[Глава 2] Слу́жба о́бща пра́здником Богоро́дичным

Ве́чер, на Го́споди воззва́х стихи́ры, гла́с 4.

Подо́бен: Да́л еси́ зна́мение:

Боже́ственными де́тельми соблюда́ющи и покрыва́ющи ꙳ от вра́жиих нахожде́ний, любо́вию пра́зднующыя пресла́вное Твое́ и́мярек, ꙳ зову́щыя Ти́: ꙳ Ты́ еси́ кре́пость на́ша и утвержде́ние, ꙳ и ра́дование Боголе́пное еди́н Сы́н Тво́й и Бо́г на́ш, ꙳ Ему́же покланя́ющеся глаго́лем: ꙳ Иису́се всеси́льне, ꙳ спаси́ ду́шы на́ша, я́ко милосе́рд.

Дне́сь свяще́нно собра́вшеся похва́лим Богоро́дицу: ꙳ Пресвята́я Де́во, ꙳ мно́гая Твоя́ вели́чия и чуде́с пучи́на: ꙳ Ты́ бо еси́ на́м свято́е огражде́ние ꙳ и похвала́ и сла́ва ꙳ и исто́чник исцеле́ния ꙳ пра́зднующих свято́е Твое́ и́мярек, ꙳ мо́лимся глаго́люще: ꙳ Иису́се всеси́льне, ꙳ спаси́ ду́шы на́ша, я́ко милосе́рд.

Благочести́вно, Пречи́стая, ꙳ честны́ми Твои́ми моли́твами ꙳ огради́ и сохрани́ ꙳ и стра́шны враго́м и нерабо́тны яви́, ꙳ творя́щыя пра́зднество Твое́ и́мярек, ꙳ да Сы́ну Твоему́ зове́м: ꙳ Иису́се всеси́льне, ꙳ спаси́ на́с, я́ко милосе́рд.

Сла́ва, и ны́не, гла́с 6:

Я́ко венце́м пресве́тлым, пречи́стая Богоро́дице, и́мярек, це́рковь Бо́жия обложи́ся, и све́тится ра́дующися, дне́сь та́йно лику́ет вопию́щи тебе́, Влады́чице: ра́дуйся, диади́мо честна́я и ве́нче Боже́ственныя сла́вы. Ра́дуйся, Еди́на сла́вы исполне́ние, и ве́чное весе́лие. Ра́дуйся, к Тебе́ прибега́ющым приста́нище, предста́тельнице и спасе́ние ду́ш на́ших.

Вхо́д. Проки́мен дне́.

Бытия́ чте́ние. [Глава́ 28].

Изы́де Иа́ков от студенца́ кля́твеннаго, и и́де в Харра́нь, И обре́те ме́сто, и спа́ та́мо. За́йде бо со́лнце, и взя́т от ка́мения ме́ста того́, и положи́ возгла́вие себе́, и спа́ на ме́сте о́ном: и со́н ви́де. И се́ ле́ствица утвержде́на на земли́, ея́же глава́ досяза́ше до небе́с, и А́нгели Бо́жии восхожда́ху и низхожда́ху по не́й. Госпо́дь же утвержда́шеся на не́й, и рече́: Аз Бо́г Авраа́мов отца́ твоего́, и Бо́г Исаа́ков, не бо́йся: земля́, иде́же ты́ спи́ши на не́й, тебе́ да́м ю́, и се́мени твоему́. И бу́дет се́мя твое́ я́ко песо́к земны́й, и распространи́тся на мо́ре, и ли́ву, и се́вер и на восто́ки, и возблагословя́тся о тебе́ вся́ коле́на земна́я, и о се́мени твое́м. И се́ Аз с тобо́ю сохраня́яй тя́ на вся́ком пути́, а́може а́ще по́йдеши. И возвращу́ тя́ в зе́млю сию́, я́ко не и́мам тебе́ оста́вити, до́ндеже сотвори́ти Ми́ вся́, ели́ка глаго́лах тебе́. И воста́ Иа́ков от сна́ своего́, и рече́: я́ко е́сть Госпо́дь на ме́сте се́м, а́з же не ве́дех. И убоя́ся, и рече́: я́ко стра́шно ме́сто сие́, не́сть сие́, но до́м Бо́жий, и сия́ врата́ Небе́сная.

Проро́чества Иезеки́илева чте́ние. [Главы́ 43 и 44].

Та́ко глаго́лет Госпо́дь: бу́дет от дне́ осма́го и про́чее, сотворя́т иере́и на олтари́ всесожже́ния ва́шего, и я́же спасе́ния ва́шего, и прииму́ вы́, глаго́лет Адонаи́ Госпо́дь. И обрати́ мя на пу́ть вра́т святы́х вне́шних, зря́щих на восто́ки, и сия́ бя́ху затворе́на. И рече́ Госпо́дь ко мне́: врата́ сия́ затворе́на бу́дут, и не отве́рзутся, и никто́же про́йдет сквозе́ и́х, я́ко Госпо́дь Бо́г Изра́илев про́йдет и́ми, и бу́дут затворе́на. Я́ко игу́мен ся́дет в ни́х сне́сти хле́б, по пути́ Ела́мских вра́т вни́дет, и по пути́ его́ изы́дет. И введе́ мя по пути́ вра́т святы́х су́щих к се́веру, пря́мо хра́му, и ви́дех, и се́ испо́лнь сла́вы хра́м Госпо́день.

При́тчей чте́ние. [Глава́ 9].

Прему́дрость созда́ Себе́ до́м, и утверди́ столпо́в се́дмь. Закла́ Своя́ же́ртвенная, и раствори́ в ча́ши свое́й вино́, и угото́ва Свою́ трапе́зу. Посла́ Своя́ рабы́, созыва́ющи с высо́ким пропове́данием на ча́шу, глаго́лющи: И́же е́сть безу́мен, да уклони́тся ко Мне́. И тре́бующым ума́ рече́: Прииди́те, яди́те Мо́й хле́б, и пи́йте вино́, е́же раствори́х ва́м. Оста́вите безу́мие, и жи́ви бу́дете, и взыщи́те ра́зума, да поживете́ и испра́вите ра́зум в ве́дении. Наказу́яй злы́я, прии́мет себе́ безче́стие: облича́яй же нечести́ваго опоро́чит себе́. Обличе́ния бо нечести́вому ра́ны ему́. Не облича́й злы́х, да не возненави́дят тебе́: облича́й прему́дра, и возлю́бит тя́. Да́ждь прему́дрому вину́, и прему́дрший бу́дет: сказу́й пра́ведному, и приложи́т приима́ти. Нача́ло прему́дрости стра́х Госпо́день, и сове́т святы́х ра́зум. Разуме́ти бо зако́н по́мысла е́сть блага́го: си́м бо о́бразом мно́гое поживе́ши вре́мя, и приложа́тся тебе́ ле́та живота́.

На стихо́вне стихи́ры, гла́с 3:

Прииди́те, вси́ концы́ земли́, честно́е и́мярек Бо́жия Ма́тере ублажи́м: и́бо ру́це к Сы́ну возде́ющи мо́лится, те́мже святы́м и́мярек Ея́ ми́р оживле́н бы́сть: псалмы́ и пе́ньми и пе́сньми духо́вными, со все́ми святы́ми пра́зднуем све́тло.

Сти́х: Приведу́тся Царю́ де́вы в сле́д Ея́: и и́скренния Ея́ приведу́тся Тебе́.

Вельми́ добро́тою украси́ Тя́ Бо́г, я́ко в челове́цех Све́т на руку́ Твое́ю, я́же еди́на во Све́те Его́, упова́ние Христиа́ном, помо́щница су́щым в ну́ждах и ско́рбех, и приста́нище в пучи́не тружда́ющымся: моли́ изба́витися от напа́стей, любо́вию пою́щым и́мярек Твое́ всечестно́е.

Сти́х: Слы́ши, Дщи́, и ви́ждь, и приклони́ у́хо Твое́.

Всечестно́е Твое́ и́мярек, пресвята́я Де́во Чи́стая, а́нгел мно́жество на небесе́х, и челове́ческий ро́д на земли́ блажи́т: я́ко Ма́ти бы́сть творца́ все́х Христа́ Бо́га. Того́ моля́щи за ны́ не преста́й мо́лим Тя́, и́же на Тя́ с Бо́гом упова́ние возложи́хом, Богоро́дице препе́тая и неискусобра́чная.

Сла́ва, и ны́не, гла́с 2:

Мы́сли очи́стивше и у́м, со А́нгелы и мы́ торжеству́ем све́тло, начина́юще Дави́дскую пе́снь отрокови́це неве́сте все́х Царя́ Христа́ Бо́га на́шего: воскресни́, Го́споди, глаго́люще, в поко́й тво́й, Ты́, и киво́т святы́ни Твоея́, я́коже пала́ту красну́ сию́ украси́л еси́, и приче́л еси́ ю́ гра́ду твоему́, Влады́ко, стро́ити и покрыва́ти от сопоста́тных пога́н держа́вною си́лою, тоя́ моли́твами.

Тропа́рь пра́зднику, во уста́ве.

А́ще ли не́сть уста́ва, глаго́ли се́й тропа́рь, гла́с 4:

К Богоро́дице приле́жно ны́не притеце́м, гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́, на ны́ милосе́рдовавши: потщи́ся, погиба́ем от мно́жества прегреше́ний: не отврати́ Твоя́ рабы́ тщы́, Тя́ бо и еди́ну наде́жду и́мамы.

Сла́ва, и ны́не:

Не умолчи́м никогда́, Богоро́дице, си́лы Твоя́ глаго́лати недосто́йнии: а́ще бо Ты́ не бы́ предстоя́ла моля́щи, кто́ бы на́с изба́вил от толи́ких бе́д? Кто́ же бы сохрани́л до ны́не свобо́дны? Не отсту́пим, Влады́чице, от Тебе́, Твоя́ бо рабы́ спаса́еши при́сно от вся́ких лю́тых.

На у́трени,

на Бо́г Госпо́дь: тропа́рь два́жды.

Сла́ва, и ны́не: Не умолчи́м никогда́: еди́ножды.

По 1-й кафи́сме седа́лен, гла́с 4.

Подо́бен: Яви́лся еси́ дне́сь:

Заря́ми просия́ всеми́рная ра́дость и́мярек Твоего́, Де́во Ма́ти Мари́е: на земли́ просвети́ мы́сли любо́вию пою́щих Тя́.

Сла́ва, и ны́не: то́йже.

По 2-й кафи́сме седа́лен, гла́с 4.

Подо́бен: Удиви́ся:

Де́ва Мари́а Богоро́дица вои́стинну, я́ко о́блак све́тлый на́м возсия́. Ктому́ Ада́м не осужда́ется, и Е́ва от у́з свободи́ся, сего́ ра́ди и мы́ зове́м, вопию́ще с дерзнове́нием еди́ней чи́стей: Пресвята́я Де́во, моли́ Сы́на Твоего́, пода́ти грехо́в оставле́ние.

Сла́ва, и ны́не, то́йже.

По Хвали́те и́мя Госпо́дне: Припе́в:

Пе́снь вся́ку духо́вную принесе́м Богоро́дице.

Псало́м избра́нный: Помяни́, Го́споди, Дави́да, и всю́ кро́тость его́:

По полиеле́и седа́лен, гла́с 1.

Подо́бен: А́нгельския си́лы:

Де́вческаго Твоего́ чре́ва кра́сен кла́с я́влься, израсти́ла бо еси́ ми́рови жи́знь, сего́ ра́ди си́лы небе́сныя вопию́т Тебе́, Богоро́дице, сла́вяще честно́е Твое́ пра́зднество, Пречи́стая: сла́ва и́мярек Твоему́: сла́ва де́вству Твоему́, Ма́ти Безневе́стная.

Сла́ва, и ны́не: то́йже.

Степе́нна, 1-й антифо́н 4-го гла́са.

Проки́мен, гла́с 4:

Помяну́ и́мя Твое́ во вся́ком ро́де и ро́де.

Сти́х: Отры́гну се́рдце мое́ сло́во бла́го, глаго́лю а́з дела́ моя́ Царе́ви.

Вся́кое дыха́ние:

Ева́нгелие пи́сано в конце́ кни́ги сея́.

По 50-м псалме́ стихи́ра, гла́с 6:

Дне́сь небе́сная врата́ отверза́ются, и две́рь Боже́ственная предгряде́т. Дне́сь ра́дости благода́ть начина́ется, явля́ющи ми́рови и́мярек Бо́жия Ма́тере: Е́юже земна́я с небе́сными совокупля́ются, во спасе́ние душа́м на́шым.

Кано́н пресвяте́й Богоро́дице, гла́с 8.

Ирмосы́ по два́жды: тропари́ на 12.

Пе́снь 1.

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Бо́жиею си́лою благоче́стно укрепи́ мя, ра́достно пе́ти и́мярек Твое́, Пречи́стая, заступле́ние гра́ду Твоему́ и все́м лю́дем Твои́м держа́ву неразруши́му, Пресвята́я, и ста́ду Твоему́ утвержде́ние.

Благосты́ню и ми́лость почерпа́ем Твои́ми моли́твами: Ты́ бо Бо́га си́льнаго родила́ еси́, спаса́ющаго вся́ благове́рныя моле́нием Твои́м, Пренепоро́чная. Его́же ра́ди Тя́ ублажа́ем вси́, Влады́чице.

Твое́ Боже́ственное и́мярек пра́зднующе, Пречи́стая Богоро́дице, Тобо́ю спасе́ние нетле́нно дарова́ся, и неразруши́мо весе́лие и наде́жда, покро́в и держа́ва, и душа́м на́шым прибе́жище.

Под Тво́й кро́в притека́ем, Влады́чице, лю́дие Твои́, Пренепоро́чная, помо́щница бу́ди на́м рабо́м Твои́м, и спасе́нию проше́ние подаю́щи, любо́вию пою́щым Тя́.

Катава́сиа: Отве́рзу уста́ моя́:

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й жела́ний кра́ю, ве́рных утвержде́ние, Еди́не Человеколю́бче.

Ве́рою сердца́ обнови́м и́мярек святы́я Богоро́дицы, все́м подава́я ве́рою прося́щым избавле́ния, от вра́г ви́димых и неви́димых на́с соблюди́, Пречи́стая.

Освяща́еши благоче́стно, ве́рно притека́ющих ко хра́му Твоему́, и припа́дающих любо́вию и́мярек твоему́: изба́ви на́с от вся́ких бе́д, и ми́лостива сотвори́ на́м Сы́на Твоего́ и Бо́га на́шего.

Из тебе́ Бо́жию сло́ву вопло́щшуся, и до́м сотвори́ себе́ во святе́м чре́ве Твое́м, и изво́ли роди́тися, я́коже восхоте́, и дарова́ на́м де́нь ви́дети Твоего́ и́мярек, то́же любо́вию пра́зднующе, мо́лимся Ти́.

Ра́достными душа́ми, и в весе́лии се́рдца прии́мше у́м к Твоему́ честно́му и Боже́ственному и́мярек и вси́ ве́рнии мо́лим Тя́, Богоро́дице, я́ко пречи́стому Сы́ну Твоему́ млеко́ подала́ еси́, и́же на́с пита́вый ми́лостию свое́ю.

Седа́лен, гла́с 4:

Це́рковь Твоя́ све́тло пра́зднует Твоего́ сла́внаго и́мярек, и вси́ ве́рнии, пою́ще зове́м Ти́ приле́жно, чи́стая Де́во: вся́ ве́рныя укрепи́ на вра́жия си́лу, и сове́ты беззако́нных разори́, и живо́т на́ш напра́ви, твори́ти Боже́ственную во́лю Сы́на Твоего́.

Сла́ва, и ны́не, то́йже.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Ты́ у́бо, Де́во чи́стая, к све́ту незаходи́мому прише́дши помяни́ на́с, моля́щи Сы́на Твоего́ и Бо́га на́шего, Твое́ честно́е и́мярек пра́зднующих, пода́ти грехо́в оставле́ние.

Я́коже со́лнце светоза́рное, и́бо преходя́щи сия́ет, и Тво́й Боже́ственный пра́здник лучы́ испуща́ет: страсте́й же мглу́ от на́с отгоня́я, да́рует душа́м на́шым очище́ние, и от бе́д свобожде́ние.

Ны́не мра́к зло́бный потреби́ся, и со́лнечный и душе́вный све́т возсия́, всенепоро́чныя Бо́жия Ма́тере, пра́здник честна́го и́мярек, его́же благоче́стно пра́зднуем.

Прибе́жище вели́кое и похвала́, Пречи́стая и Пренепоро́чная Ма́ти Всепе́тая: Ты́ киво́т у́мныя святы́ни, Ты́ целе́б исто́чник неисчерпа́емый, чту́щым Твое́ честно́е и́мярек.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тьма́ окая́ннаго, но обрати́ мя, и к све́ту за́поведей Твои́х пути́ моя́ напра́ви, молю́ся.

Исполня́ется святы́ни вся́ческая, к Тебе́ прибега́ющым и проще́ние, ве́рнии, прие́млюще, пра́зднуем Твое́ честно́е и́мярек, в не́мже мо́лим Тя́, пода́ти на́м благода́ть и ми́лость в де́нь су́дный.

Украси́лася еси́ де́вства чистото́ю, ро́ждшая кра́снаго Сы́на Твоего́ и Бо́га на́шего: украси́ Тво́й пра́здник честна́го и́мярек, и свяще́ннический чи́н возвесели́, и лю́ди Твоя́ от вся́ких бе́д свободи́.

Я́ко други́й ра́й все́м познава́ется, стяжа́вый посреде́ благоуха́ния цве́т, Тво́й честны́й пра́здник, Бо́жиим благоуха́нием ве́рных сердца́ исполня́ет, и́же любо́вию чту́щих Тя́, пренепоро́чная Влады́чице.

О́блак была́ еси́, Де́во, дождю́ Бо́жию, пренепоро́чная Влады́чице, во́ду спаси́тельную испуща́ющи, зе́млю грехми́ изсо́хшую напои́вши, приводя́щи пло́д творе́нию доброде́тели: сего́ ра́ди ублажа́ем Тя́.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Пре́жде все́х ве́к Су́щаго, я́ко Отроча́ родила́ еси́, и на́ша сердца́ обнови́ла еси́, мно́гими грехи́ обетша́вшая: и обновле́ние приими́ на́шего пе́ния, принося́щее Твоему́ пра́зднику, Богоро́дице Присноде́во.

Це́рковь Твоя́ Свята́я, и ди́вна впра́вду е́сть, е́же Твое́ Пречи́стое и́мярек в не́й благоче́стно пра́зднуем, и все́м серде́чная подава́еши исцеле́ния, блажа́щым Тя́, Пречи́стая, и от вся́ких бе́д соблюди́ рабы́ Твоя́.

Душа́ вся́ка весели́тся, соше́дшеся в це́рковь Твою́, и Тво́й пра́зднуем пра́здник пою́ще, Де́во Богоро́дице, честно́е и́мярек Твое́, я́ко со́лнце светя́щееся, и све́та сия́ющее Бо́жия Ду́ха благода́тию, и на́с озари́, и просвети́ сердца́ на́ша, Де́во Ма́ти Влады́чице.

Пое́м пречи́стое Твое́ и́мярек, и чти́м Непоро́чное Твое́ зача́тие, и Рождество́ Твое́, Богоневе́сто Отрокови́це: сла́вят же с на́ми а́нгельстии чи́нове, и все́х святы́х ли́кове.

Та́же конда́к прилучи́вшагося пра́здника.

А́ще ли не́сть, глаго́ли се́й конда́к, гла́с 1:

Честно́е жили́ще бы́вшее неизрече́ннаго естества́ Боже́ственнаго, вы́ше сло́ва, и па́че ума́, и гре́шным еси́ спору́чница, подава́еши благода́ть и исцеле́ние, я́ко Ма́ти все́х Ца́рствующаго: моли́ Сы́на Твоего́, получи́ти на́м ми́лость в де́нь су́дный.

И́н конда́к, гла́с 6:

Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице: Ты́ на́м помози́, на Тебе́ наде́емся, и Тобо́ю хва́лимся: Твои́ бо есмы́ раби́, да не постыди́мся.

И́кос: К Богоро́дице вопие́м любо́вию: ра́дуйся, Гра́де Госпо́день. Ра́дуйся, Ски́птре Дави́дов. Ра́дуйся, Пала́то одушевле́нная. Ра́дуйся, Ру́чко Боже́ственныя ма́нны. Ра́дуйся, Неопали́мая купино́. Ра́дуйся, Све́щниче златы́й, ра́дуйся, Свеще́ неугаси́мая. Ра́дуйся, Горо́ Бо́жия приосене́нная. Ра́дуйся, Огнено́сный Престо́ле, ра́дуйся, Ле́ствице и две́рь небе́сная. Ра́дуйся, Же́зле Ааро́нов невла́жно прозябы́й, ра́дуйся, все́х спаса́ющи от вся́ких бе́д и скорбе́й, и моли́, пречи́стая, Сы́на Твоего́ получи́ти на́м ми́лость в де́нь су́дный.

Пе́снь 7.

Ирмо́с: Бо́жия снисхожде́ния о́гнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших.

Цари́ца все́х прише́дши, небе́сный кро́в на сла́ву на́м уста́ви, Своего́ пра́здника Боже́ственнаго и́мярек, и́мже спаса́емся от неви́димых вра́г нахожде́ния, к Сы́ну Твоему́ вопию́ще: благослове́н Бо́г оте́ц на́ших.

Рождество́м Твои́м, Госпоже́ Богоро́дице Де́во, и все́ми Твои́ми пра́здники, кру́г ле́та венча́ся: и ны́не украси́ де́нь честна́го, и́мярек Твоего́, благода́ть источа́ющи, мы́ же вси́ ве́рнии во хра́м Тво́й притека́юще.

Вся́ си́лы небе́сныя восхваля́ют Ро́ждшую Го́спода, и ро́ди челове́честии прославля́ют Ю́, я́вльшую на́м де́нь честна́го Своего́ и́мярек, Прибе́жище на́ше, Наде́жда и Покро́в, и огражде́ние, от вра́жиих нахожде́ний.

Благода́тный о́блаче, окропи́ на́с свы́ше росо́ю Благода́ти и ми́лости Твоея́, чту́щих де́нь пра́здника Твоего́ сла́внаго, и́мярек, то́же пое́т и сла́вит вся́ка душа́ ра́дующися: благослове́на Ты́ в жена́х, и благослове́н пло́д чре́ва Твоего́.

Пе́снь 8.

Ирмо́с: Безнача́льнаго Царя́ сла́вы, Его́же трепе́щут небе́сныя си́лы, по́йте, свяще́нницы, лю́дие, превозноси́те во вся́ ве́ки.

Цари́ца еси́ все́х еди́на Бо́гу, Богороди́тельнице чи́стая, святы́й Престо́л и пала́та Христа́ Бо́га: Его́же моли́ о чту́щих Твое́ честно́е и́мярек, пода́ти грехо́в оставле́ние.

Рука́ми святы́ми и́стинно понесла́ еси́, в Тебе́ воплоти́вшагося Го́спода, на земли́ Пресла́вная: и ны́не возшла́ еси́ превы́ше небе́с, и оста́вльши челове́ком пресве́тлый де́нь честна́го и́мярек Твоего́, во́ньже сла́вим пою́ще: Го́спода по́йте, и превозноси́те Его́ во ве́ки.

Боже́ственнии игра́йте проро́цы, чту́ще Де́вы Богоро́дицы честно́е и́мярек: Та́ бо испо́лни все́х рече́ния, ва́ми сказу́емаго ро́ждши Христа́ все́х Царя́, то́же превозно́сим во ве́ки.

Па́дшым воста́ние, уныва́ющым ра́дование, заблу́ждшым Наста́внице, боля́щым посеще́ние и исцеле́ние, и все́м Христиа́ном Спасе́ние: соблюди́ на́с, Госпоже́, вопию́щих, и чту́щих Твое́ и́мярек, и изба́ви на́с от иноплеме́нных нахожде́ния.

Пе́снь 9.

Ирмо́с: Устраши́ся вся́к слу́х неизрече́нна Бо́жия снисхожде́ния, я́ко Вы́шний во́лею сни́де да́же и до пло́ти, от Де́вческаго чре́ва бы́в Челове́к. Те́мже Пречи́стую Богоро́дицу ве́рнии велича́ем.

Пресла́вная глаго́лашася о Тебе́, Гра́де Бо́жий, и при́сно Ца́рствующаго небе́сными и земны́ми, от Тебе́ Ро́ждшагося, и от земли́ Тя́ на Не́бо Возве́дша, Ему́же непреста́нно моли́ся о чту́щих честно́е и́мярек, с ни́мже Тя́ велича́ем.

Безпло́тных чи́нове, патриа́рх собо́р, и апо́стол Боже́ственный соста́в, проро́ческий ли́к, и му́ченичестии полцы́, святи́телей и преподо́бных оте́ц ли́ки, и вси́ святи́и, весели́теся с на́ми, пра́зднующе Бо́жия Ма́тере и́мярек и велича́юще.

Вся́ческая освяти́ла еси́ Рождество́м Твои́м, Пречи́стая Де́во, и яви́ла еси́ бо́льшее просвеще́ние, пречестны́й де́нь и́мярек Твоего́: его́же пра́зднующе, Тебе́ велича́ем.

Вознеси́ ро́г правосла́вных христиа́н, Богороди́тельнице Пречи́стая: невоева́ны соблюди́ гра́ды Твоя́, и вся́ страны́ христиа́нския сохрани́, в ни́хже вели́кое Твое́ и́мя и многосла́вное велича́ется, и ве́рно сла́вится от все́х, Влады́чице Чи́стая.

Свети́лен.

Подо́бен: Жены́ услы́шите:

Ада́ме, обнови́ся, и Е́во, весели́ся, проро́цы со апо́столы и му́ченики ликовству́йте, и преподо́бнии со святи́тели, весели́теся: и́бо ра́дость и весе́лие, а́нгелом же и челове́ком Пречи́стыя и́мярек Богоро́дицы Мари́и. [Три́жды.]

На Хвали́тех стихи́ры, гла́с 1:

Исто́чник све́та, и Пото́к све́тлости неистощи́мый, приноси́т пра́здник и́мярек Твоего́: у́бо моли́, Богоро́дице, неразу́мия тьмы́ изба́вити мя́, и страсте́й душе́вных же и теле́сных, и в бу́дущем ве́це безконе́чныя му́ки изба́ви на́с, [Два́жды.]

Исто́чника прему́дрости благи́я, ра́зума же пучи́ну и благода́ти: те́м Тя́ бе́здну Ипоста́сная Бо́жия Прему́дрость, Богоро́дице, показа́ пра́здник и́мярек из Тебе́ пло́тию рожде́йся. Его́же ра́ди ка́плю ми́ прему́дрости Твоея́ и ра́зума пода́ждь, и к жи́зни наста́ви мя́.

Нача́ло та́йных Христо́вых чуде́с, Влады́чице, стра́шну ви́девше глави́зну, честно́е исполне́ние честна́го Твоего́ о́браза пра́здник и́мярек и Боже́ственных чуде́с, почита́ем и покланя́емся: от боле́зней и скорбе́й посети́, наста́внице, и бу́дущаго, Богоро́дице, изба́ви на́с муче́ния.

Сла́ва, и ны́не, гла́с 8:

Богоро́дицу Мари́ю вси́ воспои́м: ра́дуйся, Ма́ти Бо́жия, ра́дуйся, Ле́ствице одушевле́нная и разу́мная. Ра́дуйся, Купино́ неопали́мая. Ра́дуйся, Ста́мно всесвята́я. Ра́дуйся, Цве́те ве́ры. Ра́дуйся, Же́зле прозя́бший, ра́дуйся, Злата́я кади́льнице. Ра́дуйся, Горо́ Бо́жия присе́нная Де́во. Ра́дуйся, Разреше́ние пе́рвыя Е́вы. Ра́дуйся, Престо́ле Бо́жий. Ра́дуйся, Многоми́лостивная красото́. Ра́дуйся, Влады́чице.

Славосло́вие вели́кое, и отпу́ст.