́вшеся в це́рковь, облачи́тся иере́й, и диа́кон. И благослови́вшу иере́ю, начина́ем вече́рню, глаго́лем: Царю́ Небе́сный: Трисвято́е, по О́тче на́ш: Го́споди поми́луй, 12. Сла́ва и ны́не: Прииди́те поклони́мся, три́жды. Псало́м: Благослови́ душе́ моя́ Го́спода: Посе́м ектениа́ вели́кая. И возгла́с. Го́споди воззва́х, пое́м во гла́с 1: Иере́й же и диа́кон отше́дше творя́т проскоми́дию: И ста́вим стихо́в 8, и пое́м стихи́ры воскре́сны 4. И трио́ди самогла́сны 3, на 4. В то́же вре́мя кади́т диа́кон.
Стихи́ры воскре́сны, гла́с 1:
Вече́рния на́ша моли́твы приими́ святы́й Го́споди, и пода́ждь на́м оставле́ние грехо́в, я́ко еди́н еси́ явле́й в ми́ре воскресе́ние.
Обыди́те лю́дие Сио́н, и объими́те его́, и дади́те сла́ву в не́м Воскре́сшему из ме́ртвых: я́ко То́й е́сть Бо́г на́ш, избавле́й на́с от беззако́ний на́ших.
Прииди́те лю́дие, воспои́м, и поклони́мся Христу́, сла́вяще Его́ из ме́ртвых воскресе́ние: я́ко То́й е́сть Бо́г на́ш, от ле́сти вра́жия ми́р избавле́й.
Стра́стию Твое́ю Христе́, от страсте́й свободи́хомся, и воскресе́нием Твои́м из истле́ния изба́вихомся: Го́споди, сла́ва Тебе́.
И́ны стихи́ры самогла́сны, Вели́кия суббо́ты, три́, повторя́юще еди́ну, гла́с 8.
Дне́сь а́д стеня́ вопие́т: у́не мне́ бя́ше, а́ще бы́х от Мари́и Ро́ждшагося не прия́л: прише́д бо на мя́ держа́ву мою́ разруши́, врата́ ме́дная сокруши́: ду́шы, я́же содержа́х пре́жде, Бо́г сы́й воскреси́. Сла́ва Го́споди, Кресту́ Твоему́ и воскресе́нию Твоему́.
Дне́сь а́д стеня́ вопие́т: разруши́ся моя́ вла́сть, прия́х ме́ртваго я́ко еди́наго от уме́рших: сего́ бо держа́ти отню́д не могу́, но погубля́ю с ни́м, и́миже ца́рствовах. А́з име́х мертвецы́ от ве́ка: но Се́й се́ все́х воздвиза́ет. Сла́ва, Го́споди, Кресту́ Твоему́, и воскресе́нию Твоему́.
Дне́сь а́д стеня́ вопие́т: поже́рта моя́ бы́сть держа́ва. Па́стырь распя́тся и Ада́ма воскреси́, и́миже ца́рствовах, лиши́хся: и я́же пожро́х возмоги́й, все́х изблева́х. Истощи́ гро́бы распны́йся: изнемога́ет сме́ртная держа́ва. Сла́ва Го́споди Кресту́ Твоему́, и воскресе́нию Твоему́.
Сла́ва, гла́с 6:
Дне́шний де́нь та́йно вели́кий Моисе́й прообразова́ше, глаго́ля: и благослови́ Бо́г де́нь седмы́й. Сия́ бо е́сть благослове́нная суббо́та, се́й е́сть упокое́ния де́нь, во́ньже почи́ от все́х де́л свои́х Единоро́дный Сы́н Бо́жий, смотре́нием е́же на сме́рть, пло́тию суббо́тствовав: и во е́же бе́, па́ки возвра́щься воскресе́нием, дарова́ на́м живо́т ве́чный, я́ко Еди́н Бла́г и Человеколю́бец.
И ны́не, Богоро́дичен, гла́с 1.
Всеми́рную сла́ву от челове́к прозя́бшую, и Влады́ку ро́ждшую, небе́сную две́рь воспои́м Мари́ю Де́ву, безпло́тных пе́снь, и ве́рных удобре́ние. Сия́ бо яви́ся не́бо, и хра́м Божества́: сия́ прегражде́ние вражды́ разруши́вши, ми́р введе́, и Ца́рствие отве́рзе. Сию́ у́бо иму́ще ве́ры утвержде́ние, побо́рника и́мамы из Нея́ ро́ждшагося Го́спода. Дерза́йте у́бо, дерза́йте лю́дие Бо́жии: и́бо то́й победи́т враги́, я́ко всеси́лен.
[зри́] Подоба́ет ве́дати: а́ще ли не́кия ну́жды ра́ди вели́кия не́сть литурги́и, пое́м на Го́споди воззва́х, стихи́ры на 8: Воскре́сны, 3, и Анато́лиев 1: И трио́ди 3, на 4. Сла́ва, гла́с 6: Дне́шний де́нь та́йно: И ны́не, Богоро́дичен 1-й: Всеми́рную сла́ву: Вхо́д с кади́лом. Све́те ти́хий: Проки́мен: Госпо́дь воцари́ся: И чте́ния дне́ трио́ди по чи́ну своему́. По сконча́нии же чте́ний ектениа́: Рце́м вси́: Та́же, Сподо́би Го́споди в ве́чер се́й: Посе́м, Испо́лним вече́рнюю моли́тву:
На стихо́вне стихи́ры воскре́сны, гла́с 1:
Стра́стию Твое́ю Христе́, от страсте́й свободи́хомся, и воскресе́нием Твои́м из истле́ния изба́вихомся, Го́споди, сла́ва Тебе́.
Сти́х: Госпо́дь воцари́ся, в ле́поту облече́ся.
Да ра́дуется тва́рь, небеса́ да веселя́тся, рука́ми да воспле́щут язы́цы с весе́лием: Христо́с бо Спа́с на́ш на Кресте́ пригвозди́ грехи́ на́ша: и сме́рть умертви́в, живо́т на́м дарова́, па́дшаго Ада́ма всеро́днаго воскреси́вый, я́ко Человеколю́бец.
Сти́х: И́бо утверди́ вселе́нную, я́же не подви́жится.
Ца́рь сы́й небесе́ и земли́ непостижи́ме, во́лею распя́лся еси́ за человеколю́бие: Его́же а́д сре́т до́ле, огорчи́ся, и пра́ведных ду́шы прие́мше возра́довашася. Ада́м же ви́дев Тя́ Зижди́теля в преиспо́дних воскре́се. О чудесе́! ка́ко сме́рти вкуси́ все́х Жи́знь? но я́коже восхоте́ ми́р просвети́ти зову́щий, и глаго́лющий: воскресы́й из ме́ртвых, Го́споди, сла́ва Тебе́.
Сти́х: До́му Твоему́ подоба́ет святы́ня, Го́споди, в долготу́ дне́й.
Жены́ мироно́сицы, ми́ра нося́ще, со тща́нием и рыда́нием гро́ба Твоего́ достиго́ша: и не обре́тше Пречи́стаго Те́ла Твоего́, от а́нгела же уве́девше но́вое и пресла́вное чу́до, апо́столом глаго́лаху: воскре́се Госпо́дь, подая́ ми́рови ве́лию ми́лость.
Сла́ва, и ны́не, Богоро́дичен:
Се́ испо́лнися Иса́иино прорече́ние: Де́ва бо родила́ еси́, и по рождестве́ я́ко пре́жде рождества́ пребыла́ еси́, Бо́г бо бе́ рожде́йся: те́мже и естества́ новопресече́. Но о Богома́ти, моле́ния Твои́х рабо́в, в Твое́м хра́ме приноси́мая Тебе́, не пре́зри: но я́ко Благоутро́бнаго Твои́ма рука́ма нося́щи, на Твоя́ рабы́ умилосе́рдися, и моли́ спасти́ся душа́м на́шым.
И про́чая слу́жба вече́рни.
По О́тче на́ш: Тропари́: Благообра́зный Ио́сиф:
Сла́ва, Егда́ снизше́л еси́ к сме́рти: И ны́не: Мироно́сицам жена́м.
И отпу́ст.
Во святую и Великую неделю Пасхи
о часе́ у́треннем, параекклисиа́рх, взе́м благослове́ние у настоя́теля, исхо́дит и ударя́ет в вели́кое, и кле́плет дово́льно. И вше́д во хра́м, вжига́ет свещы́ вся́, и канди́ла: устроя́ет же сосу́ды два́ со у́глием горя́щим, и влага́ет в ни́х фимиа́ма мно́го благово́ннаго, и поставля́ет еди́н сосу́д среди́ це́ркве, други́й же во свято́м олтаре́, я́ко да испо́лнится це́рковь вся́ благово́ния. Та́же настоя́тель вше́д во святы́й олта́рь, со иере́и и диа́коны, облача́тся в ве́сь светле́йший са́н. И раздае́т свещы́ бра́тии, и взе́млет честны́й кре́ст, кади́ло же взе́млет диа́кон, иере́й же свято́е Ева́нгелие, и́н иере́й о́браз воскресе́ния Христо́ва, и ста́вятся лице́м на за́пад. И затворя́т врата́ церко́вная, я́же к за́паду. Исхо́дит настоя́тель со иере́и в притво́р, се́верными две́рьми, предъиду́щым пред ни́м диа́коном со двема́ свеща́ми, и о́ба ли́ка, пою́ще стихи́ру, гла́с 6:
Воскре́сние Твое́, Христе́ Спа́се, а́нгели пою́т на небесе́х, и на́с на земли́ сподо́би чи́стым се́рдцем Тебе́ сла́вити.
Та́же ударя́ют во вся́ кампа́ны и тя́жкая, и кле́плют дово́льно. И вше́дше в притво́р, ста́нут со Ева́нгелием, и со о́бразом, лице́м на за́пад, я́коже указа́ся пре́жде. Та́же настоя́тель взе́млет у диа́кона кади́ло в пра́вую ру́ку, кре́ст же в ле́вую, и кади́т о́бразы, и кли́росы, и бра́тию по обы́чаю, диа́кону же преднося́щу пред ни́м свещу́ горя́щу. Бра́тия же вси́ стоя́т держа́ще свещы́ своя́, со внима́нием моля́щеся в себе́, и благодаря́ще на́с ра́ди пострада́вшаго и воскре́сшаго Христа́ Бо́га на́шего. По сконча́нии же кажде́ния прихо́дит настоя́тель пред вели́кия врата́ це́ркве, и покади́т диа́кона предстоя́щаго ему́ со свеще́ю. Тогда́ взе́мь кади́ло диа́кон от руку́ настоя́теля, и покади́т самого́ настоя́теля. И па́ки восприи́м настоя́тель кади́ло, ста́в пред церко́вными две́рьми, зря́ на восто́к, и назна́менает вели́кия врата́ це́ркве, [затворе́ная су́ща] кади́лом крестообра́зно, три́жды, держа́ в ле́вой руце́ честны́й кре́ст, и свети́льником стоя́щым со обою́ страну́.
И велегла́сно возгласи́т:
Сла́ва Святе́й, и Единосу́щней, и Животворя́щей, и Неразде́льней Тро́ице, всегда́, ны́не и при́сно, и во ве́ки веко́в.
И на́м отвеща́ющым: Ами́нь.
Начина́ет настоя́тель с про́чими служи́тели велегла́сно настоя́щий тропа́рь, во гла́с 5:
Христо́с воскре́се из ме́ртвых, сме́ртию сме́рть попра́в, и су́щым во гробе́х живо́т дарова́в.
И мы́ то́йжде пое́м подо́бне со сладкопе́нием: пое́тся же се́й тропа́рь три́жды от настоя́теля, и три́жды от на́с. Та́же настоя́тель глаго́лет стихи́.
Пе́рвый сти́х: Да воскре́снет Бо́г, и расточа́тся врази́ Его́, и да бежа́т от лица́ Его́ ненави́дящии его́.
И на ки́йждо сти́х мы́ пое́м тропа́рь: Христо́с воскре́се: ве́сь по еди́ножды.
Вторы́й сти́х: Я́ко исчеза́ет ды́м да исче́знут, я́ко та́ет во́ск от лица́ огня́. Христо́с воскре́се: [еди́ножды].
Сти́х 3: Та́ко да поги́бнут гре́шницы от лица́ Бо́жия, а пра́ведницы да возвеселя́тся. Христо́с воскре́се: [еди́ножды].
Сти́х 4: Се́й де́нь, его́же сотвори́ Госпо́дь, возра́дуемся, и возвесели́мся во́нь. Христо́с воскре́се: [еди́ножды].
Сла́ва: Христо́с воскре́се: еди́ножды И ны́не: Христо́с воскре́се: еди́ножды.
Та́же настоя́тель пое́т вы́шшим гла́сом:
Христо́с воскре́се из ме́ртвых, сме́ртию сме́рть попра́в.
И отверза́ет врата́.
Вхо́дит настоя́тель с честны́м кресто́м, предъиду́щым ему́ со двема́ лампа́дами. И бра́тиям пою́щым:
И су́щым во гробе́х живо́т дарова́в.
Та́же ударя́ют во вся́ кампа́ны, и кле́плют дово́льно три́ зво́ны.
Вше́д же настоя́тель со иере́и во святы́й олта́рь. И диа́кон глаго́лет ектению́ вели́кую.
Ми́ром Го́споду помо́лимся:
Возгла́с: Я́ко подоба́ет Тебе́ вся́кая сла́ва:
И начина́ет предстоя́тель кано́н, творе́ние господи́на Иоа́нна Дамаски́на. Гла́с 1. Ирмо́с: Воскре́сния де́нь: Ирмосы́ на 4: и тропари́ на 12, с припе́вы: Христо́с воскре́се: И па́ки последи́ ки́йждо ли́к ирмо́с. Последи́ же на схо́де катава́сиа, ирмо́с То́йже: Воскре́сния де́нь: и пое́м, Христо́с воскре́се: ве́сь, три́жды.
Твори́т же нача́ло кано́на на ку́юждо пе́снь всегда́ предстоя́тель, десно́й или́ ле́вой стране́ случи́вшейся нача́ти. И кади́т в нача́ле кано́на святы́я ико́ны, и о́ба ли́ка, и бра́тию по чи́ну.
И по ко́ейждо пе́сни быва́ет ектениа́ ма́лая вне́ олтаря́, я́коже ре́хом, во святы́й се́й де́нь. Возгла́с вну́трь олтаря́ от иере́а: Я́ко Твоя́ держа́ва: По 1-й пе́сни пое́т десна́я страна́. По 3-й же пое́т ле́вая. Си́це пое́м и по про́чих пе́снех.
Кано́н. Гла́с 1.
Пе́снь 1.
Ирмо́с: Воскре́сния де́нь, просвети́мся лю́дие: Па́сха, Госпо́дня Па́сха! от сме́рти бо к жи́зни, и от земли́ к небеси́, Христо́с Бо́г на́с преведе́, побе́дную пою́щыя.
Припе́в: Христо́с воскре́се из ме́ртвых.
Очи́стим чу́вствия, и у́зрим непристу́пным све́том воскресе́ния Христа́ блиста́ющася, и ра́дуйтеся, реку́ща, я́сно да услы́шим, побе́дную пою́ще.
Небеса́ у́бо досто́йно да веселя́тся, земля́ же да ра́дуется, да пра́зднует же ми́р, ви́димый же ве́сь, и неви́димый: Христо́с бо воста́, весе́лие ве́чное.
И́ный кано́н Богоро́дичен, подо́бен. Творе́ние господи́на Феофа́на, и господи́на Ио́сифа, его́же краестро́чие на пе́рвых тропаре́х, Феофа́нус. Гла́с то́йже. [Си́и же глаго́лются кроме́ пе́рваго дне́.]
[Феофа́н] Умерщвле́ния преде́л сломи́ла еси́, ве́чную жи́знь ро́ждшая Христа́, из гро́ба возсия́вшаго дне́сь, Де́во всенепоро́чная, и ми́р просвети́вшаго.
[Ио́сиф] Воскре́сшаго ви́девши Сы́на Твоего́ и Бо́га, ра́дуйся со апо́столы Богоблагода́тная чи́стая, и е́же ра́дуйся пе́рвее, я́ко все́х ра́дости вина́, восприя́ла еси́, Богома́ти всенепоро́чная.
Та́же, ектениа́ И возгла́с:
Я́ко Твоя́ держа́ва, и Твое́ е́сть Ца́рство, и си́ла и Сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Пе́снь 3.
Ирмо́с: Прииди́те пи́во пие́м но́вое, не от ка́мене непло́дна чудоде́емое: но нетле́ния исто́чник, из гро́ба одожди́вша Христа́, в не́мже утвержда́емся.
Ны́не вся́ испо́лнишася све́та, не́бо же и земля́ и преиспо́дняя: да пра́зднует у́бо вся́ тва́рь воста́ние Христо́во, в не́мже утвержда́ется.
Вчера́ спогребо́хся Тебе́, Христе́, совостаю́ дне́сь воскре́сшу Тебе́, сраспина́хся Тебе́ вчера́, са́м мя́ спросла́ви, Спа́се, во Ца́рствии Твое́м.
[Феофа́н] На нетле́нную жи́знь прихожду́ дне́сь, бла́гостию ро́ждшагося из Тебе́, Чи́стая, и все́м конце́м све́т облиста́вшаго.
Бо́га Его́же родила́ еси́ пло́тию, из ме́ртвых, я́коже рече́, воста́вша ви́девши, Чи́стая, лику́й, и сего́ я́ко Бо́га, Пречи́стая, возвелича́й.
Ектениа́ И возгла́с:
Я́ко ты́ еси́ Бо́г на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ипакои́, гла́с 4:
Предвари́вшыя у́тро я́же о Мари́и, и обре́тшыя ка́мень отвале́н от гро́ба, слы́шаху от а́нгела: во све́те присносу́щнем су́щаго, с ме́ртвыми что́ и́щете я́ко челове́ка? ви́дите гро́бныя пелены́, тецы́те и ми́ру пропове́дите, я́ко воста́ Госпо́дь, умертви́вый сме́рть: я́ко е́сть Сы́н Бо́га, спаса́ющаго ро́д челове́ческий.
И чте́ние в Григо́рии Богосло́ве, его́же нача́ло: На стра́жи мое́й ста́ну: По чте́нии же па́ки вжига́ют свещы́ бра́тия.
Пе́снь 4.
Ирмо́с: На Боже́ственней стра́жи Богоглаго́ливый Авваку́м, да ста́нет с на́ми и пока́жет светоно́сна а́нгела, я́сно глаго́люща: дне́сь спасе́ние ми́ру, я́ко воскре́се Христо́с, я́ко всеси́лен.
Му́жеский у́бо по́л, я́ко разве́рзый де́вственную утро́бу, яви́ся Христо́с: я́ко челове́к же, а́гнец нарече́ся, непоро́чен же, я́ко невку́сен скве́рны, на́ша Па́сха, и я́ко Бо́г и́стинен, соверше́н рече́ся.
Я́ко единоле́тный а́гнец благослове́нный на́м вене́ц Христо́с, во́лею за все́х закла́н бы́сть, Па́сха чисти́тельная, и па́ки из гро́ба кра́сное пра́вды на́м возсия́ со́лнце.
Богооте́ц у́бо Дави́д, пред се́нным ковче́гом скака́ше игра́я: лю́дие же Бо́жии святи́и, образо́в сбытие́ зря́ще, весели́мся Боже́ственне, я́ко воскре́се Христо́с, я́ко всеси́лен.
[Феофа́н] Созда́вый Ада́ма, Твоего́ пра́отца, Чи́стая, зи́ждется от Тебе́, и сме́ртное жили́ще разори́ свое́ю сме́ртию дне́сь, и озари́ вся́ Боже́ственными блиста́ньми воскресе́ния.
Его́же родила́ еси́ Христа́, прекра́сно из ме́ртвых возсия́вша Чи́стая зря́щи, до́брая и непоро́чная в жена́х и кра́сная, дне́сь во спасе́ние все́х со апо́столы ра́дующися, Того́ прославля́й.
Ектениа́ И возгла́с.
Я́ко бла́г и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Пе́снь 5.
Ирмо́с: У́тренюем у́треннюю глубоку́, и вме́сто ми́ра пе́снь принесе́м Влады́це: и Христа́ у́зрим пра́вды со́лнце, все́м жи́знь возсия́юща.
Безме́рное Твое́ благоутро́бие а́довыми у́зами содержи́мии зря́ще, к све́ту идя́ху, Христе́, весе́лыми нога́ми, Па́сху хва́ляще ве́чную.
Приступи́м свещено́снии, исходя́щу Христу́ из гро́ба я́ко жениху́, и спра́зднуим любопра́зднственными чи́нми, Па́сху Бо́жию спаси́тельную.
[Феофа́н] Просвеща́ется Боже́ственными луча́ми и живоно́сными воскресе́ния Сы́на Твоего́, Богома́ти Пречи́стая, и ра́дости исполня́ется благочести́вых собра́ние.
Не разве́рзл еси́ врата́ де́вства в воплоще́нии, гро́ба не разруши́л еси́ печа́тей Царю́ созда́ния: отону́дуже воскре́сшаго Тя́ зря́щи Ма́ти ра́довашеся.
Ектениа́ И возгла́с:
Я́ко святи́ся и просла́вися Пречестно́е и Великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Пе́снь 6.
Ирмо́с: Снизше́л еси́ в преиспо́дняя земли́, и сокруши́л еси́ вереи́ ве́чныя, содержа́щыя свя́занныя, Христе́, и тридне́вен, я́ко от ки́та Ио́на, воскре́сл еси́ от гро́ба.
Сохрани́в це́ла зна́мения, Христе́, воскре́сл еси́ от гро́ба, ключи́ Де́вы не вреди́вый в рождестве́ Твое́м, и отве́рзл еси́ на́м ра́йския две́ри.
Спа́се мо́й, живо́е же и неже́ртвенное заколе́ние, я́ко Бо́г са́м себе́ во́лею приве́д отцу́, совоскреси́л еси́ всеро́днаго Ада́ма, воскре́с от гро́ба.
[Феофа́н] Возведе́ся дре́вле держи́мое сме́ртию и тле́нием, воплоти́вшимся от Твоего́ пречи́стаго чре́ва, к нетле́нней и присносу́щней жи́зни, Богоро́дице Де́во.
Вни́де в преиспо́дняя земли́, в ложесна́ Твоя́, Чи́стая, сше́дый, и всели́выйся и воплоти́выйся па́че ума́, и воздви́же с собо́ю Ада́ма, воскре́с от гро́ба.
Ектениа́ И возгла́с:
Ты́ бо еси́ Ца́рь ми́ра, и Спа́с ду́ш на́ших, и Тебе́ сла́ву возсыла́ем, Отцу́ и Сы́ну, и Свято́му Ду́ху, ны́не и при́сно, и во ве́ки веко́в.
Та́же конда́к, гла́с 8:
А́ще и во гро́б снизше́л еси́, Безсме́ртне, но а́дову разруши́л еси́ си́лу, и воскре́сл еси́ я́ко победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом ми́р да́руяй, па́дшым подая́й воскресе́ние.
И́кос: Е́же пре́жде со́лнца со́лнце заше́дшее иногда́ во гро́б, предвари́ша ко у́тру, и́щущыя я́ко дне́ мироно́сицы де́вы, и друга́ ко друзе́й вопия́ху: о други́ни! прииди́те, воня́ми пома́жем те́ло живоно́сное, и погребе́нное, пло́ть воскреси́вшаго па́дшаго Ада́ма, лежа́щую во гро́бе: и́дем, потщи́мся я́коже волсви́, и поклони́мся, и принесе́м ми́ра я́ко да́ры, не в пелена́х, но в плащани́це обви́тому, и пла́чим, и возопии́м: о Влады́ко! воста́ни, па́дшым подая́й воскресе́ние.
И полага́ется чте́ние.
Та́же глаго́лем: Воскре́сние Христо́во ви́девше: три́жды. И Воскре́с Иису́с от гро́ба, я́коже прорече́, даде́ на́м живо́т ве́чный, и ве́лию ми́лость. [три́жды.]
Пе́снь 7.
Ирмо́с: О́троки от пе́щи изба́вивый, бы́в челове́к, стра́ждет я́ко сме́ртен, и стра́стию сме́ртное в нетле́ния облачи́т благоле́пие, еди́н благослове́н отце́в Бо́г, и препросла́влен.
Жены́ с ми́ры Богому́дрыя в сле́д тебе́ теча́ху: его́же я́ко ме́ртва со слеза́ми иска́ху, поклони́шася ра́дующыяся живо́му Бо́гу, и па́сху та́йную твои́м, Христе́, учеником благовести́ша.
Сме́рти пра́зднуем умерщвле́ние, а́дово разруше́ние, ино́го жития́ ве́чнаго нача́ло, и игра́юще пое́м вино́внаго, еди́наго благослове́ннаго отце́в Бо́га, и препросла́вленнаго.
Я́ко вои́стинну свяще́нная, и всепра́зднственная сия́ спаси́тельная но́щь, и светоза́рная, светоно́снаго дне́, воста́ния су́щи провозве́стница, в не́йже безле́тный све́т из гро́ба пло́тски все́м возсия́.
[Феофа́н] Умертви́в Сы́н Тво́й сме́рть, Всенепоро́чная дне́сь, все́м сме́ртным пребыва́ющий живо́т во ве́ки веко́в дарова́, еди́н благослове́нный отце́в Бо́г, и препросла́вленный.
[Ио́сиф] Все́м ца́рствуяй созда́нием, бы́в челове́к, всели́ся во Твою́ Богоблагода́тная утро́бу: и распя́тие претерпе́в и сме́рть воскре́се Боголе́пно, совозста́вив на́с, я́ко всеси́лен.
Ектениа́ И возгла́с:
Бу́ди держа́ва Ца́рствия Твоего́ благослове́нна и препросла́венна, Отца́, и Сы́на, и Свята́го Ду́ха, ны́не, и при́сно, и во ве́ки веко́в.
Пе́снь 8.
Ирмо́с: Се́й нарече́нный и святы́й де́нь, еди́н суббо́т Ца́рь и Госпо́дь, пра́здников пра́здник, и торжество́ е́сть торже́ств, во́ньже благослови́м Христа́ во ве́ки.
Прииди́те но́ваго виногра́да рожде́ния, Боже́ственнаго весе́лия, в наро́читом дни́ воскресе́ния, Ца́рствия Христо́ва приобщи́мся, пою́ще его́ я́ко Бо́га во ве́ки.
Возведи́ о́крест о́чи твои́, Сио́не, и ви́ждь, се́ бо приидо́ша к тебе́, я́ко Богосве́тлая свети́ла, от за́пада, и се́вера, и мо́ря, и восто́ка ча́да твоя́, в тебе́ благословя́щыя Христа́ во ве́ки.
Тро́ичен: О́тче Вседержи́телю, и Сло́ве, и Ду́ше, треми́ соединя́емое во ипоста́сех естество́, пресу́щественне и пребоже́ственне, в Тя́ крести́хомся, и Тя́ благослови́м во вся́ ве́ки.
[Феофа́н] Прии́де Тобо́ю в ми́р Госпо́дь, Де́во Богоро́дице, и чре́во а́дово расто́рг, сме́ртным на́м воскресе́ние дарова́: те́мже благослови́м Его́ во ве́ки.
[Ио́сиф] Всю́ низложи́в сме́рти держа́ву Сы́н Тво́й Де́во, свои́м воскресе́нием, я́ко Бо́г кре́пкий совознесе́ на́с и обожи́: те́мже воспева́ем Его́ во ве́ки.
Та́же, ектениа́ и возгла́с:
Я́ко благослови́ся и́мя Твое́, и просла́вися Ца́рство Твое́, Отца́, и Сы́на, и Свята́го Ду́ха, ны́не и при́сно и во ве́ки веко́в.
Припе́вы на 9-й пе́сни: Вели́чит душа́ моя́, воскре́сшаго тридне́вно от гро́ба Христа́ жизнода́вца.
И ирмо́с: Свети́ся:
И вторы́й ли́к пое́т то́йже припе́в, и ирмо́с.
Та́же пе́рвый ли́к пое́т вторы́й припе́в:
Вели́чит душа́ моя́, во́лею страда́вша, и погребе́на, и воскре́сшаго тридне́вно от гро́ба.
И ирмо́с: Свети́ся:
И вторы́й ли́к пое́т то́йже припе́в, и ирмо́с.
Та́же пе́рвый ли́к пое́т тре́тий припе́в:
Христо́с но́вая Па́сха, же́ртва жива́я, а́гнец Бо́жий, взе́мляй грехи́ ми́ра.
И сти́х. И вторы́й ли́к пое́т то́йже припе́в, и сти́х.
Та́же пе́рвый ли́к пое́т четве́ртый припе́в.
А́нгел вопия́ше Благода́тней: Чи́стая Де́во, ра́дуйся, и па́ки реку́, ра́дуйся: Тво́й Сы́н воскре́се, тридне́вен от гро́ба, и ме́ртвыя воздви́гнувый, лю́дие весели́теся.
И сти́х. И вторы́й ли́к пое́т то́йже припе́в, и сти́х.
И про́чих о́смь припе́вов припева́ют по еди́ножды ко стихо́м:
Возбуди́л еси́ усну́в ме́ртвыя от ве́ка, ца́рски рыка́вый я́ко от Иу́ды ле́в.
Магдали́на Мари́а притече́ ко гро́бу, и Христа́ ви́девши, я́ко вертогра́даря вопроша́ше.
А́нгел облиста́яй жена́м вопия́ше: преста́ните от сле́з, я́ко Христо́с воскре́се.
Христо́с воскре́се, сме́рть попра́вый, и ме́ртвыя воздви́гнувый, лю́дие весели́теся.
Дне́сь вся́ка тва́рь весели́тся и ра́дуется: я́ко Христо́с воскре́се, и а́д плени́ся.
Дне́сь Влады́ка плени́ а́да, воздви́гнувый ю́зники я́же от ве́ка имя́ше лю́те одержи́мыя.
Вели́чит душа́ моя́ Триипоста́снаго и неразде́льнаго Божества́ держа́ву.
Ра́дуйся, Де́во, ра́дуйся, ра́дуйся благослове́нная, ра́дуйся препросла́вленная: Тво́й бо Сы́н воскре́се тридне́вен от гро́ба.
Последи́ же пе́рвый ли́к пое́т па́ки пе́рвый припе́в и ирмо́с.
Посе́м вторы́й ли́к пое́т вторы́й припе́в и ирмо́с.
Та́же о́ба ли́ка соше́дшеся вку́пе, пою́т ирмо́с и тропа́рь: Христо́с воскре́се: [три́жды.]
Пе́снь 9.
Ирмо́с: Свети́ся, свети́ся но́вый Иерусали́ме, сла́ва бо Госпо́дня на тебе́ возсия́. Лику́й ны́не, и весели́ся Сио́не: Ты́ же Чи́стая красу́йся Богоро́дице о воста́нии рождества́ Твоего́.
О Боже́ственнаго! о любе́знаго! о сладча́йшаго Твоего́ гла́са! с на́ми ко нело́жно обеща́лся еси́ бы́ти, до сконча́ния ве́ка Христе́: Его́же ве́рнии утвержде́ние наде́жди иму́ще ра́дуемся.
О Па́сха ве́лия и свяще́ннейшая Христе́! о му́дросте, и сло́ве Бо́жий, и си́ло! подава́й на́м и́стее тебе́ причаща́тися, в невече́рнем дни́ Ца́рствия твоего́.
[Феофа́н] Согла́сно Де́во, тебе́ блажи́м ве́рнии: ра́дуйся, две́ре Госпо́дня, ра́дуйся, гра́де одушевле́нный, ра́дуйся, Ея́же ра́ди на́м ны́не возсия́ све́т, из Тебе́ рожде́ннаго из ме́ртвых воскресе́ния.
[Ио́сиф] Весели́ся и ра́дуйся Боже́ственная две́ре све́та: заше́дый бо Иису́с во гро́б, возсия́, просия́в со́лнца светле́е, и ве́рныя вся́ озари́в, Богора́дованная Влады́чице.
Ектениа́ И возгла́с:
Я́ко Тя́ хва́лят вся́ си́лы небе́сныя, Отца́ и Сы́на, и Свята́го Ду́ха, и тебе́ сла́ву возсыла́ют, ны́не и при́сно и во ве́ки веко́в.
Ексапостила́рий самогла́сен:
Пло́тию усну́в я́ко ме́ртв, Царю́ и Го́споди, тридне́вен воскре́сл еси́, Ада́ма воздви́г от тли́, и упраздни́в сме́рть: Па́сха нетле́ния, ми́ра спасе́ние. [три́жды.]
На хвали́тех: Вся́кое дыха́ние: на гла́с 1.
Поста́вим стихи́ 4. И пое́м стихи́ры воскре́сны. Гла́с 1.
Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.
Пое́м Твою́, Христе́, спаси́тельную стра́сть, и сла́вим Твое́ воскресе́ние.
Сти́х: Хвали́те Его́ во гла́се тру́бнем, хвали́те Его́ в псалти́ри и гу́слех.
Кре́ст претерпе́вый, и сме́рть упраздни́вый, и воскресы́й из ме́ртвых, умири́ на́шу жи́знь Го́споди, я́ко Еди́н всеси́лен.
Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.
А́да плени́вый, и челове́ка воскреси́вый воскресе́нием Твои́м Христе́, сподо́би ны́ чи́стым се́рдцем Тебе́ пе́ти и сла́вити.
Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния.
Вся́кое дыха́ние да хва́лит Го́спода.
Боголе́пное Твое́ снизхожде́ние сла́вяще, пое́м Тя́ Христе́: роди́лся еси́ от Де́вы, и неразлуче́н бы́л еси́ от Отца́, пострада́л еси́ я́ко челове́к, и во́лею претерпе́л еси́ Кре́ст: воскре́сл еси́ от гро́ба, я́ко от черто́га произше́д, да спасе́ши ми́р, Го́споди, сла́ва Тебе́.
Та́же, совоку́пльшеся о́ба ли́ка, пою́т стихи́ры па́схи, гла́с 5.
Сти́х: Да воскре́снет Бо́г, и расточа́тся врази́ Его́.
Па́сха свяще́нная на́м дне́сь показа́ся. Па́сха но́ва свята́я, Па́сха та́инственная, Па́сха всечестна́я, Па́сха Христо́с изба́витель: Па́сха непоро́чная, Па́сха вели́кая, Па́сха ве́рных, Па́сха две́ри ра́йския на́м отверза́ющая, Па́сха все́х освяща́ющая ве́рных.
Сти́х: Я́ко исчеза́ет ды́м, да исче́знут.
Прииди́те от виде́ния жены́ благове́стницы, и Сио́ну рцы́те: приими́ от на́с ра́дости благове́щения, воскресе́ния Христо́ва: красу́йся, лику́й и ра́дуйся Иерусали́ме, Царя́ Христа́ узре́в из гро́ба, я́ко Жениха́ происходя́ща.
Сти́х: Та́ко поги́бнут гре́шницы от лица́ Бо́жия, а пра́ведницы да возвеселя́тся.
Мироно́сицы жены́, у́тру глубоку́ предста́вшя гро́бу живода́вца, обрето́ша а́нгела на ка́мени седя́ща, и то́й провеща́в и́м, си́це глаго́лаше: что́ и́щете Жива́го с ме́ртвыми? что́ пла́чете Нетле́ннаго во тли́? ше́дше пропове́дите ученико́м Его́.
Сти́х: Се́й де́нь, его́же сотвори́ Госпо́дь, возра́дуемся и возвесели́мся во́нь.
Па́сха кра́сная, Па́сха, Госпо́дня Па́сха, Па́сха всечестна́я на́м возсия́: Па́сха, ра́достию дру́г дру́га объи́мем. О Па́сха, избавле́ние ско́рби! и́бо из гро́ба дне́сь я́ко от черто́га возсия́в Христо́с, жены́ ра́дости испо́лни, глаго́ля: пропове́дите апо́столом.
Сла́ва, и ны́не, гла́с 5:
Воскре́сния де́нь, просвети́мся торжество́м, и дру́г дру́га объи́мем. Рце́м, бра́тие, и ненави́дящым на́с, прости́м вся́ воскресе́нием, и та́ко возопии́м:
Христо́с воскре́се из ме́ртвых, сме́ртию сме́рть попра́в, и су́щым во гробе́х живо́т дарова́в.
Та́же, Христо́с воскре́се, три́жды. И пое́м сие́ мно́гажды, до́ндеже целу́ют бра́тия дру́г дру́га. Целова́ние же настоя́теля с про́чими иере́и и диа́коны во свято́м олтаре́ быва́ет си́це. Глаго́лет приходя́й: Христо́с воскре́се. О́ному же отвеща́вшу: Вои́стинну воскре́се. Посе́м взе́м настоя́тель честны́й кре́ст, и ста́нет вне́ пред святы́ми Ца́рскими две́рьми. Та́кожде и вси́ свяще́нницы, ели́ко и́х е́сть, и диа́кони, взе́мше ки́йждо и́х свято́е Ева́нгелие, и честны́я ико́ны, по чи́ну своему́: и ста́нут вси́ ря́дом от десны́я страны́ настоя́теля. И прихо́дят пре́жде честне́йшии церко́вницы, и ста́рцы, еди́н по еди́ному, и ма́ло преклоня́ются пред настоя́телем: и целу́ют ки́йждо и́х честны́й кре́ст и свято́е Ева́нгелие, его́же держи́т иере́й, и про́чия о́бразы. Та́же и самого́ настоя́теля во уста́ целу́ют, глаго́люще: Христо́с воскре́се. Оному же отвеща́вшу: Вои́стинну воскре́се. По тому́же о́бразу иере́ев целу́ют, и са́ми между́ собо́ю, по чи́ну своему́: и ста́вятся от иере́ев по десно́й стране́ ря́дом. Та́же по ни́х и миря́не та́кожде целова́ние творя́т. Рабо́тницы же монасты́рстии в то́мже чи́ну да ста́нут, и дру́г дру́га целу́юще. Быва́ет же посреди́ во все́х ве́лие молча́ние. По целова́нии же чте́тся огласи́тельное сло́во Златоу́стаго от настоя́теля, или́ екклисиа́рха: не седи́м же на сицево́м чте́нии, но стоя́ще слу́шаем вси́.
И́же во святы́х отца́ на́шего Иоа́нна архиепи́скопа Константинопо́льскаго Златоу́стаго, сло́во огласи́тельное во святы́й и светоно́сный де́нь, пресла́внаго и спаси́тельнаго Христа́ Бо́га на́шего воскресе́ния.
А́ще кто́ благочести́в и Боголюби́в, да наслади́тся сего́ до́браго и све́тлаго торжества́. А́ще кто́ ра́б благоразу́мный, да вни́дет ра́дуяся в ра́дость Го́спода своего́. А́ще кто́ потруди́ся постя́ся, да восприи́мет ны́не дина́рий. А́ще кто́ от пе́рваго часа́ де́лал е́сть да прии́мет дне́сь пра́ведный до́лг. А́ще кто́ по тре́тием часе́ прии́де, благодаря́ да пра́зднует. А́ще кто́ по шесто́м часе́ дости́же, ничто́же да сумни́тся: и́бо ничи́мже оттщетева́ется. А́ще кто́ лиши́ся и девя́таго часа́, да присту́пит ничто́же сумня́ся, ничто́же боя́ся. А́ще кто́ то́чию дости́же и во единонадеся́тый ча́с, да не устраши́тся замедле́ния. Любочести́в бо сы́й Влады́ка, прие́млет после́дняго, я́коже и пе́рваго: упокоева́ет в единонадеся́тый ча́с прише́дшаго, я́коже де́лавшаго от пе́рваго часа́. И после́дняго ми́лует, и пе́рвому угожда́ет. И о́ному дае́т, и сему́ да́рствует. И де́ла прие́млет, и наме́рение целу́ет: и дея́ние почита́ет, и предложе́ние хва́лит. Те́мже у́бо вни́дите вси́ в ра́дость Го́спода своего́: и пе́рвии и втори́и мзду́ приими́те. Бога́тии и убо́зии дру́г со дру́гом лику́йте. Возде́ржницы и лени́вии де́нь почти́те. Пости́вшиися и не пости́вшиися возвесели́теся дне́сь. Трапе́за испо́лнена, наслади́теся вси́: теле́ц упита́нный, никто́же да изы́дет а́лчай: вси́ наслади́теся пи́ра ве́ры, вси́ восприими́те бога́тство бла́гости. Никто́же да рыда́ет убо́жества. Яви́ ся бо о́бщее Ца́рство: никто́же да пла́чет прегреше́ний, проще́ние бо от гро́ба возсия́. Никто́же да убои́тся сме́рти, свободи́ бо на́с Спа́сова сме́рть: угаси́ ю́, и́же от нея́ держи́мый: плени́ а́да, соше́дый во а́д: огорчи́ его́, вкуси́вша пло́ти его́. И сие́ предприе́мый Иса́иа возопи́: а́д, глаго́лет, огорчи́ся, сре́т тя́ до́ле. Огорчи́ся, и́бо упраздни́ся: огорчи́ся, и́бо пору́ган бы́сть: огорчи́ся, и́бо умертви́ся: огорчи́ся, и́бо низложи́ся: огорчи́ся, и́бо связа́ся. Прия́т те́ло, и Бо́гу прирази́ся: прия́т зе́млю, и сре́те не́бо: прия́т е́же ви́дяше, и впаде́ во е́же не ви́дяше. Где́ твое́ сме́рте жа́ло? где́ твоя́ а́де побе́да? Воскре́се Христо́с, и ты́ низве́рглся еси́. Воскре́се Христо́с, и падо́ша де́мони. Воскре́се Христо́с, и ра́дуются а́нгели. Воскре́се Христо́с, и жи́знь жи́тельствует. Воскре́се Христо́с, и ме́ртвый ни еди́н во гро́бе. Христо́с бо воста́в от ме́ртвых, нача́ток усо́пших бы́сть: Тому́ сла́ва и держа́ва, во ве́ки веко́в, ами́нь.
Та́же глаго́лется тропа́рь свята́го, гла́с 8:
У́ст твои́х я́коже све́тлость огня́ возсия́вши благода́ть, вселе́нную просвети́, не сребролю́бия ми́рови сокро́вища сниска́, высоту́ на́м смиреному́дрия показа́. Но твои́ми словесы́ наказу́я, о́тче Иоа́нне Златоу́сте, моли́ сло́ва Христа́ Бо́га, спасти́ся душа́м на́шым.
Посе́м же ектениа́: Поми́луй на́с Бо́же: И возгла́с Та́же: Испо́лним у́треннюю моли́тву на́шу Го́споди: И по возгла́се диа́кон: Прему́дрость. Мы́ же: Благослови́. Иере́й: Сы́й благослове́н Христо́с Бо́г на́ш, всегда́, ны́не и при́сно, и во ве́ки веко́в. И мы́: Ами́нь. Утверди́ Бо́же:
Посе́м настоя́тель держя́ кре́ст, вме́сто, Сла́ва Тебе́ Христе́ Бо́же: пое́т: Христо́с воскре́се из ме́ртвых, сме́ртию сме́рть попра́в.
И мы́ пое́м: И су́щым во гробе́х живо́т дарова́в.
И а́бие настоя́тель глаго́лет отпу́ст:
Христо́с воскресы́й из ме́ртвых, сме́ртию сме́рть попра́вый, и су́щым во гробе́х живо́т дарова́вый, и́стинный Бо́г на́ш, моли́твами Пречи́стыя Своея́ Ма́тере, и все́х святы́х, поми́лует и спасе́т на́с, я́ко бла́г и человеколю́бец.
Та́же кре́ст возвыша́я, глаго́лет: Христо́с воскре́се [Три́жды.]
Мы́ же отвеща́ем: Вои́стинну воскре́се. [Три́жды.]
Та́же пое́м коне́чное: Христо́с воскре́се: три́жды, ве́сь тропа́рь.
И по не́м пе́нием кончи́м: И на́м дарова́ живо́т ве́чный, покланя́емся его́ тридне́вному воскресе́нию.
Посе́м многоле́тны, и целу́ем честны́й кре́ст, держи́мый в руку́ настоя́теля.
И ча́с 1-й глаго́лем: Христо́с воскре́се из ме́ртвых: три́жды, ве́сь тропа́рь.
Та́же глаго́лем три́жды:
Воскре́сние Христо́во ви́девше, поклони́мся свято́му Го́споду Иису́су, еди́ному безгре́шному. Кресту́ Твоему́ покланя́емся Христе́, и свято́е воскресе́ние Твое́ пое́м и сла́вим: Ты́ бо еси́ Бо́г на́ш, ра́зве Тебе́ ино́го не зна́ем, и́мя Твое́ имену́ем. Прииди́те вси́ ве́рнии, поклони́мся свято́му Христо́ву воскресе́нию: се́ бо прии́де Кресто́м ра́дость всему́ ми́ру. Всегда́ благословя́ще Го́спода, пое́м воскресе́ние Его́: распя́тие бо претерпе́в сме́ртию сме́рть разруши́.
Та́же ипакои́, еди́ножды:
Предвари́вшыя у́тро я́же о Мари́и, и обре́тшыя ка́мень отвале́н от гро́ба, слы́шаху от а́нгела: во све́те присносу́щнем су́щаго, с ме́ртвыми что́ и́щете я́ко челове́ка? Ви́дите гро́бныя пелены́, тецы́те и ми́ру пропове́дите: я́ко воста́ Госпо́дь, умертви́вый сме́рть, я́ко е́сть Сы́н Бо́га, спаса́ющаго ро́д челове́ческий.
Та́же конда́к, еди́ножды:
А́ще и во гро́б снизше́л еси́ Безсме́ртне, но а́дову разруши́л еси́ си́лу, и воскре́сл еси́ я́ко победи́тель Христе́ Бо́же, жена́м мироно́сицам веща́вый: ра́дуйтеся, и Твои́м апо́столом ми́р да́руяй, па́дшым подая́й воскресе́ние.
Та́же и се́й тропа́рь, еди́ножды:
Во гро́бе пло́тски, во а́де же с душе́ю я́ко Бо́г, в раи́ же с разбо́йником, и на Престо́ле бы́л еси́ Христе́, со Отце́м и Ду́хом, вся́ исполня́яй Неопи́санный.
Сла́ва: Я́ко живоно́сец, я́ко рая́ красне́йший, вои́стинну и черто́га вся́каго Ца́рскаго, показа́ся светле́йший, Христе́, гро́б Тво́й, исто́чник на́шего воскресе́ния.
И ны́не, Богоро́дичен: Вы́шняго освяще́нное Боже́ственное селе́ние, ра́дуйся: Тобо́ю бо даде́ся ра́дость, Богоро́дице зову́щым: благослове́нна Ты́ в жена́х еси́ Всенепоро́чная Влады́чице.
Та́же: Го́споди поми́луй 40. Сла́ва, и ны́не: Честне́йшую херуви́м: И́менем Госпо́дним благослови́ о́тче. Иере́й, сти́х: Моли́твами святы́х оте́ц на́ших: Мы́ же рече́м: Ами́нь. И па́ки глаго́лем подо́бне: Христо́с воскре́се: три́жды Сла́ва, и ны́не: Го́споди поми́луй, три́жды. Благослови́. И отпу́ст пе́рваго часа́.
Си́м же о́бразом пое́тся за 3, за 6, и за 9 ча́с, и за повече́рие еди́ножды, та́кожде и за полу́нощницу, да́же и до Фомины́ неде́ли.
Ча́с же 3, 6 и 9 пое́м вку́пе в притво́ре, и по е́же рещи́ по Честне́йшую: Моли́твами святы́х оте́ц: И Ами́нь. В конце́ часа́ глаго́лем: Христо́с воскре́се: три́жды. И про́чее часа́ за 6 ча́с, та́же и тре́тие за 9 ча́с. А́ще ли не бу́дет когда́ по ну́жде литурги́и, то́ждеже. За Благослови́ душе́ моя́ Го́спода: Христо́с воскре́се: три́жды Воскресе́ние Христо́во ви́девше: еди́ножды. Посе́м: Предвари́вшыя у́тро: Сла́ва, конда́к: А́ще и во гро́б: И ны́не: Единоро́дный Сы́не: Посе́м блаже́нна, от кано́на пе́снь 3 и 6-я. Иере́й: Прему́дрость.
Чте́ц, [Надписа́ние Апо́стола]. Дея́ние, зача́ло 1:
Пе́рвое у́бо сло́во сотвори́х о все́х, о Фео́филе, я́же нача́т Иису́с твори́ти же и учи́ти, да́же до дне́, во́ньже запове́дав апо́столом Ду́хом Святы́м, и́хже избра́, вознесе́ся. Пред ни́миже и поста́ви Себе́ жи́ва по страда́нии Свое́м, во мно́зех [и́стинных] зна́мениих, де́ньми четы́редесятьми явля́яся и́м, и глаго́ля я́же о Ца́рствии Бо́жии. В ни́миже и яды́й, повеле́ и́м от Иерусали́ма не отлуча́тися, но жда́ти обетова́ния О́тча, е́же слы́шасте от Мене́: я́ко Иоа́нн у́бо крести́л е́сть водо́ю, вы́ же и́мате крести́тися Ду́хом Святы́м, не по мно́зех си́х дне́х. Они́ же у́бо соше́дшеся, вопроша́ху Его́, глаго́люще: Го́споди, а́ще в ле́то сие́ устроя́еши Ца́рствие Изра́илево? Рече́ же к ни́м: не́сть ва́ше разуме́ти времена́ и ле́та, я́же Оте́ц положи́ во свое́й вла́сти. Но прии́мите си́лу наше́дшу Свято́му Ду́ху на вы́: и бу́дете ми́ свиде́тели во Иерусали́ме же и во все́й Иуде́и и Самари́и, и да́же до после́дних земли́.
Ева́нгелие на литурги́и, от Иоа́нна, зача́ло 1.
В нача́ле бе́ Сло́во, и Сло́во бе́ к Бо́гу, и Бо́г бе́ Сло́во. Се́й бе́ искони́ к Бо́гу. Вся́ Те́м бы́ша, и без Него́ ничто́же бы́сть, е́же бы́сть. В То́м живо́т бе́, и живо́т бе́ све́т челове́ком: И све́т во тьме́ све́тится, и тьма́ его́ не объя́т. Бы́сть челове́к по́слан от Бо́га, и́мя ему́ Иоа́нн. Се́й прии́де во свиде́тельство, да свиде́тельствует о Све́те, да вси́ ве́ру и́мут ему́. Не бе́ то́й Све́т, но да свиде́тельствует о Све́те. Бе́ Све́т и́стинный, и́же просвеща́ет вся́каго челове́ка гряду́щаго в ми́р. В ми́ре бе́, и ми́р Те́м бы́сть, и ми́р Его́ не позна́. Во своя́ прии́де, и свои́ Его́ не прия́ша. Ели́цы же прия́ша Его́, даде́ и́м о́бласть ча́дом Бо́жиим бы́ти, ве́рующым во и́мя Его́. И́же не от кро́ве, ни от по́хоти плотски́я, ни от по́хоти му́жеския, но от Бо́га роди́шася. И Сло́во пло́ть бы́сть и всели́ся в ны́, и ви́дехом сла́ву Его́, сла́ву я́ко Единоро́днаго от Отца́, испо́лнь благода́ти и и́стины. Иоа́нн свиде́тельствует о не́м, и воззва́ глаго́ля: Се́й бе́, его́же ре́х, и́же по мне́ гряды́й, предо мно́ю бы́сть, я́ко пе́рвее мене́ бе́. И от исполне́ния Его́ мы́ вси́ прия́хом, и благода́ть воз благода́ть. Я́ко зако́н Моисе́ом да́н бы́сть: благода́ть же и и́стина Иису́с Христо́м бы́сть.
Та́же, Помяни́ на́с Го́споди: Та́же, Ли́к небе́сный: И посе́м: Ве́рую во Еди́наго Бо́га: Осла́би, оста́ви: И по О́тче на́ш: Конда́к, А́ще и во гро́б: Сла́ва, и ны́не, Богоро́дичен: Вы́шняго освяще́нное: Го́споди поми́луй, 40. Та́же, Еди́н свя́т, еди́н Госпо́дь Иису́с Христо́с, в сла́ву Бо́га Отца́, ами́нь. И посе́м вме́сто: Бу́ди и́мя Госпо́дне: Христо́с воскре́се: три́жды. Та́же псало́м 33: Благословлю́ Го́спода на вся́кое вре́мя: Коне́ц: Не лиша́тся вся́каго бла́га.
И посе́м отпу́ст.
В неде́лю свята́го апо́стола Фомы́, тропа́рь, гла́с 7:
Запеча́тану гро́бу, Живо́т от гро́ба возсия́л еси́ Христе́ Бо́же, и две́рем заключе́нным ученико́м предста́л еси́, все́х воскресе́ние, ду́х пра́вый те́ми обновля́я на́м, по вели́цей Твое́й ми́лости.
Конда́к, гла́с 8:
Любопы́тною десни́цею, жизнопода́тельная Твоя́ ре́бра Фома́ испыта́, Христе́ Бо́же: созаключе́нным во две́рем я́ко вше́л еси́, с про́чими апо́столы вопия́ше Тебе́: Го́споди еси́ и Бо́г мо́й.
В неде́лю мироно́сиц,
тропа́рь, гла́с 2:
Егда́ снизше́л еси́ к сме́рти, Животе́ безсме́ртный, тогда́ а́д умертви́л еси́ блиста́нием Божества́. Егда́ же и уме́ршыя от преиспо́дних воскреси́л еси́, вся́ си́лы небе́сныя взыва́ху: Жизнода́вче Христе́ Бо́же на́ш, сла́ва Тебе́.
Сла́ва, Благообра́зный Ио́сиф, с дре́ва сне́м пречи́стое Те́ло Твое́, плащани́цею чи́стою обви́в, и благоуха́ньми во гро́бе но́ве закры́в, положи́: но тридне́вен воскре́сл еси́ Го́споди, подая́й ми́рови ве́лию ми́лость.
И ны́не: Мироно́сицам жена́м при гро́бе предста́в а́нгел вопия́ше: ми́ра ме́ртвым су́ть прили́чна, Христо́с же истле́ния яви́ся чу́ждь. Но возопи́йте: воскре́се Госпо́дь, подая́й ми́рови ве́лию ми́лость.
Конда́к, гла́с 2: Ра́доватися мироно́сицам повеле́л еси́, пла́чь прама́тере Е́вы утоли́л еси́, воскресе́нием Твои́м, Христе́ Бо́же: апо́столом же Твои́м пропове́дати повеле́л еси́: Спа́с воскре́се от гро́ба.
В неде́лю разсла́бленнаго,
тропа́рь воскре́сный, гла́с 3: Да веселя́тся небе́сная:
Конда́к, гла́с 3. Подо́бен: Де́ва дне́сь:
Ду́шу мою́ Го́споди, во гресе́х вся́ческих, и безме́стными дея́ньми лю́те разсла́блену, воздви́гни Боже́ственным Твои́м предста́тельством, я́коже и разсла́бленнаго воздви́гл еси́ дре́вле, да зову́ Ти спаса́емь: Ще́дрый, сла́ва Христе́, держа́ве Твое́й.
В сре́ду преполове́ния пятдеся́тницы,
тропа́рь, гла́с 8:
Преполови́вшуся пра́зднику, жа́ждущую ду́шу мою́ благоче́стия напо́й вода́ми, я́ко все́м Спа́се возопи́л еси́: жа́ждай да гряде́т ко Мне́, и да пие́т. Исто́чниче жи́зни на́шея, Христе́ Бо́же, сла́ва Тебе́.
Конда́к, гла́с 4.
Подо́бен: Вознесы́йся на Кре́ст:
Пра́зднику зако́нному преполовля́ющуся, все́х Тво́рче и Влады́ко, к предстоя́щым глаго́лал еси́ Христе́ Бо́же: прииди́те и почерпи́те во́ду безсме́ртия. Те́мже Тебе́ припа́даем, и ве́рно вопие́м: щедро́ты Твоя́ да́руй на́м, Ты́ бо еси́ исто́чник жи́зни на́шея.
Глаго́лем се́й тропа́рь и конда́к о́смь дне́й.
В неде́лю самаряны́ни,
тропа́рь воскре́сен, гла́с 4: Све́тлую воскресе́ния:
Конда́к, гла́с 8.
Подо́бен: Ве́ру Христо́ву:
Ве́рою прише́дши на исто́чник самаряны́ня, ви́де прему́дрости во́ду Тя́: Ея́же напи́вшися оби́льно, Ца́рствие вы́шнее насле́дова ве́чно присносла́вная.
В неде́лю слепа́го,
тропа́рь воскре́сен, гла́с 5: Собезнача́льное Сло́во:
Конда́к, гла́с 4.
Подо́бен: Яви́лся еси́ дне́сь:
Душе́вныма очи́ма ослепле́н, к Тебе́ Христе́ прихожду́, я́коже слепы́й от рожде́ния, покая́нием зову́ Ти: Ты́ су́щих во тьме́ све́т пресве́тлый.
В четверто́к вознесе́ния Го́спода на́шего Иису́са Христа́,
тропа́рь, гла́с 4:
Возне́слся еси́ во сла́ве Христе́ Бо́же на́ш, ра́дость сотвори́вый ученико́м обетова́нием Свята́го Ду́ха, извеще́нным и́м бы́вшым благослове́нием, я́ко Ты́ еси́ Сы́н Бо́жий изба́витель ми́ра.
Конда́к, гла́с 6:
Е́же о на́с испо́лнив смотре́ние, и я́же на земли́ соедини́в небе́сным, возне́слся еси́ во сла́ве Христе́ Бо́же, ника́коже отлуча́яся, но пребыва́я неотсту́пный, и вопия́ лю́бящим тя́: А́з е́смь с ва́ми, и никто́же на вы́.
В неде́лю святы́х 318 Богоно́сных оте́ц в Нике́и,
тропа́рь, гла́с 8:
Препросла́влен еси́ Христе́ Бо́же на́ш, свети́ла на земли́ отцы́ на́ши основа́вый, и те́ми ко и́стинней ве́ре вся́ ны́ наста́вивый, Многоблагоутро́бне, сла́ва Тебе́.
Конда́к, гла́с 8:
Апо́стол пропове́дание, и оте́ц догма́ты, це́ркви еди́ну ве́ру запечатле́ша: я́же и ри́зу нося́щи и́стины, истка́ну от е́же свы́ше богосло́вия, исправля́ет и сла́вит благоче́стия вели́кое та́инство.
В суббо́ту пред пятдеся́тницею,
[па́мять соверша́ем от ве́ка усо́пших отце́в, и бра́тий на́ших,]
тропа́рь, гла́с 8:
Глубино́ю му́дрости человеколю́бно вся́ стро́яй, и поле́зное все́м подава́яй, еди́не соде́телю, упоко́й Го́споди ду́шы ра́б Твои́х: на Тя́ бо упова́ние возложи́ша, Творца́ и Зижди́теля и Бо́га на́шего.
Конда́к, гла́с 8:
Со святы́ми упоко́й Христе́, ду́шы ра́б Твои́х, иде́же не́сть боле́знь, ни печа́ль, ни воздыха́ние, но жи́знь безконе́чная.
В неде́лю святы́я пятдеся́тницы,
тропа́рь, гла́с 8:
Благослове́н еси́ Христе́ Бо́же на́ш, и́же прему́дры ловцы́ явле́й, низпосла́в и́м Ду́ха Свята́го, и те́ми уловле́й вселе́нную, Человеколю́бче сла́ва тебе́.
Конда́к, гла́с 8:
Егда́ снизше́д язы́ки слия́, разделя́ше язы́ки вы́шний: егда́ же о́гненныя язы́ки раздая́ше, в соедине́ние вся́ призва́: и согла́сно сла́вим Всесвята́го Ду́ха.
В неде́лю все́х святы́х,
тропа́рь воскре́сен.
И святы́х, гла́с 4:
И́же во все́м ми́ре му́ченик Твои́х, я́ко багряни́цею и ви́ссом, кровьми́ це́рковь Твоя́ украси́вшися, те́ми вопие́т Ти́, Христе́ Бо́же: лю́дем Твои́м щедро́ты Твоя́ низпосли́, ми́р жи́тельству Твоему́ да́руй, и душа́м на́шым ве́лию ми́лость.
Конда́к, гла́с 8:
Я́ко нача́тки естества́, насади́телю тва́ри, вселе́нная прино́сит Ти́ Го́споди, Богоно́сныя му́ченики: те́х моли́твами в ми́ре глубо́це це́рковь Твою́, жи́тельство Твое́ Богоро́дицею соблюди́, Многоми́лостиве.
Ве́домо же бу́ди, я́ко по неде́ли все́х святы́х с понеде́льника непреме́нно начина́ется по́ст святы́х апо́стол, и быва́ет иу́ниа до 29 дне́, до па́мяти святы́х апо́стол Петра́ и Па́вла.