[Глава 21] Слу́жба о́бща му́ченицам, двема́ и мно́гим
Ве́чера,
на Го́споди воззва́х, стихи́ры, гла́с 4.
Подо́бен: Да́л еси́ зна́мение:
Де́вы отрокови́цы, ꙳ есте́ственным зако́ном связу́емы, ꙳ и изве́стно укрепля́емы любо́вию Зижди́телевою ꙳ сою́з теле́сных разреши́шася ве́рою, ꙳ и немощна́го врага́, ꙳ му́жески нога́ма свои́ма сокруши́ша, ꙳ и побе́дною по́честию светоза́рно украси́шася, и в неве́стнице все́льшеся мы́сленнем ра́дуются.
О́гнь претерпе́ша, ꙳ и многообра́зныя му́ки и сме́рти, всечестни́и, ꙳ Женихо́ву добро́ту прекра́сную ꙳ ве́рою иму́ще, ꙳ и разли́чными ра́нами украси́вшеся, ꙳ сему́ причто́шася ꙳ те́мже венча́ и́х мно́гими дарова́ньми, ꙳ Иису́с человеколю́бец, ꙳ и Спа́с ду́ш на́ших.
Де́вство нетле́нное, ꙳ де́вство преди́вное, ꙳ Христу́ принесо́сте до́брыя де́вы, ꙳ низложи́вше шата́ния ꙳ пре́лести безбо́жия ꙳ си́лою кре́стною, му́жеским умо́м, ꙳ сего́ ра́ди вся́ Христо́вы це́ркви пра́зднуют ꙳ святу́ю ва́шу па́мять, ꙳ светоно́сную и пресла́вную.
Сла́ва, и ны́не, Богоро́дичен:
Я́ко моли́тву неусыпа́ющую, и мольбу́ пребыва́ющую иму́щи Пречи́стая ко Го́споду, напа́сти успи́, и по́лны укроти́ окая́нныя моея́ души́, и в ско́рби су́щее се́рдце мое́ уте́ши Отрокови́це, молю́ Тя: и у́м мо́й облагодати́, я́ко да досто́йно просла́влю Тя́.
Крестобогоро́дичен: А́гнца и Па́стыря Тя́ на дре́ве я́ко ви́де А́гница ро́ждшая рыда́ше, и ма́терски тебе́ веща́ше: Сы́не вожделе́ннейше, ка́ко на дре́ве Кре́стнем пове́шен еси́ Долготерпели́ве? ка́ко ру́це Твои́ и но́зе Твои́, Сло́ве, пригвозди́шася от беззако́нных, и кро́вь Твою́ излия́л еси́, Влады́ко?
А́ще и́мать самогла́сен. Сла́ва, гла́с 8:
Вся́к язы́к да подви́жется ко благохвале́нию прехва́льных му́чениц, вся́к ро́д и во́зраст, вси́ ю́ношы и де́вы, Христо́вы великому́ченицы хвала́ми венча́им: зако́нно бо хра́брствовавше, и сла́бость же́нскую отве́ргше, мучи́теля врага́ низложи́ша, страстоте́рпческих ра́ди трудо́в, небе́сными Боже́ственными венцы́ украси́вшеся, про́сят у Жениха́ своего́ и Бо́га дарова́ти на́м ве́лию ми́лость.
И ны́не, Богоро́дичен:
Влады́чице, приими́ моли́тву ра́б Твои́х, и изба́ви на́с от вся́кия ну́жды и печа́ли.
Крестобогоро́дичен: Пречи́стая я́ко узре́ Тя́ ꙳ пло́тию ви́сяща на дре́ве, ꙳ се́рдцем растерза́шеся, ꙳ и вопия́ше слезя́щи: ꙳ Сло́ве, ка́мо заше́л еси́, ꙳ прелюбе́зный Иису́се Сы́не Мо́й Го́споди? ꙳ не оста́ви Мене́ еди́ну ꙳ Христе́, ро́ждшую Тя́.
[зри́] А́ще пра́зднуеши с полиеле́ем, глаго́ли Богоро́дичен воскре́сный: Ца́рь Небе́сный:
Вхо́д. Проки́мен дне́.
Чте́ния 3 му́ченическая, [пи́сана в конце́ кни́ги сея́].
На стихо́вне стихи́ры, гла́с 4.
Подо́бен: Я́ко до́бля:
Серде́чнаго раче́ния, ꙳ любви́ Боже́ственней, ꙳ и страда́ния соедине́нию ва́шему блаже́ннии, ꙳ ли́цы а́нгельстии изве́стно удиви́шася: ꙳ ка́ко му́жескими сплете́нии ꙳ врага́ неви́димаго низложи́вше, ꙳ побе́дныя венцы́, ꙳ досто́йно от дла́ни живоно́сныя, я́вственно прия́сте.
Сти́х: Ди́вен Бо́г во святы́х Свои́х, Бо́г Изра́илев.
По Христе́ скончава́еми, разжже́нным мудрова́нием, ꙳ пла́мень погаси́сте су́етный, ꙳ и свещу́ душе́вную ꙳ негаси́му соблю́дше, ꙳ совнидо́сте ко Христу́ в черто́г небе́сный: ꙳ те́м вси́ благоче́стно воспева́ем страстоте́рпицы, ꙳ святу́ю ва́шу па́мять, освяща́еми благода́тию.
Сти́х: В це́рквах благослови́те Бо́га, Го́спода от исто́чник Изра́илевых.
Стра́сти претерпе́ша, ꙳ мно́гих му́к всехва́льнии, ꙳ кре́пко присту́пльше: ꙳ отсю́ду к неболе́зненному преста́вистеся восприя́тию ꙳ незаходи́маго сия́ния, и све́тлей ра́дости, ꙳ и ве́чному Боже́ственному наслажде́нию, ꙳ те́м ва́с ублажа́ем, ꙳ и свято́е ва́ше дне́сь соверша́ем торжество́, ꙳ страстоте́рпицы Богопости́жнии.
Сла́ва, гла́с 4:
Жития́ до́лу влеку́щаго, и пи́щи наслажде́ние, и цвету́щую сла́ву, прехва́льнии оста́вльше я́ко вре́менну, Христу́ же прилепи́стеся муче́нием, добро́тою его́ кра́сною распала́еми, и приступи́сте я́ко благоуха́ннии ши́пцы, и венце́м нетле́ннаго Ца́рства венча́стеся, Богоимени́тии.
И ны́не, Богоро́дичен:
Свеще́ неугаси́мая, Престо́ле пра́ведный, пречи́стая Влады́чице, моли́ спасти́ся душа́м на́шым.
Крестобогоро́дичен: Распина́ема ви́дящи, ꙳ и в ре́бра пробода́ема копие́м, Пречи́стая ꙳ Христа́ человеколю́бца, ꙳ пла́чущи вопия́ше: ꙳ что́ сие́ Сы́не Мо́й? ꙳ что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м? ꙳ и тщи́шися безча́дствовати Мя́ Вселюбе́знейше? ꙳ дивлю́ся Благоутро́бне, Твоему́ во́льному распя́тию.
Тропа́рь во уста́ве.
А́ще ли не́сть уста́ва, глаго́ли се́й тропа́рь, гла́с 1:
А́гницы слове́сныя А́гнцу и Па́стырю приведо́стеся муче́нием ко Христу́ тече́ние сконча́вше, и ве́ру соблю́дше: те́мже дне́сь ра́достною душе́ю соверша́ем досточу́днии святу́ю ва́шу па́мять, Христа́ велича́юще.
Сла́ва, и ны́не, Богоро́дичен, или́ Крестобогоро́дичен.
На у́трени,
на Бо́г Госпо́дь, тропа́рь то́йже.
По 1-й кафи́сме седа́лен, гла́с 3.
Подо́бен: Гро́б Тво́й:
Огне́м распала́еми Боже́ственнаго жела́ния, огня́ чу́вственнаго прикоснове́нием отню́д не опали́стеся блаже́ннии: пре́лесть же пожго́сте, и влеко́ми неми́лостивно страстоте́рпицы приснопа́мятнии, прия́сте коне́ц, и сла́ву получи́сте. [Два́жды.]
Сла́ва, и ны́не, Богоро́дичен:
Наста́ви ны́ на пу́ть покая́ния уклоня́ющыяся при́сно к злы́м безпу́тием, и преблага́го прогне́вающыя Го́спода, Неискусобра́чная, Благослове́нная Мари́е, прибе́жище отча́янных челове́ков, Бо́жие обита́лище.
По 2-м стихосло́вии седа́лен, гла́с 4.
Подо́бен: Удиви́ся Ио́сиф:
Удиви́шася ва́шему терпе́нию мно́гому, небе́снии ли́цы безпло́тных си́л: я́коже бо ино́му стра́ждущу пребыва́сте, го́лени и соста́вы сокруша́емы, сме́рть го́рькую терпя́ще, и же́нским те́лом зми́я отсту́пника сокруша́юще, де́вы неве́сты жизнода́вца, ве́ры побо́рницы. [Два́жды.]
Сла́ва, и ны́не, Богоро́дичен:
Удиви́ся Ио́сиф, е́же па́че естества́ зря́, и внима́ше мы́слию и́же на руно́ до́ждь, в безсе́менном зача́тии Твое́м, Богоро́дице: купину́ огне́м неопали́мую, же́зл Ааро́нов прозя́бший, и свиде́тельствуя обру́чник тво́й и храни́тель, свяще́нником взыва́ше: Де́ва ражда́ет, и по рождестве́ па́ки Де́вою пребыва́ет.
По Хвали́те и́мя Госпо́дне:
Припе́в:
Велича́ем ва́с страстоте́рпицы святы́я, и чте́м честна́я страда́ния ва́ша, я́же за Христа́ претерпе́ли есте́.
Псало́м избра́нный: Бо́г на́м прибе́жище и си́ла:
По полиеле́и, седа́лен, гла́с 8:
Подо́бен: Прему́дрости:
Уневе́стившеся Го́сподеви Боголе́пно я́коже да́р кро́вь и заколе́ние тому́ принесо́сте, страстоно́сицы отрокови́цы, и черто́г Боже́ственный досто́йно улучи́сте, просвеще́ния неизрече́ннаго непреста́нно исполня́еми. Те́мже святу́ю и честну́ю ва́шу па́мять творя́ще духо́вно, Спа́са прославля́ем, и ве́рно взыва́ем: моли́те Христа́ Бо́га, грехо́в оставле́ние пода́ти, чту́щым любо́вию святу́ю па́мять ва́шу. [Два́жды.]
Сла́ва, и ны́не, Богоро́дичен:
Безпло́тных Твои́х, Христе́, и Предте́чи твоего́, апо́стол, и проро́к, и му́ченик, и все́х святы́х, и Богоро́дицы моли́твами неискусому́жныя и благи́я Ма́тере Твоея́, умоле́н бы́в, да́ждь на́м во све́те Твое́м ходи́ти, и сподо́би на́с улучи́ти Ца́рствие Твое́, за милосе́рдие ми́лости Твоея́.
Степе́нна, 1-й антифо́н 4-го гла́са.
Проки́мен: Ди́вен Бо́г во святы́х Свои́х, Бо́г Изра́илев.
Сти́х: В це́рквах благослови́те Бо́га, Го́спода от исто́чник Изра́илевых.
Вся́кое дыха́ние:
Ева́нгелие му́ченицам, [пи́сано в конце́ кни́ги сея́].
По 50-м псалме́ стихи́ра, гла́с 4:
Жития́ до́лу влеку́щаго: [Пи́сана на стихо́вне. Сла́ва.]
Кано́н, гла́с 4.
Пе́снь 1.
Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.
Кре́пко на проти́внаго подвиза́стеся му́ченицы, поще́нием пе́рвее, та́же второ́е кро́вными страда́нии: сего́ ра́ди ва́шу па́мять ве́рою почита́ем.
Уязви́вшеся жела́нием претерпе́вшаго на́с ра́ди Кре́ст и сме́рть, Сего́ стопа́м после́доваша преподо́бныя му́ченицы, плотску́ю не́мощь забы́вше.
Е́ллинская же́ртвища, и бесо́вская ополче́ния, ору́жием страда́ния низверго́сте, и принесо́стеся в це́рковь небе́сную, всесожже́ния одушевле́нная, му́ченицы пречестны́я.
Богоро́дичен: Укрепи́вшеся благода́тию Возсия́вшаго Пренепоро́чная, из ложе́сн Твои́х, Де́вы отрокови́цы прирази́шася к боле́знем муче́ния, и приведо́шася во сле́д Тебе́ ра́дующеся.
Пе́снь 3.
Ирмо́с: Лу́к си́льных изнемо́же, и немощству́ющии препоя́сашася си́лою: сего́ ра́ди утверди́ся в Го́споде се́рдце мое́.
Си́лою кре́пкою от Бо́га укрепля́еми, проти́внаго борца́ попра́ша си́лу: и сего́ ра́ди я́ко победоно́сицы непобеди́мии просла́вишася.
Яви́шася звери́на зия́ния безде́льна, Боже́ственною си́лою Христо́вою: и изба́влены бы́сте Богому́дрии неврежде́ны, Бо́га прославля́юще.
Му́дростию и благода́тию просве́щься у́м ва́ш, мучи́телей преще́ния не устраши́стеся страстоте́рпицы Спа́совы, Бо́жиею си́лою укрепля́еми.
Богоро́дичен: Разуме́вше благове́рно, пропове́даем Тебе́ и́стинную Бо́жию Ма́терь всенепоро́чную: Тобо́ю бо с на́ми Зижди́тель совокупи́тися изво́ли.
Седа́лен, гла́с 1.
Чуде́с ва́с исто́чники стяжа́вше, почерпа́ем здра́вие оби́льно, му́ченицы прехва́льнии, пою́ще боле́зни ва́шя, и ре́вность Боже́ственную, и я́звы до́блественныя и по́двиги: и соверша́ем ва́шу досточу́дную па́мять в сла́ву Бо́га на́шего.
Сла́ва, и ны́не, Богоро́дичен:
Моли́твы Твои́х ра́б приими́, Богоро́дице, и изба́ви на́с от вся́кия беды́: я́ко родила́ еси́ Христа́ Спа́са, изба́вителя ду́ш на́ших.
Крестобогоро́дичен: Твое́ предста́тельство иму́ще, Пречи́стая, и Твои́ми моли́твами лю́тых избавля́еми, Кресто́м Сы́на Твоего́ везде́ соблюда́еми, по до́лгу Тя́ вси́ благоче́стно велича́ем.
Пе́снь 4.
Ирмо́с: Седя́й в сла́ве, на Престо́ле Божества́, во о́блаце ле́гце, прии́де Иису́с Пребоже́ственный, нетле́нною дла́нию, и спасе́ зову́щыя: Сла́ва, Христе́, си́ле Твое́й.
Претерпе́вше муче́ния, и ра́ны теле́сныя, разли́чными о́бразы, сокруше́ние же удо́в, и опале́ния, небе́сная селе́ния насле́довасте, насла́ждшеся дре́ва живо́тнаго досточу́днии.
Му́чениц блаже́нных по́двигу удиви́шася небе́сныя си́лы, ка́ко врага́ победи́ша в же́нстем естестве́, укрепля́еми си́лою от Де́вы возсия́вшаго.
Отве́ргше мирску́ю всю́ суету́, Бо́гу еди́ному все́ю душе́ю прилепи́стеся. Те́мже по́стническия труды́, и муче́ния претерпе́сте, неве́сты Христо́вы терпели́выя.
Богоро́дичен: Вни́де во чре́во Твое́, Пренепоро́чная, Госпо́дь, я́ко до́ждь на руно́, я́коже рече́ проро́к дре́вле: Его́же во двою́ существу́ родила́ еси́. Ему́же зове́м: Сла́ва, Христе́, си́ле Твое́й.
Пе́снь 5.
Ирмо́с: Нечести́вии не у́зрят сла́вы Твоея́, Христе́, но мы́ тя́ Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя́ Человеколю́бче.
Я́ко а́гницы непоро́чныя, и я́ко же́ртвы прия́тныя, Христу́ и́стинному па́стырю принесо́стеся, приноше́ния соверше́на, и прия́тна всесожже́ния.
Умертви́вшеся те́лом, ожи́сте душе́ю, умертви́вшему кре́пость сме́ртную му́ченицы подо́бящеся, кре́ст, и сме́рть, и стра́сть во́льную претерпе́вшему.
Еди́н иму́ще ра́зум в телесе́х мно́зех, разли́чными ра́нами стру́жеми, и огне́м сожига́еми, еди́наго все́х Го́спода Иису́са испове́даху Богому́дрии.
Богоро́дичен: Воздви́гни мя́ па́дшаго в ро́ве страсте́й, и упра́ви мя́ я́же Бо́га и прави́теля ро́ждшая, еди́на Всенепоро́чная, совокупи́вшаго благода́тию разстоя́щыяся пе́рвее.
Пе́снь 6.
Ирмо́с: Пожру́ Ти со гла́сом хвале́ния Го́споди, це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Раздраже́на и нога́ми же́нскими зми́я попира́ема, зря́щи прама́ти Боже́ственно ра́дуется, ту́ю ле́стию из рая́ изгна́вшаго пе́рвее.
Поще́ние к страда́нию зако́нному сочта́вше, Жениху́ душе́вному ны́не нетле́нно приложи́стеся: и в черто́зе небе́снем весе́лою душе́ю водворя́етеся.
Возвыша́емыя мучи́тельныя во́лны му́ченическия корабли́ погрузи́ти не возмого́ша: кре́пкою бо руко́ю к Боже́ственному приста́нищу достиго́ша.
Богоро́дичен: Глаго́л Твои́х сбытия́ зря́ще, велича́ем Тя́ вя́щше Богома́ти, и Тебе́ возвели́чившаго: ро́дове бо вси́ Тебе́ вои́стинну ны́не ублажа́ют.
Конда́к во уста́ве.
А́ще не́сть уста́ва, глаго́ли се́й конда́к, гла́с 4:
Подо́бен: Яви́лся еси́:
Страстоте́рпиц Христо́вых па́мять пра́зднуим, и ве́рою прося́ще по́мощи, изба́витися все́м от вся́кия ско́рби, зову́ще: Бо́г на́ш с на́ми, и́же си́х просла́вивый, я́коже изво́ли.
И́кос: Чуде́с ва́с исто́чники стяжа́вше, почерпа́ем здра́вие оби́льно му́ченицы Христо́вы, почита́юще боле́зни ва́шя, и ре́вность Боже́ственную, и я́звы до́блественныя и по́двиги, и соверша́ем ва́шу досточу́дную па́мять, зову́ще: Бо́г на́ш с на́ми, и́же си́х просла́вивый, я́коже изво́ли.
Пе́снь 7.
Ирмо́с: Спасы́й во огни́ Авраа́мския твоя́ о́троки, и халде́и уби́в, я́же пра́вда пра́ведно уловля́ше: препе́тый Го́споди Бо́же оте́ц на́ших, благослове́н еси́.
Иму́ще о́чи серде́чныя, ко спаса́ющему Бо́гу же и Царю́, а́гницы Христо́вы внидо́ша ко вся́ческим злоко́зненным полко́м, и победи́ша му́жески, вопию́ще: благослове́н Бо́г оте́ц на́ших.
Все́ жела́ние стяжа́вше му́ченицы, ко еди́ному Влады́це, жите́йския красоты́ я́ко со́н вмени́сте, вопию́ще: благослове́н Бо́г оте́ц на́ших.
Да не уны́ем, се́ отве́рзеся черто́г, но па́че ста́нем му́жески: Христо́с бо венцы́ простира́ет, и теле́с свои́х не пощади́м, вопия́ху до́блия му́ченицы на суди́щи.
Богоро́дичен: Благослове́н пло́д благослове́ннаго чре́ва Твоего́ Чи́стая: Его́же благословя́т небе́сныя си́лы и челове́честии собо́ри, изба́вльшаго на́с от пе́рвыя кля́твы, Благослове́нная.
Пе́снь 8.
Ирмо́с: О́троки благочести́выя в пещи́ рождество́ Богоро́дичо спасло́ е́сть: тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти тебе́: Го́спода по́йте дела́, и превозноси́те его́ во вся́ ве́ки.
Во све́тлыя оде́жды себе́ кро́вию муче́ния оде́ясте, совле́кшеся вои́стинну истле́вшаго грехи́ челове́ка, воспева́юще: Го́спода по́йте дела́, и превозноси́те его́ во ве́ки.
Бога́таго све́та светоли́тии, со́лнца мы́сленнаго Боже́ственными светлостьми́, му́ченицы прехва́льнии, но́щь преидо́сте безбо́жия, пою́ще во еди́нстве души́: Го́спода воспева́йте дела́, и превозноси́те его́ во ве́ки.
Я́ко а́гницы, и я́ко нескве́рныя ю́ницы, я́ко Бо́жия голуби́цы, я́ко самово́льныя же́ртвы, принесо́стеся му́ченицы зижди́телю, я́ко же́ртва непоро́чная, согла́сно пою́ще: Го́спода по́йте дела́, и превозноси́те его́ во ве́ки.
Богоро́дичен: Во сле́д Тебе́ теко́ша жены́ страстоте́рпицы, ми́ра благоуха́ннаго жела́юще, пречи́стая Богоневе́сто, еди́на неискусобра́чная, возсия́вшаго из чре́ва Твоего́, единоча́даго Твоего́ Сы́на, и с тобо́ю ца́рствуют вои́стинну песносло́вяще Христа́ во ве́ки.
Пе́снь 9.
Ирмо́с: Е́ва у́бо неду́гом преслуша́ния кля́тву всели́ла е́сть: ты́ же Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.
Подава́ют исцеле́ния ка́пли тре́бующым, я́ко от исто́чника пресла́вныя му́ченицы, утоля́ют стра́сти боле́зненныя, и бесо́в прогоня́ют полки́: сердца́ же Боголюби́вых напоя́ют на благопло́дие Бо́жиих де́л.
Вознесо́стеся, кре́пость на враги́ прии́мше, и а́нгелом уподо́бистеся, дре́ва живо́тнаго наслажда́етеся невозбра́нно в раи́, Богоневе́стныя, исто́чника до́брых прия́сте, о ми́ре моля́щеся.
Па́мять ва́шу страстоте́рпицы, Боже́ственными сия́ющи светови́дными благода́тьми, помышле́ние просвеща́ет похваля́ющих ва́с.
Богоро́дичен: Прему́дрости селе́ние, па́че ума́ лу́чши показа́лася еси́, Де́во непоро́чная, одушевле́н же Престо́л и две́рь: те́мже я́ко Цари́цу Тя́ жены́ возлюби́ша, Де́вы во сле́д Тебе́ приведо́шася.
Свети́лен.
Ви́дети жела́юще добро́ту Жениха́ все́м о́бразом, ма́нием к нему́ Богоно́снии, безсме́ртию поучи́стеся в ме́ртвеннем телеси́: те́м досто́йно ублажа́етеся.
Богоро́дичен: Пощади́ мя, Христе́, егда́ хо́щеши ми́ру суди́ти со сла́вою, разори́ мглу́ страсте́й мои́х, моли́твами ро́ждшия Тя́, и честны́х му́чениц Твои́х, я́ко бла́г и многоми́лостив.
На хвали́тех стихи́ры, гла́с 4.
Подо́бен: Я́ко до́бля:
Обагре́нии кро́вными себе́ украси́вше, ꙳ кра́сному добро́тою де́вы отрокови́цы ꙳ нетле́нно совокупи́стеся, ꙳ Христу́ Бо́гу на́шему, ꙳ соблюда́ющему ва́ше де́вство ꙳ нескве́рненно в безсме́ртном нетле́ния неве́стнице, ꙳ во оби́телех небе́сных, в черто́зе нерукотворе́ннем, му́ченицы прехва́льнии. [Два́жды.]
Несоверше́нными у́бо телесы́, ꙳ и соверше́нным умо́м, ꙳ ве́тхаго зми́я злонача́льнаго победи́сте сла́внии ꙳ си́лою ду́ха, ꙳ и не́мощну того́ кре́пость показа́сте, ꙳ те́м восприя́сте венцы́ побе́ды, ꙳ му́ченицы прехва́льнии, ꙳ Тро́ицы побо́рницы.
И на у́ды раздробля́еми, ꙳ и огне́м снеда́еми, ꙳ и желе́зными ногты́ терза́еми, ꙳ и на дре́ве пове́шаеми, ꙳ и мече́м ссека́еми, не отверго́стеся Христа́ страстоте́рпицы прехва́льнии. ꙳ Те́мже прия́сте вене́ц побе́ды, ꙳ вели́цыи му́ченицы пребога́тии, ꙳ Тро́ицы побо́рницы.
Сла́ва, гла́с 2:
Житие́ нескве́рное пожи́вше, суди́ще безбо́жное низложи́вше, ста́сте побе́ду нося́ще честни́и, цве́т нося́ще Бо́жию све́тлость, и в Бо́жию си́лу облече́ни, повеле́нию мучи́телеву поруга́стеся, и вити́йския буесло́вныя глаго́лы оплева́сте, му́ченицы Богому́дрии.
И ны́не, Богоро́дичен:
Все́ упова́ние мое́ на Тя́ возлага́ю, Ма́ти Бо́жия, сохрани́ мя под кро́вом Твои́м.
Крестобогоро́дичен: Егда́ нескве́рная А́гница ви́де своего́ А́гнца, на заколе́ние я́ко челове́ка во́лею влеко́ма, рыда́ющи глаго́лаше: безча́дствовати Мя́ ны́не тщи́шися, Христе́, Тебе́ ро́ждшую, что́ сие́ сотвори́л еси́ изба́вителю вся́ческих оба́че воспева́ю и сла́влю Твою́, ю́же па́че ума́ и сло́ва кра́йнюю бла́гость Человеколю́бче.
А́ще и́мать на стихо́вне Сла́ву, глаго́ли вече́рний.
И ны́не, Богоро́дичен, или́ Крестобогоро́дичен.